Hauv Txoj Kev Ntseeg, Yus Yuav Tsum Tsom Ntsoov rau Qhov Tseeb—Qhov Koom Tes Nrog Txoj Kev Lig Kev Cai Ntseeg Mas Tsis Yog Txoj Kev Ntseeg

Koj ceev pes tsawg txoj kev lig kev cai ntseeg? Koj tau tig tawm tsam Vajtswv txoj lus ua raws li koj tus kheej siab nyiam lawm pes tsawg zaus? Muaj pes tsawg zaus lawm uas koj tau muab Vajtswv txoj lus coj los xyaum ua raws vim yog koj ua tib zoo xav txog Nws lub nra thiab nrhiav kev los ua kom tau zoo raws li Nws tej kev npaj siab? Koj yuav tsum to taub Vajtswv txoj lus thiab muab txoj lus ntawd coj los xyaum ua raws li ntawd. Nyob rau ntawm koj tej kev ua thiab tej hauj lwm mas yeej muab hauv paus ntsiab lus, txawm tias qhov no tsis txhais tias ua raws li cov cai los sis ua ib yam dab tsi tsuas yog ua los saib xwb; tab sis, nws txhais hais tias xyaum ua raws li qhov tseeb thiab ua neej raws li Vajtswv txoj lus. Tsuas yog xyaum ua raws li qhov no xwb mas thiaj li ua tau zoo raws li Vajtswv siab. Txhua qhov kev ua uas ua rau Vajtswv txaus siab ntawd mas tsis yog ib txoj cai, tab sis yog qhov xyaum ua raws li qhov tseeb. Muaj ib txhia tib neeg mas lawv tus kheej muaj plhus. Thaum nyob rau ntawm lawv cov kwv tij thiab cov muam lub xub ntiag, tej zaum lawv yuav hais tias lawv tshuav Vajtswv nqi, tab sis nyob tom qab ntawm lawv cov kwv tij thiab cov muam lub nraub qaum mas, lawv tsis xyaum ua raws li qhov tseeb li thiab coj tus cwj pwm txawv tag nrho li lawm. Cov no tsis yog cov Falixais ntawm sab kab li kev cai ntseeg lod? Ib tug tib neeg uas hlub Vajtswv thiab muaj qhov tseeb tiag tiag mas yog ib tug uas ua siab ncaj ncees rau Vajtswv tiam sis tsis muaj plhus rau sab nraud zoo li no. Ib tug tib neeg zoo li no mas thiaj li txaus siab hlo los xyaum ua raws li qhov tseeb thaum muaj xwm txheej, thiab tsis hais lus los yog coj tus cwj pwm uas tawm tsam lawv lub siab txawj xav. Hom tib neeg neeg zoo li no qhia tawm kev txawj ntse thaum muaj teeb meem tshwm sim, thiab nws tej hauj lwm mas yeej muaj hauv paus ntsiab lus txawm yuav muaj xwm txheej dab tsi los xij li. Hom tib neeg no tuaj yeem ua dej num tiag. Muaj qee tus neeg mas uas feem ntau tsuas hais ntawm lub qhov ncauj txog qhov lawv tshuav Vajtswv nqi xwb; lawv siv lawv lub sij hawm los xav rau tej kev txhawj xeeb, xav ua kom luag qhuas thiab ua txuj ua li lawv txaus hlub heev xwb! Cas yuav ntxim ntxub ua luaj li! Yog koj nug lawv hais tias, “Koj puas tuaj yeem qhia kuv txog qhov uas koj tshuav Vajtswv nqi nas?” ces lawv yuav hais tsis tau ib lo lus li. Yog koj ua siab ncaj ncees rau Vajtswv, ces tsis txhob tham rau sab nraud txog qhov ntawd xwb; tiam sis, qhia koj txoj kev hlub rau Vajtswv kiag los ntawm txoj kev uas xyaum ua li ntawd kiag, thiab thov Nws los ntawm lub siab tseeb. Cov neeg uas cia li nrog Vajtswv hais ntawm lub qhov ncauj thiab lam tau lam ua kom dhau xwb ces puav leej yog cov neeg hais lus zoo tab sis siab phem! Qee tus neeg hais txog qhov tshuav Vajtswv nqi txhua zaus thaum lawv thov Vajtswv, thiab pib quaj txhua zaus thaum lawv thov Vajtswv, tab txawm tsis