Txog Vajtswv Tej Kev Cai Tswj Fwm nyob rau Tiam Lub Nceeg Vaj

Ua ntej tshaj plaws, cia peb tham txog seb tej kev cai tswj fwm yog dab tsi thiab tham txog lo lus tshab txhais ntawm tej kev cai tswj fwm ntawd. Qhov no yog ib yam uas yuav tsum tau to taub. Thaum ib txhia tib neeg hnov txog “tej kev cai tswj fwm” ntawd mas lawv xav paub seb “Lub ntsiab lus ntawm tej kev cai tswj fwm ntawd yog dab tsi? Tej kev cai tswj fwm ntawd puas yog tej kev cai uas raws kev raws cai? Tej kev cai tswj fwm ntawd puas yog kev cai? Tej kev cai tswj fwm ntawd puas yog ib txoj kev coj ua? Puas muaj qee feem uas raug txwv? Tej kev cai tswj fwm ntawd puas yog cov lus txib? Tej kev cai tswj fwm ntawd yog dab tsi kiag?” Tib neeg tsis muaj kev to taub. Tsis muaj leej twg to taub hais tias tej kev cai tswj fwm ntawd yog dab tsi kiag, los sis tias tej kev cai tswj fwm ntawd ua hauj lwm li cas. Tib neeg pheej hais tias, “Vajtswv yeej muaj Nws tej kev cai tswj fwm. Yog koj tsis mloog lus, ces Vajtswv yuav siv tej kev cai tswj fwm ntawd los tshuaj xyuas koj thiab rau txim rau koj.”. Lawv tab tom nthuav “tej kev cai tswj fwm” ntawd tawm yam tsis muaj kev to taub txog tej kev cai tswj fwm ntawd lub ntsiab lus tseem tseeb li. Yog li ntawd tej kev cai tswj fwm ntawd yog dab tsi kiag? Tej kev cai tswj fwm ntawd yog ib co lus uas Vajtswv tau teev tawm los uas hais txog tib neeg tej yeeb yam thiab tej moj yam qias vuab tsuab los tshawb xyuas lawv. Tej kev cai tswj fwm ntawd tsis yog tej kev cai los sis tej kev cai uas raws kev raws cai, thiab tej kev cai tswj fwm ntawd haj yam piv tsis tau tej kev cai lij choj ntawm noob neej lub ntiaj teb. Tej kev cai tswj fwm ntawd yog ib co txheej txheem uas Vajtswv tau npaj tseg lawm uas txhob txwm los tshawb xyuas tib neeg tus cwj pwm xwb. Qhov uas tej kev cai tswj fwm hais ntxaws ntxaws ntawd yog hais txog qhov tias yuav hwm Vajtswv li cas, yuav zwm rau Vajtswv li cas, yog ib tug uas raug tsim tawm los lawm yuav ua li cas, yog ib tug tib neeg lawm yuav ua li cas, yuav ua tim khawv rau Vajtswv li cas, thiab yuav zam li cas es thiaj li tsis ua rau Vajtswv puas koob puas npe. Qhov uas Vajtswv tej kev cai tswj fwm hais ntxaws ntxaws ntawd yog hais txog ntau yam. Ib txhia tib neeg hais tias, "Vajtswv tus Ntsujplig tuaj yeem ua tau tej yam. Nws tuaj yeem rau txim rau tib neeg thiab pauj txhua tus tib neeg raws li qhov lawv tsim nyog tau txais. Vajtswv kuj tau hais qhov tseeb los qhia txhua tus tib neeg thiab. Vim li cas thiaj li yuav tsum muaj tej kev cai tswj fwm?” Qhov tseeb yog txhawj txog tib neeg txoj kev to taub lub neej txoj sia thiab tib neeg txoj kev to taub txog tej moj yam qias vuab tsuab xwb. Tej kev cai tswj fwm ntawd yog tej kev cai teeb tseg uas qhia tau meej heev li lawm. Txawm hais tias koj tus yam ntxwv yuav zoo li cas, txawm hais tias koj yog hom tib neeg twg los xij, yog tias koj ntseeg Vajtswv lawm, koj yuav tsum ua raws li txhua yam uas tej kev cai tswj fwm hauv Vajtswv lub tsev twb tau teeb tseg lawm. Yog tias koj tsis tuaj yeem ua, koj lub npe yuav raug rho tawm, thiab raws li Vajtswv pom mas, koj yuav raug ntxub ntxuag. Qhov tseeb tiag, tej kev cai tswj fwm ntawd yog tej kev ua uas cheem tsum uas tsawg tshaj plaws rau cov ntseeg Vajtswv, tsuas zoo ib yam li cov neeg Yixayees pe hawm Yehauvas los ntawm qhov tua tsiaj fij thiab ceev hnub Xanpataus xwb. Nyob rau Tiam Muaj Kev Cai ntawd, Yehauvas twb ua qee tes hauj lwm, twb hais ntau lo lus, thiab twb tsim ntau txoj kev cai lawm. Cov kev cai ntawd muaj ntau yam uas tib neeg yuav tsum tau ua: piv txwv li, lawv yuav tsum pe hawm Yehauvas li cas, los sis yuav tua tsiaj fij rau Yehauvas li cas, yuav them ib feem kaum li cas, yuav fij khoom li cas, thiab ntau yam ntxiv. Nyob rau lub sij hawm ntawd, muab tej no hu ua kev cai, thiab nyob rau lub sij hawm ntawm Tiam Hmoov Hlub ntawd, muab tej kev cai teeb tseg uas zoo sib xws li cov kev cai no hu ua cov lus txib, thiab txhua tus tib neeg yuav tsum tau ua raws li tej kev cai teeb tseg ntawd. Tam sim no, nyob rau Tiam Lub Nceeg Vaj, nyob rau theem hauj lwm ntawm tiam kawg no, twb tau muab cov lus txib ntawm tiam tshiab nthuav tawm lawm, thiab tam sim no muab cov lus txib ntawd hu ua tej kev cai tswj fwm lawm. Nyob rau Tiam Lub Nceeg Vaj mas, cov lus txib no yog ib feem ntawm tej kev cai tswj fwm. Txawm li cas los xij, cov lus txib ntawm Tiam Hmoov Hlub ntawd ua tsis tau dej num ib yam li tej kev cai tswj fwm niaj hnub no, vim qhov Vajtswv cheem tsum ntawm tib neeg nyob rau txhua tiam ntawd mas sib txawv.

