Kadokave Kapinchong Doan aHemphu ke Arnam Henlo

Kedamtang kai hini ahut isi asai angdeng ke Israel along si klemponlo, lapen isi ke Judea along henlo. Kadokave langdam pen ningje lote, laso pasonni asai angdeng sitame Israel aphan ke che’o’e, lapen kechengsi kangvaitang amonit atum aphuthak si klemponlo. Laso ajoine pen, Israel aso atum akekroidam ke pima Israel aso atum a’Arnam ke Jehovah Arnam anchotlo pulo. Athema Jisu Judea along sai klemlo, Alangli hadak thengparpan along pran kachipi asai pachunlo, Jihudi atum Alangliphan ketheklong ke Jihudi amonit aphan Kapajok Abanglo pulo. Latum mathalo pima Alangli inutpet si Jihudi aso atum aRecho pulo, akaprek madu amonit atum aphan kalilo; pima Alangli ke English amonit atum aphan kapajokji aHemphu ta kali, mate America amonit atum aphan pajokji aHemphu kali, bonta komatma Israel aso aphan kapajokji aHemphu lo; lapen pima Israel along Alangli kapajok tame Jihudi aso atum aphan henlo. Ahokpet alam ke, Arnam ke kadokave ahormu aHemphu lo. Alangli ke kadokave kapinchong ason doan a’Arnam lo. Alangli ke Israel aso atum a’Arnam anchot ta kalilo, mate Jihudi atum; Alangli ke kadokave kapinchong ason doan a’Arnam lo. Kedamtang Alangli sai sonni angdeng ke Israel along si klemponlo, laso pen apot monit atum ajahak kamunthidamthap alam do’ikoklo. Latum akekroi ke pima Jehovah Alangli sai Israel along klemlo, pima Jisu Amethang amat tame Alangli sai Judea along si klemponlo, lapen, anpartame, pima Alangli sai keklemji aphan ok chepharloponlo – lapen ajat alam pu sitame, laso asai ke Israel adet pen angtan damdedetlo. Arnam ke Egypt mate India amonit atum along ke klemkledetlo; Alangli ke Israel aso atum along ansi klemchotlo. Lasi monit atum prekjam kamunthidamthap nangdokoklo, lapen elong adim angkang ansi Arnam sai klemchotlo pusi pangthekronglo. Latum pulo pima Arnam sai klem lote, Alangli ke kangvaitang amonit atum anglum si klemvekji, lapen Israel along; Israel aso atum aphan si pajokpo, akaprek atum along ke Arnam klemklelo, mate Alangli sai kapangdangji ahin thangnat ta avelo. Latum doan ke chenam si arsikjiklo Arnam ok kachepharlotang abang aphuthak nanglelo pulote, lapen Alangliphan ke Israel adet angkang pen angtan an kapadamji aphan pekpedetlo. Tangte laheihui doan kadokave tame monit atum kamunthidamchot alam kalilangma? Arnam ke kadokave sining lapen pirthe lapen kadokave ahirmu doan pinchonglo, Alangli kadokave asontin ta pinchonglo, lasi kosonsi Alangli le Alangli sai Israel along anchot si pathikvetpo? Jongsi lason le nangplangdet pute, kopi si Alangli kadokave ahormu doan aphan kapinchong ale kedojilang? Alangli pirthe adangpi si pinchonglo, lapen Alangli ke Alangli ningkan suri throk kisik-kedang akemangdam tame Israel along anchot kali klemtanglo, bonta somindar adangpi anuttin amonit atum aphuthaklo. Latum le China, United States, United Kingdom mate Russia along si kedolo pu sitame, anuttin amonit tame Adam aso-asu saidelo; latum doan aphan ta Arnam si pinchonglo. Latum inutnat tame kapinchongtang anghor pen ke chepajok un’elo, lapen latum inutnat tame amethang aphan “Adam aso-asu” saidelo pu kehok ke chehek un’elo. Latum kadokave doan ta Arnam pinchongtang api saidelo, latum doan kadokave tame Adam pen keman