Arnam Kapachoklimtang Atum si Ardi Dojot Akai pen Rengdun Thekji

Ahokpet ke, non keklembom asai ke monit atum Sobar aphan kepa’oji aphan, kebanpik alangtum aphusar. Lamthe pen kedoan akangsai ta monit akun langno kapacheklangdakji aphan si kemon lapen monit atum kai atiri kapachini thekji aphan. Lahei aphong-phong kirui akangsai monit avibong aphan pumchok. Asitin akangsai ta alangtum alekha pensi kachepholo lapen alangtum halahei ason doan kelo thekji aphan alangtum aning amek kapadoji si kimin lapen lasonsi chethe aphan kapachini’un, bangso keterpik apirthe aphan kachini, Arnam kamatha keme adang kethe lapen ajakong kethe aphan kachini, lapen monit akhei aphan pen pen kachini, lale Sobar pen akun kapahenotang. Monit atum koanma lapuson kapangthir lapen kangsai kepho keong, hala ansi monit aning along amek pado unpo lapen alang karjong aphan ajakong pave unpo. Lahei akun kahenonei lapen monit aphan kachongthui theknei atum akarjong aphan kangthur henlo lapuson akangsai akemang. Monit along ke karjong ave, ladak kipuji puke, alang karjong ke ajir dingklui aphrangsi thilotlo lapen alang Siningrengme do puta chinine, Arnam do puta chinine, lapen alang kithi adong along si kisung kephonanglok puke chechinine chenamlo; kosonsi alang pirthe along amat si alang labangso kapahi’i ameherang along dobomlo pu kachichini thekpo? Kosonsi alang kechepahemphubom kithutang abang arpum, Sobar a’ot langno ajok, kithi aMeherang along klo’etlo pu kachichipo? Kosonsi alang kachini thekpo pirthe along kedoan ason ta monit akhei atum kachethu unji angdeng pen anpar si kaheno chemandetlo pu? Lapen Kasorjon abang pirthe along pini vanglo lapen Alangli kerap unji ot kahenotang amonit adilung aphan ribomlo pu alam kosonsi alang kachini thekji? Monit atum kedoan kapangthir lapen kangsai chechakdet aphi tame, alanglong kaduredet kacheroktok a’ot ke klemdopde ateng lapen chenam ta ajatle pu tame kacheprek ave. Monit kopuan si kahenodetlo! Lapen lapuson akangsai ke hala sining pen nangkeklo kangjinso kave aherai atenglo, lake monit atumphan ale kedoneilo. Jongsi monit aphan lapuson kangsai apot kali, thangnat angthek ta avelo lapen monit aphan kisung-keboi adong along kejang pen kapajokji puke un’edet khangjang mandetpo. Jongsi Arnam asai pen ajok kali, monit atum Meherang pen nangkebarthu ke sungpikji, atheke alangtum aning ke ajirdingklui aphrang pensi kithitanglo lapen alangtum akarjong ke Sobar si akengpak pen palerlaplo. Kanahok mate akun kaheno karnuknei along kejangtang aphi monit aphan keraiji aphan ke nangphan ingtontepin kehang kapadikrim, kangsai kapadikrim akenangsot; laso aphi ansi la paklengtang nangning aphan amek paphrangthu unpo.

