Akesar Lapen Ariso Atum Aphan Alamthe

Ne pirthe along ongdung aphai sai klemlo, lapen Ne monit akhei anglum keongdung aningkan helatlo, sitame monit atum Ne arje lapen Nekun aphuthak kachini jumheklang, lapen ing’arveng aphai amonit atum si Ne kopi keklem asai ingthimlim pen pajirmithekchot. Monit atum along kadure ason dopik, kaiketa latum ke Ne keklem ason nangchinidun thekthe, lapen Ne alangtum aphan kaprek adim bikokna pu kaphere si kaiketa latum aning ke keton-kelang si dokok. Lahenlo si, monit atum Nephan nangchepho a’ot ke kaiketa ar’ompoi lapenpen ingtangkring kachere ajoi. Laso atheke monit atum Ne keklem asai chininepin pensi pini apor an nanglerok, lapen jongklok penke, latum Ne kaningje alam pen manghulaplo. Alangtum Nelamthe ari along si otdong, alangtum keklemdop un’e akekroi along methang aphan chipedet nangji mate alangtum kamatha ripthip thekthe pen tengnedet nangjima pu chininepin pensi. Alangtum laso aphan asai pen klem si paklang nangjima mate chonghongkok ra lang nangjima pu chinine, alangtum kedoan ason ihin saiphit nangjima mate angthin chepathe si aphi dun nangji, mate aphrang ateng pirthe pen pajirpobom nangjima. Monit atum arlo apirthe ke chingvuinok ongchet, lapen alangtum relotlatpik. Atheke monit atum Nelamthe klardak mate ingthimlim pen theklongle, alangtum angbong ongdung atum ke lahei aphan keklem ahut penang aduk dolo lapen amethang aning Nethengno nangkachibi penang aduk dolo. Ne nangtum akisung harnukkrung pen chinilo. Ok-vi along kedobom ahut ke Nelong kelele dovekpo, lapen ongdung kapachunji pu kejongdamvet ason nangtum aphan nangpasung. Nangtum nangmena ahemtun aphan an chipilo, sai keklem chepaduk pensi arni thonlo, lapen achiklo lapen aningkan ta kiduklok pensi litlo. Ok-vi along kedo ke kisung-keboi doveklo – Ne la kroikre un’e, lapen ahok tema nangtum along Ne nangkehang ason ta nangtum akisung ateng si selamlo. Ne keklem asai along akenang ason kedoan ta nangtum ahokpet apun langdam pensi pinchonglo. Chenam ta kedamtang arni ke, monit atum amena asai along nangtum pen akenang ason ke kapabat ason pensi chingvuikung, bonta nangtum chini nangji Ne ke kaningje lapen keklem ason along ta nangtum abat nanghanghe. Doan akenang ta monit a’ot, ok-vi lapen alangtum kopisi kenangjima langdamsi kaselam. Nangtum chini nangji, lapen Ne nangtum aphan klardak pen nangthanthek, Ne ajahak monit kechok ason kamatha ke khamkhe dunde, lapen Ne monit akhei along aphu-phi akai pen kedo a’ot aphan khamkhekhe. Lake monit atum Ne alangtum aphan kopi angdeng along si kibiloma pu chininedet pu anvet, mate alangtum Nelamtha ajor binong’et chininedet, laso ajoksi monit atum Nelamthe aphan klardak pen chininedet, lapen achitim penta kijum amonit si Nelamthe kekroi. Ahin anke kekroikre atumlo, lapen ansose si keonglang hala Ne “tomo kethan” karju kangtung atum. Anparta, kelang pen aning cheparong atum penang an do. Ne nangtum aphan nangpacherelo: Nelamthe ongdung ke Nephang nangkekroi atum aphan chingpupi etlo, lapen hala longri abolon kemepi kelang pen ningcheparong bonta donri angtan kibikok atum aphan ke Nerideng pen pavir’etlo. Nangtum ke ale kave abap chot kalima, Ne kevar lapen kedengdetang? Kosonsi nangtum Ne kedam nanglangdunji lapen Ne nangkachirui aphan ningkarong pen kedengpo? Ne nangtum aphan nangthanpo, Nineveh arat atum Jehovah aning kithi alamthe arjulongdet pen, alangtum thoila ape lapen theklo pen chikubirphitlo. Lake alangtum Alangli lamthe kroi apotsi kaphere lapen chumphare’etlo lapen lasi thoila ape lapen theklo pen chikubirlo. Lapu pini arni amonit aphan langdam lote, nangtum Nelamthe aphan kroi pusitame lapen anparta, non ephong Jehovah nangtum anglum