ღვთის საქმის სამი ეტაპის გააზრება ღმერთის ჭეშმარიტად შემეცნებისკენ მიმავალი გზაა

კაცობრიობის მართვის საქმე სამ ეტაპად არის დაყოფილი, რაც ნიშნავს, რომ კაცობრიობის ხსნასაც სამი ეტაპი აქვს. ეს სამი ეტაპი არ მოიცავს სამყაროს შექმნას, არამედ წარმოადგენს რჯულის ეპოქის, მადლის ეპოქისა და სასუფევლის ეპოქის სამ საფეხურს. სამყაროს შექმნის პროცესი იყო სრულიად კაცობრიობის წარმოშობის საქმე. ეს არ ყოფილა კაცობრიობის ხსნის საქმე და მას არ ჰქონდა კავშირი კაცობრიობის გადარჩენასთან, რადგან როდესაც სამყარო შეიქმნა, ადამიანი არ იყო სატანის მიერ გახრწნილი და შესაბამისად, არ არსებობდა ადამიანის ხსნის საჭიროება. კაცობრიობის ხსნის საქმე მხოლოდ მას შემდეგ დაიწყო, როდესაც კაცობრიობა სატანამ გახრწნა და ამდენად, კაცობრიობის მართვის საქმეც მხოლოდ მას შემდეგ დაიწყო, რაც კაცობრიობა გაიხრწნა. სხვა სიტყვებით რომ ვთქვათ, ღმერთმა ადამიანის მართვა დაიწყო კაცობრიობის ხსნის საქმის დაწყებასთან ერთად და არა სამყაროს შექმნის საქმესთან ერთად. კაცობრიობის მართვის საქმე მხოლოდ მას შემდეგ გაჩნდა, რაც მან გახრწნილი ხასიათი შეიძინა, შესაბამისად, კაცობრიობის მართვის საქმე მოიცავს სამ ნაწილს და არა ოთხ ეტაპს ან ოთხ ეპოქას. მხოლოდ ესაა მართებული დამოკიდებულება ღმერთის მიერ კაცობრიობის მართვის საქმისა. კაცობრიობის მართვის საქმე სრულად დასრულდება მაშინ, როდესაც საბოლოო ეპოქა დასრულდება. მართვის საქმის დასრულება ნიშნავს, რომ მთელი კაცობრიობის გადარჩენის საქმეც მთლიანად დასრულდება და ამ ეტაპს კაცობრიობისთვის ამით დაესმება წერტილი. სრულიად კაცობრიობის ხსნის საჭიროების გარეშე არ იარსებებდა მისი მართვის საქმის საჭიროება და შესაბამისად, არც იარსებებდა მართვის საქმის სამი ეტაპიც. სწორედ იმიტომ, რომ კაცობრიობა გაირყვნა და მას დაუყოვნებლივ სჭირდებოდა გადარჩენა, იეჰოვამ დაასრულა სამყაროს შექმნა და დაიწყო რჯულის ეპოქის საქმე. მხოლოდ ამის შემდეგ დაიწყო კაცობრიობის მართვის საქმე, რაც ნიშნავს, რომ ამავდროულად დაიწყო კაცობრიობის ხსნის საქმეც. „კაცობრიობის მართვა“ არ ნიშნავს დედამიწაზე ახლად მოვლენილი (ჯერ კიდევ გაუხრწნელი) ადამიანების ცხოვრების წარმართვას. არამედ, ეს ნიშნავს სატანის მიერ გახრწნილი კაცობრიობის ხსნას, ანუ ამ ცოდვილი კაცობრიობის გარდაქმნას. სწორედ ეს არის „კაცობრიობის მართვის“ მნიშვნელობა. კაცობრიობის ხსნის საქმე არ მოიცავს სამყაროს შექმნის საქმეს და შესაბამისად, კაცობრიობის მართვის საქმეც არ მოიცავს სამყაროს შექმნის საქმეს, არამედ მოიცავს მხოლოდ სამ ეტაპს, რომლებიც სამყაროს შექმნისგან განცალკევებულია. კაცობრიობის მართვის საქმის გასაგებად, აუცილებელია საქმის სამი ეტაპის ისტორიის ცოდნა — ეს არის ის, რაც თითოეულმა გადასარჩენმა ადამიანმა უნდა იცოდეს. როგორც ქმნილება, შენ უნდა იცოდე, რომ ადამიანი ღმერთმა შექმნა, უნდა იცოდე კაცობრიობის გახრწნის წყარო და, მითუმეტეს, უნდა იცოდე ადამიანის ხსნის პროცესი. თუ თქვენ ზოგიერთი წესის დაცვა იცით მხოლოდ ღვთის საამებლად, მაგრამ იმის წარმოდგენაც არ გაქვთ, როგორ გადაარჩენს ღმერთი კაცობრიობას ან რა არის კაცობრიობის გახრწნის წყარო, მაშინ სწორედ ეს გაკლიათ თქვენ, როგორც ქმნილებას. შენ არ უნდა დაკმაყოფილდე მხოლოდ იმ ჭეშმარიტებების გაგებით, რომელთა პრაქტიკაში განხორციელებაც შესაძლებელია, და ამავდროულად არაფერი იცოდე ღვთის მართვის საქმის უფრო ფართო მასშტაბების შესახებ — თუ ასეა, მაშინ მეტისმეტად დოგმატური ხარ. საქმის სამი ეტაპი არის ღვთის მიერ ადამიანის მართვის რეალური ისტორია, მთელი სამყაროს სახარების მოვლინება, უდიდესი საიდუმლო მთელ კაცობრიობაში, და ისინი ასევე წარმოადგენს სახარების ფართოდ ქადაგების საფუძველს. თუ შენ მხოლოდ იმ მარტივი ჭეშმარიტებების გაგებას ესწრაფვი, რომლებიც შენს სიცოცხლეს ეხება, და არაფერი იცი ამის, ყველა საიდუმლოსა და ხილვათა შორის უდიდესის შესახებ, მაშინ განა შენი სიცოცხლე წუნდებულ პროდუქტს არ ჰგავს, რომელიც მხოლოდ საყურებლად თუ გამოდგება და სხვა არაფრად ვარგა?

თუ ადამიანი მხოლოდ პრაქტიკაზე კონცენტრირდება და ღვთის საქმესა და იმას, რაც ადამიანმა უნდა იცოდეს, მეორეხარისხოვნად მიიჩნევს, განა ეს მისგან წვრილმანებზე ზრუნვა და მთავარის უგულებელყოფა არ არის? ის, რაც უნდა იცოდე, უნდა იცოდე; ის, რაც პრაქტიკაში უნდა განახორციელო, პრაქტიკაში უნდა განახორციელო. მხოლოდ მაშინ იქნები ის, ვინც იცის, როგორ ეძიოს ჭეშმარიტება. დავუშვათ, როდესაც დადგება დღე, რომ სახარება იქადაგო, მხოლოდ იმის თქმა შეგიძლია, რომ ღმერთი არის დიადი და სამართლიანი ღმერთი, რომ იგი არის უზენაესი ღმერთი, ღმერთი, რომელსაც ვერცერთი დიდებული ადამიანი ვერ შეედრება და რომ იგი არის ღმერთი, რომელზე აღმატებულიც არავინაა... შენ მხოლოდ ამ უმნიშვნელო, ზედაპირული სიტყვების თქმა შეგიძლია, მაშინ როცა სრულიად უუნარო ხარ, თქვა ისეთი სიტყვები, რომლებსაც გადამწყვეტი მნიშვნელობა აქვს და რომლებიც არსს სწვდება. შენ არაფერი გაქვს სათქმელი ღვთის შემეცნებაზე ან ღვთის საქმეზე და, უფრო მეტიც, არ შეგიძლია ჭეშმარიტების ახსნა, ან იმის მიცემა, რაც ადამიანს აკლია. ასეთ ადამიანს არ შეუძლია თავისი მოვალეობის ჯეროვნად შესრულება. ღვთის დამოწმება და ცათა სასუფევლის სახარების ქადაგება მარტივი საქმე არ არის. შენ ჯერ ჭეშმარიტებითა და იმ ხილვებით უნდა აღიჭურვო, რომელთა გაგებაც აუცილებელია. როდესაც შენთვის ნათელი იქნება ღვთის საქმის სხვადასხვა ხილვა და ჭეშმარიტება და შენს გულში შეიცნობ ღვთის საქმეს, და განურჩევლად იმისა, თუ რას აკეთებს ღმერთი — იქნება ეს სამართლიანი სამსჯავრო თუ გამოწრთობა — შენ გექნება უდიდესი ხილვა, როგორც შენი საძირკველი, და გექნება შესაფერისი ჭეშმარიტება პრაქტიკაში განსახორციელებლად, მაშინ შეძლებ ღმერთს ბოლომდე გაჰყვე. უნდა იცოდე, რომ განურჩევლად იმისა, თუ რა საქმეს ასრულებს იგი, ღვთის საქმის მიზანი არ იცვლება, მისი საქმის არსი არ იცვლება და ადამიანის მიმართ მისი განზრახვები არ იცვლება. რაც არ უნდა მკაცრი იყოს მისი სიტყვები, რაც არ უნდა არახელსაყრელი იყოს გარემო, მისი საქმის პრინციპები არ შეიცვლება და ადამიანის ხსნისკენ მიმართული მისი განზრახვა არ შეიცვლება. იმ პირობით, რომ ეს არ არის ადამიანის შედეგის ან დანიშნულების ადგილის გაცხადება, და არ არის დასკვნითი ეტაპის საქმე ან ღვთის მართვის მთელი გეგმის დასრულების საქმე, და იმ პირობით, რომ ეს ხდება იმ დროს, როდესაც იგი მუშაობს ადამიანზე, მაშინ მისი საქმის არსი არ შეიცვლება. ეს ყოველთვის იქნება კაცობრიობის ხსნა. ეს უნდა იყოს ღვთისადმი თქვენი რწმენის საძირკველი. საქმის ამ სამი ეტაპის მიზანი მთელი კაცობრიობის ხსნაა — ეს ნიშნავს სატანის ბატონობისგან ადამიანის სრულ განთავისუფლებას. მიუხედავად იმისა, რომ თითოეულ ეტაპს განსხვავებული დანიშნულება და მნიშვნელობა აქვს, ისინი ყველა ერთად მუშაობს ადამიანის ხსნის დიდი გეგმის შესასრულებლად. თითოეული ეტაპი განსხვავებული მოთხოვნილების პასუხია და ღვთის საქმე ამ მოთხოვნილებების შესაბამისად სრულდება. როდესაც შეიცნობ საქმის ამ სამი ეტაპის მიზანს, გაიგებ საქმის თითოეული ეტაპის ღირებულების მნიშვნელობას და გაიაზრებ, როგორ იმოქმედო ისე, რომ ღმერთის ნებას შეესაბამებოდე. ამ წერტილამდე მისვლა უდიდეს ხილვად იქცევა იმ საძირკვლად, რომელზეც ღმერთისადმი რწმენა მტკიცედ დგას. საკმარისი არ არის იოლი პრაქტიკების ან ღრმა ჭეშმარიტებების ძიება, აუცილებელია ხედვებისა და პრაქტიკის გაერთიანება: უნდა გქონდეს პრაქტიკასთან დაკავშირებული ჭეშმარიტებებიც და ხედვების შესახებ ცოდნაც. მხოლოდ ამის შემდეგ იქნება ღრმა ხედვასა და ჭეშმარიტებაზე დაფუძნებული ცოდნა, რომელიც ჭეშმარიტად განხორციელდება ცხოვრებაში. ასე ვითარდება ინდივიდი ისეთ ადამიანად, რომელიც გულწრფელად და სრულად ეძებს ჭეშმარიტებას.

