Tes Hauj lwm ntawm Kev Tshaj Tawm Txoj Moo Zoo Kuj Yog Tes Hauj lwm ntawm Kev Cawm Tib Neeg Thiab

Txhua tus tib neeg yuav tsum to taub tej hom phiaj ntawm Kuv tes num hauv lub ntiaj teb, qhov ntawd yog, yam uas Kuv xav muab kom tau tshaj plaws, thiab theem twg uas Kuv yuav tsum ua kom tiav hauv tes num no ua ntej thiaj yuav ua tau tiav hlo. Yog hais tias, tom qab uas nrog Kuv los txog rau hnub no, tib neeg tsis to taub xyov Kuv tes num yog dab tsi li, yog li puas yog lawv nrog Kuv yam tsis muaj qab hau li? Yog tib neeg caum raws Kuv qab, lawv yuav tsum paub Kuv lub siab nyiam. Kuv twb ua tes num hauv ntiaj teb tau ntau txhiab xyoo lawm, thiab los txog rau hnub no, Kuv tseem yuav ua Kuv tes num mus ntxiv thiab. Txawm yog Kuv tes num muaj ntau yam los, nws lub hom phiaj yeej tseem tsis hloov li; piv txwv li hais tias, txawm tias Kuv yuav puv npo nrog kev txiav txim thiab qhuab ntuas neeg, los yam uas Kuv ua yeej tseem yog ua los cawm neeg, thiab tseem yog xa Kuv txoj moo zoo thiab nthuav Kuv tes num mus rau Lwm Haiv Neeg kom mus txog rau thaum tes num rau neeg tiav log. Yog li hnub no, tej thaum tseem muaj coob leej neeg poob rau txoj kev xav tsis thoob kiag li tias cas Kuv tseem pheej ua Kuv tes num, Kuv tseem pheej ua ntxiv tes num uas Kuv txiav txim thiab qhuab ntuas neeg. Txawm tias neeg yeej dhuav tej uas Kuv hais, thiab nws yeej tsis ntshaw los txhawj xeeb txog Kuv tes num, los Kuv yeej tseem ua Kuv tes hauj lwm, rau qhov hais tias lub hom phiaj ntawm Kuv tes num yeej tseem tsis tau hloov li, thiab Kuv lub hom phiaj thaum xub thawj yuav tsis raug rhuav. Lub hom phiaj ntawm Kuv txoj kev txiav txim yog ua kom tib neeg zwm tau rau Kuv zoo dua, thiab lub hom phiaj ntawm Kuv txoj kev rau txim yog ua kom tib neeg hloov tau zoo dua. Txawm hais tias txhua yam uas Kuv ua yog ua txhawm rau Kuv txoj kev tswj hwm, Kuv yeej tsis tau ua ib teg hauj lwm twg uas tsis muaj txiaj ntsim rau tib neeg li, rau qhov Kuv xav ua kom tag nrho cov teb chaws uas nyob dhau ntawm Yixayee mus lawm los zwm rau Kuv ib yam li cov Yixayee, ua kom lawv dhau los ua tib neeg tiag tiag, kom Kuv thiaj li muaj ib qho chaw tiag taw rau hauv cov teb chaws uas nyob sab nraum Yixayee. Qhov no yog Kuv txoj kev tswj hwm; nws yog Kuv tes hauj lwm rau hauv cov teb chaws ntawm lwm haiv neeg. Txawm yog tam sim no los, ntau tus neeg tseem tsis to taub Kuv txoj kev tswj hwm thiab, vim lawv tsis quav ntsej txog tej yam zoo li no, tiam sis lawv tsuas quav ntsej txog lawv lub neej yav tom ntej thiab lawv qhov chaw kawg xwb. Txawm Kuv hais li cas los xij, tib neeg yeej tseem tsis quav ntsej txog tes hauj lwm uas Kuv ua li thiab, tiam sis tsuas tsom ntsoom rau lawv qhov chaw kawg yav tom ntej yam tag siab nrho xwb. Yog txhua yam mus zoo li no, Kuv tes hauj lwm yuav nthuav mus kom dav tau li cas? Yuav tshaj tawm Kuv txoj moo zoo mus kom thoob plaws ntiaj teb tau li cas? Nej yuav tsum paub tias thaum Kuv tes hauj lwm nthuav mus dav, Kuv yuav ua kom nej tawg ua sab ua sua mus, thiab