Sining Kangder Throksi Aghonti – Arnam Arat Alongri Pima Somindar Adang Ingdangji pu Abirta Keme Kethanmek

Ne Gentile adet atum angbong Ne sai chepangdang tanglo. Ne nong ke somindar adang si turdetlo; Ne kemang ason kadokave amonit atum arlosi dolo, doan ta neri pensi katevar lapen Ne kepek arpu kedengpon. Bangso apor pen ke, Ne isi akimi akai along lut’etlo, kadokave amonit aphan kaprek apirthe along van pen. Nemethang “kedo alongri” along Ne kachiruithu ahut, Ne ahokpet sik-dang along Ne puthot kaprek asai pangcheng ponpo, monit atum Nephan ansose kaharnuk pen nangkachini thekji aphan. Ne ke somindar aphan amutpi pensi kelangdam lapen lake Nesai aphan kemesen aporlo pusi kethekdam,^[a] lasi Ne kachirui-kachedam ketong, monit atum along Nesai kimi keklem. Lake akai kimi, kaprek le langdamde tame, lapen ansose akimi amonit aphan bangso akai akimi akai along keponji pu ajok lapen Ne kepaveji atum aphan kesai ponji pusi Ne akimi asai vanlo. Hala dragon thepo ake-er adet along, monit atum kachinidam un’e asai Ne denglo, bangso ajoine alangtum tomon along linglang dunlo, halaso aphi si penang an atum ke kejap atomon along lidunjuilo. Ahoklo, lake Ne kangpangthirji “kisi athailo”; lahenlo Ne kar’i ason lapen lake Ne kisik-kedanglo. Atheke Ne sai klembom ahut ongdung otlangno atum nanglutdun chonghu do, bonta Ne alangtum aphan karphlung ketong aretji pu kali. Alar ke, alangtum aphan mesen apor ahut si phlungji. Halaso aphi ansi Ne chethe alangsun manji, Nephan ahokpet nangkanghon atum Nelong pen thebo athe lapen mirlangdung angnim nangpadeng dunlong lonang pu aphan. Sobar kesang alongri along, aduk-abet alongri, hadak ser kangthir ke do thekthelo, sangti anvetlo, lapen lasi, lapuson alam pen kachetong nang apotsi, Ne lapuson asai angdeng keklemnang. Nang chini nangji Ne kelong ason doan ke ingthirvet, kangsirtang aser pu, sangti kali. Kosonsi otlangno atum nehem along kedobomlong jilang? Kosonsi Ne mahar atumphan Ne kedo rengme adim along ingki-ingket pacheman longpo? Ne kedengme asai an klempo lahei ason kepakat’etji aphan. Ne kemang ason cheklangkle aphrang, majok ta Ne kopisi keklemji ma ason chinine. Bangso avarsai cho’en pensi, Ne otlangno atum aphan kephlung, lapen alangtum ke Ne kedo adim pen damnangkokpo. Lason henlo otlangno atumphan Ne kivi, bonta alangtum Nephan asai nangkeklempi aphan arni dojilang. Monit atum hirjume kelong kangtung akar’i si anpar kangtang; lasi Ne Nebang chetevarpo lapen Nelong kachepaningding theparpik pu Gentile aso aphan chepaklangpo, lasi monit atum doan ta methang alongri along pachedo nang lapen methang aphan chepangsai lonang, lason ahut Neke Ne kaningje nangji alamthe ningjebompo, lapen monit atum kenangji ason doan pidunpo. Monit atum kamathathek angdeng nangchele lote, Ne ajir dingklui pensi Nesai pangdang’etpo. Anke Ne monit atumphan Ne kemang chepaklangpo, lapen monit atum along Nesai hini angdeng abang chechengpo, monit atum Nesai pen nangcherapdun thekji aphan Nelong tebokhet nangdodunkri avarsai pipo, lapen Ne keklem nangji asai along nangpacherap dunji aphan alangtum along ajakong kedoan pen keklem’un ason paklempo.

