Yuav Caum Qhov Tseeb Li Cas (7)

Nyob rau lub caij no, peb lub ncauj lus tseem ceeb ntawm qhov kev kawm yog “Yuav Caum Qhov Tseeb li cas.” Peb nyuam qhuav sua zog tau ob lub hauv paus ntsiab lus ntawm txoj kev xyaum ua rau qhov kev caum qhov tseeb ntawd xwb. Thawj lub hauv paus ntsiab lus yog dab tsi? (Thawj lub hauv paus ntsiab lus yog kev tso tseg, hos lub ob yog kev mob siab rau.) Thawj lub hauv paus ntsiab lus yog kev tso tseg, hos lub ob yog kev mob siab rau. Peb tseem kawm txog lub ncauj lus ntawm qhov “kev tso tseg” ntawd tsis tau tag. Thawj lub ntsiab ntawm qhov “kev tso tseg” ntawd yog dab tsi? (Yog muab tej kev xav tsis zoo tso tseg.) Hais txog qhov kev muab tej kev xav tsis zoo tso tseg ntawd mas feem ntau peb kawm txog dab tsi? Feem ntau peb kawm thiab nthuav tawm txog tej kev xav tsis zoo uas tib neeg muaj, uas yog, hom kev xav tsis zoo uas pheej nrog tib neeg nyob rau hauv lawv lub neej txhua hnub thiab hauv lawv txoj kev ua neej, nrog rau qhov yuav muab tej ntawd tso tseg li cas xwb. Tej kev xav tsis zoo no zoo li ib hom kev xav uas nyob rau hauv tib neeg, tiam sis qhov tseeb tiag, tej kev xav thiab kev ntseeg yuam kev uas tib neeg muaj ntawd yog tej uas ua rau muaj tej kev xav tsis zoo no ntag. Qhov ua rau muaj tej kev xav tsis zoo ntawd yog vim tej kev xav thiab tej kev xam pom uas sib txawv hauv tib neeg uas nthuav tawm thiab tshwm nyob rau hauv lawv ntawd. Raws li tej teeb meem ntawm tej kev xav tsis zoo uas peb tau kawm txog ua ntej, uas yog tib neeg tej cwj pwm, thiab lawv tej kev xav thiab tej kev xam pom ntawd, tej teeb meem uas nej pom yog dab tsi? Lwm lo lus mas hais tias, los ntawm qhov kev soj ntsuam tej kev xav tsis zoo uas pom tseeb nyob rau sab nraud ntawd, nej puas pom qee lub ntsiab tseeb uas tseem ceeb txog tib neeg tej kev xav? Thaum tej kev xav tsis zoo tshwm rau hauv ib tug tib neeg twg lawm, yog peb tshawb nrhiav kom tob zog thiab ua tib zoo soj ntsuamtej kev xav tsis zoo ntawd , mas peb yeej soj ntsuam tau lawv tej kev xam pom, tej kev xav, thiab tej cwj pwm tsis yog uas lawv coj rau tib neeg, tej xwm txheej, thiab txhua yam uas zais nyob rau hauv tej kev xav tsis zoo ntawd, thiab haj tseem pom lawv tej kev ua thiab kev kho tej tib neeg, tej teeb meem, thiab txhua yam uas nyob rau hauv lawv thiab, puas yog? (Yog.) Yog li ntawd, los ntawm qhov peb tau kawm txog txoj kev soj ntsuam tej kev xav tsis zoo no ntau zaus ntawd, peb hais puas tau hais tias tib neeg tej kev xav thiab tej kev xam pom uas tsis yog, yuam kev, tsis ncaj ncees, tsis zoo, thiab ua rau muaj kev puas tsuaj ntawd yog zais nyob rau hauv lawv tej kev xav tsis zoo? Peb hais puas tau li ntawd? (Tau, peb yeej hais tau.) Kuv nyuam qhuav hais li cas? (Vajtswv nyuam qhuav hais tias tib neeg tej kev xav thiab tej kev xam pom uas tsis yog, yuam kev, tsis ncaj ncees, tsis zoo, thiab ua rau muaj kev puas tsuaj ntawd yog zais nyob rau hauv lawv tej kev xav tsis zoo.) Koj puas to taub Kuv meej? (To taub, kuv to taub Koj lawm.) Yog peb tsis kawm txog tej kev xav tsis zoo no, ces tej zaum tib neeg yuav tsis mob siab rau tej kev xav tsis zoo uas nyob ib ntus los sis nyob ntev uas tshwm tuaj rau saum daim tawv. Txawm li cas los xij, tom qab soj ntsuam ntau qhov kev xav thiab kev xam pom uas zais nyob rau hauv tej kev xav tsis zoo ntawd lawm, tib neeg puas lees paub qhov uas muaj tseeb no? Tej kev xav thiab kev xam pom uas tsis zoo mas zais nyob rau hauv tib neeg tej kev xav tsis zoo uas sib txawv. Lwm lo lus mas hais tias, thaum ib tug tib neeg twg muaj tej kev xav tsis zoo lawm, nyob rau saum daim tawv mas, tej zaum tej no yuav zoo li qee qhov kev xav xwb. Tej zaum lawv yuav qhia lawv tej kev xav tawm, hais tej yam uas nyuaj siab, hais qhov kev tsis xav ua neej nyob thiab ua rau muaj qee qhov tsis zoo, los sis ua tej yam uas phem heev. Qhov no yog qhov uas nthuav tawm nyob rau sab nraud. Txawm li cas los xij, nyob tom qab tej uas tshwm sim ntawm tej kev xav tsis zoo thiab tej cwj pwm lim hiam no, yeej muaj ntau qhov kev xav thiab kev xam pom uas tsis zoo nyob rau hauv tib neeg. Yog li ntawd, txawm peb twb tau tham txog tej kev xav tsis zoo nyob rau ntu no lawm los xij, qhov tseeb tiag, yog peb tab tom soj ntsuam tib neeg tej kev xav thiab tej kev xam pom uas tsis zoo los ntawm qhov muab lawv tej kev xav tsis zoo uas sib txawv ntawd nthuav tawm thiab soj ntsuam xwb. Vim li cas peb thiaj li muab tej kev xav thiab tej kev xam pom no nthuav tawm? Puas yog tej kev xav thiab tej kev xam pom uas tsis zoo no tsuas cuam tshuam rau tib neeg tej kev xav hauv siab xwb? Puas yog vim tej kev xav thiab tej kev xam pom uas tsis zoo ntawd ua rau muaj tej kev xav tsis zoo nyob rau hauv tib neeg nkaus xwb? Tsis yog. Tej kev xav thiab tej kev xam pom uas yuam kev no tsis yog tsuas hloov tib neeg tej kev xav hauv siab thiab tej kev caum xwb; txawm li cas los xij, lawv tej kev xav hauv siab thiab tej cwj pwm sab nraud yog tej uas tib neeg pom thiab paub. Yog li ntawd, peb thiaj li siv txoj kev soj ntsuam tej kev xav tsis zoo uas tsis nyuaj thiab yooj yooj yim los muab tib neeg tej kev xav thiab tej kev xam pom uas phem, tsis zoo, thiab tsis tsim nyog ntawd nthuav tawm. Peb muab tej kev xav, tej kev xam pom, thiab tej kev xav tsis zoo no nthuav tawm vim tej kev xav thiab tej kev xam pom no cuam tshuam rau tib neeg qhov kev pom thiab tus qauv uas saib tib neeg thiab txhua yam, qhov kev coj lawv tus kheej kom zoo, thiab qhov kev ua nyob rau hauv lub neej tiag tiag. Tej kev xav thiab tej kev xam pom ntawd kuj cuam tshuam rau tib neeg tej hom phiaj thiab txoj hauv kevntawm kev ciaj sia thiab, thiab kuj cia li cuam tshuam rau lawv tej kev xam pom txog lub neej thiab. Yog li ntawd, peb thiaj li tau muab qee qhov kev xav tsis zoo no nthuav tawm. Txawm li cas los xij, lub hom phiaj uas tseem ceeb ntawm qhov kev kawm txog tej kev xav tsis zoo ntawd ces yog los nthuav tawm, soj ntsuam, thiab kho tib neeg tej kev xav thiab tej kev xam pom uas yuam kev, phem, thiab tsis zoo ntawd xwb. Qhov peb muab tej kev xav thiab tej kev xam pom uas tsis zoo no nthuav tawm ntawd, yuav ua rau tib neeg paub meej txog tej kev xam pom, tej cwj pwm, thiab tej kev xav tsis yog uas muaj nyob rau hauv lawv tej kev xav txog tib neeg, xwm txheej, thiab txhua yam ntawd. Qhov no pab kho tej kev xav tsis zoo uas los ntawm tej kev xav thiab tej kev xam pom uas phem no thiab ua rau tib neeg paub thiab pom tias tej kev xav thiab tej kev xam pom uas yuam kev no zoo li cas, uas tom qab ntawd lawv thiaj li yuav nrhiav tau txoj kev yog, tso tau tej kev xav thiab tej kev xam pom ntawd tseg, thiab muab tej ntawd tso pov tseg tag nrho mus. Lub hom phiaj tseem ceeb yog los ua kom muaj peev xwm los ntsib, ua, kho, thiab daws tau tib neeg, xwm txheej, thiab txhua yam uas tib neeg ntsib nyob rau hauv lawv lub neej txhua hnub los sis kom txoj kev lawv ua neej muaj tej kev xav thiab tej kev xam pom uas yog xwb. Muab xaus lus hais tias, qhov kev ntshaw ntawd yog dab tsi? Qhov kev ntshaw ntawd yog ua kom tib neeg paub thiab pom tej kev xav tsis zoo uas nyob rau hauv lawv tus kheej, thiab tom qab paub tej kev xav tsis zoo ntawd lawm, thiaj li hloov thiab kho tej kev xav thiab tej kev xam pom uas yuam kev uas nyob rau hauv lawv lub neej thiab tej kev ua neej ntawd kom yog txuas ntxiv, kom nrhiav, kom lees txais, los sis kom ua raws li tej kev xav thiab tej kev xam pom uas yog ntawd kom mus raws li qhov tseeb, thiab kom thaum kawg thiaj li ua neej thiab coj lawv tus kheej kom zoo los ntawm tej kev xav thiab tej kev xam pom uas yog. Qhov ntawd yog lub hom phiaj. Nej puas pom zoo? (Pom zoo.) Nyob rau saum daim tawv mas, peb muab tib neeg tej kev xav tsis zoo nthuav tawm, tiam sis qhov tseeb tiag, yog peb muab lawv tej kev xav thiab tej kev xam pom uas yuam kev txog tib neeg, xwm txheej, thiab txhua yam ntawd nthuav tawm ntag. Qhov ntawd yog ua kom tib neeg siv tej kev xav thiab tej kev xam pom uas yog rau thaum ntsib tib neeg, xwm txheej thiab txhua yam thiab saib xyuas tej ntawd, thiab kom thaum kawg ua raws li qhov tseeb tej hauv paus ntsiab lus thaum saib tib neeg thiab txhua yam, coj lawv tus kheej kom zoo, thiab ua. Qhov no tsis yog rov qab los rau lub ntsiab uas hais tias “Yuav Caum Qhov Tseeb Li Cas” ntawd lod? (Yog.)

Qhov kev kawm txog qhov muab tej kev xav tsis zoo tso tseg ntawd thaum kawg yeej tseem rov qab los rau lub ncauj lus dav dav uas hais tais “Yuav caum qhov tseeb li cas,” yam tsis muaj qhov txawv ntawm lub ntsiab tseem ceeb ntawd li, puas yog? (Yog.) Thaum xub thawj mas, ib txhia tib neeg yuav xav hais tias, “Qhov muab tej kev xav tsis zoo tso tseg ntawd zoo li tsis muaj kev cuam tshuam rau txoj kev caum qhov tseeb ntau. Tej kev xav tsis zoo ntawd tsuas yog tej kev xav hauv siab uas nyob ib ntus los sis yog tej kev xav thiab tej tswv yim uas nyob ib pliag xwb.” Yog hais tias qhov ntawd yog ib qho kev xav uas nyob ib pliag los sis yog ib qho kev xav hauv siab uas nyob ib ntus xwb, ces qhov ntawd tsis nyob rau hauv tej kev xav tsis zoo uas peb tab tom kawm txog ntawd. Tej kev xav tsis zoo no cuam tshuam rau tej teeb meem ntawm lub hauv paus ntsiab lus thiab lub ntsiab uas ntsig txog qhov tib neeg saib lwm tus thiab txhua yam li cas, thiab qhov lawv coj lawv tus kheej kom zoo thiab ua ntawd. Tej kev xav tsis zoo ntawd cuam tshuam rau tej kev xam pom, tej qauv, thiab tej hauv paus ntsiab lus uas yog uas tib neeg tsim nyog txhawb nyob rau hauv lub neej, nrog rau lawv tej kev xam pom txog lub neej thiab tej kev ua neej. Lub hom phiaj kawg ntawm txoj kev kawm txog tej no ces yog los pab tib neeg kom thaum ntsib ntau yam teeb meem nyob rau hauv lub neej los thiaj li tsis daws tej teeb meem no raws li qhov lawv ib txwm daws los sis qhov kev npau taws, los sis siv lawv tus moj yam qias vuab tsuab los saib xyuas tej teeb meem no ntxiv lawm. Qhov ntawd kuj txhais tau hais tias lawv yuav tsis daws tej teeb meem no raws li tej tswv yim phem uas zej zog tau qhia lawv lawm thiab. Tiam sis, lawv yuav daws tej teeb meem ntawd raws li txoj kev yog, los ntawm lub siab uas txawj xav thiab qhov tsim nyog uas yam tsawg kawg tib neeg yuav tsum muaj thaum saib xyuas tej teeb meem uas tau ntsib nyob rau hauv lub neej ntawd. Tsis tas li ntawd xwb, raws li cov tib neeg dog dig lub siab uas txawj xav thiab qhov tsim nyog lawm, mas lawv yeej yuav ua rau tib neeg, xwm txheej, thiab txhua yam uas cuam tshuam thiab ntsib nyob rau hauv lub neej thiab muaj nyob ntawd kom raws li Vajtswv cov lus, qhov tseeb, thiab tej hauv paus ntsiab lus uas Vajtswv tau qhia lawm. Qhov kawm thiab soj ntsuam tej kev xav tsis zoo ntawd yog npaj siab kom tau raws li lub hom phiaj no xwb. Koj puas to taub? (To taub, kuv to taub lawm.) Qhia Kuv seb. (Vajtswv lub hom phiaj uas qhia thiab soj ntsuam tej kev xav tsis zoo no yog ua kom tib neeg thoob tsib to nrog thiab hloov pauv tej kev xav thiab tej kev xam pom uas yuam kev nyob rau hauv lawv tej kev xav tsis zoo, es lawv thiaj li muab tej kev xav tsis zoo no tso tseg thiab vam khom rau lub siab uas txawj xav thiab qhov tsim nyog los kho thiab saib xyuas tib neeg, xwm txheej, thiab txhua yam uas lawv ntsib nyob rau hauv lub neej kom yog raws li Vajtswv cov lus thiab qhov tseeb tej hauv paus ntsiab lus. Qhov no ua rau lawv maj mam hloov lawv qhov kev xam pom txog lub neej, saib tib neeg thiab txhua yam raws li qhov tseeb, coj lawv tus kheej kom zoo thiab ua raws li qhov tseeb, thiab ua neej raws li lawv txoj kev ua neej.) Yog Kuv tsis qhia thiab tsis soj ntsuam txog tej kev xav tsis zoo no, yog Kuv tsis qhia thiab tsis muab tib neeg tej kev xav thiab tej kev xam pom uas tsis zoo no nthuav tawm, ces thaum tib neeg ntsib teeb meem nyob rau hauv lawv lub neej txhua hnub, lawv yuav ua raws li tus qauv thiab qhov kev xav, qhov kev kho, qhov kev saib xyuas, thiab qhov kev daws tej teeb meem uas tsis yog no los ntawm tej kev xav thiab tej kev xam pom uas yuam kev tas li xwb. Thaum zoo li no lawm, tib neeg pheej yuav raug tej kev xav tsis zoo no txwv, khi thiab tswj kav ntau tuaj, tsis muaj peev xwm daws tau tej teeb meem uas nyob rau hauv lub neej kom raws li Vajtswv tej kev tim tsum los sis tej hauv paus ntsiab lus thiab tej tswv yim uas tau nthuav tawm nyob rau hauv Vajtswv cov lus li. Tseeb tiag, yog ib tug tib neeg twg muaj tej kev xav thiab tej kev xam pom tib neeg, xwm txheej, thiab txhua yam uas yog, nrog rau qhov kev pom thiab tus qauv uas yog lawm, ces thaum lawv ntsib cov tib neeg, xwm txheej, thiab txhua yam no, qhov ntawd yuav pab tau lawv daws tej ntawd los ntawm qhov kev pom uas yog yam loj heev, los sis yam tsawg kawg lawv ua tau raws li cov tib neeg dog dig lub siab uas txawj xav thiab qhov tsim nyog, thiab tsis daws teeb meem raws li txoj kev npau taws los sis raws li lawv tus moj yam qias vuab tsuab, uas tuaj yeem ua rau muaj teeb meem yam tsis tsim nyog thiab ua rau muaj tej yam tshwm sim los uas tsis xav tau. Piv txwv li, qhov tib neeg ua rau lub neej yav tom ntej, kev muaj mob, tsev neeg, kev sib yuav, kev hlub, nyiaj txiag, kev sib raug zoo ntawm tib neeg, thiab lawv tus kheej tej kev txawj, nrog rau lawv lub meej mom ntawm zej zos thiab qhov kev tsim nyog, thiab lwm yam teeb meem uas zoo sib xws li cas ntawd, yog ua raws li qhov uas lawv tau hnov, tau kawm, los sis qhov uas lawv tsev neeg los sis zej zos haub ntxias thiab cuam tshuam ua ntej los to taub txog qhov tseeb xwb, twb tsis hais txog qee qhov kev ntsib kev pom los sis tej tswv yim uas lawv tus kheej xav tawm li. Txhua tus neeg nyias muaj nyias tus kheej txoj kev ua txhua yam uas tshwj xeeb, thiab txhua tus nyias siv nyias tus cwj pwm thaum daws teeb meem. Yeej muaj qhov uas tib neeg ua txhua yam sib txawv, qhov ua li ntawd lawv txhua tus puav leej raug tej kev xav thiab tej kev xam pom uas phem, uas tsis zoo, uas yuam kev, los sis tsis ncaj ncees ntawd tswj kav thiab tswj hwm lawm. Lawv lub hom phiaj kawg yog ua kom tau lawv tus kheej lub koob lub npe, txoj hmoo, thiab lawv tus kheej txoj kev ntshaw xwb. Muab hais kom ncaj me ntsis ntxiv ces hais tias, tej kev xav thiab tej kev xam pom no yog los ntawm Ntxwgnyoog txoj kev cob thiab kev qhia los xwb. Qhov ntawd kuj hais tau hais tias tej kev xav thiab tej kev xam pom ntawd yog chiv los ntawm tej kev xav thiab tej kev xam pom uas yuam kev uas Ntxwgnyoog tshaj tawm, txhawb nqa, thiab muab rau tib neeg ntiaj teb los xwb. Vim txoj kev taw qhia ntawm tej kev xav thiab tej kev xam pom uas yuam kev no, tib neeg thiaj li siv tej kev xav thiab tej kev xam pom uas yuam kev ntawd los tiv thaiv lawv tus kheej thiab ua kom tau raws li lawv tus kheej tej kev ntshaw yam ras tsis txog li. Lawv ua kom zoo tshaj plaws los siv ntau qhov kev xav thiab kev xam pom uas chiv los ntawm zej zos thiab lub ntiaj teb no los tiv thaiv lawv tus kheej thiab nrhiav tej uas muaj txiaj ntsim rau lawv tus kheej tshaj plaws kom tau raws li lawv tus kheej tej kev ntshaw xwb. Qhov uas nrhiav kom tau no yeej yuav tsis tau dab tsi li thiab tseem ua tshaj tej ciaj ciam ncaj ncees thiab lub siab uas txawj xav thiab qhov tsim nyog lawm thiab. Yog li ntawd, vim txoj kev taw qhia ntawm tej kev xav tsis zoo thiab tej kev xav thiab tej kev xam pom uas tsis zoo no, qhov txiaj ntsim thaum kawg ntawm qhov tib neeg saib lwm tus thiab txhua yam thiab qhov lawv coj lawv tus kheej kom zoo thiab ua ntawd tsuas yog ua rau muaj kev sib tsim txom, kev sib dag ntxias, kev sib rhuav tshem, thiab kev sib cov nyom nyob rau ntawm tib neeg xwb. Thaum kawg, vim txoj kev taw qhia, kev ua qhev, los sis kev ntxias dag ntawm tej kev xav thiab tej kev xam pom uas tsis zoo ntawd, tib neeg thiaj li yuav nrug deb ntawm Vajtswv tej kev cheem tsum, los sis haj tseem nrug deb ntawm tej hauv paus ntsiab lus uas hais txog qhov yuav coj yus tus kheej kom zoo thiab ua raws li qhov Vajtswv tau qhia lawm ntawd li cas thiab. Qhov ntawd kuj hais tau hais tias vim txoj kev taw qhia thiab txoj kev ntxias dag ntawm tej kev xav tsis zoo ntawd, es tib neeg thiaj li yuav tsis tau txais qhov tseeb los sis nkag tau mus rau hauv qhov muaj tiag ntawm txoj kev xyaum ua qhov tseeb raws li Vajtswv cheem tsum kiag li. Qhov ntawd kuj nyuaj rau lawv los ua raws li lub hauv paus ntsiab lus ntawm qhov lawv saib tib neeg thiab txhua yam thiab lawv txoj kev coj kom zoo thiab tej kev ua raws li Vajtswv cov lus, uas muaj qhov tseeb ua lawv tus qauv thiab. Yog li ntawd, thaum tib neeg kho lawv tus kheej tej kev xav tsis zoo ntawd, qhov tseeb tiag lawm lawv kuj yuav tsum tau muab tej kev xav thiab tej kev xam pom uas tsis zoo ntawd tso tseg thiab. Tsuas yog thaum tib neeg paub txog tej kev xav thiab tej kev xam pom uas tsis yog nyob rau hauv lawv tus kheej lawm xwb mas lawv thiaj li yuav tso tau hom kev xav tsis zoo ntawd tseg. Thaum tib neeg muab tej kev xav thiab tej kev xam pom uas tsis zoo ntawd tso tseg lawm, ces kuj kho tau lawv tej kev xav tsis zoo ntau heev lawm thiab. Piv txwv li, cia peb xav txog tej kev nyuaj siab uas peb tau kawm txog ua ntej ntawd lawm. Muab hais kom yooj yim ces hais tias, yog tib neeg muaj tej kev xav tsis zoo no vim lawv pheej xav hais tias lawv txoj hmoo tsis zoo, ces thaum lawv ua raws li tej kev xav thiab tej kev xam pom uas hais tias lawv txoj hmoo tsis zoo ntawd lawm, lawv yuav muaj kev nyuaj siab yam ras tsis txog li. Tshaj ntawd ntxiv, qhov lawv muaj kev txawj xav ntau zuj zus tuaj yuav txhawb txoj kev ntseeg uas xav tias lawv muaj txoj hmoo tsis zoo ntawd. Thaum twg uas lawv ntsib ib yam dab tsi uas nyuaj los sis ceeb laj me ntsis, mas lawv xav hais tias, “Au, kuv txoj hmoo tsis zoo.” Lawv suav hais tias qhov ntawd yog vim lawv txoj hmoo tsis zoo. Vim li ntawd, lawv thiaj li ua neej raws tej kev xav tsis zoo uas tsis muaj kev cia siab, tso lawv tus kheej tseg, thiab nyuaj siab. Yog tib neeg daws tau tej kev nyuaj uas lawv ntsib nyob rau hauv lub neej kom yog los sis nrhiav qhov tseeb thaum muaj tej kev xav thiab kev xav pom uas tsis zoo ntawd, es vam khom rau Vajtswv cov lus los daws tej ntawd, lees paub tias tib neeg txoj hmoo yog dab tsi, thiab ntseeg hais tias lawv txoj hmoo yog nyob rau hauv Vajtswv ob txhais tes thiab ntseeg tias Nws yog tus tswj, ces lawv yuav daws tau tej kev txom nyem, tej kev ceeb laj, tej teeb meem, thiab tej kev nyuaj uas nyob rau hauv lub neej yam yog heev, los sis to taub tej teeb meem no yam zoo heev. Qhov ua li ntawd, lawv txoj kev xav thiab kev xam pom txog qhov muaj txoj hmoo tsis zoo ntawd puas hloov ib qho li? Tib lub sij hawm ntawd, lawv puas tau txais ib tus qauv zoo los daws tej teeb meem no? (Tau.) Thaum tib neeg muaj tus qauv yog los daws tej teeb meem no lawm, lawv tej kev nyuaj siab yuav maj mam zoo tuaj, hloov ntawm qhov hnyav mus rau qhov nruab nrab, hloov ntawm qhov nruab nrab mus rau qhov sib, kom txog thaum lawv muab qhov sib ntawd ua kom tag thiab ploj ntawm lawv mus. Thaum ntawd, lawv tej kev nyuaj siab thiaj li yuav ploj mus tag. Qhov no yog vim dab tsi? Nws yog vim lawv txoj kev xav thiab kev xam pom yav dhau los uas hais tias “Kuv txoj hmoo tsis zoo” ntawd hloov pauv lawm. Tom qab kho tau qhov ntawd lawm, lawv yuav tsis saib lawv txoj hmoo yam nyuaj siab ntsuav mus ntxiv lawm tiam sis yuav daws tej teeb meem ntawd los ntawm ib tug cwj pwm uas kub siab lug thiab saib mus rau qhov zoo, los ntawm lub tswv yim ntawm Vajtswv tej lus qhia, thiab qhov kev pom txog lub ntsiab tseeb ntawm txoj hmoo uas Nws tau nthuav tawm rau tib neeg lawm. Yog li ntawd, thaum ntsib tib hom teeb meem li qhov lawv tau ntsib yav dhau los lawm, lawv yuav tsis saib lawv txoj hmoo raws li tej kev xav thiab tej kev xam pom uas hais tias muaj txoj hmoo tsis zoo ntawd ntxiv lawm, thiab lawv yuav tsis tawm tsam los sis ntxeev siab rau tej teeb meem no los ntawm tej kev nyuaj siab ntawd ntxiv lawm. Txawm thaum xub thawj lawv yuav tsis quav ntsej los sis daws tej teeb meem ntawd yam tsis mob siab rau, laug lug sij hawm xwb los xij, thaum lawv tshawb nrhiav mus tob rau txoj kev caum qhov tseeb thiab loj hlob tuaj, thaum qhov lawv pom thiab tus qauv uas saib tib neeg thiab txhua yam ntawd yog zuj zus tuaj lawm, ces tsis yog lawv tej kev nyuaj siab tsuas ploj mus xwb, tiam sis lawv kuj dhau los kub siab lug thiab saib mus rau qhov zoo lawm thiab. Thaum kawg, lawv to taub meej thiab paub tseeb txog tus yam ntxwv ntawm tib neeg txoj hmoo lawm. Lawv tuaj yeem daws thiab kho tej teeb meem no kom yog los ntawm ib tug cwj pwm los sis qhov muaj tiag ntawm txoj kev ua raws li Vajtswv txoj kev coj kev qhia. Nyob rau theem ntawd, lawv tso tau lawv tej kev nyuaj siab tseg tag nrho li lawm. Qhov muab tej kev xav tsis zoo tso tseg ntawd mas yog ib qho txheej txheem zoo li no, qhov ntawd yog ib lub ncauj lus tseem ceeb nyob rau hauv lub neej. Muab xaus lus hais tias, thaum ib txoj kev xav tsis zoo cog ruaj khov rau hauv tib neeg lub siab los sis hloov qhov lawv saib tib neeg thiab txhua yam, thiab qhov lawv coj lawv tus kheej kom zoo thiab qhov ua lawm, ces yeej paub tseeb hais tias muaj ntau tshaj ib txoj kev xav uas tsis zoo. Nyob tom qab qhov kev xav tsis zoo ntawd mas muaj ib txoj kev xav los sis kev xam pom uas tsis yog txog qhov no, qhov tod, los sis lwm qhov teeb meem lawm. Nyob rau hauv tej qho zoo li no mas, yam uas koj yuav tsum tau ua ntawd tsis yog tsuas tshuaj xyuas lub hauv paus ntawm tej kev xav tsis zoo ntawd xwb, tiam sis, qhov tseem ceeb tshaj yog, saib qhov uas zais ntshis nyob rau hauv koj tej kev xav tsis zoo ntawd kom meej. Qhov uas zais ntshis no yog ib qho kev xav los sis kev xam pom tsis zoo uas tau cog nws tus kheej tob heev rau hauv koj lub siab los ntev lawm, uas yog ib txoj kev xav los sis kev xam pom txog txoj kev saib xyuas txhua yam uas tsis yog los sis yuam kev. Hais txog tej kis uas yuam kev thiab tsis zoo ntawd, mas txoj kev xav los sis kev xam pom no yeej cov nyom qhov tseeb thiab tawm tsam qhov tseeb. Nyob rau theem no mas, koj tes hauj lwm tsis yog tsuas xav txog, soj ntsuam, thiab ua kom swm txoj kev xav los sis kev xam pom ntawd xwb, tiam sis yog ua kom to taub ntxaws ntxaws txog qhov kev puas tsuaj uas txoj kev xav los sis kev xam pom ntawd ua rau koj, qhov kev tswj kav thiab qhov kev muab koj ua qhev, thiab qhov kev tsis zoo uas txoj kev xav los sis kev xam pom ntawd muaj rau hauv koj txoj kev caum qhov tseeb. Yog li ntawd, yam koj yuav tsum tau ua yog los nthuav tawm, soj ntsuam, thiab paub tej kev xav thiab tej kev xam pom uas tsis zoo ntawd; tib lub sij hawm ntawd, koj yuav tsum nrhiav Vajtswv cov lus kom thoob tsib to nrog thiab pom tias tej ntawd zoo li cas raws li qhov tseeb tej hauv paus ntsiab lus uas Vajtswv tau qhia lawm, muab qhov tseeb los hloov koj tej kev xav thiab tej kev xam pom uas yuam kev los sis tsis zoo ntawd thiab daws tej kev xav tsis zoo uas tau cuam tshuam koj ntawd. Qhov no yog txoj kev los kho tej kev xav tsis zoo.

