Yuav Caum Qhov Tseeb Li Cas (3)

Nyob rau peb txoj kev sib qhia uas nyob rau ntawm peb txoj kev sib txoos ua ke zaum tas los no peb sib qhia txog qhov twg lawm? Peb sib qhia txog qhov yuav caum qhov tseeb li cas, uas muaj feem ntsig txog ob lub ncauj lug loj uas yog ob kis ntawm txoj kev xyaum ua. Thawj lub ncauj lug yog dab si? (Thawj lub ncauj lug yog tso tseg.) Thiab lub ncauj lug ob ne? (Lub ncauj lug ob yog mob siab.) Thawj lub ncauj lug yog tso tseg, thiab lub ncauj lug ob yog mob siab. Hais txog qhov xyaum “tso tseg” ntawd mas, peb twb xub sib qhia txog qhov “tso” ntau qhov kev xav tsis zoo “tseg” lawm. Thawj qhov “tso tseg” ntawd caum tshuam txog qhov “tso” ntau qhov kev xav tsis zoo “tseg.” Yog li ntawd thaum peb hais txog qhov tso ntau qhov kev xav tsis zoo tseg ntawd, peb hais txog qhov twg? (Vajtswv hais txog txoj kev tsis zoo li luag lwm tus, kev ntxub, thiab kev chim siab thawj zaug, ces zaum ob hais txog kev nyuaj siab.) Thawj zaug, Kuv hais txog qhov yuav tsum muab txoj kev ntxub, kev chim siab, thiab kev tsis zoo li luag lwm tus tso tseg—qhov tseem ceeb ces peb qhov kev xav tsis zoo no yog yam uas Kuv hais txog ntag, thiab Kuv kuj hais ntau txog txoj kev nyuaj siab thiab. Zaum ob, Kuv hais txog qhov xyaum muab txoj kev nyuaj siab uas yog ib qho ntawm tej kev xav tsis zoo tso tseg. Tib neeg yeej nyuaj siab rau ntau yam, thiab zaum tas los no Kuv twb hais txog ntau txoj kev tias vim li cas thiaj li muaj kev xav tsis zoo txog kev nyuaj siab lawm. Qhia Kuv seb, qhov tseem ceeb uas ua rau muaj txoj kev xav txog kev nyuaj siab uas Kuv hais txog ntawd yog dab tsi? (Vajtswv, tag nrho mas muaj peb qho. Thawj qhov mas yog tib neeg pheej xav tias lawv muaj ib txoj hmoo phem; qhov ob mas yog tib neeg liam ub liam no rau lawv txoj hmoo phem thaum muaj ntau yam tshwm sim rau lawv; thiab qhov peb mas yog thaum tib neeg tau ua txhaum loj nyob rau yav tas los, los sis thaum lawv tau ua ntau yam ruam heev los sis tsis paub dab tsi li, ces thiaj li ua rau lawv poob mus rau hauv txoj kev nyuaj siab.) Cov no yog peb qho tseem ceeb. Thawj qhov mas yog vim tib neeg ntseeg tias lawv txoj hmoo yeej phem, ces yog li ntawd lawv thiaj li pheej nyuaj siab; qhov ob mas yog vim tib neeg ntseeg lawv tus kheej tias tsis muaj hmoo, ces yog li ntawd thiaj li pheej nyuaj siab thiab; thiab qhov peb mas yog vim tib neeg tau ua txhaum loj, es ua rau lawv thiaj li pheej hnov nyuaj siab. Cov no yog peb qhov tseem ceeb. Txoj kev xav txog kev nyuaj siab ntawd tsis yog ib txoj kev xav hauv siab txog txoj kev phem los sis txoj kev tu siab ib pliag xwb. Tiam sis nws yog ib txoj kev xav tsis zoo uas ib txwm muaj thiab pheej tshwm sim rau hauv lub siab tas li vim muaj qee yam ua rau muaj. Txoj kev xav tsis zoo no ua rau tib neeg muaj ntau qhov kev xav hauv lub hlwb, ntau qhov kev xam pom, thiab ntau qhov kev pom uas tsis zoo, thiab haj tseem muaj ntau qhov kev xav hauv lub hlwb, ntau qhov kev xam pom, ntau tus cwj pwm, thiab ntau lub tswv yim uas phem thiab cuav thiab. Nws tsis yog ib txoj kev xav uas nyob ib ntus los sis ib lub tswv yim uas nyob ib pliag xwb; nws yog ib txoj kev xav tsis zoo uas pheej tshwm sim tas li thiab ib txwm muaj nrog tib neeg txhua lub sij hawm, nrog tib neeg nyob hauv lawv lub neej rau hauv lawv nruab siab thiab nyob tob tob puag hauv lawv tus ntsuj, thiab nrog lawv nyob rau hauv lawv tej kev xav hauv lub hlwb thiab tej kev ua tib si. Txoj kev xav tsis zoo no tsis yog cuam tshuam rau lub siab uas txawj xav thiab lub ntsiab ntawm tib neeg txoj kev ua neej xwb, tab sis nws kuj muaj ib qho kev cuam tshuam rau ntau txoj kev pom, kev xam pom, thiab tej kev xam uas tib neeg muaj nyob rau hauv qhov lawv saib tib neeg thiab txhua yam, thiab nyob rau hauv lawv tus cwj pwm thiab tej kev ua uas nyob rau hauv lawv lub neej txhua hnub thiab. Yog li ntawd, nws thiaj li tim tsum rau peb kom los ntsuam xyuas tej kev xav hauv siab uas tsis zoo ib yam, soj ntsuam tej kev xav hauv siab ntawd, thiab paub tej kev xav hauv siab ntawd ua ntej muab tej kev xav hauv siab ntawd tso tseg thiab hloov tej kev xav hauv siab ntawd ib qho zuj zus, maj mam rau siab ntso los muab tej kev xav hauv siab tso tseg tuaj tom qab es kom koj lub siab uas txawj xav thiab lub ntsiab, nrog rau txoj kev xav hauv lub hlwb txog koj txoj kev ua neeg, rais rov los zoo li qub thiab muaj qab hau, es kom qhov uas koj saib tib neeg thiab txhua yam thiab qhov koj coj koj tus kheej thiab ua txhua yam nyob rau hauv koj lub neej txhua hnub ntawd thiaj li tsis raug tej kev xav hauv siab uas tsis zoo ntawd cuam tshuam, tswj, los sis caij tsuj mus ntxiv lawm—qhov no yog lub hom phiaj tseem ceeb ntawm txoj kev soj ntsuam thiab paub txog ntau txoj kev xav tsis zoo no. Lub hom phiaj tseem ceeb mas tsis yog kom koj los mloog yam Kuv hais, paub txog yam ntawd, to taub yam ntawd, ces tso tseg li ntawd xwb, tab sis yog kom koj paub los ntawm Kuv cov lus kiag hais tias tej kev xav tsis zoo ntawd phom sij npaum li cas rau tib neeg, los paub tias tej kev xav tsis zoo ntawd phom sij npaum li cas thiab tej ntawd muaj ib qho kev cuam tshuam loj npaum li cas rau tib neeg lub neej txhua hnub, qhov lawv saib tib neeg thiab txhua yam, thiab qhov lawv saib lawv tus kheej thiab coj.

Yav tas los peb kuj tau sib qhia txog qhov tias vim li cas tej kev xav tsis zoo no mus tsis txog qib ntawm tus moj yam qias vuab tsuab thiab ib lub tseem ntsiab uas qias vuab tsuab li cas lawm thiab, tab sis ua thiab txhawb tib neeg tus moj yam qias vuab tsuab mus rau qee theem, pab kom muaj ib lub hauv paus rau lawv tej kev ua ntau yam kom mus raws li lawv tus moj yam qias vuab tsuab, thiab muab ntau lub ntsiab rau tib neeg kom ua neej raws li lawv tus moj yam qias vuab tsuab thaum muaj tej kev xav tsis zoo no txhawb, nrog rau lub ntsiab kom saib txhua tus los sis txhua yam mus raws li lawv tus moj yam qias vuab tsuab ntawd. Yog li ntawd, tej kev xav tsis zoo no, puav leej cuam tshuam rau tib neeg lub neej txhua hnub mus rau ntau theem, thiab tej kev xav tsis zoo no yeej cuam tshuam thiab tswj tib neeg ntau txoj kev xav hauv lub hlwb, ces hloov lawv tus cwj pwm, tej kev xam, thiab tej kev pom uas lawv muaj txog qhov tseeb thiab Vajtswv. Yeej hais tau hais tias tej kev xav tsis zoo no tsis muaj ib qho zoo rau tib neeg kiag li, thiab tsis muaj ib qho zoo los sis ib qho uas pab tau li, tab sis, qhov txawv mas, tsuas yog ua kom tib neeg puas tsuaj xwb. Vim li ntawd es thaum tib neeg muaj tej kev xav tsis zoo no lawm, ces tej kev xav tsis zoo no thiaj cia li hloov thiab tswj lawv lub siab lawm, thiab lawv tsis muaj peev xwm cheem tau lawv tus kheej kom txhob muaj ib tug yam ntxwv xav txog txoj kev phem lawm, thiab lawv haj tseem muaj tej kev xam pom uas phem heev txog tib neeg thiab txhua yam vim tej kev pom uas ruam. Thaum tib neeg saib ib tug tib neeg los sis ib yam dab tsi los ntawm txoj kev xam thiab txoj kev pom ntawm tej kev xav tsis zoo lawm, ces tej cwj pwm, tej kev kho, thiab tej kev tshwm sim ntawm tus cwj pwm thiab tej kev ua uas tej ntawd ua rau muaj ntawd yuav cia li yog tej kev xav uas tsis zoo, phem, thiab nyuaj siab heev li lawm. Tej kev xav uas phem, nyuaj siab, thiab tsis zoo no yuav ua rau tib neeg tsis mloog Vajtswv lus, tsis txaus siab rau Vajtswv, liam ub liam no rau Vajtswv, tsis kam mloog Nws, thiab haj tseem tawm tsam Nws, thiab muaj tseeb tiag, tseem ntxub Nws thiab. Piv txwv li, thaum ib tug tib neeg ntseeg tias lawv muaj ib txoj hmoo phem lawm, ces lawv liam ub liam no rau leej twg? Tej zaum lawv yuav tsis hais, tab sis nyob hauv lawv lub siab mas, lawv ntseeg tias Vajtswv tau ua tsis yog lawm thiab ntseeg tias Nws coj tsis ncaj lawm, ces lawv thiaj li xav tias, “Vim li cas es Vajtswv thiaj li tsim nws zoo nraug ua luaj li? Vim cas li Vajtswv thiaj li cia nws yug los rau hauv ib tsev neeg uas zoo ua luaj li? Vim li cas Vajtswv thiaj li muab tej uas zoo zoo ntawd rau nws? Vim li cas Vajtswv thiaj li muab lub peev xwm zoo ntawd rau nws? Vim li cas kuv lub peev xwm ho tsis zoo kiag li? Vim li cas Vajtswv thiaj li npaj nws los ua ib tug thawj coj? Vim li cas thiaj li tsis yog kuv zeeg li, vim li cas kuv thiaj li tsis tau los ua ib tug thawj coj ib zaug li? Vim li cas txhua yam ho mus tau zoo heev rau nws, thiab thaum kuv ua ib yam dab tsi mas, yeej tsis yog los sis tsis mus zoo li? Vim li cas kuv txoj hmoo yuav phem ua luaj li? Vim li cas tej uas tshwm sim rau kuv ntawd ho txawv ua luaj li? Vim li cas tsuas yog tej uas phem thiaj li tshwm sim rau kuv xwb?” Txawm tias tej kev xav hauv lub hlwb uas muaj los ntawm tej kev xav uas nyuaj siab no tsis ua rau tib neeg liam ub liam no rau Vajtswv, los sis tsis tawm tsam Vajtswv thiab lawv txoj hmoo nyob hauv lawv lub siab txawj xav los xij, tej kev xav hauv lub hlwb no yeej ua kom tib neeg poob mus rau hauv tej kev xav uas tsis mloog lus, tsis txaus siab, tawm tsam, khib, thiab ntxub nyob rau hauv lawv nruab siab tas li yam tsis xav txog li. Qhov uas phem tshaj yog, tej kev xav hauv lub hlwb ntawd haj tseem ua kom tib neeg muaj tej kev xav hauv lub hlwb thiab tej cwj pwm uas phem heev thiab. Piv txwv li, thaum ib txhia tib neeg pom lwm tus ua tau zoo tshaj lawv es raug Vajtswv qhuas, ces lawv txawm khib thiab tsis nyiam kiag li. Vim li ntawd, thiaj li muaj ntau qhov kev ua uas tsis tseem ceeb xws li: Lawv hais lus phem txog lwm tus tib neeg thiab tuaj tom lawv nrab qaum hais lus saib tsis tau lawv, lawv ua qee yam tsis ncaj thiab tsis muaj qab hau yam ntsiag to, thiab ntau yam ntxiv. Qhov muaj tej teeb meem no yog muaj feem cuam tshuam ncaj nraim rau lawv txoj kev nyuaj siab thiab tej kev xav tsis zoo ntag. Tej kev xav hauv lub hlwb, tej cwj pwm, thiab tej kev kho uas muaj los ntawm lawv tej kev xav uas nyuaj siab los no mas tej zaum thaum xub thawj tsuas zoo li tej hom kev xav thiab xwb, tab sis thaum txhua yam loj hlob tuaj lawm, tej kev xav tsis zoo thiab nyuaj siab no tuaj yeem txhawb kom tib neeg ua neej raws li lawv tej moj yam qias vuab tsuab ntawd heev zuj zus. Txawm li cas los xij, yog tib neeg to taub qhov tseeb thiab muaj txoj kev ua neej, ces thaum lawv muaj tej kev xav tsis zoo thiab nyuaj siab no, lawv lub siab txawj xav thiab muaj qab hau ntawd yeej ua tau qee yam kom sai, ces cov tib neeg no yeej paub tau tias muaj tej kev xav uas nyuaj siab thiab txoj kev cuam tshuam ntawm tej kev xav uas nyuaj siab no thiab pom tej ntawd tshab plaws. Ces cov tib neeg no yeej tso tau lawv tej kev xav uas nyuaj siab no tseg tuaj tom lawv qub qab kom sai, ces thaum lawv ntsib tib neeg, tej xwm txheej, thiab txhua yam nyob rau hauv lawv qhov xwm txheej tam sim no, lawv thiaj li txiav txim tau kom muaj qab hau thiab saib tej xwm txheej uas lawv ntsib thiab tej uas lawv raug ntawd los ntawm txoj kev xam uas yog kom muaj qab hau. Thaum tib neeg ua tej no yam muaj qab hau lawm, ces yam tseem ceeb tshaj uas lawv yuav muaj peev xwm ua tau ntawd yog los lees txais lub siab txawj xav thiab lub ntsiab ntawm txoj kev ua neej txoj kev tswj. Qhov haj yam zoo tshaj ntawd mas yog, yog lawv to taub qhov tseeb lawm, ces lawv yuav muaj peev xwm los ua tau raws li qhov tseeb tej hauv paus ntsiab lus raws li ib tug xeeb cheem uas muaj qab hau, mus raws li lub hauv paus ntawm lawv lub siab txawj xav thiab lub ntsiab, thiab lawv yuav tsis coj lawv tus kheej los sis ua raws li txoj kev tswj ntawm lawv tej moj yam qias vuab tsuab lawm. Txawm li cas los xij, yog tej kev xav tsis zoo tuav tau qhov chaw tseem ceeb hauv lawv lub siab, hloov lawv tej kev xav hauv lub hlwb, tej kev xam pom, thiab qhov uas lawv daws teeb meem thiab coj lawv tus kheej lawm, ces tej kev xav tsis zoo no yuav cia li hloov lawv txoj kev nce qib nyob rau hauv lub neej, thiab yuav coj lawv tej kev xav hauv lub hlwb, tej kev xaiv, tus cwj pwm, thiab tej kev kho yuav raug txwv thiab raug cuam tshuam nyob rau hauv txhua qhov ntawm tej xwm txheej ntawd. Ib qho mas yog, tej kev xav tsis zoo no yuav txhawb tib neeg tej moj yam qias vuab tsuab, ua rau tib neeg hnov kaj siab lug thiab txaus siab ua neej nyob nrog lawv tej moj yam qias vuab tsuab; lwm qhov mas yog, tej kev xav tsis zoo no kuj ua tau rau tib neeg tsis kam lees txais tej uas zoo ces yuav ua neej nyob nrog txoj kev phem, tsis kam los saib txoj kev kaj. Vim li no, tej kev xav tsis zoo thiaj li phem zuj zus nyob rau hauv tib neeg, thiab tej kev xav tsis zoo no thiaj li tsis cia tib neeg los coj kom raws li tus ciaj cim ntawm lub siab uas txawj xav thiab lub ntsiab kiag li. Tiam sis, tej kev xav tsis zoo no txwv tib neeg kom txhob nrhiav qhov tseeb thiab kom txhob nyob rau ntawm Vajtswv lub xub ntiag, thiab, qhov ua li no, tib neeg thiaj cia li haj yam poob qis, tsis yog tsuas xav phem xwb, tab sis kuj txav deb ntawm Vajtswv lawm thiab. Yog li ntawd qhov tshwm sim ntawm qhov txhua yam mus zoo li no ntxiv ntawd yog dab tsi? Tsis yog tej kev xav tsis zoo no kho tsis tau tib neeg tej moj yam qias vuab tsuab xwb, tab sis tej kev xav tsis zoo no yuav txhawb tej moj yam qias vuab tsuab ntawd, uas yuav ua rau tib neeg daws teeb meem thiab coj lawv tus kheej mus raws li lawv tej moj yam qias vuab tsuab thiab mus raws li lawv tus kheej nyiam lawm. Tib neeg yuav ua li cas thaum lawv raug tej kev xav hauv lub hlwb thiab tej kev xam pom uas cuav thiab phem tswj lawm? Lawv puas yuav cuam tshuam pawg ntseeg tes hauj lwm? Lawv puas yuav nthuav txoj kev phem mus kom dav, thiab txiav txim rau Vajtswv thiab tej kev pab tes hauj lwm ntawm Vajtswv lub tsev? Lawv puas yuav liam ub liam no rau Vajtswv thiab tsis kam mloog Nws? Lawv yeej yuav ua li ntawd xwb xwb li. Tej no yog tej tshwm sim thaum kawg. Ntau txoj kev tsis zoo, xws li kev tsis mloog lus, kev tsis txaus siab, kev phem, thiab kev tawm tsam yuav muaj nyob rau hauv tib neeg—tej no yog tej tshwm sim ntawm tej kev xav tsis zoo uas tuav tau qhov chaw tseem ceeb nyob hauv tib neeg lub siab los tau ntev lawm. Sim saib seb, tsuas yog ib txoj kev xav tsis zoo me me xwb—ib txoj kev xav uas tib neeg yuav luag tsis muaj peev xwm paub, uas tib neeg twb paub tsis tau tias muaj los sis paub tias txoj kev xav tsis zoo ntawd muaj dab tsi cuam tshuam rau lawv—txoj kev xav tsis zoo me me no tseem caum lawv rau ub rau no cuag nkaus li nws twb nrog lawv txij thaum yug los lawm. Nws ua rau tib neeg txhua hom puas tsuaj, thiab nws haj tseem pheej tswj koj, ua kom koj ntshai, caij tsuj koj, thiab khi koj, mus txog ntua rau qhov uas nws nrog nraim koj txhua lub sij hawm li lawm, zoo ib yam li koj lub neej txoj sia ntag, tiam sis koj twb tsis paub txog qhov ntawd kiag li, ces cia li ua neej nyob nrog qhov ntawd thiab ua raws li ntawd lawm, xav tej yam zoo li no tias, “Qhov no yog qhov tib neeg yuav tsum xav, yeej tsis muaj dab tsi tsis yog li, nws yeej zoo li ib txwm muaj xwb. Leej twg thiaj li tsis muaj qee qhov kev xav hauv lub hlwb uas zoo li tej no? Leej twg thiaj li tsis muaj qee qhov kev xav tsis zoo? Koj tsis muaj peev xwm paub txog qhov kev puas tsuaj uas txoj kev xav phem no ua rau koj, tab sis qhov kev puas tsuaj ntawd yeej muaj tiag tiag li, thiab feem ntau mas koj yuav raug qhov ntawd txhawb yam tsis paub txog kom cia li los nthuav koj tej moj yam qias vuab tsuab tawm, thiab los ua thiab coj koj tus kheej kom mus raws li koj tej moj yam qias vuab tsuab, kom mus txog ntua thaum kawg es koj ua txhua yam mus raws li koj tej moj yam qias vuab tsuab lawm. Koj yeej xav tau rau hauv nruab siab tias tej tshwm sim rau thaum kawg ntawm qhov no yog dab tsi: Tej ntawd puav leej yog qhov phem, puav leej yog kev tawm tsam, tsis muaj dab tsi muaj txiaj ntsim los sis zoo li, haj yam tsis muaj ib yam dab tsi uas pab tau tib neeg kom tau txais qhov tseeb thiab Vajtswv lo lus qhuas li—tej no mas tsis yog tej tshwm sim uas zoo li. Yog li ntawd, tsuav yog tej kev xav tsis zoo no tseem muaj nyob rau hauv ib tug tib neeg xwb, ces txhua hom ntawm tej kev xav hauv lub hlwb thiab tej kev xam pom tsis zoo ntawd yuav hloov thiab tswj lawv lub neej txoj sia hnyav heev li. Tsuav yog tej kev xav hauv lub hlwb thiab tej kev xam pom tsis zoo ntawd tseem hloov thiab tswj lawv lub neej txoj sia, ces yeej yuav muaj teb meem loj txwv kom lawv txhob caum qhov tseeb, txhob xyaum ua raws li qhov tseeb, thiab txhob to taub qhov tseeb qhov muaj tiag. Ces yog li ntawd, nws yeej tim tsum rau peb los muab tej kev xav tsis zoo no nthuav tawm thiab saib kom meej, kom thiaj li kho tau tej kev xav tsis zoo no tag nrho.

Tej kev xav tsis zoo uas peb nyuam qhuav sib qhia txog ntawd mas muaj ib qho tsis zoo thiab ua rau tib neeg puas tsuaj loj heev, tab sis kuj muaj lwm cov kev xav tsis zoo uas hloov tib neeg thiab ua kom tib neeg puas tsuaj tib yam thiab. Dhau ntawm tej kev xav tsis zoo txog kev ntxub, kev chim siab, kev tsis zoo li luag lwm tus, thiab kev nyuaj siab uas peb twb tham txog ntawd lawm, los tseem muaj tej kev xav tsis zoo txog kev nyuaj siab, kev ntxhov siab, thiab kev txhawj xeeb thiab. Tej kev xav no los kuj tuaj cag tob tob rau hauv tib neeg nruab siab lawm thiab, thiab tej kev xav no yeej nrog tib neeg nyob rau hauv lawv lub neej txhua hnub, thiab nyob rau hauv lawv cov lus thiab tej kev ua. Tiag mas, thaum muaj tej yam tshwm sim rau tib neeg, ces tej ntawd kuj cuam tshuam rau tej kev xav hauv lub hlwb thiab tej kev xam pom uas muaj nyob rau hauv lawv thiab, nrog rau tej kev xam thiab kev pom uas lawv ua raws. Hnub no, peb yuav saib kom meej thiab nthuav tej kev xav tsis zoo txog kev nyuaj siab, kev ntxhov siab, thiab kev txhawj xeeb ntawd tawm, thiab rau siab pab tib neeg kom pom tej ntawd nyob rau hauv lawv tus kheej. Tom qab tib neeg pom tej kev xav tsis zoo uas nyob rau hauv lawv tus kheej no lawm, ces lub hom phiaj loj yog kom lawv paub tej kev xav tsis zoo no kom zoo, muab tej kev xav tsis zoo no tshem tawm, kom txhob nyob rau hauv tej kev xav tsis zoo no txoj kev hloov mus ntxiv lawm, thiab kom txhob nyob thiab coj lawv tus kheej raws li tej kev xav tsis zoo no li uas yog lawv qhov tseem ceeb thiab lub hauv paus mus ntxiv lawm. Ua ntej tshaj no, cia peb saib rau ntawm cov lus uas hais tias “nyuaj siab, ntxhov siab, thiab txhawj xeeb” no. Cov lus no tsis yog txoj kev nthuav txog tej kev xav lod? (Yog.) Ua ntej peb sib qhia txog lub ncauj lug no, cia peb xub ua tib zoo xav txog lub ncauj lug no tso, kom nej thiaj li muaj txoj kev to taub uas yooj yim tshaj plaws txog “kev nyuaj siab, kev ntxhov siab, thiab kev txhawj xeeb.” Txawm nej muaj ib txoj kev to taub ncaj ncaj txog cov lus no, los sis ib txoj kev to taub tob dhau ntawm cov lus no lub ntsiab ncaj ncaj lawm los xij, thaum ntawd nej yuav muaj ib txoj kev paub uas yooj yim txog tej kev xav tsis zoo no. Ua ntej tshaj no qhia Kuv seb dab tsi tau ua rau nej txhawj xeeb nyob rau yav tas los lawm, los sis nej pheej nyuaj siab, ntxhob siab, thiab txhawj xeeb txog dab tsi. Tej no yeej zoo li ib lub pob zeb loj loj uas tsoo koj, los sis zoo ib yam li ib tug duab ntxoo uas pheej caum koj qab, khi koj. (Vajtswv, kuv yuav hais ob peb lo lus. Thaum kuv ua ib yam dab tsi tsis tiav nyob rau hauv kuv tes dej num mas, txoj kev xav no tseem ceeb heev, thiab kuv txhawj xeeb txog seb kuv puas yuav raug nthuav tawm thiab raug ntiab tawm, thiab seb kuv puas yuav muaj ib lub neej zoo rau tom ntej thiab ib txoj hau kev kawg uas zoo. Thaum kuv ua tau zoo nyob rau hauv kuv tes dej num lawm, kuv tsis hnov zoo li no, tab sis thaum twg kuv ua tsis tau zoo nyob rau hauv tes dej num ntawd rau qee zaus mas, yeej pom hom kev xav tsis zoo no tseeb heev.) Qhov no tsis yog ib qho kev tshwm sim ntawm tej kev xav tsis zoo txog kev nyuaj siab, kev ntxhob siab, thiab kev txhawj xeeb lod? (Yog.) Qhov ko yog lawm. Hom kev xav tsis zoo no nkaum nyob rau hauv tib neeg nruab siab txhua lub sij hawm, yeej hloov lawv tej kev xav hauv lub hlwb tas li li. Txawm tib neeg tsis paub hom kev xav tsis zoo no thaum tsis muaj dab tsi phem tshwm sim los xij, nws yeej zoo li ib tug ntxhiab tsw, los sis zoo li ib hom roj, los sis haj tseem zoo nkaus li ib txoj kab hluav taws xob thiab. Koj tsis pom txoj kev xav tsis zoo ntawd thiab thaum koj tsis paub txog txoj kev xav tsis zoo ntawd, ces koj tsis muaj peev xwm hnov txog txoj kev xav tsis zoo no li thiab. Txawm li cas los xij, koj yeej paub tias muaj txoj kev xav tsis zoo no nyob rau hauv koj nruab siab, zoo ib yam li qhov hu ua rau txoj kev paub, thiab koj yeej cia li paub tias muaj hom kev xav hauv lub hlwb thiab txoj kev xav no. Thaum lub sij hawm yog, nyob rau qhov chaw yog, thiab nyob rau lub ntsiab lus yog, ces yuav muaj hom kev xav tsis zoo no ib qho me me zuj zus tuaj, thiab tshwm ib qho zuj zus tuaj. Tsis yog li ntawd lod? (Yog.) Yog li ntawd, lwm yam uas ua rau nej nyuaj siab, ntxhov siab, thiab txhawj xeeb ntawd yog dab tsi? Dhau ntawm qhov nyuam qhuav hais no ces tsis muaj dab tsi lawm lod? Yog muaj li ntawd, ces nej yeej ua neej tau zoo siab heev thiab tsis muaj kev txhawj xeeb, tsis muaj ib qho kev ntxhov siab, thiab tsis nyuaj siab txog ib yam dab tsi li—ces tseeb tiag nej yeej yuav yog ib tug tib neeg uas ywj pheej lawm. Yeej zoo li ntawd lod? (Tsis yog.) Yog li ntawd ces, qhia Kuv seb muaj dab tsi nyob rau hauv nej lub siab. (Thaum kuv ua kuv tes dej num tsis zoo, kuv pheej txhawj xeeb txog tsam poob koob poob npe thiab poob meej mom, txhawj xeeb tias kuv cov kwv tij thiab cov muam yuav xav li cas rau kuv, thiab kuv tus thawj coj yuav xav li cas rau kuv. Thiab, thaum kuv ua hauj lwm ua ke nrog kuv cov kwv tij thiab cov muam los ua kuv tes dej num es kuv pheej nthuav kuv tus moj yam qias vuab tsuab tawm tas li ntawd, kuv pheej txhawj xeeb tias kuv twb ntseeg Vajtswv los tau ntev lawm tiam sis kuv tsis tau hloov kiag li, thiab yog tias pheej muaj qhov no mus, ces ntshe tej zaum muaj ib hnub kuv yuav raug ntiab tawm. Tej no yog tej kev ua xyem xyav uas kuv muaj.) Thaum koj muaj tej kev ua xyem xyav no lawm es tej kev xav tsis zoo txog kev nyuaj siab, kev ntxhov siab, thiab kev txhawj xeeb no puas muaj nyob rau hauv koj? (Muaj.) Yog li ntawd, nej feem coob nyuaj siab thiab txhawj xeeb vim nej tsis ua nej tej dej num kom zoo, puas yog li ntawd? (Feem ntau, kuv txhawj xeeb txog kuv lub neej tom ntej thiab kuv txoj hmoo.) Qhov txhawj xeeb txog yus lub neej tom ntej thiab txoj hmoo ntawd yog qhov tseem ceeb tshaj. Thaum tib neeg tsis muaj peev xwm pom kom tshab, kom to taub, kom lees txais tau, los sis ua raws li qhov xwm txheej uas Vajtswv qhia kom ua thiab zwm rau Nws lub hwj chim kav, thiab thaum tib neeg ntsib ntau qhov kev nyuaj nyob rau hauv lawv lub neej txhua hnub, los sis thaum tej kev nyuaj no dhau ntawm qhov uas cov tib neeg dog dig ris taus lawm, ces lawv cia li muaj txhua hom kev txhawj xeeb thiab kev ntxhov siab, thiab haj tseem muaj kev nyuaj siab thiab. Lawv tsis paub tias xyov tag kis yuav zoo li cas, los sis hnub tom qab ntawd yuav zoo li cas, los sis seb txhua yam yuav zoo li cas rau ob peb xyoos tom ntej, los sis xyov lawv lub neej tom ntej yuav zoo li cas, ces yog li ntawd lawv thiaj li nyuaj siab, ntxhov siab, thiab txhawj xeeb txog txhua yam li. Lub ntsiab uas tib neeg nyuaj siab, ntxhov siab, thiab txhawj xeeb txog txhua yam ntawd yog dab tsi? Qhov ntawd yog qhov tias lawv tsis ntseeg Vajtswv lub hwj chim kav—qhov ntawd yog, lawv tsis muaj peev xwm ntseeg thiab pom kom tshab mus rau Vajtswv lub hwj chim kav. Tab txawm yog lawv pom kiag lub hwj chim kav ntawd ntawm lawv tus kheej ob lub qhov muag los, lawv yeej yuav tsis to taub li, los sis tsis ntseeg li. Lawv tsis ntseeg tias Vajtswv tuav lub hwj chim kav lawv txoj hmoo, lawv tsis ntseeg tias lawv lub neej yog nyob rau hauv Vajtswv ob txhais tes, ces yog li ntawd thiaj li muaj qhov tsis ntseeg nyob rau hauv lawv lub siab rau Vajtswv lub hwj chim kav thiab tej kev npaj, ces thaum ntawd txawm liam ub liam no tuaj, thiab lawv tsis muaj peev xwm zwm rau. Dhau ntawm qhov liam ub liam no thiab tsis muaj peev xwm zwm rau ntawd lawm, lawv xav ua cov tswj lawv tus kheej txoj hmoo thiab ua raws li lawv tus kheej xav. Yog li ntawd dab tsi yuav rais los ua qhov xwm txheej tiag tiag tom qab lawv pib ua raws li lawv tus kheej xav lawm? Yam uas lawv ua tau ces yog ua neej vam khom rau lawv tus kheej lub peev xwm thiab tej kev txawj xwb, tab sis muaj ntau yam uas lawv ua tsis tau kom tiav, los sis ncav tsis cuag, los sis ua kom tau raws li lawv tus kheej lub peev xwm thiab tej kev txawj. Piv txwv li: yuav muaj dab tsi tshwm rau lawv nyob rau yav tom ntej, seb lawv puas muaj peev xwm mus kawm ntawv qib siab, seb lawv puas muaj peev xwm mus nrhiav tau ib txoj hauj lwm zoo thaum lawv kawm tag qib siab, thiab seb txhua yam puas yuav mus zoo rau lawv thaum lawv tau ib txoj hauj lwm zoo lawm; thiab yog tias lawv xav nce tus ntaiv mus kom muaj txiag nplua nuj no, seb lawv puas yuav muaj peev xwm siv li ob peb xyoo xwb es ua tau li lawv tej tswv yim thiab tej kev ntshaw lawm; thiab tom qab ntawd thaum lawv xav nrhiav ib tug txij nkawm, es xav sib yuav thiab pib ib yim neej no, hom txij nkawm twg thiaj li yuav tsim nyog rau lawv? Rau tib neeg ces, yeej tsis paub tej zoo li tej no li. Vim tsis paub tej zoo li no, tib neeg thiaj li tsis paub tias yuav ua li cas. Thaum tib neeg mloog zoo li lawv tsis paub tias yuav ua li cas lawm, lawv thiaj li nyuaj siab, ntxhov siab, thiab txhawj xeeb—lawv nyuaj siab, ntxhov siab, thiab txhawj xeeb txog txhua yam uas lawv yuav muaj rau yav tom ntej. Vim li cas thiaj li muaj li no? Vim tias, nyob rau hauv txoj kev ntawm txoj kev ua neej mas, tib neeg yeej ris tsis tau txhua yam no li. Tsis muaj ib tug twg paub tias lawv yuav zoo li cas rau ob peb xyoos tom ntej, tsis muaj ib tug twg paub tias lawv txoj hauj lwm, los sis lawv txoj kev sib yuav, los sis cov me nyuam yuav zoo li cas nyob rau yav tom ntej—tib neeg yeej tsis paub tej no li. Tej no yog tej uas paub tsis tau ua ntej nyob rau hauv noob neej txoj kev txawj li, thiab yog vim li ntawd es tib neeg thiaj li pheej nyuaj siab, ntxhov siab, thiab txhawj xeeb txog tej ntawd tas li. Txawm ib tug tib neeg lub siab yuav yooj yim npaum li cas, tsuav yog lawv muaj peev xav, los tej kev xav tsis zoo no yeej yuav muaj ib qho zuj zus nyob rau hauv lawv nruab siab rau thaum lawv laus. Vim li cas thiaj li muaj kev nyuaj siab, kev ntxhov siab, thiab kev txhawj xeeb nyob rau hauv tib neeg? Vim tib neeg pheej nyuaj siab thiab ntshai txog tej uas dhau ntawm tus ciaj ciam ntawm lawv txoj kev txawj mus lawm; lawv pheej xav kom paub, kom to taub, thiab ua kom tau tej uas dhau ntawm tus ciaj ciam ntawm lawv txoj kev txawj, thiab haj tseem xav tswj tej uas dhau ntawm noob neej tej kev txawj lawm thiab. Lawv xav tswj txhua yam no, thiab tsis yog tej ntawd xwb—lawv kuj xav kom tej kev cai thiab tej uas muaj tshwm sim ntawm txoj kev tsim kho tej no nce qib thiab muaj tiav raws li lawv tus kheej lub siab nyiam thiab. Yog li ntawd, vim raug tej kev xav hauv lub hlwb uas tsis muaj qab hau no tswj kav lawm, tib neej thiaj li muaj kev nyuaj siab, kev ntxhov siab, thiab kev txhawj xeeb, thiab tej uas muaj tshwm sim ntawm tej kev xav no mas txawv ntawm ib tug tib neeg mus rau ib tug tib neeg. Txawm tib neeg yuav nyuaj siab, ntxhov siab, los sis txhawj xeeb heev txog yam dab tsi los xij li, yeej muaj tej kev xav tsis zoo no, tib neeg thiaj li yuav tsum saib tej kev xav tsis zoo no kom meej meej es nrhiav qhov tseeb los kho tej kev xav tsis zoo no.

