Nyob Rau Hauv Kev Ntseeg Vajtswv Mas, Qhov Xaiv Txoj Kev Yog ntawd Yog Qhov Tseeb Ceeb Tshaj Plaws

Nyob rau lub sij hawm uas tshaj tawm Vajtswv txoj moo zoo nyob rau tiam kawg no, cov tib neeg uas muaj peev xwm tso lawv tsev neeg tseg thiab tso txhua yam tseg es muab lawv tus kheej fij rau Vajtswv tiag tiag ntawd tsuas muaj tsawg tsawg xwb. Tag nrho cov tib neeg no muaj ib co lus tim khawv uas hais txog txoj kev ntsib kev pom uas muaj tseeb, thiab lawv txhua tus muaj qee qhov kev loj hlob. Lawv tsis xav tias qhov muab lawv tsev neeg thiab tej hauj lwm tso tseg es los ua lawv tej dej num ntawd mas yog ib qho kev txom nyem loj heev. Tab txawm yog lawv yuav tsum tau mus li kaum xyoo, los sis mus tag ib sim neej tsis rov qab los tsev li lawm los, lawv yeej txaus siab ua li no. Lawv tsis xav hais tias nws yog ib qho uas ua nyuaj. Nov yog lub zog uas Vajntsujplig Dawb Huv muab rau lawv. Tiam sis txawm lawv txoj kev loj hlob yuav mus deb npaum li cas los xij, yeej mus tsis txog qib no li, vim txawm lawv to taub qee qhov tseeb los, lawv tseem tsis tau nkag mus rau hauv qhov tseeb qhov muaj tiag, thiab lawv tsis tau tau txais qhov tseeb. Lawv tsuas yog muaj lub siab dawb paug los muab lawv tus kheej fij rau Vajtswv me ntsis xwb. Yog ib tug tib neeg twg tau txiav txim siab los caum qhov tseeb, thiab Vajntsujplig Dawb Huv muab txoj hmoov hlub uas loj tshaj plaws rau nws lawm, mas nws yuav txaus siab heev rau lub sij hawm ntawd; nws muaj zog, thiab muaj peev xwm tawm ntawm lub ntiaj teb tej kev khi los ua hauj lwm rau Vajtswv—qhov no yog Vajtswv txoj hmoov hlub. Tiam sis muaj qee tus neeg uas tsis mob siab rau ua lawv tes hauj lwm kom zoo thaum ua lawv tej dej num; lawv tsis caum qhov tseeb kiag li, thiab tshaj ntawd ntxiv lawv muaj peev xwm ua txhua hom kev txhaum thiab. Tej uas zoo li no, Vajntsujplig Dawb Huv tsis ua hauj lwm nyob rau hauv lawv. Qhov tib neeg muaj siab zoo li no mas tsis yog lawm, thiab lawv tsis yog cov ntseeg Vajtswv tseeb. Tab txawm yog yav dhau los Vajntsujplig Dawb Huv ua hauj lwm nyob rau hauv lawv me ntsis los xij, qhov ntawd tsis muaj nuj nqis li, thiab tos nco xwb, lawv twb taug txoj kev nqes hav lawm. Yog koj yog ib tug tib neeg uas muaj qhov txiav txim siab los caum qhov tseeb, mas Vajntsujplig Dawb Huv yuav muab qee qhov hmoov hlub rau koj kom koj xyiv fab, ces tom qab ntawd koj mam li taug txoj kev uas Vajntsujplig Dawb Huv coj koj ntawd mus rau tom ntej; koj yuav paub qhov tseeb tseeb zuj zus, koj txoj kev txiav txim siab yuav khov zuj zus, thiab yuav yooj yim rau Vajntsujplig Dawb Huv los ua hauj lwm rau hauv koj zuj zus. Thaum ib tug tib neeg twg tsis taug txoj kev yog uas caum qhov tseeb, ces thaum kawg Vajntsujplig Dawb Huv yuav muab tus tib neeg ntawd tshem tawm mus. Tom qab raug muab tshem tawm mus lawm, lawv txoj kev txiav txim siab thaum xub thawj, lawv txoj kev mob siab thaum xub thawj, thiab qhov lawv muaj siab los tso tseg thiab siv txhua yam ntawd ploj tag nrho li lawm. Lawv tu siab, thiab lawv xav hais tias, “Yog kuv paub hais tias muaj ib hnub kuv yuav raug muab tshem tawm mus, mas ntshe thaum xub thawj kuv twb tsis ntseeg Vajtswv.” Thaum zoo li no lawm, lawv txoj kev tu siab, tej lus yws, thiab txoj kev xav phem tawm tuaj tag nrho. Tseeb tiag, Vajntsujplig Dawb Huv twb tsis ua hauj lwm rau hauv lawv ntev los lawm. Tab txawm lawv tshaj tawm txoj moo zoo, txawj hais lus, thiab ua tau qee yam zoo los xij, qhov no tsis yog vim Vajntsujplig Dawb Huv txoj kev qhuab qhia thiab kev coj kev. Tiam sis nws yog vim tus tib neeg no muaj qee qhov kev txawj ntse thiab qee qhov peev xwm xwb. Qhov no tsis tau txhais hais tias Vajntsujplig Dawb Huv ua hauj lwm nyob rau hauv lawv. Lawv zoo ib yam li cov neeg ua hauj lwm—tab txawm Vajntsujplig Dawb Huv tsis ua hauj lwm nyob rau hauv lawv los, lawv tseem muaj peev xwm ua tau hauj lwm me nsis li ib ntus thiab. Txawm lawv yuav muaj qee qhov kev txawj thiab peev xwm los xij; lawv tsis yog caum qhov tseeb, thiab siv zog ua lawv tej dej num kom zoo thiab pauj Vajtswv txoj kev hlub hos, lawv caum lub koob lub npe, txiaj ntsim, lub meej mom, koob hmoov, thiab ib lub kaus mom kub loj xwb. Yog li ntawd, thaum lawv taug kev mus, lawv txoj kev cia li ploj lawm, thiab ua rau lawv tab txawm nro ib kauj ruam xwb los twb nyuaj lawm. Txhua tus uas tsis caum qhov tseeb yuav zoo li no.