pini vangthulo pu kroi sitame, nangtum kachepaklang akun ke thangnat kali bonta man kipipe, ningkan suri aphrang Judea along kahache lapen nonke nangtum anglum nangkisuntuk aJisu aphan kelangdunchar ateng. Nangtum aning arlo kedo kachongthui a’ot aphan Ne chini peme; nangtum angbong penang atum ke kachini kangtung pen Nephi nangkidun lapen Nephan samphridang adim penta nangridetlo. Nangtum kethom angdeng akar’i jongsi kirulo – nangtum monsam lapen ningkarong akai akar’i – tangte nangtum kachini kangtung tame virdetpo. Anke nangtum aning arlo kachongthui a’ot ke nanglamthe lapen sai pensi cheklangdakpo. Ningjedakji pulote, nangtum Nephan kachinijisi rirok anchot, bonta Nephan kaphere ave; nangtum nangde chekhang thekthe, lapen ansose si nangtum nang’ot aphan kachekhangkhelang. Tangte nangtum kopuson akekroi si kedolo, ahokpet ke? Lake abinong loma? Nangtum ke methang kamatha kisung kapakat lapen ningkasiksak kapavirji, nang kai along kangthaidang adim kapaplengji aphan si Nelamthe asai ke’en. Nangtum angbong komatsi Nelamthe aphan asai pen keklemlo? Komatsi abinong’et akekroi kedo? Nangtum Arnam ke Arnam inut monit aning arlo harnukkrung anta kethekdam abang pusi kaningje hangkong, bonta nangtum ning arlo pen kehangkong a’Arnam kosonsi Ne pen kacheteboklo? Nangtum lapuson si kehangkong tangdet, tangte kopisi nangtum halapuson le keklem? Lake nangtum Nephan nangkachituji akanghonpoma? Nangtum angtur along asapbak ta kekroithip ave, bonta konatlo nangtum dan kachipidet puke kedo, lapen nangtum asai keme? Jongsi nangtum alam Neno along nangkele ave asonte, kosonsi Ne nangtum aphan lapuan nangkelangseletji? Jongsi nangtum Nephan ahokpet pen nangkroi, kosonsi nangtum lauson ningsiksak angdeng kelerok? Nangtum amahang along ningsiksak angthek do Meherang akangsai along karjaplun ateng. Nangtum along epharbak ta jakong ave, lapen nangtum ardi pipepin si ning arlo ase alam kachethan; nangtum ke kakhinde lapen kasorsar pensi plengsetlo. Ajir dingklui pensi nangtum ke Ne keklemlong kekroi kachepangbo lapen nangtum ahokpet akekroi tame ingbo tanglo, lasi kosonsi nangtum kijut apor an nangkidun thekpo? Lake lapuson tangdet apotsi, tangte kosonsi nangtum aphan ke kepajokji?

Nesai nangtum aphan akerap dopik pulo, sitame Nelamthe kaiketa nangtum along ingbochok lapen nangtum along thangnat vangve. Penang an aningkan Ne nangtum anglum ridamlo, bonta inutbak Ne risangho binong kachelongji sungpik. Nangtum along Ne sai keklemji ningchethe avepinlo pusi chemathalo, lapen nangtum aphan nangkanghonji aphan kanghon ta avepin. Laso atheke Ne ajir dingklui pensi nangtum “kachepalong” ason aphan ning nangsiksakdun’etlo, lapuan kibi lapen ningke’oi meme pi halahei; nangtum anglum Ne mantune ta lam ningjejepinlang lapen nangtum along sai klemklepinlang ateng. Nangtum kachepa’undun ason tangte lapuan ningsiksak memepi. Nangtum kaiketa methang along kivir lapen katherak si kachevan, lapen anparte thangnat apun kelelelo. Ne nangtum along monit atheng longledetji anpin, mate monit angthek angnim ta longle. Komatlo nangtum along amanim kimi? Konatlo lapuan ongdung aningkan nangtum kitu anam ke, lapen konatlo angthek ke? Nangtum mantune ta isibak chelonglelangma? Nesai ke akimi angthun do, akimi kecheng. Ne thedung akisik-kedang dengponji lapen Ne ansose akethe asai pachun ingtung, sitame nang ke aphrang ateng si inghan kangther along kaningrilok, lapen asai pen ke methang aphan abinong akisung pen chepajok thekthedetlang. Lahenlo si, nangtum nonpuan ta Nelamthe pen thangnat longledetlo. Nangtum nonpuan ta methang inghan lapen lang cheho adim along pen chepajok thekthelang, lapen nangtum Nelamthe aphan chinichot, bonta ahokpet