Arnam Aphan Nang Kangduk-Kardom Chelangpeme Nangji

Koson si pini arni amondoli arlo along Karjong Kangthir sai klemlo ma? Laso akarju alam apot nang arjuthek pame loma? Nang korte lapen ingjir atum angbong kisung ason kethenei kopilo? Latum angbong kadurenei ason kopilo? Non amat, ajahak atum ke asat kephobom ajok kamatha kengsetse, lapen ajahak atum ke khindelo. Akaprek amonit atum ke aphrang kedam chingtonkoklo pima Arnam lam kaningje ingtonkoklo. Arnam aphan akekroi kechoklim atovar anat monit atum lutledetlo. Latum jokvan pen renglongledetlo, lapen amethang akarjong achethe ta chelana thekthedetlo. Ajahak atum ke dunbom si jakong pen hungdun bomlo, lapen Arnam lam ningjedet ansi latum kacharliji aning hanglo, bonta Arnam jongsi lam ningjeje te, latum ke aphrang anat damdelo. Monit atum non anta aning arlo Arnam akar’i ason chininelang lapen non anta Arnam aphan inghonthek pememelang; kedamtang ahut ke latum aphan ketoi parhum ajoine si Arnam aphi dunlo. Non ke Arnam asai keklemji aphan akelak ta do tanglo. Lahai amonit atum aphan pherememelo kalima? Reng nangji pu ajoine kabor’ichot atum akeongpi dolo. Latum Arnam alam cholo lapen junlo lapen Alangphaan ardomlo, latum aning ar’ot pensi klemlo, lapen dihu isi ke chihungpiklo lapen non ke lason avedetlo. Keongdung amonit atum ke Arnam kangsir lapen kepachoklimji asai keklem along chetodun ingtungte detlo, lapen ahokpet abang ke aning arlo kaiketa kacheto kangtung akar’i avedetlo. Latum kechokche pen plengset ahut, Arnam angno alangtum apreng do pu chemathathe detlo lapen aning kache’oiji aphan ta latum mathathekthe detlo. Latum ahok aphi hungdunde lapen mondoli ta cheo’e, bonta malomsovet akerengme aphi si arplung dunchotlo. Lahei amonit atum ke amo kevangve atumlo, kilu pemelo! Mo apor nangle lote, latum aphan ke plungjuipo, lapen inutnat ta jokjedetpo! Komatne jongsi ephong jokplotlo pu aling kaike ta jokverji pusi nang kamatha ma? Laso akitindam ke kachobei alamlo! Chethe anat kilutji aphan karplung dunde atum an aphan ke ado piji. Keongdung amonit atum ke chethe anat kilutji aphan aning hanghepinlo, mek renglor pen kaheman amang, mate ahokpet alam apot asai keklem amo sita. Kilutji aphan ta latum aning hanghe, lapen ansose akarnuk anat kedamji aphan’ong aning hanghe’onglo. Lake amena aphan amat kachepanahoklo kalima? Non amat ke, ajahak asanchom atum ke keme anatthu dambom si ketheklong. Karjong Kangthir koan ma sai keklem, la an si latum ning kethe ajakong chelonglo; latum koan si kepho kachetong loma, la an si Arnam sai keklem koan arnuk ma latum chetong ponbomlo. Latum koan si akarnuk anat damlo ma, la an si latum chini ponbomlo. Arnam akanghon thepik binong pu latum chinilo, lapen amena atum aning arlo kengset lapen akeme anat dambomlo pu latum chemathalo. Lahei amonit atum ke aning arlo Karjong Kangthir sai keklemlong atumlo. Ajahak atum ningjelo: “Arnam along pen lam akimi thangta ave, lasi ahok aphan kiri parnuk muchot nangpo, ajat ason apot lapen ne kepho kachetong an ason ta ahokpet nangpo lapen ahokpet Arnam alam anat si dam nangpo.” Lason kamatha amonit atum ke Karjong Kangthir sai keklemlong abangphulo. Arnam ke amena araje chepaklangkle lapen anuttin amonit angno pen binthiplo, lapen Alangli lam ethe ta ningjeje lapen ahut pen ke monit atum aning arlo kachekirlavoi chetheklonglo, bonta monit atum aphan Arnam cheo’e. Inut amonit jongsi alang keklem nangji asai along ahok pen dothip thekthete, alangtum along Karjong Kangthir asai klemkledetji. Kachikirla apor ahut, Arnam amethang nangcheklangkledet ahut, nang jongsi nangning kethe avedet lapen phererong te, Alangli lam ansose kachini muchotji aphan nang bor’i’e te, nang ke Arnam asai along pen kekat abanglo. Mo aphi ke, akeongpi aphan kevar angbong pen nang ta inutpo. Komatne jongsi Arnam alam anatthu kilutji aphan bor’i’e abang pulote Alangphaan ahakhi ason arjap un’e. Arnam aphan hakhi ason