საქმის სამი ეტაპი წარმოადგენს ღვთის მთლიანი მმართველობის არსს და მათში გამოიხატება ღვთის ხასიათი და ის, თუ რას წარმოადგენს ღმერთი. ისინი, ვინც არ იციან ღვთის საქმის სამი ეტაპის შესახებ, ვერ აცნობიერებენ, როგორ ავლენს ღმერთი თავის ხასიათს და არც სწვდებიან მისი საქმის სიბრძნეს. მათ ასევე არ უწყიან, თუ რამდენნაირ გზას იყენებს იგი კაცობრიობის ხსნისთვის და რა არის მისი განზრახვა მთელი კაცობრიობის მიმართ. საქმის სამი ეტაპი არის კაცობრიობის ხსნის საქმის სრული გამოხატულება, და ისინი, ვინც არ იცნობენ საქმის სამ ეტაპს, ვერ ჩასწვდებიან სულიწმიდის საქმის სხვადასხვა მეთოდსა და პრინციპს. ისინი, ვინც მხოლოდ მკაცრად მისდევენ რომელიმე ეტაპიდან შემორჩენილ წესებს, არიან ადამიანები, რომლებიც ღმერთს წესებსა და ჩარჩოებში აქცევენ და ღვთის ბუნდოვანი რწმენით გამოირჩევიან. ასეთი ადამიანები ვერასოდეს ეღირსებიან ღვთის ხსნას. მხოლოდ ღვთის საქმის სამ ეტაპს შეუძლია სრულად გამოხატოს ღვთის მთელი ხასიათი, მთელი კაცობრიობის ხსნისკენ მიმართული მისი განზრახვა და კაცობრიობის ხსნის მთელი პროცესი. ეს არის მტკიცებულება იმისა, რომ მან დაამარცხა სატანა და მოიპოვა კაცობრიობა; ეს არის ღვთის გამარჯვების დასტური და ღვთის მთელი ხასიათის გამოხატულება. მათ, ვინც ღვთის საქმის სამი ეტაპიდან მხოლოდ ერთს ჩასწვდნენ, მხოლოდ ღვთის ხასიათის ნაწილი იციან. შესაძლოა ადამიანის წარმოდგენით ჩამოყალიბდეს წესები, რომლებიც საქმის მხოლოდ ამ ერთი ეტაპიდან მომდინარეობს, და ადამიანი, სავარაუდოდ, ღმერთს შეზღუდულად აღიქვამდეს და ღვთის ხასიათის ამ ერთ ნაწილს როგორც მთელ ხასიათს, ისე იღებდეს. უფრო მეტიც, ადამიანის წარმოსახვაში ბევრი ეს წარმოსახვა ერთიმეორეს ერწყმის იმგვარად, რომ ადამიანი ღვთის ხასიათს, არსსა და სიბრძნეს, ასევე, ღვთის საქმის პრინციპებს შეზღუდულ ჩარჩოებში აქცევს, რადგან სჯერა, რომ თუ ღმერთი ოდესღაც ასეთი იყო, იგი სამუდამოდ ასეთივე დარჩება და სამარადისოდ არ შეიცვლება. მხოლოდ მათ, ვინც იცნობენ და სწვდებიან საქმის სამ ეტაპს, შეუძლიათ შეიქმნან სრული და ზუსტი ცოდნა ღვთის შესახებ. სულ მცირე, ისინი აღარ განსაზღვრავენ ღმერთს როგორც ისრაელიანთა ან იუდეველთა ღმერთს და აღარ აღიქვამენ მას როგორც ღმერთს, რომელიც ადამიანის გამოსახსნელად სამუდამოდ იქნება ჯვარზე გაკრული. თუ ვინმე ღმერთს მხოლოდ მისი საქმის ერთი ეტაპიდან შეიცნობს, მისი ცოდნა უკიდურესად მწირია და ის ოკეანეში წვეთს არ აღემატება. თუ ასე არ არის, მაშინ რატომ აკრავდა მრავალი ძველი რელიგიური მცველი ცოცხალ ღმერთს ჯვარზე? განა ეს არ ხდება იმიტომ, რომ ადამიანი ღმერთს გარკვეულ ჩარჩოებში აქცევს? განა ბევრი ადამიანი არ ეწინააღმდეგება ღმერთს და არ აფერხებს სულიწმიდის საქმეს იმიტომ, რომ ისინი არ იცნობენ ღვთის მრავალფეროვან და მრავალწახნაგოვან საქმეს და, უფრო მეტიც, იმიტომ, რომ სულიწმიდის საქმეს აფასებენ საკუთარი მწირი ცოდნითა და მოძღვრებებით, რომლებიც აუთვისებიათ? მიუხედავად იმისა, რომ ამ ადამიანებს მხოლოდ ზედაპირული გამოცდილება აქვთ, ისინი ბუნებით ამპარტავანნი, ურჩნი და თავნებანი არიან, ამრეზით უყურებენ სულიწმიდის საქმეს, უგულებელყოფენ სულიწმიდის მიერ დადგენილ წესრიგს და მეტიც, თავიანთ უგვანო ძველ მოძღვრებებს იყენებენ იმისათვის, რათა სულიწმიდის საქმე „განამტკიცონ“. მათ აგრეთვე, თვალთმაქცობა სჩვევიათ, სრულიად დარწმუნებულნი არიან საკუთარ განსწავლულობაში და ჰგონიათ, რომ თავისუფლად შეუძლიათ მთელ ქვეყნიერებას მოედონ. განა ასეთი ადამიანები არ არიან, ვისაც სულიწმიდა უარყოფს და ვისაც ახალი ეპოქა გარიყავს? განა ისინი, ვინც ღმერთის წინაშე წარმდგარნი აშკარად ეწინააღმდეგებიან მას, არ არიან ამაზრზენი პიროვნებები, რომელთაც ზედაპირული და შეზღუდული ცოდნა აქვთ და საკუთარი „ბრწყინვალებით“ ყოყოჩობენ? მათ ბიბლიის მხოლოდ მწირი ცოდნა აქვთ, და მაინც სურთ თავისუფლად იმოქმედონ მსოფლიოს „აკადემიურ წრეებში“; მათ ადამიანებისთვის სასწავლებელი მხოლოდ ზედაპირული მოძღვრებები აქვთ, მაგრამ მაინც ლამობენ სულიწმიდის საქმის მიმართულების შეცვლას და ცდილობენ, იგი საკუთარი სააზროვნო პროცესების გარშემო ატრიალონ. რაც არ უნდა ახლომხედველნი იყვნენ, მათ სურთ ღვთის 6000-წლიანი საქმის დიდებულება დაინახონ. ასეთ ადამიანებს საუბრის არანაირი საფუძველი არ აქვთ! სინამდვილეში, რაც უფრო მეტად იცნობენ ადამიანები ღმერთს, მით ნაკლებად ზედაპირულად განსჯიან მის საქმეს - ისინი ძალზე ცოტას ლაპარაკობენ თავიანთ ცოდნაზე ღვთის ამჟამინდელი საქმის შესახებ და დაუფიქრებლად არ განსჯიან მას. რაც უფრო ნაკლებად იცნობენ ადამიანები ღმერთს, მით უფრო უტიფრები არიან, მით უფრო აღმატებულად აფასებენ საკუთარ თავს და მით უფრო უაპელაციოდ მსჯელობენ იმაზე, თუ ვინ არის ღმერთი, მაგრამ რასაც ამბობენ, მხოლოდ დოგმაა და მას ფაქტობრივი საფუძველი არ გააჩნია. ასეთები ყველაზე უსარგებლო ადამიანები არიან. ისინი, ვინც სულიწმიდის საქმეს თამაშად მიიჩნევენ, არასერიოზული ადამიანები არიან! როდესაც სულიწმიდის ახალ საქმეს აწყდებიან, ფრთხილად კი არ უდგებიან მას, არამედ პირიქით, პირს მოაღებენ და აჩქარებით განსჯას მოჰყვებიან, თავიანთ უფლებას აძლევენ უარყონ სულიწმიდის საქმის სისწორე და მასაც კი შეურაცხყოფენ ან გმობენ - განა ასეთი უპატივცემულო ადამიანები არ არიან სულიწმიდის საქმის უცოდინარნი და მეტიც, დიდად ამპარტავანნი, ბუნებით ურჩნი და თავნებანი? თუნდაც რომ დადგეს დღე, როდესაც ასეთი ადამიანები სულიწმიდის ახალ საქმეს მიიღებენ, მათ მაინც არ მიეტევებათ ღმერთისგან. ისინი არა მხოლოდ ზემოდან უყურებენ მათ, ვინც ღმერთისთვის იღვწის, არამედ თავად ღმერთსაც გმობენ. ასეთი თავზეხელაღებულნი არ იქნებიან შეწყალებულნი არც ამ ცხოვრებაში და არც მომავალ სამყაროში, ისინი სამუდამოდ ჯოჯოხეთში დაიღუპებიან! ასეთი უპატივცემულო, თვითკმაყოფილი ადამიანები უბრალოდ ღვთის მორწმუნის ნიღაბს ატარებენ და რაც უფრო მეტად არიან ასეთები, მით მეტად იჩენენ მიდრეკილებას ღვთის ადმინისტრაციული განჩინებების დარღვევისაკენ. განა ყველა ამპარტავანი ადამიანი, რომელიც ბუნებით აღვირახსნილია და არასოდეს არავის დამორჩილებია, ამ გზას არ მიჰყვება? განა ისინი ამგვარად ყოველდღიურად არ ეწინააღმდეგებიან ღმერთს, რომელიც ყოველთვის ახალია და არასოდეს ბერდება? დღეს, თქვენ უნდა გაიგოთ, რატომ არის აუცილებელი იცოდეთ ღვთის საქმის სამი ეტაპის მნიშვნელობა. სიტყვები, რომლებსაც მე გეუბნებით, თქვენთვის სასარგებლოა და ლიტონი არ არის. თუ მათ უბრალოდ ისე წაიკითხავთ, თითქოს ცხენით ჯირითისას ყვავილების ცქერით ტკბებოდეთ, განა ჩემი გულის სისხლი ამაოდ არ დაღვრილა? თითოეულმა თქვენგანმა უნდა შეიცნოს საკუთარი ბუნება. უმეტესობა თქვენ შორის გამოცდილი ორატორია, თეორიულ კითხვებზე პასუხები პირიდან დაუბრკოლებლად ამოგდით, მაგრამ არსებით საკითხებზე სათქმელი არაფერი გაქვთ. დღესაც კი კვლავ უშინაარსო საუბარში ხართ ჩაფლულნი და ვერ ახერხებთ თქვენი ძველი ხასიათის შეცვლას, უმეტეს თქვენგანს არც კი აქვს განზრახვა შეცვალოს უმაღლესი ჭეშმარიტების ძიების მიდგომა, და ამის ნაცვლად, უბრალოდ, უხალისოდ ცხოვრობთ. როგორ შეძლებენ ასეთი ადამიანები ღმერთს ბოლომდე გაჰყვნენ? თუნდაც გზის ბოლომდე მიაღწიოთ, რა სარგებელი იქნება თქვენთვის? ჯობს, სანამ გვიან არ არის, შეცვალოთ თქვენი აზრები - ან ნამდვილად ამოქმედდეთ, ან დროულად განერიდოთ. დროთა განმავლობაში უსარგებლო პარაზიტებად გადაიქცევით - ნუთუ გსურთ ასეთი მდაბიური და უღირსი როლის შესრულება?

