Arnam Aphan Ahokpet Kanghon Atum Henlo Alangli Keklem Kepaklang Asai Along Angton Kachepidetthek

Ingthimlim pen Arnam asai lapen kepaklang asai aphuthak gian kelong – lahei ke hini ta Arnam alamthe alongsi theklong, lapen lake lahei kaningje along pen anvet si nang katheang kelongji. Lasi nang methang aphan Arnam alamthe pen cheparisimji aphan ansose klem nanglang. Kachingrum kedo ahut nang Arnam aphan kachini ason chepachoinoi, lapen lason pensi, nang anut kaprek atum aphan katheang pithekpo lapen kejok atovar pipo – lake keklem pen kapaklang atovar. Arnam nangphan varmon nangsik pipe aphrang, nangtum kechengsi ke methang aphan Alangli lamthe pen cheparisimtha. Lake anuttin ta keklem nangji asailo; lake non tongsekot ardi kipi nangji asonlo. Kechengsi, nang Arnam alamthe pen cho-junthek angdeng an chepaletha. Nang keklem thekthe ason doan apharman, kacheseke atovar aphan Alangli lamthe rinoi, lapen nang kachinine ason doan mate nang kisung kedoan apharman lahei kaningje alam ingchapnoi. Arnam alamthe nangjakong cheselamnoi, lahei aphan nang keklem kisung lapen kasiksak kapacheklam along nangpachetodun ahovang pinoi. Alangli lamthe aphan nangkai along kerap pachemanlongnoi: Ladak nanghin pen kabor’i akenang do. Arnam alamthe pen kecho-kijunji aphan, nang angthek chepalongthek nangji; Alangli thengno nangning chepadojoi thek nangji, lapen mantune le kisung chetong tame nang Alangli kaningje ateng si klem nangji. Nang kisung chetongte ahut, nang ningchibi nangji ke Alangli lamthe pen kecho-kijun. Ahutpen ke nang chardom lapen Arnam akanghon aphan matha parsik, lapen kachingrum ahut Alangli lamthe nang aphan nang kachini an chepachoi tahai, lapen mena arlo kelong akatheang lapen atur aphuthak lapen lahei kaningje alam nang kachini aphan kabor’i ahut kepho ason pachini tahai. Anparta, nang monit aphan tovar thanthek – lake keklem pen kapaklang asai, lapen labangso keklem akemang ke Arnam aphan nang ahokpet keklem ahut jakong kipi abang nangpachemandun ahovang kipi.

Arnisi angbong, ghonta koan si nang ahokpet Arnam athengno kedo pen kapadamlo? Nang arnisi pen koan apor si Arnam aphan kachipi chenam? Nangbang aphan koan si kachipi? Aning aphan kaiketa Arnam ahin kapadom henlo Alangli rideng pen choklim kacheman longji aphan kechok atovar along kedo. Jongsi nang nangning, nangbang, lapen nang ahokpet akanghon doan Arnam aphan chipidet thek, lahei aphan Alangli thengno lenoi, lapen Alangli kemang aphuthak ahokpet mathanoi – nang’ok apharman kali, don-rap aphan kali, lapen methang kar’i aphan kali, bonta Arnam ahemtun kemesenji aphan, ajat ason along ta Arnam alamthe aphan aron lapen atiri enpen – lapuson keklem pen, nang kemangdam lapen nang kelangdam doan ta akechok adim