Tam sim no, muaj ntau tus tib neeg uas hais tias, “Kuv paub hais tias kuv tus yam ntxwv tsis zoo. Kuv npau taws thiab kuv ntxeev siab heev.” Tiam sis txawm zoo li no los, cov tib neeg no tsis muaj kev paub txog lawv tus kheej tus yam ntxwv, thiab lawv tsis to taub ib qho dab tsi txog qhov tseeb li. Txawm lawv yuav hais tau lus zoo npaum li cas txog tej kev qhuab qhia, zoo li to taub txhua yam los xij, lawv muab tsis tau tej no coj los xyaum ua li. Qhov no twb tshaj qhov ua tau pov thawj qhia hais tias Vajntsujplig Dawb Huv tes hauj lwm uas ua rau hauv lawv ntawd twb ploj mus lawm. Txawm koj txoj kev ua neej yuav zoo li cas, los sis koj yuav to taub tej kev qhuab qhia ntawd ntau npaum li cas, thiab txawm koj yuav raug kev txom nyem los sis tso tseg ntau npaum li cas los xij, tsuav Vajntsujplig Dawb Huv tsis ua hauj lwm rau hauv koj xwb, ces qhov no ua tau pov thawj qhia hais tias koj tsis nyiam qhov tseeb lawm. Txawm koj yuav kub siab npaum li cas los xij, yog tsis muaj Vajntsujplig Dawb Huv tes hauj lwm ces koj yuav tsis paub dab tsi li. Lub zog me me uas tib neeg muaj ntawd loj npaum li cas? Txoj kev ntseeg me me uas tib neeg muaj ntawd loj npaum li cas? Txoj kev paub me me uas tib neeg muaj ntawd muaj nuj nqis dab tsi? Muab txoj kev caij tsuj, kev ntes, thiab kev kaw cov ntseeg Vajtswv ntawd los ua piv txwv. Lawv raug tsim txom, raug caum, thiab raug yuam kom khiav ntawm ib qho chaw mus rau ib qho chaw txij thaum lawv pib ntseeg Vajtswv los, yog li ntawd qhov no thiaj li ua rau hauv lawv lub siab lub ntsws muaj ib lub cim uas tshem tsis tau tawm mus li lawm. “Yog kuv raug ntes, kuv yuav ua tsis tau li Yudas; kuv yeej tsis ntxeev siab rau pawg ntseeg li”—tib neeg feem coob tsis npaj lawv tus kheej zoo li no lod? Tiam sis thaum lawv raug ntes tiag tiag lawm, tsis yog nyob ntawm lawv xwb. Yog lawv tsis thov Vajtswv thiab tsis vam khom rau Nws, ces Vajntsujplig Dawb Huv yuav tsis ua hauj lwm nyob rau hauv lawv, thiab lawv yuav sawv tsis tau khov kho. Qhov ua rau tib neeg dhau los zoo li Yudas no tsis yog ib lub sij hawm uas paub tsis meej. Ib yam li Kuv tau hais yav dhau los lawm hais tias, qhov uas thaum kawg tshwm sim rau koj, thiab qhov kawg ntawm koj yuav zoo li cas ntawd, yog nyob ntawm qhov seb koj puas nyiam thiab puas lees txais qhov tseeb xwb. Qhov no yog qhov tseem ceeb tshaj plaws. Tom qab ntawd, yog nyob ntawm qhov seb koj puas muaj Vajntsujplig Dawb Huv tes hauj lwm tas li, thiab seb koj puas to taub qhov tseeb thiab puas tuav koj tej lus tim khawv kom khov kho xwb. Tej no yog tej tseem ceeb uas nyob ntawm tej no xwb. Ib txhia tib neeg mas kub siab heev thaum lawv xub pib ua lawv tej dej num, thiab mloog cuag nkaus li lawv muaj lub zog uas tsis paub ntaug li. Yog li vim li cas tsis ntev xwb lawv thiaj li pib tsis muaj lub zog no lawm? Yav dhau los thiab tam sim no zoo li lawv yog ob hom tib neeg uas sib txawv hlo li lawm—vim li cas lawv thiaj li hloov lawm? Qhov no yog vim dab tsi? Twb yog vim lawv taug txoj kev uas yuam kev lawm, thiab tsis nkag mus rau hauv txoj kev uas yog ntawm txoj kev ntseeg Vajtswv. Lawv taug txoj kev uas caum koob hmoov lawm. Muaj qee yam zais nyob rau hauv lawv tej kev npaj siab. Tej uas zais ntawd yog dab tsi? Thaum tib neeg ntseeg Vajtswv, lawv muaj qee qhov kev cia siab hauv lawv lub siab—lawv cia siab hais tias Vajtswv hnub yuav los txog sai sai, thiab tias tag nrho lawv tej kev txom nyem yuav xaus mus, lawv cia siab hais tias Vajtswv yuav hloov dua lub cev thiab rov qab mus rau saum Xi-oos, thiab tias tom qab ntawd lawv yuav tshem tau tag nrho lawv tej kev txom nyem tawm mus. Txhua tus tib neeg cia siab hais tias muaj ib hnub lawv yuav tau rov qab mus tsev thiab tau mus nrog cov uas lawv hlub nyob ua ke dua. Lawv cia siab hais tias yuav muaj ib hnub uas lawv yuav tsis raug tsim txom ntxiv lawm, uas lawv yuav dim tiag tiag, thiab tab meeg ntseeg Vajtswv; nyob rau lub sij hawm ntawd, yuav tsis muaj leej twg txwv lawv, thiab lawv yuav tau nyob ib qho chaw tau zoo, tau noj qab hnav zoo. Txhua tus tib neeg tsis muaj tej kev cia siab zoo li no lod? Tej kev cia siab no muaj nyob rau hauv tib neeg nruab siab vim lawv lub cev nqaij daim tawv tsis nyiam txoj kev txom nyem. Thaum raug kev txom nyem, lawv cia siab tias yeej yuav muaj hnub zoo xwb. Tej no yog tsis muaj kev tsim txom thiab kev txom nyem ces yeej tsis tshwm tuaj li. Yog tsis muaj kev tsim txom los sis kev txom nyem, mas zoo li tib neeg muaj txoj kev ntseeg ruaj khov heev. Zoo li lawv muaj kev loj hlob, to taub qhov tseeb zoo heev, thiab muaj zog heev. Txawm li cas los xij, muaj ib hnub thaum lawv raug kev tsim txom thiab kev txom nyem lawm, lawv tej kev cia siab, tej kev xav hauv nruab siab thiab tej kev ntshaw tshaj plaws ntawm sab cev nqaij daim tawv ntawd mam li tshwm tuaj. Kev cov nyom pib tshwm nyob rau hauv lawv lub siab, thiab ib txhia tib neeg pib xav phem thiab qaug zog, thiab tej kev ua xyem xyav thiab tej kev to taub yuam kev txog Vajtswv ntawd tshwm tuaj rau hauv lawv. Tib neeg tsis to taub Vajtswv qhov kev npaj siab. Tsis yog hais tias Vajtswv tsis muab ib txoj hauv kev tawm rau lawv los sis muab Nws txoj hmoov hlub rau lawv, thiab yeej tsis yog hais tias Vajtswv tsis to taub lawv tej kev nyuaj. Tiam sis, qhov uas tam sim no koj tau ntsib tau pom qhov kev txom nyem uas koj tab tom raws Khetos qab no mas yog ib qho koob hmoov, vim hais tias yog tsis muaj qhov nyiaj txoj kev txom nyem no ces yeej yuav tsis muaj hnub uas tib neeg yuav tau txais txoj kev cawm dim thiab ciaj sia li. Vajtswv yeej npaj qhov no tseg lawm, yog li ntawd qhov txoj kev txom nyem no los raug rau koj mas yog ib qho koob hmoov xwb. Koj yuav tsum tsis txhob saib qhov no yam yooj