Kapejok Abang “Inghun Kelok” Along an Chevangthu’et Tanglo

Ningkan suri suri angbong ta, Kapejok Abang kevang kethekdun longji aphan monit atum ketheklong ingtungpiklo. Jisu Kapejok Abang inghun kelok pen kevang lapen Alangli amat, nang kisun monit atum theklong ingtunglo, lapen Alangliphan kachingtung lapen kar’i atum an ta suri suri aningkan angbong la ketheklongji chonghong phronglo. Kapejok Abang kachevangthu lapen monit pen kachetongthuji aphan latum ar’ilo; lake, Jisu Kapejok Abang aphan chingtunglo, ningkan suri suri monit atum pen chekaklo, lapen Alangli kevangthuji aphan, lapen non ephong Jihudi atum angbong kapejok asai keklemji aphan, monit aphan kanghon lapen kangjinsoji aphan, monit apap kanghorji lapen monit apap do’an kadiyaji aphan, lapen monit akechokche do’an kacharsilunji lapen monit aphan pap pen kapejokji aphan monit atum Alangliphan chingtunglo. Jisu Kapejok Abang aphrang ason non ta prekprepinte pusi monit atum ar’ilo – inghonmeme aKapejok Abang, aning mesen, aman apeng kedo, kaike ta monit aphan aningthithe, monit aphan aning siksakse, bonta monit apap do’an Alangli inghor si diya pakejoilo, lapen aphrang ason thakthak, monit apharman thengparpan athak kithipi, lason si monit atum ar’ilo. Jisu sining chedamjui pen, Alangli phi kidunkri asangho atum, lapen Alangli men pen kejoktang kangthir atum anta, Alangliphan chingtungpiklo lapen Alangliphan chonghong phronglo. Kanghon-Kangjinso Akai ahut Jisu Khristo akangjinso pen kejok amonit atum an ta Jisu Kapejok Abang mo kijut apor ahut inghun pen nang kisun lapen monit an aphan kacheklang arni aphan si chonghong phronglo lapen chingtunglo. Kalang, lake Jisu Kapejok Abang pu pini arni kekroi amonit atum aning kehangnei ason ke la henlo. Jisu Kapejok Abang pen kevan akejok alam kachini atum an ke Jisu Khristo menmen nang kisun lapen Jisu pirthe athak kedobomtik ahut kaningje alam: “Ne kedam asonthot si mo ta chevangthuji” pu alam kapachekokji aphan si chonghongdinglo. Jisu thengparpan athak apran chipidet lapen kithi pen thurthudet pen, Alangli ha inghun athak sining hem rengme chedam’etlo lapen Kangtuinei Po Arnam Ari ar’e along si ingnilo pu si monit atum kroilo. Lason thakthak si, Jisu puthot inghun kelok pen si Alangli pirthe athak nangsunji (laso anghun ke Alangli aphrang sining karlu ahut kedam’i anghun aphan si pulo), lapen Alangliphan suri suri aningkan angbong kachingtung atum angbong nangsunji, lapen Alangli Jihudi atum a’arje lapen ape ari pen si vangji pusi kroilo. Monit atum angbong nang cheklang lote, Alangli latum aphan kecho ason pipo, lapen kijun alang pangboppo, lapen monit atum angbong si rengpo, kanghon, kangjinso plengset pen, lapen ahokpet lapen chechardak pen. Lahei ke monit atum kekroidam alamlo. Sitame, Jisu Kapejok Abang ke lason klemkle; Alangli ke monit atum kamatha pen akaprek si klemlo. Alangli kachevangthuji aphan kachonghongphrong arat atum along Alangli vangve, lapen Alangli inghun kelok athak pen vang si kadokave angno cheklangkle. Alangli nangle’etlo, bonta monit atum Alangliphan chinine, lapen Alangli do puta mathathedetlo. Monit atum Alangliphan kanghong pakejoilo, Alangli “inghun kelok” (inghun ke Alangli Karjong, Alangli lam lapen Alangli ot-adur do’an aphan) pen nangsun’etlo, lapen mo kijut apor ahut kisung aphan kehaiji amonit atum angbong si Alangli dolo. Monit atum la chinine: Kangthir’et kapejok Abang Jisu jonghe le monit aphan chinghonpiklo pu sita, koson si karjong langno lapen karjong kangthirthe pen keplengset “kardom ahem” along Alangli sai keklempo? Monit atum Alangli kevangthuji aphan chonghong phronglo tema, bonta koson si kaheno atum aok kecho, kaheno atum avi kijun, lapen kaheno atum ape ri kachingthang, Alangliphan kroi bonta Alangliphan chinine, lapen kaike ta Alangliphan kehang parhum atum along Alangli kacheklangpo? Jisu Kapejok Abang ke kanghon pen plengset lapen kangjinso kangbakri abanglo pusi monit atum chini chotlo. Bonta, Alangli methang amat si Arnam lo, lapen kechoklim, aman kethe, aning kithi, lapen kangsai, aron an atiri, lapen man pen plengsetlo puke monit atum chininedetlo. Lasi, Kapejok Abang kachevangthuji aphan monit atum chingtunglo sitame, lapen alangtum akardom Sining aphan aning pangsamlo sita, Jisu Kapejok Abang ke Alangliphan kroilo bonta Alangliphan chinine pu atum angno ke cheklangkledetlo.