ntaus nej ib yam li Yehauvas tau ntaus txhua xeem Yixayee lawm. Tag nrho tej no yuav ua kom tiav kom Kuv txoj moo zoo thiaj li nthuav mus dav mus thoob plaws lub ntiaj teb, kom Kuv tes hauj lwm thiaj li nthuav mus dav mus rau cov teb chaws ntawm lwm haiv neeg, vim qhov ntawd es kom thiaj li hwm Kuv lub npe tias loj nyob rau hauv cov laus thiab cov me nyuam yaus ib yam nkaus, thiab kom Kuv lub npe dawb huv raug qhuas rau hauv cov tib neeg uas los ntawm txhua tus neeg thiab txhua haiv neeg lub qhov ncauj. Nyob rau tiam kawg no, cia kom Kuv lub npe raug hwm tias loj rau hauv cov teb chaws ntawm lwm haiv neeg, cia kom cov tib neeg hauv cov teb chaws ntawm lwm haiv neeg pom Kuv tej kev ua, cia kom lawv hu Kuv tias Muaj Hwj Chim Loj Kawg Nkaus vim yog Kuv tej kev ua, thiab cia kom Kuv cov lus muaj tshwm simsai sai no. Kuv yuav ua kom txhua tus neeg paub tias Kuv tsis yog cov Yixayee tus Vajtswv xwb, tiam sis kuj yog cov tib neeg ntawm tag nrho cov teb chaws ntawm lwm haiv neeg tus Vajtswv thiab, txawm yog cov teb chaws uas Kuv tau foom phem rau lawm los xij. Kuv yuav ua kom txhua tus neeg pom tias Kuv yog txhua tus neeg uas raug tsim tawm los tus Vajtswv. Qhov no yog Kuv tes hauj lwm loj tshaj plaws, lub hom phiaj ntawm Kuv txoj kev npaj hauj lwm rau tiam kawg, thiab yog tib teg hauj lwm uas Kuv xav ua kom tiav nyob rau tiam kawg xwb.

Nyob rau tiam kawg no tes dej num uas Kuv tau saib xyuas los tau ntau txhiab xyoo twb muab qhia tag nrho rau tib neeg lawm. Tsuas yog tam sim no Kuv thiaj li muab txhua yam uas tsis muaj neeg paub hais txog Kuv txoj kev cawm tib neeg no qhia rau tib neeg xwb, thiab tib neeg twb paub txog tej kev ntshaw ntawm Kuv tes num lawm, thiab tshaj dua li ntawd, twb los to taub txog tej uas Kuv muab zais cia lawm thiab. Kuv twb qhia txhua yam rau tib neeg ntawm txoj hau kev kawg txog tej uas nws txhawj txog lawm. Kuv twb qhib rau tib neeg tej uas Kuv muab zais cia lawm, tej uas muab zais cia yog tej uas twb muab npog tau li ntawm 5,900 xyoo lawm. Yehauvas yog leej twg? Tus Mexiyas yog leej twg? Yexus yog leej twg? Nej yuav tsum paub tag nrho tej no. Kuv tes num yog tig los rau cov npe no. Nej puas tau to taub li ntawd? Tsim nyog yuav muab Kuv lub npe dawb huv qhia li cas? Yuav ua li cas thiaj nthuav mus rau txhua haiv neeg uas hu txog Kuv raws li Kuv cov npe? Kuv tes num tseem tab tom nthuav, thiab Kuv yuav muab nthuav kom tag rau txhua haiv neeg. Txij thaum Kuv tes num tuaj txog nej lawm, Kuv yuav tsoo kom nej tawg li Yehauvas tau tsoo cov tswv yug yaj uas yog Davi lub tsev hauv cov Yixayee, ua kom nej tawg ua sab ua sua mus txhua nrho txhua haiv neeg. Rau qhov nyob rau tiam kawg no, Kuv yuav tsoo txhua haiv neeg kom tawg mos nyoos thiab ua rau lawv cov neeg coj yam tshiab no mus pub rau lwm tus. Thaum Kuv rov los dua, cov teb chaws twb yeej raug Kuv cov nplaim taws muab faib muaj ntsim tag lawm. Nyob rau lub sij hawm ntawd, Kuv yuav qhia txog Kuv Tus Kheej dua tshiab rau tib neeg ntiaj teb yam li lub