yooj yim; nws tsis yog ib qho uas ua rau tib neeg raug kev txom nyem thiab muab lawv ua si, ces tag li ntawd. Qhov tseem ceeb ntawm qhov no mas tob thiab zoo heev! Qhov muab tag nrho koj lub neej txoj sia los fij koj tus kheej rau Vajtswv yam tsis nrhiav ib tug txij nkawm los sis tsis rov qab los tsev ntawd mas muaj nuj nqis heev. Yog koj taug txoj kev yog thiab caum yam yog, ces thaum kawg koj yuav tau txais ntau dua li cov neeg dawb huv tau txais nyob rau txhua txhua tiam, thiab tau txais cov lus cog tseg uas haj yam zoo dua. Tam sim no ib txhia tib neeg pheej xav hais tias, “Vajtswv puas yuav nco ntsoov kuv txog qhov kuv nyiaj tej kev txom nyem no? Yog tsis muaj leej twg txhawb kuv thaum kuv laus ne yuav ua li cas? Leej twg yuav saib xyuas kuv yog kuv muaj mob? Vajtswv puas saib xyuas? Thaum twg es qhov kev txom nyem no mam li xaus? Thaum twg kuv mam li pom txoj kev tshav ntuj?” Cov tib neeg zoo li no yeej ib txwm tos ntsoov tej no xwb, cia siab hais tias Vajtswv yuav hloov cev thiab cawm lawv kom dim ntawm txoj kev txom nyem kom lawv thiaj li tau txais tej koob hmoov ntawm lub nceeg vaj saum ntuj ceeb tsheej. Lawv tsis ua tib zoo xav seb qhov tseem ceeb ntawm txoj kev raws Vajtswv qab thiab qhov nyiaj kev txom nyem ntawd yog dab tsi, los sis vim li cas lawv thiaj li yuav tsum tau nyiaj txoj kev txom nyem no kom tau txais qhov tseeb. Lawv txoj kev ntseeg yeej tsis muaj zog kiag li! Thaum hais txog lawv txoj kev ntseeg Vajtswv, mas nyias muaj nyias tej kev xav uas twm twm xeeb xwb. Raws li qhov no mas, qhov ntxeev siab rau Vajtswv ntawd yog tib neeg tus yam ntxwv ntag. Tsis muaj leej twg hlub Vajtswv tiag tiag, tsis muaj leej twg tuaj yeem ua tib zoo xav txog Vajtswv tej kev npaj siab tiag tiag, los sis nrog Vajtswv koom ua ib lub siab lub ntsws los nthuav txoj moo zoo li. Tib neeg tos tsis taus kom Vajtswv tawm ntawm lub ntiaj teb no mus hloov cev, kom Nws thiaj li cawm tau lawv dim ntawm txoj kev txom nyem thiab ua rau lawv tau lub neej uas nyob rau hauv lub nceeg vaj saum ntuj ceeb tsheej li. Qhov no yog qhov uas tib neeg feem coob cia siab rau. Ntau tus tib neeg xav hauv lawv tus kheej hais tias, “Yog Vajtswv tawm ntawm peb mus thiab tus zaj loj liab ploog ntawd ntog, ces peb yuav tau lub hwj chim, thiab peb yuav tsis tau raug kev txom nyem ntxiv lawm. Peb yuav xuas ib tug pas hlau los kav tag nrho txhua haiv neeg thiab txhua tus tib neeg—thaum ntawd peb yuav tsis pom txoj kev tshav ntuj lod? Nyob rau lub sij hawm ntawd, Vajtswv yuav tab meeg tshwm los thiab rau txim thiab rhuav tshem txhua tus Ntxwgnyoog thiab dab phem, Khetos lub nceeg vaj yuav tshwm nyob rau hauv ntiaj teb, thiab peb yuav tsis raug Ntxwgnyoog thiab cov dab phem tsim txom ntxiv lawm.” Txawm qhov muaj qhov kev cia siab no tsis txhaum los xij, cov tib neeg no muaj qee tus yam ntxwv uas tsis yog lawm. Qhov pheej xav kom dim ntawm txoj kev txom nyem es kom tau zoo ntawd puas yog txoj kev ua tib zoo xav txog Vajtswv tej kev npaj siab? Qhov ua li ntawd puas ua rau Vajtswv txaus siab? Tib neeg feem coob tsis to taub txog qhov tseem ceeb ntawm txoj kev raug kev txom nyem tiag tiag.

Tsis muaj leej twg npaj siab los taug txoj kev uas raws Vajtswv qab kom mus tag lawv sim neej, los caum qhov tseeb kom tau txoj sia, kom muaj kev paub txog Vajtswv, kom ua tau tim khawv rau Nws, los sis kom thaum kawg ua tau ib lub neej uas muaj nuj nqis li Petus li. Tib neeg feem coob tsis kam raug kev txom nyem thiab tsis lees txais qhov tseeb kiag li, tiam sis lawv xav kom tau tej koob hmoov ntawm lub nceeg vaj saum ntuj ceeb tsheej kom sai li sai tau, thiab nyiam nrhiav lub koob lub npe, nqi zog, thiab txiaj ntsim ntawm lub meej mom xwb. Qhov no yuav coj lawv mus yuam kev. Thaum lawv muaj qhov mob, tej uas ua tsis tau zoo, los sis ua tsis tiav, mas lawv yuav xav phem thiab qaug zog, thiab tsis muaj Vajtswv nyob rau hauv lawv lub siab lawm. Vajntsujplig Dawb Huv yuav tsis ua hauj lwm rau hauv lawv, thiab ib txhia tib neeg haj tseem xav thim rov qab thiab. Yog ib tug tib neeg twg twb ntseeg Vajtswv tau ntau xyoo lawm, tiam sis tsis muaj qhov tseeb qhov muaj tiag ib qho me me li, mas qhov ntawd yog ib qho uas phom sij heev! Cas yuav txaus hlub ua luaj uas tag nrho tej kev txom nyem uas lawv raug, tej lus qhuab qhia uas lawv mloog, thiab ntau lub xyoo uas lawv tau raws Vajtswv qab ntawd, puav leej tsis muaj qab hau dab tsi li! Qhov tib neeg poob qis mas yooj yim, hos qhov los taug txoj kev yog, thiab los xaiv Petus txoj kev mas nyuaj. Tib neeg feem coob muaj txoj kev xav uas tsis meej. Lawv tsis tuaj yeem pom kom tseeb tseeb hais tias txoj kev twg yog txoj yog thiab qhov twg yog qhov txawv ntawm txoj kev yog ntawd. Txawm lawv yuav hnov cov lus qhuab qhia ntau npaum li cas, thiab txawm lawv yuav nyeem Vajtswv cov lus ntau npaum li cas, tab txawm lawv paub hauv lawv lub siab hais tias tus Neeg Leej Tub uas yug los ua neeg ntawd twb los lawm los xij, lawv yeej tseem tsis ntseeg Nws tag nrho li thiab. Lawv paub hais tias qhov no yog txoj kev tseeb, tiam sis pib taug txoj kev no tsis tau li. Nws nyuaj npaum li cas uas los cawm tib neeg yog lawv tsis nyiam qhov tseeb! Koj paub hais tias Vajtswv txoj lus yog qhov tseeb, tiam sis koj tsis kam lees txais txoj lus ntawd li. Cia peb tsis txhob hais txog qhov zoo ntawm koj txoj kev ntseeg lawm es cia li tham txog tias vim li cas koj thiaj li tsis muaj qhov nyiam qhov tseeb, thiab vim li cas koj thiaj li tsis kam lees txais qhov tseeb xwb. Koj tsis muaj peev xwm pib taug txoj kev tseeb, tsis kam caum qhov tseeb, thiab tsis muaj peev xwm muab qhov tseeb uas koj to taub ntawd coj los xyaum ua. Koj tsis zoo ib yam li Ntxwgnyoog lod? Cov tib neeg zoo li no tsis muaj lub hom