Nangtum a’ok-vi, kethedung nangtum akemang, nangtum aning katangho, lapen nangtum akar’i lahei ke nangtum along angkur kachesak thirthip anlo. Lahei ason ke nangtum aning aphan phlutplepin pensi nangcharibom si nangtum ke lahei bang nangkachari atoi kekroinang lapen kahenodak kamatha ason arpu kardik kachevarji ajakong avedetlo. Nangtum ke non kachetongnangbom ason kachelarji aphan punon, mate kangting arideng pen kachepajokji aphan punon kar’i ave amatsi ave. Nangtum ke thangbakbe halahei ahormu pensi cherapthiplo. Nangtum kadokave ta chini labangso akai sungpik lapen labangso monit apirthe ke ingtingpik, ansitame, nangtum angbong pen inutbak anta nangkai kachelarji aphan nang’ingthin chepathehai abang ave. Nangtum kar’i ke labangso akai along abinong ason pen kachepajokji aphanlok, karjong aphan angsong kirunglong, lapen monsam, ningkarong, siningrengme ateng avarmon kedo adim along kerengdunlong henlo kar’i. Nangtum ke non kedodunbom kai kachelarji aphan kisung kachechakji ninghanghe; mate nangtum lahei kangsai lapen kapakeng along pen nangtum kilutdun nangji akai kachiridun ta ninghanghe. Alar ke, nangtum kahemandun ok-vi pen angtan kelangmepik apirthe amang ke amutpi pensi binong kalidet. Nangtum kaheman akai lake isi chepaduk nangnepin thangnat akisung lapen keso avepin pen kelong’un akailo. Lale amutpi amat si ahok kalidet! Athe nangtum kopima ning kachethedam lake ok-vi along ardi dojot akai kedodunji lapen la kai arjon along ahokpet aphan kachepalongji, lake, ahokpet apharman kerengdun lapen ahokpet akangsai apharman karjapdunji pu kalidet. Lake nangtum ningkarongset, alir kiturbong kedo pu kehok akai kalidet. Nangtum kitin ke lake kai along keklarbong lapen ardi kedojot kalidetji pu. Nangtum amek along ke, lapuson akai along kerengdun ke kechokche akangsai si kemanpo! Nangtum pini akapakeng le denglo pusitame, ajatnon nangtum kopima kiridun lake ahokpet kepalongji aphan kali mate ahokpet aphan asai pen kapaklang penle nonhut kedodunji pu kali, bonta alar ke ok-vi arpum pen abat ningkarong akai along kilut dunji aphan. Nangtum ke ahokpet aphan le kiri kali, mate ahokpet apun atengle karjapdun kali, lapen nangtum ke chenam ta ahokpet along le kedobom kali. Nangtum ke pini kilutdunji le kiri kali, bonta alar nangtum kamatha ke mohut arni alamle cheraidet lapen mo arnisi kopi manjima pu alam: nangtum sining kilir aphan langding, mekkri keho pabuji, lapen mo arnisi ke siningrengme along an nangponji pusi ning kachethe. Nangtum chininelangma nangtum kamatha adichi ke nonta ahokpet ason pen kachepho ave tanglo pu? Nangtum kamatha ke ningkeme lapen kangjinso ahoi kave Kepajok abang kahonthe athai avepin penta mo arnisi ke nangphan Alanglilong nancheponvekji, nang bangso apirthe along kisung lapen keso chechak etlo, lapen nang lale komatne arideng kisung lapen kelangrem kephonang apharman Alangli alar nanghuipipo pulo. Nang ke pap penle keplengthup kalima? Pirthe along kisung kephonang abang ke nang inutvetloma? Nang ke Sobar kachari angkang along klothotlo lapen kisung pholo – ahokpet penta Arnam nangpharman alar hui nangji puhe? Komatma Arnam kehang ason kepaplang thekthe atum doan – alangtum ke Arnam ahotur kalilangma? Monit nangcheparje a’Arnam aphan kekroikre atum doan – alangtum ke Kristo aphan kekhamkhe atum kalima? Nangtum asai keme ke kopi aphansi kalakhapon? Halahei ason Arnam aphan kardom aning adim cherai thekjima? Asapbak akeme asai keklem penke nang Arnam ahirjume chepalong un’e, lapen nangtum bang arideng kisung lapen kelangrem phonanglo pu alingle Arnam nangtum apharman alar nangkihuipiji pu kali. Arnam aphan kekroi sitame Arnam aphan kachinine atum doan, bonta komatma akeme asai keklem atum – latum henloma kapakengtang atum? Nang ke thangbakbe Arnam aphan kekroi puchot, thangbakbe Arnam nangphan anut kaprek atum nangkepasung lapen nangkelangrem nangkeklem ason Arnam nangpachekengpiji lapen alar nanghuipiji mene pu aphan, lapen nang ke Arnam nangphan nangpharman arani nangpapiji pu ning kehang, nang padusi ke nangphu kachingthur pangtui pen kedolongji arani. Bonta ahokpet ason