Գլուխ 84

Ինձ չճանաչելու պատճառով մարդիկ անթիվ անգամներ խաթարել են Իմ տնօրինումը և խափանել Իմ ծրագրերը, բայց երբեք չեն կարողացել խոչընդոտել Իմ առաջընթաց քայլերը։ Դա նրանից է, որ Ես իմաստության Աստված եմ։ Իմ մեջ կա անսահման իմաստություն, և Իմ մեջ կան անսահման ու անըմբռնելի խորհուրդներ։ Անհիշելի ժամանակներից մինչև հավերժություն մարդիկ երբեք չեն կարողացել և չեն էլ կարողանա ըմբռնել ու լիովին հասկանալ սրանք։ Այդպե՞ս չէ։ Իմ արտաբերած յուրաքանչյուր խոսքում կա միայն իմաստություն, այլև յուրաքանչյուր խոսք նաև պարունակում է Իմ թաքնված խորհուրդները։ Ինձ մոտ ամեն ինչ խորհուրդ է, Իմ ամեն մի մասը խորհուրդ է։ Այսօր պարզապես տեսել եք խորհուրդը, այն է՝ տեսել եք Իմ անձը, բայց դեռ չեք բացահայտել ներսում թաքնված այս խորհուրդը։ Մարդիկ կարող են մտնել Իմ թագավորություն միայն Իմ առաջնորդությանը հետևելով, հակառակ դեպքում, նրանք կկորչեն աշխարհի հետ միասին և մոխիր կդառնան։ Ես լիակատար Աստվածն Ինքն եմ՝ Ես ոչ այլ ոք եմ, քան Աստված Ինքը։ Նախկին ասույթները, ինչպիսին է «Աստծու դրսևորումը», արդեն հնացած են․ դրանք մաշված հին բաներ են, որոնք այլևս կիրառելի չեն։ Ձեզանից քանի՞սն են սա հստակ տեսել։ Ձեզանից քանի՞սն են այս աստիճան վստահ եղել Իմ հարցում։ Ամեն ինչ պետք է հստակ բացատրվի և ցույց տրվի Իմ կողմից։

Սատանայի թագավորությունը կործանվել է, և նրա մարդիկ շուտով կավարտեն Ինձ ծառայություն մատուցելը։ Նրանք մեկ առ մեկ կվտարվեն Իմ տնից, ինչը նշանակում է, որ նրանք, ովքեր քողարկվել են տարբեր դերերում, այսօր բացահայտել են իրենց իրական դեմքը, և նրանք բոլորը կհեռացվեն Իմ թագավորությունից։ Մի՛ մոռացեք։ Այսօրվանից սկսած՝ բոլոր նրանք, ում Ես լքում եմ, ներառյալ նրանք, ում լքել եմ անցյալում, պարզապես դերասանություն անողներ են և պարզապես կեղծ են։ Նրանք լոկ ներկայացում են խաղացել Ինձ համար, և երբ այս պիեսն ավարտվի, նրանք պետք է հեռանան բեմից։ Նրանք, ովքեր իսկապես Իմ որդիներն են, պաշտոնապես կլինեն Իմ թագավորությունում՝ ստանալու Իմ սերն ու վայելելու այն օրհնությունները, որոնք Ես վաղուց պատրաստել եմ ձեզ համար։ Օրհնվա՛ծ են անդրանիկ որդիները։ Քանի որ նախապես կրթվել եք Իմ կողմից, այժմ պիտանի եք Ինձ համար։ Հավատացե՛ք, որ Ես Ամենակարող Աստվածն եմ։ Այն բաները, որոնք մարդիկ չեն կարող իրագործել, Ես կարող եմ անել առանց խոչընդոտի, և մրցակցության տեղ բացարձակապես չկա։ Մի՛ ենթադրեք, որ ոչինչ չեք կարող անել, և որ պիտանի չեք լինելու Իմ անդրանիկ որդիները։ Դուք միանգամայն արժանի՛ եք։ Սա նրանից է, որ բոլոր բաներն Ինձնից են կախված, որպեսզի արվեն, դրանք բոլորն Ինձ են ապավինում, որպեսզի