Ib txhia tib neeg hais tias, “Kuv tsis tau pom ib qho kev xav tsis zoo nyob rau hauv kuv tus keej li.” Tsis txhob txhawj, tsis ntev, thaum txog sij hawm, zoo cheeb tsam, los sis thaum koj txog lub hnub nyoog uas tsim nyog los sis txog ntu uas tseem ceeb tshwj xeeb nyob rau hauv lub neej lawm, ces tej kev xav tsis zoo no yuav cia li tshwm tuaj xwb. Koj tsis tas yuav nco ntsoov saib los sis tshawb nrhiav tej ntawd; tej ntawd yeej muaj nyob rau hauv txhua tus lub siab tsis ntau los tsawg lawm. Qhov ntawd yog vim tib neeg ua neej nyob rau hauv tib neeg lub ntiaj teb, tsis muaj leej twg ua txhua yam tau zoo li qhoos phis tawj ua, uas tsis muab lawv tus kheej tej kev xav thiab tej kev xam pom coj los xav, thiab tib neeg tej kev xav mas ua hauj lwm, tej kev xav ntawd zoo li ib lub thawv uas muaj peev xwm ntim yam zoo thiab yam tsis zoo. Tiam sis hmoov tsis zoo, ua ntej tib neeg pib lees txais tej kev xav thiab tej kev xam pom uas zoo ntawd, lawv twb lees txais tej kev xav thiab tej kev xam pom uas yuam kev thiab tsis yog los ntawm ntawm Ntxwgnyoog, zej zos, thiab cov tib neeg ntiaj teb uas qias vuab tsuab ntawd lawm. Tej kev xav thiab tej kev xam pom uas tsis yog no mas puv npo tib neeg lub siab lub ntsws, cuam tshuam thiab muaj feem xyuam loj heev rau lawv lub neej txhua hnub thiab tej kev ua neej. Yog li ntawd, tib lub sij hawm ntawd thaum tej kev xav thiab tej kev xam pom uas tsis zoo ntawd nrog tib neeg lub neej thiab lawv txoj kev ua neej nyob lawm, ces tej kev xav tsis zoo ntawd kuj nrog lawv lub neej thiab txoj kev uas lawv ua neej nyob thiab. Yog li ntawd, txawm yuav yog leej twg los xij, muaj ib hnub koj yuav paub hais tias tsis yog koj tsuas muaj ob peb qho kev xav tsis zoo uas nyob ib ntus xwb, koj muaj ntau yam heev. Tsis yog koj tsuas muaj ib txoj kev xav los sis ib txoj kev xam pom uas tsis zoo xwb, koj kuj tib txhij muaj tej kev xav thiab tej kev xam pom uas tsis zoo ntawd ntau heev thiab. Txawm tej kev xav thiab tej kev xam pom uas tsis zoo ntawd tseem tsis tau nthuav tawm los xij, qhov ntawd tsuas yog vim tsis muaj qhov cheeb tsam uas haum, lub sij hawm uas tsim nyog, los sis qhov uas yuav ua rau koj muab koj tej kev xav thiab tej kev xam pom uas yuam kev ntawd qhia tshwm los sis tso tawm thiab nthuav koj tej kev xav tsis zoo ntawd tawm, los sis qhov cheeb tsam los sis lub sij hawm ntawd tseem tsis tau los txog xwb. Yog tias tej no muaj ib qho los txog, ces qhov ntawd yuav ua li yog ib qho hluav taw zes, uas ua rau koj tej kev xav tsis zoo thiab tej kev xav thiab tej kev xam pom uas tsis zoo ntawd kom tej ntawd tawg tuaj. Koj yuav cia li raug tej ntawd haub ntxias, tswj kav, thiab khi lawm xwb. Tej ntawd haj tseem dhau los ua ib qho kev thaiv koj kev thiab hloov koj tej kev xaiv thiab. Tsuas tos kom yog sij hawm xwb. Vim hais tias tej kev xav tsis zoo uas peb tau kawm txog ntawd yog tej teeb meem uas tej zaum yuav ntsib nyob rau hauv tib neeg lub neej los sis nyob rau hauv lawv txoj kev ua neej nyob, thiab tej kev xav tsis zoo ntawd yog tej teeb meem uas txhua tus tib neeg ntsib nyob rau hauv lawv lub neej los sis txoj kev ua neej nyob tiag tiag. Tej kev xav tsis zoo ntawd tsis yog tsis muaj dab tsi tiam sis yeej muaj tseeb tiag tiag. Vim tej kev xav tsis zoo no cuam tshuam ncaj qha rau tej hauv paus ntsiab lus uas tib neeg yuav tsum tau ua raws thiab qhov kev pom txog txoj kev ciaj sia uas lawv yuav tsum muaj, yog li ntawd qhov peb ua tib zoo tshawb nrhiav thiab soj ntsuam cov teeb meem no mas yog ib qho tim tsum.

Yav dhau los, peb tau kawm txog txoj kev xav tsis zoo ntawm “kev caij tsuj.” Peb tau kawm txog qhov teeb meem ntawm qhov “kev caij tsuj” ntawd pes tsawg zaus lawm? “Peb kawm txog qhov teeb meem ntawd ob zaug lawm.) Zaum ib peb kawm txog dab tsi? (Zaum ib peb kawm txog qhov tib neeg pheej ua tsis tau li lawv nyiam, es thiaj li ua rau muaj tej kev xav tsis zoo vim qhov kev caij tsuj ntawd. Zaum ob, peb kawm txog qhov tib neeg tsis tuaj yeem siv lawv txoj kev txawj thiab pheej muaj ib lub siab uas xav tsis zoo vim meem txom.) Peb kawm txog ob kis no. Los ntawm ob kis ntawd, peb puas hais tau hais tias qhov txhawb ob hom kev caij tsuj no, mas muaj tej kev xav thiab tej kev xam pom uas zoo ib yam txog qhov tib neeg ua neej? Thawj hom kev caij tsuj, uas yog los ntawm qhov ua tsis tau li yus nyiam ntawd, qhia txog hom kev xav los sis kev xam pom dab tsi? Qhov ntawd yog txoj kev xav uas nyiam yuav yus lub siab tas li thiab tsis mob siab leg lub luag hauj lwm, ua txhua yam raws li qhov muaj siab, lub siab, kev xav, thiab kev ntshaw, yam tsis muaj kev to taub txog qhov yuav tsum tau leg lub luag hauj lwm ntawd li. Qhov no tsis yog ib tug cwj pwm uas tib neeg coj rau hauv lub neej lod? (Yog.) Qhov ntawd kuj yog ib txoj kev ua kom nyob taus thiab. Qhov no puas yog ib tug cwj pwm zoo thiab txoj kev ua kom nyob taus? (Tsis yog.) Nws tsis yog qhov zoo. Tib neeg yeej ib txwm xav ua neej raws li lawv nyiam, ua txhua yam raws li txoj kev xav, txoj kev ntshaw, thiab qhov kev nyiam xwb. Qhov no tsis yog txoj kev ua neej uas yog; nws yog qhov tsis zoo thiab yuav tsum tau kho. Tej kev xav tsis zoo uas tawm los ntawm tus cwj pwm tsis zoo thiab txoj kev ua kom nyob taus no mas haj yam yuav tsum tau kho kom ntau dua nov. Hos lwm hom kev caij tsuj mas yog tej kev xav tsis zoo ntawm qhov kev caij tsuj uas tshwm los ntawm qhov siv tsis tau yus tus kheej txoj kev txawj. Thaum tib neeg qhia tsis tau lawv txoj kev txawj, nthuav qhia lawv tus kheej tsis tau, tsis pom txog qhov lawv tus kheej muaj nqis, tsis tau txais kev lees paub los ntawm lwm tus, los sis txaus siab rau yam lawv tus kheej nyiam tsis tau, ces lawv tsis zoo siab, tu siab, thiab hnov raug caij tsuj. Qhov no puas yog ib txoj kev thiab qhov kev xam pom uas yog txog qhov kev ua neej nyob? (Tsis yog.) Tej uas tsis yog yuav tsum tau muab hloov thiab yuav tsum nrhiav qhov tseeb mas thiaj li yuav kho tau tej ntawd thiab muab txoj kev yog uas mus raws li qhov tseeb thiab txoj kev ua neej los hloov tej ntawd. Yav dhau los peb kawm txog ob qho uas txhawb qhov muaj tej kev xav uas raug caij tsuj ntawd, xws li qhov ua tsis tau li yus nyiam thiab qhov siv tsis tau yus txoj kev txawj. Muaj lwm qhov uas ua rau muaj tej kev xav uas raug caij tsuj ntawd, nej xav puas tawm tias qhov ntawd yog dab tsi? Lwm yam uas cuam tshuam rau yus tus kheej qhov kev xam pom uas ua rau tib neeg hnov tias raug caij tsuj ntawd yog dab tsi? Paub tsis tseeb lod? Lwm qhov yog hnov tias raug caij tsuj thiab ua rau muaj tej kev xav tsis zoo txog kev caij tsuj vim tib neeg ua tsis tau raws li lawv tej kev xav thiab tej kev ntshaw. Sim xav qhov no ib pliag seb, qhov teeb meem ntawm qhov kev caij tsuj no puas muaj tiag? Qhov no puas yog ib qho teeb meem rau tib neeg tiag tiag? (Yog.) Cov tib neeg uas peb tham txog ua ntej uas xav ua li lawv nyiam ntawd mas nyiam coj lub siab twm xeeb thiab txhob txwm ua xwb. Tus cwj pwm uas lawv coj rau lub neej yog coj raws li lawv nyiam thiab ua li lawv xav ua xwb. Lawv nyiam muab lawv tus kheej ua tus loj dua lwm tus thiab tsis tsim nyog nyob rau hauv zej zos. Lawv txoj kev ua kom nyob taus ntawd yog ua kom txhua tus saib lawv tseem ceeb tshaj, thiab lawv muaj lub siab twm xeeb thiab nyob tsis tau nrog lwm tus kom sib haum xeeb los sis koom tau ua ke li. Hom tib neeg ob uas ua rau muaj kev caij tsuj no mas yog tus uas pheej xav muaj plhus, khav txog lawv tus kheej, uas xav hais tias lawv yog tus uas tseem ceeb, thiab yeej tsis cia ib qho chaw seem rau lwm tus li. Tsuav yog lawv muaj ib qho kev txawj los sis peev xwm me ntsis xwb, mas lawv xav muab nthuav tawm txawm hais tias xyov puas tsim nyog rau cheeb tsam ntawd los sis xyov lawv txoj kev txawj puas muaj nqis los sis puas siv tau rau hauv Vajtswv lub tsev li. Hom tib neeg zoo li no kuj nyiam hais txog lawv tus kheej xwb thiab, puas yog? Puas yog txhua yam no cuam tshuam rau tib neeg tej kev ua kom nyob taus? (Yog.) Txoj kev ua neej nyob thiab txoj kev ua kom nyob taus no puav leej tsis yog tib si. Tam sim no, cia peb rov qab mus rau tej kev xav tsis zoo ntawm qhov kev caij tsuj uas peb tau tham ua ntej ntawd hais tias los ntawm qhov ua tsis tau raws li yus tej kev xav thiab tej kev ntshaw ntawd. Tsis hais lub sij hawm twg, cheeb tsam twg, los sis ntu twg, thiab txawm lawv yuav ua hom hauj lwm dab tsi los xij, lawv ib txwm tsom ntsoov rau lub hom phiaj uas ua kom tau raws li lawv tus kheej tej kev xav thiab tej kev ntshaw xwb, thiab muab qhov ntawd ua lawv tus qauv. Yog lawv tsis paub los sis ua tsis tau lub hom phiaj no kom tiav, ces lawv hnov raug caij tsuj thiab tu siab. Qhov no kuj tsis yog ib txoj kev ua kom nyob taus rau qee hom neeg thiab lod? (Yog.) Qhov no kuj yog ib txoj kev ua kom nyob taus rau qee tus tib neeg thiab. Yog li ntawd, txoj kev xav los sis qhov kev xam pom uas tseem ceeb ntawm cov uas ua neej raws li txoj kev ua kom nyob taus ntawd yog dab tsi? Qhov ntawd yog qhov hais tias tsuav yog lawv muaj tej kev xav thiab tej kev ntshaw xwb, ces txawm lawv yuav nyob rau qhov twg los sis lawv yuav ua dab tsi los xij, lawv lub hom phiaj yog los ua kom tau raws li lawv tus kheej tej kev xav thiab tej kev ntshaw xwb. Qhov no yog lawv txoj kev ua kom nyob taus thiab yog lawv lub hom phiaj. Txawm lwm tus yuav tau tiv kev txom nyem los sis lwm tus yuav tau tso qee yam tseg, txawm yuav muaj pes tsawg tus tib neeg yuav tau ris lub nra ntawd los sis muab lawv tus kheej tej kev ntshaw tso tseg txhawm rau lawv tej kev xav thiab tej kev ntshaw ntawd los xij, lawv yuav caum lub hom phiaj uas ua kom tau raws li lawv tus kheej tej kev xav thiab tej kev ntshaw ntawd yam tsis tso tseg li. Lawv haj tseem txaus siab hlo caij tsuj lwm tus los sis muab lwm tus tej kev ntshaw tso tseg yam tsis muaj qhov ua xyem xyav li. Yog lawv ua tsis tau lub hom phiaj no kom tiav, ces lawv hnov raug caij tsuj. Hom kev xav thiab hom kev xam pom uas zoo li no puas yog? (Tsis yog.) Ua cas thiaj li tsis yog? (Qhov ntawd twm xeeb dhau lawm.) Lo lus uas hais tias “twm xeeb” ntawd yog qhov zoo los qhov tsis zoo? (Lo lus ntawd yog qhov tsis zoo.) Lo lus ntawd yog ib qho tsis zoo thiab yog ib qho phom sij heev, yog li ntawd yuav tsum kho qhov ntawd raws li qhov tseeb.

