Kachongthui: Eson Sodak Katora (2)
Monit a’ot ke Ne pen keplang a’ot pen cheprekpik, monit kahingno’tang a’ot ke Sobar pen si do’an ta kepangcheng; monit a’ot ke kepangje’tang lapen Sobar kephangno’tang lo. Hala monit akai aphan alang kahingno lapen kelangnodak anat si tevar ponlo. Monit ke ahok kalite kangthir atomon teprin along’le kethe keding kali, lapen non anta ong’e a’munit si kathe’ang along kereng. La a’potsi, badu aphan ta mahang kethek ahut pen ahok a’ot ke long pon un’e, lapen inutnat ta kahache pen Arnam aphan kaphere lapen alam karju a’ot ave, la alar ke, monit atum kelongtang a’ot ke Arnam aphan kepatepek, Arnam alam karjuje, lapen ahok aphan kanghon ave. Labangso a’ot pen katora henlo Ne kachingki-chethan ji ning kehang – kepachobai alamthe. Kepachobai henlo anuttin aphan ta Arnam pen kapabin dun atiri. Laso a’katora ke monit along si dochot, Ne long kali, ajahak atum arjuji: Monit atum kado kave ta Krist asonsi do’an amonit labangso apirthe along reng lo, tangte kosonsi monit a’ot heihei ke Arnam aphan pachobai lo, seta Krist ke kali det? La henlo katora la nangtum aphan than peklar vek nangji.
Monit akhei kedobom atiri ke a’karjong kachelarvoi henlo. Akaprek alam heihei penke anuttin abangphu ta monit achethe ke ok pensi ale kelong halatum a’karjong kachelar ahut. Inut a’monit arpum hache det aphi, ansi chethe ke reng bom ok keleji angdeng ledamde’tik anke, halake akejutsi apor lo, akarjong abang ahom che’o tekang ahut’an lote. Labangso aron ke puthot cherui thubom, lason monit a’karjong pen vangbom dambom apor pen apor, lapen lasonsi monit a’khei kerengji aphan pachokbom lo. Hala ok a’chethe ta karjong aphan a’chethe lo, lapen monit a’karjong pensi monit a’ok kerengji archak pidun lo. Lason ta pudam’me, anuttin achethe ta a’karjong pensi vanglo, lapen chethe ke ok along dover’ve. Setame, monit a’ot ke a’karjong pensi kevang, a’ok pen kali. Akarjong pensi monit atumta Sobar sat kelang kachetong pu latum chechini, kapanahok lapen kaphangno ta. Lahei ke monit a’ok pen chini un’e. La apotsi, monit akhei ke mathathe’pin pensi ansose kangting, kangthirthe muchot pen ansose hingno muchot, monit lapen Ne methang angbong adak ansose pachehelo lo, lapen monit akhei a’chethe ke ansose ingting muchot nangcheplang lo. Sobar ke monit akhei akarjong aphan asoi keme pen ot’thip, sonsi, jasemetpet monit a’ok aphan ta Sobar si cheraidet lo. Kosonsi lason a ok lapen lason amonit akhei ke Arnam aphan patepek’pe detji lang? Kosonsi latum kahache pen Alangli kereng rappet thekji lang? Sobar aphan Ne tomon angbong along kevar chor atheke la Ne phan kepachobai pen apot. Kopuson si monit atum, tangte, latum jokvan pen kachelang thekji? La apotsi kepachobai ke monit akhei a’ot lo, Ne ning kachethe ke ephong nangtum laso athe chini lote, nangtum Krist pen kevang a’ot aphan ta kroi thekpo. Hala ok kachepindeng Arnam a’karjong lake Arnam a’methang a’ok lo. Arnam a’Karjong ke jakong thepik; Alangli ke theparpik, kangthir lapen ahokpet. Son thakthak si, Alangli ok anatta jakong the’o, theparpik, ingthir’et lapen ahokpet. Lapuson a’ok pensi monit a’khei aphan ahokpet peman lapen ale pado thekchot, halake kangthir, ahir asang lapen jakong thepik; Alangli keklem a’ling ta ahok aphan arkan’pet pen klem