Arnam Aphan Kanghon Henlo Arnam Aphan Ahokpet Kekroi

Pini, nangtum Arnam aphan kanghon lapen kachini kangtung akar’i dolo apot, ihin penke kisung kachechak lapen kachepangthir ta nangji, lapen kaprek ahin penke, nangtum eson anam tu nangji. Arnam aphan kanghon kacharli pen anpar ajat kacharli ason ta kepleng ave, lapen pudamdet tame monit atum akai arjon kekroi pen kacharlilong ke Arnam aphan kosonsi kanghonji. Ladak kipudam ke, jongsi nangtum Arnam aphan kroi pulote Arnam aphan inghon nangji. Jongsi nang Arnam aphan kroi bonta Alangliphan inghonhe lapen Arnam aphan kachinidam ave, lapen ning arlo pen nangketet ahokpet akanghon pen Arnam aphan inghonhe, tangte nang Arnam aphan akekroi ke ale avelo; jongsi, nang Arnam aphan kekroi, Arnam aphan inghonhe, pulote nang kereng pajoilo, lapen nangkai arjon ke aman kavenei angbong si dodunpo. Jongsi, nangkai arjon along, nang mantune ta Arnam aphan inghonhe mate aning paplengple, tangte kerengbom kopi athe si dolang? Lapen nang Arnam aphan kopi athe si kekroilang? Lake nang kachepaduk ale kachepavangve kali ma? La kipudamji puke, jongsi monit atum Arnam aphan kroi lapen inghonji, tangte alangtum anam tu nangji. Athak pen kopine ateng kacheparjan alar, alangtum aning aklong pen ahokpet asonsi chepherai nangji. Jongsi nang kilun lapen kekan aphuthak ning rungphom do, bonta kacharli-seke along ahokpet chepaklang thekthe, nang Arnam aphan inghon pu pumeji ma? Arnam aphan kanghon pulote ajat alam along ta Arnam akar’i ridam nangji, lapen nanglong ajat cheman tame nang arsikjit pen aklong alam tarlip nangji, Arnam akar’i riphetji aphan kabor’i, lapen halabangso asai along Arnam akar’i kethekdam kabor’i, Alangli nangphan kopisi nangkipi kangtung, lapen kosonsi nang Alangli kar’i aphuthak matha’e kedo akenangsot. Animona aphan: Nang kisung kachechak nangkok apor chetonglokpo, halason apor ahut nang chini nangji Arnam kopisi kar’i lapen kosonsi nang Alangli kar’i ason aphuthak kamatha’e thekji. Nang nangmena aphan ning chepapleng nangne: Aphrangsi nangmena aphan ke ihin anat chibivetnon. E’ok pen anpar amo kevangvenei ajat ta avelo. Nang Arnam aphan aning kepaplengji aphan si bor’i nangji, lapen nang arpu chepapleng nangpo. Halapuson kamatha pen, Arnam nanglong isi kangjangdong akatheang vanpo halaso akisung pen, lapen nangning ta karengme longpo. Bihek mate thetan tame, nang kopine alam pholok lote, aphrangsi ke nang nangmethang aphan ihin anat chibikok nangji lapen nang’ok aphan ale kevangvenei ason pusi hok nangji. Koan ma nangbang akemang kepapleng, hala ansi jokvan chelongbompo; jongsi nang non aphong kemang ason paplengpidetlo, mo aphong ke ansose si nangkehangpo, lapen la dambom ahut, nang nang’ok aphan ansose si chinghongbompo. Ebang ke kaiketa kar’i ason thedung-dung dolo; lake kaiketa akemang papleng nangji lapen arlo pen parengmever nangji pu nangpupo, lake nang kecho along tahai, mate kachepindeng along, mate ning kithi along, mate kaselet lapen kachepa’aini along kachehodaidun…. Nang koan si nangbang aphan kemang kepapleng, hala ansi nang’ok ta kechokdamde kemanji aphan akar’i nangbatpo, mo monit a’ok along harnukkrung kamunthi kedo, lapen Arnam kapinkhat ateng keklemkle, lapen methang aphan kachepangtui, lapen Arnam asai aphuthak kahonthe kedo angdeng an leletik. Koan ma nangbang arpum aphan kemang kapapleng pi, hala