Cov Thawj Coj thiab Cov Neeg Ua Hauj Lwm Tej Luag Hauj Lwm (4)

5. Ua Kom Muaj Kev Nkag Siab thiab Kev To Taub Tshiab Tas Li Txog Qhov Xwm Txheej thiab Qhov Kev Nce Qib ntawm Txhua Tes Hauj Lwm, thiab Kom Muaj Peev Xwm Daws Tau Tej Teeb Meem Ntawd Kom Ncav Sij Hawm, Kho Tej Uas Yuam Kev Kom Yog, thiab Kho Tej Uas Tsis Zoo Hauv Tes Hauj Lwm Ntawd Kom Zoo Kom Tes Hauj Lwm Ntawd Thiaj Li Yuav Mus Tau Zoo.

Txoj kev sib qhia hnub no yog hais txog lub luag hauj lwm uas tsib ntawm cov thawj coj thiab cov neeg ua hauj lwm: “Ua kom muaj kev nkag siab thiab kev to taub tshiab tas li txog qhov xwm txheej thiab qhov kev nce qib ntawm txhua tes hauj lwm, thiab kom muaj peev xwm daws tau tej teeb meem ntawd kom ncav sij hawm, kho tej uas yuam kev kom yog, thiab kho tej uas tsis zoo hauv tes hauj lwm ntawd kom zoo kom tes hauj lwm ntawd thiaj li yuav mus tau zoo.” Peb yuav tsom ntsoov rau lub luag hauj lwm no los soj ntsuam txhua yam kev qhia tshwm uas pom tau meej txog cov thawj coj cuav, los saib seb cov thawj coj cuav ntawd puas ua lawv tej luag hauj lwm kom tiav nyob rau hauv tes hauj lwm no, thiab seb lawv puas tuav rawv lawv tej dej num ruaj thiab ua lawv tes hauj lwm kom zoo.

Cov Thawj Coj Cuav Xyiv Fab rau Txoj Kev Tau Zoo thiab Tsis Koom Nrog Cov Hauv Paus Kom Tob Kom To Taub Tes Hauj Lwm

Lub luag hauj lwm tsib ntawm cov thawj coj thiab cov neeg ua hauj lwm ntawd xub hais txog “qhov ua kom muaj kev nkag siab thiab kev to taub tshiab tas li txog qhov xwm txheej thiab qhov kev nce qib ntawm txhua tes hauj lwm.” “Qhov xwm txheej ntawm txhua tes hauj lwm” ntawd yog hais txog dab tsi? Nws yog hais txog qhov xwm txheej tam sim no ntawm ib teg hauj lwm ntawd seb zoo li cas lawm. Cov thawj coj thiab cov neeg ua hauj lwm yuav tsum to taub dab tsi ntawm no? Piv txwv li: Cov neeg ua hauj lwm tab tom ua tej hauj lwm twg kiag tiag, lawv khwv rau tej hauj lwm dab tsi, seb tej hauj lwm no puas tsim nyog ua, seb tej hauj lwm no puas yog qhov tseem ceeb thiab seb puas yog tej hauj lwm tseem ceeb, seb cov neeg ua hauj lwm no ua tau zoo npaum li cas, seb tes hauj lwm ntawd puas nce qib zoo, seb cov neeg ua hauj lwm ntawd puas phim rau cov hauj lwm, seb txhua tus puas muaj hauj lwm txaus ua, seb puas muaj tej qhov uas muaj neeg ua hauj lwm coob dhau rau ib teg hauj lwm twg lawm—uas yog muaj neeg ua hauj lwm coob dhau rau tes hauj lwm uas tsawg tsawg xwb, es tib neeg feem coob zaum dawb xwb—los sis tej qhov uas hauj lwm ntau dhau tiam sis muaj neeg ua hauj lwm tsawg dhau lawm, thiab tus saib xyuas qhia tsis tau kom zoo, ces thiaj li ua rau tes hauj lwm tsis zoo txaus thiab nce qib qeeb. Tej no puav leej yog tej xwm txheej uas cov thawj coj thiab cov neeg ua hauj lwm yuav tsum to taub. Tsis tas li ntawd xwb, thaum ua txhua tes hauj lwm ntawd, seb puas muaj leej twg ua rau muaj kev cuam tshuam los sis kev rhuav tshem, seb puas muaj leej twg rub kom txoj kev nce qib qeeb los sis ua kom puas, seb puas muaj ib hom kev cuam tshuam los sis kev ua dog ua dig tshwm sim—tej no kuj yog tej uas cov thawj coj thiab cov neeg ua hauj lwm yuav tsum to taub thiab. Yog li ntawd lawv yuav ua li cas thiaj li to taub txog tej teeb meem no? Tej zaum ib txhia thawj coj yuav hu xov tooj qee zaus mus nug hais tias, “Tam sim no nej puas tsis khoom?” Thaum hnov lwm tus hais tias lawv tsis khoom kiag li, tej zaum lawv yuav teb hais tias, “Zoo, tsuav yog nej tsis khoom xwb mas, ces kuv kaj siab lawm.” Nej xav li cas txog txoj kev ua hauj lwm li no? Nej xav li cas txog lo lus nug no? Qhov no puas yog ib lo lus nug uas tseem ceeb, tsim nyog nug? Qhov no yog tus yam ntxwv ntawm cov thawj coj cuav txoj kev ua hauj lwm—lawv tsuas yog lam ua kom dhau xwb. Lawv txaus siab rau qhov ua hauj lwm me ntsis kom lawv lub siab kaj me ntsis xwb tiam sis tsis tsom ntsoov rau qhov ua hauj lwm tiag tiag, haj yam tsis mus rau hauv theem hauv paus, mus rau txhua pab pawg, kom to taub txog qhov xwm txheej ntawm tes hauj lwm tam sim no. Piv txwv li, seb cov neeg ua hauj lwm puas haum, seb tes hauj lwm ntawd ua tau li cas lawm, seb puas muaj teeb meem dab tsi tshwm tuaj—cov thawj coj cuav tsis nug txog tej teeb meem tiag no, tiam sis lawv nrhiav ib qho chaw uas tsis muaj neeg pom mus noj mus haus, thiab ua kom lawv tus kheej muaj kev xyiv fab yam tsis raug cua tsis raug tshav li. Lawv tsuas yog xa ntawv los sis kom lwm tus sawv lawv cev nug qee zaus xwb, xav hais tias qhov no suav tau tias yog ua lawv txoj hauj lwm lawm. Tseem tshaj ntawd thiab, tej zaum mas cov kwv tij thiab cov muam twb tsis pom lawv tau li kaum hnub los sis ib nrab hli. Thaum twg nug cov kwv tij thiab cov muam hais tias, “Nej tus thawj coj khwv ua dab tsi? Nws puas ua hauj lwm tiag? Nws puas coj nej kev thiab daws teeb meem?” no mas lawv teb hais tias, “Tsis txhob hais txog qhov ntawd, peb twb tsis pom peb tus thawj coj los tau ib hlis no lawm. Txij li zaum tas los uas nws tuav kev sib txoos ua ke rau peb, ces nws yeej tsis tau tuaj dua li lawm, thiab tam sim no peb muaj ntau yam teeb meem uas tsis muaj leej twg pab peb daws tej teeb meem ntawd li. Tsis muaj lwm txoj kev lawm; peb pab pawg tus saib xyuas thiab peb cov kwv tij thiab cov muam yuav tsum tau los ua ke los thov Vajtswv thiab nrhiav tej hauv paus ntsiab lus, los sib tham thiab sib koom tes ua hauj lwm ua ke. Tus thawj coj pab tsis tau dab tsi nyob rau ntawm no; tam sim no peb tsis muaj thawj coj lawm.” Tus thawj coj no ua nws tes hauj lwm zoo li cas? Tus Nyob Saud nug tus thawj coj no hais tias, “Tom qab ua zaj yeeb yaj kiab tas lawm, koj puas tau txais ib tsab ntawv yeeb yaj kiab tshiab li lawm? Tam sim no koj tab tom ua zaj yeeb yaj kiab twg? Tes hauj lwm ntawd nce qib mus zoo li cas lawm?” Tus thawj coj ntawd txawm teb hais tias, “Kuv tsis paub. Tom qab ua zaj yeeb yaj kiab tas lawm, kuv muaj ib qho kev sib txoos ua ke nrog lawv, tom qab ntawd lawv txhua tus twb muaj zog zis, tsis xav phem, thiab tsis muaj kev nyuaj dab tsi li lawm. Peb tsis tau sib ntsib txij thaum ntawd los lawm. Yog koj xav paub lawv qhov xwm txheej tam sim no, ces kuv yeej hu tau mus nug rau koj.” “Vim li cas koj thiaj li tsis hu mus kom to taub qhov xwm txheej ntawd kom ntxov dua?” “Vim kuv khwv dhau lawm, mus koom kev sib txoos ua ke txhua qhov chaw li. Tseem tsis tau txog lawv zeeg. Kuv tsuas yuav to taub qhov xwm txheej ntawd thaum kuv nrog lawv sib txoos ua ke rau lwm zaus xwb.” Qhov no yog nws tus cwj pwm rau pawg ntseeg tes hauj lwm. Ces tus Nyob Saud thiaj li hais tias, “Koj tsis paub txog qhov xwm txheej tam sim no los sis tej teeb meem uas muaj nyob rau hauv tes hauj lwm ua yeeb yaj kiab ntawd, yog li ntawd hais txog tes hauj lwm tshaj tawm txoj moo zoo ne nce qib mus zoo li cas lawm? Lub teb chaws twg tes hauj lwm tshaj tawm txoj moo zoo nthuav tau mus zoo tshaj plaws, raws li lub siab xav tshaj plaws? Lub teb chaws twg cov neeg muaj peev xwm zoo dua thiab nkag siab sai dua? Lub teb chaws twg muaj lub neej hauv pawg ntseeg zoo dua?” “Au, kuv tsuas mob siab rau tej kev sib txoos ua ke xwb, kuv tsis nco qab nug txog tej no lawm.” “Yog li ntawd, nyob rau hauv pab pawg tshaj tawm txoj moo zoo ntawd, muaj pes tsawg leej ua tau tim khawv? Muaj pes tsawg leej thiaj li tab tom raug cob qhia kom ua tau tim khawv? Leej twg yog tus leg lub luag hauj lwm thiab taug qab txog pawg ntseeg tes hauj lwm thiab lub neej hauv pawg ntseeg nyob rau lub teb chaws twg? Leej twg yog tus ywg dej thiab yug? Cov tswv cuab tshiab hauv pawg ntseeg uas los ntawm ntau lub teb chaws los ntawd puas tau pib ua lub neej hauv pawg ntseeg? Puas tau muab lawv tej kev xav phem thiab tej kev xav hauv nruab siab daws kom tag mus? Muaj pes tsawg leej uas cog tau hauv paus rau hauv txoj hau kev tseeb lawm, es tsis raug cov neeg ntawm sab kab lis kev cai ntseeg dag mus ntxiv lawm? Tom qab ntseeg Vajtswv los tau ib ob xyoos lawm, muaj pes tsawg leej ua tau lawv tes dej num? Koj puas to taub thiab nkag siab txog tej no? Thaum muaj teeb meem tshwm tuaj rau hauv tes hauj lwm, leej twg thiaj li daws tau tej teeb meem ntawd? Nyob rau hauv pab pawg tshaj tawm txoj moo zoo ntawd, pab pawg twg los sis cov neeg twg thiaj li leg lub luag hauj lwm rau lawv tes hauj lwm thiab ua tau txiaj ntsig tiag, koj puas paub?” “Kuv tsis paub. Yog koj xav paub no, kuv yeej nug tau rau koj. Yog koj tsis maj no, kuv mam li nug thaum kuv muaj sij hawm; kuv tseem tsis tau khoom!” Tus thawj coj no puas tau ua ib teg hauj lwm tiag li? (Tsis tau.) Nws hais tias “Kuv tsis paub” rau txhua yam xwb; nws tsuas nug txog txhua yam rau thaum nws raug nug xwb, yog li ntawd nws khwv rau dab tsi? Txawm nws mus koom tej kev sib txoos ua ke rau pab pawg twg los sis mus tshuaj xyuas tes hauj lwm twg los xij, nws yeej pom tsis tau tej teeb meem hauv tes hauj lwm thiab nws tsis paub tias xyov yuav daws tej teeb meem ntawd li cas li. Yog koj tsis tuaj yeem pom tshab plaws txog ntau tus neeg tej yam ntxwv thiab lawv tus cwj pwm rau tib zaug xwb, ces yam tsawg kawg koj yuav tsum taug qab txog, kom to taub, thiab kom nkag siab txog tej teeb meem uas muaj nyob rau hauv tes hauj lwm, seb tes hauj lwm twg tab tom ua tam sim no, thiab tes hauj lwm ntawd nce qib mus txog theem twg lawm? Txawm li cas los xij, cov thawj coj cuav twb ua tsis tau npaum li no; lawv tsis yog dig muag lawm lod? Txawm lawv mus rau ntau pab pawg hauv pawg ntseeg mus taug qab thiab tshuaj xyuas tes hauj lwm los, lawv yeej tsis to taub qhov xwm txheej tiag tiag kiag li, pom tsis tau tej teeb meem tseem ceeb, thiab txawm lawv pom qee yam teeb meem los, lawv yeej daws tsis tau tej teeb meem ntawd li.

Muaj ib pab neeg ua yeeb yaj kiab uas tab tom npaj yuav ua ib zaj yeeb yaj kiab uas nyuaj heev uas yog ib hom uas lawv tsis tau sim ua dua li. Txawm lawv tsim nyog los ua tsab ntawv yeeb yaj kiab no los tsis tsim nyog, txawm tus coj ua yeeb yaj kiab thiab tag nrho pab neeg ntawd muaj peev xwm ua tes hauj lwm no kom tiav los tsis muaj los—lawv tus thawj coj tsis paub txog tej xwm txheej no. Nws tsuas hais tias, “Nej twb txais ib tsab ntawv yeeb yaj kiab tshiab lawm. Yog li ntawd, cia li ua mus yees. Kuv mam li txhawb nej thiab taug nej qab. Ua kom zoo tshaj plaws, thiab thaum muaj dab tsi nyuaj tshwm tuaj, thov Vajtswv thiab daws tej ntawd raws li Vajtswv cov lus.” Ces nws txawm mus lawm. Tus thawj coj no pom tsis tau los sis nrhiav tsis tau txog ib qho nyuaj uas muaj nyob rau ntawd li; ua hauj lwm li no puas yuav zoo tau? Tom qab pab neeg ua yeeb yaj kiab tau txais tsab ntawv no lawm, tus coj thiab cov tswv cuab pheej soj ntsuam zaj dab neeg thiab sib tham txog tej khaub ncaws thiab kev teeb tsa lub koob, tiam sis tsis paub tias yuav yees zaj yeeb yaj kiab ntawd li cas; lawv tsis muaj peev xwm pib zaj yeeb yaj kiab ntawd kom raws li txheej txheem. Qhov no tsis yog qhov xwm txheej tam sim no lod? Tej no tsis yog tej teeb meem uas muaj lod? Tej teeb meem no tsis yog tej uas tus thawj coj yuav tsum daws lod? Tus thawj coj ntawd siv txhua hnub mus nyob rau hauv tej kev sib txoos ua ke xwb, los daws tsis tau tej teeb meem tiag tom qab tej kev sib txoos ua ke los tau ntau hnub lawm, thiab tseem ua tsis tau yeeb yaj kiab kom mus tau li ib txwm ua. Tus thawj coj ntawd puas pab tau dab tsi li? (Pab tsis tau li.) Nws tsuas qw tej lus kom muaj kev txhawb zog xwb: “Peb zaum dawb tsis tau, peb noj dawb haus dawb hauv Vajtswv lub tsev tsis tau!” Nws haj tseem cem tib neeg hais tias: “Nej tsis muaj lub siab txawj xav li, noj dawb haus dawb hauv Vajtswv lub tsev xwb es tsis muaj siab ntsws kiag li—nej tsis txaj muag lod?” Tom qab nws hais li no lawm, txhua tus lub siab txawj xav txawm hnov raug qhuab ntuas me ntsis hais tias: “Yog, tes hauj lwm mas mus nce qib qeeb heev, thiab peb tseem tau noj peb pluag mov rau ib hnub li no—qhov no tsis yog noj dawb haus dawb xwb lod? Peb yeej tsis tau ua hauj lwm tiag tiag li. Yog li ntawd, leej twg yuav daws tej teeb meem uas tshwm tuaj nyob hauv tes hauj lwm no? Peb daws tsis tau yog li ntawd peb thiaj li nug tus thawj coj, tiam sis tus thawj coj ntawd tsuas hais kom peb rau siab ntso thov Vajtswv, nyeem Vajtswv cov lus, thiab sib koom tes kom sib haum xeeb xwb, tsis qhia tias yuav daws tej teeb meem no li cas li.” Tus thawj coj ntawd tuav tej kev sib txoos ua ke nyob rau ntawm qhov chaw no txhua hnub, tiam sis daws tsis tau tej teeb meem no li. Sij hawm dhau mus, ib txhia tib neeg txoj kev ntseeg thiaj li txias lawm, thiab lawv muaj tus yam ntxwv poob siab tag kev cia siab vim lawv tsis pom ib txoj hau kev mus lawm tom ntej thiab tsis paub tias yuav ua zaj yeeb yaj kiab ntawd li cas. Lawv muab lawv txoj kev cia siab kawg tso rau tus thawj coj ntawd, cia siab tias nws yuav daws tau qee yam teeb meem tiag, tiam sis tu siab kawg, tus thawj coj no zoo li tus neeg dig muag xwb, tsis kawm txog txoj hauj lwm thiab tsis sib qhia, tsis sib tham, los sis tsis nrhiav kev nrog cov uas to taub txog txoj hauj lwm ntawd li. Nws pheej tuav rawv ib phau ntawv uas hais txog Vajtswv cov lus thiab hais tias, “Kuv tab tom nyeem Vajtswv cov lus vim txoj kev mob siab pe hawm ntawm sab ntsujplig. Kuv tab tom npaj kuv tus kheej kom muaj qhov tseeb. Tsis txhob cuam tshuam kuv, kuv tsis khoom!” Thaum kawg, thiaj li muaj teeb meem ntau zuj zus tuaj, ua rau tes hauj lwm nyob rau ib qho chaw uas yuav luag liam sim lawm, tiam sis tus thawj coj cuav tseem xav tias nws ua hauj lwm tau zoo heev. Vim li cas zoo li ntawd? Nws ntseeg hais tias vim nws twb tuav tej kev sib txoos ua ke, nug txog qhov xwm txheej ntawm tes hauj lwm, qhia tau teeb meem, qhia Vajtswv cov lus, muab tib neeg tej yam ntxwv qhia tawm, thiab txhua tus twb muab lawv tus kheej los piv rau tej yam ntxwv no thiab txiav txim siab los ua lawv tes dej num kom zoo lawm, ces nws lub luag hauj lwm ua ib tug thawj coj ntawd twb tiav lawm, thiab nws twb ua txhua yam uas nws yuav tsum tau ua lawm—yog tej hauj lwm meej meej uas ntsig txog tej yam qib siab ua tsis tau zoo, ces qhov ntawd tsis yog qhov tus thawj coj txhawj lawm. Hom thawj coj no yog dab tsi? Pawg ntseeg tes hauj lwm twb poob rau ib qho chaw uas yuav luag liam sim lawm, tiam sis nws tsis txhawj los sis ntxhov siab kiag li. Yog tus Nyob Saud tsis nug los sis tsis txhib, ces nws yuav cia li ncua sij hawm mus li, yeej tsis hais txog yam uas tshwm sim nyob hauv qab nws li, tsis daws teeb meem li. Ib tug thawj coj zoo li no puas tau ua nws tej luag hauj lwm uas ua thawj coj kom tiav? (Tsis tau.) Yog li ntawd, nws tham txog dab tsi tag hnub rau hauv tej kev sib txoos ua ke xwb? Nws lam tau lam hais lus, tsuas yog qhuab qhia tej kev qhuab qhia thiab qw tej lus qw xwb. Tus thawj coj tsis daws tej teeb meem tiag hauv tes hauj lwm, tsis daws tib neeg txoj kev ua dog ua dig thiab kev xav phem, thiab tsis paub xyov yuav daws tej teeb meem hauv tib neeg tes hauj lwm kom raws li qhov tseeb tej hauv paus ntsiab lus li cas li. Vim li ntawd, tag nrho tes hauj lwm thiaj li nres thiab tsis pom ib qho kev nce qib los tau ntev lawm. Tiam sis tus thawj coj ntawd tsis txhawj kiag li. Qhov no tsis yog ib qho kev qhia tshwm uas pom tau meej txog cov thawj coj cuav uas tsis ua hauj lwm tiag lod? Lub ntsiab tseeb ntawm qhov kev qhia tshwm uas pom tau meej txog cov thawj coj cuav no yog dab tsi? Qhov no tsis yog ib qho kev tsis ua lub luag hauj lwm loj heev lod? Qhov tsis saib xyuas yus tes hauj lwm kom zoo, tsis ua yus tej luag hauj lwm kom tiav—qhov no yog kiag qhov uas cov thawj coj cuav ua ntag. Koj nyob rau ntawm qhov chaw ntawd tsuas yog lam ua kom dhau xwb, tsis daws tej teeb meem tiag. Koj nyob rau ntawm qhov chaw ntawd tsuas yog los dag tib neeg xwb; yog tsis ua ib teg hauj lwm tiag li, ces txawm yog koj yuav nyob ntawd tas li los, yeej yuav ua tsis tau dab tsi tiav li. Muaj ntau yam teeb meem tshwm tuaj rau hauv tes hauj lwm thiab ntawm tej yam qib siab, uas yog qee yam uas koj yeej daws tau tiam sis koj tsis daws—qhov no twb yog ib qho kev tsis ua lub luag hauj lwm kom zoo loj lawm. Tshaj ntawd, koj ob lub qhov muag thiab koj lub siab dig lawm: Qee zaus thaum koj pom teeb meem, koj pom tsis tau tshab plaws mus rau lub ntsiab tseeb ntawm tej teeb meem ntawd. Koj daws tsis tau tej teeb meem ntawd, tiam sis koj ua txuj tias koj saib xyuas tau tej teeb meem ntawd, tsuas lam tuav kom ruaj xwb tiam sis tsis kam qhia los sis nrog cov uas to taub qhov tseeb tham, thiab tsis qhia tawm rau tus Nyob Saud los sis tsis nrhiav kev los ntawm tus Nyob Saud los li thiab. Vim li cas zoo li no? Puas yog koj ntshai tsam raug ntuas? Ntshai tsam tus Nyob Saud paub qhov tseeb txog koj ces muab koj rho tawm? Qhov no tsis yog tsom ntsoov rau lub meej mom es tsis tiv thaiv tes hauj lwm ntawm Vajtswv lub tsev ib qho me me li lod? Yog muaj hom kev xav zoo li no, koj yuav ua li cas ua tau koj tes dej num kom zoo?