ke Nelamthe akejokvan angkang along lutlepinlang, lasi Nelamthe mantune ta nangtum aphan chingpupedetlo; lahei ke suri-suri aningkan pen kanghapchek kethanmek alam akitap atenglo. Ne nangtum akai along nangcheklang, bonta nangtum laso alam chininedet. Nangtum Nephan nangpangthek thekthedet. Ne kaningje alam doan pen achitim anbak ke nangtum aphan kangsai alonglo, lapen lahei ke achitim ansi asai kevang nangji pen asai vangchot, lake nangtum along chumphare aphon kepado. Ahin kedoan alamthe ke nangtum aphan chethe aphuthak lapen kosonsi kedo-kethak nangji pu aron nangkethan aphan. Bonsitame, nangtum kamatha le langdamlote lahei alamthe avedet asonsi thekdamlongji, mate nangtum osomar alamthe si karjudunrong pu ason, lale nang kaiketa kachibinkuk akangnekhing pidunver, bonta halaso ateng ke mantune ta klemkle. Nangtum ke mantune ta lahei aphuthak kamathadam avelang; lake kaiketa kachini kangtung ajoine pensi kechengsi ke nangtum Nesai nangkelangdun, angthek ke non nangtum kangting along klo’etlo lapen katheang theklonglelo, lapen lasi nangtum kangting along jinsomeme anpin an kachiru. Nephan kenangji ke nangtum lam karju, lapen anparta, Ne kenangji ke nangtum Ne kaningje ason doan aphuthak chinidak nangji. Nangtum kelangrem a’ot chepado nangne lapen jatsemetpet ke nangtum Ne ingvai peme pen kaningje ason aphan ingsai nangne, mate Nelam lapen Nesai aphan keplakvi pado nangne, nangbe ateng. Nesai ke nangtum anglum si keklem lapen Ne nangtum aphan Nelamthe along kedo ketheparpik akanghon nangpilo, bonta jongsi nangtum Nephan lapuson le nangvi pulote, Neke hala Gentile aso ahemtun atum aphan si nangtum kelongle lapen mantune ta keklemkle ason pirongpo. Komatsi kasorjon pen keman angbong Neri pen Ne ke’ot’elang abang kedolo? Nangtum angbong pen keongdung atum ke “kikri kesar arta”, lapen nangtum along Nelong kedo asai kedengji aphan jakong avedetlo. Nangtum ke Hanhao avo[a] asonlo, thangbakbe damjuichot, lapen Nelamthe aphan mantune ta ardi pipepinlang. Parisobom amonit atum abang ta apar ningjoino lapen apar jakong ave ongchot lapen Nelamthe aphan aning kachipi jum’ongchot. Alangtum Ne kisik achoran asan along akithu-kedok along ningcheparong kechoji aning hanghe; alangtum ke kahelo adim kahumridamji aphan a’um pen tetsi kangjarchor avoso asonlo. Kosonsi lapuson ariso-nimso lapen akesar amonit atum Nephan asai kevangpo? Hala arta kelittang amonit atum ke Nelamthe aphan alangtum tipit lele aphrang kesar apor kelong nangji akejoi anam asonsi ke’en, atheke alangtum kithitang aphi alangtum apharlo ha siningrengme ledunji mene pu aphan; alangtum aphan, la anta kechoklo. Lahei arleng kesar atum nonke kaita “thedung akemang” lapen “keklemhikhe aningkethe” si chepodokoklo. Alangtum Nesai aphan ning keding dolo lapen akesar arleng atum kedo nangji karjapthip lapen kithirkluk apun do, kesanponphitji mate komatne mate kopine along kerem dundetji pu kekroi thekthe – chenamta, latum ke kiru un’e ahemthepo asonlo – bonta latum amonit atum akekroi ke kekroithap akeso ape pensi bangthiplo kalima? Konatlo alangtum atovar? Latum aphan ke, alangtum atovar ding ongchot, atok ongchot kalima? Kosonsi alangtum Ne kemang kachini unpo? Alangtum ningchethe ke choro meme sitame, lahei akesar atum angbong bang koan si kamanghu pen kidunbom kali, bonta ahokpet ke chethe kiridun? Bang koan atum si Nesai ahokpet akenang aphan kachini peme? Komat akemang si mohut arni Meherang alongri klo jokplot bonta Ne kaprek apirthe along kevandetji mene pule pini bangso apirthe along Nephi nangkidun kalilo? Nangtum kijutsi kele nangji adim lapuan kejoike alam chitinkokma? Nangtum doan ta kapariso abongkrui ateng pusitame, nangtum aning