asomar saidelo, lapen latum doan ke kadokave tame Adam lapen Eve kahenodak aso-asu saidelo. Lake Israel aso atum anchot le Arnam kapinchongtang kalilo, bonta angton amonitlo; lake lasonsi pima ajahak atum aphan ke hirjuno pilo, lapen ajahak atum aphan ke hirjume pilo. Penang an Israel aso atum aphuthak chekroidun meme alam do’o; Arnam latum aphuthak si kechengcheng ahut ke klemlo athema latum henlo kaheno kijumnei. Chinese akhei atum ke latum pen pachingbardam un’e; latum doan ke keboidet pu helopiklang. Lasi, Arnam kepangcheng asai ke Israel amonit atum anglum si klemponlo, lapen adunthu angdeng ke Judea along si Alangli sai cheklemponlo – laso pen apot monit angbong ke cheprekjam kamunthidamthap lapen aron alam nangdo’olo. Ahokpet ta, jongsi Arnam le monit atum akamunthidamthap alam ateng pen klem pu asonte, Alangli ke Israel aso atum a’Arnam anchot si chemanpo, lapen ke Gentile adet doan Alangli sai keklemji pangdang thekthedetpo, athe Alangli ke Israel aso atum a’Arnam anchot si manpo, lapen kadokave pinchongtang ason doan a’Arnam kalidetpo. Kethandammek pen pulo pima Jehovah amen ke Gentile adet angbong antame anong-athang theji, pima lake Gentile adet doan tame ingdangji. Kopi apot si lason kethanmeklo? Jongsi Arnam le Israel aso atum a’Arnam anchotlo pu asonte, Alangli ke Israel along anchot si klempo. Anpartame, Alangli ke laso asai pangdangdedetpo, lapen Alangli ke lason kethanmek alam pangdakdedetpo. Alangli lason kethanmek alam pangdak tangdetlo apotsi, Alangli sai Gentile adet doan, adetttin along lapen kadokave alongri along tame Alangli pangdangvekpo, athe Alangli ke sining lapen pirthe lapen kadokave ahormu kapinchong abang aHemphu saidelo. Alangli le Israel aso atum angbong, mate Judea angkangpi anchot si sai klemponlo puvoiphit sitame, Alangli keklempon asai ke angton somindar adangpi apharman asailo, lapen kadokave monit akhei apharman asailo. Pini arni Alangli dragon ke’er thepo adet along keklem asai – lake Gentile adet alonglo – nonputa kadokave monit akhei aphan asailo. Pirthe along Alangli sai keklem amokam kechengpon adimlo Israel ke; lasonthot si, China tame Alangli Gentile adet doan along sai keklemponji kecheng’iji adim chemandet tahaipo. Alangli non laso kethanmek alam pima “Gentile adet doan along tame Jehovah amen ke anong-athang theji” puke paplengplelang puhe? Gentile adet doan along kechengsi Alangli sai akengkam ke laso asai henlo, Alangli dragon ke’er thepo adet along laso asai keklem henlo. Pima Arnam ok kachepharlotang abang ke laso alongri along si klempo, lapen laheihui hirjuno kephotang amonit atum angbong si klemponpo, monit akamunthidamthap ateng pen ke salajong chetontelo; laheihui doan ke kadokave kangdeinei amonit atumlo, latum ke ardi amat si avelo, lapen latum aphan ke kecheng ahut Jehovah che’obuplo. Monit atum ke akaprek amonit atum aphan che’obup ta chokji, bonta jongsi latum doan aphan Arnam le che’obup lote, anuttin tame man-peng kangdeineineipo, ardi kaveneinei si chemanpo. Arnam pinchongtang api aphan ke, Sobar si kacheparideng mate monit atum si kache’obup puke pima ningkiduknei si chemathapo – bonta Kapinchong Abang si hala pinchongtang doan api atum aphan kache’obup puke pima latum aphan ke man-peng kangdeineipo. Moab