Zaj Txuas Tom Kawg 2: Vajtswv Tswj Fwm Tag Nrho Noob Neej Txoj Hmoo

Peb ua neeg nyob thiab yog cov Ntseeg Vajtswv tiag, nws yog peb tes dej num thiab kev lav ris los muab peb lub cev thiab lub siab fij rau kev ua Vajtswv tes hauj lwm kom tiav hlo, vim tag nrho peb lub neej txoj sia yog tshwm sim los ntawm Vajtswv, thiab tshwm sim los vim yog muaj Vajtswv lub hwj chim kav. Yog hais tias tsis yog muab peb lub cev thiab lub siab los cob ua Vajtswv tes hauj lwm thiab los tsim kev ncaj ncees rau tib neeg, ces peb tus ntsujplig yuav txaj muag rau ntawm cov uas tau siv txoj sia los pua kev ua Vajtswv tes hauj lwm ntawd lub xub ntiag, thiab haj yam txaj muag rau ntawm Vajtswv lub xub ntiag, tus uas muab txhua yam rau peb.

Vajtswv tsim lub ntiaj teb no, Nws tsim cov tib neeg no thiab, dhau qhov ntawd, Nws yog tus kws qhia tsim haiv neeg Kili tej kev cai thaum ub thiab tib neeg tej kev vam meej. Tsuas yog Vajtswv xwb thiaj li nplig tib neeg, thiab tsuas yog Vajtswv xwb thiaj li saib xyuas tib neeg nruab hnub hmo ntuj. Tib neeg txoj kev loj hlob thiab kev nce qib yeej cais tsis tau tawm ntawm Vajtswv lub hwj chim kav li, thiab tib neeg qhov keeb kwm thiab tib neeg lub neej pem suab yuav khiav tsis dim tej kev npaj tseg uas Vajtswv ob txhais tes tsim. Yog tias koj yog ib tug Ntseeg Vajtswv tiag, ces koj yeej yuav ntseeg hais tias ib lub teb chaws twg los sis ib haiv neeg twg yuav poob rau hauv Vajtswv tej kev npaj tseg. Vajtswv ib leeg nkaus xwb thiaj paub txog tej xwm txheej yuav tshwm sim tom ntej rau ib lub teb chaws los sis ib haiv neeg twg, thiab Vajtswv xwb thiaj li tswj tau tib neeg txoj kev taug. Yog tib neeg xav tau txoj hmoo zoo, yog ib lub teb chaws xav kom muaj tej xwm txheej zoo, ces tib neeg yuav tsum nyo hau pe hawm Vajtswv, thiab los rau ntawm Vajtswv xub ntiag los hloov siab thiab lees txim rau ntawm Nws, tsis li ntawd ces tib neeg txoj hmoo thiab txoj hau kev kawg ces yuav zam tsis dhau kev puas tsuaj li.

Tig rov mus saib lub sij hawm thaum uas Nau-a tsim ua lub nkoj: Tib neeg mas qias vuab tsuab dhau lawm, cov neeg ntawd tau plam ntawm Vajtswv tej koob hmoov, tsis tau txais kev saib xyuas los ntawm Vajtswv lawm, thiab ua Vajtswv tej kev cog lus ploj tag lawm. Lawv ua neej nrog txoj kev tsaus ntuj, yam tsis muaj Vajtswv lub teeb ci rau. Ces lawv txawm tig coj tus yeeb yam lwj liam thiab muab lawv tus kheej tso pov tseg rau hauv txoj kev phem kev qias. Cov neeg zoo li ntawd ces yuav tsis tau txais Vajtswv tej lus cog tseg ntxiv lawm; lawv tsis zoo yuav los ntsib Vajtswv los sis hnov Vajtswv lub suab, vim lawv tau muab Vajtswv tso pov tseg lawm, muab txhua yam uas Nws muab rau lawv cuam pov tseg lawm, thiab hnov qab Vajtswv tej lus qhia lawm. Lawv lub siab tau plam mus deb zuj zus ntawm Vajtswv thiab, thaum ua li ntawd, ces lawv tau ua neeg phem yam tsis muaj qab hau thiab tsis xws li neeg li lawm thiab phem zuj zum tuaj lawm. Ces lawv mus ze zuj zus rau txoj kev tuag thiab poob rau Vajtswv txoj kev chim siab thiab kev rau txim. Tsuas yog Nau-a thiaj li hwm Vajtswv thiab zam kev phem xwb, thiab ces nws thiaj muaj cuab kav hnov Vajtswv lub suab thiab hnov Nws tej lus qhia. Nws tsim ua lub nkoj raws nraim li Vajtswv cov lus qhia, thiab sau tag nrho txhua yam tshiaj txhu los rau hauv. Thiab ua li no ces, thaum npaj txhua yam tiav tag lawm, ces Vajtswv mam tso Nws tej kev puas ntsoog los rau lub ntiaj teb. Tsuas yog Nau-a thiab xya leej hauv nws tsev neeg thiaj dim qhov kev puas ntsoog no xwb, vim yog Nau-a teev hawm Yehauvas thiab zam kev phem.