Txawm ib tug thawj coj los sis ib tug neeg ua hauj lwm ua tes hauj lwm tseem ceeb dab tsi, thiab tes hauj lwm no yog hom hauj lwm dab tsi los xij, thawj qhov uas lawv yuav tsum ua yog to taub thiab nkag siab tias tes hauj lwm ntawd mus li cas lawm. Lawv yuav tsum mus kiag tod mus taug qab thiab nug, kom lawv tus kheej thiaj li paub kiag cov ntaub ntawv. Lawv yuav tsum tsis txhob vam khom rau tej lus xaiv lus cua los sis mloog lwm tus tej lus qhia tawm xwb. Tiam sis, lawv yuav tsum siv lawv tus kheej ob lub qhov muag los soj ntsuam qhov xwm txheej ntawm cov neeg ua hauj lwm thiab seb tes hauj lwm nce qib li cas lawm, thiab to taub seb muaj tej kev nyuaj dab tsi, seb puas muaj tej qho uas tsis mus raws li tus Nyob Saud tej kev cheem tsum, seb puas muaj kev ua txhaum tej hauv paus ntsiab lus, seb puas muaj kev cuam tshuam los sis kev tab kaum, seb puas muaj qhov uas tsis muaj cov cuab yeej uas tsim nyog los sis cov ntaub ntawv qhia txog tes hauj lwm qib siab—lawv yuav tsum paub txhua yam no. Txawm lawv yuav mloog tej lus qhia tawm ntau npaum li cas, los sis hnov tej lus xaiv lus cua ntau npaum li cas los xij, ob qho no yeej piv tsis tau rau qhov mus saib kiag; qhov lawv pom ntawm lawv tus kheej ob lub qhov muag ntawd mas yog dua thiab tso siab tau dua. Thaum lawv paub txhua kis ntawm qhov xwm txheej ntawd lawm, ces lawv yuav paub meej tias muaj dab tsi tshwm sim lawm. Tshwj xeeb mas lawv yuav tsum muaj ib qho kev to taub kom meej thiab kom yog tias leej twg muaj peev xwm zoo thiab tsim nyog cob qhia, vim tsuas yog qhov no xwb thiaj li yuav ua rau lawv cob qhia thiab siv tau tib neeg kom yog, uas yog qhov tseem ceeb heev rau cov thawj coj thiab cov neeg ua hauj lwm yuav ua lawv tes hauj lwm kom zoo. Cov thawj coj thiab cov neeg ua hauj lwm yuav tsum muaj ib txoj kev thiab tej hauv paus ntsiab lus los cob qhia cov tib neeg muaj peev xwm zoo. Tsis tas li ntawd xwb, lawv yuav tsum muaj ib qho kev nkag siab thiab kev to taub txog ntau hom teeb meem thiab kev nyuaj uas muaj nyob rau hauv pawg ntseeg tes hauj lwm, thiab paub tias yuav daws tej ntawd li cas, thiab lawv kuj yuav tsum muaj lawv tus kheej tej tswv yim thiab tej lus qhia txog tias tes hauj lwm yuav nce qib li cas, los sis tej kev vam rau tes hauj lwm ntawd rau yav tom ntej. Yog lawv muaj peev xwm qi muag los yeej hais tau meej meej txog tej yam zoo li no, tsis muaj kev ua xyem xyav los sis kev tsis ntseeg li, ces yuav yooj yim ua tes hauj lwm ntawd dua. Thiab qhov ua hauj lwm li no, ib tug thawj coj yuav ua nws tej luag hauj lwm tiav, puas yog? Lawv yuav tsum paub zoo tias yuav daws tej teeb meem uas hais los saum no nyob rau hauv tes hauj lwm li cas, thiab lawv yuav tsum xav txog tej no tas li. Thaum lawv ntsib tej kev nyuaj, lawv yuav tsum sib qhia thiab sib tham nrog txhua tus, nrhiav qhov tseeb kom daws tau tej teeb meem ntawd. Qhov ua hauj lwm tiag tiag kom ruaj khov li no, yuav tsis muaj kev nyuaj uas daws tsis tau li. Cov thawj coj cuav puas ua li no? (Tsis ua.) Cov thawj coj cuav tsuas paub ua txuj thiab dag tib neeg xwb, coj zoo li lawv mas to taub tej yam uas lawv tsis to taub, daws tsis tau ib qho teeb meem tiag tiag li thiab tsuas yog ua tej yam uas tsis muaj qab hau xwb. Thaum nug lawv tias lawv ua dab tsi, lawv hais tias, “Qhov chaw peb nyob ntawd tsis muaj ob peb lub tog rwb zaum, thiab pab ua yeeb yaj kiab ntawd tsis muaj ib daim ntaub txaus los ua khaub ncaws, yog li ntawd kuv thiaj li mus yuav ib co lawm. Lwm lub sij hawm mas chav ua noj hos tsis muaj zaub lawm, thiab tus ua noj tawm tsis tau mus, yog li ntawd kuv thiaj li yuav tau tawm mus yuav ib co los, thiab kuv yuav ob peb hnab hmoov nplej thaum kuv mus. Kuv tus kheej yuav tsum tau ua txhua yam no.” Lawv yeej khwv heev tiag tiag. Tsis yog lawv tsis quav ntsej lawv tej hauj lwm tiag lod? Lawv tsis quav ntsej kiag li los sis tsis ris ib lub nra kiag li thaum hais txog tes hauj lwm uas nyob rau hauv lawv tej luag hauj lwm tam li yog cov thawj coj, tsuas yog nrhiav kev ua dog ua dig kom dhau xwb. Qhov teeb meem ntawm lawv tus kheej lub peev xwm uas tsis zoo thiab qhov lawv ob lub qhov muag thiab siab dig ntawd twb loj txaus lawm, tiam sis lawv kuj tsis ris lub nra thiab nyiam kev tau zoo, pheej siv ntau hnub los nyob rau qee qho chaw uas xis nyob xwb. Thaum ib tug neeg twg muaj ib qho teeb meem es nrhiav lawv los daws mas, nrhiav tsis pom lawv nyob qhov twg li, thiab tsis muaj leej twg paub tias lawv ua dab tsi tiag tiag. Lawv tswj lawv tus kheej lub sij hawm. Lub lim tiam no, lawv tuav ib qho kev sib txoos ua ke rau ib pab neeg rau ib tag kis sawv ntxov, ces so nyob rau thaum tav su, thiab tom qab ntawd nyob rau thaum tsaus ntuj, lawv sau cov neeg uas saib xyuas tej hauj lwm dav dav los sib tham txog tej hauj lwm ntawd. Lub lim tiam tom ntej, lawv tuav ib qho kev sib txoos ua ke rau cov uas saib xyuas tej hauj lwm sab nraud, lam nug hais tias, “Puas muaj kev nyuaj dab tsi? Nej puas tau nyeem Vajtswv txoj lus nyob rau lub sij hawm no? Nej puas raug txwv los sis cuam tshuam thaum nej nrog cov tsis ntseeg sib txuas lus?” Thiab tom qab nug ob peb lo lus nug no, ces lawv xaus lawm xwb. Ib ntsais muag xwb, ib hlis dhau mus lawm. Lawv ua tau hauj lwm dab tsi lawm? Txawm hais tias lawv tuav tej kev sib txoos ua ke rau txhua pab neeg los, lawv twb tsis paub ib yam dab tsi txog tes hauj lwm ntawm ib pab neeg twg li, thiab lawv tsis paub txog los sis nug txog qhov ntawd, los sis haj yam tsis koom nrog tes hauj lwm los sis coj qhia tes hauj lwm ntawd nyob rau hauv txhua pab neeg li. Lawv tsis koom nrog, tsis taug qab txog, los sis tsis muab kev coj qhia txog tes hauj lwm ntawd li, tiam sis muaj ob peb yam uas lawv ua raws sij hawm: noj mov raws sij hawm, pw raws sij hawm, thiab tuav tej kev sib txoos ua ke raws sij hawm. Lawv lub neej mas muaj mus raws sij hawm heev, lawv saib xyuas lawv tus kheej zoo heev, tiam sis lawv txoj kev ua hauj lwm mas tsis zoo txaus.

Ib txhia thawj coj yeej tsis ua tej luag hauj lwm ntawm cov thawj coj thiab cov neeg ua hauj lwm kiag li, tsis ua pawg ntseeg tes hauj lwm tseem ceeb tiam sis tsuas yog tsom ntsoov rau qee yam hauj lwm dav dav uas tsis tseem ceeb xwb. Lawv txawj saib xyuas chav ua noj xwb, pheej nug hais tias, “Hnub no peb noj dab tsi? Peb puas muaj qe? Tshuav nqaij ntau npaum li cas? Yog peb tsis muaj lawm, kuv mam li mus yuav ib co los.” Lawv xam hais tias tes hauj lwm hauv chav ua noj ntawd mas tseem ceeb heev, mus rau hauv chav ua noj yam tsis muaj qab hau, pheej xav txog qhov noj ntses ntxiv, noj nqaij ntxiv, kom muaj kev xyiv fab ntxiv, noj zaub mov yam kaj siab lug xwb. Thaum cov tib neeg hauv txhua pab neeg ua hauj lwm tsis khoom li, tsom ntsoov rau qhov ua lawv tej dej num kom zoo, cov thawj coj no tsuas tsom ntsoov rau qhov noj kom zoo, ua ib lub neej uas tau zoo heev xwb. Txij li thaum los ua cov thawj coj, tsis yog lawv tsis txhawj xeeb txog pawg ntseeg tes hauj lwm thiab zam txhua yam kev siv zog xwb, tiam sis lawv kuj tu lawv tus kheej kom rog kheej lam thiab muaj ntsej muag liab ploog. Lawv ua dab tsi txhua hnub? Lawv ua qee yam hauj lwm dav dav tsis khoom li, qee yam hauj lwm me me, tsis tau ua ib teg hauj lwm tiag tiag kom zoo los sis tsis daws ib qho teeb meem tiag tiag li. Tiam sis lawv tsis muaj kev tu siab hauv lawv lub siab li. Txhua tus thawj coj cuav mas yeej tsis ua pawg ntseeg tes hauj lwm tseem ceeb, thiab lawv tsis daws ib qho teeb meem tiag tiag li. Tom qab lawv los ua cov thawj coj lawm, lawv xav hais tias, “Kuv tsuas tim tsum nrhiav ob peb tug tib neeg los ua tes hauj lwm tiag xwb, ces kuv tus kheej tsis tas ua lawm.” Lawv ntseeg hais tias thaum lawv npaj tau cov saib xyuas rau txhua yam hauj lwm lawm, ces lawv tus kheej tsis muaj dab tsi ua lawm. Lawv ntseeg hais tias qhov no yog qhov ua hauj lwm ua tus thawj coj, thiab yog li ntawd lawv thiaj li tsim nyog xyiv fab rau tej txiaj ntsim ntawm lawv lub meej mom. Lawv tsis koom nrog ib teg hauj lwm tiag tiag twg li, tsis taug qab los sis tsis muaj kev taw qhia li, thiab lawv tsis ua kev tshawb xyuas los sis tshawb fawb los daws teeb meem li. Lawv puas ua tej luag hauj lwm ntawm ib tug thawj coj tiav? Zoo li no puas ua tau pawg ntseeg tes hauj lwm? Thaum tus Nyob Saud nug lawv txog qhov tes hauj lwm mus li cas lawm, lawv txawm hais tias, “Pawg ntseeg tes hauj lwm puav leej mus zoo li ib txwm. Txhua yam hauj lwm muaj ib tug saib xyuas uas saib xyuas lawm.” Yog nug ntxiv txog qhov seb puas muaj teeb meem dab tsi hauv tes hauj lwm mas, lawv teb hais tias, “Kuv tsis paub. Tej zaum tsis muaj ib qho teeb meem li!” Qhov no yog tus cwj pwm coj ntawm cov thawj coj cuav rau lawv tes hauj lwm. Ua ib tug thawj coj es, koj tsis ris lub luag hauj lwm rau tes hauj lwm uas muab rau koj kiag li; txhua yam yog muab rau lwm tus xwb, tsis muaj kev taug qab, tsis muaj lus nug, los sis tsis muaj kev pab daws teeb meem los ntawm koj li—koj tsuas yog ib tug thawj coj uas txawj muab hauj lwm rau luag ua xwb. Tsis yog koj tsis saib xyuas koj lub luag hauj lwm lod? Tsis yog koj coj zoo li ib tug nom tswv lod? Tsis ua ib teg hauj lwm tiag, tsis taug qab txog tes hauj lwm, tsis daws tej teeb meem tiag tiag li—cov thawj coj zoo li no tsis yog cov uas muaj npe xwb lod? Lawv tsis yog cov thawj coj cuav lod? Qhov no yog tus qauv tseeb tiag ntawm ib tug thawj coj cuav ntag. Ib tug thawj coj cuav tes hauj lwm tsuas yog hais ntawm qhov ncauj thiab muab lus sam hwm yam tsis koom nrog los sis taug qab txog tes hauj lwm tiag tiag li, thiab tsis nrhiav los sis paub txog tej teeb meem nyob rau hauv tes hauj lwm. Txawm thaum paub tej teeb meem lawm los, lawv tsis daws tej teeb meem ntawd. Lawv tsuas yog ua zoo li ib tug tswv uas tsis ua dab tsi li xwb, xav hais tias qhov ntawd yog ua hauj lwm lawm. Thiab qhov tseem coj li no yeej tsis cuam tshuam lawv lub siab kaj lug kiag li; lawv tau zoo nyob txhua hnub, thiab zoo siab txhua lub sij hawm. Ua li cas lawv thiaj li tseem luag taus? Kuv tau pom ib qho uas muaj tseeb tias: Cov tib neeg zoo li no mas tsis paub txaj muag kiag li. Lawv tsis ua tes hauj lwm tiag tiag li ib tug thawj coj, lawv tsuas yog npaj ob peb tug tib neeg los ua hauj lwm ces suav hais tias tiav lawm xwb. Koj yeej tsis pom lawv nyob tom qhov chaw ua hauj lwm li; lawv tsis paub dab tsi txog qhov kev nce qib los sis qhov txiaj ntsig ntawm pawg ntseeg tes hauj lwm li, tiam sis lawv tseem xav hais tias lawv muaj peev xwm thiab ua tau raws li tus qauv li ib tug thawj coj lawm. Qhov no yog tus qauv tseeb tiag ntawm ib tug thawj coj cuav, tsis ua tes hauj lwm tiag tiag kiag li. Cov thawj coj cuav mas tsis muaj lub nra rau pawg ntseeg tes hauj lwm, lawv tsis txhawj xeeb los sis ntxhov siab txawm muaj teeb meem ntau npaum li cas los xij; lawv txaus siab rau qhov tsuas yog ua qee yam hauj lwm dav dav lawm xwb ces lawv xav hais tias lawv ua tau tes hauj lwm tiag tiag lawm. Txawm tus Nyob Saud yuav muab cov thawj coj cuav qhia tshwm li cas los xij, hauv lub siab mas lawv tsis xav tias tu siab li, thiab lawv tsis pom lawv tus kheej nyob hauv qhov kev qhia tshwm ntawd; lawv tsis muaj kev xav txog tus kheej los sis kev lees txim hloov dua siab tshiab li. Cov tib neeg zoo li no puas yog tsis muaj lub siab txawj xav thiab tsis muaj laj thawj kiag li? Ib tug neeg uas muaj lub siab txawj xav thiab muaj laj thawj tiag tiag puas ua tau li no rau pawg ntseeg tes hauj lwm? Yeej ua tsis tau kiag li.

Feem ntau mas, cov tib neeg uas muaj ib lub siab txawj xav thiab laj thawj me ntsis ntawd, thaum hnov txog qhov kev qhia tshwm txog ntau yam kev qhia tshwm uas pom tau meej ntawm cov thawj coj cuav thiab muab lawv tus kheej los piv rau tej uas zoo li no, mas lawv yuav pom tau, txawm ntau los sis tsawg los xij, tias muaj qee yam ntawm lawv tus kheej nyob rau hauv tej uas zoo li no. Lawv lub ntsej muag yuav liab, lawv yuav nyob tsis tswm, lawv lub siab yuav tsis kaj, hnov tias tshuav Vajtswv nqi, thiab lawv yuav txiav txim siab ntsiag to hais tias: “Yav dhau los mas, kuv nyiam kev tau zoo ntawm lub cev nqaij daim tawv, tsis ua kuv tes hauj lwm zoo, tsis ua kuv tej luag hauj lwm kom tiav, tsis ua hauj lwm tiag tiag, tsis paub dab tsi thaum nug txog, pheej xav khiav, thiab pheej ua txuj, ntshai tias thaum lwm tus pom qhov tseeb tiag txog kuv, ces kuv lub koob lub npe thiab lub meej mom yuav ploj mus, thiab qhov uas ua ib tug thawj coj uas kuv tuav ntawd yuav tuav tsis tau lawm. Tsuas yog tam sim no xwb kuv thiaj li pom tias tus cwj pwm zoo li ntawd mas txaj muag heev thiab ua tsis tau mus ntxiv lawm. Kuv yuav tsum mob siab me ntsis thaum ua hauj lwm, thiab siv zog. Yog kuv tseem ua tsis tau zoo thiab, ces qhov ntawd yuav zam txim tsis tau—kuv lub siab txawj xav yuav iab liam kuv!” Cov thawj coj cuav zoo li no tseem muaj qee yam kev ua neeg thiab lub siab txawj xav; yam tsawg kawg mas, lawv lub siab txawj xav tseem paub. Tom qab hnov qhov Kuv qhia tshwm lawm, lawv pom lawv tus kheej hauv tej lus no ces thiaj li ntxhov siab; lawv thiaj li tig xav tias: “Kuv yeej tsis tau ua ib teg hauj lwm tiag tiag li, los sis tsis tau daws ib qho teeb meem tiag tiag li. Kuv tsis tsim nyog tau txais Vajtswv cov lus txib los sis lub npe ua ib tug thawj coj. Yog li ntawd, kuv yuav ua li cas? Kuv yuav tsum kho; txij tam sim no mus, kuv yuav tsum rau siab ntso ua hauj lwm tiag tiag thiab daws tej teeb meem tiag tiag, koom nrog txhua tes hauj lwm tiag, tsis txhob khiav, tsis txhob ua txuj, thiab ua txhua yam kom tag nrho kuv lub peev xwm. Vajtswv tshawb xyuas tib neeg lub siab thiab tej kev xav uas tob tshaj plaws kom meej, Vajtswv paub tseeb txhua tus neeg yog neeg zoo li cas tiag; txawm kuv ua tau zoo los tsis zoo los xij, qhov ua kom tag siab ntawd yog qhov tseem ceeb tshaj plaws. Yog kuv haj tseem ua tsis tau qhov no thiab no, puas tseem hu tau kuv tias yog tib neeg?” Qhov muaj peev xwm tig xav txog yus tus kheej li no yog qhov hu ua muaj ib lub siab txawj xav. Cov tib neeg uas tsis muaj ib lub siab txawj xav ntawd, txawm koj yuav muab lawv qhia tshwm li cas los xij, lawv lub ntsej muag tsis liab los sis lub siab tsis dhia ceev li; lawv tsuas ua li lawv xav tau mus ntxiv xwb. Txawm yog lawv pom lawv tus kheej hauv qhov uas Vajtswv tau muab qhia tshwm lawm los xij, lawv tsis quav ntsej txog qhov ntawd: Lawv xav hais tias, “Li cas los twb tsis tuav kuv npe.” “Vim li cas kuv thiaj li yuav tsum ntshai? Kuv muaj lub peev xwm zoo, kuv muaj peev xwm; Vajtswv lub tsev ua tsis tau yog tsis muaj kuv! Yog li ntawd kuv tsis ua tes hauj lwm tiag tiag ua cas lawm? Kuv tsis ua kuv tus kheej, tiam sis kuv kom lwm tus ua lawm, ces txawm li cas los yeej ua tiav lawm, tsis yog lod? Txawm li cas los xij, txhua tes hauj lwm uas koj kom kuv ua, kuv yeej ua tiav rau koj, txawm kuv npaj kom leej twg los ua los xij li. Kuv muaj lub peev xwm zoo, yog li ntawd kuv thiaj li ua hauj lwm tau ntse. Yav tom ntej, kuv yuav lam ua kom dhau xwb es xyiv fab rau lub neej li qhov kuv xav tau.” Txawm Kuv yuav soj ntsuam los sis qhia tshwm cov thawj coj cuav ntawd rau qhov tsis ua tes hauj lwm tiag tiag li cas los xij, cov tib neeg uas raug hais ntawd yeej zoo li qub, tsis paub dab tsi kiag li: “Cia lwm tus xav li lawv xav, thiab saib kuv li lawv xav pom kuv—kuv tsuas yog tsis ua xwb!” Cov thawj coj cuav zoo li no puas muaj ib lub siab txawj xav li? (Tsis muaj.) Qhov no yog zaum plaub uas peb tau sib qhia txog qhov kev qhia tshwm txog ntau yam kev qhia tshwm uas pom tau meej ntawm cov thawj coj cuav, thiab txhua zaus Kuv muab cov tib neeg zoo li no qhia tshwm mas, cov uas muaj ib lub siab txawj xav me ntsis ntawd yeej nyob tsis tswm li, tsis ruaj siab rau qhov tsis ua lawv tes hauj lwm zoo, thiab txiav txim siab ntsiag to los lees txim hloov dua siab tshiab thiab hloov kom sai. Hos cov uas tsis muaj ib lub siab txawj xav li mas yog cov uas tsis paub txaj muag kiag li; lawv tsis xav txog dab tsi kiag li. Txawm Kuv yuav qhia li cas los xij, lawv tsuas yog nyob li qub, xyiv fab rau lub neej li lawv xav tau. Thaum koj nug lawv hais tias, “Ib txhia tib neeg saib xyuas tes hauj lwm tshaj tawm txoj moo zoo, ib txhia saib xyuas tes hauj lwm txhais lus, thiab lwm tus saib xyuas tes hauj lwm ua yeeb yaj kiab—koj saib xyuas tes hauj lwm meej meej twg?” ces lawv hais tias: “Txawm hais tias kuv tsis tau ua ib teg hauj lwm meej meej li los, kuv saib xyuas txhua yam. Kuv tuav tej kev sib txoos ua ke rau lawv.” Yog tom qab ntawd koj nug lawv hais tias, “Koj tuav tej kev sib txoos ua ke pes tsawg zaus hauv ib lub hlis?” lawv yuav teb hais tias: “Yam tsawg kawg mas, ib zaug kev sib txoos ua ke loj rau ib lub hlis, thiab ib zaug me me txhua ob lub lim tiam.” Thiab thaum koj nug lawv hais tias, “Dhau li ntawm qhov tuav tej kev sib txoos ua ke ntawd lawm ne, koj tau ua tes hauj lwm meej meej dab tsi lawm?” lawv yuav teb hais tias: “Vim tej kev sib txoos ua ke ua rau kuv khwv heev lawm, kuv yuav ua tau tes hauj lwm meej meej dab tsi? Tsis tas li ntawd, ciaj ciam uas kuv saib xyuas ntawd dav dhau lawm, kuv thiaj li tsis muaj sij hawm rau tes hauj lwm meej meej.” Cov thawj coj cuav no xav tias lawv yog tag nrho lawm—lawv ua cov thawj coj uas ruaj thiab khov heev lawm! Txawm lawv yuav raug muab qhia tshwm thiab ntuas li cas los xij, lawv yeej tsis nyuaj siab txog qhov ntawd kiag li. Yog hais kom Kuv ua ib teg hauj lwm tiag tiag, xws li ua zaub mov rau tsib tug neeg noj, tab sis Kuv tsuas ua zaub mov txaus rau plaub tug noj xwb, ces Kuv lub siab yuav tsis kaj txog qhov tsis ua kom txaus, thiab Kuv yuav hnov txhaum vim tsis cia txhua tus noj kom tsau. Tom qab ntawd Kuv yuav xav txog qhov yuav ua li cas thiaj li yuav kho tau qhov ntawd, ua kom paub tseeb tias lwm zaus yuav suav kom yog es txhua tus thiaj li tau noj txaus. Thiab yog ib tug neeg twg hais tias cov zaub mov daw ntsev dhau lawm, Kuv kuj yuav tsis kaj siab thiab. Kuv yuav nug seb qhov zaub mov twg daw ntsev dhau lawm, tom qab ntawd mam li nug lwm tus seb cov txuj lom puas rau tau tsim nyog. Txawm hais tias nyuaj ua kom txhua tus txaus siab los, Kuv tseem yuav tsum sim txhua txoj hau kev li ua tau los ua kom tau Kuv feem kom zoo. Qhov no yog hu tias ua yus tej luag hauj lwm tiav; qhov no yog qhov laj thawj uas tib neeg yuav tsum muaj. Koj yuav tsum ua kom tiav koj tej luag hauj lwm tas li; txawm tes hauj lwm yuav yog dab tsi los xij, koj tus kheej yuav tsum nrog ua kiag. Yog leej twg muaj ib lub tswv yim txawv—txawm lawv yuav yog leej twg los xij—es koj paub tias koj ua tsis yog thiab tsis kaj siab tom qab hnov qhov ntawd lawm, ces koj yuav tsum kho thiab muab koj lub siab tso rau hauv qhov koj ua ntawd rau yav tom ntej, ua kom zoo txawm yog tias qhov ntawd txhais tau tias yuav tau tiv kev txom nyem qee yam los xij. Cov thawj coj cuav tsis muaj qhov kev xav no, yog li ntawd lawv thiaj li tsis tiv kev txom nyem kiag li. Tom qab hnov tej uas muaj tseeb no txog qhov muab cov thawj coj cuav qhia tshwm lawm, lawv tsis xav li cas kiag li, tseem noj qab, pw tsaug zog zoo, thiab ua neej lom zem raws li siab nyiam, muaj kev zoo siab txhua hnub tib yam, thiab tsis muaj qhov kev hnov tias ris ib lub nra hnyav rau saum lawv ob lub xub pwg, los sis tsis mob siab txog kev ua txhaum nyob hauv lawv lub siab li. Cov no yog hom tib neeg dab tsi? Cov tib neeg zoo li no muaj ib qho teeb meem nrog lawv tus yam ntxwv: Lawv tsis muaj lub siab txawj xav, lawv tsis muaj laj thawj, thiab lawv yog cov uas muaj tus yam ntxwv qis. Txawm hais tias tau muab ntau yam kev qhia tshwm uas pom tau meej ntawm cov thawj coj cuav ntawd qhia tshwm los tau ntev lawm los xij—los ntawm sab zoo, yug thiab qhia, thiab los ntawm sab tsis zoo, muab lawv qhia tshwm thiab soj ntsuam—ib feem ntawm cov thawj coj cuav ntawd tseem tsis tuaj yeem paub txog lawv tus kheej tej teeb meem, thiab lawv yeej tsis npaj siab los tig xav txog thiab lees txim hloov dua siab tshiab. Yog tsis muaj kev saib xyuas thiab kev txhawb los ntawm tus Nyob Saud li, ces lawv tseem yuav lam ua lawv tes hauj lwm kom dhau kom ntau li ntau tau, yam tsis hloov kiag li. Txawm Kuv yuav muab lawv qhia tshwm li cas los xij, lawv tseem zaum ntawd tsis muaj kev ntxhov siab thiab tsis paub dab tsi kiag li. Tsis yog lawv tsis paub txaj muag kiag li lod? Cov tib neeg hom no tsis tsim nyog ua cov thawj coj los sis cov neeg ua hauj lwm; lawv yog cov uas muaj tus yam ntxwv qis heev uas lawv tsis paub txaj muag! Rau cov tib neeg zoo li sawv daws mas, txawm tsuas yog hnov ib tug neeg hais txog lawv tej kev tsis zoo, tej kev ua txhaum, los sis ib yam dab tsi uas tsis tsim nyog los sis tsis haum raws li tej hauv paus ntsiab lus txog qhov lawv tau ua lawm—tsis tas hais txog qhov raug muab qhia tshwm kiag—yuav nyuaj rau lawv ris, thiab lawv yuav nyuaj siab thiab txaj muag, thiab yuav xav txog qhov yuav hloov thiab kho lawv tus kheej li cas. Hos cov thawj coj cuav no mas ua rau lawv tes hauj lwm ntxhov quav niab los tseem nyob nrog ib lub siab kaj lug, tsis txhawj xeeb los sis ntxhov siab, thiab tseem tsis paub dab tsi kiag li txawm lawv yuav raug muab qhia tshwm li cas los xij—lawv haj tseem nrhiav chaw nkaum thiab nrhiav kev tau zoo, thiab yeej tsis pom nyob qhov twg li. Lawv yeej tsis paub txaj muag tiag tiag li!