Txhua tiam yeej muaj cov lus txib, thiab txhua tiam yeej muaj Vajtswv tej kev cheem tsum thiab tus qauv rau tib neeg, tus qauv uas hloov mus raws li tej kev hloov uas nyob rau tiam ntawd thiab tej kev cheem tsum ntawm Vajtswv txoj hauj lwm. Qhov siv qee txoj kev cai nyob rau Tiam Muaj Kev Cai ntawd rau niaj hnub no mas yuav tsis tsim nyog, tiam sis, tseeb tiag, yeej tseem muaj qee txoj kev cai uas tsim nyog. Hais txog cov lus txib uas Yexus hais nyob rau Tiam Hmoov Hlub ntawd mas, feem ntau yeej tsim nyog siv rau niaj hnub no, thiab ib co thiaj li tsis tsim nyog xwb. Ib txhia tib neeg hais tias, “Hwm koj niam koj txiv, tsis txhob ua txhaum, tsis txhob deev luag poj luag txiv, tsis txhob pe hawm dab mlom—ua li cas tej no thiaj li tsis tsim nyog?” Kuv tsuas hais txog ob peb qho ntawm cov lus txib ntawd xwb. Hos hais txog cov uas hais tias “Hwm koj niam koj txiv” ntawd mas yog nyob ntawm tej xwm txheej xwb, yog li ntawd tsis txhob nkag siab yuam kev. Ib txhia tib neeg ruam hais tias, “Vajtswv hais tias tej kev cai thiab cov lus txib uas los ua ntej lawm ntawd twb raug muab rhuav tshem tag nrho lawm, thiab tsuas tshuav tsawg tsawg txoj kev cai lawm xwb uas thiaj li tseem siv tau.” Koj yuav tsum tsis txhob qhia txog txoj kev to taub zoo li no rau lwm tus li. Qhov muab ib co lus zoo li no tshaj tawm mas yog ib qho yuam kev thiab ua rau muaj kev tab kaum. Qhov no yog ib qho kev tshab txhais Vajtswv cov lus yuam kev lawm. Cov uas tshab txhais Vajtswv cov lus yuam kev ntawd ua txhaum rau Nws tus moj yam, thiab cov uas ua txhaum rau Nws tus moj yam ntawd yog dab. Tsis hais txog lub sij hawm li, yam tsawg kawg koj yuav tsum tuav rawv qhov ua ib tug neeg dawb huv uas muaj lub siab zoo ntawd. Yam tsawg kawg, yuav tsum kom muaj qho zoo li no thiaj li muaj ib qho zoo nkaus li tib neeg xwb. Tej kev cai thiab cov lus txib ntawd puav leej yog tsim los raws li tiam thiab lub ntsiab lus uas muaj nyob rau lub sij hawm ntawd, thiab raws li tib neeg tes hauj lwm thiab tej kev tim tsum uas muaj nyob rau lub sij hawm ntawd xwb. Nyob tau tiam tam sim no, Vajtswv tau hais ib co lus ntxiv, thiab tau muab ib co kev cai ntxiv los tshawb xyuas lawv. Qhov ntawd hais tau hais tias, Nws tau muab tus qauv rau lawv lawm, xws li yuav ntseeg Vajtswv li cas, yam uas lawv tsim nyog ua thiab tsis tsim nyog ua nyob rau hauv lawv txoj kev ntseeg Vajtswv, thiab ntau yam ntxiv. Nyob rau Tiam Hmoov Hlub, Yexus hais tias, “Kuv tsis tau los rhuav tshem txoj kev cai, tiam sis yog los ua kom txoj kev cai ntawd tiav.” Tiam sis tom qab ntawd, Nws rhuav tshem ntau txoj kev cai lawm. Cov kev cai no tsis tsim nyog siv rau tiam ntawd, cov kev cai no tsis tsim nyog siv rau tes hauj lwm nyob rau lub sij hawm ntawd, thiab cov kev cai no tsis haum rau qhov xwm txheej nyob rau lub sij hawm ntawd lawm, yog li ntawd Nws thiaj li rhuav tshem cov kev cai no. Tseeb tiag, niaj hnub no mas haj yam yuav tsum tau rhuav tshem cov kev cai ntawd ntxiv thiab. Ib yam nkaus li ntawd, nyob rau tiam tshiab no mas, ib co lus txib uas nyob rau hauv phau Vajluskub Tshiab ntawd yuav tsum tau muab rhuav tshem, hos ib co mas yuav tsum tau siv txuas ntxiv, vim qhov xwm txheej ntawm tes hauj lwm niaj hnub no txawv thiab yam uas tib neeg tim tsum ntawd txawv lawm. Ib theem hauj lwm twg mas siab dua li theem tas los. Ib txhia tib neeg ruam hais tias, “Tswv Yexus hais tias Nws los ua kom txoj kev cai tiav, yog li ntawd vim li cas Nws thiaj li muab txoj kev cai ntawd rhuav tshem thiab tshem tawm ntau ua luaj li? Vim li cas Nws tej kev ua thiaj li ua txhaum txoj kev cai ntawd?” Tseeb tiag Nws txoj kev rhuav tshem ntawd yog txoj kev ua kom tiav ntag. Qhov no yog vim tes hauj lwm Nws ua ntawd ua tiav hom txiaj ntsim zoo li no, yog li ntawd thiaj li tsis tas yuav tsum ua raws li cov kev cai ntawd ntxiv lawm. Tsuas zoo ib yam li tom qab Yexus tuag theej txhoj lawm xwb, ces tsis tas yuav tua tsiaj theej txhob raws li txoj kev cai ntawd ntxiv lawm, vim rau qhov Vajtswv tes hauj lwm tsis ua raws li tej kev cai tswj. Tej txoj kev cai thiab tej co lus txib ntawd mas yeej muab rhuav tshem tau thiab yeej muab tes hauj lwm tshiab los hloov tej no tau. Yog nej muab cov lus uas hais tias, “Tag nrho cov lus txib yav dhau los ntawd twb raug muab rhuav tshem lawm ntawd coj mus tshaj tawm. Cov lus txib ntawd tsis muaj txiaj ntsim ntxiv lawm” mas qhov no yuav yog ib qho ruam heev. Hnub no, Vajtswv tau tshaj tawm tej kev cai tswj fwm kom haum rau tej yam ntxwv thiab tej kev cheem tsum ntawm noob neej ntiaj teb. Ib txhia tib neeg nug hais tias, "Vim li cas ib tiam twg Vajtswv thiaj li tshaj tawm tej kev cai tswj fwm? Qhov ntawd twb tshaj tawm tag ib zaug lawm, tib neeg twb paub txog tej kev cai tswj fwm ntawd, thiab peb ua raws li tej ntawd lawm. Qhov ntawd twb tsim nyog kawg li ntawd lawm. Vim li cas thiaj pheej tshaj tawm cov tshiab?" Qhia Kuv seb, yog tib neeg qias vuab tsuab npaum li lawv qias tam sim no, nws yuav tsis ua rau muaj tej kev cai tswj fwm lov? Txhua tus tib neeg puav leej muaj tej moj yam qias vuab tsuab. Tib neeg puas tuaj yeem zwm rau Vajtswv thaum lawv raug lawv tej yeeb yam qias vuab tsuab tswj kav? Nej hais tsis tau hais tias thaum tib neeg muaj kev ntseeg Vajtswv thiab muaj peev xwm los ua raws li cov lus txib thiab mloog cov lus txib ntawd lus lawm, ces lawv dawb huv thiab ncaj ncees lawm. Qhov ntawd tsis yog. Tib neeg muaj tej moj yam qias vuab tsuab, thiab ib txwm ua neej raws li tej moj yam qias vuab tsuab ntawd, yog li ntawd thiaj li yuav tsum muaj tej kev cai tswj fwm kom tsim nyog los tshawb xyuas lawv tus cwj pwm tas li. Yog tias tib neeg yeej ua txhaum tej kev cai tswj fwm no tiag tiag, ces lawv tuaj yeem raug qhuab ntuas, raug txwv, los sis lawv tuaj yeem raug muab tshem tawm thiab muab ntiab tawm. Muaj ntau hom txim heev. Nyob rau Tiam Muaj Kev Cai thiab Tiam Hmoov Hlub mas, muaj kev cai thiab muaj lus txib ntau heev. Tam sim no, nyob rau Tiam Lub Nceeg Vaj, ntxiv rau cov lus txib, yuav tsum muaj tej kev cai tswj fwm thiab. Yog li ntawd, tej kev cai tswj fwm uas tseem ceeb tshaj plaws ntawm Tiam Lub Nceeg Vaj ntawd yog dab tsi? Tam sim no, muaj kaum txoj kev cai tswj fwm uas yuav tau muab tshaj tawm.

