Cov Lus Hais Txog Kev Coj Li Cas Rau Qhov Tseeb thiab Vajtswv

Nqe Lus Uas Xaiv Tawm Los 9

Hais txog Nau-a, Anplahas thiab Yauj, cov uas tau muab sau tseg rau hauv phau Vajluskub Qub lawm ntawd, tej yam ntxwv ntawm lawv txoj kev ua neej yog dab tsi? Tej yam ntxwv twg ntawm txoj kev ua neej nyob uas lawv muaj es ua rau Vajtswv pom tias txais yuav tau lawv? (Tshwj xeeb mas lawv muaj lub siab txawj xav thiab muaj lub ntsiab.) Yeej yog li ntawd kiag. Yauj twb ua neej nyob tau ntev heev lawm los Vajtswv tus kheej tsis tau hais lus rau nws kiag li thiab Vajtswv tus kheej tsis tshwm los rau nws pom, tiam sis Yauj to taub thiab hnov txhua yam uas Vajtswv ua. Thaum kawg, nws thiaj li muab qee cov lus uas hais txog nws txoj kev paub txog Vajtswv ntawd zuaj zog los hais ua ke tias: “Yehauvas pub, thiab Yehauvas tau muab coj mus lawm; thov qhuas Yehauvas lub npe” (Yauj 1:21). Cov lus no txhais li cas? Cov lus no txhais hais tias: “Yehauvas yog Vajtswv, Nws yog tus Tswv Tsim, Nws yog kuv tus Vajtswv, thiab thaum Nws hais lus, txawm kuv tsuas to taub ib nrab ntawm qhov Nws hais ntawd xwb los, kuv yuav tsum mloog thiab ua raws nraim li ntawd.” Vajtswv tsuas pom tias lees txais tau Yauj thaum Yauj txoj kev paub txog Nws los txog rau theem no lawm xwb. Yauj muaj tej kev ntsib kev pom thiab kev nkag siab zoo li no, thiab nws kuj tuaj yeem lees txais thiab ua raws li tej kev sim siab uas Vajtswv muab rau nws ntawd. Tag nrho tej no yog ua tau tiav raws li lub hauv paus ntawm qhov nws muaj lub siab txawj xav thiab lub ntsiab ntawm txoj kev ua neej nyob. Txawm nws tau pom Vajtswv thiab tsis tau pom, txawm Vajtswv tau ua dab tsi rau nws lawm, thiab txawm Vajtswv tau sim nws thiab tsis tau sim los sis tau tshwm los rau nws pom thiab tsis tau tshwm los xij, nws ib txwm ntseeg tias: “Yehauvas yog kuv tus Vajtswv, thiab kuv yuav tsum ua raws li tej uas Vajtswv qhia thiab tej uas Vajtswv txaus siab rau, txawm kuv to taub thiab tsis to taub los xij; kuv yuav tsum taug Nws txoj kev, thiab kuv yuav tsum mloog Nws hais thiab zwm rau Nws.” Nyob hauv Phau Ntawv Yauj ntawd tau muab sau tseg tias Yauj cov me nyuam pheej noj haus ua kev lom zem, thiab Yauj yeej tsis koom nrog lawv li, tiam sis yeem thov Vajtswv thiab tua tsiaj fij rau lawv. Qhov tseeb tiag uas Yauj pheej ua li no ua pov thawj qhia tias nws paub hauv nws lub siab tias Vajtswv tsis nyiam tib neeg ntiaj teb txoj kev ua raws siab nyiam txog kev noj, kev haus, thiab kev lom zem, thiab tib neeg ntiaj teb lub neej noj haus ua kev lom zem kiag li. Yauj to taub hauv nws lub siab tias qhov no yog qhov tseeb, thiab tab txawm nws tsis tau hnov ncaj qha tias Vajtswv hais li no los, nws paub hauv nws lub siab tias qhov no yog yam Vajtswv ntshaw. Vim Yauj paub yam Vajtswv ntshaw lawm, Yauj thiaj li muaj peev xwm mloog Nws hais thiab zwm rau Nws, Yauj tuav rawv qhov no txhua lub sij hawm, es Yauj thiaj li tsis koom kev noj, kev haus, thiab rooj noj rooj haus. Yauj puas to taub qhov tseeb? Nws tsis to taub. Nws muaj peev xwm ua tau li no vim nws muaj lub siab txawj xav thiab lub ntsiab ntawm txoj kev ua neej nyob. Ntxiv rau lub siab txawj xav