aphan kamathaji ke apor chipipe lapen nang ahokpet ateng kedoji aphan kabor’i putame klemkle. Ansose akijum si ki’unlang nang labangso kisung, kangthaidang akai pen kachepajok. Alar ke, nang ok-vi along nangkai dodunbom lapen pap kedo nangkai dobom ahut, nang ningkephophe alam doan kepatokji lapen nangkedo along kibinhum ahunmelan kapakakji aphan Arnam aphan nang ke ningchetheklong pensi cholangding. Bonta la unji meme asonma? Jongsi nanglong ahokpet do, nang Arnam aphi dunthekpo. Jongsi nanglong ahokpet ateng kerengdun a’ot do, nang ke Arnam alamthe angthek kapaklang abang manpo. Jongsi nanglong chethe do, nang Arnam ahirjume denglongpo. Komat along si ahokpet kedoma, halatum Arnam ahirjume denglongpo. Komatma Arnam aphan ning aklong pen kanghon lapen kisung lapen keso kachechak abang doan halatum aphan Arnam kapacheklampi klemvekpo, bonta hala methang aphan chinghonchot lapen Sobar kachongthui a’okhung kemantang atum kali. Kosonsi ahokpet aphan ning kedokde atum along le akeme kedothekpo? Kosonsi ok-vi aphan kachinghonchot atum alongle hokpet binong kedothekpo? Hokpet binong lapen ot keme la hini ta ahokpet ason aphan kimin ahut ke kaningjedam kalima? Lahei ke Arnam aphan ning ingthimlim pen kanghon atum aphan le kisikpivet kalima? Ahokpet aphan kanghonhe atum lapen lale kithutang abang arpum anchot atum – lahei atum kadokave ta kapahi’i a’ot aphanle kepang pen kalima? Lapen nangtum ke kosonlo?

Jongsi nangtum le labangso kangting arideng pen chepajok’un lapen methang aphan kasijirvet kali ahormu pen chepachekakthek, jongsi nang ingthirjir manthek, tangte nang ke ahokpet aphan parideng thekpo. Lake nang’ot le kachelardet lapu kali, bonta nang ahokpet aphan asai klem si paklang theklo lapen ok-vi aphan mathachot asai ingtong theklo. Lahenlo komatma kapangthirtang atum along kedo apun-achaklo. Kacheraiji pu along akemang athepinei ke monit akhei aphan pangthir si alangtum aphan hokpet kacheparideng longji kepaman, atheke monit atum hokpet alam aphuthak kachini jum ongchet! Lapuson amonit atum along kacherai asai keklemji ke akaharnuknei akenanglo. Nangtum kadokave ta kangting arideng chingnang’etlo lapen harnukpik an akanahok phonanglo. Labangso asai akemang ke, tangte, nangtum aphan lapuson amonit a’ot nangpachini’un lapen laso aphi ahokpet aphan kroithip si kerengdun unji aphan. Choklim kapinchong henlo kadokave kasorjon pen keman atum an kedengvek nangji. Jongsi bangso angdeng asai ke monit aphan choklim kapinchong ansi pangromchot pulote, lake Britain, mate America, mate Israel along le klemdet ta chok; lake nahok adet amonit atum along le klem ta chok. Bonta kacherai asai ke ingvaidet. Kacherai asai kechengsi angdeng ke ajak thihek; lapen anpar ta, lake Sobar aphan kapatherji aphan si sai enponpo lapen somindar adang cheraidetpo. Lahenlo kacherai asai kecheng angdeng. Majok ta pudetthek Arnam aphan kekroi akereng’ak akhei aphan ke choklim pinchong’un atheke choklim kacheman longji puke isi ajak dinglen kachekirla aphi si chepalong unji. Bonta, kacheraidet keman lake prekdak ason. Kacherai aphan animona lapen apun ke hala kapaphrangdun thekthe kahelonei kedokok abang nangji, lale kaharnuknei akangting along kedo abang; alangtum ke a’ot kememenei atum, Arnam aphan kedeng kangtungtenei, lapen Arnam alam ateng keklemklenei atum nangji. Lake kacheraidet keman longji aphan angthek kachipi thekserji amonit asanchom chenamlo. Kacherai asai akethenei akemang ke Sobar aphan keparem henlo, halapu monit aphan choklim kapinchong akemang ke monit aphan kacheparideng. Lake kacheraitangdet aphi monit atum angthek kachepado thekji aphan pusi kacherai asai kedengpon, nangtum ason amonit along. Akemang ke kacheraidet aphi monit atum halabangso angthek kachepadoji aphan. Lahei kacheraitang amonit atum aphan ke Sobar aphan kapatherak akemang kapaplengji aphan asai enponpo. Lasi, kacherai aphan kethenai abidi kopilo? Kapakeng, kangsai, hirjuno kipi, lapen kachepatujoi ason kapacheklang – monit atum ingthimlim pensi kekroiji aphan hokpet binong akun asai ke’enpon atheke Arnam along kedo hokpet binong akun pen