along ahokpet atovar kedo ing’arpik an. Nangtum kapariso pule Nesai kelong keong nangji pu kali; laso alar ke, nangtum kaiketa Nephan ning nangpakangver titi. Nangtum pariso pusitame, nangtum keprangset kalite kemang duredet, lapen nangtum kaiketa methang kevangjilang akai aphan chepaduksipse; nangtum mathachunche lapen ingthonbi ateng. Pudet tame henone keprangset, kekroi abidi, lapen pariso amonit along kedo nangji alamrai kedengdun, abinong’et ke nangtum along longdamde; nangtum, lapuson pariso amonit, atum ke kacherai alam ave lapen kechok lapen kechokche, keme lapen kaheno, kelangme lapen kelangno angbong kethakthek ajakong ave. Nangtum along ajat ahin tame mirak pu kelongdam un’edet. Nangtum ke akai kedamtang manhoilo, lapen nangtum, lapuson ariso-nimso atum ke, armu aphi kidun ta charli’etlo, kachepaludun charli’etlo. Nangtum mantune ta klardak pen kechok lapen kechokche angbong phar thekthelo, ahok lapen kachobai angbong pacheprek thekthelo, mantune ta kechokche kemanji aphan bor’i un’elo, lapen mate nangtum kopisi kechok lapen kopisi kechokche than thekthelo, kopisi ahok lapen kopisi kacheparjan phar thekthelo. Nangtum ke haita hainernar lapen kechok ateng le keklem kali, nangtum ke kachepate a’ot do, lapen kasedeng a’ot abang thepik – kopusi lapuson ariso-nimso amonit atum le ahokpet kacheparideng thekpo? Kosonsi inut lamrai ke’endun thekthe abang le hakhi kedodunpo? Kosonsi inut kechok lapen kechokche angbong kepaprek thekthe amonit aphan le riso-nimso pu kipu unpo? Kosonsi inut keprangset, keripsip, kimirak, kangsamjin, lapen kithirkluk kave ariso-nimso aphan le Nelong nangkidun abang pu kipu unpo? Kosonsi inut ahokpet kave abang, kangsai aphuthak kachinine, bonta kijui lapen kachebohong aning kehang, abang le Nehakhi kachemanji apun kedopo? Anut kaprek aphan kachongthui lapen kelangrem pen keplengchen amek kedo henlo riso-nimso atum along kavedet nangji, lapen riso-nimso atum ke kaphalangno lapen kepalangseletri asai klemkledet nangji. Alangtum kekroi abidi, kemang, lapen isi methang aphan kachepame muchotji aphan ning kirunpik akar’i avedet penle kedo kalidet nangji; alangtum methang kevangji arni aphan kachisikmek akemang along ning kirun avedet nangji, lapen mate alangtum akai along ningchethe chepangbobdedet nangji mate kevangji arni aphan ta methang aphan ningchethe avevedet nangji; alangtum along non ahokpet atovar kangvaitang along kedothipji aphan kithirkluk dover nangji – athe alangtum Nelong akai kachepangdangji pu akemang kachepachini aphan. Alangtum ahokpet avevedet nangji, mate alangtum kacheparjanthap lapen hokpet binong kali ason aphan chakchedet nangji – alangtum mesen alamrai che’en si arjapkluk nangji. Alangtum thangbakbe lapu amat tutdun aret nangne, bonta dan chipidethai lapen hokpet kangsai lapen ahokpet apharman kachesonghai a’ot donangji. Riso-nimso amonit atum ke kangting ajakong atum nangkeber along kachethondundedetji lapen methang kedobom ardi kachekirlaji aphan keklemhai angthin do nangji. Riso-nimso amonit atum ke kisung athengno ari chirung nangne, bonta chingpudang lapen prangset nangji, alang korte lapen ingjir apharman kadiya a’ot chepado pen. Ahoklo, lahei henlo anuttin along pen Ne kenangji ason, lapen anuttin aphan Ne keparedunji ason. Bonta lapen anparta, lahei henlo kadokave parisobom amonit aphan Nehin pen lam kangsam. Nangtum Nelamthe ateng si klem nangji. Jatsemet ke, riso-nimso atum ke lamki along lam kephlakdunthek ajakong lapen ahokpet akangsai lapen ahokpet alam katarlipji aphan lamrai ke’en ajakong avevedet nangji. Nangtum ke kelangme lapen akeme ason doan ridun’et nangji, lapen nangtum akeme ason doan along abinong’et alam