საქმის სამი ეტაპი ღვთის მთელი საქმის ფაქტობრივი ჩანაწერია; ისინი კაცობრიობის ღვთისეული ხსნის ფაქტობრივი ჩანაწერია და არ არის გამოგონილი. თუ თქვენ ნამდვილად გსურთ ღვთის მთელი ხასიათის შემეცნების ძიება, მაშინ უნდა იცოდეთ ღვთის მიერ განხორციელებული საქმის სამი ეტაპი და, უფრო მეტიც, არ უნდა გამოტოვოთ არცერთი ეტაპი. ეს არის ის მინიმუმი, რასაც უნდა მიაღწიონ მათ, ვინც ღვთის შემეცნებას ესწრაფვის. თავად ადამიანს არ შეუძლია ღვთის ჭეშმარიტი შემეცნების შეთხზვა. ეს არ არის ის, რისი მოფიქრებაც თავად ადამიანს შეუძლია, და მითუმეტეს, არ არის სულიწმიდის განსაკუთრებული მადლის შედეგი, რომელიც ერთ კონკრეტულ ადამიანს მიენიჭა, არამედ, ეს არის ცოდნა, რომელიც მოდის მას შემდეგ, რაც ადამიანმა განიცადა ღვთის საქმე, და ეს არის ღვთის შემეცნება, რომელიც მოდის მხოლოდ ღვთის საქმის ფაქტების განცდის შემდეგ. ასეთი ცოდნა ადვილად მოსაპოვებელი არ არის და არც ისეთია, რისი სწავლებაც შეიძლება. იგი მთლიანად პირად გამოცდილებასთან არის დაკავშირებული. კაცობრიობის ღვთისეული ხსნა ამ საქმის სამი ეტაპის ბირთვს წარმოადგენს, თუმცა ხსნის საქმეში შედის მუშაობის რამდენიმე მეთოდი და რამდენიმე საშუალება, რომლითაც ღვთის ხასიათი გამოიხატება. სწორედ ამის ამოცნობაა ადამიანისთვის ყველაზე რთული. ადამიანისთვის ამის წვდომა რთულია. ეპოქების დაყოფა, ცვლილებები ღვთის საქმეში, ცვლილებები საქმის ადგილმდებარეობაში, ცვლილებები ამ საქმის მიმღებებში და ა.შ. — ეს ყველაფერი საქმის სამ ეტაპში შედის. კერძოდ, სულიწმიდის მუშაობის მეთოდის განსხვავება, ისევე როგორც ცვლილებები ღვთის ხასიათში, ხატში, სახელში, ვინაობაში, თუ სხვა ცვლილებები, საქმის სამი ეტაპის ნაწილია. საქმის ერთი ეტაპი მხოლოდ ერთ ნაწილს წარმოადგენს და იგი გარკვეულ ჩარჩოებში ექცევა. იგი არ მოიცავს ეპოქების დაყოფას ან ღვთის საქმეში ცვლილებებს, და მითუმეტეს, სხვა ასპექტებს. ეს სრულიად აშკარა ფაქტია. საქმის სამი ეტაპი კაცობრიობის ხსნაში ღვთის მთლიან საქმეს წარმოადგენს. ადამიანმა უნდა იცოდეს ღვთის საქმე და ღვთის ხასიათი ხსნის საქმეში; ამ ფაქტის გარეშე, ღვთის შესახებ შენი ცოდნა მხოლოდ უსაფუძვლო სიტყვებისგან შედგება და სხვა არაფერია, თუ არა ფუჭი „მხარ-თეძოზე წამოწოლილის“ მსჯელობა. ასეთ ცოდნას არც ადამიანის დარწმუნება შეუძლია და არც მისი დაპყრობა; იგი რეალობას ეწინააღმდეგება და არ არის ჭეშმარიტება. ის შეიძლება ძალიან მდიდარი და ყურისთვის სასიამოვნო იყოს, მაგრამ თუ იგი ღვთის თანდაყოლილ ხასიათს ეწინააღმდეგება, მაშინ ღმერთი არ დაგინდობს შენ. იგი არა მხოლოდ არ მოიწონებს შენს ცოდნას, არამედ სამაგიეროს მოგიზღავს შენ გმობის ცოდვისთვის. ღვთის შემეცნების სიტყვები დაუფიქრებლად არ წარმოითქმის. თუმცა შენ შეიძლება მჭევრმეტყველი და ენატკბილი იყო, და თუმცა შენი სიტყვები იმდენად ჭკვიანური იყოს, რომ შავი თეთრად გაასაღო და თეთრი — შავად, შენ მაინც სრულიად გამოუცდელი ხარ, როდესაც საქმე ღვთის შემეცნებაზე საუბარს ეხება. ღმერთი არ არის ის, ვინც შეგიძლია დაუფიქრებლად განსაჯო, შეაქო ან დააკნინო. შენ შეგიძლია შეაქო ნებისმიერი და ყველა, მაგრამ მაინც გიჭირს შესაფერისი სიტყვების პოვნა ღვთის უზენაესი მადლის აღსაწერად — ეს არის ის, რასაც ყველა ხელმოცარული აცნობიერებს. მიუხედავად იმისა, რომ ენის მრავალი ოსტატი არსებობს, რომლებიც ღმერთს აღწერენ, მათი აღწერის სიზუსტე ღვთის მიერ რჩეული ადამიანების მიერ წარმოთქმული ჭეშმარიტების მხოლოდ მეასედია — იმ ადამიანებისა, რომლებსაც, თუმცა მხოლოდ შეზღუდული ლექსიკა გააჩნიათ, აქვთ მდიდარი გამოცდილება, რომელსაც ეყრდნობიან. აქედან ჩანს, რომ ღვთის შემეცნება სიზუსტესა და პრაქტიკულობაში მდგომარეობს და არა სიტყვების ჭკვიანურ გამოყენებასა თუ მდიდარ ლექსიკაში, და რომ ადამიანის განსწავლულობა და ღვთის შემეცნება ერთმანეთთან სრულიად დაუკავშირებელია. ღვთის შემეცნების გაკვეთილი კაცობრიობის ნებისმიერ საბუნებისმეტყველო მეცნიერებაზე მაღლა დგას. ეს არის გაკვეთილი, რომლის წარმატებით ათვისებაც მხოლოდ იმ ადამიანთა უკიდურესად მცირე ნაწილს შეუძლია, ვინც ღვთის შემეცნებას ესწრაფვის, და არა ნებისმიერ ნიჭიერ ადამიანს. ამიტომ, თქვენ არ უნდა უყურებდეთ ღვთის შემეცნებასა და ჭეშმარიტებისკენ სწრაფვას ისე, თითქოს ეს ისეთი რამ იყოს, რისი მიღწევაც ჩვეულებრივ ბავშვსაც კი შეუძლია. შესაძლოა შენ სრულიად წარმატებული ხარ შენს ოჯახურ ცხოვრებაში, ან შენს კარიერაში, ან შენს ქორწინებაში, მაგრამ როდესაც საქმე ჭეშმარიტებასა და ღვთის შემეცნების გაკვეთილს ეხება, შენ არაფერი გაქვს საჩვენებელი და არაფრისთვის მიგიღწევია. შეიძლება ითქვას, რომ ჭეშმარიტების პრაქტიკაში განხორციელება თქვენთვის დიდ სირთულეს წარმოადგენს, ხოლო ღვთის შემეცნება კიდევ უფრო დიდი პრობლემაა. ეს არის თქვენი სირთულე და ეს არის ის სირთულეც, რომლის წინაშეც მთელი კაცობრიობა დგას. მათ შორის, ვისაც გარკვეული მიღწევები აქვს ღვთის შემეცნების საქმეში, თითქმის არავინაა სტანდარტის შესაბამისი. ადამიანმა არ იცის, რას ნიშნავს ღვთის შემეცნება, რატომ არის აუცილებელი ღვთის შემეცნება, ან რა დონეს უნდა მიაღწიოს მან, სანამ ღმერთს შეიცნობს. სწორედ ეს აბნევს კაცობრიობას ასე ძალიან და ეს, მარტივად რომ ვთქვათ, ყველაზე დიდი გამოცანაა, რომლის წინაშეც კაცობრიობა დგას — არავის შესწევს უნარი უპასუხოს ამ კითხვას და არც არავის სურს ამ კითხვაზე პასუხის გაცემა, რადგან დღემდე კაცობრიობაში არავის ჰქონია რაიმე წარმატება ამ საქმის შესწავლაში. შესაძლოა, როდესაც საქმის სამი ეტაპის გამოცანა კაცობრიობისთვის ცნობილი გახდება, თანმიმდევრულად გამოჩნდება ღვთის მცოდნე ნიჭიერი ადამიანების ჯგუფი. რა თქმა უნდა, ვიმედოვნებ, რომ ეს ასე იქნება და, უფრო მეტიც, მე ამ საქმის განხორციელების პროცესში ვარ. ვიმედოვნებ, რომ უახლოეს მომავალში ვიხილავ მეტი ასეთი ნიჭიერი ადამიანის გამოჩენას და ვიმედოვნებ, რომ ისინი გახდებიან საქმის ამ სამი ეტაპის ფაქტის მოწმენი — რაც, რა თქმა უნდა, იმას ნიშნავს, რომ ისინი გახდებიან პირველნი, ვინც დაამოწმებენ საქმის ამ სამ ეტაპს. მაგრამ არაფერი იქნება იმაზე უფრო სამწუხარო და დასანანი, თუკი ასეთი ნიჭიერი ადამიანები არ გამოჩნდებიან იმ დღეს, როდესაც ღვთის საქმე დასრულდება, ან თუ იქნება მხოლოდ ერთი ან ორი ასეთი