Qhov Tseem Ceeb ntawm Kev Caum Raws qhov Tseeb thiab txoj Kev ntawm Kev Caum Raws

Nyuam qhuav no, tus kwv tij qhia txog lub ncauj lus uas caum qhov tseeb. Qhov qhia txog qhov no ntau heev ntawd, nej puas xav hais tias txoj kev caum qhov tseeb mas yog qhov tseem ceeb npaum li cas, thiab tias yog nej ntseeg Vajtswv tiam sis tsis caum qhov tseeb no, nej yuav tsis tau ib yam dab tsi li? Tej zaum tam sim no nej ib txhia twb npaj txhij, thiab twb txiav txim siab los rau siab ntso caum qhov tseeb, los siv zog ua hauj lwm rau Vajtswv txoj lus, thiab los siv zog kom to taub qhov tseeb ntxiv thiab los xyaum ua qhov tseeb ntawd ntxiv lawm. Qhov no puas yog txoj kev xav uas yog? Yog kawg nkaus. Thaum qhia ntau heev lawm, yog nej tseem tsis muaj kev xav kiag li thiab, ces qhov ntawd tsis yog dog dig lawm, thiab cov lus no yuav tsis muaj qab hau dab tsi. Qhov tseeb yog qhov tseem ceeb tshaj plaws rau txhua tus uas ntseeg Vajtswv tiag tiag thiab xav kom Nws tshwm los thiab txhua tus uas nyiam qhov tseeb thiab cia siab tias yuav tau txais Vajtswv txoj kev cawm dim nyob rau tiam kawg. Txoj kev cawm qhov tseeb mas tseem ceeb tshaj lwm yam huv si: Nws tseem ceeb dua peb tej hauj lwm, peb txoj sia, los sis peb tej kev cia siab ntawm sab cev nqaij daim tawv. Tam sim no nej puas paub txog qhov tseem ceeb ntawm txoj kev caum qhov tseeb? Nej yeej muaj tej yam kev xav hauv nej lub siab, paub hais tias txoj kev caum qhov tseeb mas yog qhov tseem ceeb tshaj plaws hauv nej lub neej—yog li ntawd muab hais tias yog ib qho xwm txheej uas mus tag sim neej rau nej txhua tus. Tom qab mloog lus qhuab qhia ntau heev lawm, tej zaum tam sim no nej txhua tus muaj ib lub hauv paus zoo li no nyob rau hauv nej lub siab lawm, xws li kev paub, kev xav, thiab kev ras. Txoj kev paub thiab tej kev xav zoo li no mas yog thiab raug lawm, thiab tej no ua pov thawj qhia hais tias yam uas nej to taub ntawd mus raws li Vajtswv txoj lus, raws li qhov Nws yuav ua rau hauv nej txhua tus, thiab raws li Nws tej kev npaj siab kiag lawm.

Tib neeg feem coob ntseeg Vajtswv kom tau koob hmoov xwb. Tab txawm yog lawv to taub txog qhov tseeb me ntsis los xij, lawv tso tsis tau lawv qhov kev npaj siab tias yuav tau koob hmoov ntawd tseg li. Tus cwj pwm uas tib neeg coj rau qhov tseeb ntawd yog tus zoo li cas? Tib neeg feem coob tsis nyiam qhov tseeb thiab lawv twb tsis quav ntsej txog qhov tseeb ntawd nyob rau hauv lawv lub siab li. Vim qhov tseeb yog ib qho txawv txawv rau tib neeg. Lawv tsis to taub tias qhov tseeb yog dab tsi, thiab haj yam tsis paub tias qhov tseeb los qhov twg los, vim li cas lawv thiaj li yuav tsum tau caum qhov tseeb, vim li cas lawv thiaj li yuav tsum tau lees txais qhov tseeb, vim li cas lawv thiaj li yuav tsum tau xyaum ua qhov tseeb, los sis vim li cas Vajtswv thiaj li qhia txog qhov tseeb ntawd ntau heev. Tag nrho cov lus nug no mas txawv heev rau txhua tus tib neeg, thiab lawv yeej tsis tau xav txog cov lus nug no, thiab yeej tsis tau muab cov lus nug no qhia rau lawv li. Tam sim no uas Vajtswv tab tom ua tes hauj lwm txiav txim nyob rau tiam kawg thiab tau nthuav ntau lo lus tawm, peb tau los ntsib ntau yam uas cuam tshuam rau txhua kis ntawm qhov tseeb nyob rau hauv txoj kev ntseeg Vajtswv. Tsis muaj ib txoj hauv kev tawm li yog tsis nrhiav qhov tseeb, yog li ntawd peb yuav tsum muaj ib txoj kev to taub txog qhov tseeb thiab yuav tsum nyeem Vajtswv cov lus raws li qhov muaj tseeb. Txhua kab lus ntawm Vajtswv txoj lus puav leej yog qhov tseeb, yog li ntawd tib neeg nyias yuav tsum tau paub nyias kom thiaj li to taub txoj lus ntawd. Vim txij thaum yug los txog rau thaum laus, thaum tau hauj lwm ua, thaum sib yuav thiab muaj hauj lwm ruaj khov, txhua yam nyob rau hauv cheeb tsam uas tib neeg nyob—nrog rau tib neeg, xwm txheej, thiab txhua yam uas lawv ntsib thiab txhua yam uas tshwm sim nyob ib puag ncig lawv ntawd—tseeb tiag lawm puav leej yog cuam tshuam rau qhov tseeb xwb, tiam sis tsis muaj ib tug tib neeg pom hais tias tej no yog qhov tseeb li. Vim li ntawd thiaj li hais tias qhov tseeb yog ib qho txawv txawv rau txhua tus. Tib neeg ntiaj teb txhua tus tsis muaj ib tug to taub qhov tseeb li, yog li ntawd qhov no thiaj li kom nej pib ntsib, lees txais, thiab caum qhov tseeb txij li tam sim no mus. Qhov no yog qhov tim tsum. Yog koj tseem tsis tau to taub hais tias kev ntseeg Vajtswv mas yuav tsum tau caum qhov tseeb, thiab tias tsuas yog qhov tseeb xwb thiaj li hloov tau koj, ua rau koj zoo tiav log, coj kev cawm dim los rau koj, thiab ua rau koj los cuag Vajtswv tiag tiag—yog koj tsis tuaj yeem to taub tej no, ces koj yuav tsis nyiam qhov tseeb, koj yuav caum tsis tau qhov tseeb, thiab koj yuav tsis kub siab thaum koj caum. Ib txhia tib neeg hais tias, “Txoj kev ntseeg Vajtswv ntawd tsuav ua lub neej li pawg ntseeg thiab ua yus tes dej num xwb ces zoo txaus lawm, yog li ntawd vim li cas peb thiaj li tseem yuav tsum tau caum qhov tseeb thiab? Peb tsis ua kev phem, thiab peb tsis raws lwm tus qab, thiab haj yam tsis raws cov thawj coj cuav los sis cov tawm tsam Khetos qab los tawm tsam Vajtswv. Peb txhua tus puav leej to taub qee yam ntawm tej kev qhuab qhia txog txoj kev ntseeg Vajtswv thiab txhawb tau peb txoj kev ntseeg Vajtswv mus txog thaum kawg lawm, yog li ntawd peb tsis tas yuav tsum to taub qhov tseeb kom tob ntxiv.” Qhov kev xav no puas yog? (Tsis yog.) Vim li cas thiaj li tsis yog? (Vim tsuas yog thaum tib neeg tau txais qhov tseeb lawm xwb mas Vajtswv thiaj li yuav cawm tau lawv.) Qhov ko yog lawm. Tam sim no ib txhia tib neeg paub tsis tseeb txog qhov tseem ceeb ntawm qhov tseeb uas cawm tib neeg ntiaj teb nyob rau hauv lawv lub siab. Tej zaum lawv tseem tsis tau pom qhov muaj nqis thiab qhov tseem ceeb ntawm qhov tseeb uas dhau los ua tib neeg txoj sia ntawd kom tseeb tseeb, tiam sis qhov kev xav thiab qhov kev paub hauv lawv lub siab no muaj nuj nqis heev. Qhov tseem ceeb yog qhov hais tias seb qhov kev xav thiab qhov kev paub no puas cog tau rau hauv tib neeg lub siab xwb, thiab tias nyob ntawm tib neeg tej kev caum nyob rau yav tom ntej xwb. Qhov uas tam sim no koj muaj qhov kev paub no mas yog ib qho zoo. Nws ua rau muaj kev cia siab tias koj yuav taug txoj kev uas mus tau txoj kev cawm dim. Txoj kev caum qhov tseeb yeej tseem ceeb heev. Piv txwv li, thaum koj xav phem thiab qaug zog lawm, koj puas yuav muaj zog yog tsis muaj qhov tseeb txhawb thiab pab? Koj puas yuav kov yeej qhov koj qaug zog ntawd? Koj puas yuav paub thiab soj ntsuam tau tias qhov uas ua rau koj qaug zog thiab xav phem ntawd yog dab tsi? Koj yeej tsis paub thiab soj ntsuam tsis tau! Thaum koj lam taus lam ua koj tej dej num lawm, koj kho puas tau tus moj yam qias vuab tsuab no yog koj tsis caum qhov tseeb? Koj ua puas tau lub siab ncaj ncees rau Vajtswv txog txoj kev ua koj tej dej num? Yog tsis nrhiav qhov tseeb no, tib neeg puas paub lawv tus kheej thiab kho puas tau lawv tus kheej txoj kev qias vuab tsuab, thiab lawv tus kheej txoj kev khav theeb? Tib neeg ib txwm muaj tej kev xav phem txog Vajtswv thiab ib txwm ntsuas Vajtswv raws li lawv tus kheej tej kev xav phem thiab tej kev xav hauv nruab siab xwb. Yog tsis muaj qhov tseeb no kho puas tau qhov no? Tsis tau. Peb muaj ntau txoj kev xaiv txog ntau yam uas los raug rau peb hauv lub neej. Yog peb tsis to taub qhov tseeb, yog peb tsis paub tias Vajtswv tej kev npaj siab yog dab tsi thiab qhov Nws xav kom peb ua, ces peb yeej tsis muaj txoj kev xyaum ua li. Ces thaum ntawd peb yuav nthuav peb tej moj yam qias vuab tsuab tawm, thiab peb yuav ua yuam kev yam yooj yim heev thiab taug txoj kev yuam kev. Cov lus thiab tej kev qhuab qhia uas tib neeg to taub ntawd kho puas tau tus moj yam qias vuab tsuab uas tib neeg muaj? Yog koj tsis nrhiav qhov tseeb, ces tej zaum koj yuav hais tias nyob rau hauv lub neej mas tsis muaj lub hauv paus ntsiab lus rau txhua yam uas koj ua, tsis muaj kev taug, thiab tsis muaj hom phiaj los sis txoj xub ke li. Yog zoo li no, ces txhua yam uas nej ua ntawd yog tsis mus raws li qhov tseeb tej hauv paus ntsiab lus, yog ib lub cim uas tawm tsam Vajtswv thiab yog ib qho kev ntxeev siab rau Nws, yog li ntawd Vajtswv yuav qias thiab foom tsis zoo rau nej tej kev ua. Yog nej ua neej raws li nej tej moj yam qias vuab tsuab xwb, ces nej yuav tsis muaj ib tug dim li yog nej tsis lees txais Vajtswv txoj kev txiav txim thiab kev rau txim. Yog li ntawd, ua ntej yuav to taub qhov tseeb tiag tiag, txhua tus yuav tau ntsib qee qhov kev txiav txim thiab kev rau txim, qee qhov kev qhuab qhia thiab kev qhuab ntuas. Tej no puav leej yog txhawm rau lub hom phiaj uas pab tib neeg kom tau txais qhov tseeb thiab muab lawv tej moj yam qias vuab tsuab tso tseg xwb.

