Kangting Kepangrompon pen Chepajoknon, lapen Nang Arnam Aphan Longpo

Kopilo kangting kepangrompon puke? Laso “kangting kepangrompon” pu kipudam athe ke monit atum aphan Sobar kachongthui, kapaheno, kekotthip, lapen ninghang aling kacharipon henlo; Sobar kepangrompon puke kithi atomon kejap si kepangrompon aphanlo. Kadokave komatmat ma Sobar akacheja arum kedo atum doan ke kivirdetji si phovekpo. Kopuson si nang Arnam aphan kekroi longdet aphi laso kangting kepangrompon pen kachepajok unpo? Ephong ke nang athikdut pen Arnam aphan ardomlo, Alangliphan si angton pen nang ning chipilo, halason ahut si nang ning tame Arnam aKarjong chejaponlo. Alangliphan angton pen kachipidetji si nangmena aphan nang kethe ninghanglo, lapen laso apor ahut ke, kangting kepangrompon pen nang kejok long tanglo. Jongsi monit atum kadokave keklempon ke Arnam aphan ningpangsam lapen Alangli kenangji ateng pen si dolo, tangte alang ke pima Arnam alamm angbong si kedo abanglo lapen Alangli kelana lapen kerai arum si dolo. Jongsi monit atum Arnam alamm ateng klem thekthe, jongsi latum ke Alangliphan kapachobeidetji kaiketa keklemji rirok, Alangliphan ninghang binong kalipin pen si cheparjanbom dobom, lapen Alangli kerengbom along kroidunde – tangte laheihui kadokave amonit atum ke kangting kepangrompon arum si dolo. Monit atum matmat ma Arnam pen akejok longdundelang atum ke Sobar kepangri arum si dolo; lake, latum kadokave ta kangting kepangrompon arum si do’etlo. Komatmat ma Arnam aphan kekroikre atum anke Sobar kepangri arum si dopetlo. Komatmat ma Arnam kerengbom kekroidun atum antame Alangli katheang along si kedoveklo pu aphan kali, pima matmat si Alangliphan kekroidun atum do’an chenam ta Alangli lammthe angbong si kedo kali mate Arnam aphan chehodaidet thekthe. Arnam aphan kekroidun monit atum ke angdeng do, lapen athema alang Arnam aphuthak kachini avedet, alang ke hako aron heihui angbong si nonpu dobomlo, kithitang alammthe angbong, kangting akai lapen thangnat chipu thekthepin, Arnam angton pen pangthir pememe mate Alangli choklim pen longle. Laso apot si, ningjejepin ta lason si dolo pima komatmat ma Arnam aphan kekroikre atum anke kangting kepangrompon arum si dodunlo, anparta matmat si Arnam aphan kekroi atum do’an tame laso kepangrompon arum si dokok tahai, pima latum along Karjong Kangthir asai duredetlo. Komatmat ma Arnam akangjinso lapen kadiya kelonglelang lapen matmat si Karjong Kangthir asai keklem thek longlelang atum do’an ke kangting kepangrompon arum si dopetlo; lapen ongdung apor ke, lasi monit atum Arnam akangjinso masapso si chehok longchotlo tebonta Alangliphan chininedetlo. Jongsi inut amonit Arnam aphan kroilo tebonta kangting kepangrompon arum si alang kai ongdung apor ke dolo tangte, laso amonit akerengbom ke ajor ingbo tanglo – lapen tangte matmat si Arnam do pu kekroikredet amonit atum aphan kejongdamji ke kopi si akenang dojilang?