Majok along ta alangtum Ne ketheparpik anong theklongji pu akekroi ave, lapen Ne toi bor’i’e, bonta alar ke monit anglun pen ne ketheparpik anong cheterekphitpo lapen kaprek apirthe along pondetji. Monit atum puthot chekubirthulo pulote, tangte Ne ketheparpik anong cheponpo lapen hala kekroi atum pen ansose ake’ong si lapen kethe si paklangpo. Atheke isi apor do Ne ketheparpik anong Canaan ke’oji, lapen sonsi isi apor dothulang Ne ketheparpik anong kangvaritang atum aphan ta ke’oji. Lapen anparta, isi apor do Ne ketheparpik anong pirthe amutpi pen ke’oji, bangso ajoine atur pamepriri lapen kangting along pajangdetpo. Canaan alongri amat ta katheang theklonglelo; doan amonit kekroi che’o’etpo, bonta majok ta Canaan alongri angnim che’o ingtungte. Ne akimi asiningrengme lapen apirthe along lerok ansi Ne kaprek Ne anong kethe along pen achet enpo lapen kechengsi Canaan alongri along si chepaklangpo, bangso ajok pirthe adang katheang atur nangkarbor dopo, ajo akangting along kejangchok apor, pirthe adang amutpi si katheang along kevang longji aphan. Pirthe adang amonit doanta katheang ajakong along pen horang nangpacho’en lonang, Ne ketheparpik anong kepakamlong lapen det doan along pacheklangmithuji aphan. Monit akhei doan Ne monit apirthe along ajak dingklui aphrang pensi kevang pu kachini lonang lapen ajir dingklui aphrang si Ne ketheparpik anong Israel pen Nihang anat kachevan pu; athe nenong ke Nihang pensi nangkitur, hadak pensi Kanghon-Kangjinso Akai pen pini arni an kevan. Bonta lake Israel along pensi Ne kacheterek lapen hadak pensi Ne Nihang along nangkele. Israel along ephong kedodamdet lapen aphithu puthot kacheterekthujui apotsi, Neke puthot Israel along ke mahang thek un’elo, atheke Nesai ke somindar adangpi si kejapon lapen, anpar kopi kedo, sining kangder ame Nihang pen Nichi anat kitur. Laso ajoksi Ne Nihang along mahang thekdam pen Nihang kedo amonit atum aphan Canaan vanpilo. Pirthe adang amonit aphan ta Ne Canaan alongri along van ingtung, lapen lasi Ne Canaan alongri along lamthe kaningje ingtonte athe pirthe adang aphan kachari-chalomji aphan. Laso apor ahut, Canaan pen anpar ke pirthe along atur avelo, lapen monit doan ta kangchir lapen kangsam pen ajok kisung thektiklo. Ne Nemethang anong Israel aphan chipilo laso aphi puthot che’ethudetlo, lapen aphi ke Ne Israel aso aphan Nihang an vanlo, lapen monit akhei doan aphan ta Nihang an. Ne alangtum doan aphan katheang along vanlo atheke alangtum lapen pachetongthuji aphan, lapen laso pen cherapver si doji, lapen anpar ke laso aphan ridamdedetji mene pu aphan. Ne katheang kiri atum doan aphan puthot katheang pathekthu longji lapen Israel along kedo nenongnam palangponpo; ajir dingklui apor ahut Ne inghun kelok pensi monit akhei anglum nangsunlo pu alangtum aphan Ne patheklongji, latum aphan kalakha un’e inghun kelok lapen abitung kethe athesere patheklongnoi, lapen, anpar kopima, latum aphan Jehovah Israel a’Arnam patheklongnang. Ne alangtum aphan Jihudi ahemphu paheklongpo, chetong kangtungpre Messiah, lapen Nebang arjon akangthim komat aphanma akaitin along ta recho atum adai ke’enver. Ne somindar adang aphan si sai klemji lapen Ne thedung asai klemji, kijut arni ahut monit aphan Nenong lapen Nesai kachepaklang. Nephan ongdung aningkan pen nangkanghong atum aphan Ne kachechak’un ajakong ingthimlim pen chepaklangpo, Nephan inghun kelok pen vang nangji pu nangkar’i atum aphan, Israel aphan lale Nephan puthot cheklangthu nangji pu kar’i atum, lapen kadokave monit akhei aphan lale Nephan adai nangke’en atum, atheke kadokave ta Ne ajirdingklui pensi Nenong chepon si Nihang anat vandet pu pachini lonang pu, athe lake Judea along dobombelo pu. Atheke kijutsi arni nangle’et tanglo!