chepalong’et nangji. Nang methang akai arpu che’en nangji, lapen nangtum laphan mathakrang nangne. Monit atum pirthe along vang lapen Nephan nangkachetong ke ing’arpik, lapen ahokpet aphan kiri lapen kachepalongdun avarsai kelong ta ing’arpik. Pipotsi nangtum bangso apor keme aphan bangso akai along kiridunji aphan akechok atovarlo pu apun kipipedetpo? Lapen kopisi nangtum kaiketa ahokpet lapen kechoklim akangsai ahin lapuan kelangdam prekvilo? Kopisi nang kaiketa kachedong-chesak lapen methang aphan hala monit aphan kijui’idet ahokpet binong kali lapen keterpik penle methang aphan kachepanahok aretlo? Lapen kopisi nangtum ahokpet binong kali atum keklem asai along kachejok arleng kesar ason le kacheplanglo? Kopisi nangtum akeban ason along penle akeban abidi charlidunthurong? Nangtum akai ke hokpet akangsai, hokpet ason, lapen kangthirjir a’ot pensi plengthipji; nangtum akai lapuan kangdukchit arta ahut ke lapuanset ter aret nangne, nangtum aphan Meherang along nangpaklochok anke. Nangtum lake ahir kangtang kopai kelangnopo pu chemathathema? Lake ahir ingtangrak pen kechokche akangsaipo pu chemathathema?

Nangtum kadokave ta nangtum asai kechoklim chenam abang klem nangpo lapen Nedovan along chehodaide nangpo, laphan kijutsi, keprekjek dan kachipi pinchong si, lale nangtum Nelong nangkachehodai. Nangtum kadokave ta methang alamrai along charjapthip nangpo lapen sining along kedo anghun ateng aphongtin atomon kevang along lidun nangne. Nangkai achitim apharman ke nang klem chepaduklo, tangte pipotsi nang kelong nangji kijtusi kele adim chehanghedetpo? Nangkai achitim aphan nangduk chinghoilo, bonta nang phak – lapen methan – ason nangpi-nangpo atum ahokpet lapen nang jongjung keso akai aphan tipit along pasanpon longloklo. Lake nangphan kechokchepik akangsailo pu nang chemathathema? Lapuson si kai along kerengdun puke ajor avedet pu nang chemathathema? Lapuson si ahokpet ason lapen kechoklim atovar kiridun ke nangdung-nangrei kedo atum kedono lapen hem isi ta ning karong kave akasiksak si pinchongdetpo, lapen lake ahir kangtangrak akanahok ahin si pondetpo. Jongsi nang lapuson le dodun, tangte lake ajor kave akai pule lakhaji kalima? Komat akai si nangkai pen anpar varsai kemejilang, komat akai si nangkai si pen anpar kangnekememejilang? Nangtum Nephan nangkiri ke nangtum aphan keparengme Ne ningkarong lapen lamthe kachelongji aphan kalima? Bonta nang kai achitim aphan ahin-ahin damdet aphi, nang Ne nangphan ningkithi plengtir lapen nangphan nanglangletle mate nangroredet an Nephan ningnangpakanglo – lake nangkai kangthim le ale kevangvedetlo kalilangma? Kosonsi nang lahei akai-akai pen si kapangthir along pen kejoktang monit kangthir atum amahang kelanghailo? Nang Nephan nangmathathe lapen kijut ahut kivirji akanahok aphan pathurlo – labangso avarsai ale cho’en pen talo thepi tarai an kedam along kidun lapen aphi Ne “nangkepek asai” kekroi si kemeji. Ajir ding’o pen si Ne nangthanlo pini ke nang, nang un’an mathathaletlelo sitame kedamji aphan ninghanghe, kijut ahut ke Ne kasorjon angdung si parlopondet lapen joipondetpo. Nang methang aphan cherai unji chenam ma? Nang non amat kiridun’ibom abidi penta nangphan choklim nangpinchongji pu nangning chetheklong ma nang? Nangning ingtang’oi kalima? Lapuson akekroi, lapuson akiridun, lapuson akai, lapen lapuson a’ot – kosonsi lake Nelong pen kero kelongpo?

Kapachini:

a. Hanhao avo atomo ke Aesop ketok miso lapen phelong atomo pen chinglitpik. Hanhao avo atum kar’om abotor ahut ke atar kachekim alar mek si kejang kangtung, alang adunghet kedo magpie, lapuan kether tangdet aphi tame. Kangsam apor nangkele ahut ke, avo kichung pen kithi pangklengdetlo.