իրագործվեն։ Ինչո՞ւ եք հիմա զգում, որ այդպիսի հասակ ունեք։ Դա պարզապես նրանից է, որ ձեզ իսկապես օգտագործելու Իմ ժամանակը դեռ չի հասել։ Մեծ տաղանդները չեն կարող օգտագործվել մանր նպատակների համար, հասկանո՞ւմ եք։ Ողջ տիեզերական աշխարհում արդյո՞ք պարզապես սահմանափակված եք փոքրիկ Չինաստանով։ Այսինքն՝ ողջ տիեզերական աշխարհի բոլոր մարդիկ կտրվեն ձեզ՝ հովվելու և առաջնորդելու, քանի որ դուք անդրանիկ որդիներն եք, և ձեր եղբայրներին առաջնորդելը ձեր կատարելիք պարտավորությունն է։ Լա՛վ իմացեք սա։ Ես Ամենակարող Աստվածն ե՛մ։ Ես մեկ անգամ ևս շեշտում եմ, որ թույլ եմ տալիս ձեզ վայելել։ Ես Նա եմ, Ով գործում է․ Սուրբ Հոգին գործում է ամենուր և անձամբ ուղղորդում է։

Անցյալում մարդիկ Իմ փրկության մասին հասկացողություն չունեին։ Հիմա հասկանո՞ւմ եք։ Իմ փրկությունը մի քանի կողմ ունի։ Մեկն այն է, որ որոշ մարդկանց համար բացարձակապես նախասահմանում չկա, ինչը նշանակում է, որ նրանք ընդհանրապես չեն կարող վայելել Իմ շնորհը։ Մյուսն այն է, որ կան մարդիկ, որոնք ի սկզբանե նախասահմանված են և որոշ ժամանակ վայելում են Իմ շնորհը, բայց որոշ ժամանակ անց՝ այն ժամանակ, որը Ես եմ նախասահմանել, Ես դուրս կթողնեմ նրանց, և ապա նրանց կյանքը լիովին կավարտվի։ Եվս մեկ այլ կողմն այն է, որ կան մարդիկ, որոնց Ես նախասահմանել ու ընտրել եմ, և որոնք վայելում են հավերժական օրհնություններ։ Նրանք վայելում են Իմ շնորհը սկզբից մինչև վերջ՝ ներառյալ այն նեղությունները, որոնք նրանք կրել են Ինձ ընդունելուց առաջ և հետո, ինչպես նաև այն լուսավորությունն ու լուսավորումը, որոնք ստացել են Ինձ ընդունելուց հետո։ Այսուհետ նրանք կսկսեն վայելել օրհնություններ։ Այլ կերպ ասած՝ Ես լիովին փրկած կլինեմ այս մարդկանց։ Սա Իմ մեծ գործի ավարտի ամենաակնհայտ դրսևորումն է։ Ապա ինչի՞ն են վերաբերում օրհնությունները։ Թույլ տվեք հարցնել ձեզ։ Ի՞նչ եք ամենաշատն ուզում անել։ Ի՞նչն եք ամենաշատն ատում։ Ի՞նչ եք ամենաշատը հույս ունենում ձեռք բերել։ Անցյալում ցավերի ու նեղությունների միջով եք անցել բացառապես Ինձ ձեռք բերելու համար, և որպեսզի ձեր կյանքն աճի։ Դրանք շնորհի մի մասն են կազմում։ «Օրհնություններ» նշանակում է, որ ապագայում այլևս չեք ունենա այն բաները, որոնք ատում եք, ինչը նշանակում է, որ այդ բաներն այլևս ներկա չեն լինի ձեր իրական կյանքում։ Դրանք լիովին հեռացված կլինեն ձեր տեսադաշտից։ Ընտանիքը, աշխատանքը, կինը, ամուսինը, երեխաները, ընկերներն ու բարեկամները և նույնիսկ օրական ատելի երեքանգամյա սնունդը, կվերանան։ (Սա նշանակում է չսահմանափակվել ժամանակով և լիովին դուրս գալ մսեղիից։ Միայն այն ժամանակ, երբ հոգովդ կշտանաս, կկարողանաս պահպանել քո մարմինը, բայց սա վերաբերում է քո մարմնին, ոչ թե մսեղիին։ Դու լիովին ազատ և գերազանցող կլինես։ Սա ամենամեծ և ամենաակնհայտ հրաշքն է, որն Աստված դրսևորել է աշխարհի արարումից ի վեր։) Հողի բոլոր մասնիկները կհեռացվեն ձեր մարմիններից, և լիովին կլինեք հոգևոր մարմիններ, որոնք սուրբ են ու անարատ՝ ունակ ճամփորդելու ողջ տիեզերքով մեկ և մինչև երկրի ծայրերը։ Այդ ժամանակից սկսած՝ նաև կազատվեք այդ ամբողջ տաղտկալի լվացքից ու մաքրությունից, և պարզապես լիովին կվայելեք։ Այնուհետև այլևս չեք մտածի ամուսնության մասին (քանի որ Ես ավարտում եմ դարաշրջանը, ոչ թե ստեղծում եմ աշխարհը), և այլևս չեն լինի ծննդաբերության ցավեր, որոնք ամենատանջալիցն են կանանց համար։ Ապագայում այլևս չեք աշխատի կամ տքնի։ Լիովին կընկղմվեք Իմ սիրո գրկում՝ վայելելով այն օրհնությունները, որոնք Ես շնորհել եմ ձեզ։ Սա բացարձակ է։ Մինչ վայելում եք այս օրհնությունները, շնորհը կշարունակի ուղեկցել ձեզ։ Այն ամենը, ինչ Ես պատրաստել եմ ձեզ համար, այսինքն՝ հազվագյուտ և թանկարժեք գանձեր ողջ աշխարհից, կտրվեն ձեզ։ Հենց հիմա չեք կարող ո՛չ ըմբռնել, ո՛չ էլ պատկերացնել այս ամենը, իսկ նախկինում ոչ ոք չի վայելել դրանք։ Երբ այս օրհնությունները գան ձեզ վրա, անվերջ կցնծաք, բայց մի՛ մոռացեք, որ այս ամենն Իմ մեծ զորության, Իմ գործերի, Իմ արդարության և, առավել ևս, Իմ մեծափառության շնորհիվ է։ (Ես շնորհ կցուցաբերեմ նրանց հանդեպ, ում կընտրեմ շնորհ ցուցաբերել, և ողորմած կլինեմ նրանց հանդեպ, ում կընտրեմ ողորմած լինել։) Այդ ժամանակ դուք ծնողներ չեք ունենա, և արյունակցական կապեր չեն լինի։ Դուք բոլորդ մարդիկ եք, ում Ես սիրում եմ՝ Իմ սիրելի որդիները։ Այդ ժամանակից սկսած՝ ոչ ոք չի համարձակվի ճնշել ձեզ։ Դա կլինի ժամանակ՝ մեծանալու ու չափահաս դառնալու, ինչպես նաև ժամանակ, երբ երկաթե գավազանով կկառավարեք բյուր ազգերը։ Ո՞վ կհամարձակվի խոչընդոտել Իմ սիրելի որդիներին։ Ո՞վ կհամարձակվի հարձակվել նրանց վրա։ Բոլորը կվախենան Իմ սիրելի որդիներից, որովհետև Հայրը փառք է ձեռք բերել։ Այն բոլոր բաները, որոնք ոչ ոք երբևէ չէր կարող պատկերացնել, կհայտնվեն ձեր աչքերի առաջ։ Դրանք կլինեն անսահման, անսպառ և անվերջ։ Մոտ ապագայում հաստատ չեք խանձվի արևից կամ չեք տանի տանջող շոգը, և հաստատ չեք տառապի ցրտից կամ չեք զգա անձրևի, ձյան կամ քամու հպումը։ Դա նրանից է, որ Ես սիրում եմ ձեզ, և դա ամբողջովին Իմ սիրո աշխարհը կլինի։ Ես կտամ ձեզ այն ամենը, ինչ ուզում եք, և կպատրաստեմ ձեզ համար այն ամենը, ինչի կարիքն ունեք։ Ո՞վ կհամարձակվի պնդել, որ Ես արդար չեմ։ Ես անմիջապես կտապալեմ քեզ, որովհետև նախկինում ասել եմ, որ Իմ ցասումը (չարերի հանդեպ) կտևի մինչև հավերժություն, և Ես մի փոքր անգամ չեմ զիջի։ Սակայն Իմ սերը (Իմ սիրելի որդիների հանդեպ) նույնպես կտևի հավերժ։ Ես այն ամենևին չեմ զսպի։

