Jakongthepar abang arsikkrung akar’i

Nangning arlo isi thedung alam kapatujoi do, bangso aphuthak nang mantuneta chiputhekthe lang, athe nangke isi katheang kave apirthe along si dobom. Nangning lapen nangkarjong aphan kechokche lapen aning kapahi-i abang si nangcheraidetlo. Nangmek ke kangting si nangpamanghulaplo, lapen nang ke sining along kedo arni aphan ta checharche, lapen ajo kiturri-ra achiklolongso ta thekdunde. Nangno ta kapachobai alam pen si parpongthiplo, lapen nangke hala kangder ahir ketan parpik Jehovah ase ta arjulongle, hala richo anghoi pen nangkili alang ase ta arjulongle. Aron ateng pen nangpharman ason doan ta nang chepangbo’et, Hemphu nangphan nangkepek ason daan ta lo. Nang kijut un’e kepasung atalo lut tanglo, kapajokji ajakong ke ave, kerengji aphan ningchethe avepin, lapen nang keklem ke kaike kachesong lapen ketong solo…. Halaso apor penke, nang ke akun langno abang arideng pen kisung nangji si nangtangkoklo, Hemphu ahirjume pen heloving Hemphu kaselam aron nangpho un’edet anpin, kacherui kave atovar along sundunbom. Suri-suri ase penle nanghang ta nangning pen nangkarjong aphan ingthur thekthe. Nang ke akun langno arideng si ingsamjin pen mek kejang, alang nangphan ahoi kave adang pen si nangbaidetlo, tovar akrong kachini ason anta ave. Laso aphi, nanglang ahokpet akangthir ke nang chepangbo’etlo, lapen Hemphu akanghon ta che’o tekanglo. Nangning arlo, hala hi-i si nangtevarvoi ajat asai along ta lapen nangchethe si mandetlo. Nonke nang alangphan phererelo, honthethelo alangphan; alar nang ke alangphan nangning arlo Arnam asonsi pinchonglo. Nang alangphan karcho chenglo, kardom chenglo lapen nangtum banghini nonke chekak un’e mandetlo, abang arpum pen harchi ason, kithi-kereng ta chitukrup apharman. Nang chiputhekthe nang konat pen kevang, kopi ajoine si kahache, lapen kopi aphan si nangji. Nang ke Hemphu aphan kachinine mate monit kimi asonsi thekrong; nang Alangli keplang alam chinine, Alangli nangphan nangkeklempi ason doan ke lakhakhedet ta chok. Alangli pen kevang doan ason ta nang ke lang selet etlo; nang halahei aphan inghonghe lapen ardi pipe. Nang ke hala akun langno along si dunkri ha Hemphu nangkipi aron amokha kelongcheng arni pen. Nang hala akun langno abang pen ningkan suri-suri si mongve lapen lang kethe chechaklo, lapen nang alanglong Hemphu chethe kerai abang aphan kachesong along cherapdunlo. Nang ningcherui pu aphuthak thangta chinine, nang kivirji angchun along nangle etlo pu alam ke bikok tame. Nangke hala akun langno abang nangphan nangbaidet si nangpasunglo puke tengnedetlo, nang nangkeplang alam ta chetengne etlo. Sonsi akun langno abang angdeng-angdeng nangphan nangpasungbom si batbom non pini arni an. Nangning pen nangkarjong ke kithur lapen kapangklenglo. Nang nonke monit apirthe along akarengno aphuthak nangse kachepado ington etlo; pirthe along kechokche do puta nonke nang kroikre tanglo. Anparta Hemphu do puke nang munthithedetlo. Lake nang non pen ajir dingklui aphrang pensi hi-i aphan nang ahokpet apo lo lapen nang alangpen chekak un’e pu kedeng apotlo. La henlo nangning arlo isi kachepatujoi alam.

