Kecheng ahut Khristo pen Kethanpon Alammthe – Ingkung 88

Ne kengkam kopu’an ajak tong kepaprap lone Rat atum ajongjong pen ke matha un’e: Lake eson manghumeme hala keplang monit atum pun un’e. Ne kengkam ke ha pirthe kethip ahut penta vangbom, lapen Ne sai ke mentune ta ington’te. Somindar a’pirthe angkangpi arni pen arni chelar bom lapen monit, lethot’ta, kaike chelar pon bom. Lahei kado kave Ne sai angdeng lo, Ne kemang pon angdeng, lapen, anparata, lahei anta Ne keklem asai long si do, lapen badu a’monit ta chinine kalite lahei chinipet un’e. Ne Methang nangtum aphan nang kethan ahut anchot si, Ne pen chepangno rappet nangtum pen kachingki ahut chotsi, nangtum hala majerso anta chiniji, lapupe’te, badu abangphu ta Ne kepachokji akemang chechar’rim anta a’bidi avedet khangjangji. Laheihei ke Ne kethedung a’jakong, lapen anpar, lahei ke Ne manghumeme asai lo. Lahei ke badu ta lar un’e amar. La apotsi, kopima Ne kopima kaningje lasi pini dam bom lo, lapen lake kelarji un’e. Monit a’bidi along asapnat ta Ne phuthak kachini thap ponpe – latum kadokave ke bonta kelupik alam si kaningje pangtar! Lason mathari je nang phan ke dorphlup dolo kalite nang ning plenglim lo! Ne si la nangthan lo: Nang kedamji heloving dolang! Ne do’an kepachok ji kemang along pen, nangtum kachini bonta asapvet, lasi nangtum Ne kopima kepu arju vek nangji lapen Ne kopima kepaklem’toi si klem nangji. Asontin along ta Ne ning kehang ateng pen klem non, lapen nang Ne pen hirjume long vekji; komatma kekroi abang aling long unji, setame komatma kekroikre abang ke “thangnat’ta” longle lo halatum kamatha jongjong si papleng po. Lake Ne ahokpet, lapen, la’an sose, lake Ne hir-asang, Ne ning kithi lapen Ne kangchek. Ne badu aphanta isinat kematha kalite a’sai pen padamjui longle detji.

Ne lam heihei karjulong pen, ongdung atum ke kaphere lapen ok’keklem, latum a’mahang ingting’sang pen ning keduk. Nangtum aphan Ne kechokche do chenam lo ma? Nang ke hala chehang erpo aso kalidet ji ma? Nang ke keme si chekrong bom lang! Nang ke Ne sopo akleng ason anta chekrong! Ne mek ave pusi nang kamatha ma? Ne ke monit aphan bahak thekthe pusi kamatha ma? Ne ke Arnam monit aning aklong anta ketarlip abang lo: Lason henlo Ne sopo atum aphan kethan, lapen nangtum, Chehang’erpo asomar atum aphanta nang kethan lo. Ne ke asontin ta thek longdak, asapnat kechokche ta klemkle. Kopima Ne keklem kosonsi Ne chinine’det ji? Ne keklem aphuthak kopima ta klardak chenam! Kopi si Ne ke Arnam Amethang, somindar lapen kedo’an ason kapinchong abang pu Ne kaningje lo? Kopi apot si Ne helo labangso Arnam lo monit a’ning aklong an a’sat ke’en abang pu Ne kaningje lo? Ne bangphu’tin kedo kedam ta chinidun pame. Kopisi keklem ji kalite kopisi kaningje ji Ne chini dunde putong nangtum kamatha ma? Lake nang kachini kenang ave. Ne rideng pen kepathi’the detji le chere non; lason ke nang kanahok phoji. Ne kachari aron heihei ke dija pon bombe. Nang chinidam lo ma? Athak kadokave ta Ne kachari aron heihei angdeng lo. Ne nangtum aphan lahei kethan arni pen, jongsi nangtum a’kaprek kechokche klemthu bom te, hadak Ne alar kehui doji, atheke aphrang pen nangtum chini thekthe apot.