Txawm nej to taub qee qhov kev qhuab qhia txog txoj kev ntseeg Vajtswv los xij, nej pheej paub tsis meej thaum ntsib txhua yam. Nej tsis paub ua dab tsi li thiab tsis to taub txog Vajtswv tej kev npaj siab, nej tsis paub xyov yuav xyaum ua li cas, thiab txhawj xeeb npaum li cas los yeej daws tsis tau. Nej xav nrhiav kev kawm tiam sis nej tsis paub tias qhov teeb meem yog dab tsi, nej xav nrhiav cov lus teb nyob rau hauv Vajtswv txoj lus, tiam sis Nws txoj lus hais ntau heev thiab nej tsis muaj hom phiaj. Tsis yog pheej zoo li no lod? Qhov no yog ib lub cim uas qhia tias cov ntseeg tshiab tsis paub xyov yuav nrhiav qhov tseeb nyob rau hauv txhua yam li cas. Yog li ntawd, cov lus nug uas nej nug thaum tuaj pe hawm thiab cov lus uas nej qhia ntawd feem ntau tsis cuam tshuam rau qhov tseeb. Qhov no qhia tau hais tias tib neeg feem coob tsis paub xyov yuav xyaum ua qhov tseeb li cas nyob rau hauv lub neej tiag tiag, thiab lawv tsis paub xyov yuav nrhiav qhov tseeb li cas thaum muaj tej xwm txheej los raug rau lawv, thiab lawv haj yam tsis muaj qhov tseeb ua lub hauv paus ntsiab lus thiab lub hom phiaj rau lawv txoj kev xyaum ua. Qhov no puas yog ib qho nyuaj rau txhua tus? Yog koj to taub lub hauv paus ntsiab lus ntawm qhov tseeb thiab to taub nws lub ntsiab tseeb uas nyob rau hauv tej xwm txheej uas los raug rau koj ntawd lawm no, koj puas tseem yuav tsis paub meej li txhua zaus lawm? Koj yuav tsis zoo li ntawd lawm. Tab txawm yog koj muaj qee qhov paub tsis meej los xij, qhov ntawd tsis yog vim koj to taub qhov tseeb ntiav dhau lawm, los sis vim koj paub qhov tseeb tsawg dhau lawm. Koj tsis tuaj yeem nkag siab txog Vajtswv tej kev npaj siab, kho tsis tau koj txoj kev qias vuab tsuab, thiab koj hnov mob hauv koj lub siab. Tam sim no qhov uas nyuaj tshaj plaws rau nej nyob rau hauv txoj kev caum qhov tseeb ntawd yog dab tsi? Puas yog tias nej ntshai thaum kom nej qhia txog lub ncauj lus uas hais txog qhov tseeb? Ntshai tsam nthuav cov lus thiab tej kev qhuab qhia tawm thiab tsis muaj peev xwm hais txog qhov muaj tseeb lod? Thiab haj yam ntshai tsam nej yuav tsis paub ua li cas thaum muaj tej yam tshwm sim rau nej lod? (Yog.) Qhov no yog vim nej tsis muaj qhov tseeb nyob rau hauv nej lub siab. Yog nej muaj, txhua yam no yeej yuav tsis nyuaj rau nej daws li. Ib txhia tib neeg mas tsis paub xyov yuav ua li cas thaum muaj xwm txheej los raug rau lawv. Lawv paub nrhiav qhov tseeb nyob rau hauv Vajtswv txoj lus, tiam sis lo lus teb uas yog ntawd tsis tawm los kiag tam sid, yog li ntawd lawv thiaj li ua raws li lawv lub siab nyiam. Qhov ntawd yog, lawv txaus siab rau lawv tus kheej los ntawm qhov kev to taub ncaj ncaj txog lub ntsiab lus ntawm Vajtswv txoj lus xwb, thiab ua raws li tej kev cai tswj ntawd xwb. Yog lawv hais lawv cov lus thov es lawv lub siab kaj lug thiab ruaj siab, thiab yog lawv nug lawv cov kwv tij thiab cov muam es cov kwv tij thiab cov muam ntawd tsis muaj ib qho kev paub tob uas zoo dua lawv li, ces lawv xav hais tias xyaum ua li no xwb txaus lawm. Tseeb tiag, qhov xyaum ua zoo li no mas nyob deb ntawm tus qauv ntawm qhov tseeb heev, nyob deb qhov muaj tiag ntawm qhov tseeb heev, thiab nyob deb ntawm Vajtswv tej kev npaj siab heev. Qhov no tsis yog lub hauv paus ntsiab lus ntawm txoj kev xyaum ua qhov tseeb. Yog koj xav xyaum ua raws thiab to taub qhov tseeb, ces ua ntej shaj koj yuav tsum xub nrhiav qhov tseeb thaum tej yam tshwm sim rau koj nyob rau hauv koj lub neej txhua hnub. Qhov ntawd yog, koj yuav tsum saib txhua yam kom mus raws li Vajtswv cov lus thiab qhov tseeb; thaum koj to taub lub ntsiab tseeb ntawm qhov teeb meem no meej lawm, ces koj yuav paub tias yuav xyaum ua raws li qhov tseeb tej hauv paus ntsiab lus li cas. Thiab yog koj yeej ib txwm saib txhua yam mus raws li Vajtswv cov lus, ces koj yuav muaj peev xwm pom Vajtswv txhais tes—Vajtswv tej kev ua—nyob rau hauv txhua yam uas tshwm sim nyob ib puag ncig koj. Txawm yuav muaj dab tsi tshwm sim nyob ib puag ncig lawv los xij, ib txhia tib neeg xav hais tias qhov ntawd tsis muaj dab tsi cuam tshuam txog lawv txoj kev ntseeg Vajtswv los sis qhov tseeb li; lawv tsuas ua raws li lawv tus kheej tus yam ntxwv, ua raws li Ntxwgnyoog tej tswv yim xwb. Lawv kawm puas tau tej zaj lus qhia zoo li no? Yeej kawm tsis tau kiag li. Vim li no es thiaj li muaj ntau tus tib neeg uas twb ntseeg Vajtswv los tau kaum los sis nees nkaum xyoo lawm los tseem tsis to taub txog qhov tseeb los sis lub neej txoj sia li. Lawv tsis muaj peev xwm koom nrog Vajtswv nyob rau hauv lawv lub neej txhua hnub, los sis txhua yam uas yuav tshwm sim nyob ib puag ncig lawv raws li Vajtswv cov lus, yog li ntawd thaum twg ib yam dab tsi tshwm sim rau lawv, lawv qhia tsis tau tias qhov ntawd yog dab tsi tiag tiag, thiab lawv tsis muaj peev xwm daws qhov ntawd raws li qhov tseeb tej hauv paus ntsiab lus. Cov tib neeg zoo li no tsis muaj kev to taub lub neej txoj sia. Yog li ntawd, cov tib neeg zoo li no tsis to taub qhov tseeb txog lub neej txoj sia. Ib txhia tib neeg mas tsuas koom siab thaum lawv nyeem Vajtswv cov lus nyob rau hauv kev pe hawm xwb; nyob rau tej lub sij hawm zoo li no mas, lawv muaj peev xwm hais me ntsis txog kev paub, tiam sis lawv siv Vajtswv cov lus ua tsis tau ib yam dab tsi uas tshwm sim rau lawv hauv lub neej tiag tiag li, los sis lawv tsis paub xyov yuav xyaum ua raws li qhov tseeb li cas li, yog li ntawd lawv thiaj li xav hais tias txhua yam uas tshwm sim nyob rau hauv lawv lub neej txhua hnub ntawd tsis muaj kev cuam tshuam rau qhov tseeb, tsis muaj kev sib raug zoo nrog Vajtswv cov lus li. Nyob rau hauv lawv txoj kev ntseeg Vajtswv mas, cuag nkaus li lawv saib Vajtswv cov lus thiab qhov tseeb yam li yog ib qho chaw uas muaj kev paub, yam li nrauj kiag tawm ntawm lawv lub neej txhua hnub thiab cai tawm kiag ntawm lawv tej kev xav txog txhua yam, lawv tej hom phiaj ntawm lub neej, thiab lawv tej kev caum lub neej li lawm. Txoj kev ntseeg Vajtswv uas zoo li no ne ho zoo li cas? Lawv puas yuav muaj peev xwm to taub qhov tseeb thiab to taub qhov muaj tiag? Thaum lawv ntseeg Vajtswv li no lawm, lawv puas yog ib tug uas raws Vajtswv qab? Lawv tsis yog ib tug uas ntseeg Vajtswv tiag tiag, lawv haj yam tsis yog ib tug uas raws Vajtswv qab li thiab. Tag nrho tej teeb meem uas nyob rau hauv lawv lub neej txhua hnub—nrog rau txhua yam uas ntsig txog tsev neeg, kev sib yuav, hauj lwm, los sis lawv tej kev cia siab ntawd—lawv pom tias tsis muaj kev cuam tshuam rau qhov tseeb li, yog li ntawd lawv thiaj li sim siv noob neej tej tswv yim los daws tej ntawd. Qhov ua li no, lawv yeej yuav tsis tau txais qhov tseeb, yeej yuav tsis muaj peev xwm to taub tias qhov Vajtswv xav ua kom tiav nyob rau hauv tib neeg ntawd yog dab tsi, thiab qhov txiaj ntsim uas Nws xav ua kom tiav nyob rau hauv lawv. Vajtswv nthuav qhov tseeb tawm los cawm tau tib neeg, los yaug lawv tus moj yam qias vuab tsuab kom dawb huv thiab hloov lawv tus moj yam qias vuab tsuab, tiam sis lawv tsis paub tias tsuas yog lawv lees txais thiab caum qhov tseeb xwb mas lawv thiaj li yuav muaj peev xwm daws tau lawv tus kheej tus moj yam uas qias vuab tsuab; lawv tsis paub tias tsuas yog thaum lawv paub thiab xyaum ua raws li Vajtswv cov lus nyob rau hauv lawv lub neej txhua hnub lawm xwb mas lawv thiaj li yuav tau txais qhov tseeb li. Cov tib neeg zoo li no tsis yog ruam thiab tsis paub dab tsi li lod? Lawv tsis yog cov tib neeg uas ruam thiab txaus luag tshaj plaws lod? Ib txhia tib neeg mas yeej tsis tau caum qhov tseeb nyob rau hauv lawv txoj kev ntseeg Vajtswv li. Lawv xav hais tias kev ntseeg Vajtswv ces yog mus koom kev pe hawm, kev thov Vajtswv, kev hu nkauj qhuas Vajtswv, kev nyeem Vajtswv cov lus; lawv saib txoj kev ua kev cai ntawm sab kev lis kev cai ntseeg tseem ceeb xwb, thiab lawv tsis xyaum ua raws los sis tsis paub Vajtswv cov lus li. Qhov no yog qhov cov tib neeg ntawm sab kev lis kev cai ntseeg ntawd ntseeg Vajtswv. Thiab thaum tib neeg saib tej yam tseem ceeb npaum li txoj kev ntseeg Vajtswv npaum li txoj kev ntseeg ntawm sab kev lis kev cai ntseeg lawm no, lawv tsis yog cov tsis ntseeg cov lod? Lawv tsis yog cov tsis ntseeg lod? Qhov caum qhov tseeb ntawd mas cheem tsum kom paub ntau tus txheej txheem heev. Muaj ib sab mas yooj yim, thiab kuj muaj ib sab mas nyuaj. Muab hais yooj yim tias, peb tsim nyog tshawb nrhiav qhov tseeb thiab xyaum ua raws thiab ntsib Vajtswv cov lus hauv txhua yam uas tshwm sim puag ncig peb. Kiag thaum koj pib ua qhov no, koj yuav pom ntau thiab ntau ntxiv tias koj cheem tsum muab kom tau thiab caum raws qhov tseeb npaum li cas hauv koj txoj kev ntseeg Vajtswv, thiab tias qhov tseeb mas muaj qab hau heev thiab qhov tseeb yog txoj sia. Vajtswv cawm noob neej kom noob neej thiaj li tau txais qhov tseeb li txoj sia. Txhua tus noob neej uas raug tsim tawm los ntawd yuav tsum lees txais qhov tseeb li txoj sia, tsis yog cov uas ua dej num, cov uas yog thawj coj thiab cov neeg ua hauj lwm, los sis cov ua dej num rau Vajtswv xwb. Vajtswv cov lus taw ncaj qha rau txhua tus noob neej, thiab Vajtswv hais lus rau txhua tus noob neej. Yog li ntawd, txhua tus neeg uas raug tsim tawm los thiab txhua tus noob neej yuav tsum lees txais Vajtswv cov lus thiab qhov tseeb, nrhiav qhov tseeb hauv txhua yam, thiab tom qab ntawd xyaum ua raws li qhov tseeb tej hauv paus ntsiab lus kom lawv thiaj li muaj peev xwm xyaum ua qhov tseeb thiab zwm rau qhov tseeb. Yog hais tias tsuas yog cov thawj coj thiab cov neeg ua hauj lwm thiaj li yuav tsum tau xyaum ua raws li qhov tseeb xwb, ces qhov no yuav cov nyom rau Vajtswv txoj kev npaj siab kiag li lawm, vim qhov tseeb uas Vajtswv nthuav tawm ntawd yog rau txhua tus noob neej, thiab qhov tseeb uas raug muab nthuav tawm ntawd yog txhawm rau lub hom phiaj uas cawm noob neej, tsis yog cawm ob peb tug tib neeg xwb. Yog zoo li no, ces cov lus uas Vajtswv nthuav tawm ntawd tsuas muaj nqis me ntsis xwb. Tam sim no koj puas tau muaj ib txoj kev los caum raws qhov tseeb? Qhov ua ntej tshaj uas yuav tsum muab los xyaum ua thaum caum raws qhov tseeb yog dab tsi? Ua ntej tshaj txhua yam, koj yuav tsum siv sij hawm kom ntau los noj thiab haus Vajtswv cov lus thiab mloog tej lus qhuab qhia thiab kev sib qhia. Thaum koj ntsib ib qho teeb meem, taij thov thiab tshawb nrhiav ntxiv. Thaum nej tau npaj nej tus kheej txhij nrog rau ntau qhov tseeb lawm, thaum nej loj hlob sai, thiab muaj tus yeeb yam lawm, nej yuav muaj cuab kav ua ib teg dej num, ua ib txoj dej num me me, thiab yuav muaj peev xwm mus dhau qee qhov kev sim siab thiab kev ntxias dag. Lub sij hawm ntawd, nej yuav hnov tias nej tau to taub tiag tiag lawm thiab muab tau qee qhov tseeb lawm, thiab nej yuav paub tias cov lus uas Vajtswv hais ntawd puav leej yog qhov tseeb, tias cov lus ntawd yog tej qhov tseeb uas cheem tsum tshaj plaws rau txoj kev cawm cov tib neeg ntiaj teb qias vuab tsuab kom dim, thiab tias cov lus ntawd puav leej yog qhov tseeb ntawm lub neej txoj sia uas tus Tswv Tsim uas tsuas yog tib tug xwb muab los. Tam sim no, nej tsis muaj kev ntsib kev pom; nej tsuas muaj ib qho kev ntshaw me ntsis nyob rau hauv nej lub siab xwb. Nej xav hais tias Vajtswv cov lus mas tob heev, thiab xav tias cov lus ntawd muaj ntau yam uas nej ua tsis tau, thiab muaj ntau qhov tseeb uas nej tsis nkag siab. Lub ntsiab tseeb ntawm qee yam yeej tseem paub tsis tau meej, thiab nej xav hais tias nej txoj kev to taub txog qhov tseeb ntawd mas ntiav heev. Tsuas yog hais tias nej muaj txoj kev ntshaw zoo li no thiab lub zog zoo li no nyob rau hauv nej lub siab xwb, tiam sis qhov nej yuav tau txais qhov tseeb thiab tsis tau ntawd yog nyob ntawm qhov seb nej yuav xyaum ua thiab caum qhov tseeb ntawd li cas nyob rau yav tom ntej.

