Yuav Caum Qhov Tseeb Li Cas (2)

Nyob rau peb txoj kev sib txoos ua ke tas los no, peb tau sib qhia txog ib lub ncauj lug loj lawm: yuav caum qhov tseeb li cas. Yuav caum qhov tseeb li cas—peb tau sib qhia txog qhov xwm txheej no li cas lawm? (Vajtswv qhia txog ob qho: Qhov ib yog “tso tseg,” qhov ob yog “mob siab.” Hais txog qhov tso tseg ntawd, Vajtswv tham txog tej kev xav tsis zoo uas muaj nyob hauv tib neeg. Tshwj xeeb mas, Vajtswv qhia txog tej kev tshwm sim thiab lub txim uas tej kev xav tsis zoo txog kev tsis zoo li luag lwm tus, kev chim siab, thiab kev ntxub uas muaj nyob rau ntawm peb tes dej num. Vajtswv txoj kev qhia ua rau peb muaj ib txoj kev to taub txawv txog qhov yuav caum qhov tseeb li cas. Peb thiaj li pom tias peb tsis pom tej kev xav tsis zoo uas peb nthuav tawm txhua hnub ntawd npaum li cas, thiab pheej tsis paub los sis tsis to taub peb tej kev xav tsis zoo ntawd li. Peb tsuas txiav txim rau ib sab xwb tias qhov no yeej yog tus tib neeg uas peb yog lawm. Ces peb thiaj li coj tej kev tsis zoo no los rau hauv peb tes dej num, thiab qhov no muaj ib qho kev cuam tshuam ncaj qha rau qhov ua tau los ntawm tes dej num ntawd. Qhov ntawd kuj hloov qhov peb saib tib neeg thiab txhua yam li cas thiab qhov peb daws tej teeb meem hauv peb lub neej li cas thiab. Qhov no ua nyuaj heev rau peb los taug txoj kev caum qhov tseeb.) Nyob rau peb txoj kev sib txoos ua ke dhau los no, kuv twb qhia txog qhov yuav caum qhov tseeb li cas lawm. Thaum hais txog qhov xyaum ua, muaj ob txoj kev tseem ceeb—uas yog tso tseg, thiab yog mob siab. Zaum tas los no, peb twb muab tej xwm txheej tseem ceeb uas cuam tshuam rau thawj kis ntawm thawj txoj kev, “tso tseg” zuaj zog los hais lawm—qhov ntawd yog, yus yuav tsum muab ntau hom ntawm txoj kev xav tso tseg. Tej no ces yog tej kev xav tsis zoo kiag ntag—tej uas tsis zoo, xeeb txob, thiab tej uas tsis mus raws li lub siab zoo thiab lub ntsiab. Hais txog tej no mas, peb txoj kev sib qhia yog hais txog tej kev xav tsis zoo txog kev tsis zoo li luag lwm tus, kev chim siab, thiab kev ntxub, nrog rau qee tus cwj pwm uas muaj los ntawm txoj kev ua neej nrog tej kev xav tsis zoo no, muaj ntau txoj kev xav tsis zoo vim qee yam xwm txheej tshwj xeeb los sis qhov keeb kwm yav tas los, thiab tej kev xav tsis zoo uas raug ib tug yam ntxwv tsis zoo cuam tshuam lawm. Vim li cas thiaj li yuav tsum muab tej kev xav tsis zoo no tso tseg mus? Hais lub ntsiab ces, qhov ntawd yog vim hais tias tej kev xav no ua rau muaj tej kev xav phem thiab kev xam pom phem rau hauv tib neeg, hloov tog uas lawv tuaj thaum ntsib tib neeg, tej xwm txhee, los sis txhua yam. Yog li ntawd, thawj kis ntawm txoj kev xyaum ua li no yog—tso tseg—cheem tsum kom tib neeg muab txhua hom ntawm tej kev xav tsis zoo ntawd tso tseg. Zaum tas los no peb twb sib qhia txog qee qhov kev sib qhia txog tej kev xav tsis zoo no lawm. Tab sis dhau ntawm kev tsis zoo li luag lwm tus, kev chim siab, thiab kev ntxub uas peb sib qhia txog lawm, ces tseeb tiag yeej muaj ntau qhov kev xav tsis zoo sib txawv uas cuam tshuam rau. Tej kev xav ntawd cuam tshuam rau noob neej lub siab zoo, lub ntsiab, txoj kev xav hauv lub siab, thiab txoj kev txiav txim, thiab cuam tshuam tau rau tib neeg txoj kev caum qhov tseeb. Qhov no txhais tias tej kev xav tsis zoo no yog thawj yam uas noob neej yuav tsum muab tso tseg rau hauv lawv txoj kev caum qhov tseeb. Peb txoj kev sib qhia hnub no yog yuav tham txog lub ncauj lug no txuas ntxiv mus—yuav muab ntau txoj kev xav tsis zoo tso tseg li cas. Ua ntej tshaj peb yuav sib qhia txog ntau qhov kev tshwm sim ntawm tej kev xav tsis zoo ntawd thiab, los ntawm Kuv txoj kev qhia txog tej kev tshwm sim no, tib neeg yuav tau txais txoj kev paub txog tej kev xav tsis zoo no, muab tej kev xav tsis zoo no piv rau lawv tus kheej, ces tom qab ntawd mam li pib kho tej kev xav tsis zoo no ib qho zuj zus nyob rau hauv lawv lub neej txhua hnub. Los ntawm txoj kev nrhiav thiab kev to taub qhov tseeb, thiab los ntawm txoj kev paub thiab tej kev xav hauv lub hlwb thiab tej tswv yim phem, nrog rau tej kev xam thiab ntau sab uas tsis zoo, uas tej kev xav tsis zoo ua rau muaj nyob rau hauv tib neeg ntawd, lawv thiaj li tuaj yeem pib los kho tej kev xav tsis zoo ntawd.

Zaum tas los no, peb tham txog txoj kev xav tsis zoo txog “kev nyuaj siab.” Ua ntej tshaj plaws, tib neeg feem coob puas muaj kev xav txog txoj kev nyuaj siab no? Nej puas muaj peev xwm paub me ntsis txog tias kev nyuaj siab yog zoo li cas thiab xav li cas, thiab kev nyuaj siab muaj tej kev tshwm sim dab tsi? (Muaj.) Qhov no mas to taub yooj yim. Peb yuav tsis tshua tham txog “kev nyuaj siab” heev, peb tsuas yuav piav txog tej kev tshwm sim uas muaj los ntawm txoj kev xav txog kev nyuaj siab uas nyob hauv cov uas ntseeg Vajtswv thiab caum Vajtswv qab xwb. “Kev nyuaj siab” txhais li cas? Txhais tias tu siab, tsis zoo siab, tsis nyiam ib yam dab tsi uas koj ua li, tsis muaj siab, tsis muaj kev txhawb siab, muaj ib tug cwj pwm phem thiab tub nkeeg ua tej uas koj ua, thiab tsis muaj ib txoj kev txiav txim siab kom khov kho thiab tsis kub siab ua dab tsi li. Yog li ntawd, lub hauv paus ua rau muaj tej kev tshwm sim no yog dab tsi? Qhov no yog qhov teeb meem loj uas yuav tsum tau muab saib kom zoo. Thaum koj to taub txog txoj kev xav tsis zoo no ua rau muaj ntau qhov kev tshwm sim txog kev nyuaj siab, nrog rau ntau lub siab, tej kev xav hauv lub hlwb thiab tej cwj pwm uas txawv txawv hauv txoj kev ua txhua yam lawm, ces koj yuav to taub tias dab tsi yog qhov ua rau muaj tej kev xav tsis zoo no, qhov ntawd yog, lub hauv paus uas txhawb tej kev xav tsis zoo no yog dab tsi es thiaj li muaj nyob rau hauv tib neeg. Vim li cas tib neeg thiaj li nyuaj siab? Vim li cas lawv thiaj li tsis muaj siab ua ub ua no li? Vim li cas lawv thiaj li pheej xav phem, tub nkeeg thiab tsis muaj kev txiav txim siab thaum lawv ua ub ua no kiag li? Yeej muaj ib lub ntsiab rau qhov no. Piv txwv li, koj pom ib tug uas pheej nyuaj siab thiab tub nkeeg thaum lawv ua ub ua no, tsis siv zog ua li, lawv tej kev xav thiab tus cwj pwm mas tsis zoo kiag li los sis tsis muaj siab li, thiab lawv yeej ib txwm muaj ib tug cwj pwm phem, liam ub liam no thiab tag kev cia siab zoo li no. Koj muab tswv yim rau lawv tab sis lawv yeej tsis mloog lub tswv yim ntawd li thiab, txawm lawv lees tias qhov koj muab hais tawm rau lawv ntawd yog txoj kev yog thiab koj lub ntsiab yog qhov zoo, tiam sis thaum lawv ua ub ua no ntawd mas lawv tsis siv zog ua li thiab tseem xav phem thiab tub nkeeg thiab. Nyob rau hauv tej qhov xwm txheej loj mas, koj yeej pom tau los ntawm qhov lawv lub cev txav mus los, tus yeeb yam, qhov lawv tham, lawv lub suab hais lus, thiab cov lus uas lawv hais ntawd tias tus tib neeg no tej kev xav mas tshwj xeeb yog nyuaj siab, tias lawv tsis muaj siab ua txhua yam uas lawv ua li thiab lawv zoo ib yam li ib lub txiv uas raug tsoo lawm, thiab leej twg siv sij hawm ntau nrog tus neeg ntawd ces yeej yuav zoo li lawv thiab. Txhua yam no yog hais txog dab tsi? Ntau tus cwj pwm, tej kev hais lus, lub suab hais lus, thiab tej kev xav hauv lub hlwb thiab tej kev xam pom uas cov tib neeg muaj kev nyuaj siab ntawd nthuav tawm mas yeej muaj tej uas tsis zoo. Yog li ntawd, lub ntsiab uas txhawb tej xwm txheej tsis zoo no yog dab tsi? Lub hauv paus yog nyob qhov twg? Tseeb tiag, lub hauv paus uas ua rau muaj txoj kev xav tsis zoo txog txoj kev nyuaj siab no mas txawv rau txhua tus. Tej zaum ib hom ntawm tus tib neeg ntawd txoj kev xav txog kev nyuaj siab yog muaj los ntawm lawv txoj kev pheej ntseeg lawv tus kheej txoj hmoo uas phem los. Qhov no tsis yog ib lub hauv paus lod? (Yog.) Thaum