Kadokave matmat ma Arnam asai kedeng thekthedet atum anke, mate Arnam asai dengdunlo bonta Alangli akenang ateng paplengdun un’edet, lason amonit atum anke kangting kepangrompon arum si dopetlo. Komatmat ma ahok aphan kiri atum anchot lapen Arnam akenang ateng pen kapaplengdunthek atum doan si Alangli pen hirjume longpo, lapen latum anchot si kangting kepangrompon pen jok longpo. Komatmat ma kejokjelang, ajahak ahormu si kaiketa kacheparidengthiplang atum, lapen alangtum aning Arnam aphan kachipi thekthelang atum anke kithi atomon kejappon angbong Sobar kebengthip arum si kedobom amonit atumlo. Komatmat ma alangtum mena adeng aphan anta athikdut kali, matmat ma Arnam ketoi asai keklem athikdut kali, lapen matmat si alangtum arpu kardomhem along cheklem kethekthedet atum doan ke kangting kepangrompon arum kedo amonit atum saidelo. Komatmat ma kardomhem achethe chenam si kapasiksakdun, matmat ma chinilor pen alangtum akortemar lapen angjirmar angbong kapachetonte asai keklem, mate matmat si abe abe kedo amonit atum anke kangting kepangrompon along karnuknei arum kedo atum saidelo, Sobar kebengthip along. Komatmat ma Arnam pen akachepho kememedet atum an, matmat ma kaiketa akele tangka kapadamthap akar’i kedo, matmat ma ale kelongji aphan kaike ninghang, lapen matmat si alangtum akun heihui kachelarji akiri kavedet amonit atum doan ke kangting kepangrompon arum kedo atumlo. Komatmat ma kamathakrang lapen ahok along alangtum keklem arsikjik pen kalidet, lapen matmat si Arnam aninghang ateng kachetongji kiri kavedet atum, alangtum mena ok ningpangsamji aphan si alar ke kirichot, lason amonit atum tame kangting kepangrompon arum kedo atumlo, kithi si telomhetlo. Komatmat ma Arnam apharman keklempibom ahut tame kachongthui lapen kachobei pen si do, matmat ma Arnam pen kachepho ninghang ateng pen kalidet, mat si Arnam aphan kapachobei, lapen mat ma kaiketa mena apharman bidi klembom amonit atum doan ke kangting kepangrompon arum si dopetlo. Kadokave komatmat ma Arnam aphan chingkimesen pen kanghon thekthe, matmat ma ahok aphan kiri dundedet, lapen komat si alangtum akun heihui kachelarji ahin ardi kipipe amonit atum doan ke kangting kepangrompon arum si dopetlo.

Jongsi nang le Arnam akero charju ingtungduk, tangte nang aphrangsi ke Sobar kangting kepangrompon pen chepajokdettha, Arnam aphan le nang ning chingpunon lapen Alanglihin le angton pen pangnodunnon. Nang non keklembom ason along Arnam akero pijima? Nang ning Arnam aphan nang pangno’etlo ma? Nangphan Arnam kenangji ateng si nang asonson keklempontang loma? Tangte latum ahok akrong pen si doloma? Kadokave angton pen nangmena aphan chelang pemenon lapen Arnam alam kecho lapen kejun ahin mathathipnon; nang ning Alangli thengno le chehodainon, Alangliphan kanghon athikdut pen donon, lapen nang mena aphan Arnam apharman le apor chipinon. Komatmat amonit atum lason le keklem lote Arnam akero chenam si longvekpo. Kadokave matmat ma Arnam aphan kekroi, tebonta ahok aphan ridundedet, Sobar kepangrompon along pen masap ta kachepajokji akrong ave. Kadokave matmat ma alangtum akai chingkimesen pen kedodun kalidet, matmat ma bang athengno kacheklang le ahin kaprek bonta alangtum anung lote kacheklang akaprek, matmat ma alangtum aot-adur ke pherememe, resakjak, lapen Arnam along athikpet kalidet tame kacheklang ke ingdukjin ason, chepaningdingthek, lapen kanghon do – lason amonit atum anke matmat ma kangting kepangrompon arum kedovek apharman atum binonglo; latum doan ke phurui pen isinat atum saidelo. Komatmat ma alangtum mena ale aphanchot si Arnam aphan kekroidun, matmat ma mena aphan si kechoklo pu kachiputhip lapen kethek ane kachepathe, mat si kachepaklangthap, lapen alangtum mena aman-peng aphan si kacheraikom amonit atum doan ke Sobar aphan si chinghon atumlo lapen ahok aphan ke khamkhelo. Laheihui amonit atum ke Arnam anghor aphan chinidundedetlo, Arnam aphan aning aklong pen ru-thai thekthedetlo, alangtum mena jongjung ale lapen alangtum hemtun ale aphan si kaiketa chemathathiplo, Arnam aphan amethang apor kachipiji pu kadokave ason che’o’et thekthedetlo, lapen Alangli lamthe pen kerengredet amonit atum doan ke Alangli lamthe pen angtan si dolo. Lason amonit atum doan ke Arnam akero longlelo.

