Ingkung 13

Ne lamthe lapen kaningje angbong anke penang an Ne akemangdam aphai chepatujoi dolo, bonta monit atum lahei aphuthak thangnat ta kachinidam avedetlo; latum Ne lamthe angtan pen si longbomlo lapen latum angtan pen si aphiphi dunbomlo, lapen latum Ne ning alam chininedetlo mate Ne akar’idam Ne lamthe angbong pen klemkledetlo. Ne lamthe le Ne paklardak puvoiphit tame, komatlo ladak kedo lahei kachinidam abang? Zion pen Ne monit akhei along vanglo. Athema Ne Methang aphan jongjung amonit ason lapen monit areng along si chepa’oklo, monit atum angtan pen masap anchot si Ne arpum kacheklang aphuthak chinilo – bonta latum Nelong kedo pima chethe alam ke chinidamdedetlo, mate latum Karjong a’Arnam aphan tame pangthekthedetlo, lapen ok chepharlo amonit aphan si chinichotlo. Tangte ahok Arnam Amethang ke nangtum Alangliphan kachiniji kabor’i aphan atheng kalidetjima? Tangte ahok Arnam Amethang ke nangtum Alangliphan “kethakdakji” kachepeduk aphan atheng kalidetjima? Ne angton monit akhei akahenodak apot langseletpiklo, bonta Ne alangtum akeboidet apot kangjinso tame dolo. Ne sitame angton monit akhei atum aban asema pen si chelangbomlang. Atheke Ne monit atum China along lasonlo, nangtum ke tangte bangso amonit akhei aro kalilangma? Ne monit atum kadokave angbong, lapen Ne sopomar kadokave angbong, pima lake, Ne angton monit akhei angbong kangvaitang atum doanlo, nangtum ke kangdeinei adilung along si dolo. Laso athe si, Ne nangtum along akeongpi ajakong chepadamlo, kethenei khi-khanlo. Nangtum nonpu ta pini arni ahirjume plengset akai kelong apot chehok thekthelangma? Tangte nangtum npnpu ta Nephan kachedanji si nang ning chepangtangbomlang lapen nang mena abidi ateng pen si dobomlangma? Lake tangte Ne akangjinso lapen akanghon kedobom apot kalima, pupete angton monit akhei ke komentune pen si Sobar akangnang along keklotheiji lapen angho along “kechomepik achoran” cheman’etji. Pini arni, kadokave amonit atum angbong, komatma athikpet pen amethang alar Nepharman si chepadamlo lapen ahokpet pen Nephan kanghon atum anke nonpu ta rijak ehong along richimun kalakhaji aphan anta kadure dolang. Pini arni, tangte “Ne monit atum” anke nangtum salajong akhi-adat pu hokjilangma? Nang keme-kaheno kemathathek ke jasemet herai athan ason si ingsamklak puloma? Tangte nang ahokpet Ne kenangji ateng amonit atum atheng chemanloma? Kedamtang ahut alam chemathathutha, lapen pini arni aphan puthot langthunon – koloso abang si nang Ne ning aphan pangsamlo? Koloso abang si nang Ne akemangdam aphan ahokpet pen kachematha chepaklanglo? Ne nangtum aphan ningperungrelangma, nangtum kalite nonpu ta thurthejilang, bonta kangsamklak ason si dobomjilang apotlo, lapen puthot, thangnat ta keklem thekthedet asonlo.