lawv tseem hluas, lawv nyob pem toj siab los sis nyob rau ib cheeb tsam uas tsis zoo, lawv tsev neeg tsis vam meej thiab, dhau ntawm tej rooj tog uas tsis zoo lawm ces, lawv tsis muaj ib yam dab tsi muaj nqis li. Tej zaum lawv muaj ib los sis ob ce khawb ncaws xwb ces txawm yog cov khawb ncaws ntawd to qhov lawm los lawv yuav tsum tau hnav, thiab lawv yeej ib txwm tsis tau noj tej zaub mov zoo zoo li, ces yuav tsum tau tos txog Xyoo Tshiab los sis tej hnub caiv mas mam li tau noj nqaij xwb. Qee lub sij hawm mas lawv tshaib plab thiab tsis muaj txaus hnav kom sov so li thiab qhov tau noj ib taig qaij puv nkaus ntawd mas yog ib txoj kev npau suav uas tsis muaj tshwm sim li, thiab qhov nrhiav ib daig txiv hmab txiv ntoo los noj ntawd los yeej nyuaj kawg. Qhov ua neej nyob rau ib qho chaw zoo li ntawd mas lawv yeej paub tias txawv ntawm cov tib neeg uas nyob rau hauv nroog loj, uas yog cov lawv niam lawv txiv muaj noj muaj haus, cov uas lawv xav noj dab tsi los tau thiab lawv xav hnav dab tsi los tau, cov uas tau txhua yam li lawv xav kiag tam sim ntawd thiab tom ntej, thiab cov uas muaj kev paub txog txhua yam. Lawv thiaj li xav tias, “Lawv muaj ib txoj hmoo zoo heev. Vim li cas kuv txoj hmoo phem ua luaj li?” Lawv pheej xav kom yog tus tseem ceeb tshaj lwm tus thiab xav hloov lawv txoj hmoo. Txawm li cas los xij, kev hloov yus txoj hmoo mas tsis yooj yim hlo li. Thaum ib tug tib neeg twg yug los rau ib qho xwm txheej zoo li ntawd lawm, ces txawm lawv yuav sim hloov lawv txoj hmoo npaum li cas los, lawv yuav hloov tau zoo npaum li cas? Tom qab lawv rais los ua ib tug neeg laus lawm, txhua qhov chaw uas lawv mus lawv yeej raug teeb meem rau hauv lub zej zog, txhua qhov chaw uas lawv mus lawv yeej raug thab, ces yog li ntawd lawv thiaj li pheej xav tias tsis muaj hmoo kiag li. Lawv thiaj li xav tias, “Vim li cas kuv tsis muaj hmoo kiag li? Vim li cas kuv pheej ntsib cov tib neeg siab phem xwb? Lub neej nyuaj thaum kuv tseem yog ib tug me nyuam yaus, thiab qhov ntawd yeej yog li ntawd. Tam sim no kuv twb loj lawm, los lub neej tseem phem heev li thiab. Kuv yeej ib txwm xav qhia yam uas kuv ua tau tab sis kuv yeej tsis muaj ib lub hwv tsam los qhia li. Yog tias kuv tsis muaj ib lub hwv tsam li, ces kav liam xwb. Kuv tsuas xav rau siab ntso ua hauj lwm kom khwv tau nyiaj txaus los ua ib lub neej zoo xwb. Vim li cas kuv haj tseem ua tsis tau li ntawd thiab? Ua li cas es qhov ua ib lub neej zoo ntawd yuav nyuaj ua luaj li? Kuv tsis tas yuav ua ib lub neej kom zoo tshaj txhua tus. Yam tsawg kawg kuv xav ua lub neej li ib tug neeg nyob hauv nroog es kom txhob raug tib neeg saib tsis taus, thiab kom txhob muab suav ua ib tug pej xeem uas txom nyem xwb. Yam tsawg kawg los kom thaum tib neeg hu kuv, lawv txhob nthe tias, ‘He koj nas, los ntawm no!’ Yam tsawg kawg los kom lawv hu kuv lub npe thiab hais lus saib taus kuv xwb. Tab sis kuv haj tseem twb tsis xyiv fab rau qhov hais lus saib taus ntawd li thiab. Vim li cas kuv txoj hmoo phem ua luaj li? Thaum twg txoj hmoo no mam li xaus?” Thaum ib tug tib neeg zoo li no tsis ntseeg Vajtswv, ces lawv suav tias txoj hmoo ntawd phem. Tom qab lawv tau pib los ntseeg Vajtswv lawm es pom tias qhov no yog txoj hau kev tseeb, thaum ntawd lawv thiaj li xav tias, “Txhua qhov kev txom nyem yav dhau los ntawd yeej tsim nyog lawm. Qhov kev txom nyem ntawd puav leej yog Vajtswv coj thiab ua, thiab Vajtswv ua tau zoo lawm. Yog tias kuv tsis tau raug kev txom nyem zoo li ntawd, ces kuv yeej tsis tau los ntseeg Vajtswv li. Tam sim no kuv ntseeg Vajtswv lawm, yog tias kuv tuaj yeem lees txais qhov tseeb ces kuv txoj hmoo yuav hloov mus rau qhov zoo dua. Tam sim no kuv ua tau lub neej zoo ib yam li kuv cov kwv tij thiab cov muam rau hauv pawg ntseeg lawm, thiab tib neeg hu kuv ua ‘Kwv tij’ los sis ‘tus Muam,’ thiab hais lus saib taus kuv lawm. Tam sim no kuv xyiv fab rau txoj kev xav hauv siab txog qhov lwm tus hwm lawm.” Zoo li lawv txoj hmoo tau hloov lawm, thiab zoo li lawv tsis muaj kev txom nyem mus ntxiv thiab lawv tsis muaj ib txoj hmoo phem mus ntxiv lawm. Thaum lawv tau pib los ntseeg Vajtswv lawm, lawv thiaj li tig lawv txoj kev txiav txim siab los ua lawv tes dej num kom zoo nyob rau hauv Vajtswv lub tsev lawm, ces lawv thiaj li muaj peev xwm los tiv kev nyuaj thiab rau siab ua hauj lwm, muaj peev xwm tiv kev txom nyem tshaj lwm tus rau hauv txhua qhov xwm txheej, thiab lawv rau siab ua kom tib neeg feem coob pom zoo thiab saib taus. Lawv haj tseem xav tias tej zaum lawv yuav raug xaiv los ua ib tug thawj coj pawg ntseeg, ib tug tswj, los sis ib tug thawj coj pab pawg thiab, thiab tom qab ntawd lawv yuav tsis hwm lawv tej poj koob yawg koob thiab lawv tsev neeg lod? Tom qab ntawd lawv yuav hloov tsis tau lawv txoj hmoo lod? Txawm li cas los xij, qhov muaj tiag tsis mus raws li lawv tej kev xav tau ces lawv thiaj li tu siab, thiab xav tias, “Kuv twb ntseeg Vajtswv los tau ntau xyoo lawm thiab kuv sib raug zoo nrog kuv cov kwv tij thiab cov muam heev li, tab sis ua li cas thaum twg txog sij hawm los xaiv ib tug thawj coj, ib tug tswj, los sis ib tug thawj coj pab pawg, mas yeej tsis yog kuv zeeg li? Puas yog vim kuv tsis zoo kiag li, los sis vim kuv ua tsis tau zoo txaus, es thiaj li tsis muaj ib tug twg pom kuv li? Txhua zaus muaj ib qho kev tawm suab, mas tej zaum kuv muaj ib qho kev cia siab me me, thiab kuv yuav zoo siab tab txawm yog raug xaiv los ua ib tug thawj coj pab pawg xwb los xij. Kuv zoo siab them rov qab rau Vajtswv heev, tab sis txhua zaus uas muaj ib qho kev tawm suab mas thaum kawg kuv tsuas tu siab xwb vim kuv raug muab tso tseg lawm. Qhov ntawd yog ua cas lawm? Qhov ntawd puas yog tias kuv tsuas muaj peev xwm ua tau ib tug tib neeg tsis zoo, ib tug tib neeg dog dig, ib tug uas tsis tsim nyog kiag li mus kom tag kuv sim neej xwb? Thaum kuv rov qab saib mus rau lub sij hawm uas kuv tseem yog me nyuam yaus, kuv tseem hluas, thiab kuv ib nrab neej ntawd mas, txoj kev uas kuv tau taug lawm no yeej ib txwm phem heev thiab kuv tsis tau ua ib yam dab tsi uas tsim nyog li. Qhov ntawd tsis yog tias kuv tsis muaj ib qho kev ntshaw li, los sis tias kuv tsis muaj peev xwm kiag li, thiab qhov ntawd tsis yog tias kuv tsis siv zog txaus los sis tias kuv tiv tsis taus kev nyuaj. Kuv yeej muaj tej kev vam thiab tej hom phiaj thiab, thiab haj tseem hais tau tias kuv muaj kev ntshaw thiab. Yog li ntawd vim li cas kuv thiaj li tsis zoo tshaj lwm tus? Nyob rau txoj kev soj ntsuam kawg ntawd, kuv tsuas muaj ib txoj hmoo phem xwb thiab raug npaj ua ntej los raug kev txom nyem lawm, thiab qhov no yog qhov Vajtswv tau npaj txhua yam rau kuv lawm.” Lawv yim xav txog qhov ntawd, mas lawv yim xav tias lawv txoj hmoo phem. Nyob rau sab nraum lawv tej dej num, yog lawv tawm qee qhov tswv yim los sis hais qee qhov kev xam pom es pheej tau txais ib qho kev tsis pom zoo, thiab tsis muaj ib tug twg mloog lawv hais los sis saib lawv tseem ceeb kiag li mas lawv haj yam nyuaj siab ntxiv, ces lawv thiaj li xav tias, “Au, kuv txoj hmoo mas phem heev li! Txhua pab pawg uas kuv nyob rau hauv mas yeej muaj qee tus neeg siab phem thaiv kuv txoj hau kev mus lawm tom ntej thiab caij tsuj kuv. Yeej tsis muaj ib tug twg saib kuv tseem ceeb kiag li thiab yeej yuav zoo tshaj tsis tau li. Thaum hais thiab ua txhua yam tag lawm, los yeej rov qab los rau qhov no xwb tias: kuv tsuas muaj ib txoj hmoo phem xwb!” Txawm muaj dab tsi tshwm sim rau lawv los, lawv yeej muab qhov ntawd hais rau lawv txog qhov muaj ib txoj hmoo phem xwb; lawv pheej hais txog lub tswv yim ntawm qhov muaj ib txoj hmoo phem no tas li, lawv mob siab ua kom muaj ib txoj kev to taub thiab kev thoob tsib txog