ajok. Lamthe along kedo hokpet lapen atirijung asai enpen monit aphan kacherai lapen kepakroi – lahenlo kacheraidet keman pu alamjor ke. Choklim kemantang atum ke cheraidet kemantang aphi lamthe ateng keklem thek anchot kali, bonta alangtum ke kangsai asai aphuthak kachini ta chepalong theklo, lapen Arnam aphan kachini along an ledampo. Alangtum ke Arnam aphan atovar aphan chetonglongpo lapen hokpet ason pensi plengthir chemanpo. Alangtum Arnam asai aphan kachini charlipo, Arnam apharman kisung ta kachechak unpo lapen Arnam alamthe kachinilong akerap pen ajok ahokpet ason aphan abinong kachinidam dopo. Kacheraidet kemantang atum ke hala hokpet aphan chini bonta hokpet alamjor binong aphan kedengdelang atum. Kacheraidet kemantang aphi, alangtum lamthe ateng klempo, bonta alangtum lamthe ateng keklem ke alangtum kelong akangsai angthek. Alangtum along amutpi amat si hala keongpik ahokpet ason alamjor aphuthak kachinidam avedet khangjang. Alangtum alam penchot ke ahokpet aphan dengji, bonta alangtum ahokpet along lutdamdelang; alangtum ahokpet aphan chini, bonta ahokpet aphan chetong longlelang. Hala choklim kapaman atum along keklem asai kaparlo asai ke kapakeng lapen kangsai, lapenpen kai along kenangji ason-amung. Inut ahokpet along kilutdun aphan ardi kipi abangphu henlo choklim kapamanponji abanglo. Hala choklim kapinchongponji atum lapen kacherai ponji amonit atum angbong kacheprekdam ke alangtum ahokpet along lutdun-lutdunde along henlo. Choklim kapamanpon atum ke hala ahokpet aphan kachini atumlo, ahokpet along kilut atumlo, lapen ahokpet aphan akai along dengponbomlo; choklim kapinchongno amonit atum ke ahokpet aphan chinine lapen ahokpet along lutle, ladak kipuji puke, hala ahokpet aphan akai along asai dengponbombe atum. Jongsi lapuson amonit atum ingthimlim pen lam kethan ateng klemthek, pulote alangtum aphan cheraiponpo. Jongsi kacheraitangdet atum ahokpet aphan ridunde – jongsi alangtum alam arju bonta akai along asai chepaklang ponpe, jongsi alangtum ahokpet aphan chechardun lapen alam arjudunlong bonta ahokpet aphan kai along asai kapaklang aphan ardi piponpe – tangte alangtum choklim man thekthe. Choklim kemanji amonit atum ke Arnam aphan kenangji ateng si choklim ahin atovar along ahokpet aphan asai pen paklangbomji. Laso ajok pensi, alangtum Arnam akemang paplengpo, lapen alangtum aphan choklim pinchongdetpo. Komatma kacherai asai ingtonte aphrang kijut an aphi kidun abang henlo kacheraipondetji abang, bonta choklim kemanji abanglo puke puthekthelang. “Choklim atum” pu kejongdam ke halatum henlo, kacherai asai ingtondet aphi, ahokpet aphan kiridunthek lapen Arnam ahin pen kacheparideng apun chepalong atum. Ladak kejongdam ke halatum henlo lale, kacherai asai jutdet aphi, kisung-keboi along arjapthip lapen ahokpet aphan akai along asai pen kapaklangthek. Kacheraidet atum lapen choklim kapamandet atum angbong kapaprek ason ke hala sai angdeng along kachetonte lapen hala monit atum ahokpet aphan kachini lapen ahokpet along kilutdun aphan along kachetonte henlo. Choklim kapinchong atovar along karludunde atum doan, atheke hala ahokpet kapaidengde atum, kijut ahut ke latum aphan pavirdetpo. Hala ahokpet aphan kaparideng lapen ahokpet aphan akai along asai pen kapaklang atum anvet si Arnam ingthimlim pen cheparideng ponji. Ladak kipuji puke, Peter a’arjan ateng kerengdun atum anke choklim pachemanpo, halapu kaprek atum doan abang ke kacheraidet atumlo. Kacheraidet doan atum along keklem asai kaparlopon ke hirjume kepabon, ado ke’en, lapen ningkithi kapaklang, lapen alangtum along kevangji ke hokpet binong lapen hirjume. Lapuson amonit along sai keklem puke thangnat rong-aje mate keprangset avepin pen kachepatujoi ason kapaklang – lapuson amonit aning arlo along kedo chongthui-chopanglim akun kapacheklang atheke alangtum amethang amatsi kachini unji lapen ingthimlim pen kekroi thekji aphan. Ephong jongsi alangtum ingthimlim pen lam ateng keklemthek chemanlote, kacherai asai ke kangtonlo. Ongdung amonit atum ke ahokpet aphan kachiniji pule kiridun kali pusita, kacherai asai ke jut’etpo.