1. Tib neeg yuav tsum tsis txhob ua tus loj dua, los sis tsis txhob qhuas nws tus kheej siab dua. Nws yuav tsum pe hawm thiab qhuas Vajtswv.

“Tib neeg yuav tsum tsis txhob ua tus loj dua, los sis tsis txhob qhuas lawv tus kheej siab dua. Lawv yuav tsum pe hawm thiab qhuas Vajtswv xwb.” Tseeb tiag plaub qho no yog hais txog ib qho teeb meem xwb: Nyob rau hauv tib neeg txoj kev hais lus, lawv yuav tsum hais li ib tug tib neeg hais, thiab lawv yuav tsum txhob khav txog lawv tus kheej. Txhob khav txog qhov koj coj tau ib pawg ntseeg zoo npaum li cas, txhob khav hais tias pawg ntseeg ntawd yog koj pawg, thiab txhob khav hais tias Vajtswv siv koj thiab ua zoo rau koj tshwj xeeb. Txhob hais tej yam xws li, “Vajtswv nrog peb noj thiab nrog peb sib tham.” Tej uas koj hais no tsis mus raws li qhov muaj tiag lawm. Vajtswv ua rau txhua tus neeg Nws xaiv ib yam nkaus. Tsuav ib tug tib neeg tsis tau raug muab nthuav tawm thiab tshem tawm xwb, ces Vajtswv yeej coj tib tug cwj pwm rau txhua tus. Yog Vajtswv tau qhia txog qhov tseeb rau koj lawm, qhov ntawd tsis tau ua pov thawj qhia hais tias koj zoo tshaj lwm tus, tiam sis, qhov ntawd yog vim koj cia li muaj lub hwv tsam ntawd xwb. Yog li tib neeg yuav hais tau li cas es thiaj li muaj qab hau? Yog koj tsis tuaj yeem qhia txog qhov tseeb, thiab yog koj tsis muaj peev xwm muab txoj sia los pab koj cov kwv tij thiab cov muam, ces koj yuav tsum xyaum qhov xav txog tus kheej kom paub koj tus kheej, soj ntsuam koj tus kheej, kom muaj peev xwm hais yam uas nyob rau hauv koj lub siab, nthuav koj tus kheej tawm thiab qhia koj tus kheej tawm tag nrho rau txhua tus paub. Qhov xyaum ua li no yuav tau txais txiaj ntsim. Qhov nthuav tawm ntawd tsis tau txhais hais tias koj tus kheej ncaj ncees. Qhov ntawd txhais hais tias muab tej kev muaj siab thiab tej kev xav nyob rau hauv koj uas tsis yog ntawd nthuav tawm los soj ntsuam, kom txhua tus paub ua ke, kom lwm tus thiaj li tau txais txiaj ntsim los ntawm qhov ntawd los thiab. Qhov ua li no, koj thiaj li tsis yog qhuas koj tus kheej hais tias zoo dua. Yog koj ua rau koj tus kheej yog thiab ua koj txoj hauj lwm zoo lawm, txhais hais tias yog koj tuaj yeem tso tau tej kev muaj siab ntawd tseg thiab soj ntsuam koj tus kheej tej kev muaj siab ntawd, muab tej uas qias neeg nyob rau hauv koj ntawd qhia tawm kom tag nrho, thiab qhov ua li ntawd, uas yog muab koj tus kheej qhia tshwm, ces qhov no qhia hais tias koj ua yog lawm. Kuv tau pom lawm hais tias muaj ntau tus thawj coj tsuas muaj peev xwm cem tib neeg thiab tshaj tawm rau lwm tus los tawm lub hwj chim siab xwb, thiab pom hais tias lawv tsis tuaj yeem nrog lwm tus sib txuas lus kom zoo ib yam nkaus li. Lawv tsis muaj peev xwm nrog tib neeg sib thamli ib txwm tham li. Thaum ib txhia tib neeg hais lus mas, cuag nkaus li lawv tab tom hais lus saum sam thiaj los sis tab tom qhia ib qho dab tsi tawm tas li xwb. Lawv cov lus tsuas yog hais ncaj qha rau lwm tus tib neeg tej yam ntxwv xwb, tiam sis lawv yeej tsis qhia tawm txog lawv tus kheej li. Lawv yeej tsis soj ntsuam lawv tus kheej tej moj yam qias vuab tsuab li, tiam sis lawv tsuas soj ntsuam lwm tus tib neeg tej teeb meem, uas yog siv tej teeb meem ntawd los ua piv txawv kom txhua tus thiaj li muaj kev paub xwb. Vim li cas lawv thiaj li ua li no? Vim li cas lawv thiaj li tshaj tawm tej lus qhuab qhia zoo li no thiab hais tej lus zoo li no? Qhov no ua pov thawj qhia hais tias lawv tsis muaj kev paub txog lawv tus kheej kiag li, tias lawv tsis muaj qab hau li, thiab tias lawv khav theeb thiab qhuas tias tus kheej ncaj ncees heev. Lawv xav hais tias qhov lawv muaj peev xwm paub lwm tus tib neeg tej moj yam qias vuab tsuab ntawd ua pov thawj qhia hais tias lawv siab dua lwm tus, zoo dua lwm tus thaum hais txog qhov paub txog tib neeg thiab txhua yam, thiab xav hais tias lawv tsis qias vuab tsuab npaum li lwm tus tib neeg. Lawv muaj peev xwm soj ntsuam thiab cem lwm tus, tiam sis lawv tsis qhia lawv tus kheej tawm kom tag nrho, tsis qhia tshwm los sis tsis soj ntsuam lawv tus kheej tej moj yam qias vuab tsuab, tsis qhia lawv lub ntsej muag tseeb tawm, los sis tsis hais ib yam dab tsi txog lawv tus kheej tej kev muaj siab li. Lawv tsuas cem lwm tus tib neeg txog qhov coj yam tsis tsim nyog xwb. Qhov no yog kev qhuas lawv tus kheej thiab kev tsav lawv tus kheej. Koj yuav ua li cas ua tau ib tug thawj coj es tseem ua rau muaj teeb meem yam tsis muaj qab hau li? Vim li cas tom qab tau los ua ib tug thawj coj ib pawg ntseeg lawm, koj cia li cem lwm tus, coj ywj siab, thiab ua li koj siab nyiam xwb? Vim li cas koj thiaj li tsis xav txog lub txim ntawm koj cov lus, tsis xav txog tias koj tus kheej yog leej twg li? Vim li cas koj thiaj li ua li no? Qhov no yog vim tias tab txawm koj yog ib tug thawj coj los xij, koj tsis paub koj tus kheej lub meej mom los sis tias koj yog leej twg li. Qhov npaj koj los ua ib tug thawj coj ntawd tsuas lam yog txhawb nqa koj thiab muab ib lub hwv tsam rau koj los xyaum ua xwb. Tsis yog vim koj muaj qhov muaj tiag ntau dua lwm tus los sis vim koj zoo dua lwm tus. Tseeb tiag, koj tsuas zoo ib yam li lwm tus xwb. Nej