qhov ntawd kom tob thiab, thaum lawv xav txog qhov nyob rau hauv lawv lub siab, lawv tej kev xav haj yam ua rau nyuaj siab ntxiv xwb. Thaum lawv ua ib qho yuam kev me me nyob rau hauv txoj kev ua lawv tes dej num ntawd, mas lawv xav tias, “Au, kuv yuav ua li cas ua tau kuv tes dej num kom zoo thaum kuv muaj ib txoj hmoo phem zoo li no?” Nyob rau hauv tej kev sib txoos ua ke, lawv cov kwv tij thiab cov muam muab lus sib qhia mas lawv xav ntau yam tag los xav dua, tab sis lawv tsis to taub li, ces lawv thiaj li xav tias, “Au, yuav ua li cas kuv thiaj li to taub txhua yam thaum kuv muaj ib txoj hmoo phem zoo li no?” Thaum twg lawv pom ib tug uas hais lus zoo dua lawv, tus uas tham txog lawv txoj kev to taub tau ib nyuag meej thiab tseeb dua lawv, mas lawv haj yam nyuaj siab ntxiv. Thaum lawv pom ib tug uas tiv taus kev nyuaj thiab kev txom nyem, tus uas pom qhov txiaj ntsim hauv txoj kev ua lawv tes dej num, tus uas tau txais lawv cov kwv tij thiab cov muam txoj kev pom zoo thiab raug txhawb, mas nyob hauv lawv lub siab mas lawv tsis zoo siab li. Thaum lawv pom ib tug tau los ua ib tug thawj coj los sis ib tug neeg ua hauj lwm, mas lawv haj yam nyuaj siab, thiab thaum lawv pom ib tug uas hu nkauj thiab seev cev tau zoo dua lawv es ua rau lawv tsis zoo npaum li tus tib neeg ntawd, mas lawv nyuaj siab. Txawm lawv yuav ntsib tej tib neeg, tej xwm txheej, los sis tej yam dab tsi los xij li, los sis txawm lawv ntsib tej xwm txheej dab tsi los xij li, lawv ib txwm yeej siv txoj kev xav txog txoj kev nyuaj siab no los daws tej ntawd xwb. Txawm thaum lawv pom ib tug hnav cov khawb ncaws uas zoo dua lawv cov los sis tus ntawd ntsis plaub hau ib nyuag zoo dua xwb los, lawv yeej tu siab tas li, ces thaum kawg thiaj li muaj txoj kev khib thiab kev ntshaw luag tug nyob rau hauv lawv lub siab mus txog ntua rau thaum lawv rov qab mus rau txoj kev xav uas nyuaj siab ntawd. Lub ntsiab uas lawv muaj ntawd yog dab tsi xwb? Lawv xav tias, “Au, qhov no tsis yog vim kuv txoj hmoo phem lod? Yog tias kuv zoo nkauj zoo nraug me ntsis, yog tias kuv ntxim hwm li lawv ntxim, yog tias kuv siab es muaj ib tug yeeb yam zoo, nrog rau cov khawb ncaws zoo zoo thiab muaj nyiaj ntau ntau, muaj niam muaj txiv zoo, ces txhua yam yuav tsis txawv tshaj li tam sim no lod? Ces tib neeg yuav tsis hwm kuv tshaj, thiab ntshaw thiab khib kuv lod? Txawm hais ib hnub tsaus ntuj los, kuv txoj hmoo yeej phem thiab kuv muab liam tsis tau rau lwm tus vim qhov ntawd. Vim muaj ib txoj hmoo phem zoo li no es thiaj li tsis muaj dab tsi yog rau kuv li, thiab kuv mus tsis tau qhov twg es yuav tsis dawm ib yam dab tsi ntog li. Tsuas yog kuv txoj hmoo phem xwb, thiab kuv ua tsis tau dab tsi txog qhov no li.” Kuj zoo ib yam thiab, thaum lawv raug qhuab qhia thiab raug qhuab ntuas los sis thaum cov kwv tij thiab cov muam qhia los sis thuam lawv, los sis tawm tswv yim rau lawv mas, lawv teb rau qhov ntawd tias yog vim lawv txoj kev xav txog kev nyuaj siab. Txawm li ntawd los xij, txawm yog muaj qee yam tshwm sim rau lawv los sis txhua yam uas nyob puag ncig lawv los xij, lawv ib txwm yeej teb rau tej ntawd los ntawm ntau txoj kev xav hauv lub hlwb, tej kev xam pom, tej cwj pwm thiab tej kev pom uas tsis zoo es muaj los ntawm lawv txoj kev xav txog kev nyuaj siab los xwb.

Cov tib neeg zoo li no, cov uas pheej xav tias lawv tus kheej muaj ib txoj hmoo phem, yeej hnov zoo li lawv lub siab raug ib lub pob zeb loj loj tsoo tas li. Vim lawv pheej ntseeg tias txhua yam uas tshwm sim rau lawv ntawd muaj li ntawd los vim lawv txoj hmoo phem, lawv thiaj li xav tias lawv hloov tsis tau ib qho li, txawm yuav muaj dab tsi tshwm sim los xij. Yog li ntawd lawv yuav ua li cas? Lawv tsuas xav phem thiab lam tau lam ua xwb thiab lawv tus kheej swb rau lawv txoj kev tsis muaj hmoo ntawd. Kuv txhais li cas thaum kuv hais tias lawv tus kheej swb rau lawv txoj kev tsis muaj hmoo? Lawv xav tias, “Au, kuv tsuas lam ua zoo li no kom dhau tiam neej no xwb!” Thaum lwm cov tib neeg raug qhuab qhia thiab raug qhuab ntuas mas, cov tib neeg ntawd tuaj yeem tig xav txog lawv tus kheej thiab hais tias, “Vim li cas kuv ho raug qhuab qhia thiab qhuab ntuas? Kuv tau ua dab tsi uas tawm tsam qhov tseeb tej hauv paus ntsiab lus lawm? Kuv tau nthuav tus moj yam qias vuab tsuab twg tawm lawm? Kuv txoj kev to taub puas tob txaus thiab khov txaus? Kuv yuav ua li cas to taub thiab daws cov teeb meem no?” Lawv hais tej zoo li no, thiab qhov no yog ib tug uas caum qhov tseeb. Txawm li cas los xij, thaum tus tib neeg uas hu ua hmoov phem ntawd raug qhuab qhia thiab raug qhuab ntuas mas, lawv xav tias lwm tus saib tsis taus lawv, tias lawv txoj hmoo phem, es yog li ntawd thiaj li tsis muaj ib tug twg nyiam lawv li, thiab leej twg xav qhuab ntuas lawv los yeej qhuab ntuas tau lawv. Thaum tsis muaj ib tug twg qhuab ntuas lawv li mas, lawv txoj kev nyuaj siab nqig me ntsis, tab sis kiag thaum muaj ib tug qhuab ntuas lawv mas, lawv txoj kev nyuaj siab haj yam nyuaj tuaj. Thaum lwm cov tib neeg raug qhuab ntuas, mas tej zaum lawv yuav xav phem mus ntau hnub. Vim lawv cov kwv tij thiab cov muam txoj kev pab thiab txhawb, lawv thiaj li nyeem Vajtswv cov lus thiab muaj peev xwm los lees txais qhov tseeb thiab lawv tus kheej maj mam hloov, thiab lawv tso tus yam ntxwv phem tseg rau tom qab. Txawm li cas los xij, cov uas xav rau lawv tus kheej tias muaj ib txoj hmoo phem ntawd tsis yog tsis tso txoj kev xav tsis zoo tseg rau tom qab xwb, tab sis qhov txawv mas lawv haj yam paub tseeb tias lawv muaj ib txoj hmoo phem tiag tiag. Vim li cas muaj li no? Lawv los rau ntawm Vajtswv lub tsev es xav tias yeej tsis siv lawv tej kev txawj kiag li, tias lawv yeej raug qhuab ntuas tas li thiab raug muab siv ua ib tug tshis uas ris kev txhaum xwb. Lawv thiaj li xav tias, “Koj pom lod? Lwm cov tib neeg ua li no tab sis tsis raug qhuab ntuas li, yog li ntawd ua li cas kuv ho raug qhuab ntuas thaum kuv ua li no? Tseeb tiag qhov no qhia tias kuv txoj hmoo yeej phem!” Ces yog li ntawd lawv thiaj li tau qhov nyuaj siab no thiab lawv thiaj li poob mus rau txoj kev tag kev cia siab lawm. Txawm lwm cov tib neeg sim qhia qhov tseeb rau lawv npaum li cas los, qhov ntawd yeej mus tsis taus, thiab lawv hais tias, “Nej tsuas raug qhuab ntuas ib pliag xwb, tab sis rau kuv mas txawv. Kuv ua tsis tau ib yam dab tsi yog li thiab yeej yug los tiv qhov raug qhuab ntuas ntawd. Kuv liam tsis tau rau ib tug twg, tsuas yog tias kuv txoj hmoo yeej phem xwb.” Vim lawv pheej ntseeg lawv tus kheej tias muaj ib txoj hmoo phem, thiab tias lawv yeej yuav zoo li no yog lawv tseem muaj sia nyob, ces txawm Vajtswv lub tsev yuav qhia tib neeg kom caum qhov tseeb li cas, yuav ua ib tug uas raug tsim tawm los tes dej num li cas, thiab yuav ua lawv tes dej num kom mus raws li tus qauv li cas los xij, yeej tsis muaj ib yam mus taus li. Vim lawv yeej paub tseeb tias lawv txoj hmoo yeej phem mus ib txhis lawm, lawv xav tias qhov uas zoo tshaj plaws ntawm qhov caum qhov tseeb thiab tau txais kev cawm dim no tsis muaj dab tsi cuam tshuam rau lawv, ces yog li ntawd lawv thiaj li tsis ua tib zoo ua lawv tes dej num kom zoo. Nyob hauv lawv lub siab mas lawv paub tseeb tias “Cov tib neeg muaj ib txoj hmoo phem ntawd yeej ua tsis tau lawv tes dej num kom zoo; tsuas yog cov tib neeg muaj ib txoj hmoo zoo xwb mas thiaj li ua tau lawv tes dej num zoo. Thaum ib tug muaj ib txoj hmoo zoo lawm, ces txhua qhov chaw uas lawv mus ntawd tib neeg yeej nyiam lawv, thiab txhua yam yeej mus zoo rau lawv. Kuv muaj ib txoj hmoo phem ces yeej ntsib cov tib neeg siab phem tas li xwb, kuv yeej tsis zoo siab ua kuv tej dej num li—tej kev tsis muaj hmoo no mas yeej los ib qho zuj