Se Sèlman Sila yo ki Konnen Travay Bondye Jodi a ki ka Sèvi Bondye

Pou rann temwayaj devan Bondye epi pou fè gran dragon wouj la wont, fòk ou gen prensip, epi fòk ou ranpli yon kondisyon: Ou dwe renmen Bondye ak tout kè w epi fè pawòl Li yo abite nan ou. Si pawòl Bondye pa abite nan ou, lè sa a ou p ap gen okenn fason pou w fè Satan wont. Pandan w ap grandi nan lavi w, ou bay gran dragon wouj la do epi ou imilye li nèt ale; sèlman sa a se vrèman pou fè gran dragon wouj la wont. Plis ou dispoze mete pawòl Bondye yo an pratik, se plis ou bay prèv lanmou ou genyen pou Bondye ak degoutans pou gwo dragon wouj la; plis ou obeyi pawòl Bondye yo, se plis ou bay prèv dezi ou genyen pou laverite. Moun ki pa swaf pawòl Bondye yo se moun ki pa gen lavi nan yo. Moun sa yo se moun ki andeyò pawòl Bondye, ki fè pati larelijyon. Moun ki vrèman kwè nan Bondye gen yon konesans ki pi pwofon sou pawòl Bondye paske l ap manje epi bwè pawòl La. Si ou pa swaf pawòl Bondye, ou pa ka manje ni bwè pawòl Li yo vre, epi si ou pa konnen pawòl Bondye, ou pa gen mwayen pou w temwaye pou Bondye ni satisfè Bondye.

Lè yon moun kwè nan Bondye, ki jan li ta dwe konnen Bondye? Yon moun ta dwe aprann konnen Bondye sou baz pawòl Li ak travay Bondye ap fè jodi a, san devyasyon ni erè, epi, anvan tout lòt bagay, yon moun ta dwe konnen travay Bondye a. Sa a se fondman pou aprann konnen Bondye. Tout divès pawòl anlè sa yo ki pa pote yon konpreyansyon total pawòl Bondye a, tout se nosyon relijye yo ye; yo pote yon konpreyansyon ki pèvès epi ki fo. Pi gwo konpetans pèsonalite relijye yo se pran pawòl Bondye a, jan li te konpreyansib nan tan lontan, epi mezire pawòl Bondye jodi a kont yo. Si, pandan w ap sèvi Bondye jodi a, ou rete kole sou bagay iliminasyon Sentespri te revele nan tan pase, ebyen sèvis ou a pral lakòz deranjman, epi pratik ou yo pral pase mòd, anyen anplis pase yon seremoni relijye. Si ou kwè moun k ap sèvi Bondye dwe parèt tèt bese epi pasyan, pami lòt kalite, epi si ou mete kalite konesans sa a an pratik jodi a, ebyen konesans sa a se yon nosyon relijye; pratik sa a vin tounen yon pèfòmans ipokrit. Ekspresyon “nosyon relijye” a fè referans ak kèk bagay ki pase mòd, ki depase (ou jwenn ladan konpreyansyon pawòl Bondye te pale anvan yo ak limyè Sentespri a te revele dirèkteman), e si yo ta mete yo an pratik jodi a, sa ap deranje travay Bondye a, epi li p ap pote okenn avantaj pou moun. Si moun yo pa kapab debarase yo ak bagay sa yo ki fè pati nosyon relijye, ebyen bagay sa yo pral tounen gwo antrav pou yo sèvi Bondye. Moun ki gen nosyon relijye pa gen okenn mwayen pou yo suiv diferan etap travay Sentespri a—yo fè yon pa annaryè, apre sa de pa. Sa rive paske nosyon relijye sa yo lakòz moun yo vin awogan epi kwè nan siperyorite espirityèl yo nan yon fason ekstrawòdinè. Bondye pa santi okenn nostalji pou sa Li te di epi fè nan tan lontan; si yon bagay vin demode, Li elimine li. Èske ou vrèman enkapab pou w vire do bay nosyon sa yo? Si ou rete kole ak pawòl Bondye te pale nan tan lontan yo, èske sa pwouve ke ou konnen travay Bondye a? Si ou pa kapab asepte limyè Sentespri a jodi a, men ou prefere rete kole sou limyè tan lontan an, èske sa pwouve ke w ap swiv tras pye Bondye? Èske ou toujou pa kapab abandone nosyon relijye yo? Si se konsa, ebyen w ap tounen yon moun ki opoze ak Bondye.

