Ingkung 3

Recho kehaidong abang Alangli anong-athang anghoi along si ingnilo. Alangli ke pap kadiya papleng’etlo lapen kadokave Alangli monit doan aphan anongthe along pacheklanglo. Alangli rideng along si Alangli somindar aphan bilo lapen Alangli kangthir’et gian lapen ajakong pen Alangli Zion kikim-kerang pathirthiplo. Alangli adak-atur pen Alangli pap apirthe aphan ingsailo; Alangli kadokave adet lapen kedoan amonit aphan kangsai vanlo, laso along pirthe lapen talo doan lapen kereng’et api doanlo, lason thakthak si hala komatma kaheno adrakha alang kijun pen kangri atum an. Arnam latum aphan chenam si ingsaipo, lapen Alangli chenam si latum aphan ningthipo lapen laso along Arnam adak-atur chepaklangponpo, menmen tongsekot si ingsaipo lapen panglenlepin penlo. Alangli ningkithi amide ke chenam ta alangtum kapahi’ipik adai kaichokpo lapen ajat apor ahut tame latum aphuthak kivir vanpo; latum kachepajokji adim chininelo lapen kachepatu athai avelo, latum chirupo lapen alangtum aso chingkritpo, lapen latum amethang aphuthak si kivir chevanpo.

Kehaidong asomar, Arnam kachinghonnei atum ke chenam ta Zion along dopo, hadak pen chekakkedetlo. Suri-suri amuluk amonit atum Alangli se arjudun pemepo, latum Alangli asai keklem ardi pidun pemepo, lapen alangtum kero angtong ingtontedetpo. Inutpet ahok Arnam cheklang tanglo! Itum akarjong pen Alangli phuthak chinidam pemelo lapen Alangli phiphi dunlo; itum ajakong doan pen itum kepaphrangdun ketonglo lapen anpar ke seletledailo. Pirthe kijutji itum athengno cheklangbomlo; kemesen mondoli achethe penpen monit atum, kachepho-chero, lapen hormu doan pima itum aphan nangkekomchen anta nonke itum aseke aphan arsikjiklo. Itum aning pima puan pirthe aphan akanghon kedo ahin le prapjin pen chiruithu lonang! Itum kelangdammek pima puan kebangthip apot prapjin pen chelangthu lonang! Itum akengkam along itum chedothipnang, pima itum ahoi kekapkedetji aphan. Itum angho chekhang lonang laso ajok itum Arnam alam along chejordunji aphan, lapen anparke itum mena kehai lapen kerem kachepate ington lonang. Ah, che’otheinang – nang mek kethe akar’ipik pirthe lapen akhi-adat aphan! Ah, nangmethang aphan laso pen chepajoknon – nang penan lapen sopi lapen sopo atum pen akachephosap! Ah, thurnon; apor thiheklo! Langnon, langnon, karjong aklong’et pen, lapen Arnam le pachepahemphu lonang. Ajat le cheman tame, Lot apiso asonthot ke chemandun nangnelo. Koan ingjinso memelo jongsi kivirdet kephonang pulote! Chenam koan ingjinso memelo! Ah, thurnon!