Jongsi nang ke choklim kapachemanji apunlo tangte, penang an apun chepapleng nangji. Nang kache’en alamrai pen, nang kithirthip lapen nang me-heno kephar ajakong pen, lapen nang kiridun ason pen, nang Arnam kai along asonson chetongthekpo lapen Arnam akemang papleng unpo. Lahenlo nang kilutdun, lapen lahei henlo choklim atovar along kenangji ason-amung. Choklim kapinchong asai ke abangphutin along ta klem’un. Komatma Arnam aphan kiridun abang ke choklim pinchong unlo lapen choklim kemanji aphan avarsai lapen apun-achak tame dolo. Ladak thangnat kithirthip aron ave. Inut abangphu aphan choklim pinchong unma un’e lake alang kopisi kiridun pensi langdampo. Ahokpet aphan kanghonhe amonit atum aphan ke Arnam le kaphinkhat kali; alangtum along ke Arnam aphan kenangji akai ave, lapen alangtum ke choklim man un’e. Choklim kapinchong asai lake monit aphan kacheparideng longji aphan anvet lapen Sobar pen kachedanji asai aro-arim kali; kacherai anvet henlo Sobar pen kachedanji asailo, ladak kipuji puke monit aphan kacherai asai enpon pen Sobar aphan kaparem. Kacherai asai henlo athepi asailo, akiminei asai, lapuan akai angbong mantune ta keklemklepin asai. Majok tame pudet’un labangso angdeng asai akemang ke Sobar aphan kaparemji monit aphan kacherai. Monit aphan kapachoklim kapinchong asai – lake akimi asai kali. Ok-vi along Arnam asai kedobom apor ahut asai akemang a’ot atiri ke monit aphan kacheraiji pu henlo. Lake Kanghon-Kangjinso Akai ahut asonlo, halaso ahut le kethenei asai ke thengparpan along apran kedam pen monit akhei aphan pap pen kapajok. “Monit kapalong” lake ok-vi along isi sai abatlo lapen lake thengparpan along apran damdet si keklem. Jisu kevang lapen Alangli sai kacheklem ahut, Alangli kemang ke Alangli thengparpan alang apran kedamnang ale enpon pen kithi lapen Meherang akangnang aphuthak kachepahai, Sobar akeberthip aphuthak kachepahai – lake, Sobar aphan kaparem. Lake Jisu aphan thengparpan along apran endet aphi si Peter nangkarlu, ephong pen kengkam isi, kechoklim atovar along. Ahoklo, Peter tame Jisu sai klembom ahut Jisu aphi kidun atum angbong si dolo, bonta alangphan ke halaso apor ahut choklim pinchongchedet. Alar ke, Jisu Alangli sai chepatangdet aphi ansi Peter abang ke pajo pen ahokpet aphan kachini lapen laso aphi si choklim kemanlo. Monit nangcheparje a’Arnam pirthe along kevang ke thihek apor angbong isi tovar kangpu angdeng, kenangsotnei angdeng kapatangji aphan anchot, pirthe along monit angbong ajak kiding dodun si alangtum aphan choklim kapamanji pu akemang pen kali. Alangli halaso asai klemkle. Alangli ke monit atum amut pen amat choklim mandet si Alangli sai kachepatangji pu apor aphan chonghonghe. Lake Alangli monit nangkacheparje akemang lapen akenang kali. Alangli kevang ke thihek apor pen monit akhei aphan kerai aphan, ajak kidinglen monit aphan choklim kapaman asai kali. Monit akhei aphan kerai asai ke kacheparjanpi, kai kimi kapangcheng’un ajakong kedo. Lake ajak thihek apor along ta patangdet’un. Bonta choklim kapaman ke monit aphan isi angdeng an nangkirung akenangsot; lapuson asai ke ajak dinglen apor nangkok. Lake Arnam Akarjong keklem nangji asai, bonta lake ok-vi asai apor ahut kaningje tekang ahokpet alam aphan along’e pinchong pensi keklem. Lake Alangli hala kacharlidun abangphu atum aphan angsong