phiaj los sis txoj hauv kev nyob rau hauv lub neej, lawv tsis muaj txoj kev ua neej, zoo li tej tsiaj xwb. Yog li ntawd, ib txhia tib neeg thiaj li plam Vajntsujplig Dawb Huv tes hauj lwm, tsis yog vim Vajntsujplig Dawb Huv txhob txwm tsis ua hauj lwm rau hauv lawv thiab txhob txwm muab lawv nthuav tawm, tiam sis yog vim Nws ua tsis tau hauj lwm rau hauv lawv. Nyob rau sab hauv mas tib neeg qias vuab tsuab heev thiab saib xyuas lawv nyuaj heev. Yog lawv tsis caum qhov tseeb los sis xaiv txoj kev yog no, Vajntsujplig Dawb Huv yuav ua li cas ua tau hauj lwm rau hauv lawv? Thaum twg uas Vajntsujplig Dawb Huv ua hauj lwm mas Nws yeej ib txwm cia tib neeg xaiv xwb, Nws yeej tsis yuam leej twg li. Tiam sis tib neeg txoj kev xav mas nyuaj dhau lawm. Lawv tsis nyiam qhov tseeb los sis tsis lees txais qhov tseeb kiag li, thiab lawv haj tseem tsis kam raug kev txom nyem kom tau txais qhov tseeb thiab. Txawm lawv xav kom tau koob hmoov los xij, lawv tsis kam siv zog los sis tiv kev txom nyem li. Lawv txoj kev twm xeeb mas loj dhau lawm. Lawv tsuas yog txhawj txog lawv tej kev ntshaw tam sim ntawd xwb; lawv caum thiab siv zog rau tej uas nyob ntawm lawv ob lub qhov muag hauv ntej uas lawv pom thiab xyiv fab xwb, hos lawv tsis quav ntsej tej uas lawv tsis pom, los sis tej uas lawv pom hais tias tsis muaj qab hau li. Qhov no yog qhov uas tib neeg feem coob zoo li no, thiab yuav luag tsis muaj chaw rau Vajntsujplig Dawb Huv tes hauj lwm li. Ib txhia hais tias, “Kuv muaj ntau yam teeb meem uas kuv daws tsis tau. Yog muaj neeg qhia kuv thiab pab kuv kom to taub qhov tseeb mas ntshe kuv twb tsis muaj teeb meem lawm.” Tiam sis lawv daws puas tau lawv tej teeb meem los ntawm qhov to taub qhov tseeb tiag tiag? Lawv puas muaj peev xwm muab qhov tseeb coj los xyaum ua? Tag nrho tej no puas leej tsis paub. Muaj ntau tus tib neeg uas tau hnov cov lus qhuab qhia ntau heev thiab to taub qhov tseeb ntau heev, tiam sis lawv tsis muaj peev xwm muab ib qho ntawm qhov tseeb ntawd coj los xyaum ua li. Yog koj nug lawv txog lawv tej teeb meem, mas lawv hais tias, “Kuv to taub tag nrho txhua qhov tseeb li lawm, tiam sis tsuas yog kuv muab coj los xyaum ua tsis tau xwb. Kuv yuav ua li cas thiaj li daws tau qhov teeb meem no?” Yog koj xyaum ua qhov tseeb tsis tau ib qho li no qhov ntseeg Vajtswv ntawd muaj nuj nqis dab tsi? Kav tsij maj nroos mus tsev es mus ua koj lub neej xwb. Qhov qhia txog qhov tseeb rau koj ntawd muaj nuj nqis dab tsi? Koj tsis tsim nyog hnov qhov tseeb, thiab tsis tsim nyog ntseeg Vajtswv, yog li ntawd koj tsim nyog tos kom txog thaum koj puas tsuaj xwb! Vim koj twb xaiv txoj kev uas tsis zoo, nyuaj, thiab phem lawm, txawm twb qhia qhov tseeb rau koj ntau npaum li cas lawm los xij, koj yuav tsis lees txais qhov tseeb ntawd li. Yog li ntawd, koj yuav tsum tso tseg! Tsis muaj dab tsi uas yuav tsum tau hais rau cov tib neeg zoo li no lawm. Muaj ntau tus uas tau hais ua ntej lawm hais tias, “Kuv to taub tag nrho txhua qhov tseeb lawm, tiam sis tsuas yog kuv muab coj los xyaum ua tsis tau xwb.” Tib lo lus no xwb twb txaus los ua pov thawj qhia lawm hais tias lawv yog ib tug dab phem thiab zoo ib yam nkaus li Ntxwgnyoog ntag. Yog ib tug tib neeg twg tsis nyiam qhov tseeb, ces tus tib neeg ntawd yeej phem. Tib neeg tus yam ntxwv yeej sawv cev rau yam uas lawv nyiam, yam uas lawv cia siab rau, yam uas lawv ntshaw, thiab yam uas lawv xav tau. Yog koj tsis nyiam qhov tseeb, ces koj yog dab phem li xwb thiab koj yuav puas tsuaj mus. Tiam sis yog koj nyiam qhov tseeb, ces yog Vajtswv twb teem tseg ua ntej thiab xaiv koj lawm. Tsis yog li no lod? Txoj kev uas koj xaiv yog qhov tseem ceeb tshaj plaws. Koj tuaj yeem ua siab ntxias ntxias thiab ua tib zoo xav txog qhov no tiag tiag; yog koj yuam kev lawm, nws tseem tsis tau lig dhau uas tig rov qab los. Yog koj muaj lub siab uas xav muab qhov tseeb coj los xyaum ua, ces qhov no yog ib qho zoo. Tsis tas li ntawd xwb, koj yuav tsum muaj ib txoj hauv kev tias yuav ua li cas es thiaj li tau raws li koj lub siab nyiam no thiab tau raws li koj qhov kev xav tau. Ua ntej tshaj plaws, koj yuav tsum to taub qhov tseeb, paub tib neeg ntiaj teb lub hom phiaj yav tom ntej, txoj kev uas tib neeg ntiaj teb tsim nyog taug thiab tej hom phiaj uas lawv tsim nyog ua kom tiav ntawd. Yav dhau los, pheej hais tias, “Tag nrho txhua yam thiab xwm txheej puav leej yog nyob rau hauv Vajtswv ob txhais tes.” Qhov no yog ib yam uas koj yuav tsum paub kom zoo. Nyob rau hauv txhua yam, koj yuav tsum xav seb qhov ntawd puas yog nyob rau hauv Vajtswv ob txhais tes. Yog koj yeej paub tseeb tseeb hais tias tag nrho txhua yam thiab tej xwm txheej ntawd puav leej yog nyob rau hauv Vajtswv ob txhais tes lawm, ces koj yeej muaj txoj kev ntseeg tiag tiag. Yog koj ntseeg Vajtswv, puas tsim nyog koj zwm rau Nws? Dab tsi yog qhov tseem ceeb ntawm txoj kev ntseeg Vajtswv? Lub hom phiaj ntawm txoj kev ntseeg Vajtswv puas yog kom tau txais Nws tej koob hmoov xwb? Tam sim no koj tab tom raws Khetos qab nyob rau hauv koj txoj kev ntseeg Vajtswv, tiam sis koj puas yuav muaj peev xwm ua li no mus kom txog thaum kawg kiag? Koj yuav tsum ua li cas txuas ntxiv thaum koj ntsib teeb meem thiab kev txom nyem nyob rau ntawm koj txoj kev yav tom ntej? Koj yuav tsum muab Vajtswv cov lus uas tseem ceeb los ua cov lus txhawb koj tus kheej lub zog, kom koj thiaj li yuav tsis ntog, tsis qaug zog los sis tsis xav phem, tsis yws txog Vajtswv, tsis khiav tawm ntawm txoj kev, los sis ntxeev siab rau Vajtswv los ntawm qhov mus txog nrab ke xwb khiav lawm. Koj yuav tsum to taub, paub kom meej, thiab to taub txhua yam kom ntxaws ntxaws es thiaj li yuav raws tau Vajtswv qab mus kom txog thaum kawg kiag.