Peb yuav sib qhia txog tej kev xav tsis zoo ntawm txoj kev nyuaj siab, kev ntxhov siab, thiab kev txhawj xeeb uas feem ntau los ntawm ob kis los: Kis ib yog yuav tshuaj xyuas seb tib neeg tej kev nyuaj yog dab tsi, ces txij ntawd mus yuav saib seb qhov laj thawj uas muaj tej kev xav tsis zoo ntawm txoj kev nyuaj siab, kev ntxhov siab, thiab kev txhawj xeeb ntawd yog dab tsi kiag, thiab ua li cas thiaj li muaj tej ntawd kiag; kis ob yog yuav tshuaj xyuas tej kev xav tsis zoo ntawm txoj kev nyuaj siab, kev ntxhov siab, thiab kev txhawj xeeb uas hais txog tus cwj pwm uas tib neeg coj rau Vajtswv tes hauj lwm. Nej puas to taub? (To taub.) Muaj pes tsawg kis? (Ob.) Peb yuav tshuaj xyuas qhov laj thawj tias vim li cas thiaj li muaj tej kev xav tsis zoo ntawm txoj kev nyuaj siab, kev ntxhov siab, thiab kev txhawj xeeb, qhov ib yog los ntawm tej kev nyuaj uas tib neeg muaj, thiab qhov ob yog los ntawm tib neeg tus cwj pwm coj rau Vajtswv tes hauj lwm. Rov qab hais qhov ntawd rau Kuv dua. (Peb yuav tshuaj xyuas qhov laj thawj tias vim li cas thiaj li muaj tej kev xav tsis zoo ntawm txoj kev nyuaj siab, kev ntxhov siab, thiab kev txhawj xeeb, qhov ib yog los ntawm tej kev nyuaj uas tib neej muaj, thiab qhov ob yog los ntawm tib neeg tus cwj pwm coj rau Vajtswv tes hauj lwm.) Muaj ntau qhov kev nyuaj uas tib neeg muaj, txhua qhov uas tib neeg ntsib nyob rau hauv lub neej txhua hnub, tej kev nyuaj uas nquag muaj nyob rau hauv txoj kev ua ib lub neej ntawm txoj kev ua neej. Thiab ua li cas ho muaj tej kev nyuaj no? Muaj tej kev nyuaj no vim tib neeg pheej sim mus ncav kom dhau lawv tus kheej, pheej sim tswj lawv tus kheej txoj hmoo, kom paub lawv lub neej yav tom ntej ua ntej lub sij hawm. Yog tias lawv lub neej yav tom ntej tsis zoo, ces lawv mus nrhiav ib tug neeg txawj ntse los sis ib tug neeg saib hmoov kom muab kho rau thiab kho kom yog. Vim li ntawd es tib neeg thiaj li ntsib ntau qhov kev nyuaj nyob rau hauv lawv lub neej txhua hnub, thiab yeej yog tej kev nyuaj no uas pheej ua rau tib neeg poob mus rau hauv tej kev xav tsis zoo ntawm txoj kev nyuaj siab, kev ntxhov siab, thiab kev txhawj xeeb. Tej kev nyuaj no yog dab tsi? Cia peb xub saib rau ntawm qhov uas tib neeg xav tias yog lawv txoj kev nyuaj uas loj tshaj plaws tso—qhov ntawd yog dab tsi? Qhov ntawd yog lawv tej kev vam rau yav tom ntej, txhais tias ib tug tib neeg lub neej yav tom ntej yuav zoo li cas nyob rau tiam neej no, seb lawv puas yuav muaj txiag nplua nuj los sis tsuas zoo ib yam li sawv daws nyob rau yav tom ntej xwb, seb lawv puas muaj peev xwm nrov koob nrov npe tau, ua tau zoo, thiab vam meej nyob rau hauv lub ntiaj teb thiab rau ntawm tib neeg. Tshwj xeeb mas yog nyob rau ntawm cov uas ntseeg Vajtswv, tej zaum lawv yuav tsis paub tias dab tsi yuav tshwm sim rau lwm tus nyob rau yav tom ntej, tab sis lawv pheej txhawj xeeb txog lawv tus kheej lub neej yav tom ntej thiab pheej xav paub tias, “Ntseeg Vajtswv es yeej zoo li no xwb lod? Kuv puas yuav nrov koob nrov npe tshaj lwm tus nyob rau yav tom ntej? Kuv puas yuav muaj peev xwm ua tau ib teg hauj lwm tseem ceeb nyob rau hauv Vajtswv lub tsev? Kuv puas yuav muaj peev xwm ua tau ib tug thawj coj ntawm pab pawg los sis ib tug tswj? Kuv puas yuav muaj peev xwm ua tau ib tug thawj coj? Yuav muaj dab tsi tshwm sim rau kuv? Yog tias kuv pheej ua kuv tes dej num zoo li no nyob rau hauv Vajtswv lub tsev, thaum kawg kuv yuav zoo li cas? Kuv puas yuav tau txais kev cawm dim? Kuv puas muaj ib qho kev vam nyob rau yav tom ntej? Kuv puas tseem yuav tsum tau ua kuv txoj hauj lwm nyob rau hauv lub ntiaj teb no mus? Kuv puas yuav tsum tau kawm txoj kev txawj qhib siab uas kuv tau kawm yav tas los lawm ntawd txuas ntxiv mus, los sis siv qhov ntawd mus kawm ntxiv? Yog kuv ua tau kuv tes dej num puv sij hawm hauv Vajtswv lub tsev mus, ces kuv yuav tsum tsis muaj teeb meem nrog rau tej kev tim tsum uas tseem ceeb ntawm lub neej, tab sis yog kuv tsis ua kuv tes dej num kom zoo ces ntshe kuv yuav raug tshais chaw thiab raug hloov, thaum ntawd kuv yuav ua li cas ua neej nyob? Ua ntej raug hloov los sis raug ntiab tawm, kuv puas yuav tsum siv lub cib fim tam sim no los npaj rau qhov uas yuav muaj tiag tiag ntawd?” Lawv xav paub txog tej no thiab pom tias lawv muaj qee cov nyiaj khaw cia, ces lawv thiaj li xav tias, “Qhov nyiaj uas kuv tau khaws cia lawm no yuav kav kuv mus pes tsawg xyoo? Tam sim no kuv muaj peb caug tawm xyoo, ces kaum xyoo tom ntej no kuv yuav muaj plaub caug tawm xyoo. Yog kuv raug tshem tawm ntawm pawg ntseeg mus lawm no, kuv puas yuav muaj peev xwm ua tau raws li qhov xwm txheej thaum kuv rov qab mus rau ntawm lub ntiaj teb lawm? Kuv puas yuav noj qab nyob zoo txaus los ua hauj lwm txuas ntxiv mus? Kuv puas yuav muaj peev xwm khwv tau nyiaj txaus los ua neej nyob ntxiv mus? Kuv ua kuv tes dej num nyob hauv Vajtswv lub tsev, tab sis Vajtswv puas yuav ceev kuv cia kom mus txog ntua thaum kawg?” Txawm lawv xav txog tej no txhua lub sij hawm los, lawv yeej nrhiav tsis tau tej lus teb rau li. Txawm tsis muaj ib lo lus xaus li los, lawv yeej xav txog tej no tas li—qhov ntawd dhau ntawm qhov lawv tswj tau lawm. Thaum lawv ntsib teeb meem los sis kev nyuaj, los sis thaum qee yam tsis mus raws li qhov lawv xav tau mas, nyob hauv lawv nruab siab, lawv yeej xav txog tej no yam tsis qhia leej twg li. Thaum ib txhia tib neeg raug qhuab qhia thiab raug qhuab ntuas, thaum lawv raug hloov hauv lawv tej dej num, thaum lawv raug tshais chaw mus ua tej dej num txawv, los sis thaum lawv ntsib qee yam kev phom sij los sis lwm yam mas, lawv cia li nrhiav ib txoj kev thim rov qab es npaj thiab nrhiav kev rau lawv tej kauj ruam mus lawm tom ntej. Txawm yuav muaj dab tsi tshwm sim rau thaum kawg los, tib neeg yeej tseem pheej npaj thaum nrhiav kev rau tej uas lawv txhawj xeeb, ntxhov siab, thiab nyuaj siab txog. Tej no tsis yog tej uas tib neeg xav txog rau lawv tus kheej tej kev vam rau yav tom ntej lod? Tsis yog muaj tej kev xav tsis zoo no vim tib neeg tsis muaj peev xwm tso lawv tus kheej tej kev vam rau yav tom ntej tseg lod? (Yog, lawv yeej ua li ntawd.) Tshwj xeeb thaum tib neeg muaj siab thiab thaum txhua yam mus tau zoo heev nyob rau hauv txoj kev ua lawv tej dej num, thiab tshwj xeeb thaum lawv raug txhawb nce qib, raug siv mus ua qee yam hauj lwm tseem ceeb, thaum lawv xyiv fab rau lawv cov kwv tij thiab cov muam feem coob txoj kev txhawb, thiab thaum lawv tus kheej qhov muaj nqis ntawd raug qhuas mas, lawv tsis xav txog tej kev xav tsis zoo no. Thaum lawv lub koob lub npe, lub meej mom, thiab tej kev ntshaw raug puas tsuaj lawm, ces lawv thim rov qab los rau tej kev xav tsis zoo ntawm txoj kev nyuaj siab, kev ntxhov siab, thiab kev txhawj xeeb. Thaum tib neeg rov qab mus rau tej kev xav tsis zoo no lawm, ces qhov lawv kho tej kev xav tsis zoo no tsis yog khiav ntawm tej kev xav tsis zoo no mus los sis tsis yog tsis lees txais tej kev xav tsis zoo no, tab sis ho yog txhawb tej kev xav tsis zoo no, thiab rau siab ua kom poob mus rau hauv tej kev xav hauv siab ntawm txoj kev nyuaj siab, kev ntxhov siab, thiab kev txhawj xeeb, kom tob mus rau tej ntawd xwb. Vim li cas kuv thiaj li hais li no? Thaum tib neeg poob mus rau hauv tej kev xav tsis zoo no lawm, thaum ntawd lawv haj yam muaj ntau qhov laj thawj, hais ub hais no ntau, thiab muaj ntau qhov kev npaj rau lawv lub neej yav tom ntej thiab rau lawv tej kauj ruam mus lawm tom ntej xwb. Thaum lawv tab tom npaj tej no, lawv xav tias qhov no yeej tsim nyog lawm, tias qhov no yog yam uas lawv yuav tsum tau ua, ces lawv thiaj li siv qhov hais tias, “Every man for himself and the devil take the hindmost,” thiab lwm qhov uas hais tias, “Tus uas tsis npaj rau lub neej yav tom ntej yeej yuav ntsib teeb meem xwb xwb li,” txhais hais tias yog koj tsis npaj thiab tsis ua tib zoo xav txog koj lub neej yav tom ntej thiab txoj hmoo ua ntej, ces tsis muaj leej twg yuav txhawj txog tej ntawd rau koj, thiab tsis muaj leej twg yuav quav ntsej txog tej ntawd rau koj lawm. Thaum koj tsis paub tias koj yuav mus lawm tom ntej li cas lawm, ces koj yuav ntsib kev phem, kev mob siab, thiab kev txaj muag, ces tus uas yuav txom nyem thiab tiv tej kev nyuaj ntawd yuav yog koj ntag. Yog li ntawd, tib neeg xav hais tias lawv mas ntse heev, thiab txhua kauj ruam uas lawv rhais ntawd, lawv yeej yuav saib mus lawm tom ntej li kaum kauj ruam. Lub sij hawm uas lawv ntsib ib qho kev nyuaj twg los sis kev tu siab twg mas, lawv yeej tig rov qab los rau lawv tej kev xav tsis zoo ntawm txoj kev nyuaj siab, kev ntxhov siab, thiab kev txhawj xeeb kiag tam sim ntawd kom thiaj li tiv thaiv tau lawv tus kheej, kom lawv lub neej yav tom ntej thiab lawv kauj ruam tom ntej hauv lub neej ntawd thiaj li yooj yim, kom thiaj li muaj zaub mov noj thiab muaj khawb ncaws hnav, kom thiaj li tsis ncig mus ncig los rau tom tej kev xwb, es thiaj li muaj zaub mov los sis khawb ncaws hnav txaus. Yog li ntawd, vim txoj kev hloov ntawm tej kev xav tsis zoo no, lawv thiaj li pheej ceeb toom rau lawv tus kheej, xav hais tias, “Kuv yuav tsum tau npaj ua ntej, tuav qee yam cia, thiab kuv tus kheej yuav tsum thim rov qab me ntsis. Kuv yuav tsum txhob ruam ruam—kuv txoj hmoo yog nyob rau hauv kuv tus kheej ob txhais tes. Tib neeg pheej hais tias, ‘Peb txoj hmoo yog nyob rau hauv Vajtswv ob txhais tes, thiab Vajtswv muaj hwj chim kav tib neeg txoj hmoo,’ tab sis qhov no tsuas yog tej kev tham uas qhuav qhawv xwb. Leej twg twb pom qhov no lawm tiag tiag? Vajtswv muaj hwj chim kav peb txoj hmoo li cas? Leej twg twb pom kiag lawm hais tias ib hnub twg Vajtswv yeej npaj peb pluag mov rau txhua tus, los sis npaj txhua yam uas lawv tim tsum nyob rau hauv lub neej lawm? Tsis muaj leej twg pom li.” Tib neeg ntseeg tias thaum lawv tsis pom Vajtswv lub hwj chim kav, thiab yog lawv nyuaj siab, ntxhov siab, thiab txhawj xeeb txog lawv tej kev vam rau yav tom ntej, ces tej kev xav tsis zoo no yog zoo ib yam li ib txoj kev tiv thaiv rau lawv, zoo ib yam li ib daig hlau tiv thaiv, ib qho chaw uas nyab xeeb ntag. Lawv thiaj li nquag ceeb toom thiab hais kom lawv tus kheej nco npaj rau lub neej yav tom ntej, hais tias lawv yuav tsum tau txhawj txog tag kis, hais tias lawv yuav tsum tsis txhob tsuas ntim zaub mov noj kom puv rau lawv tus kheej tas hnub xwb es tsis ua dab tsi li; qhov npaj rau yus tus kheej, qhov nrhiav ib txoj kev rau yus tus kheej tawm, thiab ua hauj lwm nruab hnub hmo ntuj rau yus tus kheej lub neej yav tom ntej ntawd yeej tsis txhaum. Lawv hais rau lawv tus kheej hais tias qhov no yeej zoo li ib txwm muaj thiab yeej zoo thiab tsis yog qee yam uas yuav txaj muag txog. Yog li ntawd, tab txawm tib neeg ntseeg tias kev nyuaj siab, kev ntxhov siab, thiab kev txhawj xeeb yog tej kev xav tsis zoo los xij, lawv yeej tsis ntseeg tias xav li tej ntawd yog ib yam phem, lawv yeej tsis xav tias tej zaum tej kev xav tsis zoo no yuav ua rau lawv puas tsuaj li, los sis tias tej zaum tej kev xav tsis zoo no yuav ua teeb meem rau lawv txoj kev caum qhov tseeb thiab to taub qhov tseeb qhov muaj tiag. Tiam sis, lawv xyiv fab rau tej kev xav tsis zoo ntawd yam muaj zog zis, thiab lawv txaus siab hlo ua lub neej nyob rau hauv tej kev xav tsis zoo no yam muaj zog zis. Qhov no yog vim lawv ntseeg tias tsuas yog los ntawm qhov ua neej nyob rau hauv tej kev xav tsis zoo no thiab nquag nyuaj siab, ntxhov siab, thiab txhawj xeeb txog lawv tej kev vam rau yam tom ntej xwb mas lawv thiaj li nyab xeeb. Yog tsis li ntawd no, leej twg thiaj li yuav nyuaj siab, ntxhov siab, thiab txhawj xeeb txog lawv lub neej yav tom ntej? Tsis muaj leej twg lawm. Tsis muaj leej twg hlub lawv tshaj li lawv hlub lawv tus kheej lawm, tsis muaj leej twg to taub lawv li lawv to taub, los sis nkag siab lawv li lawv nkag siab. Yog li ntawd, txawm yog tias tib neeg yeej paub mus txog ib theem twg thiab paub cov lus thiab cov kev qhuab qhia tias qhov muaj tej kev xav tsis zoo zoo li ntawd yuav ua rau lawv puas tsuaj los xij, lawv yeej tseem tsis txaus siab hlo muab tej kev xav tsis zoo zoo li ntawd tso tseg vim tej kev xav tsis zoo no cia li tuav khov kho kom nkag siab thiab tswj tau lawv tus kheej lub neej yav tom ntej lawm. Hais li no puas yog? (Yog.) Yog li ntawd, rau tib neeg mas, kev txhawj xeeb, kev ntxhov siab, thiab kev nyuaj siab txog lawv lub neej yav tom ntej ntawd yog ib qho ntawm lub luag hauj lwm uas loj heev. Qhov ntawd tsis txaj muag, thiab tsis ntxim hlub, thiab tsis ntxim ntxub, tab sis rau lawv mas qhov ntawd yeej yog li qhov txhua yam yuav tsum yog li lawm. Vim li ntawd es thiaj li nyuaj heev rau tib neeg muab tej kev xav tsis zoo no tso tseg mus, cuag nkaus li lawv twb muaj tej kev xav tsis zoo no txij thaum yug los lawm. Txhua yam uas tib neeg xav txog txij thaum yug los ces yog rau lawv tus kheej xwb, thiab yam uas tseem ceeb tshaj plaws rau lawv ces yog lawv tus kheej tej kev vam rau yav tom ntej. Lawv xav tias yog lawv tuav lawv lub neej yav tom ntej kom khov kom saib ntsoov mus rau qhov ntawd, ces lawv yuav ua ib lub neej kaj siab lug. Lawv xav tias qhov muaj tej kev vam uas zoo rau yav tom ntej ntawd, lawv yuav muaj txhua yam uas lawv xav tau, thiab qhov ntawd yuav yog ib qho uas nyab xeeb heev. Ces yog li ntawd, tib neeg thiaj li tsis dhuav qhov nyuaj siab, ntxhov siab, thiab txhawj xeeb txog lawv lub neej yav tom ntej dua li lawm. Txawm yog Vajtswv twb muab Nws cov lus cog tseg, txawm yog tib neeg twb xyiv fab los sis tau txais hmoov hlub los ntawm Vajtswv los ntau heev, txawm yog lawv twb pom Vajtswv muab txhua hom koob hmoov, thiab lwm yam xws li tej uas muaj tseeb rau tib neeg ntiaj teb lawm los xij, tib neeg tseem xav ua neej nyob rau hauv tej kev xav tsis zoo ntawm txoj kev nyuaj siab, kev ntxhov siab, thiab kev txhawj xeeb, thiab npaj rau lawv lub neej yav tom ntej.

Dhau li ntawm tej kev vam rau yav tom ntej lawm, tseem muaj qee yam tseem ceeb thiab, qee yam uas tib neeg kuj nquag nyuaj siab, ntxhov siab, thiab txhawj xeeb txog, qhov ntawd yog txoj kev sib yuav. Ib txhia tib neeg tsis txhawj xeeb txog qhov ntawd thiab tsis quav ntsej yog tias lawv tseem tsis tau yuav txij nkawm thaum lawv muaj peb caug tawm xyoo, vim tias muaj coob tus tib neeg uas tam sim no lawv muaj peb caug tawm xyoo los tsis tau yuav txij nkawm. Qhov no yog qee yam uas nquag pom muaj nyob rau hauv lub zej lub zog, thiab yeej tsis muaj leej twg luag koj vim qhov ntawd, thiab yeej tsis muaj leej twg hais tias koj muaj qee yam tsis zoo lawm. Txawm li cas los xij, yog ib tug twg tsis tau yuav txij nkawm rau lub sij hawm lawv muaj plaub caug tawm xyoo, ces lawv txawm pib ntshai nyob tob tob puag hauv lawv nruab siab, ces lawv thiaj li xav tias, “Puas tsim nyog kuv nrhiav ib tug txij nkawm los tsis tsim nyog ne? Puas tsim nyog kuv yuav txij nkawm los tsis tsim nyog ne? Yog kuv tsis yuav txij nkawm thiab tsis muaj ib yim neej, yog kuv tsis muaj ib tug me nyuam li, kuv puas yuav muaj leej twg saib xyuas kuv thaum kuv laus lawm? Puas yuav muaj leej twg saib xyuas kuv thaum kuv muaj mob? Kuv puas yuav muaj leej twg los npaj kuv lub ntees thaum kuv tuag?” Tib neeg txhawj xeeb txog tej no. Cov uas tsis npaj yuav txij nkawm ces tsis nyuaj siab, tsis ntxhov siab, los sis tsis txhawj xeeb. Piv txwv li, ib txhia tib neeg hais tias, “tam sim no kuv ntseeg Vajtswv, thiab kuv txaus siab hlo muab kuv tus kheej fij rau Vajtswv lawm. Kuv tsis mus nrhiav ib tug txij nkawm, thiab kuv tsis mus yuav txij nkawm lawm. Ces txawm kuv yuav laus npaum li cas los kuv tsis nyuaj siab txog tej no.” Cov tib neeg uas tseem tab seeb, cov tib neeg uas tab seeb los tau 10 xyoo los sis 20 xyoo, cov uas twb tab seeb txij thaum hnub nyoog 20 xyoo mus rau 40 xyoo ntawd, yuav tsum tsis muaj ib qho kev txhawj xeeb loj li. Tab txawm lawv yuav hnov txhawj xeeb me ntsis rau qee lub sij hawm vim ntawm tej xwm txheej ib puag ncig los sis tej laj thawj uas tseem ceeb los xij, vim lawv ntseeg Vajtswv thiab ua lawv tes dej num khwv heev, thiab vim lawv txoj kev txiav txim siab tam sim no tsis tau hloov, ces hom kev txhawj xeeb uas lawv muaj ntawd tsis muaj qab hau thiab tsuas muaj ib ntus xwb, ces qhov ntawd tsis tseem ceeb. Hom kev xav no uas tsis cuam tshuam rau txoj kev ua tej dej num li ib txwm muaj ntawd tsis ua rau tib neeg puas tsuaj, thiab tsis muab xam tias yog ib txoj kev xav tsis zoo, qhov ntawd yog, qhov xwm txheej no tsis tau tig mus ua ib txoj kev xav tsis zoo rau koj. Hos hais txog cov uas twb yuav txij nkawm lawm ntawd, lawv ho txhawj xeeb txog dab tsi? Yog tus txiv thiab tus poj niam nkawv ob leeg ntseeg Vajtswv thiab ua nkawv tej dej num, ces puas yuav tuav tau txoj kev sib yuav no? Puas muaj yim neej no? Hais txog cov me nyuam ne? Ntxiv rau qhov ntawd, yog ib tug ntawm ob tug ntawd caum qhov tseeb hos lwm tus tsis caum, yog tus uas tsis caum qhov tseeb pheej caum lub ntiaj teb, caum ib lub neej uas muaj txiag nplua nuj xwb, hos tus uas caum qhov tseeb pheej xav ua lawv tes dej num, hos tus uas tsis caum qhov tseeb pheej sim los cheem lawv tus txij nkawm tab sis ho txaj muag, qee lub sij hawm mas pheej yws los sis hais tej yam tsis zoo los txo lawv tus txij nkawm lub zog, ces tus uas caum qhov tseeb yuav xav paub hais tias, “Au, kuv tus txiv tsis ntseeg Vajtswv tiag tiag, yog li ntawd qhov ntawd yuav mus zoo li cas rau wb nyob rau yav tom ntej? Yog wb sib nrauj mas, kuv yuav rov tab seeb dua thiab tsis muaj peev xwm tuav tau txoj kev khwv noj khwv haus. Yog kuv nrog nws nyob, los wb yuav tsis taug tib txoj kev, wb nyias yuav muaj nyias tej kev npau suav uas sib txawv, ces tom qab ntawd kuv yuav ua li cas?” Nkawv thiaj li nyuaj siab, ntxhov siab, thiab txhawj xeeb txog tej no. Thaum lawv pib los ntseeg Vajtswv lawm, ib txhia nkauj muam ntseeg tias, txawm lawv cov txiv tsis ntseeg Vajtswv los xij, lawv cov txiv tsis txwv lawv txoj kev ntseeg Vajtswv, thiab lawv tsis raug tsim txom, yog li ntawd tsis muaj laj thawj dab tsi uas yuav sib nrauj. Txawm li cas los xij, yog lawv nyob ua ke, ces lawv pheej raug txwv thiab raug haub ntxias. Lawv raug haub ntxias los ntawm dab tsi? Lawv raug txwv thiab raug haub ntxias los ntawm lawv txoj kev hlub, thiab ntau yam kev nyuaj hauv lub neej ntawm yim neeg thiab muaj qee lub sij hawm mas txoj kev sib yuav ntawd yuav dig ub dig no nyob rau hauv nruab siab, ces ua rau lawv muaj ib hom kev nyuaj siab, kev ntxhov siab, thiab kev txhawj xeeb uas tsis loj tsis me. Nyob rau hauv tej xwm txheej zoo li no mas, txoj kev sib yuav yeej yog ib qho uas ib txwm muaj uas tuav tau ib lub neej ntawm yim neeg uas ib txwm muaj, thiab txoj kev sib yuav ntawd rais los ua qee yam uas khi cov poj niam txoj kev xav hauv lub hlwb uas ib txwm muaj, lawv lub neej uas ib txwm muaj, thiab haj tseem khi txoj kev ua lawv tej dej num uas ib txwm muaj lawm thiab—qhov ntawd thiaj li tsom kwm nyuaj kom txoj kev sib yuav ntawd mus taus, tab sis lawv tus kheej tsis tuaj yeem khiav kom dim li thiab. Tsis muaj qhov laj thawj tshwj xeeb twg yuav los tsom kwm ib txoj kev sib yuav zoo li txoj no kom mus taus, thiab tsis muaj ib qho laj thawj tshwj xeeb twg rau lawv los mus sib nrauj li thiab; tsis muaj laj thawj kom txaus los ua qhov twg li. Lawv tsis paub tias xyov txoj kev xaiv twg thiaj li yog, thiab lawv tsis paub tias yam ua tsis yog ntawd yog dab tsi. Vim li ntawd lawv thiaj li muaj kev nyuaj siab, kev ntxhov siab, thiab kev txhawj xeeb. Tej kev xav hauv siab txog kev nyuaj siab, kev ntxhov siab, thiab kev txhawj xeeb no mas yeej muaj tas li nyob rau hauv lub siab thiab muab lawv khi nyob rau hauv lawv lub neej txhua hnub, thiab tej kev xav hauv siab no kuj cuam tshuam rau lawv lub neej uas ib txwm muaj thiab. Nyob rau thaum tab tom ua lawv tej dej num ntawd, yeej muaj tej no nyob rau hauv lawv lub siab tas li thiab muaj nyob rau hauv lawv nruab siab, cuam tshuam rau txoj kev ua lawv tej dej num uas ib txwm ua ntawd. Txawm tias tej no tsis zoo li yog ib lo lus meej txog yam uas cov poj niam no yuav tsum ua los sis yam uas lawv yuav tsum xaiv los xij, tej xwm txheej no ua rau lawv daig tob tob rau hauv tej kev xav tsis zoo ntawm kev nyuaj siab, kev ntxhov siab, thiab kev txhawj xeeb, uas ua rau lawv raug puas tshuaj thiab daig lawm. Qhov no tsis yog lwm hom kev nyuaj lod? (Yog.) Qhov no yog lwm hom kev nyuaj, ib qho kev nyuaj uas txoj kev sib yuav coj los.