nangrung pen monit aphan choklim kapinchongji pu Alangli kemang kapachunji apharman ajak kidinglen kivipon asai kapadeng penta klemdet. Alangli ke monit atum pachini nangji kosonsi kai along kedodun nangji aphuthak si kaningje, lapen Alangli monit akhei aphan ahokpet anvetsi kipi, ahokpet aphan asai keklemji pura monit along kedodunkri alar, athe hala ke Alangli kachetakji asai arlo kalidet. Lasi, monit atum ingthimlim pen ahokpet aphan kachini lapen ingthimlim pen ahokpet aphan kachepalong apor ahut anke Alangli along dodunvervelo. Ok-vi along Alangli sai lake monit atum kai along ahokpet ahin kedam atovar kechok along kilutlo, monit atum choklim kachemaji aphan akechok atovar along kilutdunlo pulote pangjangdong pen kangtonlo. Lake chenam-chenum ta Sobar aphan amutpi pen amat si Alangli kaparem lapen pirthe aphuthak kehaidet aporlo. Halaso apor ahut monit atum abinong’et pen ta ahokpet along lut’etpoma-lutle puke Alangli mathadamde, mate monit akai thepik loma mate bihek loma puta Alangli mathathe. Hala angbong isibak ta Alangli ok-vi along kedo ahut kelang-chari nangji ason kali; lahei angbong pen isibak ta monit nangcheparje a’Arnam kapachetak nangji angkang arlo ave. Ephong Alangli kemang asai ketanglote, ok-vi along Alangli sai kangtonlo. Lasi, monit nangcheparje a’Arnam keklem asai lake Arnam Akarjong keklemphit thekthe asai anchot. Lapen anparta, lake monit aphan kapajok ajak thihek asai, Alangli pirthe along ajak kiding aphan kedengponji asai kalidet.

Nangtum ajakong kapabat ke Nesai angkang arlo kali. Ne nangtum aphan laso asai nangpaklemtoi ke nangtum ajakong jum’ong apot. Ahokpet penke lake choklim kapaman asai aphar kali; alar, lake nangtum along abat asai si nangkeklembom. Nangtum along pini nangkepatang asai lake nangtum kopisi kenangji ateng si keklemlo. Lake anutnut along si kacheprek lapen choklem kapaman atum doan le kilut nanglapji pu atovar kali. Athe nangtum ajakong ke kedamtang arni choklim kapamantang atum pen akijumlang apotsi, labangso nangtum along keklem ahut, akechaknap dopik khangjang. Ne nangtum anglum kedo pen labangso abat asai keklembom atheke choklim kapaman akemang cheprekjam. Akenangsot ke, Arnam pirthe along kevang ahut, Alangli ke Alangli kadiya’un angkang along si chedo lapen Alanglisai kachedengpon, kaprek kachophodunde alam along ke chejokdunde. Alangli hemtun alam along chejokdunde mate monit atum akai alam along arpu cho’endunde. Alangli lahei achichi asai aphuthak ke mathadunde; halahei ke Alangli kapachetak ason aphar kalidet. Bonta nangtum ajakong ke Ne nangkehang pen apar jumdetlang – chenamta, ladak asapbak kapangbardam meme ason amatsi ave – halale bangso asai aphan akechaknap kipidunver. Lapen anparta, labangso asai ke labangso China alongri amonit anglum si klem nangji. Nangtum ke lapu anpin si kethek-kere kadurelo lasi Ne ningjeser nangkoklo lapen nangtum chepathek-cheparetha pu nanghangser nangkoklo. Ne nangtum aphan nangthanlo lake abat asai, bonta lake nangtum kachepalong nangji ason ahormulo, kopine nangtum aphan choklim kacheman longji aphan akerap kedoji ahormulo. Ahokpet along ke, kethek-kere, methang kedo-kethak aphuthak kenangsot kachini, lapen kai aphuthak kenangsot alam kachini heihui henlo nangtum mena amat kacheparidengthek nangji ason. Bonta nangtum along lahei kave tangdet