Nyob rau hauv tes hauj lwm txiav txim uas nyob rau tiam kawg ntawd, muab xav hais tias yog Vajtswv tsuas nthuav qee qhov tseeb uas yooj yooj yim tawm xwb: tsis muaj dab tsi tob tob, thiab haj yam tsis muaj dab tsi ntau cuam tshuam rau txoj kev txiav txim thiab kev muab tib neeg nthuav tawm, tiam sis tsuas muaj ib co lus tsawg tsawg raws li qhov uas tib neeg lees txais tau thiab qhov lawv lub siab to taub xwb—tsuas yog ib co lus uas cog lus thiab foom koob hmoov los sis ib co lus ntuas xwb. Ces tab txawm yog tib neeg lees txais cov lus no los, lawv puas yuav tau txais txoj kev cawm dim? Saib qhov piv txwv no. Piv txwv li Vajtswv cia li hais tias, “Txoj kev qias vuab tsuab uas nyob rau hauv nej txhua tus ntawd mas qias vuab tsuab heev. Nej txhua tus puav leej tsis muaj qhov tseeb, thiab nej txhua tus puav leej tsis ua lub siab ncaj ncees rau Kuv. Nej tus yam ntxwv lub ntsiab tseeb dhau los ua Ntxwgnyoog tus yam ntxwv lawm; nej dhau los ua cov Ntxwgnyoog uas ua neej nyob lawm. Nej ua yeeb ncuab rau Kuv, thiab nej tsis nyiam qhov tseeb.” Ces tom qab ntawd Nws hais rau tib neeg hais tias, “Cia li mus xav!” thiab hais kiag tam sim ntawd lawv qab hais tias, “Tus uas nyiam qhov tseeb yog tus tau koob hmoov. Tus uas ua lub siab ncaj ncees rau Kuv yuav ua tau raws li Kuv tej kev npaj siab, taug tau txoj kev kom mus txog thaum kawg, thiab tau txais raws li Kuv lo lus cog tseg” no. Tib neeg puas yuav ntxhov siab yog Vajtswv cia li qhia lawv li no? Lawv puas yuav siv zog rau qhov tseeb? Tib neeg yuav xav li cas? “Peb twb tau nyeem Vajtswv cov lus tag nrho lawm, thiab txawm peb txhua tus puav leej muaj tej moj yam qias vuab tsuab los xij, peb tsis yog cov tib neeg phem thiab yuav tsis tawm tsam Vajtswv. Tsuas yog hais tias peb muaj tej moj yam uas ntxeev siab, coj tus cwj pwm uas qias vuab tsuab thiab tsis zoo, thiab nyiam ua raws li tej kev ntiaj teb xwb. Tam sim no uas peb to taub qee qhov tseeb thiab thim xav thiab paub peb tus kheej lawm, peb yeej yuav tso tau tej uas qias vuab tsuab no tseg xwb xwb li.” Puas muaj ntau tus tib neeg coj tus yam ntxwv no? Lawv xav hais tias qhov to taub txoj kev qhuab qhia txog txoj kev ntseeg Vajtswv ntawd ces yog to taub qhov tseeb lawm, yog li ntawd qhov no mas phom sij heev. Cov uas tshaj tawm cov lus thiab tej kev qhuab qhia yam khav theeb ntxiag ntawd mas thaum ib qho kev sim siab los raug rau lawv, lawv ntog kiag tam sid thiab raug muab nthuav tawm kiag lawm. Yog tsis caum qhov tseeb thiab tsis lees txais txoj kev txiav txim thiab kev rau txim no, tso puas tau tus moj yam qias vuab tsuab tseg? Yeej tso tsis tau li. Nej yuav tsum paub tseeb hais tias tam sim no sij hawm twb yuav tag lawm, es yog nej nyiaj tsis taus kev txom nyem thiab tiv tsis taus kev txom nyem kom tau txais qhov tseeb, ces qhov ntseeg Vajtswv raws li tej kev xav phem thiab tej kev xav hauv nruab siab ntawd yuav nkim nej lub sij hawm xwb. Thaum txoj kev txom nyem loj los, ces tab txawm yog nej xav caum qhov tseeb los nej yuav tsis muaj sij hawm caum lawm, thiab nej yuav plam nej lub hwv tsam uas los tau txoj kev cawm dim hlo li lawm. Txawm tam sim no nej ntseeg Vajtswv los xij, nej tsis to taub Vajtswv tej kev npaj siab. Nej puas paub tiag tiag hais tias vim li cas Vajtswv thiaj li nthuav qhov tseeb tawm, thiab ua tes hauj lwm txiav txim? Txhua lo lus, txhua lub ncauj lus, txhua qhov tseeb uas Vajtswv nthuav tawm ntawd mas tseem ceeb thiab muaj txiaj ntsim heev rau nej. Txawm niaj hnub no xyov nej puas pom, puas paub, los sis puas hnov, thiab txawm tam sim no nej twb paub ntau npaum li cas lawm los xij, tom qab nej tau ntsib tau pom li peb mus rau tsib xyoos lawm, nej yuav paub hais tias Vajtswv cov lus niaj hnub no mas muaj tseeb, thiab qhov Vajtswv nthuav cov lus no tawm mas zoo npaum li cas! Yog Vajtswv tseem ua zoo rau tib neeg li Nws ua nyob rau Tiam Hmoov Hlub, uas muab lawv hu ua “tus me nyuam yaj uas nyob rau hauv Nws lub xub ntiag” thiab tus yaj uas ploj lawm uas Nws yuav muab cuaj caum cuaj tus tso tseg es mus nrhiav ntawd, ces tib neeg yuav xav hais tias, “Vajtswv txoj kev hlub tshua thiab lub siab zoo uas muaj kev hlub ntawd mas loj heev; Vajtswv txoj kev hlub tib neeg mas tob heev!” Yog tib neeg pheej xav txog Vajtswv thiab saib Vajtswv zoo li no tas li xwb, ces lawv yuav tsis nrhiav qhov tseeb tiag tiag, lawv yuav tsis los cuag Vajtswv, lawv yuav tsis zwm rau Vajtswv, thiab lawv yuav tsis muaj lub siab hwm Vajtswv. Yog tsis muaj ib txoj kev to taub txog Vajtswv tiag tiag, ces yuav tso tsis tau tib neeg tus moj yam qias vuab tsuab tseg; lawv yuav coj ib tug cwj pwm uas saib tsis taus Vajtswv thiab qhov tseeb, thiab lawv yuav tawm tsam Vajtswv li cov dab thiab Ntxwgnyoog tawm tsam. Yog hais tias zoo li ntawd, tib neeg yeej yuav tsis to taub tias qhov tseeb yog dab tsi, lawv yeej yuav tsis to taub tias qhov lawv ntseeg thiab raws Vajtswv qab ntawd yog dab tsi thiab qhov nrhiav kom tau qhov tseeb ntawd yog dab tsi li. Qhov no muaj tseeb. Yog Vajtswv tsis nthuav cov lus no tawm; yog Nws tsis rau txim thiab txiav txim rau txhua tus tib neeg thiab hais cov lus hnyav zoo li no rau txhua tus, ces tib neeg yuav xav hais tias qhov ntseeg Vajtswv ntawd txhais hais tias lawv twb tau txais qhov tseeb lawm, tias qhov ntseeg Vajtswv ntawd yog kom tom qab ntawd raug coj mus rau hauv lub nceeg vaj thiab muaj hwj chim li ib tug vajntxwv xwb. Ib txhia tib neeg hais tias, “Tus tib neeg zoo li kuv yuav luag yog ib tug thawj tub rog pawg pua!” Lwm tus hais tias, “Kuv tsis thov dab tsi ntau. Nyob rau hauv lub nceeg vaj, kuv zov rooj vag los sis cheb kev xwb los yeej tau lawm!” Qhov no yog txhua tus tib neeg uas ntseeg Vajtswv thawj qhov kev npaj siab, kev xav, thiab kev ntshaw. Vajtswv tau hais ntau yam uas muab tib neeg tej kev xav phem thiab tej kev xav hauv nruab siab, lawv tej kev ntshaw lwj ntshaw liam, thiab lawv tus moj yam qias vuab tsuab ntawd nthuav tawm yam ntxaws heev. Tsis muaj ib yam dab tsi uas tib neeg xav es mus raws li qhov tseeb los sis haum rau Vajtswv, thiab tsis muaj ib yam dab tsi uas tib neeg cia siab rau los sis xav tau es mus raws li Vajtswv tej kev npaj siab li. Tej ntawd puav leej cov nyom Vajtswv nkaus xwb. Thaum tib neeg ntseeg Vajtswv, lawv raug Vajtswv cov lus uas txiav txim thiab rau txim, raug Vajtswv cov lus uas muab tib neeg tus yam ntxwv lub ntsiab tseeb nthuav tawm, raug cov lus uas tsis mus raws li tib neeg tej kev xav phem, thiab raug Vajtswv txoj kev ua hauj lwm uas tsis mus raws li tib neeg tej kev xav phem thiab tej kev xav hauv nruab siab. Txawm ntau tus tib neeg lees paub hais tias Vajtswv cov lus yog qhov tseeb, thiab lawv txaus siab hlo ua raws li Vajtswv tes hauj lwm thiab lees txais Vajtswv txoj kev txiav txim thiab kev rau txim los xij, qhov ua kom tau raws li Vajtswv tej kev cheem tsum ntawd mas nyuaj heev. Thaum hais txog qhov kev caum qhov tseeb, mas ntau tus tib neeg tsis muaj zog li, thiab thaum hais txog txoj kev kawm txog qhov tseeb, mas lawv tsaug zog thiab tsis cuab pob ntseg mloog li. Tiam sis thaum hais txog tej uas tsis muaj neeg paub, koob hmoov, thiab tej lus cog tseg, mas lawv kub siab heev. Yog ua li cas lawm? Nyob rau hauv lawv nruab siab, tib neeg tsis nyiam qhov tseeb. Lawv pom hais tias txoj kev caum qhov tseeb ntawd mas muaj teeb meem heev, siv zog heev, mob siab heev, thiab tiv kev txom nyem loj heev. Yog kev caum qhov tseeb yooj yim ib yam li kev nyeem ib phau ntawv qhia hauv tsev kawm ntawv theem pib los sis ib co lus paj huam uas ntxias me nyuam yaus no, ib txhia tib neeg yuav nyiam qhov tseeb ntawd me ntsis, vim yuav tsis nyuaj, yooj yim, thiab tsis tas yuav tiv kev txom nyem los sis siv dag zog ntau li. Tam sim no, nws tsis yog li ntawd. Kev caum qhov tseeb tsis yooj yim npaum li ntawd. Tsis yog hais tias, yog tib neeg muaj peev xwm txaus los nyeem Vajtswv txoj lus thiab to taub txoj lus ntawd xwb, ces lawv yuav cia li nkag tau mus rau hauv qhov tseeb qhov muaj tiag; kev to taub cov lus thiab tej kev qhuab qhia ntawd tsis tau txhais hais tias nkag tau mus rau hauv qhov tseeb qhov muaj tiag lawm. Ib txhia tib neeg mas muaj zog heev rau lawv txoj kev ntseeg Vajtswv yog li ntawd lawv thiaj li muab sau cia thaum pe hawm thiab thaum mloog lus qhuab qhia thiab kawm. Tiam sis tom qab ntawd ib ntus, lawv ua tib zoo xav thiab pom hais tias tsis tau dab tsi los ntawm qhov ua li ntawd li: Tab txawm yog lawv xav tau los, lawv hnov qab tej ntawd tag nrho thiab tsis nco ib yam dab tsi li lawm, yog li ntawd lawv thiaj li paub hais tias kev tau txais qhov tseeb mas tsis yooj yim, thiab tsuas yog thaum ntawd xwb lawv thiaj li to taub hais tias kev ntseeg Vajtswv tsis yog ib qho yooj yim. Lwm tus tib neeg xav hais tias lawv tau txais thiab to taub ntau yam heev tom qab pe hawm lawm, tiam sis tom qab pw tsaug zog ib hmos xwb lawv hnov qab tej ntawd tag nrho li lawm, uas yeej tsis txawv qhov tsis tau pe hawm li. Thiab lwm tus haj tseem mloog zoo li Vajtswv txoj lus qhia lawv thiab ua rau lawv paub tseeb tom qab nyeem Vajtswv txoj lus lawm. Lawv zoo siab heev rau lawv tus kheej, tiam sis tom qab nrog cov tsis ntseeg tham li ib ntus lawm, lawv lub siab ua ywj fab ywj fwj, thiab thaum lawv mus tsev mus thov Vajtswv, lawv mloog zoo li tsis muaj Nws li lawm. Lawv hnov qab txhua yam txog txoj kev caum qhov tseeb, kev hloov lawv tej moj yam, thiab qhov Vajtswv cawm lawm. Qhov no yog vim lawv lub siab me dhau lawm thiab tsuas to taub qee cov lus thiab qee qhov kev qhuab qhia xwb. Vajtswv txoj lus tseem tsis tau tuaj cag rau hauv lawv, uas ua pov thawj qhia hais tias lawv tseem tsis tau muaj ib qho chaw rau Vajtswv nyob hauv lawv lub siab, yog li ntawd, thaum daws tej teeb meem sab nraud, Vajtswv tsis yog tus kav lawv lub siab. Qhov tau ntsib tau pom Vajtswv tes hauj lwm ntawd tsis yog ib qho yooj yim. Yog tsis tau ntsib tsis tau pom qee qhov kev sim siab, kev ua tsis tiav, thiab tej yam tsis zoo, ces tib neeg yeej yuav tsis tau txais txiaj ntsim li, thiab qhov kev xyaum nco nkaus xwb yuav siv tsis tau. Niaj hnub nim no, tib neeg feem coob tsuas pib to taub qee qhov tseeb tom qab ntseeg tau ob peb xyoos lawm xwb. Tshwj xeeb tshaj yog tom qab uas tau ntsib tau pom qee yam tsis zoo thiab qee qhov uas ua tsis tiav lawm, mas lawv mam li paub qhov tseem ceeb ntawm txoj kev caum qhov tseeb, thiab tsuas yog thaum ntawd xwb lawv thiaj li pib mob siab rau txoj kev nyeem Vajtswv txoj lus, txoj kev kawm txog qhov tseeb, thiab txoj kev xyaum ua qhov tseeb. Tsuas yog thaum ntawd xwb lawv thiaj li pib nkag mus rau hauv qhov muaj tiag.