Tib neeg yuav tsum kho tej kev xav hauv siab uas raug caij tsuj no uas muaj los ntawm qhov ua tsis tau raws li lawv tej kev xav thiab tej kev ntshaw ntawd li cas? Cia peb xub saib tej kev xav thiab tej kev ntshaw uas tib neeg muaj ntawd kom meej tso. Cia peb pib kawm ntawm no mus yom? (Ua li.) Qhov peb pib kawm ntawm qhov hais tias tej kev xav thiab tej kev ntshaw uas tib neeg muaj yog dab tsi ntawd mus mas yooj yim dua rau tib neeg to taub thiab muaj ib txoj kev xav tau zoo. Yog li ntawd, cia peb xub saib tej kev xav thiab tej kev ntshaw uas tib neeg muaj ntawd tso. Qee qhov kev xav thiab kev ntshaw mas muaj tiag, hos qee qhov kev xav thiab kev ntshaw mas tsis muaj tiag. Qee tus tib neeg mas muaj tej kev xav uas tsis muaj tiag, hos qee tus mas muaj tej kev xav uas muaj tiag. Peb yuav xub qhia txog tej kev xav ntawm cov neeg uas ua raws li qhov tsis muaj tiag ua ntej los yog tej kev xav ntawm cov neeg uas ua raws li qhov muaj tiag ntawd ua ntej? (Cov neeg uas ua raws li qhov muaj tiag.) Cov neeg uas ua raws li qhov muaj tiag. Yog li tej kev xav uas tsis muaj tiag ntawd ne? Peb puas yuav qhia txog tej kev xav uas tsis muaj tiag ntawd los tsis qhia? Yog peb tsis qhia txog tej kev xav uas tsis muaj tiag ntawd no, tib neeg puas yuav paub txog tej kev xav uas tsis muaj tiag ntawd? (Lawv yuav tsis paub.) Yog hais tias lawv yuav tsis paub txog tej kev xav uas tsis muaj tiag ntawd vim tsis tau qhia, ces peb yeej yuav tau qhia txog tej kev xav uas tsis muaj tiag ntawd xwb xwb li. Feem ntau mas, tab txawm tsis tau qhia los xij, tib neeg yeej paub txog tej kev xav ntawm cov neeg uas ua raws li qhov muaj tiag ntawd lawm. Tej no muaj nyob rau hauv txhua tus tej kev xav thiab lub siab uas txawj xav. Qee qhov kev xav thiab kev ntshaw mas yeej tsis hloov txij thaum yau los txog rau thaum loj, txawm lawv paub thiab tsis paub los xij, hos qee tus tej kev xav mas hloov raws hnub nyoog lawm. Thaum tib neeg laus zuj zus es lawv txoj kev paub, kev pom, thiab kev ntsib kev pom ntawd nthuav dav tuaj, mas lawv tej kev xav thiab tej kev ntshaw ntawd hloov tas li. Tej kev xav thiab tej kev ntshaw ntawd muaj tiag zuj zus, ze rau lub neej tiag tiag zuj zus, thiab ncaj zuj zus. Piv txwv li, qee tus tib neeg xav ua ib tug hu nkauj thaum lawv tseem hluas, tiam sis thaum lawv loj tuaj lawm, lawv paub hais tias lawv ua tsis tau, yog li ntawd qhov yuav los ua ib tug hu nkauj ntawd mas tsis muaj tseeb. Ces tom qab ntawd lawv xav los ua ib tug ua yeeb yaj kiab. Ntau xyoo tom qab, lawv mam li tsom iav na has pom hais tias lawv tsis ntxim nyiam li. Txawm lawv siab me ntsis los xij, lawv tsis txawj ua yeeb yam, thiab qhov lawv ua yeeb yam ntawd pom tias tsis zoo li. Qhov ua ib tug ua yeeb yaj kiab ntawd kuj tsis muaj tseeb thiab. Yog li ntawd, lawv ho xav los ua ib tug thawj qhia ua yeeb yaj kiab, kom lawv thiaj li tau qhia cov ua yeeb yaj kiab ua yeeb yaj kiab. Thaum lawv muaj hnub nyoog li nees nkaum tawm xyoo es yuav tsum tau xaiv ib yam kev kawm nyob rau hauv tsev kawm qib siab, lawv txoj kev xav hloov mus ua ib tug thawj qhia ua yeeb yaj kiab lawm. Tom qab kawm tiav, thaum lawv tau txais lawv daim ntawv kawm tiav txog kev qhia ua yeeb yaj kiab thiab tau nkag mus qhia ua yeeb yaj kiab lawm, lawv mam li paub hais tias qhov ua ib tug thawj qhia ua yeeb yaj kiab ntawd mas yuav tsum muaj koob muaj npe thiab muaj meej mom, yuav tsum muaj tej kev txawj kev paub, nrog rau muaj nyiaj txiag, uas yog yam lawv tsis muaj ib qho li. Thiaj li tsis muaj leej twg ntiav lawv ua tus thawj qhia ua yeeb yaj kiab. Yog li ntawd, lawv thiaj li yuav tsum tau txais yam uas haum lawv thiab nrhiav lawv txoj kev nkag los rau hauv tuam txhab ua yeeb yaj kiab, tej zaum ua tus saib xyuas ntaub ntawv los sis ua tus saib xyuas kev ua yeeb yaj kiab. Sij hawm dhau mus, lawv xav hais tias, “Qhov ua ib tug tsim yeeb yaj kiab ntawd tej zaum yuav haum kuv. Kuv nyiam khwv kom tau nyiaj ntau, kuv hais tau lus zoo, thiab kuv kuj zoo nkauj zoo nraug thiab. Tib neeg tsis pom tias kuv siab kub, thiab kuv nrog lwm tus sib tham tau zoo thiab ua rau lawv nyiam kuv. Tej zaum qhov tsim yeeb yaj kiab ntawd yuav yog ib qho uas phim kuv.” Koj pom hais tias, lawv txoj kev xav maj mam hloov lawm. Vim li cas txoj kev xav no thiaj li hloov? Txoj kev xav ntawd pib hloov vim lawv tej kev xav loj tuaj zuj zus lawm, lawv qhov kev nkag siab txog txhua yam ntawd yog zuj zus tuaj, muaj tseeb thiab muaj qab hau zuj zus tuaj. Ces tom qab ntawd, thaum ua lub neej tiag tiag, raws li cheeb tsam ntawm lawv lub neej tiag tiag thiab tej kev tim tsum thiab tej kev meem txom ntawm lub neej tiag, ces lawv tej kev xav yav dhau los ntawd maj mam hloov mus raws li cheeb tsam ntawd lawm. Thaum kawg, tsis muaj peev xwm ua tau ib tug thawj qhia ua yeeb yaj kiab, ces lawv thiaj li xaiv los ua ib tug tsim yeeb yaj kiab lawm xwb. Tiam sis qhov los ua ib tug tsim yeeb yaj kiab ntawd puas yog li lawv tej kev xav tiag tiag los sis tsis yog? Lawv tus kheej yeej xav tsis tawm li. Txawm li cas los xij, thaum lawv pib ua lawm, ces lawv yuav tsim yeeb yaj kiab mus li kaum xyoo, los sis haj tseem txog rau thaum lawv so hauj lwm thiab. Qhov no yog ib qho kev xam pom dav dav txog tej kev xav ntawm cov neeg uas ua raws li qhov muaj tiag.

Peb tsuas yog tham txog qhov tuaj yeem muab tib neeg tej kev xav faib ua tej kev xav ntawm cov neeg uas ua raws li qhov tsis muaj tiag thiab tej kev xav ntawm cov neeg uas ua raws li qhov muaj tiag ntawd li cas xwb. Cia peb pib tham txog tej kev xav ntawm cov neeg uas ua raws li qhov tsis muaj tiag ntawd. Tej kev xav ntawm cov neeg uas ua raws li qhov muaj tiag ntawd mas muab cais tau yooj yim. Tiam sis, tej kev xav ntawm cov uas ua raws li qhov tsis muaj tiag ntawd, mas tsis muaj tseeb thiab nrug deb ntawm lub neej tiag tiag. Tej kev xav ntawm cov uas ua raws li qhov tsis muaj tiag ntawd kuj raug muab tshem tawm mus deb ntawm tej muaj tiag uas cuam tshuam rau hauv qhov tib neeg muaj sia nyob lawm thiab, xws li tej kev tim tsum txhua hnub. Tej kev xav no muaj cov tswv yim uas muaj tseeb tiam sis tsis muaj ib qho chaw txawb chaw rau kom tseem ceeb li. Koj yeej hais tau hais tias tej kev xav thiab tej kev ntshaw no yog tej kev xav, uas tsis muaj dab tsi thiab tawm ntawm tib neeg tus yam ntxwv los xwb. Ib txhia mas lam xav xwb, hos ib co mas haj tseem yog tej kev xav thiab tej kev ntshaw uas tawm ntawm tus cwj pwm tsis zoo los thiab. Tej kev xav ntawm cov neeg uas ua raws li qhov tsis muaj tiag ntawd yog dab tsi? Txoj kev xav ntawd mas to taub yooj yooj yim xwb. Txoj kev xav ntawd yog ib qho kev npau suav nruab hnub, ib qho kev xav, uas tsis cuam tshuam rau yam uas muaj qab hau ntawm tej kev tim tsum txhua hnub uas nyob rau hauv lub neej tiag tiag. Piv txwv li, ua ib tug kws sau paj huam, ib tug kws sau paj huam uas tsis txawj tuag, ncig lub ntiaj teb; los sis ua ib tug neeg tua ntaj, ib tug neeg taug kev, kuj ncig lub ntiaj teb thiab, tsis yuav txij yuav nkawm thiab tsis muaj me tub me nyuam, tsis muaj dab tsi cuam tshuam rau lub neej, tsis muaj kev txhawj xeeb txog tej kev tim tsum hauv lub neej txhua hnub, ua neej yooj yim thiab kaj siab, ya rau ub rau no, pheej xav kom tsis txhob txawj tuag thiab khiav tawm ntawm lub neej tiag tiag. Qhov no puas yog qhov kev xav ntawm ib tug neeg uas ua raws li qhov tsis muaj tiag? (Yog.) Nej puas muaj leej twg muaj tej kev xav zoo li no? (Tsis muaj.) Cov kws sau paj huam uas muaj koob muaj npe nyob rau hauv Teb Chaws Suav yav dhau los uas qaug cawv es sau paj huam ntawd ne? Lawv yog cov neeg uas ua raws li qhov tsis muaj tiag los yog cov neeg uas ua raws li qhov muaj tiag? (Cov neeg uas ua raws li qhov tsis muaj tiag.) Cov tswv yim uas lawv tsim los ntawd yog tej uas tsis muaj qab hau thiab yog tej kev npau suav nruab hnub ntawm cov neeg uas ua raws li qhov tsis muaj tiag xwb. Lawv ib txwm ya rau ub rau no, es hais tej lus uas paub tsis meej thiab tsis muaj tseeb, xav hauv nruab siab hais tias lub ntiaj teb mas zoo nkauj npaum li cas, tib neeg ntiaj teb mas muaj kev thaj yeeb npaum li cas, tib neeg yuav nyob ua ke tau sib haum xeeb npaum li cas. Lawv muab lawv tus kheej cais tawm ntawm lub siab uas txawj xav, qhov tsim nyog, thiab tej kev tim tsum hauv lub neej ntawm txoj kev ua neeg nyob. Lawv muab lawv tus kheej txiav tawm ntawm tej teeb meem hauv lub neej tiag tiag no thiab xav hauv nruab siab txog ib sab uas tsis cuam tshuam rau qhov muaj tiag li. Lawv xav hais tias lawv tus kheej nyob rau sab ntawd, nyob rau qhov chaw ntawd. Qhov no tsis yog txoj kev xav ntawm ib tug neeg uas ua raws li qhov tsis muaj tiag ntawd lod? Yav dhau los muaj ib zaj paj muam, uas muaj ib kab hais tias “Kuv xav nrog huab nrog cua ya mus tsev xwb.” Zaj paj huam ntawd lub npe hu li cas? (“Lub Suab Dej.”) Nyeem cov kab ntawm zaj paj huam ntawd tias. (“Kuv xav nrog huab nrog cua ya mus tsev xwb. Kuv ntshai tsam nyob saum nruab ntug mas no heev, vim lub vaj loog pob zeb ntsuab siab dhau lawm. Seev cev nrog kuv tus duab ntxoo, mas kuv mloog zoo li kuv yuav tsis tuag li.”) Qhov nws hais tias, “Seev cev nrog kuv tus duab ntxoo, mas kuv mloog zoo li kuv yuav tsis tuag li” ntawd yog txhais li cas? Ob kab no puas qhia txog tej kev xav uas raug caij tsuj thiab tsis txaus siab ntawm ib tug neeg uas ua raws li qhov tsis muaj tiag ntawd uas ua tsis tau los sis ua tsis tiav raws li nws tej kev xav? Tej kev xav ntawd puas yog tej yam uas nthuav tawm nyob rau hauv txoj kev xav uas raug caij tsuj no? Qhov no yog mob siab rau dab tsi? Kab lus twg qhia txog qhov xwm txheej thiab qhov keeb kwm uas nws pom nws tus kheej nyob rau lub sij hawm ntawd? Puas yog kab uas hais tias “Kuv ntshai tsam nyob saum nruab ntug mas no heev”? (Yog.) Nws tab tom muab txoj kev tsaus ntuj thiab txoj kev phem ntawm txoj kev ua nom ua tswv, qhov chaw qias vuab tsuab uas tsis zoo nyob ntawd nthuav tawm ntag. Nws xav kom zoo li ib tug neeg uas tsis txawj tuag, khiav dim ntawm cheeb tsam thiab qhov xwm txheej uas zoo li no mus xwb. Qhov kom nws cia li tawm txoj kev ua ib tug nom ib tug tswv ntawd tseem yuav tsis txaus rau news thiab lod? Puas yog hais tias nws xav hloov cheeb tsam no? Nws tsis txaus siab rau cheeb tsam uas zoo li no, mloog zoo li qhov ua ib tug nom ntawd tsis haum rau cheeb tsam uas zoo li no ntawm lub neej uas nws tau xav txog ntawd, yog li ntawd nws thiaj li hnov tias raug caij tsuj nyob rau puag hauv nruab siab. Qhov no yog ib hom kev xav uas tus neeg uas ua raws li qhov tsis muaj tiag ntawd muaj. Tej kev xav ntawm cov neeg uas ua raws li qhov tsis muaj tiag ntawd mas feem ntau yog nyiam xav rau tej uas tsis muaj qab hau, tej kev xav ntawd tsis muaj tiag thiab tsis muaj tseeb, tsis cuam tshuam rau lub neej tiag tiag. Qhov ntawd zoo li lawv nyob rau ib lub ntuj nrauv uas tsis yog sab kov tau, nyob rau hauv ib qho chaw ywj pheej thiab tsuas yog lawv tus kheej nyob xwb, xav rawv tej uas tsis muaj qab hau thiab tawm ntawm qhov muaj tiag mus lawm. Tsuas zoo ib yam li ib txhia tib neeg uas nyob rau hauv lub neej niaj hnub, uas lawv pheej xav hnav cov khaub ncaws puag thaum ub, qaws lawv cov plaub hau kom zoo li puag thaum ub, thiab hais cov lus puag thaum ub xwb. Lawv xav hais tias, “Vuag, lub neej uas zoo li ntawd mas zoo heev! Zoo li ib tug tib neeg uas tsis txawj tuag li, ya rau ub rau no, tsis muaj teeb meem ntawm lub cev, tsis muaj tej kev txom nyem ntawm lub neej tiag tiag li. Nyob rau hauv lub neej uas zoo li ntawd, mas tsis muaj kev tsim txom, tsis muaj kev caij tsuj, tsis muaj kev txhawj xeeb li. Tib neeg muaj vaj huam sib luag, ib leeg pab ib leeg thiab ua neej sib haum xeeb. Cov kev xav ua lub neej uas zoo li ntawd mas cas yuav zoo thiab txaus ntshaw tshaj plaws li!” Nyob rau ntawm cov tsis ntseeg, mas muaj ib txhia uas caum tej no. Ib txhia tib neeg mas hu cov nkauj uas me ntsis zoo ib yam los sis sau cov paj huam uas me ntsis zoo ib yam, los sis seev cev me ntsis zoo ib yam. Vim li ntawd, tib neeg thiaj li haj yam xav tau dua lwm lub ntuj uas cov ua raws li qhov tsis muaj tiag ntawd ua npau suav txog. Yog li ntawd thaum ib txhia tib neeg hu cov nkauj no los sis ua cov yeeb yam no, mas lawv yim hu, ces lawv yim tu siab, lawv yim xav tau thiab yim tuav rawv txoj kev xav txog lub ntuj ntawd xwb. Thaum kawg muaj dab tsi tshwm sim? Tom qab uas hu nkauj ntev lawm, mas ib txhia tib neeg mloog zoo li lawv khiav tsis dim lawv tej kev txhawj xeeb lawm. Txawm lawv yuav hu nkauj ntau npaum li cas los xij, lawv yeej tseem tsis hnov txoj kev sov siab ntawm sab yaj ceeb li. Txawm lawv yuav hu nkauj ntau npaum li cas los xij, lawv yeej tseem mloog zoo li sab uas lawv xav ntawm lawv txoj kev xav uas tsis muaj tseeb ntawd mas zoo dua. Lawv cia li tag kev cia siab rau lub ntiaj teb, thiab tsis xav ua neej nyob rau hauv sab yaj ceeb ntxiv li lawm, yog li ntawd thaum kawg lawv thiaj li txiav txim siab lawv mus lawv rau lub ntuj uas lawv xav ntawd lawm. Qee tus noj yeeb noj tshuaj, qee tus dhia tsev, qee tus dai caj dab, hos qee tus ces cia li mus ua hauj sam es mus caum txoj kev xyaum ua raws li sab ntsujplig lawm. Nyob rau hauv lawv cov lus, mas lawv pom tias txoj kev dag uas nyob rau hauv lub ntiaj teb no zoo li cas lawm. Qhov tseeb, tsis tas yuav siv tej kev ntsuas thiab tej tswv yim uas loj tag npaum li no los daws qhov lawv tag kev cia siab rau lub ntiaj teb no li. Muaj ntau txoj kev los daws tej teeb meem thiab tej kev nyuaj uas zoo li no, tiam sis vim lawv tsis paub lub ntsiab tseeb uas tseem ceeb ntawm tej teeb meem no, ces thaum kawg lawv thiaj li xaiv tej tswv yim uas nruj tshaj plaws los daws tej kev nyuaj no thiab khiav tawm ntawm tej kev nyuaj no mus kom thiaj li tau raws li lub hom phiaj ntawm lawv tej kev xav ntawd. Qhov no qhia txog ib txhia neeg uas ua raws li qhov tsis muaj tiag uas nyob rau hauv cov tsis ntseeg thiab lawv tej teeb meem.

Nyob rau hauv Vajtswv lub tsev, hauv pawg ntseeg, puas muaj cov tib neeg uas muaj tej kev xav zoo sib xws? Muaj xwb xwb, tsuas yog nej tseem tsis tau pom tej kev xav ntawd xwb, yog li ntawd Kuv mam li qhia nej txog tej kev xav ntawd. Muaj ib co tib neeg uas thaum nyob rau ntawm sab ntiaj teb mas ntshaw kom muaj ib lub neej uas muaj kev thaj yeeb, kev sib haum xeeb, kev nyab xeeb, thiab muaj vaj huam sib luag rau txhua tus raws li txoj kev xav, ib yam li cov neeg uas ua raws li qhov tsis muaj tiag ntawm cov tsis ntseeg ntawd muaj. Lub neej hauv txoj kev xav no mas zoo li yog ib qho chaw zoo nkauj tshaj plaws uas qee tus kws sau paj huam los sis cov kws sau ntawv ntawd tau hais txog, txawm li ntawd los feem ntau qhov ntawd zoo li qee qhov chaw, qee qhov kev ua neej, los sis qee qhov cheeb tsam ua neej uas muaj nyob rau hauv tib neeg txoj kev xav xwb. Cov tib neeg no, ua raws li tej kev tim tsum thiab tej kev xav uas zoo li no xwb, nrhiav lawv tus kheej txoj kev ntseeg kom tau raws li lawv tej kev xav yam tsis paub dab tsi li. Thaum tab tom tshawb nrhiav, lawv pom hais tias kev ntseeg Vajtswv mas yog ib txoj kev zoo thiab yog ib txoj kev xaiv uas zoo ntawm txoj kev ntseeg lawm. Vim lawv muaj tej kev xav ntawd, lawv thiaj li los rau hauv Vajtswv lub tsev, cia siab hais tias yuav muaj kev sov siab, kev txhawj, thiab tib neeg yuav muab lawv saib muaj nqis thiab saib xyuas lawv, thiab lawv haj yam cia siab tias yuav tau txais Vajtswv txoj kev hlub thiab kev tiv thaiv zoo. Lawv nkag los rau hauv Vajtswv lub tsev nrog rau lawv tej kev xav, yog li ntawd txawm lawv yuav ua lawv tej dej num tiav thiab tsis tiav los xij, lawv tej kev xav yeej tsis hloov li—lawv coj thiab tuav rawv lawv tej kev xav ntawd nyob rau hauv lawv tas li xwb. Txij thaum pib mus txog thaum xaus, yeej piav qhia tau lawv tej kev xav raws li nram qab no: Thaum nkag mus rau hauv Vajtswv lub tsev lawm, lawv cia siab hais tias Vajtswv lub tsev yog ib qho chaw uas lawv yuav muaj kev sov siab, qhov chaw uas lawv yuav xyiv fab rau txoj kev sov siab, kev zoo siab, thiab kev noj qab nyob zoo. Lawv cia siab hais tias Vajtswv lub tsev yog ib qho chaw uas tsis muaj kev sib tw, kev tsis sib ntseeg siab, los sis kev ntxub ntxaug los ntawm tib neeg, yog ib qho chaw uas tsis muaj kev thab plaub, kev dag ntxias, kev rhuav tshem, los sis kev sib cais nyob rau ntawm tib neeg li. Tej no yog tej kev xav uas tuaj yeem pom nyob rau hauv cov neeg uas ua raws li qhov tsis muaj tiag ntawd lub siab. Qhov ntawd yog, lawv xav hais tias muaj ib qho chaw uas tib neeg ib leeg ua rau ib leeg zoo li tej tshuab, uas tsis muaj txoj sia thiab ib qho kev xav, kev luag ntxhi, kev ncaws hau, thiab kev nyo hau thaum lawv sib ntsib los qhia txog txoj kev phooj ywg, los qhia tias tsis muaj kev ua yeeb ncuab li. Nyob rau hauv qhov chaw hauv txoj kev xav no, mas muaj qhov tib neeg sib hlub, thiab lawv ib leeg quav ntsej ib leeg, ib leeg saib ib leeg muaj nqis, ib leeg saib xyuas ib leeg, ib leeg pab ib leeg, ib leeg to taub ib leeg, thiab ib leeg ua kom haum ib leeg, thiab ib leeg haj tseem tiv thaiv thiab npog ib leeg zoo heev. Tej no puav leej yog qee yam ntawm tej uas cov neeg uas ua raws li qhov tsis muaj tiag ntawd xav thiab ua npau suav txog. Piv txwv li, thaum cov neeg uas ua raws li qhov tsis muaj tiag ntawd nkag mus rau hauv Vajtswv lub tsev lawm, lawv txoj kev xav thiab qhov kev cia siab mas yog qhov hais tias tej zaum cov hluas yuav hwm cov tib neeg laus, saib lawv muaj nqis, saib xyuas lawv, thiab cuab pob ntseg mloog lawv hais thiab quav ntsej txog lawv. Dhau ntawm qhov kev hwm lawm, lawv kuj cia siab hais tias tib neeg yuav siv cov npe uas muaj meej mom, xws li hu cov kwv tij ua “Txiv Ntxawm Loj Li Ub Li No,” “Txiv Ntxawm No Txiv Ntxawm Tod,” los sis “Txiv Ntxawm Li Ub Li No,” thiab hu lawv cov muam ua “Pog Ub Pog No,” “Niam Ntxawm Li Ub Li No,” los sis “Tus Muam Li Ub Li No”—tseeb tiag, txhua tus nyias yeej muaj nyias lub npe hu. Lawv cia siab hais tias tib neeg ib leeg yuav coj zoo rau ib leeg, ib leeg haum ib leeg, thiab ib leeg paub kev paub cai rau ib leeg nyob rau sab nraud, thiab tias yuav tsis muaj leeg twg muaj ib lub siab phem los sis ib yam tsis zoo los sis ib yam phem nyob rau saum daim tawv los sis hauv lawv lub siab li. Lawv cia siab hais tias yog leej twg ua ib qho yuam kev los sis ntsib tej kev nyuaj, mas txhua tus yuav cev tes los pab tus ntawd, thiab tsis tas li ntawd xwb, kuj txhawj thiab ua siab ntev txhawb rau tus ntawd thiab. Tshwj xeeb yog thaum raug rau cov uas tsis muaj peev xwm, thiab cov tib neeg uas tsis paub dab tsi uas raug lwm tus hauv lub ntiaj teb no thab thiab caij tsuj yooj yim heev ntawd—lawv haj tseem cia siab heev ntxiv hais tias thaum cov tib neeg zoo li no los rau hauv pawg ntseeg, los rau hauv Vajtswv lub tsev lawm, mas cov tib neeg zoo li no yuav tau txais kev saib xyuas , kev mob siab rau, thiab kev saib xyuas tshwj xeeb yam zoo heev. Ib yam li cov neeg uas ua raws li qhov tsis muaj tiag no hais tias, thaum lawv los rau hauv Vajtswv lub tsev lawm, mas lawv xav kom txhua tus zoo siab thiab nyob zoo, thiab lawv cia siab hais tias vim lawv txhua tus twb ntseeg Vajtswv lawm, ces lawv yuav yog ib tsev neeg loj thiab yog kwv tij ua ke. Lawv xav hais tias yuav tsum tsis muaj kev thab plaub, tsis muaj kev rau txim, tsis muaj kev rhuav tshem li. Lawv ntseeg hais tias yog muaj ib qho teeb meem tshwm tuaj, mas tib neeg yuav tsum tsis muaj kev sib cav sib ceg los sis tsis muaj kev npau taws li, tiam sis txhua tus ib leeg yuav tsum ua siab txias txias rau ib leeg, ib leeg ua siab ntev rau ib leeg thiab ib leeg pab ib leeg, txhua tus yuav tsum ua kom lwm tus kaj siab tas li, thiab txhua tus tib neeg ib leeg yuav tsum ua qhov zoo tshaj plaws thiab ua lub siab zoo tshaj plaws rau ib leeg, hos ceev lawv sab kev phem los sis sab tsis zoo ntawd rau lawv tus kheej xwb. Lawv ntseeg hais tias tib neeg ib leeg yuav tsum coj rau ib leeg zoo li tej tshuab, tias tib neeg yuav tsum tsis txhob muaj ib qho kev xam pom los sis ib qho kev xav uas tsis zoo txog lwm tus tib neeg li, thiab ib leeg haj yam tsis ua ib yam dab tsi tsis zoo rau ib leeg kiag li thiab; lawv xav hais tias tib neeg yuav tsum muaj tej kev npaj siab uas zoo rau lwm tus, thiab tias lo paj lug no mas hais tau meej heev hais tias, “Cov neeg zoo muaj lub neej uas nyob kaj siab lug.” Lawv xav hais tias tsuas zoo li no xwb mas thiaj li yog Vajtswv lub tsev tseeb thiab yog pawg ntseeg tseeb. Txawm li cas los xij, cov neeg uas ua raws li qhov tsis muaj tiag no tej kev xav tseem tsis tau paub. Lawv tsis paub hais tias, Vajtswv lub tsev tsom ntsoov rau tej hauv paus ntsiab lus, mob siab rau kev sib pab thiab kev sib txhawb nyob rau ntawm tib neeg, thiab cheem tsum kom txhua tus coj rau txhua hom tib neeg raws li qhov tseeb tej hauv paus ntsiab lus thiab Vajtswv cov lus xwb. Vajtswv lub tsev haj tseem muab qee qhov kev cheem tsum uas hais tias “tsis xav txog” tib neeg ntawd hais tawm kom ua thiab, xws li muab cov tib neeg uas sib txawv cais, thiab ua rau lawv sib txawv. Vajtswv lub tsev kuj cheem tsum kom tib neeg sawv los muab txhua tus uas lawv pom hais tias rhuav tshem tej kev ntshaw ntawm Vajtswv lub tsev, ua txhaum cov txheej txheem hauj lwm, los sis tawm tsam tej hauv paus ntsiab lus ntawd nthuav tawm thiab qhuab ntuas thiab, kom thiaj li yuav tsom kwm tau tej kev ntshaw ntawm Vajtswv lub tsev, thiab Vajtswv lub tsev tsis pub tib neeg tiv thaiv los sis npog ib leeg tus twg raws li lawv tej kev xav li. Vajtswv lub tsev kuj tau tsim muaj ntau qib kev ua thawj coj thiab. Muaj ib qho mas, Vajtswv lub tsev cheem tsum kom cov thawj coj ntawm txhua qib los saib xyuas tes hauj lwm uas niaj hnub ua ntawm pawg ntseeg. Hos lwm qhov mas, Vajtswv lub tsev cheem tsum kom lawv saib xyuas, tsim kho, thiab taug tej hauj lwm ntawd qab kom nruj heev, tiam sis kuj yuav tau paub, to taub, thiab cuab pob ntseg mloog txog tej xwm txheej thiab txhua tus tib neeg lub neej ntawm pawg ntseeg txhua lub sij hawm, soj ntsuam cov cwj pwm thiab cov kev nyiam uas lawv muaj thaum ua lawv tej dej num, thiab kho kom zoo thiab kom tsim nyog thaum uas tim tsum thiab. Vajtswv lub tsev kuj yeej cheem tsum kom cov thawj coj thiab cov neeg ua hauj lwm los qhuab ntuas thiab qhuab qhia txhua tus tib neeg uas lawv pom hais tias tawm tsam cov txheej txheem hauj lwm ntawm Vajtswv lub tsev los sis ua txhaum tej hauv paus ntsiab lus thiab tab kaum thiab cuam tshuam pawg ntseeg tes hauj lwm, ceeb toom rau tej kev ua txhaum me me kom nruj thiab, thiab saib xyuas tej teeb meem loj ntawd kom tsim nyog ntxiv. Nyob rau hauv qhov ua li no, ib txhia tib neeg tau raug muab tshem tawm mus, ntiab tawm mus, los sis tau muab lawv cov npe tshem tawm mus lawm. Thaum tib neeg los rau hauv Vajtswv lub tsev los ua tej dej num thiab tej hauj lwm ntawd, lawv coob leej ntau tus hnov, pom, los sis tau ntsib tau pom txoj kev rau txim thiab kev txiav txim uas los ntawm Vajtswv cov lus los; tsis tas li ntawd xwb, lawv kuj raug cov thawj coj ntawm txhua qib qhuab ntuas thiab qhuab qhia thiab. Tej yam txawv txawv uas tib neeg ntsib nyob rau hauv Vajtswv lub tsev no mas txawv cov neeg uas ua raws li qhov tsis muaj tiag ntawd txoj kev xav txog Vajtswv lub tsev thiab pawg ntseeg, txog rau qhov uas lawv dhau ntawm lawv tej kev cia siab ntawd lawm, yog li ntawd qhov no thiaj li ua rau lawv muaj kev meem txom heev nyob rau hauv lawv lub siab. Muaj ib qho mas, lawv pom hais tias muaj ntau yam xwm txheej uas tshwm sim nyob rau hauv pawg ntseeg, los sis pawg ntseeg tej tswv yim thiab tej hauv paus ntsiab lus uas daws tej teeb meem ntawd, mas tsis txaus ntseeg li. Hos lwm qhov mas yog, vim lawv tej kev xav thiab lawv tej kev nkag siab yuam kev txog yam zoo, pawg ntseeg, thiab Vajtswv lub tsev es thiaj li ua rau muaj tej kev xav uas raug caij tsuj nyob rau hauv lawv lub siab. Tom qab muaj tej kev xav uas raug caij tsuj no tshwm tuaj lawm, vim lawv kho tsis tau lawv tej kev xav thiab tej kev xam pom uas yuam kev ntawd kiag tam sid, los sis saib tsis pom thiab tsis paub tej teeb meem ntawm lawv tej kev xav ntawd kom meej tseeb, ces thiaj li ua rau muaj ntau qhov kev xav phem pib tshwm tuaj rau hauv lawv lub siab. Tsis tas li ntawd xwb, vim lawv tsis to taub qhov tseeb los sis siv tsis tau qhov tseeb los kho tej kev xav phem no, tej kev xav phem no thiaj li pib cog tob rau hauv lawv tej kev xav los sis cog tob rau hauv lawv nruab siab nruab ntsws lawm, ua rau lawv tej kev xav uas raug caij tsuj ntawd nthuav dav thiab loj zuj zus tuaj lawm. Qhov tseeb tiag, Vajtswv, Vajtswv lub tsev, pawg ntseeg, cov ntseeg, thiab cov Ntseeg Vajtswv ntawd puav leej tsis yog qhov chaw uas thaj yeeb tshaj plaws, ntuj ceeb tsheej, los sis qhov chaw uas zoo nkauj tshaj plaws uas cov neeg uas ua raws li qhov tsis muaj tiag no xav nyob rau hauv lawv tej kev xav hlo li. Vim li ntawd, txoj kev caij tsuj uas nyob rau hauv lawv nruab siab ntawd thiaj li ntau zuj zus ntxiv, thiab lawv tsis muaj txoj hauv kev los tso lawv tus kheej kom dim ntawm txoj kev caij tsuj ntawd mus li. Puas muaj cov tib neeg zoo li no nyob rau hauv pawg ntseeg? (Muaj.)