Tam sim no tig rov los saib tiam tam sim no: Cov neeg ncaj ncees li Nau-a, tus uas hwm Vajtswv thiab zam kev phem, ces yeej tsis muaj ntxiv lawm. Tab sis Vajtswv yeej tseem hlub tib neeg thiab tseem zam txim rau lawv nyob rau tiam kawg no. Vajtswv nrhiav cov uas tos ntsoov kom Nws tshwm sim. Nws nrhiav cov uas muaj cuab kav hnov Nws cov lus, cov uas tseem tsis tau hnov qab Nws tes hauj lwm thiab muab lawv lub siab thiab lub cev cob fim rau Nws. Nws nrhiav cov uas zwm rau Nws npaum li tej me nyuam yaus zwm rau ntawm Nws lub xub ntiag thiab tsis tawm tsam Nws. Yog koj muab koj tus kheej zwm rau Vajtswv, yam tsis muaj ib qho hwj huaj los sis ib lub zog dab tsi los cuam tshuam tau li, ces Vajtswv yeej yuav saib xyuas koj thiab foom Nws tej koob hmoov rau koj. Yog tias koj yog ib tug muaj meej mom, muaj koob nrov npe, muaj kev txawj ntse, muaj txiag nplua nuj, thiab muaj neeg coob txhawb nqa, tab sis tej yam no tsis txwv txiav koj kom txhob los rau ntawm Vajtswv lub xub ntiag los txais qhov Nws hu thiab Nws cov lus txib thiab los ua yam uas Vajtswv hais kom koj ua, ces txhua yam uas koj ua ntawd yuav yog qhov muaj qab hau tshaj plaws nyob rau hauv lub ntiaj teb thiab qhov dej num ncaj ncees tshaj plaws ntawm tib neeg. Yog koj tsis kam txais yuav Vajtswv tej kev txib kev khaiv vim koj lub meej mom thiab koj tus kheej tej hom phiaj xwb, ces txhua yam koj ua ntawd yuav raug foom phem thiab Vajtswv tsis nyiam kiag li. Tej zaum mas koj yog ib tug thawj pwm tsav, ib tug kws tshawb fawb muaj txuj ntau, ib tug xib fwb, los sis ib tug txwj laug, tab sis tsis hais koj tes dej num yuav siab npaum twg li, yog koj tsuas siv koj tej kev txawj ntse thiab koj lub peev xwm los ua koj tej dej num ntawd xwb, ces koj yeej yuav ua tsis tiav li thiab tsis tau txais Vajtswv tej koob hmoov li, vim Vajtswv tsis txais yuav ib yam dab tsi uas koj ua li, thiab Nws yuav tsis xam tias tej koj ua ntawd yuav yog ib qho uas ncaj ncees, los sis txais yuav tias koj ua dej num pab rau tib neeg. Nws yuav hais tias txhua yam koj ua ntawd yog siv txoj kev paub thiab tib neeg lub zog los yuam Vajtswv txoj kev tiv thaiv tawm ntawm tib neeg mus, hais tias qhov ntawd yog tsis lees yuav Vajtswv tej koob hmoov xwb. Nws yuav hais tias koj tab tom coj tib neeg mus rau txoj kev tsaus ntuj, mus rau txoj kev tuag, thiab mus rau kev pib ua lub neej yam tsis muaj chaw xaus uas tib neeg tau plam Vajtswv thiab Nws tej koob hmoov lawm.