Ib tug thawj coj pawg ntseeg mas yam tsawg kawg yuav tsum muaj lub siab txawj xav thiab laj thawj, thiab kuj to taub qee yam qhov tseeb thiab—tsuas yog thaum ntawd xwb lawv thiaj li hnov tias muaj ib lub nra. Tej yam uas qhia kom pom tau tseeb txog qhov hnov tias muaj ib lub nra ntawd yog dab tsi? Yog lawv pom qee leej xav phem, qee leej nkag siab tsis tseeb, qee leej nkim tej khoom muaj nqis hauv Vajtswv lub tsev, qee leej ua lawv tes hauj lwm ua dog ua dig, qee leej tsis ua tej hauj lwm kom tsim nyog thaum lawv ua lawv tej dej num, qee leej pheej hais lus zoo zoo xwb tiam sis tsis ua hauj lwm tiag li…, pom hais tias muaj ntau yam teeb meem heev nyob rau hauv pawg ntseeg es yuav tsum tau daws, pom hauj lwm ntau heev uas tsis tau ua, qhov no ua rau lawv muaj ib qho hnov txog ib lub nra. Txij thaum los ua ib tug thawj coj lawm, zoo li muaj ib co hluav taws uas pheej kub tas li nyob rau hauv lawv nruab siab; yog lawv pom ib qho teeb meem es daws tsis tau, lawv txawm txhawj xeeb thiab ntxhov siab, noj tsis qab los sis pw tsis tsaug zog. Thaum sib txoos ua ke, thaum qee leej qhia tawm tej teeb meem nyob rau hauv lawv tes hauj lwm uas tus thawj coj pom tsis tshab thiab daws tsis tau kiag tam sim ntawd, tus thawj coj yeej tsis tso tseg; nws xav hais tias nws yuav tsum daws qhov teeb meem no. Tom qab thov Vajtswv thiab nrhiav, thiab ua tib zoo xav los tau ob hnub, thaum nws paub tias yuav daws qhov teeb meem ntawd li cas lawm, nws maj nroos daws qhov teeb meem ntawd. Tom qab daws qhov teeb meem ntawd lawm, nws maj nroos mus tshuaj xyuas lwm tes hauj lwm thiab pom lwm qho teeb meem uas muaj neeg coob dhau lawm ntsig txog rau ib teg hauj lwm uas yuav tsum tau txo cov neeg ua hauj lwm. Ces nws mam li maj nroos hu ib lub rooj sib txoos ua ke, kom paub qhov teeb meem kom meej, txo cov neeg ua hauj lwm, thiab npaj kom tsim nyog, ces thiaj li daws tau qhov teeb meem ntawd lawm. Txawm lawv tab tom tshuaj xyuas tes hauj lwm twg los xij, cov thawj coj uas muaj ib lub nra yeej yuav pom tej teeb meem tas li. Rau tej teeb meem uas muaj feem xyuam txog txoj kev paub qib siab, los sis ua txhaum tej hauv paus ntsiab lus, lawv yeej yuav pom tej ntawd, nug txog tej ntawd, thiab to taub txog tej ntawd, thiab thaum lawv pom ib qho teeb meem, lawv daws qhov teeb meem ntawd kom sai. Cov thawj coj thiab cov neeg ua hauj lwm uas ntse tsuas daws tej teeb meem uas muaj feem xyuam txog pawg ntseeg tes hauj lwm, txoj kev paub qib siab, thiab qhov tseeb tej hauv paus ntsiab lus xwb. Lawv tsis quav ntsej txog tej teeb meem me me hauv lub neej txhua hnub li. Lawv saib xyuas txhua sab ntawm tes hauj lwm tshaj tawm txoj moo zoo uas Vajtswv txib kom ua. Lawv nug txog thiab tshuaj xyuas txhua yam teeb meem uas lawv paub tau los sis nrhiav tau. Yog lawv tus kheej daws tsis tau qhov teeb meem ntawd kiag tam sim ntawd, ces lawv nrog lwm cov thawj coj thiab cov neeg ua hauj lwm sib txoos ua ke, sib qhia, nrhiav qhov tseeb tej hauv paus ntsiab lus, thiab xav txog tej hau kev los daws qhov teeb meem ntawd. Yog lawv ntsib ib qho teeb meem loj uas lawv daws tsis tau tiag tiag li, ces lawv mam li maj nroos nrhiav kev pab los ntawm tus Nyob Saud, thiab cia tus Nyob Saud saib xyuas thiab daws qhov teeb meem ntawd. Cov thawj coj thiab cov neeg ua hauj lwm uas zoo li no yog cov tib neeg uas ua muaj hauv paus ntsiab lus nyob rau hauv lawv tej kev ua. Txawm muaj teeb meem dab tsi los xij, tsuav lawv pom tej teeb meem ntawd lawm xwb, ces lawv yeej yuav tsis tso tej teeb meem ntawd tseg li; lawv nias qees ua kom to taub tej teeb meem no meej meej ces mam li daws tej teeb meem ntawd ib qho zuj zus. Txawm lawv daws tsis tau tag nrho los xij, yeej paub tseeb hais tias tej teeb meem no yuav tsis tshwm sim tuaj dua lawm. Qhov no yog ua yus tes dej num kom kawg siab, kawg dag kawg zog, thiab kawg tswv yim, ua kom tiav yus tej luag hauj lwm tag nrho. Cov thawj coj cuav thiab cov neeg ua hauj lwm cuav uas tsis ua hauj lwm tiag los sis tsis tsom ntsoov daws tej teeb meem tiag tiag ntawd nyob hauv lawv lub qhov muag yeej pom tsis tau tej teeb meem thiab tsis paub tias yuav tsum ua tes hauj lwm twg. Tsuav lawv pom hais tias cov kwv tij thiab cov muam ua lawv tej dej num khwv heev xwb, ces lawv yeej txaus siab heev lawm, xav hais tias qhov no yog qhov txiaj ntsig ntawm lawv tes hauj lwm tiag; lawv xav hais tias txhua kis ntawm tes hauj lwm ces yeej zoo heev lawm thiab tsis muaj ntau yam rau lawv tus kheej ua los sis tsis muaj teeb meem rau lawv daws, yog li ntawd lawv thiaj li rau siab ntso xyiv fab rau tej txiaj ntsim ntawm lawv lub meej mom xwb. Lawv ib txwm muaj plhus thiab khav txog lawv tus kheej nyob rau hauv cov kwv tij thiab cov muam. Thaum twg lawv pom cov kwv tij thiab cov muam mas, lawv hais tias, “Ua ib tug ntseeg zoo. Ua koj tes dej num kom zoo. Tsis txhob ua dog ua dig. Yog koj tawv ncauj los sis tsim teeb meem, kuv yuav muab koj rho tawm!” Lawv tsuas paub siv lawv lub meej mom thiab cem tib neeg xwb. Thaum sib txoos ua ke mas lawv pheej nug hais tias muaj teeb meem dab tsi nyob rau hauv tes hauj lwm thiab nug seb cov uas nyob rau hauv lawv qab ntawd puas muaj kev nyuaj dab tsi, tiam sis thaum lwm tus nthuav lawv tej teeb meem thiab tej kev nyuaj tawm mas, lawv daws tsis tau li. Txawm li no los, lawv tseem zoo siab, thiab tseem nyob yam kaj siab lug. Yog cov kwv tij thiab cov muam tsis hais txog tej kev nyuaj los sis tej teeb meem, ces lawv xav hais tias lawv ua lawv tes hauj lwm zoo heev lawm, ces lawv thiaj li txaus siab heev. Lawv xav hais tias qhov nug txog tes hauj lwm ntawd mas yog txoj hauj lwm uas muab rau lawv ua, thiab thaum muaj teeb meem tshwm sim tuaj es tus Nyob Saud taug lub luag hauj lwm rov qab mus rau lawv mas, lawv ceeb tag li. Lwm tus muab tej kev nyuaj thiab tej teeb meem ntawm tes hauj lwm tso rau ntawm lawv xub ntiag, tiam sis lawv tseem yws tias vim li cas lawv tsis nrhiav qhov tseeb los daws tej teeb meem ntawd. Lawv tus kheej tsis daws tej teeb meem tiag tiag, lawv muab lub luag hauj lwm pov rau cov saib xyuas uas nyob rau hauv lawv qab, cem cov uas ua tej hauj lwm kiag ntawd hnyav heev. Qhov kev cem no pab kom lawv tso lawv txoj kev npau taws, thiab lawv haj tseem ntseeg yam kaj siab lug hais tias lawv tab tom ua hauj lwm tiag. Lawv yeej tsis tau txhawj xeeb los sis ntxhov siab txog qhov nrhiav tsis tau los sis daws tsis tau teeb meem, thiab noj tsis taus los sis pw tsis taus vim qhov no li—lawv yeej tsis tau raug hom kev txom nyem no li.

Txhua zaus Kuv mus saib ib pawg ntseeg teb mas, Kuv yeej daws qee yam teeb meem. Txhua zaus Kuv mus mas, tsis yog vim Kuv pom ib qho teeb meem twg es mus daws; tsuas yog muaj sij hawm es mus ncig thiab saib seb ntau pab pawg ua hauj lwm hauv pawg ntseeg ua hauj lwm li cas, thiab seb cov neeg hauv txhua pab pawg muaj yam ntxwv li cas. Kuv hu cov saib xyuas los tham, nug seb lawv tau ua hauj lwm dab tsi rau lub sij hawm no, thiab seb muaj teeb meem dab tsi, cia lawv hais qee yam teeb meem, ces Kuv mam li qhia lawv seb yuav daws tej teeb meem no li cas. Thaum sib qhia nrog lawv, Kuv kuj pom qee yam teeb meem tshiab thiab. Ib hom teeb meem mas yog tej uas ntsig txog cov thawj coj thiab cov neeg ua hauj lwm ua lawv tes hauj lwm li cas; hos lwm hom ces yog tej teeb meem hauv tes hauj lwm uas nyob hauv ciaj ciam ntawm lawv tej luag hauj lwm. Ntxiv ntawd, Kuv kuj pab thiab coj qhia lawv ua hauj lwm tiag li cas, seb yuav ua hauj lwm li cas, seb yuav ua hauj lwm dab tsi, ces mam li taug qab rau lwm zaus, nug lawv seb qhov hauj lwm uas tau muab rau lawv ua zaum tas los lawm ntawd mus zoo li cas lawm. Yuav tsum muaj qhov kev saib xyuas, txhawb, thiab taug qab zoo li no. Txawm qhov no tsis yog ua nrog lub suab nrov thiab qw, siv cov paj taub nrov nrov los tshaj tawm los, tej hauj lwm meej meej thiab tej dej num meej meej no yog raug qhia mus thiab ua tiav los ntawm qee cov thawj coj thiab cov neeg ua hauj lwm uas ua tau hauj lwm tiag tiag. Yog li ntawd, txhua pab pawg tej hauj lwm thiaj li mus raws qib raws duas thiab nce qib, qhov ua hauj lwm tau zoo ntawd thiaj li zoo dua, thiab cov txiaj ntsig thiaj li zoo dua lawm thiab. Thaum kawg, txhua tus neeg hauv txhua pab pawg tuav rawv tau lawv tus kheej tes dej num, paub tias lawv yuav tsum ua dab tsi thiab yuav ua li cas. Yam tsawg kawg nkaus, txhua tus neeg ua lawv tes dej num uas tsim nyog ua, lawv txhua tus yeej muaj tej hauj lwm ua, thiab tej uas lawv ua ntawd yog ua raws li Vajtswv lub tsev tej kev cheem tsum thiab kuj ua tau raws li tej hauv paus ntsiab lus thiab. Qhov no tsis yog ua tau txiaj ntsig lawm lod? Cov thawj coj cuav puas paub ua hauj lwm li no? Cov thawj coj cuav yuav xav tias: “Yog li ntawd, qhov no yog txoj kev uas tus Nyob Saud ua hauj lwm: hu qee tus neeg los sib tham, txhua tus sau cia rau hauv ib phau ntawv me me, thiab tom qab sau cia tas lawm, ces tus Nyob Saud tes hauj lwm tiav lawm. Yog tias tus Nyob Saud ua hauj lwm li no, ces peb yuav ua ib yam li ntawd thiab.” Yog li ntawd, cov thawj coj cuav thiaj li ua raws li no. Lawv ua raws li qhov zoo li sab nraud, tiam sis thaum kawg, lawv tsis ua hauj lwm tiag tiag kiag li, yeej tsis ua ib yam hauj lwm uas tau hais kom lawv ua li, tsuas yog nkim sij hawm tham txog yam tsis muaj qab hau xwb. Qee zaum, Kuv kuj mus rau tom tej teb zaub thiab mus tom tej tsev cog yub zaub mus saib seb cov yub loj hlob li cas thiab, los sis mus nrhiav seb muaj pes tsawg lub caij cog qoob loo tau rau hauv tej tsev cog yub zaub thaum lub caij ntuj no, thiab yuav ywg dej npaum li cas. Tej hauj lwm no, tsis hais loj los sis me, puav leej ntsig txog tej teeb meem txog thev naus laus ntsis kev cog zaub, thiab tsuav yus siv siab ua tej ntawd xwb, ces yus yeej ua tau tej ntawd tiav. Cov thawj coj cuav pheej nthuav lawv txoj kev cuav tawm rau qhov twg? Qhov tseem ceeb tshaj plaws ces yog qhov tsis ua hauj lwm tiag tiag; lawv tsuas ua qee yam hauj lwm uas ua rau lawv tus kheej zoo xwb ces xam tias tiav lawm, thiab tom qab ntawd lawv pib xyiv fab rau tej txiaj ntsim ntawm lawv lub meej mom. Txawm lawv ua hom hauj lwm no ntau npaum li cas los xij, qhov ntawd puas txhais tias lawv ua hauj lwm tiag tiag? Feem coob ntawm cov thawj coj cuav nkag siab qhov tseeb tsis yog, tsuas to taub qee cov lus thiab cov kev qhuab qhia xwb, uas ua rau nyuaj heev kom ua tau tes hauj lwm tiag tiag kom zoo. Ib feem ntawm cov thawj coj cuav haj tseem twb daws tsis tau tej teeb meem uas ntsig txog tej hauj lwm dav dav thiab; pom tseeb tias lawv tsis muaj peev xwm thiab tsis muaj kev to taub ntawm sab ntsujplig. Qhov kev cob qhia lawv mas tsis muaj nuj nqis kiag li. Ib txhia thawj coj cuav mas muaj peev xwm me ntsis, tab sis lawv tsis ua tes hauj lwm uas muaj tiag li, thiab lawv nyiam kev tau zoo ntawm sab cev nqaij daim tawv xwb. Cov tib neeg uas nyiam kev tau zoo ntawm sab cev nqaij daim tawv ntawd mas yeej tsis txawv tej npua hlo li. Npua mas tsuas pw thiab noj xwb. Lawv tsis ua dab tsi li. Txawm li cas los xij, tom qab pub rau cov npua ntawd noj tau ib xyoo lawm, thaum tag nrho ib tsev neeg noj cov npua ntawd tej nqaij rau thaum lub xyoo xaus, ces tej zaum lawv yuav hais tau tias cov npua ntawd twb ua tes dej num txhawb lawm. Yog ib tug thawj coj cuav twg raug pub zoo li ib tug npua, es ib hnub twg noj thiab haus peb pluag kom rog thiab muaj zog, tiam sis lawv tsis ua tes hauj lwm uas muaj tiag li thiab yog ib niag qho khoom seem txheej xwb, ces qhov pheej tseem yuav lawv ntawd puas muaj txiaj ntsig mas? Nws puas muaj ib qho txiaj ntsig dab tsi li mas? Nws tsuas ua tau ib tug neeg lwj liam xwb thiab yuav tsum raug muab tshem tawm. Qhov tiag tiag ces, yug ib tug npua mas tseem zoo dua li qhov pheej tseem yug ib tug thawj coj cuav. Tej zaum cov thawj coj cuav yuav tau lub npe “thawj coj,” tej zaum lawv yuav tau tuav tes dej num no, tau noj zoo ib hnub twg peb pluag mov, xyiv fab rau Vajtswv txoj hmoov hlub ntau heev, rog kheej lam thiab zoo los ntawm qhov tau noj mus txog rau thaum lub xyoo xaus—tab sis tes hauj lwm ua tau zoo li cas? Saib rau txhua yam uas ua tiav nyob rau hauv koj tes hauj lwm rau xyoo no: Koj puas tau ua muaj txiaj ntsig rau ntawm tes hauj lwm hauv lub xyoo no? Tes hauj lwm uas muaj tiag uas koj ua ntawd yog dab tsi? Vajtswv lub tsev tsis hais kom koj ua txhua txoj hauj lwm kom zoo tiav log, tab sis koj yuav tsum ua tes hauj lwm tseem ceeb kom zoo—piv txwv li, tes hauj lwm ntawm kev tshaj tawm txoj moo zoo, los sis tes hauj lwm ua yeeb yaj kiab, tes hauj lwm leg tej ntaub ntawv, thiab ntau yam zoo li no. Tag nrho tej no yuav tsum tawg paj txi txiv. Raws li ib txwm mas, feem ntau tes hauj lwm yuav tsum muaj txiaj ntsig thiab ua tau tiav tom qab peb mus txog tsib lub hlis lawm; yog ua tsis tiav dab tsi tom qab ib lub xyoo lawm, ces qhov no yog ib qho teeb meem loj lawm. Nyob rau hauv koj lub luag hauj lwm, tes hauj lwm twg ua tau tawg paj txi txiv tshaj? Tes hauj lwm twg uas koj tau them tus nqi thiab tiv kev txom nyem tshaj nyob rau hauv lub xyoo ntawd? Muab qhov ua tau coj los qhia thiab tig xav seb koj ua puas tau ib qho txiaj ntsig uas muaj nqis los ntawm lub xyoo uas koj tau xyiv fab rau Vajtswv txoj hmoov hlub; koj yuav tsum muaj ib qho kev to taub kom meej txog qhov nov nyob rau hauv koj lub siab. Koj tab tom ua dab tsi thaum koj noj mov hauv Vajtswv lub tsev thiab xyiv fab hlo rau Vajtswv txoj hmoov hlub rau txhua lub sij hawm no? Koj puas ua tau ib yam dab tsi tiav li? Yog koj ua tsis tiav ib yam dab tsi li, ces koj tsuas lam ua kom dhau xwb; koj yog ib tug thawj coj cuav tiag tiag li. Cov thawj coj zoo li no puas tsim nyog raug rho tawm thiab tshem tawm? (Tsim nyog.) Nej puas paub cais cov thawj coj cuav zoo li no thaum nej ntsib lawv? Nej puas pom hais tias lawv yog cov thawj coj cuav, uas tsuas yog lam ua kom tau noj mov dawb xwb? Lawv noj mus txog ntua thaum lawv lub qhov ncauj los roj li tiam sis yeej tsis txhawj xeeb los sis tsis ntxhov siab txog tes hauj lwm li, tsis koom nrog los sis tsis nug txog ib teg dej num twg kiag li. Txawm yog lawv nug los xij, yeej muaj ib qho laj thawj uas yog lawv tsuas ua li ntawd rau thaum tus Nyob Saud nias lawv txog tej txiaj ntsig xwb es yog tsis li ntawd ces lawv yeej tsis thab li. Lawv ib txwm nyiam kev lom zem, pheej saib yeeb yaj kiab los sis TV xwb. Lawv muab hauj lwm faib rau lwm tus ua rau thaum lwm tus tab tom ua lawv tej dej num khwv heev, hos lawv tus kheej ces so thiab xyiv fab xwb. Yog muaj ib qho teeb meem es koj nrhiav lawv los daws mas, yeej tsis pom lawv nyob qhov twg li, tiam sis lawv yeej tsis los noj mov lig li. Thiab tom qab noj mov lawm, thaum txhua tus rov qab mus ua hauj lwm mas, lawv mus so ntxiv lawm xwb. Yog koj nug lawv hais tias, “Vim li cas koj tsis mus tshuaj xyuas tes hauj lwm? Txhua tus tab tom tos koj coj qhia, tos koj tej kev npaj!” mas lawv hais tias: “Vim li cas tos kuv? Nej sawv daws yeej ua tau, nej sawv daws yeej paub ua—thaum kuv tsis nyob los twb zoo ib yam xwb tsis yog lod? Kuv so ib pliag tsis tau lod?” “Qhov ntawd puas yog so? Koj tsuas yog saib yeeb yaj kiab xwb!” “Kuv tab tom kawm paub tej txuj ci qib siab, kuv tab tom kawm seb ua yeeb yaj kiab li cas.” Lawv haj tseem hais li ub li no thiab. Lawv saib ib zaj yeeb yaj kiab tas ces saib ib zaj ntxiv, thiab thaum txhua tus so rau yav hmo ntuj, lawv los kuj so thiab. Txhua hnub mas lawv tsuas lam ua kom dhau hnub li no xwb, tiam sis yuav ua mus txog qhov twg? Txhua tus pom lawv ces yeej tsis nyiam, lawv ua rau txhua tus hnov tias txawv thiab tsis xis nyob, thiab thaum kawg, tsis muaj leej twg quav ntsej lawv li. Qhia Kuv seb, yog ib tug thawj coj zoo li no tsis saib xyuas no, tes hauj lwm puas tseem yuav nce qib tau? Yog tsis muaj lawv no, lub ntiaj teb puas tseem tig? (Nws yeej tseem tig.) Yog li ntawd, yuav tsum muab lawv qhia tshwm kom txhua tus pom tau hais tias lawv tsis mob siab rau tej hauj lwm uas tsim nyog thiab tsis muaj leej twg yuav tsum raug lawv txwv. Cov thawj coj cuav zoo li no uas tsis mob siab rau tej hauj lwm uas tsim nyog ntawd yuav tsum raug muab qhia tshwm thiab soj ntsuam kom txhua tus paub cais, ces mam li muab lawv rho tawm mus sawv rau ib sab! Nej puas paub cais cov thawj coj cuav zoo li no thaum nej ntsib lawv? Yog tsis muaj cov thawj coj cuav no, nej sawv daws puas yuav xav tias nej zoo li cov neeg tsav nkoj uas tsis muaj ib tug thawj coj? Nej puas yuav ua hauj lwm kom tiav thiab ua tej dej num kom tiav ntawm nej tus kheej? Yog nej ua tsis tau, ces nej nyob rau qhov phom sij lawm. Thaum ntsib cov thawj coj cuav zoo li no, cov uas tsis ua lawv tes dej num kom zoo, tsis coj ua tus qauv zoo, thiab nkim sij hawm los tham nyob os lais xwb—nej puas yuav muaj kev paub cais nyob rau hauv hom xwm txheej zoo li no? Nej puas yuav raug lawv haub ntxias kom koom nrog kev tham pem tsis muaj qab hau kom ua rau nej tej dej num qeeb? Nej puas tseem yuav raws cov thawj coj cuav zoo li no qab? (Tsis raws.)