si dopo, lapen laso pensi nang Arnam athengno Alangli pen kero kelong abang chemanpo. Arnam aning kedok amonit atum ke amut pen amatsi Alanglihinlo; alangtum henlo Arnam inutvet aphan ning kachipithek atum. Arnam aning kedokde atum ke Alanglihin aning pabenghoi lapen Alangliphan kekhamkhe atumlo. Alangli aning kedokde ke hala Alangliphan kekroi lapen kaiketa Alangliphan ningcheparong ingtung bonta mena aphan Alanglipharman sai chepavang thekthe atum henlo. Alangli ningkedokdeke halahei Alangliphan chinghon puke ningje sitame aning arlo pen Alangliphan kekhamkhe atum; Alangli halale kachongthuiji aphan pura ardi doklong, kedokchop alamthe kaningje atum aphan. Arnam aphan ahokpet aning kachipipe atum mate Alangli thengno hokpet chehodaide atum ke chongthui-chobai lapen akele kachepindak a’otsi doji. Ningklarsap pen kaike ateng kedo, asai keklem Arnam aphan kachehodai thekthe atum si ansose kachepindak chotchotlang, lapen latum asai kacheklem peme tekela kehoi asomar pangjanglo. Methang aphan Arnam apharman asai kachepavang atum ke Alangli thengno mena aphan ingthimlim kachebat atum; latum ahokpet pensi Alangli lamthe doan along kachehodai, lapen Alangli lamthe aphan asai pen paklangthek. Alangtum Arnam alamthe aphan si methang kereng atiri kachepaman, lapen alangtum padikrim pen koso angdengsi keklem nangjima pu Arnam alamthe along pen rithek. Lason henlo Arnam aphan ahokpet kanghon amonit ke. Nang keklem ason pen jongsi nangkai aphan ale do, lapen Alangli lamthe pen kecho-kijun pen nangkai akun kachelarji aphan nanglong arlo pen kenangji lapen kelele doan pleng’ithek, tangte lake Arnam akemang paplengpo. Jongsi nang Arnam akenang ateng do-thak, lapen jongsi nang nangbang akenang le kepaplengpi kali bonta alar ke Alangli kenangsi kepapleng, tangte laso along nang Alangli lamthe ahokpet along lut’etpo. Ansose chenam-chenum Arnam alamthe ahokpet along kilutdam alam chethan lote, la kipudam ke nang nang’arpu cheklem thekpo lapen Arnam akenang apun chepadopo. Lapuson keklem asai henlo ahokpet Alangli lamthe along kilut pu kipu unji. Jongsi nang laso abinong along lut thek chenamlo, tangte nang ahokpet aphan cheparidengpo. Lahenlo ahokpet along kilut kechenglo; nang kechengsi ke laso aseke en nangji, lapen laso pen aphi ansi nang lapen akaharnuk ahok ason along lut thekpo. Kosonsi kapinkhat alam kepapleng thekji lapen Arnam athengno ning chepangthirthekji le matha parsiknoi; komentu si nang Arnam kepangri alongri kilutdun longjima puke mathalot nangne. Jongsi nangkun chelarle, tangte nang ajat le matha ta ale avelo! Arnam alamthe ahokpet along kilutji aphan, aphrangsi ke nangbidi lapen kamatha doan Arnam aphan veklo pu angdeng chepale nangji – lahenlo keklangdak akenangsot.