Ib txhia tib neeg hais tias, “Vim li cas thaum muaj qee yam kev nyuaj los sis qee qhov teeb meem, mas kuv mloog zoo li kuv raug txwv thiab tsis paub yuav ua li cas, thiab kuv mloog zoo li kev ntseeg Vajtswv mas nyuaj heev? Vim li cas thaum muaj tej kev nyuaj, kuv cia li qaug zog thiab tsis muaj zog ntseeg Vajtswv li lawm? Vim li cas muaj qee zaus kuv tsis xav mus koom tej rooj sib tham los sis tsis xav nyeem Vajtswv txoj lus li, tiam sis yog kuv tham txog tej yam ntawm cov tsis ntseeg, mas kuv kub siab heev?” Qhov no yog ua li cas lawm? Tseeb tiag, raws li saib tib neeg tus yam ntxwv lub ntsiab tseeb mas, nws yog vim tib neeg tsis nyiam qhov tseeb xwb. Puas muaj ib qho chaw rau Vajtswv nyob hauv lawv lub siab? Vajtswv puas nyob hauv lawv lub siab? Tsis nyob, yeej tsis nyob. Yog koj tsis muaj Vajtswv nyob rau hauv koj lub siab thiab tsis muaj chaw rau Vajtswv nyob, ces qhov ntawd ua tau pov thawj qhia hais tias koj tsis muaj qhov tseeb nyob rau hauv koj lub siab, koj tsis to taub qhov tseeb ib qho li, thiab koj yuav tsis xyaum ua qhov tseeb ib qho li. Yog li ntawd, thaum hais txog qhov ua tib zoo xav txog Vajtswv txoj lus thiab qhov xyaum ua qhov tseeb ntawd mas, tib neeg tsis muaj zog thiab tsis muaj txoj hauv kev li. Yog muaj neeg hais kom koj mus khwv nyiaj thiab qhia rau koj hais tias koj yuav khwv tau nyiaj ntau los ntawm qhov ua ib yam dab tsi, mas koj yuav ua txhua yam li ua tau kom kov yeej txhua yam kev nyuaj kom tau nyiaj, thiab koj yuav khwv li ntawd mus ntxiv yuav tsis ntshai tsam khwv tsis tau nyiaj li. Muaj tej uas ua rau koj nyiam, koj lub siab muaj tej uas koj nyiam, tej uas koj nyiam ntawd los rau hauv koj lub siab ua ntej, thiab koj xav hais tias nyiaj thiab tej uas koj nyiam ntawd mas tseem ceeb heev thiab cia li muab tso tseg yam yooj yooj yim tsis tau, yog li ntawd txawm yuav zoo li cas los xij, koj yuav ua txhua yam li koj ua tau kom tau raws li koj tus kheej tej kev ntshaw thiab tej hom phiaj. Yog li ntawd, yog koj muab qhov kev tshawb nrhiav qhov tseeb los ua qhov tseem ceeb thib ib nyob rau hauv koj lub neej, ces Kuv ntseeg hais tias koj yeej yuav muaj ib txoj hauv kev, thiab koj yeej yuav muaj sij hawm xwb, thiab haj yam tsis muaj ib qho kev nyuaj uas thaiv koj kom txhob tshawb nrhiav qhov tseeb thiab txhob xyaum ua qhov tseeb li. Nej puas muaj qhov kev txiav txim siab zoo li no? Qhov ntawd zoo li niam thiab txiv uas yuav them txhua tus nqi kom nkawv cov me nyuam txaus siab. Thaum cov me nyuam hais tias qhov mus kawm ntawv nyob rau tsev kawm qib siab ntawd mas raug nyiaj ntau npaum li no, mas yog tsev neeg tsis muaj nyiaj ntau npaum li ntawd, ces cov uas yog niam thiab txiv yuav mus qiv nyiaj, khaws nyiaj, los sis nrhiav kev mus ua lag luam los sis ua tes hauj lwm uas tsis tshua nyiam yog lawv qiv tsis tau nyiaj. Txawm lawv yuav raug kev txom nyem npaum li cas los xij, lawv yuav khaws nyiaj kom txaus mus them rau lawv cov me nyuam kawm ntawv nyob rau tsev kawm qib siab, txhawb kom lawv cov me nyuam vam meej, thiab kom lawv cov me nyuam muaj lub hwv tsam zoo. Yog nej yeej muaj qhov kev txiav txim siab zoo li no nyob rau hauv nej txoj kev tshawb nrhiav qhov tseeb tiag tiag, ces Kuv xav hais tias yuav tsis muaj qhov kev nyuaj uas nej yuav kov tsis yeej li, tshwj yog nej kev xav tsis zoo txaus los sis muaj lub hlwb tsis meej pem lawm xwb. Tshwj yog koj yug los es yeej tsis txawj tsis ntse lawm xwb, yog tsis yog li ntawd mas koj yeej ua tau li tus tib neeg uas muaj siab muaj ntsws ua tau, thiab txhua qhov kev nyuaj tsis yog ib qho nyuaj li. Vim txoj kev tshawb nrhiav qhov tseeb tsis yog ib yam uas tib neeg xav hauv nruab siab xwb ces cia li tau; yuav tsum muaj Vajntsujplig Dawb Huv tes hauj lwm, es tib neeg cia li koom tes xwb. Tsuav peb muaj lub siab los tshawb nrhiav qhov tseeb xwb, ces Vajntsujplig Dawb Huv yuav coj peb kev, pab peb thiab qhia peb txhua lub sij hawm, cia peb hla dhau txhua qhov kev nyuaj thiab to taub qhov tseeb uas peb tsis to taub. Rau qhov yam uas tib neeg ua tsis tau Vajtswv ua tau, thiab tib neeg tsis muaj dab tsi li; yog Vajtswv tsis ua hauj lwm, ces tag nrho tej uas tib neeg siv zog thiab tawm dag tawm zog ntawd tsis muaj qab hau dab tsi li.

Nyob rau Tiam Hmoov Hlub, tib neeg kuj hais tias lawv ntseeg Vajtswv thiab raws Vajtswv qab thiab, tiam sis lawv lub hom phiaj yog nkag mus rau hauv ntuj ceeb tsheej xwb. Lawv tsis hais txog qhov kev xyaum ua raws li Vajtswv txoj lus thiab qhov kev ntsib kev pom Vajtswv txoj lus, thiab lawv tsis paub tias qhov dim ntawd yog txhais li cas li. Lawv tsuas yog ua raws li tej kev cai tswj, coj raws li tej kev cai ntawm sab kev lis kev cai ntseeg thiab nyeem phau Vajluskub xwb, ces tom qab ntawd lawv muaj ib qho kev cia siab me ntsis hais tias thaum lawv tuag lawv muaj feem nkag mus rau hauv lub ntuj ceeb tsheej tsis ntau los tsawg lawm. Theem hauj lwm ntawm tiam kawg no mas tsis yooj yim, thiab txhua yam ntawm Vajtswv tes hauj lwm ntawd mas yog qhov muaj tiag uas peb yuav tsum tau tiv kev txom nyem tiag tiag los nrhiav kom tau ntsib tau pom tiag tiag, kom peb thiaj li tau txais qhov tseeb los ntawm cov lus uas Vajtswv nthuav tawm. Yog tib neeg txoj kev ntseeg tseem zoo li cov uas nyob rau Tiam Hmoov Hlub, uas tsuas tuaj sib sau ua ke txhua lub lim tiam, nyeem Vajluskub, thiab thov Vajtswv, hu nkauj, thiab qhuas Vajtswv ua ntej tos kom raug coj mus rau saum lub ntuj ceeb tsheej los sis tos kom tau nce mus rau saum lub ntuj ceeb tsheej thib peb xwb no, tib neeg khav theeb npaum li cas lawm! Cov tib neeg ntiaj teb uas qias vuab tsuab yeej zoo li no. Txawm Vajtswv yuav ua hauj lwm li cas los xij, tsuav Nws cog lus rau tib neeg xwb, ces tib neeg yuav tuav rawv lo lus cog tseg ntawd, muab lo lus cog tseg ntawd ceev yam li yog ib txoj kev cai tswj tas li thiab yeej tsis nrhiav Vajtswv tes hauj lwm los sis Nws tej kev npaj siab ib qho me me li, tiam sis tsuas xav kom raug coj mus rau saum lub ntuj ceeb tsheej xwb. Tib neeg tsis paub tias lawv yog dab tsi, lawv ua npau suav txog tej yam zoo zoo thiab ntshaw mus rau qhov siab siab. Lawv tsis muaj leej twg xav hais tias lawv yog Ntxwgnyoog hom li, thiab lawv haj yam tsis xav tias lawv yog yam khoom uas txawj puas ntsoog. Lawv txhua tus puav leej xav hais tias lawv ntseeg Vajtswv tiag tiag, raug kev txom nyem ntau heev thaum ua lawv tej dej num, thiab yeej tsis tau ntxeev siab rau Vajtswv li, yog li ntawd Vajtswv twb cawm tau lawv lawm thiab yeej yuav tau nkag mus rau hauv lub nceeg vaj saum ntuj ceeb tsheej xwb. Qhov kev xav li no tsis yog lawm, thiab lawv yeej tsis to taub qhov tseeb kiag li. Tshwj xeeb tshaj yog thaum tib neeg pib ntseeg Vajtswv, lawv tsis mloog lus, tsis txaus siab, thiab khav theeb heev, saib txhua tus tsis khuab qhov muag thiab tsis xav txog leej twg li—tab txawm Vajtswv los twb tsis khuab qhov muag thiab tsis xav txog—tias zoo npaum lawv tus kheej. Tab txawm yog tib neeg twb lees txais Khetos lawm los xij, qhov ntawd tsis tau txhais hais tias lawv tuaj yeem lees txais yam uas Khetos hais los sis txhua yam uas Khetos tau ua lawm. Lawv tsuas lees txais Vajtswv theem hauj lwm no los ntawm lub npe xwb, thiab lees txais tus Vajtswv uas yug los ua neeg ntawd los ntawm lub npe xwb, tiam sis qhov ntawd tsis tau txhais hais tias lawv tsis muaj tej kev xav phem, tsis muaj tej kev xav hauv nruab siab, thiab tsis muaj kev tawm tsam yam uas Vajtswv tau ua lawm. Ib txhia tib neeg mas kub siab thiab zoo siab heev thaum lawv pom Khetos, zoo siab heev hauv lawv lub siab thiab xav hais tias lawv tsis tau ua neej nyob yam tsis muaj qab hau dab tsi. Txawm li cas los xij, vim lawv tsis muaj qhov tseeb thiab tsis paub Vajtswv, lawv thiaj li muaj tej kev xav phem thaum lawv pom Khetos hais lus, xav phem thaum lawv pom Khetos ua txhua yam, thiab xav phem txog tus cwj pwm uas Khetos coj rau tib neeg; lawv haj tseem muaj tej kev xav phem, tej kev xav, thiab tej tswv yim txog yam uas Khetos noj thiab hnav thiab txhua qhov uas Nws lub ntsej muag nthuav tawm los sis piav qhia ntawd thiab. Qhov no yog dab tsi? Qhov no yog qhov hais tias cov vajtswv uas tib neeg xav hauv nruab siab ntawd mas txawv tus Vajtswv tseeb, rau qhov cov tib neeg uas yeej ib txwm muaj tej moj yam qias vuab tsuab thiab tej yam ntxwv khav theeb ntawd mas, qhov tsis muaj tej kev xav phem, tsis tawm tsam, thiab tsis txiav txim rau tus Neeg Leej Tub uas yug los ua neeg ntawd mas yeej tsis muaj hnub li. Yog yus tsis paub Vajtswv lub hwj chim qaum ntuj, mas qhov los zwm rau Vajtswv ntawd mas nyuaj thiab qhov los hlub Nws thiab hwm Nws ntawd mas haj yam nyuaj. Tiam sis cov tib neeg uas tau ntsib tau pom Vajtswv tes hauj lwm tau ntau lub xyoo lawm ntawd yuav ua li cas paub tus Vajtswv uas yug los ua neeg thiab yuav coj li cas rau tus Vajtswv uas yug los ua neeg ntawd, tshwj xeeb tshaj yog cov uas twb tau hmoog Vajtswv tej lus qhuab qhia thiab kev qhia ntau heev lawm? Lawv tus kheej tau txeev muaj kiag qhov uas muaj tej kev xav phem txog Vajtswv ntawd los mus rau qhov uas muaj txoj kev paub txog Vajtswv lawm, qhov kev ntxeev siab thiab tawm tsam los mus rau qhov kev zwm rau tiag tiag, thiab lawv tus kheej tau ntsib tau pom kiag txhua yam uas Vajtswv ua, txhua lo lus uas Nws hais, thiab txhua yam uas Nws ua ntawd puav leej muaj nyob rau hauv qhov tseeb tej hauv paus ntsiab lus. Tib neeg yuav tsum tsis txhob muaj tej kev xav phem, thiab haj yam tsis txhob muaj txoj kev tawm tsam los sis kev ntxub nyob rau hauv lawv lub siab. Tom qab tau ntsib tau pom li ob peb lub xyoos, thaum tib neeg to taub qhov tseeb me ntsis lawm, lawv yuav coj raws li qhov tseeb ntawd yam yog heev, thiab thaum lawv muaj qhov tseeb nyob rau hauv lawv me ntsis yam li yog lawv txoj sia thiab tau txais tej hauv paus ntsiab lus ntawm txoj kev xyaum ua lawm, ces lawv yuav tsis ua ib yam dab tsi ruam ruam lawm. Cov uas yog cov ntseeg tshiab thiab cov uas tsis muaj kev paub txog tej no mas nquag ntxeev siab rau Vajtswv thiab tawm tsam Nws heev, thiab lawv nquag ua tej yam uas ruam ruam thiab tsis xyuam xim heev. Ib txhia tib neeg mas txiav txim thiab tuam mom Vajtswv ces tom qab ntawd ntog kiag li lawm; hos lwm tus mas tab kaum thiab cuam tshuam pawg ntseeg tes hauj lwm tas li li, ces lawv raug muab tshem tawm mus lawm. Puas yog tam sim no nej txhua tus puav leej muaj tej kev xav phem thiab tej kev xav hauv nruab siab txog Vajtswv puv npo xwb? Nej puas xav hais tias txoj kev ntseeg tus Vajtswv uas yug los ua neeg ntawd mas nyuaj dhau lawm? Ib txhia tib neeg hais tias, “Thaum peb swm qhov ntseeg tus Tswv lawm, mas yooj yim heev. Peb tsuas yog tuaj sib sau ua ke, mloog lus qhuab qhia, thiab thov tus Tswv rau txhua yam xwb; tsis muaj leej twg hais kom peb xyaum ua qhov tseeb thiab zwm rau Vajtswv li, thiab tsis muaj leej twg coj peb xyaum ua kom paub tus Tswv cov lus thiab tshawb nrhiav qhov tseeb. Cov xib fwb thiab cov qhuab qhia ntawd tsuas qhia Vajluskub xwb, thiab peb yuav to taub li cas los yeej tau. Tiam sis tam sim no uas peb ntseeg Vajtswv Tus Uas Muaj Hwj Chim Loj Kawg Nkaus lawm, muaj ntau qhov tseeb uas Nws tau nthuav tawm uas peb xav hais tias xyaum ua nyuaj heev, thiab nkag mus rau qhov muaj tiag nyuaj heev!” Nej puas txeev xav hais tias yog nej tseem ntseeg Vajtswv li nej txeev ntseeg tus Tswv ntawd no, nej puas yuav tau txais qhov tseeb thiab txoj sia? Nej puas yuav tau txais kev cawm dim los ntawm Vajtswv? (Peb tsis tau.) Qhov uas nej paub li no qhia hais tias nej nce qib lawm.