un’e, hala keme a’ot lapen choklim kangsai aphan karkan ke aphi lo, Alangli ke Arnam a’Karjong Kangthir aphan kepachobai meme ason thangta klemkle. Arnam a’karjong ke ingthir’et lapen sonsi Alangli ok aphan Sobar phangno un’e. Alangli ok ke isi kevang kacheprek do hala monit a’ok pen. Lasi lake monit lo, Arnam kali, alangli phan henlo Sobar pen kephangno tang: Sobar ke mentune seta Arnam a’ok kephangno ji pu un’e. Lasonsi, abinong’et ke setame monit lapen Kristo elongpet le do puta, monit aphan chot kapacherai akam ke’en, lapen Sobar apham along kapachedan. Kacheprek lake Kristo aphan kejutje’pin anta Sobar kaphangno pale dam un’e, atheke Sobar ke mentune seta akangtui nei adim karlu dunji ajakong ave, lapen mentuneta Arnam along patebok dam un’e. Pini, nangtum kadokave ta chini pame nangji, lake monit akhei anchot, Sobar pen kaphangnotang ason, la Nephan kapachobai ver, kapachobai alam along ke mentune seta Kristo pen masapta kacherap damji ave.
Kadokave a’karjong ta Sobar pen kephangno’tang anke Sobar abi along kedo kachingnang avaikang along si do. Kristo aphan kekroi atum anchot lo kacheprek, kejoklong Sobar kapangrum ahem pen, lapen pini Recho arat along an kevan long. Lahei arat atum ke mentune seta Sobar kachongthui along dode lo. Setame, monit aot kee monit aok alongsi angkur nonpu ta chesakthip lang, lake lason lo nang karjong le jok longdet setame nangtum a’ot ke aphrang asonthot lo, lapen Ne phan kepachobai ji aphan ke phant pharo si dobom lang, la apotsi Ne sai lapu’an ajak kapeding, nangtum a’ot chekhang un’e tik an. Non nangtum kado kave ta chepadukpik nangji adim alongsi dobom lang nangtum akam kache papleng peme unji aphan, seta nangtum anutin ta Ne phan kepachobai lapen Sobar asat along kacheruithu, hala kapangrum adim lapen nangtum abarim achethe along kachevoithu un’e kali – lake kapatepek un’e ahok alam. Hala bangso apor ahut, nangtum un’e detji monit akhei achethe kachepaklangji anta kalite monit ason non nang keklem ason anta, kesodak alamke, nangtum kevirdet ji lapen aparta hala, kangtingkuk adim jutjepin, akele kachenek, pen mentune seta chekirla un’e detji. Lahelo nangtum aphrang kebi’tang. Ne ke nangtum aphan lasonsi nang pachini bom lo, aphrangsi ke, la Ne sai akejoi keplangple detji, adunthu ke, la nangtum kado kave ta kathe’ang arni along kedo longji, Ahok along. Ne sai akejoi kacheplang lake kethedung katora kali. Akethenei alam ke nangtum ning arong achethe kelong lapen manghumeme nangtum aphrang aphan helo. Ne Sai ke monit a’karjong kapejok dunbom asai lahelo. Jongsi nang karjong Sobar arideng si klochok te, nang bang arpum aphan ta ningkangsam pen dolongle detji. Jongsi Ne nang bang arpum aphan raikom bomtik, nang karjong seta Ne ka ora arum si dolong vekji. Jongsi Ne nangphan chenamsi nang kelang selet pu asonte nang bang arpum lapen nang karjong ta Sobar arideng eboi vetsi klochok po. Nang kachetongji munthi ma tangte? Jongsi mo arnisi Ne lam heihei nanglong pen ingbodet tangte, Ne akaprek anta nang phan Sobar arideng kadokave hodaiji. Halaso, pensi nang phan kesungpik kachenek phonangji, Ne ning kithi hamhetik an, kalite Ne jungjung ta nangtum aphan kejok un’e pin amonit ason pesungji, nangtum aning arlo Ne phan kepachobai mentune ta chelarle detji.