Ib txhia thawj coj cuav mas noj loj heev thiab tub nkeeg, nyiam kev tau zoo dua kev ua hauj lwm hnyav. Lawv tsis xav ua hauj lwm los sis tsis txhawj xeeb, zam kev siv zog thiab lub luag hauj lwm, tsuas yog nyiam kev tau zoo xwb. Lawv nyiam noj thiab ua si, thiab tshwj xeeb mas yog tub nkeeg heev. Muaj ib tug thawj coj cuav uas tsuas sawv thaum sawv ntxov tom qab txhua tus noj mov tag lawm xwb, thiab yav hmo ntuj, nws tseem saib tej kev yeeb yaj kiab hauv TV thaum lwm tus tab tom so. Ib tug kwv tij uas ua zaub mov nyiaj tsis taus thiaj li tau thuam nws. Nej puas xav tias nws yuav mloog ib tug neeg ua zaub mov hais? (Tsis mloog.) Piv txwv tias ib tug thawj coj los sis ib tug neeg ua hauj lwm tau cem nws hais tias, “Koj yuav tsum nquag me ntsis; tes hauj lwm uas yuav tsum tau ua yuav tsum ua. Ua ib tug thawj coj, koj yuav tsum ua kom tiav koj tej luag hauj lwm txawm tes hauj lwm ntawd yog dab tsi los xij; koj yuav tsum ua kom paub tseeb tias tsis muaj teeb meem rau tes hauj lwm ntawd. Tam sim no uas pom ib qho teeb meem lawm, thiab koj tsis nyob ntawd los daws qhov teeb meem ntawd, qhov no cuam tshuam rau tes hauj lwm. Yog koj pheej ua hauj lwm li no, qhov no tsis ua rau pawg ntseeg tes hauj lwm qeeb lod? Koj ris puas taus lub luag hauj lwm no?” Nws puas yuav mloog qhov no? Tej zaum yuav tsis mloog. Rau cov thawj coj cuav zoo li no mas, pab pawg txiav txim siab yuav tsum muab lawv rho tawm kom sai thiab npaj lwm yam hauj lwm rau lawv, cia lawv ua yam uas lawv ua tau. Yog lawv tsis muaj nuj nqis dab tsi li, es txawm mus qhov twg los xav kom tau noj dawb xwb, ua tsis tau dab tsi li, ces muab lawv xa mus yam tsis pub lawv ua ib teg dej num li. Lawv tsis tsim nyog ua dej num; lawv tsis yog tib neeg, lawv tsis muaj lub siab txawj xav thiab qhov laj thawj ntawm kev ua neeg uas ib txwm muaj, lawv tsis paub txaj muag li. Rau cov thawj coj cuav zoo li no, cov uas zoo li cov neeg tub nkeeg no mas, thaum pom tshab lawm, yuav tsum muab lawv rho tawm kiag; tsis tas yuav sim ntuas lawv, thiab yuav tsum tsis txhob muab cib fim rau lawv raug soj ntsuam, thiab tsis tas yuav qhia qhov tseeb rau lawv lawm. Lawv tsis tau hnov qhov tseeb txaus lod? Yog lawv raug ntuas, lawv hloov puas tau? Lawv hloov tsis tau. Yog ib tug neeg tsis muaj peev xwm, es qee zaus muaj tej kev xam pom uas tsis ncaj, los sis tsis pom tag nrho vim qhov uas tsis paub, tiam sis lawv rau siab, muaj ib lub nra, thiab tsis tub nkeeg, ces tus neeg zoo li no, txawm muaj kev ua yuam kev hauv kev ua lawv tes dej num los, yeej lees txim hloov dua siab tshiab tau thaum raug ntuas. Yam tsawg kawg mas, lawv paub tej luag hauj lwm ntawm ib tug thawj coj thiab paub tias lawv yuav tsum ua dab tsi, lawv muaj lub siab txawj xav thiab lub siab ris ib lub luag hauj lwm, thiab lawv muaj ib lub siab. Txawm li cas los xij, cov uas tub nkeeg, nyiam kev tau zoo dua li kev ua hauj lwm hnyav, thiab tsis muaj lub nra, ces yeej hloov tsis tau li. Tsis muaj lub nra nyob rau hauv lawv lub siab; txawm leej twg ntuas lawv los, yeej tsis muaj qab hau li. Qee leej hais tias, “Yog li ntawd, yog Vajtswv txoj kev txiav txim, kev rau txim, kev sim siab, thiab kev kho kom dawb huv los raug rau lawv, qhov ntawd puas yuav hloov tau lawv qhov teeb meem uas tsis muaj lub nra?” Qhov no hloov tsis tau; qhov ntawd yog txiav txim los ntawm ib tug neeg tus yam ntxwv xeeb txawm, zoo ib yam li ib tug dev hloov tsis tau nws tus cwj pwm uas noj tej khoom qias. Thaum twg koj pom ib tug neeg uas tub nkeeg thiab tsis muaj lub nra thiab ua ib tug thawj coj, ces yeej paub tseeb tau hais tias nws yog ib tug thawj coj cuav lawm. Tej zaum qee leej yuav hais tias, “Ua li cas koj thiaj li hu tau lawv ua ib tug thawj coj cuav? Lawv muaj peev xwm zoo, ntse, pom tshab tej yam, thiab txawj npaj tswv yim. Nyob rau hauv lub ntiaj teb, lawv tswj kev lag luam, ua cov thawj coj loj; lawv muaj kev paub, muaj kev ntsib kev pom, thiab muaj kev pom dav!” Tej peev xwm zoo no puas daws tau lawv qhov teeb meem uas tub nkeeg thiab tsis muaj ib lub nra? (Daws tsis tau.)

Cov uas tub nkeeg heev ntawd muaj hom kev qhia tshwm uas pom tau meej thiab tus yam ntxwv dab tsi? Qhov ib, txawm lawv ua dab tsi los xij, lawv ua dog ua dig, ua qeeb qeeb thiab maj mam ua, thiab so thiab ncua thaum twg los tau li. Qhov ob, lawv tsis quav ntsej pawg ntseeg tes hauj lwm. Rau lawv mas, leej twg nyiam txhawj xeeb txog tej ntawd los yeej txhawj tau. Lawv yuav tsis txhawj li. Thaum lawv txhawj txog ib yam dab tsi mas, qhov ntawd yog txhawm rau lawv tus kheej lub koob npe, qhov tau txais txiaj ntsim, thiab lub meej mom xwb—txhua yam uas tseem ceeb rau lawv ces yog qhov tias lawv xyiv fab rau tej txiaj ntsim ntawm lub meej mom xwb. Qhov peb, lawv zam kev txom nyem hauv lawv tes hauj lwm; lawv haj tseem twb lees txais tsis tau qhov ua lawv tes hauj lwm sab me ntsis, lawv chim heev yog hais tias sab me ntsis, thiab lawv ris tsis taus kev txom nyem los sis them tsis taus tus nqi. Qhov plaub, lawv ua tsis tau siab ntev rau tes hauj lwm uas lawv ua, lawv ib txwm muab tso tseg thaum ua txog ib nrab thiab ua tsis taus siab ntev kom txog thaum ua hauj lwm tiav. Yog lawv zoo siab ib ntus, tej zaum lawv yuav ua qee yam hauj lwm kom lom zem, tiam sis yog ib yam dab tsi cheem tsum kom tau ua ntev, thiab ua rau lawv khwv heev, cheem tsum kom muaj kev xav ntau, thiab ua rau lawv lub cev nqaij daim tawv sab, ces sij hawm dhau mus lawv yuav pib yws. Piv txwv li, qee cov thawj coj saib xyuas pawg ntseeg tes hauj lwm, thiab thaum xub thawj mas lawv pom tias tes hauj lwm ntawd tshiab. Lawv thiaj li muaj siab heev rau lawv txoj kev sib qhia qhov tseeb thiab thaum lawv pom cov kwv tij thiab cov muam muaj teeb meem mas, lawv pab tau thiab daws tau cov teeb meem ntawd. Tiam sis, tom qab ua siab ntev mus tau ib ntus lawm, lawv txawm pib pom tias tes hauj lwm ua thawj coj ntawd mas sab dhau lawm, ces lawv txawm xav phem—lawv thiaj li xav hloov mus ua ib txoj hauj lwm kom yooj yim dua, thiab tsis kam tiv kev txom nyem. Cov neeg zoo li no tsis muaj kev ua siab ntev. Qhov tsib, lwm tus yam ntxwv uas qhia tau tias yog neeg tub nkeeg ntawd yog qhov lawv tsis kam ua hauj lwm tiag. Kiag thaum lawv lub cev nqaij daim tawv sab lawm, ces lawv nrhiav kev los hais ub hais no thiab tsis ua lawv tes hauj lwm, los sis muab tes hauj lwm ntawm rau lwm tus ua. Thiab thaum tus neeg ntawd ua tes hauj lwm ntawd tiav lawm mas, lawv sau tej txiaj ntsig ntawd rau lawv tus kheej yam tsis paub txaj muag li. Cov no yog tsib tug yam ntxwv loj ntawm cov neeg tub nkeeg. Nej yuav tsum tshuaj xyuas saib seb puas muaj cov neeg tub nkeeg zoo li no nyob rau hauv cov thawj coj thiab cov neeg ua hauj lwm hauv cov pawg ntseeg. Yog nej pom ib tug, yuav tsum muab lawv rho tawm tam sim ntawd. Cov neeg tub nkeeg puas ua tau hauj lwm li cov thawj coj? Txawm lawv muaj hom peev xwm zoo li cas los sis lawv txoj kev ua neeg yuav zoo li cas los xij, yog lawv tub nkeeg, ces lawv yuav ua tsis tau lawv tes hauj lwm kom zoo, thiab lawv yuav ua rau tes hauj lwm thiab tej teeb meem tseem ceeb ntawd qeeb. Pawg ntseeg tes hauj lwm mas muaj ntau yam; txhua kis ntawm tes hauj lwm ntawd mas qhia ntau yam hauj lwm ntxaws ntxaws nyob rau hauv thiab cheem tsum kom muaj kev sib qhia txog qhov tseeb los daws teeb meem kom thiaj li ua tau zoo. Yog li ntawd, cov thawj coj thiab cov neeg ua hauj lwm yuav tsum nquag—lawv yuav tsum hais lus ntau thiab ua hauj lwm ntau txhua hnub kom paub tseeb tias ua tau hauj lwm muaj txiaj ntsig. Yog lawv hais lus los sis ua hauj lwm tsawg dhau, ces yuav tsis muaj txiaj ntsig dab tsi li. Yog li ntawd, yog ib tug thawj coj los sis ib tug neeg ua hauj lwm yog ib tug neeg tub nkeeg, nws yeej yog ib tug thawj coj cuav thiab ua tsis tau hauj lwm tiag. Cov neeg tub nkeeg tsis ua hauj lwm tiag, lawv tus kheej haj yam twb tsis mus rau ntawm qhov chaw ua hauj lwm thiab, thiab lawv tsis kam daws teeb meem los sis lawv tus kheej tsis koom nrog ib teg hauj lwm meej meej twg li. Lawv tsis muaj kev to taub los sis kev nkag siab txog tej teeb meem hauv ib teg hauj lwm ib qho me me li. Lawv tsuas muaj ib lub tswv yim ntiav ntiav thiab tsis meej pem nyob hauv lawv lub taub hau los ntawm qhov mloog lwm tus hais xwb, thiab lawv lam ua kom dhau los ntawm qhov uas tsuas qhuab qhia me ntsis txog kev qhuab qhia xwb. Nej puas paub cais hom thawj coj no? Nej qhia puas tau hais tias lawv yog cov thawj coj cuav? (Paub cais me ntsis.) Cov neeg tub nkeeg mas lawv ua dej num ua dog ua dig xwb. Txawm yog tes dej num twg los xij, lawv tsis muaj kev ua siab ntev, ua hauj lwm tu ncab tu ncua, thiab yws thaum twg lawv raug kev txom nyem, yws tsis txawj tag. Lawv cem tus uas thuam los sis ntuas lawv, zoo li ib tug poj niam uas thab tib neeg nyob ntawm tej kev, pheej xav npau taws rau lwm tus, es tsis xav ua lawv tes dej num li. Qhov tsis xav ua lawv tes dej num ntawd qhia tau dab tsi? Qhov ntawd qhia hais tias lawv tsis muaj ib lub nra, tsis kam ris lub luag hauj lwm, thiab yog cov neeg tub nkeeg. Lawv tsis xav raug kev txom nyem los sis them tus nqi. Qhov no tshwj xeeb yog raug rau cov thawj coj thiab cov neeg ua hauj lwm: Yog lawv tsis muaj ib lub nra li no, lawv puas ua tau tej luag hauj lwm ntawm cov thawj coj thiab cov neeg ua hauj lwm kom tiav? Yeej ua tsis tau kiag li.