karjappi un amonit lapen Alangli ning kehang ason an kepaplengpi atum anke Arnam alam aphan kiri aning hang peme atumlo. Monit atum angbong Arnam sai keklem ke latum ahok alam kachiniji aphan; nangphan chethe aphan nang keparitoi ke nangphan kereng nang kepachoklimji ajoine, lahei ke Arnam angno nangphan mesen ajaton nang kepamanji ajoinelo. Non nang kiribom ke chini un’epin alam, Arnam alam karju, kachechar, lapen keprekjek mate pine akimi ason doji mene pu kelang chari, lapen nang kachini kangtung ason chinipo. Nang ning arlo nang jongsi lason kemang lo lepute, Arnam akenangji ateng nang komentune ta plang un’e. Ahok aphan kirire atum mo kijut anta ri thekthe. Non amat ke, Arnam kopine ason klemkledet lapu kali, bonta monit atum Alanglilong cheto dundedetlo, pima latum Alangli sai pen apot aning dokdelo. Alangli lam kaningje lapen hirjume kipi ansi latum arju ingtung chotlo, lapen Alangli kangsai lapen ado kipi alam latum arju molo. Lahei ke kopi ajoinelo? La kopi ajoine ma pulote, monit atum kar’i ateng pen hirjume longledetlo lapen laso ajok latum ajakong boplo lapen kamatha meme detlo. Arnam monit aphan Alangliphi kepadun longle chenam kali, lapen monit aphuthak aning kithi kali. Monit atum ajakong avedetlo lapen kamatha henolo pima alangtum akar’i ason mesen kalidetlo. Arnam lake monit aphan chethe kipi a’Arnam, lapen Alangli monit aphan kepathi aning hanghe. Monit atum aning kematha kahingno, ajakong kebop lapen aphi kachirui an ta amethang keklem pensi manlo.

Arnam non keklembom asai pen ajahak amonit aphan ingsirlo, lapen komat si laso akangsir arjapthip pen kedengdun abang aphan ke Arnam dengpo. Alangli jonghe chepatu sita, lam kaningjeje lapen sai keklemkle pen sita, nang jakong doan pen ri ta chok. Arnam jongsi nangphan nangdeng ingtungte pu ningje sita, nang Alangliphi dunbomji. Lake Arnam aphan hakhi karjappilo. Arnam nang ingno pen chepatulo lapen nang Alangliphi kidunji molo pulo tangte, Arnam aphan hakhi karjappi loma? Monit atum jongsi lutledet pulote, lake apun kechoklim atum kalilo, lapen akethedung asat latum chetong lote latum patekungpo. Arnam lam kaningjeje ahut pulote, lapen nang kemang ateng pen angthun dodedet pulote, nang chepathu’it titi. Arnam jongsi nang kematha aling nangpacheklobom ahut, alang nang kemang aling nang peplenglo lapen nang ta arjapthip pen lapen jakong doan pen Alangliphan rilo, lapulote nang kereng lapen kedo kecheng atiri kosonlo? Keongdung amonit atum ke monit atum kachini kangtung ason aphan ning chethethip si laso ateng rengbomlo pu ne pudetji. Lahei atum ke aning arlo pen kiriji aphan asap ta aning hanghepinlo. Ahok atovar anat kiri kangtungte atum bonta kai achethe aphan kachini kangtung lapen kachiki atum ke amo kevangve amonit atumlo, lapen latum ke koan pherememe loma! Arnam keklem asai akeongdung ke monit aphan choklim kapinchongji aphan. Bonta, monit atum kaike ta lam kachini kangtung pen plengsetlo, ehin ehin lam karju pangtar aning hanglo, lapen bang ahavar along kemanbom alam heihui pen apot phere pangtarlo – bisar alam, Israel ahavar kopi si kemanbom ma latum kachiniji si kaike ta apvunglo, lapen Egypt adet chikli vangve ma pu chini ingtungo – latum kaike ta akimi ason, prekjek ason aphan rivunglo alangtum aning kehang kachepaplengji aphan. Latum chethe aphan riredetlo, lapen kechoklimji aphan ta aning hanghedetlo. Alangtum aning kehang keongdung ason keplengji aphan lapen alangtum kaheman amang kapachekokji si latum Arnam arni komentu si nangkeleji ma pu inghongdinglo. Lason amonit ke kemesen abang kalilo – lake kachecharmek kave amonit atumlo. Ahok aphi kihungdun henlo monit atum Arnam aphan kekroi kecheng atirilo, lapen monit atum jongsi chethe aphi hungdunde te, Arnam aphan aning kapangsamji bor’i’e te, latum ke ado phovek nangkokpo. Ado kephovek nangji atum lake Arnam sai keklemvoi adihu Karjong Kangthir sai keklem kachechakche amonit atum henlo.