zus los!” Vim lawv ntseeg lawv tus kheej tias muaj ib txoj hmoo phem, lawv thiaj li pheej tu siab thiab nyuaj siab. Lawv pheej ntseeg tias qhov caum qhov tseeb ntawd tsuas yog qee yam uas muab coj los tham txog xwb thiab tias ib tug zoo li lawv uas muaj ib txoj hmoo phem ntawd yeej tsis muaj hnub tau txais ib yam dab tsi los ntawm qhov caum qhov tseeb li. Lawv xav tias, txawm yog lawv yuav caum qhov tseeb los, lawv yuav tsis tau txais ib yam dab tsi nyob rau thaum kawg, thiab lawv pheej xav tias, “Yuav ua li cas cov tib neeg muaj ib txoj hmoo phem thiaj li nkag tau mus rau hauv lub nceeg vaj? Yuav ua li cas cov tib neeg muaj ib txoj hmoo phem thiaj li tau txais kev cawm dim?” Lawv tsis muaj cuab kav ntseeg qhov ntawd li, ces yog li ntawd lawv thiaj li pheej txwv lawv tus kheej, xav tias, “Vim kuv txoj hmoo yeej phem thiab kuv yug los txom nyem, ces qhov ciaj sia nyob thiab los ua ib tug neeg ua Vajtswv tes dej num nyob rau thaum kawg ntawd yuav tsis phem ua luaj twg. Qhov ntawd yuav txhais tias kuv cov poj koob yawg koob tej kev ua zoo yuav tawg paj txi txiv rau hauv kuv, ces lawv yuav foom koob hmoo zoo rau kuv. Vim kuv txoj hmoo yeej tsis zoo, ces tsuas tsim nyog ua qee tes dej num uas tsis tseem ceeb, xws li ua zaub mov, tu vaj tu tsev, los sis saib xyuas cov kwv tij thiab cov muam tej me nyuam xwb, los sis qee cov hauj lwm uas tsis zoo, thiab ntau yam ntxiv. Hos hais txog cov hauj lwm uas ua rau koj nrov rau hauv Vajtswv lub tsev ntawd mas, tej zaum kuv yuav tsis muaj feem xyuam txog tej ntawd yog tias kuv tseem ua neej nyob. Koj pom tias, kuv los rau ntawm Vajtswv lub tsev yam zoo siab heev, tab sis thaum kawg kuv zoo li cas xwb? Tsuas yog ua zaub mov thiab ua hauj lwm siv dag zog xwb. Yeej tsis muaj ib tug twg pom tias kuv sab npaum li cas thiab qhov ntawd nyuaj npaum li cas li, tsis muaj ib tug twg pom, thiab tsis muaj ib tug twg quav ntsej li. Yog qhov no tsis yog ib qho nyuaj thiab ces kuv tsis paub tias yog dab tsi lawm! Lwm cov tib neeg mas yog cov thawj ua yeeb yaj kiab los sis cov tshwj xeeb, yees yeeb yaj kiab ib daim tag ib daim tuaj, yees yeeb yaj duab ib daim tag ib daim tuaj—cas qhov ntawd yuav zoo ua luaj li! Kuv tsis tau nrov ib zaug li. Cas qhov no yuav yog ib qho nyuaj ua luaj li! Kuv txoj hmoo yeej phem heev li! Yuav liam leej twg rau kuv txoj hmoo phem? Qhov ntawd tsis yog kuv qhov txhaum lod? Kuv tsuas ua mus tas zog kom txog ntua rau lub sij hawm tuag xwb.” Lawv poob tob zuj zus mus rau hauv txoj kev xav tsis zoo no. Tsis yog lawv tsis muaj peev xwm tig xav txog thiab paub lawv tus kheej tej kev xav tsis zoo, los sis vim li cas ho muaj lawv, los sis seb puas muaj ib yam no muaj feem xyuam nrog rau qhov muaj ib txoj hmoo zoo los sis ib txoj hmoo phem, thiab seb lawv puas nrhiav qhov tseeb kom to taub tej no xwb, tab sis lawv kuj qi muag nti tuav rawv rau lub tswv yim uas xav tias tag nrho lawv tej teeb meem ntawd mas yog vim lawv txoj hmoo phem xwb. Qhov tau ntawm qhov no los ces yog qhov tias lawv poob tob zuj zus mus rau hauv tej kev xav tsis zoo no lawm thiab tsis muaj peev xwm tso lawv tus kheej dim. Thaum kawg, vim lawv pheej ntseeg lawv tus kheej tias muaj ib txoj hmoo phem, ces lawv thiaj li poob mus rau hauv txoj kev tag kev cia siab, ua neej tsis muaj ib lub hom phiaj tiag tiag li ces tsuas noj thiab pw, tos tuag xwb; yog li ntawd lawv thiaj li tsis nyiam caum qhov tseeb heev zuj zus tuaj, tsis nyiam ua lawv tes dej num kom zoo, kom tau txais kev cawm dim, thiab lwm yam xws li Vajtswv tej kev cheem tsum, thiab haj tseem tawm tsam thiab tsis lees yuav tej no ntau zuj zus ntxiv thiab. Lawv siv lawv txoj hmoo phem ua lawv lub ntsiab thiab lub hauv paus rau txoj kev tsis caum qhov tseeb thiab tsis muaj peev xwm tau txais kev cawm dim uas yog ib qho tseeb. Lawv tsis saib lawv tus kheej tus moj yam qias vuab tsuab los sis tej kev xav tsis zoo kom zoo rau hauv tej xwm txheej uas lawv ntsib es thiaj li paub kho lawv tus moj yam qias vuab tsuab ntawd, tab sis lawv ho siv lawv txoj kev xam pom txog qhov muaj ib txoj hmoo phem rau hauv qhov lawv teb rau txhua tus tib neeg, xwm txheej, thiab txhua yam uas lawv ntsib thiab paub, ces ua rau lawv haj yam poob tob mus rau hauv lawv txoj kev xav txog kev nyuaj siab xwb. Tsis yog li ntawd lod? (Yog.) Yog li ntawd, txoj kev xav txog kev nyuaj siab no uas tib neeg ntseeg tias lawv muaj ib txoj hmoo phem ntawd puas yog los tsis yog? (Tsis yog.) Ua li cas ho tsis yog? (Kuv xav tias txoj kev xav no mas txawv heev. Tib neeg coj lawv txoj hmoo phem los rau hauv qhov lawv piav thiab txwv txhua yam uas tshwm sim rau lawv. Thaum txhua yam tshwm sim rau lawv, lawv tsis tig xav txog thiab tsis los hais lus xaus txog qhov tias vim li cas thiaj li muaj tej teeb meem no, thiab lawv tsis nrhiav los sis tsis xav txog li. Qhov ntawd mas yog ib qho txawv heev thiab txwv txoj kev los daws ntau yam lawm.) Ua li cas ho muaj txoj kev los daws ntau yam uas txawv heev thiab tsis muaj qab hau no? Lub hauv paus ua rau muaj txoj kev xav txog kev nyuaj siab no yog dab tsi? (Kuv xav tias lub hauv paus ua rau muaj txoj kev xav no yog qhov tias lawv taug txoj kev tsis yog lawm, thiab qhov pib ntawm lawv txoj kev caum ntawd tsis yog lawm. Lawv muaj qee qhov kev ntshaw uas phem, lawv yeej ib txwm sib tw nrog lwm tus thiab muab lawv tus kheej piv rau lwm tus, thiab thaum lawv ua tsis tau raws li lawv tej kev ntshaw uas phem ntawd, ces txoj kev xav tsis zoo uas nyob hauv lawv siab no thiaj li tshwm tuaj.) Nej tsis tau to taub lub ntsiab tseeb ntawm qhov teeb meem no kom meej—qhov tseeb ceeb ces yog qhov tias lawv txoj kev xam pom txog qhov teeb meem ntawm “txoj hmoo” ntawd tsis yog lawm xwb. Lawv yeej ib txwm caum ib txoj hmoo zoo xwb los sis lawv xav kom lawv txoj hmoo yog txoj uas txhua yam mus zoo thiab yooj yim rau lawv. Lawv ib txwm saib rau tib neeg txoj hmoo, ces thaum lawv pib caum ib yam zoo li no, muaj dab tsi tshwm sim rau lawv? Lawv saib rau tib neeg txoj kev ua neej nyob rau ntawm txhua qhov chaw uas sib txawv, seb cov tib neeg ntawd noj dab tsi, cov tib neeg ntawd hnav dab tsi, cov tib neeg ntawd xyiv fab rau dab tsi, ces tom qab ntawd lawv muab qhov ntawd los piv rau lawv tus kheej qhov xwm txheej ces xav tias lawv phem tshaj nyob rau txhua qhov lawm, tias lwm cov mas zoo tshaj lawv lawm, ces yog li ntawd lawv thiaj li ntseeg lawv tus kheej tias muaj ib txoj hmoo phem. Qhov tiag ces, lawv tsis phem tshaj tshaj thiab, tab sis lawv pheej muab lawv tus kheej piv thiab ntsuas rau lwm tus, pheej siv zog ua tib zoo xav thiab saib qhov teeb meem ntawm “txoj hmoo” no thiab tshawb mus rau txoj kev kawm txog txoj hmoo no. Lawv siv txoj kev xam thiab kev xam pom txog qhov seb txoj hmoo no zoo los sis phem ntawd los ntsuas txhua yam, pheej ntsuas tas li, mus txog ntua rau thaum lawv ua nyuaj rau lawv tus kheej heev es tsis muaj txoj hau kev mus rau tom ntej li lawm, ces thaum kawg lawv thiaj li poob mus rau hauv txoj kev xav phem. Lawv pheej siv txoj kev xam pom txog qhov seb txoj hmoo zoo los sis phem ntawd los ntsuas qhov pom sab nraum qhov txhua yam tshwm sim ntawd xwb es tsis saib rau lub ntsiab tseeb ntawm txhua yam li. Qhov ua li no yog lawv ua dab tsi yuam kev lawm? Lawv tej kev xav hauv lub hlwb thiab tej kev xam pom ntawd mas tsis yog lawm thiab tsis muaj qab hau, thiab lawv tej tswv yim txog txoj hmoo ntawd los tsis yog lawm thiab. Tib neej txoj hmoo mas yog ib qho tob heev uas tsis muaj ib tug twg tuaj yeem to taub kom meej li. Qhov ntawd tsis yog ib tug tib neeg lub hnub yug xwb los sis lawv yug los rau lub sij hawm twg kiag es qhia seb ib tug tib neeg txoj hmoo yuav zoo los sis phem—qhov ntawd yog ib qho uas to taub nyuaj heev.