Txoj kev ntseeg Vajtswv ntseeg tsis tau raws li tej kev xav hauv nruab siab los sis raws li tej kev xav phem, thiab haj yam ntseeg tsis tau raws li qhov yus nyiam. Yog koj ntseeg Vajtswv raws li qhov koj nyiam uas nyob ib pliag los sis raws li qhov kub siab xwb, ces koj ua siab txias txias ntshe yuav zoo dua thiab ua tib zoo xav seb koj puas xav ntseeg mus ntxiv lawm, seb koj puas xav tshawb nrhiav qhov tseeb tiag tiag, seb koj puas yog ib tug ntseeg Vajtswv tiag tiag, seb koj puas tau txiav txim siab los taug txoj kev ntseeg Vajtswv, thiab seb koj puas tau txiav txim siab los caum qhov tseeb. Vim li cas thiaj li hais txog cov ntsiab lus no? Vim qhov peb ntseeg tam sim no yog tus Vajtswv uas yug los ua neeg, thiab qhov Vajtswv yug los ua neeg ntawd txhais hais tias Nws los saum ntuj ceeb tsheej los rau hauv ntiaj teb thiab los ua ib tug tib neeg tiag tiag, Nws lub ntsej muag zoo ib yam nkaus li tib neeg lub, tiam sis Khetos yog leej twg, Vajtswv Tus Kheej yog leej twg, thiab leej twg tsis yog ib tug tib neeg yooj yim. Tseeb tiag lawm qhov Vajtswv yug los ua neeg ntawd yog los ua tes hauj lwm txiav txim rau tib neeg thiab ntxuas tib neeg kom dawb huv, tseeb tiag lawm yog los nthuav ntau los lus tawm, ua ntau yam hauj lwm, thiab xaiv ntau tus tib neeg, thiab tseeb tiag lawm yog Nws nthuav Nws tes hauj lwm thiab Nws txoj moo zoo mus kom dav. Txhua qhov me me ntawm tes hauj lwm uas muaj qab hau no qhia tseeb hais tias Vajtswv txoj kev xav los cawm tib neeg thiab ua kom tib neeg zoo tiav log ntawd mas yog ua kom tib neeg tau ntsib tau pom Nws cov lus thiab tes hauj lwm, kom lawv thiaj li tau txais qhov tseeb, thiab zwm rau Vajtswv thiab pe hawm Vajtswv tiag tiag. Qhov yog qhov uas Vajtswv xav kom ua tiav. Txij thaum nej pib lees txais Vajtswv tes hauj lwm los txog rau tam sim no ntawd, tej zaum nej twb tau ntsib tau pom qee yam lawm, txawm nej xav hais tias tej ntawd zoo heev, los sis txawm qhov muag pom tej ntawd los sis tib neeg lub siab tuaj yeem to taub tej ntawd los xij; muab hais luv luv hais tias, Vajtswv ua tib zoo ua txhua yam, ua hauj lwm nyob rau hauv peb, nrog peb nyob, thiab nyob ib puag ncig peb, kom peb thiaj li pom thiab kov tau. Yog li ntawd, txoj kev tshawb nrhiav qhov tseeb mas yog ib qho kev kawm uas muaj qab hau heev, thiab peb yuav tsum nrhiav thiab xyaum ua qhov tseeb nyob rau hauv txhua yam uas los raug rau peb, vam khom rau peb lub zog los koom tes kom tau txais qhov tseeb. Txoj kev tshawb nrhiav qhov tseeb ntawd tsis yog li tib neeg xav hauv nruab siab. Tib neeg xav hais tias nyeem Vajtswv cov lus thiab to taub cov lus ntawd lub ntsiab lus ncaj ncaj xwb ces yog to taub qhov tseeb lawm, thiab tias tsuav lawv hais tau lus zoo xwb, ces yog lawv xyaum ua qhov tseeb lawm. Nws tsis yooj yim npaum li ntawd. Txoj kev tshawb nrhiav qhov tseeb mas peb yuav tsum tau nrhiav thiab lees txais qhov tseeb tiag tiag, yuav tsum tau raug kev txom nyem thiab tiv kev txom nyem, yuav tsum tau ntsib tau pom, yuav tsum tau nrhiav, ua tib zoo xav, kawm, xyaum ua, thiab yuav tsum tau siv zog ua hauj lwm nyob rau hauv lub neej tiag tiag. Tsuas yog ua li no xwb mas peb thiaj li yuav maj mam nkag tau mus rau hauv Vajtswv txoj lus thiab qhov tseeb thiab tau txais los ntawm Vajtswv txoj lus thiab qhov tseeb. Muaj ib hnub, thaum koj to taub tias qhov tseeb yog dab tsi, thiab lub ntsiab tseeb ntawm qhov tseeb ntawd yog dab tsi lawm, koj yuav paub hais tias cov lus uas tus Vajtswv yug los ua neeg hais ntawd mas yog qhov uas peb tim tsum tiag tiag, tias cov lus ntawd yog tej hauv paus ntsiab lus ntawm txoj kev xyaum ua uas peb yuav tsum tau siv coj los daws tag nrho peb tej teeb meem, thiab tias Vajtswv cov lus no mas yog lub hom phiaj thiab txoj xub ke ntawm peb lub neej. Lub sij hawm ntawd, koj yuav pom hais tias txhua yam uas Vajtswv ua ntawd muaj nuj nqis npaum li cas, thiab qhov Vajtswv yug los ua neeg ntawd tseem ceeb thiab muaj nuj nqis npaum li cas rau peb! Txhua kab lus uas Vajtswv hais, txhua kauj ruam ntawm Nws tes hauj lwm, Nws txhua lo lus thiab txoj kev ua, Nws tej kev xav, Nws tej tswv yim, thiab Nws tej kev xam pom ntawd puav leej yog los ntxuav tib neeg kom dawb huv thiab cawm tib neeg kom dim xwb, thiab tej ntawd tsis muaj ib qho uas tsis muaj dab tsi li; tej ntawd puav leej muaj tseeb thiab muaj qab hau. Yog li ntawd, txawm yus los ntawm ib txoj kab lis kev cai ntseeg los los sis los ntawm cov tsis ntseeg los los xij, yus yuav tsum tsis txhob ntseeg Vajtswv raws li tej kev xav phem thiab tej kev xav hauv nruab siab ntxiv lawm, thiab yus yuav tsum tsis txhob raus tes rau tej kev npau suav ntawm sab kev lis kev cai ntseeg ntxiv lawm, uas ua npau suav hais tias yus yuav cia li raug coj mus rau saum ntuj mus ntsib tus Tswv thaum tej kev puas tsuaj loj los; qhov no yog ua npau suav nruab hnub xwb. Vajtswv tau los muab tib neeg nthuav tawm thiab txiav txim, thiab ntxuav tib neeg txoj kev qias vuab tsuab los ntawm qhov ua tib zoo nthuav qhov tseeb tawm, thiab los ua tib zoo cawm tib neeg kom dim ntawm Ntxwgnyoog txoj kev haub ntxias. Nyob rau lub sij hawm no, tib neeg yuav tsum tau tiv ntau yam kev tsim txom thiab kev txom nyem, thiab lawv yuav raug ntau yam kev qhuab qhia thiab ntau yam kev txiav txim thiab kev rau txim ua ntej lawv raug ntxuav kom dawb huv thiab hloov pauv; tsuas yog raug Vajtswv tes hauj lwm no xwb mas lawv thiaj li yuav tau txais qhov tseeb. Thaum koj tau txais qhov tseeb lawm, Vajtswv yuav muaj ib qho chaw nyob rau hauv koj lub siab, thiab koj yuav muaj txoj kev hwm thiab txoj kev zwm rau Vajtswv tiag tiag, uas yog qhov uas Vajtswv xav kom ua. Thaum koj to taub qhov tseeb thiab paub qhov muaj nqis ntawm qhov tseeb ntawd, thiab qhov tseeb cog rau hauv koj lub siab, thiab koj muaj txoj kev ntsib kev pom thiab kev paub uas muaj qab hau txog qhov tseeb lawm, ces Vajtswv txoj lus yuav dhau los ua txoj sia nyob rau hauv koj lub siab. Qhov txheej txheem no puas muaj qab hau? (Muaj.) Yog li, qhov txheej txheem no xav kom tib neeg ua li dab tsi? Ua ntej tshaj plaws, tib neeg yuav tsum muaj lub siab zwm rau Vajtswv, lees txais txoj kev txiav txim thiab kev rau txim ntawm Vajtswv txoj lus, thiab yuav raws li Vajtswv txoj kev qhuab qhia, tej kev sim siab thiab kev tsim kho kom zoo, kom thiaj li ntxuav tau lawv txoj kev qias vuab tsuab kom dawb huv, kom lawv thiaj li xyaum ua tau qhov tseeb thiab zwm tau rau Vajtswv, thiab kom lawv thiaj li nkag tau mus rau hauv qhov muaj tiag ntawm Vajtswv txoj lus. Tsuav tib neeg paub tias yuav ua li cas es thiaj li tau ntsib tau pom Vajtswv tes hauj lwm xwb, ces lawv yuav paub tias qhov uas Vajtswv xav ua kom tiav nyob rau hauv lawv ntawd yog dab tsi thiab qhov txiaj ntsim uas Nws xav ua kom tau ntawd yog dab tsi. Vajtswv txoj lus ua tau ob qho tseem ceeb nyob rau hauv tib neeg xws li: Qhov ib, txoj lus ntawd ua rau tib neeg paub lawv tus kheej; hos qhov ob, txoj lus ntawd ua rau tib neeg paub Vajtswv. Thaum ua tau ob qho no tiav lawm, ces tib neeg yuav paub Vajtswv cov lus tiag tiag, thiab to taub qhov tseeb tiag tiag.