Lang atarthui kachepharlep angbong si, monit ke Ne ningkithi theklonglo; menmen kapanghun’ik anghun athan along, monit ke manghuhaklo lapen phereduklo, lapen kopunat si kangjarjima chininedetlo, atheke pherelo pima latum aphan laso sining kangder lapen arve si jappontheiji asonlo. Anke, lahinhin kejap tomonthepi hamdet aphi, alangtum aning domemuchotlo lapen arjangphoilo atheke latum plangmena apirbi akelangmepik arjan along kelang ningingsamjinlo. Bonta, lason apor ahut, atheke latum angbong pen komat abang si Ne monit akhei aphan kachechak ahoi kavedet akanghon kachomatlonglo? Alangtum aning arlo ke Ne bang arpum anchotlo, bonta Ne Karjong akenangsot atiri kalilo: Tangte monit ke Nephan cheklangsak pen kekroikre kalilangma? Tomonthepi kejap hamdet pen aphi, kadokave monit akhei ke akimi chemanthei asonlo; atheke, asat kepho doan pen ajok cham pangthirthei asonlo, latum katheang lapen chethe chelongthu asonlo. Tangte nangtum tame, Ne kevan atomonthepi kejap chechak’et aphi, pini arni kemesen akopai nanglelo kalima? Bonta, pini arni damdet lapen penap kevangthu ahut, nangtum tangte pima bangso arve thepi keklo aphi chepangthirver thekjima? Tangte nang cham pangthirdet aphi pima nang laso kangduk-kardom ateng dover thekjima? Tangte nang pini arni athikpet ateng dover thekjima? Tangte nangtum kangduk-kardom kroithipji lapen chelarledet si dojima? Lahenloma akehang kepachunji aphan pima monit ajakong pen abat kedo? Ne arnivang ta monit akhei anglum si dolo, lapen monit akhei penpen si klem rappetlo, alangtum anglum along, tebonta inutnat tame laso aphuthak pangthekthelo. Jongsi Ne Karjong akeja pon kalidet pu asonte, komatlo, angton monit akhei angbong pen, non kedobom akai along kerengdun unji? Ne kipu Ne dolo lapen monit atum penpen si klem-dam rappetlo pu ahut, tangte Ne chepaklang ongchotma? Kedamtang ahut, Ne pulo “Ne monit akhei pinchonglo, lapen angton monit akhei aphan japonlo, lapen angton amonit akhei aphan hokum pilo”; tangte lake ahok kalima? Lake tangte unjima pima nangtum lahei alam kachomatlong ke dordelang pu? “Sai klembang” pu alamthe jongjong pen anchot ke nangtum aphan kerengtik an kangsir-kangchapji si ponpo. Ahokpet kachomatlong kalite, monit ke Nephan nangchiniji un’elo – latum ke Ne lamthe pen ajok Nephan nangchiniji un’elo. Pini arni, ajat punon, Ne nangtum anglum salajong vang tanglo – nangtum aphan lake ansose ale kalilangma kachinidamji aphan? Tangte Ne ok nangcheparje ke nangtum aphan pap pen kapajokji kalilangma? Jongsi Ne monit akhei along Ne mena abang arpum pen vangvedet asonte, angton monit akhei ke komentune pen kapahanchathap ansi pangdangtheipo, atheke la Sobar akhi kachepahemphu cheman’etpo, athe kopima nang akekroi ke jasemet Sobar amohor lapen ke Arnam Amethang pen thangnat ta kacherap avelo. Tangte lake Ne pap pen kapajok kalilangma?

Ne thengno Sobar kevang ahut, Ne alang ahir ketanrak pen apot thiriktettelo, mate kahenopik apot Ne phererelo: Ne jasemet langplotlo. Nephan le Sobar asat kelang ahut, Ne laso abidi langno checharlo, lapen pajoike pen patheraklo lapen amahang pajuremtemlo. Sobar le Ne pen kachedan ahut lapen Ne kangvaitang amonit atum aphan kesanpon bor’i ahut, Ne ok along pen si Ne ron chedan’ilo; lapen Ne ok along pen Ne monit atum aphan pajoklo lapen chiviponlo laso ajok latum joike pen kachingkoi mate kangbodet jokplotji aphanlo, lapen Ne latum aphan akengkamtin sitame chejaponlo. Lapen Sobar le kerem aphi kachirui ahut lote, Ne ke Ne monit atum along anong-athang dopo, lapen Ne monit atum Nephan kemepik lapen kechokche avepin ahakhi cheparidengpo. Lasi anke, Ne kisik-kedang akemangdam along kasiksak anke khangchekpo lapen latum aphan ke kai apar kai karnukkrung ameherang along varchorpo. Lahenlo Ne akemangdamlo; lahenlo Ne keklem asailo. Nangtum akai kereng along, lason kephoji apor arnisi ma arnisi ke nanglong nanglerok tahailo meme: Tangte nang methang aphan nang Sobar akebengthip along chepaklochuijima, mate nangphan Ne nangkepajokdunplotji aphan nangpekjima? Lake nang mena ang-anglo, lapen nang si matha peme pen chepathik vek nangpo.