Qhov Vajtswv npaj seb ib tug tib neeg txoj hmoo yuav zoo li cas ntawd, txawm zoo los sis phem los xij, tsis yog saib los sis ntsuas raws li tib neeg lub qhov muag pom los sis raws li ib tug neeg saib hmoov lub qhov muag pom, thiab tsis yog ntsuas raws li qhov seb tus tib neeg ntawd xyiv fab rau txoj kev muaj txiag nplua nuj thiab lub yeeb koob npaum li cas nyob rau hauv lawv sim neej, los sis seb lawv raug kev txom nyem npaum li cas, los sis seb lawv vam meej npaum li cas nyob rau hauv lawv txoj kev caum tej hom phiaj, lub koob meej thiab txoj hmoo. Tiam sis qhov no yog kiag qhov cov uas hais tias lawv muaj ib txoj hmoo phem ntawd ua yuam kev loj tshaj plaws ntag, thiab yog ib txoj kev ntsuas ib tug tib neeg txoj hmoo uas tib neeg feem coob siv. Tib neeg feem coob ntsuas lawv tus kheej txoj hmoo li cas? Tib neeg hauv lub ntiaj teb ntsuas seb ib tug tib neeg txoj hmoo zoo los sis phem li cas? Feem ntaus mas, lawv ntsuas raws li qhov seb tus tib neeg ntawd lub neej mus zoo los sis phem, seb lawv puas tuaj yeem xyiv fab rau txoj kev muaj txiag nplua nuj thiab lub koob meej los sis tsis xyiv fab, seb lawv puas ua tau ib lub neej uas zoo tshaj lwm tus, lawv txom nyem npaum li cas thiab lawv xyiv fab npaum li cas rau hauv lawv sim neej, lawv yuav ua neej ntev npaum li cas, lawv muaj txoj hauj lwm dab tsi, seb hauv lawv lub neej puas muaj qhov rau siab ntso ua hauj lwm los sis tau zoo thiab yooj yim xwb—lawv siv tej no thiab ntau yam ntxiv los ntsuas seb ib tug tib neeg txoj hmoo zoo los sis phem. Nej tsis ntsuas zoo li no thiab lod? (Ntsuas.) Yog li ntawd, thaum nej feem coob ntsib qee yam uas nej tsis nyiam, thaum lub sij hawm nyuaj, los sis nej tsis muaj peev xwm xyiv fab rau ib lub neej uas zoo tshaj, ces nej yuav xav tias nej muaj ib txoj hmoo phem ib yam thiab, thiab nej yuav poob mus rau hauv txoj kev nyuaj siab. Cov uas hais tias lawv muaj ib txoj hmoo phem ntawd tsis yog muaj ib txoj hmoo phem tiag tiag, thiab cov uas hais tias lawv muaj ib txoj hmoo zoo ntawd tsis yog muaj ib txoj hmoo zoo tiag tiag. Qhov zoo los sis phem ntawd yog ntsuas li cas kiag? Nej txoj hmoo zoo yog tias nej ntseeg Vajtswv, thiab txoj hmoo tsis zoo yog tias nej tsis ntseeg Vajtswv—hais li no puas yog? (Tsis yog li.) Nej hais tias, “tsis yog li,” ces txhais tias muaj ib txhia uas ntseeg Vajtswv mas muaj ib txoj hmoo phem tiag tiag thiab muaj ib txhia uas ntseeg mas muaj ib txoj hmoo zoo. Yog tias muaj li no, ces muaj ib txhia tib neeg uas tsis ntseeg Vajtswv kuj muaj ib txoj hmoo zoo thiab muaj ib txhia muaj ib txoj hmoo phem thiab—hais li no puas yog? (Tsis yog, qhov ko tsis yog lawm.) Qhia Kuv seb vim li cas nej thiaj li hais li no. Vim li cas qhov no thiaj li tsis yog? (Kuv tsis ntseeg tias ib tug tib neeg txoj hmoo yuav muaj feem cuam tshuam rau qhov seb lawv puas ntseeg Vajtswv.) Qhov ko yog lawm; txawm ib tug tib neeg txoj hmoo zoo los sis phem los xij tsis muaj feem dab tsi cuam tshuam rau txoj kev ntseeg Vajtswv. Yog li ntawd, qhov ntawd muaj feem cuam tshuam rau dab tsi xwb? Qhov ntawd puas muaj feem cuam tshuam rau txoj kev uas tib neeg taug los sis rau lawv txoj kev caum? Puas yog tias ib txhia muaj ib txoj hmoo zoo yog tias lawv caum qhov tseeb, tab sis mas lawv muaj ib qho nyuaj heev yog tias lawv tsis caum? Qhia Kuv seb, ib tug poj ntsuam puas muaj ib txoj hmoo zoo? Rau cov tib neeg hauv ntiaj teb mas, cov poj ntsuam muaj ib txoj hmoo phem. Yog tias lawv ua poj ntsuam thaum lawv muaj peb caug los sis plaub caug xyoo mas, lawv muaj ib txoj hmoo phem tiag tiag, qhov no mas nyuaj rau lawv tiag tiag li! Tab sis yog tias ib tug poj ntsuam txom nyem heev vim lawv tus txiv tuag lawm, es lawv los ntseeg Vajtswv no, tom qab ntawd lawv txoj hmoo puas nyuaj thiab? (Tsis nyuaj.) Vim cov uas tsis tau ua poj ntsuam dua mas yeej ua ib lub neej zoo siab, txhua yam yeej mus tau zoo rau lawv, muaj ntau txoj kev txhawb, muaj zaub mov thiab khawb ncaws, muaj ib tsev neeg uas muaj me nyuam thiab xeeb leej xeeb ntxwv puv nkaus, ua ib lub neej kaj siab lug, tsis muaj ib qho kev nyuaj los sis tsis xav tau dab tsi ntawm sab ntsujplig li, lawv tsis ntseeg Vajtswv thiab lawv yuav tsis ntseeg Nws li txawm koj tas zog tshaj tawm txoj moo zoo rau lawm npaum li cas los xij. Yog li ntawd leej twg muaj txoj hmoo zoo? (Tus poj ntsuam muaj txoj hmoo zoo vim nws tau los ntseeg Vajtswv lawm.) Koj pom tias, vim tib neeg hauv ntiaj teb xam tias tus poj ntsuam ntawd muaj ib txoj hmoo phem, thiab nws txom nyem heev li, ces nws thiaj li hloov txoj xub ke thiab pib los taug ib txoj kev txawv lawm, thiab nws ntseeg Vajtswv thiab caum Vajtswv qab—qhov no tsis txhais tias tam sim no nws muaj ib txoj hmoo zoo, thiab ua neej zoo siab hlo lawm lod? (Txhais li ntawd.) Nws txoj hmoo phem tau hloov los ua ib txoj hmoo zoo lawm. Yog koj hais tias nws muaj ib txoj hmoo phem, ces nws txoj hmoo hauv lub neej yeej ib txwm phem thiab nws yeej hloov tsis tau txoj hmoo ntawd li; yog li ntawd ces yuav ua li cas thiaj li hloov tau? Puas yog nws txoj hmoo hloov thaum nws pib ntseeg Vajtswv lawm? (Tsis yog, yog vim nws tej kev xam pom txog txhua yam ntawd tau hloov lawm xwb.) Vim qhov nws saib rau txhua yam ntawd tau hloov lawm. Qhov muaj tseeb ntawm nws tus kheej txoj hmoo ntawd puas tau hloov? (Tsis tau.) Ua ntej tus poj ntsuam ntawd los ntseeg Vajtswv mas, nws ntshaw cov poj niam uas tsis tau ua poj ntsuam, ces thiaj li xav tias, “Saib nws seb, nws muaj ib txoj hmoo zoo heev. Nws muaj ib tug txiv, ib lub tsev, nws muaj ib lub neej uas zoo siab thiab txaus siab. Nws tsis raug txoj kev txom nyem ntawm qhov ua ib tug poj ntsuam no.” Txawm li cas los xij, tom qab nws ntseeg Vajtswv lawm, nws thiaj li xav tias, “tam sim no kuv ntseeg Vajtswv thiab Vajtswv tau xaiv kuv los caum Nws qab lawm, thiab kuv yeej ua tau kuv tes dej num thiab tau txais qhov tseeb lawm. Yav tom ntej kuv yuav muaj peev xwm tau txais txoj kev cawm dim thiab nkag mus rau lub nceeg vaj. Cas qhov no yuav yog ib txoj hmoo zoo ua luaj li! Tus poj niam ntawd tsis tau ua poj ntsuam li, tab sis nws txoj hmoo ho zoo li cas? Nws ib txwm nrhiav kev kom xyiv fab rau lub neej, caum lub koob meej, txoj hmoo, thiab lub meej mom, saib ntsoov kom ua tau nws txoj hauj lwm zoo, thiab xyiv fab rau txoj kev vam meej thiab kev muaj txiag nplua nuj xwb, tab sis tom qab thaum nws tuag lawm, nws yeej tseem yuav mus rau hauv ntuj tawg. Nws muaj ib txoj hmoo phem. Kuv txoj hmoo zoo tshaj nws txoj!” Nws tej kev xam pom tau hloov lawm, tab sis qhov muaj tseeb tseem tsis tau hloov. Tus uas tsis ntseeg Vajtswv tseem xav tias, “Hwj! Kuv txoj hmoo zoo tshaj koj txoj! Koj yog ib tug poj ntsuam hos kuv tsis yog. Kuv lub neej zoo tshaj koj lub. Kuv muaj ib txoj hmoo zoo!” Txawm li cas los xij, raws li tus poj niam uas tau los ntseeg Vajtswv ntawd pom mas, nws tsis muaj ib txoj hmoo zoo. Ua li cas ho muaj txoj kev hloov no? Puas yog tus poj ntsuam ntawd qhov xwm txheej tau hloov lawm? (Tsis yog.) Yog li ntawd ua li cas nws tej kev xam pom ho tau hloov lawm? (Nws tus qauv rau txoj kev ntsuas seb txhua yam zoo los sis phem ntawd tau hloov lawm.) Yog mas, nws tej kev xam pom txog qhov ntsuas txhua yam thiab xav txog tej ntawd tau hloov lawm. Nws tau hloov ntawm qhov xav tias tus poj niam uas tsis tau ua poj ntsuam ntawd muaj ib txoj hmoo zoo mus rau qhov xav tias nws muaj ib txoj hmoo phem lawm, thiab hloov ntawm qhov xav tias nws tus kheej muaj ib txoj hmoo phem mus rau qhov xav tias nws muaj txoj hmoo zoo lawm. Ob qho kev xam pom no mas txawv ntawm ob qho kev xam pom yav dhau los lawm, ob qho kev xam pom no tau hloov tag nrho lawm. Muaj dab tsi tshwm sim nyob rau ntawm no? Qhov muaj tseeb thiab qhov xwm txheej tseem tsis tau hloov, yog li ntawd ua li cas thaum kawg nws ho tau hloov tej kev xam pom txog txhua yam lawm? (Tom qab nws tau lees txais qhov tseeb thiab lees txais txhua yam zoo lawm, tam sim no nws thiaj li siv tus qauv uas yog hauv nws tej kev xam pom los ntsuas txhua yam seb zoo los sis phem lawm.) Nws tej kev xam pom txog txhua yam ntawd tau hloov lawm, tab sis qhov muaj tseeb tiag tiag ntawd puas tau hloov? (Tsis tau.) Tus poj ntsuam ntawd tseem ua poj ntsuam, thiab tus poj niam uas ua neej zoo siab hlo ntawd tseem ua neej zoo siab hlo—tsis muaj kev hloov nyob rau hauv qhov muaj tseeb tiag tiag li. Yog li ntawd, thaum kawg leej twg muaj txoj hmoo zoo thiab leej twg muaj txoj hmoo phem? Koj piav qhia puas tau? Tus poj ntsuam ntawd keev xav tias nws muaj ib txoj hmoo phem, ib lub ntsiab ces yog nws qhov xwm txheej ntawm txoj kev ua neej, hos lwm lub ntsiab ces yog tej kev xav hauv lub hlwb thiab tej kev xam pom uas nws qhov xwm txheej ua rau muaj. Tom qab nws los ntseeg Vajtswv lawm, ces los ntawm qhov nyeem Vajtswv cov lus thiab qhov to taub qee qhov tseeb, nws tej kev xav hauv lub hlwb thiaj li mus raws li qhov tseeb thiab hloov lawm, thiab nws txoj kev xam txog txhua yam ntawd thiaj li txawv lawm. Yog li ntawd, tom qab nws los ntseeg Vajtswv lawm, nws thiaj li tsis xav tias nws tus kheej muaj ib txoj hmoo phem mus ntxiv lawm, tab sis xav ua ib tug uas muaj ib txoj hmoo zoo lawm xwb, vim nws tau muaj lub hwv tsam los lees txais Vajtswv tes hauj lwm, thiab nws tuaj yeem to taub qhov tseeb thiab tau txais txoj kev cawm dim lawm—qhov no yog qee yam uas Vajtswv twb npaj ua ntej lawm, thiab nws tau koob hmoov ntau tshaj plaws lawm. Thaum nws ntseeg Vajtswv lawm, nws rau siab ntso caum qhov tseeb, uas yog txawv ntawm tej hom phiaj uas nws caum yav dhau los lawm. Tab txawm tias nws txoj kev noj nyob, qhov xwm txheej ntawm txoj kev ua neej, thiab nws qhov zoo ntawm lub neej tsuas zoo ib yam li yav dhau los xwb thiab tsis tau hloov los xij, tiam sis nws tej kev xam pom txog txhua yam ntawd tau hloov lawm. Qhov tseeb tiag, qhov nws los muaj ib txoj hmoo zoo ntawd puas yog vim nws ntseeg Vajtswv tiag tiag? Tsis yog. Tsuas yog qhov tias tam sim no nws ntseeg Vajtswv, nws muaj kev cia siab, nws muaj qee qhov kev txaus siab nyob rau hauv nws lub siab lawm xwb, ces tej hom phiaj uas nws caum ntawd tau hloov lawm, nws tej kev xam pom mas txawv lawm, ces yog li ntawd nws qhov xwm txheej ntawm txoj kev ua neej tam sim no thiaj li ua rau nws zoo siab, txaus siab, xyiv fab, thiab kaj siab lawm. Nws hnov tias tam sim no nws txoj hmoo mas zoo heev li lawm, zoo tshaj li tus poj niam uas tsis tau ua poj ntsuam ntawd txoj hmoo lawm. Tsuas yog tam sim no xwb nws thiaj li ras tias txoj kev xam pom uas nws muaj yav tas los, uas ntseeg nws tus kheej tias muaj ib txoj hmoo phem, ntawd mas tsis yog lawm. Nej pom dab tsi los ntawm qhov no? Puas muaj tej uas hais tias “txoj hmoo zoo” thiab “txoj hmoo phem”? (Tsis muaj.) Tsis muaj, yeej tsis muaj li.