Txoj kev raws Vajtswv qab ntawd mas muaj qhov nce thiab qhov nqis, nws muaj qhov iab thiab qhov qab zib. Thaum tib neeg zoo siab, mas lawv txhua tus hais tau hais tias, “Kuv txaus siab hlo muab kuv tus kheej fij rau Vajtswv, kuv yuav muab tag nrho kuv lub neej fij rau Nws.” Txawm li cas los xij, muaj qee qhov lawv ua tsis tau zoo thiab xav phem. Hauv lawv lub siab, lawv xav paub seb, “Vajtswv nyob qhov twg? Kuv ntseeg mus ntxiv tsis tau lawm, txoj kev no taug nyuaj dhau lawm!” Tom qab ntawd, lawv thov Vajtswv thiab mloog zoo li lawv raug cem, xav hais tias lawv tshuav Vajtswv nuj nqis. Lawv yuav tsum tsum tsis txhob ua li no tom qab lawv paub hais tias lawv tshuav Vajtswv nuj nqis. Txawm li cas los xij, tej zaum muaj ib hnub txhua yam yuav tsis mus raws li lawv xav, thiab thaum lawv xav phem thiab yws txog Vajtswv hais tias, “Yog ua cas Vajtswv thiaj li npaj qhov xwm txheej no rau kuv? Vim li cas Nws thiaj li pheej ua rau kuv raug kev txom nyem? Nws ua kom kuv txhob raug kev txom nyem tsis tau lod? Tib neeg yeej ib txwm yws tas li, tiam sis tom qab ntawd lawv hos pheej hais tias lawv tshuav Vajtswv nuj nqis thiab. Txawm li ntawd los xij, lawv yeej tsis hloov li; thaum lawv ua tau ib qho tsis zoo los sis ib qho me me uas tsis mus raws li lawv xav, mas lawv npau taws thiab yws. Qhov phem tshaj plaws yog, ib txhia tib neeg haj tseem hais ob peb lo lus uas txiav txim thiab tuam mom thiab. Tom qab ntawd, lawv mam li paub hais tias qhov lawv hais ntawd tsis yog lawm, thiab tu siab rau qhov lawv hais ntawd, yog li ntawd lawv thiaj li maj nroos los ua lawv tej dej num me ntsis thiab ua ob peb qho dej num zoo los txhiv lawv tus kheej. Tej kev qhia kom pom tseeb no qhia peb li cas? Qhia hais tias qhov ntawd yog tib neeg tus yam ntxwv tsis nyiam qhov tseeb, los sis haj tseem ntxub qhov tseeb thiab. Tib neeg phem, dag tuag heev, thiab tsis muaj kev xav thiab qhov tsim nyog li. Tib neeg ntseeg Vajtswv cuag nkaus li lawv ua lag ua luam; lawv thov Vajtswv thaum lawv tim tsum Nws nkaus xwb, hos khiav ntawm Nws mus thaum lawv tsis tim tsum Nws lawm. Lawv tsis muaj Vajtswv nyob rau hauv lawv lub siab, thiab lawv ua li lawv nyiam xwb. Tib neeg txhua tus khav theeb heev thiab tsis paub tswj lub siab li; lawv tsis muaj lub siab uas ntshai Vajtswv los sis ntxub yam tsis zoo tiag tiag. Lawv tsis muaj qhov nyiam qhov tseeb tiag tiag thiab cais tsis tau qhov txawv ntawm txoj kev ncaj ncees thiab kev tsis ncaj ncees. Lawv tsis muaj ciaj ciam, tsis muaj hom phiaj, thiab lawv haj yam tsis muaj tej hauv paus ntsiab lus thiab qhov ncaj nruab nrab nyob rau hauv txhua yam uas lawv ua li. Lawv lub siab tsis zoo, thiab tawm tsam qhov keeb kwm no, lawv tseem tos ntsoov tias lo lus cog tseg ntawd yuav zoo npaum li cas, thiab lawv yuav tau txais koob hmoov ntau npaum li cas nyob rau yav tom ntej, los sis lawv yuav cais lawv tus kheej li cas tom qab ntawd, thiab tej uas lawv yuav muaj kev xyiv fab rau ntawd. Tsuas yog thaum lawv xav txog tej yam zoo li no xwb mas lawv thiaj li xav hauv lawv lub siab hais tias, “Vajtswv ntxim hlub heev! Kuv yuav tsum pauj Vajtswv txoj kev hlub!” Vim li cas lawv thiaj li hais tias Vajtswv ntxim hlub heev? Qhov lawv xav los pauj rov qab rau Vajtswv ntawd los qhov twg los? Tsis muaj ib qho kev npaj siab uas nyob tom qab cov lus no lod? Lawv tsuas yog hais qee yam raws li txoj kev xav vim qhov lawv nyiam uas nyob ib pliag, thiab qhov kev xyiv fab uas nyob ib ntus xwb—qhov no puas yog txoj kev to taub tiag tiag? Qhov no puas yog txoj kev hlub tiag? Qhov no puas yog tawm hauv lawv nruab siab tuaj? Yog koj yeej muaj ib txoj kev to taub zoo li no tiag tiag no, vim li cas koj thiaj li tseem yws? Yog koj yeej paub hais tias koj tshuav Vajtswv nuj nqis no, vim li cas koj thiaj li tseem hais ub hais no? Koj xav hais tias Vajtswv tsis zoo rau koj, yog li ntawd koj thiaj li tsis quav ntsej Nws. Yog Vajtswv tsis siv koj, ces koj tsis xav ua koj tes dej num. Nyob rau hauv nruab siab koj chim siab npaum li cas! Txawm zoo li no los xij, koj tseem ntseeg hais tias koj hlub Vajtswv tshaj lwm tus thiab. Txoj kev hlub Vajtswv tiag tiag no zoo li cas? Qhov uas tib neeg hais tau cov lus yws zoo li no tawm tuaj ntawd ua tau pov thawj qhia hais tias lawv tseem tsis muaj ib txoj kev to taub txog lawv tus kheej tus yam ntxwv. Lawv tseem tsis paub tias lawv zoo li cas, lawv yog leej twg tug, thiab lawv muaj nqis npaum li cas. Tseeb tiag, txhua tus tib neeg tus yam ntxwv puav leej tawm tsam Vajtswv thiab ntxeev siab rau Nws. Qhov no yog ib yam uas muaj thoob lub qab ntuj khwb thiab txhua tus tib neeg puav leej muaj. Tsis muaj leej twg nyiam qhov tseeb thiab yam zoo tiag tiag, ib yam li tsis muaj leej twg ntxub Ntxwgnyoog thiab yam phem tiag tiag thiab. Tib neeg txoj kev hlub thiab kev ntxub mas tsis muaj lub hauv paus ntsiab lus los sis ciaj ciam li, thiab tib neeg txoj kev hlub thiab kev ntxub haj yam tsis nyob rau hauv qhov tseeb hlo li thiab. Nyob rau hauv tib neeg lub siab mas, tsis muaj qhov txawv ntawm txoj kev ncaj ncees thiab kev tsis ncaj ncees, dub thiab dawb, thiab haj yam tsis muaj qhov txawv ntawm qhov tseeb thiab tej kev qhuab qhia los sis tej kev ntseeg uas yuam kev li. Tib neeg cais tsis tau tej no li. Lawv tsis paub meej txog yam uas tsim nyog hlub thiab tsim nyog caum, yam uas