Si moun kapab vire do bay nosyon relijye yo, yo p ap sèvi ak lespri yo pou mezire pawòl ak travay Bondye jodi a, men pito, yo pral obeyi dirèkteman. Menm si sa evidan travay Bondye jodi a pa sanble ak travay nan tan pase a, ou toujou anmezi pou w kite opinyon pase yo epi obeyi travay Bondye jodi a dirèkteman. Si ou kapab konprann ke ou dwe bay travay Bondye a jodi a yon plas espesyal, kèlkeswa jan Bondye te travay nan tan lontan, lè sa a, ou se yon moun ki te vire do bay nosyon yo, k ap obeyi Bondye, epi ki moun ki kapab obeyi travay ak pawòl Bondye epi swiv tras Li. Nan pwen sa a, w ap yon moun ki vrèman obeyi Bondye. Ou pa analize oswa egzamine travay Bondye a; se tankou si Bondye te bliye travay Li te fè anvan an, epi ou menm tou, ou te bliye li. Prezan an se prezan an, epi pase a se pase a, epi depi jodi a, Bondye mete sou kote sa li te fè nan tan lontan, ou pa ta dwe, oumenm, ap mize sou li. Se yon moun konsa sèlman ki obeyi Bondye totalman epi ki abandone tout lide relijye yo totalman.