Vajtswv twb npaj tib neeg txoj hmoo ua ntej los ntev lawm, ces txoj hmoo ntawd yeej hloov tsis tau li. “Txoj hmoo zoo” thiab “txoj hmoo phem” no mas txawv ntawm ib tug tib neeg mus rau ib tug tib neeg, thiab txoj hmoo zoo thiab txoj hmoo phem ntawd mus raws li qhov xwm txheej, raws li qhov seb tib neeg xav li cas thiab lawv caum dab tsi. Vim li ntawd es ib tug tib neeg twg txoj hmoo thiaj li tsis zoo los sis tsis phem. Tej zaum koj ua ib lub neej nyuaj heev, tab sis tej zaum koj xav tias, “Kuv tsis tos qhov ua lub neej zoo rau thaum kawg. Kuv tsuas zoo siab rau qhov muaj txaus noj thiab muaj khawb ncaws txaus hnav xwb. Txhua tus yeej txom nyem nyob rau lawv sim neej. Cov tib neeg hauv ntiaj teb thiaj li hais tias, ‘Koj tsis pom ib tug duab zaj yog tsis los nag,’ yog li ntawd txoj kev txom nyem thiaj li muaj nqis. Lub ntuj ceeb tsheej uas nyob saud tau muab ib co kev mob, ib co kev sim siab, thiab kev ceeb laj txom nyem rau kuv lawm. Qhov ntawd yog vim tias Nws saib kuv tseem ceeb. Qhov no yog ib txoj hmoo zoo!” Ib txhia tib neeg xav tias kev txom nyem yog ib yam phem, qhov ntawd txhais tias lawv muaj ib txoj hmoo phem, thiab tsuas yog muaj ib lub neej uas tsis muaj kev txom nyem, tau zoo thiab kaj siab xwb mas thiaj li txhais tias lawv muaj ib txoj hmoo zoo. Cov tsis ntseeg hu qhov no ua “ib lub tswv yim” xwb. Cov ntseeg Vajtswv xav li cas txog “txoj hmoo” no? Puas yog peb tham txog qhov muaj “ib txoj hmoo zoo” los sis ib “txoj hmoo phem”? (Tsis yog.) Peb tsis hais tej zoo li no. Muab hais tias koj muaj ib txoj hmoo zoo vim koj ntseeg Vajtswv, ces yog koj tsis taug txoj kev yog hauv koj txoj kev ntseeg, yog koj raug rau txim, raug qhia tshwm thiab raug ntiab tawm, ces qhov ntawd puas txhais tias koj muaj ib txoj hmoo zoo los sis ib txoj hmoo phem? Yog koj tsis ntseeg Vajtswv, ces tej zaum koj tsis tuaj yeem raug muab qhia tshwm los sis raug ntiab tawm. Cov tsis ntseeg thiab cov tib neeg coj kev cai qub mas tsis tham txog qhov muab tib neeg qhia tshwm los sis qhov paub txog tib neeg, thiab lawv tsis tham txog qhov tib neeg raug tshem tawm los sis raug ntiab tawm. Qhov ntawd yuav tsum txhais tias tib neeg muaj ib txoj hmoo zoo thaum lawv muaj peev xwm los ntseeg Vajtswv, tab sis yog thaum kawg es lawv raug rau txim, ces qhov ntawd puas txhais tias lawv muaj ib txoj hmoo phem? Ib lub sij hawm mas lawv txoj hmoo zoo, hos lwm lub sij hawm mas lawv txoj hmoo phem—yog li ntawd qhov twg zoo qhov twg phem mas? Txawm ib tug twg muaj ib txoj hmoo zoo los sis tsis zoo los tsis yog qee yam uas muab txiav txim tau, tib neeg txiav txim tsis tau rau qhov no. Txhua yam uas Vajtswv ua thiab txhua yam uas Vajtswv npaj ces yeej zoo lawm. Tsuas yog qhov tias qhov xwm txheej ntawm txhua tus txoj hmoo, los sis lawv cheeb tsam, thiab cov tib neeg, tej xwm txheej, thiab tej uas lawv ntsib, thiab txoj kev ua neej uas lawv paub nyob rau hauv lawv lub neej ntawd puav leej sib txawv xwb; tej no mas txawv ntawm ib tug tib neeg mus rau ib tug tib neeg. Txhua tus qhov chaw nyob thiab qhov chaw uas lawv loj hlob, ob yam uas yog Vajtswv npaj rau lawv ntawd, puav leej sib txawv tib si. Tej uas txhua tus ntsib thiab pom nyob rau hauv lawv lub neej ntawd mas puav leej sib txawv thiab. Tsis muaj qhov hu ua txoj hmoo zoo los sis txoj hmoo phem—Vajtswv npaj txhua yam lawm, thiab puav leej yog Vajtswv ua. Yog peb xav txog qhov no los ntawm txoj kev xam tias puav leej yog Vajtswv ua, ces txhua yam Vajtswv ua yeej zoo thiab yog lawm; tsuas yog qhov tias xam los ntawm tib neeg tej kev txiav txim, tej kev xav hauv siab thiab tej kev xaiv xwb, ces ib txhia tib neeg thiaj li xaiv mus ua ib lub neej tau zoo, xaiv kom muaj koob meej thiab muaj hmoo, muaj ib lub koob lub npe zoo, kom muaj kev vam meej rau hauv lub ntiaj teb thiab rau lawv tus kheej xwb. Lawv ntseeg tias qhov no txhais tias lawv muaj ib txoj hmoo zoo, thiab tias qhov ua ib sim neej rau ntawm txoj kev tsis zoo thiab tsis vam meej, ib txwm ua lub neej tuaj qab tsag ntawd mas yog ib txoj hmoo phem. Qhov no yog qhov cov tsis ntseeg txoj kev xam tias txhua yam zoo li cas thiab cov tib neeg hauv ntiaj teb caum tej uas nyob hauv ntiaj teb thiab nrhiav kev los nyob rau hauv lub ntiaj teb li cas, thiab qhov no yog qhov muaj lub tswv yim ntawm txoj hmoo zoo thiab txoj hmoo phem los li cas. Lub tswv yim ntawm txoj hmoo zoo thiab txoj hmoo phem ntawd tsuas yog muaj los ntawm tib neeg txoj kev to taub uas nqaim nqaim thiab txoj kev paub uas ntiav ntiav txog txoj hmoo los xwb, thiab los ntawm tib neeg tej kev txiav txim txog qhov lawv tiv kev txom nyem ntawm sab cev nqaij daim tawv npaum li cas, thiab lawv tau txais kev xyiv fab, lub koob meej thiab hmoov ntau npaum li cas, thiab ntau yam ntxiv li cas. Qhov tseeb tiag, yog peb saib qhov ntawd los ntawm txoj kev xam txog Vajtswv txoj kev npaj thiab lub hwv chim kav tib neeg txoj hmoo, ces yeej tsis muaj tej lus tshab txhais zoo li ntawd txog txoj hmoo zoo los sis txoj hmoo phem li. Tsis yog li no lod? (Yog.) Yog koj saib tib neeg txoj hmoo los ntawm Vajtswv lub hwj chim kav, ces txhua yam uas Vajtswv ua ntawd yeej zoo lawm, thiab txhua yam ntawd yog yam uas txhua tus tim tsum. Qhov no yog vim tias qhov tsim thiab qhov tau los ntawd muaj ib feem nyob rau hauv lub neej yav tas los thiab lub neej tam sim no, Vajtswv twb npaj ob yam no ua ntej lawm, ces Vajtswv muaj hwj chim kav ob yam no, thiab Vajtswv npaj thiab teeb ob yam no—tib neeg ntiaj teb thiaj li tsis muaj kev xaiv lawm. Yog peb saib qhov ntawd los ntawm qhov xav li no, ces tib neeg yuav tsum txhob txiav txim rau lawv tus kheej txoj hmoo tias zoo los sis phem, puas yog? Yog tib neeg cia li txiav txim rau qhov no, ces tsis yog lawv ua ib qho yuam kev uas phem kawg lod? Tsis yog lawv ua yuam kev txog qhov txiav txim rau Vajtswv tej kev npaj, tej kev teeb tseg, thiab lub hwj chim kav lod? (Lawv ua yuam kev lawm.) Thiab qhov kev ua yuam kev ntawd tsis yog ib qho loj lod? Qhov ntawd tsis cuam tshuam rau txoj kev uas lawv taug hauv lub neej lod? (Qhov ntawd yeej yuav cuam tshuam.) Yog li ces qhov kev ua yuam kev ntawd yuav coj lawv mus rau txoj kev puas tsuaj.