Ib txhia tib neeg hais tias, “Au, Vim li cas Vajtswv lub tsev thiaj li pheej tham txog qhov lees txais txoj kev txiav txim thiab kev rau txim ntawd? Ua cas cov ntseeg Vajtswv tseem raug qhuab qhia thiab? Au, vim li cas Vajtswv lub tsev thiaj li muab tib neeg ntiab tawm mus? Tsis muaj kev hlub nyob rau hauv Vajtswv lub tsev kiag li! Yog ua cas tej yam zoo li no thiaj li tshwm sim rau hauv ‘lub ntuj ceeb tsheej hauv ntiaj teb’? Yog ua cas cov tawm tsam Khetos thiaj li tshwm rau hauv pawg ntseeg? Yog ua cas cov tawm tsam Khetos thiaj li tawm los caij tsuj thiab rau txim rau lwm tus? Yog ua cas tib neeg ib leeg thiaj li muab ib leeg nthuav tawm thiab soj ntsuam nyob rau hauv pawg ntseeg, hauv Vajtswv lub tsev? Yog ua cas thiaj li muaj kev sib cav sib ceg? Yog ua cas thiaj li muaj kev khib thiab kev cov nyom? Yog ua li cas lawm? Vim peb twb los rau hauv Vajtswv lub tsev lawm, mas peb tsim nyog muaj kev sib hlub, thiab peb sawv daws ib leeg tsim nyog pab tau ib leeg. Yog ua cas tej no thiaj li tseem tshwm sim?” Cov tib neeg uas muaj cov tswv yim no puas muaj coob? Coob tus tib neeg saib Vajtswv lub tsev raws li lawv tej kev xav hauv nruab siab xwb. Tam sim no, qhia Kuv seb, tej kev xav hauv nruab siab thiab tej kev tshab txhais no puas yog? (Tsis yog, tej kev xav hauv nruab siab thiab tej kev tshab txhais no tsis yog.) Tej ntawd tsis yog qhov twg? (Tib neeg mas qias vuab tsuab heev thiab cov uas Vajtswv cawm ntawd puav leej muaj tus moj yam qias vuab tsuab, yog li ntawd lawv yeej yuav nthuav txoj kev qias vuab tsuab uas nyob rau hauv lawv tej kev nrog lwm tus sib tham ntawd tawm xwb xwb li. Yuav muaj kev khib thiab kev cov nyom, thiab yuav muaj kev thab plaub thiab kev caij tsuj. Tej no yeej yuav tsum tshwm sim. Tej uas cov neeg uas ua raws li qhov tsis muaj tiag ntawd xav hauv nruab siab zoo li no mas tsis muaj tseeb. Tsis tas li ntawd xwb, yuav kom tiv thaiv tau pawg ntseeg lub neej thiab tes hauj lwm, mas pawg ntseeg yuav tau qhuab qhia tib neeg raws li qhov tseeb tej hauv paus ntsiab lus, los sis kho thiab hloov pauv tib neeg, los sis muab cov tib neeg phem thiab cov tsis ntseeg ntawd rho tawm mus thiab ntiab tawm mus—li no mas thiaj li mus raws li tej hauv paus ntsiab lus. Qhov ntawd yog vim hais tias thaum tib neeg ua raws li lawv tus moj yam qais vuab tsuab lawm, mas lawv tab kaum thiab cuam tshuam pawg ntseeg tes hauj lwm. Qhov ntawd yuav tsis muaj tseeb yog pawg ntseeg tsis ntsuas xws li qhuab qhia, los sis muab cov tib neeg uas zoo li no hloov pauv thiab tshem tawm mus.) Qhov ntawd tsis muaj tseeb, vim li ntawd cov tib neeg no tej tswv yim thiaj li yog cov neeg uas ua raws li qhov tsis muaj tiag ntawd tej kev xav xwb. Tej kev xav ntawd tsis muaj ib qho muaj tseeb li, tej kev xav ntawd puav leej tsis muaj dab tsi thiab tsuas yog xav hauv nruab siab xwb, puas yog? Tab txawm tam sim no los, cov tib neeg zoo li no yeej tseem tsis to taub hais tias vim li cas lawv thiaj li yuav tsum ntseeg Vajtswv thiab. Ib txhia tib neeg hais tias, “Kev ntseeg Vajtswv yog qhov zoo. Kev ntseeg Vajtswv txhais hais tias ua yam zoo thiab ua ib tug neeg zoo.” Nqe lus no puas yog? (Tsis yog, nqe lus no tsis yog.) “Cov ntseeg Vajtswv yuav tsum muaj tej kev npaj siab uas zoo nyob rau hauv lawv lub siab.” Nqe lus no puas yog? (Tsis yog, nqe lus no tsis yog.) Muaj tej kev npaj siab uas zoo nyob rau hauv yus lub siab—nqe lus no yog nqe lus dab tsi? Koj puas tuaj yeem xav tau xwb es cia li muaj tej kev npaj siab uas zoo ntawd lawm? Koj puas muaj tej kev npaj siab uas zoo? Qhov muaj tej kev npaj siab uas zoo nyob rau hauv yus lub siab ntawd puas yog ib lub hauv paus ntsiab lus ntawm tib neeg txoj kev coj kom zoo? Qhov ntawd tsuas yog ib lo lus zoo, ib lo lus qhuab qhia xwb. Qhov ntawd yog ib yam uas tsis muaj dab tsi li. Thaum tsis cuam tshuam rau koj tus kheej tej kev ntshaw, mas koj hais tau qhov no yam zoo heev hais tias, kuv xav hais tias, “Kuv muaj tej kev npaj siab uas zoo nyob rau hauv kuv lub siab, kuv tsis thab plaub, tsis rhuav tshem, tsis dag, los sis siv lwm tus kom kuv tau txiaj ntsim li.” Tiam sis thaum cuam tshuam rau koj tus kheej tej kev ntshaw, lub meej mom, thiab txoj kev khav txiv lawm no, nqe lus uas hais tias “muaj tej kev npaj siab uas zoo nyob rau hauv yus lub siab” ntawd puas yuav txwv tau koj? Nqe lus ntawd puas yuav kho tau koj tus moj yam qias vuab tsuab? (Tsis tau, nqe lus ntawd kho tsis tau.) Yog li ntawd, nqe lus no tsis muaj qab hau dab tsi li; nqe lus no tsis yog qhov tseeb. Qhov tseeb muaj peev xwm nthuav tau lub ntsiab tseeb ntawm koj tus moj yam qias vuab tsuab tawm, qhov tseeb ntawd tuaj yeem nthuav tau thiab txheeb xyuas tau lub ntsiab tseeb thiab tus yam ntxwv tseeb ntawm tej uas koj ua, thiab txiav txim siab thiab teem txim rau lub ntsiab tseeb ntawm tej uas koj ua thiab tus moj yam uas koj nthuav tawm ntawd. Tom qab ntawd qhov tseeb muab txoj kev uas tsim nyog thiab tej hauv paus ntsiab lus rau koj los hloov koj txoj kev ua neej thiab txoj kev uas koj coj koj tus kheej kom zoo thiab txoj kev ua ntawd. Ua li no, yog tib neeg lees txais tau qhov tseeb thiab hloov lawv txoj kev ua neej, ces yeej kho tau lawv tus moj yam qias vuab tsuab lawm; tsis tas yuav kom tib neeg muaj tej kev npaj siab uas zoo nyob rau hauv lawv lub siab es thiaj li yuav ua tau qhov no, qhov tseeb xwb yeej ua tau lawm. Qhov tseeb tsis yog muab cov lus zoo, cov lus qhuab qhia, los sis cov kev cai tswj thiab kev cai coj los kho tib neeg tus moj yam qias vuab tsuab, tiam sis yog muab tej hauv paus ntsiab lus, tej qauv, thiab tej hauv kev uas yuav coj lawv tus kheej li cas es thiaj li yuav zoo ntawd coj los kho. Qhov tseeb ntawd siv tej hauv paus ntsiab lus, tej qauv, thiab tej hauv kev los pauv thiab hloov tib neeg tus moj yam qias vuab tsuab. Thaum tib neeg tej hauv paus ntsiab lus, tej qauv, thiab tej hauv kev uas yuav coj lawv tus kheej li cas es thiaj li yuav zoo ntawd hloov thiab yog lawm, ces tag nrho tej tswv yim uas yuam kev thiab tej kev xav tsis yog uas nyob rau hauv lawv lub siab ntawd yuav cia li hloov li lawm thiab xwb. Thaum tib neeg to taub qhov tseeb thiab tau txais qhov tseeb lawm, ces lawv tej kev xav yuav hloov raws. Qhov muaj tej kev npaj siab uas zoo nyob rau hauv tib neeg lub siab ntawd tsis yog qhov tseem ceeb, qhov tseem ceeb yog qhov kev hloov lub hauv paus ntawm lawv tej kev xav, lawv tus moj yam, thiab lawv lub ntsiab tseeb xwb. Yam uas tus tib neeg zoo li no nthuav tawm thiab ua neej raws ntawd yuav dhau los yog yam zoo. Txoj hauv kev, tus xeeb ceem, thiab lub hauv paus ntawm qhov lawv yuav coj lawv tus kheej li cas es thiaj li yuav zoo ntawd puav leej hloov lawm. Lawv txoj kev hais lus thiab tej kev ua ntawd muaj Vajtswv cov lus ua lawv lub hauv paus thiab tus qauv, thiab lawv ua tau neej li cov tib neeg dog dig lawm. Yog li ntawd, puas tseem yuav tim tsum qhia lawv kom “muaj tej kev npaj siab uas zoo nyob rau hauv lawv lub siab” thiab? Nqe lus ntawd puas muaj qab hau? Nqe lus ntawd tsis muaj qab hau dab tsi li; nqe lus ntawd daws tsis tau ib qho teeb meem kiag li. Tom qab cov neeg uas ua raws li qhov tsis muaj tiag ntawd los rau hauv Vajtswv lub tsev, hauv pawg ntseeg lawm, es tseem ua tsis tau raws li lawv tej kev xav thiab, ces lawv thiaj li hnov raug caij tsuj nyob rau hauv lawv lub siab vim qhov no. Qhov ntawd zoo ib yam li qhov ib txhia neeg uas ua raws li qhov tsis muaj tiag ntawd mus rau hauv tsoom fwv los sis zej zos es tom qab ntawd pom hais tias ua tsis tau los sis ua tsis tiav raws li lawv tej kev xav. Vim li ntawd, lawv thiaj li pheej tag kev cia siab. Tom qab ib txhia tib neeg tau los ua nom ua tswv los sis ua huab tais lawm, mas lawv zoo siab heev rau lawv tus kheej thiab khav theeb heev, yog nkaus li kab lus uas nyob rau hauv ib zaj paj huam uas hais tias, “Thaum cua daj cua dub tuaj, ces cov huab yuav tawg tag.” Kab tom ntej hais li cas? (“Tam sim no kuv lub hwj chim kav tag nrho hauv hiav txwv, kuv rov qab mus rau kuv lub zos lawm.”) Koj pom hais tias, lawv cov lus mas txawv heev. Lawv muaj ib hom kev xav hauv siab uas cov tib neeg muaj kev ua neej thiab qhov tsim nyog ntawd to taub nyuaj. Cov neeg uas ua raws li qhov tsis muaj tiag no yeej ib txwm hais lus ua lub suab zoo li muaj meej mom siab. Qhov hais lus ua lub suab zoo li muaj meej mom siab ntawd txhais li cas? Qhov ntawd txhais hais tias lawv yeej tsis txeev ntsib qhov muaj tiag los sis yeej daws tsis tau tej teeb meem tiag tiag uas nyob rau hauv txhua yam uas lawv ua ntawd li. Lawv tsis to taub tias qhov muaj tiag yog dab tsi, lawv pheej ua raws li tej kev xav hauv siab xwb. Thaum cov tib neeg no los rau hauv Vajtswv lub tsev, mas txawm lawv yuav hnov qhov tseeb ntau npaum li cas los xij, lawv yeej tsis to taub hais tias qhov los ntseeg Vajtswv ntawd yog txhais li cas los sis qhov tseem ceeb ntawm txoj kev ntseeg Vajtswv yog dab tsi li. Lawv twb tsis nkag siab qhov muaj nqis ntawm qhov tseeb, mas tsis tas yuav hais txog qhov muaj nqis ntawm qhov kev caum qhov tseeb ntawd li. Yam uas lawv pheej caum ces yog cov neeg uas ua raws li qhov tsis muaj tiag ntawd tej kev xav xwb. Lawv txoj kev npau suav ces yog kom muaj ib hnub es Vajtswv lub tsev zoo li qhov lawv xav xwb, uas yog qhov chaw uas tib neeg ib leeg hwm ib leeg, nyob ua ke yam sib haum xeeb, ib leeg ncawg ib leeg, thiab ib leeg saib ib leeg muaj nqis, ib leeg saib xyuas ib leeg, ib leeg txhawb ib leeg, ib leeg pab ib leeg, thiab ib leeg ua ib leeg tsaug. Yog qhov chaw uas tib neeg ib leeg hais yam zoo rau ib leeg thiab ib leeg foom koob hmoov rau ib leeg, yam tsis muaj ib lo lus tsis txaus siab los sis mob siab li, los sis cov lus uas muab tib neeg lub ntsiab tseeb uas qias vuab tsuab, los sis tej kev sib cav sib ceg ntawd nthuav tawm, los sis tib neeg ib leeg muab ib leeg nthuav tawm thiab ib leeg qhuab qhia ib leeg. Txawm lawv yuav hnov qhov tseeb ntau npaum li cas los xij, cov tib neeg no yeej tseem tsis to taub lub ntsiab ntawm txoj kev ntseeg Vajtswv, los sis Vajtswv tej kev cheem tsum yog dab tsi, thiab Vajtswv xav kom tib neeg yog hom tib neeg zoo li cas li. Tsis yog tias lawv tsuas tsis to taub tej no xwb, tiam sis lawv kuj haj yam cia siab hais tias muaj ib hnub lawv yuav muaj kev xyiv fab rau txoj kev ua zoo uas tsis muaj tseeb uas lawv ntshaw nyob rau hauv Vajtswv lub tsev ntawd thiab. Yog lawv tsis tau txais txoj kev ua zoo uas zoo li no, ces lawv xav hais tias nyob rau hauv Vajtswv lub tsev mas tsis muaj ib qho chaw uas yuav ua tau raws li lawv tej kev xav, thiab tsis muaj ib lub hwv tsam uas yuav ua tau raws li tej kev xav ntawd li. Yog li ntawd, ib txhia tib neeg thiaj li pheej xav txog qhov muab tso tseg thaum hnov raug caij tsuj, hais tias, “Kev ntseeg Vajtswv mas dhuav thiab tsis muaj dab tsi li. Cov ntseeg Vajtswv ib leeg tsis pab, tsis txhawb, thiab tsis hwm ib leeg ib yam li cov uas ntseeg Hauj Sam. Thiab cov ntseeg Vajtswv pheej tham txog qhov tseeb thiab tej hauv paus ntsiab lus xwb, feem ntau lawv tham txog txoj kev thoob tsib to nrog txog tej kev sib raug zoo ntawm lawv tus kheej xwb, tej thaum muaj kev qhia tshwm thiab kev sib thuam, thiab lawv haj tseem raug qhuab qhia tas li thiab. Qhov no tsis yog lub neej uas kuv xav tau.” Yog lawv ua tsis tau raws li lawv tej kev xav thiab tsis muaj ib qho kev cia siab me me tias lawv yuav tau mus rau hauv ntuj ceeb tsheej li, ces cov neeg uas ua raws li qhov tsis muaj tiag uas zoo li no yuav tawm ntawm pawg ntseeg mus lub sij hawm twg los tau es mus nrhiav lwm txoj kev. Yog li ntawd, qhia Kuv seb, cov tib neeg no puas yog cov tib neeg uas nyob rau hauv Vajtswv lub tsev? Lawv puas tsim nyog nyob rau hauv Vajtswv lub tsev? (Tsis tsim nyog, lawv tsis tsim nyog.) Nej xav tias lawv tsim nyog mus rau qhov twg? (Lawv tsim nyog mus koom lub neej ua hauj sam.) Lawv mus rau tsev Hauj Sam los sis tsev Tauj los tau, lub twg los yeej tau. Lawv tsis hnov raug caij tsuj nyob rau ntawm sab ntiaj teb tiam sis hnov raug caij tsuj nyob rau hauv Vajtswv lub tsev, lawv xav hais tias lawv tsis muaj lub hwv tsam los ua kom tau raws li lawv tej kev xav los sis tsis muaj ib qho chaw seem los muab tej kev xav ntawd siv li. Yog li ntawd, cov tib neeg no mas tsim nyog nyob rau tej chaw uas muaj pa ncho thiab hlawv xyab tas zog xwb. Cov chaw ntawd mas nyob ntsiag to, thiab cov chaw ntawd tsis qhia koj tias yuav tsum coj koj tus kheej li cas es thiaj li yuav zoo. Cov chaw ntawd tsis muab koj tej kev xav thiab tej kev xam pom uas yuam kev ntawd nthuav tawm, thiab cov chaw ntawd tsis muab koj tus moj yam qias vuab tsuab nthuav tawm los sis qhuab ntuas. Nyob rau ntawm cov chaw ntawd mas tib neeg nyob sib nrug deb thiab sib hwm. Ib hnub twg ib leeg tsuas hais ob peb lo lus rau ib leeg xwb, thiab tsis muaj kev sib cav sib ceg li. Tsis muaj leeg twg saib xyuas los sis tswj koj. Koj yuav ua ib lub neej uas txaus siab hlo rau tus kheej nyob rau ntawm cov chaw ntawd, ib xyoos los yeej tsis tshua tau ntsib cov tib neeg txawv li. Koj tsis tas yuav txhawj txog tej hauj lwm uas niaj hnub ua ntawd li. Yog koj xav tau zaub mov los yug koj lub cev, koj cia li nqa ib lub tais me me los sis ib lub tais thov khawv mus thov ntawm cov pej xeem sawv daws, ces cia li tau zaub mov noj lawm xwb, tsis tas yuav khwv nyiaj li. Nyob rau hauv cov chaw ntawd, txhua yam teeb meem hauv lub ntiaj teb ploj tag li lawm. Tib neeg ib leeg ua zoo rau ib leeg heev, thiab tsis muaj leej twg nrog lwm tus sib cav sib ceg li. Yog muaj tej qho uas tsis sib pom zoo, los tej ntawd nyob rau hauv tib neeg lub siab xwb. Txhua hnub nyob tau kaj siab thiab tau zoo heev. Qhov chaw no yog thaj av uas sawv daws paub hais tias muaj kev kaj siab tshaj plaws, nws yog qhov chaw ntawm cov neeg uas ua raws li qhov tsis muaj tiag ntawd tej kev xav, thiab yog qhov chaw uas cov neeg uas ua raws li qhov tsis muaj tiag ntawd ua tau raws li lawv tej kev xav. Cov tib neeg no tsim nyog nyob rau hauv qhov chaw uas raws li lawv txoj kev xav hauv nruab siab, tsis yog hauv pawg ntseeg. Rau qhov cov tib neeg uas zoo li lawv ntawd, mas muaj ntau yam uas yuav tau ua nyob rau hauv pawg ntseeg heev. Txhua hnub, lawv yuav tsum tau nyeem Vajtswv cov lus, koom kev sib txoos ua ke, kawm txhua lub hauv paus ntsiab lus, thiab kawm txog qhov tseeb thiab kev to taub txog lawv tus kheej tus moj yam qias vuab tsuab txhua lub sij hawm; qee tus tib neeg, uas ua raws li lawv tus moj yam qias vuab tsuab thiab ua txhaum tej hauv paus ntsiab lus, mas raug qhuab qhia, thiab ob peb tug tib neeg haj tseem raug li no tsis tu ncua li thiab. Cov tib neeg no hnov raug caij tsuj thiab tsis zoo siab nyob rau ntawm no. Pawg ntseeg tsis yog qhov chaw uas mus raws li lawv txoj kev xav. Lawv ntseeg hais tias qhov mus nyob rau ib qho chaw uas lawv nyiam kom sai, mas yuav zoo dua li siv lawv lub sij hawm los sis nkim lawv lub sij hawm thaum tseem hluas nyob rau hauv qhov chaw no. Lawv xav hais tias tsis tas yuav siv lawv lub sij hawm kom tag rau ntawm no, uas yog lub neej uas pheej hnov raug caij tsuj thiab tsis tau zoo nyob, tsis muaj kev xyiv fab, thiab tsis kaj siab li. Qhov no yog ib qho kev qhia kom pom tseeb txog cov neeg uas ua raws li qhov tsis muaj tiag ntawd tej kev xav uas peb hais txog xwb. Tsis muaj dab tsi hais ntau txog cov tib neeg no li. Txawm koj yuav qhia qhov tseeb rau lawv ntau npaum li cas los xij, lawv yuav tsis mloog. Lawv tsuas ua raws li tej kev xav ntawd tag hnub xwb, thiab tej uas lawv xav txog ntawd puav leej tsis muaj tseeb thiab pom tsis meej, thiab txawv deb ntawm txoj kev ua neej dhau lawm. Lawv xav txog tej no tag hnub es tsis tuaj yeem nrog cov tib neeg dog dig sib txuas lus li. Cov tib neeg dog dig los kuj tsis to taub tias dab tsi ua rau lawv muaj txoj kev xav ntawd thiab. Yog li ntawd, txawm cov tib neeg no yuav muaj hom kev xav thiab kev xam pom dab tsi los xij, lawv tej kev xav ntawd tsis muaj qab hau dab tsi li. Vim lawv tej kev xav tsis muaj qab hau dab tsi, lawv tej kev xav thiab tej kev xam pom kuj tsis muaj qab hau dab tsi thiab. Tej kev xav thiab tej kev xam pom ntawd tsis tsim nyog soj ntsuam los sis muab khawb mus kom tob tob li. Vim tej kev xav thiab tej kev xam pom ntawd tsis muaj qab hau dab tsi, ces cia tej ntawd nws zoo nws li ntawd. Cov tib neeg no xav mus qhov twg los yeej meem mus, Vajtswv lub tsev yuav tsis cuam tshuam. Yog lawv txaus siab hlo los nyob rau hauv Vajtswv lub tsev thiab ua lawv tej dej num me ntsis los sis ua dej num rau Vajtswv, ces tsuav yog lawv tsis ua rau muaj kev cuam tshuam los sis ua kev phem xwb, peb mam li ua kom tau raws li tej uas lawv xav tau thiab muab lub hwv tsam rau lawv los lees txim hloov dua siab tshiab. Muab hais luv luv hais tias, tsuav yog lawv tseem coj zoo rau cov kwv tij thiab cov muam, rau Vajtswv lub tsev, thiab rau pawg ntseeg xwb, ces peb tsis tas yuav saib xyuas hom tib neeg zoo li no li, tshwj yog lawv tus kheej xav tawm mus xwb. Yog hais tias yog li ntawd, ces cia peb qhib siab lug txais tos hom tib neeg no, puas tau? (Tau kawg.) Yog li ces, daws tau qhov ntawd lawm.