Yuav kom paub txog koj tus kheej mas, koj yuav tsum paub koj tus kheej cov kev nthuav tawm txog txoj kev ua qias vuab tsuab, koj tus moj yam qias vuab tsuab, koj tus kheej tej kev qaug zog tshaj plaws, thiab koj tus yeeb yam thiab lub ntsiab tseeb. Koj kuj yuav tsum paub, kom tob mus txog ntua lub ntsiab lus kawg kiag, cov uas raug nthuav tawm hauv koj lub neej txhua hnub—koj tej kev txhawb zog, koj tej kev xam pom, thiab koj tus yeeb yam rau txhua txhia yam—tsis hais koj nyob hauv tsev los tsis nyob hauv tsev, thaum koj tab tom nyob hauv kev sib txoos ua ke, thaum koj tab tom noj thiab haus cov lus ntawm Vajtswv, los sis hauv txhua txhua qhov xwm txheej uas koj ntsib. Los ntawm tej kis no koj yuav tsum rais los paub koj tus kheej. Tseeb tiag, yuav kom paub koj tus kheej mus rau ntawm ib theem tob dhua no, koj yuav tsum koom nrog Vajtswv cov lus; tsuas yog kev paub koj tus kheej los ntawm Nws cov lus nkaus xwb koj thiaj li tuaj yeem ua tau qhov tshwm sim tiav. Thaum lees txais kev txiav txim ntawm Vajtswv cov lus lawm, tsis txhob ntshai tsam raug kev txom nyem los sis kev mob, thiab tsis tas li ntawd xwb, tsis txhob ntshai tias tsam Vajtswv cov lus yuav nkaug nej lub siab thiab muab nej tus yam ntxwv phem qhia tshwm. Qhov raug tej no yeej muaj txiaj ntsim. Yog koj ntseeg Vajtswv, ces nej yuav tsum nyeem Vajtswv cov lus uas txiav txim thiab rau txim rau tib neeg kom ntau ntxiv, tshwj xeeb yog cov uas nthuav tawm txog lub ntsiab tseeb ntawm noob neej txoj kev qias vuab tsuab, koj yuav tsum muab cov lus ntawd coj los piv rau koj tus yam ntxwv uas muaj qab hau kom ntau ntxiv, thiab koj yuav tsum siv cov lus ntawd rau koj tus kheej kom ntau ntxiv hos lwm yam ces kom tsawg. Hom yam ntxwv uas Vajtswv nthuav tawm ntawd yeej muaj nyob rau hauv txhua tus tib neeg, thiab koj yeej muaj txhua tus yam ntxwv ntawd thiab. Yog koj tsis ntseeg qhov no, ces sim thiaj li paub. Koj yim paub, ces koj yim yuav paub koj tus kheej, thiab koj yim yuav xav tias Vajtswv cov lus mas yog tshaj plaws li xwb. Tom qab tau nyeem Vajtswv cov lus tag lawm, qee leej tib neeg tsis muaj cuab kav muab coj los siv rau lawv tus kheej; lawv xav tias ntau feem ntawm cov lus no mas tsis yog rau lawv, tiam sis yog rau lwm tus tib neeg xwb. Piv txwv li, thaum Vajtswv qhia tshwm tias tib neeg yog neeg vuab tsuab thiab plees, qee tus muam xav tias vim yog lawv mas coj ncaj ncees rau lawv tus txiv yam tsis tseg li, tej lus zoo li ntawd yuav tsis yog hais rau lawv; qee tus muam xav tias vim lawv tseem tsis tau yuav txiv thiab tsis tau sib deev dua li, tej lus zoo li ntawd yeej yuav tsum tsis yog hais rau lawv tib yam nkaus thiab. Qee tus kwv tij xav tias cov lus no tsuas yog hais rau cov poj niam xwb, thiab tsis muaj dab tsi cuam tshuam rau lawv; qee leej tib neeg ntseeg tias Vajtswv cov lus uas nthuav tawm ntawd mas hnyav heev, tias cov lus no mas tsis mus raws li qhov muaj tiag, yog li ntawd lawv thiaj li tsis kam lees txais cov lus no. Muaj qee lub sij hawm qee leej haj tseem hais tias, Vajtswv cov lus mas tsis yog lawm. Tus yeeb yam no puas yog tus yog uas tsim nyog muaj rau Vajtswv cov lus thiab? Tus yeeb yam zoo li no mas tsis yog kiag li lawm. Tib neeg txhua tus pom lawv tus kheej raws li lawv tus yam ntxwv sab nraud xwb. Lawv tsis muaj cuab kav ua tib zoo xav txog lawv tus kheej, thiab los paub lawv lub ntsiab tseeb uas qias vuab tsuab thaum hais txog Vajtswv cov lus li. Ntawm no, “vuab tsuab” thiab “plees” yog hais txog lub ntsiab tseeb ntawm tib neeg qhov kev qias vuab tsuab, kev qias neeg, thiab kev ua plees ua yi. Tsis hais txiv neej los sis poj niam, muaj cuab yig los sis tsis muaj, txhua tus puav leej muaj tej kev xav qias vuab tsuab ntawm kev plees kev yi—yog li ntawd nws tsis muaj qhov cuam tshuam nrog koj tau li cas? Vajtswv cov lus qhia tshwm tib neeg cov moj yam qias vuab tsuab; tsis hais txiv neej los sis poj niam, yus theem ntawm txoj kev qias vuab tsuab ces zoo ib yam nkaus xwb. Qhov no tsis yog qhov tseeb lod? Ua ntej thaum yuav ua ib yam dab tsi, peb yuav tsum paub tias txhua yam uas Vajtswv hais ntawd yog qhov tseeb, thiab muaj tseeb, thiab tias txawm Nws cov lus uas txiav txim rau tib neeg thiab muab tib neeg qhia tshwm ntawd yuav hnyav npaum li cas, los sis cov lus uas qhia txog qhov tseeb los sis qhuab ntuas tib neeg yuav zoo npaum li cas los xij, txawm cov lus no yog kev txiav txim los sis yog koob hmoov, txawm cov lus no yog kev teem txim los sis kev foom phem, txawm cov lus no ua rau tib neeg iab siab los sis zoo siab los xij, tib neeg yuav tsum lees txais cov lus no. Nov yog tus yeeb yam uas tib neeg tsim nyog muaj rau Vajtswv cov lus. Hom yeeb yam no yog dab tsi? Nws puas yog ib tug yeeb yam mob siab, ib tug yeeb yam zoo, ib tug yeeb yam ua siab ntev, los sis ib tug yeeb yam ntawm kev lees txais tej kev txom nyem? Nej me ntsis feeb tsis meej lawm. Kuv hais rau nej tias nws puav leej tsis yog tej no ib qho kiag li. Hauv lawv txoj kev ntseeg, tib neeg yuav tsum tuav kom ruaj nreeg tias Vajtswv cov lus mas yog qhov tseeb. Vim tej no yog qhov tseeb, tib neeg tsim nyog lees txais tej no tias yog qhov tsim nyog. Tsis hais lawv muaj cuab kav los sis tsis muaj cuab kav paub los sis lees nws, lawv thawj tug yeeb yam rau Vajtswv cov lus tsim nyog yog ib tug uas lees txais tau huv tib si. Yog Vajtswv txoj lus tsis muab koj qhia tshwm, ces txoj lus ntawd muab leej twg qhia tshwm? Thiab yog txoj lus ntawd tsis yog txhawm los muab koj qhia tshwm no, vim li cas thiaj li hais kom koj lees txais txoj lus ntawd? Qhov no tsis yog ib qho kev sib txawv lod? Vajtswv hais lus rau tib neeg ntiaj teb tag nrho, txhua sob lus uas Vajtswv hais tawm ntawd puav leej yog los muab cov tib neeg ntiaj teb uas qias vuab tsuab ntawd qhia tshwm, thiab tsis zam leej twg li—uas suav nrog rau koj huv si thiab. Tsis muaj ib kab lus twg ntawm Vajtswv cov lus hais ntawd es yog hais txog yam sab nraud, los sis ib hom yam ntxwv twg li, thiab haj yam tsis yog hais txog cov kev cai nyob sab nraud los sis ib tug qauv ntawm tus cwj pwm hauv tib neeg li. Tej no tsis yog zoo li ntawd. Yog koj xav tias txhua kab lus hais tawm los ntawm Vajtswv tsuas yog nthuav tawm ib hom yooj yim ntawm tib neeg tus cwj pwm los sis qhov tshwm nyob sab nraud xwb, ces koj yeej tsis muaj kev to taub sab kev ntseeg thiab koj tsis to taub tias qhov tseeb yog dab tsi li. Vajtswv cov lus yog qhov tseeb. Tib neeg yeej tuaj yeem paub qhov tob ntawm Vajtswv cov lus. Cov lus ntawd tob npaum li cas? Vajtswv txhua lo lus qhia tshwm txog tib neeg cov moj yam qias vuab tsuab, thiab tseem ceeb heev thiab faus cag tob heev nyob hauv lawv lub neej. Cov lus no yog yam tseem ceeb heev, tsis yog tej qhov kev tshwm sim nyob sab nraud, thiab tshwj xeeb tshaj tsis yog cov cwj pwm sab nraud. Kev saib tib neeg los ntawm lawv tej kev tshwm sim uas nyob sab nraud mas, tej zaum kuj zoo li lawv yog neeg zoo thiab. Tab sis vim li cas es Vajtswv thiaj hais tias qee leej tib neeg mas yog cov ntsuj nplig phem thiab qee leej mas yog cov ntsuj plig tsis huv? Qhov no yog ib qho teeb meem uas tsis muaj peev xwm pom tau rau koj. Yog li ntawd, yus yuav tsum tsis txhob saib Vajtswv cov lus raws li noob neej tej kev xav phem los sis tej kev xav hauv nruab siab, los sis raws li noob neej tej lus xaiv lus cua xwb, thiab tsis raws li cov lus hais tiag tiag. Vajtswv cov lus nkaus xwb thiaj li yog qhov tseeb; tib neeg cov lus ces puav leej yog lus dag ntxias xwb. Tom qab tau sib qhia los txog qhov no lawm, nej puas tau paub tau pom ib qho kev hloov pauv hauv nej tus yeeb yam rau Vajtswv cov lus thiab? Tsis hais txawm muaj kev hloov loj los sis me me los xij, lub sij hawm tom ntej thaum nej nyeem Vajtswv cov lus uas txiav txim rau tib neeg thiab muab tib neeg nthuav tawm ntawd, yam tsawg tshaj nej yuav tsum tsis txhob sim cav nrog Vajtswv lawm. Nej yuav tsum tseg txoj kev yws txog Vajtswv uas hais tias, “Vajtswv cov lus uas nthuav tawm thiab txiav txim mas hnyav dhau lawm; kuv yuav tsis nyeem nplooj ntawv no. Kuv yuav cia li hla nws mus xwb. Cia kuv tshawb xyuas lwm yam los nyeem txog cov koob hmoov thiab cov lus cog tseg, kom nrhiav tau kev nplij siab.” Koj yuav tsum tsis txhob nyeem Vajtswv txoj lus los ntawm qhov rho thiab xaiv raws li koj tus kheej tus yam ntxwv ntxiv lawm. Koj yuav tsum lees txais qhov tseeb thiab txoj kev txiav txim thiab kev rau txim ntawm Vajtswv cov lus; tsuas yog thaum ntawd xwb mas koj tus moj yam qias vuab tsuab thiaj li yuav raug yaug kom dawb huv, tsuas yog thaum ntawd xwb koj thiaj li yuav tau txais txoj kev cawm dim.