Tib neeg tsim nyog ua li cas thaum hais txog Vajtswv tej kev teeb tseg thiab lub hwj chim kav lawv txoj hmoo? (Ua raws li Vajtswv tej kev coj kev qhia thiab tej kev teeb tseg.) Ua ntej tshaj, koj yuav tsum nrhiav kom to taub tias vim li cas tus Tswv Tsim thiaj li tau npaj hom hmoov thiab qhov xwm txheej ntawm txoj kev nyob no rau koj, vim li cas Nws thiaj li ua kom koj ntsib thiab paub qee yam, thiab vim li cas koj txoj hmoo thiaj li yog li ntawd. Vim li no, koj yuav tsum to taub tias koj lub siab ntshaw dab tsi thiab tim tsum dab tsi, nrog rau Vajtswv lub hwj chim kav thiab tej kev teeb tseg. Tom qab koj to taub thiab paub tej no lawm mas, koj yuav tsum txhob tawm tsam, txhob txiav txim siab rau koj tus kheej txog qhov ntawd, txhob tsis lees txais, txhob tsis lees paub, los sis txhob zam kom dhau koj txoj hmoo. Tseeb tiag, koj kuj yuav tsum txhob sim los nrog Vajntswv sib khom thiab. Tiam sis, koj yuav tsum ua raws li xwb. Vim li cas koj yuav tsum ua raws li xwb? Vim tias koj yog ib tug neeg uas raug tsim tawm los xwb, ces koj coj tsis tau koj txoj hmoo thiab koj tsis muaj hwj chim kav txoj hmoo ntawd. Koj txoj hmoo mas yog Vajtswv txiav txim siab xwb. Thaum hais txog koj txoj hmoo mas, koj nyob twj ywm thiab koj tsis muaj kev xaiv. Tib yam uas koj yuav tsum ua ces yog ua raws li xwb. Koj yuav tsum txhob txiav txim siab rau koj tus kheej txog koj txoj hmoo los sis zam kom dhau txoj hmoo ntawd, koj yuav tsum txhob nrog Vajtswv sib khom, thiab koj yuav tsum txhob tawm tsam koj txoj hmoo los sis yws li. Tseeb tiag, tshwj xeeb mas koj yuav tsum txhob hais tej yam zoo li, “Txoj hmoo uas Vajtswv tau npaj rau kuv lawm ntawd yeej phem. Txoj hmoo ntawd mas ntxhov siab thiab nws phem tshaj li lwm tus txoj hmoo,” los sis “Kuv txoj hmoo yeej phem ces kuv thiaj li tsis tau xyiv fab rau ib qho kev zoo siab los sis kev vam meej li. Vajtswv tau npaj txhua yam phem heev rau kuv lawm.” Cov lus no yog kev txiav txim thiab qhov hais cov lus no ces yog koj hla koj qhov chaw lawm. Cov lus no tsis yog cov lus uas ib tug neeg raug tsim tawm los yuav tsum hais thiab cov lus no tsis yog tej kev xam los sis tus cwj pwm uas ib tug neeg raug tsim tawm los yuav tsum muaj. Tiam sis, koj yuav tsum muab tej kev to taub, tej lus tshab txhais, tej kev xam pom, thiab tej kev nkag siab uas tsis muaj tseeb txog txoj hmoo no tso tseg mus. Nyob rau tib lub sij hawm no, koj yuav tsum muaj peev xwm hloov mus rau ib tug cwj pwm thiab sab uas yog es los ua raws li txhua yam uas yuav muaj tshwm sim es yog ib feem ntawm txoj hmoo uas Vajtswv tau npaj rau koj lawm. Koj yuav tsum txhob tawm tsam, thiab koj yuav tsum txhob nyuaj siab thiab txhob yws tias Ntuj Ceeb Tsheej mas tsis ncaj ncees kiag li, tias Vajtswv tau npaj tej uas phem heev rau koj lawm, es tsis muab yam uas zoo tshaj plaws pub rau koj li. Cov neeg uas raug tsim tawm los ntawd tsis muaj cai xaiv lawv txoj hmoo. Vajtswv tsis muab hom kev cheem tsum no rau koj thiab Nws tsis muab txoj cai no rau koj. Yog li ntawd, koj yuav tsum txhob sim los xaiv, los cam nrog Vajtswv, los sis los thov Nws ntxiv lawm. Koj yuav tsum ua li thiab ua raws li Vajtswv tej kev teeb tseg, txawm tej kev teeb tseg ntawd yuav yog dab tsi los xij li. Koj yuav tsum ua raws li thiab sim kom paub nco txiaj ntsig rau yam uas Vajtswv tau npaj lawm. Koj yuav tsum ua raws li txhua yam uas koj tsim nyog paub los ntawm Vajtswv tej kev teeb tseg. Koj yuav tsum ua raws li txoj hmoo uas Vajtswv tau npaj rau koj lawm. Txawm yog tias koj tsis nyiam qee yam los xij, los sis yog koj raug txom nyem vim yog qhov ntawd los xij, txawm yog qhov ntawd ua rau koj txoj kev khav theeb thiab lub koob npe puas tsuaj thiab raug txwv los xij, tsuav qhov ntawd yog qee yam uas koj tsim nyog paub, qee yam uas Vajtswv tau coj qhia thiab npaj rau koj lawm, ces koj yuav tsum ua raws li qhov ntawd thiab koj tsis muaj kev xaiv txog qhov ntawd. Vim tias Vajtswv npaj tib neeg txoj hmoo thiab muaj hwj chim kav txoj hmoo ntawd, ces lawv nrog Nws sib khom tsis tau. Yog li ntawd, yog tib neeg paub thiab muaj lub ntsiab txog txoj kev ua neej, ces lawv yuav tsum txhob yws tias lawv txoj hmoo yeej phem los sis tias yam no los sis yam tod mas tsis zoo rau lawv. Lawv yuav tsum txhob muaj ib tug cwj pwm nyuaj siab es yws lawv tes dej num, lawv lub neej, txoj kev uas lawv taug hauv lawv txoj kev ntseeg, tej xwm txheej uas Vajtswv tau npaj lawm, los sis Nws tej kev tim tsum ntawm lawv tsuas yog vim tias lawv xav tias lawv txoj hmoo yeej phem xwb. Hom kev nyuaj siab no tsis yog ib txoj kev ntxeev siab uas yooj yim los sis nyob ib nyuag ntu xwb, thiab nws tsis yog txoj kev nthuav tawm txog ib tug moj yam qias vuab tsuab uas nyob ib nyuag ntu xwb, haj yam tsis yog txoj kev nthuav tawm txog ib tug yam ntxwv qias vuab tsuab thiab. Tab sis, kev nyuaj siab yog ib txoj kev tawm tsam Vajtswv ntsiag to, thiab yog ib txoj kev tawm tsam uas tsis txaus siab yam ntsiag to rau txoj hmoo uas Vajtswv npaj rau lawv lawm. Txawm tias tej zaum kev nyuaj siab tsuas yog ib txoj kev xav tsis zoo xwb los, lub txim uas kev nyuaj siab coj los rau tib neeg ntawd mas loj tshaj li cov txim uas ib tug moj yam qias vuab tsuab coj los. Kev nyuaj siab tsis yog txwv kom koj txhob muaj ib tug cwj pwm zoo thiab yog rau tes dej num uas koj yuav tsum tau ua, thiab rau koj tus kheej lub neej txhua hnub thiab lub neej mus rau tom ntej xwb tab sis, laj tshaj ntawd, nws kuj ua tau rau koj liam sim vim kev nyuaj siab thiab. Yog li ntawd, cov tib neeg ntse yuav maj nroos los muab lawv tej kev xam pom uas tsis yog lawm ntawd hloov, tig xav txog lawv tus kheej thiab los paub lawv tus kheej hauv txoj kev kaj ntawm Vajtswv cov lus, thiab saib seb dab tsi ua rau lawv ntseeg tias lawv muaj ib txoj hmoo phem; lawv yuav tsum saib seb lawv lub koob npe raug puas tsuaj li cas lawm los sis mob lawv lub siab li cas, es thiaj li ua rau muaj tej kev xav tsis zoo hauv lub hlwb xws li xav tias lawv muaj ib txoj hmoo tsis zoo, uas ua rau lawv poob mus hauv txoj kev xav tsis zoo txog kev nyuaj siab uas tsis muaj hnub lawv kho tau lawm, los txog ntua niaj hnub no. Qhov no yog ib qho teeb meem uas koj yuav tsum tig xav txog thiab saib kom meej. Tej zaum muaj tej yam mas twb cog tob tob rau hauv koj lub siab lawm, los sis tej zaum ib txhia tau hais qee yam phem rau koj lawm uas ua rau koj txoj kev hwm tus kheej ntawd puas tsuaj lawm, ces qhov no thiaj li ua rau koj xav tias koj muaj ib txoj hmoo phem, ces yog li ntawd koj thiaj li poob mus rau hauv kev nyuaj siab lawm; los sis tej zaum nyob rau hauv koj lub neej los sis thaum koj loj hlob tuaj ntawd, muaj qee txoj kev xav hauv lub hlwb los sis kev xam pom txog Ntxwgnyoog los sis txog lub ntiaj teb ces thiaj li ua rau koj muaj txoj kev to taub tsis yog txog txoj hmoo no thiab los xav seb koj muaj ib txoj hmoo zoo los sis ib txoj hmoo phem; los sis tej zaum tom qab paub txog qee yam uas chim chim siab nyob rau qee ntu, ces tshwj xeeb koj thiaj li los xav txog qhov ntawd tiag tiag thiab xav txog koj txoj hmoo; thiab tom qab ntawd koj thiaj li ua lub siab ntev txog qhov ntawd thiab mob siab los hloov koj txoj hmoo—tej no yog txhua yam uas koj yuav tsum saib kom meej. Txawm li cas los xij, txawm koj yuav saib txog tej no kom meej li cas los xij li, yam uas thaum kawg koj yuav tsum to taub ces yog qhov no: Koj yuav tsum txhob siv tej kev xav hauv lub hlwb thiab tej kev xam pom txog seb txoj hmoo zoo los sis phem ntawd los ntsuas koj tus kheej txoj hmoo. Txoj hmoo ntawm ib tug tib neeg lub neej yog Vajtswv tuav rau hauv Nws ob txhais tes thiab Vajtswv twb npaj txoj hmoo ntawd los ntev lawm; qhov no tsis yog qee yam uas tib neeg hloov tau. Txawm li cas los xij, hom kev uas ib tib neeg taug nyob rau lawv sim neej ntawd thiab seb lawv puas ua tau ib lub neej kom muaj nqis ntawd yog tej kev uas tib neeg xaiv tau rau lawv tus kheej. Koj yuav xaiv tau los ua ib lub neej kom muaj nqis, ua koj lub neej rau tej uas muaj nqis, ua lub neej rau tus Tswv Tsim tej kev npaj thiab kev cawm tib neeg, thiab rau txoj kev ncaj ncees uas tsim tib neeg ntiaj teb. Tseeb tiag, koj kuj xaiv tau kom txhob ua lub neej rau tej yam zoo thiab, tab sis ua lub neej rau txoj kev caum lub koob meej thiab txoj hmoo, ib txoj hauj lwm ua nom ua tswv, muaj txiag nplua nuj, thiab tej kev coj hauv lub ntiaj teb. Koj xaiv tau los ua ib lub neej tsis muaj nqis li thiab zoo li ib tug ntawm cov tuag uas mus kev lawm xwb. Tej no yog txhua txoj kev xaiv uas koj yeej xaiv tau.