Այսօր այն մարդիկ, որոնք լսում են Իմ խոսքերը որպես դատաստան, նրանք են, ովքեր ճիշտ վիճակում չեն։ Սակայն, երբ նրանք գիտակցեն դա, Սուրբ Հոգին արդեն լքած կլինի նրանց։ Ողջ տիեզերական աշխարհից անդրանիկ որդիներն ընտրվում են ձեր միջից, մինչդեռ որդիներն ու ժողովուրդը կազմում են ձեր միայն մի փոքր մասը։ Իմ ուշադրության կենտրոնում ողջ տիեզերական աշխարհն է, ինչը նշանակում է, որ որդիներն ու ժողովուրդն ընտրվում են աշխարհի բոլոր ազգերից։ Հասկանո՞ւմ եք։ Ինչո՞ւ եմ շարունակ շեշտում, որ անդրանիկ որդիները պետք է արագ մեծանան և դուրս գան՝ առաջնորդելու այդ օտարերկրացիներին։ Հասկանո՞ւմ եք Իմ խոսքերի ճշմարիտ իմաստը։ Դա նրանից է, որ Չինաստանն այն ազգն է, որին Ես անիծել եմ։ Այն ամենաշատն է հալածել Ինձ, և Ես ամենաշատն եմ գարշում նրանից։ Իմացե՛ք սա։ Իմ անդրանիկ որդիները և Ես երկնային ենք և տիեզերական մարդիկ ենք․ չենք պատկանում որևէ ազգի։ Պե՛տք է դադարեք կառչել մարդկային պատկերացումներից։ Պատճառն այն է, որ Իմ անձն արդեն հայտնվել է ձեզ։ Ամեն ինչ Ինձնից է կախված։ Կարո՞ղ եք հիշել Իմ խոսքերը։ Ինչո՞ւ եմ ասում, որ ձեր մեջ մարդիկ գնալով պակասում են, և որ անդամները դարձել են ավելի ու ավելի ընտիր։ Դա նրանից է, որ Իմ փրկարար շնորհն աստիճանաբար ուղղվել է դեպի տիեզերական աշխարհը։ Նրանք, ովքեր դուրս են թողնվել, ովքեր ընդունել են Իմ անունը, նրանք են, ովքեր ծառայություն են մատուցել հանուն անդրանիկ որդիներին կատարելագործելու։ Հասկանո՞ւմ եք։ Ինչո՞ւ եմ ասում, որ նրանք բոլորն այն մարդիկ են, որոնք ծառայություն են մատուցել Իմ որդիներին։ Հիմա իսկապես հասկանում եք, այնպես չէ՞։ Թիվն իսկապես չնչին է, անկասկած քիչ են։ Սակայն այդ մարդիկ զգալիորեն շահել են Իմ որդիների շնորհիվ և վայելել Իմ շնորհներից շատերը, և ահա թե ինչու Ես ասացի, որ փրկում եմ մարդկային ցեղը վերջին անգամ։ Հիմա գիտե՛ք Իմ խոսքերի ճշմարիտ իմաստը։ Ես խստորեն կպատժեմ ցանկացածին, ով դիմակայում է Ինձ, և Իմ երեսը կշրջեմ դեպի նրան, ով աջակցում է Ինձ։ Դա նրանից է, որ ի սկզբանե Ես միշտ եղել եմ մեծափառ և արդար Աստված, և ամեն ինչ հայտնի կդառնա ձեզ։ Ես գործում եմ արագ՝ հրաշալի եղանակներով, և շուտով տեղի կունենան հրաշալի բաներ, որոնք աներևակայելի են մարդկանց համար։ Ես իսկապես նկատի ունեմ անմիջապես և շուտով։ Հասկանո՞ւմ եք։ Առանց հապաղելու ձգտե՛ք կյանքի մուտքին։ Իմ սիրելի՛ որդիներ, ամեն ինչ այստեղ ձեզ համար է, և ամեն ինչ գոյություն ունի հանուն ձեզ։