Txij thaum tib neeg tsim tau kev kawm txog tib neeg txoj kev ua neej, tib neeg lub siab ces tsuas muaj kev tshawb fawb nrhiav txuj thiab kev txawj ntse nkaus xwb. Kev kawm tshawb nrhiav txuj thiab kev txawj ntse thiaj li dhau los mus ua tej cuab yeej siv los kav tib neeg, ces thiaj tsis muaj chaw txaus rau tib neeg los teev hawm Vajtswv, thiab tsis muaj ib yam dab tsi zoo rau kev teev hawm Vajtswv lawm. Vajtswv qhov chaw nyob hauv neeg lub siab haj yam poob qis lawm. Yog tsis muaj Vajtswv nyob hauv lawv lub siab, ces hauv tib neeg nruab siab yuav tsaus ntuj nti, tsis muaj kev cia siab thiab khoob lug tsis muaj dab tsi li. Tom qab ntawd muaj coob tus neeg tshawb fawb txog tib neeg txoj kev ua neej, neeg sau keeb kwm, thiab neeg ua nom ua tswv tau tawm los piav txog lawv tej kev tshawb xav txog tib neeg tej kev ua neej, kev tshawb xav txog tib neeg txoj kev hloov, thiab lwm yam kev tshawb xav uas tsis zoo xws li qhov tseeb tias Vajtswv yog tus tsim tib neeg ntawd, coj los mus hliv puv nkaus tib neeg lub siab thiab txoj kev xav. Thiab nyob rau qhov no, cov uas ntseeg tias Vajtswv yog tus tsim txhua yam ces muaj tsawg zuj zus lawm xwb, thiab cov uas ntseeg kev tshawb xav txog tib neeg txoj kev hloov ntawd mas muaj coob zuj zus tuaj. Neeg coob zuj zus xav tias tej ntaub ntawv teev tseg txog Vajtswv tej hauj lwm thiab Nws tej lus thaum ub nyob rau lub sij hawm hauv Vajluskub Qub ntawd tsuas yog dab neeg thiab kwv huam lawm xwb. Nyob hauv lawv lub siab, lawv tsis quav ntsej txog Vajtswv lub meej mom thiab txoj kev zoo, rau qhov kev muaj Vajtswv, thiab rau txoj kev ntseeg tias Vajtswv muaj lub hwj chim kav tau txhua yam. Kev dim ciaj sia nyob ntawm tib neeg, thiab txoj hmoo ntawm tej teb chaws thiab tej haiv neeg ces tsis tseem ceeb rau lawv li lawm, ces tib neeg ua lub neej khoob lug uas tsuas xav txog qhov noj, qhov haus, thiab caum txoj kev lom zem nkaus xwb. … Muaj tsawg tus thiaj yuav sawv los nrhiav seb tam sim no Vajtswv ua Nws tes hauj lwm rau qhov twg, los sis xyuas seb Nws ho tswj thiab npaj tib neeg txoj hau kev kawg li cas. Thiab ua li no ces, tib neeg yeej tsis paub li, tib neeg txoj kev vam meej yuav tshwm sim tsis tau raws li lawv txoj kev xav, thiab tseem yuav muaj neeg coob tshaj uas xav li ntawd, ua lub neej zoo li ntawd, ces lawv haj yam tsis muaj kev kaj siab tshaj li cov uas twb tuag lawm. Txawm yog cov neeg hauv cov teb chaws vam meej los yeej yws li ntawd tib yam nkaus thiab. Vim yog tsis muaj Vajtswv txoj kev coj lawm, ces txawm yog cov neeg tswj kav thiab cov txawj ntse txog fab kev vam meej ntawm tib neeg txawm yuav siv tswv yim npaum li cas los xav txog kev ceev khaws tib neeg txoj kev vam meej los yeej pab tsis tau. Tsis muaj ib tug tib neeg twg yuav los txhaws tau qhov khoob lug hauv tib neeg lub siab, vim tsis muaj ib tug tib neeg twg yuav ua tau tib neeg txoj