Kuj muaj cov uas, vim lawv tau los ntseeg Vajtswv lawm, ua lub neej hauv pawg ntseeg, nyeem Vajtswv cov lus, thiab ua lawv tej dej num thiab, es thiaj li tsis muaj sij hawm los koom nrog lawv cov me nyuam, lawv cov poj niam (los sis cov txiv), lawv tej niam tej txiv, los sis lawv tej phooj ywg thiab tej txheeb ze uas tsis ntseeg li ib txwm koom lawm. Tshwj xeeb mas, lawv yuav tsis muaj peev xwm los saib xyuas lawv cov me nyuam uas tsis ntseeg kom zoo lawm, los sis ua tej yam uas lawv cov me nyuam cheem tsum lawm, ces yog li ntawd lawv thiaj li txhawj xeeb txog lawv cov me nyuam lub neej yav tom ntej thiab tej kev vam. Tshwj xeeb mas yog thaum lawv cov me nyuam loj hlob tuaj, ces ib txhia tib neeg yuav pib txhawj hais tias: Kuv tus me nyuam puas yuav mus kawm ntawv qib siab los tsis mus? Lawv yuav kawm mus ua dab tsi yog tias lawv mus kawm ntawv qib siab? Kuv tus me nyuam tsis ntseeg Vajtswv thiab xav mus kawm ntawv qib siab xwb, yog li ntawd kuv uas yog ib tug ntseeg Vajtswv puas yuav tsum tau them lawv tej nqi kawm ntawv? Kuv puas yuav tsum tau saib xyuas lawv tej kev tim tsum txhua hnub thiab txhawb lawv tej kev kawm? Thiab hais txog thaum lawv yuav txij nkawm, thaum muaj ib txoj hauj lwm, thiab thaum lawv tus kheej muaj ib yim neej thiab muaj me nyuam lawm, kuv lub luag hauj lwm yog dab tsi? Kuv tsim nyog ua yam twg thiab tsis ua yam twg? Lub sij hawm muaj tej yam zoo li no, lub sij hawm lawv pom lawv tus kheej nyob rau hauv ib qho xwm txheej zoo li no lawm, lawv cia li tsis paub xav thiab tsis paub tias yuav ua li cas lawm, thiab lawv tsis paub tias yuav daws tej zoo li no li cas li lawm. Thaum sij hawm dhau mus, txawm muaj kev nyuaj siab, kev ntxhov siab, thiab kev txhawj xeeb txog tej no: Yog lawv ua tej no rau lawv tus me nyuam, ces lawv ntshai tsam tawm tsam Vajtswv lub siab nyiam thiab Vajtswv tsis txaus siab, thiab yog lawv tsis ua tej no, ces lawv ntshai tsam ua tsis tau lawv tej luag hauj lwm li yog niam yog txiv ces yuav raug lawv tus me nyuam thiab cov tswv cuab ntawm lwm tsev neeg yws; yog lawv ua tej no, ces lawv ntshai tsam lawv yuav plam txoj kev ua tim khawv, thiab yog lawv tsis ua tej no, ces lawv ntshai tsam raug cov tib neeg ntiaj teb thuam, thiab raug luag thiab raug hais lus tuam mom rau, thiab raug lawv cov neeg zej zog txiav txim; lawv ntshai tsam tsis hwm Vajtswv, tab sis lawv kuj ntshai txog qhov tsam ua rau lawv tus kheej muaj ib lub koob lub npe phem thiab, thiab txaj muag heev ces lawv tsis tuaj yeem tshwm ntsej tshwm muag li. Thaum lawv ua ywj fab ywj fwj txog tej no, thiaj li muaj kev nyuaj siab, kev ntxhov siab thiab kev txhawj xeeb nyob rau hauv lawv lub siab; lawv nyuaj siab txog qhov tsis paub tias xyov yuav ua li cas, lawv ntxhov siab txog qhov tsam ua tsis yog txawm lawv xaiv qhov twg los xij, thiab tsis paub seb yam lawv ua ntawd puas tsim nyog, thiab lawv txhawj xeeb tias yog pheej muaj tej no tshwm sim, ces muaj ib hnub ntshe lawv yuav tsis muaj peev xwm daws tau tej ntawd, thiab yog muaj ib qho uas lawv ua tsis tau ces txhua yam yuav haj yam nyuaj rau lawv. Cov tib neeg uas nyob rau hauv ib qho xwm txheej zoo li no mas yeej nyuaj siab, ntxhov siab, thiab txhawj xeeb txog txhua yam no uas muaj tshwm sim rau hauv lub neej, tsis hais txawm tej ntawd loj los sis me li. Thaum lawv muaj tej kev xav hauv siab uas tsis zoo no lawm, ces lawv txawm muaj txoj kev nyuaj siab, kev ntxhov siab, thiab kev txhawj xeeb no, thiab tsis muaj peev xwm tso lawv tus kheej dim: Yog lawv ua li no los txhaum, yog lawv ua li ntawd los txhaum, ces lawv thiaj li tsis paub xyov yuav ua li cas thiaj li yog; lawv xav ua kom lwm tus tib neeg zoo siab, tab sis lawv ho ntshai tsam Vajtswv tsis txaus siab; lawv xav ua ntau yam rau lwm tus tib neeg kom luag thiaj li hais lus zoo txog lawv, tab sis lawv tsis xav tsis hwm Vajtswv los sis ua kom Vajtswv ntxub lawv. Vim li ntawd lawv thiaj li pheej muaj tej kev xav hauv siab txog kev nyuaj siab, kev ntxhov siab, thiab kev txhawj xeeb no. Lawv nyuaj siab rau lwm tus tib neeg thiab rau lawv tus kheej tib si; lawv ntxhov siab txog ntau yam rau lwm tus tib neeg thiab rau lawv tus kheej tib si; thiab lawv kuj txhawj xeeb txog ntau yam rau lwm tus tib neeg thiab rau lawv tus kheej thiab, ces yog li ntawd lawv thiaj muaj ob qho kev nyuaj uas lawv khiav tsis dim. Tej kev xav tsis zoo uas zoo li tej no mas tsis yog tsuas cuam tshuam rau lawv lub neej txhua hnub xwb, tab sis kuj cuam tshuam rau txoj kev ua lawv tej dej num thiab, thiab tseeb tiag, kuj cuam tshuam rau lawv txoj kev caum qhov tseeb mus rau qee theem thiab. Qhov no yog ib hom kev nyuaj, ntawd yog, tej no yog tej kev nyuaj uas ntsig txog txoj kev sib yuav, lub neej ntawm yim neeg, thiab lub neej ntawm tus kheej, thiab yog vim ntawm tej kev nyuaj no es tib neeg thiaj li nquag daig rau hauv txoj kev nyuaj siab, kev ntxhov siab, thiab kev txhawj xeeb ntawd. Thaum tib neeg daig rau hauv hom kev xav tsis zoo no lawm tib neeg tsis ntxim hlub lod? (Lawv ntxim hlub.) Lawv puas ntxim hlub mas? Nej tseem hais tias, “Lawv ntxim hlub,” qhia hais tias neej tseem hlub tshua lawv heev. Thaum ib tug twg daig rau hauv ib txoj kev xav tsis zoo lawm, txawm yuav muaj dab tsi tshwm sim nyob rau yav tas los es thiaj li muaj txoj kev xav tsis zoo ntawd los, qhov laj thawj uas muaj txoj kev xav tsis zoo ntawd yog dab tsi? Puas yog vim ib cheeb tsam puag ncig, vim tib neeg, tej xwm txheej, thiab txhua yam uas nyob puag ncig tus tib neeg ntawd? Los sis puas yog vim qhov tseeb uas Vajtswv nthuav tawm ntawd cuam tshuam lawv? Puas yog ib cheeb tsam puag ncig cuam tshuam tus tib neeg ntawd, los sis puas yog Vajtswv cov lus cuam tshuam lawv lub neej? Qhov laj thawj yog dab tsi kiag? Nej puas paub? Qhia Kuv seb, txawm yog nyob rau hauv tib neeg lub neej li ib txwm muaj los sis nyob rau hauv txoj kev ua lawv tes dej num los xij, puas muaj tej kev nyuaj no yog tias lawv caum qhov tseeb thiab txaus siab hlo xyaum ua raws li qhov tseeb? (Tsis muaj.) Tej kev nyuaj no muaj raws li qhov muaj tseeb ntawm lub hom phiaj xwb. Nej hais tias tsis muaj tej kev nyuaj ntawd no, yog li ntawd puas yog hais tias nej twb daws tau tej kev nyuaj no lawm? Nej puas muaj peev xwm ua li ntawd mas? Tej kev nyuaj no mas daws tsis tau li, thiab muaj tej kev nyuaj no raws li qhov muaj tseeb ntawm lub hom phiaj xwb. Qhov tshwm sim ntawm tej kev nyuaj nyob rau hauv cov tib neeg uas caum qhov tseeb ntawd yuav yog dab tsi? Thiab qhov tshwm sim ntawm tej kev nyuaj nyob rau hauv cov tib neeg uas tsis caum qhov tseeb no ho yog dab tsi thiab? Lawv yuav muaj ob qho tshwm sim uas sib txawv tag nrho. Yog tib neeg caum qhov tseeb, ces lawv yuav tsis raug tej kev nyuaj no thiab tsis poob mus rau hauv tej kev xav tsis zoo ntawm kev nyuaj siab, kev ntxhov siab, thiab kev txhawj xeeb no. Qhov txawv mas, yog tib neeg tsis caum qhov tseeb, ces yuav muaj tej kev nyuaj no rau lawv ib yam nkaus, thiab qhov tshwm sim ne yuav yog dab tsi? Tej kev nyuaj no yuav khi koj kom koj tsis muaj peev xwm khiav dim, thiab yog koj tsis muaj peev xwm daws tau tej kev nyuaj no, ces thaum kawg tej kev nyuaj no yuav rais los ua tej kev xav tsis zoo uas muab tej kev nyuaj no khi ua pob caus rau hauv koj nruab siab; tej kev nyuaj no yuav cuam tshuam koj lub neej uas ib txwm muaj thiab txoj kev ua koj tej dej num uas ib txwm ua, ces tej kev nyuaj no yuav ua rau koj raug caij tsuj thiab tsis muaj peev xwm nrhiav kev tawm—qhov no yog qhov tshwm sim uas tej kev nyuaj no yuav muaj rau koj. Ob qho tshwm sim no sib txawv, tsis yog lod? (Yog.) Yog li ntawd, cia peb rov qab tig mus rau lo lus nug uas Kuv nyuam qhuav nug ntawd. Kuv nug dab tsi? (Puas yog tej kev hloov ntawm ib cheeb tsam no los sis yog Vajtswv cov lus cuam tshuam rau tib neeg es ua rau muaj tej kev xav tsis zoo rau lawv?) Yog li ntawd, qhov laj thawj yog dab tsi? Lo lus teb yog dab tsi? (Yog vim tias tib neeg tsis caum qhov tseeb.) Qhov ko yog lawm, tsis yog ib qho ntawm tej ntawd li, tab sis yog vim tib neeg tsis caum qhov tseeb xwb. Thaum tib neeg tsis caum qhov tseeb, ces lawv thiaj li pheej daig rau hauv tej kev xav hauv lub hlwb uas phem heev thiab tej kev xav tsis zoo ces thiaj li tsis muaj peev xwm tso tau lawv tus kheej dim. Rov qab hais lo lus nug uas Kuv nyuam qhuav nug seb. (Qhov laj thawj uas tib neeg muaj tej kev xav tsis zoo ntawd puas yog vim lawv qhov cheeb tsam ib puag ncig thiab cov tib neeg, tej xwm txheej, thiab txhua yam uas nyob puag ncig lawv, los sis yog vim qhov tseeb uas Vajtswv nthuav tawm ntawd cuam tshuam tib neeg?) Muab hais kom yooj yim, qhov ntawd puas yog vim tej kev hloov ntawm cheeb tsam ib puag ncig los sis yog vim Vajtswv cov lus cuam tshuam tib neeg? Yog qhov twg? (Tsis yog ib yam ntawm tej ntawd li.) Yog lawm, tsis yog ib yam ntawm tej ntawd li. Tej xwm txheej ntawd yeej hloov txhua tus ib yam nkaus; yog koj caum qhov tseeb, ces koj yeej yuav tsis poob mus rau ib txoj kev xav tsis zoo vim qee qhov xwm txheej xwb. Txawm li cas los xij, yog koj tsis caum qhov tseeb, ces koj cia li yuav sab heev zaum tag los zaum thiab uas ua rau koj los daig rau hauv tej kev xav tsis zoo ntawm txoj kev nyuaj siab, kev ntxhov siab, thiab kev txhawj xeeb. Saib los ntawm qhov kev xam no los, txoj kev caum qhov tseeb tsis tseem ceeb lod? (Tseem ceeb.) Nrhiav txhua yam uas tshwm sim nyob rau hauv qhov tseeb tej hauv paus ntsiab lus. Txawm li cas los xij, qhov tiag tiag ces, vim tib neeg tsis caum qhov tseeb thiab tsis nrhiav qhov tseeb tej hauv paus ntsiab lus, los sis yog tsis li ntawd ces lawv yeej paub meej tias Vajtswv cheem tsum dab tsi, qhov tseeb tej hauv puas ntsiab lus yog dab tsi, lawv tsim nyog xyaum taug txoj kev twg, thiab tus qauv rau txoj kev xyaum ntawd yog dab tsi, tab sis lawv tsis quav ntsej txog tej ntawd los sis tsis ua raws li tej ntawd, thaum lawv tus kheej pheej xaiv thiab npaj, yuav muaj dab tsi tshwm sim rau lawv nyob rau thaum kawg? Thaum tib neeg tsis xyaum ua raws li Vajtswv cov lus, es pheej txhawj xeeb txog qhov no thiab qhov tod xwb, ces tsis yog muaj ib qho tshwm sim xwb, thiab qhov ntawd yog qhov hais tias lawv daig rau hauv txoj kev nyuaj siab, kev ntxhov siab, thiab kev txhawj xeeb, ces tawm tsis tau rov qab los dua lawm. Qhov tib neeg pheej vam khom rau lawv tus kheej tej kev xav hauv nruab siab, kom txhua yam mus raws li lawv xav tas li, kom ua rau lwm tus tib neeg zoo siab thiab tau txais Vajtswv txoj kev pom zoo ntawd puas mus taus? Qhov ntawd mus tsis taus! Lawv pheej xav daws txhua yam raws ib txoj kev uas ua kom txhua tus nyob ib puag ncig lawv ntawd zoo siab, txaus siab, thiab qhuas lawv nkaus xwb. Lawv xav kom muab lawv hu ua ib tug tib neeg zoo, es kom Vajtswv txaus siab, thiab yog lawv ua tsis tau raws li tus qauv no, ces lawv nyuaj siab. Thiab lawv tsis tsim nyog nyuaj siab lod? (Tsim nyog lawm.) Qhov no yog qhov uas tib neeg xaiv rau lawv tus kheej.

Kuj muaj ib txhia tib neeg ruam uas hais tias, “Yog Vajtswv tsis hais lus ntau mas, kuv yuav ua ntau yam kom raws li tej qauv zoo ntawm qhov ua ib tug tib neeg zoo. Qhov ntawd mas yooj yim heev, thiab yuav tsis muaj ntau zaj lus hais. Zoo ib yam li Tiam Hmoov Hlub, tib neeg ua raws li tej kev cai, thiab lawv uv thiab ua siab ntev, thiab kwv tus ntoo khaub lig thiab raug kev txom nyem, qhov ntawd yooj yooj yim xwb. Qhov ntawd tsis yog xaus li ntawd xwb lod? Tam sim no, vim Vajtswv hais ntau qhov tseeb thiab ntau lub hauv paus ntsiab lus txog qhov xyaum ua uas twb muab qhia nyob rau hauv txoj kev sib qhia lawm, vim li cas twb ntev heev lawm los tib neeg tseem ua tsis tau tej ntawd tiav li thiab? Tib neeg tsis muaj peev xwm kiag li, thiab lawv tsis muaj peev xwm to taub tej ntawd kom tag, thiab muaj ntau qhov tseeb uas lawv ua tsis tau kom tiav; kuj muaj ntau qhov kev nyuaj nyob rau hauv qhov tib neeg muab qhov tseeb coj los xyaum ua thiab, thiab txawm yog lawv to taub los, tseem nyuaj rau lawv ua kom tiav. Yog koj to taub qhov tseeb tab sis tsis xyaum ua raws li qhov tseeb, ces koj tsis kaj siab, tab sis thaum koj xyaum ua raws li qhov tseeb ntawd, los tseem muaj ntau qhov kev nyuaj tiag thiab.” Tib neeg ntseeg tias Vajtswv cov lus mas cuam tshuam lawv, tab sis qhov tseeb tiag puas yog li ntawd? (Tsis yog.) Qhov no yog hu ua tsis muaj laj thawj thiab tsis muaj qab hau. Lawv dhuav qhov tseeb thiab tsis caum qhov tseeb, thiab lawv tsis xyaum ua raws li qhov tseeb, tab sis lawv tseem xav ua txuj tias muaj kev ntseeg, ua txuj tias xyaum ua raws li qhov tseeb, thiab lawv xav kom tau txais kev cawm dim. Thaum kawg, thaum ua tsis tau tej no tiav, lawv thiaj li tsis kaj siab thiab nyuaj siab, thiaj li xav hais tias, “Leej twg thiaj li ua tau tag nrho tej no kom sib luag? Nws yuav zoo dua yog Vajtswv txo Nws tej qauv kom qis me ntsis, ces tib neeg yuav tsis muaj teeb meem, Vajtswv yuav tsis muaj teeb meem, txhua tus yuav tsis muaj teeb meem—qhov ntawd yuav yog ib lub neej uas zoo heev li!” Cov tib neeg zoo li no mas yeej pheej xav hais tias cov lus uas Vajtswv hais ntawd mas mob tib neeg. Tseeb tiag, thaum lawv muaj tej kev xav hauv siab txog kev nyuaj siab, kev ntxhov siab, thiab kev txhawj xeeb mas, Vajtswv tsis txaus siab rau lawv txog ntau yam. Tshwj xeeb mas, thaum hais txog qhov lawv los nrhiav qhov tseeb tej hauv paus ntsiab lus ntawd, lawv nrhiav tsis tau tej ntawd los sis tsis tau txais tej ntawd, lawv tham tsis tau txog tej ntawd kiag li, ces raws li lwm tus tib neeg pom mas qhov no muaj ib qho kev cuam tshuam loj rau lawv lub koob lub npe thiab lub meej mom, thiab lawv txoj kev ntshaw kom tau koob hmoov, ces thiaj li ua rau lawv daig rau hauv txoj kev nyuaj siab, kev ntxhov siab, thiab kev txhawj xeeb, thiab vim li ntawd lawv thiaj li ntseeg hais tias muaj ntau yam uas Vajtswv ua mas lawv tsis zoo siab rau. Haj tseem muaj ib txhia hais tias, “Vajtswv yeej ncaj ncees, kuv lees paub qhov ntawd; Vajtswv yeej dawb huv, thiab kuv los yeej lees paub qhov ntawd thiab. Txhua yam uas Vajtswv hais mas yeej yog qhov tseeb xwb, nws tsuas yog ib qho txaj muag hais tias yam Vajtswv hais tam sim no mas siab dhau lawm, Nws tej kev cheem tsum ntawm tib neeg mas nruj dhau lawm, ces qhov ntawd thiaj li tsis yooj yim rau tib neeg ua tau kiag li!” Lawv tsis nyiam qhov tseeb, thiab lawv muab txhua lub luag hauj lwm tso rau Vajtswv xwb. Lawv pib los ntawm zaj lus uas hais tias Vajtswv yeej ncaj ncees, thiab Vajtswv yeej dawb huv, thiab lawv ntseeg hais tias qhov no yeej muaj tseeb tag nrho li. Vajtswv yeej ncaj ncees, Vajtswv yeej dawb huv—qhov ntawd puas tim tsum rau koj los lees paub tias muaj Vajtswv? Tej no yog qhov muaj tiag; tej no tsis yog muaj tseeb vim koj lees paub tej no xwb. Yuav kom tib neeg txhob raug teem txim vim qhov lawv liam Vajtswv, ces lawv thiaj li maj nroos hais tias Vajtswv yeej ncaj ncees, Vajtswv yeej dawb huv xwb. Txawm li cas los xij, txawm lawv yuav hais li cas txog qhov Vajtswv ncaj ncees thiab dawb huv los xij, lawv yeej tseem muaj tej kev xav tsis zoo ntawm txoj kev nyuaj siab, ntxhov siab, thiab txhawj xeeb thiab, tsis yog tsuas muaj tej kev xav tsis zoo no xwb, tab sis lawv tsis kam muab tej kev xav tsis zoo no tso tseg, tsis kam muab tej kev xav tsis zoo no tso tuaj tom qab, tsis kam hloov lawv tej hauv paus ntsiab lus ntawm txoj kev xyaum ua, hloov txoj xub ke ntawm lawv txoj kev caum, thiab hloov txoj kev uas lawv ua raws hauv lub neej. Cov tib neeg zoo li no mas ntxim hlub thiab ntxim ntxub tib si. Lawv tsis tsim nyog tau txoj kev hlub tshua, thiab txawm lawv raug kev txom nyem npaum li cas los xij, lawv yeej tsis tsim nyog tau peb txoj kev hlub tshua li. Yam uas peb yuav tsum tau ua ces yog qhia ob peb lo lus no rau lawv xwb hais tias: Qhov ntawd yeej tsim nyog rau nej lawm! Yog nej tuag los ntawm qhov nyuaj siab dhau lawm xwb, ces yeej tseem tsis muaj leeg twg hlub tshua txog nej! Leej twg tsis ua kom koj nrhiav qhov tseeb los daws koj tej teeb meem? Leej twg ua kom koj tsis muaj peev xwm los zwm rau Vajtswv thiab xyaum ua raws li qhov tseeb? Vim leej twg es koj thiaj li nyuaj siab, ntxhov siab, thiab txhawj xeeb? Puas yog koj muaj tej ntawd kom tau txais qhov tseeb xwb? Los sis kom caum cuag Vajtswv xwb? Los sis vim Vajtswv tes hauj lwm? Los sis vim Vajtswv lub koob meej? (Tsis yog.) Yog li ntawd no koj muaj tej kev xav no ua tus dab tsi? Txhua yam yog rau koj tus kheej, rau koj cov me nyuam, rau koj tsev neeg, rau txoj kev hwm koj tus kheej, rau koj lub koob lub npe, rau koj lub neej yav tom ntej thiab tej kev vam, rau txhua yam uas koj ua los ntawm koj tus kheej xwb. Ib tug tib neeg zoo li no yeej tsis tso ib yam dab tsi pov tseg li, los sis tso ib yam dab tsi mus li, los sis tso ib yam dab tsi tseg li, los sis muab ib yam dab tsi tso pov tseg li; lawv tsis muaj txoj kev ntseeg Vajtswv tseeb, thiab tsis muaj ib txoj kev ua siab ncaj tiag los ua lawv tes dej num. Nyob rau ntawm lawv txoj kev ntseeg Vajtswv ntawd, lawv tsis muab lawv tus kheej fij tiag tiag, lawv tsuas ntseeg kom tau koob hmoov xwb, thiab tsuas ntseeg Vajtswv vim muaj ib qho kev ntseeg tias yuav tau txais koob hmoov xwb. Lawv muaj “kev ntseeg” Vajtswv, ntseeg Vajtswv tes hauj lwm, thiab ntseeg Vajtswv tej lus cog tseg, tab sis Vajtswv tsis qhuas txoj kev ntseeg zoo li ntawd, thiab Nws tsis nco ntsoov txog txoj kev ntseeg ntawd, tab sis Nws ntxub txoj kev ntseeg ntawd xwb. Cov tib neeg zoo li no mas tsis ua raws los sis tsis xyaum ua raws li tej hauv paus ntsiab lus rau txoj kev daws teeb meem uas Vajtswv cheem tsum ntawm lawv, lawv tsis tso tej uas lawv tsim nyog tso tseg ntawd mus, lawv tsis tso tseg tej uas lawv tsim nyog tso tseg, lawv tsis muab tej uas lawv tsim nyog muab tso pov tseg ntawd tso pov tseg, thiab lawv tsis muaj lub siab ncaj ncees uas lawv tsim nyog muaj, ces yog li ntawd lawv thiaj li tsim nyog poob mus rau hauv tej kev xav tsis zoo ntawm txoj kev nyuaj siab, ntxhov siab, thiab txhawj xeeb. Txawm lawv yuav txom nyem npaum li cas los xij, lawv tsuas txom nyem rau lawv tus kheej xwb, tsis yog rau lawv tes dej num thiab tsis yog rau pawg ntseeg tes hauj lwm. Yog li ntawd, cov tib neeg zoo li no thiaj li tsis yog nyob rau hauv txoj kev caum qhov tseeb—lawv tsuas yog cov niag tib neeg uas lam ntseeg Vajtswv ntawm lub npe xwb. Lawv yeej paub kiag hais tias qhov no yog txoj hau kev tseeb, tab sis lawv tsis xyaum ua raws li ntawd. Lawv txoj kev ntseeg mas ntxim hlub tshua thiab yeej yuav tsis tau txais Vajtswv txoj kev pom zoo li, thiab Vajtswv yeej yuav tsis nco ntsoov txog txoj kev ntseeg ntawd. Cov tib neeg zoo li no daig rau hauv tej kev xav tsis zoo ntawm txoj kev nyuaj siab, kev ntxhov siab, thiab kev txhawj xeeb vim muaj tej kev nyuaj ntau heev nyob rau hauv lawv lub neej hauv tsev.