Arnam sai keklemvoi ahut monit atum koson si Arnam pen kachelangpo? Arnam ke monit aphan asat langbomlo. Alangli lam ethenat ta ningjeje, bonta chepatujoi si monit atum aphan cheklangdak pen chingkikedetlo. Athak pen langprui lote, Alangli ajat asai ta klemkledet ason, bonta ahokpet ke Alangli monit aning arlo sai klembomlo. Komatne abang jongsi chethe anat kilutji aphan aning kehang abanglo pulote, Arnam keklem asai chinidun un’epin sita kamatha ning bibepinji. Asat along keklo ahut, Arnam kopi si keklemji aning kehang ma lapen kopi si kapeplengji aning kehang ma nang chini dundedet sita, monit aphan Arnam akar’i ke kaike ta akeme aphan pu nang chinivek nangji. Nang jongsi Alangliphan ahokpet aning pen hungdun lote Alangli kaiketa nangphan nang’o’e detji, lapen mo kijut ke alang nangphan nang pachoklimji, lapen monit aphan kemesen adim si biji. Monit aphan Arnam non amat asat langbom sita, chelonchit akijut lapen chelonchit alar alangtum keklemtang ateng kipiji arni nangleji. Arnam ke monit aphan penang adim an japonchot pen varchorji mate koirokji pu klemkle. Kopima Arnam ke ningtheklong. Non apor ahut, kangsir asai Karjong Kangthir pen klembomlo. Anuttin amonit aphan ta ingsir bomlo. Kithi akangsai lapen ado kipiji akangsai asai angdeng along, lamthe pensi kangsir asai klemlo. Arnam keklem asai arsikkrung pen chini ingtungduk pulo tangte, Alangli non keklembom asai lapen monit atum pen kachelang koson ma latum chinidun paphrang nangji. Kalang, lake kadokave atum ta kachinivek nangji asonlo. Ajat ason le Arnam klem sita, monit aphan kangsir kalite lam ethe le ningjejedet pu sita, Arnam sai keklem angbong pen isinat ta monit kamatha ason pen chingbar un’e. Alangli keklem asontin asai ta monit atum kamatha ason an aphan amo pavangvedet si haithorlo. Alangli sai ke lason henlo. Bonta, Arnam sai keklem isi angdeng an lelo pulote, Alangli monit aso aphan jonghe ma sita pathithe pu nang kroivek nangji. Alangli kechak alam peplengji lapen hirjume ta piji, lapen Alangliphi kihungdun atum an aphan hirjume piji, bonta kihung dunde atum an aphan ke Arnam achar anat koirokpo. Lake nang aphi kihungdun alinglo. Ajat le pu sita, Arnam jongsi Alangli sai keklem pajutpo pulote, anuttin amonit atum ta chelonchit adim chelongpo. Monit aphan Arnam kemesen kemang ason pilo, bonta aphi hungdunde te la long un’e. Nang non pen la chini nangji – Arnam monit aphan kangsir lapen ado kipi ke Alangli sai lo, bonta, monit atum, alangtum keklem nangji ke, ajat apor ahut sita a’ot-adur kachelarji aphan kaiketa hungkri nangji. Nang kepho kachetong pen kachini nangji ke, aphrangsi Arnam alam cho lapen junthek nangji; konat si kilut nangji, nang mena akechokche nat ma kedo Alangli lam along ri pame nangji, nang methang keklem pensi kilut nangji adim ri nangji, lapen Arnam alam along pen penang an ason enchom si sai keklem’iji aphan bor’i nangji. Arnam alam kecho lapen kijun ta esonlo. Lapen abat, mondoli achethe ta lana pame nangpo, kechokchit Karjong achethe nanglong do nangpo, lapen non amat nang kedobom ason an Arnam arideng hodai’et nangpo. Alangli sai keklem chelarvoi pu sita, nang karjong kereng achethe ke ephong ateng nangji. Arnam ajat asai le klem sita, nang karjong achethe kereng damthing nangji lapen nang keklemvek nangji asai chepapleng nangji. Monit atum keklem nangji asai ke lahelo. Lahei ke Karjong Kangthir keklem asailo, bonta chelonchit pen kedo atum aphan ke lake choklimlo, bonta kechokche atum aphan ke lake asatlo. Karjong Kangthir non ahut kangsir asai keklembom adihu ahut ke, ajahak atum ke Arnam sai keklem ajakong thepik lapen monit atum chingsir peme nangji pu ningjelo, kopima alangtum