Paske toujou genyen nouvo devlopman nan travay Bondye a, gen travay ki vin demode epi ansyen pandan nouvo travay yo ap rive. Diferan kalite travay sa yo, ansyen ak nouvo, pa kontradiktwa, men yo konplemantè; chak etap swiv dènye a. Paske gen nouvo travay, ansyen bagay yo, nòmalman, dwe elimine. Pa egzanp, kèk nan pratik ki tabli depi lontan ak pawòl moun abitye di, makonnen ak anpil lane eksperyans moun genyen epi ansèyman, te fòme tout fòm ak kalite nosyon nan lespri lòm. Ke Bondye poko fin revele vrè vizaj Li ak karaktè entèn Li bay lòm, mete sou pwopagasyon, pandan anpil ane, yon seri teyori tradisyonèl tan lontan, te pi favorab toujou pou fòmasyon moun sou nosyon sa yo. Nou ta kapab di, nan evolisyon kwayans moun nan Bondye, enfliyans divès kalite nosyon mennen nan fòmasyon san rete ak evolisyon divès kalite teyori sou fason moun konprann Bondye, ki vin lakòz anpil pratikan relijye k ap sèvi Bondye vin tounen lennmi Li. Donk, plis nosyon relijye moun yo fò, se plis yo opoze ak Bondye, e se plis yo se lennmi Bondye. Travay Bondye a toujou nouvo e li pa janm ansyen; li pa janm fòme doktrin, okontrè li chanje san rete epi li renouvle nan yon mezi plizoumwen gran. Travay nan fason sa a se yon ekspresyon karaktè entèn Bondye Li menm. Li se prensip entèn travay Bondye a tou, ak youn nan mwayen Bondye sèvi pou Li akonpli jesyon Li. Si Bondye pa t travay nan fason sa a, moun pa t ap chanje oswa yo pa t ap kapab konnen Bondye, epi Satan pa t ap pèdi batay la. Se konsa, nan travay Li, chanjman k ap fèt tout tan yo kapab parèt iregilye, men poutan yo peryodik. Sepandan, fason moun kwè nan Bondye, totalman diferan. Li rete kole sou ansyen doktrin ak sistèm li abitye yo, epi plis yo ansyen, se plis yo aseptab pou li. Ki jan lespri ensanse moun, yon lespri ki rèd tankou wòch, kapab rive asepte tout nouvo travay ak pawòl ensondab Bondye yo? Lòm rayi Bondye ki toujou nouvo epi ki pa janm vyeyi; li renmen sèlman ansyen Bondye a, ki gen dan long, cheve blan, epi ki rete rèd yon sèl kote. Se konsa, paske Bondye ak lòm, chak gen pwòp gou pa yo, lòm devni lennmi Bondye. Anpil nan kontradiksyon sa yo toujou egziste menm jodi a, nan yon moman kote Bondye t ap fè nouvo travay pandan prèske sis mil ane. Donk, pa gen remèd pou yo. Petèt se paske tèt lòm di, oswa envyolabilite dekrè administratif Bondye pou nenpòt ki moun—men reskonsab legliz sa yo, fanm kou gason, rete kole ak vye liv mwazi ak dokiman, pandan Bondye kontinye ap reyalize travay jesyon Li a ki pako fini, tankou si Li pa t gen pèsonn bò kote Li. Menm si kontradiksyon sa yo fè Bondye ak lòm lennmi, epi yo menm sanble san solisyon, Bondye pa ba yo okenn atansyon, tankou si yo te alafwa la epi pa la. Sepandan, lòm toujou kontinye rete kole sou kwayans ak nosyon li yo, epi li pa janm lage yo. Epoutan gen yon bagay ki evidan: Menm si lòm pa devye nan pozisyon li yo, pye Bondye toujou ap deplase, epi Li toujou ap chanje pozisyon Li selon anviwònman an. Finalman, se lòm ki pral pèdi batay la san goumen. Entretan, Bondye se pi gwo lennmi tout advèsè li bat yo, epi Li se chanpyon limanite, kit li pèdi batay kit li pa pèdi. Kiyès ki kapab fè konpetisyon ak Bondye epi pote laviktwa sou Li? Nosyon lòm adopte yo ta sanble yo soti nan Bondye paske anpil ladan yo te pran nesans alasuit travay Bondye a. Sepandan, Bondye pa padone lòm poutèt sa, ni tou, Li pa felisite lòm paske l ap kreye pwodui pakèt apre pakèt “pou Bondye” alasuit travay Li, men ki andeyò travay Li. Okontrè, Li gen anpil degoutans pou nosyon lòm yo, ansyen kwayans pyete yo, epi pa menm gen yon lespri L pou Li konnen nan ki dat nosyon sa yo premye parèt. Li pa aksepte ditou ke se travay Li ki lakoz egzistans nosyon sa yo, paske nosyon lòm yo, se lòm ki gaye yo; sous yo se panse ak lide lòm—se pa Bondye, men se Satan. Entansyon Bondye se te toujou pou travay Li nouvo epi vivan, pa vyeyi epi mouri, epi sa Li fè pou lòm adopte yo varye selon epòk la ak peryòd la, epi li pa etènèl ni envaryab. Tout sa, paske Li se yon Bondye ki fè moun viv epi vin nouvo, pase pou Li ta yon dyab ki fè lòm mouri epi vyeyi. Èske nou toujou pa konprann sa? Ou genyen teyori sou Bondye epi ou pa kapab kite yo paske ou gen yon lespri fèmen. Se pa paske travay Bondye a pa gen ase bon sans ladan, ni paske travay Bondye a diferan de sa lòm vle, ni, anplis, se pa paske Bondye toujou neglijan nan devwa Li yo. Ou pa ka bay nosyon w yo do paske ou manke twòp nan obeyisans ou, epi paske ou pa gen okenn resanblans ditou ak yon kreyati; se pa paske Bondye ap rann bagay yo difisil pou ou. Se ou ki lakòz tout bagay sa yo, sa pa gen okenn rapò ak Bondye; tout soufrans ak malè se lòm ki kreye yo. Panse Bondye yo toujou bon: Li pa vle lakòz ke w ap kreye teyori, men Li swete pou ou chanje epi renouvle ofiramezi epòk yo ap pase. Poutan ou pa konnen sa ki bon pou ou, epi ou toujou swa ap ekzaminen swa ap analize. Se pa paske Bondye ap rann bagay yo difisil pou ou, men se paske ou pa gen okenn respè pou Bondye, epi dezobeyisans ou yo anpil. Yon ti kreyati tou piti, ki pèmèt li pran kèk pati san enpòtans nan sa Bondye te bay deja, epi answit, detounen yo epi sèvi ak yo pou atake Bondye—èske se pa dezobeyisans lòm? Li fè sans pou nou di, pa gen moun ki kalifye ditou pou eksprime opinyon yo devan Bondye, epi yo mwens kalifye toujou pou y ap parade ak langaj dous, san valè, pouri, santi move, jan yo pito—Pou nou pa di anyen sou teyori mwazi sa yo. Èske yo pa vin pi san valè toujou?