tsim nyog ntxub, thiab yam uas tsim nyog tsis kam txais yuav, thiab lawv tsis muaj ib qho kev thoob tsib to nrog li. Ib txhia tib neeg ua lawv tej dej num, thiab thaum lawv hnov cov tsis ntseeg hu nkauj hais tias, “Rov Qab Los Tsev Tas Li,” ces ua rau lawv nco tsev thiab tsis muaj siab ua lawv tej dej num li lawm. Hom tib neeg no yog tib neeg dab tsi? Lawv puas haj tseem muaj qhov tseeb qhov muaj tiag ib qho me me li? Ib txhia tib neeg ntseeg hais tias lawv tuaj yeem ua tau hauj lwm me ntsis, thiab tias lawv muaj qee qhov zoo. Tej zaum yuav zoo li lawv muaj qhov tseeb, tiam sis qhov tseeb tiag, lawv tsis muaj dab tsi li, thiab lawv tsis muaj nuj nqis dab tsi li. Txawm tam sim no koj muaj peev xwm tshaj tawm ob peb co lus qhuab qhia rau lwm tus los xij, tej zaum muaj ib hnub lwm tus yuav txhawb koj lub zog, thiab qhov koj ntog ntawd yuav phem dua li qhov lwm tus ntog, thiab koj haj yam yuav xav phem dua li lwm tus xav. Koj puas ntseeg li no? Nej puas ntseeg? Tej zaum nej tseem tsis tau ntsib qhov kev ntog uas nyuaj los sis muaj kev xav phem. Nej xav hais tias nej muaj zog heev, thiab vim nej tsis tau ntsib tej yam zoo li no es nej thiaj li ntseeg hais tias nej muaj kev loj hlob lawm. Tej zaum muaj ib hnub thaum nej raug muab nthuav tawm lawm, nej yuav quaj kua muag ntws si hais tias, “Tag li no. Kuv ces tag li no lawm!” Thaum no yog thaum nej yuav pib mus ib qho mus rau ib qho lawm. Muaj ntau tus tib neeg uas muaj zog heev thaum lawv xub los ntseeg Vajtswv, tiam sis thaum muaj tej yam los raug rau lawv, ces lawv cia li tsis muaj zog, thiab tsa tsis tau lawv tus kheej sawv li lawm. Nej puas pom cov tib neeg zoo li no muaj ib qho teeb meem li? Tsis muaj leej twg paub qhov lawv tus kheej ua tsis tau zoo thiab qhov ua tau zoo li; tej qias vuab tsuab uas zais nyob rau hauv tib neeg ntawd nthuav tawm nyob rau lub sij hawm twg thiab qhov chaw twg los tau. Nyob rau hauv tib neeg mas muaj qhov kev sib cog lus thiab kev qias neeg tas li xwb, tej yam zoo li no tshwm nyob rau hauv tib neeg tsis txawj tag li. Yog li ntawd, tib neeg tus yam ntxwv thiaj li yog Ntxwgnyoog tus yam ntxwv uas tsis yog lawm. Qhov ntawd txawv ntawm Vajtswv lub ntsiab tseeb. Yav dhau los, Vajtswv hais tias: “Kuv yeej hlub tau tib neeg mus ib txhis, thiab kuv kuj ntxub tau lawv mus ib txhis thiab.” Qhov ntawd yog, Vajtswv muaj ib tug qauv uas Nws ntsuas tib neeg. Nws muaj Nws tej kev txiav txim, thiab Nws muaj tej hauv paus ntsiab lus rau txoj kev ua Nws txiav txim rau txhua yam. Nws muaj Nws cov qauv thiab tej hauv paus ntsiab lus rau yam uas Nws hlub thiab ntxub, rau tus uas Nws ntxub, thiab tus uas Nws foom koob hmoov rau. Tib neeg tsis muaj qhov tseeb thiab tej hauv paus ntsiab lus, yog li ntawd lawv thiaj li pheej mus raws li lawv tus kheej txoj kev. Lawv hloov hloov siab thiab tsis muaj peev xwm pib taug txoj kev yog yog tsis muaj Vajtswv coj kev.

Ib txhia tib neeg pheej xav paub seb, “Thaum twg Vajtswv mam li tawm ntawm lub ntiaj teb no mus? Thaum twg Vajtswv txoj hauj lwm mam li tag? Kuv tsis hluas ntxiv lawm; Kuv yuav ua neej li cas thaum kuv laus?” Tus tib neeg uas zoo li no puas muaj kev ntseeg? Lawv yuav ua li cas yog tias tsis muaj leej twg txhawb nqa lawv thaum lawv laus? Lawv yuav tsis hais tias tim Vajtswv no lod? Coob tus uas ntseeg Vajtswv tsis paub tias lawv yuav tau txais dab tsi los ntawm txoj kev raws Nws qab ntawd, los sis tsis paub tias dab tsi yog yam uas muaj nuj nqis tshaj plaws li. Tsawg tus tib neeg xwb thiaj li paub tseeb txog tej no. Yog tsis muaj tus Vajtswv uas yug los ua neeg tes hauj lwm, ces cov tib neeg uas nyob rau hauv lub Teb Chaws Suav twb raug muab rhuav tshem ntev los lawm. Tej zaum ib txhia tib neeg yuav tsis ntseeg qhov no, tiam sis qhov ntawd yog vim lawv tsis pom qhov xwm txheej kom tseeb tseeb, vim qhov no yog qhov tseeb ntawm qhov ntawd. Tib neeg kuj ntseeg hais tias: “Peb tseem mus tau rau tom ntej yam tsis muaj Vajtswv ua tus coj; peb twb muaj Vajtswv txoj lus coj peb kev ces txaus lawm. Peb txhua tus twb tau nyeem phau ntawv Txoj Lus Tshwm Hauv Lub Cev Nqaij Daim Tawv lawm, peb twb paub me ntsis txog phau ntawv ntawd hauv peb lub siab thiab peb to taub tej hauv paus ntsiab lus lawm. Tam sim no, peb ua tus tswj tau lawm” thiab. Tiam sis koj ua puas tau tus tswj tiag tiag? Koj taug tsis tau txoj kev yog—thaum koj taug, koj yuav mus yuam kev, yog li ntawd koj nkag puas tau mus rau hauv qhov muaj tiag? Tab txawm tam sim no los, nej yeej tseem tsis ntseeg li. Tuaj yeem hais tau hais tias txhua tus tib neeg uas tsis muaj Vajtswv ua tus coj ces yuav mus yuam kev. Vajntsujplig Dawb Huv ua hauj lwm nyob rau hauv qee tus neeg tas li nyob rau Tiam Hmoov Hlub, tiam sis vim li cas lawv feem coob pheej mus raws li lawv tus kheej txoj kev xwb? Qhov yuav suav hais tias nyob rau hauv lub ntiaj teb ntawm sab kev lis kev cai ntseeg ntawd muaj pes tsawg pab ntseeg tag nrho mas nyuaj; muaj ntau pab uas koj yeej paub tsis txog, los sis cov npe uas koj tsis paub—qhov teeb meem nyob rau ntawm no yog dab tsi? Nws yog qhov hais tias tib neeg muaj kev sib chab sib chaws ntau dhau lawm, thiab nws tsis yooj yim rau lawv pom hais tias yam uas nyob rau hauv lawv tus yam ntxwv ntawd zoo li cas. Niaj hnub no, Vajtswv tau hais ntau lo lus los muab tib neeg tus yam ntxwv nthuav tawm, thiab