ansi nangbang along keledamde ason kebatji; nang kadure ason along majok ta ning nangrengnodun abang ave pusi nang mathaji, nang kaiketa Arnam kedam helovinglo pusi mathapo, lapen nang ningjepo: “Kosonsi Arnam lapuan aning kaheno unlo? Pipotsi Alangli monit aphan asap ta pasang longle?” Monit atum methang a’ok akemang akele papleng pidet lapen archodet lote, alangtum methang aphan si kachepavirlo. Jongsi nang Arnam aphan ahokpet pen inghon lapen nangbang aphan akemang paplengple, tangte nang theklongpo Arnam keklem ason doan ta koan lapuan akeme lapen kechok, lapen Alangli le nanglong kedo kachedan a’ot lapen nanglong akaheno ason aphan nangkangsai kechoklim chenam. Ahut pen apor nangleji Arnam nangphan adai nang’en lapen nangpekengpo lapen nangning thimeme avarmon ingthurpo, nangphan Alangli thengno nangpavangji aphan nangvungpo – lapen nang kaiketa mathapo Arnam keklem asai doan ta alon dopik. Sonsi nang mathapo lapuanset le keso ason ke’ong aret kali, lapen Arnam akanghon thepik pu. Jongsi nang nang’ok akeledamde along chetodundet lapen Arnam kedam helo’olo pu ningje, pulotangte nang kaiketa keso chechak nangpo, lapen kaiketa ning’oijinpo, lapen Arnam keklem asai aphuthak kamanghudunlokpo, lapen Arnam ta monit atum akeledamde lapen kisung aphuthak kangjinso avedet nangnak asonsi theklongpo. Lapen laso ajok nang sampungvet lapen ningduk pensi dopo, nang kopine thedung kelangrem kephonang ason ben, lapen lapuson apor pen nang kakhinde chengpo. Koan si nang lason ateng nang’ok along keledamde ason along chetodun hala ansi Arnam kedam kahelo pu nang mathabompo, mo Arnam asai aphan kekroikre kecheng anpin akaheno mandet an, lapen Arnam aphan kekhamkhe kecheng, lapen Arnam alam arjujepin chemandet an. Lasi, nang nang’ok pen khamkhe nangpo, lapen alanglong chethokdun nangnelo: “Nepenan (piso), nesomar, kemang, pangri-pangdon, hemtun – thangta nangchaknap ave! Nening along ke Arnam anchot, lapen ne Arnam aphan aning kepaplengji aphan un’an bor’iji lapen ne’ok aphan kali.” Nang labangso kacheparai dengvek nangji. Nang jongsi kaiketa lapuson kacheparai pensi dothip, anke nang mo ahokpet aphan asai klemlote lapen methang aphan ke chesaivet ahut, nang jakong chipinang’o’epin pen klem unpo. Kachethan alam, ihut isi inut bamonpo do alang tovar along ejon aphurui kangsam pen chekenghet theklonglo. Bamonpo abang aphurui humjok si aning along an bamraphet’lo, lapen aphithu ke aphurui abang kachereng pen bamonpo aphan archujok si pathilotlo. Monit a’ok ta phurui asonlo: Laso aklongsi alam ke akai kaphangno henlo – lapen la mo atovar along kachedam ingthimlim lote, nangchethe ke kache’onanglo kemanji. E’ok ke Sobar apharman. Laso angbong kedoji ketheparpik akemang, alang amethang aphan ansi chemathachot, alang karengme pensi ning cheparong ingtung lapen sai avepin pen kecho-kijun, thangnat asai klemkle lapen kaselet pensi kasengri, lapen laphan penang an angdeng an papleng’et lote nang kijut ke methang aphan chepachodet khangjangpo. Ladak kipudam ke, jongsi nang non le paplengdet lote, puthot aphong ke vangpen ansose si nanghangpo. Alanglong kaiketa theparpik lapen akimi-kimi akemang do, lapen nang nang’ok along kachethonrut ale nangcho’endun si alangphan ansose anong pathe lapen alanglong akerengme along nangpadopo – lapen jongsi nang laso pen chepajok un’e, nang methang aphan