Kachongthui: Eson Sodak Katora (1)

Prapjin pen, Ne sai ke tang’po, lapen ongdung a’ningkan do’rappet pen ajok chechak un’e a’lamo nang planglo. Ne ingtonte’pin si Ne lam heihei ruithu tanglo lapen kaiketa Ne sai akimi ingpu tanglo. Kalang tema, Ne kapinkhat ke hala Ne keklem asai’tin aphan kenangsot ason amung lo. Ne kethan-kapere ave pulote, nangtum kadokave kedam manghu’ji lapen anparta nang methang aphan angton pen kangbotang adim si chelong dampo. Ne sai non plengji dokdok lo lapen lake kepadu angdeng lo. Ne nonpu’ta kapere dunbom asai keklemji ning’hang lang, halake, nangtum apharman Ne kapinkhat alam heihei kapajir karjuji aphan lo. Ne ning kethe isivet nangtum ke’unji lake Ne kesung nang kachechakpi heihei akejoi panahok’he lo, lapen, hala pen aparta, Ne kamatha’e pen nang kalana la nangtum chini unpo, lapen Ne lam heihei ke kopusonsi nangtum monit ason nang keplang atiri asonsi hokpo. Kali kalang seta nangtum halatum alam heihei karjuji ninghang lo, Kali kalang seta nangtum halatum aphan ning arong pen deng bomlo kalite ning keme’me pen seta latum aphan deng lo, nang latum aphan arsikjit pensi hok nangji. Kali pulote, nangtum kai ateng lapen kamathakrang a’ot-adur lapen athak kacheklang a’ot-adur heihei pen Ne phan jasemet ning padukji lapen, ahok, Ne phan palang seletji. Ne jasemet ningthe parpik lo nangtum kadokave ta Ne lam heihei porhi lethot lethot unji – suri suri aphong – lapen lahei nang ning arlo chibi pen chini unpo. Laso atovar anat pen chotlo Ne nangtum aphan ning kachethe katekuk’ke detji aphan nang ke’unji. Ajat seta, nangtum angbong baduta non lapuson kereng abang ave. Lason aparte, nangtum kadokave akele kahenopik akai alongsi inglimchok, kecho lapen kejun pensi nangtum aning chepangsam lo, nangtum baduta Ne lam heihei pen nangtum a’ning lapen a’karjong aphan chepepleng’ple. Laso ajoine si, Ne kejut anta ahok monit akhei aphuthak ning keding pen vang nangkoklo: Monit atum ke mentune apor seta Ne phan pachobai thek, lapen baduta Ne lam heihei aphan kroithirklong un’e.

“Monit aphan ke Sobar si phangno-etlo je alang monit arje ason anta avedet anlo.” A ke’ongpi arat atum non laso alamjir chini bom lo. Ne la kepu atheke hala “kachini” pu Ne kejongdam lake jongjong aphan ahok ason kedeng pon, hala ahokpet a’kachini kepatepekji aphan. Nangtum baduta nang methang ke choklim pen chelir un’e ason si nang methang mamat ke angton pen chelangdam’pet un’e, nangtum Ne lam heihei aphuthak chini pameme si dobom. Bonta non ke, Ne a’binong’et enponsi nangtum angbong kedotang’sodak katora aphuthak than pajirmi lo. Halaso katora ke kachongthui. Nangtum kadokave ta “kachongthui” alamthe ke kachini tanglo, atheke penang an arat ke kopine bang aphan kachongthui asai klem tanglo, a’pinan abang a’piso aphan chongthuibom asonsi, a’piso ta a’pinan aphan chongthui bomlo, a’sopo abang a’po aphan chongthuibom, a’sopi abangta apei aphan chongthuibomlo, aBan kedo abang a’hemphu aphan chongthuibom, Jirpo angbong che’chongthui seroi bom, don-rap angbong ta che’chongthui seroi bom, kejor abang kenam abang aphan chongthui bom lapen kaprek kaprek ta son thakthak. Lahei kadokave kapangbar ason ke kachongthui arlo si vang lo. Thihek pen ke, kachongthui lake eson abe kachinghoi hala lamchak heihei aphan kepaphuk, keme kaheno ahokpet aphan karkan, kalite kahili, monit akhei kangbo si chepaklang bom. Ahokpet pudam lote, monit akhei ason pirthe along nang kahache’tang atum, nangtum an ke ahok aphan kopine hala kachongthuiji aphan si kesiktang ason lo, jongsi nangtum bang aphan chongthui long tanglo pu chekimover, kalite nang bang aphan aphrang ta kachongthui’tang aphong do’o lo lepute. Nangke nang pei nang po kalite jirpi jirpo atum aphan ta kachongthui un abanglo, tangte nang akaprek atum aphan ta chongthui ponbom, lapen Nephan ta kachongthui lapen Ne ning kakhinde akam heihei si klem bom. Akaprek alam pen pudam lote, kachongthui ke athak ketheklong ateng ke ajongjong kechokche a’ot-adur kali, bonta kopine hala ahok pen kachetonte ason. Lake abinong’et monit atum kahiliji lapen Ne lam karjuje detji aphan atiri lo. Laso athesi Ne la jong tanglo hala aber alamthe along pen: kachongthui ke monit atum a’ot-adurlo, lapen labangso a’ot ke anut’tin abangphu aphanta thedung a’hotur pusi Ne pen lamchak pipon lo.