ადამიანი, და ისინი იქნებიან ისეთები, ვინც პირადად მიიღო განკაცებული ღვთის მიერ სრულყოფა. თუმცა, ეს მხოლოდ ყველაზე ცუდი სცენარია. როგორც არ უნდა იყოს, მე მაინც ვიმედოვნებ, რომ ისინი, ვინც ჭეშმარიტად ეძიებენ, შეძლებენ ამ კურთხევის მიღებას. დასაბამიდან მოყოლებული, არასოდეს ყოფილა ასეთი საქმე; მსგავსი წამოწყება არასოდეს მომხდარა ადამიანის განვითარების ისტორიაში. თუ შენ ნამდვილად შეძლებ გახდე ერთ-ერთი პირველი მათ შორის, ვინც იცნობს ღმერთს, განა ეს არ იქნება უმაღლესი პატივი ყველა ქმნილებას შორის? იქნებოდა კი კაცობრიობაში რომელიმე ქმნილება ღვთის მიერ უფრო მეტად მოწონებული? ასეთი საქმის მიღწევა ადვილი არ არის, მაგრამ საბოლოოდ მაინც გამოიღებს შედეგს. განურჩევლად მათი სქესისა თუ ეროვნებისა, ყველა, ვისაც შესწევს უნარი მიაღწიოს ღვთის შემეცნებას, საბოლოოდ დაეუფლება ღვთის უდიდეს პატივს და იქნებიან ერთადერთნი, ვინც ფლობენ ღვთის ხელმწიფებას. ეს არის დღევანდელი საქმე და ეს ასევე არის მომავლის საქმე; ეს არის უკანასკნელი და უმაღლესი საქმე, რომელიც შესრულდა 6000-წლიან საქმეში, და ეს არის მუშაობის გზა, რომელიც ავლენს ადამიანთა თითოეულ კატეგორიას. იმ საქმის მეშვეობით, რომელიც ადამიანს ღმერთს შეაცნობინებს, ვლინდება ყველა ტიპის ადამიანის კატეგორიები: ისინი, ვინც იცნობენ ღმერთს, შესაფერისნი არიან მიიღონ ღვთის კურთხევები და დაიმკვიდრონ მისი აღთქმები, ხოლო ისინი, ვინც არ იცნობენ ღმერთს, შეუფერებელნი არიან მიიღონ ღვთის კურთხევები და დაიმკვიდრონ მისი აღთქმები. ისინი, ვინც იცნობენ ღმერთს, ღვთის მესაიდუმლენი არიან, ხოლო ისინი, ვინც არ იცნობენ ღმერთს, არ შეიძლება იწოდებოდნენ ღვთის მესაიდუმლეებად; ღვთის მესაიდუმლეებს შეუძლიათ მიიღონ ღვთის ნებისმიერი კურთხევა, მაგრამ ისინი, ვინც არ არიან მისი მესაიდუმლენი, არ არიან კომპეტენტურნი არანაირი საქმისთვის. იქნება ეს გასაჭირი, გამოწრთობა თუ სამსჯავრო, ყოველივე ეს იმისთვისაა, რომ ადამიანმა საბოლოოდ შეიცნოს ღმერთი და დაემორჩილოს მას. ეს არის ერთადერთი შედეგი, რომელიც საბოლოოდ მიიღწევა. საქმის სამი ეტაპის სრულად გაცხადება სასარგებლოა ადამიანის მიერ ღვთის შემეცნებისთვის და ეხმარება ადამიანს, მოიპოვოს ღვთის უფრო სრული და საფუძვლიანი შემეცნება. მთელი ეს საქმე ადამიანისთვის სასარგებლოა.

თავად ღვთის საქმე არის ის ხილვა, რომელიც ადამიანმა უნდა იცოდეს, რადგან ღვთის საქმეს ადამიანი ვერ შეასრულებს და არც ადამიანი ფლობს მას. საქმის სამი ეტაპი ღვთის მთლიან მართვას წარმოადგენს და არ არსებობს იმაზე დიდი ხილვა, რომელიც ადამიანმა უნდა იცოდეს. თუ ადამიანმა არ იცის ეს უდიდესი ხილვა, მაშინ ადვილი არ არის ღვთის შემეცნება, ადვილი არ არის ღვთის განზრახვების გაგება და, უფრო მეტიც, გზა, რომელზეც ადამიანი დადის, სულ უფრო და უფრო რთული გახდება. ხილვების გარეშე ადამიანი აქამდე მოსვლას ვერ შეძლებდა. სწორედ ხილვები ასაზრდოებდა ადამიანს დღემდე და ისინი იქცა ადამიანის უდიდეს მფარველობად. მომავალში თქვენი ცოდნა უნდა გაღრმავდეს. თქვენ უნდა შეიცნოთ მისი განზრახვების სისრულე და მისი ბრძნული საქმის არსი საქმის სამი ეტაპის ფარგლებში. მხოლოდ ეს არის თქვენი ჭეშმარიტი სულიერი ზრდა. საქმის დასკვნითი ეტაპი განცალკევებული არ არის, არამედ იგი წინა ორ ეტაპთან ერთად შექმნილი მთლიანობის ნაწილია, რაც იმას ნიშნავს, რომ შეუძლებელია ხსნის მთლიანი საქმის დასრულება საქმის სამი ეტაპიდან მხოლოდ ერთის შესრულებით. მიუხედავად იმისა, რომ საქმის დასკვნით ეტაპს ადამიანის სრულად გადარჩენა შეუძლია, ეს არ ნიშნავს იმას, რომ მხოლოდ ამ ერთი ეტაპის დამოუკიდებლად განხორციელებაა აუცილებელი და რომ საქმის წინა ორი ეტაპი არ არის საჭირო სატანის გავლენისგან ადამიანის გადასარჩენად. სამი ეტაპიდან არცერთი თავისთავად არ შეიძლება ჩაითვალოს ერთადერთ ხილვად, რომელიც მთელმა კაცობრიობამ უნდა იცოდეს, რადგან ხსნის მთლიანი საქმე საქმის სამი ეტაპია და არა რომელიმე ერთი ეტაპი მათ შორის. სანამ ხსნის საქმე არ შესრულდება, ღვთის მართვა საბოლოოდ ვერ დასრულდება. ღვთის არსება, მისი ხასიათი და მისი სიბრძნე ხსნის მთლიან საქმეში გამოიხატება; ისინი თავიდანვე კი არ ეუწყა ადამიანს, არამედ თანდათანობით გამოიხატა ხსნის საქმეში. ხსნის საქმის თითოეული ეტაპი ღვთის ხასიათის ნაწილს და მისი არსების ნაწილს გამოხატავს; საქმის არცერთ ეტაპს არ შეუძლია უშუალოდ და სრულად გამოხატოს ღვთის მთლიანი არსება. ამრიგად, რადგან ხსნის საქმე სრულად მხოლოდ საქმის სამი ეტაპის დასრულების შემდეგ შეიძლება დაგვირგვინდეს, ადამიანის მიერ ღვთის მთლიანობის შემეცნება განუყოფელია ღვთის საქმის სამი ეტაპისგან. ის, რასაც ადამიანი საქმის ერთი ეტაპიდან იღებს, მხოლოდ ღვთის ის ხასიათია, რომელიც მისი საქმის ერთ ნაწილში გამოიხატება. მას არ შეუძლია წარმოადგინოს ის ხასიათი და არსება, რომელიც წინა ან მომდევნო ეტაპებზე გამოიხატება. ეს იმიტომ ხდება, რომ კაცობრიობის ხსნის საქმე მყისვე არ სრულდება ერთ პერიოდში ან ერთ ადგილას, არამედ თანდათანობით ღრმავდება სხვადასხვა დროსა და ადგილას ადამიანის განვითარების მდგომარეობის შესაბამისად. ეს არის საქმე, რომელიც ეტაპობრივად ხორციელდება და იგი ერთ ეტაპზე არ სრულდება. ამიტომ, ღვთის მთელი სიბრძნე სამ ეტაპშია კრისტალიზებული და არა ერთ ცალკეულ ეტაპზე. მისი მთელი არსება და მისი მთელი სიბრძნე ამ სამ ეტაპზეა განაწილებული — თითოეული ეტაპი შეიცავს მის არსებას და თითოეული ეტაპი მისი საქმის სიბრძნის ჩანაწერია. ადამიანმა უნდა იცოდეს ღვთის მთელი ხასიათი, რომელიც ამ სამ ეტაპშია გამოხატული. ღვთის ეს არსება უდიდესი მნიშვნელობისაა მთელი კაცობრიობისთვის, და თუ ადამიანებს არ აქვთ ეს ცოდნა, როდესაც ისინი ღმერთს ეთაყვანებიან, მაშინ ისინი არაფრით განსხვავდებიან მათგან, ვინც ბუდას ეთაყვანება. ღვთის საქმე ადამიანთა შორის არ არის დაფარული ადამიანისგან და იგი უნდა იცოდეს ყველამ, ვინც ღმერთს ეთაყვანება. რადგან ღმერთმა ადამიანთა შორის ხსნის საქმის სამი ეტაპი განახორციელა, ადამიანმა უნდა იცოდეს იმის გამოხატულება, რაც ღმერთს აქვს და რაც იგი არის საქმის ამ სამი ეტაპის განმავლობაში. ეს არის ის, რაც ადამიანმა უნდა გააკეთოს. რასაც ღმერთი ადამიანისგან მალავს, არის ის, რისი მიღწევაც ადამიანს არ შეუძლია და რაც ადამიანმა