Khristo recho kepangri aratakai alongke monit atum akailo lapen Arnam Amethang amatlo. Kadokave monit akhei doan ta Ne kelame lapen kerai aber si dolo, lapen kadokave tame dragon ke’er thepo pen kithi anta kachedan along si dolo. Laso kepadusi akachedan kehaiji aphan, dragon ke’er thepo aphan kepathilotji pulote, kadokave monit atum alangtum angton abang arpum Ne kepangri arat ahavar along Nephan chehodaidet nangpo. “Khristo recho arat akai kepangri ahavar” pu ladak kejongdam ke pima kangthirset abang aMethang jasemet kepangripon aber kedo akai aphanlo, atheke kadokave amonit akhei aphan Ne si kiviponlo, komatma Ne seke kipi ahut nangkedengdunthek atum anke, laso ajok alangtum akai-achethe, pirthe athak dobom sitame, sininghemrengme along si kedo asonlo – kethom asiningrengme along kedo akai ahokpet pen kachichiniponlo. Ne ok along Ne kedo puvoiphit tame, Ne ke ok akadure mate ki’un’edet akesung chechak nangne. Lasi penang an apor Ne monit angbong vanglo atheke alang akardom kethakji aphan, lapen penang an abatai ke Ne thaklo, monit atum anglum si damlo, alangtum akero chehok’ilo; monit atum Ne kedo pu alam chichininedetlo puvoiphit tame, Ne ke nonpu ta lason ateng pen si Ne sai cheklembomlo. Ne kedo adim along, atheke Ne kachepatujoi adim along henlo – ajat punon, Ne kedo adim along, Ne ke kadokave Ne hotur doan aphan paremtheilo; Ne kedo adim along, Ne ke ahok pirthe along kedo aphuthak kachomat long pemelo; Ne kedo adim along, Ne ke monit atum asontin alam lapen asai keklem ta langdunbomlo, lapen langcharidunlo lapen angton monit akhei aphan than-mumdunlo. Jongsi monit akhei le Ne akemangdam aphan chemathadamtheklo pulote, lason si Ne ning pangsam theklo lapen Nephan ningkarong pilo pulote, Ne anke kadokave monit akhei aphan chenam si pahirjumepo. Lake tangte kopima Ne monit akhei aphan akemangdam kalilangma?

Monit akhei le amek kejang sikchitlo pulote, Ne sining kapangder si latum aphan alangtum amangmun pen ingthurpo. Lapen latum le alangtum amek chingpu lote, lahei kejap akangsam aharchi penang an alangtum amek pasoangji, lason si pima latum kedam nangji akrong alangtum chepangboji, lapen latum konat pen si kevangma mate latum konat si kedamjima pu chichinineji. Akeongpi amonit atum anke la ke’apvong atur ason pen rolo lapen tomonthepi along si ruhuplo, alangtum abang arpum aphan ke tomonthepi jap si pondetlo, ajat ta kebut-idunji aphan avedetlo. Katheang along, kejokdun atum anke Ne arje klardak pen kijut ke theklonglo, lapen laso aphi ansi latum Ne athak kacheklangpon aphuthak kopine chinidampo, lason si latum anpar ke Nephan jasemetpet amohor nanglangplak haihelo, kalite Ne ado kipi lapen ahirjuno kipi alangtum aok aphuthak Ne vanthudetji pu arnukkrung akaphere dolo. Lasi penang an amonit atum hang taramlo lapen chiru-charnaplo; lasi penang an atum aningkethe avepin along klolo; lasi penang an atum alangtum avi pen aroi pamanlo; lasi penang an atum ke kithitang arpum manlo, kemang avepin pen lahinhin si damthap-damprulo; lasi penang an amonit atum, katheang along alangtum mena adim chirilo, menmen aning kiduk’it dolo lapen alangtum ningkan koan pen lone aningkarong kave apot amekkri bulo. Lasi penang an amonit atum, katheang pen ajok si, alangtum keterbung apot chekobirlo lapen amethang aphan chekirlaji si chepathiklo. Lasi penang an amonit atum, amek kavedet pen, kereng aningkarong chepangbo tanglo lapen laso angthek ke katheang kepangthekdunji aning avelo, lapen lasi pasangkoklo, alangtum akijutji aphan si chonghonglo. Lapen penang an amonit atum anke chethe atelong kevekpon ingthurlo lapen, katheang kachejapon arum along, alangtum penap aphan cholangding si dolo. Pini arni, komatma monit akhei angbong laso angdeng along kedodelo? Komat si Ne katheang angbong kedodelo? Jongsi nang le ingtangrak tame, mate nang le ainiti sitame, koson si nang Ne katheang kevang kapatepekdun unpo?

There 10, 1992