Cov Thawj Coj Cuav Tsis Taug Qab txog los sis Tsis Qhia Kev Txog Tes Hauj Lwm

Peb nyuam qhuav tham txog kis no ntawm cov thawj coj thiab cov neeg ua hauj lwm lub luag hauj lwm tsib: “tuav ib qho kev nkag siab thiab kev to taub txog qhov xwm txheej ntawm txhua yam hauj lwm.” Qhov tham txog kis no, peb tau qhia cov thawj coj cuav qee qhov kev qhia tshwm uas pom tau meej ntxaws ntxaws ntawd tshwm, nrog rau lawv txoj kev ua neeg thiab tus yam ntxwv. Tam sim no, cia peb los saib txog qhov “tuav ib qho kev nkag siab thiab kev to taub txog qhov kev nce qib ntawm txhua yam hauj lwm.” Tseeb tiag, qhov kev nce qib ntawm tes hauj lwm yeej muaj feem ntsig txog rau qhov xwm txheej ntawm tes hauj lwm, txoj kev sib cuam tshuam ntawd mas yeej sib ze dua. Yog ib tug neeg twg tsis tuaj yeem tuav tau ib qho kev nkag siab thiab to taub txog qhov xwm txheej ntawm ib yam hauj lwm, ces nws yeej tuav tsis tau ib qhov kev nkag siab thiab to taub txog qhov kev nce qib ntawm tes hauj lwm ntawd ib yam nkaus thiab. Piv txwv li, qhov kev nce qib ntawm tes hauj lwm ntawd zoo li cas lawm, tes hauj lwm ntawd mus txog qib twg lawm, cov neeg uas ua hauj lwm ntawd tus yam ntxwv zoo li cas, seb puas muaj teeb meem dab tsi txog kis kev txawj ntse qib siab, seb puas muaj qhov twg ntawm tes hauj lwm uas tsis tau raws li Vajtswv lub tsev tej kev cheem tsum, cov txiaj ntsig uas ua tau los ntawd zoo li cas, seb cov neeg ua hauj lwm uas tsis tshua txawj txog kis kev txawj ntse qib siab ntawd puas tab tom kawm, leej twg npaj txoj kev kawm ntawd, lawv tab tom kawm dab tsi, lawv kawm li cas, thiab ntau yam ntxiv—tej teeb meem ntxaws ntxaws no puav leej muaj feem ntsig txog qhov kev nce qib. Piv txwv li, txoj kev sau nkauj qhuas Vajtswv puas tseem ceeb heev? Rau ib zaj nkauj mas, txij thaum pib xaiv cov zaj lus uas tseem ceeb ntawm Vajtswv cov lus mus txog thaum sau suab nkauj tiav ntawd, yuav tsum ua cov hauj lwm ntxaws ntxaws twg nyob rau hauv txheej txheem no? Ua ntej tshaj plaws mas, yuav tsum xaiv cov zaj lus uas tseem ceeb ntawm Vajtswv cov lus uas haum rau kev ua nkauj, thiab cov lus ntawd yuav tsum ntev tsim nyog thiab. Kauj ruam ob yog cuam tshuam rau qhov xav seb hom suab nkauj twg thiaj li haum rau zaj lus ntawd kom hu tau zoo thiab xyiv fab. Tom qab ntawd, yuav tsum nrhiav kom tau cov neeg uas haum los hu zaj nkauj ntawd. Tej no tsis yog cov hauj lwm ntxaws ntxaws lod? (Yog.) Tom qab sau ib zaj nkauj tiav lawm, tus thawj coj cuav tsis nug kiag li hais tias zaj nkauj ntawd puas tsim nyog los sis hom suab nkauj ntawd puas tsim nyog. Tus sau nkauj, pom tias tsis muaj kev saib xyuas, nws tus kheej thiaj li xav tias zoo lawm ces cia li muab kaw suab. Zaj lus ntawm Vajtswv cov lus uas txhua tus tos ntsoov yuav muab ua zaj nkauj ntawd thaum kawg tau muab tso ua suab paj nruag thiab muab ua ib zaj nkauj lawm, tiam sis tib neeg feem ntau pom tias nws tseem muaj qhov tsis zoo thaum hu thiab. Muaj teeb meem dab tsi tshwm sim? Zaj nkauj uas sau ntawd tsis zoo txaus: Nws raug muab kaw ua suab txawm tias tsis muaj suab nkauj thiab tsis zoo mloog los xij. Tus thawj coj cuav, tom qab hnov zaj nkauj ntawd lawm, txawm nug hais tias, “Leej twg sau zaj nkauj no? Vim li cas thiaj li muab kaw ua suab?” Thaum lub sij hawm nws nug lo lus nug no, ces yam tsawg kawg los twb dhau mus ib hlis lawm. Nyob rau hauv ib hlis no, tus thawj coj tsis tsim nyog taug qab txog thiab to taub txog qhov kev nce qib ntawm tes hauj lwm no tam sim ntawd lod? Piv txwv li, txoj kev sau nkauj mus zoo li cas lawm? Puas tau txiav txim siab rau lub hauv paus suab nkauj? Nws puas muaj suab nkauj? Lub suab nkauj thiab hom suab ntawm zaj nkauj no puas phim rau Vajtswv cov lus? Cov neeg uas muaj kev paub txog qhov no puas pab qhia? Tom qab sau tiav lawm, puas muaj neeg coob hu zaj nkauj no? Nws yuav muaj txiaj ntsig zoo li cas? Lub suab nkauj ntawd puas suav tau tias zoo? Tus thawj coj cuav ntawd yeej ib txwm tsis taug qab txog tej yam zoo li tej no li. Thiab lawv muaj ib qho laj thawj rau qhov tsis taug qab ntawd hais tias: “Kuv tsis to taub txog kev sau nkauj. Kuv yuav ua li cas taug qab txog ib yam dab tsi uas kuv tsis to taub? Tsis muaj hnub ua tau li.” Qhov no puas yog ib qho laj thawj uas tsim nyog? (Tsis yog.) Nws tsis yog ib qho laj thawj uas tsim nyog; yog li ntawd, ib tug neeg uas tsis paub txog kev sau nkauj puas tseem taug qab tau? (Taug qab tau.) Nws yuav tsum taug qab li cas? (Nws tuaj yeem koom tes nrog cov kwv tij thiab cov muam, thiab tshuaj xyuas lub suab nkauj raws li tej hauv paus ntsiab lus seb lub suab nkauj ntawd puas haum; lawv tuaj yeem taug qab tes hauj lwm ntawd tiag tiag, tsis yog muab tes hauj lwm ntawd tso tseg.) Cov thawj coj cuav tus yam ntxwv tseem ceeb ntawm tes hauj lwm ces yog hais tej kev qhuab qhia uas tsis muaj qab hau thiab lam qw tej lus uas tsis muaj ntsiab xwb. Tom qab lawv muab tej lus txib lawm, lawv cia li muab qhov ntawd tso tseg lawm xwb. Lawv tsis nug txog qhov kev nce qib ntawm tes hauj lwm tom qab ntawd li; lawv tsis nug seb puas muaj teeb meem, qhov yuam kev, los sis kev nyuaj dab tsi tshwm sim li. Lawv suav hais tias lawv tes hauj lwm tiav kiag thaum lawv muab tes hauj lwm ntawd faib lawm. Tseeb tiag, tam li yog ib tug thawj coj mas, tom qab npaj tes hauj lwm lawm, koj yuav tsum taug qab txog qhov kev nce qib ntawm tes hauj lwm ntawd. Txawm tias koj tsis paub txog tes hauj lwm ntawd—txawm koj tsis muaj ib qho kev paub txog tes hauj lwm ntawd li los—koj yeej nrhiav tau ib txoj hau kev los ua koj tes hauj lwm. Koj tuaj yeem nrhiav ib tug neeg uas to taub tes hauj lwm ntawd tiag tiag, tus uas to taub txog txoj hauj lwm ntawd, los tshuaj xyuas thiab tawm tswv yim. Los ntawm lawv tej tswv yim ntawd ces koj yeej nrhiav tau txog tej hauv paus ntsiab lus uas tsim nyog, thiab vim qhov ntawd koj yuav muaj peev xwm taug qab txog tes hauj lwm ntawd. Txawm koj paub los sis tsis paub los sis tsis to taub txog txoj hauj lwm ntawd los xij li, yam tsawg kawg koj yuav tsum saib xyuas tes hauj lwm, taug qab txog tes hauj lwm ntawd, thiab nug tas li txog tes hauj lwm ntawd qhov kev nce qib. Koj yuav tsum tuav kom muaj ib qho kev nkag siab txog tej yam no; qhov no yog koj lub luag hauj lwm, qhov no yog ib feem ntawm koj txoj hauj lwm. Qhov tsis taug qab txog tes hauj lwm, tsis ua ib yam dab tsi ntxiv thaum muab tes hauj lwm faib lawm, muab tes hauj lwm ntawd tso tseg—qhov no yog qhov uas cov thawj coj cuav ua. Qhov tsis taug qab txog los sis tsis qhia kev txog tes hauj lwm, tsis nug txog los sis tsis daws cov teeb meem uas tshwm sim ntawd, thiab tsis to taub qhov kev nce qib los sis qhov ua tau zoo ntawm tes hauj lwm ntawd—tej no kuj yog tej kev qhia tshwm uas pom tau meej ntawm cov thawj coj cuav thiab.

Cov Thawj Coj Cuav Tsis Ua Hauj Lwm Tiag Tiag, Ces Thiaj Li Ua Rau Qhov Kev Nce Qib ntawm Tes Hauj Lwm Qeeb

Vim cov thawj coj cuav tsis kawm kom paub txog qhov nce qib ntawm tes hauj lwm, thiab vim lawv tsis muaj peev xwm paub kiag tam sim ntawd—haj yam daws tsis tau—tej teeb meem uas muaj nyob rau hauv tes hauj lwm ntawd, ces qhov no thiaj li pheej ua rau muaj kev khuam tab kaum ib zaug tas los ib zaug thiab. Nyob rau hauv qee tes hauj lwm mas, vim tib neeg tsis nkag siab txog cov hauv paus ntsiab lus thiab tsis muaj ib tug zoo tsim nyog los ris tes hauj lwm los sis tswj xyuas tes hauj lwm ntawd, ces cov uas ua tes hauj lwm ntawd thiaj li nquag muaj kev xav phem, nyob twj ywm, thiab tos nkaus xwb, uas ua rau muaj kev cuam tshuam rau qhov kev nce qib ntawm tes hauj lwm. Yog hais tias cov thawj coj tau ua lawv tes dej num tiav hlo lawm—yog lawv tswj xyuas tes hauj lwm, txhawb tes hauj lwm mus lawm tom ntej, saib xyuas tes hauj lwm ntawd, thiab nrhiav tej tug uas to taub hom hauj lwm ntawd los coj tes hauj lwm ntawd kev, ces tes hauj lwm yeej yuav nce qib sai dua li qhov muaj kev khuam tab kaum ib zaug tas los ib zaug thiab. Rau cov thawj coj mas, qhov to taub thiab nkag siab txog tes hauj lwm ntawd yog qhov tseeb ceeb heev. Muaj tseeb, qhov ntawd kuj yog ib qho uas tim tsum heev rau cov thawj coj kom to taub thiab nkag siab tias tes hauj lwm ntawd nce qib mus zoo li cas lawm, vim qhov nce qib ntawd cuam tshuam rau qhov uas ua tes hauj lwm tau zoo thiab qhov txiaj ntsig uas tsim nyog ua kom tau. Yog cov thawj coj thiab cov neeg ua hauj lwm tsis muaj ib qho kev nkag siab txog pawg ntseeg tes hauj lwm nce qib li cas, thiab lawv tsis taug qab txog los sis tsis saib xyuas txhua yam li, ces qhov nce qib ntawm pawg ntseeg tes hauj lwm ntawd yuav mus qeeb heev. Qhov no yog vim tias cov tib neeg feem coob uas ua tej dej num ntawd mas ua phem heev, tsis muaj lub nra, thiab pheej xav phem, nyob twj ywm, thiab ua dog ua dig xwb. Yog tsis muaj leej twg muaj lub nra thiab muaj lub peev xwm ua hauj lwm los ris lub luag hauj lwm tiag tiag rau tes hauj lwm, kawm kom paub txog qhov nce qib ntawm tes hauj lwm kom raws sij hawm, thiab coj kev, saib xyuas, qhuab ntuas, thiab ntuas cov neeg ua tej dej num ntawd, ces qhov ua tes hauj lwm zoo ntawd yeej yuav qeeb heev thiab tej txiaj ntsig ntawm tes hauj lwm ntawd yeej yuav tsis zoo kiag li. Yog cov thawj coj thiab cov neeg ua hauj lwm haj tseem twb tsis pom qhov no kom meej thiab, ces yog lawv ruam thiab dig muag lawm. Yog li ntawd, cov thawj coj thiab cov neeg ua hauj lwm ntawd yuav tsum paub txog, taug qab, thiab nkag siab qhov nce qib ntawm tes hauj lwm ntawd kom sai, paub txog seb tej teeb meem uas cov tib neeg ua tej dej num ntawd muaj uas yuav tsum tau daws yog dab tsi, thiab to taub seb tej teeb meem twg yuav tsum tau daws kom thiaj li ua tau txiaj ntsig zoo dua. Tej no puav leej tseem ceeb heev, ib tug tib neeg uas ua ib tug thawj coj mas yuav tsum paub tej no kom meej. Yuav kom ua tau koj tes dej num zoo mas, koj yuav tsum tsis txhob ua zoo li ib tug thawj coj cuav, tus uas ua qee qhov hauj lwm ntiav ntiav xwb ces txawm xav hais tias nws mas twb ua tau nws tes dej num zoo lawm. Cov thawj coj cuav yeej tsis quav ntsej thiab tsis xyuam xim txog lawv tes hauj lwm, thiab lawv tsis paub txog lub luag hauj lwm, lawv tsis daws teeb meem thaum muaj tej teeb meem ntawd, thiab txawm lawv ua tes hauj lwm dab tsi los xij, lawv tsuas lam ua saum daim tawv thiab ua dog ua dig xwb; lawv tsuas hais cov lus zoo, nthuav tej kev qhuab qhia tawm thiab tham lus qhuav, thiab lam ua lawv tes hauj lwm kom dhau xwb. Muab hais dav dav ces, qhov no yog cov thawj coj cuav tus yam ntxwv ua hauj lwm. Yog muab piv rau cov tawm tsam khetos, ces txawm cov thawj coj cuav ntawd tsis tab meeg ua phem thiab tsis txhob txwm ua phem los xij, thaum koj saib rau qhov lawv ua hauj lwm ntawd, yeej hais tau hais tias lawv ua dog ua dig xwb, yeej tsis muaj ib lub nra, yeej tsis ris lub luag hauj lwm thiab yeej tsis ua siab ncaj rau lawv tes dej num li.

Peb nyuam qhuav sib qhia txog cov thawj coj cuav uas tsis ua hauj lwm tiag, thiab tsis to taub thiab tsis nkag siab qhov kev nce qib ntawm txhua yam hauj lwm. Hais txog cov teeb meem thiab tej kev nyuaj uas tshwm sim hauv pawg ntseeg tes hauj lwm ntawd, kuj yog tias cov thawj coj cuav kuj tsis quav ntsej tej ntawd li los sis tsuas hais tej kev qhuab qhia me ntsis thiab lam hais tej lus uas tsis muaj ntsiab kom dhau mus xwb. Rau txhua yam hauj lwm mas, yus yeej yuav tsis pom lawv tus kheej tuaj rau ntawm qhov chaw ua hauj lwm tuaj sim kom to taub thiab taug qab txog tes hauj lwm li. Yus yuav tsis pom lawv qhia txog qhov tseeb los daws teeb meem nyob ntawd, thiab yus haj yam tsis pom lawv nyob ntawd qhia kev thiab saib xyuas tes hauj lwm kiag, tiv thaiv kom tsis txhob muaj qhov tsis zoo thiab qhov yuam kev tshwm sim hauv tes hauj lwm ntawd li thiab. Qhov no yog qhov kev qhia tshwm uas pom tau meej tshaj plaws ntawm txoj kev ua dog ua dig uas cov thawj coj cuav ua hauj lwm. Txawm tias cov thawj coj cuav, tsis zoo li cov tawm tsam khetos, tsis txhob txwm tab kaum thiab cuam tshuam pawg ntseeg tes hauj lwm, thiab lawv tsis ua ntau yam kev phem thiab tsis tsim lub nceeg vaj ywj pheej los, lawv ntau yam kev coj uas ua dog ua dig ntawd ua rau muaj kev thaiv loj heev rau pawg ntseeg tes hauj lwm, yog li ntawd thiaj li muaj ntau yam teeb meem tshwm sim tsis tu ncua thiab daws tsis tau. Qhov no cuam tshuam rau qhov kev nce qib ntawm txhua yam hauj lwm hauv pawg ntseeg loj heev, thiab cuam tshuam rau cov neeg Vajtswv xaiv tseg txoj kev nkag mus rau hauv lub neej txoj sia. Cov thawj coj cuav zoo li no tsis tsim nyog raug muab tshem tawm lod? Cov thawj coj cuav tsis muaj peev xwm ua hauj lwm tiag—txawm lawv ua dab tsi los yeej muaj qhov pib uas khov kho tiam sis tsis muaj zog zuj zus rau thaum kawg. Lub luag hauj lwm uas lawv ua yog tus uas hais lus qhib rooj xwb: Lawv hais tej lus uas tsis muaj ntsiab thiab tshaj tawm tej kev qhuab qhia, thiab thaum lawv muab tes hauj lwm faib rau lwm tus thiab npaj tias leej twg yuav ris tes hauj lwm ntawd lawm, ces lawv tes hauj lwm tiav lawm xwb. Lawv zoo li lub paj taub hais lus nrov nrov uas yus pom nyob pem tej toj siab hauv Teb Chaws Suav—qhov no yog tag nrho lub luag hauj lwm uas lawv ua. Lawv tsuas ua hauj lwm pib me ntsis xwb; rau tes hauj lwm uas tseem tshuav ntawd, ces yeej tsis pom lawv nyob qhov twg li. Hais txog cov lus nug ntxaws ntxaws xws li txhua yam hauj lwm mus li cas lawm, seb puas mus raws li tej hauv paus ntsiab lus, thiab seb puas tau txiaj ntsig ntawd—lawv tsis paub cov lus teb rau li. Lawv yeej tsis mus kom tob rau hauv qib hauv paus thiab mus xyuas qhov chaw ua hauj lwm kom to taub thiab nkag siab txog qhov kev nce qib thiab tej ntxaws ntxaws ntawm txhua yam hauj lwm. Yog li ntawd, tej zaum cov thawj coj cuav yuav tsis txhob txwm tsim kev tab kaum thiab kev cuam tshuam, los sis ua ntau yam kev phem thaum lawv ua thawj coj, tiam sis, qhov tseeb tiag, lawv ua rau tes hauj lwm mus tsis taus, ua rau qhov kev nce qib ntawm txhua yam hauj lwm hauv pawg ntseeg qeeb, thiab ua rau cov neeg Vajtswv xaiv tseg ua tsis tau lawv tej dej num zoo thiab tsis tau txais kev nkag mus rau hauv lub neej txoj sia. Ua hauj lwm li no, lawv yuav ua li cas coj tau cov neeg Vajtswv xaiv tseg mus rau txoj kev ntseeg Vajtswv uas yog? Qhov no qhia tau tias cov thawj coj cuav tsis ua ib qho hauj lwm tiag li. Lawv tsis taug qab txog tes hauj lwm uas lawv yuav tsum ris los sis tsis qhia kev thiab saib xyuas tes hauj lwm ntawd kom paub tseeb tias pawg ntseeg tes hauj lwm nce qib mus li ib txwm; lawv tsis ua tej hauj lwm uas cov thawj coj thiab cov neeg ua hauj lwm tsim nyog ua, thiab lawv tsis ua lawv txoj kev ua siab ncaj los sis tej luag hauj lwm kom tiav. Qhov no ua kom paub tseeb tias cov thawj coj cuav tsis ua siab ncaj hauv txoj kev lawv ua lawv tej dej num, tias lawv tsuas ua dog ua dig xwb; lawv dag cov neeg Vajtswv xaiv tseg thiab dag Vajtswv Tus Kheej, thiab lawv cuam tshuam thiab thaiv qhov ua raws li Vajtswv lub siab nyiam. Qhov muaj tseeb no yog qhov uas sawv daws pom tau. Tej zaum ib tug thawj coj cuav yeej ua tsis tau hauj lwm tiag tiag; tej zaum kuj yog lawv khiav hauj lwm thiab txhob txwm ua dog ua dig xwb. Txawm yog qhov twg los xij, qhov muaj tseeb tseem yog tias lawv ua rau pawg ntseeg tes hauj lwm ntxhov quav niab. Tsis muaj kev nce qib ib qho me me hauv txhua yam hauj lwm hauv pawg ntseeg li, thiab ib pawg teeb meem uas muaj nyob ntawd tseem tsis tau daws los tau ntev heev lawm. Qhov no tsis yog cuam tshuam rau txoj kev nthuav dav tes hauj lwm tshaj tawm txoj moo zoo xwb, tiam sis kuj thaiv cov neeg Vajtswv xaiv tseg txoj kev nkag mus rau hauv lub neej txoj sia yam hnyav heev thiab. Tej muaj tseeb no txaus los qhia tias cov thawj coj cuav tsis yog tsuas tsis muaj peev xwm ua hauj lwm tiag xwb, tiam sis kuj dhau los ua tej kev thaiv rau tes hauj lwm nthuav dav txoj moo zoo ntawd thiab, thiab dhau los ua tej kev thaiv rau txoj kev ua li Vajtswv lub siab nyiam hauv pawg ntseeg.