Non Ne kachari aron heihei nangtum apharman pangdak tanglo (latum kapangdak kecheng pon arni pen, prekjam a’kangchek prekjam a’monit aphan pek pon lo):

Ne lamchak heihei Ne chibi, lapen do’an ason ta Ne rideng si do: Komat ma ning kebi kedo abang aphan pathi vekji. Haladak badu aphanta kamatha piponji a’dim ave; latum aphan prapjin pensi sorphlot ji, lasonsi Ne ning kithi pen pho nangji. (Non penke pithir tanglo komatma pran karmut abang Ne recho kachari arat aso kalidet nang po, lapen lake Sobar apoton vek lo.)

Sonu-sokleng ason, nang karjap nang methang chepathir nangji lapen nang inghor chepapleng pame nangji, lapen arki dohang kalidet nangji. Ne kapechokji kemang aphan nang methang chipidet nangji, lapen nang dam aling tame, nang ke Ne hakhi keme abang plang nangji lapen Ne men aphan nang pathe nangji. Therak’meme asai klem detri; Ne sopo atum lapen Ne rat do’an atum kacharli’meme a’ot cheplang non. Malomso nat sita arong-aje along chejok dun non: Nang kaike ta abangphu’tin athengno sonu sokleng angthek si chepaklang vek nangji, lapen ban ason cheplang’ri; alar ke, nang ke ajak kedingpi aphrang kedamji le nangphu angsong chingthur non. Ne nangtum aphan nangpu bom lo Ne men kepathe ji aphan, Ne men aphan nong pajuno’ri. Sonu sokleng atum an latum a’methang methang keklem nangji dorep, lapen asontin klem’pet un’e. Lake Ne nang kepitang nangtum aphan anghor lo, lapen lake dengmo nangne. Nang ning do’an pen nang methang chepidet nangji, nang ning kedo an lapen nang jakong do’an pen, Ne nang phan kebat’tang anghor kepapleng pon bomji aphan.

Pini pen aphrang anke, somindar a’pirthe adang’an, Ne sopo do’an atum aphan lapen Ne rat do’an kelangji anghor ke Ne sonu sokleng atum la kepaplengji aphansi pek ponpo, lapen komatma aning do’an chepidet’de lapen aning aklong pen kepaplengji aphan keklemkle abang aphan Ne jasemet ingchekji. Lahenlo Ne ahokpet. Ne sonu-sokleng atum aphan pusita pajoije lapen langding’de.

Jongsi Ne sopo atum angbong kalite Ne rat atum angbong pen komatne abang Ne sonu-sokleng atum angbong inut aphan kangnekchoi lapen kelangrem dokok te, latum aphan Ne jasemet pasungji, Ne sonu-sokleng atum ke Ne methang alar lo; komatsi kopima latum aphuthak keklem, Ne phuthak ta lasonsi klem lo. Lake kesodak Ne kachari aron lo. Ne sonu-sokleng atum aphan, alangtum ning kehang ateng pen, Ne ahokpet pen Ne somar lapen Ne rat atum komatne laso aron arkan lote kachariji si hodai lo.

Ne pajo pen che’obupji komatma Ne phan kedeng mathakrang lapen Ne kecho kejun aphan, pe-ri aphan lapen mek kesang aphan ansi pachini chot atum pen, Ne phan athak a’bolon aphan lapen Ne arpu aphan kematha pangching ponpe, lapen latum keklem papleng nangji a’methang asai angdeng heihei aphan kematha pameme atum an aphan. Lake ano kedo atum an aphan si than tanglo.

Komatne abang Ne pharman keklem patang tanglo te lam karjupik pen pasimume’pin pen che’o tame. Chere non, kalite Ne nang phan nangphlung’phitji. (Lake kapabat kachari aron lo.)

Ne sonu-sokleng atum si ingchin a’kaibong humsi non penke Ne ketoi ateng pen a’kheitin lapen rat do’an aphan chari pangcheng’po, a’kheitin lapen rat do’an atum along halat po, lapen Ne kangsai, ahokpet, lapen ahir-asang a’khei’tin lapen a’rat an angbong ponpo. Ne sopo atum lapen Ne rat atum Ne phan phereji, Ne phan roji, chehokji, lapen ingtonte’pin si Ne nong patheji, atheke Ne kepachokji kemang ke pachekok tanglo lapen Ne sonu-sokleng ta Ne pen recho cholong po.

Lake Ne chari chalon aron heihei lo; laso aphi si, Ne do’an ta nangtum aphan nangthan ji asai kepaphrang pon bom asonsi. Athak kachari chalon aron heihei pen nangtum hala Ne sai Ne keklem akengkam thek longpo lapen kopu’an angdeng si kele ma lata theklong’po. Lake kepangthek ji aphan lo.