hnub ntaiv tuaj, qhia txog Kuv Tus Kheej tab meeg rau lawv li tus duab ntawm tus Dawb Huv uas lawv tsis tau pom dua li, Kuv yuav mus kev nrog ntau haiv neeg, ib yam li Kuv, Yehauvas, yav dhau los tau mus kev hauv caj ces uas yog cov Yudais lawm. Tom qab ntawd, Kuv yuav ua tus coj neeg ntiaj teb ua neej nyob hauv ntiaj teb no. Lawv yuav paub txog Kuv lub hwj chim uas ci ntsa iab, thiab thaum ntawd Kuv yuav coj lawv zoo li tauv huab saum ntuj uas coj lawv kev hauv lawv lub neej, thaum ntawd Kuv yuav los tshwm rau lawv pom Kuv hauv tej chaw dawb huv. Tib neeg yuav pom Kuv hnub uas muaj kev ncaj ncees, thiab pom Kuv lub hwj chim tshwm ci ntsa iab. Yuav muaj li no thaum uas Kuv kav tag nrho lub qab ntuj no thiab coob leej uas yog Kuv cov tub yuav tau lub meej mom ci ntsa iab. Txhua qhov chaw hauv qab ntuj no, tib neeg yuav nyo hau pe, thiab Kuv yuav los tsuam chaw thiab nres khov kho hauv plawv nrog tib neeg ntiaj teb, rau saum lub pob zeb ntawm tes num Kuv tau ua hnub no. Tib neeg yuav ua num rau Kuv, thiab hauv Kuv lub tuam tsev. Lub thaj, uas puv npo tej yam uas qias thiab tej uas ntxim ntxub, Kuv yuav muab tsoo kom tawg mos nyoo thiab muab tsim dua tshiab. Tej me nyuam yaj uas yug tshiab thiab tej me nyuam nyuj yuav muab teeb rau saum Kuv lub thaj uas dawb huv. Kuv yuav muab lub tuam tsev niaj hnub nim no tshem thiab ua dua lub tshiab. Lub tuam tsev uas tseem sawv tam sim no, puv npo tej neeg uas tsis huv xwb, yuav vau mus, thiab lub uas Kuv ua dua tshiab yuav puv nkaus cov tub txib uas hwm Kuv. Lawv yuav rov sawv los thiab ua dej num rau Kuv hauv lub tuam tsev uas ci ntsa iab. Tseeb tiag nej yuav pom hnub uas Kuv tau txais lub meej mom ci ntsa iab thiab tseeb tiag nej kuj yuav pom thaum Kuv muab lub tuam tsev qub rhuav thiab tsa lub tshiab. Tsis tag li xwb, nej kuj tseem yuav pom hnub Kuv los nrog tib neeg nyob hauv ntiaj teb no xwb xwb li. Yog thaum Kuv muab lub tuam tsev tsoo tag lawm, yog li Kuv yuav coj Kuv lub tsev ntaub los rau hauv tib neeg lub ntiaj teb, ib yam li lawv saib rau Kuv caj ces. Tom qab uas Kuv tsoo txhua haiv neeg tag lawm, Kuv yuav rov muab lawv sau los ua ke dua tshiab, dhau ntawd Kuv yuav ua Kuv lub tuam tsev thiab tsa Kuv lub thaj, kom txhua tus thiaj coj tau khoom tuaj fij rau Kuv, ua rau Kuv hauv Kuv lub tuam tsev, thiab ua siab ncaj ncees muab lawv tus kheej tag nrho los ua Kuv tes hauj lwm rau hauv Lwm Haiv Neeg. Lawv yuav zoo li haiv neeg Yixayee tam tsim no, hnav ib cev khaub ncaws pov thawj hlob suab ntev loo thiab ntoo lub mom vaj ntxwv uas muaj Kuv, Yehauvas, lub hwj chim nyob hauv plawv ntawm lawv, thiab Kuv lub hwj huam yuav roos lawv thiab nrog lawv ua ke. Kuv tes num hauv cov teb chaws uas yog Lwm Haiv Neeg los kuj yuav ua mus ib yam nkaus thiab. Kuv ua tes num rau cov neeg Yixayee li cas, Kuv yuav ua Kuv tes num rau cov teb chaws uas yog Lwm Haiv Neeg li ntawd thiab, rau qhov Kuv yuav nthuav Kuv tes num hauv cov neeg Yixayee thiab yuav nthuav mus rau cov teb chaws uas yog Lwm Haiv Neeg.