Non amat, ongdung amonit do alangtum ke asat kachelanglok lapen Arnam asai chinidunde, nonta Ne nangphan nangthanlang: Jongsi nang chinine, tangte nang thangnat alamrai pidunde si keme. Mo amut pen amat ahokpet kacheklang arni nangle tahai, lapen halaso ahut si nang ta chinipinpo. Kangsai dunde si nangphan ale kedoji, bonta nang dothing pen chonghongkok puke heno. Nang klemrok pensi kilutdun avarsai chiri nangji; laso aphi si nang inut ahokpet kilut abang chemanji. Alangtum along kekhamkhe a’ot ajoine si, monit atum kaiketa keklemvoi Arnam aphuthak kamathathap dopik. Lake monit atum along kachehodai a’ot kepadoji aphan akenangne si chemanpo, athe keklemvoi Arnam ke monit aphan kethetan asatlanglo. Jongsi nang arjapthip thekthe, tangte kadokave ta kijutlo; jongsi nang keklemvoi Arnam ahokpet keklem ason aphuthak kachini ave, pulote nang ke Arnam arideng choklim cheman un’elo. Isi arsikjit alam abang ke monit atum aphan alangtum Arnam keklemvek asai aphan kachini along pachoklim pinchongme mate heno. Arnam monit kacheparjan a’Arnam abang pirthe kevang ke anuttin amonit aphan ta isi satlanglo; jongsi nang laso aphuthak arjapthip thek, tangte nang ke inut Arnam aphan kachini abangpo, lapen nang ke inut Alangliphan ahokpet kanghon abangpo. Jongsi nang laso aphuthak arjapthip thekthe, lapen nang Karjong aphan si kekroi anchot lapen Arnam keklemvoi along kroidun thekthe, tangte nang Arnam along ningchethe jonghe the tame, lake ale avelo. Jongsi nang kacheklangdak Arnam aphan kroi thekthe, tangte nang Arnam aKarjong aphan kroi thekji? Nang Arnam aphan kepalujile kekher kalima? Nang ke kacheklangdak lapen kepapholokme Arnam athengno chehodai thekthe, tangte Karjong athengno chehodai thekjima? Karjong ke cheklangkle lapen paphono, lasi nang Arnam aKarjong aphan si chehodai pu kipu ahut, nang ke amo kevangve alam kaningjechot kalima? Kapinkhat alam kedeng angthek ketheklong ke Arnam keklemvoi aphuthak kachini henlo. Ephong le Arnam keklemvoi aphuthak kachinilo tangte, nang ke kapinkhat alam kedeng theklo. Lahei aphan kedeng along pharni do: Eson ke Alangli Karjong ajor binong along kithirthip akekroi, lapen Karjong athengno, Karjong nangphan nangke’en satlang kedengdun; kaprek abang ke hala amen kachevang abang aphan kechoklim kachini, lapen kechoklim kachehodai angdeng kachepale. Abang athengno mate Karjong athengno tame, inut abangphu kaiketa Arnam aphan kachehodai lapen man kipi donangji. Lapuson abang ansi kechoklim kachemanlong apun kedo. Jongsi nanglong keklemvoi Arnam keklem aphuthak kachini do – lake, jongsi nang le laso asatlang along arjapthip – tangte nangphan ajat ason ta sungpik kalilo.

Ajahak amonit ningje, “Kapinkhat alam kekroi joike; Arnam athengno kedo ahut nang ningjedak lapen ning aklong pen ningjenoi, lapen nangri pen angthek paklangthap nangne; lahenlo kapinkhat alam kekroilo.” Lake kechokloma? Lasi, jongsi nang Arnam anung isi-hini Alangliphan kekhamkhe asai klem lote, lake kapinkhat alam kekroi pusi lakhapoma? Kapinkhat alam kekroi along kopipisi kaparlopon do lahei aphuthak nang chini peme nangji. Lake nang keklemvoi Arnam aphan chinima mate chinine pensi cheraplok; jongsi nang ahok keklem aphan kachini do lapen satlang along katikung dunde, tangte nangphan ke ingtangkring angthek kedo abang pusi lakha ponpo. Arnam ahakhi kethetan kedo puke nang Arnam keklemvoi aphuthak kachini do-ave, lapen nang bangso thangbakbe anchot kali, kadokave ateng amonit aphan chehodai thekma mate thekthe, lapen mo kithi arni anta kachehodai thek-thekthe pensi chepholoklo. Jongsi, kachehodai atovar pen, nang Arnam aphan ahokpet hakhi pilo, pulote keklangji ke nangphan Arnam nangcheparideng etlo pulo. Jongsi nang kithi an chehodai thek lapen, Alangli thengno, kakhinde chepave, kangsaidun