Nws kom tib neeg saib seb tej uas nyob rau hauv lawv tus yam ntxwv ntawd zoo li cas, thiab saib lawv lub ntsiab tseeb kom meej meej. Li no xwb mas thiaj li yog txoj kev uas lawv tuaj yeem kawm kom paub lwm tus thiab kom tsis txhob raug lwm tus dag, los sis pe hawm lwm tus, qhuas lwm tus, los sis raws lwm tus qab. Yog ib tug tib neeg twg tsis muaj txoj kev to taub qhov tseeb, ces tus tib neeg ntawd yuav tsis pom tias tib neeg yog leej twg tiag tiag, thiab muaj feem yuav raug lwm tus dag thiab txwv. Yog li ntawd, cov ntseeg Vajtswv yuav tsum to taub qhov tseeb, lawv yuav tsum nyeem Vajtswv cov lus kom ntau ntxiv, thiab paub tib neeg tus yam ntxwv thiab pom tias tib neeg lub ntsiab tseeb zoo li cas raws li Vajtswv qhia. Qhov Vajtswv txoj lus qhia ntawd yog nthuav tib neeg tus yam ntxwv tawm ntag, txoj lus ntawd hais txog tib neeg tias lawv lub ntsiab tseeb yog dab tsi, thiab cia lawv pom tias lub ntsiab tseeb ntawm lawv txoj kev qias vuab tsuab ntawd zoo li cas. Qhov no tseem ceeb heev. Ntxwgnyoog yog ib yam uas tsis meej pem, thiab cov lus phem uas nws hais ntawd mas txhais nyuaj. Vajtswv nug nws hais tias, “Koj mus qhov twg los?” Ces Ntxwgnyoog teb hais tias, “Mus ncig ntuj ncig teb los xwb, thiab mus nce toj nqis taug hauv lub ntiaj teb los xwb” (Yauj 1:7). Ua tib zoo xav txog nws lo lus teb no seb. Yog nws tuaj los yog nws mus? Nws lub ntsiab mas nkag siab nyuaj, vim li ntawd Kuv thiaj li hais tias cov lus no mas tsis meej pem. Raws li cov lus no mas, pom tau hais tias Ntxwgnyoog yog tus tsis meej pem. Thaum tib neeg raug Ntxwgnyoog muab ua qias vuab tsuab lawm, ces lawv kuj tsis meej pem lawm thiab. Lawv tsis muaj qhov ncaj nruab nrab, tsis muaj qauv, thiab tsis muaj tej hauv paus ntsiab lus nyob rau hauv txhua yam uas lawv ua. Yog li ntawd, txhua tus tib neeg thiaj li yuam kev yooj yim heev. Ntxwgnyoog ntxias Evas los ntawm qhov hais tias, “Vim li cas koj thiaj li tsis noj cov txiv ntawm tsob ntoo ntawd?” Ces Evas teb hais tias, “Vajtswv hais rau wb hais tias yog wb noj cov txiv ntawm tsob ntoo ntawd ces wb yuav tuag.” Ces Ntxwgnyoog hais tias, “Koj yeej yuav tsis tuag yog koj noj cov txiv ntawm tso ntoo ntawd.” Nyob rau hauv cov lus no, muaj ib qho kev npaj siab uas los sim Evas lub siab. Tsis yog hais tseeb tseeb hais tias nws yuav tsis tuag yog nws noj cov txiv ntawm tsob ntoo ntawd hos, Ntxwgnyoog cia li hais tias nws yeej yuav tsis tuag, ces thiaj li ua rau nws xav hais tias, “Yog kuv yeej yuav tsis tuag, ces kuv noj tau!” Tsis muaj peev xwm tawm tsam qhov kev sim siab ntawd, ces nws thiaj li noj cov txiv ntawd lawm. Qhov ua li no, Ntxwgnyoog ua tau raws li nws lub hom phiaj uas ntxias kom Evas ua txhaum lawm. Nws tsis ris lub txim no, vim nws tsis tau yuam kom Evas noj. Nyob rau hauv txhua tus tib neeg, mas muaj ib tug moj yam phem; lawv txhua tus lub siab puav leej muaj cov kuab lom uas Ntxwgnyoog sim Vajtswv siab thiab ntxias tib neeg ntawd ntau heev. Qee zaus, lawv cov lus yog hais raws li Ntxwgnyoog lub suab thiab kev hais lus, thiab muaj ib qho kev npaj siab los sim siab thiab ntxias. Tib neeg tej tswv yim thiab kev xav mas puv npo Ntxwgnyoog cov kuab lom xwb thiab cov kuab lom ntawd tsw phem heev. Qee zaus, tib neeg lub ntsej muag los sis tej kev ua ntawd muaj tib hom kev sim siab thiab kev ntxias. Ib txhia tib neeg hais tias, “Yog kuv cia li raws li no xwb, ces kuv yeej yuav tau txais ib yam dab tsi xwb xwb li. Tab txawm yog kuv tsis caum qhov tseeb los xij, kuv tuaj yeem raws Vajtswv qab kom mus txog thaum kawg kiag. Kuv muab txhua yam tso tseg thiab muab kuv tus kheej fij rau Vajtswv tiag tiag. Kuv muaj lub zog ua siab ntev mus kom txog thaum kawg kiag. Tab txawm yog kuv muaj kev txhaum me ntsis los xij, Vajtswv yuav muaj kev hlub tshua txog kuv thiab yuav tsis tso kuv tseg.” Lawv twb tsis paub tias qhov uas lawv tab tom hais ntawd yog dab tsi li. Muaj ntau yam uas qias vuab tsuab nyob rau hauv tib neeg—yog lawv tsis caum qhov tseeb no, lawv yuav ua li cas hloov tau? Raws li lawv txoj kev qias vuab tsuab lawm, yog Vajtswv tsis tiv thaiv tib neeg, ces lawv yuav ntog thiab ntxeev siab rau Vajtswv lub sij hawm twg los tau li. Koj puas ntseeg li no? Tab txawm yog koj yuam koj tus kheej los, koj yeej ua tsis tau kom mus txog thaum kawg, vim theem kawg ntawm Vajtswv tes hauj lwm no yog los tsim kom tau ib pab ua cov kov yeej. Qhov ua li no puas yooj yim npaum li koj xav? Qhov kev hloov thaum kawg no tsis cheem tsum kom tib neeg hloov 100 feem pua los sis 80 feem pua li, tiam sis yam tsawg kawg yog 30 los sis 40 feem pua xwb. Yam tsawg kawg, koj yuav tsum khawb, yaug kom dawb huv, thiab hloov yam uas nyob rau hauv koj uas tawm tsam Vajtswv, uas cog tob rau hauv koj lub siab lawm. Tsuas yog thaum ntawd xwb koj thiaj li yuav tau txais txoj kev cawm dim. Tsuas yog thaum koj hloov li 30 mus rau 40 feem puas raws li Vajtswv cheem tsum, los sis qhov zoo tshaj yog tau li 60 mus rau 70 feem puas lawm xwb, mas thiaj li yuav qhia tau hais tias koj tau txais qhov tseeb, thiab tias koj nrog Vajtswv koom tau ua ke lawm. Koj yuav tsis tawm tsam Vajtswv los sis ua txhaum rau Nws tus moj yam nyob rau yav tom ntej thaum muaj ib yam dab tsi los raug rau koj lawm. Tsuas yog ua li no xwb mas koj thiaj li yuav tau kom zoo tiav log thiab tau txais Vajtswv qhov kev pom zoo.