apotsi, Nelong kaprek atovar avedetlo bonta nangtum pirthe along nanghachedet pen aphi nangtum along lahei ason nangkibi pen anparke. Nangtum le jongsi Nephuthak kamathap ason dopik pusitame, Ne nangtum along pen la nanghangji – Ne nangtum jakong chepabat nanglang pu nangtoiji. Vang si laso asai keklemji pu lake nening kehang ason kali, athe Nesai ke nangtum aphan nangkacherai anvet, nangtum aphan nangkangsai pen ingthimlim ningchethe kachepalong, lason pensi nangtum kilutdun nangji kai atovar kejongdam. Kaprek ahin pen pudam lote, nangtum koanma kethek-kere lapen kai aphuthak koanma kachini angdeng kangtui lahei ke Nephan amutpi thangnat akenang avedetji jongsi Nele nangtum aphan Nelamthe pen nangkacherai nangji pu alam ave asonte. Lahei kadokave kapabatdun lake kacherai asai along angthek kepalongvekji aphan lapen laso aphi choklim kapinchongji apharman. Lake kacherai asai along isi aphar kali. Atheke nangtum ke kadokave ta jakong kaduredet saide lapen nangtum ke seletpik lapen ardi kipi pangkreve, kajoklu lapen kamatha inglenpik, thengpi abeng ason ingtangklek lapen chingkinosi – athe nangtum ke bang ateng ot kememe angdeng apar litpik – Nephan kenangji ke aphrangsi nangtum jakong chepabat nanglang. Komat choklim kacheman kangtung atum ke aphrangsi kenangnot apun-achak chepapleng nanglang. Choklim kapaman aphan, inut abangphu kamatha klarsap lapen ingtherjom nangji lapen ardi kedojot akai kedo longji aning kehang donangji. Jongsi nang ke inut angpong kakhurungvang akai kedo kangtungte abang, inut ahokpet kiridun abang, inut ajat asai sitame padikrim pensi kabor’i abang, lapen inut prekjek anpin monit jongjong a’ot kedo abang, tangte nang ke choklim kachemanji apun-achak keledam abanglo.

La nangtum anglum keklem asai lake nangtum along kedengponbom ke hala kopima keklem nangji asai pen kapacheton atenglo. Lahei amonit atumphan kacheraidet aphi, dilung isi amonit aphan choklim pamanpo. Lasi, nonhut asai along pen ongdung aphai ke nangtumphan choklim nangpinchongji pu akemang akisik-kedanglo, atheke ongdung choklim kemanthek amonit ahokpet aphan kangchirbom dolo. Jongsi hala kacherai asai nangtum alongsi kedengpon nangji lapen laso aphi anpar kaprek asai keklempon nangji avelo, tangte lake ajahak ahokpet aphan kar’i atum halaphan longdundedetji pu alam kalidetjima? Nonhut akai akemang ke mononphi monit aphan choklim kapinchongji aphan tovar ketho henlo. Nesai le kacherai asai anchot pusitame, Ne kaningje kai along kedo nangji aron ke chenam ta monit aphan choklim kapamanji aphan kisik-kedanglo. Kacheraidet aphi kevang asai lake monit aphan choklim aphan si kapavaikanglo, lapen kacheraibom keklem lake monit aphan choklim kapamanji asai aphuthak si atiri ke’enlo. Monit aphan ke cheraidet aphi ansi choklim paman unji. Non amat ke, akethenei asai ke kacherai henlo; aphi anke, hala ahokpet aphan kiri lapen kar’i atum doan aphan ta choklim pinchongpo. Choklim keman longji aphan kaparlopon ke monit atum kilutdun a’ot kacheklangdong: Nanglong Arnam aphan kanghon aning doma? Nang laso atovar along damlong’etlo apot si nang kachinilongtang koanbak harnuklo? Nang Arnam aphan kanghon koan ingthirlo? Nang ahokpet aphan asai pen kapaklang koan chokdamlo? Choklim kachepamanlongji aphan, inut amonit along monit a’ot along kedo asonson aphuthak kenangsot an kachini dovek