Ingkung 15
Arnam kacheklang ke kadokave amondoli along tame thur’etlo. Lake pima Karjong si ningjelo; Alangli me akar pathelo, jakongthe adak-atur cheparidenglo, lapen kangsailo. Alangli henlo monit aSopo, Alangli kengpak an kephorok achoi keding chingchoilo, lapen Alangli ning angden ser achepan chingtinlo. Alangli phu lapen chu kelok biresak angmi ason thakthak, lapen Alangli mek ke me ade ason thakthaklo; Alangli keng ke kepherangtang lapen kangthitang abitoi ason si klarbong lapen Alangli se ke langsun arki asonlo. Alangli ari ar’e along chiklolongso throksi do, lapen Alangli ingho pen rangso hini kedo kereset anokjir barlo, lapen Alangli mahang ke anerlo chitim arni ason thakthak si tur’anglo!
Monit aSopo aphan ke theklong’etlo, lapen Arnam Amethang tame chepaklangdaklo. Arnam anong kethe ke chepaklang’etlo, arni kitur’ang ason si turbonglo! Alangli anong kethe abang arpum keklarbong atur ason si chingdatrilo; komat amek si Alangliphan kekhang pen klem haijima? Kachedan ke kithi vanlo! Nang ningarlo kematha asontin, nang kaningje alam doan, mate ajat le nang keklempon tame masapsonat ta kangjinso chepaklangklelo. Nangtum anke kopima lake nangtum kelongdam apot chinidampo lapen chetheklongpo – thangnat ta kali bonta Ne kangsailo! Nangtum le Ne lamthe kecho lapen kijun nang chepedukdedetlo, lapen alar ke ninghang aling pasiksakdun lapen ke Ne kikim-kerang kephangnodun ahut Ne deng unjima? Ne lason ajat abangphu aphan ke lang pememelo! Jongsi nang aot-adur le ansose arsikjik pen heno tanglo pulote, nang ke me ade along nangpachodetpo! Arnam jakongtheparpik akarjong abang along si cheklanglo, ok mate vi aphu pen ha akengchimun an masapsonat ta chephophelo. Alangli somindar adangpi aphan rung pangtuilo, kethom asining hemrengme anong theklong anghoi along si ingnilo, kadokave ahormu aphan langchariponlo! Somindar lapen kadokave ahormu doan tame Ne rideng si dopetlo. Jongsi Ne le nningjelo te, lason si chemanpo. Jongsi Ne le kebak lote, lasi lason chemanpo. Sobar ke Ne kengpak arum si dolo; lake karnuknei aherang along si dolo! Ne se le kachepado lote, sining lapen pirthe antame cheterekjuipo lapen thangnat ta avedetpo! Kadokave ahormu aphan pamithupo; lake kelar un’edet ahok alam pima chenam ta akechokvetlo. Ne pirthe aphan chepahai tanglo, lason thakthak si kaheno doan aphan antalo. Ne ladak ingnilun si nangtum aphan lam thanbomlo, lapen kadokave komatma ano kedo atum parjunang lapen kadokave komatma kereng atum an pachodeng lonang.
Arnisi arni ke kijut nanglepo; kadokave ahormu doan laso apirthe along thangnat ta avedetpo, lapen kadokave ahormu doan mahang thekmipo. Lale ningchibinon! Chetengnedetrinon! Ladak ke kapachobai alam kalipinlo! Sining lapen pirthe avedetji, bonta Ne lam heihui kaiketa doverji! Ne nangtum aphan puthot ephong ningperunglang: Ale kavedet pen damrinon! Mekprangnon! Ningchiruinon, lapen pap pen kejok ke nangrideng si dolo! Ne nangtum angbong nangcheklang’etlo, lapen Ne se ke thur’etlo. Ne se ke nangtum athengno thur’etlo; arnivang ta nang chetongbomlo, chepathengnonolo, lapen arnivang tame chamsap lapen akimilo. Nang Nephan langlo lapen Ne nangphan langlo; Ne kaiketa nangphan lam thanbomlo, lapen nang pen si chepathengnono dolo. Ajat punon, nang Nephan che’obuplo lapen Nephan chininedetlo. Ne biresak atum anke Ne se arjulong, tebonta nangtum ke nonpu ta kroikrelang! Nang kroikrelang! Nang ning ke buikluihaklo, nang mek ke Sobar si pangtingthiplo, lapen nang ke Ne nongthe amahang theklonglelo – kopuan nangphan ingjinsomeme loma! Koan ingjinso meme!
Ne anghoi pen Karjong throksi pirthe adang atok-ano tame nangtoitheilo lapen Ne pherangke atum aphan amondolitin along birta pathanji si toipo. Ne henlo kangthirnei lapen athikpetnei; Ne henlo Arnam pima monit aning aklong’et aphar kangsirthek abang. Karjong Kangthir si amondolitin aphan ningjepo, lapen lake Ne lamthe pima Ne Sopo pen si vanglo; kadokave komatma ano kedo atum an parjulongnang! Kadokave komatma kereng atum an pachodeng lonang! Lahei doan chonon lapen junnon, lapen honthedam nangnelo. Kadokave komatma Ne lamthe aphan chehodaithek lapen ardi kipi atum anke thedung ahirjume longpo! Kadokave komatma Ne mahang aphan arsikjik pen kiri atum anke chenam ta akimi atur, akimi akatheang, lapen akimi akarsik alam longdamvekpo; kadokave ta chamsap lapen akimiverpo. Ne lamthe ke ajat apor ahut tame nangphan cheklangpo, lapen lahei ke nang karjong amek pachingpupo laso ajok nang kadokave kachepatujoijai karjong plengset ahavar alam thekdam longpo lapen pima monit angbong Khristo kepangri arat aphuthak theklongpo. Chepachongdamnon, lapen doan akangjinso lapen ahirjume anke nang phuthak dopo; akhim lapen avur ke nangphan paphodop un’elo, lapen sirung, phurui, teke lapen bongkrui doan tame nangphan pasung un’edetpo. Nang ke Ne penpen si damrappetpo, Ne pen si kengkam chejorpo, lapen Ne pen si anongthe arlo lutpo!
