Laso Ahok Ateng Keklem pen Anchot si Ahokpet Cheparideng Longji

Arnam alam heihui keotdong pen lapen lahei therakrepin pen kethanponthek pu aling le nang ahokpet cheparideng longlo lapu kali; nang kahemandam ateng pen lapuan kejoike ason kali. Nang ahokpet aphan kacheparidenglong ke kopima nang kaningje atenglo pu kalidet tame; alar ke, kopima nang kereng ateng pen si langdamji. Arnam alam anchot si nang kai cheman tangdet lote lapen nang lam kaningje methang kebar ateng pen si nang ahokpet longlo puji, lapen anchot si nang ke ahokpet chinidam long tanglo lapen choklim aman-peng longlo pu nanglakha ponji. Nang penang an ajak kiding apor pen si satlang chepahaidong unvek nangji, lapen nang pima Arnam akenang ateng kacheton si rengdunvek nangkokji. Lake kachepaklang’ichot ason ke kalidet nangji; lake nanglong pen methang si vangvek nangji. Lapuan si nang ahokpet chenam ta cheparideng longji, lapen aphi si chethe nang longdun unji. Lake kadokave ta chinipetlo Ne hala sai keklem atum aphan asat kelang apot chethandam sinang: Sai keklem atum aphuthak ke madu sitame ingtuiving alam paklangthekji, lapen anuttin tame laso akethan kopima doan ta chelonchit an chinidamlo; latum laso alam ningjelo lapen aphongtin alam kethan ta aban aphan pabatchetlo, kachepate asonthakthak si pemanlo. Tebontame, jongsi monit atum kenangsot asatlang phophedetlang, tangte lake kaningjeji sungkrunglo pima alang kemesen ahakhi chipithekpo puke. Pathihek pen, monit atum akerengbom ke nonpu ta durepiklang, alang kachinidam pen angton si cheprekdak. Laso apot si, lake tebonta monit atum choklim angdeng non si vangjilang, lapen la non dobom ke monit akai kalilang. Athema monit atum akachinidam ke ahokpet along vanvedetlang, alang man-peng angdeng ke nonpu ta sangti along kikim ahem ason, linglangcho lapen kahenodakji along ansi dolo. Monit atum ahokpet masapsobak ta kacheparideng puke helopiklang, lake monit along ajat tame ahokpet kelongji puke un’edetji anbaklo. Monit along pen masapsonat si ahokpet methang pen kevang dolo, lapen kadokave ahokpet pen latum kedo anta ketoi bor’i pen si dolo. Laso athe si ne pulo monit along ahokpet cheparideng longlelang. Monit atum chethanlo alangtum akanghon Arnam aphan chelarle puvoiphit tame, lake kopima latum thangnat asat chetongte aphrang si latum pulo. Bontame arnisi arni latum menmen asat chetongloklo pulote, asontin latum kaningjetang doan alam tame puthot ahokpet along pen akengkam cheklophit si manthupo, lapen lake puthot angthek klangdakpo pima monit atum ahokpet cheparideng longlelang. Lake lapule pudet ta melo pima nang kamunthidam ateng pen nang ajat ahormu le kachetongpon aling tame lapen pima lake nang methang aphan nang angjar chibi nangkokpo, halahei ahormu doan ke nangphan asatlo. Arnam aningkehang pangdakde aphrang, anuttin tame arsikjik asatlang lapen keongdung asat kephopon dovek nangji. Tangte nang la chinijima? Arnam le monit atum aphan paklemnang pulote, Alangli kaiketa latum aphan alangtum aningkehang pachongvailong lake choklim ahokpet pangdakde aphranglo. Laso athe ke pima monit atum aphan Arnam asat ke’enbom ahut lote, Alangli ke nangphan chenam si ahok nangthanthelo; lake monit atum kopuson loma pu kapangdak’iji aphanlo. Lake isi akronglo pima Arnam Alangli asai keklemlo, pini arni Arnam aphan nang chinima chininema pulo, lapen ke nang ajat tame ahokpet cheparideng longloma longle pulo. Tangte nang chenam ta Arnam asai aphuthak ningkibidam avepinloma? Tangte nang chenam ta mo arsikjik asat nanglong vanglo pulote arjapkluk unpoma? Komat si ningje haiji, “Ne chechak pemelo pima thangnat akesung ta avedetji”? Komat si chechak haiji, “bang atum ningkibi do tahai meme, bonta Ne ke avelo”? Lake Pitor aphan le asat kelang ahut asonthotlo: Alang kaiketa kacheparokaver laso ahokpet pacheklangdaklo. Lake salajong keprekjek akadurelo pu kalilo Pitor aphan; lake anuttin amonit tame nonjong kephobom thedung akesunglo. Jongsi Ne le ajahak