Ces tseem muaj cov uas tsis noj qab nyob zoo thiab, cov uas muaj ib txoj kev tswj tsis khov thiab tsis muaj zog, cov uas nquag mob vim muaj tus mob loj los sis me, cov uas twb ua tsis tau tej yam yooj yooj yim uas cheem tsum rau hauv lub neej txhua hnub lawm, cov uas nyob tsis tau los sis mus los tsis zoo li cov tib neeg dog dig lawm. Cov tib neeg zoo li no mas nquag xeeb txhob thiab tsis xis nyob rau thaum tab tom ua lawv tej dej num; ib txhia mas lub cev tsis muaj zog, ib txhia mas muaj tus mob tiag tiag, thiab tseeb tiag muaj ib txhia yeej paub thiab yeej muaj kab mob qee hom los sis lwm yam. Vim lawv muaj tej kev nyuaj ntawm lub cev zoo li no, ces cov tib neeg zoo li no thiaj li nquag poob mus rau hauv tej kev xav tsis zoo thiab muaj kev nyuaj siab, kev ntxhov siab, thiab kev txhawj xeeb. Lawv nyuaj siab, ntxhov siab, thiab txhawj xeeb txog dab tsi? Lawv txhawj xeeb tias yog lawv pheej ua lawv tes dej num zoo li no, muab lawv tus kheej fij thiab khwv heev rau Vajtswv zoo li no, thiab pheej sab li no, ces lawv txoj kev noj qab nyob zoo puas yuav phem zuj zus ntxiv xwb? Thaum lawv muaj 40 los sis 50 xyoo, lawv puas yuav da luj luam rau saum lawv lub txaj xwb? Tej kev txhawj xeeb no puas muaj qab hau? Puas yuav muaj leej twg muab tau ib txoj kev ruaj khov los daws qhov no? Leej twg yuav ris lub luag hauj lwm no? Leej twg thiaj li yuav teb tau? Cov tib neeg uas tsis noj qab nyob zoo thiab cov uas tsis tsim nyog ntawm sab cev nqaij daim tawv thiaj li nyuaj siab, ntxhov siab, thiab txhawj xeeb txog tej zoo li no xwb. Cov tib neeg uas muaj mob yuav nquag xav hais tias, “Au, kuv twb txiav txim siab los ua kuv tes dej num kom zoo lawm, tab sis kuv muaj tus mob no. Kuv thov kom Vajtswv tsom kwm kuv kom txhob raug puas tsuaj, ces vim Vajtswv txoj kev tiv thaiv kuv thiaj li tsis tas ntshai. Tab sis yog kuv sab thaum tab tom ua kuv tej dej num ntawd, kuv qhov xwm txheej puas yuav haj yam phom sij tuaj? Kuv yuav ua li cas yog kuv qhov xwm txheej haj yam phem tuaj lawm tiag tiag? Yog kuv yuav tsum tau mus pw tim tsev kho mob mus phais, ces kuv tsis muaj nyiaj them, yog li ntawd yog kuv tsis txais nyiaj los them txoj kev kho kuv ntawd, kuv qhov xwm txheej puas yuav haj yam phem tuaj? Thiab yog qhov xwm txheej ntawd phem heev no, kuv puas yog tuag? Txoj kev tuag zoo li no puas muab suav tau tias yog ib txoj kev tuag li ib txwm muaj? Yog kuv tuag tiag tiag no, Vajtswv puas yuav nco ntsoov tej dej num uas kuv tau ua lawm? Puas yog suav tias kuv tau ua hauj lwm zoo lawm no mas? Kuv puas yuav tau txais kev cawm dim? Kuj muaj ib txhia uas paub tias lawv mob thiab, qhov ntawd yog, lawv paub tias lawv muaj mob tiag tiag los sis lwm yam, piv txwv li muaj kab mob hauv lub plab, mob nrab qaum thiab mob ceg, mob yas tes yas taw, mob pob txha, thiab kab mob ntawm daim tawv nqaij, kab mob ntawm tsev me nyuam, kab mob ntawm lub tsib, ntshav siab, kab mob hauv lub plawv, thiab ntau yam ntxiv. Lawv xav hais tias, “Yog kuv pheej ua kuv tes dej num mus, Vajtswv lub tsev puas yuav them txoj kev kho kuv tus mob? Yog kuv tus mob ntawd mob heev tuaj thiab cuam tsuam txoj kev ua kuv tes dej num no, Vajtswv puas yuav kho kom kuv zoo? Twb kho lwm tus tib neeg zoo tom qab los ntseeg Vajtswv lawm, yog li ntawd puas yuav kho kom kuv zoo thiab? Vajtswv puas yuav kho kom kuv zoo, ib yam li Nws ua siab zoo rau lwm tus thiab? Yog kuv ua siab ncaj ncees ua kuv tes dej num, ces Vajtswv yuav tsum kho kom kuv zoo, tab sis yog kuv tsuas xav kom Vajtswv kho kom kuv zoo xwb es Nws tsis kho, ces kuv yuav ua li cas?” Thaum twg lawv xav txog tej no mas, lawv muaj ib qho kev xav hauv siab tob tob txog kev ntxhov siab uas muaj nyob rau hauv lawv lub siab. Txawm tias lawv yeej tsis tso txoj kev ua lawv tes dej num tseg thiab lawv yeej ua yam uas lawv yuav tsum tau ua los, lawv pheej xav txog lawv tus mob, lawv txoj kev noj qab nyob zoo, lawv lub neej yav tom ntej, thiab txog lawv txoj sia thiab txoj kev tuag tas li. Thaum kawg, lawv thiaj li mus txog qhov xav hais tias, “Vajtswv yuav kho kom kuv zoo, Vajtswv yuav tsom kwm kom kuv nyab xeeb. Vajtswv yuav tsis tso kuv tseg, thiab Vajtswv yuav tsis sawv ntawm ib sab es tsis ua dab tsi li yog Nws pom tias kuv muaj mob.” Tsis muaj hauv paus rau tej kev xav hauv lub hlwb uas zoo li no kiag li, thiab tej kev xav hauv lub hlwb no yeej muab hais tau hais tias yog ib hom ntawm txoj kev xav phem. Tib neeg yeej yuav tsis muaj peev xwm daws tau lawv tej kev nyuaj tiag tiag los ntawm tej kev xav phem thiab tej kev xav hauv nruab siab uas zoo li tej no li, thiab nyob rau hauv lawv nruab siab mas, lawv nyuaj siab, ntxhov siab, thiab txhawj xeeb txog lawv txoj kev noj qab nyob zoo thiab lawv tus mob uas pom tsis meej; lawv tsis paub tias leej twg yuav ris tej no, los sis puas yuav muaj leej twg ris tej no kiag li.

Kuj muaj ib txhia uas, txawm lawv tsis mob tiag tiag thiab tsis tau muaj ib yam dab tsi los, paub tias lawv muaj qee yam kab mob uas tseem tsis tau ua kom muaj mob. Yam kab mob uas tsis tau ua kom muaj mob ntawd yog dab tsi? Piv txwv li, tej zaum yog ib yam kab mob kis los xws li kab mob plawv, ntshav qab zib, los sis ntshav siab, los sis tej zaum yog tus kab mob saum lub hlwb, tus kab mob saum hlwb uas ua kom tswj tsis tau tus kheej los sis qee hom khees xaws—tag nrho tej no puav leej yog cov kab mob uas tseem tsis tau ua kom muaj mob. Ib txhia tib neeg paub tias vim lawv yug los rau hauv ib tsev neeg zoo li no lawm, ces tus kab mob kis no yuav raug lawv tsis ntev no. Lawv thiaj li xav paub tias, yog lawv ntseeg Vajtswv thiab caum qhov tseeb, ua lawv tes dej num zoo, ua hauj lwm zoo, thiab ua tau kom Vajtswv zoo siab no, yam kab mob uas tseem tsis tau ua kom muaj mob no puas yuav zam lawv es tsis los raug lawv? Txawm li cas los xij, Vajtswv yeej tsis tau cog ib qho lus zoo li ntawd rau lawv, thiab lawv yeej tsis tau muaj hom kev ntseeg Vajtswv no, thiab yeej tsis muaj cuab kav hais kom tseeb tseeb los sis muaj tej tswv yim tsis tseeb no. Vim lawv hais tsis tau kom tseeb tseeb los sis kom meej meej, ces lawv thiaj li siv dag zog ntau thiab siv zog ua lawv tej dej num, lawv rau siab ntso rau txoj kev txom nyem thiab tiv kev txom nyem, thiab lawv yeej yuav ua kom ntau tshaj lwm tus thiab kom nrov tshaj lwm tus, es thiaj li xav hais tias, “Kuv yuav yog thawj tug xub raug kev txom nyem thiab tus kawg uas muaj kev xyiv fab.” Lawv pheej txhawb lawv tus kheej raws li hom lus no, tab sis qhov ntshai thiab txhawj xeeb uas nyob tob tob hauv lawv lub siab uas hais txog lawv yam kab mob uas tseem tsis tau ua kom mob ntawd yeej muab tshem tsis tau li, thiab txoj kev txhawj xeeb thiab kev nyuaj siab no yeej nrog lawv nyob tas li. Tab txawm tej zaum lawv yuav nyiaj taus kev txom nyem thiab rau siab ua hauj lwm thiab txaus siab hlo tiv kev txom nyem los ua lawv tej dej num los xij, lawv tseem xav hais tias lawv tsis muaj peev xwm los txais Vajtswv lo lus cog tseg los sis ib lo lus tseeb los ntawm Vajtswv los uas hais txog lub ncauj lus ntawd, ces yog li ntawd lawv thiaj muaj kev nyuaj siab, kev ntxhov siab, thiab kev txhawj xeeb hais txog qhov xwm txheej no txuas ntxiv. Tab txawm lawv tsis ua ib yam dab tsi los kho lawv yam kab mob uas tseem tsis tau ua kom muaj mob ntawd los xij, muaj qee lub sij hawm lawv tseem cia li mus nrhiav txhua hom tshuaj ntsuab los tiv thaiv kom yam kab mob uas tseem tsis tau ua kom muaj mob ntawd txhob cia li los raug rau lawv rau qee hnub, nyob rau ib teev twg, los sis yam lawv tsis paub txog. Tej zaum muaj ib txhia tib neeg tseem npaj muab Suav ib co tshuaj ntsuab coj los noj ib lub sij hawj mus rau ib lub sij hawm thiab, qee lub sij hawm mas muaj ib txhia tib neeg mus nug txog cov tshuaj ntsuab uas twb npaj tau lawm los rau lawv noj thaum yuav tsum tau noj, hos muaj ib txhia tib neeg mus os lais mus tshawj nrhiav tej tswv yim ua ev xaws xais kom lawv thiaj li ua tau ev xaws xais pab thiab xyaum ua raws. Txawm tej zaum tsuas yog ib yam kab mob uas tseem tsis tau ua kom muaj mob xwb los xij, qhov ntawd yeej tseem yog qhov tseem ceeb tshaj nyob rau hauv lawv lub siab; txawm tej zaum cov tib neeg no yuav tsis hnov tias tsis noj qab nyob zoo los sis tsis muaj ib qho mob kiag li los xij, lawv yeej tseem txhawj xeeb thiab ntxhov siab txog qhov ntawd, thiab nyob tob tob hauv lawv nruab siab mas lawv nyuaj siab thiab tsis kaj siab txog qhov ntawd li, pheej cia siab xav ua kom zoo los sis muab tej kev xav tsis zoo no ntiab tawm hauv lawv lub siab los ntawm txoj kev thov Vajtswv los sis txoj kev ua lawv tej dej num. Cov tib neeg uas muaj ib tug mob tiag tiag los sis cov uas muaj ib yam kab mob uas tseem tsis tau ua kom muaj mob no, nrog rau cov uas txhawj xeeb txog tsam muaj mob nyob rau yav tom ntej, thiab cov uas yug los es tsis noj qab nyob zoo, cov uas tsis muaj mob loj tab sis pheej txom nyem vim tej kev mob nkeeg me ntawd, lawv yeej nquag nquag nyuaj siab thiab txhawj xeeb txog tej kev mob nkeeg thiab ntau yam kev nyuaj ntawm lub cev nqaij daim tawv. Lawv xav khiav tej mob ntawd, khiav kom dim tej mob ntawd, tab sis lawv tsis muaj txoj hau kev ua tau li ntawd; lawv xav muab tej mob ntawd tso tseg tab sis lawv ua tsis tau; lawv xav thov kom Vajtswv muab tej kev mob nkeeg thiab tej kev nyuaj no tshem tawm ntawm lawv mus, tab sis lawv hais tsis tau cov lus ntawd thiaj li txaj muag, vim lawv xav hais tias tsis muaj kev ncaj ncees rau hom kev thov zoo li no. Lawv paub zoo hais tias tsis tsim nyog thov Vajtswv hais txog tej xwm txheej no, tab sis nyob hauv lawv lub siab lawv tsis muaj zog; lawv thiaj li xav paub hais tias, yog lawv muab tag nrho lawv tej kev cia siab tso rau Vajtswv no, lawv puas yuav kaj siab dua, thiab puas yuav nplig tau lawv lub siab txawj xav? Yog li ntawd, ib lub sij hawm mus rau ib lub sij hawm lawv thiaj li thov Vajtswv ntsiag to txog qhov xwm txheej no nyob rau hauv lawv nruab siab. Yog lawv tau txais qee yam zoo ntxiv los sis qee yam zoo yam tsis tau xav txog los sis hmoov hlub los ntawm Vajtswv los mas, lawv xyiv fab los sis zoo siab me ntsis; yog lawv tsis tau txais txoj kev saib xyuas tshwj xeeb los ntawm Vajtswv lub tsev los kiag li, thiab tsis hnov muaj txoj kev zoo los ntawm Vajtswv los kiag li, ces lawv rov qab txav nqis mus rau hauv tej kev xav tsis zoo ntawm txoj kev nyuaj siab, kev ntxhov siab, thiab txhawj xeeb dua lawm thiab. Tab txawm yug los, laus, kev mob nkeeg thiab kev tuag yeej muaj nrog tib neeg ntiaj teb nyob thiab yeej zam tsis dhau hauv lub neej lawm los xij, muaj cov uas muaj ib txoj kev tswj lub cev los sis muaj mob tshwj xeeb uas, txawm lawv ua lawv tej dej num los sis tsis ua los xij, poob mus rau hauv txoj kev nyuaj siab, ntxhov siab, thiab txhawj xeeb txog tej kev nyuaj thiab tej kab mob ntawm lub cev nqaij daim tawv; lawv txhawj xeeb txog lawv tus mob, lawv txhawj xeeb txog ntau yam kev nyuaj siab uas lawv tus mob yuav ua rau lawv mob, seb lawv tus mob puas yuav loj tuaj, qhov tshwm sim yuav zoo li cas yog tus mob ntawd loj tuaj, thiab seb lawv puas yuav tuag los ntawm tus mob ntawd. Nyob rau tej xwm txheej uas tshwj xeeb thiab qee lub ntsiab mas, ntau hom lus nug no ua rau lawv daig rau hauv txoj kev nyuaj siab, ntxhov siab, thiab txhawj xeeb thiab tsis muaj peev xwm tso kom lawv tus kheej dim; ib txhia tib neeg mas haj tseem muaj ib tug yam ntxwv uas nyuaj siab, ntxhov siab, thiab txhawj xeeb vim ntawm tus kab mob loj uas lawv twb paub tias lawv muaj los sis ib yam kab mob uas tseem tsis tau ua kom muaj mob uas lawv ua tsis tau dab tsi kom zam dhau li lawm, ces lawv thiaj li raug tej kev xav tsis zoo hloov, cuam tshuam, thiab tswj lawm. Thaum lawv poob mus rau hauv qab kev tswj hwm ntawm tej kev xav tsis zoo no lawm, ces ib txhia tib neeg yuav tso txhua lub hwv tsam thiab kev cia siab ntawm qhov tau txais kev cawm dim tseg tag nrho; lawv xaiv los muab txoj kev ua lawv tes dej num thiab txhua lub hwm tsam ntawm qhov tau txais Vajtswv txoj kev zoo tso tseg. Tiam sis, lawv ho xaiv los fim thiab kho lawv tus kheej tus mob yam tsis thov leej twg txoj kev pab thiab yam tsis tos ib lub cib fim twg li. Lawv tus kheej mob siab los kho lawv tus mob, lawv tsis ua dej num ntxiv li lawm, thiab txawm yog lawv lub cev yeej muaj peev xwm ua lawv tes dej num los xij, lawv tseem tsis ua tes dej num ntawd li thiab. Qhov laj thawj rau qhov no yog dab tsi? Lawv txhawj xeeb tias, “Yog kuv tus mob pheej zoo li no es Vajtswv tsis kho kom kuv zoo los, kuv yeej tuaj yeem ua kuv tes dej num li kuv tab tom ua tam sim no thiab yeej tseem yuav tuag rau thaum kawg. Yog kuv tsum tsis ua kuv tes dej num es nrhiav kev kho, kuv tuaj yeem ua neej nyob tau ob peb xyoos ntxiv, thiab tej zaum tus mob ntawd haj tseem yuav zoo thiab. Yog kuv ua kuv tes dej num ntxiv mus thiab Vajtswv tsis tau hais tias Nws yuav kho kom kuv zoo, tej zaum kuv txoj kev noj qab nyob zoo haj tseem yuav phem tshaj. Kuv tsis xav ua kuv tes dej num mus li 10 los sis 20 xyoo es tom qab ntawd tuag mus xwb. Kuv xav nyob ob peb xyoos ntxiv, kuv tsis xav tuag sai heev, ntxov heev!” Yog li ntawd, lawv ua lawv tes dej num hauv Vajtswv lub tsev tau ib ntus, tshuaj xyuas tau ib ntus thiab, peb yeej hais tau tias, lawv saib seb muaj dab tsi tshwm sim tau ib ntus, ces lawv txawm pib xav paub hais tias, “Kuv twb ua kuv tes dej num lawm, tab sis kuv tus mob tsis tau zoo thiab tsis tau khees li. Cuag nkaus li tsis muaj kev cia siab txog qhov zoo li. Thaum ntawd kuv muaj ib qho kev npaj, xav hais tias yog kuv muab txhua yam tso tseg thiab ua siab ncaj ncees ua kuv tes dej num, ces tej zaum Vajtswv yuav tshem tus kab mob no tawm ntawm kuv mus. Tab sis tsis muaj dab tsi mus raws li qhov kuv npaj, xav, thiab xav tau li. Kuv tus mob tsuas zoo ib yam li yav tas los xwb. Npaum li no lub xyoo twb dhau mus lawm, los tus kab mob no tseem tsis tau zoo ib qho li thiab. Cuag nkaus li kuv tus kheej kho tus mob no xwb. Kuv vam kho tsis tau rau leej twg li, tsis muaj leej twg es yuav vam khom tau li. Kuv yuav tsum tau tsuj kuv txoj hmoo rau hauv kuv tus kheej ob txhais tes. Tam sim no kev tshawb fawb thiab thev nos los ntsis twb zoo heev lawm, tshuaj los ib yam thiab, yeej muaj cov tshuaj zoo los kho txhua hom kab mob, thiab yeej muaj tej kev kho uas zoo rau txhua yam lawm. Kuv ruaj siab tias yeej kho tau tus kab mob no xwb.” Thaum muaj tej kev npaj zoo li no lawm, lawv txawm pib mus tshawb os lais los sis nug tib neeg thiab nug tej ntaub ntawv, mus txog ntua thaum kawg uas lawv nrhiav tau qee cov lus teb lawm. Thaum kawg, lawv thiaj li txiav txim siab seb yuav noj yam tshuaj dab tsi, yuav kho lawv tus mob li cas, yuav ua ev xaws xaij li cas, thiab yuav saib xyuas lawv tus kheej txoj kev noj qab nyob zoo li cas. Lawv xav hais tias, “Yog kuv tsis ua kuv tes dej num thiab rau siab kho tus kab mob no, ces yeej muaj kev cia siab txog qhov kho kom zoo. Muaj ntaus tus qauv hais txog qhov kho hom kab mob no zoo lawm.” Tom qab npaj thiab tshawb li no los tau ib ntus lawm, thaum kawg lawv thiaj li txiav txim siab tsis ua lawv tes dej num ntxiv lawm ces qhov kho lawv tus mob ntawd thiaj li rais los ua qhov tseem ceeb tshaj rau lawv lawm xwb—tsis muaj dab tsi tseem ceeb rau lawv tshaj li qhov ua neej nyob. Lawv txoj kev nyuaj siab, kev ntxhov siab, thiab kev txhawj xeeb thiaj li tig los ua ib hom kev ua uas tseem ceeb lawm; lawv txoj kev ntxhov siab thiab kev txhawj xeeb tig ntawm qhov lam xav los ua ib hom kev ua lawm. Cov tsis ntseeg muaj ib lo lus hais uas hais tias: “Txoj kev ua mas zoo dua li txoj kev xav hauv lub hlwb, thiab qhov haj yam zoo tshaj li txoj kev ua ntawd mas yog txoj kev ua kiag tam sim ntawd.” Cov tib neeg zoo li no mas xav ces tom qab ntawd ua, thiab lawv ua sai heev. Ib hnub lawv xav txog qhov kho lawv tus kab mob, thiab lwm tag kis mas lawv txawm siv ntim lawv tej khoom thiab npaj txhij tawm mus lawm. Ob peb hli tsis ntej tom qab ntawd, txawm muaj tej xov xwm tsis zoo tuaj txog tias lawv twb tuag vim qhov kho lawv tus mob tsis zoo lawm. Lawv puas rov qab zoo ntawm lawv tus mob los lawm? (Tsis zoo lawm.) Qhov koj tus kheej kho ib tug kab mob kom zoo ntawd mas mus tsis taus, tab sis puas muaj tseeb tias koj yuav tsis muaj mob thaum ua koj tes dej num hauv Vajtswv lub tsev? Tsis muaj leej twg yuav muab ib lo lus cog tseg zoo li no rau koj. Yog li ntawd, koj yuav tsum xaiv li cas, thiab koj yuav tsum daws qhov xwm txheej ntawm qhov mob ntawd li cas? Yooj yim heev, thiab muaj ib txoj kev taug: Caum qhov tseeb. Caum qhov tseeb thiab saib qhov xwm txheej ntawd kom mus raws li Vajtswv cov lus thiab mus raws li qhov tseeb tej hauv paus ntsiab lus—qhov no yog txoj kev to taub uas tib neeg yuav tsum muaj. Thiab koj yuav tsum xyaum ua li cas? Koj muab tag nrho tej kev ntsib kev pom no coj los xyaum ua raws li txoj kev to taub uas koj tau txais thiab qhov tseeb tej hauv paus ntsiab lus uas koj to taub raws li qhov tseeb thiab Vajtswv cov lus, thiab koj muab tej ntawd coj los ua koj qhov muaj tiag thiab koj lub neej txoj sia—qhov no yog ib kis. Kwm kis ces yog qhov hais tias koj yuav tsum txhob tso koj tes dej num tseg. Txawm koj mob los sis mob siab, tsuav yog koj tseem tshuav ib txoj pa xwb, tsuav yog koj tseem ciaj sia nyob xwb, tsuav yog koj tseem hais tau lus thiab mus taus kev xwb, ces koj yeej muaj zog los ua koj tes dej num, thiab koj yuav tsum coj kom zoo nyob rau hauv txoj kev ua koj tes dej num es koj ob txhais ko taws sawv khov kho rau hauv av. Koj yuav tsum txhob tso tes dej num ntawm ib tug uas raug tsim tawm los los sis lub luag hauj lwm uas tus Tswv Tsim muab rau koj ntawd tseg. Tsuav yog koj tseem tsis tau tuag, ces koj yuav tsum ua koj tes dej num kom tiav thiab kom tiav zoo. Ib txhia tib neeg hais tias, “Tej uas Koj hais no mas tsis ua tib zoo xav kiag li. Kuv mob thiab qhov ntawd mas nyuaj rau kuv ris heev!” Thaum qhov ntawd nyuaj rau koj ris, ces koj yeej so tau, thiab koj yeej saib xyuas tau koj tus kheej thiab txais tau txoj kev kho. Yog koj tseem xav ua koj tes dej num, ces koj yeej txais tau koj tej hauj lwm thiab ua ib teg dej dum uas tsim nyog, ib teg uas tsis cuam tshuam rau koj txoj kev zoo rov qab los. Qhov no yuav ua pov thawj qhia hais tias koj tsis tau tso koj tes dej num nyob hauv koj lub siab tseg, hais tias koj lub siab tsis tau txav deb ntawm Vajtswv, hais tias koj tsis tau tsis lees paub Vajtswv lub npe nyob hauv koj lub siab, thiab hais tias koj tsis tau tso txoj kev ntshaw los ua ib tug uas raug tsim tawm los uas tsim nyog nyob hauv koj lub siab tseg. Ib txhia tib neeg hais tias, “Kuv twb ua txhua yam ntawd lawm, yog li ntawd Vajtswv puas yuav tshem tus mob no ntawm kuv mus?” Nws puas yuav tshem? (Tsis tas yuav tshem.) Txawm Vajtswv tshem tus mob ntawd tawm ntawm koj mus los sis tsis tshem, txawm Vajtswv kho kom koj zoo los sis tsis kho los xij, yam uas koj ua ntawd yog yam uas ib tug uas raug tawm los yuav tsum tau ua. Txawm koj lub cev muaj peev xwm ua koj tes dej num los sis tsis muaj, txawm koj ua tau ib teg hauj lwm los sis ua tsis tau, txawm koj txoj kev noj qab nyob zoo ntawd cia koj ua koj tes dej num los sis tsis cia los xij, koj lub siab yuav tsum txhob txav ntawm Vajtswv mus, thiab koj yuav tsum tsis txhob tso koj tes dej num hauv koj lub siab tseg. Ua li no, koj thiaj li yuav ua tau koj tej luag hauj lwm, koj tej uas yuav tsum tau ua, thiab koj tes dej num tiav—qhov no yog txoj kev ua siab ncaj ncees uas koj yuav tsum muaj. Tsuas yog vim koj ua tsis tau ntau yam los ntawm koj ob txhais tes los sis koj tsis muaj peev xwm hais lus ntxiv, los sis koj ob lub qhov muag tsis pom kev lawm, los sis koj txav tsis tau koj lub cev mus los ntxiv lawm los, koj yuav tsum tsis txhob xav hais tias Vajtswv yuav tsum kho kom koj zoo, thiab yog Nws tsis kho kom koj zoo ces koj xav tsis lees paub Nws nyob rau hauv koj nruab siab, tso koj tes dej num tseg, es muab Vajtswv tso tseg tuaj tom qab. Tus yam ntxwv ntawm txoj kev ua zoo li ntawd yog dab tsi? (Qhov ntawd yog ib txoj kev ntxeev siab rau Vajtswv.) Qhov ntawd yog ib txoj kev ntxeev siab! Thaum lawv tsis mob mas, ib txhia tib neeg yuav nquag los rau ntawm Vajtswv lub xub ntiag los thov Vajtswv, thiab thaum lawv mob mas lawv cia siab tias Vajtswv yuav kho kom lawv zoo, muab tag nrho lawv tej kev cia siab tso rau Vajtswv, los lawv yeej tseem yuav los rau ntawm Vajtswv lub xub ntiag thiab tsis tso Nws tseg. Txawm li cas los xij, tom qab qee lub sij hawm dhau mus lawm thiab Vajtswv tseem tsis tau kho kom lawv zoo, lawv thiaj li tu siab rau Vajtswv, nyob hauv lawv nruab siab lawv tso Vajtswv tseg thiab lawv tso lawv tej dej num tseg. Thaum lawv tus mob tsis mob ua luaj twg thiab Vajtswv tsis kho kom lawv zoo los, ib txhia tib neeg tsis tso Vajtswv tseg; txawm li cas los xij, thaum lawv tus mob loj tuaj, lawv ntsib txoj kev tuag, thaum ntawd lawv mam li paub tseeb tias Vajtswv tsis tau kho kom lawv zoo tiag, tias lawv twb tos los txog tav no lawm los tsuas tos txoj kev tuag xwb, ces yog li ntawd lawv thiaj li tso Vajtswv tseg thiab tsis lees paub Vajtswv nyob hauv lawv lub siab. Lawv ntseeg tias yog Vajtswv tsis tau kho kom lawv zoo, ces yuav tsum tsis muaj Vajtswv; tias yog Vajtswv tsis tau kho kom lawv zoo, ces Vajtswv yuav tsum tsis yog Vajtswv kiag li, thiab tsis tsim nyog ntseeg li. Vim Vajtswv tsis tau kho kom lawv zoo, lawv thiaj li khuv xim qhov uas tau ntseeg Vajtswv lawm, thiab lawv tsum tsis ntseeg Nws lawm. Qhov no tsis yog ib txoj kev ntxeev siab rau Vajtswv lod? Qhov no yog ib txoj kev ntxeev siab rau Vajtswv uas loj heev. Yog li ntawd, koj yuav tsum tsis txhob ua li ntawd kiag li—tsuas yog cov uas mloog Vajtswv lus mus kom txog thaum tuag xwb thiaj li muaj txoj kev ntseeg tseeb.