tsis muaj leej twg muaj qhov muaj tiag li, thiab qee yam mas, koj haj tseem qias vuab tshuab tshaj lwm tus lawm thiab. Yog li ntawd vim li cas koj thiaj li tsim teeb meem yam tsis muaj qab hau, thiab lam tau lam cem, thuam thiab txwv lwm tus? Vim li cas thiaj li yuam kom lwm tus mloog koj hais tab txawm thaum koj twb hais tsis yog lawm? Qhov no ua pov thawj qhia txog dab tsi? Qhov no ua pov thawj qhia hais tias koj ua qhov tsis yog lawm. Koj tsis yog ua hauj lwm los ntawm qhov uas yog ib tug tib neeg lawm, koj tab tom ua koj tes hauj lwm los ntawm qhov uas yog Vajtswv, los ntawm ib txoj hauj lwm uas siab tshaj lwm tus lawm. Yog hais tias yam uas koj hais yog thiab mus raws li qhov tseeb lawm, ces lwm tus yeej mloog koj hais. Qhov zoo li no yeej yuav taus. Tiam sis thaum koj ua tsis yog lawm, vim li cas koj thiaj li yuam lwm tus kom mloog koj hais? Koj puas muaj cai? Koj puas yog tus loj tshaj plaws? Koj puas yog qhov tseeb? Thaum ib txhia tib neeg mus rau ib qho chaw mus tshaj tawm txoj moo zoo es pom cov tib neeg uas nyob rau qhov chaw ntawd ces lawv txawm tsis nyiam cov tib neeg ntawd txoj kev ua neej nyob rau ntawd, thaum kawg lawv tsis nyiam qhov chaw ntawd thiab xav tawm mus rau lwm qhov chaw. Lwm tus tib neeg yuav hais rau lawv hais tias, “Ntawm no tim tsum qee tus neeg tuaj tshaj tawm txoj moo zoo. Koj yuav ua rau tes hauj lwm qeeb yog koj tawm mus lawm.” Tiam sis lawv yuav tsis mloog, thiab pheej yuav tawm mus xwb xwb li, lawv hais tias, “Yog li vim li cas koj ho tsis nyob? Kuv yuav tsum tau tawm mus lawm! Nej yuav tsum mloog kuv hais, thiab xyaum mloog lus.” Lawv yeem cia pawg ntseeg tes hauj lwm qeeb kom thiaj li tau raws li lawv tus kheej txoj kev xav thiab xaiv ib qho chaw uas lawv nyiam. Lawv ua li lawv xav tau thiab yuam kom lwm tus ua li lawv hais xwb. Tsis yog lawv qhuas lawv tus kheej lod? Tsis yog lawv tsa lawv tus kheej lod? Lawv tsis yog cov tib neeg khav theeb khav txiv lod? Nyob rau hauv lawv tes dej num mas, lawv ua raws li lawv tus kheej nyiam kom ntau li ntau tau yam tsis xyaum ua raws li qhov tseeb ib qho me me li. Yog li ntawd, thaum lawv coj cov neeg mas, lawv tsis hais kom cov uas lawv coj ntawd xyaum ua raws li qhov tseeb li. Tiam sis, lawv yuam kom lwm tus mloog lawv hais thiab ua raws li lawv tej kev xav xwb. Qhov no tsis yog hais kom tib neeg saib lawv zoo li Vajtswv thiab mloog lawv lus li lawv yog Vajtswv lod? Lawv puas muaj qhov tseeb? Lawv tsis muaj qhov tseeb li, lawv muaj Ntxwgnyoog tus moj yam puv npo, thiab phem heev. Yog li ntawd vim li cas lawv thiaj li tseem hais kom tib neeg mloog lawv lus? Ib tug neeg zoo li no tsis yog qhuas lawv tus kheej xwb lod? Tsis yog lawv tsa lawv tus kheej lod? Cov tib neeg zoo li no puas coj tau tib neeg los rau ntawm Vajtswv lub xub ntiag? Lawv puas tuaj yeem ua tau rau tib neeg pe hawm Vajtswv? Lawv yog cov uas xav kom tib neeg mloog lawv lus. Thaum lawv ua hauj lwm zoo li no, puas yog lawv coj tib neeg kom los to taub qhov tseeb qhov muaj tiag tiag tiag? Puas yog lawv tab tom ua tes hauj lwm uas Vajtswv muab tso rau lawv ua tiag tiag? Tsis yog, lawv tab tom ua txhua yam los tsim tsa kom muaj ib lub nceeg vaj rau lawv tus kheej. Lawv xav ua Vajtswv, thiab lawv xav kom tib neeg saib lawv zoo li Vajtswv thiab mloog lawv lus li lawv yog Vajtswv. Lawv tsis yog cov tawm tsam khetos lod? Txoj kev uas cov tawm tsam khetos ua yeej ib txwm zoo li no; txawm yuav ua rau pawg ntseeg tes hauj lwm qeeb los sis ua rau cov neeg Vajtswv xaiv txoj kev to taub lub neej txoj sia raug puas tsuaj los sis raug rhuav tshem los xij li, txhua tus yuav tsum mloog lawv lus thiab mloog lawv hais xwb. Qhov no tsis yog dab tus yeeb yam lod? Qhov no tsis yog Ntxwgnyoog tus moj yam lod? Cov tib neeg zoo li no yog cov dab uas nyob rau hauv tib neeg daim tawv ntag. Tej zaum lawv muaj tib neeg lub ntsej muag, tiam sis txhua yam uas nyob rau hauv lawv nruab siab mas phem heev. Txhua yam uas lawv hais thiab ua mas phem heev. Tsis muaj ib yam dab tsi uas lawv ua yuav mus raws li qhov tseeb li, tsis muaj ib yam dab tsi ntawm qhov lawv ua ntawd yog qhov cov tib neeg muaj qab hau ua li, yog li ntawd yeej paub tau tseeb hais tias tej no yog dab, Ntxwgnyoog, thiab cov tawm tsam Khetos tej kev ua xwb. Nej yuav tsum muaj peev xwm paub qhov no kom meej. Yog li ntawd thaum nej ua, hais lus, thiab nrog lwm tus sib tham—txhua yam uas nej ua nyob rau hauv lub neej—nej yuav tsum tuav rawv qhov no rau hauv nej lub siab: “Tib neeg yuav tsum tsis txhob ua tus loj dua, los sis tsis txhob qhuas nws tus kheej siab dua. Nws yuav tsum pe hawm thiab qhuas Vajtswv.” Tej kev txwv no muab coj los txwv tib neeg, kom lawv thiaj li yuav tsis mus txog rau qhov ua txhaum rau Vajtswv tus moj yam. Txoj kev cai tswj fwm no mas tseem ceeb heev, thiab nej txhua tus yuav tsum ua tib zoo xav seb txoj kev cai tswj fwm no yog txhais li cas, vim li cas Vajtswv thiaj li cheem tsum qhov no ntawm tib neeg ntiaj teb, thiab qhov uas Nws xav ua kom tiav ntawd yog dab tsi. Ua tib zoo xav txog qhov no. Tsis txhob cia qhov no nkag ib sab pob ntseg es tawm lwm sab lawm xwb. Qhov no yuav muaj txiaj ntsim rau nej heev.