klemkle, sorsase, kamathap ave, lapen kidipjoi akemang chepave, tangte lason pensi Arnam si kehai longpo. Keprekvi kali kadokave atum kelangrem amonit aphan kachehodai, lapen kemang avepin pen kithi an kachehodaithek – lahenlo angthek kachepado puke. Monit aphan Arnam kapalutdun kangtung abinong ason puke nang Alangli lamthe kekroi, halahei aphan asai kepavang, keklemvoi Arnam athengno kangkup lapen nangmena along kachehotang a’ot kachepangthek, Alangli thengno nangning chingpunoi, lapen, padusi ke, lahei Alangli lamthe pen ajok Alangli nangphan nangcheparidenglong. Arnam anong thepo lahei kaningje alam nangphan nangcherai lapen nangphan ingthimlim pen Alangliphan kekroi nangpinchong lote; lason pen si, Alangli Sobar aphan patherakpo lapen Alangli sai chepapleng’ipo. Keklemvoi Arnam amen kachevang aphan nang kamathathap ave lote – lake, nang kangsai along arjapthiplo – tangte lake nang bangso ahakhi kedodun pemelo. Mo arnisi nang keklem Arnam aphuthak plenglim kachini nangdo lote lapen Pitor ason kithi ahut an chehodai theklo, tangte nangphan ke Arnam pensi cheparideng lapen choklim nangpinchongpo. Nang kamatha pen kachetonte ason Arnam keklem doan ke nangphan satlanglo. Jongsi Arnam asai le nang kamatha aling pen cheton pute, lake nangphan kisung kachechak mate kachepangthir akenang avelo. Laso athe ke Alangli sai ke lapuan si keklempik lapen nang kamatha ateng kali lasi nangphan halahei kamatha ason kedoan nangpache’othaiji. Lahenlo lake nangphan isi satlanglo. Lake Arnam keklemvoi ajoine si kedoan amonit tame satlang angbong si dobom; Alangli sai ke keklem pen paklangme, jakong thepik ason kali. Alangli keklemvoi alamthe lapen Alangli keklemvoi kaningje thangnat kamathathap chepave ra plenglim pen kachini, lapen Alangliphan ahokpet inghonthekpo athe ke Alangli sai ansose si keklemme chemanbom, nangphan Arnam nangcheparidengpo. Arnam kacheparidengji amonit adilung ke Arnam aphan kachini atum; lake, Alangli ke keklemvoi pu kachini atum an. Lapen anparta, latum ke keklemme Arnam asai along kachehodai atumlo.

Arnam a’ok along kedobom apor ahut, Alangli kenang akachehodai ke monit atum anut kaprek aphan kangsaidun pen kachepahelo mate kedothip parlo ponpe, alangtum ningkere kamathadam ateng; alar ke, Alangli kenang ke monit atum Alangli lamthe aphan aron pu ensi kaboche lapen rengdunbom aphan atiri kapinchong, alangtum ahokpet penta Alangli lamthe ajor aphan asai klem pen paklang, lapen alangtum Alangli kemang ingthimlim pen paplengji pu. Arnam amen kachevang along kachehodai isi aphar ke Alangli lamthe aphan asai pen kapaklang, lapen akaprek aphar abang ke Alangli bang ateng kedodun lapen keklemvoi along kachehodaithek. La hini ta plenglim nangji. La pharni ta chepalongdet thek atum ke aning along Arnam aphan kanghon kabirti atumlo. Alangtum ke Arnam pen kacheparidengtang atumlo, lapen latum ke Arnam aphan mena akai kachinghon atengsi chinghon. Monit kacheparjan a’Arnam abang ke Alangli sai along bang ateng lapen majok ta keklem’un monit a’ot si do. Lasonsi, athak kacheklang bang ateng lapen keklem monit a’ot ahom ke monit aphan thedung asatlang manpo; lake alangtum aphan kethenai akisung chemanpo. Bonsitame, Arnam along kedo bang ateng lapen keklemvoi a’ot aphan pangkre heno. Alangli asai kapachun abidi ripiklo, bonta Alangli tame Alangli athak kacheklang Alangli bang ateng monit a’ot aphan chepajok thekthedet. Laso athe ke, ajat le punon, Alangli ke ok kacheman Arnam, siningrengme kedo Karjong a’Arnam kali. Alangli ke monit atum ketheklongle a’Arnam kali, bonta kasorjon abangphu areng kachepindeng a’Arnam. Lasi, Alangli methang aphan bang ateng monit a’ot pen kachepajokji ke ajat abidi pen ta Alangliphan kejoike kaliji. Lasi, ajat le punon, Alangli ke monit a’ok ateng pen