Kecheng ahut Khristo pen Kethanpon Alammthe – Ingkung 5
Inglong lapen langroi chelarlo, lang tame alangtum ahor along si chililo, lapen monit akai ke pirthe lapen sining asonthot anke chepaningdingdelo. Jakongtheparpik Arnam anchot si kijut un’epin achethelo lapen kithi pen thurlo, atheke dambomlo, ove isi aphi aovetin antalo, kaike aphanlo! Kadokave ahormu lapen kadokave akepho ason anta Alangli rideng si dolo, lapen Sobar ke Alangli akengber arum si dolo.
Pini arni, lake Arnam kecheng ahut pen kangvaitang apot si pima Alangli itum aphan Sobar kangnang pen nangpajoklo. Alangli henlo ahokpet itum apap Kadiyathek Abang. Kai apar kai, Khristo kithi pen kithur achethe ke chenam ta itum along vantanglo, Arnam achethe pen itum aphan kapacherappetji si japonlo, pima itum tame chenam si Alangli pen chepathengnono longji mene pulo, Alangli pen cho rappet, Alangli pen jun rappet, lapen Alangli penpen chehok rappet. Lahenlo mena aphan chibikok athok-ajir pima Arnam ke Alangli ning avi anam kachipi pen si chemanlo.
Botor ke vanglo lapen damlo, tomon lapen ar’e heihui tetponlo, penang an kai along kisung-keboi, kachenek-kaholo lapen asat doan chetongnanglo, penang an pirthe alamdon lapen anongno pen, penang an detchari kapachobai akoi karbok pen, tebonta masapsonat tame Arnam akekroi lapen Alangli keparai anke preiprelang. Arnam akar’idam, lapen Arnam akisik-kedang lapen akemang aphan ning aklong’et pen chehodaidetlo, pima lahei kichun thekji aphan, Alangli mena achethe chibikok si Alangli siklo. Alangli monit atum suri-suri amuluk apharman, Alangli keso chakchedetlo, latum aphan pangkrang pemelo lapen pang’it’edetlo. Itum le koanma kangting angbong si do tame, mate koan si itum kisunglo tame, itum Alangli ingno chipidetvek nangji anchotlo, lapen kithi pen kithurthu Khristo achethe itum abarim asema nanglarplotpo…. Athe lahei kadokave ke mahang kethekcheng asomar saide, Alangli lakledet si chepeduklo, choche lapen sangsedetlo. Koan arni lapen ajo, kopuan arni keso angtang lapen kangsam kithiklak pen chechaklo, Alangli ning aklong’et pen si Zion lang pemelo.
Pirthe, hem, sai, lapen angton tame, kadokave che’otheilo, ningarongchen, ningkehang pen lapen pirthe aningkarong ke Alangliphan thangnat chophophelo…. Alangli ingho pen itum aphan kero alamthe, itum aning arlo kachepatusip ason-amung pangdaklo. Koson si itum kachedondundedet unji? Alangli angho pen nangkebar alamsengtin tame ajat apor ahut itum along ahok chekokpo mene. Itum ajat le klem, Alangli kedobom along mate Alangli pen kachepatujoi tame, Alangli ketheklongle puke thangnat avelo, Alangli kachinine puke thangnat avelo. Kadokave tame chenam si Alangli ingno cheklangtheilo, itum mena akemang lapen akisik-kedang dolo tame.
Alangli thengno kangni, itum akarjong along ningkarongpon, rengmesen lapen domesen, tebonta kaiketa ingtheidang ason lapen ahokpet Arnam aphan apreng dopik: Lahenlo akemepik kahemandam un’edet ason lapen kelongdam un’edetji. Karjong Kangthir ke pima Jakongtheparpik Arnam henlo inutpet ahok a’Arnam lo pu angthek kipiji dorpluplo! Laso angthek ke patepekdun un’elo! Itum laso adilung anke pajirmidam un’edet ahirjume longlo! Jongsi Arnam akanghon lapen akangjinso kalite, itum ke kivir along si dopo lapen Sobar aphiphilo kidun anchotlo. Jakongtheparpik Arnam anchot si itum aphan pajokji!
Ah! Jakongtheparpik Arnam, asai ateng keklem a’Arnam! Lake Nangli henlo komatma netum karjong amek kangpu, netum aphan karjong plengset apirthe kemanghumeme ason-amung nangkepatheklong. Khristo kepangri arat ahavar mohut kachetongji anke ongpik khangjang. Itum kachonghong along itum cherokduntok lonang. Laso arni nangkeleji helolepinlo.
Ron amede chartingchenlo, tomon along hele-kaman angui si tokplunglo, arni-arve ta ingsamhe manlo, botor chelarlo, keso avur ingdanglo, lapen monit atum kithi anchotlo, kerengji aphan ningkethe avepinlo.
Ah! Jakongtheparpik Arnam, asai ateng keklem a’Arnam! Nangli ke netum kangtangrak keremredet abanglo. Netum Nangli vengkong arum si chingsomlo, lapen kephangno ason netum along nangle un’elo. Lason henlo Nangli kangthirjir akeraikom lapen akelame.
Netum lunjir along kedoan ase rungpangtuilo; netum akero alun lunlo, lapen netum akero ase Zion atok-ano tame ledamlo! Jakongtheparpik Arnam, asai ateng keklem a’Arnam, itum aphan chisik tanglo pima anong-athang ketheparpik kijut keledamji adim! Nonpu an, laso apor nangkeleji derdepinlo.