kachepavirlo. Nang Arnam athengno chethe chepalong unji-un’e lapen nang kijut ahut kopi manji, lake nang’ok aphuthak kosonsi khamkheji si paklangpo. Nangphan Arnam nangkerai lapen nangkangvai lapen nangkehok tanglo, bonta jongsi pini nang ke Alangphan aning pangsam ingtungte, nang ke ahokpet aphan asai pen paklang ingtungte, Arnam aphan ahokpet kanghon aning pen nang’ok aphan khamkhe ingtungte, aphi ke nang nangmethang aphan chepavirvekpo, lapen sonsi kilitpik akeso chingtang nangpo. Jongsi nang kaiketa nang’ok along chetorutver, Sobar ke pajopen nangphan nangjoilutpo, lapen nangphan chethe, mate Karjong nangkepapho avepin ansi nanglopo, mo nang aklong pen anta ingtingthir arni an. Mo nang akangting along dodun lote, nang Sobar aphatek alongsi dopo, nang Arnam aning along anpar ke dodelo, lapen halaso apor ahut nang Arnam do pu kroikrelo lapen Alangliphan obuppo. Lasi, jongsi nang Arnam aphan inghon ingtung pulote, nang anam tu nangpo lapen kisung ta chechak nangpo. Athak kacheklangdong akisung lapen thedung ningkachingduk, ansose kaporhi lapen dode-sangse akenang ave; alar, lahei ason-amung doan nang arlo chibivetnoi: ketheparpik kamunthi, jongjung aning kehang ason, lapen nangmethang kangsaidam, kamunthimek, lapen kemangdam. Lason henlo Arnam akar’i.

Arnam le monit atum athak pen kacheklang a’ot pen kachedan ta Alanglisai lo; monit atum kacheklangdak, kachongpengjeng monit a’ot pen kachedan, le pudam lonang, mate alangtum kedo-kethak aron lapen abe, alangtum ajutang lapen adichi, alangtum angtan pen keklemchot asai lapen thedung ningkachingduk pen pen. Bonta Alangli monit atum ahokpet aphan asai pavang nangji lapen a’ot chelang nangji pu nangkipu ahut, kechengsi kachedan’i ason ke alangtum arlo kachepatujoi akemang lapen kelangmek ason henlo. Nangtum athak kacheklang a’ot pen kachedanchot ke kisung’o kali; lake nang ning kehang ason nangkepacholongle asonlo, lake joike. Hala nangning arlo kedo akemang aphan keroklok ason ke, sitame, ke’oji kejoike kali: Lake nang nang’ok aphan chekhamkheji, lapen anam tu nangji, lapen Arnam athengno kisung chechak nangji. Lake jasemetpet monit atum akemang along henlo. Monit atum Arnam aphan kekroi chenglo pupen ke, alangtum penang an kechokche akemang chepangpen tanglo. Nang ahokpet ason aphan asai along vangve tangte, nang kemang ason an chokthailo pusi chemathabompo, bonta mo nangphan kopine nang chopholok ahut lote, nang chetheklongpo nangning arlo along kechokche kemang do’o pu. Lasi, Arnam le monit aphan choklim kaselam lote, Alangli pinchong si alangtum aphan pachichinipo alangtum along Arnam aphuthak kachini along kekhamkhedun koan kechokche kelangdammek do. Mo nang kemang chokche pu nang chichini lote, jongsi nang nang kemang lapen kelangmek ateng asai keklem ington thek lote, lapen Arnam ahukhi chechak un, lapen nangphan ajat le nangchopho sitame nangdim along charjapthip thek, lake angtheklo nang nang’ok aphuthak chekhamkhelo pu. Nang nang’ok aphuthak khamkhe lote, nangtum angbong ron kedoji khang un’elo. Sobar ke monit atum laso ateng kapakroiji aphan bor’ipo, a’ok akemang ateng kepaklem lapen a’ok keklem kangtung an ason man kepatheji aphan bor’ipo – bonta Arnam alamthe ke nangning arlo patheang lapen paklarchenpo, lapen laso apor ahut ke nang alinglo Arnam ma mate Sobar abe tong kidunji. Arnam monit atumphan