sia, thiab tsis muaj ib lub tswv yim ntawm sab kev coj twg uas yuav tso tau tib neeg tawm ntawm tej teeb meem ntawm qhov khoob lug li. Kev kawm tshawb nrhiav txuj, kev paub, kev ywj pheej, kev muaj vaj huam sib luag, kev xyiv fab, kev tau zoo tsuas coj tau kev kaj siab los rau tib neeg ib vuag dua xwb. Txawm muaj tej no, los tib neeg yeej tseem zam tsis dhau tej kev txhaum li thiab yws txog tej kev tsis ncaj ncees. Qhov muaj tej no yeej cheem tsis tau tib neeg txoj kev ntshaw thiab kev xav paub xav pom. Qhov no vim yog tib neeg yog Vajtswv tsim thiab lawv tej kev tso txhua yam tseg thiab tej kev tshawb nrhiav ntawd tsuas coj tau kev ntxhov siab los rau lawv, thiab tsuas ua rau tib neeg muaj txoj kev ntxhov siab nkaus xwb, yeej tsis paub txog tias xyov yuav ua cas rau tib neeg lub neej yav tom ntej los sis yuav taug txoj kev tom ntej mus tau li cas li, mus txog qhov uas tib neeg haj tseem ntshai tej kev tshawb nrhiav txuj thiab kev paub, thiab haj yam ntshai qhov kev xav tias txog qhov tsis muaj dab tsi hlo li thiab. Nyob hauv lub ntiaj teb no, tsis hais koj yuav nyob rau lub teb chaws ywj pheej los lub teb chaws uas tib neeg tsis muaj cai li, koj yeej yuav khiav tsis dhau tib neeg txoj hmoo li. Tsis hais koj yuav yog tus kav lub teb chaws los tus raug kav li, koj yeej tsis muaj cuab kav yuav khiav dim txoj kev xav yuav los tshawb xyuas tib neeg txoj hmoo, tej yam uas tsis tau paub txog thiab lawv txoj hau kev kawg hlo li, koj yeej yuav khiav tsis dhau lub neej khuam siab khuav txog qhov tsis muaj dab tsi hlo li. Tej xwm txheej zoo li no, uas yeej tshwm sim ntau heev rau tib neeg, ces cov kws kawm txog tib neeg txoj kev ua neej muab hu ua xwm txheej fab kev ua neej, tab sis yeej tsis muaj ib tug neeg twg ntse txaus yuav los daws tau tej teeb meem ntawd li. Tib neeg ces thaum kawg los yeej tseem yog tib neeg, thiab Vajtswv lub meej mom thiab Vajtswv lub neej txoj sia yeej tsis muaj ib tug neeg twg los hloov tau li. Qhov tib neeg xav tau ntawd tsis yog xav kom muaj lub teb chaws ncaj ncees es kom txhua tus muaj noj muaj haus, muaj vaj huam sib luag thiab muaj kev ywj pheej nkaus xwb; qhov tib neeg xav tau ces yog Vajtswv txoj kev cawm dim thiab Nws txoj kev pab kom tib neeg muaj lub neej txoj sia. Tsuas yog thaum tib neeg tau txais Vajtswv txoj kev pab kom muaj lub neej txoj sia thiab Nws txoj kev cawm dim lawm xwb lawv txoj kev xav tau, lawv txoj kev ntshaw xav tshawb xyuas, thiab qhov khoob lug ntawm lawv lub siab ntawd thiaj li yuav muab kho tau. Yog cov neeg nyob rau ib lub teb chaw los sis ib haiv neeg twg tsis muaj peev xwm tau txais Vajtswv txoj kev cawm dim thiab txoj kev saib xyuas, ces lub teb chaws los sis haiv neeg zoo li ntawd yuav maj mam txav zuj zus mus rau txoj kev uas phem, mus rau txoj kev tsaus ntuj, thiab vim li ntawd yuav raug Vajtswv muab rhuav tshem kom tu noob mus.