Yon moun ki vrèman ap sèvi Bondye se yon moun ki selon kè Bondye, ki pare pou Bondye itilize li, epi ki kapab vire do bay teyori relijye yo. Si ou vle manje ak bwè pawòl Bondye yo yon fason ki efikas, ebyen, ou dwe vire do bay nosyon relijye ou yo. Si ou gen dezi pou sèvi Bondye, ebyen, li pi nesesè toujou pou w kite nosyon relijye yo toudabò, epi obeyi pawòl Bondye nan tout sa w ap fè. Se sa yon moun ki vle sèvi Bondye ta dwe posede. Si ou manke konesans sa a, lè sa a, kou w kòmanse sèvi, ou pral lakòz dezòd ak latwoublay, epi si ou kenbe nosyon ou yo, ebyen ou p ap kapab evite pou Bondye frape ou, pou w pa janm leve ankò. Pran sa ou pral li la a kòm egzanp: Anpil nan pawòl ak travay jounen jodi a enkonpatib ak Bib la ansanm ak travay Bondye te fè deja, epi si ou pa gen okenn anvi pou w obeyi, ebyen ou kapab tonbe nenpòt ki lè. Si ou vle sèvi annakò ak volonte Bondye, ebyen ou dwe toudabò vire do bay nosyon relijye yo epi korije pwòp pwennvi w yo. Anpil nan sa ki pral di pral enkonpatib ak sa ki te di nan tan lontan, epi si kounye a ou manke volonte pou obeyi, ou p ap kapab mache nan chemen ki trase devan w nan. Si youn nan metòd Bondye travay yo pran rasin anndan ou epi ou pa janm kite l ale, ebyen metòd sa a ap vin tounen nosyon relijye pa w la. Si sa Bondye ye a anrasinen nan ou, ebyen w ap vin genyen verite a, epi si pawòl ak verite Bondye yo kapab vin tounen pwòp lavi w, ou p ap janm gen okenn nosyon sou Bondye ankò. Moun ki posede vrè konesans sou Bondye p ap kenbe okenn teyori e yo p ap gen pou konfòme yo anba okenn doktrin.

Poze kesyon sa yo pou ou kapab rete vijilan:

1. Èske konesans ou genyen entèfere ak sèvis w ap bay Bondye?

2. Konbyen pratik relijye ou genyen nan lavi kotidyen w? Si ou sèlman montre aparans pyete, èske sa vle di ke lavi w te grandi epi atenn matirite?

3. Lè ou manje epi bwè pawòl Bondye yo, èske ou kapab vire do bay nosyon relijye ou yo?

4. Lè w ap priye, èske w kapab mete seremoni relijye sou kote?

5. Èske ou se yon moun ki anfòm pou Bondye itilize?

6. Ki kantite nan konesans ou genyen sou Bondye ki gen nosyon relijye ladan yo?