Ne Isreal along sai klembom ahut “Jehova” pusi Ne men chi’irlo, lapen lake Israel (Arnam kangvaitang akhei) aso atum a’Arnam lo lapen Alangli ke monit aphan ingjinsothek, hirjuno pithek, monit achethe aphan jadunthek; jakong kethepik a’Arnam lapen gian pen keplengset Abanglo. “Jisu” ke Emmanuel lo, lapen lake kanghon pen pap athok kachehodai Abanglo, lapen monit aphan pap pen pejoklo. Alangli Kanghon-Kangjinso Akai ahut laso asai klemlo, Alangli ke Kanghon-Kangjinso Akai amen pensi vanglo, lapen sai amo angbong pen eson asai amen pensi vang chotlo. La kopilo ma pulote, Jehovah ke Arnam kangvaitang Israel amonit atum a’Arnam lo, Abraham a’Arnam, Issak a’Arnam, Jakob a’Arnam, Moses a’Arnam, lapen kadokave Israel aso atum a’Arnam lo. Lasi, non akai along ke, Israel aso do’an ke, Judah akhei pen anpar, Jehovah aphan si ardomlo. Latum Alangliphan si dovan athak athok-ajir pilo lapen kardom ahemthepi along kurusar achoi pe chingthang si Alangliphan archolo. Jehovah nang cheklangthuji mene pusi latum aning chepathe parpiklo. Monit akhei aphan kapejok Abang ke Jisu anchot, lapen monit aphan kapejokji si pap alar kacharkli athok ke Alangli henlo. La pudamlo pulote, Jisu amen ke kangjinso akai along pensi vanglo lapen kangjinso akai ahut kapejok asai keklem nangkok ajoine si Alangli planglo. Jisu amen keplang athe lake kangjinso akai ahut amonit atum aphan amahang kethekthumiji lapen kejokji ajok si planglo. Lasi, Jisu pu amen athe ke kapejok asai keklemji amen pusi manlo, lapen Alangli men ke kangjinso akai pu aphanlo. Jehovah pu amen lake aron aphan kekroithip a’Israel aso atum apharmanlo. Aovetin lapen sai angdengtin ta, Ne men ke ale avedetde, bonta aman-apeng do pemelo: Amentin isi aove aphanlo. “Jehovah” lake Aron Akai ahut amenlo, lapen lake Israel aso atum Arnam aphan karcho ahut ke’en amenlo. “Jisu” lake kangjinso akai ahut amenlo, lapen laso amen ke kangjinso akai ahut kejok atum a’Arnam amenlo. Monit atum jongsi kijut arni ahut anta Jisu Kapejok Abang kachevangthuji aphan chingtungbomlang pulote, lapen Judea adet along Alangli arje ateng pensi kevangji aphan ningthebomlang pulote, la ningkan suri-throk-asai amo lake Pap pen kapejok akai ahut si ingtonkokpo, lapen ansose aphrang dam un’edetji apotlo. Lason thakthak si, kijut arni pute nangleledetji, lapen kai amat si pejutjedetji. La kopi apotlo ma pulote, Jisu Kapejok Abang ke monit akhei aphan pap pen kelangji lapen kapejokji aphan chot. Jisu amen ne kapinpur ke kangjinso akai ahut kejok amonit atum ajoine chot, bonta laso amen pen ajok si monit akhei do’an aphan pajutkokpo lapu kali. Jehovah, Jisu lapen Messiah la kethom amen ta