Cov thawj coj cuav tsis ua hauj lwm tiag thiab daws tsis tau tej teeb meem tiag. Qhov no tsis yog tsuas ua rau qhov kev nce qib ntawm tes hauj lwm qeeb thiab cuam tshuam rau cov txiaj ntsig xwb, tiam sis nws kuj ua rau muaj kev poob loj rau pawg ntseeg tes hauj lwm, nkim lub zog, cov khoom siv, thiab nyiaj txiag ntau heev thiab. Yog li ntawd, cov thawj coj cuav yuav tsum them tej uas poob lawm ntawd rov qab. Ib txhia tib neeg hais tias, “Yog cov thawj coj thiab cov neeg ua hauj lwm yuav tsum them tej uas poob lawm ntawd rov qab vim qhov tsis ua lawv tes hauj lwm zoo, ces yuav tsis muaj leej twg kam ua thawj coj los sis neeg ua hauj lwm li lawm.” Cov neeg uas tsis ris lub luag hauj lwm zoo li no mas tsis tsim nyog ua thawj coj los sis neeg ua hauj lwm. Cov uas tsis muaj lub siab txawj xav los sis laj thawj yog cov neeg phem—yog cov neeg phem xav ua thawj coj thiab neeg ua hauj lwm ntawd tsis yog muaj teeb meem lod? Vim ntau yam hauj lwm hauv Vajtswv lub tsev cuam tshuam txog kev siv nyiaj, qhov ntawd tsis tas yuav suav cov nyiaj ntawd lod? Vajtswv cov khoom fij puas yog qee yam uas tib neeg nkim thiab siv ywj siab raws siab nyiam tau? Cov thawj coj thiab cov neeg ua hauj lwm muaj cai dab tsi los siv Vajtswv cov khoom fij ywj siab? Qhov ua rau poob txog sab nyiaj txiag ntawd mas yuav tsum tau them rov qab; qhov no yeej zoo li ib txwm muaj thiab ncaj ncees lawm, thiab tsis muaj leej twg tsis lees paub tau qhov no. Piv txwv li, muab hais tias muaj ib txoj hauj lwm uas ib tug neeg ua ib hlis xwb tiav lawm. Yog siv rau lub hlis los ua txoj hauj lwm no, cov nqi siv rau tsib lub hlis uas ntxiv ntawd tsis yog ib qho poob lod? Cia Kuv muab ib qho piv txwv txog kev tshaj tawm txoj moo zoo. Muab hais tias ib tug neeg txaus siab tshuaj xyuas txoj hau kev tseeb thiab tej zaum ib lub hlis xwb twb coj tau nws los ntseeg lawm, tom qab ntawd nws yuav nkag tau mus rau hauv pawg ntseeg thiab yuav tau txais kev ywg dej thiab kev yug mus ntxiv, thiab rau lub hli ces nws tsim tau ib lub hauv paus lawm. Tiam sis yog tus cwj pwm uas tus neeg tshaj tawm txoj moo zoo coj rau qhov xwm txheej no yog ib qho ntawm qhov tsis quav ntsej thiab ua dog ua dig, thiab cov thawj coj thiab cov neeg ua hauj lwm kuj tsis quav ntsej lawv tej luag hauj lwm li thiab, thiab thaum kawg siv sij hawm ib nrab xyoo mam li muab tau tus neeg ntawd, qhov ib nrab xyoo no yuav tsis yog ib qho poob rau tus neeg ntawd txoj sia lod? Yog nws ntsib tej kev puas tsuaj loj es nws tseem tsis tau tsim tau ib lub hauv paus ntawm txoj hau kev tseeb, ces nws yuav muaj kev phom sij, thiab thaum ntawd cov neeg ntawd yuav tsis tshuav tus neeg ntawd nqi lod? Qhov poob zoo li no mas muab ntsuas tsis tau rau nyiaj txiag los sis tej khoom siv. Yog tus neeg ntawd txoj kev to taub qhov tseeb raug muab ncua mus ib nrab xyoo, thiab nws qhov kev tsim ib lub hauv paus thiab qhov pib ua nws tes dej num raug muab ncua mus ib nrab xyoo, leej twg yuav ris taus qhov no? Cov thawj coj thiab cov neeg ua hauj lwm puas muaj peev xwm ris taus qhov no? Tsis muaj leej twg muaj peev xwm ris tau qhov ncua ib tug neeg twg txoj sia li. Vim tsis muaj leej twg muaj peev xwm ris taus qhov no, qhov tsim nyog rau cov thawj coj thiab cov neeg ua hauj lwm ua ntawd yog dab tsi? Muaj rau lo lus: Ua kom kawg koj lub zog. Ua kom kawg koj lub zog los ua dab tsi? Los ua koj tus kheej tej luag hauj lwm kom tiav, ua txhua yam uas koj pom tau ntawm koj tus kheej ob lub qhov muag, xav rau hauv koj lub siab, thiab ua kom tau los ntawm koj lub peev xwm. Qhov no yog qhov ua kom kawg koj lub zog, qhov no yog qhov ua siab ncaj thiab muaj lub luag hauj lwm, thiab qhov no yog lub luag hauj lwm uas cov thawj coj thiab cov neeg ua hauj lwm yuav tsum ua kom tiav. Qee cov thawj coj thiab cov neeg ua hauj lwm tsis saib qhov tshaj tawm txoj moo zoo li yog ib qho tseem ceeb. Lawv xav tias, “Vajtswv cov yaj yuav hnov Vajtswv lub suab. Leej twg tshuaj xyuas thiab lees txais ces yuav tau koob hmoov; leej twg tsis tshuaj xyuas thiab tsis lees txais ces yuav tsis tau koob hmoov, thiab tsim nyog tuag rau hauv kev puas tsuaj!” Cov thawj coj cuav tsis ua tib zoo xav txog Vajtswv tej kev npaj siab li, thiab tsis ris lub nra rau tes hauj lwm tshaj tawm txoj moo zoo li; lawv kuj tsis ris lub luag hauj lwm rau cov neeg los tshiab uas nyuam qhuav nkag los rau hauv pawg ntseeg, thiab tsis saib cov neeg Vajtswv xaiv tseg txoj kev nkag mus rau hauv lub neej txoj sia tias tseem ceeb li—lawv ib txwm tsom ntsoov rau qhov txaus siab rau tej txiaj ntsim ntawm lawv lub meej mom xwb. Txawm yuav muaj pes tsawg tus neeg tshuaj xyuas txoj hau kev tseeb los, lawv tsis ntxhov siab kiag li, ib txwm muaj lub siab xav tias lam ua kom dhau hnub xwb, ua zoo li ib tug vajntxwv uas los so lawm los sis ib tug nom tswv. Txawm tes hauj lwm yuav tseem ceeb los sis ceev npaum li cas los, lawv yeej tsis tuaj rau ntawm chaw li, thiab lawv tsis nug txog thiab tsis to taub txog qhov xwm txheej ntawm tes hauj lwm, los sis tsis taug qab txog tes hauj lwm thiab tsis daws teeb meem. Lawv tsuas npaj tes hauj lwm thiab xav tias lawv txoj hauj lwm tiav log lawm, thiab lawv ntseeg tias qhov no yog kev ua hauj lwm lawm. Qhov no tsis yog ua dog ua dig xwb lod? Qhov no tsis yog dag cov saud thiab cov hauv qab xwb lod? Cov thawj coj thiab cov neeg ua hauj lwm zoo li no puas haum rau Vajtswv siv? Lawv tsis zoo ib yam li cov nom tswv ntawm tus zaj loj liab ploog xwb lod? Lawv xav tias, “Qhov ua thawj coj los sis neeg ua hauj lwm ntawd ces zoo ib yam li qhov ua nom lawm, thiab yus yuav tsum xyiv fab rau tej txiaj ntsim ntawm lub meej mom no. Qhov ua nom ntawd muab txoj cai tshwj xeeb no rau kuv, ua rau kuv tsis tas yuav mus rau ntawm qhov chaw ua hauj lwm ntawd. Yog kuv ib txwm nyob rau ntawm chaw, taug qab txog tes hauj lwm thiab to taub qhov xwm txheej, qhov ntawd yuav sab npaum li cas, yuav poob meej mom npaum li cas! Kuv txais yuav tsis tau qhov kev sab zoo li no!” Qhov no yog kiag qhov uas cov thawj coj cuav thiab cov neeg ua hauj lwm cuav ua hauj lwm ntag, tsuas txhawj txog kev ntshaw kev tau zoo thiab xyiv fab rau tej txiaj ntsim ntawm lub meej mom yam tsis ua hauj lwm tiag, thiab tsis muaj lub siab txawj xav los sis laj thawj hlo li. Cov niag cab zoo li no yeej tsim nyog muab tshem tawm lawm, thiab txawm yog muab lawv rau txim los, lawv yeej tsim nyog lawm! Qee cov thawj coj thiab cov neeg ua hauj lwm, txawm ua pawg ntseeg tes hauj lwm los tau ntau xyoo lawm los xij, tsis paub xyov yuav tshaj tawm txoj moo zoo li cas, haj yam tsis paub hais lus tim khawv thiab. Yog koj hais kom lawv qhia txog txhua qhov tseeb uas hais txog tej zeem muag ntawm Vajtswv tes hauj lwm rau cov neeg uas yuav qhia txoj moo zoo rau, lawv ua tsis tau. Thaum nug hais tias, “Koj puas tau siv zog npaj koj tus kheej los ntawm qhov tseeb txog tej zeem muag?” cov thawj coj cuav xav hais tias, “Vim li cas kuv yuav tsum siv zog npaum li ntawd? Vim kuv lub meej mom siab, tes hauj lwm ntawd tsis yog rau kuv ua; muaj neeg coob heev ua.” Qhia rau Kuv seb, lawv yog hom tsiaj dab tsi? Lawv twb ua pawg ntseeg tes hauj lwm los tau ntau xyoo lawm, tiam sis tsis paub xyov yuav tshaj tawm txoj moo zoo li cas. Thiab thaum hais txog qhov hais lus tim khawv ntawd, lawv yuav tsum nrhiav ib tug neeg tshaj tawm txoj moo zoo los ua rau lawv. Yog tias, tam li yog ib tug thawj coj los sis neeg ua hauj lwm, koj tsis muaj peev xwm tshaj tawm txoj moo zoo, hais lus tim khawv, los sis qhia qhov tseeb uas ntsig txog tej zeem muag rau tib neeg, koj ua tau dab tsi? Koj tej luag hauj lwm yog dab tsi? Koj puas tau ua tej luag hauj lwm ntawd tiav? Koj puas yog tsuas noj tej qub peev uas koj twb muaj lawm xwb? Yam uas koj muaj ntawd yog dab tsi? Leej twg tso cai rau koj noj tej qub peev uas koj twb muaj lawm ntawd? Qee cov neeg saib xyuas ntawm pab pawg tshaj tawm txoj moo zoo yeej tsis tau saib thiab mloog lwm tus tshaj tawm txoj moo zoo li. Lawv tsis quav ntsej mloog; lawv nkees mloog, pom tias meem txom dhau lawm, thiab tsis muaj lub siab ntev. Lawv yog cov thawj coj, koj tsis paub lod—yog cov nom thiab ntag—yog li ntawd lawv tsis ua cov hauj lwm tiag tiag no; lawv kom cov kwv tij thiab cov muam ua xwb. Piv txwv hais tias qee cov neeg ua hauj lwm tshaj tawm txoj moo zoo ntsib ib tug neeg uas muaj peev xwm siab, tus uas mob siab rau txhua yam, thiab tus uas xav kom to taub qee qhov tseeb ntxaws ntxaws uas ntsig txog tej zeem muag. Cov neeg ua hauj lwm tshaj tawm txoj moo zoo qhia tsis tau kom meej meej kiag li, yog li ntawd lawv thiaj li hais kom lawv cov thawj coj ua. Cov thawj coj lawv tus kheej tsis muaj lus hais li, thiab haj yam nrhiav kev los hais ub hais no hais tias, “Kuv tus kheej los yeej tsis tau ua tes hauj lwm no dua li thiab. Nej mus ua; kuv mam li txhawb nej. Yog muaj teeb meem dab tsi tshwm sim, kuv mam li pab nej kho; kuv txhawb nej. Tsis txhob txhawj. Muaj dab tsi ntshai thaum peb muaj Vajtswv lawm? Thaum ib tug neeg nrhiav txoj hau kev tseeb, nej tuaj yeem hais lus tim khawv los sis qhia txog qhov tseeb ntawm tej zeem muag. Kuv tsuas ris qhov qhia txog qhov tseeb ntawm kev nkag mus rau hauv lub neej txoj sia xwb. Tes hauj lwm hais lus tim khawv yog nej lub nra hnyav uas yuav tsum ris, tsis txhob vam khom rau kuv.” Txhua zaus thaum txog lub sij hawm tseem ceeb ntawm kev hais lus tim khawv hauv kev tshaj tawm txoj moo zoo mas, lawv khiav nkaum lawm. Lawv paub meej tias lawv tsis muaj qhov tseeb, yog li ntawd vim li cas lawv thiaj li tsis siv zog npaj qhov tseeb rau lawv tus kheej? Paub meej tias lawv tsis muaj qhov tseeb, vim li cas lawv ho pheej siv zog txeeb kom tau los ua thawj coj tas li? Lawv tsis muaj txuj ci hlo li, tiam sis lawv tseem ua ntsej muag tuab txais yuav txhua txoj hauj lwm ua nom tswv thiab—lawv haj tseem yuav txais yuav lub luag hauj lwm ua vajntxwv thiab yog koj cia lawv ua—lawv tsis paub txaj muag hlo li! Txawm lawv tuav txoj kev ua thawj coj qib twg los xij, lawv ua tsis tau hauj lwm tiag, tiam sis lawv tseem muaj cuab kav los xyiv fab rau tej txiaj ntsim ntawm lub meej mom yam tsis hnov mob hauv lub siab li. Lawv tsis yog cov neeg uas tsis paub txaj muag hlo li lod? Yeej to taub tau yog hais tias hais kom koj hais lwm hom lus es koj hais tsis tau; tiam sis qhov qhia qhov tseeb ntawm tej zeem muag thiab Vajtswv tej kev npaj siab ua koj hom lus xwb yuav tsum ua tau, puas yog? Cov neeg uas tsuas ntseeg los tau peb mus rau tsib xyoos xwb tej zaum yuav zam txim tau rau qhov tsis muaj peev xwm qhia qhov tseeb. Tiam sis qee leej twb ntseeg Vajtswv los tau yuav luag muaj 20 xyoo lawm es tseem tsis muaj peev xwm qhia qhov tseeb uas ntsig txog tej zeem muag thiab—cov neeg zoo li no tsis yog cov neeg uas tsis muaj qab hau lod? Lawv tsis yog cov neeg uas tsis muaj nuj nqis lod? Nws ua rau Kuv xav tsis thoob thaum hnov tias ib tug neeg tau ntseeg Vajtswv los tau ntau xyoo lawm, tiam sis tsis paub xyov yuav qhia qhov tseeb txog tej zeem muag li cas. Nej txhua tus xav li cas tom qab hnov qhov no lawm? Qhov no tsis yog ib qho uas xav tsis txog lod? Lawv tau ua lawv tes hauj lwm li cas los tau tag nrho tej xyoo no lawm? Thaum hais kom muab kev qhia rau kev ua suab paj nruag mas, lawv tsis paub ua li, thiab hais tias tes hauj lwm tshwj xeeb no mas nyuaj dhau lawm, tias nws tsis yog qee yam uas tus neeg dog dig yuav to taub tau. Thaum hais kom muab kev qhia rau tes hauj lwm ua duab, los sis rau tes hauj lwm ua yeeb yaj kiab, lawv hais tias cov hauj lwm no mas cheem tsum kom muaj kev txawj qib siab rau dhau lawm lawv ua tsis tau. Thaum hais kom sau cov ntawv txog cov lus tim khawv uas hais txog txoj kev ntsib kev pom mas, lawv hais tias lawv txoj kev kawm ntawv qis dhau lawm thiab lawv tsis paub sau cov ntawv ntawd, thiab tias yeej tsis tau xyaum txog qhov ntawd li. Yog lawv ua tsis tau cov hauj lwm no, qhov ntawd zam txim tau rau, tiam sis tes hauj lwm tshaj tawm txoj moo zoo mas yog ib feem ntawm lawv tes dej num uas ib txwm muaj los. Tes hauj lwm uas lawv twb swm heev no—nws tsis tsim nyog yooj yim rau lawv ua lod? Kis uas tseem ceeb tshaj plaws ntawm txoj kev qhia qhov tseeb txog tej zeem muag yog kom qhia qhov tseeb txog peb theem hauj lwm kom meej meej. Thaum pib mas, tib neeg tsis muaj kev ntsib kev pom ntau txog kis no thiab tej zaum yuav qhia tsis tau zoo, tiam sis los ntawm kev xyaum raws sij hawm, lawv yuav muaj peev xwm qhia tau zoo dua thaum lawv ua ntau ntxiv, xws li lawv muaj peev xwm hais lus muaj txheej txheem, los ntawm hom lus uas yog thiab meej, thiab hais tau zoo. Qhov no tsis yog ib qho tiag tiag ntawm tes hauj lwm tiag tiag uas cov thawj coj yuav tsum paub lod? Qhov no tsis zoo li qhov yuam kom ib tug ntses mus nyob saum nruab nqhuab, puas yog? (Tsis yog, tsis yog li.) Tiam sis cov thawj coj cuav zoo li no tsis muaj peev xwm ua txawm yog me ntsis hauj lwm no xwb los xij. Tiam sis, lawv tseem ua thawj coj thiab lod? Lawv ua dab tsi es tseem nyob hauv txoj hauj lwm ntawd? Ib txhia tib neeg hais tias, “Kuv yog ib tug neeg uas txoj kev xav tsis meej pem thiab tsis meej, tsis muaj laj thawj, thiab kuv tsis tshua txawj hais lus txog qhov tseeb uas ntsig txog tej zeem muag.” Yog li ntawd, koj puas paub tau thiab daws tau ntau yam tsis zoo thiab qhov yuam kev uas tshwm sim rau hauv tes hauj lwm tshaj tawm txoj moo zoo? Yog koj paub tsis tau tej ntawd, ces koj yeej daws tsis tau tej ntawd ib yam nkaus thiab. Thaum cov thawj coj cuav saib xyuas tes hauj lwm tshaj tawm txoj moo zoo, lawv tsis ua lub luag hauj lwm tshuaj xyuas los sis saib xyuas li; lawv tsuas cia cov uas nyob hauv qab lawv ua raws li lawv siab nyiam xwb, kom txhua tus ua tau txhua yam li lawv xav ua, thiab tshaj tawm rau tus uas lawv xav tshaj tawm rau—yeej tsis muaj tej hauv paus ntsiab lus los sis cov qauv siv rau li. Ib txhia tib neeg ua raws li lub siab xav, tsis muaj laj thawj thiab tshwj xeeb tshaj yog tsis muaj tej hauv paus ntsiab lus thaum lawv ua txhua yam, thiab ua tej yam tsis zoo yam tsis xyuam xim. Cov thawj coj cuav tsis pom los sis tsis paub cov teeb meem no hlo li.

Hais tias nyob rau Amelikas Qab Teb thiab Afikas ntawd, muaj qee cov neeg pluag uas raug coj los rau hauv pawg ntseeg los ntawm tes hauj lwm tshaj tawm txoj moo zoo. Cov neeg no tsis muaj nyiaj txiag ruaj khov, thiab txawm yog qhov nrhiav zaub mov kom txaus noj thiab ua neej nyob los yeej muaj teeb meem li. Yog li ntawd, yuav tsum ua li cas? Muaj cov thawj coj hais tias, “Yog Vajtswv txoj kev npaj siab los cawm noob neej, thiab yuav kom raug cawm dim mas, yus yuav tsum muaj zaub mov kom txaus noj ua ntej, puas yog? Yog li ntawd Vajtswv lub tsev tsis tsim nyog muab kev pab lod? Yog lawv ntseeg Vajtswv, peb yeej muab tau ob peb phau ntawv uas hais txog Vajtswv cov lus rau lawv. Lawv tsis muaj khoos phis tawj los sis xov tooj, yog li ntawd peb tsim nyog ua li cas yog lawv thov ua dej num? Sim nug seb, saib seb lawv puas muaj lub siab dawb paug kam los ua dej num.” Los ntawm qhov nug ntawd, thiaj li pom tias cov neeg no tam sim no tsis muaj nyiaj, tiam sis yog lawv muaj nyiaj thiab noj mov tsau lawm, lawv yuav txaus siab tawm mus tshaj tawm txoj moo zoo thiab ua lawv tes dej num. Tom qab to taub tej xwm txheej no lawm, cov thawj coj thiaj li pib muab nyiaj pab, muab nyiaj txhua lub hli. Cov zaub mov thiab chaw nyob, thiab haj tseem them nqi is taws nem, thiab qhov yuav xov tooj, khoos phis tawj, thiab lwm yam khoom siv rau cov neeg no puav leej yog siv Vajtswv lub tsev cov nyiaj los them rau. Qhov muab nyiaj rau cov neeg no tsis yog tsom rau qhov nthuav dav tes hauj lwm tshaj tawm txoj moo zoo, tiam sis yog muab txhawm rau txoj kev pab lawv txoj kev ua neej nyob. Qhov no puas mus raws li tej hauv paus ntsiab lus? (Tsis raws, tsis mus raws li ntawd.) Vajtswv lub tsev puas muaj txoj cai hais tias, thaum tshaj tawm txoj moo zoo thiab thaum ntsib cov neeg pluag uas tsis muaj kev khwv noj khwv haus, tsuas yog lawv lees txais tau theem hauj lwm no xwb, lawv yuav tsum tau txais kev pab? Puas muaj lub hauv paus ntsiab lus zoo li no? (Tsis muaj.) Yog li ntawd, cov thawj coj no muab nyiaj pab rau lawv raws li lub hauv paus ntsiab lus twg? Puas yog vim lawv xav tias Vajtswv lub tsev muaj nyiaj tiam sis tsis muaj chaw siv, los sis vim lawv saib cov neeg no tias txaus khuv leej dhau lawm, los sis yog cia siab tias cov neeg no yuav pab nthuav dav txoj moo zoo? Lawv qhov kev npaj siab yog dab tsi kiag? Lawv yuav ua kom tau dab tsi? Thaum hais txog qhov muab xov tooj, khoos phis tawj, thiab cov nqi noj nyob ntawd, lawv muaj kev kub siab heev; lawv xyiv fab rau qhov kev koom nrog cov hauj lwm zoo li no uas muab kev pab rau lwm tus, vim qhov ntawd lawv ua tau rau cov neeg no zoo siab thiab kov yeej cov neeg no lub siab, thiab lawv mob siab tshwj xeeb rau cov hauj lwm zoo li no, ua mus deb zuj zus thiab tsis muaj kev txaj muag hlo li lawm. Qhov no yog siv Vajtswv cov nyiaj los ua kom tib neeg zoo siab thiab yuav tib neeg lub siab. Tseeb tiag, cov neeg pluag no tsis ntseeg Vajtswv tiag tiag; lawv tsuas sim ua kom lawv lub plab tsau thiab nrhiav ib txoj hau kev los khwv noj khwv haus xwb. Cov neeg zoo li no tsis yog nrhiav kev los kom tau txais qhov tseeb los sis kev cawm dim. Vajtswv puas yuav cawm cov neeg no? Qee leej, txawm yog lawv txaus siab hlo ua ib teg dej num los, tsis yog siab dawb paug, tiam sis yog vim lawv ntshaw xov tooj thiab khoos phis tawj, tau kev yooj yim hauv lub neej xwb. Tiam sis cov thawj coj cuav tsis quav ntsej txog qhov no; tsuav yog ib tug neeg twg txaus siab hlo ua ib teg dej num xwb, ces lawv saib xyuas tus neeg ntawd lawm, tsis yog tsuas muab nyiaj rau tsev nyob thiab zaub mov xwb, tiam sis kuj yuav khoos phis tawj, xov tooj, thiab ntau yam khoom siv thiab. Tiam sis thaum kawg pom tias cov neeg no ua lawv tej dej num yam tsis muaj txiaj ntsig dab tsi hlo li. Cov thawj coj cuav tsis yog tsuas muab nyiaj pov tseg xwb lod? Lawv tsis yog siv Vajtswv lub tsev cov nyiaj los qhia txog lawv txoj kev ua siab dawb xwb lod? (Yog.) Qhov no puas yog tes hauj lwm uas cov thawj coj thiab cov neeg ua hauj lwm tsim nyog ua? (Tsis yog.) Cov no tsis yog cov thawj coj cuav lod? Cov thawj coj cuav mas nyiam ua txuj ua zoo, ua txuj muaj kev hlub tshua, thiab ua txuj muaj lub siab dawb siab zoo. Yog koj xav qhia txog lub siab dawb siab zoo, los qhov ntawd tsis ua li cas, tsuas siv koj tus kheej cov nyiaj xwb! Yog lawv tsis muaj khaub ncaws hnav, ces hle koj li es muab rau lawv; tsis txhob siv Vajtswv cov khoom fij! Vajtswv cov khoom fij yog txhawm rau tes hauj lwm nthuav dav txoj moo zoo xwb, tsis yog muab pab dawb, thiab yeej tsis yog kev pab khoom rau cov neeg pluag li. Vajtswv lub tsev tsis yog ib lub koom haum pab tib neeg dawb. Cov thawj coj cuav tsis muaj peev xwm ua hauj lwm tiag, thiab haj yam tsis muaj peev xwm yug qhov tseeb los sis txoj sia. Lawv tsuas tsom ntsoov rau qhov siv Vajtswv cov khoom fij los pab dawb kom ua rau tib neeg zoo siab thiab kom tuav tau lawv tus kheej lub koob lub npe thiab lub meej mom xwb. Lawv yog cov neeg nkim nyiaj uas tsis paub txaj muag, puas yog? Yog pom cov thawj coj cuav zoo li no, puas muaj leej twg nthuav tau lawv tawm thiab txwv lawv kom ncav sij hawm? Tsis muaj leej twg sawv los txwv lawv li. Yog tsis yog tus Nyob Saud pom thiab txwv qhov ntawd, ces qhov kev siv Vajtswv cov nyiaj los pab dawb rau tib neeg ntawd yuav tsis muaj hnub xaus li. Cov neeg pluag ntawd cev lawv ob txhais tes mus deb zuj zus, yeej xav tau ntau ntxiv tas li xwb. Tsis txawj txaus lawv li; txawm koj muab ntau npaum li cas los xij, yeej tsis txaus li. Cov uas ua lub siab dawb paug ntseeg Vajtswv yeej muaj peev xwm tso lawv tsev neeg thiab txoj hauj lwm tseg los ua lawv tes dej num kom tau kev cawm dim, thiab txawm lawv ntsib kev nyuaj hauv lub neej los, lawv yeej nrhiav tau kev los daws tej ntawd ntawm lawv tus kheej yam tsis tas yuav thov khoom los ntawm Vajtswv lub tsev tas li li. Lawv daws yam uas lawv daws tau ntawm lawv tus kheej, thiab rau yam uas lawv daws tsis tau ntawd, lawv thov Vajtswv thiab vam khom rau lawv txoj kev ntseeg los ntsib los pom. Cov uas ib txwm thov ntawm Vajtswv, xav kom Vajtswv lub tsev muab nyiaj rau lawv txoj kev ua neej nyob thiab yug lawv ntawd, yog cov uas tsis muaj laj thawj hlo li! Lawv tsis xav ua ib teg dej num li tiam sis xav xyiv fab rau lub neej, tsuas paub cev tes thov khoom ntawm Vajtswv lub tsev xwb, thiab txawm li ntawd los, yeej tsis txaus li. Lawv tsis yog cov neeg thov khawv lod? Thiab cov thawj coj cuav—cov neeg ruam no—tsuas pheej muab pab dawb tas li xwb, thiab tsis tsum li, pheej ua kom haum tib neeg lub siab kom tau txais lawv txoj kev ua tsaug, thiab haj tseem xav tias tej kev ua zoo li no mas muab yeeb koob rau Vajtswv thiab. Tej no yog tej yam uas cov thawj coj cuav nyiam ua tshaj plaws. Yog li ntawd, puas muaj leej twg paub txog cov teeb meem no, uas tuaj yeem pom tshab lub ntsiab tseeb ntawm cov teeb meem no? Cov thawj coj feem coob ua ntsej lag muag dig, xav tias, “Txawm li cas los xij, kuv tsis saib xyuas tes hauj lwm tshaj tawm txoj moo zoo, vim li cas kuv thiaj li yuav tsum txhawj txog tej no? Qhov ntawd tsis yog siv kuv cov nyiaj. Tsuav yog tsis kov cov nyiaj nyob hauv kuv hnab tshos xwb, ces tsis ua li cas. Nej muab tau rau tus uas nej xav muab rau, qhov ntawd muaj dab tsi cuam tshuam rau kuv? Twb tsis yog cov nyiaj ntawd los rau hauv kuv lub hnab nyiaj li.” Muaj ntau tus neeg tsis ris lub luag hauj lwm zoo li no nyob ib puag ncig, tiam sis muaj pes tsawg tus thiaj li tiv thaiv Vajtswv lub tsev tes hauj lwm?