Ne somindar adang Nesai cheklembomlo, lapen Nihang anat, sining kangder pen kanghang sangsepin si nangpaphrangbomlo, adet lapen anim doan aphan hijuknutlo. Nese si monit aphan non apor an nangkeja pen vanlo. Nese pen ajok si Ne monit doan aphan cheraidetji, langroiso along pajangji, lapen Nethengno nangpachehodaiji, athe ne ajir dingklui pensi pirthe along pen Nenong puthot kache’enthu lapen Nihang anat si laphan puthot padamthu miraklo. Komatlo Nenong kelang kangtungte? Komatlo Ne kachiruithu apor aphan kachonghong ningkarkar ke? Komatlo Ne puthot kacheklangthuji aphan kalang’it’e? Komatlo Nelong kedo akanghon aphan kar’i’e? Komatlo katheang along kevangveji? Komatlo Canaan akeplang aphan kacholang dundeji? Komatlo pap pen kapajok abang nangkachirui aphan kachonghonghe? Komatlo Jakongkethe Hemphu aphan kanghonhe? Nese pirthe adang ingdang damji; Ne kemang ke, Ne kangvaitang amonit aphan kachepathengno, alangtum aphan ansose lamthe kethan. Hala inglong lapen langroi kapaklem un thedung kangder ason, Ne somindar adang lapen monit akhei aphan Nelamthe chethan. Lasi Ne ingho along alamthe ke monit atumphan anam kesodak ahormu chemandetlo, lapen monit kedoan ta Nelamthe birti. Nihang asining kabirlak ame ha Nichi anta kele. Nelamthe ke lapusonlo monit atum lahei aphan lo ingtungte lapen ripdam peme ta un’e, bonta lahei pen kaike ansose aning cheparong’i. Nese pen ajok, Ne monit doan aphan Nethengno vanji. Halaso aphi, Ne monit akhei along lut binongpo alangtum vang pen Nephan nangpardomji aphan. Ne kapachingdak anong lapen Ne ingho along alamthe pen, Ne lapusonsi pinchongpo monit atum Nethengno vangpo lapen hala Nihang anat pen kevang kabirlak ame theklongpo lapen Ne Nihang anat kedo “Olive Anglong” along nangsun’etlo pu patheklongpo. Alangtum Ne pirthe along kedo ajir dingpiklo pu patheklongpo, anpar ke Jihudi Asopo ason kalilo, bonta Nihang anat Kabirlak Ame ason. Athe Ne ajir dingklui penlo kithi pen nangkiburthu, lapen monit akhei anglum pen cheterek’etlo, lapen laso aphi puthot monit anglum nongme pensi cheklangthulo. Neke lakha un’e akai aphrang pen ta kardomhur abanglo, lapen Neke nonpen lakha un’e akai aphrang Israel aso atum ke’obup abang ta kalanglo. Lapen anparta, Neke non akai aphan anong kethenei Hemphu Arnam! Kadokave ta ne’inghoi athengno pavang nang lapen anong kethe Ne kachechak’un ajakong patheklong lonang, Ne se parjunang, lapen Nesai doan nangpalangdun lonang. Lahenlo Ne kemang amutpi; lake Ne kisik-kedang kirip angkung lapen kijutlo, lapenpen Ne kelangchari akenang ta lahenlo. Doan adet Nephan nangpardom lonang, doan ade Nephan nangpadeng lonang, doan amonit Nelong kelong akekroi nangpachibi lonang, lapen doan amonit Nelong nangpachiki lonang!

Kapachini:

a. Abinong’et alamjir along ke “pusi kethekdam” pu alamseng ave.