kechengsi kapaklem ke alangtum aning arlo ason pen kapachedan, Arnam aning ateng kalipin ason doan akamatha lapen akemang pen kachedan. Karjong Kangthir monit aning aphan paphopen alangtum aphan patheang lapen paklarpo. Lasi ajat ason kacheman anung ke ron dovek: Monit atum ahokpet aphan asai kepavang aphongtin, mate Arnam aphan kanghon aphan asai pen keklem ahut thedung aron dolo, lapen a’ok pen kadokave me’et ason le cheklang pusitame, hala aning arlo akaharnuk along kithi-lapen-kereng aron, chenam chenum, dobompo – lapen laso ahir dojot aron aphi, ongdung apor kachelang parsik pen munthidet aphi, kerem mate kehai pu hok unji. Inut abangphu kangnek nangji ma kachiru nangji ma chipu thekthe. Atheke monit arlo ongdung akemang ke akaheno saide, mate kalite penang Arnam asai ke alangtum akemang pen chetonte, monit atum ahokpet aphan asai pen paklang lote, kapaklang anung isi thedung aron ke chengdutlo. Ahokpet aphan asai van tangdet apot, kacheklang anung, monit atum Arnam aningkehang papleng pipe aphrang lakha un’epin ningduk amekkri amu chepabupo. Lake laso aron ajoine henlo monit atum kisung lapen kachepangthir kachechak; lason ahokpet akisung. Ron nanglong kevang ahut, jongsi nang ahokpet pen Arnam anat arjapdunthip un pulote, nang Arnam aphan aning pangsam thekpo. Ahokpet asai keklem ahut kisung kachechaknang ke doveklo; jongsi, alangtum ahokpet aphan sai keklem ahut, monit atum along doan ason ta chokpet pusonte, alangtum aphan Arnam apun choklim selam jokplokji, lapen ron ta avedetpo, lapen alangtum kisung chechak nangnelo. La atheke monit atum aning arlo Arnam asai along akenangsot kali ason dopik, lapen atheke a’ok along kekhamkhe a’ot dopik, lasi monit atum a’ok aphuthak kachekhamke ansose angton pen charlithu nangkok. Lahenlo Arnam monit atumphan Alanglong kachechakdun nangji pu akeso. Nang kisung chetong lote, paprapjin ra Arnam aphan chardomnoi: “O Arnam! Ne Nangphan ningpangsam ingtung, ne Nangning kapangsamji aphan kijutsi akatora chechak ingtung, lapen koan akethe akanahok le kachetong nangji pu langdamdepin pen, ne Nangphan ning pangsam nangji!” Bangso kacherai pen, nang lason chardom lote, nang nangmena angthek along thirthip pen arjap unpo. Alangtum ahokpet aphan asai kepavang aphongtin, alangtum kachepangthir kachechak aphongtin, alangtum kelak aphongtin, lapen Arnam asai alangtum along kevang aphongtin, monit atum kilitpik akeso chechak nangji. Lahei doan ta monit aphan isi satlang saidelo, lapen lasi lahei doan arlo ta ron dolo. Lahenlo alangtum kitunang ahokpet anam ke. Arnam aphuthak ansose kaporhi lapen ahin-ahin kekat ke halabangso anam along asapsovet achet anchot. Lahenlo monit atum klemvek nangji asai, lake alangtum kepachunvek nangji, asai lapen arpulo, bonta monit atum kopima kesaivet nangji ason aphan ihin koivet nangji. Jongsi nang lason klemkle, tangte nanglong athak kacheklang akisung ahir ingtang jonghe, nang ahin-ahin kat jonghe, kadokave ta klemnakpo! La kipudam ke, nangning arlo along kachelar henlo nang athak pen kachechak akisung ardi do-ave kepachiniji. Nangning arlo a’ot chelardet ahut lapen nang ahokpet aphan asai klemdetlo, pulote nanglong doan akisung ta Arnam pen dengponpo; jongsi nangning arlo a’ot along kachelar ave, tangte nang jonghe kisung chechak mate athak pen jonghe ahin-ahin kat, hadak Arnam pen kedengpon ave – lapen