Ne Karjong alar si arjaplo pu sita, lahei amen ke Ne sai keklem amo along kaprek kaprek akai ahut ki’ir amenlo, lapen lake Ne ingthimlim pen si Ne methang alar charjaplo lapu kali. Monit atum pirthe athak Nephan nang kehang amen pen chot ke Ne ot Ne dur do’an lapen Ne koson ma puke puthip un’e. Lahei amen ke aove kaprek akai kaprek angbong Nephan nang kehang’i amen chot. Lasi, kijut akai – kijut arni ahut akai – nangle lote, Ne men kaprek si chelarthuji. Nephan Jehovah pu nanghanghelo, lapen Jisu puta nanghanghelo, Messiah puke aphi alamlo – halaso ahut ke Jakong Ketheparpik, Aman kedo parpik Arnam Alangli amatlo pusi nanghangpo, lapen laso amen pensi angton akai ta ne pajutpo. Ahut’isi Nephan Jehovah pusi Ne chinilo. Nephan Messiah mate kapejok abang pusitame Ne hanglo, lapen ahut’isi monit atum Nephan kapejok abang a Jisu puta Ne hanglo athe latum Nephan inghon lapen man Nepi. Bonta pini Neke kelit tang apor ahut monit atum Ne kachini a Jehovah mate a Jisu kalilo; Ne henlo kejut arni ahut kevangthu a’Arnam lo, Ne henlo isi akai kapejut a’Arnam lo. Ne amat si pirthe pen kethurthu a’Arnam lo, Ne ot-adur anta chepeklang etpo, lapen jakong-horang, man-peng lapen adak-atur plengsetpo. Monit atum Nelong nangchelang dundepin lang, Ne chini abang avepin lang, lapen kaike ta Ne ot-adur aphan chini ingtung vangve. Pirbi kasorjon pen pini arni an inut ta Nephan nethek longle lang. La henlo kejut arni monit anglum nangkacheklang a’Arnam lo bonta monit angbong chepatujoi si do. Ne monit anglum sido, ahok lapen abinong, keturdang arni ason lapen kekar’ang ameh ade ason, Jakong-horang adak atur plengset pen. Inut bak mate eson bak ta Ne lammthe pen kangsai sedetji ave lapen inut bak mate eson bak ta ke kar’ang ameh adeh pen kangsir sedetji ave. Adet’tin mate alongri tin ta Ne lammthe pen apot hirjume plengsetji, lapen ke Ne lammthe pen ajok pachetneji. Lapuson si monit atum chinipo Ne henlo kejut arni kevangthu kapejok abang pu, Ne ke Arnam Jakongthepar lo kado-kave amonit atum aphan kerai kom abanglo, lapen ahut isi Ne ke monit atum apap athok-ajir kachepi abang lo, bonta kejut arni Ne ke kekhor-ang arni akar ason chepeklang si hala kado-kave anta pesek lo, lapen akemesen arni atur ason hala akeme ason an peklandak lo. Lason henlo kejut arni Ne sai. Ne laso amen pen Ne’ot Ne dur chepeklangdak pen monit atum’an Ne henlo ahokpet a’Arnam pu chini po, lapen Ne ke ketur’ang arni lapen kekar’ang ameh ade lo. Lake lalo kado-kave atum Nephan Ne ardomji mene, Israel akhei atum, lapen Ne ke pap kadia chot abang kali. Ne ke kado-kave kereng-et api an, sining pirthe lapen talo langroi langjeng an a’Arnam lo.