Tam sim no, tes hauj lwm tshaj tawm txoj moo zoo nyob txawv teb chaws tab tom nthuav dav mus rau txhua qhov chaw. Qee lub teb chaws muaj tib neeg ntau dua uas lees txais tau qhov tseeb, hos lwm lub teb chaws cov tib neeg lub peev xwm tsis zoo dua me ntsis, ua rau muaj neeg tsawg dua uas lees txais tau qhov tseeb. Qee lub teb chaws tsis muaj kev ywj pheej ntawm kev ntseeg, thiab muaj kev tawm tsam hnyav rau txoj hau kev tseeb thiab Vajtswv tes hauj lwm, thiab tsis muaj tib neeg ntau uas lees txais tau qhov tseeb. Tsis tas li ntawd, qee lub teb chaws cov tib neeg poob qab dhau thiab lub peev xwm tsis zoo kiag li es lawv to taub tsis tau qhov tseeb txawm yuav qhia li cas los xij, thiab zoo li cov tib neeg ntawd mus tsis txog qhov tseeb. Ces tsis tsim nyog tshaj tawm txoj moo zoo nyob rau tej chaw zoo li ntawd. Tiam sis, cov uas tshaj tawm txoj moo zoo pom tsis tshab lub ntsiab tseeb ntawm qhov teeb meem; lawv tsis tshaj tawm rau cov uas lees txais tau qhov tseeb, tiam sis pheej tuav rawv nrhiav cov uas nyuaj hos tsis quav ntsej cov uas yooj yim dua. Lawv tsis mus tshaj tawm nyob rau tej chaw uas tes hauj lwm tshaj tawm txoj moo zoo twb nthuav dav lawm thiab yooj yim tshaj tawm. Tiam sis, lawv pheej yuav mus tshaj tawm txoj moo zoo nyob rau tej chaw uas pluag thiab poob qab, tshaj tawm rau cov pab pawg neeg uas lub peev xwm tsis zoo tshaj plaws, uas to taub tsis tau qhov tseeb, thiab rau cov haiv neeg uas muaj tej kev xav phem ntawm sab kab lis kev cai ntseeg hnyav tshaj plaws thiab tawm tsam Vajtswv hnyav tshaj plaws. Qhov no tsis yog ib qho yuam kev lod? Piv txwv li Kev Ntseeg Yudais, thiab qee txoj kab lis kev cai ntseeg ntawm haiv neeg uas cog cag tob heev, uas saib Kev Ntseeg Vajtswv ua yeeb ncuab thiab haj tseem tsim txom Kev Ntseeg Vajtswv thiab. Nyob hauv cov teb chaws thiab cov haiv neeg zoo li no mas, yeej tsis tsim nyog tshaj tawm txoj moo zoo kiag li. Vim li cas? Vim qhov tshaj tawm ntawd tsis muaj qab hau. Txawm koj yuav siv tag nrho cov neeg lub zog, nyiaj txiag, thiab khoom siv los xij, peb xyoos, tsib xyoos, los sis haj tseem yog kaum xyoo dhau mus los tej zaum yuav tsis pom muaj txiaj ntsig loj dab tsi li. Raws li qhov xwm txheej no, yuav ua li cas? Thaum pib, vim tsis paub zoo, tuaj yeem sim los tau; tiam sis thaum pom qhov xwm txheej meej lawm—tias qhov them tus nqi loj heev los tshaj tawm txoj moo zoo rau lawv ntawd tej zaum thaum kawg yuav tsis tau txiaj ntsig zoo—ces yus yuav tsum xaiv lwm txoj kev, ib txoj kev uas ua tau kom muaj txiaj ntsig. Qhov no tsis yog ib yam uas cov thawj coj thiab cov neeg ua hauj lwm yuav tsum pom tshab lod? (Yog.) Tiam sis cov thawj coj cuav tsis to taub qhov no. Thaum hais txog pib nthuav dav txoj moo zoo nyob txawv teb chaws rau qhov twg ua ntej ntawd, ib txhia hais tias, “Pib ntawm Yixayee. Vim Yixayee yog lub hauv paus rau Vajtswv ob theem hauj lwm ua ntej ntawd, yuav tsum tshaj tawm nyob rau qhov ntawd. Txawm nyuaj npaum li cas los xij, peb yuav tsum tshaj tawm rau lawv yam tsis tso tseg li.” Txawm li cas los xij, tom qab tshaj tawm tau ntev heev lawm, tsis muaj txiaj ntsig tseem ceeb dab tsi li, ua rau tag kev cia siab. Lub sij hawm no cov thawj coj tsim nyog ua dab tsi? Yog tias yog ib tug thawj coj uas muaj peev xwm thiab muaj lub nra, lawv yuav hais tias, “Peb txoj kev tshaj tawm txoj moo zoo tsis muaj hauv paus ntsiab lus; peb tsis paub tias yuav ua raws li qhov xwm txheej li cas, tiam sis tsuas saib tej yam raws li peb tej kev xav hauv nruab siab xwb—peb tsis paub tab dhau lawm! Cov tib neeg no txoj kev ruam, kev tawv ncauj, thiab kev tsis muaj qab hau ntawd mas tsis yog li peb xav. Peb xav tias vim lawv ntseeg Vajtswv tau ntau txhiab xyoo lawm, lawv yuav tsum yog cov xub hnov Vajtswv txoj moo zoo, tiam sis peb xav yuam kev lawm; lawv tsis muaj qab hau dhau lawm! Tseeb tiag mas, thaum Vajtswv ua tes hauj lwm txhiv dim ntawd, Nws twb tso lawv tseg lawm. Qhov tam sim no peb rov qab mus tshaj tawm rau lawv ntawd mas yog ua ib yam uas tsis muaj qab hau; yog qhov nkim zog thiab ua yam ruam xwb. Peb nkag siab Vajtswv tej kev npaj siab yuam kev lawm. Vajtswv tsis ua hauj lwm rau qhov no, yog li ntawd peb tib neeg yuav ua li cas thiaj li ua tau? Peb twb sim lawm, tiam sis txawm peb tshaj tawm li cas los xij, lawv tsis lees txais txoj hau kev tseeb li. Peb yuav tsum tso tseg qhov tshaj tawm rau lawv ntawd tam sim no, muab lawv tso rau ib sab, thiab tsis quav ntsej lawv rau lub sij hawm no. Yog muaj cov uas txaus siab hlo nrhiav, ces peb yuav txais tos lawv thiab ua tim khawv txog Vajtswv tes hauj lwm rau lawv. Yog tsis muaj leej twg nrhiav, ces peb tsis tas yuav tsum xub mus nrhiav lawv.” Qhov no tsis yog ib lub hauv paus ntsiab lus ntawm kev tshaj tawm txoj moo zoo lod? (Yog.) Yog li ntawd, ib tug thawj coj cuav puas ua tau raws li tej hauv paus ntsiab lus? (Tsis tau.) Cov thawj coj cuav lub peev xwm tsis zoo thiab pom tsis tshab lub ntsiab tseeb ntawm qhov teeb meem; lawv yuav hais tias, “Vajtswv twb hais lawm tias cov neeg Yixayee yog cov neeg Nws xaiv tseg. Txawm lub sij hawm twg los peb tsis tuaj yeem tso lawv tseg li. Lawv yuav tsum yog cov ua ntej; peb yuav tsum tshaj tawm rau lawv ua ntej mam li tshaj tawm rau cov tib neeg nyob rau lwm lub teb chaws. Yog Vajtswv tes hauj lwm nthuav dav rau hauv Yixayee lawm mas, qhov ntawd yuav yog ib qho yeeb koob uas loj npaum li cas! Vajtswv tau coj lub yeeb koob tawm ntawm Yixayee los rau Sab Hnub Tuaj, thiab peb yuav tsum coj lub yeeb koob ntawd tawm ntawm Sab Hnub Tuaj rov qab mus rau Yixayee, thiab cia lawv pom tias Vajtswv twb rov qab los lawm!” Qhov no tsis yog ib kab lus qw xwb lod? Qhov no puas mus raws li qhov tseeb? Qhov no yog yam uas cov tsis muaj kev to taub ntawm sab ntsujplig hais xwb. Ua li cov thawj coj cuav uas tsis ua hauj lwm tiag tiag ntawd ne? Lawv tsis quav ntsej txog tej no li. Cov tib neeg uas tshaj tawm txoj moo zoo raug qhov teeb meem no ua rau ntxhov siab los tau ntev lawm, nyob hauv qhov xav tso tseg los tsis yog, xav tshaj tawm mus ntxiv los tsis yog, tsis paub tias yuav xyaum ua raws li cas. Cov thawj coj cuav tsis paub kiag li tias qhov no yog ib qho teeb meem. Thaum pom cov tib neeg no ntxhov siab txog qhov tsis muaj txoj hau kev ntawd, lawv hais tias, “Muaj dab tsi txhawj? Peb muaj qhov tseeb thiab cov lus tim khawv uas hais txog txoj kev ntsib kev pom; cia li tshaj tawm rau lawv xwb!” Ib txhia hais tias, “Koj tsis paub, cov tib neeg no mas nyuaj tshaj tawm rau tiag tiag.” Thaum muaj teeb meem loj tshwm tuaj hauv tes hauj lwm uas cheem tsum kom cov thawj coj daws, cov thawj coj tseem tsuas yog qw cov lus tsis muaj ntsiab thiab hais cov lus qhuav xwb. Qhov no puas yog tus cwj pwm uas cov thawj coj tsim nyog muaj? Thaum raug nug tias cov neeg uas yuav qhia txoj moo zoo rau zoo li no puas tsim nyog tshaj tawm rau, lawv hais tias, “Yuav tsum tau tshaj tawm rau txhua tus, tshwj xeeb yog cov neeg Yixayee, haj yam yuav tsum tau tshaj tawm rau lawv.” Nej puas hnov muaj teeb meem dab tsi hauv cov lus no? Lawv puas paub tias qhov no yog ib qho yuam kev, ib qho tsis zoo hauv tes hauj lwm tshaj tawm txoj moo zoo uas lawv yuav tsum tau daws? Cov neeg tsis muaj txiaj ntsim no tsis paub thiab tseem nyob ntawd hais lus loj thiab qw cov lus tsis muaj ntsiab, lawv yeej yog cov khoom seem txheej uas tsis muaj txiaj ntsim tiag tiag li! Tiam sis lawv tseem xav tias lawv ntse, muaj peev xwm thiab muaj tswv yim. Lawv twb tsis paub tias muaj qhov tsis zoo thiab qhov yuam kev loj npaum li no tshwm tuaj hauv tes hauj lwm; lawv puas yuav pib daws tau? Qhov ntawd haj yam ua tsis tau. Cov uas tshaj tawm txoj moo zoo puav leej txhawj xeeb heev; tes hauj lwm tshaj tawm txoj moo zoo raug cuam tshuam, raug thaiv, thiab mus tsis tau zoo, thiab xav tsis thoob tias cov thawj coj cuav tsis paub dab tsi txog qhov yuam kev uas tshwm tuaj hauv tes hauj lwm kiag li. Tib neeg feem coob, thaum ntsib teeb meem los sis qhov yuam kev hauv tes hauj lwm, feem ntau mas tsis quav ntsej, tsis paub txog, thiab pheej tseem tawv ncauj tuav rawv ua raws li txoj kev uas yuam kev yam tsis xyuam xim. Yog cov thawj coj thiab cov neeg ua hauj lwm kuj tsis ceev nrooj to taub thiab nkag siab qhov xwm txheej, ces txog thaum qhov teeb meem loj tuaj thiab cuam tshuam rau txoj kev nce qib ntawm tes hauj lwm, thiab tib neeg feem coob twb pom qhov teeb meem lawm, cov thawj coj thiab cov neeg ua hauj lwm yuav yoob tag. Qhov no tshwm sim los ntawm qhov cov thawj coj thiab cov neeg ua hauj lwm tsis ua lawv lub luag hauj lwm. Yog li ntawd, lawv yuav ua li cas thiaj li zam tau tej tshwm sim los uas hnyav zoo li no? Cov thawj coj thiab cov neeg ua hauj lwm yuav tsum tshuaj xyuas tes hauj lwm tas li, thiab to taub qhov xwm txheej tam sim no thiab txoj kev nce qib ntawm tes hauj lwm kom raws sij hawm. Yog pom tias tes hauj lwm mus tsis tau zoo, lawv yuav tsum saib seb qhov twg muaj tej qhov tsis zoo thiab tej teeb meem lawm, thiab ua tib zoo xav tias: “Tam sim no, cov tib neeg no zoo li tsis khoom li, tiam sis vim li cas thiaj li tsis muaj txiaj ntsig kom pom tseeb li? Zoo li tes hauj lwm ntawm pab pawg tshaj tawm txoj moo zoo; muaj tib neeg coob heev tshaj tawm txoj moo zoo thiab hais lus tim khawv txhua hnub, nrog rau qee cov tib neeg uas koom tes hauv tes hauj lwm no, yog li ntawd vim li cas thiaj li tsis tau tib neeg ntau txhua lub hli? Qhov twg muaj teeb meem lawm? Leej twg ua rau muaj teeb meem? Qhov yuam kev no tshwm los li cas? Nws pib thaum twg? Kuv yuav tsum mus rau txhua pab pawg mus nrhiav seb tam sim no txhua tus tab tom ua dab tsi, cov neeg uas yuav qhia txoj moo zoo rau ntawd tam sim no zoo li cas, thiab seb txoj kev tshaj tawm txoj moo zoo puas yog; kuv yuav tsum nrhiav kom paub tag nrho tej no.” Los ntawm kev sab laj, kev sib qhia thiab kev sib tham, tej qhov yuam kev thiab tej qhov tsis zoo hauv tes hauj lwm maj mam tshwm tuaj. Thaum pom qhov teeb meem lawm, yuav tsum tsis txhob tso tseg li; yuav tsum daws qhov teeb meem ntawd. Yog li ntawd, cov thawj coj zoo li cas thiaj li pom tau qee cov teeb meem, qhov yuam kev, thiab qhov tsis zoo uas tshwm tuaj hauv tes hauj lwm? Cov thawj coj no yuav tsum muaj lub nra, rau siab, thiab koom nrog txhua yam ntxaws ntxaws ntawm tes hauj lwm tiag tiag; taug qab, to taub, thiab nkag siab txhua qhov; nrhiav kom paub meej tias txhua tus tab tom ua dab tsi, pes tsawg tus tib neeg thiaj li haum rau txoj hauj lwm twg, leej twg yog cov saib xyuas, cov tib neeg no lub peev xwm zoo li cas, thiab seb lawv puas ua lawv tes hauj lwm zoo los sis tsis zoo, thiab qhov ua tau zoo ntawd zoo li cas, tes hauj lwm mus zoo li cas lawm, thiab lwm yam ntxiv—tag nrho tej no yuav tsum tau nrhiav kom paub meej. Tsis tas li ntawd, qhov tseem ceeb tshaj plaws ntawm tes hauj lwm tshaj tawm txoj moo zoo yog seb cov neeg tshaj tawm txoj moo zoo puas muaj qhov tseeb los sis tsis muaj, seb lawv puas muaj peev xwm qhia qhov tseeb ntawm tej zeem muag kom meej los daws tau tib neeg tej kev xav phem thiab tej teeb meem, seb lawv puas muaj peev xwm pub tau yam uas cov neeg uas yuav qhia txoj moo zoo rau ntawd tsis muaj kom lawv ntseeg tag siab, thiab seb lawv puas muaj peev xwm siv txoj kev sib tham los qhia qhov tseeb, kom cov neeg uas yuav qhia txoj moo zoo rau ntawd thiaj li tau hnov Vajtswv lub suab ntau ntxiv. Piv txwv li, yog ib tug neeg uas yuav qhia txoj moo zoo rau xav kawm txog qhov tseeb hais txog qhov tseem ceeb ntawm Vajtswv txoj kev yug los ua neeg, tiam sis ib tug neeg tshaj tawm txoj moo zoo pheej tham txog qhov tseem ceeb ntawm Vajtswv tes hauj lwm thiab tham txog tej kev xav phem ntawm sab kab lis kev cai ntseeg yog dab tsi, qhov no tsis yog ib qho teeb meem lod? Yog ib tug neeg tsuas xav kawm txog tias lawv yuav ua li cas thiaj li tau txais kev cawm dim thiab Vajtswv txoj kev npaj tswj hwm los cawm noob neej yog dab tsi, qhov no tsis yog lub sij hawm los qhia txog qhov tseeb ntawm tej zeem muag hais txog Vajtswv peb theem hauj lwm lod? (Yog.) Tiam sis tus neeg tshaj tawm txoj moo zoo no pheej tham txog Vajtswv txoj kev rau txim thiab kev txiav txim, thiab Nws txoj kev qhia tshwm tias tib neeg tej moj yam qias vuab tsuab muaj xws li kev khav theeb, kev txawj dag, thiab kev lim hiam, thiab lwm yam ntsiab lus uas zoo li no. Ua ntej lwm tus lees txais Vajtswv tes hauj lwm, tus neeg tshaj tawm txoj moo zoo pib tham rau lawv txog kev rau txim thiab kev txiav txim, thiab qhia tshwm lawv tej moj yam qias vuab tsuab. Qhov tshwm sim los yog tus neeg ntawd tsis nyiam, tsis tau yam uas lawv xav tau, thiab lawv cov teeb meem uas cheem tsum daws tsis tau txais kev daws; lawv tsis muaj siab thiab tsis kam tshawb xyuas ntxiv lawm. Qhov no tsis yog ib qho teeb meem ntawm tus neeg tshaj tawm txoj moo zoo lod? Tus neeg tshaj tawm txoj moo zoo tsis to taub qhov tseeb, los sis tsis muaj kev to taub ntawm sab ntsujplig, thiab yog li ntawd thiaj li tsis paub kiag li tias lwm tus cheem tsum dab tsi, thaum lawv hais lus tsis raug qhov tseem ceeb, hais lus yam tsis muaj qab hau, thiab yeej daws tsis tau tus neeg uas yuav qhia txoj moo zoo rau ntawd tej teeb meem kiag li—lawv yuav ua li cas thiaj li tau tib neeg los ntawm kev tshaj tawm txoj moo zoo uas zoo li no?

Cov thawj coj cuav tsis quav ntsej txog txhua yam teeb meem uas lawv ntsib hauv lawv tes hauj lwm li. Tsis hais muaj teeb meem dab tsi tshwm sim hauv tes hauj lwm tshaj tawm txoj moo zoo, thiab tsis hais cov tib neeg phem cuam tshuam thiab coj qee yam tsis zoo los rau tes hauj lwm no li cas los, lawv tsis quav ntsej txog tej no li, cuag li tsis muaj feem xyuam txog lawv dab tsi li. Cov thawj coj cuav ua lawv tes hauj lwm yam paub tsis meej; tsis hais ib tug tib neeg twg ua lawv tes dej num puas muaj txiaj ntsig los sis puas ua raws li qhov tseeb tej hauv paus ntsiab lus, lawv tsis saib xyuas los sis tshuaj xyuas li, cia tib neeg ua yam ywj pheej txawm yuav muaj qhov tshwm sim los zoo li cas los xij. Qhov no ua rau tej qhov yuam kev thiab qhov tsis zoo uas tshwm sim hauv tes hauj lwm tshaj tawm txoj moo zoo yeej tsis tau txais kev daws li, thiab tsis paub tias muaj pes tsawg tus tib neeg uas nrhiav txoj hau kev tseeb plam mus lawm, tsis tuaj yeem coj tau lawv los rau ntawm Vajtswv lub xub ntiag kom sai li sai tau. Qee tus tib neeg, tom qab los lees txais Vajtswv tes hauj lwm nyob rau tiam kawg lawm, es hais tias, “Qhov tseeb tiag, muaj ib tug neeg tshaj tawm txoj moo zoo rau kuv peb xyoos dhau los. Tsis yog tias kuv tsis xav lees txais los sis ntseeg cov lus xaiv lus cua; tiam sis tus neeg uas tshaj tawm txoj moo zoo rau kuv ntawd tsis ris lub luag hauj lwm dhau lawm. Lawv teb tsis tau cov lus nug uas kuv nug, thiab lawv qhia tsis meej thaum kuv nrhiav qhov tseeb, tsuas hais qee cov lus tsis muaj qab hau xwb. Vim li ntawd, kuv tsuas tau tawm mus yam tag kev cia siab xwb.” Peb xyoos tom qab, tom qab tshawb xyuas hauv os lais, nrhiav thiab sib qhia nrog cov kwv tij thiab cov muam, cov tib neeg no daws tau tag nrho cov kev xav phem thiab kev paub tsis meej hauv lawv lub siab ib qho zuj zus, lees paub tag nrho tias yog Vajtswv tshwm sim thiab ua hauj lwm, thiab lees txais lawm. Qhov no yog lawv lees txais Vajtswv tes hauj lwm los ntawm lawv tus kheej txoj kev nrhiav thiab tshawb xyuas. Yog tias tus neeg tshaj tawm txoj moo zoo muaj peev xwm qhia qhov tseeb kom meej thiab daws lawv tej kev xav phem thiab tej lus nug peb xyoos ua ntej ntawd, ces lawv yuav ntxov lees txais peb xyoos. Nyob hauv peb xyoos no, txoj kev loj hlob hauv lub neej txoj sia raug ncua ntau npaum li cas lawm! Qhov no yuav tsum suav tias yog kev tsis ua lub luag hauj lwm ntawm cov uas tshaj tawm txoj moo zoo thiab muaj feem xyuam ncaj qha rau qhov lawv tsis to taub qhov tseeb. Qee cov neeg ua tes hauj lwm tshaj tawm txoj moo zoo tsis tsom ntsoov rau kev npaj lawv tus kheej nrog qhov tseeb, tsuas paub hais qee yam kev qhuab qhia yam daws tsis tau tib neeg tej kev xav phem los sis tej teeb meem tiag tiag li. Qhov tshwm sim los ces yog ntau tus tib neeg thaum lawv hnov txoj moo zoo lawv tsis lees txais txoj moo zoo ntawd raws sij hawm, ua rau lawv txoj kev loj hlob ntawm lub neej txoj sia qeeb mus ob peb xyoos. Qhov ntawd yuav tsum tau hais tias cov thawj coj uas saib xyuas tes hauj lwm tshaj tawm txoj moo zoo muaj lub luag hauj lwm rau qhov no vim lawv txoj kev coj qhia tsis zoo thiab kev saib xyuas tsis txaus. Yog cov thawj coj thiab cov neeg ua hauj lwm muaj lub nra tiag tiag thiab tuaj yeem tiv kev txom nyem ntau me ntsis ntxiv, xyaum qhia qhov tseeb ntau ntxiv, thiab qhia tawm kev ua siab ncaj ntau me ntsis ntxiv, muab txhua kis ntawm qhov tseeb qhia kom meej meej, kom cov neeg ua tes hauj lwm tshaj tawm txoj moo zoo ntawd muaj peev xwm qhia qhov tseeb los daws tib neeg tej kev xav phem thiab tej kev ua xyem xyav, ces cov txiaj ntsig ntawm kev tshaj tawm txoj moo zoo yuav zoo zuj zus tuaj. Qhov no yuav ua rau tib neeg ntau ntxiv uas tab tom tshawb xyuas txoj hau kev tseeb ntxov lees txais Vajtswv tes hauj lwm thiab rov qab los rau ntawm Vajtswv lub xub ntiag kom tau txais Nws txoj kev cawm dim sai dua. Tes hauj lwm ntawm pawg ntseeg raug ncua yeej vim yog cov thawj coj cuav tsis ua lawv lub luag hauj lwm yam hnyav dhau, tsis ua tes hauj lwm tiag tiag los sis tsis taug qab thiab tsis saib xyuas tes hauj lwm, thiab tsis muaj peev xwm qhia qhov tseeb los daws tej teeb meem. Muaj tseeb tias, kuj yog vim cov thawj coj cuav no ntshaw tej txiaj ntsim ntawm lub meej mom, tsis caum qhov tseeb kiag li, thiab tsis txaus siab taug qab, saib xyuas, los sis coj qhia tes hauj lwm nthuav dav txoj moo zoo—ua rau tes hauj lwm nce qib mus tau qeeb, thiab ntau qhov yuam kev, kev tsis muaj qab hau, thiab kev ua phem yam tsis xyuam xim uas tib neeg ua ntawd tsis raug kho kom yog los sis tsis raug daws tam sim ntawd, uas cuam tshuam hnyav rau qhov txiaj ntsig ntawm kev nthuav dav txoj moo zoo. Tsuas yog thaum cov teeb meem no raug tus Nyob Saud pom thiab hais kom cov thawj coj thiab cov neeg ua hauj lwm daws ces cov teeb meem no thiaj li raug kho kom yog xwb. Cov thawj coj cuav no zoo li cov neeg dig muag pom tsis tau teeb meem dab tsi li, thiab tsis muaj hauv paus ntsiab lus kiag li rau txoj kev uas lawv ua tej yam, thiab tseem tsis muaj peev xwm paub txog lawv tus kheej tej kev ua yuam kev thiab, tsuas lees lawv tej kev ua yuam kev thaum lawv raug tus Nyob Saud ntuas lawm xwb. Yog li ntawd leej twg thiaj li muaj peev xwm ris taus lub txim rau qhov puas tsuaj uas tshwm los ntawm cov thawj coj cuav no? Txawm yog rho lawv tawm ntawm lawv txoj hauj lwm lawm los, yuav ua li cas thiaj li kho tau qhov puas tsuaj uas lawv ua rau tshwm sim ntawd? Yog li ntawd thaum pom tias muaj cov thawj coj cuav uas tsis tuaj yeem ua hauj lwm tiag tiag, yuav tsum rho lawv tawm tam sim ntawd. Nyob hauv qee lub pawg ntseeg, tes hauj lwm tshaj tawm txoj moo zoo mus tau qeeb tshwj xeeb, thiab qhov no yeej vim yog cov thawj coj cuav tsis ua hauj lwm tiag tiag, nrog rau lawv muaj qhov kev tsis ua lub luag hauj lwm thiab ua yuam kev ntau dhau lawm.