aso-asu atum aphan hirjuno pilo, lapen latum ke laso keduknei adet along si mahangtheklo; ningbibepin pen, kadokave amonit atum kangting kepangrompon arum si kedo atum anke, Moab aso-asu atum henlo aman-peng kangdeineineilo. Athema laheihui amonit atum ke man-peng kangdeineinei atum tangdetlo apot si, latum aphuthak sai keklempon ke monit atum kamunthidamthap alam kapachetdam ke kemeneilo, lapen Arnam ningkan suri throk kisik-kedang kemangdam angton pen ale kedoneipo. Laheihui amonit atum angbong lason asai keklem ke monit kamunthidamthap alam kaphangno kemenei akronglo, lapen laso pen ajok Arnam akimi akai pangchengpo; laso pen ajok Alangli kadokave monit kamunthidamthap alam doan pachet’ilo; laso pen ajok Alangli angton pen Kanghon-Kangjinso Akai ke pajutkoklo. Alangli kechengsi asai ke Judea along si cheklem ponlo, Israel ahoi angkang ansi dolo; Gentile adet doan angbong, Alangli thangnat asai ta akimi akai kapangchengji aphan klemkledetlo. La kapajut angdeng ahut asai ke Gentile adet doan angbong anchot le keklem kali, bonta komatmatma hirjuno kelongtang atum doan angbong si ansose klemlo. Lason pen ajok eson ke Sobar aphan kapatherakpon undetlo pu angtheklo, lapen lasi, Arnam ke kadokave somindar adang pinchongtang doan a’Arnam si “chemanlo”, kadokave ahormu aHemphu lo, athe chethe pen asontin aphan karcho nangji ajatonlo.

Pini arni, komatmatma Arnam akimi asai keklem kapangchengpon aphuthak kopima chinidundelang atum dolang. Gentile adet doan angbong, Arnam ke akimi asai-amo nangpangcheng etlo. Alangli akimi akai pangcheng tanglo, lapen akimi asai pathik tanglo – lapen laso asai Alangli Moab aso-asu atum aphuthak klempon tanglo. Lake tangte Alangli akimitet asai kalilang puhe? Phurkimo along inutnat tame laso asai aphrang ke chomat longlepinlang. Madu tame lason arju longlepinlang, kachorodunji puke durepiklo. Arnam akethek-kere, Arnam kemanghumeme ason, Arnam aphan angton kachini un’edet, Arnam akethedung alam, lapen Arnam akangthirpet doan kadokave ta laso asai angdeng pen si chepaklangdakpo, kepajutsi arni asailo. Lake tangte akimi asai kalilangma, pima monit kamunthidamthap alam kapachet’iji asai? Komatmatma lasonsi kamatha atum dolang: “Arnam ke Moab aphan hirjuno pilo lapen pulo pima Alangli Moab aso-asu aphan anke che’otheipo, kosonsi latum aphan non Alangli kapajokthupo?” Laheihui doan ke komatma Arnam hirjuno kipitang lapen Israel pen angtan kepondet Gentile aso atumlo; Israel aso atum latum aphan “Gentile amethan” pusi hanglo. Anuttin akelangdam along, latum doan ke Gentile amethan pu anchot ta kali, bonta lapen henochotlang, kapavirdetthek asomar atumlo; lake pudamlo te, latum doan ke Arnam kangvaitang amonit atum kalilo. Latum ke Israel angkang ahoi along si mahang thekdunlo tahai meme, bonta latum ke Israel asorlo pu chekamdun longle, lapen ke Gentile adet along ansi toiplotlo. Latum doan ke man-peng kangdeinei amonit atum saidelo. Lake klardaklo athema latum doan ke monit akhei angbong pen man-peng kangdeinei atumlo pima Arnam Alangli sai latum angbong si akimi akai pangchengpon keklemlo, athe latum doan ke kehonotang monit akhei apharman cheklang tanglo. Arnam asai ke chongvaidet lapen kejongdam do; laso asai Alangli keklem laheihui amonit atum