Nangtum non kado kave ko’an ma kepaprap’un nangtum methang chelang nangji, ko’an ake’ong si Ne phan kepachobai ji nangtum along kedolang kachethek longji aphan. Ne ning dingde pin lo nangtum kethak alam kanghong bomji. Ne pen kachingki bom along mathakrang pen klemri. Ne mentune ta monit pen kajui akam klemkle. Ne kopine keklemji la ningje lote Ne la klemvek ji, Ne ningthe lo nangtum anuttin ta Ne lam heihei jasemet pet kedeng abang plangpo, lapen lake sonthan alamjir ason pu mathathe lo. Ne kar’i kopima lake nang long pen theklongdak akam henlo, kamatha jongjong kali. Adun ke, nangtum Ne karju an alamthak nangpivek nangji, halahei ke aber ason henlo:
1. Jongsi nang ke ahokpet inut sai kklem-bang, Ne pharman thirklong pen sai klem un lo ma, thangnat kacherap kalite ning ar’ot avepin pen?
2. Jongsi nang phan Ne mentune ta kero nangpipe pura nang chethek long seta nang kai dingpi seta Ne sai keklemji aphan do unji lang ma?
3. Jongsi Ne nang phan pangsamhek setame nang ansose kabor’i pathe’si, thangnat chepu thekthe angbong sita Ne sai klem thubom unji ma?
4. Jongsi nang Ne pharman chepadam det aphi, nang kehang ason aphan asap ta Ne ning ingsamse pute nang ning cheparunsi lapen Ne pen ninchingsamse si kalite ansose jasemet ning kithi lapen nang ington ji ma?
5. Jongsi nang ke kaita ahokpik, Ne phan chinghon pik, seta nang ke keso un’e akesung lok kepho, keduk lapen jirpo atum lapen chepho chero atum ta nang’o et, kalite jongsi nang kai along akaprek-kopai kelangno heihei pen ning chepading nang seta, nang ahok lapen Ne phan kanghon do thujilang ma?
6. Jongsi nang ning arlo kopisi kamunthi ma laso ateng pen thangnat ta Ne keklem pen kacheton ave det lote, koson lo nang phrang kedam atovar ke?
7. Jongsi nang kelongji ning kethe ason thangnat ta longledet lote, nang Ne phi kedun bom abang cheplang unji ma?
8. Jongsi nang mentune ta ke’ang dam cheni pameme lapen Ne sai aphan kamatha ave ta nang Ne lam karju abang plang unji ma hala kemang avepin pen kangsai lapen klardakde pin abang ason?
9. Nang Ne lam heihei Ne kethantang an lapen hala Ne monit akhei pen kedo rappet ahut keklemtang an nang khi chebirti lo ma?
10. Nang ke Ne phi ahokpet kedun abang plang unji ma, Ne phan nang kai isi ning keding pen kesung chechakji ning hang ma, nang thangnat longle det setame?