Ne phan nang kekroikre aot adur ke ahokpet ke kachongthui henlo. Laso a’ot-adur Nephan kethirklongkle pen kedo ke kachongthui. Nephan ahok kave lapen kachongthui kachorai pen ne phan nang kapamanghu lake kachongthui, ke’ongdung abidi langno aphan kedipdun lapen alangtum nahok-nahok kerikdamthip ke kachongthui lo. Ne phan ahokpet a’hakhi ke’otthip thekthe lapen ning kehanghe lake kachongthui pen. Ning arlo Ne pen heloving ahut kangnek’hing thap lake kachongthui. Laheihei ke kachongthui akam lo lasi kaike nangtum ke’untang lapen halahei nangtum angbong kedotang lo. Nangtum baduta lake isi a’katora pu mathathe det tahai, bonta halason le Ne kamatha kali. Ne phan kachongthui abang aphan ke Ne langdingde, lapen mentune seta Ne obup un’e. Non, Ne nangtum angbong sai keklembom ahut nangtum lason si do thak lo – jongsi nangtum aphan baduta nang kelang abang ave’pin arni nangkele ahut, nangtum ke methang aphan recho pu kachepu atum nangtum klempar abang ason plangple detji kali ma? Hala puson nang keman ahut lapen nangtum menmen thedung huni pholok lote, komatlo nangtum aphuthak kepangthir dunji abang kedojilang? Nangtum kematha ke penang’an akachongthui akam heihei ke mentune pen a’jongjong si nang keman, lake nangtum keklemver a’ot-adur kali, lapen kachingki chethan bom alongta labangso a’kele pik pen kemesen aphan klemkle, lason si nangtum kachepindak pen ajok sung nanglo. Jongsi nangtum ahokpet lasonsi matha, tangte nang kachechini jumdet lo. Lason kamatha ke isi kepangthek aphan lapen kachedanji aphan arjan lo. Monit a’ot ke alangli chethe lo; lake isi alang kerengji adim archak atiri lo, lapen alangli la chelar un’e. Hala kachongthui a’ot ta isinat lo – jongsi nang kopine nang don-rap kalite jirpo-jirpi aphan chongthui thek tangte, dak pen si klangdak lo lake nang chethe along isi aro lo lapen laso a’ot pensi nang mahang thek tanglo. Lake pine eson badu abangphu ta patepek un’e. Pangbar alam, “jongsi inut amonit bang amar’atar kanghu pen aning cheparong-i lote, lasi bangso kanghu aning cheparong-I” ke latum achethe along isi aroh lo, latum ahut pen chonghu lapen ahut pen ke chonghuhe puseta. Latum chonghu kalite chonghuhe seta, lake halatum kachonghu ke isi abe kedo lo pu angthek pu un’e. Setame pudak’un latum kanghubom ke latum achethe aro lo – halake latum a’ot binong. Ajahak atum arjuji; lake aphrang pen latum a’ot, tangte kopisi, latum kemesen amar kethek long ahut, ahut penke latum chonghuhe det lo? Laso alamthak ke joike. Ladak keongdung athe do latum kanghu he. Latum kopine kachonghuhe atheke kachothiji amar akele the’ongchet ketheklong amek angden pen, kalite ladak pen kachetonte akam keklemji aphan, kalite akele ador sopik, keton-kelang ingchimpik, kalite latum jongjung kenangji ason kalidet tahai, kalite alangtum ketheklong pen latum aphan akenangji ason kalidet lapen akaprek kaprek apot. Lahei kadokave athe pen ajoine ta kalanglo. Bonta ajat setame, latum chonghu, kalite chonghuhe det tame lapen ke pudak un’e, laso kematha ke ahut pen ahut si dochot, atur kero pon ason. Ehin pen ke, lake latum a’ot pen isi aro lo halake kepamesenji aphan kelar sungpik. Lapuson abangke ephong kanghu pen ke aning ingsamse: Lapuson heihei kamatha hala bang amar mentune kemesen theklok pen asoi keme aling amethang amar ason kacherai detji kabor’i. Laso ajoksi Ne kepu labangso akematha kecheng adim ke kopine joike pen menmen non kehumlok lason kali, bonta laso amonit along ke alang methang a’ot lo.