nangji. Lake aklong aren akenanglo. Hala cheraidet aphi tame choklim kapaman un’e atum doan ke an kethon ahormu chemandetpo lapen kijut ahut ke me akar lapen arlong keso atalo along ingdoiphitpo lapen aklong kave ahilik along klopo, atheke nangkun chelarlelang lapen nang ke Sobar apharman si doverlang. Jongsi monit autm choklim kemanji apun duredet, tangte alang ke ale avelo – alang ke kevartang ahormulo, isi arisim, lale kangsai along karjapthip un’e ahormu! Non amat nang Arnam aphan kanghon koan thelo? Nang nangmena aphan kachelang selet koan thelo? Koan akaharnuk si nang Sobar aphan kachini binonglo? Nangtum nanglamrai chepangtang etloma? Monit a’ot angkang arlo nangkai kelang chari pameloma? Nangkai chekirla etloma? Nang akimi akaisi dodunbom loma? Nangtum akai kelangdam angkan chelar etloma? Jongsi lahei ahormu le chelarlelang, nang le nangphi chiruiredet pusitame nangphan ke choklim nangpaman un’elo; alar ke, nangphan ke nangcheraitang anvetlo. Nangphan asat nangkelang aporlo tangte, nanglong ke ahokpet kadure dopo, nanglong monit a’ot ke bang ateng kalidetpo, lapen nang ke bang aphan kapardidun amarat ateng anpin si kangdaipo. Nang kachepalongdun ke kacheraitang keman anvetpo – nang ke Ne nangkacherai ahormu ansi man longchotpo. Gadho ateng, ephong along ahemphu aphamri kachomatlong aphi, aphongtin le ahemphu aphan chetheklong ta kaphere lapen okchunghurpo. Jongsi inut amonit lahei akeme ason-amung duredunlo lapen alar ke dothing lapen kapherelok, mongdunloi lapen ajat ason along ta keklemdun haihelok, ajat ason ta chinidundak thekthe, ahokpet alamjor kedeng thekthe, asai keklemji atovar kave dothing, lapen hala pen anparta Arnam aphan kanghon aning kave – jongsi inut amonit le Arnam aphan kosonsi kanghon nangji pu kachinidam ave, kosonsi alang ardi kedojot akai kedodun thekpo, mate kosonsi monit binong kemanpo – kosonsi lapuson amonit le Arnam aphan hakhi kedodun thekpo? Lasi nangkai ke ardi jumpik pu paklangpo lapen nang ke kaprek kali bonta kacheraitang agadho. Nangphan nangcheraidetpo, bonta lake nang dragon ke’er aphan che’olo lapen alang kachari angkang along kachehodaiji aphan kroikre tanglo puanvet si pudam chotji; lake Arnam do pu nang kroilo, Arnam kisik-kedang ateng karju, lapen thangnat kakhinde avelo pu anvet pudam chotji. Bonta halapu akeme ahin abang ke, nang Arnam alamthe asai pen paklang thekloma lapen Arnam aphan paklang thekloma? Jongsi nanglong lahei angbong thangnat avelang, la kipu damji puke nangphan Arnam nangcherairelang, lapen nang ke kaprek kali bonta kacheraidet agadho. Nanglong thangnat ninghangmeme ason ave, lapen Karjong Kangthir nanglong sai klembom kali. Nang jongjong amonit a’ot tame duredet; lake Arnam nangphan asai amat si nang’enpon un’e. Nangphan Arnam nangdeng nangji lapen hala kekroi un’e amarat lapen akeng kedamvoi kithitang atum pen anpar batai pharo akeme man nangjiang – komatma labangso angdeng kele atum anvet si choklim kemanji apun chot. Jongsi inut abangphu along monit a’ot do lapen me-heno kamatha ajakong do ansi alang Arnam asai ke’enpon aphan apun doji. Nangtum aphan choklim nangpinchongdet aphi ansi nangtum aphan monit pu nanghok unji. Choklim kemantang atum anvet ardi kedojot akai pen kedodun thekji. Lapuson amonit atum anvet si Arnam aphan ansose pacheklangdong pen satlang chipi unji.