არ უნდა იცოდეს, ხოლო რასაც ღმერთი ადამიანს უჩვენებს, არის ის, რაც ადამიანმა უნდა იცოდეს და რაც ადამიანს უნდა ჰქონდეს. საქმის სამი ეტაპიდან თითოეული წინა ეტაპის საძირკველზე ხორციელდება; იგი არ ხორციელდება დამოუკიდებლად, ხსნის საქმისგან განცალკევებით. თუმცა დიდი განსხვავებებია ეპოქასა და იმ საქმეში, რომელიც ხორციელდება, ამ საქმის არსი მაინც კაცობრიობის ხსნაა და ხსნის საქმის თითოეული ეტაპი წინაზე უფრო ღრმაა. საქმის თითოეული ეტაპი წინა ეტაპის საძირკვლიდან გრძელდება, ისე, რომ წინა არასოდეს მიტოვებულა. ამგვარად, თავის საქმეში, რომელიც ყოველთვის ახალია და არასოდეს ძველდება, ღმერთი მუდმივად გამოხატავს თავისი ხასიათის იმ ასპექტებს, რომლებიც მანამდე არასოდეს გამოხატულა ადამიანისთვის, და ყოველთვის აცნობს ადამიანს თავის ახალ საქმესა და თავის ახალ არსებას. მიუხედავად იმისა, რომ რელიგიური კონსერვატორები ძალ-ღონეს არ იშურებენ, რათა წინ აღუდგნენ ამას და აშკარად ეწინააღმდეგებიან მას, ღმერთი მაინც ასრულებს იმ ახალ საქმეს, რომელიც უნდა შეასრულოს. მისი საქმე ყოველთვის იცვლება და ამის გამო, იგი ყოველთვის აწყდება ადამიანის წინააღმდეგობას. ასევე მუდმივად იცვლება მისი ხასიათიც, ისევე როგორც ეპოქა და მისი საქმის მიმღებნი. უფრო მეტიც, იგი ყოველთვის ასრულებს ისეთ საქმეს, რომელიც მანამდე არასოდეს შესრულებულა, და ისეთ საქმესაც კი ახორციელებს, რომელიც ადამიანს წარსულში შესრულებულ საქმესთან წინააღმდეგობაში მყოფად და მის საპირისპიროდ ეჩვენება. ადამიანი მხოლოდ ერთი სახის საქმეს ან ერთი სახის პრაქტიკას იღებს, და ადამიანისთვის რთულია ისეთი საქმის ან პრაქტიკის მიღება, რომელიც მათ ეწინააღმდეგება ან მათზე მაღლა დგას. მაგრამ სულიწმიდა ყოველთვის ახალ საქმეს ასრულებს, და ამიტომ ჩნდება რელიგიურ ექსპერტთა ჯგუფები ერთმანეთის მიყოლებით, რომლებიც ეწინააღმდეგებიან ღვთის ახალ საქმეს. ეს ადამიანები „ექსპერტები“ სწორედ იმიტომ გახდნენ, რომ მათ არ აქვთ ცოდნა იმის შესახებ, თუ როგორ არის ღმერთი ყოველთვის ახალი და არასოდეს ბერდება, არ აქვთ ცოდნა ღვთის საქმის პრინციპების შესახებ და, უფრო მეტიც, არ აქვთ ცოდნა იმ მრავალი გზის შესახებ, რომლითაც ღმერთი გადაარჩენს ადამიანს. ამრიგად, ადამიანი სრულიად უუნაროა გაარჩიოს, არის თუ არა ეს სულიწმიდისგან მომდინარე საქმე და არის თუ არა ეს თავად ღვთის საქმე. მრავალი ადამიანი ებღაუჭება ისეთ დამოკიდებულებას, რომლის მიხედვითაც, თუ რამე შეესაბამება წარსულში ნათქვამ სიტყვებს, ისინი იღებენ მას, ხოლო თუ რამე განსხვავდება წარსულის საქმისგან, მაშინ ისინი ეწინააღმდეგებიან და უარყოფენ მას. დღეს, განა თქვენ ყველანი არ მისდევთ ასეთ პრინციპებს? ხსნის საქმის სამ ეტაპს თქვენზე დიდი გავლენა არ მოუხდენია და არიან ისეთებიც, რომლებსაც სჯერათ, რომ საქმის წინა ორი ეტაპი ტვირთია, რომლის ცოდნაც მათ უბრალოდ არ სჭირდებათ. ისინი ფიქრობენ, რომ ეს ეტაპები არ უნდა გამოეცხადოს მასებს და რაც შეიძლება მალე უნდა იქნას უკან წაღებული, რათა ხალხი არ დააბნიოს საქმის სამი ეტაპიდან წინა ორმა ეტაპმა. უმეტესობას სჯერა, რომ საქმის წინა ორი ეტაპის გაცხადება არასაჭიროა და არანაირად არ ეხმარება ღვთის შემეცნებას — სწორედ ასე ფიქრობთ თქვენ. დღეს თქვენ ყველას გჯერათ, რომ ამგვარად მოქმედება სწორია, მაგრამ დადგება დღე, როდესაც თქვენ გააცნობიერებთ ჩემი საქმის მნიშვნელობას. იცოდეთ, რომ მე არ ვასრულებ არანაირ საქმეს, რომელსაც მნიშვნელობა არ აქვს. რადგან მე გიცხადებთ საქმის სამ ეტაპს, ისინი აუცილებლად სასარგებლო უნდა იყოს თქვენთვის; რადგან საქმის ეს სამი ეტაპი ღვთის მთლიანი მართვის უმთავრესი ნაწილია, ისინი სამყაროში მყოფი ყველა ადამიანის ყურადღების ცენტრში უნდა მოექცეს. ერთ დღეს, თქვენ ყველანი გააცნობიერებთ ამ საქმის მნიშვნელობას. იცოდეთ, რომ თქვენ ეწინააღმდეგებით ღვთის საქმეს, ან იყენებთ საკუთარ წარმოდგენებს დღევანდელი საქმის შესაფასებლად, რადგან არ იცით ღვთის საქმის პრინციპები და რადგან დაუფიქრებლად ეპყრობით სულიწმიდის საქმეს. ღვთისადმი თქვენი წინააღმდეგობა და სულიწმიდის საქმისთვის ხელის შეშლა გამოწვეულია თქვენი წარმოდგენებითა და თანდაყოლილი ამპარტავნებით. ეს იმიტომ კი არ ხდება, რომ ღვთის საქმე მცდარია, არამედ იმიტომ, რომ თქვენ ბუნებით ზედმეტად ურჩნი ხართ. ღვთის რწმენის პოვნის შემდეგ, ზოგიერთ ადამიანს იმის თქმაც კი არ შეუძლია დანამდვილებით, თუ საიდან წარმოიშვა ადამიანი, თუმცა ბედავს საჯარო გამოსვლებს და სულიწმიდის საქმის სისწორისა თუ სიმცდარის განსჯას. იგი ჭკუასაც კი არიგებს მოციქულებს, რომლებსაც სულიწმიდის ახალი საქმე აქვთ, აკეთებს კომენტარებს და გამოთქვამს თავხედურ შენიშვნებს; მისი ადამიანობა მეტისმეტად მდაბალია და მასში მცირედი გონიერებაც კი არ არის. განა არ დადგება დღე, როდესაც ასეთ ადამიანებს სულიწმიდის საქმე ზიზღით უარყოფს და ჯოჯოხეთის ცეცხლში დაიწვებიან? მათ არ იციან ღვთის საქმე, მაგრამ ამის ნაცვლად განსჯიან მის საქმეს და ასევე ცდილობენ, მიუთითონ ღმერთს, თუ როგორ უნდა იმუშაოს. როგორ შეუძლიათ ასეთ ადამიანებს, რომლებიც მოკლებულნი არიან გონიერებას, შეიცნონ ღმერთი? ადამიანი ღმერთს ძიებისა და განცდის პროცესში შეიცნობს; ღვთის შემეცნება არ მიიღწევა სულიწმიდის მიერ ნათლის მოფენით მაშინ, როდესაც ადამიანი თვითნებურ განსჯას ეწევა. რაც უფრო ზუსტი ხდება ადამიანების მიერ ღვთის შემეცნება, მით უფრო ნაკლებად ეწინააღმდეგებიან ისინი მას. ამის საპირისპიროდ, რაც უფრო ნაკლებად იცნობენ ადამიანები ღმერთს, მით უფრო მეტია ალბათობა, რომ ისინი წინ აღუდგნენ მას. შენი წარმოდგენები, შენი ძველი ბუნება და შენი ადამიანობა, ზნეობა და მორალური შეხედულება არის ის საშუალება, რომლითაც შენ ეწინააღმდეგები ღმერთს, და რაც უფრო გახრწნილია შენი მორალი, რაც უფრო საზიზღარია შენი ზნეობა და რაც უფრო მდაბალია შენი ადამიანობა, მით უფრო მეტად ხარ შენ ღვთის მტერი. ისინი, ვინც ძლიერი წარმოდგენებით არიან შეპყრობილნი და თვითმართალი ხასიათი აქვთ, კიდევ უფრო მეტად მტრობენ განკაცებულ ღმერთს; ასეთი ადამიანები ანტიქრისტეები არიან. თუ შენი წარმოდგენები არ გამოსწორდება, მაშინ ისინი ყოველთვის ღვთის წინააღმდეგი იქნებიან; შენ არასოდეს იქნები ღვთის შესატყვისი და ყოველთვის მისგან განცალკევებული იქნები.