Txawm tam sim no nej paub hais tias Vajtswv cov lus puav leej yog qhov tseeb, thiab nej txaus siab hlo los tshawb nrhiav qhov tseeb lawm los xij, nej tseem muaj tej uas nej tus kheej nyiam thiab tej uas nej tus kheej xaiv los ua raws li Vajtswv cov lus, thiab nej tseem yuav ua raws li nej tus kheej lub siab nyiam xwb. Nej yeej txaus siab hlo nyeem Vajtswv cov lus cog tseg thiab cov lus foom koob hmoov, thiab nej yuav nco ntsoov Vajtswv cov lus cog tseg ntawd. Nej yuav hnov nplij tau nej lub siab thaum nyeem cov lus zoo li no, los sis nej yuav hnov zoo li muaj kev cia siab me ntsis thiab pom hais tias nej tseem tsis tau muaj lub zog thiab qhov muaj siab los ntseeg Vajtswv. Tiam sis nej tsis kam nyeem Vajtswv cov lus uas txiav txim rau tib neeg thiab muab tib neeg nthuav tawm, vim hais tias yog nej pheej nyeem Vajtswv cov lus uas muab tib neeg nthuav tawm thiab txiav txim thiab rau txim rau tib neeg ntawd, ces nej nyuaj siab, thiab lub zog uas los ntseeg Vajtswv ntawd yuav ploj mus, yog li ntawd nej yuav ua li cas mus tau rau tom ntej? Niaj hnub no, tib neeg feem coob tsis to taub Vajtswv cov lus uas qhia txog tej uas tsis muaj neeg paub. Lawv xav hais tias cov lus ntawd mas tob dhau lawm, thiab tias cov lus foom koob hmoov ntawd mas dhau qhov lawv ncav cuag lawm. Thaum nyeem Vajtswv cov lus uas muab tib neeg tus moj yam qias vuab tsuab nthuav tawm, mas lawv to taub cov lus ntawd qee cov, thiab tab txawm yog lawv muab tau cov lus ntawd coj los rau lawv tus kheej thiab lees hauv lawv lub siab hais tias cov lus ntawd yog tej uas muaj tseeb los xij, lawv tseem tsis kam lees txais cov lus ntawd li thiab. Koj pom hais tias, tib neeg ua rau muaj teeb meem npaum li cas! Lawv paub hais tias Vajtswv txoj lus yog qhov tseeb, tiam sis lawv tseem tsis kam lees txais txoj lus ntawd li thiab; lawv xav kom tau koob hmoov, tiam sis lawv tseem tsis tuaj yeem txais tej koob hmoov ntawd li thiab. Yog li ntawd tib neeg yuav tsum ua tib zoo noj thiab haus Vajtswv txoj lus li cas? Ua ntej tshaj plaws, tib neeg yuav tsum nyeem Vajtswv cov lus uas qhia txog tej uas tsis muaj neeg paub ntawd ntxiv. Thaum nyeem cov lus zoo li no lawm, tib neeg xav hais tias Vajtswv nyob rau saum lub ntuj ceeb tsheej thib peb thiab muaj hwj chim, thiab tias tib neeg yuav tsum muaj lub siab hwm Vajtswv. Ces lawv thov Vajtswv hais tias, “Au Vajtswv, Koj zoo kawg nkaus! Koj loj tshaj plaws! Koj muaj hwj chim kav tag nrho ib puas tsav yam, thiab Koj txiav txim siab tau rau kuv txoj hmoo; kuv txaus siab hlo yuav raws li txhua yam uas Koj twb tau npaj kom tshwm sim nyob ib puag ncig kuv lawm.” Kev thov Vajtswv li no, tib neeg yuav muaj qee qhov kev hwm Vajtswv. Tib neeg txaus siab hlo ntseeg tus Vajtswv uas muaj hwj chim, yog li ntawd ua ntej noj thiab haus Vajtswv txoj lus ntawd mas, thawj kauj ruam yog ua kom paub tseeb hais tias Vajtswv hais lus saum ntuj tuaj rau tib neeg, mas tib neeg thiaj li yuav txaus siab hlo nyeem Vajtswv txoj lus thiab thiaj li yuav tsis tshua muaj tej kev xav phem. Kauj ruam ob yog nrhiav Vajtswv cov lus uas cog lus thiab cov lus foom koob hmoov ntawd ib co coj los noj thiab haus. Thaum pom Vajtswv cov lus foom koob hmoov rau txiv neej, mas tib neeg zoo siab heev lawv pib quaj hais tias, “Au Vajtswv, Koj zoo tiag tiag! Tsim nyog peb pe hawm Koj heev! Peb txaus siab hlo lees txais tej koob hmoov uas Koj pub rau peb, thiab peb haj yam txaus siab hlo lees txais cov lus cog tseg uas Koj tau cog rau peb ntawd. Tsuas yog hais tias tam sim no peb siab me thiab peb tseem tsis tau loj hlob xwb, peb tsis tsim nyog tau txais Koj cov lus cog tseg thiab tej koob hmoov, yog li ntawd thov Koj pab peb ntxiv!” Qhov nyeem Vajtswv cov lus foom koob hmoov ntawd mas zoo npaum li cas! Ces lawv ua tib zoo xav hais tias, “Yog li, yog hom koob hmoov dab tsi? Vajtswv tau hais tias thaum lub sij hawm los txog, yuav tsis muaj kev puas ntsoog los raug rau tib neeg lawm, thiab tias tib neeg yuav dim ntawm txoj kev meem txom uas ib hnub noj peb pluag mov thiab ntxhua ub ntxhua no thiab tu ub tu no lawm—Vajtswv tau cog lus tseg li no.” Tib neeg yim nyeem, ces tib neeg yim zoo siab xwb. Tiam sis txawm koj yuav kub siab npaum li cas los xij, tsis txhob hnov qab tshawb nrhiav qhov tseeb. Kauj ruam peb yog nyeem Vajtswv cov lus uas muab tib neeg ntiaj teb tus moj yam qias vuab tsuab thiab lub ntsiab tseeb nthuav tawm. Thaum los txog qhov no lawm, tsis tas yuav noj thiab haus kom ntau nyob rau ib zaug twg; ib zaug twg tsuas noj thiab hau ib ob yam xwb txaus lawm. Tom qab noj thiab haus lawm, muab tej uas koj tsis to taub, tej uas txuas tsis tau rau koj ntawd tso tseg ua ntej, thiab ua tib zoo xav txog tej uas txuas tau rau koj, ces koj yuav maj mam los paub koj tus kheej tus yam ntxwv. Thaum koj paub koj tus moj yam qias vuab tsuab tiag tiag, thiab to taub qhov tseeb zuj zus ntxiv lawm, koj yuav pom hais tias koj tus yam ntxwv lub ntsiab tseeb zoo li cas yam ras tsis txog li. Nej puas xav hais tias qhov no yog qhov zoo? (Yog.) Nws zoo ib yam li thaum muab tshuaj rau me nyuam noj: Koj xub muab yam qab zib los ntxias nws ua ntej tso, ces tom qab ntawd thaum nws tsis nco qab lawm, koj mam li muab tshuaj rau nws noj kom puv nkaus qhov ncauj; yog nws paub hais tias iab, koj muab kiag ob lub qhaub noom los ntxias nws ntxiv, ces nws yuav noj nws qhov tshuaj ntawd. Tiam sis thaum nws loj tuaj lawm, tsis ua li no ntxiv lawm: Txawm paub tias tshuaj iab npaum li cas los xij nws mam li noj nws lawm xwb. Qhov no yog los ntawm lub siab. Yog koj tsis muaj siab, thiab kom koj nrhiav nyob rau hauv Vajtswv txoj lus cov lus uas muab tib neeg tus yam ntxwv qias vuab tsuab nthuav tawm thiab hais txog qhov tseeb ntawd es muab koj tus kheej piv rau cov lus ntawd, thiab yog kom koj noj thiab haus cov lus no tag hnub li, ces thaum kawg koj yuav dhuav cov lus no, vim koj qhov kev paub mus tsis txog cov lus no thiab ua tsis tau raws li txoj lus no. Yog li ntawd, koj yuav tsum ntxiv ib yam dab tsi uas zoo li ntawd kom qab zib rau hauv nruab nrab ntawm txoj lus ntawd, es cov uas siab me thiaj li noj thiab haus tau Vajtswv cov lus los ntawm txoj kev no. Yog koj pheej qaug zog thiab xav phem thiab tsis muaj txoj kev ntseeg los sis kev cia siab tiag tiag, ces koj yuav tsum maj nroos los noj thiab haus Vajtswv cov lus foom koob hmoov thiab cov lus cog tseg ntawd qee cov, thiab nrhiav cov lus uas Vajtswv qhia txog tej uas tsis muaj neeg paub ntawd los noj thiab haus. Yog koj mloog zoo li koj lub zog loj tuaj thiab koj txoj kev nrog Vajtswv sib raug zoo ntawd zoo tuaj lawm, ces koj yuav tsum siv zog thaum tus hlau tseem kub thiab nrhiav cov lus los nyeem thiab kawm txog txoj kev rau txim thiab kev txiav txim, es qhov ua li no, txoj kev nyeem thiab txoj kev kawm ntawd thiaj li yuav tau hauj lwm yooj yim dua, thiab koj thiaj li yuav tsis ncua txoj kev loj hlob ntawm lub neej. Thaum noj thiab haus Vajtswv cov lus ntawd yog koj me siab, koj yuav tsum paub tias yuav hloov li cas: noj thiab haus li no yog ua kom koj tus kheej muaj lub siab tus thiab loj hlob ceev; noj thiab haus yam uas koj ncav cuag thiab muab yam uas koj ncav tsis cuag tso tseg; thiab sim xyaum ua kom paub yam uas koj to taub los ntawm qhov noj thiab qhov haus ntawd. Tsuav koj paub xyaum ua thiab tau ntsib tau pom Vajtswv cov lus thiab qhov tseeb uas koj to taub xwb, ces koj yuav nkag tau mus rau hauv txoj kev ntseeg Vajtswv uas yog.

Kuv nco tau muaj ib zaug muaj qee tus neeg hais tej yam zoo li no hais tias: Muaj ib tug tib neeg tau siv zog kawm heev thaum Vajtswv yuav ncaim lub ntiaj teb mus. Qhov kev siv zog no tsis yog xav txog qhov kev kawm ntawd nruab hnub thiab hmo ntuj; tiam sis qhov kev kawm ntawd yog ib qho kev txhawj rau nws txij thaum nws pib ntseeg Vajtswv los lawm. Yuav kom nrhiav tau ib lo lus teb uas yog mas, nws yuav tsum tau sau tag nrho cov lus uas hais txog qhov Vajtswv ncaim mus xws li thaum Vajtswv yuav ncaim lub ntiaj teb mus, tej cim yog dab tsi, thiab cov tib neeg hauv pawg ntseeg xav li xas ntawd los ua ke. Ces tom qab ntawd nws ua tib zoo xav txog cov lus ntawd yam siv zog heev, tshuaj xyuas kom nkag siab thiab muab cov lus ntawd coj los sib piv, muab ib lo piv rau ib lo thiab muab tom ntej piv rau tom qab, cuag nkaus li sab laj rau ib phau Vajluskub ua pov thawj. Qhov no tsis yog siv zog heev lod? Tus tib neeg no “txhawj” txog Vajtswv npaum li cas, thiab nws “hlub” Vajtswv npaum li cas! Qhov Vajtswv ncaim ntawm lub ntiaj teb mus mas yog ib qho xwm txheej uas tseem ceeb heev nyob rau hauv Vajtswv tes hauj lwm, yog li ntawd thaum nws tshawb pom qhov ncaim mus ntawd, mas nws suav hais tias yog qhov tseem ceeb tshaj plaws—tseem ceeb tshaj qhov nws tshawb nrhiav qhov tseeb kom tau txais txoj kev cawm dim, thiab tseem ceeb tshaj kev nrhiav txhua qhov tseeb uas nyob rau hauv Vajtswv cov lus lawm. Yog li ntawd, nws sau tag nrho cov lus ntawd los ua ke ces thaum kawg nrhiav tau “lo lus teb” lawm. Muab nws txoj kev tshawb fawb uas yog ntawd tso tseg, nej xav li cas txog hom tib neeg no tej kev xam pom txog txoj kev tshawb nrhiav txoj kev ntseeg Vajtswv thiab txoj kev uas nws tshawb nrhiav txoj kev ntseeg Vajtswv ntawd? Lub zog uas nws siv ntawd puas tsim nyoog? Qhov siv zog ua hauj lwm npaum li no ntawd tsis muaj qab hau dab tsi li! Qhov Vajtswv ncaim ntawm lub ntiaj teb mus ntawd muaj dab tsi cuam tshuam rau koj? Vajtswv tsis tau qhia koj txog qhov Nws los, yog li ntawd Nws yuav tsis cia koj paub thaum Nws ncaim ncaim mus thiab. Muaj ntau yam uas Vajtswv tsis cia tib neeg paub, yog li ntawd qhov ntawd yog vim li cas? Qhov ntawd yog vim hais tias tib neeg tsis tas yuav paub, thiab yog lawv paub, los yuav ua tsis tau dab tsi zoo rau lawv thiab yuav ua tsis tau dab tsi rau lawv tej hom phiaj yav tom ntej, yog li ntawd tib neeg tsis tas yuav paub. Tam sim no uas Vajtswv twb tau los ua cev nqaij daim tawv lawm, Nws paub txhua yam uas tib neeg tsis paub thiab txhua kis ntawm qhov tseeb thiab ib puas tsav yam, thiab Nws qhia tau tib neeg, tiam sis muaj qee yam uas tib neeg tsis tas yuav paub, thiab tsis tas yuav qhia rau lawv. Thaum Vajtswv ncaim ntawm lub ntiaj teb mus thiab thaum Nws muab Nws tes hauj lwm xaus ntawd—tej no puas cuam tshuam rau tib neeg? Tib neeg hais tau hais tias: Tsis cuam tshuam hlo li! Ib txhia tib neeg hais tias, “Yog ua cas qhov ntawd thiaj li tsis tseem ceeb? Kuv yuav ua li cas yog qhov tshawb nrhiav qhov tseeb ntawd lig dhau rau kuv lawm? Kuv yuav tsum saib seb Vajtswv hnub tshuav sij hawm npaum li cas lawm, thiab kuv yuav tsum tau paub tseeb txog hnub ntawd ua ntej kuv tshawb nrhiav qhov tseeb.” Tus tib neeg zoo li no puas yog ruam? Lawv puas yog ib tug uas tshawb nrhiav qhov tseeb? Tsis yog kiag li! Yog tib neeg yeej tshawb nrhiav qhov tseeb tiag tiag, mas lawv yuav tsis quav ntsej txog qhov no, thiab lawv tus kheej yuav tsis txhawj txog tej no; lawv xav hais tias qhov txhawj txog tej no ntawd yuav pab tsis tau txoj kev tshawb nrhiav qhov tseeb thiab tsis tseem ceeb, yog li ntawd lawv thiaj li tsis kam xav thiab siv zog rau tej ncauj lus uas dhuav dhuav neeg no. Ib txhia tib neeg mas txeev txhawj txog thaum Vajtswv hnub yuav los, tiam sis qhov no tsis yog ib qho txheej txheem ntawm lawv tus kheej lod? Qhov koj pheej txhawj txog thaum Vajtswv hnub yuav los ntawd puas ua tau pov thawj qhia hais tias koj hlub Vajtswv? Qhov