aman bihekpo lapen Arnam akar’i ason kelongji atovar latum along avedetlo. Bonta, keso mate aok kememe abang ke, Arnam aphi kihung dundeji athe chelong’ilokpo, lapen Arnam amen pen kachingrum along kidundeji athe chelonglokpo lapen Arnam alam choche lapen jundedetpo. Arnam asai along ke, Alangli ajat le klem lapen ajat akachelar le van sita, monit atum kaike kerengver akemesen karjong achethe pen dothing nangji. Nang non malom nang karjong achethe aphan mathakrang kalidet tahai, bonta nang ale chepado thek’o’edetlo, lapen sok ake’ong nang rot longledetlo. Lason kepho kachetong ahut lo pu sita, nang aron-ateng pen sai klembom nangji; lapen nang kai achethe kachepangbobedetji aphan lapen Arnam aning kehang ateng kapeplengji aphan lahei aron nang otthip nangji. Nang karjong achethe kereng jongsi bang apunpe pulote, Arnam non amat keklemvoi asai nang chini un’edetji, lapen laso alar nang kachinidam ason anta bang apunpe ason si nang chethek longrongpo, lapen nang Alangli phiphi kidunji nang ning hang sita, nang ning arlo pen jakong chepherang movedetpo. Lasi, ajat le Arnam klem sita, monit atum cheto dunvek nangji. Monit atum cheto dundedet lote, Karjong Kangthir ta Alangli sai klemnodakpo, lapen jongsi monit atum kacheto dunji aning hanghedet pulote, Karjong Kangthir pen keklem asai latum pachun un’edetpo. Nang jongsi nang ning arlo Karjong Kangthir sai paklem ingtung pulote, lapen Arnam aphan jongsi nangpachedondun ingtung pulote, nang ahokpet akekroi Arnam amahang angden chepathirthip nangji. Nonke, karjuthekji aphan kamatha parsikkrung teng’ai nangnelo, kangtui muchot alam, kalite akaprek ason – non kenangjivek ke ahokpet kecheng atiri along Arnam alam nang pathir nangpo. Monit atum jongsi Arnam pen cherapre te lapen akarnuk atovar anat hungdunde te, alangtum ahormu binong latum along pen Arnam ponpidetpo. Arlo anat langdam lote, monit atum ke kaike ta kerengme aphan amek thepik lapen kedotang an amar pen aning cheparong’idetji. Latum ke anam tu ingtungtepin pensi Arnam kechaktang ason akejoi pen kelongji aning hanglo. Monit akhei atum aning arlo kamathapik alam lahei henlo. Chethe ta anam tutepin pen kelong – bonta la an joike pen esonbak kelong ason doma? Komatne jongsi Arnam aphan kroithip lote lapen chethe atovar anat kilutji aning hang lote lapen aot-adur kachelarji aning hang lote, latum anam tuvek nangji lapen Arnam ajat asai le klem sita Alangliphi dunverpo pu isi kachechak angdeng an ledunthek nangji. Laso asai ke monit atum keklemvek nangji asailo. Nang jongsi lahei ason aron-ateng kroilo pulote, kaike ta nang la rimver nangpo, jonghe le asat vang sitame, nang lapen Arnam angbong akacherap pabop nangne. Arnam ardomthek nangji, mondoli along nang kerengdun chelang nangji, lapen nang korte lapen ingjir aphan komentune ta o’tekangri. Arnam nangphan asat nang kelang ahut sita, ahokpet aphan si nang ri nangji. Lake karjong pen kereng achethe along ardi kijumnei akenanglo. Kaike ta kiriji aning kehang, kachelangji aphan kabor’i, nang jakong doan chipidet – lason klem unji ma? Monit atum jongsi kecheng atirilo pu chematha un asonte, latum kachingsirji aphan lapen ahokpet atovar anat kilutji aphan ajakong chelonglokpo. Apun-achak ateng kedo ahut si Arnam alam kedeng joimuchot; lason apor ahut ahok asai keklemji aphan akisung ave, lapen Arnam asai keklem ajakong koan the ma nang chinipo. Bonta nang jongsi dukvok pulote, Arnam sai keklem koan ma ajakong the sita, lapen komatne abang jongsi lam kaningje arjumesenlo sita, nang arjujedetji. Inut amonit jongsi bang apunpedet pulote, latum aphuthak Arnam sai klemkledetji, lapen alangtum a’ot kachelarji aphan ajakong avedetji.