yog Vajntsujplig txhawb los xij li. Cov neeg zoo li no mas raug tej kev lis kev cai ntseeg dab qhuas thiab tej kev xav nkag rau lawm; lawv ua neejraws li tej kab lis kev cai dab qhuas thiab kev xav phem zoo li ntawd, pheej ntseeg tias tej kev ua li ntawd mas ua rau Vajtswv zoo siab thiab tias Nws nyiam tej kua muag uas zoo los sis tu siab ua ntiav ntiav li ntawd. Yuav muaj dab tsi zoo los ntawm cov neeg ruam no los? Yuav kom qhia tau txoj kev txo hwj chim, ib txhia thiaj li ua txuj hais lus mos lus muag rau ntawm lwm tus lub xub ntiag. Ib txhia yog txhob txwm ua qhev thaum nyob rau ntawm lwm tus neeg lub xub ntiag, ua zoo li cov me nyuam yaj uas tsis muaj ib lub zog li. Qhov no puas ib tug xeeb ceem uas phim rau cov neeg ntawm lub nceeg vaj? Cov neeg ntawm lub nceeg vaj yuav tsum muaj lub neej zoo thiab nyob ywj pheej, dawb huv thiab qhib siab lug, coj ncaj thiab ntxim hlub, thiab ua neej nyob hauv txoj kev ywj pheej. Lawv yuav tsum muaj kev ncaj ncees thiab meej mom thiab muaj peev xwm tuav tej lus tim khawv kom khov kho txawm lawv mus qhov twg los xij li; Vajtswv thiab tib neeg yeej hlub cov tib neeg uas zoo li no. Cov neeg uas tseem tsis tau paub txoj kev ntseeg mas muaj ntau qhov kev xyaum ua nyob rau sab nraud dhau lawm; lawv yuav tsum raug qhuab qhia thiab raug txom nyem ib tus ua ntej tso. Cov neeg uas muaj kev ntseeg Vajtswv nyob rau hauv nruab siab mas muab cais tsis tau rau sab nraud kom lwm tus txhob pom, tab sis lawv tej kev coj ua thiab tej hauj lwm tsim nyog qhuas. Tsuas yog cov neeg zoo li no xwb thiaj li suav tau tias ua lub neej raws li Vajtswv txoj lus. Yog koj tshaj tawm txoj moo zoo txhua hnub mus rau ntau tus neeg es vam tias yuav coj tau lawv rau txoj kev cawm dim, tab sis thaum kawg tseem ua neej raws li tej kev cai thiab tej kev qhuab qhia, ces koj yuav coj tsis tau koob meej los rau Vajtswv. Cov neeg zoo li no yog cov thawj coj ntawm sab kab lis kev cai ntseeg xwb, thiab yog cov neeg ncauj lus zoo tab sis siab phem. Thaum twg cov neeg ntawm sab kab lis kev cai ntseeg ntawd tuaj sib sau, lawv yuav nug hais tias, “Tus viv ncaus, ob peb hnub no koj puas nyob zoo?” Tej zaum nws yuav teb hais tias, “Kuv xav tias kuv tshuav Vajtswv ib qho nqi, thiab tias kuv ua tsis tau kom tau zoo raws li Nws tej kev npaj siab.” Muaj dua lwm tus yuav hais tias, “Kuv los ib yam thiab uas xav tias tshuav Vajtswv nqi thiab tias kuv tsis muaj peem xwm ua kom tau zoo raws li Nws siab.” Ob peb sob lus no thiab cov lus no xwb twb nthuav qhov phem tob hauv lawv tawm lawm; cov lus zoo li no mas tsis ntxim nyiam kiag li, thiab txob siab heev li. Tus yam ntxwv ntawm cov neeg zoo li no mas tawm tsam Vajtswv. Cov neeg uas tsom ntsoov rau qhov muaj tiag ntawd yeej tham txog txhua yam uas nyob hauv lawv lub siab, thiab qhib lawv lub siab rau txoj kev sib qhia. Lawv tsis koom ua ib qho kev dag cuav, tsis ua kom pom kev ua hauj lwm tsis muaj nuj nqis los sis tsis muaj kev lom zem. Lawv yeej ib txwm ua ncaj nraim, thiab tsis ceev tej kev cai hauv ntiaj teb. Qee tus neeg muaj