Jakongtheparpik Arnam! Alangli anong kethe abang ke cheklangdaklo, kangthir karjong abang thurlo, lapen Alangli henlo keplenglim Arnam Amethang! Pirthe lapen ok sonni tame chelarlo, lapen Alangli abang arpum kachekirla inglong athak ke Arnam abangphulo. Alangli aphu athak ser aphutup si chekuplo, Alangli chepindeng ape ke lokplanlo, aning angden ser achepan chingtinlo, lapen kadokave pirthe along ahormu doan Alangli kengpak arum si dolo. Alangli mek ke me ade asonlo, Alangli ingho pen rangso hini kedo kereset anokjir barlo, lapen Alangli ari ar’e along chiklolongso throksi dolo. Khristo kepangri arat atovar ke klardang si dolo, lapen Alangli anongthe ke thurlo lapen tur’anglo; inglong doan tame ningarongsetlo lapen lang heihui anta ingneklo, lapen arni, chiklo, lapen chiklolongso doan kadokave ta alangtum aphan kibivetvet kisiktang ateng pen si dolo, keprekjek, ahok Arnam komatma kehaidong kachehok arki Alangli ningkan suri throk kisik-kedang akemang kepleng aphan ingthum-arnelo. Kadokave ta chonprolo lapen ningarong pen kanlo! Chehokjoklo! Jakongtheparpik Arnam ke Alangli anong kethe anghoi athak si ingnilo! Lunlo! Jakongtheparpik Abang kehaidong atarpangthek adak-atur pen angsong rung pangtuilo, kelangmepik Zion Anglong! Kadokave adettin tame chehokjoklo, kadokave amonit atum anta lunjolo, Zion Anglong ta ningarongchen pen si ingneklo, lapen Arnam anongthe tame thur tanglo! Ne mangmun amat ta hemanme pima Ne Arnam amahang theklongji puke, tebonta pini arni Ne la theklonglo. Alangli pen arnivang chepathengnonolo, Alangliphan ne ning ne chingpudanglo. Alangli akeongparpik ason-amung pen kecho lapen kijun padorlo. Chethe, lamthe, asai amo, kematha, bidi doan – Alangli anongthe atur akatheang lahei kedoan pakarborlo. Alangli asontin akengkam tame chejaponlo, lapen Alangli majok kachedandong aning aphan menmen si kangsai vanlo.
Kecho, kedo rappet, lapen Arnam penpen si do rappet, Alangli pen kedo-kethak rappet, kengkam chejor rappet, chehok rappet, nong kethe lapen hirjume kelong rappet, Alangli pen recho anghoi chepachoi rappet, lapen Khristo kepangri arat along kereng rappet – oh, kopuan ningkangsamjin alam! Oh, kopuan akemepik alam! Itum anke Alangli pen arnivang chepathengnonolo, arnivang Alangli pen chingkilo lapen kaiketa chethanlo, lapen akimi aketheang lapen akimi aklong’et alam arnivang longbomlo. Itum karjong amek anke ingputheilo, lapen itum asontin tame langlonglo; kadokave karjong kachepatujoi alam doan itum aphan cheklangtheilo. Kangthir achethe ke chenam ta kejokvan do; kekat paprapnon lapen sangsedetnon, lapen chingtontepin pen paphrangbomnon – ansose akemeparpik achethe ephrang si dolang. Jongjong akedok kachomatlong pen ke ningchepangsam nangnelo; Arnam along kilutdunji aphan le chingtontepin pen rinon. Alangli ke kadokave ta pangrompetlo lapen amung ongparpiklo, lapen asontin ahormu tame pima itum akadure anke dotheilo. Keprangset pen jalangdun rappetnon lapen Alanglilong lutdunnon, lapen anpar ke thangnat ta hako ahut atengthot kalidetpo. Itum akai anke chingthurtheipo, lapen madu abangphu, athe, mate ahormu tame itum aphan pasiksak un’edetpo.
Rung pangtuilo! Rung pangtuilo! Ahokpet rung ingtui tanglo! Arnam kirung pangtui achethe ke dolo, lapen kadokave ahormu tame ahokpet rengmesen cheman tanglo! Itum pirthe lapen pirthe ahormu-hortar athak rung ingtui tanglo, apenan lapen osomar aphan thangnat kachephosap aning avelo. Itum keso-un’e lapen varmon pen kepangripon athak rung ingtui tanglo. Sobar tame itum aphan pasiksakji haihelo. Itum kadokave kivir-kephalangno ason an pen plenglim si rung ingtui tanglo. Lake Arnam aphan recho anghoi along kepangnitoilo! Itum Sobar aphan kengpak arum sak’ilo, mondoli apharman hakhi cholo, lapen Sobar keterbung arje lurchi-lurcha paklangtheilo. Mondoli kikim-kerang ke Khristo arideng si dolo, lapen anong theklong abang ke thur tanglo – lake Hemphu nangkangthum ahut dopo!