ntawd ua puas tau pov thawj qhia hais tias koj yog ib tug tib neeg uas ua raws li Vajtswv lub siab nyiam? Qhov ntawd ua puas tau pov thawj qhia hais tias koj ua tim khawv rau Vajtswv? Qhov ntawd ua puas tau pov thawj qhia hais tias koj twb tau pab nthuav Vajtswv lub nceeg vaj txoj moo zoo mus kom dav lawm? Qhov koj npaj ua tej dej num zoo ntawd zoo li cas lawm? Koj to taub qhov tseeb ntau npaum li cas lawm? Koj twb tau nkag mus rau hauv qhov tseeb qhov muaj tiag dab tsi lawm? Tej no yog tej uas koj yuav tsum txhawj tshaj plaws. Koj pheej nug txog Vajtswv tsab xov, pheej xav kom paub txog tej lus hais luag plig ntawd me ntsis, pheej xav kom to taub txog qhov uas tsis muaj neeg paub ntawd me ntsis. Tiam sis qhov no tsuas yog lub siab uas xav paub xav pom xwb, tsis yog lub siab uas tshawb nrhiav qhov tseeb los sis lub siab uas xav txog Vajtswv, thiab haj yam tsis yog lub siab uas hwm Vajtswv kiag li. Koj txoj kev tshawb nrhiav kom to taub txog tej uas tsis muaj tib neeg paub ntawd tsis cuam tshuam rau txoj kev tshawb nrhiav qhov tseeb ib qho me me li. Yuav ua li cas rau cov tib neeg zoo li no? Koj puas hwm lawv? Koj puas qhuas lawv? Koj puas khib lawv? Koj puas yuav pab lawv nrhiav tej uas tsis muaj tib neeg paub zoo li no? Tsis pab, koj yeej yuav saib tsis taus lawv, hais tias, “Peb tseem tsis tau txawj tshawb nrhiav qhov tseeb, tsis paub peb tus kheej, thiab tsis paub Vajtswv—peb tseem ua tsis tau tau ib yam dab tsi tiav li—thiab muaj ntau qhov tseeb ntawm txhua kis tos ntsoov kom nrhiav, kom to taub, thiab kom xyaum ua xwb, yog li ntawd peb tsis tas yuav siv zog los kawm tej uas tsis muaj tib neeg paub zoo li no.” Qhov tseeb tiag, tsuav koj muaj Vajtswv nyob rau hauv koj lub siab thiab qhov kev ntshaw los tshawb nrhiav qhov tseeb xwb, ces thaum hnub ntawd los txog, Vajtswv yuav tsis cia koj tsis paub dab tsi; Nws yuav tsis tso koj tseg. Qhov no yog txoj kev ntseeg thiab txoj kev to taub uas koj yuav tsum muaj. Yog koj muaj txoj kev ntseeg thiab txoj kev to taub no, ces koj yuav tsis ua ib yam dab tsi uas ruam ruam lawm. Yog Vajtswv npaj siab qhia koj, Nws yuav tsis hais ncaj qha lod? Puas tas yuav hais ua dog ua dig? Puas tas yuav zais lus thaum hais lus? Puas tas yuav zais li? Tsis zais kiag li. Yam uas Vajtswv npaj siab cia kom tib neeg paub ntawd yog qhov tseeb; txhua yam uas Nws tes hauj lwm, cov lus, thiab tej kev npaj siab ntawd nthuav tawm ces yog qhov tseeb xwb, thiab Nws yuav tsis muab tej ntawd zais kom tib neeg txhob paub kiag li. Yog li ntawd, tsis tas koj yuav nug txog tej uas Vajtswv tsis xav kom tib neeg paub, thiab koj tsis tas yuav xav txog tej ntawd, rau qhov lub zog uas koj siv rau tej ntawd yuav tsis muaj qab hau dab tsi, thiab yuav tsis muaj nqis kiag li, tiam sis qhov ua li ntawd yuav ua rau Vajtswv ntxub xwb. Vim li cas qhov ua li ntawd thiaj li ua rau Vajtswv ntxub? Ua ntej tshaj plaws, koj yuav tsum to taub hais tias Vajtswv twb nthuav ntau qhov tseeb tawm, thiab qhov tseeb twb nthuav tawm nyob rau txhua qhov chaw lawm. Yog koj tsis nrhiav qhov tseeb los daws koj tus kheej cov teeb meem tiag tiag thaum muaj tej yam tshwm sim rau koj, ces koj tsis yog tus uas nyiam qhov tseeb: Koj yog ib tug tib neeg uas xav paub xav pom dhau lawm xwb; yog tus tib neeg uas nyiam sib xav; yog tus tib neeg uas tsis hwm Vajtswv cov lus thiab pheej coj tus xeeb ceem uas lam taus lam ua xwb. Koj tsis muaj ib qho chaw rau Vajtswv nyob hauv koj lub siab. Yam uas koj muaj nyob rau hauv koj lub siab ces yog ob peb yam uas Vajtswv tsis xav kom koj paub xwb, xws li Nws qhov chaw nyob—lub ntuj ceeb tsheej thib peb—zoo li cas thiab nyob rau qhov twg tiag tiag, lub nceeg vaj yav tom ntej yuav zoo li cas, thiab thaum twg Vajtswv tus uas yug los ua neeg mam li ncaim lub ntiaj teb mus. Vim li ntawd kuv thiaj li hais tias Vajtswv ntxub koj. Puas muaj qhov tias vim li cas Vajtswv thiaj li ntxub koj? (Muaj.) Piv txwv li koj cov me nyuam tsis rau siab kawm ntawv tag hnub thiab tsis ua cov ntawv uas los ua tom tsev uas lawv yuav tsum tau ua ntawd li, tiam sis ho xav txog cov lus nug xws li: “Kuv txiv thiab kuv niam ntsib li cas? Nkawv yug los kuv li cas? Tom qab kuv yug los lawm, nkawv puas nyiam kuv? Kuv tsev neeg yuav nyob li cas rau yav tom ntej? Peb puas yuav muaj txiag nplua nuj?” xwb. Yog lawv pheej kawm cov lus nug no xwb, koj puas yuav tsis nyiam tus me nyuam zoo li no? Koj puas yuav ntxub koj cov me nyuam uas ua li no? Koj xav kom koj cov me nyuam ua dab tsi? Xav kom xyaum nyeem ntawv thiab sau ntawv kom zoo thiab rau siab kawm ntawv. Qhov no yog koj qhov kev npaj siab rau koj cov me nyuam, yog li ntawd Vajtswv qhov kev npaj siab rau tib neeg yog dab tsi? Yog ua cas Vajtswv thiaj li haj yam tsis nyiam kom tib neeg taug txoj kev yog thiab ua tes hauj lwm zoo? Vajtswv tsis nyiam kom tib neeg los kawm txog Nws, los sis pheej los soj ntsuam Nws txhua lo lus thiab txhua txoj kev ua, los sis los siv lub sij hawm thiab lub zog uas tsis muaj qab hau dab tsi rau Nws yam zais ntshis xwb. Muaj coob leej yog cov uas pheej kawm thaum Vajtswv hnub yuav los. Tsis yog lawv ua xyem xyav thiab tawm tsam Vajtswv hauv lawv lub siab lod? Qhov teeb meem uas tib neeg tsis saib ntau qhov tseeb uas Vajtswv nthuav tawm ntawd muaj nqis thiab tsis tshawb nrhiav ntau qhov tseeb uas Vajtswv nthuav tawm ntawd yog dab tsi? Tus tib neeg uas muaj lub siab ncaj ncees mas nrhiav qhov tseeb thiab ua txhua yam kom to taub Vajtswv tej kev npaj siab nyob rau hauv txhua yam, thiab tom qab nyeem Vajtswv cov lus lawm, mas lawv paub tseeb hais tias cov lus no yog qhov tseeb, thiab paub tias tib neeg yuav tsum xyaum ua cov lus no thiab ua raws li cov lus no. Tsuas yog cov uas tsis ntseeg hais tias Vajtswv txoj lus yog qhov tseeb xwb thiaj li yuav kawm txog Vajtswv. Cov tib neeg no tsis quav ntsej txog lawv lub luag hauj lwm thiab lawv tus kheej tej dej num ib qho me me li; lawv tsis quav ntsej txog tej ntawd kiag li thiab tsis siv zog los sis tsis tiv kev txom nyem rau tej ntawd li. Tiam sis, lawv pheej txhawj txog tej yam xws li thaum twg Vajtswv mam li ncaim lub ntiaj teb mus, thaum twg Vajtswv mam li coj kev puas tsuaj los, thiab yuav ntev npaum li cas es mam li txog Vajtswv hnub, thiab cov lus nug txawv txawv xws li: “Vajtswv puas tseem yuav ntsib peb tom qab Nws ncaim lub ntiaj teb mus lawm? Vajtswv tes hauj lwm puas yuav zoo li no tom qab Nws ncaim lub ntiaj teb mus lawm? Tom qab Vajtswv ncaim lub ntiaj teb mus lawm, Nws yuav nyob rau hauv lub ntuj ceeb tsheej thib peb ntev npaum li cas? Nws puas yuav rov qab los? Puas yuav muaj cov tub txib saum ntuj nyob rau Tiam Lub Nceeg Vaj yav tom ntej? Cov tub txib saum ntuj puas nrog tib neeg sib tham?” Vajtswv ntxub cov tib neeg uas pheej kawm txog cov ncauj lus zoo li no. Yog li tib neeg yuav tsum mob siab rau dab tsi? Yuav paub tus Vajtswv uas yug los ua neeg ntawd li cas, yuav paub Vajtswv tes hauj lwm li cas, thiab yuav nkag siab txhua lo lus uas Vajtswv hais li cas: Tej no yog tib neg tej luag hauj lwm, thiab tej no yog thawj yam uas tib neeg yuav tsum nrhiav kom to taub thiab nkag mus rau hauv. Yog koj tsis nrhiav kom to taub thiab nkag mus rau hauv qhov tseeb no, ces koj txoj kev ntseeg Vajtswv tsis muaj qab hau dab tsi li—yog ib lo lus hais qhuav qhuav uas tsis muaj lub ntsiab xwb. Yog koj pheej xav paub xav pom txog tej yam uas cuam tshuam rau tej uas tsis muaj tib neeg paub thiab thaum twg Vajtswv ncaim lub ntiaj teb mus yam ntsiag to, los sis yog nej pheej tham txog tias Vajtswv lub cev nqaij daim tawv yug nyob rau qhov twg, Nws yug los rau tsev neeg twg, Nws muaj tsev neeg uas keeb kwm zoo li cas, Nws muaj lub neej zoo li cas, Nws muaj hnub nyoog pes tsawg xyoo, Nws kawm ntawv siab npaum li cas, seb Nws puas txeev ntseeg Vajtswv, seb Nws puas txeev nyeem Vajluskub, thiab Nws ntseeg Yexus ntev npaum li cas lawm, thiab ntau yam ntxiv—yog nej pheej kawm tej no, ces yog nej tab tom txiav txim rau Vajtswv thiab tuam mom Vajtswv lub cev nqaij daim tawv ntag! Vajtswv xav kom koj paub txog Nws tus moj yam thiab Nws lub ntsiab tseeb, kom koj thiaj li yuav to taub Nws tej kev npaj siab, kom muaj peev xwm zwm rau Nws, thiab muaj peev xwm xyaum ua qhov tseeb kom Nws txaus siab; Nws tsis cia koj kawm txog Nws thiab tham txog Nws nyob tom Nws nraub qaum. Yog li ntawd, yog peb twb lees txais Vajtswv txoj kev yug los ua neeg thiab Vajtswv theem hauj lwm no, thiab peb twb lees txais Khetos los ua peb lub neej txoj sia thiab peb tus Vajtswv lawm, mas peb yuav tsum muaj lub siab hwm Vajtswv thiab coj tus cwj pwm uas muaj lub siab ncaj ncees rau Vajtswv tej khoom thiab qhov ua neej nyob thiab lub cev nqaij daim tawv uas Nws tau yug los ua neeg ntawd; qhov no yog qhov tsim nyog thiab txoj kev ua neej uas peb yuav tsum muaj. Yog koj mloog zoo li tam sim no koj tsis muaj ib qho kev paub txog Vajtswv li, ces tsis txhob hais txog qhov kev paub ntawd. Tiam sis, hais txog qhov kev paub txog koj tus kheej, hais txog qhov yuav tshawb nrhiav qhov tseeb li cas, thiab hais txog qhov yuav ua koj tej dej num kom zoo li cas, thiab npaj koj tus kheej kom muaj txhua kis ntawm qhov tseeb no. Muaj ib hnub, thaum koj mloog zoo li koj muaj qee qhov kev paub txog Vajtswv tiag tiag lawm, koj mam li qhia ua ke los yeej tau. Tiam sis tsis txhob sim los tham txog tej yam uas hais txog Vajtswv lub cev nqaij daim tawv uas yug los ua neeg los sis qee yam uas tsis muaj tib neeg paub, rau qhov nej yuav ua txhaum rau Vajtswv tus moj yam yam yooj yim heev, yuav raug Vajtswv teem txim, thiab dhau los ua ib tug tib neeg tuam mom, thiab Vajntsujplig Dawb Huv yuav muab koj tso tseg. Qhov no yog ib qho uas koj yuav tsum pom kom tseeb. Qhov pheej kawm txog Vajtswv thiab nug txog qhov hais luag plig ntawd hloov puas tau txoj kev tshawb nrhiav qhov tseeb qhov chaw? Qhov ua li ntawd pab puas tau koj kom paub Vajtswv? Yog koj tsis tuaj yeem pom tej no kom tseeb tseeb, ces koj tsis yog ib tug tib neeg uas ruam thiab tsis paub dab tsi kiag li lod?

Tib neeg yuav tsum to taub tias txoj kev tshawb nrhiav qhov tseeb yog dab tsi kiag. Vim li cas Vajtswv thiaj li nthuav ntau qhov tseeb tawm los cawm tib neeg? Vim li cas Vajtswv thiaj li xav kom tib neeg to taub ntau qhov tseeb? Yog yus tsis to taub qhov tseeb no, yus kho puas tau yus tus moj yam qias vuab tsuab? Yus puas tuaj yeem paub Vajtswv yog tsis to taub qhov tseeb no? Yog yus tsis paub Vajtswv no, yus zwm puas tau rau Vajtswv? Yus puas tuaj yeem pe hawm Vajtswv? Txhua qhov tseeb no puav leej sib cuam tshuam. Yus yuav ua li cas tau txais txoj kev cawm dim yog tsis to taub qhov tseeb no? Nws puas yooj yim to taub qhov tseeb no? Yus puas tuaj yeem to taub qhov tseeb yog tsis raug txiav txim thiab rau txim? Yus puas paub yus tus kheej yog tsis raug qhuab qhia? Yus puas muaj txoj kev lees txim hloov dua siab tshiab tiag tiag yog tsis paub yus tus kheej? Yus puas tau txais txoj kev cawm dim yog tsis muaj txoj kev lees txim hloov dua siab tshiab tiag tiag? Txhua qhov tseeb no yog qhov tseeb uas cov ntseeg Vajtswv yuav tsum to taub, thiab txhua qhov tseeb no yog qhov tseeb uas yuav tsum to taub mas thiaj li yuav tau txais txoj kev cawm dim. Yog koj txoj kev ntseeg Vajtswv pheej tsis meej pem thiab koj tsis tau tshawb nrhiav qhov tseeb li, ces koj yuav plam lub ntsiab ntawm txoj kev ntseeg Vajtswv.

Lub Caij Nplooj Ntoo Zeeg, Xyoo 2007