ib lub ntsej muag zoo rau sab nraud, mus txog ntua qhov uas tsis muaj qab hau li lawm. Thaum ib tug neeg hu nkauj, lawv txawm pib seev cev, haj tseem tsis paub txog tias cov mov nyob hauv lawv cov lauj kaub twb kub hnyiab tag lawm. Cov neeg zoo li no mas tsis zoo los sis tsis ntxim hwm, thiab lawv tsis muaj nqis hlo li. Txhua yam no yog tej kev qhia tshwm kom pom tau meej txog ib qho uas tsis muaj qhov muaj tiag. Thaum qee leej neeg paub txog tej yam ntawm sab ntsujplig, txawm hais tias lawv tsis hais txog Vajtswv los xij, lawv tseem muaj kev hlub rau Nws tob heev. Koj txoj kev xav uas tshuav Vajtswv nqi yeej ua tsis tau li cas rau lwm tus neeg; koj yog tus tshuav Vajtswv nqi, tsis yog lwm tus. Dab tsi muaj nuj nqi rau koj uas koj pheej hais li no rau lwm tus? Koj yuav tsum tau saib qhov tseem ceeb saib puas muaj tiag, tsis yog saib ntawm sab cev nqaij daim tawv sab nraud xwb. Tib neeg tej kev coj zoo sab nrauv sawv cev rau dab tsi? Lawv sawv cev rau lub cev nqaij daim tawv. Thiab tej kev ua sab nrauv, txawm yog cov uas zoo tshaj plaws los, yeej tsis sawv cev rau txoj sia; lawv tsuas qhia tau txog koj tus kheej tus yam ntxwv xwb. Tib neeg tej kev ua sab nrauv yeej ua tsis tau kom tau raws li Vajtswv tej kev npaj siab. Koj yuav hais txog qhov koj tshuav nuj nqis rau Vajtswv tsis tu ncua, tab sis koj tsis tuaj yeem pab lwm tus lub neej los yog txhawb kom lawv muaj lub siab hlub Vajtswv. Koj ntseeg tias cov kev coj li ntawm koj ko yuav ua rau Vajtswv zoo siab no lov? Koj xav tias nws yog Vajtswv txoj kev npaj siab uas ua kom koj ua li no, thiab tias koj tej kev ua ntawd yeej mus raws li sab kev ntseeg lawm, tab sis qhov tseeb, txhua yam tsis muaj nuj nqis kiag li! Koj ntseeg tias yam ua rau koj txaus siab thiab yam koj txaus siab ua yog yam ncaj ncees uas ua rau Vajtswv zoo siab. Yam koj nyiam puas sawv cev tau rau Vajtswv? Tib neeg tus cwj pwm puas tuaj yeem sawv cev rau Vajtswv tau? Qhov twg haum koj ces yog qhov uas Vajtswv ntxub tshaj, thiab koj tus cwj pwm yog cov uas Vajtswv ntxub ntxaug. Yog tias koj xav tias koj tshuav nqi, ces cia li mus thov Vajtswv; tsis tas yuav hais qhia rau lwm tus paub li. Yog tias koj tsis thov Vajtswv, thiab xav kom lawv mloog koj tus kheej hais rau ntawm lwm tus lub xub ntiag xwb, qhov no puas yuav ua tau kom txaus li Vajtswv tej kev npaj siab? Yog koj tej kev ua ib txwm yog rau sab nrauv xwb, ces qhov ntawd qhia tau tias koj yog tus neeg uas siab ploj las thiab tsuas muaj qhov pom sab nrauv xwb. Cov neeg uas tsuas muaj tej kev coj zoo sab nrauv xwb tiam sis tsis muaj qhov muaj tiag, lawv yog neeg zoo li cas? Lawv yog cov Falixais uas ua txuj ua neeg ncaj ncees, thiab yog cov neeg tseem ceeb ntawm kev ntseeg! Yog nej tsis muab nej tej kev ua sab nrauv tso tseg, thiab hloov pauv tsis tau, ces nej txoj kev ua txuj ua neeg ncaj ncees yuav muaj ntau zuj zus tuaj. Nej txoj kev ua txuj ua neeg ncaj ncees ntau npaum twg, nej haj yam yuav tawm tsam Vajtswv ntau npaum ntawd. Thaum kawg, cov neeg zoo li ntawd yeej yuav raug muab pov tseg!