adim humridamji mate ajahak kortemar lapen ingjirmar along chehumridamji kopima alangtum pini arni Arnam asai aphuthak kachini dolo pu kelangdamji aphan, nangtum tangte chenam-chenum si nang kachini gian aphuthak tame ongdung thanthekvekpo, lapen ajat pu tame nang ke thangnat aningkibidam ta avedet asonpo. Jongsi Ne le nangphan arjulo, “Tangte nang chenam si pudakthekjima pima pini arni asai ke Arnam aMethang si klemponloma? Ningkibidam avepin pen?” Nang chenam ta kethakji ke, “Ajat ningkibidam ta kavepin pen, laso asai ke Arnam aKarjong pen si klemponlo.” Ephong le nang lason ateng pen thakdunlo pute, nang chenam-chenum si masapso ta ningkibidam ason avedet nangpo, lapen nang ning ingsam muchot ason si chemathapo, asapso anbak ke ahokpet longdunlo pusi nang chitinpo. Komatmat ma laso ateng pen kachinidamlo pu kachekrong amonit atum doan ke ahokpet cheparidenglong durepiklo; koan ma ne longtanglo pu kachemathadam do, lapuan sose akadure si dopo jongsi asat chetonglo pute arjapkluk un’elo. Komatmat ma mena aphan ardi kachipi lapen ane chepathe atum aphan pasungkrupnang, lapen matmat ma methang aphan kachichininedet atum doan aphan pasungkrupnang; lason amonit atum doan ke lam si ningje thekchotlo, tebonta alangtum alamthe ateng pen asai keklem ahut lote kahenopik khangjanglo. Halaso kaesung angthek masapso ahut tame, laheihui amonit atum ningkibidam chengpo, lapen alangtum aphu along kachonghu kache’oji aphan chemathapo. Latum ke thangnat ahokpet ta cheparideng movelo; latum along ke kachethan alam anchotlo kedo pima lake dhorom pen angtan si do, nonjong Arnam akenangji ateng ahokpet ke thangnat ta avedetlo. Ne ningjangjeneilo komatmat si thangnat ahokpet kalipin pen bidi kethan alam ningjechot atum aphan. Latum ke alangtum sai keklem ahut ase kasarlang pen si hangji, bonta latum ahokpet pen kachetonglo pulo tangte, latum prunjin-prunjan si klolo. Tangte laso kacheklang ke pima laheihui amonit atum ahokpet kavelang pu kalima? Jonghe le kopuan ma tomon lapen atarthui kejap pherememe pu sitame, nang jongsi nang karjapkluk along nang phu tarlok along masapso ta ningkibi avepin pen kilutji avarsai pilo tangte, lapen karjap pathirkluk lapen kekroikre pen kedo chepajokthek, inutnat ta laso ahut avedetlo pu tame, nangphan ke ahokpet kachini lapen choklim pen ahokpet kacheparidenglong abang pusi lakhaponpo. Jongsi nang le tomon kejappon aling chingbedunrong – jongsi akeongpi armu along abe dunthurong, lapen vokek ason bang alam charlidunrong – tangte nang jonghe le lam kaningje pajumethek pu sitame, lake angthek amat si avelo pima nang ahokpet cheparideng longlo puke. Laso apot si, Ne nangparelo pima nang kangtheidang alam kehangdunthap pen ke kajokluvok chemandun nangnelo. Nang chichinilo ma kopisi Arnam keklemjima? Anut kaprek aPitor ason ke klemdetrinon, kalite nang methang aphuthak si katherak chevanpo lapen nangphu kachingthurverji ajakong chepangbodetpo; pima madu aphan ta thangnat akeme vanvelo. Ongdung amonit atum kechoklim atheng angdeng ave. Arnam le thedung asai amo keklemlo puvoiphit tame, monit atum aphuthak Alangli ahokpet vanvedetlang; klardak pen langdamlo te, Alangli jongjung pen madu aphan tame ado pipelang. Ajahak amonit atum laso asatlang pen pangdakpon tanglo, alangtum pap ari hongni pen ajok kahelo lapen anpar kahelo si palelo, mathalo pima lake ansose kemesen Arnam kelong joikeji aphan, athe latum ke ninghang aling latum jat tame klemthek. Pipotma latum doan ke lapuson asatlang pen chepajokplot thekthedetlo, ansose kisungkrung asatlang doan pen ke latum aphan ke helopik alamlo karjuji, lasonsi ahokpet kacheparideng ta pulo. Tangte latum Arnam aphan kapaluchot kalilangma? Ahokpet kacheparideng puke kopine kapachobaidetji pu ason kalidet, mate kachinidam pen anchot si pima lake nang ahokpet kelongji lapu kali. Lake nang choklim atheng angdeng pen anchotji, lapen ke kedoan asatlang nang chepahai unma un’ema lasi langdamji. Nang chinidamloma?