Cov neeg uas ua raws li qhov tsis muaj tiag ntawd tej kev xav tsis muaj qab hau dab tsi li, hos cov neeg uas ua raws li qhov muaj tiag ntawd tej kev xav muaj qab hau dua thiab mus raws nraim li tib neeg lub neej thiab tej xwm txheej tiag tiag. Cov neeg uas ua raws li qhov muaj tiag ntawd tej kev xav kuj cuam tshuam rau tej lus nug txog tib neeg lub neej thiab txoj kev ua neej, nrog rau tej lus nug txog qhov kev daws teeb meem thiab qhov kev pib tib neeg lub neej yam muaj tseeb heev thiab. Qhov kev daws teeb meem thiab qhov kev pib tib neeg lub neej ntawd cuam tshuam rau tej txuj ci, tej peev xwm, thiab tej kev txawj uas tib neeg tau los, ntau hom kev kawm uas lawv tau txais, thiab lawv tej tswv yim, tej peev xwm, thiab txoj kev txawj ntse. Cov neeg uas ua raws li qhov muaj tiag ntawd tej kev xav muaj tej no tag nrho. Nyob rau hauv cov neeg uas ua raws li qhov muaj tiag ntawd tej kev xav mas, tsis hais qhov mob siab rau qhov kev txhim kho lawv txoj kev ua neej los sis qhov txaus siab rau lawv tus kheej lub neej ntawm sab ntsujplig li, tej kev xav no yeej pom tias muaj tseeb nyob rau hauv tib neeg lub neej tiag tiag. Piv txwv li, qee tus neeg muaj tej peev xwm ua thawj coj thiab nyiam nyob rau hauv qhov nrov nrov. Tej zaum lawv txawj hais lus rau pej xeem los sis kev sib txuas lus, los sis muaj ib txoj kev to taub zoo txog tib neeg thiab txawj siv lawv, uas tuaj yeem piav qhia tau hais tias yog txib tib neeg kom tsim nyog. Yog li ntawd, cov tib neeg uas zoo li no mas nyiam tuav chaw ua hauj lwm heev, xws li tej kev ua thawj coj, los sis ua txoj hauj lwm uas nrhiav neeg ua hauj lwm. Thaum paub tias lawv txawj tej no lawm, ces tib neeg xav kom lawv ua cov thawj coj los sis cov neeg npaj hauj lwm, saib xyuas hauj lwm thiab cov neeg ua hauj lwm los sis haj tseem qhia qee yam hauj lwm thiab. Lawv lub hom phiaj tseem ceeb ces yog los ua thawj coj xwb. Qhov no yeej yog qhov lawv ua nyob rau hauv zej zos. Thaum lawv nkag mus rau hauv Vajtswv lub tsev, lawv pom Vajtswv lub tsev yam li yog ib lub koom haum ntawm sab kev ntseeg, yog ib qho chaw tshwj xeeb. Tom qab koom pawg ntseeg lawm, lawv tej kev xav yeej tseem tsis tau hloov. Txawm lawv twb hloov chaw nyob los sis keeb kwm lawm los lawv tej kev xav yeej tsis hloov li. Lawv coj txoj kev xav ua thawj coj ntawd nrog lawv los rau hauv Vajtswv lub tsev. Lawv txoj kev ntshaw yog los tuav tej hauj lwm ua thawj coj nyob rau hauv Vajtswv lub tsev, xws li coj pawg ntseeg, ua tus saib xyuas kiag ib qib, los sis coj ib pab pawg. Qhov no yog lawv txoj kev xav. Txawm li cas los xij, vim cov txheej txheem hauj lwm hauv Vajtswv lub tsev muaj tej hauv paus ntsiab lus thiab tej kev cai tswj txog txoj kev xaiv tsa cov thawj coj los sis cov neeg ua hauj lwm, thiab cov tib neeg no ua tsis tau raws li qhov tsim nyog ua thawj coj, tab txawm yog qee zaus lawv nkag rau hauv tus txheej txheem kev xaiv tsa thawj coj rau kiag ib qib los xij, thaum kawg lawv ua tsis tau raws li lawv txoj kev xav thiab tsis tau los ua cov thawj coj uas lawv xav ua. Lawv yim tsis tau ua thawj coj los sis tsis tau ua txoj hauj lwm raws li lawv txoj kev xav, ces lawv tej kev xav ntawd yim ua rau lawv xav, yim ua rau lawv ntshaw ua thawj coj ntxiv xwb. Yog li ntawd, tsis hais nyob rau ntawm lawv cov kwv tij thiab cov muam los yog nyob rau ntawm cov thawj coj qib siab lub xub ntiag li, lawv siv zog ua ntau yam los qhia lawv tus kheej, ua kom zoo li lawv tus kheej zoo tshaj plaws thiab tshwj xeeb, thiab ua kom cov thawj coj ntawd paub lawv tej kev txawj. Tej zaum lawv haj tseem yuam lawv tus kheej lub siab uas txawj xav los ua raws li tej uas lawv cov kwv tij thiab cov muam nyiam, ua los sis hais qee yam thiab txhob txwm coj qee tus cwj pwm kom haum rau tej kev tim tsum txog txoj kev ua thawj coj uas cov txheej txheem hauj lwm ntawm Vajtswv lub tsev tau teeb tseg ntawd thiab. Txawm li cas los xij, txawm lawv yuav siv zog tas li los xij, lawv yeej tseem ua tsis tau raws li lawv tej kev xav uas los ua thawj coj ntawd. Muaj cov uas poob siab, poob zoo, thiab siab tsis npuab cev. Tej kev xav tsis zoo vim txoj kev meem txom uas lawv tau ntsib tau pom yav dhau los ntawd yim huab loj tuaj thaum lawv ntseeg Vajtswv tiam sis lees txais tsis tau qhov tseeb los sis nrhiav tsis tau kev daws lawv tej teeb meem. Lawv yeej ib txwm ntshaw tuav chaw ua hauj lwm thiab ua thawj coj, thiab tej kev xav no twb muaj nyob rau hauv lawv lub siab ua ntej lawv los ntseeg Vajtswv lawm. Vim lawv ua tsis tau raws li lawv tej kev xav, pheej muaj ib qho kev meem txom uas ntsia tsis pom nyob tob tob rau hauv lawv. Tab txawm tom qab nkag mus rau hauv Vajtswv lub tsev, qhov chaw uas tseem ua tsis tau raws li lawv tej kev xav ntawd los xij, tej kev xav uas vim txoj kev meem txom uas nyob rau hauv lawv ntawd muaj zog zuj zus thiab hnyav zuj zus tuaj. Cov neeg no tsis txaus siab vim luag tsis siv lawv lub peev xwm ua thawj coj, thiab lawv mloog zoo li lawv tsis muaj hmoo, tag kev cia siab, thiab meem txom vim ua tsis tau raws li lawv tej kev xav. Vim ua tsis tau raws li lawv tej kev xav, lawv tus kheej thiaj li mloog zoo li tsis muaj kev ncaj ncees. Thaum lawv tsis muaj kev tawm rau lawv tej peev xwm lawm, ces lawv poob siab txog lub neej thiab txoj hauv kev tom ntej. Yog li ntawd, nyob rau hauv lawv lub neej txhua hnub, lawv thiaj li pheej muaj ib txoj kev meem txom thaum ua ntau yam hauj lwm. Qee tus tib neeg mas, tab txawm tom qab siv zog thiab sim ntau zaus lawm los, yeej tseem tsis tau ua thawj coj los sis tsis tau raws li lawv txoj kev xav li. Thaum zoo li no lawm, ces lawv pib siv ntau txoj hauv kev los tso lawv tej kev xav hauv siab tawm thiab tso los sis qhia lawv txoj kev meem txom ntawd tawm. Yeej muaj qee tus uas ntseeg Vajtswv es tseem tuav rawv lawv tej kev xav uas los tuav chaw ua hauj lwm ntawd tau raws li lawv lub siab txoj kev ntshaw thiab tau ua thawj coj nyob rau hauv pawg ntseeg lawm. Txawm li cas los xij, lawv ua tsis tau lawv tej dej num uas yog cov thawj coj kom tiav raws li Vajtswv tej kev tim tsum thiab tej kev npaj ntawm Vajtswv lub tsev. Tib lub sij hawm ntawd, lawv pom hais tias lawv tus kheej tsis kam ua raws li tej hauj lwm ua thawj coj raws li tej kev tim tsum thiab txoj kev saib xyuas ntawm Vajtswv lub tsev thiab ntawm lawv cov kwv tij thiab com muam no. Txawm lawv twb ua tau raws li lawv tej kev xav thiab tab tom ua tej uas lawv xav ua los xij, lawv yeej tseem hnov meem txom. Qhov no yog vim lawv coj raws li lub hauv paus ntawm qhov kev ua kom tau raws li lawv tus kheej tej kev xav xwb, thiab tab txawm zoo li lawv yuav ua tau tej hauj lwm uas Vajtswv lub tsev tim tsum ntawd tiav nyob rau sab nraud los sis saum daim tawv los xij, lawv tej kev xav ntawd mus dhau tej peev xwm no lawm. Lawv tej hom phiaj, tej kev xav, tej kev ntshaw, thiab lub zeem muag mas deb tshaj lawv tej hauj lwm tam sim no lawm. Vim cov txheej txheem hauj lwm ntawm Vajtswv lub tsev thiab Vajtswv tej kev tim tsum, es lawv tej kev ua thiab tej kev xav, nrog rau lawv tej kev npaj thiab tej kev npaj siab ntawd, thiaj li raug khi thiab raug txwv lawm. Yog li ntawd, tab txawm tom qab tau tej hauj lwm ua thawj coj lawm los, lawv yeej tseem hnov meem txom. Vim li cas thiaj li muaj cov teeb meem no? Vim hais tias, txawm tau ua thawj coj lawm los, lawv tseem caum kom tau raws li lawv tus kheej tej kev xav thiab cov lus cog tseg uas lawv tau cog rau lawv tus kheej tej kev xav ntawd lawm. Txawm li cas los xij, kev ua thawj coj nyob rau hauv Vajtswv lub tsev los sis hauv pawg ntseeg ntawd ua tsis tau raws li lawv tej kev xav thiab tej kev ntshaw, yog li ntawd lawv cov kev xav thiaj li ntxhov quav niab thiab sib cov nyom. Vim cov kev cov nyom no thiab qhov lawv tsis muaj peev xwm muab lawv tus kheej tej kev xav thiab tej kev caum ntawd tso tseg, lawv thiaj li pheej hnov meem txom nyob rau hauv nruab siab thiab nrhiav tsis tau kev tawm li. Nov yog ib hom tib neeg. Nyob rau hauv Vajtswv lub tsev, ntawm cov neeg uas ua raws li qhov tsis muaj tiag no mas, muaj cov uas ua txhua yam kom tau raws li lawv tej kev xav tiam sis tsis tau, thiab kuj muaj cov uas ua txhua yam kom tau es thaum kawg tau raws li lawv tej kev xav lawm tiam sis tseem hnov meem txom thiab. Txawm lawv yuav pom hais tias lawv tus kheej nyob rau qhov twg los xij, yeej muaj cov tib neeg uas tsis tau tso lawv tej kev xav tseg thiab tseem caum tej kev xav ntawd txuas ntxiv thaum ua lawv tej dej num thiab ua lawv lub neej nyob rau hauv Vajtswv lub tsev.

Kuj muaj lwm tus uas txawj sau ntawv, txawj hais lus, thiab txawj sau ntaub sau ntawv thiab. Lawv cia siab hais tias yuav tau nthuav lawv tej kev xav tawm los ntawm qhov lawv txawj sau ntaub sau ntawv ntawd, thiab tib lub sij hawm ntawd, qhia tej txuj ci no ua kom tib neeg pom lawv lub peev xwm, qhov muaj nuj nqis, thiab txoj kev pab Vajtswv lub tsev. Lawv txoj kev xav yog los ua ib tug kws sau ntawv uas zoo tshaj plaws thiab tsim nyog thiab tus neeg txawj ntse. Thaum lawv nkag mus rau hauv Vajtswv lub tsev thiab pib ua tej dej num sau ntaub sau ntawv, mas lawv xav hais tias lawv nrhiav tau ib qho chaw siv lawv tej peev xwm lawm. Lawv kub siab lug qhia tej uas lawv ua tau zoo thiab tej kev txawj kom tau raws li lawv tej kev xav los ua cov kws sau ntawv thiab cov neeg txawj ntse ntawd. Txawm lawv ua lawv tej dej num txuas ntxiv los, lawv tsis tso lawv tej kev xav ntawd tseg li. Nyob rau hauv txoj kev ua lawv tej dej num mas, tuaj yeem hais tau hais tias 80 mus rau 90 feem pua yog ua raws li lawv tej kev xav xwb, lwm lo lus mas hais tias, qhov muaj siab ua lawv tej dej num ntawd yog los ntawm lawv txoj kev caum tej kev xav no thiab cia siab rau tej kev xav no xwb. Yog li ntawd, txoj kev ua dej num ntawm cov tib neeg zoo li no mas tsis tshua dawb huv, ua rau nws nyuaj rau lawv txog qhov ua kom tau raws li cov qauv ntawm txoj kev ua dej num raws li qhov tseeb tej hauv paus ntsiab lus thiab cov qauv uas Vajtswv tim tsum ntawd. Lawv tsis yog los rau hauv Vajtswv lub tsev los ua lawv tej dej num kom tiav nkaus xwb, tiam sis lawv cia siab tias yuav tau siv lub hwv tsam uas ua lawv tej dej num ntawd los qhia txog lawv tus kheej tej kev txawj, txoj kev ntshaw ua kom tau raws li lawv tej kev xav thiab qhia txog qhov lawv muaj nuj nqis los ntawm txoj kev nthuav lawv tej kev txawj tawm ntawd. Yog li ntawd, lawv qhov teeb meem uas loj tshaj plaws nyob rau hauv txoj kev ua lawv tej dej num kom tau raws li tus qauv ntawd yog lawv tej kev xav ntag, qhov ntawd yog, lawv tus txheej txheem ua tej dej num ntawd xyaw rau tej uas lawv tus kheej nyiam thiab lawv tej kev xav thiab tej kev xam pom txog tib neeg, xwm txheej, thiab txhua yam lawm. Qee tus neeg mas muaj kev to taub txog qee yam txuj ci qib siab los sis muaj qee qhov kev txawj, piv txwv li, qee tus to taub qhoos phis tawj tev no lo ntsis thiab nyiam ua cov neeg tsim kho qhoos phis tawj. Lawv rau tsom iav, hnav khaub ncaws ua hauj lwm zoo zoo, thiab coj cwj pwm zoo zoo, nqa cov lov thov uas zoo zoo los sis ua kom lwm tus tsis tshua pom li. Txawm lawv yuav mus qhov twg los xij, lawv zaum qhov chaw ntawd nrog lawv lub lov thov thiab qhib lub lov thov ntawd los xyuas ntaub ntawv nyob rau ntau qhov vev phej thiab daws ntau yam teeb meem los ntawm lub qhoos phis tawj, uas puav leej yog tes hauj lwm qib siab xwb. Muab hais luv luv hais tias, tus kws tshaj lij qhov kev xam pom, kev coj tus cwj pwm, thiab tus xeeb ceem yog qhov uas lawv tim tsum ntawm lawv tus kheej thiab khav rau ntawm lwm tus lub xub ntiag ntag, siv zog kom tau los ua cov kws tshaj lij nyob rau hauv qhov chaw ua hauj lwm tsim kho qhoos phis tawj. Tom qab nkag mus rau hauv Vajtswv lub tsev lawm, thaum kawg cov tib neeg no ua tau raws li lawv txoj kev xav thiab ua tej hauj lwm uas ntsig txog qhoos phis tawj tev no lo ntsis lawm. Lawv kawm tev no lo ntsis thiab hloov kho lawv tej txuj ci tas li, rau siab ntso txheeb xyuas thiab daws ntau yam teeb meem, vim muaj lub hom phiaj uas xav khaws tej kev ntawm qhov chaw ua hauj lwm thiab txoj kev txhawb nqa thiab kev tshaj tawm ntaub ntawv tshiab ntawd rau hauv lawv qhov kev kawm. Cov tib neeg zoo li no mas muaj ib qho kev ntshaw tshwj xeeb thiab kev to taub txog ib qho txuj ci qib siab, es thiaj li ua rau lawv yog cov kws tshaj lij thiab cov kws txawj. Yog li ntawd, lawv txoj kev xav yog los ua cov kws tshaj lij xwb, thiab lawv cia siab hais tias Vajtswv lub tsev yuav cia lawv ua ib txoj hauj lwm uas tseem ceeb, hwm lawm, thiab vam khom rau lawv. Nyob rau hauv Vajtswv lub tsev thiab nyob rau lub sij hawm tam sim no, cov tib neeg uas zoo li no feem coob yeej siv tej uas lawv ua tau zoo kom tau raws li lawv tej kev xav. Txawm li cas los xij, thaum ua kom tau raws li lawv tej kev xav ntawd, cov tib neeg no puas tau xav seb yog lawv tab tom ua lawv tej dej num kom tiav los yog tab tom caum lawv tus kheej tej kev xav nyob rau hauv qhov kev ua lawv tes hauj lwm no xwb? Qhov ntawd tsis meej kiag li, puas yog? Tes hauj lwm uas lawv ua mas tshwj xeeb, nyuaj, thiab tiv xwb. Txawm li cas los xij, tej txuj ci uas lawv muaj ntawd ua tsis tau raws li tej kev tim tsum ntawm Vajtswv lub tsev txog tes hauj lwm no. Yog li ntawd, thaum caum lawv tus kheej tej kev xav thiab ua lawv tej dej num ntawd, lawv thiaj li mloog zoo li raug txwv thiab raug tswj kav me ntsis. Vim tej kev xav uas lawv muaj nyob rau hauv lawv lub siab, es cov tib neeg no thiaj li hnov meem txom thaum ntsib ntau qhov tseeb ntawm txoj kev ntseeg Vajtswv thiab tej hauv paus ntsiab lus uas hais txog txoj kev ua dej num. Muaj ib co tib neeg mas zoo li no.