Thaum kev mob kev nkeeg hu lawm, tib neeg tsim nyog taug txoj kev twg? Lawv tsim nyog xaiv li cas? Tib neeg yuav tsum txhob poob mus rau hauv txoj kev nyuaj siab, kev ntxhov siab, thiab kev txhawj xeeb, thiab xav txog lawv tus kheej tej kev vam thiab tej kev mus rau yav tom ntej. Tiam sis, yog tib neeg yim paub tias lawv tus kheej nyob rau cov sij hawm zoo li no thiab nyob rau hauv tej xwm txheej tshwj xeeb thiab cov ntsiab lus zoo li no, thiab lawv yim paub tias lawv tus kheej nyob rau hauv cov kev nyuaj uas ceev zoo li no, ces lawv yim nrhiav qhov tseeb thiab caum qhov tseeb. Tsuas yog ua li no xwb mas tej kev qhuab qhia uas koj tau hnov nyob rau yav tas los thiab qhov tseeb uas koj tau to taub lawm ntawd thiaj li muaj qab hau thiab thiaj li yuav pib ua hauj lwm. Koj yim paub tias koj tus kheej nyob rau hauv tej kev nyuaj zoo li no, ces koj yim yuav tsum tso koj tus kheej tej kev ntshaw tseg tuaj tom qab es ua raws li Vajtswv tej kev coj kev qhia. Vajtswv lub hom phiaj los teeb hom xwm txheej no thiab npaj tej yam ntxwv no rau koj mas tsis yog los ua kom koj poob mus rau hauv tej kev xav txog kev nyuaj siab, kev ntxhov siab, thiab kev txhawj xeeb, thiab tsis yog ua kom koj sim Vajtswv seb Nws puas yuav kho kom koj zoo thaum muaj kev mob kev nkeeg, los sis los nrhiav qhov tseeb ntawm qhov teeb meem ntawd; Vajtswv teeb tej xwm txheej thiab tej yam ntxwv tshwj xeeb no kom koj thiaj li tuaj yeem kawm paub tej xwm txheej thiab tej yam ntxwv zoo li no, kom to taub qhov tseeb tob dua thiab zwm rau Vajtswv, es kom koj paub tias Vajtswv coj qhia txhua tus tib neeg, tej xwm txheej thiab txhua yam li cas kom meej thiab yog. Tib neej txoj hmoo yog nyob rau hauv Vajtswv ob txhais tes thiab, txawm tib neeg paub los sis tsis paub, txawm lawv ras txog qhov ntawd los sis tsis ras txog los xij, lawv yuav tsum mloog lus es tsis txhob tawm tsam, tsis txhob tsis lees, thiab tsis txhob sim Vajtswv kiag li. Txawm yog li cas los koj yeej yuav tuag, thiab yog koj tawm tsam, tsis lees, thiab sim Vajtswv, ces tsis tas hais li yeej paub hais tias koj qhov xaus yuav zoo li cas lawm. Txawv qhov ntawd, yog nyob rau tib co xwm txheej thiab yam ntxwv es koj muaj peev xwm nrhiav tias ib tug uas raug tsim tawm los yuav tsum tau ua raws li tus Tswv Tsim tej kev coj kev qhia li cas, nrhiav seb koj yuav tsum kawm kom paub dab tsi thiab seb koj yuav tsum paub tej moj yam qias vuab tsuab dab tsi nyob rau hauv tej xwm txheej uas Vajtswv coj los rau koj ntawd, thiab to taub Vajtswv lub siab nyiam nyob rau hauv tej xwm txheej zoo li no, thiab hais lus tim khawv kom zoo kom raws li Vajtswv tej kev cheem tsum, ces qhov no yog yam uas koj yuav tsum ua. Thaum Vajtswv npaj kom ib tug twg muaj ib qho kev mob nkeeg lawm, txawm loj los sis me los xij, Nws lub hom phiaj ntawm qhov ua li no tsis yog los ua kom koj paub ntxaws ntxaws txog qhov mob, qhov kev puas tsuaj uas qhov kev mob nkeeg ntawd ua rau koj, tej kev nyuaj siab thiab tej kev nyuaj uas qhov kev mob nkeeg ntawd ua rau koj, thiab txhua qhov kev xav hauv siab txog qhov kev mob nkeeg ua rau koj ntawd—Nws lub hom phiaj tsis yog ua kom koj paub kev mob kev nkeeg los ntawm qhov mob ntawd. Tiam sis, Nws lub hom phiaj yog ua kom koj kawm paub los ntawm kev mob kev nkeeg, kawm kom paub tias yuav xav li cas rau Vajtswv lub siab nyiam, kom paub tej moj yam qias vuab tsuab uas koj nthuav tawm thiab tej cwm pwm tsis yog uas koj coj rau Vajtswv thaum koj mob lawm, thiab kawm kom paub los zwm rau Vajtswv lub hwj chim kav thiab tej kev npaj, kom koj thiaj li muaj txoj kev mloog Vajtswv lus tiag thiab muaj peev xwm tuav koj tej lus tim khawv khov kho—qhov no yog qhov tseem ceeb tshaj plaws. Vajtswv xav cawm koj thiab yaug kom koj dawb huv los ntawm kev mob kev nkeeg. Nws xav yaug dab tsi ntawm koj kom dawb huv? Vajtswv xav yaug tag nrho koj tej kev ntshaw tsis paub ntxaus thiab tej kev cheem tsum rau Vajtswv ntawd kom dawb huv, thiab haj tseem yaug ntau qhov kev npaj, kev txiav txim, thiab tej kev dag ntxias uas koj ua txhua yam kom ciaj sia thiab ua neej nyob mus ntawd kom dawb huv. Vajtswv tsis hais kom koj npaj, Nws tsis hais kom koj txiav txim, thiab Nws tsis cia kom koj muaj tej kev ntshaw tsis paub txaus ntawd rau Nws; Nws tsuas cheem tsum tias kom koj zwm rau Nws thiab, nyob rau ntawm koj txoj kev xyaum ua thiab paub txog txoj kev zwm ntawd, los paub koj tus kheej tus cwj pwm uas coj rau kev mob kev nkeeg, thiab los paub koj tus cwj pwm rau tej yam ntxwv ntawm lub cev uas Nws muab rau koj, nrog rau koj tus kheej tej kev xav tau xwb. Thaum koj paub tej no lawm, ces koj yuav paub tias tej ntawd muaj txiaj ntsim npaum li cas rau koj uas Vajtswv tau npaj tej xwm txheej ntawm qhov kev mob nkeeg ntawd rau koj los sis tias Nws tau muab tej yam ntxwv ntawm lub cev rau koj lawm; thiab koj yuav paub tau tias tej ntawd pab tau rau txoj kev hloov koj tus moj yam, rau koj txoj kev tau txais kev cawm dim, thiab rau koj txoj kev to taub lub neej txoj sia npaum li cas. Vim li ntawd, thaum kev mob nkeeg hu lawm, ces koj yuav tsum tsis txhob pheej xav paub tias koj yuav khiav qhov ntawd los sis khiav kom dim qhov ntawd los sis tsis lees paub qhov ntawd li cas. Ib txhia tib neeg hais tias, “Koj hais tias kuv yuav tsum tsis txhob khiav kom dim qhov ntawd los sis tsis lees qhov ntawd, thiab hais tias kuv yuav tsum tsis txhob sim khiav qhov ntawd, yog li ntawd Koj txhais tias, kuv yuav tsum tsis txhob mus nrhiav kev kho qhov ntawd lod!” Kuv tsis tau hais li ntawd li; qhov ntawd yog koj txoj kev to taub uas tsis yog lawm. Kuv txhawb qhov koj rau siab ntso kho koj qhov kev mob nkeeg, tab sis kuv tsis xav kom koj ua neej nyob nrog koj qhov kev mob nkeeg los sis poob mus rau hauv txoj kev nyuaj siab, kev ntxhov siab, thiab kev txhawj xeeb vim txoj kev cuam tshuam uas koj qhov kev mob nkeeg ua, kom txog ntua thaum kawg es koj txav deb los sis tso Vajtswv tseg vim ntawm txhua qhov kev mob siab uas koj qhov kev mob nkeeg ua. Yog koj qhov kev mob nkeeg ua rau koj txom nyem heev thiab koj xav kom tau txais kev kho es kom koj qhov kev mob nkeeg zoo mus, ces tseeb tiag qhov ntawd yeej tsis ua li cas. Koj muaj cai ua li ntawd; koj muaj cai xaiv kom tau kev kho, thiab tsis muaj leej twg muaj cai cheem koj. Txawm li cas los xij, koj yuav tsum tsis txhob ua neej nrog koj qhov kev mob nkeeg es tsis kam ua koj tes dej num, los sis tso koj tes dej num tseg, los sis tsis lees Vajtswv tej kev coj kev qhia thiab tej kev npaj vim koj tau txais kev kho lawm. Yog kho tsis tau koj qhov kev mob nkeeg kom zoo, ces koj yuav poob mus rau hauv txoj kev nyuaj siab, kev ntxhov siab, thiab kev txhawj xeeb, ces yog li ntawd yuav muaj kev yws thiab kev tsis ntseeg Vajtswv, thiab haj tseem yuav plam txoj kev ntseeg Vajtswv thiab, tsis muaj kev cia siab, thiab ib txhia yuav xaiv los muab lawv tej dej num tso tseg—qhov no yog tej yam uas koj yuav tsum tsis txhob ua kiag li. Thaum muaj keb mob nkeeg lawm, koj yuav tsum rau siab ntso nrhiav kev kho, tab sis koj kuj yuav tsum kho tus mob ntawd los ntawm ib tug cwj pwm uas zoo. Hais txog qhov yuav kho tau koj qhov kev mob nkeeg ntawd npaum li cas thiab seb puas kho tau tus mob kom zoo, thiab txawm yuav muaj dab tsi tshwm sim rau thaum kawg los xij, koj yuav tsum ua raws li ntawd tas li thiab tsis txhob yws. Qhov no yog tus cwj pwm uas koj yuav tsum muaj, vim koj yog tib tug uas raug tsim tawm los xwb thiab koj tsis muaj lwm txoj kev xaiv lawm. Koj hais tsis tau hais tias, “Yog kuv kho tus kab mob no zoo, ces kuv yuav ntseeg hais tias nws yog Vajtwv lub chim loj, tab sis yog kho kuv tsis zoo, ces kuv yuav tsis zoo siab rau Vajtswv. Vim li cas Vajtswv thiaj li muab tus kab mob no rau kuv? Vim li cas Nws ho tsis kho tus kab mob no kom zoo? Vim li cas kuv ho tau tus kab mob no tab sis lwm tus ho tsis tau? Kuv tsis xav tau tus kab mob no! Vim li cas kuv yuav tsum tau tuag ntxov ua luaj thaum hnub nyoog tseem hluas heev? Ua cas lwm tus tib neeg ho tau ua neej nyob mus? Vim li cas?” Tsis txhob nug tias vim li cas, vim nws yog Vajtswv txoj kev coj kev qhia. Tsis muaj laj thawj, thiab koj yuav tsum txhob nug tias vim li cas. Qhov nug tias vim li cas ntawd mas yog txoj kev tham uas ntxeev siab, thiab qhov no tsis yog ib lo lus nug uas ib tug raug tsim tawm los tsim nyog nug. Tsis txhob nug tias vim li cas, vim tsis muaj qhov vim li cas. Vajtswv twb npaj txhua yam thiab npaj txhua yam zoo li no lawm. Yog koj nug tias vim li cas, ces qhov ntawd tsuas hais tau hais tias koj mas ntxeev siab dhau lawm, tawv ncauj dhau lawm xwb. Thaum muaj tej yam koj tsis txaus siab rau, los sis Vajtswv tsis ua li qhov koj xav los sis tsis cia koj ua raws koj siab, ces koj tsis zoo siab, koj xeeb txhob, thiab pheej nug tias vim li cas. Yog li ntawd, Vajtswv thiaj li nug koj hais tias, “Tam li yog ib tug raug tsim tawm los, vim li cas koj tsis ua koj tes dej num kom zoo? Vim li cas koj tsis ua siab ncaj ncees ua koj tes dej num?” Thiab koj yuav teb li cas? Koj hais tias, “Tsis muaj qhov vim li cas, kuv yeej zoo li no.” Qhov ko lees txais puas tau? (Tsis tau.) Vajtswv hais lus li ntawd rau koj mas lees txais tau, tab sis koj hais lus li ntawd rau Vajtswv mas lees txais tsis tau. Koj txoj kev xam pom tsis yog lawm, thiab koj tsis paub kiag li. Txawm ib tug raug tsim tawm los ntsib tej kev nyuaj dab tsi los xij, yeej zoo li ib txwm muaj thiab ncaj ncees lawm tias koj yuav tsum ua raws li tus Tswm Tsim tej kev npaj thiab tej kev coj kev qhia. Piv txwv li, koj niam koj txiv yug koj, tu koj, ces koj thiaj li hu nkawv ua niam ua txiv—qhov no yeej zoo li ib txwm thiab ncaj ncees lawm, thiab qhov no yeej tsim nyog li ntawd lawm; tsis muaj qhov vim li cas. Yog li ntawd, Vajtswv thiaj li coj qhia txhua yam no rau koj thiab, txawm koj xyiv fab rau tej koob hmoov los sis raug kev nyuaj siab los xij, qhov no yeej zoo li ib txwm thiab ncaj ncees lawm, thiab koj tsis muaj kev xaiv rau qhov ntawd. Yog koj tuaj yeem ua raws li mus kom txog ntua thaum kawg kiag, ces koj yuav tau txais kev cawm dim ib yam li Petus tau. Txawm li cas los xij, yog koj liam ub liam no rau Vajtswv, tso Vajtswv tseg, thiab ntxeev siab rau Vajtswv vim tej qhov kev mob nkeeg uas mob ib ntus xwb, ces txhua yam uas muab tso tseg lawm, tau siv lawm, txoj kev ua koj tes dej num, thiab txoj kev tiv kev txom nyem uas koj tau tiv nyob rau yav tas los lawm ntawd yuav tsis muaj dab tsi li. Qhov no yog vim koj txoj kev rau siab ua hauj lwm yav tas los ntawd tsis ua lub hauv paus rau koj los ua koj tes dej num ntawm ib tug raug tsim tawm los kom zoo los sis sawv koj qhov chaw kom zoo li ib tug raug tsim tawm los, ces qhov ntawd yuav tsis hloov ib yam dab tsi ntawm koj li. Ces qhov no yuav ua rau koj ntxeev siab rau Vajtswv vim koj qhov kev mob nkeeg, thiab koj qhov xaus ces yuav zoo ib yam li Povlauj qhov, uas yog raug rau txim rau thaum kawg. Qhov laj thawj rau txoj kev txiav txim siab no ces yog qhov hais tias txhua yam uas koj tau ua nyob rau yav tas los lawm ntawd yog ua kom koj tau txais ib lub kaus mom kub kom tau txais koob hmoov xwb. Yog thaum kawg es koj muaj kev mob nkeeg thiab tuag lawm, los koj tseem muaj peev xwm ua raws li yam tsis muaj ib qho lus yws li, ces qhov ntawd ua pov thawj qhia tias txhua yam uas koj ua nyob rau yav tas los ntawd yog ua yam siab dawb paug thiab txaus siab hlo rau Vajtswv. Koj mloog Vajtswv lus, thiab thaum kawg koj txoj kev mloog lus yuav ua ib qho xaus uas zoo kawg nkaus rau koj lub neej ntawm txoj kev ntseeg Vajtswv, thiab Vajtswv qhuas qhov no. Yog li ntawd, ib qho kev mob nkeeg ua tau rau koj muaj ib qho xaus uas zoo, los sis qhov kev mob nkeeg ntawd ua tau rau koj muaj ib qho xaus uas phem; qhov xaus uas koj muaj ntawd yog nyob ntawm txoj kev uas koj taug thiab seb koj tus cwj pwm coj rau Vajtswv ntawd yog dab tsi.

Tam sim no tib neeg qhov teeb meem uas poob mus rau hauv tej kev xav tsis zoo vim kev mob nkeeg ntawd daws puas tau tau? (Tau lawm.) Tam sim no koj puas muaj tej tswv yim thiab tej kev xam pom uas yog txog qhov yuav kho qhov kev mob nkeeg ntawd li cas? (Muaj.) Koj puas paub xyaum qhov no li cas? Yog tsis paub, ces kuv yuav muab yam zoo tshaj rau koj, uas yog yam zoo ua tshaj. Nej puas paub yam ntawd yog dab tsi? Yog kev mob nkeeg los raug rau nej, es txawm hais tias koj to taub txog kev qhuab qhia ntau npaum li cas los xij koj yeej tseem tsis muaj peev xwm kov yeej qhov kev mob nkeeg ntawd, koj lub siab yeej tseem yuav nyuaj siab, ntxhov siab, thiab txhawj xeeb, thiab tsis yog koj tsuas yuav tsis muaj peev xwm daws qhov teeb meem ntawd ntsiag to xwb, tab sis koj lub siab yeej kuj tseem yuav muaj lus yws puv npo thiab. Koj tseem pheej yuav xav paub hais tias, “Vim li cas es lwm tus ho tsis mob vim tus kab mob no? Vim li cas ho ua kom kuv tau tus kab mob no? Ua li cas qhov no ho tshwm sim rau kuv? Vim kuv tsis muaj hmoo thiab kuv muaj ib txoj hmoo phem. Kuv tsis keev ua rau ib tug twg chim li, thiab kuv tsis tau ua ib qho txhaum li, yog li ntawd vim li cas qhov no ho tshwm sim rau kuv? Vajtswv coj tsis ncaj ncees rau kuv kiag li lawm!” Koj pom hais tias, dhau ntawm txoj kev nyuaj siab, kev ntxhov siab, thiab kev txhawj xeeb lawm, ces koj kuj poob mus rau hauv txoj kev tsis kaj siab thiab, muaj ib qho kev xav tsis zoo tas los ib qho tuaj thiab tsis muaj ib txoj hau kev los khiav kom dim tej ntawd li txawm koj yuav xav khiav kom dim npaum li cas los xij. Vim qhov ntawd yog ib qho kev mob nkeeg tiag tiag, ces tsis yooj yim muab tshem tawm ntawm koj mus los sis kho kom zoo, yog li ntawd koj yuav tsum ua li cas? Koj xav yoog raws tab sis koj yoog tsis tau, thiab yog muaj ib hnub es koj yoog raws, ces hnub tom qab ntawd koj tus mob haj yam mob loj thiab tus mob ntawd haj yam mob heev, thiab tom qab ntawd koj tsis xav yoog raws lawm, ces koj thiaj li pib yws dua. Koj mus mus los los zoo li txhua lub sij hawm, yog li ntawd koj yuav tsum ua li cas? Cia Kuv qhia lub tswv yim zoo rau koj. Txawm koj muaj ib tug mob loj los sis ib tug mob me los xij, lub sij hawm koj qhov kev mob nkeeg ntawd mob loj tuaj los sis koj yuav tuag, ces tsuas nco ntsoov txog ib yam xwb: Tsis txhob ntshai tuag. Txawm yog tias koj nyob rau theem kawg ntawm tus kab mob khees xaws, txawm yog txoj kev tuag ntawm koj tus mob ntawd yeej siab heev los xij, tsis txhob ntshai tuag. Txawm koj txoj kev txom nyem yuav loj npaum li cas los xij, yog koj ntshai tuag ces koj yuav tsis yoog raws. Ib txhia tib neeg hais tias, “Thaum hnov Koj hais li no mas, txhawb kuv heev thiab kuv haj yam muaj ib lub tswv yim zoo dua. Tsis yog kuv tsis ntshai tuag xwb, tab sis kuv yuav thov kom tuag. Qhov ntawd tsis ua kom dhau mus yooj yim lod?” Vim li cas ho thov kom tuag? Txoj kev thov kom tuag mas yog ib lub tswv yim phem kawg, hos qhov tsis ntshai tuag ntawd mas yog ib tug cwj pwm uas tsim nyog muaj. Tsis yog li ntawd lod? (Yog.) Tus cwj pwm yog uas koj yuav tsum muaj kom txhob ntshai tuag ntawd yog dab tsi? Yog koj qhov kev mob nkeeg loj tuaj es tej zaum koj yuav tuag, thiab txoj kev tuag ntawd siab heev txawm tus neeg ntawd yog tus uas muaj qhov kev mob nkeeg ntawd, thiab lub sij hawm txij thaum tib neeg muaj qhov kev mob nkeeg mus rau thaum lawv tuag ntawd luv heev los xij, nyob hauv koj lub siab koj xav li cas? “Kuv yuav tsum txhob ntshai tuag, thaum kawg txhua tus yeej tuag. Txawm li cas los xij, txoj kev zwm rau Vajtswv yog tej yam uas tib neeg feem coob ua tsis tau, thiab kuv yeej siv tau qhov kev mob nkeeg no los xyaum zwm rau Vajtswv. Kuv yuav tsum muaj txoj kev xav hauv lub hlwb thiab muaj tus cwj pwm uas ua raws li Vajtswv tej kev coj kev qhia thiab tej kev npaj, thiab kuv yuav tsum txhob ntshai tuag.” Txoj kev tuag mas yooj yim, yooj yim tshaj li txoj kev ua neej nyob. Tej zaum koj yuav mob heev tab sis koj tsis paub txog, thiab kiag thaum koj ob lub qhov muag qi lawm, ces koj txoj pa tu, koj tus plig ncaim ntawm koj lub cev mus, thiab koj txoj sia tu. Txoj kev tuag yeej zoo li no; yooj yim li no xwb. Qhov tsis ntshai tuag ntawd yog ib tug cwj pwm uas yuav tsum muaj. Dhau ntawm qhov no lawm, koj yuav tsum txhob txhawj xeeb txog qhov seb koj qhov kev mob nkeeg ntawd puas yuav loj tuaj los tsis loj, los sis seb koj puas yuav tuag yog kho tsis tau kom koj zoo, los sis yuav ntev npaum li cas mus txog rau thaum koj tuag, los sis koj yuav mob npaum li cas thaum txog lub sij hawm tuag. Koj yuav tsum txhob txhawj xeeb txog tej no; tej no tsis yog tej uas koj yuav tsum txhawj xeeb txog. Qhov no yog vim tias hnub ntawd yeej yuav tsum los txog, thiab nws yuav tsum los txog rau tej lub xyoo, tej lub hli, thiab los rau tej hnub uas tshwj xeeb. Koj yeej khiav nkaum tsis tau thiab koj yeej khiav tsis dim—qhov ntawd yog koj txoj hmoo. Vajtswv twb npaj ua ntej thiab Nws twb npaj qhov hu ua txoj hmoo rau koj lawm. Qhov ntev ntawm koj lub niaj lub xyoo thiab lub hnub nyoog thiab lub sij hawm uas koj tuag ntawd Vajtsw twb teeb tseg lawm, yog li ntawd koj txhawj xeeb txog dab tsi? Koj yeej txhawj xeeb tau txog qhov ntawd tab sis qhov ntawd yeej tsis hloov ib yam dab tsi li; koj yeej txhawj xeeb tau txog qhov ntawd, tab sis koj yeej txwv tsis qhov ntawd kom txhob tshwm sim; koj yeej txhawj xeeb tau txog qhov ntawd, tab sis koj yeej cheem tsis tau kom hnub ntawd txhob los txog. Yog li ntawd, koj txoj kev txhawj xeeb ntawd mas tshaj dhau lawm, thiab nws yuav ua rau lub nra ntawm koj qhov kev mob nkeeg ntawd haj yam hnyav xwb. Ib qho ces yog tsis txhob txhawj xeeb, thiab lwm qhov ces yog tsis txhob ntshai tuag. Lwm qhov ces yog tsis txhob ntxhov siab es hais tias, “Tom qab kuv tuag lawm, kuv tus txiv (los sis tus poj niam) puas yuav rov qab yuav poj niam dua (los sis yuav txiv dua)? Leej twg yuav saib xyuas kuv tus me nyuam? Leej twg yuav ua kuv tes dej num? Leej twg yuav nco txog kuv? Tom qab kuv tuag lawm, Vajtswv yuav txiav txim siab rau kuv qhov xaus mus li cas?” Tej xwm txheej zoo li tej no mas tsis yog ib yam dab tsi uas koj yuav tsum txhawj xeeb txog. Cov tib neeg uas tuag txhua tus yeej muaj lawv qhov chaw uas tsim nyog mus lawm thiab Vajtswv twb npaj lawm. Cov uas tseem ua neej nyob yuav ua neej nyob mus; qhov muaj txhua tus tib neeg ntawd yuav tsis cuam tshuam rau txoj kev ua dej ua num li ib txwm ua thiab tib neeg ntiaj teb txoj kev ciaj sia, thiab qhov txhua tus tib neeg ploj mus lawm ntawd yuav tsis hloov ib yam dab si, ces yog li ntawd tej no tsis muaj dab tsi uas koj yuav tsum txhawj xeeb txog. Tsis tas yuav txhawj xeeb txog koj tej txheeb ze, thiab haj yam tsis tas txhawj xeeb txog qhov seb puas muaj leej twg nco txog koj tom qab koj tuag lawm. Qhov txhua tus nco txog koj ntawd muaj qab hau dab tsi? Yog koj zoo ib yam li Petus, ces qhov nco txog koj ntawd yuav muaj tej yam muaj nqis thiab; koj zoo ib yam li Povlauj xwb, ces yam uas koj coj los rau tib neeg ntawd yuav yog kev puas tsuaj, yog li ntawd leej twg thiaj li xav nco txog koj? Muaj lwm yam uas yuav tau txhawj xeeb txog uas yog ib txoj kev xav hauv lub hlwb muaj tiag uas tib neeg muaj. Lawv hais tias, “Thaum kuv tuag lawm, kuv yeej yuav tsis saib lub ntiaj teb no dua li lawm, thiab kuv yuav tsis muaj peev xwm xyiv fab rau txoj sia uas yog tej khoom ntawm txhua yam no. Thaum kuv tuag lawm, tsis muaj dab tsi nyob hauv lub ntiaj teb no uas kuv yuav txhawj txog mus ntxiv lawm, thiab txoj kev xav hauv siab txog txoj kev ua neej nyob ntawd yuav tsis muaj lawm. Thaum kuv tuag lawm, kuv yuav mus rau qhov twg?” Qhov koj yuav mus rau qhov twg ntawd tsis yog tej yam uas koj yuav tsum txhawj xeeb txog, thiab tsis yog tej yam uas koj yuav tsum ntxhov siab txog. Koj yuav tsis yog ib tug tib neeg ciaj sia nyob mus ntxiv lawm, es koj pheej txhawj xeeb txog qhov kom rov qab muaj peev xwm paub txhua tus tib neeg, tej xwm txheej, txhua yam, tej cheeb tsam, thiab ntau yam ntxiv txog lub ntiaj teb no. Qhov no mas haj yam yog tej yam uas koj yuav tsum tsis txhob txhawj xeeb txog, thiab tab txawm yog koj tso tsis taus tej no tseg los, nws yuav tsis muaj qab hau lawm. Txawm li cas los xij, yam uas coj tau ib qho kev nplig siab los rau koj ces tej zaum yog koj txoj kev tuag los sis koj txoj kev ncaim mus uas tej zaum yuav yog ib qho pib tshiab rau koj txoj kev yug los ua neeg tom ntej no, uas yog ib qho pib tshiab uas zoo dua, ib qho pib tshiab uas noj qab nyob zoo, ib qho pib tshiab uas zoo tag nrho, ib qho pib tshiab rau koj tus plig rov qab los dua. Qhov ntawd yuav tsis yog ib yam phem, uas tej zaum koj yuav rov qab los muaj nyob rau hauv txoj kev txawv thiab hauv ib lub cev txawv lawm. Hais txog lub cev seb qhov ntawd yuav hnav dab tsi kiag ntawd mas nyob ntawm Vajtswv thiab tus Tswv Tsim tej kev npaj xwb. Hais txog lub ntsiab no mas, yeej hais tau hais tias txhua tus yuav tsum tos thiab saib xwb. Yog koj xaiv los ua neej rau hauv ib txoj kev zoo thiab rau hauv ib lub cev zoo tom qab koj tuag rau hauv lub neej no lawm, ces txawm koj qhov kev mob nkeeg yuav mob npaum li cas los xij, qhov tseem ceeb tshaj plaws mas yog qhov seb koj kho qhov kev mob nkeeg ntawd li cas thiab koj tsim nyog npaj tej hauj lwm zoo twg, tsis yog koj txoj kev nyuaj siab, kev ntxhov siab, thiab kev txhawj xeeb uas tsis muaj qab hau ntawd. Thaum koj xav li no lawm, qhov siab ntawm koj txoj kev ntshai, kev poob siab, thiab kev tsis lees txoj kev tuag ntawd puas nqes? (Nqes.) Peb nyuam qhuav tham txog pes tsawg yam lawm? Yam ib yog txhob ntshai tuag. Dab tsi ntxiv thiab? (Peb tsis txhawj xeeb txog qhov seb peb qhov kev mob nkeeg puas yuav loj tuaj los sis tsis loj, thiab peb tsis ntxhov siab txog peb tej poj niam los sis tej txiv los sis tej me nyuam, los sis txog peb tus kheej qhov xaus, txoj hau kev kawg, thiab ntau yam ntxiv.) Muab tag nrho tej no tso rau hauv Vajtswv ob txhais tes. Dab tsi ntxiv thiab? (Peb tsis txhawj xeeb txog qhov seb peb mus qhov twg tom qab peb tuag lawm.) Qhov txhawj xeeb txog tej no mas tsis muaj qab hau li. Ua neej nyob rau tam sim no thiab ua tej uas koj yuav tsum ua ntawm no thiab tam sim no kom zoo. Koj tsis paub tias xyov txhua yam yuav mus zoo li cas rau yav tom ntej, yog li ntawd koj yuav tsum muab tag nrho tej no tso rau hauv Vajtswv ob txhais tes. Dab tsi ntxiv thiab? (Peb yuav tsum maj nroos los npaj tej hauj lwm zoo rau peb txoj hau kev kawg rau yav tom ntej.) Qhov ko yog lawm, tib neeg yuav tsum npaj tej hauj lwm zoo kom ntau ntxiv rau yav tom ntej, thiab lawv yuav tsum caum qhov tseeb thiab ua cov tib neeg uas to taub qhov tseeb thiab muaj qhov tseeb qhov muaj tiag. Ib txhia tib neeg hais tias, “Tam sim no Koj tab tom tham txog txoj kev tuag, yog li ntawd puas yog Koj txhais hais tias txhua tus yuav tsum tau ntsib txoj kev tuag nyob rau yav tom ntej?” Qhov no tsis yog ib qho kev ceeb toom uas phem, thiab tsis yog muab ib qho kev qhia los tiv thaiv rau koj, haj yam tsis yog txoj kev foom tsis zoo rau ib tug twg kom tuag—tej lus no tsis yog tej lus foom tsis zoo. Yog li ntawd, tej lus no yog dab tsi? (Tej lus no yog ib txoj kev xyaum rau tib neeg.) Yog lawm, tej lus no yog yam uas tib neeg yuav tsum xyaum, tej lus no yog tej kev xam pom thiab tej cwj pwm uas yog uas tib neeg yuav tsum tuav rawv rau, thiab tej lus no yog qhov tseeb uas tib neeg yuav tsum to taub. Txawm cov tib neeg uas tsis muaj ib hom mob li los kuj yuav tsum muaj hom cwj pwm no los fim txoj kev tuag thiab. Yog li ntawd, ib txhia tib neeg hais tias, “Yog peb tsis ntshai tuag no, qhov ntawd puas txhais hais tias txoj kev tuag yuav tsis los raug rau peb?” Qhov no puas yog qhov tseeb? (Tsis yog.) Yog li ntawd ces qhov no yog dab tsi? (Qhov no yog ib txoj kev xav phem thiab yog lawv txoj kev xav hauv nruab siab xwb.) Qhov ntawd tsis tseeb, nws yog qhov laj thawj ntawm txoj kev xav, thiab lub tswv yim phem xwb—qhov ntawd tsis yog qhov tseeb. Qhov ntawd tsis yog qhov hais tias yog koj tsis ntshai los sis tsis txhawj xeeb txog txoj kev tuag ces txoj kev tuag yuav los raug rau koj thiab koj yuav tsis tuag—qhov no tsis yog qhov tseeb. Qhov kuv tab tom tham txog no yog tus cwj pwm uas tib neeg yuav tsum muaj rau txoj kev tuag thiab kev mob nkeeg. Thaum koj muaj hom cwj pwm no lawm, ces koj yeej tso tau tej kev xav tsis zoo ntawm txoj kev nyuaj siab, kev ntxhov siab, thiab kev txhawj xeeb tseg rau tom qab. Ces koj yuav tsis daig rau hauv koj qhov kev mob nkeeg, thiab koj txoj kev xav hauv lub hlwb thiab lub ntiaj teb ntawm koj tus ntsujplig yuav tsis raug puas tsuaj los sis raug cuam tshuam los ntawm koj qhov kev mob nkeeg. Ib qho ntawm yus tus kheej tej kev nyuaj uas tib neeg ntsib mas yog lawv tej kev vam rau yav tom ntej, thiab lwm qhov mas yog kev mob kev nkeeg thiab kev tuag. Tej kev vam rau yav tom ntej thiab txoj kev txawj tuag ntawd tswj tau tib neeg lub siab, tab sis yog koj kho tau ob qhov teeb meem no kom yog thiab kov yeej koj tej kev xav tsis zoo, ces tej kev nyuaj uas ib txwm muaj ntawd yuav kov tsis yeej koj.