Arnam pen kehokhe akisung ke sungnak’lo. Lasi, nang kitun anam Arnam pen dengpon ma dengponpe keplang ke nangning arlo kachelar doma avema, lapen nang ahokpet aphan asai pen klem ma klemkle lapen Arnam aning kehang kepaplengji, Arnam aphuthak kachini pemeji, lapen Arnam aphan kekroithip thekji aphan nangmena akemang lapen kelangmek pen chedan ma chedande ma. Nang jonghele ahin-ahin katdam sitame, jongsi nang mantune ta nangme akemang pen chedande, bonta athak pen asai lapen thedung ningkachingduk si rirok, lapen mantune ta nangkai aphuthak chemunthi damde, tangte nang kisung doan ta sung pakejoi. Jongsi, ajahak amonvar, nang kopine kaningje kangtungji do, bonta arlo ke nang mathapo halabangso alam kaningjedet ke akechok kali, hala kaningje pen nang korte-ingjir atumphan ale vangve lapen alangtum aphan akanahok dokok tahai, pulote nang halaso alam ningjejedetpo, arlo si sung ikrapjoipo pu matha pen, athe lahei alamthe ke Arnam akemang kepapleng unji apun ave. Laso apor ahut, nanglong arlo pen ron dopo, bonta nang abang kisung chechakpo lapen nang ningkedok ason an che’obup pusi ninghang rongpo. Nang Arnam aphan aningparongji aphan si laso akisung chechakji pu ninghangpo, lapen nang laso akisung chechak nang sitame, nang nang’ok along chethondamdelo, lapen Arnam aning ke plengdetpo, lapen lasi nang ta arlo pen karengme longpo. Lahenlo ahokpet anam kitu ke, lapen lahenlo Arnam aning kehang anamlo. Jongsi nang lapuson le klem, Arnam nangphan hirjume nangpivekpo; jongsi nang la chepalong un’e, tangte nang jonghe le chini tame, mate nang koan le ningje pajumethek tame, lahei ke thangnat aphan ta kalidetpo! Jongsi, Arnam aphan kanghon atovar along, Arnam le Sobar pen chedambom ahut nang Alanglinat arjapdunthip un, lapen nang Sobar anat chepangno thuthe, tangte nang Arnam aphan kanghon long un’etpo, lapen nang nangmena angthek along charjapthippo.

Monit atum aning arlo Arnam keklem asai angdengtin along, athak pen kacheklang ke monit atum angbong lamthe chepachoi, monit atum kaselam pen mate monit atum kachejokdun pensi amahang kethek ason. Bonta kacheklang anung ke, sai angdengtin along, lapen doan kacheplang along, Arnam athengno Sobar pen kaselam kachedak do, lapen monit atum Arnam aphan kekroi angthek along arjapthip akenangsot. Job kelak ahut pu entha, animona aphan: Sobar abang Arnam pen kachedaklok, lapen Job kopi kacheman ma lake monit asai lapen monit atum kachejokdun angthek. Nangtum along Arnam nangkeklem asai doan angdeng anung ke Arnam aphuthak Sobar keklem kachedaklo – lahei anung ke ronlo. Pudam lonang, jongsi nangle nangkorte-ingjir atum ahin kelangvi ason do, nanglong kaningje kangtung alamthe doji – nang kamatha ateng pulote Arnam aphan aning kepadono alamthe – bonta jongsi nang halahei ningjeje, nang arlopen kedono ason dopo, lapen lason apor ahut, nangbang arlo isi aron chengpo: “Ne ningje non ma nangne?” lahenlo aron ke. Lasi, nang laso aron along kachetong asontin along, lapen nangbang arlo ron kedo ahut, chorolo nang ahokpet nang nangkacheto lapen ahokpet akisung aphan, Arnam nangbang arlo sai klembom. Kepajut ke, nang alam abang ihin anat bivet undetlo lapen ningkithi ke amena amatsi jutkokpo. Lason henlo nang Arnam along kachetodun angtheklo. Monit atum keklem ason doan along alangtum kabor’i along isi anam tu nangji. Ahokpet akisung kachechak