Muaj dua pab tib neeg uas muaj feem xyuam nyob rau hauv txoj kev tshaj tawm txoj moo zoo thiab. Lawv xav ua cov thawj coj nyob rau hauv qhov kev tshaj tawm txoj moo zoo, ua tus ua ntej, thiab coj kom ua tau zoo nyob rau hauv txhua pawg ntseeg uas lawv muaj feem xyuam, yeej tsis xav tuaj tom qab li. Txawm lawv ua tau lawv tej dej num tiav thiab ua lawv tes hauj lwm los xij, lawv txoj kev caum yog kom tau raws li lawv tus kheej tej kev xav thiab tej hom phiaj uas lawv npaj thiab xav txog xwb, uas tsis muaj dab tsi cuam tshuam rau txoj kev ntseeg Vajtswv los sis qhov tseeb li. Thaum tej hom phiaj thiab tej kev xav no raug muab nthuav tawm thiab qhia tawm, los sis lawv ntsib qee yam teeb meem lawm, mas cov tib neeg no mam li paub hais tias ua tsis tau raws li lawv tej kev xav thiab qhia tsis tau qhov lawv muaj nuj nqis ntawd tawm, ua rau lawv hnov meem txom thiab tsis txaus siab. Lawv coob leej ntau tus xav kom tau txais kev lees paub thiab kev txais yuav thaum caum lawv lawv tej kev xav. Thaum lawv tsis tau txais tej no, los sis thaum lawv lub zog ua tsis tau dab tsi rov qab los kiag tam sim ntawd, mas lawv xav hais tias qhov ntawd tsis tsim nyog li, tias qhov ntawd tsis ncaj ncees, yog li ntawd lawv thiaj li hnov meem txom. Lawv tsis coj cov cwj pwm zoo li no lod? (Coj, lawv coj.) Nyob rau ntawm cov uas muaj feem xyuam rau hauv txoj kev tshaj tawm txoj moo zoo ntawd mas, muaj qee tus uas pheej xav ua cov qhuab qhia los sis cov tshaj tawm txoj moo zoo uas tsim nyog thiab yog tus qauv zoo. Thaum lawv hnov li ub li no txog ib tug neeg tshaj tawm txoj moo zoo thiab ib tug qhuab qhia uas muaj koob muaj npe, mas lawv khib thiab cia siab hais tias muaj ib hnub lawv kuj yuav zoo li no thiab, uas cov neeg tiam tom ntej yuav nco txog thiab qhuas, thiab Vajtswv yuav nco txog. Lawv yeej ib txwm xav qhuab qhia raws li lawv tus kheej txoj kev xav, siv lawv txoj kev xav los ua lawv lub hom phiaj thiab qhov kev muaj siab los ua ib tug qhuab qhia kom muaj koob muaj npe los sis kom cov neeg tiam tom ntej nco txog nyob rau hauv Vajtswv lub tsev. Qhov no yog lawv txoj kev xav. Txawm li cas los xij, nyob rau hauv Vajtswv lub tsev mas muaj tej kev tim tsum uas nruj rau txhua txoj hauj lwm, thiab tej hauv paus ntsiab lus uas Vajtswv tau qhia rau tib neeg kom ua txoj hauj lwm no. Yog li ntawd, cov tib neeg no hnov meem txom vim lawv ua tsis tau hom neeg tshaj tawm txoj moo zoo raws li lawv xav, cov thawj coj thiab cov neeg ua hauj lwm pheej saib xyuas thiab tswj lawv, thiab muaj kev taug qab thiab kev nug los ntawm cov thawj coj thiab cov neeg ua hauj lwm txog lawv tes hauj lwm ntawd. Kuj muaj cov uas pheej caum lawv tej kev xav tom qab los rau hauv Vajtswv lub tsev lawm vim lawv muaj tej txuj ci los sis tej kev txawj uas tshwj xeeb. Piv txwv li, nyob rau ntawm cov uas yog neeg ua yeeb yaj kiab, qee tus mas txawj ua yeeb yam thiab to taub txog kev ua yeeb yam. Lawv xav los ua ib tug neeg ua yeeb yaj kiab raws li qhov kev xav, cia siab hais tias muaj ib hnub lawv yuav zoo li cov neeg ua yeeb yaj kiab uas muaj koob muaj npe nyob rau ntawm cov tsis ntseeg ntawd xws li: cov neeg tseem ceeb, cov neeg nrov koob nrov npe, zoo li vajntxwv thiab niam vajntxwv. Txawm li cas los xij, nyob rau hauv Vajtswv lub tsev, mas tus moj yam thiab txoj kev qhia kom pom tseeb txog txoj kev qias vuab tsuab no raug muab nthuav tawm tas li xwb, thiab muaj tej kev tim tsum thiab tej hauv paus ntsiab lus uas ncaj ncaj rau cov neeg ua yeeb yaj kiab no. Tab txawm tom qab tau ua cov neeg ua yeeb yaj kiab uas muaj koob muaj npe me ntsis lawm los xij, lawv tseem tsis tau los ua cov neeg nto moo uas tib neeg pe hawm thiab raws qab ntawd thiab, es thiaj li ua rau lawv meem txom. Lawv hais tias, “Vajtswv lub tsev ua nyuaj dhau lawm. Vajtswv lub tsev pheej txwv tib neeg txog txhua yam. Qhov ua raws li cov neeg nto moo ntawd tus qauv ho ua li cas? Qhov hnav khaub ncaws zoo zoo, coj cwj pwm thiab coj raws li tej kev tim tsum ntawd kom zoo me ntsis ho ua li cas?” Vim tej kev tim tsum txog qhov cov neeg ua yeeb yaj kiab ntawd hnav khaub ncaws thiab tej kev ua yeeb yam nyob rau hauv Vajtswv lub tsev ntawd, lawv thiaj li pom hais tias muaj kev cov nyom thiab kev tsis sib haum ntawm tej kev tim tsum no thiab lawv txoj kev xav los ua cov neeg nto moo thiab cov neeg tseem ceeb tas li li. Yog li ntawd, lawv thiaj li chim siab heev, xav hais tias “Vim li cas qhov ua kom tau raws li kuv tej kev xav ntawd thiaj li nyuaj ua luaj? Vim li cas nyob rau hauv Vajtswv lub tsev mas kuv ntsib teeb meem nyob rau txhua sab txhua seem li?” Thaum lawv muaj tej kev xav zoo li no los sis ua tsis tau raws li tej kev cia siab no, ces lawv hnov meem txom. Qhov nyob tom qab ntawm txoj kev meem txom no yog lawv txoj kev ntseeg hais tias lawv tej kev xav ntawd mas yog lawm thiab muaj nuj nqis. Lawv kuj ntseeg hais tias qhov caum lawv tej kev xav ntawd mas tsis ua li cas, tias lawv yeej muaj cai ua li ntawd, yog li ntawd, tej kev xav uas meem txom ntawd thiaj li pib tshwm tuaj rau hauv lawv. Piv txwv li, qee tus thawj qhia ua yeeb yaj kiab xav hais tias tom qab qhia ua ntau zaj yeeb yaj kiab tag mas lawv muaj kev paub me ntsis lawm. Lawv ntseeg hais tias lawv cov yeeb yaj kiab mas tsim nyog muab tso rau tib neeg saib, thiab twb tau txhim kho txog kev yees, kev kho, kev ua yeeb yam ntawm cov neeg ua yeeb yaj kiab, thiab txhua yam uas me ntsis zoo li ntawd tag nrho lawm, yog muab piv rau yav tag los. Tom qab tau txais kev taw qhia los ntawm tus Nyob Saud lawm, thaum kawg lawv cov yeeb yaj kiab ua tau raws li cov qauv uas tsim nyog thiab tau muab tso tawm raws sij hawm lawm. Qhov no zoo li lees paub hais tias lawv txoj kev caum ua ib tug thawj qhia ua yeeb yaj kiab uas tsim nyog ntawd mas yog ib txoj kev xav uas tsim nyog, yog, thiab tim tsum lawm. Txawm li cas los xij, thaum tab tom caum lawv lub hom phiaj uas los ua ib tug thawj qhia ua yeeb yaj kiab uas tsim nyog ntawd, lawv cov tswv yim, tej kev xam pom, thiab tej kev ua uas tsis zoo ntawd muaj qee yam pheej raug tsis kam txais yuav, muab thim rov qab, los sis tsis lees paub. Tej zaum lawv haj tseem pheej raug qhuab qhia thiab qhuab ntuas thiab. Qhov no ua rau lawv hnov meem txom nyob rau hauv lawv nruab siab, yog li ntawd lawv thiaj li hais tias, “Vim li cas qhov ua ib tug thawj qhia ua yeeb yaj kiab nyob rau hauv Vajtswv lub tsev ntawd yuav mus nyuaj ua luaj li? Saib cov thawj qhia ua yeeb yaj kiab nyob rau hauv lub ntiaj teb ntawm cov tsis ntseeg ntawd seb, lawv raug qhov muag npaum li cas. Lawv muaj neeg muab tshuaj yej rau lawv hau, nchuav dej rau lawv haus, thiab haj tseem ntxuav lawv ob txhais ko taw thiab. Nyob rau hauv Vajtswv lub tsev mas, qhov ua ib tug thawj qhia ua yeeb yaj kiab ntawd tsis muaj meej mom thiab qhov zoo, thiab tsis muaj leej twg hais txog peb los sis qhuas peb li. Vim li cas peb thiaj li raug qhuab qhia thiab qhuab ntuas tas li xwb? Txawm peb yuav ua li cas los xij, yeej tsis yog li. Cas yuav meem txom ua luaj! Peb muaj peb cov tswv yim, cov kev xam pom, thiab cov peev xwm qib siab, yog li ntawd vim li cas thiaj li qhuab ntuas peb tas li xwb? Qhov caum peb tus kheej cov tswv yim ntawd puas yuam kev, los sis puas yog hais tias qhov kev caum peb tej kev xav ntawd tsis yog lawm? Vim li cas qhov ua raws li peb tej kev xav ntawd thiaj li nyuaj ua luaj? Meem txom heev li!” Txawm lawv yuav xav li cas txog qhov ntawd los xij, lawv yeej tseem hnov meem txom. Kuj tseem muaj qee tus neeg hu nkauj uas hais tias, “Nyob rau hauv Vajtswv lub tsev, kuv tsis caum ib yam dab tsi li tsuas caum qhov ua ib tug neeg hu nkauj uas tsim nyog, hu nkauj zoo, qhia txog kuv tus kheej tus qauv, thiab kom txhua tus uas mloog kuv hu nkauj nyiam kuv xwb.” Txawm li cas los xij, Vajtswv lub tsev muab tej kev tim tsum thiab tej hauv paus ntsiab lus uas hais txog kev hu cov nkauj qhuas Vajtswv ntawd hais tawm tas li, thiab cov neeg hu nkauj no raug qhuab qhia thiab qhuab ntuas tas li vim pheej ua txhaum tej kev tim tsum ntawd. Thaum lawv tsis raug qhuab ntuas, ces lawv xav hais tias lawv ua tau raws li lawv tej kev xav yam zoo heev. Tiam sis thaum lawv raug qhuab ntuas thiab muaj ob peb qho tsis zoo lawm, ces lawv xav hais tias qhov lawv siv zog thiab qhov ua tau tiav nyob rau ntu ntawd mas zoo li siv tsis tau, thiab lawv rov qab mus pib puag tom hauv paus lawm. Qhov no ua rau muaj kev meem txom nyob rau hauv lawv nruab siab, yog li ntawd lawv thiaj li hais tias, “Au, qhov ua raws li kuv tej kev xav ntawd yeej nyuaj tiag tiag! Lub ntiaj teb dav heev, tiam sis zoo li tsis muaj chaw rau kuv li. Nyob rau hauv Vajtswv lub tsev los ib yam nkaus. Vim li cas qhov caum kuv tus kheej txoj hauj lwm ntawd thiaj li nyuaj ua luaj? Vim li cas qhov ua tej uas kuv xav ua ntawd thiaj li nyuaj ua luaj? Tsis muaj leej twg tso cai rau kuv ua ib yam dab tsi li, kuv ntsib teeb meem nyob rau txhua sab txhua seem, thiab kuv raug qhuab qhia thiab qhuab ntuas tas li xwb. Txhua yam no mas nyuaj thiab meem txom tiag tiag! Nyob rau hauv lub ntiaj teb ntawm cov tsis ntseeg, mas lawv sib dag thiab sib tawm tsam, thiab muaj teeb meem txog hauj lwm nyob rau txhua qho chaw tas li li, yog li ntawd qhov hnov meem txom ntawd yeej ib txwm muaj. Tiam sis vim li cas kuv thiaj tseem hnov meem txom thaum kuv los rau hauv Vajtswv lub tsev nrog kuv tej kev xav?” Cov uas ua ntau txoj hauj lwm nyob rau hauv Vajtswv lub tsev ntawd mas ntsib ntau yam tsis zoo nyob rau hauv tus txheej txheem uas caum lawv tej kev xav ntawd tas li li, siv tsis tau tas li, pheej raug qhuab qhia thiab raug qhuab ntuas, thiab pheej tsis muaj leeg lees paub li. Tom qab tau ntsib tau pom tej no tas li lawm, lawv cia li poob siab, mloog zoo li lawv lub neej yuav cia li tag li ntawd li lawm thiab zoo li tias yeej ua tsis tau raws li lawv tej kev xav li lawm thiab. Ua ntej los rau hauv Vajtswv lub tsev mas lawv txeev xav hais tias, “Kuv coj kuv tus kheej tej kev xav thiab tej kev ntshaw nrog kuv mus. Kuv muaj kuv tej kev ntshaw, thiab nyob rau hauv Vajtswv lub tsev mas muaj hwv tsam tas li li. Kuv tuaj yeem dhau mus ua ib tug thawj qhia ua yeeb yaj kiab, tus ua yeeb yaj kiab, tus sau ntawv uas tsim nyog, los sis haj tseem tau ua ib tug seev cev, hu nkauj, los sis tus ntaus suab paj nruag uas tsim nyog thiab.” Thaum lawv qhia tsis tau lawv tej kev txawj thiab ua tsis tau raws li lawv tej kev xav ntawd, lawv ntseeg hais tias Vajtswv lub tsev yuav muab ib lub sam thiaj rau lawv tus kheej, nrog rau ib qho chaw dav dav uas tej zaum lawv tej kev xav, thiab tej kev npau suav thiab tej kev ntshaw ntawd yuav muaj tseeb. Lawv xav hais tias lub sam thiaj hauv Vajtswv lub tsev mas loj heev. Txawm li cas los xij, tom qab ntau xyoo lawm, lawv xav paub hais tias, “Vim li cas kuv mloog zoo li lub sam thiaj ntawd me zuj zus rau hauv kuv qab xib taws lawm? Vim li cas kuv lub ntiaj teb me zuj zus lawm? Qhov uas yuav ua tau raws li kuv tej kev xav ntawd mas zoo li nyob deb zuj zus thiab haj yam ua tsis tau li lawm. Yog ua li cas lawm?” Twb los txog rau theem no lawm los, cov tib neeg no tseem yuav tsis tso lawv tej kev xav tseg los sis nug txog qhov yog ntawm tej kev xav thiab tej kev ntshaw no li. Lawv tseem coj tej kev xav thiab tej kev ntshaw no mus ua lawv tej dej num kom tiav thiab. Yog li ntawd, tib neeg tej kev xav uas meem txom ntawd nrog lawv mus rau txhua qhov chaw li, tsis hais thaum caum lawv tej kev xav thiab tej kev ntshaw los sis thaum lawv ua lawv tej dej num tiag tiag. Cov uas muaj tej kev xav uas meem txom, los sis cov uas tso tsis tau tej kev xav uas meem txom tseg ntawd, qhov kev cov nyom ntawm ob co no yeej tsis sib haum li. Lawv muaj ib lub siab uas hnov meem txom txog txoj kev caum lawv tej kev xav thiab tej kev ntshaw thiab txoj kev ua lawv tej dej num kom tiav. Yog li ntawd, txawm yuav zoo li cas los xij, tib neeg hloov kho lawv tus kheej tas li, caum lawv tej kev xav thiab tej kev npau suav thaum ua lawv tej dej num kom tiav ntawd tas li xwb. Koj kuj hais tau hais tias tib neeg ua lawv tej dej num los ntawm ib tug cwj pwm uas muaj kev cov nyom, hnov meem txom thiab tsis kam tas li xwb. Tiam sis yuav kom ua tau raws li lawv tej kev xav thiab tej kev ntshaw, yuav kom qhia tau qhov lawv muaj nuj nqis thiab qhov caum tej kev xav thiab tej kev ntshaw no, mas lawv yuav tsum tau ua lawv tej dej num kom tiav. Lawv tsis paub tias vim li cas lawv thiaj li ua li ntawd, yam uas lawv nrhiav kom tau txais ntawd yog dab tsi, lub hom phiaj uas lawv sim ua kom tiav, sim caum, los sis sim ua kom tau ntawd yog dab tsi. Lawv paub tsis tseeb txog qhov ntawd zuj zus, thiab zoo li pom txoj kev mus tom ntej tsis tseeb zuj zus lawm. Thaum zoo li no lawm, yuav tsis nyuaj rau lawv los muab lawv tej kev xav uas meem txom ntawd tso tseg los sis kho lod? (Nyuaj.)