along pini arni ke pima kapinchong ahut pen keklem asaithotlo. Noah ke Arnam pinchongtang apilo, lasonsi alang aso-asu atum antalo. Pirthe along madu sitame komatma ok lapen vi kedo atum anke Arnam pinchongtang api saidelo. Arnam asai ke kadokave pinchongtang doan aphan chejaponlo; lake komatne latum aphan ke hirjuno pidetlo mate pipe pinchongdet pen pu aling kalilo. Alangli kisik-kedang asai ke kadokave pinchongtang doan aphan chejaponlo, komatmatma kangvaitang amonit atum hirjuno kipipedetlang aphan lapu kalilo. Arnam aningkehang ke Alangli sai Alangli kapinchongtang angbong keklemponji aphan putangdetlo apot, Alangli ke bangso asai chun peme pen si patangponvekpo, lapen Alangli ke komatmatma Alangli sai aphan ale kedoji amonit atum angbong si klemponpo. Laso apot si, Alangli kadokave aron-atang tame pachet’ilo Alangli monit atum anglum sai keklem ahut; Alangliphan ke, “hirjuno,” “ado kipi” lapen “hirjume” pu alamthe anke thangnat ajor avelo! Jihudi amonit atum mesensan, kangvaitang Israel amonit atum ta sonthakthalo; latum doan ke aboi kemesen lapen monit atheng kedo amonit atum saide. Kecheng ahut, lake latum angbong si pima Jehovah Alangli sai pangchenglo, lapen Alangli aphrangsi asai cheklemponlo – bonta pini arni latum aphan kachepahaidetji pu asai keklempon ke thangnat ajor avedetji. Latum, lasonthot si, kapinchongtang apharlo pu tame, lapen anpar sitame pima latum aphuthak kemesen dolo, bonta laso asai angdeng latum angbong keklemji puke ale avedetpo; Arnam la monit atum aphan chepahemphu un’edetpo, mate kadokave pinchongtang doan ason aphan baiponrup Alangli un’edetpo, atheke lasi Alangli sai dragon thepo ke’er adet laheihui amonit atum along si nangcheterekphitlo puke klardak alamlo. Kethenei akenangsot alam ladak ke Alangli isi akai kapangchengponlo, Alangli kadokave aron lapen kadokave monit atum kamunthidamthap alam lapen Alangli angton Kanghon-Kangjinso Akai asai kangtonponlo pu lake Alangli kapachet’i pen henlo. Jongsi Alangli nonjong asai le Israel aso atum angbong klemdamronglo, laso apor ahut anke Alangli ningkan suri throk kisik-kedang kemangdam tame jutkokpo, anuttin tame kroipo pima Arnam ke Israel aso a’Arnam anchotlo, pima Israel aso atum anchot si Arnam kangvaitang amonitlo, pima Israel aso atum anchot si Arnam along kedolor ahirjume lapen alamchak kelongji athenglo pupo. Arnam ok kachepharlotang abang kepajutsi arni ahut dragon thepo ke’er adet aGentile adet along si kadokave kapinchongtang ason doan a’Arnam keklem a’Arnam asai paplengponpo; Alangli angton pen Alangli kisik-kedang asai patangponpo, lapen Alangli sai dragon thepo ke’er adet along Alangli angbongchit aphar patangponpo. Laheihui pasonthom asai angdeng acho alam ke monit aphan kapajok henlo – jongdamvet pen, kadokave kapinchongtang ahormu doan Kapinchong Abang aphan kaparchoji pu henlo. Lasi, asontin asai angdeng along tame thedung ajor dopet; pima Arnam ke thangnat ta ajor kave mate ale kavedet asai ke klemkle. Ihin anatthu ke, laso asai angdeng ke akimi akai van’ilo lapen kedamtang hini akai anke pajutponlo; ahin kaprek pen pulote, lake kadokave monit kamunthidamthap alam lapen kadokave aban an monit atum akekroi lapen kachinidam kapachet henlo. Kedamtang hini akai ahut keklempon asai