keklem kangtung asai klembom. Lahenlo bang ateng lapen sai keklem a’Arnam kachepaklang, lasi kosonsi monit atum kachehodaide le kemesenji? Pirthe along kopisi monit atum Arnam keklem asai aphuthak keklem thekji? Alangli ke Alangli aning hang aling si keklem; Alangli ning karong’i ason ke kosonsi kedo halason si kedo henlo. Jongsi monit atum chehodaide, tangte alangtum along kopi bidi keme si dolang? Non an, kachehodai si monit aphan pajok unchotlang; majok along ta anpar akeme abidi avelang. Jongsi Arnam monit aphan satlang enji pulote, alangtum laso aphuthak kopilo klemji? Bonsitame, lahei kadokave amat ke sining along kedo Arnam penle kamatha kali; lake monit cheparjan a’Arnam pensi kamatha. Alangli si la keklem kangtung, lasi majok abangphu ta lar un’e lake. Sining along kedo a’Arnam ke monit cheparjan a’Arnam keklem asai along chejokdunde, lasi lake monit atum Alanglilong chehodai nangji pu ansose athe kalilang ma? Alangli ke klemvoi lapen bang ateng pusitame, Alangli ke ingthimlim ok kacheman a’Arnam. Alangli mena abidi langdam pen, Alangli ke Alangli ninghang aling si keklem. Sining along kedo Arnam ke doan asai Alangliphan si pekdetlo; Alangli keklem aling along si nang chehodaidun nangpo. Alanglilong monit a’ot do lapen bang ateng binong sitame, Alangli kemang binong pensi lahai kisik, lasi kosonsi monit atum Alangliphan kekroi ason ben aning chepathi si amek kechar chepathe kehailo? Alangli ke bang ateng si kedo kangtung, lasi Alangli ke bang atenglo. Alangli monit a’ot angbong si kedo kangtung, lasi Alangli monit a’ot angbong si dolo. Alangli kangthirjir a’ot angbong si kedo ninghang, lasi Alangli kangthirjir a’ot angbong si dolo. Monit atum aning kehang alingle lang tame, bonta Arnam ke kaiketa Arnam si chedothotpo lapen monit ke monit si chedopo. Alangli ajor aphan asapbak kapajirmiso ajoine langphlot un’e, lapen te lahei achichi alam ajoine Alangliphan Arnam “abang” penta angtan toino. Monit atum monit akhei akejokvan do, lapen Arnam along ta Arnam aman do; la sonni atum angbong chehilile. Monit atum Arnam aphan aning kehang aling pinrem mate chinipo. Alangtum Arnam abang aphan non asapbak ingdukjom pen chechak un’e loma? La anset parsik aretri! Anuttin ta methang angbong asap kachechak donangji; la an lote ajat kachingvai ta chunchedetjima? Kopine kacheplak dobomlangma? Jongsi inut abangphu lahei achichi alam anta chechak un’e, tangte kosonsi alang ningkarjang abangphu mate ahokpet amonit kemanji aphan kamathatheklo? Lake Arnam le monit akhei aphan kepasung kali, bonta monit akhei si Arnam aphan kapasung. Alangtum kaiketa teplong aphan inglong selam si ajat asai ta ke’ot. Alangtum thangnat kali ason penta kopine pinchong chenam, lapen lake akenang kalipin an! Bang ateng lapen keklemme monit a’ot pen Arnam sai klem lote, Alangli keklem ke monit akhei asai kali, bonta Arnam asai. Bonta, monit atum alanglisai ajor theklongle; alangtum kaiketa Alanglilong athak kacheklang monit a’ot si langdamchot. Alangtum lapuson kethedung asai theklonglepinlang, tame alangtum Alanglilong bang ateng lapen mesen monit a’ot si kelang kangtung, lapen lahei aphan lophlotple. Kosonsi laphan Arnam athengno kachehodai pu kipu unji? Sining angsong a’Arnam nonke pirthe athak a’Arnam si “chekirladetlo”, lapen pirthe athak a’Arnam ke non sining athak a’Arnam lo. Alanglitum athak kacheklang araje isivet pusitame thang alam ave, mate Alanglitum keklem asai isivet putame kasiksak ave. kijut ahut ke, komatsi Arnam amena asai keklem abang Alangli ke Arnam Mena amatlo. Nang ning hangnon-hanghenon chehodai nangpo – lake nang kachongvai avarsai kelongji alam kali! Arnam aphan monit atum kroivek nangji, lapen monit atum ingthimlim pen Arnam aphan chehodai nangji asapbak ta kachekrongthap chepavepin pen.