Arnam ke ahokpet aphuthak lam kaningjethek amonit atum aphan anchot le akenangji kalidet; pima lake joipikji, kali ma? Kopi apot, tangte, chethe along kilut aphuthak Arnam kaningjelo? Kopi apot si Alangli kachelarthumi aphuthak lam kethanlo? Jongsi monit atum doan le ahokpet aphuthak thangbakbe lam kaningje thekchot, pulote alangtum akun along latum kachelarmi longvekji puhe? Arnam kepangri alongri along kemesen anokbe atum ke ahokpet aphuthak matmat amonit adilung atum si lam kaningje thekchot le seke kipipon kalidet mate ane chepathe aphan kali; alar ke, latum ajat ahut apor tame Arnam alam ateng pen kerengji aphan si seke pilo, latum kopi akesung doan le chetong pu tame chepathirthip pen kedothek, lapen Arnam alam atengthotsi kerengdunthek lapen pirthe along kachiruithuthedet henlo. Lahenlo Arnam kopima kaningje ahokpet alam; lahenlo monit aphan Arnam akenangji. Lasi, Arnam pen kaningjetang alam ahokpet aphan thangbakbe pu masap ta matha nangne. Karjong Kangthir pen kopine kapatheang anchot ke ahokpet kacheparidenglong pen kachingbar ave. Lason ke monit atum atheng angdeng kali – lake pima Arnam akangjinsolo, laso along monit atum thangnat ta cherapdunlok ave. Anuttin tame Pitor akesung ason chechakvek nangji, lapen, lapen anpar sose, Pitor anongthe ason cheparideng nangji, laso pen latum Arnam asai longduntang aphi lote latum rengdun thekji. Lason aphan anchot si ahokpetlo puji. Mathadetri pima nang kacheparideng ahokpet ke athema nang kaningjethek apot kali; pima lake chokchedet akamathalo. Lason akamathadam ke Arnam aninghang ateng pen chetonte lapen thangnat ta choklim ardi kedo ave. Mohut lason alam ningjedetrinon – lason alam pen chepajokplotnon! Kadokave matmat si Arnam alam aphuthak kechokche kachinidamrong atum doan ke kekroikrelang atumlo. Latum along ke thangnat ta choklim gian avelo, choklim atheng angdeng puke durepiklang; latum doan ke ahokpet kadure kelangkrang amonit atumlo. Kaprek ahin pen pulote, komatmat ma kadokave Arnam alam acho-a’et ateng angtan si kedodun atum anke kekroikrelang atumlo. Komatmat ma kekroikrelang atum si monit atum ardi kipi anke Arnam amek angdeng doan ta hi’i atai saidelo, lapen komatmat ma kekroikrelang si Arnam ardi kipipon anke alangtum achethe along Arnam alam kavedet amonit atum saidelo. Lake laso apot si pudet ta henonelo pima matmat ma Arnam alam ateng ahokpet cheparideng longledet an lapen mat si Alangli lam ateng kerengdun thekthedet atum anke kekroikrelang saidelo. Arnam akemangdam ke anuttin tame Alangli lam ahokpet ateng kerengdun thekji aphan – tebonta ahokpet aphuthak anuttin tame lam kaningjethekchot kalidet, bonta, lapen anpar tame, Alangli lam ahokpet ateng pen anuttin tame kerengdun thekji aphanlo. Laso ahokpet pima monit atum kelongdam ke thangnat ta kalidetlang; lake ardi avepin lapen Arnam ninghang ateng papleng un’e. Lake ardi jumpik anlang lapen kethanji anta atheng kalipinlang. Lake kephophe dopiklang lapen Arnam akenangji ateng pen kachepho dunde si aber dokoklang. Komatmat si nangtum angbong pen laso akrong jongdam thek pen methang kachinidam