Katheang prinprele penke, Nihang anat klirdap nangtur tanglo. Labangso achiklolongso haladak komentune ta avelang, lapen bangso achiklolongso kiturri, kangsamri asining aphan patheangdanglo, monit aning arlo kemeptang atur puthot pakarthulo. Monit akhei nonke sampungvet kalilo, choro nangji bangso atur aphan, alang nang lapen anut kaprek along ta isivet kitur. Bonta nang inut abang ke kangtingkuk ajo along mek kejang chiphet si do. Nang thangnat ase arju longle, thangnat atur checharche; nang chinidunde non kevangbom akimi apirthe lapen sining alam, akimi akai alam, atheke nanglipo si nangliphan nangkethan, “Ne so, nang thurdet ritha, non amatke prap’onglang. Botor ingsam’ong, hong damdetri, moke nangmek along chir lapen nokjir nangtoklut-lat na.” Nanglipo nangkapare alam si nang ta ningchethechot, atheke nang ke nanglipo ansi akechok chotlo pusi kekroi athema alang ke nanglipen paklenglang lapen alang nangliphan nangchinghonpik. Laheihui nangkepare ajoine pen si nangliphan pirthe along katheang do pu thansera kekroiji nangkhang thiplo; lahei si nangliphan pirthe along ahokpet pu ason do pu nangpamatha ingtungte tanglo. Hemphu pen nang nangpajok jilang pu ningchethe haihedetlo. Nang ke kedobom ajutang pensi ningchepangsamlo, nang nonke kapaphrangbom atur nangleji puta mathathe, nang nonke thansera along ketok ateng Hemphu chevangji puta ridamde. Nang kamathadun ke akeme ason anke pacherui un’e, do thekthe. Nanglimek along ke monit atum along kevangji arni kevangjilang akai, lapu si ingbodet, praidet. Nang jakong doan pen nanglipo ape si rip ikphring, alang akisung-keboi kachethakdun pen cheprekprepin asonsi, nang kedamrap arisangho lapen heloving kele nangji akrong chepangbodetna kaphere. Ketheparpik lapen kachechar-rim monit apirthe si nangtum penang an along, pirthe along keprekjam adeng kapaplengji aphan masap keklemdop un’e lapen ajersobak ta kaphere kave aning pinchongdetlo. Lasi pemanlo keongdung a “Nokbe” – kithi aphan kaphere kave atum. Lapen anparta lasi pemanlo, angthun aphi angthun alangphan kasorjon pen akemang kachinine dirda kave lapen keklemdop thekthe keongparpik amonit. Hemphu amek ke abangphutin kephonang asumsi aphan ta nanglang tarliplo. Alangli karjulong ke harnukkrung akeso pen kachiru-kachechek ase, Alangli ketheklong ke bangphan kepasung abangphu atum katherak thekthe, lapen alangli kachinilong ke monit akhei atum kejok akerengeme kachepangbotang pen ajok kerap kelongji aphan ningkachethe kave lapen okchumpran kaphere. Monit akhei Alangli kanghon dengde tanglo, methang ningkehang akrong si damrong, lapen Alangli kelangchar dun’ibom amek pen kekatji kabor’i, kedengdunthu ke hotur arideng pen talo aklong akeho kachomatji, kijutsi amu an. Monit akhei nonke Hemphu achethe ase arjuje tanglo; Hemphu aripak ta nonke bangso ningduk meme monit akhei aphan ar’u ingtungte tanglo. Aphong-aphong Alangli cheraithuvoilo, aphong-aphong Alangli puthot chepangbothupo, lapen lahenlo Alangli ruithu lemdet asai. Halabangso ahut pen, Alangli kelak kecheng, kaharjaklo pu kachechini, lapen lahenlo Alangli alangli rideng asai kangtonlo, lapen monit akhei anglum kedam ke’olo…. Monit akhei ke laheihui kachelar chini dundepin khangjang, halabangso kevang lapen kedam thekdunde, Hemphu aning karong lapen aning kedono chinidundepin.

Labangso mindar along doan ason ta Hemphu kamatha lapen Alangli men athengno kachelardun prappik. Monit akhei atum karjulonglepin ason menmen nanglerok, alar ke monit akhei atum ajir dingklui pen kacherailong ason ke chininepinpen si ingbo’et. Majok ta munthi thekthe Hemphu konat si doma puke, ansose akijum si chini un’elang Hemphu achethe ajakong cheparje lapen koan akethe loma. Alangli kethe puke lalo Alangli henlo monit akhei atum kakhindetang Inut bonsitame monit akhei aphan cheraikombom. Alangli kithi lapen kereng alamjor chini, lapen anpar ta Alangli chini Alangli kasorjon amonit akhei kepadobomji aphan kopi aron si akeme. Monit akhei kedobom atiri ke alangli henlo Alangli henlo monit akhei aphan chethe kimi kipi Pajokbang. Alangli sengkarong aning aphan sengduk pen lin si pakloji, lapen sengduk aning aphan sengkarong pen rungphomji, doan ta Alangli sai apharman, lapen Alangli kemang apharman.

Monit akhei, Hemphu kaselampon kerengji aron-atang pen avive suichok aphi ke pirthe along kerengdun akemang chechinine tanglo, bonsitame kithi aphan phereduk. Alangtum aphan kerap lapen karchakji abang ave tanglo bonta amek selok ingtungte lapen methang aphan pinchongpo isi alon kave mate achethe bangso pirthe along ok kevai amantung methang akarjong aphan kachechinine. Nang lapu si rengbomlo, ningchethe ave, kaprek atum ta lapusonthot, thang akemang ave. Thansera along Kangthir-et Abang henlo kapajokji hala methang akisung pen kar’em Alangli kachevangthuji aphan chonghong padikrim atum aphan. Non an, halapuson akekroi hala aphir kave atum along ke thek’longle. Sitame monit atum lapuson aphan kar’i ke dovek. Hemphu hala kisungnang atumphan kangjinso do lason ahut, Alangli hala aphir kave atumphan ke aning phophebom tanglo, Alangli monit akhei pen lammvoi kelongji aphan akele chonghong nanglo. Alangli chohangji ninghang, kachohangji ke nangning lapen nangkarjong, nangphan lang pen an nangvanpi si mek nangpaphrangji, nang mononphi me kang’it lapen ingchir jokplotji aphan. Mo nang kelak-kaharjak lapen ning ningthe athai avepin si pirthe ingtingthip ason chinilo tangte, ning cheparunri, chirudetri. Hemphu Arnam, ekelangchari Abang, ajat apor sitame nangphan nangdengji. Alangli nangdung pensi nanglangdunbom, nangphan aphi kachetevarji si kachonghong. Alangli ke nang kedamtang alamm ningchevang’etji arni si inghongding: kachepu thekthe apor ahut nangkrong kachepangbo, ihut kachepu thekthe apor ahut tovar along nangphir kachepangbo, lapen ihut kachinine apor ahut nang inut “po” kachelong; mo nang chechini lote, lapen anparta, Hemphu kaike nanglangcharidun, nangchonghonglo hadak, ajir dinglen pen nang kacheruiji aphan. Alangli ning thethe-bibi pen nangcholangding, thangnat lammvoi longlepin pen si lammthak kachonghong. Alangli nangkelang chari ke kaprek do’an ason pen anam kangtuilang, lapen lake monit aning lapen akarjong apharman. Tahai labangso akanghong ke kijut kave, lapen tahai la amat si kijutlo. Bonta nang chechini nangji non amat nangning lapen nangkarjong konatsi dobom ma.

Aru 28, 2003