2. Ua txhua yam uas muaj txiaj ntsig rau Vajtswv tes dej num thiab tsis muaj ib yam dab tsi uas cuam tshuam rau kev txaus siab ntawm Vajtswv tes dej num. Pov thaiv Vajtswv lub npe, Vajtswv tej lus tim khawv, thiab Vajtswv tes dej num.

Koj yuav tsum txhawb nqa thiab leg lub luag hauj lwm rau txhua yam uas ntsig txog yam uas muaj txiaj ntsig rau Vajtswv lub tsev, los sis yam uas txhawj txog txoj hauj lwm ntawm Vajtswv lub tsev thiab Vajtswv lub npe. Nej txhua tus puav leej muaj lub luag hauj lwm thiab lo lus cog tseg no, thiab qhov no yog qhov uas nej yuav tsum tau ua.

3. Cov nyiaj, cov khoom siv, thiab txhua tsav yam hauv Vajtswv tsev yog cov uas tib neeg yuav tsum muab rau. Tej zaum yuav tsis muaj ib tug tib neeg txaus siab rau li tab sis tus pov thawj thiab Vajtswv, rau tib neeg cov khoom fij yog rau kev txaus siab ntawm Vajtswv. Vajtswv tsuas yog muab cov no faib rau tus pov thawj xwb; tsis muaj ib tug twg uas tsim nyog los yog muaj cai txaus siab rau ib qho ntawm lawv. Txhua yam uas tib neeg muab (suav nrog cov nyiaj thiab cov khoom siv uas tuaj yeem txaus siab) tau muab rau Vajtswv, tsis yog muab rau tib neeg, thiab yog li tej yam no yuav tsum tsis yog ua kev txaus siab rau tib neeg; yog tias tib neeg yog tus txaus siab rau lawv, ces nws yuav yog nyiag cov khoom fij no. Txhua tus tib neeg uas ua qhov no yog ib tug Yudas, ntxiv rau qhov ua tus neeg ntxeev siab, Yudas kuj tau pab nws tus kheej rau yam uas tau muab tso rau hauv lub hnab nyiaj.