Monit aphan Arnam kapinchong ke, lake pima latum Alangli keongparpik chehok longji lapen Alangliphan sakhit kanghon thekji aphan; lason pen si, Alangli katheang along monit atum dolongpo. Pini arni, komatmat ma Arnam aphan kanghon thekthedet atum doan, Alangli anghor aphan ardi chininedet atum saidelo, alangtum aning angton pen Alangliphan chipi thekthe atumlo, Alangli ning aphan alangtum mena pu chepon thekthedet atumlo, lapen Alangli anghor aphan alangtum mena pu parphang un’edetlo – lason amonit atum do’an along ke Arnam akatheang masap ta turtelo, lapen latum ke pipotma kangting kepangrompon arum so kadokave ta dopetlo. Latum ke cheklangdak pen Arnam aninghang ateng aphan abirudhe kithur akrong si damlo, lapen latum asontin asai along masapsonat ta ahok puke avedetlo. Latum do’an ke Sobar pen si inghan kangther along chilungthutbunglo; latum do’an ke kangting kepangrompon arum si pima kedopet atum saidelo. Jongsi nang Arnam alamm heihui cho lapen junlo lapen Alangli aninghang ateng ardi chipidunlo lapen Alangli lammthe heihui asai klem’ilo, tangte nang ke Arnam apharmanlo, lapen nang ke Alangli lammthe angbong si kedo abanglo. Nang Sobar kachepahemphu pen chepajokplot ingtungdukma lapen Arnam akatheang along si kerengji ninghang doma? Jongsi nang le Arnam alammthe heihui angbong si do, tangte Karjong Kangthir tame Alangli sai kacheklemji avarsai longponpo; nang jongsi Sobar kepangrompon arum dolo, tangte nang ke Karjong Kangthir aphan asontin avarsai pipelo. Monit atum along Karjong Kangthir asai kacheklempon, latum along Alangli katheang atur kipipon, lapen latum aphan ningkethe Alangli kipipon ke malomso aphan anchotsi plangji; jongsi monit atum chereredet lapen ardi chipi dundedet lote, latum along pen Karjong Kangthir asai athak damphruipo. Monit atum jongsi Arnam alamm angbong le dodun, tangte latum along Karjong Kangthir tame dopo lapen latum along asai cheklemponpo. Monit atum jongsi Arnam along angbong dodedet lote, latum ke Sobar pensi cherappet dopo. Monit atum jongsi kahenodak akun pen dolote, latum ke Karjong Kangthir asai lapen kedodun ta longledetpo. Nang jongsi Arnam alamm heihui ahoi angbong le dolo pulote, lapen jongsi nang le Arnam akenangji angkang along dolote, nang ke Alangli pharman abanglo, lapen nanglong Alangli sai cheklempo; jongsi nang le Arnam akenangji ahoi angbong dodedet, bonta Sobar kachepahemphu aber si dodunrong lote, nang ke chenam-chenum si Sobar kaphangno along si dodunlo. Arnam alamm angbong kedodun lapen Alangliphan nangning kachipidet pen anchotsi nang Alangli kenangji ateng chetongji; Arnam kaningje ateng si nang klem nangpo, nang kereng ke Alangli kaningje alamm ateng si kecheng atiri lapen nang kai ahokpet peman nangpo; lason pen anchotsi nang ke Arnam apharman chemanpo. Jongsi nang chenam ta Arnam aninghang ateng pen cheklempon lote, nanglong Alangli sai cheklemponpo, lapen nang ke tangte Alangli hirjume arum si dodunpo, Alangli katheang akacherap along si dopo; Karjong Kangthir asai keklem nang longdunpo lapen Arnam kedodun aningkarong chematha longpo.

Kangting kepangrompon pen kachepajokplotji aphan, nang aphrangsi ke Arnam aphan athikdut nanglang lapen ahok kiriji aphan ning kehang donanglang; pima la pen anchot si kechoklim angdeng nang long unji. Kechoklim angdeng along kedodun puke kangting kepangrompon pen kachepajokji aphan akenangsot ahormulo. Kechoklim angdeng along kedode puke Arnam aphan athikdut kalidetlo; lapen ahok aphan akiridun ning kehang avedetlo; lapen kangting kepangrompon along pen chepajokji puke alam amat si klangkledetlo. Kangting kepangrompon pen monit atum kachepajokji aphan Ne lam heihui ke kepangcheng’i asonlo, lapen Ne lam heihui ateng pen keklemdun thekthe amonit atum anke kangting kepangrompon akacherapdunhet pen chepajok thekthedetpo. Kechoklim angdeng along kedodun puke Arnam alam akejapon ateng kedodun henlo, Arnam aphan athikdut pen kedodun angdeng henlo, ahok aphan kiri angdeng along si kedodun henlo, Arnam apharman si nangmena aphan chenam ta apor kachipidet kedodun henlo, lapen Arnam aphan aketer kavepin pen kanghon kipithek henlo. Komatmat ma laheihui angdeng along si dolo lapen laso thekprong angbong si dolo te pajo pen