Monit atum jongsi ningkethe ave te, laso atovar kedambomji aphan joike kalidetji. Arnam asai ke monit atum aning kamatha pen asap ta chetonte pu kadokave ta theklongpronglo – jonghe le Alangli sai klem sita lapen jonghe le Alangli lam ningje sita, Alangli keklem asai lapen Alangli lam kaningje ke monit atum akamatha pen thangnat kachingbar ave. Lasi, alangtum ketheklongtang lapen alangtum kepho kachetong pen kelongtang ateng pen karjapthipji aphan ningkethe lapen ning kamatha kapangchingthek monit atum along kedo akenangsot. Monit atum aphuthak Arnam ajat asai le klem sita, alangtum along kopi ma kedo la che’otthip nangji, Arnam angno athikpet pen dotu, lapen Alangphaan mo kijut arni anta chikithip nangji. Monit atum keklem nangji asai ke la helo. Monit atum kopi si keklem nangji ma la che’otthip nangji. Arnam aphan kekroi pulo tangte Alangli lam karju lapen Alangli sai keklem kachinidun kenangsot. Arnam akeongpi asai klemlo – monit aphan pulote pachoklim pen kibi, kangsir, lapen laso aphuthak ado kipi heihui helo. Arnam sai keklem an angbong pen kengkam isinat ta monit akamatha pen kacheton pu ave; Arnam alam la an ahukum keso angbong monit atum ale chepadolo sita. Mo Hemphu vanglote, monit atum Alangli man lapen Alangli ning kithi si theklongpo. Bonta, Alangli lam ahukum sopik lo pu sita, Alangli monit aphan kapejokji lapen kepachoklimji si vanglo. Monit jungjung apichot apot si, alangtum keklem nangji asai anke papleng’et nangji, lapen nang kangsir adihu Arnam apharman hakhi arjap pi nangji. Asat kevang abataitin sita alangtum hakhi kechoji aphan mathathip nangji, lapen Arnam apharman arsikjit pen klempi nangji. Komatne amonit jongsi lason klemlo lepute lake kehai abangphulo. Arnam jonghe le nangphan nang ingsir sitame, kaike ta ning kethe pensi dolo lapen Alangphaan kaike ta ning chethethiplo. Monit atum keklem nangji kopi ma lasi nang klem nangji. Monit aphan Arnam akar’i ke la helo, lapen monit aning Arnam angno chepangnothu peme nangji lapen apor kedambom ahut sita Alanglinat si chetevar nangji. Lake kehai abang pusi pupo. “Kehai abang” pu Arnam kipudam ke Arnam apharman hakhi ason arjap pibomlang atum lapen sobar kehaidet ahut lapen sobar apham along kachingnang ahut sita Arnam aphan aning kachethe lapen kekroithip pen kedo atum aphan, lake, kangting ajakong angbong kedo ahut amena aphan kachelongthu henlo. Nang jongsi Arnam angno nang ning ingthirjir pen dolo lapen ajat apor ahut sita aju kavepin aning lapen kijut akanghon Arnam aphan dothip pulote, Arnam angno nang ke inut hakhi karjap abanglo, lapen lason atum aphan si Arnam ke “kehai abang” pulo. Arnam hirjume nang kipi ahut nang Alangli phiphi hungdun thekserlo, bonta, Alangli jongsi hirjume nangpipe pulote Alanglong pen kekat, lake ingthir’et pusi pupo ma? Laso atovar ke ahokpet pu nang mathathiplo apot si, kijut an nang dunthor nangpo; Arnam aphan nang kroithip nangpo. Nangphan kechoklim apun nang kapemanji aphan si Arnam pirthe vanglo pu nang chinilo apot si, nang ning doan pen Arnam aphan chipidet nangpo. Alangli ajat ason le klem sita, lapen nangphan mo kijut ahut Arnam keme lapen kahingno ason le nangbak sita, nang Alangliphi dun thekbomlang pulote, lake Arnam angno nang ingthirvet pensi dolo. Karjong keplengset lapen kangthirjir aok Arnam aphan hodailo pulo tangte Arnam angno ahokpet aning kibidamlo. Monit akhei doan aphan ke, angthikdut ke kangthirjir henlo, lapen Arnam angno angthikdut pen dotheklo pulote kangthirjir pen kedolo. Nang keklem nangji asai ke la henlo. Kardom nangji apor ahut, ardomnon; rat pen kachingrum nangji ahut, lata nang klemnon, nang jongsi lun lun nangji pulote, lun ta lunnon; lapen ok aphan ke’oji ninghanglo pulote, ok aphan ta che’onon. Nang jongsi sai cheklem nangji pulote, kalili kalanglang pen klemri; nang jongsi asat pholok lote arjapthipnon. Lake Arnam aphan kekroithip angtheklo. Monit atum keklem nangji asai jongsi nang otthipthe te, kedamtang arni nang koan ma kisung lapen kangsai kepho ke pakejoidetpo.