Ne Sobar aphan ke ingsai tanglo. Atheke Ne kar’i ke ning theklong lapen Ne sonu-sokleng atum ta Ne pen a’nong thelong rappet ajoine, Ne ahokpet lapen ahir-asang pen pirthe lapen Sobar arideng kedo’an amar aphuthak ta Ne jakong cheharjak tanglo. Ne ri chemun isinat’ta cherungre kalite Sobar aphan thangnat’ta karjuji ason ave (atheke lake Ne pen kachingkiji apun amatsi ave). Ne kopisi keklem ning kehang lasi klem bomlo. Ne sai paphrang pon pame bomlo, kengkam isi pen isi lapen Ne kar’i ke pirthe adang ta ningbi ave. Laso ajok ingtuiving adim Sobar aphan patherak lo, lapen laso ajoksi paruhup lo, bonta ladak ke a’methang si Ne kar’i papleng’ple det lo. Ne amatsi Ne sonu-sokleng atum aphan bangso chari chalon aron heihei halatum aphuthak anta keponji aphan hodai’et lo. Ehin anat ke, kopima Sobar aphan Ne kapathek long lake latum anat Ne ning kithi helo; ehin anat ke, Ne hir-asang si pathek longpo (kethek longji ke Ne sonu-sokleng atum helo kechoklim a’hakhi hala Sobar aphan kepatherak). Ne a’bangphu aphan pasungse; setame, Ne sonu-sokleng atum aphan si Ne ahokpet lapen Ne hir-asang papon ji. Athema Sobar Ne sopo atum aphan langrem lo, Ne sopo atum aphan chenek lo, lapen Ne somar aphan dongthip lo, pini labangso asai keklem tang lote, Ne sonu-sokleng aphan la papadat’phit ji. Sobar ke keklo’kle detji aphan jakong avepin tanglo. La do’an akhei pirthe athak katekok’rui helo kemenei amethang alamjir; rat atum kacharvo lapen adet pen adet ron thama heihei ke Sobar kachari arat kiru klardak kachepaklang lo. Kedamtang ahut Ne thangnat angthek lapen manghumeme ason kepaklang’kle det ke, Sobar aphuthak kepatherak ji si kevan longji aphan lapen angdeng Ne men anong ketheji aphan. Mo Sobar ke angton jutkok ahutsi, Ne jakong chepeklang pangcheng po: Kopima Ne kepu la nangplang bom, lapen hala munthidam un’e pin amar heihei hala ke monit kemenei abidi penta papleng un’e sitame pachunji (lahei kejongdam ke ahirjume nangle dapprang’po). Atheke Ne ke keklemvoi Arnam lo Amethang si lapen Ne phan thang aron atang ave, lapen atheke Ne kapechokji kemang atengsi Ne ningje ponbom, kopima Ne kedamtang ahut kaningje ke Non apor ke enponji aphan kenangsot avedetji. Nang methang bidi aphan che’ot thip ri! Ne ke aron-atang heihei kekroi abang Arnam kali. Ne phan asontin ta jokvan, kapejok tang, lapen angton pen kapejok tang lo. Kopima tumi kaningje tang ke pini aphan kilit’tang lo tahai, kalite la kaprek anat’thu pini varchor tahai (ajat seta, Ne kachari aron heihei, aphrang pen lahei pachethang’et tanglo, mentune ta chelarle) lahei helo. Ne kepachok pon kemang angdeng lo. Aron-atang heihei aphan ot’thip ri. Arnivang si a’kimi atur kevang lapen hadak a’kimi heihei kepaklang, lapen hala ke Ne kemang. Arnivang Ne kathe’ang si nang phan paklang ji lapen Ne seta somindar aphan pale ponji. Nang chini pame lo ma? Lake nang inghor lo, Ne kebat’tang nang phan arpu lahen lo. Nang masapso apor ta mathakrang’ri. Ne kangvaitang abang aphan Ne kejut anta enji, lake mentune ta chelarle. Atheke Ne henlo theparpik Arnam, Ne chini koson a’monit si kopi klem nangji, lason thakthak si koson abangphu si kopisi keklem an ta chini. Ne klemthek’et puke lahenlo.