Kuv yuav tsum tau piav cov lus no. Yog Kuv tsis piav qhia, ces yuav muaj qee tus tib neeg uas tsis paub txaj muag thiab siab tawv heev uas lawv yuav nyiag cov khoom fij. Tam sim no, cov thawj coj thiab cov neeg ua hauj lwm uas nyob rau txhua qib hauv pawg ntseeg ntawd tab tom raug sim mus li ib ntus tso. Cov uas tsim nyog yuav raug siv txuas ntxiv, tiam sis cov uas tsis tsim nyog yuav raug muab rho tawm los sis muab tshem tawm. Tej hauj lwm no mas tsis nyob ruaj khov. Txhob xav hais tias ua ib tug thawj coj los sis ib tug neeg ua hauj lwm ces txhais hais tias koj txoj hauj lwm nyob ruaj khov lawm thiab tias koj yeej yuav tsis raug muab rho tawm los sis muab tshem tawm li. Txhob qaug rau txoj kev dag ntxias no. Qhov no yog ib txoj kev ntshaw dhau lawm. Tus pov thawj tsis yog ib tug thawj coj dog dig. Nws muaj cai thiab muaj qhov tsim nyog los ua dej num ncaj qha rau Vajtswv. Raws li ib txwm muaj mas, qhov muaj cai thiab qhov tsim nyog no yog Vajtswv muab rau nws. Qhov no tsuas zoo li cov pov thawj nyob rau Tiam Muaj Kev Cai xwb. Lawv nkag tau mus rau hauv lub tuam tsev, tiam sis tsis muaj leej twg nkag tau li, thiab lawv noj tau tej koom fij, tiam sis tsis muaj leej twg noj tau li. Niaj hnub no, nyob rau Tiam Lub Nceeg Vaj lawm, ib tug pov thawj yog hom tib neeg twg? Ib tug tib neeg uas hu ua ib tug pov thawj nyob rau yav dhau los ntawd mas tam sim no muab hu ua tus uas Vajntsujplig siv lawm. Yog li ntawd, qhov no puas qhia txog nej? Nej tsis yog cov pov thawj kiag li! Ib tug pov thawj mas yog tus uas Vajntsujplig siv, thiab tsis muaj leej twg li tsuas yog ib tug tib neeg zoo li no xwb thiaj li siv tau cov koom fij ntawd xwb. Tsis muaj leej twg tsim nyog siv li. Yog koj hais tias koj tsim nyog siv, ces yog koj hais koj xwb. Yuav tsis pub koj siv cov khoom fij ntawd. Cov khoom fij ntawd tsis yog muab rau koj.

Kuv yuav hais txog nej qhov xwm txheej kom ntau ntxiv. Rau qhov cov tib neeg zoo li nej, uas yog cov thawj coj thiab cov neeg ua hauj lwm uas ua hauj lwm tshwj xeeb nyob rau hauv ntau pawg ntseeg ntawd, tej zaum pawg ntseeg yuav muab nqi mus los rau koj, tiam sis pawg ntseeg yuav tsis saib xyuas nej tej kev tim tsum txhua hnub. Koj ntseeg Vajtswv, thiab yeem muab koj tus kheej fij rau Vajtswv. Yog koj hais tias, “Kuv tsis yeem ua qhov no, qhov no yog Vajtswv lub tsev kom ua xwb,” ces koj tawm mus los tau. Ib txhia tib neeg hais tias, “Vajtswv hu kuv, Vajtswv xav siv kuv, yog li ntawd kuv thiaj li los. Kuv tsis yog yeem los.” Yog hais tias yog li ntawd, ces tam sim no Kuv tsis tim tsum koj . Koj tawm mus los tau. Kuv yeej tsis txeev yuam tib neeg li. Tab txawm yog koj yeem los rau ntawm no los xij, qhov koj yuav tau nyob rau ntawm no ntawd yog nyob ntawm seb koj puas tsim nyog xwb. Yog koj tsis tsim nyog, ces yuav tsis siv koj. Mam li nrhiav lwm tus los hloov koj chaw los tau. Qhov no yog lub hauv paus ntsiab lus uas Vajtswv lub tsev siv tib neeg. Tsis muaj kev zam tshwj xeeb rau leej twg li. Cov nyiaj ntawm Vajtswv lub tsev yog siv rau Vajtswv lub tsev tes hauj lwm xwb, tsis yog siv los txhawb ib tug tib neeg twg lub neej, thiab tsis yog siv rau tib neeg tus kheej txoj kev lom zem.

4. Tib neeg muaj tus moj yam uas ua siab tsis ncaj thiab muaj kev xav hauv siab ntau. Zoo li no, nws yog qhov txwv tsis pub rau ob tus tswv cuab ntawm poj niam thiab txiv neej los ua hauj lwm ua ke yam tsis muaj leej twg nrog thaum ua dej num rau Vajtswv. Yog leej twg raug tshawb pom ua li ntawd yuav raug ntiab tawm, yam tsis muaj kev zam.

Ib txhia kwv tij mas tsuas pheej sib qhia nrog rau cov nkauj muam xwb, thiab haj tseem ua li ntawd ib leeg nkaus xwb thiab. Lawv qhib siab lug rau cov nkauj muam thaum lawv sib qhia nrog rau lawv, tiam sis tsis kam ua li ntawd rau lwm tus li. Cov tib neeg no mas tsis zoo! Ib txhia nkauj muam mas tsis sib qhia nrog rau lwm tus nkauj muam, thiab yeej tsis qhib siab lug rau lawv li, tsuas yog nrhiav cov kwv tij sib qhia nrog rau xwb. Hom tib neeg no yog hom neeg dab tsi? Yeej tsis muaj ib tug nkauj muam uas tuaj yeem txhawb tau koj li lov? Yeej tsis muaj ib tug nkauj muam uas yuav sib qhia nrog rau koj li lov? Lawv txhua tus puas ntxub koj? Puas yog tsis muaj ib tug haum koj li? Koj tsuas tuaj yeem sib raug zoo nrog rau cov kwv tij xwb lov? Kuv xav tias koj muaj lwm yam kev txhawb siab! Muaj cov tib neeg uas yog lawv yog poj niam ces pheej nyiam thab txiv neej hos yog lawv yog txiv neej ces pheej nyiam thab poj niam. Qhov no mas phom sij heev. Nej yuav tsum txwv nej tus kheej, ua kom muaj kev paub tob, thiab muaj kev paub tias dab tsi yog qhov tsim nyog me ntsis. Tib neeg muaj tej moj yam qias vuab tsuab, yog li ntawd tsis txhob cia li ua raws li nej tus kheej lub siab nyiam. Nej yuav tsum txwv qee yam, thiab qhov ua li no mas nej tus cwj pwm thiaj li yuav zoo tuaj. Yog tsis muaj kev txwv, thiab yog tsis muaj lub siab hwm Vajtswv, ces tib neeg yuav coj phem heev tuaj. Thaum lawv ua txhaum tej kev cai tswj fwm lawm, lub txim yuav hnyav heev, yog li ntawd lawv yuav tsum nco ntsoov txoj kev cai tswj fwm no.