thiab lub ntsiab ntawd, qhov uas tseem ceeb tshaj plaws yog nws muaj txoj kev ntseeg Vajtswv tseeb. Nws lees paub hauv nws nruab siab tias Vajtswv yog tus Tswv Tsim, thiab yam uas tus Tswv Tsim hais yog Vajtswv lub siab nyiam. Muab hais raws li tej lus niaj hnub no mas, qhov ntawd yog qhov tseeb, qhov ntawd yog cov lus qhia siab tshaj plaws, thiab yog yam uas tib neeg yuav tsum ua raws. Tsis hais txawm qhov ntawd yog Vajtswv ib qho kev ntshaw uas tib neeg nkag siab tau, los sis tsuas yog ob peb lo lus uas Vajtswv hais xwb los xij li, tib neeg yuav tsum lees txais thiab ua raws li ntawd. Qhov no yog kiag lub ntsiab uas tib neeg yuav tsum muaj ntag. Thaum tib neeg muaj lub ntsiab no lawm, nws yuav yooj yim rau tib neeg ua raws li Vajtswv txoj lus, muab Nws txoj lus coj los xyaum ua raws, thiab zwm rau Nws txoj lus. Thaum ua li ntawd, yuav tsis muaj kev nyuaj siab, tsis muaj kev txom nyem, thiab yeej tsis muaj kev tab kaum ib yam dab tsi li. Yauj puas to taub ntau txog qhov tseeb? Nws puas paub Vajtswv? Nws puas muaj kev paub txog yam uas Vajtswv muaj thiab yam uas yog Vajtswv los sis Nws tus moj yam lub ntsiab tseeb? Yog muab piv rau cov tib neeg niaj hnub no mas, nws tsis paub Vajtswv, thiab nws to taub me me xwb. Txawm li cas los xij, yam uas Yauj muaj ntawd yog qhov zoo uas muab txhua yam uas nws to taub ntawd coj los xyaum ua raws. Tom qab to taub qee yam lawm, nws yuav mloog lus thiab ua raws. Qhov no yog kis uas zoo tshaj plaws ntawm nws txoj kev ua neej, thiab kuj yog yam uas tib neeg saib tsis taus tshaj plaws. Tib neeg xav tias, “Tsis yog Yauj tsuas zam txoj kev noj haus ua kev lom zem xwb lod? Tsis yog nws tsuas pheej tua tsiaj fij rau ntawm Vajtswv lub xub ntiag tas li xwb lod? Muab hais raws li tej lus niaj hnub no mas, tsis yog nws tsuas zam txoj kev ua raws siab nyiam rau tej kev kaj siab ntawm sab cev nqaij daim tawv xwb lod?” Tej no tsuas yog tej yam sab nraud xwb, tiam sis thaum koj saib rau Yauj tus moj yam lub ntsiab tseeb thiab txoj kev ua neej uas nyob tom qab tej no, koj yuav to taub tias tej no tsis yog tej yam yooj yim, thiab tej no tsis yog ua tau yooj yim. Yog ib tug tib neeg dog dig zam txoj kev noj haus ua kev lom zem kom txuag tau nyiaj mas, qhov no yuav ua tau yooj yim. Tiam sis Yauj yog ib tug neeg nplua nuj nyob rau lub sij hawm ntawd. Tus neeg nplua nuj twg thiaj li yuav xaiv tsis noj haus ua kev lom zem? Yog li ntawd, ua li cas Yauj thiaj li zam tau txoj kev noj haus ua kev lom zem? (Nws paub tias Vajtswv tsis nyiam qhov ntawd kiag li. Nws muaj peev xwm hwm Vajtswv thiab zam kev phem.) Yog lawm. Nyob rau ntawm qhov hwm Vajtswv thiab zam kev phem ntawd, Yauj tau xyaum ua dab tsi kiag? Nws paub tias tej uas Vajtswv tsis nyiam kiag li ntawd puav leej yog kev phem, yog li ntawd nws ua raws li Vajtswv txoj lus, thiab nws yuav tsis ua ib yam dab tsi uas Vajtswv tsis nyiam kiag li. Txawm lwm tus yuav hais li cas los xij, nws yeej yuav tsis ua tej no kiag li. Qhov no yog qhov uas txhais tias hwm Vajtswv thiab zam kev phem. Vim li cas Yauj thiaj li muaj peev xwm hwm Vajtswv thiab zam kev phem? Nws xav li cas nyob hauv nws lub siab? Ua li