მხოლოდ შენი ძველი წარმოდგენების გვერდზე გადადებით შეგიძლია ახალი ცოდნის მიღება, თუმცა ძველი ცოდნა აუცილებლად არ უტოლდება ძველ წარმოდგენებს. „წარმოდგენები“ გულისხმობს ადამიანის მიერ წარმოსახულ იმ საგნებს, რომლებიც რეალობას ეწინააღმდეგება. თუ ძველი ცოდნა, ეპოქების გასვლასთან ერთად, მოძველდა, იგი უნდა იქნას უარყოფილი. ძველი ცოდნა ადამიანთა წარმოდგენების ნაწილია და იგი ხელს უშლის მათ ახალ საქმეში შესვლაში. თუ ადამიანს შეუძლია ამ ძველ ცოდნას სწორად მოეპყროს და ძველისა და ახლის გაერთიანება ძალუძს, მაშინ ძველი ცოდნა სინამდვილეში მისთვის დამხმარე ხდება და იქცევა იმ საფუძვლად, რომლითაც ის ახალ ეპოქაში შედის. ღვთის შემეცნების გაკვეთილი შენგან მრავალი პრინციპის ათვისებას მოითხოვს: როგორ შეხვიდე ღვთის შემეცნების გზაზე, რომელი ჭეშმარიტებები უნდა გაიგო ღვთის შესაცნობად და როგორ მოიშორო შენი წარმოდგენები და ძველი ხასიათი, რათა შეძლო ღვთის ახალი საქმის ყველა განკარგულებისადმი დამორჩილება. თუ შენ ამ პრინციპებს ღვთის შემეცნების გაკვეთილში შესასვლელ საძირკვლად გამოიყენებ, მაშინ შენი ცოდნა სულ უფრო და უფრო გაღრმავდება. თუ შენ გაქვს საქმის სამი ეტაპის — ანუ, ღვთის მართვის მთლიანი გეგმის — ნათელი ცოდნა, და თუ შეგიძლია ღვთის საქმის წინა ორი ეტაპი სრულად დაუკავშირო ამჟამინდელ ეტაპს და დაინახო, რომ ეს არის ერთი ღვთის მიერ შესრულებული საქმე, მაშინ შენ გექნება ყველაზე ღრმა საძირკველი. საქმის სამი ეტაპი ერთი ღვთის მიერ არის შესრულებული; ეს არის უდიდესი ხილვა და ეს არის ღვთის შემეცნებისკენ მიმავალი ერთადერთი გზა. საქმის სამი ეტაპის შესრულება მხოლოდ თავად ღმერთს შეუძლია. არცერთ ადამიანს არ შეუძლია ასეთი საქმის შესრულება მის მაგივრად. ეს იმას ნიშნავს, რომ დასაბამიდან დღემდე მხოლოდ თავად ღმერთს შეეძლო თავისი საქმის შესრულება. მიუხედავად იმისა, რომ ღვთის საქმის სამი ეტაპი სხვადასხვა ეპოქასა და ადგილას განხორციელდა, და თუმცა თითოეული მათგანის საქმე განსხვავებულია, ყოველივე ეს ერთი ღვთის მიერ შესრულებული საქმეა. ყველა იმ ხილვას შორის, რომელიც ადამიანმა უნდა იცოდეს, ეს ყველაზე დიდია, და თუ ადამიანი შეძლებს მის სრულად გაგებას, მაშინ იგი მტკიცედ დგომას შეძლებს. დღეს, ყველაზე დიდი პრობლემა, რომლის წინაშეც სხვადასხვა რელიგია და აღმსარებლობა დგას, არის ის, რომ მათ არ იციან სულიწმიდის საქმე და არ შეუძლიათ განასხვავონ სულიწმიდის საქმე იმ საქმისგან, რომელიც სულიწმიდისგან არ არის — ამის გამო, მათ არ შეუძლიათ თქვან, არის თუ არა საქმის ეს ეტაპი, საქმის წინა ორი ეტაპის მსგავსად, ასევე იეჰოვა ღვთის მიერ შესრულებული. მიუხედავად იმისა, რომ ადამიანები მიჰყვებიან ღმერთს, უმეტესობას მაინც არ შეუძლია თქვას, არის თუ არა ეს ჭეშმარიტი გზა. ადამიანი წუხს იმაზე, არის თუ არა ეს გზა პირადად თავად ღვთის მიერ წარმართული გზა, და არის თუ არა ღვთის განკაცება ფაქტი, და ადამიანთა უმეტესობას ჯერ კიდევ წარმოდგენა არ აქვს, როგორ გაარჩიოს ასეთი რამეები. ისინი, ვინც ღმერთს მიჰყვებიან, დარწმუნებულნი არ არიან ამ გზაში, და ამიტომ წარმოთქმულ ქადაგებებს მხოლოდ ნაწილობრივი გავლენა აქვს ამ ადამიანებზე და არ შეუძლია იყოს სრულად ეფექტური, რაც შემდგომში გავლენას ახდენს ასეთი ადამიანების სიცოცხლეში შესვლაზე. თუ ადამიანი საქმის სამ ეტაპში დაინახავს, რომ ისინი თავად ღვთის მიერ ხორციელდება სხვადასხვა დროს, სხვადასხვა ადგილას და სხვადასხვა ადამიანზე; თუ ადამიანი დაინახავს, რომ მიუხედავად იმისა, რომ საქმე განსხვავებულია, იგი მთლიანად ერთი ღვთის მიერ სრულდება, და რადგან ეს ერთი ღვთის მიერ შესრულებული საქმეა, მაშინ იგი აუცილებლად სწორი და უშეცდომო უნდა იყოს, და რომ თუმცა იგი ეწინააღმდეგება ადამიანის წარმოდგენებს, უარყოფა იმისა, რომ ეს ერთი ღვთის საქმეა, შეუძლებელია — თუ ადამიანს შეუძლია დანამდვილებით თქვას, რომ ეს ერთი ღვთის საქმეა, მაშინ ადამიანის წარმოდგენები უბრალო წვრილმანებად იქცევა, რომლებიც ხსენებადაც არ ღირს. ადამიანისთვის ბუნდოვანია ხილვები, მან მხოლოდ იეჰოვა იცის ღმერთად და იესო — უფლად, და ორჭოფობს დღევანდელ განკაცებულ ღმერთთან დაკავშირებით. შესაბამისად, მრავალი ადამიანი კვლავ მიჯაჭვულია იეჰოვასა და იესოს საქმეზე და შეპყრობილია წარმოდგენებით დღევანდელი საქმის შესახებ, და ადამიანთა უმეტესობა ყოველთვის გაურკვევლობას გრძნობს და სერიოზულად არ ეკიდება დღევანდელ საქმეს. ადამიანს არ აქვს წარმოდგენები საქმის წინა ორი ეტაპის მიმართ, რომლებიც უხილავი იყო. ეს იმიტომ ხდება, რომ ადამიანს არ ესმის საქმის წინა ორი ეტაპის რეალობა და პირადად არ ყოფილა მათი მოწმე. სწორედ იმიტომ, რომ საქმის ამ ეტაპების დანახვა შეუძლებელია, ადამიანი ისე წარმოიდგენს მათ, როგორც თავად სურს; რაც არ უნდა მოიფიქროს მან, არ არსებობს ფაქტები ასეთი ფანტაზიების დასამტკიცებლად და არც არავინ მათ გამოსასწორებლად. ადამიანი გასაქანს აძლევს თავის ბუნებას, ივიწყებს სიფრთხილეს და თავისუფლებას ანიჭებს საკუთარ ფანტაზიას. არ არსებობს ფაქტები მისი ფანტაზიების დასადასტურებლად, და ამიტომ ადამიანის ფანტაზიები „ფაქტად“ იქცევა, მიუხედავად იმისა, აქვს თუ არა მათ საფუძველი. ამგვარად, ადამიანს სწამს თავის გონებაში წარმოსახული საკუთარი ღმერთის და არ ეძიებს რეალობის ღმერთს. თუ ერთ ადამიანს ერთი სახის რწმენა აქვს, მაშინ ას ადამიანში ასი სახის რწმენა იარსებებს. ადამიანი ასეთი რწმენით არის შეპყრობილი, რადგან მას არ უნახავს ღვთის პრაქტიკული საქმე, რადგან მან მხოლოდ ყურებით მოისმინა იგი და საკუთარი თვალით არ უხილავს. ადამიანს სმენია