Madutame latum methang alamm heihei lapen asai heihei en pen latum a’binong arje chepaklang thek. Laso abinong’et arje ke, lake ahok, latum a’ot lo. Jongsi nang inut kek’kek kang’kang ason kaningje thek abang, tangte nang ke kek’kek kang’kang a’ot kedo abang lo. Jongsi nang ot ke kulikjik, tangte nang sai ta kulikjikpo, lapen nang bang aphan kachongthuiji ke joipikpo. Jongsi nang’ot pen kapherememe abang pulote, nang lam heihei ke arjumeme tahai, bonta nang sai heihei along laso kapherememe a’ot abidi ke dipthip un’e. Jongsi nang ke kaselet a’ot si dobom tangte nang kaningje alingta arpu pen kachepajokji aphan keklemji rirokpo lapen seletpik, lapen asai heihei inglenthonji lapen ninghanghe’rem, lapen ahok aphan kepatu ke thekpikji. Jongsi nang’ot ke kamunthithek, tangte nang lam heihei ta athe kero saiseji, lapen nang sai heihei tame ahok pen kemesen si nangthek longji. Jongsi nang’ot ahokpet, tangte nang lam heihei anta chenamsi angthikpetji lapen nang sai klem aling ta pacheton pame, thangnat ason ta ahemphu aphan aning pa’oilak ason klemkle. Jongsi nang’ot ke katherak meme, kalite tangka amek kethe tangte ahut pen lahei pensi nang ning plengset ji, lapen mathathe pin si avive, otlangno akam heihei hala monit joike pen katengne thekthe lapen halaso pen si monit aning paso ji. Ne keputang asonsi, jongsi nang’ot ke kachongthui, tangte nang sungpik pensi haladak pen nang methang chepajok unji. Nang kopai aphan chiki nangne haladak jongsi nang akaprek akechokche ave te, tangte nang kachongthui a’ot ke avedet po. Jongsi halason thotsi nang kamatha tangte, chenamsi nang ke ning ingsamse lo. Ne lam heihei do’an, apor tin Ne kaningje, do’anta kadokave arat aphan si kejongdam lo, inut aphan chot kalite eson ajat abangphu aphan chot kali. Atheke lason lo nang eson alam pen chot ke Ne phan pachobaibe pu hala akaprek ason pen ke nang Ne phan pachobai un’e pu pudak thekthe. Ahok aphan kiribom along, ajahak arat atum ke latum ning kachethe chepangbo det latum kachepangri katora ahut. Ajahak arat atum ke Ne phan ahok akenangji pen che’obup hemtun kachekak phun ahut, ajahak atum ke Ne phan che’o tekangbup ning arong lapen arong’aje kiriji aphan. Ajahak arat ke kangting arlok kloji setame akathe’ang along rengji lapen puthot karjong kangthir asai pen ning arongji. Ajahak arat ke ajirpo kapinkhat alam patepek lo katherak meme latum akhi pen ning chepangsamji aphan, lapen non anta latum akelet chechini’un’e lapen keklem ta chelarle. Ajahak atum ke malomso aphansi Ne men aber kedochot Ne keraikom kelongji aphan, hala akaprek atum ke masapso si Ne phan chehodai hai chot saijokje pen atheke latum chethe aphan si ke’ot lapen kithi aphan kaphere ajok. La heihei lapen akaprek otlangno lapen anparta, alon kave akam an laso a’ot pensi monit aning aklong pen latum ajir dingklui pen Ne phan chongthui tanglo kali ma? Ahoklo, Ne chini monit atum Ne phan kachongthuiji aphan kachesik mek kali; latum kachongthui ke isi kahache ahut pen kepaklang latum a’ot lo. Baduta Nephan kachongthuiji aphan aning hanghe, lapen baduta aning arongre atheke latum kopine Ne phan kachongthui akam keklem ason. Ehin anathu ke, latum kaphere pen ok klemhur, latum lason kalima? Lasi, nang kosonsi lahei kachongthui pen kejok longji mathabom, lapen kosonsi non kedobom pen kachelarji le kamatha kali ma?