cas nws thiaj li muaj peev xwm tsis ua tej kev phem no? Nws muaj ib lub siab hwm Vajtswv. Qhov muaj ib lub siab hwm Vajtswv ntawd txhais li cas? Qhov ntawd txhais hais tias nws lub siab ntshai Vajtswv, tuaj yeem hwm Vajtswv li yog tus loj, thiab muaj ib qho chaw rau Vajtswv nyob rau hauv nws lub siab. Nws tsis yog ntshai tsam Vajtswv pom, thiab tsis ntshai tsam Vajtswv npau taws. Tiam sis, nyob hauv nws lub siab mas nws hwm Vajtswv li yog tus loj, txaus siab hlo ua kom Vajtswv txaus siab, thiab txaus siab hlo tuav rawv Vajtswv cov lus khov kho. Vim li ntawd nws thiaj li muaj peev xwm hwm Vajtswv thiab zam kev phem. Tam sim no txhua tus yeej hais tau kab lus uas “hwm Vajtswv thiab zam kev phem,” tiam sis lawv tsis paub tias ua li cas es Yauj thiaj li ua tau li ntawd. Qhov tseeb tiag, Yauj saib qhov “hwm Vajtswv thiab zam kev phem” ntawd yam li yog lub hauv paus thiab yog qhov tseem ceeb tshaj plaws hauv txoj kev ntseeg Vajtswv. Yog li ntawd, nws thiaj li muaj peev xwm tuav rawv cov lus no khov kho, ib yam li nws tab tom tuav rawv ib lo lus txib khov kho. Nws mloog Vajtswv cov lus vim nws lub siab hwm Vajtswv li yog tus loj. Txawm nyob hauv tib neeg lub qhov muag es Vajtswv cov lus zoo li tsis tseem ceeb npaum li cas, txawm yog cov lus dog dig xwb los xij, nyob hauv Yauj lub siab mas, cov lus no yog los ntawm Vajtswv tus uas siab tshaj plaws los; cov lus no yog cov lus uas loj tshaj plaws, tseem ceeb tshaj plaws. Txawm yog cov lus uas tib neeg saib tsis taus los, tsuav yog Vajtswv cov lus xwb ces tib neeg yuav tsum ua raws li cov lus ntawd—txawm lawv raug luag thuam los sis raug hais lus phem rau vim qhov ntawd los xij. Txawm lawv ntsib kev txom nyem los sis raug tsim txom los xij, lawv yuav tsum tuav rawv Nws cov lus khov kho mus kom txog thaum kawg; lawv tso tsis taus cov lus ntawd tseg. Qhov no yog qhov uas txhais tias hwm Vajtswv. Koj yuav tsum tuav rawv txhua lo lus uas Vajtswv cheem tsum ntawm tib neeg kom khov kho. Hais txog tej yam uas Vajtswv txwv, los sis tej yam uas Vajtswv tsis nyiam kiag li ntawd, tsis ua li cas yog koj tsis paub txog tej ntawd, tiam sis yog koj paub txog tej ntawd, ces koj yuav tsum muaj peev xwm tsis txhob ua tej ntawd kiag li. Koj yuav tsum muaj peev xwm tuav rawv kom khov kho, txawm koj tsev neeg tso koj tseg, cov tsis ntseeg thuam koj, los sis cov neeg ncawg koj thuam koj thiab tso dag tso luag rau koj. Vim li cas koj thiaj li yuav tsum tuav rawv kom khov kho? Koj lub hauv paus pib yog dab tsi? Koj tej hauv paus ntsiab lus yog dab tsi? Nws yog, “Kuv yuav tsum tuav rawv Vajtswv cov lus kom khov kho thiab ua raws li Nws tej kev ntshaw. Kuv yuav ua tej yam uas Vajtswv nyiam, thiab yuav txiav txim siab tso tej yam uas Vajtswv tsis nyiam kiag ntawd tseg tiag. Yog kuv tsis paub Vajtswv txoj kev npaj siab, ces tsis ua li cas, tiam sis yog kuv paub thiab to taub Nws txoj kev npaj siab lawm, ces kuv yuav txiav txim siab mloog thiab ua raws li Nws cov lus. Yuav tsis muaj leej twg tab kaum tau kuv, thiab kuv yuav tsis ua ywj fab ywj fwj txawm lub ntiaj teb yuav kawg los xij.” Qhov no yog qhov uas txhais tias hwm Vajtswv thiab zam kev phem.