Tam sim no yog lub sij hawm uas Kuv tus Ntsujplig ua tes hauj lwm loj, thiab yog lub sij hawm uas Kuv pib Kuv tes hauj lwm hauv cov teb chaws ntawm Lwm Haiv Neeg. Ntau tshaj ntawd, nws yog lub sij hawm uas Kuv cais txhua tus neeg uas raug tsim tawm los, muab txhua tus faib mus rau lawv hom, kom Kuv tes hauj lwm thiaj li mus tau sai dua thiab muaj peev xwm tau txais txiaj ntsim ntau dua. Yog li ntawd, yam uas Kuv thov nej tseem yog qhov tias kom koj muab tag nrho koj tus kheej fij rau tag nrho Kuv tes hauj lwm, thiab, haj tseem tshaj ntawd ntxiv, kom koj paub cais meej thiab pom tseeb txog txhua tes hauj lwm uas Kuv tau ua rau hauv koj lawm, thiab siv kom tag nrho koj lub zog kom Kuv tes hauj lwm thiaj li ua tau tiav ntau dua. Qhov no yog qhov uas koj yuav tsum to taub. Tseg kiag txoj kev ib leeg sib tw nrog ib leeg, txoj kev nrhiav kev npaj tseg rau yav tom ntej, los sis txoj kev nrhiav kev tau zoo rau koj lub cev nqaij daim tawv, kom thiaj li tsis ua rau Kuv tes hauj lwm qeeb, thiab thaiv koj lub neej yav tom ntej uas zoo kawg nkaus. Qhov ua li ntawd tsis yog tiv thaiv koj, qhov ua li ntawd tsuas coj tau txoj kev puas tsuaj los rau koj xwb. Qhov no tsis yog koj ruam lawm lod? Qhov uas koj ua raws koj lub siab ntshaw niaj hnub no yog yam uas tab tom rhuav tshem koj lub neej yav tom ntej ntag, hos qhov mob uas koj tiv niaj hnub no yog yam uas tab tom tiv thaiv koj. Koj yuav tsum paub kom meej meej txog tej no, kom thiaj li tsis poob mus rau hauv tej kev dag ntxias uas koj yuav pom tias nyuaj tso koj tus kheej dim, thiab kom thiaj li tsis yuam kev mus rau hauv cov huab uas tuab es nrhiav tsis tau lub hnub ntxiv li lawm. Thaum cov huab uas tuab ntawd ploj mus lawm, ces koj yuav pom koj tus kheej nyob rau ntawm txoj kev txiav txim ntawm hnub uas loj. Thaum lub sij hawm ntawd, Kuv hnub twb los ze rau tib neeg ntiaj teb lawm. Koj yuav khiav dim Kuv txoj kev txiav txim li cas? Koj yuav muaj peev xwm tiv taus qhov kub kub ntawm lub hnub ntawd li cas? Thaum Kuv muab tej kev nplua mias rau tib neeg, nws tsis txaus siab muab khaws rau hauv nws xub ntiag, tiam sis muab pov rau ib cag uas tsis muaj neeg pom li. Thaum Kuv hnub nqis los txog rau tib neeg lawm, nws yuav tsis muaj cuab kav tshawb tau Kuv tej kev nplua mias, los sis nrhiav tau Kuv tej lus iab uas yog lus tseeb uas Kuv tau hais ntev los lawm. Nws yuav quaj thiab nyiav, rau qhov nws tau plam qhov ci ntawm qhov