Tej zaum mas tam sim no koj lub teb chaws tab tom muaj txiag nplua nuj, tab sis yog koj cia koj cov neeg yuam kev tawm ntawm Vajtswv mus, ces koj lub teb chaws yuav pom tias nws plam Vajtswv tej koob hmoov zuj zus lawm, lub teb chaws ntawd tej kev vam meej yuav raug tsuj zuj zus rau hauv tib neeg qab xib taws thiab, tsis ntev ntawd ces lub teb chaws cov neeg yuav sawv tig tawm tsam Vajtswv thiab tsawm foom tsis zoo rau Ntuj Ceeb Tsheej. Qhov ua li no, ib lub teb chaws txoj hmoo yuav puas tsuaj yam tsis paub txog. Vajtswv yuav tsa cov teb chaws muaj zog tshaj los tawm tsam cov teb chaws uas raug Vajtswv foom phem rau, thiab tej zaum kuj yuav tau muab cov teb chaws ntawd rhuav tshem hauv ntiaj teb no mus kom du lug. Qhov tseem ceeb rau txoj kev muaj txiaj nplua nuj los sis qhov ploj mus ntawm ib lub teb chaws twg los sis ib haiv neeg twg ntawd yog nyob ntawm qhov seb cov tswv kav lub teb chaws ntawd puas pe hawm Vajtswv, thiab seb lawv puas coj lawv cov neeg kom txav los ze rau Vajtswv es los pe hawm Nws. Tab sis nyob rau tiam kawg no, vim cov uas ua lub siab dawb paug nrhiav thiab pe hawm Vajtswv ntawd muaj tsawg zuj zus, Vajtswv thiaj muab qhov kev hlub tshwj xeeb rau cov teb chaws uas txoj kev Ntseeg Vajtswv yog txoj kev ntseeg ntawm lub teb chaws ntawd. Nws muab cov teb chaws ntawd sau coj los ua ntiaj teb pawg uas ncaj ncees, hos cov teb chaws uas tsis ntseeg tias muaj Vajtswv thiab cov uas tsis pe hawm tus Vajtswv tiag thiaj rais los ua yeeb ncuab rau pawg ncaj ncees. Ua li no ces, Vajtswv tsis yog yuav muaj ib qho chaw nyob nrog tib neeg uas yog qhov chaw Nws ua tau Nws tes hauj lwm xwb, nyob rau tib lub sij hawm ntawd, Nws kuj muab tau cov teb chaws uas muaj kev tswj fwm ncaj ncees, cia muab kev rau txim thiab kev txwv txiav coj los nog rau cov teb chaws uas tawm tsam Nws thiab. Txawm li no los xij, Vajtswv yeej tseem tsis muaj peev xwm muab kom tau tib neeg coob ntxiv los pe hawm Nws, vim tib neeg tau ncaim ntawm Nws mus deb heev lawm, thiab tau hnov qab Vajtswv los tau ntev lawm ces nyob rau hauv lub ntiaj teb no thiaj li tsuas lam tshuav cov teb chaws uas muaj kev ncaj ncees thiab tawm tsam kev tsis ncaj ncees lawm xwb. Tab sis qhov no mas yeej tseem deb ntawm qhov Vajtswv xav tau, vim tsis muaj ib lub teb chaws uas tus tswv kav teb chaws ntawd yuav cia Vajtswv los kav lawv cov neeg, thiab tsis muaj ib lub teb chaws twg yuav sau lawv cov neeg los hwm Vajtswv; Vajtswv tau plam Nws qhov chaw uas yeej yog Nws tug hauv nruab siab ntawm txhua lub teb chaws, haiv neeg, pab pawg neeg kav teb chaws, thiab hauv txhua tus neeg lub siab kiag. Txawm hais tias qee lub zog uas ncaj ncees yeej muaj nyob rau hauv lub ntiaj teb no, los ib txoj kev cai uas tsis muaj Vajtswv nyob rau hauv tib neeg lub siab mas yeej tsis ruaj khov heev li, thiab txoj kev kav teb chaws uas tsis muaj Vajtswv tej koob hmoov ntawd yeej yuav ntxhov quav niab thiab tsis muaj peev xwm tiv taus ib qho kev sib tawm tsam