avepin pen, alangtum Arnam aphan aning pangsam un’e; alangtum Arnam aphan aning kapangsam adung an ta le thekthe, lapen alangtum lamthe hang-taram pajoilo! Lahei kataram pajoi Arnam aphan aning pangsam unji ma? Karjong angkang along Sobar pen Arnam ron kachedan ahut, kosonji nang Arnam aphan aning pangsam unji, lapen nang Alangliphan kekroi angthek along kosonsi karjapthipji. Athak penke lahei ardi kave pule cheklang pusitame, lahei ason cheman lote nang Arnam aphan inghon ma inghonhe pu paklangpo. Jongsi nang inghon, nang Alangliphan kekroi angthek along karjap thirkluk unpo, lapen jongsi nang Alangliphan akanghon asai pen klemkle, dak pen klangpo nangke ahokpet aphan asai keklem abang kali, nangke ahokpet pen kedo abang kali lapen kavepen, nangke inut kangnek ahanmi chot! Monit atum along ajat le cheplangji ta Arnam alangtum aphan Alangliphan kekroi angthek along karjapthip nangji ahut si cheplangji. Nangphan halaso ahut kopine thedung ason chemanme tahai mene lapen angthek thetan chepado thekthe, pusitame arnivang nangkai along alam doan ta Arnam aphan kekroi angthek along ke kenangsotlo. Jongsi nang nangkorte-ingjir, hemtun isi, lapen nangdung kedoan atum along pen akero chapalongthek; jongsi, arnisi, hala kekroikre atum vang, lapen nang keklem ason an ro, lapen Arnam keklem ason doan asai mepik theklong, tangte nang kekroi angthek chepado’etpo. Nangle kevangji ason kachinidam ajakong ave lapen a’ot le duredet ta, Arnam nangkapapleng pen, nang Alangliphan aning papleng unpo lapen Alangli kemang aphuthak cheroktok thekthe. Anut kaprek atum theklongpo Arnam kopuson kemepik asai si Alangli a’ot kavenei amonit atum along keklem loma; alangtum theklongpo monit atum vangpen Arnam aphan kachini lapen Sobar athengno kachepajok’un abang keman, ingtuiving angdeng an Arnam aphan kekroi abang. Bangso adilung amonit atum pen anpar anung areppi keong atum avelo. Lasi kethenei angthek manpo. Nangle thedung asai keklem ajakong ave pusitame, nang Arnam aning papleng unlo. Kaprek atum ke akemang chesaivet un’e, bonta nangke un; ahok-ahak akai along kaprek atum ke Arnam aphan kanghon angthek chepado thekthe, bonta nang ke nangmethang abang arpum lapen keklem asai ajok Arnam akanghon apreng chitu un lapen Alangliphan kanghon angthek kacheklangdong chepadothek. Laphan si Arnam aphan ahokpet kanghon pu along lakha ponchotji. Jongsi nang lasi apun ave, pulote nang korte-ingjir, hemtun isi, mate pirthe amonit anglum along angthek chepadodundelo. Jongsi nang Sobar athengno angthek chapaklangdun thekthe, Sobar ke nangphan nang ingnekchoidetpo, alang nangphan kangnek ahanmi, kijui ahormu asonsi nangpinchongpo, alang ahut pen nangphan nangpalupo lapen nangphan ingcham nangpinchongdetpo. Kevangji arni along, ahir dosak akangsai nangphan nangtang tahai – bonta pini, jongsi nang Arnam aphan ahokpet aning pen inghon, lapen jongsi, koan ahir kedo akangsai aphrang nangkanghong pu mathathe pen, nangphan kopi cheman pu langlepin pen, nangmena angthek along nang arjupthip unlo lapen Arnam aphan aning papleng unlo, tangte nangning ke karengme longpo, lapen kevangji arni kachetongji akangsai jonghe the tame nangjokplotpo. Mohut kopisi chemanji nangtum chinine; nangtum Arnam aphan pini apor along ansi aning papleng unchotji. Nangtum thedung asai keklemji aphan jakong ave lasi nangtum arnivang akai