Twb kawm los txog txij no lawm, cia peb kawm txuas ntxiv txog qhov tib neeg yuav tsum to taub thiab paub txoj kev sib txuas ntawm lawv tej kev xav, tej kev ntshaw, thiab lawv tej dej num ntawd li cas. Ua ntej tshaj plaws, cia peb tham txog tej kev xav, tshwj xeeb yog tej kev xav ntawm cov tib neeg uas peb hais txog ua ntej ntawd. Puas tsim nyog uas tib neeg caum kom tau raws li lawv tus kheej tej kev xav nyob rau hauv Vajtswv lub tsev? (Tsis tsim nyog, qhov ntawd tsis tsim nyog.) Qhov uas ua rau muaj qhov teeb meem ntawd yog dab tsi? Vim li cas thiaj li tsis tsim nyog? (Qhov caum kom tau raws li lawv tej kev xav thaum ua lawv tej dej num ntawd, yog lawv tab tom qhia lawv tus kheej thiab tsim lawv tus kheej tej hauj lwm xwb, tsis yog caum ua lawv tej dej num kom tiav li yog cov neeg uas raug tsim tawm los.) Qhia Kuv seb, puas yog tsis tsim nyog uas los caum kom tau raws li yus tus kheej tej kev xav thiab tej kev ntshaw? (Yog, qhov ntawd tsis tsim nyog.) Yog nej hais tias tsis tsim nyog no, qhov no puas txwv ib qho ntawm qhov lawv muaj cai ntawd? (Tsis txwv, qhov no tsis txwv.) Yog li qhov teeb meem yog dab tsi? (Thaum tib neeg ntseeg Vajtswv, lawv yuav tsum caum qhov tseeb thiab taug txoj kev uas Vajtswv cov lus taw kom lawv taug. Yog lawv tsuas caum lawv tus kheej tej kev ntshaw thiab tej kev xav xwb, ces yog lawv caum yam uas lawv lub cev nqaij daim tawv ntshaw, uas yog ib lub tswv yim uas Ntxwgnyoog muab cog rau hauv lawv lawm xwb.) Nyob rau hauv lub ntiaj teb no, qhov caum kom tau raws li yus tus kheej tej kev xav ntawd mas suav hais tias yog qhov tsim nyog lawm. Txawm koj yuav caum tej kev xav dab tsi los xij, yeej tsis ua li cas tsuav tej kev xav ntawd raug kev raug cai thiab tsis hla ib tug ciaj ciam ntawm txoj kev ncaj ncees li xwb. Tsis muaj leej twg nug ib yam dab tsi, thiab tsis muaj leej twg ntes tau tias koj yog los tsis yog. Koj caum yam uas koj tus kheej nyiam, thiab yog koj tau yam ntawd, yog koj caum cuag koj lub hom phiaj, ces yog koj ua tiav lawm; tiam sis yog koj plam, yog koj ua tsis tiav, ces qhov ntawd yog koj tus kheej li hauj lwm xwb. Txawm li cas los xij, thaum koj nkag mus rau hauv Vajtswv lub tsev, uas yog ib qho chaw tshwj xeeb lawm, txawm koj yuav coj tej kev xav thiab tej kev ntshaw dab tsi nrog koj mus los xij, koj yuav tsum muab tej ntawd tso tseg tag nrho. Vim li cas ua li ntawd? Qhov kev caum tej kev xav thiab tej kev ntshaw ntawd, txawm koj yuav caum dab tsi kiag los xij—cia peb tham txog qhov kev caum ntawd nkaus xwb—qhov kev caum ntawd txoj kev ua thiab txoj kev uas qhov kev caum ntawd taug ces puav leej yog ntsig txog txoj kev ua kom tau ntsej muag, yus tus kheej txoj kev ntshaw, lub meej mom, thiab lub koob lub npe xwb. Tej no puav leej yog tej uas qhov kev caum ntawd ntsig txog. Lwm lo lus mas hais tias, thaum tib neeg caum kom tau raws li lawv tej kev xav lawm, ces tus uas tau txais txiaj ntsim yog lawv tus kheej xwb. Qhov tib neeg caum kom tau raws li lawv tej kev xav txhawm rau lub meej mom, lub koob lub npe, kev khav txiv, thiab tej kev ntshaw ntawm lub cev ntawd puas ncaj ncees? (Tsis ncaj ncees, qhov ntawd tsis ncaj ncees.) Vim qhov txhawm rau lawv tus kheej thiab tej kev xav ntawm lawv ntiag ntug, tej kev xav, thiab tej kev ntshaw, tej kev tswv yim thiab tej kev ua uas lawv muab coj los siv ntawd puav leej yog lub siab twm xeeb thiab mob siab rau qhov txiaj ntsim ntawm lawv tus kheej xwb. Yog peb muab qhov tseeb coj los ntsuas lawv, mas lawv yeej tsis ncaj ncees los sis ua yog li. Tib neeg tsim nyog muab tej ntawd tso tseg, tsis yog li ntawd lod? (Yog, yog lawm.) Lawv tsim nyog muab tso tseg, muab txoj kev ua kom tau ntsej muag tso tseg, muab tej kev xav thiab tej kev ntshaw ntawm lawv tus kheej tso tseg. Qhov no yog pom los ntawm qhov kev xam pom txog lub ntsiab tseeb ntawm tej kev uas tib neeg taug—qhov caum kom tau raws li yus tus kheej tej kev xav thiab tej kev ntshaw ntawd mas tsis yog ib qho zoo, qhov ntawd yog qhov tsis zoo. Qhov ntawd yog ib kis. Tam sim no cia peb tham txog lwm kis, Vajtswv lub tsev, thiab pawg ntseeg ntawd yog qhov chaw dab tsi, txawm yuav yog lub npe twg los xij? Qhov chaw ntawd yog qhov chaw dab tsi? Lub ntsiab tseeb ntawm pawg ntseeg, thiab Vajtswv lub tsev ntawd yog dab tsi? Ua ntej tshaj plaws, raws li qhov kev xam pom mas, qhov chaw ntawd tsis yog ib lub ntiaj teb, ib qho chaw sib sau ua ke, los sis ib qho chaw tib neeg sib koom tes los sis ib lub koom haum nyob rau hauv zej zos. Qhov chaw ntawd tsis yog lub ntiaj teb los sis tib neeg ntiaj teb li. Vim li cas thiaj li tsim tau qhov chaw ntawd? Vim li cas qhov chaw ntawd thiaj li tshwm los thiab muaj nyob? Qhov ntawd yog vim Vajtswv thiab Nws tes hauj lwm, puas yog? (Yog.) Pawg ntseeg, thiab Vajtswv lub tsev, muaj nyob vim yog muaj Vajtswv thiab Nws tes hauj lwm. Yog li ntawd, pawg ntseeg, thiab Vajtswv lub tsev puas yog ib qho chaw los qhia yus tus kheej tej kev txawj thiab ua yus tus kheej tej kev xav, tej kev muaj siab, thiab tej kev ntshaw kom tiav? (Tsis yog, qhov chaw ntawd tsis yog.) Qhov chaw ntawd yeej tsis yog. Pawg ntseeg, thiab Vajtswv lub tsev, muaj nyob vim yog muaj Vajtswv thiab Nws tes hauj lwm xwb. Yog li ntawd, qhov chaw ntawd tsis yog ib qho chaw los qhia yus tus kheej tej kev txawj los sis ua kom tau raws li yus tus kheej tej kev xav, tej kev muaj siab, thiab tej kev ntshaw. Qhov chaw ntawd tsis ntsig txog lub neej ntawm sab cev nqaij daim tawv, tej kev xam pom, kev muaj koob muaj npe thiab kev muaj txiag nplua nuj, lub meej mom, lub koob lub npe, thiab lwm yam ntawm sab cev nqaij daim tawv—qhov chaw ntawd tsis ua hauj lwm rau tej no. Qhov chaw ntawd kuj tsis tau tshwm sim los los sis muaj nyob vim tej khoom uas muaj koob muaj npe, muaj meej mom, kev xyiv fab, los sis tej kev xam pom ntawm tib neeg thiab. Yog li ntawd, qhov chaw ntawd yog qhov chaw dab tsi? Yog hais tias qhov tsim tau pawg ntseeg, thiab Vajtswv lub tsev ntawd, yog vim muaj Vajtswv thiab Nws tes hauj lwm xwb no, qhov chaw ntawd tsis yog txhob txwm tsim los ua raws li Vajtswv lub siab nyiam, tshaj tawm Nws cov lus, thiab ua tim khawv rau Nws xwb lod? (Yog.) Qhov no tsis yog qhov tseeb lod? (Yog.) Pawg ntseeg, thiab Vajtswv lub tsev, muaj nyob vim yog muaj Vajtswv thiab Nws tes hauj lwm, yog li ntawd qhov chaw ntawd tsuas ua tau raws li Vajtswv lub siab nyiam, tshaj tawm Nws cov lus, thiab ua tim khawv rau Nws xwb. Qhov chaw ntawd tsis muaj dab tsi cuam tshuam rau qhov chaw ntawd lub meej mom, lub koob lub npe, tej kev xam pom, los sis lwm yam kev ntshaw li. Tej hauv paus ntsiab lus uas tswj hwm txhua tes hauj lwm uas pawg ntseeg, thiab Vajtswv lub tsev ua ntawd, yuav tsum yog ua raws li Vajtswv cov lus, Nws tej kev tim tsum, thiab Nws tej lus qhia xwb. Yog muab hais dav dav ces, tuaj yeem hais tau hais tais qhov chaw ntawd ntsig txog Vajtswv lub siab nyiam thiab Nws tes hauj lwm; tshwj xeeb yog, ntsig txog txoj kev nthuav txoj moo zoo ntawm lub nceeg vaj ntawd mus kom dav thiab ua tim khawv thiab tshaj tawm Nws txoj lus xwb. Qhov ntawd puas yog? (Yog.) Dhau ntawm qhov ua raws li Vajtswv lub siab nyiam, tshaj tawm Nws cov lus, thiab ua tim khawv rau Nws lawm, puas muaj tej yam uas haj yam tseem ceeb tshaj rau pawg ntseeg, thiab Vajtswv lub tsev lawm? (Qhov ntawd yog qhov chaw uas cov neeg Vajtswv xaiv tau ntsib tau pom Nws tes hauj lwm, tau txais kev yaug kom dawb huv, thiab tau txais kev cawm dim.) Nej hais yog kawg nkaus lawm. Pawg ntseeg, thiab Vajtswv lub tsev, yog ib qho chaw uas ua raws li Vajtswv lub siab nyiam, tshaj tawm Nws txoj lus, ua tim khawv rau Nws, thiab qhov tseem ceeb tshaj, qhov chaw ntawd yog ib qho chaw uas tib neeg tau txais kev cawm dim. Koj puas nco qab qhov ntawd? (Nco, kuv nco.) Nyeem seb. (Pawg ntseeg, thiab Vajtswv lub tsev, yog ib qho chaw uas ua raws li Vajtswv lub siab nyiam, tshaj tawm Nws txoj lus, ua tim khawv rau Nws, thiab cov neeg Vajtswv xaiv tau txais kev yaug kom dawb huv thiab kev cawm dim.) Pawg ntseeg, thiab Vajtswv lub tsev, yog ib qho chaw uas ua raws li Vajtswv lub siab nyiam, tshaj tawm Nws txoj lus, ua tim khawv rau Nws, thiab cov neeg Nws xaiv tau txais kev yaug kom dawb huv thiab kev cawm dim. Qhov chaw ntawd yog ib qho chaw uas zoo heev. Nyob rau hauv ib qho chaw zoo li no, puas muaj ib txoj hauj lwm los sis ib qho hauj lwm, uas txawm yuav yog txoj hauj lwm dab tsi los xij, uas haum rau txoj kev ua kom tau raws li yus tus kheej tej kev xav thiab tej kev ntshaw ntawd? Tsis muaj ib txoj hauj lwm los sis ib qho hauj lwm uas ua raws li lub hom phiaj ntawm qhov kom tau raws li yus tus kheej tej kev xav thiab tej kev ntshaw, thiab tej no yeej tsis muaj ib qho muaj nyob txhawm rau qhov ua kom tau raws li yus tus kheej tej kev xav thiab tej kev ntshaw li. Yog li ntawd, puas tsim nyog muaj yus tus kheej tej kev xav thiab tej kev ntshaw nyob rau hauv Vajtswv lub tsev? (Tsis tsim nyog muaj tej ntawd.) Tsis tsim nyog muaj tej ntawd, vim yus tus kheej tej kev xav thiab tej kev ntshaw ntawd cov nyom rau txhua tes hauj lwm uas Vajtswv xav ua nyob rau hauv pawg ntseeg. Yus tus kheej tej kev xav thiab tej kev ntshaw ntawd tawm tsam txhua tes hauj lwm uas ua nyob rau hauv pawg ntseeg. Tej ntawd tawm tsam qhov tseeb, tsis ua raws li Vajtswv lub siab nyiam, tsis ua raws li txoj kev tshaj tawm Nws cov lus, tsis ua raws li txoj kev ua tim khawv rau Nws, thiab tsis ua raws li tes hauj lwm uas yaug kom dawb huv thiab txoj kev cawm dim rau cov neeg Vajtswv xaiv. Txawm yus tej kev xav yuav xav li cas los xij, tsuav tej ntawd yog yus tus kheej tej kev xav thiab tej kev ntshaw xwb, ces tej ntawd yuav thaiv tsis pub tib neeg ua raws li Vajtswv lub siab nyiam, thiab cuam tshuam los sis thaiv txoj kev tshaj tawm txog Nws cov lus thiab txoj kev ua tim khawv rau Nws. Tsuav tej kev xav ntawd yog yus tus kheej tej kev xav thiab tej kev ntshaw xwb, ces tej kev xav ntawd yeej tsis cia kom tib neeg tau txais txoj kev yaug kom dawb huv thiab txoj kev cawm dim li. Qhov ntawd tsis yog ib qho kev tawm tsam ntawm ob sab ntawd xwb, ob sab ntawd ib sab yeej tawm tsam ib sab heev. Thaum caum koj tus kheej tej kev xav thiab tej kev ntshaw ntawd, koj thaiv qhov ua raws li Vajtswv lub siab nyiam, tes hauj lwm uas tshaj tawm Nws cov lus thiab qhov ua tim khawv rau Nws, nrog rau tib neeg txoj kev cawm dim thiab koj tus kheej txoj kev cawm dim lawm. Muab hais luv luv hais tias, txawm tib neeg tej kev xav yuav yog dab tsi los xij, tej kev xav ntawd tsis yog los ua raws li Vajtswv lub siab nyiam thiab zwm tsis tau rau Vajtswv tiag tiag. Thaum tib neeg caum lawv tej kev xav thiab tej kev ntshaw ntawd, lawv lub hom phiaj kawg tsis yog kom to taub qhov tseeb, los sis to taub tias yuav coj lawv tus kheej li cas, yuav ua kom tau raws li Vajtswv lub siab nyiam li cas, thiab yuav ua lawv tej dej num thiab ua lawv txoj hauj lwm uas yog cov neeg raug tsim tawm los ntawd kom tiav li cas. Qhov ntawd tsis yog kom tib neeg muaj txoj kev ntshai Vajtswv thiab zwm rau Vajtswv tiag tiag. Tiam sis, yus yim ua kom tau raws li yus tej kev xav thiab tej kev ntshaw, ces yus yim txav deb ntawm Vajtswv hos txav ze Ntxwgnyoog xwb. Ib yam nkaus li ntawd, lawv yim caum lawv tej kev xav thiab ua tau raws li tej kev xav ntawd, ces lawv lub siab yim ntxeev siab rau Vajtswv, lawv yim txav deb ntawm Vajtswv, thiab thaum kawg, thaum lawv ua tau raws li lawv tej kev xav raws li qhov lawv xav tau thiab ua tau raws li lawv tej kev ntshaw lawm, ces lawv yim saib tsis taus Vajtswv, Nws lub hwj chim kav, thiab txhua yam ntawm Nws xwb. Tej zaum lawv haj tseem taug txoj kev uas tsis lees paub, cov nyom, thiab sawv tawm tsam Vajtswv thiab. Qhov no yog qhov tshwm sim thaum kawg.

Tom qab to taub tias Vajtswv lub tsev, thiab pawg ntseeg yog dab tsi lawm, tib neeg kuj yuav tsum to taub tias yuav coj tus cwj pwm thiab tus qauv li cas thaum lawv ua ib tug tswv cuab nyob rau hauv Vajtswv lub tsev thiab. Ib txhia tib neeg tau hais tias, “Koj tsis cia peb caum kom tau raws li peb tus kheej tej kev xav los sis ua kom tau raws li peb tus kheej tej kev ntshaw.” Kuv tsis yog txwv nej kom txhob caum nej tus kheej tej kev xav; Kuv qhia koj tias yuav ua neej nyob rau hauv Vajtswv lub tsev li cas es thiaj li zoo, yuav coj tus qauv uas tsim nyog li cas thiab ua koj tej dej num hauv Vajtswv lub tsev yam li yog ib tug neeg uas raug tsim tawm los li cas es thiaj li zoo xwb. Yog koj pheej caum kom tau raws li koj tus kheej tej kev xav, ces Kuv tuaj yeem hais ncaj qha hais tias: Thov tawm mus! Pawg ntseeg tsis yog ib qho chaw rau koj los caum kom tau raws li koj tej kev xav. Nyob rau sab nraud, koj tuaj yeem ua txhua yam li koj tej kev xav uas koj xav ua thiab caum koj tus kheej tej kev xav thiab tej kev muaj siab. Yam uas koj yuav tsum tau ua ces yog tawm ntawm Vajtswv lub tsev mus xwb, ces tsis muaj leej twg yuav cuam tshuam rau yam koj ua lawm. Txawm li cas los xij, pawg ntseeg, thiab Vajtswv lub tsev, tsis yog ib qho chaw uas haum rau koj los caum kom tau raws li koj tej kev xav. Muab hais kom meej ntxiv hais tias, yeej tsis muaj hnub uas koj yuav caum tau koj tus kheej tej kev xav thiab tej kev ntshaw nyob rau hauv qhov chaw no li. Yog koj nyob rau hauv Vajtswv lub tsev, thiab pawg ntseeg, txawm ib hnub xwb los, tsis tas yuav xav txog qhov ua kom tau los sis caum koj tus kheej tej kev xav li. Yog koj hais tias, “Kuv tso kuv tus kheej tej kev xav tseg lawm. Kuv txaus siab hlo los ua kuv tej dej num kom tiav raws li Vajtswv tej kev tim tsum thiab ua ib tug neeg uas muaj peev xwm,” ces yuav lees txais tau qhov no. Koj tuaj yeem ua tau koj tej dej num raws li koj txoj hauj lwm thiab raws li tej kev cai hauv Vajtswv lub tsev. Tiam sis yog koj pheej caum thiab ua kom tau raws li koj tus kheej tej kev xav, ua kom tsis txhob ua rau koj lub neej tsis muaj qab hau xwb, ces koj muab koj tej dej num tso tseg es tawm ntawm Vajtswv lub tsev mus los tau. Los sis koj sau ib nqe lus hais tias, “Kuv yeem tawm ntawm Pawg Ntseeg ntawm Vajtswv Tus Uas Muaj Hwj Chim Loj Kawg Nkaus mus caum kom tau raws li kuv tus kheej tej kev xav thiab tej kev ntshaw. Lub ntiaj teb dav dav li, yuav tsum muaj ib qho chaw rau kuv xwb. Mam li sib ntsib dua,” los tau. Ua li ntawd, thiaj li yog koj ua tib zoo tawm mus caum koj tus kheej tej kev xav. Txawm li cas los xij, yog koj hais tias, “Kuv yeem muab kuv tus kheej tej kev xav tso tseg, ua kuv tej dej num kom tiav nyob rau hauv Vajtswv lub tsev, ua ib tug neeg raug tsim tawm los uas muaj peev xwm, thiab caum kev cawm dim,” ces peb yeej yuav muaj qee qhov kev sib haum xwb. Yog koj xav ua ib tug tswv cuab kom zoo nyob rau hauv Vajtswv lub tsev, koj yuav tsum xub kawm kom paub tias yuav ua ib tug neeg zoo yog ua li cas thiab ua koj tej dej num raws li koj txoj hauj lwm ua ntej tso. Mas koj thiaj li yuav dhau los ua ib tug neeg uas ua neej phim lub npe nyob rau hauv Vajtswv lub tsev. Tus neeg uas raug tsim tawm los yog koj tus kheej thiab lub npe, thiab qhov ntawd yuav tsum muaj tej kev qhia kom pom tseeb thiab lub ntsiab tseem ceeb. Nws tsis yog qhov muaj lub npe xwb; tiam sis vim koj yog ib tug neeg uas raug tsim tawm los lawm, koj yuav tsum ua tej dej num ntawm ib tug neeg uas raug tsim tawm los ntawd kom tiav. Vim koj yog ib tug neeg uas raug tsim tawm los lawm, koj yuav tsum ua tej luag hauj lwm uas zoo li no kom tiav. Yog li ntawd, tej dej num thiab tej luag hauj lwm ntawm ib tug neeg uas raug tsim tawm los ntawd yog dab tsi? Vajtswv txoj lus qhia meej heev txog tej dej num, tej uas yuav tau ua, thiab tej luag hauj lwm ntawm cov neeg uas raug tsim tawm los, tsis yog lod? Txij hnub no mus, koj yog ib tug tswv cuab ntawm Vajtswv lub tsev tiag tiag lawm, uas hais tau hais tias, koj lees paub tias koj tus kheej yog ib tug ntawm cov neeg uas Vajtswv tsim tawm los lawm. Yog li ntawd, txij hnub no mus, koj yuav tsum xav txog koj tej kev npaj lub neej. Koj yuav tsum tsis txhob caum tej kev xav, tej kev ntshaw ntawd ntxiv lawm tiam sis yuav tsum muab tej kev xav, tej kev ntshaw, thiab tej hom phiaj uas koj npaj rau koj lub neej yav dhau los ntawd tso tseg. Koj yuav tsum hloov koj tus kheej thiab qhov kev xam pom mas thiaj li yuav npaj tau tej hom phiaj thiab txoj hauv kev ntawm lub neej uas ib tug neeg uas raug tsim tawm los ntawd tsim nyog muaj. Qhov ib uas yog qhov tseem ceeb tshaj plaws yog, koj tej hom phiaj thiab txoj hauv kev ntawd yuav tsum tsis txhob yog los ua ib tug thawj coj, los sis los coj los sis ua tus txawj tshaj plaws nyob rau hauv txhua qhov chaw ua hauj lwm, los sis los ua ib tug neeg muaj koob muaj npe uas ua ib txoj hauj lwm los sis muaj kiag ib qho txuj ci. Koj lub hom phiaj yuav tsum yog los lees txais koj tes dej num ntawm Vajtswv, qhov ntawd yog, kom paub tias koj yuav tsum ua tes hauj lwm dab tsi tam sim no, nyob rau lub sij hawm no, thiab kom to taub tias koj yuav tsum tau ua tes dej num dab tsi kom tiav. Koj yuav tsum nug seb Vajtswv tim tsum dab tsi ntawm koj thiab tes dej num uas tau npaj rau koj nyob rau hauv Nws lub tsev ntawd yog dab tsi. Koj yuav tsum to taub thiab paub meej txog tej hauv paus ntsiab lus uas tsim nyog to taub, tuav rawv, thiab ua raws nyob rau ntawm tes dej num ntawd. Yog koj tsis nco qab tej hauv paus ntsiab lus ntawd, koj muab tej hauv paus ntsiab lus ntawd sau cia rau hauv ntawv los sis muab teev tseg rau hauv koj lub qhoos phis tawj los tau. Siv sij hawm los tshuaj xyuas tej hauv paus ntsiab lus ntawd thiab xav txog tej hauv paus ntsiab lus ntawd. Yog ib tug neeg uas raug tsim tawm los lawm, koj lub hom phiaj uas tseem ceeb ntawm lub neej ntawd yuav tsum yog los ua koj tes dej num kom tiav li yog ib tug neeg uas raug tsim tawm los thiab ua ib tug neeg raug tsim tawm los uas muaj peev xwm. Qhov no yog lub hom phiaj uas tseem ceeb tshaj plaws ntawm lub neej uas koj yuav tsum muaj. Qhov ob uas yog qhov ncaj ncaj ntawd yog qhov yuav ua koj tes dej num li yog ib tug neeg uas raug tsim tawm los ntawd kom tiav li cas thiab ua ib tug neeg raug tsim tawm los uas muaj peev xwm. Txhua lub hom phiaj los sis txhua txoj hauv kev uas ntsig txog koj lub koob lub npe, lub meej mom, txoj kev khav txiv, yav tom ntej, thiab lwm yam ntawd yuav tsum tau muab tso pov tseg. Ib txhia yuav nug hais tias, “Vim li cas peb thiaj li yuav tsum muab tej ntawd tso tseg?” Qhov ntawd yooj yooj yim xwb. Qhov caum lub koob lub npe, kev muaj txiag nplua nuj, thiab lub meej mom ntawd yuav thaiv txoj kev ua raws li Vajtswv lub siab nyiam, tab kaum qee yam hauj lwm nyob rau hauv Vajtswv lub tsev los sis hauv pawg ntseeg, thiab haj tseem rhuav tshem qee yam hauj lwm ntawm pawg ntseeg thiab. Qhov ntawd yuav cuam tshuam rau txoj kev tshaj tawm Vajtswv txoj lus, txoj kev ua tim khawv rau Vajtswv, thiab qhov loj tshaj yog, qhov tib neeg tau txais txoj kev cawm dim. Yuav kom ua tau koj tes dej num tiav yam muaj peev xwm thiab dhau los ua ib tug neeg raug tsim tawm los uas muaj peev xwm mas, koj yuav tsum npaj tej hom phiaj thiab xyuas koj tej kev ntsib kev pom li qhov koj xav tau, tiam sis koj yuav tsum tsis txhob caum kom tau raws li koj tus kheej tej kev xav li. Koj tej kev xav yuav tsum tsis txhob los txuam yuaj rau hauv ib lub hauv paus ntsiab lus los sis ib txoj kev ua uas koj siv coj los ua koj tes dej num li. Yuav kom ua tau koj tes dej num tiav yam muaj peev xwm thiab dhau los ua ib tug neeg raug tsim tawm los uas muaj peev xwm ntawd mas, koj yuav tsum nrhiav tej hauv paus ntsiab lus uas nyob rau hauv Vajtswv cov lus thiab ib txoj kev xyaum ua uas yog dua, es tsis txhob yog ua raws li koj tus kheej tej tswv yim thiab tej cib fim uas nyob sab nraum Vajtswv cov lus xwb. Tej hauv paus ntsiab lus ntawm qhov kev xyaum ua no thaum kawg yog ntsig txog qhov yuav ua ib tug neeg raug tsim tawm los uas muaj peev xwm thiab ua koj tes dej num kom tiav li cas xwb. Txhua yam yog nyob rau hauv qhov kev to taub txog qhov tseeb, kev ua koj tes dej num kom tiav li yog ib tug neeg uas raug tsim tawm los, thiab thaum kawg to taub txog tej hauv paus ntsiab lus uas yuav tau ua thaum ntsib tib neeg, xwm txheej, thiab txhua yam nyob rau hauv tus txheej txheej ua koj tes dej num kom tiav los sis hauv koj lub neej txhua hnub ntawd lawm. Qhov no puas meej? (Meej.) Yog koj ua tau koj tes dej num tiav raws li tej kev tim tsum thiab tej hauv paus ntsiab lus ntawm Vajtswv lub tsev, thiab siv zog ua ib tug neeg raug tsim tawm los uas muaj peev xwm lawm, ces koj yeej yuav ua tau tej no xwb. Txawm li cas los xij, yog koj caum kom tau raws li koj tus kheej tej kev xav xwb, ces koj yeej yuav tsis tau txais Vajtswv txoj kev pom zoo li.

