Ingkung 7

Nichi anat ke do aro atum an ta ne seh arjutha.

Kedamtang ahut, nangtum Nephan nekroithip ma? Ne kapinkhat kemepik alamthe nangtum arjulo ma? Nangtum ningkachethe linglanghir kali si ahokvet loma? Monit akhei atum a’be kachedun, monit akhei atum a’kachinghon seroi, monit akhei atum a’kekroi – la kadokave an madu ta kali Ne pensi vangchot, madu ta kali bonta Ne pensi pipotchot. Ne muluk atum, nangtum Ne lamthe karjulong pen, Ne ningkehang nang chinidam’un loma? Ne ning arlo alam nangthek long ma? Kedamtang an keklem kedam ahut, kangtui kangdei, -kleme--klemno anta chetongsi, ahut penke nangtum kachingkoibupji ansido, pu’an chot ta kalisi Nephan nangchongthui detji ansi do, lapu’an det aphi sita, Ne kaikita nangtum aphan nang rai dunbom pu nangtum chichini ma? Kaikita Ne seh nangchepado dundei si, nang pejok dunbom pu chini ma? Batai keongpi nangtum Sobar kiduh a’ruh along kachingthang; abatai batai monit ajat apham along kachedan; keongdung aphong chekroikre hejan anta chetenenedet si kejut un’e akachibohong par’omluk sido. Batai ko’an lone nang bang ke Ne hem arlosi do bonta nang ning ke konat lone. Bonsita, batai keongpi ne nangtum aphan kerap arideng nang pajir dunbom, lapen nangtum angbong kachejinsothek amuthe nang rik dunbom lo. Abatai keongpi, nangtum kesung kepho ajoine jinsomeme nangthek dunlong pen ne kachechak un’e; abatai keongpi…. Nang la nangchini dun ma?

Bonsita, pini, nangtum aphan Ne nangchiri pon pen, non kepadusi kesung an pen chepajok tanglo, lapen neta nangtum along nang chehok dunlo; lake Ne kethek kachini ke’pa-klong apot lo. Sitame, ning chematha pame non! Nangtum nangmethang kangtangrak ahut, komat si kachingkoi lo? Ahutpen jakong kebop phophepin komat si kangtangrak abang dolo? Monit atum angbong, ne pen kecheju kavedet ahirjume kelong abang komat si do? Ne hinpen kipi kalidet akesung kepho abang komat ne doma? Nephan nangkachinghon atum anke ahirjume anchot si kelong ma? Job kesung kephonang ke nephan nangchinghonhedet ajoine, nangkekroikre ajoine ma? Paul Nephan ahokpet pen nang kachinghon undet ajoine si Ne thengno ahokpet pen sai nang dengpi undet loma? Nangtum An kehum pen hakhi nang chipilo tahai, bonsita nangtum angbong kachipi a’hakhi kapajujepin a’ser kedoivet ason si pajujedet abang doma? Monit atum ahokpet pen a’be kedunthek abang doma? Nangtum a’hakhi nang kachipipen Nephan ning nangparong nangtum “abe karjapthip” aphan la chedai dunde, athema Ne mentuneta nangtum madu along penta nang kehang’o ave. Ne aphrangsi kemang dam ateng penle dam asonte nangtum kado kave ta isi amo kevangve ahormu asonsi man detji apotlo. Ne nangtum aphan lahai nang kethan ke isi “kajinsomeme a muthe kirik” ason kali ma? Ne long pen kevang kejokvan nangtum la theklong lo kali ma?

Nangtum chemunthi ra ning chepavang thutha; Nehem nangchirui thutanglo apotsi, Peter asonthot si ale kalite kanohok chelanglepin pen nephan nang chini loma? Nangtum Baibel alamthe anta ning chibilap si kroi lo, bonsita nangtum Baibel abinong aphik ang’an chekroi pame loma? Nangtum amethang “atiri” si che ot chot lang, non an ta ahokpet pen amethang aphan chipidet an un’e lang. Ne lamthe kapachon ahut, Ne nangpen chetongphrong nang kachingki ahut, nangtum angbong kachinghon a lothui chibikok si Ne kapeklangpon kereng’et alamthe nang chodeng dun abang mane doma? Nangtum ne lamthe ardi ajor pipe, lapen ningchingsam i’eh. Lapu kalisi, nangtum nang hotur aphan Hele pen asonsi Ne lamthe pen ap’i rong, nangdim nangklong chesik i-rong; Ne kangsaipon kroisi Nephan pu’an sose nang chiniji aphan nang asapso ta bor’i ponpe. Nangtum anutin ta komatne aphan risim pen kejong do; nangtum kado kave ahuttin sita “kaprek aphan ajoine nang methang aphan chemathe”. Lavek si nangtum atumi anta kachoklem kalima? Lapen pini antalo kalima? Nang “a’be karjapthip” ahin asapso angdeng arluchet lo, lapen nangtum chinimuchot, arta do muchot si planglo; laso ajoine si nangtum nephan asapso anta “nangphere” tan muchot lo, lapen maduta “keklem panglangle” lo. Nangtum thangta chichinedet asonben le pisi dolo? Pipotsi nangtum adung arei ning cheparung meme ason ame kaiketa longle lo? Oh Ne muluk atum, aphrang alamo ke kedam heloving lo; nang lalong chevek dunling nangnelo. Nangtum atumi, pini chebithip asonsi ahokpet pen nelong a’be nangdun pame nangpo; pu’anchot ta kalisi, penap nangtum nepharman akeme a’hakhi chipi non, lapen nang Ne pen sita mononphi Ne hirjume long ponpo. La abangsi nangtum arjuponthek nangpo.

Ne nangtum athengno avedet pusitame, Ne karjong ahokpetpen nangtum aphan kangjinso nangpi ji. Ne kipi a’hirjume nangtum chebirti ponpo pusi Ne ning thelo, lapen laphan charchak si, nangmethang aphan chichinipo. Nangmethang atiri apharmanle la enri non, Ne lamthe pen nang kachedordelang anle la papleng’i non, lapen laso penle akeme anat kengkam chejor’i non. Ne nangtum aphan kachepadi tekang alamjir la henlo!

Thangthang 28, 1992