Pini arni monit arje pen kevang a’Arnam keparideng kangtung amonit atum ke Alangli kemang ateng keklemji atum henlo. Alangtum kenangji ke Alanglisai along kachehodai, lapen amethang atum aphan kaike amat sining athak kedo a’Arnam asai aphuthak kaike kamatha, prekchet pen kerengdun, lapen ok along kedo a’Arnam asai along kapasiksak kangton. Alangliphan kekroithek atum ke ingthimlim pen Alangli lamthe karju lapen Alangli kisik ateng kachehodaidun atumlo. Lapuson amonit atum ke sining athak kedo a’Arnam ahokpet ke kosonji ma mate sining athak a’Arnam monit akhei angbong kopi asai si keklembom pu asap ta mathadamde; alangtum amutpi si sining along kedo a’Arnam aphan aning kachipi lapen methang achethe ingthimlim amat si Alangli thengno kachipi. Alangtum mantune ta methang kemesenji aphan asap ta chematha ave, lapen te alangtum mantune ta ok-vi pen kedo a’Arnam bang ateng kedo lapen keklemvoi apot hur pachoche. Ok along kedo a’Arnam along kachehodai atum anke Alangli pen choklim kepaman atumlo. Sining athak kedo a’Arnam aphan kekroi atum ke thangnat longlele. Laso athe ke lake sining athak a’Arnam kali, bonta pirthe along a’Arnam henlo, monit aphan seme lapen hirjume kipi abang. Pirthe athak kedo a’Arnam aphan thangbakbe bang pen cheprekpre abang pu kelang ahut sining athak a’Arnam aphan pathever nangne; lake chokche. Sining athak kedo a’Arnam ke manghumeme abidi pen thedung lapen anong thepik, sitame lake ahokpet ke ave; pirthe athak a’Arnam ke jakong ingtuite lapen kenang asai thethe, lapen bang ateng. Alanglilong anpar kemepik kamatha ave mate pirthe paruset asai klemkle; Alangli ke keklem lapen kaningje ta bang ateng lapen keklemme a’ot pen. Alangli sining kangder penle kaningje kali mate arve lapen tomon thepi le phaphe tame, Alangli ke sining along kedo a’Arnam monit araje pen kevang abang binonglo, lapen Alangli ke monit akhei angbong kedo kereng’et a’Arnam binonglo. Alangtum ketheklonglor Abang aphan kedeng thekthe lapen ahokpet lapuan kachepabiji pu kamatha ahut monit atum alangtum kachini’un lapen alangtum kamatha ateng chidun pen Arnam pu kehok abang aphan pen ro-archo nangne. Lahei kadokave ta monit atum kekhamkhe a’ot pensi kevanglo; lahei kadokave ta monit akhei Arnam aphan kechakthip a’ot kevang adimlo.