Yog tib neeg pheej caum kom tau raws li lawv tus kheej tej kev xav yam tsis taug txoj kev caum qhov tseeb li, ces thaum kawg lawv yuav khav theeb, twm xeeb, lim hiam, siab phem, thiab siab hlob ntxiv xwb. Dab tsi ntxiv thiab? Lawv kuj yuav khav lawv tus kheej zuj zus ntxiv thiab. Txawm li cas los xij, thaum tib neeg muab txoj kev caum kom tau raws li lawv tus kheej tej kev xav thiab tej kev ntshaw ntawd tso tseg es los caum txoj kev to taub txog qhov tseeb nrog rau ntau kis ntawm Vajtswv cov lus thiab cov qauv ntawm qhov tseeb uas hais txog qhov yuav saib tib neeg thiab txhua yam, coj lawv tus kheej kom zoo, thiab nqis tes ua li cas ntawd, ces lawv yuav ua neej zoo nkaus li tib neeg tuaj ntxiv. Thaum ua ntau yam hauj lwm los sis tau ntsib tau pom ntau cheeb tsam uas sib txawv lawm, lawv yuav tsis mloog zoo li lawv tsis nkag siab thiab paub tsis meej li yav dhau los ntxiv lawm. Tshaj ntawd ntxiv, lawv yuav tsis daig nyob rau hauv tej kev xav tsis zoo li lawv pheej txeev daig, uas tsis muaj peev xwm tso lawv tus kheej dim, raug txwv thiab raug khi los ntawm tej kev xav thiab tej kev xav hauv siab uas tsis zoo, uas thaum kawg raug tej kev xav tsis zoo ntawd tswj thiab npog ntxiv lawm. Qhov kev caum kom tau raws li lawv tus kheej tej kev xav thiab tej kev ntshaw ntawd tsuas ua rau tib neeg txav deb ntawm tej hauv paus ntsiab lus thiab Vajtswv cov lus thiab ntawm qhov los ua cov neeg raug tsim tawm los uas muaj peev xwm xwb. Lawv tsis paub tias yuav ua raws li Vajtswv tej kev npaj thiab tej kev coj kev qhia li cas, thiab tsis muaj kev to taub tias tib neeg lub neej, kev laus, kev mob, thiab kev tuag yog dab tsi li. Lawv tsis paub tias yuav daws txoj kev ntxub ntxaug ntawd li cas los sis kho tej kev xav tsis zoo ntawd li cas li. Lawv kuj tsis paub tias yuav ua li cas rau cov tib neeg, cov xwm txheej, thiab txhua yam uas los rau hauv lawv lub neej li thiab. Thaum ntsib ntau tus tib neeg, ntau qhov xwm txheej, thiab ntau yam, mas lawv pab tsis tau, paub tsis meej, thiab tsis paub ua dab tsi li. Thaum kawg, lawv tsuas cia tej kev xav hauv siab thiab tej kev xav thiab tej kev xam pom uas tsis zoo ntawd nthuav dav thiab loj hlob rau hauv lawv lub siab, cia tej ntawd tswj thiab khi lawv xwb. Tsis tas li ntawd xwb, thaum tej kev xav hauv siab los sis tej kev xav thiab tej kev xam pom uas tsis zoo no coj kev lawm, tej zaum lawv kuj yuav coj tus cwj pwm lim hiam, los sis ua tej yam uas rhuav tshem lawv tus kheej thiab lwm tus thiab, uas ua rau muaj tej yam tshwm sim uas xav tsis txog li. Tej kev ua uas zoo li no thaiv tib neeg tej kev caum uas yog thiab rhuav tshem lub siab uas txawj xav thiab qhov tsim nyog uas lawv tsim nyog muaj. Yog li ntawd, qhov uas tseem ceeb tshaj plaws tam sim no yog kom tib neeg los saib lawv lub siab kom meej meej seb yam uas lawv tseem ntshaw ntawd yog dab tsi, thiab yam uas yog lub cev nqaij daim tawv, lub ntiaj teb, thiab tej kev ntshaw ntawm lub cev nqaij daim tawv, xws li lub koob lub npe, lub koob meej, nrov koob nrov npe, lub meej mom, kev muaj txiag nplua nuj, thiab lwm yam, uas lawv tseem ntshaw, tseem tim tsum, thiab tsis pom tias zoo li cas, uas pheej muab lawv khi thiab sim siab ntawd yog dab tsi. Tej zaum lawv haj tseem raug tej no cuab los sis qhuas tej no heev thiab, yog li ntawd yog ua yuam kev ib qho me me lawm, tuaj yeem ua rau lawv raug tej no ntes tau nyob rau txhua lub sij hawm thiab txhua qhov chaw yam yooj yim heev. Vim li ntawd, tej no thiaj li yog lawv tej kev xav. Thaum lawv ua tau raws li lawv tej kev xav no lawm, ces thaum ntawd yog thaum lawv ua rau lawv raug kev puas tsuaj thiab ua rau lawv tuag. Nej xam pom qhov no li cas? (Tib neeg yuav tsum saib puag hauv lawv lub siab kom meej seb yam uas lawv tseem ntshaw ntawd yog dab tsi. Lawv yuav tsum pom tej yam xws li lub koob lub npe, lub koob meej, nrov koob nrov npe, lub meej mom, kev muaj txiag nplua nuj, thiab lwm yam ntawm sab cev nqaij daim tawv thiab sab ntiaj teb tias zoo li; yog tsis li ntawd, lawv yuav raug tej ntawd ntes tau yam yooj yim heev.) Lawv tuaj yeem raug tej ntawd ntes, puas yog? Yog koj tsis pom tias tej ntawd zoo li cas, ces koj yuav nyob rau qhov kev phom sij uas raug tej ntawd haub ntxias tas li los sis haj tseem raug ntes thiab. Yog li ntawd, qhov uas tseem ceeb tshaj plaws rau nej ua tam sim no yog los soj ntsuam kom to taub txhua yam ntawm sab cev nqaij daim tawv uas Kuv hais ua ntej ntawd raws li Vajtswv cov lus thiab qhov tseeb. Thaum nej khawb tau tej ntawd tawm los thiab soj ntsuam tau tej ntawd lawm, nej yuav tsum muab tej ntawd tso tseg es siv lawv lub cev, lub siab lub ntsws, thiab dag zog los ua ib tug neeg dog dig uas raug tsim tawm los, thiab los ua nej tej dej num thiab tes hauj lwm tam sim no. Tsis txhob saib koj tus kheej li yog ib tug neeg tshwj xeeb los sis hloov tsis tau, los sis ib tug neeg uas muaj kev txawj los sis muaj peev xwm heev. Koj tsuas yog ib tug neeg tsis tseem ceeb xwb. Tsis tseem ceeb npaum li cas? Nyob rau ntawm txhua tus neeg thiab txhua yam uas Vajtswv tsim los ntawd, koj tsuas yog ib tug ntawm cov ntawd, ib tug uas dog dig tshaj plaws xwb. Koj dog dig npaum li cas? Koj zoo ib yam li tej nplooj nyom, ib yam li tej ntoo, tej roob, tej lub dej poob, los sis haj tseem zoo li tej xuab zeb ntawm ntug dej xwb. Tsis muaj dab tsi rau koj coj los khav, tsis muaj dab tsi tsim nyog qhuas. Koj dog dig npaum li ntawd. Tshaj ntawd ntxiv, yog tseem muaj cov duab ntawm cov neeg nrov koob nrov npe, cov neeg tseem ceeb, cov neeg nto moo, cov tib neeg zoo sawv khov kho rau hauv koj nruab siab, los sis tej yam uas koj khib, mas koj yuav tsum muab tej ntawd tshem tawm mus thiab muab tso tseg. Koj yuav tsum pom tias tej ntawd lub ntsiab tseeb zoo li cas, es tig rov qab los rau txoj kev uas ua ib tug neeg dog dig uas raug tsim tawm los. Qhov ua ib tug neeg dog dig uas raug tsim tawm los thiab ua koj tej dej num kom tiav ntawd yog qhov tseem ceeb tshaj plaws uas koj yuav tsum tau ua. Tom qab ntawd, koj yuav tsum tig rov qab mus rau lub ncauj lus uas caum qhov tseeb no thiab siv zog rau qhov tseeb ntxiv. Sim txo koj txoj kev nthuav tawm txog tej xov xwm, ntaub ntawv, xwm txheej, thiab cov neeg nto moo sab nraud ntawd. Qhov zam txhua yam uas tuaj yeem ua rau muaj txoj kev ntshaw los ua kom tau raws li koj tus kheej tej kev xav ntawd mas yog qhov zoo tshaj plaws. Tam sim no, koj tus kheej yuav tsum nyob deb ntawm tib neeg, xwm txheej, thiab txhua yam uas tsis muaj txiaj ntsim rau koj thiab yog yam tsis zoo. Cais koj tus kheej tawm ntawm tej ntawd thiab txav kom deb ntawm txhua yam uas nyob rau hauv lub ntiaj teb uas nyuaj thiab kub ntxhov no. Tab txawm yog lawv tsis tsim txom los sis tsis sim koj siab los xij, koj tseem yuav tsum tau txav deb ntawm lawv. Zoo ib yam li Mauxes nyob rau tom roob moj sab qhua tau plaub caug xyoo; tsis yog nws tseem nyob zoo thiab lod? Thaum kawg, txawm nws tsis txawj hais lus los xij, Vajtswv xaiv nws, uas yog yam muaj nuj nqis tshaj plaws nyob rau hauv nws lub neej. Qhov ntawd tsis yog ib qho uas tsis zoo. Yog li ntawd, qhov ua ntej uas tseem ceeb tshaj plaws ntawd yog, kho koj lub siab uas nyob tob rau hauv koj tej kev xav, thiab nyob rau hauv koj tej kev xav koj yuav tsum muaj ib lub siab uas tshaib nqhis txog txoj kev ncaj ncees uas caum qhov tseeb nyob rau hauv koj txoj kev ntseeg. Koj yuav tsum muaj ib qho kev npaj zoo li no, xws li ib txoj kev txaus siab thiab ib txoj kev ntshaw, es tsis txhob yog pheej ua raws li koj tej kev xav los sis tas zog siv zog thiab xav seb koj yuav ua tau raws li tej kev xav ntawd los tsis tau xwb. Koj yuav tsum muab qhov koj txuas rau tej kev xav thiab tej kev ntshaw yav dhau los ntawd txiav tawm kom tag nrho, es siv zog los ua ib tug neeg raug tsim tawm los uas muaj peev xwm thiab dog dig lawm xwb. Qhov yog ib feem ntawm txhua yam uas raug tsim tawm los ntawd tsis yog ib qho uas tsis zoo. Vim li cas Kuv thiaj hais li no? Tseeb tiag qhov ntawd yeej yog ib qho zoo. Txij li lub sij hawm uas koj pib muab koj tej kev xav thiab tej kev ntshaw ntawm sab cev nqaij daim tawv tso tseg, txij li lub sij hawm uas koj txiav txim siab los ua ib tug neeg dog dig uas raug tsim tawm los yam tsis muaj ib lub meej mom, ib txoj hauj lwm, los sis ib qho muaj nuj nqis uas tshwj xeeb li lawm, ces qhov ntawd txhais tau hais tias koj muaj qhov kev txaus siab hlo thiab kev txiav txim siab los muab koj tus kheej zwm nyob rau hauv Vajtswv txoj kev tswj fwm, nyob rau hauv tus Tswv Tsim txoj kev tswj fwm, cia Vajtswv coj thiab kav koj lub neej lawm. Koj muaj qhov kev txaus siab hlo los mloog lus, los muab koj tus kheej tej kev xav thiab tej kev ntshaw tso tseg thiab tso pov tseg, es cia Vajtswv ua koj tus Tswv thiab coj koj txoj hauv kev, los ua ib tug neeg raug tsim tawm los uas muaj peev xwm uas muaj ib lub siab zoo li no, thiab los ua koj tes dej num kom tiav zoo los ntawm ib lub siab thiab ib tug cwj pwm uas zoo li no. Qhov no yog txoj kev pom txog lub neej uas koj tsim nyog muaj. Qhov no puas yog? Qhov no puas yog qhov tseeb? (Yog.) Tej hom phiaj ntawm koj lub neej thiab txoj hauv kev ntawm koj lub neej yog mob siab rau dab tsi? (Ua tej dej num ntawm ib tug neeg uas raug tsim tawm los kom tiav.) Qhov ko yog qhov tseem ceeb tshaj plaws. Dab tsi ntxiv thiab? (Qhov los ua ib tug neeg dog dig uas raug tsim tawm los.) Puas muaj dab tsi ntxiv lawm? (Caum qhov tseeb kom tau txais kev cawm dim.) Qhov ko yog ib qho thiab. Puas muaj dab tsi ntxiv lawm? (Mob siab rau Vajtswv cov lus thiab siv zog rau qhov tseeb ntxiv.) Qhov ko tseeb dua, tsis yog lod? Tag nrho tej hom phiaj ntawm koj lub neej thiab txoj hauv kev ntawm koj lub neej ntawd yuav tsum ntsig txog Vajtswv cov lus, thiab koj yuav tsum siv zog rau qhov tseeb ntxiv. Muab qhov kev kub siab uas koj muaj txog txoj kev caum tej kev xav uas pom tsis meej yav dhau los ntawd tig los mus nyeem Vajtswv cov lus thiab xav txog qhov tseeb, es saib seb koj puas yuav nce mus rau qhov tseeb. Yog koj yeej nce mus rau qhov tseeb lawm tiag tiag, ces yuav muaj ib qho kev qhia kom pom tseeb nyob rau hauv koj tus kheej. Qhov ntawd yog, thaum ntsib tib neeg, xwm txheej, thiab txhua yam uas muaj feem xyuam rau hauv tib neeg tej kev xav thiab tej kev xam pom, thiab tej hauv paus ntsiab lus lawm, koj yuav tsis mloog zoo li tsis paub ua dab tsi, paub tsis meej, ntxhov siab, los sis xav tsis tawm ntxiv lawm. Tiam sis, koj yuav thov Vajtswv, Nws cov lus yuav coj qhia koj, muaj lub siab txias thiab khov kho, thiab paub tias yuav ua li cas es thiaj li yog txoj kev uas zwm rau Vajtswv thiab ua tau raws li Nws lub siab nyiam. Thaum ntawd yog thaum uas koj taug tau txoj kev yog nyob rau hauv lub neej tiag tiag lawm. Muaj ntau tus tib neeg uas nce qib qeeb qeeb nyob rau hauv lawv lub neej vim hais tias, nyob rau hauv tus txheej txheem ua lawv tej dej num kom tiav ntawd, mas lawv pheej caum lawv tus kheej tej kev xav, lub koob lub npe, lub meej mom, thiab tej hom phiaj ntawm lub neej uas lawv xav hauv nruab siab xwb, thiab xav kom tau txais koob hmoov thaum ua kom tau raws li lawv tej kev ntshaw ntawm sab cev nqaij daim tawv ntawd. Vim li ntawd, lawv thiaj li ua tsis tau lawv tej dej num kom tiav tiag tiag, thiab lawv thiaj li tsis tau ntsib tau pom txoj kev to taub lub neej txoj sia uas tseeb. Txij thaum pib mus txog rau thaum xaus, lawv tsis muaj peev xwm qhia tau ib co lus tim khawv uas hais txog txoj kev ntsib kev pom tiag tiag li. Yog li ntawd, txawm lawv twb ua lawv tej dej num ntev npaum li cas lawm los xij, qhov lawv to taub txog lub neej txoj sia thiab qhov tseeb ntawd yeej tseem tsawg heev, thiab lawv txi txiv tsawg tsawg xwb. Yog koj tus kheej yeej mob siab ua koj tej dej num, siv tag nrho koj lub zog los caum qhov tseeb thiab siv zog ua hauj lwm rau qhov tseeb tiag tiag, ces koj yuav tsis pom tias koj tus kheej muaj tus yam ntxwv, tus yeeb yam, thiab qhov xwm txheej uas koj muaj tam sim no. Qhov ntawd yog vim feem ntau tib neeg tsuas mob siab rau tej hauj lwm ntawm lub ntiaj teb, tes hauj lwm qib siab, thiab txoj hauj lwm ntawm tes xwb, thiab lub ntsiab tseeb uas tseem ceeb ntawm tej hauj lwm no yog los ua kom tiav raws li lawv tus kheej tej kev ntshaw thiab tej kev muaj siab thaum ua kom tau raws li lawv tus kheej tej kev xav xwb. Tej kev xav no yog dab tsi? Nws yog qhov uas tib neeg pheej xav paub lawv tus kheej nyob rau hauv lawv tes hauj lwm, thiab qhov ua tau qee yam tiav, tau txais qee yam txiaj ntsim, thiab lwm tus lees paub, tib lub sij hawm ntawd lawv pheej xav ua kom tau raws li lawv tej kev npau suav thiab tej hom phiaj ntawm qhov lawv caum los qhia txog qhov lawv tus kheej muaj nqis thiab. Mas lawv thiaj li yuav paub tias ua tiav lawm. Txawm li cas los xij, qhov no tsis yog txoj kev caum qhov tseeb; nws tsuas yog ua kom lawv tus kheej txaus siab thiab siv hauj lwm los txhawb lawv lub neej xwb. Tsis yog li no lod? (Yog.) Yog li ntawd, txawm tib neeg yuav ua hauj lwm tau ntev npaum li cas los sis lawv ua tau hauj lwm ntau npaum li cas lawm los xij, tej ntawd tsis cuam tshuam rau qhov tseeb li. Lawv yeej tseem tsis to taub qhov tseeb thiab nyob deb ntawm txoj kev caum qhov tseeb ntawd heev. Hais txog tej hauv paus ntsiab lus uas cuam tshuam rau lawv tej luag hauj lwm ntawd, mas tib neeg yeej tseem tsis tau paub los sis to taub li. Yog li ntawd, nej thiaj li hnov sab thiab xav paub hais tias, “Vim li cas peb thiaj li pheej raug qhuab ntuas? Peb siv dag zog ntau heev, nyiaj kev txom nyem ntau heev, thiab tiv kev txom nyem loj heev. Vim li cas peb thiaj li tseem raug qhuab ntuas?” Vim hais tias koj tsis to taub tej hauv paus ntsiab lus. Koj yeej tsis to taub los sis nkag siab txog tej hauv paus ntsiab lus, thiab koj yeej tsis tau siv ib qho dag zog rau tej hauv paus ntsiab lus ntawd li. Lwm lo lus mas hais tias, koj tsis tau siv zog rau qhov tseeb, rau Vajtswv cov lus li. Koj tsuas ua raws li ob peb txoj kev cai thiab ua raws li koj tus kheej txoj kev xav hauv nruab siab xwb. Koj ib txwm ua neej nyob rau hauv lub ntiaj teb ntawm koj tus kheej tej kev xav thiab tej kev xav phem xwb, thiab txhua yam uas koj ua ntawd tsis cuam tshuam rau qhov tseeb li. Koj caum koj tusk heej txoj hauj lwm xwb, tsis yog ua raws li Vajtswv lub siab nyiam. Yog li ntawd, koj thiaj li tseem tsis to taub tej hauv paus ntsiab lus hauv Vajtswv cov lus, yog li ntawd thaum kawg, thiaj li pom hais tias ib txhia tib neeg yog cov neeg ua Vajtswv tes dej num, hos ib txhia xav hais tias lawv ua txhaum. Vim li cas lawv thiaj li xav hais tias lawv ua txhaum? Vim lawv xav hais tias qhov lawv raug kev txom nyem thiab tiv kev txom nyem ntawd mas npaum nkaus li txoj kev xyaum ua qhov tseeb lawm. Tseeb tiag, qhov lawv raug kev txom nyem thiab tiv kev txom nyem ntawd tsuas yog nyiaj qee yam kev txom nyem xwb. Qhov ntawd tsis yog xyaum ua qhov tseeb los sis ua raws li Vajtswv txoj kev. Tseeb tshaj ntawd yog, qhov ntawd tsis muaj dab tsi cuam tshuam rau qhov kev xyaum ua qhov tseeb li; qhov ntawd tsuas yog siv zog ua hauj lwm xwb. Qhov siv zog ua hauj lwm ntawd puas ua tau koj tej dej num tiav yam muaj peev xwm? Qhov ntawd puas yog ua ib tug neeg raug tsim tawm los uas muaj peev xwm? (Tsis yog.) Muaj qhov nrug thiab qhov txawv nyob rau ntawm ob qho no.

Hais txog lub ncauj lus uas hais tias muab tej kev xav tsis zoo vim txoj kev meem txom tso tseg ntawd, hnub no, cia peb tso peb qhov kev kawm rau ntawm no tso. Nej puas tuaj yeem pom tseeb tseeb hais tias tej teeb meem uas tshwm sim rau cov tib neeg uas hnov meem txom ntawd vim lawv ua tsis tau raws li lawv tus kheej tej kev xav thiab tej kev ntshaw? (Pom, pom tseeb lawm.) Pom dab tsi tseeb? Cia peb muab ib lub ncauj lus xaus. Ua ntej tshaj plaws, cia peb tham txog tias tej kev xav ntawd yog dab tsi. Tej kev xav uas raug soj ntsuam nyob rau ntawm no yog yam tsis zoo, tej kev xav ntawd tsis yog yam yog thiab yam zoo. Tej kev xav yog dab tsi? Siv cov lus kom yog yog los muab ib lub ntsiab lus rau “tej kev xav” seb. (Tej kev xav ntawd yog tej kev xav uas tsis muaj dab tsi uas tsis ua raws li cov tib neeg dog dig lub siab uas txawj xav thiab qhov tsim nyog, uas tib neeg xav hauv nruab siab rau lawv tus kheej tiam sis tsis mus raws li qhov muaj tiag. Tej kev xav ntawd tsis muaj tiag.) Qhov uas koj hais ntawd yog tej kev xav ntawm cov neeg uas ua raws li qhov tsis muaj tiag. Koj txhais puas tau tej kev xav ntawd? Tej kev xav ntawd puas txhais nyuaj? Tej hom phiaj uas tib neeg npaj rau lawv tus kheej lub meej mom, lub koob lub npe, thiab tej kev cia siab ntawd yog dab tsi? (Tej hom phiaj uas tib neeg npaj rau lawv tus kheej lub meej mom, lub koob lub npe, thiab tej kev cia siab ntawd ces yog tej kev xav xwb.) Txhais li no puas yog? (Yog.) Tej hom phiaj uas npaj rau tib neeg tus kheej lub meej mom, lub koob lub npe, tej kev cia siab, thiab tej kev ntshaw ces yog tej kev xav thiab tej kev ntshaw xwb. Qhov no puas yog qhov txhais dav dav txog tej kev xav uas cov tsis ntseeg hais txog? Peb txhais raws li qhov ntawd lub ntsiab tseeb uas tseem ceeb xwb, puas yog? (Yog.) Txawm yuav yog hom kev xav dab tsi, txawm tej kev xav ntawd yuav yog tej kev xav siab, qis, los sis nruab nrab xwb los xij, tej kev xav ntawd puav leej yog tej hom phiaj uas tib neeg npaj rau lawv tus kheej tej kev ntshaw xwb. Tej hom phiaj no yog lawv tej kev xav los sis tej kev ntshaw. Qhov no tsis yog txoj kev xav ntawm cov neeg uas peb tau kawm txog thiab soj ntsuam nyob rau hauv cov piv txwv yav dhau los ntawd los? Tej hom phiaj uas tib neeg npaj rau lawv tus kheej lub meej mom, lub koob lub npe, tej kev cia siab, tej kev ntshaw, thiab lwm yam ntawd, yog tej kev xav thiab tej kev ntshaw xwb. Those who pursue ideals and desires but cannot realize them often feel repressed within the church. Koj puas kuj pheej nyob rau hauv ib qho xwm txheej zoo li no, uas muaj tej kev xav hauv siab zoo li no thiab? Yog koj muaj tej kev xav hauv siab no, koj tab tom siv zog rau dab tsi? Qhov ntawd yog rau koj tus kheej lub meej mom, lub koob lub npe, tej kev cia siab, thiab tej kev ntshaw xwb. Tej kev xav thiab tej hom phiaj uas koj tau npaj ntawd mas pheej raug qhov tseeb thiab yam zoo txwv thiab thaiv tas li xwb—ua tsis tau raws li tej kev xav thiab tej hom phiaj ntawd. Tsis yog li ntawd lod? (Yog.) Qhov no yog qhov teeb meem ntawm tib neeg tej kev xav. Ua ntej tshaj plaws, peb soj ntsuam txog tib neeg tej kev xav, ces tom qab ntawd peb kawm txog dab tsi? Peb kawm hais tias pawg ntseeg, thiab Vajtswv lub tsev, tsis yog qhov chaw rau tib neeg los ua kom tau raws li lawv tej kev xav. Tom qab ntawd peb kawm txog tej hom phiaj yog uas tib neeg yuav tsum caum nyob rau hauv lawv txoj kev ntseeg Vajtswv, yuav ua ib tug neeg raug tsim tawm los uas muaj peev xwm li cas, thiab yuav ua tej dej num ntawm ib tug neeg uas raug tsim tawm los ntawd kom tiav li cas. Tsis yog li ntawd lod? (Yog.) Lub hom phiaj tseem ceeb ntawm qhov kev kawm txog tej no ces yog los qhia tib neeg tias yuav xaiv li cas thiab yuav ua li cas rau lawv tej kev xav thiab tej dej num ntawd. Tib neeg yuav tsum muab lawv tej kev xav uas tsis tsim nyog ntawd tso pov tseg, hos lawv tej dej num yog tej uas lawv yuav tsum tau tiv ua nyob rau tiam neej no thiab siv tag nrho lawv lub sim neej los ua. Tej dej num ntawm ib tug neeg uas raug tsim tawm los ntawd mas yog yam zoo, hos tib neeg tej kev xav tsis yog yam zoo thiab yuav tsum tsis txhob ua raws li tej kev xav ntawd tiam sis muab tej kev xav ntawd tso pov tseg. Yam uas tib neeg yuav tsum ua raws thiab caum ntawd yog los ua ib tug neeg raug tsim tawm los uas muaj peev xwm thiab ua lawv tej dej num kom tiav xwb. Yog li ntawd, tib neeg yuav tsum ua li cas thaum lawv tej kev xav cov nyom rau lawv tej dej num? (Lawv yuav tsum muab lawv tus kheej tej kev xav tso tseg thiab muab tej kev xav ntawd tso pov tseg.) Lawv yuav tsum muab lawv tej kev xav tso pov tseg es ua raws li lawv tej dej num. Txawv lawv yuav ua neej nyob mus txog thaum twg los sis lub hnub nyoog twg los xij, yam uas tib neeg yuav tsum ua thiab yam uas lawv yuav tsum caum mas yuav tsum yog ntsig txog qhov yuav ua tej dej num ntawm ib tug neeg uas raug tsim tawm los kom tiav li cas thiab zwm tau rau Vajtswv, Nws cov lus, thiab qhov tseeb xwb. Tsuas yog los ntawm qhov kev xyaum ua li no xwb mas tib neeg thiaj li yuav ua tau ib lub neej uas muaj qab hau thiab muaj nuj nqis, puas yog? (Yog.) Zoo lawm, hnub no cia peb xaus peb qhov kev kawm rau ntawm no tso.

Kaum Ob Hlis 10, 2022