aphuthak koson si kethan thekji ma nangtum anuttin aphan tame arsikjik kelangchari kepado along phoponvekji, lapen ke nangtum angbong matmat si ale kavenei keter abun achet atumlo pu kachichini aphan. Non pen ke la ningchibinon! Kangtheidang kachini gian alam ke ningje nangnelo; ahokpet aphuthak lapen keklem-kedam akrong alam anchot le ningjenon. Choklim kachini lapen choklim keklem an akachelarpon, lapen aphi ke keklem-kedam pen choklim ateng kerengdunthek an kachelar henlo. Jongsi nang laso akrong akachinidam ke, tangte nang lamthe doan laso aphuthak pajokvannon; jongsi lason kalidet, tangte choningrilo nang ingho chinghipthipnon lapen lam ningjedetrinon! Kopima nang kaningje ke ale ave. Nang kachinidam alam kaningje ke Arnam aphan kachongthui puchotlo lapen nangphan bang kaprek atum ningpasolo. Tangte lake nang kai akemang kalilangma? Tangte nang bang akaprek atum pen chinilor si kijui’i kalilangma? Lason ke kopine ale kedo doma? Jongsi nang kachinidam aphuthak lam thanlo nang chomat longdet aphi ke, nangphan ane kachepathe puke nangtheklonglelo. Kalite, nang ke komat ma mena ale aphan alam kangthok abang si chemanlo. Penang an ahormu do nang choklim kephopon along ke pima nang la chepahaidet un’e, lapen nang mena aok aphan nang chedaihaihe; nang ke kaiketa nang kenangji ateng si klemlo, Arnam aninghang ateng kaike ningpangsamse – tebonta nang nonpu ta kapinchongchot alam heihui kachinidam si kethan chepahaidong dolang. Nang ke therak thekthe abanglo! Nang ke nonpu tame Arnam alam aphan nang kachinidam akethan ke chepangtangkring si dolang. Koan katherak thekthe abanglo nang! Lam kethan lapen ane kachepathe ke nang mena asema chemandetlo, lapen nang ke lason keklempon ke aot dokoklo. Nang kaningjeji pu ninghang abataitin tame, nang chepajoike pen klemlo, chepasungsepin lapen adai kavepin ason si klemlo, bonta mo la keklem-kedam ahut lote, nang ke alon kipi’ichot ason-amung along si dolo. Tangte lake anut kaprek atum aphan kachongthui kalilangma? Monit atum aphan nang chongthuidet thek tahai, bonta Arnam aphan ke nang chongthui un’e. Monit atum ke chinidamde lapen kelang kapangching ta avedet, bonta Arnam ke arsikjik saide lahei aphuthak anke, lapen Alangli nangphan nanglangdingdedetji. Nang kortemar lapen ingjirmar doan nangphan chekroidun tahailo, nang kachinidam aphuthak chorolo meme lapen nangphan ar’idunlo, bonta jongsi nanglong thangnat ahokpet cheparideng ave, Karjong Kangthir nangphan nanglangdindedetji. Anpar ta nang kechokche apot ke keklem-kedam a’Arnam nangrire, bonta Arnam aKarjong ke nangphan langlelo, lapen pima nang la kachechakji kisungkrung dokokpo. Laso alam nang kroima? Ahokpet akeklem-kedam aphuthak le ansose ningjenon; nang ke chetengne etloma? Keklem-kedam akrong alam le ningjenon; nang ke chetengne etloma? “Kijumdet kapinchongchot alam heihui lapen ardi kavedet anke var’etnon, kaningjepar alam; nonjong amat keklem-kedamji le la pangchengponji kemeneilo.” Nang laheihui alam chetengne etloma? Nang thangnat ta kachinidam avedetma? Arnam aninghang ateng alam nang kachinidam avedetma?