Nyob hauv txhua tes hauj lwm uas cov thawj coj cuav ua ntawd mas, qhov tseeb tiag muaj ntau yam teeb meem, qhov yuam kev, thiab qhov tsis zoo uas cheem tsum lawv mus daws, kho, thiab kho kom zoo. Txawm li cas los xij, vim cov thawj coj cuav no tsis muaj lub nra, tsuas txaus siab rau tej txiaj ntsim ntawm lawv lub meej mom yam tsis ua hauj lwm tiag tiag, thaum kawg lawv ua rau tes hauj lwm ntxhov quav niab. Nyob hauv qee lub pawg ntseeg mas, tib neeg tsis muaj ib lub siab ib lub ntsws, txhua tus ib leeg ua xyem xyav rau ib leeg, ib leeg ceev faj ib leeg, thiab ib leeg rhuav tshem ib leeg, tib lub sij hawm ntawd kuj ntshai tsam raug Vajtswv lub tsev tshem tawm thiab. Thaum ntsib cov xwm txheej no, cov thawj coj cuav tsis mus daws, tsis ua hauj lwm tiag tiag los sis tsis ua hauj lwm ntxaws ntxaws dab tsi li. Pawg ntseeg tes hauj lwm nres mus tsis taus, tiam sis cov thawj coj cuav tsis nyuaj siab txog qhov no kiag li, tseem ntseeg tias lawv tus kheej twb ua hauj lwm ntau heev lawm thiab tsis tau ua rau pawg ntseeg tes hauj lwm qeeb li. Cov thawj coj cuav zoo li no yeej tsis muaj peev xwm ua tes hauj lwm uas yug lub neej txoj sia, thiab daws tsis tau cov teeb meem tiag tiag raws li qhov tseeb. Lawv tsuas ua me ntsis tes hauj lwm dav dav uas tus Nyob Saud tshwj xeeb muab faib thiab teem meej rau xwb, cuag nkaus li lawv tes hauj lwm yog ua rau tus Nyob Saud xwb. Thaum hais txog pawg ntseeg tes hauj lwm hauv paus uas tus Nyob Saud ib txwm cheem tsum kom ua—xws li tes hauj lwm uas yug lub neej txoj sia thiab tes hauj lwm uas cob qhia tib neeg—los sis qee yam hauj lwm tshwj xeeb uas tus Nyob Saud taw qhia, lawv tsis paub ua thiab ua tsis tau. Lawv tsuas muab cov hauj lwm no faib rau lwm tus ces xav tias lawv txoj hauj lwm twb tiav lawm. Lawv ua txhua yam raws li tus Nyob Saud qhia, thiab tsuas ua me ntsis thaum raug thawb xwb; yog tsis li ntawd, lawv tsis ua dab tsi thiab ua dog ua dig—cov no yog cov thawj coj cuav. Ib tug thawj coj cuav yog dab tsi? Muab hais luv luv, qhov ntawd yog ib tug neeg uas tsis ua hauj lwm tiag tiag, uas tsis ua lawv txoj hauj lwm li ib tug thawj coj, ua rau pom qhov uas lawv tsis quav ntsej lawv lub luag hauj lwm hnyav heev hauv tes hauj lwm tseem ceeb thiab lub hauv paus thiab tsis ua dab tsi li—qhov no yog ib tug thawj coj cuav. Cov thawj coj cuav tsuas ua tej hauj lwm dav dav sab nraud kom lawv tsis khoom, es xav yuam kev tias qhov no yog ua hauj lwm tiag tiag, thiab qhov tseeb tiag mas, thaum hais txog lawv txoj hauj lwm li ib tug thawj coj thiab tes hauj lwm tseem ceeb uas Vajtswv lub tsev muab rau lawv mas, lawv tsis ua ib yam dab tsi zoo li. Tsis tas li ntawd, cov teeb meem nquag tshwm sim nyob hauv pawg ntseeg ntau yam hauj lwm uas cheem tsum tus thawj coj los daws, tiam sis tus thawj coj daws tsis tau, lawv pheej coj tus cwj pwm zam, thiab thaum cov kwv tij thiab cov muam xav daws ib qho teeb meem lawv nrhiav tsis tau tus thawj coj. Yog lawv nrhiav tau tus thawj coj, tus thawj coj zam lawv los ntawm qhov siv lo lus tias tsis khoom vim ua hauj lwm ntau dhau thiab hais kom cov kwv tij thiab cov muam nyeem Vajtswv cov lus ntawm lawv tus kheej thiab nrhiav qhov tseeb los daws lawv cov teeb meem ntawm lawv tus kheej, uas muaj tus cwj pwm cia li tso tes tsis quav ntsej. Thaum kawg qhov no ua rau muaj ib pawg teeb meem ntau dhau uas tsis tau daws, ua rau txhua yam hauj lwm nres thiab ua rau pawg ntseeg tes hauj lwm nres mus tsis taus. Qhov no yog qhov tshwm sim los ntawm qhov cov thawj coj cuav tsis ua hauj lwm tiag tiag. Cov thawj coj cuav yeej tsis mob siab los sis rau siab txog lawv lub luag hauj lwm tseem ceeb, thiab tsis nrhiav qhov tseeb los daws ntau yam teeb meem. Qhov no txhais tau hais tias cov thawj coj cuav raug teem tias ua tsis tau tes hauj lwm tiag tiag thiab daws tsis tau tej teeb meem dab tsi li. Yam uas cov thawj coj cuav txawj tshaj plaws yog tshaj tawm cov lus thiab cov kev qhuab qhia, qw cov lus tsis muaj ntsiab, thiab ntuas lwm tus, tsom ntsoov rau qhov ua kom lawv tus kheej tsis khoom nrog tej hauj lwm dav dav xwb. Hais txog pawg ntseeg tes hauj lwm hauv paus uas Vajtswv lub tsev muab tso rau lawv, xws li yug lub neej txoj sia thiab qhia qhov tseeb los daws teeb meem, lawv tsis paub ua, tsis xyaum kom paub ua, thiab daws tsis tau cov teeb meem tiag tiag hlo li—cov no yog cov thawj coj cuav.

Qee cov thawj coj cuav, thaum hais kom lawv coj qhia tes hauj lwm sau ntaub ntawv xws li sau cov ntawv ua yeeb yam, sau cov ntawv txog cov lus tim khawv uas hais txog txoj kev ntsib kev pom, thiab lwm yam hauj lwm tiag tiag, lawv xav tias vim tsuas yog kev coj qhia xwb, tsis tas yuav ua hauj lwm tiag tiag dab tsi, yog li ntawd lawv thiaj li ncig mus ncig los xwb. Lawv hais tias, “Tsab, koj zaj ntawv mus li cas lawm?” “Yuav luag tiav lawm.” “Lis, thaum sau tsab ntawv ua yeeb yam ntawd koj puas muaj kev nyuaj dab tsi?” “Muaj, koj puas tuaj yeem pab kuv daws?” “Nej sawv daws sib tham ntawm nej xwb. Thov Vajtswv ntau ntxiv.” Tsis yog cov thawj coj cuav no tsis coj qhia thiab pab cov kwv tij thiab cov muam xwb, lawv tseem tsis tsom ntsoov rau qhov ua lawv tus kheej txoj hauj lwm kom zoo thiab, pheej ncig mus ncig los ua si, thiab ua neej yam xis nyob thiab kaj siab lug xwb. Saib sab nraud mas, zoo li lawv tab tom tshuaj xyuas tes hauj lwm, tiam sis qhov tseeb tiag lawv tsis daws teeb meem dab tsi li—lawv yeej yog cov neeg tuav ntaub ntawv tiag! Cov nom tswv uas muaj peev xwm hauv qee lub teb chaws hauv lub ntiaj teb tsis ntseeg ntawd kuj yog tib neeg qias vuab tsuab ib yam nkaus, tiam sis tab txawm yog lawv los tseem zoo dua cov thawj coj cuav no lawm ntau, uas tsis muaj qhov hnov txog lub luag hauj lwm li cov nom tswv no muaj. Piv txwv li, tom qab muaj tus kab mob sib kis, cov teb chaws thoob ntiaj teb pib ua cov kev tiv thaiv. Thaum kawg, feem ntau ntawm cov teb chaws no lees paub tias Taibvam cov kev tiv thaiv muaj txiaj ntsig, qhov no qhia tias cov nom tswv ntawm tsoom fwv Taibvam ua lawv cov hauj lwm tiv thaiv tus kab mob sib kis tau tus qauv siab tshaj plaws thiab ntxaws tshaj plaws. Rau ib lub teb chaws ntawm lub ntiaj teb, rau cov nom tswv thiab cov neeg ua nom ua tswv hauv cov tib neeg qias vuab tsuab, qhov uas ua ib txoj hauj lwm kom tau tus qauv siab tshaj plaws thiab ntxaws li no mas yeej tsim nyog qhuas tiag tiag. Ntau tus nom tswv ntawm sab Aws Lauv txaus siab mus saib thiab kawm los ntawm Taibvam; los ntawm qhov kev xam pom no cov nom tswv ntawm tsoom fwv Taibvam zoo dua cov ntawm lwm lub teb chaws ntau lawm. Yeej vim yog feem ntau ntawm lawv cov nom tswv tuaj yeem ua hauj lwm tiag tiag thiab tuaj yeem rau siab ntso siab rau qhov ua lawv lub luag hauj lwm kom tiav, qhov ntawd ua pov thawj tias cov nom tswv no tau raws li tus qauv. Qee cov thawj coj thiab cov neeg ua hauj lwm hauv pawg ntseeg ib txwm ua dog ua dig thaum ua lawv tej dej num, thiab txawm lawv raug ntuas li cas los xij, qhov ntawd tsis muaj txiaj ntsig li. Kuv pom tias tus yam ntxwv ntawm cov thawj coj thiab cov neeg ua hauj lwm no tsis zoo npaum li cov nom tswv ntawm lub ntiaj teb tsis ntseeg uas muaj peev xwm ua hauj lwm tiag tiag. Feem ntau ntawm lawv hais ntawm ncauj tias lawv ntseeg Vajtswv thiab caum qhov tseeb, tiam sis qhov tseeb tiag, lawv tsis yeem them tus nqi. Muaj qhov tseeb uas yug rau lawv ntau heev, tiam sis lawv tus cwj pwm rau qhov ua lawv tes dej num tseem yog li no xwb. Qhov tshwm sim los yog lawv puav leej dhau los ua cov thawj coj cuav, uas poob qab deb heev thaum piv rau cov nom tswv tsoom fwv uas zoo! Qhov tseeb tiag Kuv tej kev cheem tsum ntawm tib neeg tsis siab; Kuv tsis cheem tsum kom tib neeg to taub qhov tseeb ntau heev los sis lub peev xwm siab heev. Tus qauv qis tshaj plaws yog ua raws li lub siab txawj xav thiab ua yus lub luag hauj lwm kom tiav xwb. Yog tsis muaj lwm yam, ces yam tsawg tshaj plaws mas, koj yuav tsum ua kom tsim nyog rau koj cov zaub mov uas noj txhua hnub thiab cov lus txib uas Vajtswv muab rau koj; qhov ntawd txaus lawm. Tiam sis Vajtswv tes hauj lwm tau ua los txog rau tam sim no, thiab puas muaj tib neeg ntau uas ua tau raws li lub siab txawj xav? Kuv pom tias qee cov nom tswv hauv cov teb chaws uas pej xeem yog tus tswj hais lus thiab ua hauj lwm nrog txoj kev ua tiag tiag. Lawv tsis hais lus loj los sis hais tej tswv yim uas siab, lawv cov lus hais mas nruj thiab muaj tseeb tshwj xeeb, thiab lawv muaj peev xwm saib xyuas ntau yam hauj lwm tiag. Lawv tes hauj lwm yeej ua tau zoo tiag, yeej qhia txog lawv txoj kev coj ncaj thiab kev ua neeg tiag tiag. Thaum saib feem ntau ntawm cov thawj coj thiab cov neeg ua hauj lwm hauv pawg ntseeg tam sim no, nyob hauv lawv tes hauj lwm mas, lawv tsuas lam ua kom dhau thiab ua dog ua dig, lawv tsis tau txais txiaj ntsig zoo heev, thiab lawv tsis tau ua lawv lub luag hauj lwm kom tiav tag nrho. Tom qab los ua cov thawj coj, lawv dhau mus ua cov nom tswv ntawm sab kab lis kev cai ntseeg, lawv ua tus loj thiab muab lus txib, thiab dhau los ua cov neeg tuav ntaub ntawv lawm. Lawv tsuas tsom ntsoov rau qhov txaus siab rau tej txiaj ntsim ntawm lawv lub meej mom, thiab lawv nyiam kom txhua tus raws lawv qab thiab nyob ib puag ncig lawv. Lawv tsis tshua koom mus tob nrog qib hauv paus ntawm pawg ntseeg los daws cov teeb meem tiag tiag. Nyob hauv lawv lub siab lawv txav deb Vajtswv zuj zus. Cov thawj coj cuav thiab cov neeg ua hauj lwm cuav zoo li no yeej cawm tsis tau kiag li lawm! Kuv qhia qhov tseeb yam mob siab heev, tiam sis cov thawj coj thiab cov neeg ua hauj lwm no tsis lees txais, lawv tawv ncauj tuav rawv lawv tej kev xav yuam kev, thiab lawv tsis quav ntsej li. Lawv tus cwj pwm rau lawv tej dej num ib txwm yog ua dog ua dig, thiab lawv tsis muaj lub siab xav lees txim hloov dua siab tshiab ib qho me me li. Kuv pom tias cov tib neeg no tsis muaj lub siab txawj xav, tsis muaj laj thawj, tsis yog tib neeg kiag li! Kuv thiaj li ua tib zoo xav tias: Puas tseem tsim nyog qhia tej qhov tseeb no mus mus los los rau cov tib neeg zoo li no lawm? Kuv puas tim tsum ua kom txoj kev qhia ntawd ntxaws npaum li no? Kuv puas tim tsum tiv txoj kev txom nyem no? Cov lus no puas yog hais tsis muaj qab hau? Tom qab xav tag, Kuv txiav txim siab tias Kuv tseem yuav tsum hais, vim txawm hais tias cov lus no tsis muaj txiaj ntsig rau cov uas tsis muaj lub siab txawj xav los sis laj thawj ib qho me me ntawd li los, cov lus no muaj txiaj ntsig rau cov uas tuaj yeem lees txais qhov tseeb thiab ua lawv tes dej num los ntawm lub siab dawb paug, txawm lawv peev xwm tsis zoo dua me ntsis los xij. Cov thawj coj cuav tsis ua hauj lwm tiag tiag thiab tsis ua lawv lub luag hauj lwm kom tiav, tiam sis cov uas caum qhov tseeb yuav kawm tau kev qhia, tau txais kev txhawb siab, thiab nrhiav tau ib txoj hau kev xyaum ua raws los ntawm cov lus no thiab tej yam no. Kev nkag mus rau hauv lub neej txoj sia tsis yooj yim npaum li ntawd; yog tsis muaj ib tug los txhawb thiab pub, yog tsis muaj kev muab cais thiab piav qhia ntxaws txog txhua yam ntawm qhov tseeb, tib neeg qaug zog heev, lawv pheej nyob hauv ib qho xwm txheej uas tsis muaj kev pab thiab paub tsis meej, ib qho xwm txheej uas xav phem thiab nyob tos xwb. Yog li ntawd, ntau zaus thaum Kuv pom cov thawj coj cuav no, Kuv tsis muaj siab qhia rau lawv lawm. Tiam sis, thaum Kuv xav txog tej kev txom nyem uas cov ntseeg Vajtswv tiag tiag thiab ua siab ncaj ua lawv tej dej num tau tiv, nrog rau tus nqi uas lawv tau them ntawd, Kuv thiaj li hloov Kuv lub siab. Tsis txhawm rau lwm yam: Txawm yog 30 mus rau 50 tus tib neeg—los sis yam tsawg tshaj plaws 8 los sis 10 tus tib neeg—muaj peev xwm muab lawv tus kheej fij tiag tiag thiab ua siab ncaj hauv lawv tej dej num, thiab txaus siab mloog hais thiab zwm rau, ces qhov hais cov lus no yeej tsim nyog lawm. Nyob hauv Kuv mas tsis muaj kev txhawb siab uas yuav los hais lus thiab qhia rau cov uas tsis muaj lub siab txawj xav thiab laj thawj no; qhov nrog cov tib neeg no tham mas sab heev thiab tsis muaj txiaj ntsig dab tsi li. Nej feem coob tsis caum qhov tseeb thiab tsis them tus nqi hauv nej tej dej num li—nej tsis muaj lub nra los sis tsis muaj kev ua siab ncaj, nej tsuas lam ua kom dhau hauv nej tej kev ua, thiab ua tej yam yam tsis txaus siab hauv qhov kev cia siab tias yuav tau txais koob hmoov xwb. Qhov mloog cov lus no qhov tseeb tiag yog ib qho uas nej tsis tsim nyog tau txais. Nej tau txais txiaj ntsim los ntawm cov uas ua lawv tej dej num ntawm lub siab tseeb, cov uas them tus nqi tiag tiag, cov uas muaj kev ua siab ncaj thiab muaj lub nra, thiab cov uas yeem xyaum ua raws qhov tseeb. Cov lus no yog hais rau cov tib neeg ntawd, thiab nej tau txais ib qho uas tsis tsim nyog tau txais los ntawm qhov hnov cov lus ntawd. Yog saib los ntawm qhov kev xam pom no—uas yog nej feem coob muaj tus cwj pwm lam ua kom dhau yam tsis muaj kev mob siab nyob hauv nej tej dej num ib qho me me li—ces nej tsis tsim nyog hnov cov lus no. Vim li cas nej thiaj li tsis tsim nyog? Vim txawm nej mloog los, qhov ntawd tsis muaj qab hau dab tsi; txawm hais ntau npaum li cas los sis ntxaws npaum li cas los xij, nej tsuas lam mloog ua kom dhau xwb, nej yeej tsis xyaum ua raws cov lus no txawm nej to taub ntau npaum li cas tom qab mloog tag. Cov lus no tsim nyog hais rau leej twg mloog? Leej twg tsim nyog mloog cov lus no? Tsuas yog cov uas yeem them tus nqi, cov uas tuaj yeem muab lawv tus kheej fij los ntawm lub siab tseeb, thiab cov uas ua siab ncaj rau lawv tej dej num thiab cov lus txib xwb mas thiaj li tsim nyog mloog. Vim li cas Kuv thiaj li hais tias lawv tsim nyog mloog? Vim thaum lawv to taub qhov tseeb me ntsis tom qab mloog tag, lawv muaj peev xwm muab coj los xyaum ua raws, thiab lawv xyaum ua raws li qhov lawv to taub; lawv tsis ua neeg tsis ncaj thiab lawv tsis ua neeg tub nkeeg; thiab lawv coj rau qhov tseeb thiab Vajtswv tej kev cheem tsum nrog ib tug cwj pwm ntawm lub siab tseeb thiab ntshaw, muaj peev xwm hlub thiab lees txais qhov tseeb. Yog li ntawd, tom qab lawv mloog tag, cov lus no muaj txiaj ntsig rau lawv thiab ua tau kom muaj txiaj ntsig.

Lub Ob Hlis Ntuj Hnub Tim 13, Xyoo 2021