Dhau ntawm kev mob nkeeg lawm, tib neeg pheej nyuaj siab, ntxhov siab, thiab txhawj xeeb txog lwm yam teeb meem tiag hauv lawv lub neej. Muaj ntau qhov teeb meem tiag hauv lub neej, piv txwv li, muaj cov neeg laus los sis cov me nyuam nyob hauv koj tsev uas tim tsum kev saib xyuas los sis kev tu, tej nyiaj txiag uas koj cov me nyuam tim tsum rau lawv txoj kev kawm ntawv thiab siv rau kev noj kev nyob, cov neeg laus uas tim tsum nyiaj txiag los kho tej mob uas yuav tsum siv tshuaj rau, thiab cheem tsum nyiaj txiag ntau uas siv rau kev noj kev nyob hauv lub neej txhua hnub. Koj xav ua koj tes dej num, tab sis yog koj tso koj txoj hauj lwm tseg, koj yuav ua neej li cas? Koj tej nyiaj txiag uas khaws cia hauv tsev yuav tas saiv heev li, yog li ntawd koj yuav ua li cas yog tsis muaj ib qho nyiaj txiag li? Yog koj tawm mus khwv nyiaj txiag lawm, qhov ntawd yuav ua rau txoj kev ua koj tes dej num ntawd qeeb, tab sis yog koj tso koj txoj hauj lwm tseg los ua koj tes dej num, ces koj yuav tsis muaj txoj hau kev los daws tej kev nyuaj hauv tsev. Yog li ntawd, koj yuav ua li cas? Ntau tus tib neeg cov nyom thiab tsis paub meej txoj tej zoo li no, ces yog li ntawd lawv txhua tus thiaj li xav kom Vajtswv hnub los thiab xav paub tias thaum twg es tej kev puas tsuaj loj thiaj li yuav los thiab seb lawv puas yuav tsum tau ua txhab rau khoom noj. Yog lawv npaj, ces lawv tsis muaj nyiaj txiag seem nyob hauv tsev thiab lub neej yuav nyuaj heev. Lawv pom lwm tus tib neeg hnav tej khawb ncaws zoo dua thiab noj tej zaub mov zoo dua ces lawv thiaj li tsis zoo siab thiab hais tias lawv lub neej mas nyuaj dhau lawm. Lawv tsis tau nqaij noj los lawm ntev, thiab yog lawv muaj qe los lawv tsis kam noj tej qe ntawd, thiab lawv maj nroos muab tej qe ntawd coj mus muag tom khw kom tau ob peb duas las nyiaj. Thaum lawv xav txog txhua qhov kev nyuaj no lawm, lawv txawm pib txhawj xeeb hais tias: “Thaum twg cov hnub uas nyuaj no thiaj li yuav xaus? Lawv pheej hais tias, ‘Vajtswv hnub tab tom los, Vajtswv hnub tab tom los,’ thiab ‘tsis ntev no Vajtswv tes hauj lwm yuav xaus,’ tab sis thaum twg es leej twg mam li qhia kuv tias thaum twg qhov no mam li tshwm sim tiag tiag? Leej twg thiaj li hais tau li no tseeb tseeb?” Ib txhia tib neeg siv ntau lub xyoo mus ua lawv tes dej num deb ntawm tsev, thiab muaj qee lub sij hawm lawv xav hais tias, “Kuv tsis paub tias tam sim no kuv cov me nyuam loj li cas lawm, los sis seb kuv niam kuv txiv puas noj qab nyob zoo. Kuv twb ncaim tsev tuaj deb los tau ntau lub xyoo lawm thiab tsis tau saib xyuas lawv li. Lawv puas muaj kev nyuaj? Lawv yuav ua li cas yog lawv muaj mob? Puas muaj leej twg saib xyuas lawv? Tam sim no kuv niam kuv txiv yuav tsum muaj 80 los sis 90 tawm xyoo lawm, thiab kuv twb tsis paub seb nkawv puas tseem muaj sia nyob lawm.” Thaum lawv xav txog tej no mas, muaj ib qho kev ntxhov siab uas tsis paub npe nyob hauv lawv lub siab. Dhau ntawm qhov ntxhov siab lawm ces, lawv yuav txhawj xeeb, tab sis txoj kev txhawj xeeb ntawd yeej daws tsis tau dab tsi li, ces yog li ntawd lawv thiaj li pib nyuaj siab. Thaum lawv nyuaj siab heev, lawv thiaj li tig mus rau Vajtswv tes hauj lwm thiab Vajtswv hnub, thiab lawv xav paub hais tias, “Vim li cas Vajtswv hnub tseem tsis tau los txog? Puas yog peb yeej ib txwm ua ib lub neej uas tsis paub meej thiab sib cais zoo li no? Thaum twg Vajtswv hnub mam li los txog? Thaum twg Vajtswv tes hauj lwm mam li xaus? Thaum twg Vajtswv mam li rhuav tshem lub ntiaj teb no? Thaum twg Vajtswv lub nceeg vaj mam li tshwm sim rau hauv lub ntiaj teb? Thaum twg peb mam li pom Vajtswv tus neeg tshwm los?” Lawv xav txog tej no tas li, ces thiaj li muaj tej kev xav tsis zoo ntawm txoj kev txhawj xeeb, kev ntxhov siab, thiab kev nyuaj siab nyob rau hauv lawv lub siab, lawv thiaj li muaj lub ntsej muag uas txhawj xeeb, lawv tsis muaj kev xyiv fab li lawm, lawv tsis muaj zog mus kev, lawv tsis qab los noj mov, thiab lawv siv lawv lub hlwb xav mus xav los txhua hnub xwb. Qhov ua neej nyob rau hauv tej kev xav tsis zoo zoo li no puas yog ib qho zoo? (Tsis yog.) Txawm ib qho kev nyuaj me me xwb los tej zaum yeej ua tau rau tib neeg poob mus rau hauv tej kev xav tsis zoo no yam tsis xav txog li, thiab tej zaum tsis muaj ib qho laj thawj kiag li, los sis tsis muaj ib lub ntsiab li, los sis tsis muaj ib tug tib neeg twg hais ib yam dab tsi tshwj xeeb li los, yuav muaj tej kev xav tsis zoo no rau hauv tib neeg lub siab yam tsis paub txog. Thaum muaj tej kev xav tsis zoo no rau hauv tib neeg lub siab lawm ces, tej kev xav tau uas tib neeg muaj, txoj kev ntshaw kom Vajtswv hnub los txog, kom Nws tes hauj lwm los rau qhov xaus, thiab kom Nws lub nceeg vaj los ntawd haj yam muaj tseeb. Ib txhia tib neeg haj tseem kub siab lug txhos cuag ua kua muag teev yees thov Vajtswv hais tias, “Au Vajtswv, kuv ntxub lub ntiaj teb no, thiab kuv ntxhub cov tib neeg ntiaj teb no. Thov muab xaus mus tag nrho kom sai li sai tau, muab tib neeg lub neej ntawm sab cev nqaij daim tawv xaus mus, thiab muab tag nrho tej kev nyuaj siab no xaus mus.” Lawv thov Vajtswv zoo li no ntau zaus lawm los tsis muaj qhov tshwm sim li, thiab tej kev xav tsis zoo ntawm txoj kev txhawj xeeb, kev ntxhov siab, thiab kev nyuaj siab ntawd tseem muaj nyob hauv lawv lub siab, thiab tseem nyob rau hauv lawv tej kev xav hauv lub hlwb thiab nyob tob tob hauv lawv tus ntsujplig, haub ntxias lawv thiab nyob puag ncig lawv. Qhov muaj tseeb ces yog, qhov no tshwm sim tsis vim yog lwm qhov laj thawj tab sis yog vim lawv xav kom Vajtswv hnub los sai zog, kom Vajtswv tes hauj lwm xaus sai zog, kom lawv tau txais koob hmoov kom sai li sai tau, kom lawv muaj ib txoj hau kev kawg uas zoo, kom lawv tau nkag mus rau saum ntuj ceeb tsheej los sis lub nceeg vaj uas lawv xav hauv nruab siab thiab xav rau hauv lawv tej kev xav phem; vim li ntawd lawv thiaj li pheej rau siab ntso xav rau hauv lawv nruab siab txog tej no. Lawv qhia pom lawv tus kheej qhov rau siab ntso xav txog sab nraum daim tawv, tab sis qhov tiag ces lawv nyuaj siab, ntxhov siab, thiab txhawj xeeb. Thaum pheej muaj tej kev xav hauv siab txog kev nyuaj siab, kev ntxhov siab, thiab kev txhawj xeeb zoo li no nyob puag ncig tib neeg lawm mas, lawv pheej xav hais tias, “Yog Vajtswv hnub tsis los txog sai, thiab Vajtswv tes hauj lwm tsis tiav kom sai li sai tau, ces kuv yuav tsum siv kuv txoj kev hluas thiab kuv lub peev xwm los rau siab ua hauj lwm. Kuv xav ua hauj lwm thiab khwv nyiaj txiag, rau siab ua hauj lwm rau hauv lub ntiaj teb mus ib ntus thiab xyiv fab rau lub neej. Yog Vajtswv hnub tsis los kom sai, ces kuv xav rov qab mus tsev mus koom nrog kuv tsev neeg, mus nrhiav ib tug txij nkawm, mus ua neej kom zoo ib tus, mus txhawb kuv niam kuv txiv, mus tu kuv cov me nyuam. Thaum kuv laus lawm, kuv yuav muaj me nyuam coob heev thiab lawv yuav nrog kuv nyob ua ke, ces peb yuav xyiv fab rau tsev neeg lub neej—qhov ntawd mas yog ib qho zoo kawg li! Ib tug yam ntxwv uas qab zib heev li!” Thaum xav li no lawm, lawv saib mus rau txoj kev xyiv fab rau hom neej zoo li ntawd. Thaum twg tib neeg xav tias Vajtswv hnub yuav los txog ntawm no sai thiab tias Vajtswv tes hauj lwm yuav xaus sai mas, lawv tej kev ntshaw haj yam kub heev, thiab lawv txoj kev xav kom Vajtswv tes hauj lwm los xaus kom sai li sai tau ntawd haj yam kub heev. Nyob rau ib qho xwm txheej zoo li no mas, thaum tej uas muaj tseeb tsis mus raws li yam tib neeg xav tau, thaum tib neeg tsis pom ib qho cim qhia tias Vajtswv tes hauj lwm yuav xaus los sis Vajtswv hnub yuav los txog li mas, lawv tej kev xav hauv siab txog kev nyuaj siab, kev ntxhov siab, thiab kev txhawj xeeb haj yam phem ntxiv. Nyob rau lub sij ham ntawm ob peb xyoo ntawd, lawv txhawj xeeb txog tsham thaum lawv laus lawm es nrhiav tsis tau ib tug txij nkawm uas yuav saib xyuas lawv rau thaum lawv laus lawm. Lawv txhawj xeeb tias yog lawv pheej ua lawv tes dej num rau hauv Vajtswv lub tsev thiab twb tau tu txoj kev sib raug zoo nrog lub zej zog lawm, es seb lawv puas yuav muaj peev xwm rov qab hloov mus rau hauv lub zej zog thaum lawv rov qab mus tsev mus ua neej lawm. Lawv txhawj xeeb tias yog lawv rov qab mus ua lag luam rau lub sij hawm ob peb xyoo los sis rov qab mus ua hauj lwm, es seb lawv puas yuav muaj peev xwm ua tau raws li lub sij hawm, seb lawv puas yuav muaj peev xwm nrov koob nrov peb tshaj li lwm tus, thiab seb lawv puas yuav muaj peev xwm ua tau neej mus. Lawv yim txhawj xeeb txog tej zoo li no thiab lawv yim ntxhov siab thiab nyuaj siab txog tej no mas, lawv yim tsis muaj peev xwm ua tau lawv tes dej num twj ywm thiab ua raws li Vajtswv hais nyob rau hauv Vajtswv lub tsev. Yog li ntawd, lawv thiaj li txhawj xeeb txog lawv lub neej yav tom ntej, lawv tej kev vam, thiab lawv tsev neeg lub neej ntau ntxiv, thiab txhawj xeeb txog txhua qhov kev nyuaj uas yuav muaj nyob rau hauv lub neej rau yav tom ntej. Lawv xav txog txhua yam uas lawv ua tau, lawv txhawj xeeb txog txhua yam uas lawv ua tau; lawv haj tseem txhawj xeeb txog lawv tej tub xeeb ntxwv thiab seb lub neej yuav zoo li cas rau lawv tej tub xeeb ntxwv tej xeeb leej xeeb ntxwv thiab. Lawv tej kev xav hauv lub hlwb mas mus deb heev, lawv tej kev xav hauv lub hlwb mas zoo heev, thiab lawv xav txhua yam thoob plaws. Thaum tib neeg muaj tej kev txhawj xeeb, kev ntxhov siab, thiab tej kev xav hauv siab txog txoj kev nyuaj siab no lawm, ces lawv tsis muaj peev xwm ua lawv tej dej num twj ywm lawm, thiab lawv caum tsis tau Vajtswv qab lawm, tab sis lawv pheej muaj tej kev xav hauv lub hlwb uas hloov mus hloov los. Thaum lawv pom tias tes hauj lwm tshaj tawm txoj moo zoo mus tau zoo heev mas, lawv xav hais tias, “Vajtswv hnub yuav los sai. Kuv yuav tsum ua kuv tes dej num kom zoo, yog lawm! Rau siab ntso! Kuv yuav tsum ua mus li ob peb xyoos ntxiv, tam sim no tshuav tsis ntev lawm. Txhua qhov kev txom nyem no yeej yuav tsim nyog thiab qhov kev txom nyem no yuav tawg paj txi txiv, ces kuv yuav tsis muaj kev txhawj xeeb ntxiv lawm!” Txawm li cas los xij, ob peb xyoo tom qab ntawd, tej kev puas tsuaj loj tseem tsis tau los txog thiab tsis muaj leej twg hais txog Vajtswv hnub li, ces yog li ntawd lawv lub siab thiaj li txias lawm. Txoj kev nyuaj siab, kev ntxhov siab, thiab kev txhawj xeeb no, nrog rau lawv tej kev xav hauv lub hlwb pheej mus mus los los thiab rov qab los li no, mus los li qub raws li qhov xwm txheej uas txhob txwm ua thiab qhov xwm txheej nyob hauv Vajtswv lub tsev, thiab lawv ua tsis tau dab tsi los tswj tej no li—lawv tsis muaj peev xwm hloov tau tus yam ntxwv uas lawv muaj txawm leej twg yuav hais li cas los xij. Puas muaj cov tib neeg zoo li no? (Muaj.) Puas yooj yim rau cov tib neeg zoo li no sawv kom khov kho? (Tsis yooj yim.) Lawvtus cwj pwm thiab txoj kev xav ua lawv tej dej num, thiab lub zog uas lawv siv los ua lawv tej dej num ntawd yog mus raws li “tej xov xwm uas tshiab tshaj plaws xwb.” Ib txhia tib neeg hais tias, “Raws li cov xov xwm uas tso siab tau mas, Vajtswv txoj moo zoo tab tom nthuav tawm mus tau zoo heev!” Thiab ib txhia tib neeg hais tias, “Tej xov xwm tshiab tshaj plaws ces yog qhov hais tias tam sim no tej kev puas tshuaj tab tom nquag nquag tshwm sim mus thoob ntiaj teb thiab zoo li qhov xwm txheej ntawm lub ntiaj teb thiab tej kev puas tsuaj tam sim no twb muaj tiav li qhov kev puas tshuaj nyob hauv Phau Qhia Tshwm lawm. Vajtswv tes hauj lwm yuav tiav sai sai no, thiab lub ntiaj teb ntawm sab kev ntseeg tab tom nrov ntsuag qees!” Thaum twg lawv hnov “tej xov xwm tshiab tshaj plaws” los sis “tej xov xwm uas tso siab tau” mas, lawv txoj kev nyuaj siab, kev ntxhov siab, thiab kev txhawj xeeb nqig mus ib ntus thiab tsis cuam tshuam lawv ntxiv ces lawv txawm tso lawv tej kev xav hauv lub hlwb tseg mus tau ib lub sij hawm. Txawm li cas los xij, thaum twg lawv tsis tau hnov ib qho “xov xwm uas tso siab tau” los sis ib qho “xov xwm uas yog” tsis ntev no mas, lawv txoj kev nyuaj siab, kev ntxhov siab, thiab kev txhawj xeeb, nrog rau lawv tej kev xav hauv lub hlwb txawm pib tawm tuaj. Ib txhia tib neeg haj tseem xav hais tias yuav mus nrhiav ib txoj hauj lwm qhov twg, mus ua hauj lwm qhov twg, yuav muaj pes tsawg tus me nyuam, nyob hauv ob peb lub xyoos ntawd lawv cov me nyuam yuav mus kawm ntawv qhov twg, yuav npaj lawv tej nqi kawm ntawv qib siab li cas, thiab lawv haj tseem npaj mus yuav ib lub tsev, av, los sis tsheb thiab. Txawm li cas los xij, thaum hnov “tej xov xwm uas tso siab tau” lawm, txawm muab tej no ncua tseg ib ntus. Qhov no tsis zoo li ib qho kev tso dag xwb lod? (Zoo li kawg.) Lawv ntseeg Vajtswv tab sis lawv tsis muab lawv lub siab tso rau qhov no thiab tsis hais tias txoj kev ntseeg Vajtswv yog txoj kev yog hauv lub neej, hais tias txoj kev ntseeg ntawd yog lub neej uas muaj qab hau tshaj plaws, hais tias ua lub neej li no mas muaj nuj nqis tshaj plaws; txawm Vajtswv yuav coj lawv kev li cas los sis Vajtswv yuav ua dab tsi los xij, lawv paub tseeb tias txhua yam uas Vajtswv ua yog ua los cawm tib neeg xwb, ces yog li ntawd lawv thiaj li caum Vajtswv qab mus kom txog ntua qhov kawg kiag. Txawm nws yuav siv mus kom txog ntua thaum lub ntuj thiab lub ntiaj teb laus tuaj, mus txog ntua thaum cov hnub qub hloov cov hnub qub ntawd tej chaw, txawm nws yuav siv mus kom txog ntua thaum tej dej hiav txwv qhuav, tej pob zeb tig mus ua hmoov av, los sis tej dej hiav txwv rais los ua av thiab av rais mus ua dej hiav txwv los xij, lawv lub siab tseem zoo li qub, ces li ntawd lawm xwb. Yuav muab lawv lub siab rau Vajtswv kom mus tag lawv sim neej, thiab yog muaj lwm tiam tom qab tiam no, los lawv tseem yuav caum Vajtswv qab thiab. Txawm li cas los xij, cov tib neeg uas muaj ntau qhov kev nyuaj nyob hauv lawv lub neej tsis xav li no. Lawv txoj kev ntseeg Vajtswv mas muaj qhov saib ntsoov rau lub sij hawm tam sim no, thiab lawv ua lawv lub neej raws li lawv xav tias lawv tsim nyog ua xwb. Lawv yuav tsis hloov tej kev thiab tej ntsiab uas lawv ua neej los sis hloov lawv tej kev xav tau los sis tej kev npaj tsuas yog vim lawv ntseeg Vajtswv thiab taug txoj kev ntawm txoj kev ntseeg Vajtswv xwb. Txawm lawv tej kev npaj yuav zoo li cas rau thaum pib los xij, lawv tsis hloov tej ntawd tsuas yog vim lawv ntseeg Vajtswv xwb, lawv tsis hloov ib yam dab tsi kiag li, thiab lawv nrhiav kev los ua neej raws li txoj kev uas cov ntseeg ua neej xwb. Tab sis txoj kev ntseeg Vajtswv mas muaj ib yam tshwj xeeb, thiab qhov ntawd yog qhov hais tias tsis ntev no Vajtswv hnub yuav los txog, tsis ntev no Vajtswv lub nceeg vaj yuav los, thiab tej kev puas tsuaj loj yuav los raug. Tom qab ntawd cov ntseeg Vajtswv yuav khiav dim tej kev puas tsuaj ntawd, lawv yuav tsis poob mus rau hauv tej kev puas tsuaj ntawd, lawv yuav dim, thiab nws tsuas yog vim qhov tshwj xeeb no xwb es lawv thiaj li txaus siab ntseeg Vajtswv heev li. Yog li ntawd, lawv lub hom phiaj thiab yam lawv mob siab rau lawv txoj kev ntseeg Vajtswv ces tsuas yog tib yam no nkaus xwb. Txawm lawv yuav mloog pes tsawg zaj kev qhuab qhia, los sis pes tsawg qhov tseeb uas lawv hnov tib neeg sib qhia txog, los sis lawv twb ntseeg Vajtswv los tau ntev npaum li cas lawm los xij, txoj kev uas lawv ntseeg Vajtswv ntawd yeej tsis hloov li, thiab lawv yeej tsis tso txoj kev ntseeg ntawd tseg li. Tsis yog vim ntawm tej kev qhuab qhia uas lawv mloog thiab qhov tseeb uas lawv to taub ntawd es lawv thiaj li hloov los sis tso lawv tej kev xam pom txog txoj kev ntseeg Vajtswv uas tsis yog lawm ntawd tseg. Ces yog li ntawd, txawm muaj tej qhov hloov los sis tej qhov lus hais txog qhov xwm txheej nyob sab nraum lub ntiaj teb los sis nyob hauv Vajtswv lub tsev los xij, yeej ib txwm muaj ib qho kev cuam tshuam rau yam no uas lawv txhawj txog tshaj plaws nyob hauv lawv nruab siab. Yog lawv hnov tias tsis ntev no Vajtswv tes hauj lwm yuav tiav, ces lawv yuav xyiv fab heev li; txawm li cas los xij, yog lawv hnov tias qhov Vajtswv tes hauj lwm tiav ntawd mas tseem ntxov dhau lawm, thiab lawv mus tsis taus ntxiv lawm, ces lawv txoj kev nyuaj siab, kev ntxhov siab, thiab kev txhawj xeeb thiaj li yuav loj tuaj rau hnub ntawd, thiab lawv yuav pib npaj tawm ntawm Vajtswv lub tsev thiab lawv cov kwv tij thiab cov muam mus txhua lub sij hawm, ncaim ntawm Vajtswv lub tsev mus kom du lug. Tseeb tiag, kuj tseem muaj cov uas pib npaj muab tag nrho tej xov tooj ntawm lawv cov kwv tij thiab cov muam thiab tag nrho lawv tej ntawv sau mus los ntawd rhuav tshem kom tag nrho txhua lub sij hawm thiab, thiab muab cov phau ntawv ntawm Vajtswv cov lus uas Vajtswv lub tsev tau xa mus rau lawv ntawd rov qab xa mus rau pawg ntseeg lawm thiab. Lawv xav hais tias, “Kuv taug tsis tau txoj kev uas ntseeg Vajtswv thiab caum qhov tseeb lawm tiag tiag. Kuv xav hais tias ntseeg Vajtswv ces txhais hais tias kuv yuav ua ib lub neej uas zoo siab, muaj me nyuam, tau txais koob hmoov thiab tau nkag mus rau lub nceeg vaj saum ntuj ceeb tsheej no. Tam sim no tus npau suav uas zoo kawg no raug muab tsoo ntsoog tag lawm, yog li ntawd kuv tseem yuav xaiv los ua ib lub neej zoo siab, muaj me nyuam, thiab xyiv fab rau lub neej. Tab sis kuv tseem tso tsis tau kuv txoj kev ntseeg Vajtswv tseg. Yog muaj ib lub hwv tsam uas kuv tuaj yeem tau txais ib puas npaug nyob rau hauv lub neej no thiab lub neej uas nyob mus ib txhiab ib txhis uas tseem yuav los no, qhov ntawd haj tseem yuav tsis zoo dua lod?” Qhov no yog lawv txoj kev xam pom txog txoj kev ntseeg Vajtswv, qhov ntawd yog lawv txoj kev npaj thiab, tseeb tiag, qhov ntawd kuj yog yam uas lawv ua thiab. Qhov no yog txoj kev xav hauv lub hlwb thiab txoj kev npaj nyob rau hauv nruab siab ntawm cov uas vam khom rau lawv txoj kev xav hauv nruab siab hauv lawv txoj kev ntseeg Vajtswv, cov uas pheej nyuaj siab, ntxhov siab, thiab txhawj xeeb txog lawv lub neej ntawm sab cev nqaij daim tawv, thiab qhov ntawd qhia txog yam uas lawv caum thiab txoj kev uas lawv taug nyob rau hauv lawv txoj kev ntseeg Vajtswv. Yam uas lawv txhawj tshaj plaws yog dab tsi? Yam uas lawv txhawj tshaj plaws yog thaum Vajtswv hnub los txog, thaum Vajtswv tes hauj lwm yuav los xaus, thaum tej kev puas tsuaj loj yuav los raug, es seb lawv puas yuav muaj peev xwm khiav dim tej kev puas tsuaj loj ntawd—qhov no yog yam uas lawv txhawj tshaj plaws.