li. Rau tib neeg ces, qhov tsis muaj Vajtswv txoj koob hmoov ntawd zoo ib yam li qhov tsis muaj lub hnub ci ntag. Tsis hais cov tswv kav teb chaws yuav pab nyiaj txiag npaum li cas mus rau lawv cov neeg, tsis hais tib neeg yuav npaj muaj pes tsawg lub rooj sib tham txog kev ncaj ncees li, tsis muaj ib yam no uas yuav tig tau qhov phem los sis hloov tau tib neeg txoj hmoo li. Tib neeg ntseeg hais tias ib lub teb chaws uas tib neeg muaj noj muaj hnav, uas lawv ua neej muaj kev sib haum xeeb, ces yog ib lub teb chaws zoo, thiab yog lub uas muaj kev coj zoo. Tab sis Vajtswv tsis xav li ntawd. Nws ntseeg hais tias ib lub teb chaws uas tsis muaj neeg teev hawm Nws ces yog lub uas Nws yuav muab rhuav kom puas tsuaj tu noob. Tib neeg tej kev xav mas txawv deb heev ntawm Vajtswv tej lawm. Yog li ntawd, yog tus coj ntawm ib lub teb chaws twg tsis pe hawm Vajtswv, ces yam yuav tshwm sim tom ntej rau lub teb chaws ntawd yuav yog ib qho txaus tu siab kawg li, thiab lub teb chaws no yuav tsis muaj txoj hau kev kawg.

Vajtswv tsis nrog tib neeg koom kev sib huas ua nom ua tswv, tab sis Nws tswj txoj hmoo ntawm txhua lub teb chaws thiab txhua haiv neeg, Nws tswj lub ntiaj teb no thiab tag nrho lub qab ntuj khwb. Tib neeg txoj hmoo thiab Vajtswv txoj kev npaj mas yeej sib txuas khov kawg nkaus, thiab tsis muaj ib tug neeg twg, ib lub teb chaws twg los sis ib haiv neeg twg yuav khiav dim ntawm Vajtswv lub hwj chim kav li. Yog tib neeg xav paub lawv txoj hmoo, ces lawv yuav tsum los rau ntawm Vajtswv lub xub ntiag. Vajtswv yuav ua kom cov uas ntseeg thiab teev hawm Nws ntawd kom muaj txiag nplua nuj thiab yuav coj kev poob tsag thiab kev tu noob los rau cov uas tawm tsam thiab tsis txais yuav Nws.

Nco txog qhov xwm txheej hauv Vajluskub thaum uas Vajtswv tso kev puas tsuaj rau Xaudoo thiab xav txog qhov uas Lauj tus poj niam tau rais los ua ib tug ncej ntsev. Tig rov xav txog qhov uas cov neeg hauv Ninave lees lawv tej kev txhaum rau hauv hnab xaws khaub ncaws thiab hmoov tshauv thiab nco ntsoov tej yam uas tshwm sim tom qab cov neeg Yudai muab Yexus ntsia rau saum tus ntoo khaub lig 2,000 xyoo dhau los. Cov neeg Yudais raug ntiab tawm hauv Yixayee thiab khiav mus nyob thoob ntiaj teb. Muaj coob tus raug tua tuag, thiab tag nrho haiv neeg Yudais raug muab coj mus zwm txoj kev mob siab ntsim plawv ntawm lawv lub teb chaws txoj kev puas ntsoog tag nrho yam tsis tau muaj dua los li. Lawv tau muab Vajtswv ntsia rau saum ntoo khaub lig—tau ua ib qho kev txhaum loj tshaj plaws—thiab tau thab Vajtswv tus moj yam. Lawv tau raug yuam kom them tej uas lawv tau ua thiab tau raug yuam kom txais tag nrho tej txim txhaum los ntawm tej lawv ua ntawd. Lawv tau cem Vajtswv, tsis txais yuav Vajtswv, thiab yog li lawv thiaj li tsuas muaj tib txoj hmoo nkaus xwb: raug Vajtswv rau txim. Qhov no yog lub txim iab thiab kev puas tsuaj uas lawv cov tswv kav teb chaws tau tsim tawm los rau lawv lub teb chaws thiab haiv neeg.