5. Tsis txhob xa kev txiav txim rau Vajtswv los sis kev sib tham tej teeb meem txog Vajtswv. Ua raws li qhov uas tib neeg yuav tsum ua, thiab hais raws li yam uas tib neeg yuav tsum hais, thiab tsis txhob ua dhau cai los sis tsis txhob hla dhau ciam. Saib xyuas koj tus kheej tus nplaig thiab saib xyuas qhov chaw koj mus, zam tsis txhob ua tej yam uas yuav ua rau Vajtswv tus moj yam chim.

6. Ua yam uas yuav tsum tau ua los ntawm tib neeg, thiab ua koj cov luag hauj lwm, thiab ua kom koj cov luag hauj lwm tiav, thiab tuav koj tes hauj lwm. Vim koj ntseeg Vajtswv, koj yuav tsum muab koj cov kev pab rau Vajtswv tes dej num; yog koj tsis muab, ces koj tsis tsim nyog tau noj thiab haus Vajtswv tej lus, thiab tsis tsim nyog nyob hauv Vajtswv tsev neeg.

Nqe Rau yog ntsig txog noob neej tej dej num. Tsis hais koj txoj kev to taub lub neej txoj sia yav dhau los los sis qhov koj tus kheej txoj kev caum tau loj hlob li cas, thiab tsis hais koj lub peev xwm los sis kev ua neej li, tsuav txoj hauj lwm ntawm pawg ntseeg cheem tsum kom koj ua qee yam xwb, ces txawm hais tias yuav txom nyem los sis nyuaj npaum li cas los xij, koj yuav tsum ua qhov ntawd. Yog tias koj tsis ua, ces koj tsis tsim nyog nyob rau hauv Vajtswv lub tsev. Vajtswv lub tsev tsis lam muab ib yam dab tsi pub dawb, thiab tsis lam ceev ib yam dab tsi cia dawb dawb li. Yog ib tug tib neeg twg tsis caum qhov tseeb mas, yam tsawg kawg lawv yuav tsum muaj peev xwm ua qee yam hauj lwm. Yog lawv haj tseem tsis xav ua hauj lwm ib qho me me li, los sis lawv tsuas yog siv zog me me kom tau noj ib kaug xwb, ces yuav tsum tau muab lawv rho tawm kom sai, lawv cov ntawv uas hais txog Vajtswv cov lus ntawd yuav tsum tau muab rov qab, thiab yuav tsum tau saib xyuas lawv yam li cov tsis ntseeg. Yam tsawg kawg mas, tib neeg yuav tsum ua lub siab dawb paug ntseeg Vajtswv, muaj ib lub siab hwm Vajtswv, thiab qhia qee yam kom pom tseeb txog txoj kev pe hawm Vajtswv kom pom tau tias tsim nyog nyob rau hauv Vajtswv lub tsev. Vajtswv lub tsev tsis hais kom tib neeg ua dab tsi ntau. Tsuav tib neeg muaj ib lub siab txawj xav thiab lub ntsiab, tuaj yeem to taub qhov tseeb thiab lees txais qhov tseeb, thiab mob siab leg lawv tes dej num xwb, ces qhov ntawd yeej txaus lawm. Yam tsawg kawg mas, koj tus cwj pwm thiab txoj kev koj ua yuav tsum txais yuav tau. Koj yuav tsum muaj ib lub siab hwm Vajtswv, thiab koj yuav tsum tau qhia qee qhov kev zwm rau Nws. Yog tias koj haj tseem ua tsis tau qhov ntawd, ces koj tsim nyog rov qab mus tsev thiab tsis txhob ua rau muaj kev kub ntxhov nyob rau hauv Vajtswv lub tsev lawm. Yog tias koj haj tseem tsis kam ua tes dej num uas me tshaj plaws, thiab tsuas xav nyob ywj siab hauv Vajtswv lub tsev xwb no, koj puas yog ib tug uas ua lub siab dawb paug ntseeg Vajtswv? Raws li Kuv xam pom mas, ib tug neeg zoo li no yog ib tug tsis ntseeg xwb, yeej tsis txawv tus tsis ntseeg li. Tsis xav pom lawv li lawm! Yog koj xav ntseeg Vajtswv, yuav tsum ntseeg kom zoo, yog tsis li ntawd tsis txhob ntseeg kiag li. Kev ntseeg Vajtswv yog yus yeem yus xwb. Tsis muaj leej twg yuam koj. Yog koj tsis to taub qhov me me no, yuav hais dab tsi ntxiv txog txoj kev ntseeg Vajtswv? Vajtswv lub tsev tsis xav tau cov tsis tsim nyog. Pawg ntseeg tsis yog ib qho chaw cawm siav. Cov uas twb tsis muaj txoj kev lees txais qhov tseeb uas yooj yim tshaj plaws ntawd yuav raug muab tshem tawm thiab muab ntsaig tawm mus! Qhov tseeb tswj kav nyob hauv Vajtswv lub tsev. Yog leej twg sim ua tej yam ruam ruam, los sis tsim kev tab kaum los sis kev cuam tshuam, ces yuav tsum muab lawv ntsaig tawm mus thiab muab tshem tawm mus kom tag.

7. Hauv kev ua hauj lwm thiab cov teeb meem ntawm pawg ntseeg, dhau li kev zwm rau Vajtswv lawm, ua raws li cov lus taw qhia ntawm tus tib neeg uas raug siv los ntawm tus Vajntsujplig hauv txhua yam. Txawm tias qhov kev ua txhaum cai me ntsis xwb los yog qhov txais yuav tsis tau kiag li. Ua neeg ncaj rau koj txoj kev ua raws, thiab tsis soj ntsuam qhov raug los sis tsis raug; qhov yog los sis qhov tsis yog tsis muaj dab tsi ua rau koj. Koj yuav tsum txhawj txog koj tus kheej kom muaj ua raws puv ntoob nkaus xwb.