Thawj qhov uas ua kom tib neeg muaj peev xwm zam tau kev phem ntawd yog qhov muaj ib lub siab hwm Vajtswv. Lub siab hwm Vajtswv ntawd yog tshwm los li cas? Yog los ntawm qhov hwm Vajtswv li yog tus loj. Hwm Vajtswv li yog tus loj ntawd txhais li cas? Yog thaum tib neeg paub tias Vajtswv muaj hwj chim kav txhua yam, thiab lawv lub siab hwm Vajtswv. Vim li ntawd, lawv thiaj li muaj peev xwm los siv tau Vajtswv cov lus los ntsuam xyuas txhua yam xwm txheej, thiab siv Vajtswv cov lus los ua lawv tus qauv. Qhov no yog qhov uas txhais tias hwm Vajtswv li yog tus loj. Muab hais kom yooj yim ces, txoj kev hwm Vajtswv li yog tus loj ntawd yog muaj Vajtswv nyob hauv koj lub siab, kom koj lub siab xav txog Vajtswv, es tsis txhob hnov qab koj tus kheej nyob rau hauv yam koj ua, thiab koj tsis txhob ua koj, tiam sis cia Vajtswv ua tus coj. Nyob rau hauv yam, koj xav tias, “Kuv ntseeg Vajtswv thiab raws Vajtswv qab. Kuv tsuas yog ib tug neeg me me uas raug tsim tawm los uas Vajtswv tau xaiv tseg xwb. Kuv yuav tsum muab tej kev xam pom, tej lus qhia, thiab tej kev txiav txim siab uas yog los ntawm kuv tus kheej lub siab nyiam los ntawd tso tseg, es cia Vajtswv ua kuv tus Tswv. Vajtswv yog kuv tus Tswv, kuv qhov chaw ruaj khov, thiab lub teeb ci ntsa iab uas coj kuv txoj kev hauv txhua yam kuv ua. Kuv yuav tsum ua txhua yam raws li Nws cov lus thiab Nws tej kev ntshaw, tsis txhob muab kuv tus kheej tso ua ntej.” Qhov no yog qhov uas txhais tias muaj Vajtswv nyob hauv koj lub siab. Thaum koj xav ua ib yam dab tsi, tsis txhob lam taus lam ua los sis ua maj maj. Xub xav txog seb Vajtswv cov lus hais li cas, seb Vajtswv puas yuav tsis nyiam koj tej kev ua kiag li, thiab seb koj tej kev ua puas mus raws li Nws txoj kev npaj siab tso. Nyob hauv koj lub siab, xub nug koj tus kheej, xav, thiab ua tib zoo xav; tsis txhob maj maj. Qhov maj maj ntawd yog lam taus lam ua, thiab yog los ntawm kev siab kub thiab tib neeg lub siab nyiam xwb. Yog koj pheej maj maj thiab lam taus lam ua xwb, ces qhia tau tias Vajtswv tsis nyob hauv koj lub siab. Ces thaum koj hais tias koj hwm Vajtswv li yog tus loj, tej lus ntawd tsis yog lus tsis muaj qab hau xwb lov? Koj qhov muaj tiag nyob qhov twg? Koj tsis muaj qhov muaj tiag, thiab koj hwm tsis tau Vajtswv li yog tus loj. Koj ua zoo li tus tswv tsev hauv txhua yam, ua raws li lub siab nyiam txhua lub sij hawm. Yog li ntawd, yog koj hais tias koj muaj ib lub siab hwm Vajtswv no, qhov ntawd tsis yog tsis muaj qab hau xwb lov? Koj siv tej lus no los dag neeg xwb. Yog ib tug neeg muaj ib lub siab hwm Vajtswv, ces qhov ntawd qhia kom pom tau meej li cas tiag? Yog pom los ntawm qhov hwm Vajtswv li yog tus loj. Qhov qhia kom pom tau tseeb kiag txog qhov hwm Vajtswv li yog tus loj ntawd mas yog qhov hais tias Vajtswv muaj ib qho chaw nyob hauv lawv lub siab—qhov chaw uas tseem ceeb tshaj plaws. Nyob hauv lawv lub siab lawv cia Vajtswv ua lawv tus Tswv thiab muaj hwj chim kav. Thaum muaj qee yam tshwm sim, lawv muaj ib lub siab uas zwm rau Vajtswv. Lawv tsis maj, tsis lam taus lam ua, thiab lawv tsis ua siab kub; tiam sis, lawv muaj peev xwm ua