ლეგენდები და ისტორიები — მაგრამ იშვიათად თუ სმენია ცოდნა ღვთის საქმის ფაქტების შესახებ. სწორედ ამიტომ ხდება, რომ ადამიანები, რომლებიც მხოლოდ ერთი წელია მორწმუნენი არიან, ღმერთს საკუთარი წარმოდგენების მეშვეობით ირწმუნებენ, და იგივე ეხებათ მათაც, ვისაც მთელი ცხოვრება სწამდა ღმერთის. ისინი, ვინც ფაქტებს ვერ ხედავენ, ვერასოდეს შეძლებენ თავის დაღწევას ისეთი რწმენისგან, რომელშიც მათ ღვთის შესახებ წარმოდგენები აქვთ. ადამიანს სჯერა, რომ მან გაითავისუფლა თავი თავისი ძველი წარმოდგენების ბორკილებისგან და ახალ ტერიტორიაზე შეაბიჯა. განა ადამიანმა არ იცის, რომ მათი ცოდნა, ვისაც არ შეუძლია ღვთის ჭეშმარიტი სახის დანახვა, სხვა არაფერია, თუ არა წარმოდგენები და ჭორები? ადამიანი ფიქრობს, რომ მისი წარმოდგენები სწორი და უშეცდომოა, და ფიქრობს, რომ ეს წარმოდგენები ღვთისგან მოდის. დღეს, როდესაც ადამიანი ღვთის საქმის მოწმე ხდება, იგი თავისუფლებას აძლევს იმ წარმოდგენებს, რომლებიც მრავალი წლის განმავლობაში დაგროვდა. წარსულის ფანტაზიები და იდეები საქმის ამ ეტაპისთვის დამაბრკოლებლად იქცა, და ადამიანისთვის რთული გახდა ასეთი წარმოდგენების დათმობა და ასეთი იდეების უარყოფა. იმ მრავალი ადამიანის წარმოდგენები, რომლებიც დღემდე მიჰყვებოდნენ ღმერთს, ამ საქმის თითოეული ეტაპის მიმართ სულ უფრო და უფრო მძიმე გახდა, და ამ ადამიანებს თანდათანობით ჩამოუყალიბდათ დაუძლეველი სიძულვილი განკაცებული ღვთის მიმართ. ამ სიძულვილის წყარო ადამიანის წარმოდგენები და ფანტაზიებია. ფაქტები არ აძლევს ადამიანს უფლებას, გასაქანი მისცეს თავის ფანტაზიას, და მითუმეტეს, არ ნებდება არანაირ დაუფიქრებელ უარყოფას, და ადამიანის წარმოდგენებსა და ფანტაზიებს არ შეუძლია ფაქტების არსებობის ატანა; უფრო მეტიც, ადამიანი არ უფიქრდება ფაქტების სისწორესა და უტყუარობას, და უბრალოდ განაგრძობს თავისი წარმოდგენებისთვის თავისუფლების მიცემას და საკუთარი ფანტაზიების განვითარებას. სწორედ ამის გამო ადამიანის წარმოდგენები და ფანტაზიები დღევანდელი საქმის მტრად იქცა — საქმისა, რომელიც ადამიანის წარმოდგენებს ეწინააღმდეგება. შეიძლება ითქვას, რომ ეს მხოლოდ ადამიანის წარმოდგენების ბრალია, და არ შეიძლება ითქვას, რომ ეს ღვთის საქმის ბრალია. ადამიანს შეუძლია წარმოიდგინოს ის, რაც სურს, მაგრამ არა იმისთვის, რომ თავისუფლად უარყოს ღვთის საქმის რომელიმე ეტაპი ან მისი რაიმე ნაწილი; ღვთის საქმის ფაქტი ადამიანისთვის ხელშეუხებელია. შენ შეგიძლია თავისუფლება მისცე შენს ფანტაზიას და იეჰოვასა და იესოს საქმის შესახებ მშვენიერი ისტორიებიც კი შეთხზა, მაგრამ არა იმისთვის, რომ უარყო იეჰოვასა და იესოს საქმის თითოეული ეტაპის ფაქტი; ეს არის პრინციპი და ეს ასევე არის ადმინისტრაციული განკარგულება, და თქვენ უნდა გესმოდეთ ამ საკითხების მნიშვნელობა. ადამიანს სჯერა, რომ საქმის ეს ეტაპი შეუთავსებელია ადამიანის წარმოდგენებთან, და რომ ეს ასე არ არის საქმის წინა ორი ეტაპის შემთხვევაში. თავის ფანტაზიაში ადამიანს სჯერა, რომ წინა ორი ეტაპის საქმე ნამდვილად არ არის იგივე, რაც დღევანდელი საქმე — მაგრამ თუ დაფიქრებულხარ ოდესმე იმაზე, რომ ღვთის საქმის პრინციპები სრულიად ერთნაირია, რომ მისი საქმე ყოველთვის პრაქტიკულია, და რომ, ეპოქის მიუხედავად, ყოველთვის იარსებებს იმ ადამიანთა სიმრავლე, რომლებიც ეწინააღმდეგებიან და წინ აღუდგებიან მისი საქმის ფაქტს? ყველა, ვინც დღეს ეწინააღმდეგება და წინ აღუდგება საქმის ამ ეტაპს, უდავოდ შეეწინააღმდეგებოდა ღმერთს წარსულშიც, რადგან ასეთი ადამიანები ყოველთვის ღვთის მტრები იქნებიან. ის ადამიანები, ვინც იციან ღვთის საქმის ფაქტი, საქმის სამ ეტაპს ერთი ღვთის საქმედ დაინახავენ და უარს იტყვიან თავიანთ წარმოდგენებზე. ესენი არიან ადამიანები, რომლებიც იცნობენ ღმერთს, და ასეთი ადამიანები არიან ისინი, ვინც ჭეშმარიტად მიჰყვებიან ღმერთს. როდესაც ღვთის მთლიანი მართვა დასასრულს მიუახლოვდება, ღმერთი ყოველივეს დაახარისხებს მათი გვარისამებრ. ადამიანი შემოქმედის ხელებით შეიქმნა, და საბოლოოდ მან ადამიანი სრულად უნდა დააბრუნოს თავისი ხელმწიფების ქვეშ; ეს არის საქმის სამი ეტაპის დასკვნა. უკანასკნელი დღეების საქმის ეტაპი და წინა ორი ეტაპი ისრაელსა და იუდეაში, არის ღვთის მართვის გეგმა მთელ სამყაროში. არავის შეუძლია ამის უარყოფა, და ეს არის ღვთის საქმის ფაქტი. მიუხედავად იმისა, რომ ადამიანებს არ განუცდიათ ან არ უნახავთ ამ საქმის დიდი ნაწილი, ფაქტები მაინც ფაქტებად რჩება და ეს უდავოა ნებისმიერი ადამიანისთვის. ადამიანები, რომლებსაც სწამთ ღმერთის სამყაროს ნებისმიერ ადგილას, ყველა მიიღებს საქმის სამ ეტაპს. თუ შენ მხოლოდ საქმის ერთი კონკრეტული ეტაპი იცი და არ გესმის საქმის დანარჩენი ორი ეტაპი, არ გესმის ღვთის საქმე წარსულში, მაშინ შენ არ შეგიძლია ისაუბრო ღვთის მართვის მთლიანი გეგმის სრულ სიმართლეზე, და შენი ცოდნა ღვთის შესახებ ცალმხრივია, რადგან ღვთისადმი შენს რწმენაში შენ არ იცნობ და არ გესმის მისი, ამიტომ შენ არ ხარ კვალიფიცირებული, იყო ღვთის მოწმე. განურჩევლად იმისა, ამ საკითხების შესახებ შენი ამჟამინდელი ცოდნა ღრმაა თუ ზედაპირული, საბოლოოდ, თქვენ ყველას უნდა გქონდეთ ცოდნა და სრულად უნდა იყოთ დარწმუნებულნი, და ყველა ადამიანი იხილავს ღვთის საქმის მთლიანობას და დაექვემდებარება ღვთის ხელმწიფებას. ამ საქმის დასრულების შემდეგ ყველა რელიგია ერთ მთლიანობად იქცევა: ყოველი ქმნილება კვლავ შემოქმედის საუფლოს დაუბრუნდება, ყველა ერთადერთ ჭეშმარიტ ღმერთს ეთაყვანება, ხოლო ყველა ბოროტი რელიგია საბოლოოდ გაქრება და აღარასოდეს იარსებებს.