Koj yuav tsum mloog thiab zwm rau tus tib neeg uas Vajntsujplig siv txawm nws yuav hais thiab ua dab tsi los xij. Ua yam uas nws twb qhia kom koj ua, uas yog ua li nws twb qhia kom koj ua lawm. Tsis txhob hais tias, “Vajtswv puas paub? Kuv yuav tsum nug Vajtswv tso.” Tsis tas yuav nug li, cia li ua yam uas tus tib neeg uas Vajntsujplig siv ntawd tau qhia kom koj ua lawm xwb. Koj puas to taub? Tsis tas yuav hais txog qhov no ntxiv lawm. Nej tsim nyog to taub qhov no meej heev li lawm.

8. Cov tib neeg ua ntseeg Vajtswv yuav tsum mloog Vajtswv lus thiab pe hawm Nws. Tsis txhob tsa los yog ntsia rau ib tug tib neeg twg; tsis txhob muab Vajtswv tso ua ntej, lwm tus tib neeg uas koj nrhiav rau zeeg ob, thiab koj tus kheej rau zeeg peb. Yuav tsum tsis muaj ib tug tib neeg twg tswj ib qho chaw hauv koj lub siab, thiab koj yuav tsum tsis txhob xav txog tib neeg—tshwj xeeb yog cov koj hwm—kom sib luag nrog Vajtswv los sis ua kom nws sib txig sib luag nrog Nws. Qhov no yog yam uas nyiaj tsis tau rau Vajtswv.

Ib txhia tib neeg mas tshwj xeeb muaj peev xwm dhia mus koom cov neeg coob coob thiab ua txuj qhuas lwm tus. Yog lawv pom Kuv qhuas thiab ua zoo rau leej twg, los sis pheej siv sij hawm los qhia, mas lawv ua txuj mus qhuas tus ntawd. Ua rau lawv muaj lub siab uas muaj ib txoj kev xav phem: Tam sim no tom qab Vajtswv los rau tus kwv tij no lawm, ces tom qab ntawd lawv los rau tus muam no. Tsis txhob muaj qhov ua ib qib ib qib nyob rau hauv koj lub siab: Vajtswv yog tus ib, lwm tus yog tus ob, tus peb, los sis tus plaub.... Tej kev muab ua ib qib ib qib zoo li no puas muaj ib lub hom phiaj dab tsi li? Qhov no tsis yog tsuas zoo li ib qho chaw huab tais nyob, uas huab tais ua tus ib, tus thawj tswj uas loj tshaj plaws yog tus ob, hos lwm tus nom tswv yog tus peb xwb lod? Tsis muaj tej kev ua ib qib ib qib zoo li no nyob rau hauv Vajtswv lub tsev li, tsuas muaj Vajtswv thiab cov neeg Vajtswv xaiv xwb, thiab cov neeg Vajtswv xaiv yuav tsum zwm rau Vajtswv thiab pe hawm Vajtswv nkaus xwb! Qhov tseeb tiag, nej txhua tus muaj vaj huam sib luag xwb. Tsis hais nej lees txais Vajtswv ua ntej los sis ua qab, thiab tsis hais nej yuav yog poj niam los txiv neej, hnub nyoog pes tsawg xyoo, los sis muaj peev xwm los tsis muaj li, Vajtswv pom hais tias nej txhua tus yeej muaj vaj huam sib luag xwb. Tsis txhob pe hawm tib neeg, thiab tsis txhob xav txog koj tus kheej ntau heev dhau lawm. Tsis txhob tsim tej kev ua ib qib ib qib los sis tej kev muab ua ib qib ib ntawd. Yog koj ua li ntawd, ces qhov ntawd ua tau pov thawj qhia hais tias yam uas nyob rau hauv koj lub siab ntawd twb tsuas nrog noob neej tej kev xav phem thiab tej kev xav hauv nruab siab ntau heev lawm, yog li ntawd ntxim zoo li koj yuav ua txhaum tej kev cai tswj fwm ntawd.

9. Tswj koj cov kev xav kom nyob rau hauv tes dej num ntawm pawg ntseeg. Muab txoj kev cia siab ntawm koj cev nqaij daim tawv tso rau ib sab, txiav txim siab txog teeb meem hauv tsev neeg, mob siab rau muab koj tus kheej lub siab tag nrho rau Vajtswv tes dej num, thiab muab Vajtswv tes dej num tso ua ntej thiab ua koj lub neej tuaj tom qab. Nov yog kev coj noj coj ua ntawm ib tug neeg dawb huv.

10. Tej txheeb ze uas tsis muaj kev ntseeg (koj cov me nyuam, koj tus txiv los sis tus poj niam, koj cov viv ncaus los sis koj niam thiab koj txiv, thiab lwm tus) yuav tsum tsis txhob raug yuam mus rau pawg ntseeg. Vajtswv tsev neeg tsis yog muaj tswv cuab tsawg, thiab tsis tas yuav ntxias cov neeg siv tsis tau. Txhua tus uas tsis zoo siab ntseeg yuav tsum tsis txhob raug coj mus rau pawg ntseeg. Txoj kev cai no yog qhia rau txhua tus tib neeg. Nej yuav tsum xyuas, saib xyuas, thiab sib ceeb toom kom txhua tus nco qhov teeb meem no; tsis pub kom muaj ib tus twg ua txhaum nws. Txawm hais tias cov txheeb ze uas tsis ntseeg nkag mus hauv tsev teev hawm yam tsis txaus siab hlo, lawv yuav tsum tsis txhob tau txais phau ntawv los sis tsis txhob muab npe tshiab; cov tib neeg zoo li no tsis yog Vajtswv tsev neeg, thiab lawv txoj kev nkag mus hauv pawg ntseeg yuav tsum raug cheem los ntawm txhua txoj hau kev uas tsim nyog. Yog tias muaj teeb meem rau pawg ntseeg vim muaj kev cuam tshuam ntawm tej dab, ces koj tus kheej yuav raug ntiab tawm los sis yuav muaj kev txwv rau koj. Muab hais luv luv tias, txhua tus tib neeg muaj lub luag hauj lwm hauv qhov teeb meem no, txawm li cas los koj yuav tsum tsis txhob ua dog dig, los sis tsis txhob siv nws los daws tej teeb meem ntawm yus ntiag tug.

Cov no yog Vajtswv kaum txoj kev cai tswj fwm uas cov neeg Vajtswv xaiv yuav tsum tau ua raws nyob rau ntawm Tiam Lub Nceeg Vaj. Nco kom tau tag nrho cov kev cai tswj fwm no.

Xyoo 1995 Yuav Tag