Arnam Sai Keklem Amo

Athak pen langdamphrui pulote, Arnam non malom keklembom asai tang’etlo, lapen monit atum ta kangsai arni, ado kepho, ereng-ehu keso lapen Arnam alam kangsir-kangchap angdeng, lapen sai keklem atum asat kepho asonsi pholo, ado kipiji pu ahut akangsir, kithi asat kepho, kechokche atum asat kepho, lapen Arnam aphan kanghon lahei an monit atum an pho chetong’et ason si ketheklong. Bonta, angdengtin along kisung-kiduk phopikpo sita, monit atum Arnam akar’i ason chini un’e detlo. Bisar alam sai kachoklem asat kepho alam chethandam sinang: Latum doan kopi si ale kelong ma, kopi si kachini ma, lapen Arnam aninghang lote kopi plangji ma latum thangnat ta chinine. Arnam sai keklem keprap amo langdam lote, pini akai along monit atum ajat ta chephodundedet asonsi manlo. Arnam ke monit aphan si Alangli sai keklem amo chepaklang paphranglo pu itum theklonglo, lapen monit atum matha unchit angdeng an kapechun anchot kalidet si, sai amo kosonsi keklem ma monit aphan paklangdaklo. Arnam monit aphan kapinchong pangthim lapen Alanglilong pen ahokpet ale kelongji aphan, athak ketoktang asai angdeng an Alangli papleng nangkokji. Laso asai keklem pen akemangdam ke isi abitung amonit atum aphan Arnam jongsi kapinchong pachoklimji pulote Alangli kopi asai si klem nangji ma pu aphanlo. Lasi, athak pen langdamphrui lote, Arnam sai keklem angkung jut’etlo – bonta karjong pen monit aphan kapinchong kepachoklimji si pangcheng tanglo. Monit atum kachinivek nangji ason lake: Alangli sai keklem amo si kijut chotlang, bonta asai amat ke jutjelang. Bonta monit atum kamatha ke, Arnam keklem asai angkungtin ta monit aphan paklang etlo pusi tinlo. Pirthe aphan kachechardam lason ke chokchepik khangjanglo. Arnam asai keklem angthun ke monit atum aning kamatha pen cheprekdak lapen monit atum kamatha ason an along ta kachetonte ajok chepho nangkok titi; Arnam asai keklem angkung ke, chenam ta, monit atum kamatha pen che’un’e. Lahei pen ajok Arnam agian paklanglo. Ajat ason along ta monit atum akamatha ason ke kapasiksak ason mandet pu thekpronglo, lapen monit atum kamathathap ason an aphan Arnam dengmolo, lapen lake monit atum kepho kachetong pen chetheklonglo. Arnam sai keklem paprap’ong pusi kadokave arat atum mathalo, lapen Arnam sai keklem ke monit atum chinidunde aphrang jut’etpo titi pusi tinlo, lahei ke latum kachini’un ajakong thangnat ta avepin ahutlo lapen manghu-mangram pen kedo ahutlo. Arnam sai keklem angkung ke lapuson helo. Arnam ke monit aphan jui’idet pusi ke’ongdung amonit atum ke kroilo – bonta lason le Arnam keklemji pu kamatha ta kali. Alangli sai keklem aron ke mathapeme pen klemthun; kecheng ke losei athak ardonchon pen mir apu aphan kelanglet ason ben, lapen laso aphi si kamatha pangtakji, lapen lahei ingsirdet aphi lote – monit atum manghuhakji. Monit atum Arnam aphan kachongthuiji bor’ilo, penang an angdeng anle klemchot sita Arnam aning ingsampo pu akamatha pen ajok. Ahokpet alam ke, koson si monit atum penang angdeng an keklemdun kabor’ichot le Arnam aning kangsampo? Kemesen ale kelongji aphan, monit atum manghuhak an si Arnam sai klemji, latum chininepin ahut si klemdut titi; lason pen ajok Alangli gian lapen Alangli koan kemesen, aman kethe lapen Alangli a’ot-adur koan ahir ingtangloma monit atum chini dunbomlo.

Pini arni, Arnam monit aphan kapinchong pachoklimji aphan sai pangcheng tanglo. Kechoklim atheng kemanji aphan ke, monit atum Alangli lam ateng pen kapeklang, kangsai lapen ado kepho phovek nangkokpo, latum asat lapen Alangli lam ateng pen kangsir ta chechak nangji (sai kachoklem atum kepho asat ason), lapen kithi asat ta latum chechakthip un nangji. Lake kopiloma pulote Arnam akangsai, ado kipi lapen asat kephobom ahut, Arnam aning kehang aling kekroi atum lapen aning pen Arnam aphan kero-karchothek, Arnam alam arju peme lapen amethang aphan kachihijimthek, laso ajok Arnam aphan ahokpet, ingthimlim, ingthirjir pen kanghonthek; lason pulote kechoklim abangphulo, lapen lake Arnam keklem kangtung asailo, lapen laso asai ke Alangli pachunvekpo. Arnam sai keklem aron pen apot kijut kosonji ma pu monit atum ripduntong nangnelang chethe atovar anat kilutji si latum bor’i nangji. Lake kenangsotneilo. Arnam sai keklem aron koson ma pura langdunchar nangne; keklem pen nang kachecharmek aphan nang kekhamkhedun cheplangdetji. Arnam sai keklem aron angbong pen koanbak si nang kachini dunlo? Nang koan si hukum karjulo? Alangli keklem asai angkung doan pen nang koan si ale kelonglo? Arnam jongsi nangphan nangkapinchong pachoklimji pute nang kroiji ma? Kechoklim abang nang man ingtungduk ma? Lahei henlo nangtum kamatha kapangchingvek nangji ason lapen kilutdun nangji.