Kijut arni nangkele ahut Kapejok Abang nangleroklo lapen Jisu pusi laphan hangbomlang pulote, lapen Alangli jongsi Judea adet along hache pen puthot hadak si sai klemlo pulote, Ne ke Israel aso atum aphan si pinchongchot lapen Israel aso atum aphan si kejok vanpichot pusi mandetpo, lapen Gentile atum pen thangnat ta ale ave pupo. Tangte la Ne kiputang alam “Ne henlo pirthe lapen sining lapen ajat ason an ta kithip aHemphu lo” pu Ne kipu alam pen chetontedetpo kalima? Ne Judea che’o tekang si kekroikrelang atum angbong sai klemlo kopima Ne ke Israel aso atum a’Arnam chotlo lapu kali, bonta kapinchongtang an amar a’Arnam lo. Kijut apor ahut Ne kekroikrelang atum aphan cheklanglo kopima Ne ke Jehovah, Israel aso atum a’Arnam pu anchot kali, bonta, lapen anpar, kekroikrelang atum angbong pen kangvaitang atum aphan kapinchong Abang ke Ne henlo. Israel, Ijip lapen Lebanon anchot le Ne kapinchong kali, bonta Israel adet pen anpar kekroikrelang atum adet ta Ne si pinchonglo. Laso ajoine si, Ne ke kadokave api an aHemphu lo. Israel ahavar along Ne sai kapangcheng’i adim Ne paplanglo lapu kali, lapen Judea lapen Galilee ahavar aphan Ne kejok asai keklem ahavarlo pu Ne cheraidetlo puta kali, lapen, non ke kekroikrelang adet aphan humsi angton akai kepajutji asai hadak pensi Ne pangcheng’iji. Israel ahavar along Ne sai keklem phurun hini an klemlo (la phurun hini lake Aron Akai lapen Kanghon-Kangjinso Akai), lapen phurun hini asai (Kanghon-Kangjinso Akai lapen Khristo Arat Kepangri Alongri Akai) Ne klembomlo lapen Israel ahavar pen akaprek adim si klemlo. Kekroikrelang adet atum angbong ke, keparem asai klem si, kai arni pajutdetpo. Inut amonit jongsi Jisu Khristo pu nanghangkonglo, bonta kijut arni ahut ove akimi Ne pangchenglo lapen sai kimi keklemji aphan pangcheng tanglo pu chinine pulo tangte, lapen inut amonit jongsi Jisu Kapejok Abang kachevangthuji aphan inghongding pulote, lason amonit atum aphan ke Nephan nang kekroikre atum pusi Ne pudetji; lahei amonit atum ke Nephan nang kachinine atumlo, lapen latum Nephan nang kekroi aron chokchedetlo. Tangte lahei amonit atum Jisu Kapejok Abang sining pen nang kisun thekdun longji ma? Latum ke Ne kevangji aphan le kanghongding kali, bonta Jihudi atum aRecho kevangthuji aphan si inghonglo. Kangthirthe kebanpik apirthe aphan Ne kepavirji pu latum ar’i’e, bonta Jisu puthot batai hini aphong kachevangthuji aphan lapen kejok kelongji si latum ar’ilo. Ketertang lapen kaheno ahavar pen monit akhei an aphan non ephong Jisu kapejokthuji si latum ar’ilo. Tangte lason amonit atum koson si mo kijut arni ahut Ne sai keklem kepachun atumlo pu kemanpo? Monit atum akar’i ke Ne ning kehang asai lapen Ne sai keklem kepachun’un ajakong ave, kopima kedamtang ahut Ne keklemtang asai pen apot monit atum chehok thekthe lapen inghon thekthe, lapen Ne henlo Arnam lo lapen kaike ta mirakver lapen ban un’e pu monit atum chinine. Ne helo Jehovah lapen Jisu lo pusi monit atum chinichot, lapen Ne henlo monit akhei aphan kepadusi kijut kevanji abanglo pu monit atum chinine. Monit atum akar’i lapen kachini ason an ta alangtum aning kamatha pensi vanglo, lapen amek pen amat ketheklong lapu kali. Ne keklem ason pen ajat ta kacheton avedetlo; lapen, kachingbarbe pen plengsetlo. Ne sai keklem jongsi monit aning kamatha ateng pen klemlo pulote, la komentu si jutpo? Monit akhei atum komentu si kesang longpo? Lapen koson si ni throksi arni, Sabbath arni Ne kilut longpo? Ne sai keklem lake Ne kemang amo ateng lapen Ne kemangdam ateng si klemlo – monit aning kehang ateng penle keklem kali.