lub siab tus los daws qhov ntawd, thiab nyob twj ywm rau ntawm Vajtswv lub xub ntiag los nrhiav qhov tseeb tej hauv paus ntsiab lus. Txawm koj ua tej yam raws li Vajtswv txoj lus los sis ua raws li koj tus kheej lub siab nyiam, thiab txawm koj cia koj tus kheej lub siab nyiam los sis Vajtswv txoj lus kav los xij, qhov ntawd yog nyob ntawm qhov seb Vajtswv puas nyob hauv koj lub siab xwb. Koj hais tias Vajtswv nyob hauv koj lub siab, tiam sis thaum muaj qee yam tshwm sim, koj ua ntsej lag muag dig, cia koj tus kheej ua tus txiav txim siab rau thaum kawg es thiab muab Vajtswv thawb rau ib sab. Qhov no puas yog qhov kev qhia kom pom tseeb txog lub siab uas muaj Vajtswv nyob rau hauv? Muaj ib txhia tib neeg uas muaj peev xwm thov Vajtswv thaum muaj qee yam tshwm sim, tiam sis tom qab thov Vajtswv lawm, lawv pheej xav ntsoov, xav tias, “Kuv xav tias qhov no yog yam kuv yuav tsum ua. Kuv xav tias qhov ntawd yog yam kuv yuav tsum ua.” Koj ib txwm ua raws li koj tus kheej lub siab nyiam xwb, thiab tsis mloog leej twg hais txawm lawv yuav qhia koj li cas los xij li. Qhov no tsis yog qhov kev qhia kom pom tseeb txog qhov tsis muaj lub siab hwm Vajtswv lod? Vim koj tsis nrhiav qhov tseeb tej hauv paus ntsiab lus thiab tsis xyaum ua raws li qhov tseeb, thaum koj hais tias koj hwm Vajtswv li yog tus loj, thiab muaj lub siab hwm Vajtswv, tej lus ntawd tsuas yog lus qhuav xwb. Cov tib neeg uas lawv lub siab tsis muaj Vajtswv, thiab cov uas tsis muaj peev xwm hwm Vajtswv li yog tus loj ntawd yog cov tib neeg uas tsis muaj lub siab hwm Vajtswv. Cov tib neeg uas tsis muaj peev xwm nrhiav qhov tseeb thaum muaj qee yam tshwm sim, thiab cov uas tsis muaj lub siab zwm rau Vajtswv ntawd los puav leej yog cov tib neeg uas tsis muaj lub siab txawj xav thiab lub ntsiab. Yog tus tib neeg twg muaj lub siab txawj xav thiab lub ntsiab tiag tiag, ces thaum muaj qee yam tshwm sim, lawv yeej yuav cia li muaj peev xwm nrhiav qhov tseeb. Lawv yuav tsum xub xav tias, “Kuv ntseeg Vajtswv. Kuv twb los nrhiav Vajtswv txoj kev cawm dim lawm. Vim kuv muaj ib tug moj yam qias vuab tsuab, kuv thiaj li ib txwm saib kuv tus kheej li yog tus muaj hwj chim rau hauv txhua yam uas kuv ua; kuv ib txwm tawm tsam Vajtswv tej kev npaj siab. Kuv yuav tsum lees txim hloov dua siab tshiab. Kuv yuav tsum tsis txhob tig tawm tsam Vajtswv li no ntxiv lawm. Kuv yuav tsum kawm kom paub zwm rau Vajtswv. Kuv yuav tsum nrhiav seb Vajtswv cov lus hais li cas, thiab seb qhov tseeb tej hauv paus ntsiab lus yog dab tsi.” Tej no yog tej kev xav thiab tej kev ntshaw uas tshwm los ntawm lub ntsiab ntawm txoj kev ua neej nyob. Tej no yog tej hauv paus ntsiab lus thiab tus cwj pwm uas koj yuav tsum siv los ua txhua yam. Thaum koj muaj lub ntsiab ntawm txoj kev ua neej nyob, ces koj muaj tus cwj pwm no lawm; thaum koj tsis muaj lub ntsiab ntawm txoj kev ua neej nyob, ces koj tsis muaj tus cwj pwm no. Yog vim li ntawd qhov muaj lub ntsiab ntawm txoj kev ua neej nyob ntawd thiaj li tseem ceeb heev thiab tseem ceeb kawg li. Qhov ntawd muaj feem xyuam ncaj qha rau qhov tib neeg to taub qhov tseeb thiab tau txais kev cawm dim.