ke monit atum keprekjam kamunthidamthap alam ateng penlo; laso angdeng, tebontame, angton pen si monit kamunthidamthap ateng ke pavirtheilo, laso pen ajok monit akhei aphan chenam si chepahemphulo. Moab aso-asu aphan kachepahemphudam pen ajok, Moab aso-asu atum angbong sai keklemdam pen ajok, Arnam kadokave monit atum aphan somindar adangpi along chepahemphutheipo. Lahenlo karnuknei akenangsot alamlo laso angdeng Alangli sai keklem, lapen lake ale kedonei ahinlo laso asai angdeng along Alangli keklem. Jongsi nang le chinilo pima nang mena angdeng ke ingdeipik lapen pima nang ke ardi kavenei abang pu sitame, nang ke nonputa chemathaji pima nang ningkarongnei ahormu si chetong longlo: Nanglong ke thedung ahirjume chepaklong longlo, thedung alamchak longdunlo, lapen nang ke laso asai Arnam keklem pachundun cherap longpo. Nang ke Arnam ahokpet abang arje theklonglo, nang ke Arnam along kedolor akun chinidunlo, lapen nang ke Arnam akar’idam ateng si klemlo. Kedamtang hini Arnam asai angdeng ke Israel along si klemponlo. Jongsi laso angdeng Alangli sai la kepadusi arni ahut ke Israel aso atum angbong si klemronglo pute, kadokave kapinchongtang ason doan atum pima Israel aso atum henlo Arnam kangvaitang amonitlo pu kekroidamchot kali, bonta Arnam angton pen kisik-kedang kemangdam ke mesen pen chunchedet si longrongpo. Alangli sai hini angdeng ta Israel along keklembom akai ahut, akimi sai ave – mate akimi akai kavenji pu thangnat asai ta ave – Gentile adet atum angbong klemkledet. Pini arni asai angdeng – akimi akai kapangcheng asai ke – Gentile adet angbong si aphrangsi klemponlo, lapen ke, anpartame, kecheng ahut Moad aso-asu atum along si klemponlo, lasi angton akai kapangcheng’ilo. Arnam ke monit along kedo kamunthidamthap alam doan kachini ke pachet’ilo, esonnat tame kapadolongji aphan pekpedetlo. Alangli kachepahemphuji pu asai along, Alangli monit kamunthidamthap alam pachet’ilo, halahei aban an, hako amonit atum kachinidam akrong doan. Alangli monit atum aphan pima Arnam pen lote ajat aron ta nangnelo pu paklanglo, pima Arnam aphuthak thangnat ta aban avelo, pima Alangli keklem asai ke angton ta kejokvanlo, angton pen pajoikelo, lapen pima Alangli ke kopima Alangli keklem along an akechoklo. Nang angton pen pima Alangli kapinchongtang atum angbong keklem asai along anke chepidundetvek nangpo. Kadokave Alangli keklempon asai anke ajor dopet, lapen ke Alangli mena ninghang lapen kethek-kere ateng pen si klem-damlo, lapen monit aninghang lapen kamunthidamthap alam ateng pen kalidet. Jongsi Alangli sai along kopine ale kedo pulote, Alangli klemponpo; lapen jongsi kopine Alangli sai along ale kavedet ason pulote, Alangli klemkledetji, koanma lake akeme puvoiphi sitamelo! Alangli klemlo lapen kelongdunji atum tame ingvailo lapen Alangli sai ajor kedoji lapen Alangli sai kemangdam pachetondam peme pen si adim thiklo. Alangli ke hako aron Alangli sai along rimponpelo, mate Alangli aban adichi anke chekroikdundelo. Alar ke, Alangli sai akenangsot ale kedoji asai ateng pen Alangli kemang padolo. Kijutsi ke, Alangli kemesen angthek lapen kemangdam’e akichun si longdampo. Jongsi nang le laheihui alam pini arni anta chininedetlo, laso asai ke nanglong thangnat ta angthek avedetpo.