Hais txog cov uas pheej nyuaj siab, ntxhov siab thiab txhawj xeeb txog lawv lub neej ntawm sab cev nqaij daim tawv ntawd mas, lawv txoj kev caum lawv txoj kev ntseeg Vajtswv yog kom “tau txais ib puas npaug nyob rau hauv lub neej no thiab lub neej uas nyob mus ib txhiab ib txhis uas tseem yuav los no” xwb. Txawm li cas los xij, txawm cov uas ntseeg Vajtswv twb ua tiav qhov tau txais kev cawm dim lawm los xij, lawv tsis nyiam hnov txog qhov seb Vajtswv tes hauj lwm tau nce qib mus deb li cas, muaj pes tsawg tus tib neeg tau txais qhov tseeb, los paub Vajtswv, thiab hais tau lus tim khawv zoo lawm, cuag nkaus li tej no tsis muaj dab tsi cuam tshuam rau lawv li. Yog li ntawd, yam uas lawv xav hnov ntawd yog dab tsi? (Thaum twg Vajtswv tes hauj lwm mam li los xaus.) Lawv muaj tej kev cia siab uas loj kawg, puas yog? Tib neeg feem coob mas siab me dhau lawm. Saib seb yam lawv saib rau ntawd yog dab tsi thiab lawv tsuas cia siab rau tej yam uas loj xwb—cas lawv yuav muaj ib tug yam ntxwv siab ua luaj li! Tib neeg feem coob mas siab phem heev, pheej tham txog tej kev hloov tus moj yam, kev zwm rau Vajtswv, kev ua lawv tes dej num kom ncaj ncees, kev ua txhua yam kom raws li qhov tseeb tej hauv paus ntsiab lus—cov tib neeg no yog dab tsi? Lawv muaj lub siab me dhau lawm! Cov neeg Suav hais li cas? Lawv qis heev. Qis txhais li cas? Siab phem dhau lawm. Thiab cov tib neeg no saib rau qhov twg xwb? Lawv cia siab rau tej yam uas loj, tej yam uas siab, tej yam uas kim kim xwb. Cov uas cia siab rau tej yam uas kim kim ntawd mas pheej xav kom nce qib mus lawm tom ntej xwb, tseem cia siab yam tsis muaj qab hau hais tias muaj ib hnub Vajtswv yuav tsa lawv sawv mus rau saum nruab ntug mus ntsib Nws. Koj xav mus ntsib Vajtswv tab sis koj tsis xav nug seb Vajtswv puas xav ntsib koj los tsis xav—koj tsuas xav tau tej uas phim hwj no xwb! Koj tsuas tau ntsib Vajtswv ob peb zaug xwb lod? Tib neeg tsis paub Vajtswv, yog li ntawd thaum koj ntsib Nws koj tseem yuav tawm tsam Nws. Yog li ntawd, qhov laj thawj uas txhawb kom cov tib neeg no muaj kev nyuaj siab, kev ntxhov siab, thiab kev txhawj xeeb yog dab tsi? Qhov ntawd puas yog vim tej kev nyuaj nyob hauv lawv lub neej tiag tiag? Tsis yog, qhov ntawd tsis yog tias lawv muaj tej kev nyuaj nyob hauv lawv lub neej tiag tiag, qhov ntawd yog qhov tias lawv tau muab lawv txoj kev mob siab rau txoj kev ntseeg Vajtswv ntawd tig mus rau lawv lub neej ntawm sab cev nqaij daim tawv lawm. Txoj kev mob siab ntawm lawv txoj kev caum ntawd tsis yog qhov tseeb, tab sis nws yog ua ib lub neej kom zoo siab, xyiv fab rau lub neej zoo thiab xyiv fab rau ib lub neej zoo rau yav tom ntej. Cov tib neeg no tej teeb meem puas daws tau yooj yim? Puas muaj cov tib neeg zoo li no nyob rau hauv pawg ntseeg? Lawv pheej nug lwm tus hais tias, “Au, thaum twg Vajtswv hnub mam li los? Tsis yog twb hais ob peb xyoos los lawm tias Vajtswv tes hauj lwm tab tom yuav los xaus lod? Yog li ntawd vim li cas tes hauj lwm ntawd tseem tsis tau xaus?” Puas muaj ib txoj hau kev twg los kho cov tib neeg zoo li no? Tsuas hais ib lo lus rau lawv xwb, thiab hais rau lawv tias, “Tsis ntev lawm!” Thaum hais txog cov tib neeg zoo li no mas, xub nug lawv hais tias, “Koj yeej ib txwm nug txog qhov no. Koj puas tau npaj? Yog npaj lawm, ces txhob nyob rau ntawm no yog koj tsis xav nyob. Cia li mus raws li qhov koj xav. Txhob tawm tsam koj tus kheej tej kev ntshaw, thiab txhob ua kom lub neej nyuaj rau koj tus kheej. Vajtswv lub tsev tsis cia koj nyob rau ntawm no, nws tsis khi koj rau ntawm no. Koj xav tawm mus thaum twg los tau. Tsis txhob pheej nug hais tias nyob rau ntawm tej lus paj lus cua ntawd muaj dab tsi tshiab. Tsuas qhia rau koj tias qhov tshiab nyob rau ntawm tej lus paj lus cua ntawd ces yog ‘Tsis ntev’ xwb! Yog koj tsis zoo siab rau lo lus teb ntawd, yog koj twb npaj nyob rau hauv koj lub siab lawm thiab yuav ua tej ntawd tsis ntev no, ces siv kuv lo lus qhia hais tias: Muab cov phau ntawv ntawm Vajtswv cov lus ntawd rov qab mus rau pawg ntseeg kom sai li sai tau, muab koj tej khoom ntim es mus. Peb ib leeg tsuas yuav hais tias sib ntsib dua rau ib leeg, ces koj yuav tsis tas nyuaj siab, ntxhov siab, los sis txhawj xeeb txog tej no dua li lawm. Rov qab mus tsev es mus ua koj lub neej. Kuv xav kom koj tau zoo! Kuv xav kom koj muaj ib lub neej zoo siab thiab txaus siab thiab kuv cia siab tias txhua yam yuav ua hauj lwm rau koj nyob rau yav tom ntej!” Koj xav li cas txog qhov no? (Zoo.) Qhia rau lawv kom tawm ntawm pawg ntseeg mus; txhob cia lawv nyob. Vim li cas txhob cia lawv nyob? (Lawv tsis ntseeg Vajtswv tiag tiag, yog li ntawd qhov cia lawv nyob ntawd tsis muaj qab ntxhiab dab tsi.) Qhov ko yog lawm; lawv yog cov tsis ntseeg! Qhov cia cov tsis ntseeg nyob es tsis ncaws lawv tawm ntawd yuav muaj qab ntxhiab dab tsi? Ib txhia tib neeg hais tias, “Tab sis lawv twb tsis tau ua ib yam dab tsi phem li, thiab lawv tsis tau tab kaum ib yam dab tsi li.” Lawv puas tas tab kaum ib yam dab tsi li? Qhia Kuv seb, ib tug zoo li no nyob hauv ib pab pawg neeg tsis ua rau muaj ib qho kev tab kaum lod? Lawv mus qhov twg los xij, lawv tus yam ntxwv sab nraud thiab tej kev ua twb ua rau muaj ib qho kev tab kaum. Lawv yeej tsis muaj kev mob siab rau sab ntsujplig, lawv yeej tsis nyeem Vajtswv cov lus, lawv yeej tsis thov Vajtswv los sis muab kev sib qhia rau hauv tej kev sib txoos ua ke li, lawv tsuas lam ua raws li feem coob hauv lawv tej kev kawm, pheej nug tias muaj dab tsi tshiab nyob rau ntawm tej lus paj lus cua xwb. Lawv mas siab mos siab muag heev thiab hloov sai heev yam twv tsis tau li. Tshwj xeeb mas lawv kuj mob siab rau txoj kev noj, kev haus, thiab kev xyiv rau lawv tus kheej thiab, thiab haj tseem muaj ib txhia uas twb nkeeg, ib txhia uas ntshaw noj, ib txhia uas ntshaw pw, ib txhia uas ua dog ua dig, ib txhia uas tsuas muaj kom coob nyob rau hauv Vajtswv lub tsev xwb. Lawv tsis txhawj lawv tus kheej txoj kev ua lawv tej dej num, thiab lawv tsuas yog cov neeg uas nkim sij hawm xwb. Thaum lawv los rau ntawm Vajtswv lub tsev, lawv tsuas los rau ntawd los nrhia tej uas muaj txiaj ntsim rau lawv tus kheej thiab los siv xwb. Yog lawv siv tsis tau, ces lawv tawm mus ceev heev li, qhov ntawd tsis zoo dua rau lawv tawm mus kom sai dua li qeeb dua lod? Cov tib neeg zoo li no yeej ua tsis tau dej num mus kom txog thaum kawg thiab lawv txoj kev ua dej num ntawd tsis muaj qhov tshwm sim uas zoo li. Thaum lawv ua dej num mas, lawv tsis ua tej yam uas yog li—lawv tsuas yog cov tsis ntseeg xwb. Nyob rau lawv txoj kev ntseeg Vajtswv ntawd, lawv xam tej teeb meem los ntawm lub tswv yim sab nraud los xwb. Thaum Vajtswv lub tsev vam meej, lawv zoo siab, xav hais tias lawv muaj kev cia siab txog qhov tau koob hmoov, hais tias lawv muaj qhov zoo, hais tias lawv txoj kev ntseeg Vajtswv mas yeej muaj qab hau, hais tias lawv tsis tau poob peev, thiab lawv tau twv rau sab uas yeej lawm. Txawm li cas los xij, yog Vajtswv lub tsev raug tej hwj chim phem caij tsuj, raug lub zej zog tso tseg, raug hais lus phem rau thiab raug kev tsim txom, muaj tej cwj pwm tsis zoo, ces tsis yog lawv tsis chim siab xwb, tab sis lawv luag rau thiab. Peb cia puas tau cov tib neeg zoo li no nyob rau hauv pawg ntseeg? (Tsis tau.) Lawv yog cov tsis ntseeg thiab cov yeeb ncuab! Yog ib tug yeeb ncuab nyob ntawm koj ib sab tab sis koj muab lawv xam li yog ib tug kwv tij los sis ib tug muam, ces qhov ntawd tsis ua rau koj ruam lod? Yog cov tib neeg zoo li no tsis muaj peev xwm ua dej num yam txaus siab hlo, ces yuav tsum muab lawv ncaws tawm, puas yog? (Yog.) Yog kawg, ua kom tsim nyog thiab yog. Tsis tas yuav qhia lawv, tsuas ua tib zoo hais kom lawv tawm mus xwb. Tsis tas nkim koj txoj pa rau lawv, koj yuav tsum muab lawv xa rov qab mus tsev. Nyob rau hauv lub ntsiab tseeb mas, lawv tsis yog cov tib neeg uas yog Vajtswv lub tsev tug, lawv tsuas yog cov tsis ntseeg uas lawv nrhiav lawv kev los rau hauv pawg ntseeg xwb. Lawv rov qab mus rau qhov chaw uas lawv tuaj tau, thiab koj yeej hais tau kom lawv tawm mus. Tom qab lawv twb nkag los rau hauv pawg ntseeg lawm, ib txhia tib neeg pom ib qho txawv ntawm lawv tus kheej thiab cov kwv tij thiab cov muam thiab Vajtswv lub tsev. Qhov no mas vim lawv paub tias lawv los ua dab tsi, lawv paub tias cov neeg ntawd ntseeg tiag tiag los sis tsis ntseeg tiag, thiab dhau ntawm lawv tej kev cia siab uas hais txog qhov thaum twg Vajtswv tes hauj lwm mam li xaus thiab seb lawv puas tau txais koob hmoov ntawd, ces tsis muaj tes hauj lwm ntawm Vajtswv lub tsev los sis ib qho tseeb uas Vajtswv cheem tsum kom tib neeg to taub ntawd muaj ib yam dab tsi cuam tshuam rau lawv kiag li; lawv tsis quav ntsej tej no li, lawv tsis nyeem cov phau ntawv ntawm Vajtswv cov lus uas pawg ntseeg xa mus rau lawv nyeem, lawv tsuas muab cov phau ntawv ntawd tso pawg lug es tseem tsis tau qhib pob ntawv ntawd. Cov tib neeg zoo li no tsuas hais tias lawv ntseeg Vajtswv xwb; zoo li lawv ntseeg ib yam li lwm tus ntseeg saum daim tawv thiab lam ua lawv tej dej num mus raws li feem coob xwb, tab sis lawv yeej tsis nyeem Vajtswv cov lus li. Lawv yeej tsis tau qhib ib phau ntawv ntawm Vajtswv cov lus ib zaug li, lawv yeej tsis nthuav ib plooj ntawv li—lawv yeej tsis nyeem ib qho ntawm phau ntawv ntawd li. Lawv yeej tsis saib tej yeeb yaj duab ntawm cov lus tim khawv uas hais txog txoj kev ntsib kev pom, cov yeeb yaj kiab uas tshaj tawm txoj hmoo zoo, los sis tej nkauj thiab ntau yam uas Vajtswv lub tsev muab tso os lai li thiab. Lawv ib txwm saib dab tsi xwb? Lawv saib xov xwm, tej kev tham uas nrov koob nrov npe, tej yeeb yaj duab, thiab tej kev tso dag tso luag, tsuas saib yam uas tsis muaj qab hau xwb. Cov tib neeg no yog tib neeg dab tsi? Lawv nquag mus saib pawg ntseeg mus nug hais tias, “Tam sim no twb tshaj tawm txoj moo zoo mus rau pes tsawg lub teb chaws lawm? Muaj pes tsawg tus tib neeg twb tig los rau Vajtswv lawm? Tam sim no cov pawg ntseeg twb tsim tsa rau hauv pes tsawg lub teb chaws lawm? Muaj pes tsawg pawg ntseeg nyob rau hauv? Vajtswv tes hauj lwm nyob rau theem twg lawm?” Thaum lawv khoom mas, lawv pheej nug txog tej no. Puas muaj ib qho ua xyem xyav tias tus tib neeg no yog ib tug neeg soj? Qhia Kuv seb, qhov cia ib tug neeg zoo li no nyob puas ua li cas? (Ua.) Yog lawv tsis tawm ntawm pawg ntseeg mus raws li qhov lawv tus kheej pom zoo, ces nej yuav tsum muab lawv tshem tawm kom sai li thaum nej paub txog lawv es tshem pawg ntseeg tawm ntawm cov neeg tsim teeb meem no. Qhov cia lawv nyob ntawd tsis muaj qab hau thiab yuav tsim teeb meem. Yog li ntawd, tej uas cov tib neeg no nyuaj siab, ntxhov siab, thiab txhawj xeeb txog ntawd tsis muaj dab tsi cuam tshuam rau peb ib qho li. Txhob mus thab muab tswv yim rau lawv, thiab qhov sib qhia txog qhov tseeb nrog lawv ntawd tsis muaj qab hau. Cia li muab lawv tshem thiab ua qhov ntawd kom tiav—qhov daws cov tib neeg zoo li no li no thiaj li yog qhov zoo tshaj plaws.

Dhau ntawm cov tsis tseeg lawm, kuj muaj cov neeg laus nyob rau hauv cov kwv tij thiab cov muam thiab, cov uas muaj hnub nyoog 60 mus rau 80 los sis 90 xyoo thiab cov uas, vim lawv lub hnub nyoog laus lawm, kuj tau ntsib tau pom tej qhov kev nyuaj lawm thiab. Dhau ntawm lawv lub hnub nyoog lawm, lawv txoj kev xav hauv lub hlwb tsis tshua yog los sis tsis raug lawm, thiab lawv tej tswv yim thiab tej kev xam pom tsis tshua mus raws li qhov tseeb lawm. Cov neeg laus no los tsuas muaj tib co teeb meem thiab xwb, thiab lawv pheej txhawj xeeb hais tias, “Kuv txoj kev noj qab nyob zoo tsis tshua zoo lawm thiab kuv ua tsis tau yam dej num uas kuv ua tau lawm. Yog kuv tsuas ua tes dej num me me no xwb, Vajtswv puas yuav nco ntsoov kuv lawm? Qee zaum kuv muaj mob, thiab kuv xav tau ib tug neeg los saib xyuas kuv. Thaum tsis muaj leej twg los saib xyuas kuv, ces kuv tsis muaj peev xwm ua kuv tes dej num, yog li ntawd kuv yuav ua li cas? Kuv laus lawm thiab kuv tsis nco qab Vajtswv cov lus thaum kuv nyeem cov lus ntawd thiab nws nyuaj rau kuv to taub qhov tseeb. Thaum sib qhia txog qhov tseeb mas, kuv hais lus ua rov ua rais thiab tsis to taub li, thiab kuv tsis muaj ib qho kev ntsib kev pom uas tsim nyog muab qhia li. Kuv laus lawm thiab kuv tsis muaj zog txaus, kuv tsis pom kev zoo thiab kuv tsis khov lawm. Txhua yam puav leej nyuaj rau kuv. Tsis yog kuv tsuas ua tsis tau kuv tes dej num xwb, tab sis kuv hno qab ntau yam yooj yim heev thiab ua ntau yam yuam kev. Qee zaum mas kuv feeb tsis meej ces kuv tsim ntau qhov teeb meem rau pawg ntseeg thiab rau kuv cov kwv tij thiab cov muam. Kuv xav kom tau txais kev cawm dim thiab caum qhov tseeb tab sis nws nyuaj heev. Kuv yuav ua li cas?” Thaum lawv xav txog tej no, lawv txawm pib nyuaj siab, thiaj li xav hais tias, “Ua li cas kuv tsuas pib ntseeg Vajtswv rau thaum laus no xwb? Ua li cas kuv tsis zoo li cov uas thaum lawv muaj 20 thiab 30 tawm xyoo, los sis cov uas lawv tseem muaj 40 thiab 50 tawm xyoo? Ua li cas tam sim no kuv tsuas los ntsib Vajtswv tes hauj lwm rau thaum kuv laus heev lawm xwb? Nws tsis yog tias kuv txoj hmoo phem; yam tsawg kawg los tam sim no kuv tau ntsib Vajtswv tes hauj lwm lawm. Ces kuv txoj hmoo zoo, thiab Vajtswv tau ua siab zoo rau kuv! Tsuas muaj ib yam uas kuv tsis zoo siab txog, thiab qhov ntawd ces yog qhov hais tias kuv laus heev lawm xwb. Kuv tsis nco qab zoo li lawm, thiab kuv txoj kev noj qab nyob zoo los tsis zoo li lawm thiab, tab sis kuv muaj ib lub siab khov kho. Tsuas yog hais tias kuv lub cev tsis mloog kuv lus lawm xwb, thiab kuv tsaug tsaug zog tom qab mloog tau ib nyuag pliag nyob rau hauv tej kev sib txoos ua ke. Qee zaum kuv qi kuv ob lub qhov muag thov Vajtswv ces cia li tsaug zog lawm, thiab kuv lub siab feeb tsis meej thaum kuv nyeem Vajtswv cov lus. Tom qab nyeem tau ib pliag lawm, kuv tsaug tsaug zog ces cia li tsaug zog lawm li, ces thiaj li tsis to taub cov lus ntawd. Kuv yuav ua li cas? Vim muaj tej kev nyuaj uas loj zoo li no, los kuv tseem muaj peev xwm caum thiab to taub qhov tseeb thiab lod? Yog tsis muaj, thiab yog kuv tsis muaj peev xwm xyaum ua raws li qhov tseeb tej hauv paus ntsiab lus, ces tag nrho kuv txoj kev ntseeg txawm yuav tsis muaj qab hau li lod? Kuv yuav tsis tau txais kev cawm dim li lod? Kuv yuav ua li cas? Kuv txhawj xeeb heev li! Thaum laus li no lawm, tsis muaj dab tsi tseem ceeb li lawm. Tam sim no kuv ntseeg Vajtswv lawm, ces kuv tsis muaj kev txhawj xeeb ntxiv lawm los sis tsis muaj ib yam dab tsi ntxhov siab txog lawm, thiab kuv cov me nyuam los twb loj hlob lawm ces lawv tsis tim tsum kuv los saib xyuas los sis tu lawv ntxiv lawm, qhov kuv xav tau tshaj plaws hauv lub neej ces yog los caum qhov tseeb, ua tes dej num ntawm ib tug uas raug tsim tawm los, es thaum kawg kom tau txais kev cawm dim nyob rau cov niaj cov xyoo uas kuv tseem muaj xwb. Txawm li cas los xij, tam sim no saib rau ntawm kuv qhov xwm txheej tiag tiag, uas yog tsis tshua pom kev vim lub hnub nyoog thiab lub hlwb feeb tsis meej, tsis noj qab nyob zoo lawm, ces tsis muaj peev xwm ua kuv tes dej num kom zoo lawm, thiab qee zaum mas tseem tsim teeb meem rau thaum kuv sim ua kom ntau li qhov kuv ua tau thiab, mas nws zoo li qhov ua kom tau txais kev cawm dim ntawd tsis yooj yim rau kuv li.” Lawv xav txog tej no tas li ces thiaj li ntxhov siab tuaj, thiab tom qab ntawd thiaj li xav hais tias, “Zoo li tias yam zoo tsuas tshwm sim rau cov neeg hluas xwb es tsis tshwm sim rau cov neeg laus. Nws zoo li tias txawm txhua yam zoo npaum li cas los, kuv yuav tsis muaj peev xwm xyiv fab rau tej ntawd ntxiv lawm.” Lawv yim xav txog tej no mas, lawv yim nyuaj siab thiab lawv yim ntxhov siab ntxiv xwb. Lawv tsis yog tsuas txhawj xeeb txog lawv tus kheej xwb, tab sis lawv kuj mob siab thiab. Yog lawv quaj, ces lawv xav hais tias qhov ntawd tsis tsim nyog quaj rau kiag li, thiab yog lawv tsis quaj, ces qhov mob ntawd, qhov mob siab ntawd, yeej nyob nrog nraim lawv tas li. Yog li ntawd, lawv yuav ua li cas? Tshwj xeeb mas, muaj ib txhia neeg laus uas xav siv tag nrho lawv lub sij hawm los muab lawv tus kheej fij rau Vajtswv thiab ua lawv tes dej num, tab sis lawv lub cev tsis noj qab nyob zoo lawm. Ib txhia muaj ntshav siab, ib txhia muaj ntshav qab zib, ib txhia muaj teeb meem rau tej plab hnyuv, thiab lawv lub zog ntawm lub cev ua tsis tau raws li tej kev cheem tsum ntawm lawv tes dej num lawm, ces yog li ntawd lawv thiaj li nyuaj siab. Lawv pom cov neeg hluas muaj peev xwm noj thiab haus, khiav thiaj dhia, ces lawv txawm khib. Lawv yim pom cov neeg hluas ua tej zoo li no mas, lawv yim nyuaj siab ntxiv, thiaj li xav hais tias, “Kuv xav ua kuv tes dej num kom zoo es kom caum tau thiab to taub qhov tseeb, thiab kuv xav xyaum ua raws li qhov tseeb thiab, yog li ntawd vim li cas nws yuav nyuaj ua luaj li? Kuv laus heev thiab tsis muaj qab hau lawm! Vajtswv tsis xav tau cov neeg laus lawm lod? Puas yog cov neeg laus tsis muaj qab hau lawm tiag tiag? Peb tsis tau txais kev cawm dim lawm lod?” Lawv tu siab thiab tsis muaj peev xwm hnov zoo siab lawm txawm lawv xav txog qhov ntawd npaum li cas los xij. Lawv tsis xav kom plam ib lub sij hawm zoo zoo li no thiab ib lub cib fim zoo zoo li no, tiam sis lawv tsis muaj peev xwm muab lawv tus kheej fij rau thiab ua lawv tes dej num kom kawg lawv lub siab lub ntshws li cov neeg hluas ua lawm. Ces cov neeg laus no thiaj li poob mus rau hauv txoj kev nyuaj siab, kev ntxhov siab, thiab kev txhawj xeeb vim lawv lub hnub nyoog. Txhua zaus uas lawv ntsib tej yam kev nyuaj, kev poob qab, kev txom nyem, los sis teeb meem mas, lawv hais tias yog tim lawv lub hnub nyoog, thiab haj tseem ntxub lawv tus kheej thiab tsis muaj qhov nyiam lawv tus kheej. Tab sis txawm li cas los xij, qhov ntawd tsis muaj txiaj ntsim, tsis muaj kev daws tau, thiab lawv tsis muaj txoj hau kev mus lawm tom ntej lawm. Puas yog tias lawv tsis muaj txoj hau kev mus lawm tom ntej tiag tiag? (Cov neeg laus los kuj yuav tsum ua lawv tej dej num kom ntau li qhov lawv muaj peev xwm ua thiab.) Qhov cov neeg laus ua lawv tej dej num kom ntau li qhov lawv muaj peev ua ntawd yeej lees txais tau thiab, puas yog? Cov neeg laus ntawd caum tsis tau qhov tseeb ntxiv lawm vim lawv lub hnub nyoog lod? Puas yog lawv tsis muaj peev xwm to taub qhov tseeb lawm? (Muaj, lawv muaj.) Cov neeg laus puas tuaj yeem to taub qhov tseeb? Lawv tuaj yeem to taub tej qhov, thiab txawm yog cov neeg hluas los yeej tsis to taub qhov tseeb tag nrho thiab. Cov neeg laus mas yeej muaj ib qho kev nkag siab yuam kev, ntseeg hais tias lawv feeb tsis meej lawm, hais tias lawv tsis nco qab zoo lawm, ces yog li ntawd lawv thiaj li tsis tuaj yeem to taub qhov tseeb. Lawv hais puas yog? (Tsis yog.) Txawm cov neeg hluas muaj zog tshaj cov neeg laus, thiab lawv lub cev khov tshaj los xij, qhov tiag ces lawv lub peev xwm to taub, nkag siab, thiab paub ntawd tsuas zoo ib yam li cov neeg laus lub thiab xwb. Cov neeg laus ntawd tsis txeev hluas thiab lod? Lawv tsis yog yug los es twb laus lawm, thiab muaj ib hnub cov neeg hluas los yeej puav leej yuav laus thiab. Cov neeg laus yuav tsum txhob pheej xav hais tias vim lawv laus, lub cev tsis muaj zog, tsis noj qab nyob zoo, thiab tsis nco zoo lawm, es lawv thiaj li txawv ntawm cov neeg hluas. Qhov tseeb tiag, yeej tsis muaj qhov txawv li. Kuv txhais li cas thaum kuv hais tias yeej tsis muaj qhov txawv li? Txawm ib tug twg laus los sis hluas los xij, lawv tej moj yam qias vuab tsuab yeej zoo ib yam xwb, lawv tej cwj pwm thiab tej kev xam pom txog txhua yam ntawd yeej zoo ib yam xwb, thiab lawv tej kev xam thiab tej kev pom txog txhua yam ntawd los yeej zoo ib yam xwb. Yog li ntawd, cov neeg laus yuav tsum txhob xav hais tias vim lawv laus, muaj tej kev ntshaw uas tsis paub ntxaus ntawd tsawg tshaj li cov hluas, thiab muaj peev xwm nyob tus lawm, ces lawv tsis muaj tej kev vam los sis tej kev ntshaw uas phem lawm, thiab hais tias lawv muaj tej moj yam qias vuab tsuab tsawg tshaj lawm—qhov no yog ib qho kev nkag siab yuam kev. Cov neeg hluas twb nrhiav tau ib txoj hauj lwm, yog li ntawd cov neeg hluas nrhiav tsis tau lod? Cov neeg hluas ua tau ntau yam tawm tsam tej hauv paus ntsiab lus thiab lam tau lam coj, yog li ntawd cov neeg laus ua tsis tau ib yam li ntawd thiab lod? (Tau, lawv ua tau kawg.) Cov neeg hluas mas tej zaum khav theeb, yog li ntawd cov neeg laus khav theeb tsis tau thiab lod? Txawm li cas los xij, thaum cov neeg laus khav theeb, vim lawv lub hnub nyoog laus lawm lawv thiaj li tsis tsiv nyaum heev, thiab qhov ntawd tsis yog ib lub siab uas khav theeb heev. Cov neeg hluas qhia tshwm txoj kev khav theeb uas txawv heev vim lawv tej tes taw tsis ywj thiab lawv lub siab ua ywj fab ywj fwj. Txawm li cas los xij, lawv lub ntsiab tseeb ntawm txoj kev khav theeb thiab lawv tej moj yam qias vuab tsuab ntawd zoo ib yam xwb. Txawm ib tug neeg laus twb ntseeg Vajtswv los tau ntev npaum li cas lawm los xij, los sis lawv twb ua lawv tes dej num los tau pes tsawg lub xyoo lawm los xij, yog lawv tsis caum qhov tseeb, ces lawv tej moj yam qias vuab tsuab yeej tseem yuav nyob mus. Piv txwv li, ib txhia neeg laus uas nyob ib leeg ntawd lawv keev nyob lawv tus kheej thiab lawv ua raws li lawv xav xwb uas yog: Lawv teem sij hawm thiab lawv tus kheej yeej npaj rau txoj kev noj mov, pw, thiab so, thiab lawv tsis kam ua kom tab kaum qhov muaj paus muaj ntsis ntawm txhua yam nyob rau hauv lawv lub neej. Tuaj sab nrauv saib mas cov neeg laus no zoo li yog neeg zoo heev, tab sis lawv tseem muaj tej moj yam qias vuab tsuab, thiab koj paub li no tom qab koj tau koom nrog lawv los tau ntev lawm. Ib txhia neeg laus mas yeej twv tsis tau thiab khav theeb kawg li; lawv yuav tsum muaj yam uas lawv xav noj xwb xwb li, thiab tsis muaj leej twg cheem tau lawv yog thaum lawv tsis ua dab tsi es xav mus rau ib qho twg lawm. Thaum lawv xav ua tej yam lawm mas, txawm yog cov nees qus los yeej cab tsis tau lawv tawm. Tsis muaj leej twg hloov tau lawv, thiab yeej twv tsis tau lawv mus tag lawv sim neej. Cov neeg laus tawv ncauj zoo li no mas haj yam tsim teeb meem tshaj li cov neeg hluas uas tswj tsis tau! Yog li ntawd, thaum ib txhia tib neeg hais tias, “Cov neeg laus tsis qias vuab tsuab heev npaum li cov neeg hluas. Cov neeg laus ua neej los dhau ib lub sij hawm uas tuav tej kab lis kev cai qub thiab sib raug zoo, ces vim li ntawd cov neeg laus tiam no thiaj li tsis qias vuab tsuab heev,” qhov hais li no puas muaj tseeb? (Tsis muaj tseeb.) Qhov no tsuas yog lawv tus kheej txoj kev cav xwb. Cov neeg hluas tsis nyiam ua hauj lwm nrog lwm tus, es cov neeg laus tsis zoo ib yam li ntawd thiab lod? (Lawv zoo ib yam li ntawd thiab.) Ib txhia neeg laus los haj yam muaj tej moj yam qias vuab tsuab uas phem tshaj li cov neeg hluas tej moj yam, pheej khav txog lawv lub hnub nyoog uas laus lawm thiab khav lawv tus kheej txog lawv cov niaj cov xyoos uas laus lawm, es thiaj li hais tias, “Kuv muaj hnub nyoog siab lawm. Koj muaj pes tsawg xyoo lawm? Kuv puas yog tus hlob, los sis koj puas yog? Koj tsis xav hnov qhov no, tab sis kuv twb los nyob ntev tshaj koj lawm, ces koj yuav tsum tau mloog kuv hais. Kuv tau ntsib tau pom thiab paub zoo lawm. Nej cov me nyuam hluas ntawm ko to taub dab tsi xwb? Kuv twb ntseeg Vajtswv ua ntej koj yug los lawm.” Qhov no tsis yog tsim teeb meem ntxiv xwb lod? (Yog.) Thaum lawv muaj lub cim hu ua “neeg laus” lawm, ces cov neeg laus ntawd haj yam tsim teeb meem ntxiv. Yog li ntawd, nws tsis yog hais tias cov neeg laus ntawd tsis muaj dab tsi ua, thiab tsis yog lawv tsis muaj peev xwm ua lawv tej dej num xwb, lawv haj yam tsis muaj peev xwm caum qhov tseeb thiab—yeej muaj ntau yam rau lawv ua. Ntau txoj kev ntseeg cuav thiab kev ntseeg yuam kev uas koj tau muaj nyob rau hauv koj sim neej, nrog rau ntau lub tswv yim thiab tej kev xav phem uas qub qub, ntau yam uas tsis paub qab hau thiab tawv ncauj, tej uas qub qub, tej yam uas tsis muaj qab hau, thiab tej yam ruam ruam uas koj muaj ntawd twb muab sau los nyob rau hauv koj lub siab huv si lawm, ces koj yuav tsum siv sij hawm kom ntau tshaj cov neeg hluas los muab tej ntawd dig tawm, tshuaj xyuas, thiab lees paub tej no. Nws tsis yog qhov hais tias koj tsis muaj dab tsi ua, los sis hais tias koj yuav tsum nyuaj siab, ntxhov siab, thiab txhawj xeeb thaum koj tsis muaj dab tsi ua lawm—qhov no tsis yog koj txoj hauj lwm thiab tsis yog koj lub luag hauj lwm. Ua ntej tshaj plaws, cov neeg laus yuav tsum muaj lub siab uas yog. Txawm tias koj muaj hnub nyoog ntau thiab koj lub cev laus lawm los xij, koj tseem yuav tsum muaj ib lub siab uas hluas. Txawm tias koj laus lawm, koj xav qeeb qeeb thiab nco tsis zoo lawm los xij, yog koj tseem paub koj tus kheej, tseem to taub cov lus uas kuv hais, thiab tseem to taub qhov tseeb, ces qhov ntawd ua pov thawj qhia tias koj tsis tau laus thiab tias koj tseem muaj peev xwm. Yog ib tug twg muaj 70 tawm xyoo tab sis tsis muaj peev xwm to taub qhov tseeb lawm, ces qhov no qhia tias lawv lub siab me dhau lawm thiab tsis ua txoj hauj lwm. Yog li ntawd, lub hnub nyoog tsis muaj feem dab tsi thaum hais txog qhov tseeb thiab, tshaj qhov ntawd, lub hnub nyoog tsis muaj feem dab tsi thaum hais txog tej moj yam qias vuab tsuab. Twb muaj Ntxwgnyoog los ntau kaum tawm txhiab xyoo, pua pua plhom xyoo lawm, thiab nws tseem yog Ntxwgnyoog, yog li ntawd peb tseem yuav tsum ntxiv ib lo lus tom qab rau “Ntxwgnyoog” thiab, ces qhov ntawd yog tus “Ntxwgnyoog laus,” uas txhais hais tias nws yog tus dab phem kawg li, puas yog? (Yog.) Yog li ntawd, cov neeg laus yuav tsum xyaum li cas? Ib qho ces yog qhov hais tias koj yuav tsum muaj lub siab ib yam li cov neeg hluas, caum qhov tseeb thiab paub koj tus kheej, thiab thaum koj paub koj tus kheej lawm, ces koj yuav tsum lees txim hloov dua siab tshiab. Lwm qhov ces yog qhov hais tias koj yuav tsum nrhiav tej hauv paus ntsiab lus uas nyob hauv txoj kev ua koj tes dej num thiab xyaum ua raws li qhov tseeb tej hauv paus ntsiab lus. Koj yuav tsum txhob muab koj tus kheej tshem tawm ntawm txoj kev caum qhov tseeb, es hais tias koj laus lawm, muaj hnub nyoog siab lawm, hais tias koj tsis muaj tej kev xav hauv lub hlwb uas nquag li cov neeg hluas muaj lawm, hais tias koj tsis muaj tej moj yam qias vuab tsuab uas cov neeg hluas muaj, hais tias koj twb ntsib twb pom txhua yam nyob hauv lub neej no lawm, paub txog tej ntawd tob lawm, ces yog li ntawd koj tsis muaj tej kev vam los sis tej kev ntshaw uas phem lawm. Qhov koj txhais tiag tiag los ntawm qhov hais li no ces yog, “Kuv tej moj yam qias vuab tsuab tsis phem luaj twg, yog li ntawd txoj kev caum qhov tseeb ntawd yog rau nej cov neeg hluas xwb. Qhov ntawd tsis muaj feem cuam tshuam dab tsi rau peb cov neeg laus. Peb cov neeg laus tsuas ua tes hauj lwm dab tsi los xij thiab siv lub zog dab tsi los xij uas peb ua tau nyob rau hauv Vajtswv lub tsev xwb, ces tom qab ntawd peb yuav ua peb tes dej num kom tiav zoo thiab peb yuav dim. Hais txog qhov Vajtswv nthuav tib neeg tej moj yam qias vuab tsuab, tej moj yam uas tawm tsam Khetos, thiab lub ntsiab tseeb uas tawm tsam Khetos tawm ntawd, qhov ntawd yog yam uas cov neeg hluas yuav tsum to taub. Tej zaum nej ua tib zoo mloog qhov ntawd, thiab qhov peb tos txais nej zoo thiab saib tej xwm txheej nyob ib puag ncig los tsom kwm nej kom nyob nyab xeeb ntawd twb txaus lawm. Peb cov neeg laus mas tsis muaj tej kev vam uas phem. Peb laus lawm, peb lub hlwb khiav qeeb qeeb, ces vim li ntawd peb tej lus teb thiaj li yog qhov zoo xwb. Ua ntej peb tuag, peb muaj lub siab zoo. Thaum tib neeg laus lawm, lawv coj zoo, yog li ntawd peb yog cov neeg coj zoo.” Qhov lawv hais tiag tiag ntawd ces yog qhov hais tias lawv tsis muaj tej moj yam qias vuab tsuab li. Thaum twg es peb tau hais lawm hais tias cov neeg laus tsis tas caum qhov tseeb los sis txoj kev caum qhov tseeb mas sib txawv nyob rau ntawm koj lub hnub nyoog? Peb puas tau keev hais li no li? Tsis tau, peb tsis tau hais. Nyob hauv Vajtswv lub tsev thiab hais txog qhov tseeb ntawd, cov neeg laus puas yog ib pab pawg uas tshwj xeeb? Tsis yog, lawv tsis yog. Lub hnub nyoog tsis muaj feem dab tsi thaum hais txog qhov tseeb, ib yam li thaum hais txog nej tej moj yam qias vuab tsuab, uas yog qhov tob ntawm nej txoj kev qias vuab tsuab ntawd thiab, txawm nej tsim nyog caum qhov tseeb, txawm nej tau txais kev cawm dim, los sis qhov feem uas nej yuav dim ntawd muaj npaum li cas los xij. Tsis yog li ntawd lod? (Yog.) Peb twb sib qhia txog qhov tseeb los tau ntau lub xyoo lawm, tab sis peb tsis tau sib qhia txog ntau hom uas sib txawv ntawm qhov tseeb raws li tib neeg tej hnub nyoog uas sib txawv. Yeej tsis tau sib qhia txog qhov tseeb thiab tsis tau muab tej moj yam qias vuab tsuab nthuav tawm huv si rau cov neeg hluas los sis cov neeg laus li, thiab tsis tau muab hais tias, vim lawv lub hnub nyoog laus lawm, xav tsis zoo lawm, thiab tsis muaj peev xwm lees txais tej yam tshiab lawm, ces lawv tej moj yam qias vuab tsuab thiaj li cia li zoo zuj zus thiab hloov lawm—tsis tau muab tej no hais dua li. Tsis tau muab ib qho tseeb twg los sib qhia tshwj xeeb kom raws li tib neeg lub hnub nyoog es tsis muaj cov neeg laus nyob rau hauv. Cov neeg laus tsis yog ib pab pawg uas tshwj xeeb nyob rau hauv pawg ntseeg, nyob rau hauv Vajtswv lub tsev, tab sis tsuas zoo ib yam li lwm pab pawg thiab xwb. Tsis muaj dab tsi tshwj xeeb txog lawv li, tsuas yog qhov hais tias lawv tau ua neej los ntev me ntsis lwm cov lawm xwb, hais tias lawv tau los txog rau hauv lub ntiaj teb no ob peb xyoos ua ntej lwm cov lawm xwb, hais tias lawv cov plaub hau txheeb me ntsis lwm cov lawm xwb, thiab hais tias lawv lub cev laus me ntsis lwm cov lawm xwb; dhau ntawm tej no mus lawm ces tsis muaj qhov txawv lawm. Yog li ntawd, yog cov neeg laus pheej xav hais tias, “Kuv laus lawm yog li ntawd qhov ntawd txhais hais tias kuv yog ib tug tib neeg coj zoo, hais tias kuv tsis muaj tej moj yam qias vuab tsuab, thiab hais tias kuv tsuas muaj txoj kev qias vuab tsuab me me lawm xwb,” ces qhov no tsis yog ib txoj kev to taub yuam kev lawm lod? (Yog.) Qhov ntawd tsis txaj muag lod? Ib txhia neeg laus mas yog cov neeg laus uas txawj dag, txawj ntxias kawg li. Lawv hais tias lawv tsis muaj tej moj yam qias vuab tsuab, thiab haj tseem hais tias lawv tej moj yam qias vuab tsuab ntawd mas twb raug muab rhuav tag lawm, tab sis qhov tseeb tiag ces tej kev nthuav tawm ntawm lawv tej moj yam qias vuab tsuab ntawd yeej muaj tsis tsawg tshaj li lwm tus tib neeg tej li thiab. Qhov tseeb tiag, yeej muaj ntau txoj kev uas peb piav tau txog tej moj yam qias vuab tsuab thiab qhov zoo ntawm hom neeg laus no txoj kev ua neej. Piv txwv li, “cov neeg laus uas txawj dag,” thiab “yav qhiav laus yog yav ntsim tshaj plaws, txoj kev paub kov yeej txoj kev hluas”—ob yam no puav leej siv lo lus “laus,” puas yog? (Yog.) Lwm yam kev piav qhia uas siv lo lus “laus” no yog dab tsi thiab? (Cov neeg laus uas dag ntxias.) Yog, qhov ko yog ib qho zoo, “cov neeg laus uas dag ntxias.” Koj pom hais tias, tag nrho cov ntawd yeej siv lo lus “laus.” Ces muaj “Ntxwgnyoog laus” thiab “cov dab phem uas laus”—cov niag uas laus tshaj plaws! Tib neeg ntseeg dab tsi thaum lawv yog ib feem ntawm ib pab pawg neeg laus? Lawv ntseeg hais tias, “Peb tej moj yam qias vuab tsuab twb raug muab rhuav tag lawm. Tej moj yam qias vuab tsuab ntawd yog ib qho teeb meem rau nej cov hluas. Nej haj yam raug muab ua qias vuab tsuab tshaj peb lawm.” Qhov no tsis yog ib txoj kev txhob txwm ntxeev ntxias lod? Lawv xav npog kom lawv tus kheej zoo thiab tshuab lawv tus kheej lub raj xwb, tab sis qhov tseeb tiag tsis yog li ntawd, thiab txhua yam tsis zoo li ntawd. “Cov dab phem uas laus,” “Ntxwgnyog laus,” “cov neeg laus uas dag ntxias,” “cov neeg laus uas txawj dag,” thiab “khav txog yus lub hnub nyoog laus”—tej kev piav qhia uas siv lo lus “laus” no tsis yog tej yam zoo, thiab tej no yog tej yam phem xwb.