Arnam sai keklem angdengtin along, monit atum kacherap-kachetodun nangji atovar do. Monit atum ansose kangsir kepho un ahut ning kethe pen kedothekji aphan Arnam latum aphan kecheng pen ingsirlo. Monit atum kechoklimji aphan Arnam sai keklem ahut aning kehangji aphan kecheng pen ta Arnam monit aphan pachoklimlo Alangli kangsir lapen kolom kipi ahut anta kachechaklunji aphan. Arnam aKarjong monit aning arlo kachini un ajakong lapen katheang asai klemlo, lapen Alangli pen raprap sai keklemji aphan. Arnam ke monit aphan kangsir-kangchap ahut lam ningjeje. Alangli asap ta ase chibibe, bonta, monit atum keklem nangji asai do binong. Kedamtang arni ason si nanglong kopi ma kedo che’otthip non, Arnam aphan ardombom nangji, Arnam pen chetebokhet nangji, Arnam angno inut hakhi kecho ason arjapnon; lason pen lote nang mena asai kacheklem asonpo. Arnam sai keklem along pen monit atum kachinidun nangji akenangsot ke monit atum Alangphaan koan aning chethe ma pu asat kelang ahut monit atum Arnam aphan ardompik nangji, lapen Alangli ingno Alangli lam ansose cho nangji. Arnam jongsi nangphan kachini un ajakong nangpilo lapen Alangli keklemji asai nangphan nangpachinilo, bonta nang isinat ta charliledet pulote, nang ajat ale longledetpo. Arnam kaningje alam apot nang jongsi asai klem charli lote, Alangphaan nang ardombom nangji, lapen nang Alangli lam kecho ahut, Alangli ingno dam si, Alangphaan ri si ning chethe nangji, lapen ning kibi, ning kahingno avedet nangji. Arnam kipu alam pen apot asai keklemkle atum ke monit kachingrum ahut ke ajakong dopikji, bonta hem chele lote kangting anat si klobupji. Ajahak atum ke rat pen chingrum rappet aning kehanghe atum ta do. Lasi monit atum kapeplengvek nangji asai kopi ma nang chinivek nangji. Arnam aning kehang kopi lone nang chini dundedet tahai, bonta nang keklem nangji asai cheklembom non, kardom nangji ahut ardom non, ahok alam pen apot asai klem’i charlinon, lapen monit atum kopi si keklem nangji ma nang ta lale klemnon. Nang kachecharmek ason kopima che’otthip non. Lasonlo pulote, Arnam kopi ma mo aphi keklemji ason nang dengdun thekpo. Arnam jongsi chepaklangdak pen sai klemkle pulote, nang kiri parsiksedet pulote lake chokchelo. Rat atum kachingrum ahut Alangli lam ningje lapen birta keme pachetak lote, karjudun nang ning hangpik, bonta Alangli jongsi nangphan nang ingkike te nang jakong avedet titi lapen aphi chiruiphit titi. Kopi amonit atum si lason keklemlo? Lason atum ke ahur kedam aling kachingbedun atumlo. Latum ke karjap adim chechinine, hakhi kecho atomo ta ave, lapen kachecharmek ta avelo! Keongdung amonit atum ke lason helo. Nang jongsi laso atovar dambom pulo tangte, arnisi arni nang kethedung asat chetongji, ado ta nang pho nangkokji. Nang karjap adim kachechini lake Arnam monit aphan kapangjang along isi akenangsot asailo. Nang jongsi Arnam asai aphan asap ta ningbibe lote, monit keklem nangji asai nang klemlo tangte, Arnam nangphan nangkepaklemtoi asai nang jongsi otthip lote, Arnam nangketoi asai nang ning kedo’e abanglo, lapen pini arni Alangli ajat asai le klem sitame, Alangli nangketoi asai nang tengnenelo, lapen nang jongsi Alangli sai keklem apot asap ta ning bibe lote, nang karjap adim che’otthip non, nang hakhi karjap apot che’otthip non, lapen