Hnub no, Vajtswv twb rov qab los nrog tib neeg nyob los ua Nws tes hauj lwm lawm, thiab Nws thawj qho chaw nres hauv Nws tes hauj lwm ces yog ua tus qauv ntawm txoj kev koom tsham: Suav Teb, lub hauv paus ruaj khov ntawm kev tsis ntseeg ntuj. Vajtswv tau ib pab neeg los ntawm Nws txoj kev txawj ntse thiab lub hwj chim. Nyob rau lub sij hawm no, Nws raug Suav Teb pab neeg tswj teb chaws siv txhua yam caum tua thiab raug txhua hom kev txom nyem, yam tsis muaj chaw rau Nws so li, thiab tsis tau chaw nkaum li. Txawm li no los xij, Vajtswv yeej tseem rau siab ntso ua tes hauj lwm uas Nws npaj siab yuav ua: Nws hais lus thiab hais lus tawm, thiab Nws nthuav tawm Nws txoj moo zoo. Tsis muaj leej twg yuav to taub tau txog Vajtswv txoj kev muaj hwj chim loj kawg nkaus. Nyob rau Suav Teb, ib lub teb chaws uas muab Vajtswv xam ua tus yeeb ncuab, los Vajtswv yeej tsis tso Nws tes hauj lwm tseg li. Txawm li ntawd los, muaj neeg coob tau txais yuav Nws tes hauj lwm thiab txoj lus, vim Vajtswv cawm txhua leej thiab txhua tus noob neej mus rau qhov zoo tshaj plaws. Peb txhua tus ntseeg hais tias tsis muaj ib lub teb chaws los sis ib lub zog twg yuav thaiv tau yam uas Vajtswv xav ua kom tiav, thiab tias cov uas sim los thaiv Vajtswv tes hauj lwm, cov uas tawm tsam Vajtswv txoj lus thiab cov uas tab kaum thiab sim los rhuav Vajtswv txoj kev npaj ntawd thaum kawg yuav raug Vajtswv rau txim. Ib tug neeg twg uas tawm tsam Vajtswv tes hauj lwm yuav raug Vajtswv xa mus rau dab teb; ib lub teb chaw twg uas tawm tsam Vajtswv tes hauj lwm yuav raug Vajtswv ua kom puas ntsoog; haiv neeg twg uas sawv tig tawm tsam Vajtswv tes hauj lwm yuav raug Vajtswv ntsaig tawm kom tu noob hauv ntiaj teb no mus thiab yuav tsis muaj nyob ntxiv lawm. Kuv xav hais kom cov neeg hauv txhua haiv neeg, hauv txhua lub teb chaws, thiab tag nrho txhua yam kev khwv noj khwv haus tig los mloog Vajtswv lub suab, los pom Vajtswv tes hauj lwm thiab tig los ua tib zoo saib tib neeg txoj hmoo, es ua kom Vajtswv dawb huv tshaj plaws, kom txaus hwm tshaj plaws, siab tshaj plaws, thiab tib tug uas tib neeg pe hawm nkaus xwb, thiab pab tag nrho txhua tus tib neeg los nyob rau hauv Vajtswv tej koob hmoov, ib yam nkaus li Anplahas cov xeeb leej xeeb ntxwv nyob hauv qab Yehauvas qhov kev cog lus, thiab ib yam li Adas thiab Evas, uas yog tus Vajtswv tsim nyob rau thaum chiv keeb, es nyob rau hauv lub Vaj Edee.

Vajtswv tes hauj lwm nphau nthwv tuaj mus zoo li ib nthw dej loj heev. Tsis muaj leej twg yuav txhom tau Nws, thiab tsis muaj leej twg yuav cheem tau qhov Nws taug kev mus no. Tsuas yog cov uas ua twb zoo mloog Nws tej lus xwb, thiab cov uas nrhiav thiab ntshaw Nws heev xwb, thiaj yuav caum tau Nws tej hneev taw thiab tau txais Nws cov lus cog tseg. Cov tsis ua li no ces yuav raug kev puas tsuaj loj thiab kev rau txim raws li qhov lawv tsim nyog tau txais.