11. Ne pen ajoine, nang kapaphrang abang, kemang, kalite nang phrang kerengji atovar aphan kachesik plang unji ma?
Lahei akarju helo kepadu si nangtum pen kenangji ason lo, lapen nangtum kado kave laso karju Ne phan lamthak Ne pi thekji si ning thelo. Jongsi nang laso karju pen eson sonni kepaplengtang dolo, tangte nang bor’i thei bom nangpo. Jongsi nang isinat ta lahei karju pen kepaplengji ason ave te, nang ke, hala inut meherang along kevarchorji abang asonthot lo. Lapuson abangphu atum aphan ke, Ne kepuji ake’ong alam ave lo, atheke latum Ne phan kachedonde amonit atum chenam lo. Kosonsi Ne lason atum Ne phan asoi kelong aling ta Ne phan kepachobai thek abang aphan Ne hem arlo kebi thek po? Hala Ne phan aling apor seta Ne phan kepachobai thek atum aphan ason ke, Ne latum keklem asai lang pangchingji akaprek aphan chesik chedang’de ako. Jonghe seta, Ne phan kepachobai thek atum anke, ajat seta, aling ason pen seta, mentune ta tengnene detji. Latum aphan Ne ning arlo chebiverji, lapen asoi keme inghong si latum kahingno keklemtang heihei apot anam piji. Hala akenangji ason Ne keputang’an kado kave katora aphuthak nangtum methang methang asat chelang non. Ne ningthe lo nangtum kadokave ta lahei sikjit pen matha thekpo lapen Ne pen kachingki mathakrang’kre lo. Tebokhet nangtum aphrang Ne phan nangtum kipitang alamthak Ne phan kenangji ason an Ne kelangji. Halaso apor ahut, Ne nangtum pen thangnat akele kenangji ason ave lo lapen ansose kapacheretoi aphan choningriji apor nangpipe lo. Alar ke, Ne jakong pen si Ne cheharjakji, kebi nangji abang ke bibomji, nongnam kepiji atum aphan nongnam piji, Sobar aphan kahodai ji atum aphan ke Sobar aphan hodaiji, jasemet kapesung nangji atum aphan ke jasemet pasungji, lapen kapevir nangji atum aphan ke phangno etji. Setame, haladak hala nephan kepanong arni heihiei ke Ne phan kepasiksak dunji abang baduta avelo. Nang Ne lam heihei kroi ma? Nang alar kehui aphan kroi ma? Nang kroi ma hala kahingno atum, Ne phan kachongthui lapen kepachobai atum aphan pasung jip pu? Nang halabangso arni kevangji prapjin seta kalite derjon seta ningkethe do ma? Nang ke hala inut kachenekji aphan kaphere thektik abang ma kalite inut hala Ne phan kepatepek abang ma latum ajak dingpi kesung aphan ning chepading seta? Halabangso arni nang kele ahut, nang halatum angbong pen inut ning karong lapen kangnekmon abang ji ma kalite nang ke kacheru charnap lapen aso kachardeng abangji pu matha thek ma? Nang matha loma Ne phan kekroi arsikjit pen phant pharo chok lo kalite phant pharo ning kebi sido? Nang matha loma chereset pen kopuson alam heihei lapen nang kam heihei athe lapen abe kachinghoi pen nang phuthak keplangji alam? Nang ahokpet pen ningthe pon ma? Kadokave Ne lam ateng si kepaplengji aphan kalite kaphere thirik ma nang ke Ne lam heihei kepaplengji aphan? Jongsi nang ning kethe do te Ne lam heihei prapjin kepachekokji aphan Ne dam po, kosonsi nanglam heihei lapen akam heihei aphan nang chehok ji? Jongsi nang Ne kedamji aphan ta ning kethe ave lapen Ne lam heihei prapjin kepaplengji aphan ta ning kethe ave, koson si nang Ne phan lahei kekroi lo? Nang ahokpet chini ma kopi aphan si nang Ne phi kedun lo? Jongsi nang akemang ke ajongjong si angkang kepathe chot pen ladak nang thangnat nang methang chepasung nangne. Jongsi lake ahirjume kelongji aphan lapen kevangbom akevir pen kachepajokji aphan pute, kopisi nang emthang kachoklem aphuthak chematha pameme det lo? Kopisi nang methang charjuje det. Ne akenangji apun chok loma pu? Kopisi nang methang charjuje det kevangji ahirjume kedeng dun longji apun dolo ma pu?