chelarponpo pima latum ahok akarnukkrung an lutdun longpo, lapen latum pima asai akarnuk kedambom ateng si chelardunpo; lapen mo kepajut ke, latum ke Arnam pen kelong amonit atum saise si manpo lapen Arnam aphan ingthirjir pen kanghon atum saidepo. Komatmat ma kangting kepangrompon along pen kachepajoktang atum doan ke Arnam aningkehang ateng pajo pen ridun thekpo lapen pajo pen la chinidunthekpo, kepajut ke Arnam kachikimeme atum si chemandunpo. Latum Arnam aphuthak akamathadamthap anchot le kabirtitedetji kali lapen Alangliphan tame chedandelo, bonta latum halahei kamathathap lapen latum along aphrang kachedandong kachibihup ason doan pen ansose si chepahelopo, lapen ingthirjir pen Arnam aphan akanghon alangtum aning along thurpo. Monit atum matmat si kangting kepangrompon along pen chepajok thekthedet atum doan ke angton pen ok si chepa’okdetlo lapen kachedanji si plengsetlo; alangtum aning along ke monit akamatha lapen kereng’ji abidi-sore akachinidam si plengsetlo, anpar tame alangtum mena kamunthidam lapen kachingvaidam si dopetlo. Kopima Arnam kenangji ke monit along pen isinat akanghon henlo; kopima Alangli kenangji ke monit aphan Alangli lam heihui pen chepangromthip lapen Alangliphan kanghon aning pen keplengset henlo. Arnam alam angbong kedodun ke, Alangli lam heihui angbong si kirilo pima latum lahenlo kiri nangjivek, Alangli lam apot Arnam aphan kanghon, Alangli lam aphan keklempon, Alangli lam apharman kerengdun – laheihui akemang henlo monit atum kichunji aphan chepeduk nangji. Arnam alam heihui ateng pen si asontin tame selam nangji; lason pen si Arnam akenangji ateng monit atum chetong unji. Monit atum jongsi Arnam alam heihui pen chepaokthip thekthedetlo, tangte alang ke Sobar kacheparidengdet isi angthanlo! Kardik langtha: Kopuan si Arnam alam angkur nanglong chesak tanglo? Kopi ahormu along si nang Alangli lam heihui ateng pen kedodunlo? Kopi ahormu along si nang latum ateng pen kedodun thekthedetlo? Jongsi latum le nangphan angton pen otthip un’edetlang, tangte latum koloso ansi dolo? Nang kai arnivang along, nangphan Sobar si ninghang aling keklem ma, mate Arnam alam ateng si nangphan chejaponma? Nang kardom heihui kecheng ke Alangli alam heihui kecheng atiri saideloma? Arnam alam akatheang adak-atur pen ajok nang kahenodak angdeng pen nangbarplot unloma? Nang kereng along Arnam alam heihui kecheng atiri kepon puke – lake kopima madu tame kilutvek nangpo. Nang kai along jongsi Alangli lam heihui ave pulote, kangting kepangrompon arum si nang dolo, nang ke Arnam aphan si chesonglo, Alangliphan si nang ke khanglo, lapen nang ke Alangli men aphan anongme pavedetlo. Lason amonit atum Arnam aphan kekroi ke chenam ta aot-adur meme lapen kasiksaklo. Alangli lam heihui ateng pen kopuan nang kai rengdun dolo? Alangli lam heihui ateng pen kopuan nang kai rengdundedet dolo? Nanglong kopima kenangji ateng pen nang kopuan si Arnam alam heihui longpon tanglo? Nanglong kopuan si chepangbodet tanglo? Nang lahei ason aphan arsikjik pen langloma?

Kangting kepangrompon pen kachepajokpon along kenangji ke Karjong Kangthir asai lapen monit atum chitikrup pen kajalangdun pasonni ta do nangji. Kopi apot si Ne kaningje pima monit atum ahokpet akrong along avelang pulo? Monit atum matmat si ahokpet akrong along kedo atum anke alangtum aning Arnam aphan kechengsi chipipo. Lake lahenlo arjidingklui pen kilutdunji aphan keklem asailo, pima monit akhei atum kaiketa kangting kepangrompon arum si dokok tanglo, lapen ningkan suri sose Sobar kachepahemphu aber si dolo. Laso apot si, laso kilutdun ke thangbakbe arnisi nini pen ke long un’e. Ne laso alam kepaklang ke athe pima monit atum alangtum mena angdeng kelongdunji aphanlo; ephong le monit atum kopima kangting kepangrompon chinilo tangte lapen kopima katheang along kedodun pu chinilo tangte, kilutdun aphan joikevekpo. Lake athe kopima nang Sobar kepangrompon chinivek nangji athe ke nang chepajok un’e aphrang penlo; laso pen aphi si nang chenam ta chepajokplot atovar longji. Pima laso pen lote kopisi keklemji ma ke, monit atum mena ninghang alinglo. Kemesen ahin pen asontin along kilutdun, lapen kedojoi pen kachonghonghedet. Lason pen anchot si nang Arnam aphan long unji.