nang kedam atovar akengkamtin along ta haiponbompo, lapen mo kijut ahut ke Arnam nangphan nangpachoklimpo lapen kehai abang nang pinchongdetpo. Arnam nangphan asat nangkelang ahut an ta nang arjapthip un pulo tangte, lapen mo kijut ahut anta nang arjapthip un pulote, nang ke kehai abangphulo, nang ke Arnam kapinchong kechoklim abang pusi pudetji. Nang jongsi asat kepho ahut arjapthip un’e pulo tangte, mo kevangji arni ke ansose siksakji. Nang jongsi asapvet akisung si chechakchot pulote lapen ahok aphi hungdunde pulote, nangphan ajat ta ale avedetji. Nangri angse si nang do nangkokpo. Ajahak amonit atum ke Arnam jongsi lam kaningje ingtonkok pulote, kihungdun ta ingtonkok titi lapen aning ta pratjampo. Lason ke kilupik atumlo kalima? Lason amonit atum ke ahokpet kali atumlo. Arnam jongsi lam ningje lote, latum kaiketa krungchenlo, lapen sai klempik lapen chepadukpik ason si athak ke chepaklanglo, bonta nonke Alangli thangnat ta ningjejedetlo, lapen latum riredetlo. Lason amonit atum ke aphrang damthekthelo. Nangkangsir ahut ke, nang kamatha keme anat si pa’ong nangji lapen kacharli nangji ason nang charli nangji; nang Arnam aphan kardom lapen Alangli lam kaporhi ahut, nang methang kedo-kedam pen chepangbar nangji, nang kechokche konat ma chetarlip nangji, lapen kacharli nangji ason dopik’lang pu nang chechini nangji. Nang phan nangkangsir ahut nang koan si kiri kachepeduk ma, la an si nang kechokche keplengple chechinipo. Nangphan nangkangsir kephobom ahut nang kepho kachetong ason dopikji; lang chechar pememe, nang khindeji, nang ok aning kehang ason chepaklangji – ansi nangning arlo nang’ot-nangdur koan hingno loma nang chechinipo.

Monit atum akethek ke Arnam along thangnat ta chingbar dunde, lapen mo aphi laso atovar kedamji aphan latum along jakong nangpik tahai. Arnam asai ke mo kijut arni malom ke jakong lapen ning kethe adim nangpik tahai, Job pen anpar ning kachethe man nangkok tahai. Monit atum ning kachethe jongsi ave pulote, kethek nangji ateng latum thekthedetji lapen Arnam latum aphan kepachoklim asai klemkledetji. Mo asat ahir kangtang kevang ahut ke, monit atum mondoli aphan ke’o tekang atum dopikji – ajahak atum dak pen – ajahak atum hadak pen. Ajahak atum ke kedamtang arni ke alangtum Arnam aphan kihungdun kangjangso ta kali lapen nonke kopi athe pen tong nonke kroikredet lone chini un’e. Nang chini un’epin ason keongdung manji, lapen Arnam ajat angthek lapen kamanghu meme ason ta paklangkledetji, lapen prekjek ason ta avedetji. Lake nang arjapthip un ma un’e ma pu nang kelangji aphanlo – monit aphan kangsir ahut Arnam ke ahokpet pensi klemji. Nang akeongpi akisung phophelang. Mo ephrang asat ahir kangtangrak kevang ahut, ajahak adim ke mondoli along kedo an amonit ta o’etji, lapen nang pen kachemesen atum ta alangtum akekroi aphan koirokji. Halaso ahut nang arjapthip unji ma? Non anke, nang kepho asat anta asat bihek saidelang, lapen la anta nang chesong un’erem si do. Lahei asai angdeng ke lamthe pen kangsir lapen kapangjang anvet. Non ephrang asai angdeng ke, nangphan nangkangsirji aphan alamchot kali asai ta dopo, anlote nangphan koan kapherememe loma. Ahir ingtangpik angdeng an lelo pulote, paprap ra o’tekang seraknon pu Arnam nangphan nang pareji lapen halaso ahut kekroi