kaj lawm thiab yuav poob mus rau hauv qhov kev tsaus ntuj. Qhov uas nej pom hnub no yog ib qho me me ntawm rab ntaj ntse ntawm Kuv lub qhov ncauj xwb. Nej tseem tsis tau pom tus qws ntawm Kuv txhais tes los sis cov nplaim taws uas Kuv hlawv tib neeg, thiab yog vim li ntawd nej thiaj tseem khav theeb heev thiab muab hlob rau ntawm Kuv xub ntiag. Yog li no nej thiaj tseem nrog Kuv sib cav nyob hauv Kuv tsev, siv nej tus plaig nrog Kuv sis cav txog tej lus uas Kuv tau hais tawm ntawm Kuv lub qhov ncauj lawm. Tib neeg tsis ntshai Kuv, thiab nws tseem pheej ua yeeb ncuab rau Kuv los txog hnub no, nws yeej tseem ua li qub tsis ntshai li. Nej muaj tus nplaig thiab cov hniav uas tsis ncaj ncees hauv nej qhov ncauj. Nej cov lus thiab tej uas nej ua zoo li tus nab uas dag Evas ua txhaum. Nej yuav tseev kom lwm tus muab qhov muag pauj qhov muag thiab hniav pauj hniav, thiab muaj kev cov nyom nrog Kuv sib ntsuas zog txeeb lub luag hauj lwm, lub koob lub npe thiab nqi zog rau nej tus kheej, tiam sis nej twb tsis paub hais tias Kuv tseem nraim nkoos ntsia ntsoov nej tej lus thiab tej uas nej ua. Ua ntej uas nej tseem yuav los rau ntawm Kuv xub ntiag, Kuv mloog lub suab tawm hauv nej nruab siab tuaj. Tib neeg yeej ib txwm muaj txoj kev ntshaw xav khiav tawm ntawm Kuv txhais tes uas tuav lawv thiab khiav kom Kuv lub qhov muag txhob pom lawv, tiam sis Kuv yeej tsis tau zam tej lus nws hais los sis tej uas nws ua li. Dua ntawd, Kuv yeej xwb tim tso cai rau cov lus thiab tej uas lawv ua nkag rau hauv Kuv qhov muag, xwv Kuv thiaj qhuab ntuas tau tib neeg txoj kev tsis ncaj ncees thiab rau txim rau lawv txoj kev ntxeev siab. Yog li, tib neeg tej lus thiab tej uas lawv ua nraim nkoos yeej nyob tab meeg rau saum Kuv lub rooj txiav txim, thiab Kuv txoj kev txiav txim yeej tsis tau ncaim ntawm tib neeg li, rau qhov nws txoj kev ntxeev siab muaj ntau heev lawm. Kuv tes num yog hlawv thiab lim txhua yam lus thiab tej num uas tib neeg ua thiab tej uas lawv tau hais tawm thiab ua tag los tab meeg ntawm Kuv tus Ntsujplig lub xub ntiag. Nyob rau txoj kev no,^[a] thaum Kuv ncaim lub ntiaj teb, tib neeg thiaj tseem ceev lawv txoj kev ua siab ncaj rau Kuv, thiab thiaj tseem tiam Kuv li Kuv cov tub qhe uas dawb huv uas ua Kuv tes num, cia Kuv tes num nyob hauv ntiaj teb mus txog thaum hnub uas ua tiav.

Lus taw qhia:

a. Cov lus sau thaum xub thawj tsis muaj kab lus “Nyob rau txoj kev no.”