Ib txhia tib neeg saib txoj kev ntseg Vajtswv yam yooj yooj yim xwb. Lawv xav hais tias, “Txoj kev ntseeg Vajtswv ces txhais hais tias mus koom kev pe hawm, kev thov Vajtswv, mloog lus qhuab qhia, sib qhia, hu nkauj thiab qhuas Vajtswv, thiab ua qee yam dej num xwb. Txoj kev ntseeg Vajtswv tsis yog zoo li ntawd xwb lod?” Tam sim no, txawm nej twb ntseeg Vajtswv tau pes tsawg xyoo lawm los xij, nej tseem tsis tau to taub qhov tseem ceeb ntawm txoj kev ntseeg Vajtswv tag nrho. Tseeb tiag, lub ntsiab ntawm txoj kev ntseeg Vajtswv mas tob heev yog tib neeg tej kev ntsib kev pom ntiav dhau lawm, ces lawv yuav tsis muaj peev xwm nkag siab txog txoj kev ntseeg ntawd. Thaum lawv ntsib lawv pom mus txog qhov kawg kiag lawm, mas yuav tsum yaug tau thiab hloov tau Ntxwgnyoog tus moj yam thiab cov kuab lom phem uas nyob rau hauv lawv ntawd kom dawb huv xwb. Tib neeg yuav tsum npaj lawv tus kheej kom muaj ntau qhov tseeb, ua kom tau raws li cov qauv uas Vajtswv kom tib neeg ua, thiab muaj peev xwm zwm rau Vajtswv thiab pe hawm Nws tiag tiag. Tsuas yog thaum ntawd xwb lawv thiaj li tau txais txoj kev cawm dim tiag tiag. Yog koj tseem zoo li yav tas los uas thaum koj yog ib feem ntawm txoj kev lis kev cai ntseeg, uas tsuas hais qee cov lus thiab cov kev qhuab qhia thiab hais ib co lus, coj ob peb tug cwj pwm zoo thiab tej kev ua uas zoo, thiab tsis ua qee yam kev txhaum xwb—yam tsawg kawg yog tej uas pom tau tseeb tseeb—ces qhov no qhia tsis tau hais tias koj twb taug tau txoj kev yog nyob rau hauv koj txoj kev ntseeg Vajtswv lawm. Qhov ua raws li tej kev cai tswj kav ntawd puas txhais hais tias koj taug tau txoj kev yog lawm? Qhov ntawd puas txhais hais tias koj txiav txim siab yog lawm? Yog yam uas nyob rau hauv koj tus yam ntxwv ntawd tsis hloov, ces koj yeej tseem yuav tawm tsam Vajtswv thiab ua txhaum rau Nws nyob rau thaum kawg. Qhov no yog qhov teeb meem loj tshaj plaws. Yog koj tsis daws qhov teeb meem uas nyob rau hauv koj txoj kev ntseeg Vajtswv no no, hais puas tau hais tias koj twb tau txais txoj kev cawm dim lawm tiag tiag? Qhov kuv hais li no yog txhais li cas kiag? Kuv xav kom nej to taub hauv nej lub siab hais tias txoj kev ntseeg Vajtswv ntawd cais tsis tau tawm ntawm Nws txoj lus, thiab cais tsis tau tawm ntawm Vajtswv Tus Kheej, los sis qhov tseeb. Koj yuav tsum xaiv txoj kev yog thiab siv zog rau qhov tseeb thiab Vajtswv txoj lus. Koj cia li ua kom tiav ib feem los sis to taub me ntsis ces yuav li ntawd xwb tsis tau. Qhov dag koj tus kheej ntawd tsuas yuav rhuav tshem koj xwb. Qhov tuav koj txoj kev ntseeg raws li koj tej kev xav hauv nruab siab ntawd mas tsis zoo. Yog koj ntseeg mus txog thaum kawg, es Vajtswv tsis nyob rau hauv koj lub siab, yog koj cia li nyeem Nws cov lus ceev ceev xwb, es tom qab ntawd tsis nco cov lus ntawd li lawm, thiab yog Vajtswv tsis muaj ib qho chaw nyob rau hauv koj lub siab li, ces koj tag li ko lawm. Qhov hais tias “txoj kev ntseeg Vajtswv mas cais tsis tau tawm ntawm Nws txoj lus” ntawd yog txhais li cas? Nej puas to taub qhov no? Qhov ntawd puas cov nyom rau nqe lus uas hais tias, “txoj kev ntseeg Vajtswv mas cais tsis tau tawm ntawm Vajtswv Tus Kheej”? Koj yuav ua li cas muaj tau Vajtswv nyob rau hauv koj lub siab yog Nws cov lus tsis nyob rau hauv koj lub siab? Yog koj ntseeg Vajtswv, tiam sis koj lub siab tsis muaj Nws, tsis muaj Nws cov lus, thiab Nws txoj kev coj kev li, ces koj tag li ko lawm. Yog koj twb daws tsis tau ib qho teeb meem me me raws li Vajtswv tej kev cheem tsum li, ces koj haj yam yuav ua tsis tau raws li Vajtswv tej kev cheem tsum thaum ntsib ib qho teeb meem loj ntawm lub hauv paus ntsiab lus. Ces koj yuav tsis muaj ib lo lus tim khawv li, uas yog qhov teeb meem; qhov no ua tau pov thawj qhia hais tias koj tsis muaj ib yam dab tsi li thiab tias koj yeej tseem tsis tau tau txais qhov tseeb li qho li.

Muaj qee yam tshwj xeeb uas piav qhia tsis tau kom ntxaws ntxaws. Muaj ib hnub nej tsuas to taub tej ntawd tiag tiag thaum Vajntsujplig Dawb Huv qhia nej lawm xwb. Hos tam sim no, Kuv tsuas hais tau ob peb lo lus los nthuav tej ntawd tawm uas tej zaum yuav zoo li dog dig los sis haj tseem tsis tsim nyog rau tib neeg thiab xwb, ces tag li ntawd lawm. Nej puas paub hais tias cov neeg txawv teb chaws xav li cas txog cov neeg Vajtswv xaiv uas nyob rau hauv lub Teb Chaws Suav? Thaum lawv pom nej ntseeg Vajtswv thiab raws Khetos qab nyob rau hauv lub Teb Chaws Suav, raug kev tsim txom thiab kev txom nyem ntau heev, xyiv fab rau Vajtswv txoj lus thiab Nws tes hauj lwm, thiab tau txais ntau yam heev ntawd, mas lawv khib nej heev! Cov neeg txawv teb chaws muaj ib qho kev xav—lawv xav hauv lawv tus kheej hais tias: “Kuv kuj xav ntsib xav pom Vajtswv tes hauj lwm thiab. Txawm kuv yuav raug txoj kev txom nyem dab tsi los xij, kuv kuj xav tau qhov tseeb thiab! Kuv los kuj xav muaj kev paub thiab kev loj hlob tuaj thiab, tiam sis tsis muaj hmoo, kuv nyob tsis yog chaw.” Lawv xav hais tias cov tib neeg Suav mas tau koob hmoov heev, tiam sis txawm li no los xij, nej tseem xav hais tias lawv yog cov tau koob hmoov, thiab khib lawv thiab. Tseeb tiag, nej siv nej txoj hmoov zoo kom nej tau zoo xwb. Vajtswv ua rau pab tib neeg no zoo tiav log nyob rau hauv tus zaj loj liab ploog lub teb chaws, thiab cia lawv nyiaj txoj kev txom nyem no. Qhov no hais tau hais tias yog Vajtswv txoj kev txhawb nqa uas loj heev! Yav dhau los, Vajtswv hais tias: “Kuv twb tau coj kuv lub yeeb koob ntawm Yixayee los rau sab Hnub Tuaj ntev los lawm.” Tam sim no, nej puas to taub lub ntsiab ntawm nqe lus no? Nej yuav tsum taug nej txoj kev nyob rau yav tom ntej li cas? Nej yuav tsum caum qhov tseeb li cas? Yog nej tsis caum qhov tseeb no nej yuav ua li cas tau txais Vajntsujplig Dawb Huv tes hauj lwm? Yog Vajntsujplig Dawb Huv tsis ua hauj lwm rau hauv nej, ces nej nyob rau qhov uas phom sij tshaj plaws lawm. Qhov kev txom nyem me me uas nej tab tom raug tam sim no ntawd ntau npaum li cas? Nej puas paub tias qhov ntawd yuav ua tau dab tsi rau nej? Puas muaj hnub uas nej caum qhov tseeb es tsis raug kev txom nyem li? Nej puas tau txais qhov tseeb los ntawm txoj kev ua li no? Nej ua puas tau tim khawv tseeb? Yog nej to taub tej yam zoo li no, ces nej yuav tsis xav hais tias nej raug kev txom nyem. Tab txawm yog nej raug kev txom nyem ntau tuaj los xij, qhov ntawd yuav zoo li tsis muaj dab tsi li.

Lub caij nplooj zeeg, 1999