რატომ არის ყოველთვის ხაზგასმული ამ სამუშაოს სამი ეტაპი? საზოგადოების განვითარებამ, საუკუნეების განმავლობაში მომხდარმა ცვლილებებმა და ბუნების მრავალფეროვნებამ გამოიწვია შესაბამისი ცვლილებები ამ სამ ეტაპზე. კაცობრიობას არ შეუძლია დამოუკიდებლად გაიზარდოს; ის უნდა შეიცვალოს ღვთის სამუშაოს წინსვლისას. ღვთის სამუშაოს სამი ეტაპი ნახსენებია იმისათვის, რომ ყველა ქმნილება და ყველა რელიგიისა და კონფესიის ადამიანი ერთი და იმავე ღმერთის კონტროლის ქვეშ მოექცეს. საბოლოოდ ყველა დაემორჩილება ღვთის მმართველობას, შენი რელიგიური კუთვნილების მიუხედავად. არცერთ რელიგიურ ლიდერს არ შეუძლია ამ ამოცანის შესრულება; მხოლოდ ღმერთს შეუძლია. მსოფლიოში რამდენიმე ძირითადი რელიგია არსებობს და თითოეულ მათგანს თავისი მეთაური ან წინამძღოლი ჰყავს, ხოლო მიმდევრები მთელ მსოფლიოში, სხვადასხვა ქვეყანასა და რეგიონში არიან მიმოფანტულნი; თითქმის ყველა ქვეყანაში, იქნება ეს დიდი თუ პატარა, სხვადასხვა რელიგია არსებობს. თუმცა, განურჩევლად იმისა, თუ რამდენი რელიგია არსებობს მსოფლიოში, სამყაროში მყოფი ყველა ადამიანი საბოლოოდ ერთი ღვთის წინამძღოლობის ქვეშ არსებობს და არა რელიგიების მეთაურების ან წინამძღოლების გაძღოლის ქვეშ. ეს იმას ნიშნავს, რომ კაცობრიობას არ წარმართავს კონკრეტული რელიგიური მეთაური ან წინამძღოლი; არამედ, მთელ კაცობრიობას მიუძღვის შემოქმედი, რომელმაც შექმნა ცა, მიწა და ყოველივე, და რომელმაც ასევე შექმნა კაცობრიობა — ეს ფაქტია. მიუხედავად იმისა, რომ მსოფლიოში რამდენიმე ძირითადი რელიგიაა, რაც არ უნდა დიდებულნი იყვნენ ისინი, ყველა მათგანი შემოქმედის ხელმწიფების ქვეშ არსებობს და არცერთ მათგანს არ შეუძლია ამ ხელმწიფების ფარგლებს გასცდეს. კაცობრიობის განვითარება, საზოგადოების მონაცვლეობა, საბუნებისმეტყველო მეცნიერებების წინსვლა — თითოეული მათგანი განუყოფელია შემოქმედის განგებულებისგან, და ეს საქმე არ არის ისეთი რამ, რისი შესრულებაც ნებისმიერ რელიგიურ მეთაურს შეუძლია. რელიგიური მეთაური მხოლოდ კონკრეტული რელიგიის წინამძღოლია და არ შეუძლია წარმოადგენდეს ღმერთს, და ვერც იმას წარმოადგენს, ვინც შექმნა ცა, მიწა და ყოველივე. რელიგიურ მეთაურს შეუძლია უწინამძღოლოს ყველას მთელი რელიგიის ფარგლებში, მაგრამ მას არ შეუძლია უბრძანოს ყველა ქმნილებას ცისქვეშეთში — ეს საყოველთაოდ აღიარებული ფაქტია. რელიგიური მეთაური მხოლოდ წინამძღოლია და არ შეუძლია ღმერთს (შემოქმედს) გაუთანაბრდეს. ყოველივე შემოქმედის ხელშია და საბოლოოდ ყველა მათგანი შემოქმედის ხელებს დაუბრუნდება. კაცობრიობა ღმერთმა შექმნა და ყოველი რელიგია ღვთის ხელმწიფების ქვეშ მოექცევა — ეს გარდაუვალია. მხოლოდ ღმერთია უზენაესი ყოველივეს შორის, და ყველა ქმნილებას შორის უმაღლესი მმართველიც კი მის ხელმწიფებას უნდა დაექვემდებაროს. რაც არ უნდა მაღალი იყოს ადამიანის სტატუსი, მას არ შეუძლია კაცობრიობის შესაფერის დანიშნულების ადგილას მიყვანა, და არავის შეუძლია ყოველივეს დახარისხება მათი გვარისამებრ. თავად იეჰოვამ შექმნა კაცობრიობა და თითოეული დაახარისხა მათი გვარისამებრ, და როდესაც აღსასრულის ჟამი დადგება, იგი კვლავ თავად შეასრულებს თავის საქმეს და ყოველივეს დაახარისხებს მათი გვარისამებრ — არცერთ ადამიანს არ შეუძლია დაიკავოს ღვთის ადგილი ამ საქმეში. საქმის სამი ეტაპი, რომელიც დასაბამიდან დღემდე განხორციელდა, მთლიანად თავად ღვთის მიერ არის შესრულებული, და ერთი ღვთის მიერ არის განხორციელებული. საქმის სამი ეტაპის ფაქტი არის მთელი კაცობრიობისადმი ღვთის წინამძღოლობის ფაქტი, ფაქტი, რომლის უარყოფაც არავის შეუძლია. საქმის სამი ეტაპის დასასრულს, ყოველივე დახარისხდება მათი გვარისამებრ და დაუბრუნდება ღვთის ხელმწიფებას, რადგან სამყაროზე მაღლა და მის ფარგლებში მხოლოდ ეს ერთი ღმერთი არსებობს და არ არსებობს სხვა რელიგიები. ვისაც არ შეუძლია სამყაროს შექმნა, მას არც მისი დასრულება შეეძლება, ხოლო ვინც შექმნა სამყარო, ის აუცილებლად შეძლებს მის დასრულებას. შესაბამისად, თუ ვინმეს არ შეუძლია ეპოქის დასრულება და მხოლოდ ის ძალუძს, რომ დაეხმაროს ადამიანს საკუთარი თავის სრულყოფასა და ხასიათის გაკეთილშობილებაში, მაშინ ის ნამდვილად არ იქნება ღმერთი, ის ნამდვილად არ იქნება კაცობრიობის უფალი და მას არ შეეძლება ასეთი დიადი საქმის შესრულება. მხოლოდ ერთს შეუძლია ასეთი საქმის განხორციელება, და ყველა, ვისაც არ შეუძლია ამ საქმის შესრულება, ნამდვილად სხვადასხვა ბოროტი სულია და არა ღმერთი, და ყველა ბოროტი სული ღვთის მტერია. თუკი რაიმე არის ადამიანების შეცდომაში შემყვანი ბოროტი სულების საქმე, ის ბოროტი რელიგიაა, ხოლო ბოროტი რელიგიები ღმერთთან შეუსაბამოა, ხოლო ის, რაც ღმერთთან შეუსაბამოა, ღვთის მტერია. მთელი საქმე ამ ერთადერთი ჭეშმარიტი ღვთის მიერ სრულდება და მთელ სამყაროს ეს ერთი ღმერთი მართავს. განურჩევლად იმისა, ეს მისი საქმეა ისრაელში თუ ჩინეთში, განურჩევლად იმისა, საქმე სულის მიერ ხორციელდება თუ ხორცის მიერ, ყოველივე თავად ღვთის მიერ სრულდება და სხვას არავის შეუძლია მისი შესრულება. სწორედ იმიტომ, რომ იგი მთელი კაცობრიობის ღმერთია, იგი თავისუფლად მუშაობს, პირობების ყოველგვარი შეზღუდვის გარეშე. ეს ყველა ხილვას შორის უდიდესია. როგორც ქმნილებას, თუ გსურს შეასრულო ქმნილების მოვალეობა და გაიგო ღვთის განზრახვები, შენ უნდა გესმოდეს ღვთის საქმე, უნდა გესმოდეს ქმნილებების მიმართ ღვთის განზრახვები, უნდა გესმოდეს მისი მართვის გეგმა და უნდა გესმოდეს მის მიერ შესრულებული საქმის მთელი მნიშვნელობა. ისინი, ვისაც ეს არ ესმით, არ არიან სტანდარტის შესაბამისი ქმნილებები! როგორც ქმნილებას, თუ არ გესმის საიდან მოხვედი, არ გესმის კაცობრიობის ისტორია და ღვთის მიერ შესრულებული მთელი საქმე, და, მით უმეტეს, არ გესმის, როგორ განვითარდა კაცობრიობა დღემდე, და არ იცი, ვინ მართავს მთელ კაცობრიობას, მაშინ შენ მიერ მოვალეობის შესრულებაზე საუბარიც კი ზედმეტია. ღმერთი მიუძღოდა კაცობრიობას დღემდე, და მას შემდეგ, რაც მან ადამიანი დედამიწაზე შექმნა, არასოდეს მიუტოვებია იგი. სულიწმიდას არასოდეს შეუწყვეტია მუშაობა, არასოდეს შეუწყვეტია კაცობრიობის წინამძღოლობა და არასოდეს მიუტოვებია კაცობრიობა. მაგრამ კაცობრიობა ვერ აცნობიერებს, რომ არსებობს ღმერთი, და მითუმეტეს, არ იცნობს ღმერთს. არსებობს კი ყველა ქმნილებისთვის ამაზე უფრო დამამცირებელი რამ? ღმერთი პირადად მიუძღვის ადამიანს, მაგრამ ადამიანს არ ესმის ღვთის საქმე. შენ ქმნილება ხარ, თუმცა არ იცი შენი საკუთარი ისტორია, არ იცი, ვინ გიძღვებოდა შენს გზაზე და არ იცი ღვთის მიერ შესრულებული საქმე, და ამიტომ შენ არ შეგიძლია ღვთის შემეცნება. თუ შენ ახლაც არ იცი ყოველივე ეს, მაშინ შენ არასოდეს იქნები შესაფერისი, იყო ღვთის მოწმე. დღეს, შემოქმედი კვლავ პირადად მიუძღვის ყველა ადამიანს და აძლევს ყველას საშუალებას, იხილონ მისი სიბრძნე, ყოვლისშემძლეობა, ხსნა და მშვენიერება. თუმცა შენ მაინც ვერ აცნობიერებ ან ვერ იგებ — მაშ, განა შენ არ ხარ ის, ვინც ვერ მიიღებს ხსნას? ისინი, ვინც სატანისანი არიან, ვერ იგებენ ღვთის სიტყვებს, ხოლო ღვთის მიერ რჩეულებს შეუძლიათ ღვთის ხმის გაგონება. ყველა, ვინც იცის და იგებს ჩემ მიერ წარმოთქმულ სიტყვებს, არის ის, ვინც გადარჩება და ვისაც შეუძლია ღმერთზე მოწმობა; ყველა, ვისაც არ ესმის ჩემ მიერ წარმოთქმული სიტყვები, ვერ შეძლებს ღმერთზე მოწმობას და იგი იქნება მოკვეთილი. მათ, ვისაც არ ესმით ღვთის განზრახვები და ვერ აცნობიერებენ ღვთის საქმეს, არ შესწევთ უნარი მიაღწიონ ღვთის შემეცნებას, და ასეთ ადამიანებს არ შეუძლიათ ღმერთზე მოწმობა. თუ გსურს იყო ღვთის მოწმე, მაშინ უნდა იცნობდე ღმერთს; ღვთის შემეცნება ღვთის საქმის მეშვეობით მიიღწევა. საბოლოოდ, თუ გსურს ღვთის შემეცნება, მაშინ უნდა იცოდე ღვთის საქმე: ღვთის საქმის ცოდნა უდიდესი მნიშვნელობისაა. როდესაც საქმის სამი ეტაპი დასრულდება, შეიქმნება ღვთის მოწმეთა ჯგუფი, ღვთის მცოდნეთა ჯგუფი. ეს ადამიანები, ყველა, შეიცნობენ ღმერთს. ისინი შეძლებენ ჭეშმარიტების პრაქტიკაში განხორციელებას და ექნებათ ადამიანობა და გონიერება. მათ ყველას ეცოდინებათ ღვთის ხსნის საქმის სამი ეტაპი. ეს არის საქმე, რომელიც დასასრულს შესრულდება, და ეს ადამიანები 6000-წლიანი მართვის საქმის კრისტალიზაციაა და სატანის საბოლოო დამარცხების ყველაზე ძლიერი მოწმობაა. ისინი, ვისაც შეუძლია ღმერთზე მოწმობა, შეძლებენ მიიღონ ღვთის აღთქმა და კურთხევა, და იქნებიან ის ჯგუფი, რომელიც ბოლომდე გადარჩება, ჯგუფი, რომელიც ფლობს ღვთის ხელმწიფებას და მოწმობს ღმერთზე. შესაძლოა თქვენ შორის ყველანი გახდეთ ამ ჯგუფის წევრები, ან შესაძლოა მხოლოდ ნახევარი, ან მხოლოდ რამდენიმე — ეს დამოკიდებულია თქვენს სიმტკიცესა და თქვენს ძიებაზე.