along Arnam alamthe asat chelang nangpo lapen Alangliphan ning pangsam nangpo, lapen ingtangkring lapen cheklangdong angthek chepado pen Sobar aphan patherak nangpo. Nang’ok le ning ingsamse lapen keso chechaknang pusitame, nang Arnam aphan ning pangsampo lapen Sobar aphan patherak’etpo. Jongsi nang kaiketa lapuson le klemver, Arnam nangthengno tovar nang ingpu pipo. Mo, arnisi, ahir dosak akangsai kevang ahut, kaprek atum ke klo’etpo, bonta nangke halaso ahut anta arjapkluk unpo: Atheke nang kitu anam ajoine, Arnam nangphan nangraipo nang karjapthip unji lapen keklokledetji aphan. Jongsi, thangbakbe le, nang ahokpet alam asai pen klemthek lapen Arnam aphan alangliphan ahokpet pen kanghon aning pen ning pangsamthek, pulote Arnam nangphan mohut kevangji akangsai along an nangraidunpo. Nangle luvok lapen nangbang bihek lapen jakong le duredet pusitame, Arnam nang phuthak lang pangkre ponpelo. Lake nang kemang doan chok-chokche si thanpo. Pini, nang Arnam aphan aning pangsam theklo, laso along nang bihek kangdainai alam aphan ta ardi pi unlo, nang Arnam aphan asontin alam along ta Arnam aphan ning pangsam unlo, nanglong Arnam aphan ahokpet kanghon aning do, nangmena ahokpet aning Arnam aphan chipilo, lapen ajahak nang kachinine ason do pusitame, nang Arnam athengno vang pen chepakenglong lapen Arnam aning kehang alam enlong, lapen nang Arnam aphan aning kapangsamji aphan kenangji ason an klem. Nangkorte-ingjir nang nang’o tahai, bonta nangning ke Arnam aphan aning pangsambompo, lapen nang’ok kelong nangji akarengme ke longlelo. Jongsi nang kaiketa lasonsi klembom, nanglong ahir dosak akangsai vanglote nangphan nangraipo.

Kopi arlo ason aphuthak si kangsai akemangdam dolo? Lahei ke monit along Arnam aphan aning kapangsam thekthe kachesong rirok a’ot aphan si kemangdam. Monit along kangthirthe ason penang do, lapen penang kachongthui ason do, lapen lasi Arnam monit atum aphan kapangthirji aphan si kangsai kepadodo. Bonta jongsi, pini, nang Alangliphan aning pangsam thek, mohut akangsai ke nangphan kechoklim nangpamanji aphanlo. Bonta jongsi, pini, nang Alangliphan aning pangsam thekthe, tangte mohut akangsai nangphan nangbaipo, lapen nang chininepin pen si klochokpo, lapen halaso apor ahut nangmethang aphan nang cherap un’elo, atheke nang Arnam asai along dunthekthedet lapen ahokpet abang arpum duredet. Lapen lasi, nang mohut along thirthip pen arjap ingtung, Arnam aphan ansose aning pangsamji aphan, lapen Alanglilong mo kijut apor anta aphi kidunji aphan, pini nang ingtangkring along’e chesom nangpo. Nang Arnam aphan ning pangsam nangpo hala ahokpet ason asai pavang pen lapen Alangli kar’i aphuthak munthi padikrim pado si. Jongsi nang kaiketa lasonsi klem, nanglong arlo pen isi along’e dopo, lapen Arnam nanglong Alangliphan kanghon aning pathurpo, lapen Alangli nangphan ningchethe nangpipo. Arnisi, mo nangphan ahokpet kangsai nangro lote, nang ahok keso chechak nangji lapen penang an ke nangduk doji, lapen ning runhup an ning’oi nangji, nang thilotlo asonben – bonta Arnam apharman nangkanghon ke chelarle, lapen ansose si harnukthupo. Lason henlo Arnam ahirjume ke. Jongsi nang Arnam kaningje ason an deng lote lapen chingki mesen aning pen klempon, tangte nangphan Arnam hirjume nangpi chenampo, lapen lasi nang inut Arnam pen hirjume kelong lapen Alangli seme kelong