Tshooj 3
Tus Vajntxwv muaj yeej zaum rau saum Nws lub zwm txwv uas muaj yeeb koob. Nws tau ua txoj kev txhiv dim tiav hlo lawm thiab tau coj tag nrho Nws cov neeg tshwm los muaj yeeb koob. Nws tuav txhua yam rau hauv Nws ob txhais tes thiab los ntawm Nws txoj kev ntse thiab lub zog nchav uas muaj hwj chim qaum ntuj ntawd Nws tau tsim tsa thiab tau ua rau Xi-oo ruaj khov kho. Los ntawm qhov Nws muaj hwj chim heev Nws thiaj li txiav txim rau lub ntiaj teb uas muaj kev txhaum; Nws tau txiav txim rau ntau ntau haiv neeg thiab ntau ntau tus neeg, rau lub ntiaj teb thiab rau tej dej hiav txwv thiab txhua yam muaj sia uas nyob rau hauv lub ntiaj teb thiab tej dej hiav txwv, nrog rau cov uas qaug cawv rau txoj kev plees kev yim. Vajtswv yeej yuav txiav txim rau lawv xwb xwb li, thiab Nws yuav npau taws rau lawv xwb xwb li ces yog li ntawd qhov ntawd yuav nthuav qhov Vajtswv, tus uas txiav txim tib ntsais muag xwb twb tau lawm thiab txiav txim yam tsis qeeb li. Nws qhov kev npau taws yuav hlawv lawv tej kev txhaum uas loj tshaj plaws ntawd kom kub ua ncaig du lug thiab kev puas tsuaj los raug rau lawv rau lub sij hawm twg los tau; lawv yuav paub tias tsis muaj chaw khiav dim thiab tsis muaj chaw nkaum, lawv yuav quaj thiab zom hniav qawv, thiab lawv yuav coj txoj kev puas tsuaj los rau lawv tus kheej.
Cov tub uas muaj yeej, cov uas Vajtswv hlub yuav tau nyob rau hauv Xi-oo xwb xwb li, yeej tsis muaj hnub yuav ncaim qhov ntawd mus li. Ntau ntau tus neeg yuav tsum mloog Nws lub suab kom zoo, lawv yuav ua tib zoo mloog Nws tej kev ua, thiab lub suab ntawm lawv txoj kev qhuas mas yuav tsum tsis muaj hnub kawg li. Tus tseem Vajtswv uas tsuas muaj tib tug xwb tau tshwm los lawm! Peb yuav paub tseeb txog Nws rau sab ntsujplig thiab mob siab caum raws Nws kom ze; peb yuav maj nroos mus tom ntej kom tag peb lub zog nchav thiab yuav tsis ua xyem xyav mus ntxiv lawm. Qhov kawg ntawm lub ntiaj teb tab tom yuav tshwm los rau ntawm peb xub ntiag; ib pawg ntseeg zoo tsim nyog nrog rau cov tib neeg, tej dej num, thiab tej yam uas nyob ib puag ncig ntawm peb tam sim no tab tom cob qhia peb kom ruaj khov ntxiv. Cia peb maj nroos los muab peb lub siab uas hlub lub ntiaj teb rov qab los! Cia peb maj nroos los muab peb lub zeem muag uas tsaus ntuj nti rov qab los! Cia peb tsuj rau ntawm peb cov kauj ruam, kom peb thiaj li yuav tsis ua tshaj cov ciaj ciam. Cia peb cheem peb lub qhov ncauj kom peb taug kev mus tau raws li Vajtswv txoj lus, thiab yuav tsis tawm tsam rau peb tus kheej tej txiaj ntsig thiab tej kev poob mus ntxiv lawm. Ab, tso nws mus—koj txoj kev ntshaw luag tug rau lub ntiaj teb tsis muaj kev cai thiab rau kev muaj txiag nplua nuj! Ab, ua kom koj tus kheej dim plaws ntawm nws mus—koj txoj kev tuav ruaj rau ntawm cov txiv thiab cov ntxhais thiab cov tub! Ab, tig koj lub nrab qaum rau lawv—koj tej kev xam pom thiab kev xaiv ntsej xaiv muag! Ab, tsim dheev los; lub sij hawm luv heev! Tsa ntsej tsa muag saib seb, tsa ntsej tsa muag saib seb, los sab hauv tus ntsujplig los, thiab cia Vajtswv tswj. Txawm tias yuav tshwm sim dab tsi los xij, txhob dhau los ua Lauj tus poj niam ntxiv lawm. Cas yuav txaus hlub ua luaj uas nws raug tso tseg! Cas yuav txaus hlub ua luaj! Ab, tsim dheev los lau!