Tam sim no peb tab tom sib qhia txog qhov no los muab ib qho kev ceeb toom rau cov neeg laus, los muab tswv yim rau lawv, thiab los coj lawv kev, thiab kuj los muab ib qho kev tiv thaiv rau cov neeg hluas thiab. Qhov tseem ceeb ntawm lub hom phiaj ntawm qhov hais tej no yog los daws qhov teeb meem dab tsi? Qhov ntawd yog los daws cov neeg laus no txoj kev nyuaj siab, kev ntxhov siab, thiab kev txhawj xeeb, thiab los ua kom paub tseeb hais tias lawv to taub hais tias txoj kev nyuaj siab, kev ntxhov siab, thiab kev txhawj xeeb no loj thiab tsis cheem tsum kom muaj li. Yog koj xav ua ib teg dej num thiab koj yeej tsim nyog ua ib teg dej num lawm, Vajtswv lub tsev puas yuav tsis kam rau koj ua? (Kam.) Vajtswv lub tsev yeej yuav muab ib lub cib fim rau koj ua ib teg dej num xwb xwb li. Vajtswv lub tsev yuav tsis hais tias, “Koj ua tsis tau ib teg dej num vim koj laus lawm. Cia li tawm mus. Peb tsis muab ib lub fwm tsam rau koj.” Tsis ua li ntawd, Vajtswv lub tsev coj ncaj ncees rau txhua tus tib neeg. Tsuav yog koj tsim nyog ua ib teg dej num thiab tsis muaj kev phom sij uas nyob nraim nkoos xwb, ces Vajtswv lub tsev yuav muab lub cib fim rau koj thiab cia koj ua ib teg dej num kom ntau li qhov koj muaj peev xwm ua. Ntxiv ntawd, yog koj xav kom paub koj tus kheej thiab caum qhov tseeb, puas yuav muaj leej twg thuam koj thiab hais tias, “Ib tug neeg laus zoo li koj no puas yuav tsim nyog caum qhov tseeb?” Puas yuav muaj leej twg thuam koj? (Tsis muaj.) Puas yuav muaj leej twg hais tias, “Koj laus lawm thiab feeb tsis meej lawm. Lub ntsiab uas koj caum qhov tseeb yog dab tsi? Vajtswv yuav tsis cawm ib tug uas laus li koj”? (Tsis hais.) Tsis hais, lawv yuav tsis hais. Rau ntawm qhov tseeb mas txhua tus yeej xib txig sib luag, thiab yeej coj ncaj ncees rau txhua tus. Tsuas yog qhov hais tias tej zaum koj tsis caum qhov tseeb es pheej yuav ua ib tug niag tub rog laus, pheej xav hais tias, “Kuv laus lawm ces kuv ua tsis tau ib teg dej num twg lawm.” Qhov tseeb tiag, yeej muaj ntau tes dej num uas koj ua tau mus kom kawg koj lub peev xwm. Yog koj tsis ua ib teg dej num twg li tiam sis khav txog koj lub hnub nyoog laus, xav cem lwm tus xwb, ces leej twg thiaj li yuav xav mloog koj hais? Tsis muaj leej twg li. Koj pheej hais tias, “Au, nej cov neeg hluas mas tsis to taub txhua yam li!” thiab “Au, nej cov neeg hluas mas twm xeeb heev!” thiab “Au, nej cov neeg hluas mas khav theeb heev!” thiab “Au, nej cov neeg hluas mas tub nkeeg heev. Peb cov neeg laus mas rau siab ua hauj lwm, thiab nyob rau kuv lub sij hawm mas peb zoo li no li no.” Qhov hais lus zoo li no muaj qab hau dab tsi? Tsis txhob hais txog koj qhov keeb kwm uas “zoo” ntxiv lawm; tsis muaj leej twg xav hnov qhov ntawd. Qhov tham txog tej uas qub qub ntawd tsis muaj qab hau lawm; tej ntawd tsis sawv cev rau qhov tseeb. Yog koj xav tham txog tej yam, ces siv zog rau qhov tseeb ntxiv, to taub qhov tseeb me ntsis ntxiv, paub koj tus kheej, saib koj tus kheej kom zoo li ib tug tib neeg dog dig xwb es txhob saib li yog ib tug neeg ntawm ib pab pawg tshwj xeeb uas lwm tus yuav tsum hwm, lwm tus saib taus, lwm tus muab saib tseem ceeb thiab kom lwm tus koom nyob ib puag ncig koj. Qhov no yog ib txoj kev ntshaw uas tsis paub txaus, thiab nws yog ib txoj kev xav hauv lub hlwb uas tsis yog lawm. Lub hnub nyoog tsis yog ib lub cim ntawm qhov seb koj yog leej twg tiag tiag, lub hnub nyoog tsis sawv cev rau qhov zoo tsim nyog, thiab lub hnub nyoog tsis sawv cev rau txoj kev ua laus neeg, haj yam tsis sawv cev rau qhov hais tias koj muaj qhov tseeb los sis txoj kev ua neej, thiab lub hnub nyoog ua tsis tau kom koj tej moj yam qias vuab tsuab qaug mus. Yog li ntawd, koj tsuas zoo ib yam li lwm cov tib neeg thiab xwb. Txhob pheej muab koj tus kheej hu ua “neeg laus” kom cais koj tus kheej tawm ntawm lwm tus, thiab haj tseem muab koj tus kheej cais tawm hais tias dawb huv thiab. Qhov ntawd qhia tias koj tsis paub koj tus kheej kiag li! Thaum lawv tseem ua neej nyob, cov neeg laus yuav tsum mob siab caum qhov tseeb ntxiv, caum kom to taub lub neej txoj sia, thiab ua hauj lwm ua ke kom haum nrog cov kwv tij thiab cov muam los ua lawv tes dej num; tsuas yog ua li no xwb mas lawv lub siab thiaj li yuav loj hlob. Cov neeg laus yuav tsum txhob muab lawv tus kheej xav hais tias yog laus neeg rau ntawm lwm tus es khav txog lawv lub hnub nyoog uas laus lawm. Cov neeg hluas yeej nthuav tau txhua hom moj yam qias vuab tsuab tawm, ces yog li ntawd koj los yeej nthuav tau tawm thiab; cov neeg hluas tuaj yeem ua txhua yam uas ruam ruam, ces yog li ntawd koj los yeej tuaj yeem ua thiab; cov neeg hluas muaj tej kev xav phem, ces yog li ntawd cov neeg laus los yeej muaj thiab; cov neeg hluas tuaj yeem ntxeev siab, ces yog li ntawd cov neeg laus los yeej tuaj yeem ntxeev siab thiab; cov neeg hluas tuaj yeem nthuav ib tug moj yiam qias vuab tsuab tawm, ces yog li ntawd cov neeg laus los yeej tuaj yeem nthuav tawm thiab; cov neeg hluas muaj tej kev vam thiab tej kev ntshaw uas phem, ces yog li ntawd cov neeg laus los yeej muaj thiab, tsis muaj ib qho txawv me me li; cov neeg hluas tuaj yeem tsim kev tab kaum thiab kev cuam tshuam thiab raug muab tshem ntawm pawg ntseeg mus, ces yog li ntawd cov neeg laus los yeej tuaj yeem ua tau li ntawd thiab. Yog li ntawd, dhau ntawm qhov muaj peev xwm ua lawv tes dej num kom zoo tshaj plaws li ntawm lawv lub peev xwm lawm, los tseem muaj ntau yam uas lawv tuaj yeem ua thiab. Tshwj yog hais tias koj ruam, coj phem, thiab tsis to taub qhov tseeb, thiab tshwj yog hais tias koj tsis muaj peev xwm saib xyuas koj tus kheej xwb, los tseem muaj ntau yam uas koj yuav tsum ua thiab. Zoo ib yam li cov neeg hluas, koj los yeej tuaj yeem caum qhov tseeb, thiab tuaj yeem nrhiav qhov tseeb, thiab koj yuav tsum nquag los rau ntawm Vajtswv lub xub ntiag los thov Vajtswv, los nrhiav qhov tseeb tej hauv paus ntsiab lus, rau siab saib tib neeg thiab txhua yam thiab coj koj tus kheej kom zoo thiab coj raws li Vajtswv cov lus kom tag nrho, uas yog siv qhov tseeb los ua koj tus qauv. Qhov no yog txoj kev uas koj yuav tsum taug, thiab koj yuav tsum txhob nyuaj siab, ntxhov siab, los sis txhawj xeeb vim koj laus lawm, vim koj muaj ntau yam mob, los sis vim koj lub cev laus lawm. Qhov nyuaj siab, txhov siab, thiab txhawj xeeb ntawd tsis yog yam uas yog—tej ntawd yog tej kev qhia tshwm uas tsis muaj qab hau xwb. Cov neeg laus yuav tsum muab lawv lub cim “neeg laus” ntawd tso tseg, es los sib sau nrog cov neeg hluas thiab zaum kom sib txig sib luag nrog cov neeg hluas ntawd. Koj yuav tsum txhob khav txog koj lub hnub nyoog laus, es pheej xav hais tias koj mas tsim nyog hwm tshaj, hais tias koj mas tsim nyog tshaj, hais tias koj tswj tau cov neeg hluas, hais tias koj yog cov laus neeg thiab cov neeg laus rau cov neeg hluas, pheej muaj tej kev vam los tswj kav cov neeg hluas, thiab pheej muaj txoj kev ntshaw los tswj cov neeg hluas—qhov yog ib tug moj yam uas qub dhau lawm. Vim cov neeg laus muaj tej moj yam qias vuab tsuab ib yam li cov neeg hluas muaj, thiab nquag nthuav lawv tej moj yam qias vuab tsuab tawm nyob rau hauv lub neej thiab thaum ua lawv tej dej num ib yam li cov neeg hluas nthuav thiab, yog li ntawd vim li cas cov neeg laus ho tsis ua yam uas tsim nyog, tiam sis pheej nyuaj siab, ntxhov siab, thiab txhawj xeeb txog lawv lub hnub nyoog laus thiab seb muaj dab tsi tshwm sim rau lawv tom qab tuag lawm? Vim li cas lawv ho tsis ua lawv tej dej num ib yam li cov neeg hluas ua? Vim li cas lawv ho tsis caum qhov tseeb ib yam li cov neeg hluas caum? Twb muab lub cib fim no rau koj lawm, yog li ntawd yog koj tsis tuav lub cib fim ntawd, thiab yog koj laus lawm tiag tiag es koj tsis hnov los sis tsis pom los sis tsis saib xyuas koj tus kheej, ces koj yuav tu siab, thiab koj lub neej yuav tag mus zoo li no xwb. Koj puas to taub? (To taub.)

Tam sim no daws puas tau tau qhov teeb meem ntawm cov neeg laus tej kev xav tsis zoo? Thaum nej laus tuaj, nej puas yuav khav txog nej lub hnub nyoog laus? Nej puas yuav rais los ua cov neeg laus uas txawj dag thiab cov neeg laus uas dag ntxias? Thaum nej pom ib tug neeg laus, nej puas yuav hu lawv ua “tij laug” los sis tus “muam hlob”? Lawv muaj npe tab sis koj tsis hu lawv lub npe, tiam sis muab lo lus “laus” los ntxiv rau. Yog koj pheej ntxiv lo lus “laus” rau thaum hais lus rau cov neeg laus, qhov ntawd yuav tsis ua rau lawv puas lod? Lawv twb xav hais tias lawv tus kheej laus lawm thiab muaj tej kev xav tsis zoo, yog li ntawd yog koj hu lawv hais tias “laus,” ces qhov ntawd zoo ib yam li koj qhia rau lawv hais tias, “Koj laus lawm, laus dua kuv lawm, thiab koj tsis muaj qab hau ntxiv lawm.” Lawv puas yuav nyab xeeb thaum lawv hnov koj hais li no? Lawv yuav tsis zoo siab kiag li. Qhov ntawd puas yuav mob lawv yog koj hu lawv li ntawd? Ib txhia neeg laus yuav zoo siab heev thaum lawv hnov koj hu lawv zoo li no, thiab yuav xav hais tias, “Pom hais tias, kuv muaj ib qho uas tsim nyog hwm tshaj thiab muaj ib lub koob lub npe uas tsim nyog. Thaum cov kwv tij thiab cov muam pom kuv, lawv tsis hu kuv lub npe. Nyob hauv Vajtswv lub tsev mas, tib neeg tsis hu cov neeg laus ua txiv ntxawm, los sis yawg, los sis pog. Tiam sis, thaum cov kwv tij thiab cov muam hu kuv, lawv muab lo lus “laus” ntxiv rau, es hu kuv ua ‘tij laug’ (los sis tus ‘muam hlob’). Sim saib seb kuv tsim nyog hwm npaum li cas, thiab sim saib seb lwm tus hwm kuv npaum li cas. Vajtswv lub tsev mas yeej zoo—tib neeg hwm cov laus thiab saib xyuas cov hluas!” Koj puas tsim nyog hwm? Koj coj tau txoj kev tsim kho twg los rau koj cov kwv tij thiab cov muam lawm? Koj coj tau qhov txiaj ntsim twg los rau lawv lawm? Qhov koj muab pub dawb rau Vajtswv lub tsev yog dab tsi? Koj to taub qhov tseeb npaum li cas? Koj muab qhov tseeb coj los xyaum ua npaum li cas lawm? Koj xav hais tias koj tus kheej mas tsim nyog hwm tshaj tiam sis koj tsis tau muab ib yam dab tsi pub dawb kiag li, yog li ntawd koj puas tsim nyog rau koj cov kwv tij thiab cov muam muab hu ua “tij laug” los sis tus “muam hlob”? Tsis tsim nyog kiag li! Koj khav txog koj lub hnub nyoog laus thiab pheej xav kom lwm tus hwm koj xwb! Puas zoo kom muab hu ua “tij laug” los sis tus “muam hlob”? (Tsis zoo.) Tsis zoo, qhov ntawd tsis zoo, tab sis kuv hnov qhov ntawd tas li. Phem heev, tiam sis tib neeg tseem nquag muab cov neeg laus hu li no. Qhov no tsim muaj xwm txheej dab tsi? Qhov ntawd mas qias heev, tsis yog lod? Koj yim muab ib tug neeg laus hu ua “tij laug” los sis tus “muam hlob,” ces lawv yim xav hais tias lawv tus kheej mas tsim nyog heev, thiab lawv yim xav hais tias lawv tus kheej mas tsim nyog hwm tshaj; koj yim muab lawv hu ua “tij laug thiab tus muam ub tus muam no,” ces lawv yim xav hais tias lawv mas tshwj xeeb, tseem ceeb tshaj thiab zoo tshaj lwm tus tib neeg, ces lawv lub siab thiaj li xav mus rau txoj kev coj lwm tus tib neeg, thiab lawv haj yam txav deb ntawm txoj kev caum qhov tseeb lawm. Lawv pheej xav coj lwm tus tib neeg thiab tswj lwm tus tib neeg, pheej muab lawv tus kheej xav hais tias zoo tshaj lwm tus tib neeg, pheej tsis pom zoo nrog lwm tus tib neeg, pheej pom tej teeb meem uas lwm tus tib neeg muaj thiab pom tias lawv tus kheej mas tsis muaj li. Qhia Kuv seb, ib tug tib neeg zoo li no puas tseem tuaj yeem caum qhov tseeb? Tsis tuaj yeem, lawv tsis tuaj yeem. Yog li ntawd, qhov hu tib neeg ua “tij laug” los sis tus “muam hlob” ntawd tsis muaj txiaj ntsim rau lawv li, thiab qhov ntawd tsuas ua kom lawv mob thiab ua rau lawv puas tsuaj xwb. Yog koj tsuas hu lawv lub npe xwb es txhob siv lub cim “laus,” yog koj muab lawv saib mus raws li qhov yog, thiab zaum sib txig sib luag nrog lawv, ces lawv tus yam ntxwv thiab lub hlwb yuav zoo, thiab lawv yuav tsis khav lawv tus kheej txog lawv tej niaj tej xyoo yav dhau los thiab tsis saib tsis taus lwm tus. Ua li no es qhov ntawd thiaj li yooj yim rau lawv los muab lawv tus kheej xam kom sib txig sib luag li lwm tus tib neeg, lawv yuav muaj peev xwm muab lawv tus kheej thiab lwm tus tib neeg xam kom yog, muaj peev xwm pom lawv tus kheej ib yam li lwm tus tib neeg, ib yam li cov tib neeg dog dig, thiab tsis zoo tshaj li lwm tus tib neeg kiag li. Ua li no mas lawv tej kev nyuaj thiaj li yuav me zuj zus tuaj, thiab lawv thiaj li yuav tsis ntsib tsis pom tej kev xav tsis zoo uas muaj tuaj vim lawv tej hnub nyoog laus lawm thiab lawv tseem tsis tau tau txais qhov tseeb, ces tom qab ntawd lawv thiaj li yuav muaj kev vam txog txoj kev caum qhov tseeb. Thaum tsis muaj tej kev xav tsis zoo no, ces lawv yuav xam txog lawv tus kheej tej teeb meem, tshwj xeeb mas yog lawv tej moj yam qias vuab tsuab, los ntawm lub siab uas yog. Qhov no muaj ib qho txiaj ntsim zoo thiab pab tau lawv txoj kev caum qhov tseeb, lawv tus kheej txoj kev paub, thiab lawv lub peev xwm los taug txoj kev caum qhov tseeb. Ces tom qab ntawd tej teeb meem uas los ntawm tej kev xav tsis zoo uas muaj nyob hauv cov neeg laus ntawd tseem yuav daws tsis tau thiab lod? (Yuav daws tau tej teeb meem ntawd.) Yuav daws tau tej teeb meem ntawd, thiab yuav tsis muaj kev nyuaj ntxiv lawm. Yog li ntawd cov neeg laus yuav tsum muaj lub siab twg ua ntej tshaj? Lawv yuav tsum muaj ib lub siab zoo; lawv yuav tsum txhob ua tib zoo coj xwb, tab sis lawv yuav tsum zam txim thiab. Lawv yuav tsum txhob lam ua tej yam rau cov neeg hluas tab sis yuav tsum ua ib tug qauv thiab qhia txoj hau kev rau cov neeg hluas, thiab txhob ua tsiv ua nyaum rau lawv. Cov neeg hluas mas muaj ib lub siab ceev ceev thiab hais lus nrawm nrawm, yog li ntawd txhob lam ua tej yam rau lawv. Lawv tseem hluas, tsis paub tab, thiab tsis tau muaj kev ntsib kev pom, ces ua lub siab ntev ob peb xyoos mas mam li pom hais tias lawv yog. Yuav tsum yog li no, thiab cov neeg laus yuav tsum to taub li no. Yog li ntawd cov neeg laus yuav tsum muaj lub siab twg es thiaj li mus raws li qhov tseeb? Lawv yuav tsum coj kom yog rau cov neeg hluas thiab, nyob rau tib lub sij hawm no, lawv yuav tsum txhob khav theeb thiab txhob khav tus kheej, es xav hais tias lawv mas muaj kev ntsib kev pom zoo heev thiab tob heev lawm. Lawv yuav tsum muab lawv tus kheej xam hais tias yog cov neeg dog dig thiab tsuas zoo ib yam li txhua tus xwb—qhov no thiaj li yog qhov yog. Cov neeg laus yuav tsum txhob thim rov qab vim lawv lub hnub nyoog xwb, thiab yuav tsum txhob hloov mus kom muaj ib tug neeg hluas lub siab. Qhov hloov mus kom muaj ib tug neeg hluas lub siab ntawd mas tsis zoo li ib txwm muaj lawm thiab, yog li ntawd tsis txhob thim rov qab vim koj lub hnub nyoog xwb. Txhob pheej xav hais tias, “Au, kuv laus heev lawm, ces kuv ua tsis tau qhov no, kuv hais tsis tau qhov no, kuv ua tsis tau qhov tod. Vim kuv laus heev lawm mas, kuv yuav tsum ua li no, kuv yuav tsum ua li tod, kuv yuav tsum zaum zoo li no thiab sawv li no, thiab kuv yuav tsum noj kom zoo li no, kom cov neeg hluas pom txhua yam no, es kom lawv thiaj li txhob saib tsis taus cov neeg laus.” Lub siab no mas tsis yog lawm, thiab los ntawm qhov xav li no, koj raug tswj kav thiab raug txwv los ntawm ib hom kev xav hauv lub hlwb uas tsis yog lawm, thiab koj raug txua me ntsis, tsis muaj tseeb, thiab ua cuav tsab lawm. Tsis txhob thim rov qab vim koj lub hnub nyoog xwb, ua ib yam li txhua tus, ua yam uas koj muaj peev xwm ua, thiab ua yam uas koj yuav tsum tau ua—ua li no es koj thiaj li yuav muaj lub siab li ib txwm muaj. Koj puas to taub? (To taub.) Yog li ntawd, thaum ib tug neeg laus muaj ib lub siab li ib txwm muaj lawm, ces ntau txoj kev xav tsis zoo uas muaj nyob hauv lawv vim ntawm lub hnub nyoog laus lawm ntawd yuav ploj mus yam lawv tsis paub txog; tej kev xav tsis zoo ntawd yuav tsis khi koj ntxiv lawm, thiab txoj kev puas tsuaj uas tej kev xav tsis zoo tsim rau koj ntawd kuj yuav yaj ntsis mus lawm thiab, thiab tom qab ntawd koj txoj kev ua neej, koj qhov laj thawj, thiab koj lub siab zoo puav leej yuav rais los zoo li ib txwm muaj. Nyob rau qhov muaj ib lub siab zoo thiab txoj kev muaj qab hau uas ib txwm muaj ntawd, tib neeg lub ntsiab thaum pib ntawd yuav zoo heev rau txoj kev caum qhov tseeb, txoj kev ua lawv tes dej num, txoj kev koom txhua qhov kev ua thiab txhua tes hauj lwm, thiab tej uas tshwm sim tau los ntawd los kuj yuav yog thiab. Ua ntej tshaj plaws, cov neeg laus yuav tsum txhob thim rov qab vim lawv lub hnub nyoog tab sis yuav muaj peev xwm los ua lawv tus kheej lub hom phiaj kom yog thiab kom muaj qab hau, ua yam uas lawv yuav tsum tau ua, kom zoo ib yam li lwm tus tib neeg, thiab ua tes dej num uas lawv yuav tsum tau ua kom kawg lawv lub peev xwm. Cov neeg hluas yuav tsum txhob xav hais tias, “Koj laus heev lawm, koj yeej tsis tsim txoj hau kev rau kuv, thiab koj tsis saib xyuas kuv. Koj laus heev lawm, koj tsim nyog muaj kev ntsib kev pom lawm, tab sis koj tsis muab tswv yim rau kuv kom paub tias yuav ua txhua yam li cas thiab qhov nrog koj ntawd tsis muaj txiaj ntsim. Koj laus lawm, yog li ntawd vim li cas koj tsis paub tias yuav to taub cov neeg hluas li cas?” Hais li no puas yog? (Tsis yog.) Tej kev taij cov neeg laus zoo li no mas tsis tsim nyog lawm. Yog li ntawd, txhua tus tib neeg yeej sib txig sib luag rau ntawm qhov tseeb. Yog tag nrho koj txoj kev xav hauv lub hlwb es yeej muaj tiag, muaj hom phiaj, yog, thiab muaj qab hau, ces qhov ntawd yeej yuav mus raws li qhov tseeb tej hauv paus ntsiab lus xwb xwb li. Yog koj tsis hloov los ntawm ib tug yam ntxwv ntawm lub hom phiaj, lub hauv paus, qhov xwm txheej, los sis ib qho tseeb twg kiag li, yog koj tsuas ua yam uas tib neeg yuav tsum ua xwb, ces yam koj ua ntawd yeej yuav tsim nyog thiab zoo xwb xwb li, uas yog mus raws li qhov tseeb. Koj yuav tsis daig nyob rau hauv tej kev xav tsis zoo ntawm txoj kev nyuaj siab, kev ntxhov siab, thiab kev txhawj xeeb vim koj lub hnub nyoog laus lawm xwb thiab, thiab yuav daws tau qhov teeb meem no.

Zoo, kuv yuav muab qhov kev sib qhia hnub no xaus rau ntawm no. Sib ntsib dua!

Lub Kaum Hli Tim 22, Xyoo 2022