abang manpo. Jongsi, pini, nang asai klemkle, mo arnisi kangsai nangpho lote, nang ningchethe mate isi kanghon aning kavedet abangpo, lapen halaso apor ahut kangsai ke asat ason manpo; nangke Sobar asat along chevardamhampo lapen kachepajokji atovar avelo. Pini, aso-asa akangsai nangkepho ahut nang arjapthip undet tahai, bonta mo arnisi thedung akangsai nangkepho ahut ke nang arjapthip unvekpo pu kali. Ajahak amonit atum ke cheparoka’o lapen alangtum kechoklim adung le’etlo pusi chematha-tha. Jongsi lapuson apor ahut nang karnuk muchot an damde, lapen ning ingsamjin pen dokok, tangte nang ke kasiksak along si dopo. Pini, Arnam ahir dosak akangsai klemkle lapen ajat ta mesen asonsi cheklang, bonta mo Arnam nangphan asat nangkelang ahut, nang chetheklongpo nang ke kadure padikrimpik, athe nangbang arpum bipik lapen halapuson ahir dosak akangsai kachechak unji aphan ke jakong ave ongchot. Jongsi, pini, nang aphrang anat keja ponpe, jongsi nang halaso adim along amat chedokok, tangte, mo tomon thepi kevang ahut, nangke klophitpo. Nang chelangver nangji nangbang arpum bihek pu, nangning ajakong durekpik pu, nanglong ahokpet ason jumpik pu, lapen nang ke Arnam akemang aphan durepik anlang – jongsi nang lahei alam chikubirbe tangte, lake apor litpik anpo.

Jongsi nang Arnam a’ot chinine, tangte kangsai ahut nang ke klonangvekpo, athe nang ke Arnam kopusonsi monit aphan choklim kapinchong ma pu alam chinidunde, kopi abidi pensi Alangli alangtum aphan choklim pinchong, lapen mo Arnam akangsai nanglong nangkele ahut lapen halahei nang kemang chingbarbe, nang karjap thirkluk un’edetpo. Arnam ahokpet akanghon ke Alangli kadokave a’ot along, lapen Arnam a’ot doan nangphan nangpaklang ahut, la nangbang aphan kopilo kevanji? Arnam akemepik a’ot nangphan nangpaklang ahut, nang’ok ke ongdung akeso chechaknangvekpo. Jongsi nang laso akeso chechakche, tangte Arnam nangphan choklim nangpinchong thekthelo, anparta nang Arnam aphan hokpet akanghon pi thekthe. Jongsi Alangli nangphan choklim nangpinchong, Alangli methang a’ot kangthim Alangli nangphan nangchepaklangpo. Ha kasorjon arni pen pini an, Arnam komantune ta monit aphan a’ot kangthim chepaklangklelang – bonta kedamtang arni malom Alangli kehokmek lapen kangvaitang amonit adilung aphan Alangli pachinibom, lapen monit aphan choklim pinchong pen, Alanglimethang a’ot Alangli chepaklangdaklo, bangso ajoine pen Alangli isi monit adilung aphan ingthimlim pinchonglo. Lason henlo Arnam monit aphan ahokpet pen akanghon. Arnam pen ahokpet akanghon kachiniji aphan kenangji ke monit atum ahir ketanrak akeso kachechak, lapen thedung anam kitu. Laso aphi ansi alangtum aphan Arnam dengpo lapen alangtum ahokpet akanghon Arnam aphan chevoithuthekpo, lapen laso ahut ansi Arnam aning plengpo. Jongsi monit atum Arnam arideng pen choklim chepinchong ingtung, lapen jongsi alangtum Alangli akemang klem ingtung, lapen alangtum ahok akanghon ingthilim Arnam aphan chipi, tangte alangtum amena apor along penang an akisung lapen kachenek chechak nangji, kithit pen anpar kilitpik akisung. Padu ke alangtum mena hokpet aning Arnam aphan chipithu jokjedetpo. Komatne Arnam aphan ahokpet pen inghon ma inghonhe lake kisung lapen kapangthir ahut si cheklang’et. Arnam ke monit akanghon pacharkle’et, lapen la kelongji ke kisung lapen kapangthir angbong si long unchot.