asong atum alangtum abe kidunji si nangphan nangbeipo. Lake, nang laso atovar kedam ateng damthing thekjima pu asat nangkelangji aphanlo, lapen lahei ke asat saidelo. Non kephobom asat ke asat bihek saide, bonta laso arni nangleji ajahak ahemtun along ke pei lapen po atum kekroi ingtonkokji, lapen ajahak atum ke osomar atum si kekroi ingtonkokji. Lason apor ahut nang dambom thekji ma? Nang koan ma aphrang anat kedamthek, nangphan asat la ansi ketheji. Monit aphan Arnam kangsir asai keklem ke alangtum kenangji ateng lapen alangtum karjap adim ateng pensi klemji. Monit akhei aphan Arnam kapinchong pachoklimji pu asai keklem ahut, monit aphai chanbomji puke un’elo – bonta jumbompo. Lason kangsir-kangchap pen ansi monit aphan pachoklim unji. Nangphan nang ingchekdet, nang pakengdet, asat nanglangdet, ado nangpidet lapen nang ington nang ingthidet an – nang chechaksen unji ma? Isi amondoli along jongsi korte ingjir atum mesen pen lapen jakong doan pen rilo pulote, nang ta nangning rung dunpikji. Bonta, arnisi arni latum jongsi mondoli aphan o’tekang’et lote, lapen ajahak atum ke kroikredet lote, lapen ajahak atum ke beha-bepar keklemji aphan lapen kachepachorji aphan dam’et lote, lapen ajahak atum ke dhorom anat lutchok lote, halaso ahut nang arjapthip unji ma? Nang ning arlo thangta kalidet ason ben nang dothekji ma? Arnam monit aphan kangsir ke joike asai kali. Monit atum ke alamchot ason si theklongji, bonta Arnam kemang binong ke alamchot kalipin, bonta ahokpet asai penak. Ha kijut ke, Alangli monit aphan kangsir ahut monit atum jongsi khindede pulote, Alangli sai keklem angkung ke kichun asonsi manpo. Nangphan nang kapinchong kechoklim henlo Karjong Kangthir keklem asai akethedung ke, lapen Alangli jongsi sai klemkledet lapen chepatujoi pulote, lake nangphan ansose nang kepachoklimji aphanlo, lapen Arnam aphan koan si kachinghon ma pu asat kelangji aphan isi atovarlo lapen Alangphaan ahokpet pen ning chethe ma pu kachiniji aphanlo. Arnam jongsi lam ningje pemelo pulote, nang kiri asai klem nangnelo; bonta Alangli inglimjoi ahut si nang atovar ri si dam nangji. Nang inut kapinchongtang amonit keklem nangji ason an ke klemlo, lapen mo nang phrang lapen nang kele damji adim chinine sita, nang rengtik an gian lapen Arnam aphi kidun koson ma nang chinilo, lapen Arnam nangphuthak ajat le van sita, nang kakhindeji molo. Karjong Kangthir monit aning arlo sai keklemji aphan isi aron kachesemar dolo. Monit atum ing’it nangji lapen ri nangji lapen Arnam sai keklem pen apot ning bibedet nangji mate ning biri kalidet nangji, lapen kaiketa alangtum keklem nangji asai che’otthip nangji; lapu ansi Karjong Kangthir alangtum along sai klem ingtungji. Arnam sai keklem amotin along ta, monit atum ning kachethepik lapen Arnam aphan kiri henlo akenangsotnei – lapen kepho kachetong pen si monit atum Arnam koan kanghonthek abang ma lapen Karjong Kangthir kosonsi monit angbong sai keklem ma chiniji. Nang jongsi chinine phophe pulote, lapen lahei alam an nang jongsi phophe pulote, lapen nang jongsi rire pulote, nang thangnat ale ta longledetji. Nang kepho kachetong pensi nang tovar chechini nangji, lapen nang kepho kachetong pen ansi Arnam keklem asai nang theklongji lapen Alangli ajakong kethe lapen koan arnuk ma nang chinipo.