Los ntawm txoj kev sib qhia li no, nej puas tau to taub seb tej kev xav hauv lub hlwb thiab kev xam pom ntawm cov tib neeg uas ib txwm hais tias lawv muaj ib txoj hmoo phem ntawd yog los sis tsis yog? (Lawv tsis yog lawm.) Tseeb tiag, cov tib neeg no muaj txoj kev xav txog kev nyuaj siab vim muaj txoj kev phem dhau lawm. Lawv muaj txoj kev xav txog kev nyuaj siab uas phem no vim muaj tej kev xav hauv lub hlwb thiab kev xam uas phem, ces lawv thiaj li tsis muaj peev xwm los kho tej uas tshwm sim nyob hauv lub neej kom yog, lawv thiaj li coj tsis tau tej yam ntxwv uas tib neeg yuav tsum muaj ntawd tawm los rau sab nraud li ib txwm ua, thiab ua tsis tau tej dej num, tej luag hauj lwm los sis tej uas yuav tsum tau ua ntawm ib tug uas raug tsim tawm los. Yog li ntawd, lawv los kuj zoo ib yam li ntau hom tib neeg uas poob mus rau hauv tej kev xav tsis zoo uas peb tau tham txog nyob rau hauv peb txoj kev sib qhia yav tas los lawm thiab. Txawm tias cov tib neeg uas xav tias lawv muaj ib txoj hmoo phem no ntseeg Vajtswv, thiab muaj peev xwm muab ntau yam tso tseg, muab lawv tus kheej fij rau Vajtswv thiab caum Vajtswv qab los xij, tiam sis lawv los kuj ib yam thiab uas tsis muaj peev xwm ua lawv tes dej num nyob hauv Vajtswv lub tsev yam ywj siab, tso siab thiab kaj siab lug li. Vim li cas lawv thiaj li ua tsis tau li no? Yog vim tias nyob rau hauv lawv lub siab mas lawv zais ib txoj kev phem thiab tej kev xav hauv lub hlwb thiab tej kev xam pom tsis zoo uas ua rau muaj tej kev xav phem nyob hauv lawv. Tej kev xav phem no ua txoj kev rau lawv txiav txim rau txhua yam, ua txoj kev rau lawv xav, thiab lawv tej kev xam pom txog txhua yam uas los ntawm qhov kev xav uas phem, tsis yog thiab cuav los. Lawv saib teeb meem thiab tib neeg los ntawm qhov kev xav uas phem thiab tsis yog no los, ces thiaj li ua neej, saib tib neeg thiab txhua yam, thiab coj lawv tus kheej thiab ua raws li qhov tshwm sim thiab txoj kev hloov ntawm txoj kev xav tsis zoo no tas zog li. Thaum kawg, txawm lawv ua neej zoo li cas los, zoo li lawv sab sab heev es thiaj li tsis muaj peev xwm muaj ib qhov kev kub siab rau lawv txoj kev ntseeg Vajtswv thiab caum qhov tseeb li. Txawm lawv yuav xaiv los ua lawv lub neej li cas los xij, yeej ua tsis tau lawv tes dej num kom zoo thiab nquag plias li, thiab txawm twb ntseeg Vajtswv los tau ntau xyoo lawm los, lawv yeej tsis mob siab txog qhov ua lawv tes dej num kom kawg lawv lub siab lub ntsws li los sis ua lawv tes dej num yam txaus siab hlo li, tseeb tiag, lawv haj yam tsis caum qhov tseeb, los sis xyaum ua raws li qhov tseeb tej hauv paus ntsiab lus li. Vim li cas muaj li no? Nyob rau qhov kev ntsuam xyuas thaum kawg mas, yog vim lawv pheej xav tias lawv muaj ib txoj hmoo phem, ces qhov no thiaj li ua rau lawv muaj txoj kev xav uas nyuaj siab loj heev li. Ces lawv tsis muaj siab, tsis muaj zog kiag li, zoo ib yam li ib lub cev tuag mus kem lawm xwb, es tsis muaj ib lub zog li, tsis muaj ib tug cwj pwm zoo los sis kub siab li, haj yam tsis muaj kev txiav txim siab los sis lub peev xwm los ua lub siab ncaj uas lawv tsim nyog muaj rau lawv tes dej num, lawv tej luag hauj lwm, thiab tej uas lawv yuav tsum tau ua li. Tiam sis, lawv muaj ib tug cwj pwm phoom tas zog ib hnub dhau ib hnub yam tsis txaus siab, yam tsis muaj hom phiaj es tsuas lam ua kom dhau, tsuas lam ua kom dhau hnub xwb. Lawv tsis paub tias xyov lawv yuav lam ua mus ho ntev. Thaum kawg, lawv thiaj li tsis muaj kev pab li tab sis ceeb toom rau lawv tus kheej hais tias, “Au, kuv tsuas yuav lam ua tas zog mus kom ntev li qhov kuv ua tau xwb! Yog muaj ib hnub kuv mus tsis taus ntxiv lawm, thiab pawg ntseeg xav muab kuv tshem tawm los sis ntiab tawm, ces lawv tsuas cia li muab kuv ntiab tawm xwb. Vim tias kuv muaj ib txoj hmoo phem!” Koj pom tias, txawm tej lawv hais xwb los yeej mus tsis taus kiag li lawm. Txoj kev xav txog kev nyuaj siab no tsis yog ib qho kev xav uas yooj yim xwb tab sis, tseem ceeb tshaj ntawd, nws yog ib qho kev cuam tshuam rau tib neeg tej kev xav hauv lub hlwb, lub siab, thiab rau lawv txoj kev caum loj heev thiab. Yog koj hloov tsis tau koj txoj kev xav txog kev nyuaj siab kom raws sij hawm thiab ceev, ces nws tsis yog yuav cuam tshuam rau koj lub neej xwb, nws kuj yuav rhuav tshem koj lub neej thiab ua kom koj tuag. Tab txawm yog koj ntseeg Vajtswv los xij, koj yuav tsis muaj peev xwm tau txais qhov tseeb thiab tau txais txoj kev cawm dim thiab thaum kawg, koj yuav puas tshuaj. Vim li ntawd cov uas ntseeg tias lawv txoj hmoo phem ntawd thiaj li yuav tsum sawv los tam sim no; pheej saib seb lawv txoj hmoo zoo los sis phem, pheej caum qee hom hmoov, pheej txhawj txog lawv txoj hmoo—qhov no tsis yog ib yam zoo. Pheej xam txog koj txoj hmoo tas li xwb, thaum koj muaj ib nyuag qhov kev cuam tshuam los sis kev tu siab, los sis thaum ua tsis tau, thim rov qab, los sis muaj kev txaj muag los, ces koj txawm maj nroos ntseeg tias qhov ntawd yog vim koj tus kheej txoj hmoo phem, thiab koj tus kheej txoj hmoo tsis zoo xwb. Yog li ntawd, koj thiaj li hais tas zog rau koj tus kheej kom nco hais tias koj yog ib tug neeg uas muaj ib txoj hmoo phem, tias koj tsis muaj ib txoj hmoo zoo li lwm cov tib neeg, ces koj thiaj li muab koj tus kheej tso rau hauv txoj kev nyuaj siab tas zog, raug txoj kev xav tsis zoo txog kev nyuaj siab tswj, khi, thiab ceev cia, tsis muaj peev xwm khiav kom dim li lawm. Qhov no yog ib qho txaus ntshai thiab phom sij uas muaj tshwm sim. Tab txawm tej zaum txoj kev xav txog kev nyuaj siab no yuav tsis ua rau koj haj yam khav theeb thiab txawj dag, los sis tsis ua rau koj nthuav txoj kev lim hiam los sis kev tsis kam lees, los sis lwm yam xws li tus moj yam qias vuab tsuab tawm los xij; txawm tej zaum txoj kev xav txog kev nyuaj siab ntawd yuav mus tsis txog theem uas koj nthuav ib tug moj yam qias vuab tsuab tawm es tawm tsam Vajtswv, los sis koj nthuav ib tug moj yam qias vuab tsuab tawm es ua txhaum qhov tseeb tej hauv paus ntsiab lus, los sis koj tsim muaj kev tab kaum thiab kev cuam tshuam, los sis ua tej yam phem los xij, tiam sis, thaum hais txog lub ntsiab tseeb mas, txoj kev xav txog kev nyuaj siab no yog ib qho kev qhia tshwm loj heev txog tib neeg txoj kev tsis txaus siab uas muaj tiag. Nyob rau hauv lub ntsiab tseeb mas, qhov kev qhia tshwm txog txoj kev tsis txaus siab uas muaj tiag no kuj yog ib txoj kev tsis txaus siab rau Vajtswv lub hwj chim kav thiab tej kev teeb tseg thiab. Thiab lub txim ntawm qhov tsis txaus siab rau Vajtswv lub hwj chim kav thiab tej kev teeb tseg ntawd yog dab tsi? Lub txim ntawd mas loj heev thiab yam tsawg kawg mas yuav ua rau koj ntxeev siab thiab tawm tsam Vajtswv, thiab ua rau koj tsis muaj peev xwm los lees txais Vajtswv cov lus hais thiab txoj kev pub, thiab tsis muaj peev xwm to taub thiab tsis kam los mloog Vajtswv tej kev qhuab qhia, tej kev txhawb zog, tej kev hais kom nco thiab tej kev ceeb toom. Vim koj muaj txoj kev xav txog kev nyuaj siab puv npo, ces koj thiaj li tsis muaj peev xwm los lees txais Vajtswv cov lus hais tam sim no, thiab tsis muaj kev los lees txais Vajtswv tes hauj lwm uas muaj qab hau thiab tus Vajntsujplig txoj kev qhuab qhia, kev coj qhia, kev pab, kev txhawb, thiab kev pub rau koj. Tab txawm tias Vajtswv tab tom ua hauj lwm los xij, koj yeej tsis muaj peev xwm paub txog li; tab txawm tias Vajtswv thiab tus Vajntsujplig tab tom ua hauj lwm los xij, koj yeej tsis muaj peev los lees txais li. Koj tsis tuaj yeem lees txais tej uas zoo no, tej kev cheem tsum no thiab txoj kev pub uas los ntawm Vajtswv los no, koj lub siab tsis muaj dab tsi li tab sis muaj txoj kev xav txog kev nyuaj siab no xwb, thiab tsis muaj ib yam dab tsi Vajtswv ua es yuav muaj txiaj ntsim rau koj li. Thaum kawg, ces koj yuav plam txhua kauj ruam ntawm Vajtswv tes hauj lwm, koj yuav plam txhua fab ntawm Nws cov lus hais, thiab koj haj tseem yuav plam txhua fab ntawm Vajtswv tes hauj lwm thiab Nws txoj kev pub rau koj thiab. Thaum Vajtswv cov lus hais thiab tej kauj ruam ntawm Nws tes hauj lwm tiav tag nrho lawm, los koj yeej tseem yuav tsis muaj peev xwm los kho koj txoj kev xav txog kev nyuaj siab, koj yuav tsis muaj peev xwm muab txoj kev xav txog kev nyuaj siab ntawd tso tseg tuaj tom qab, koj tseem yuav raug tswj thiab muaj txoj kev xav txog kev nyuaj siab puv npo, ces tom qab ntawd koj yuav plam Vajtswv tes hauj lwm tag nrho. Thaum koj tau plam Vajtswv tes hauj lwm tag nrho lawm mas, thaum kawg koj yuav tab meeg raug Vajtswv txoj kev txiav txim thiab kev teem txim rau tib neeg ntiaj teb, ces thaum ntawd yog lub sij hawm thaum Vajtswv yuav tshaj tawm txog qhov kawg ntawm tib neeg ntiaj teb. Tsuas yog thaum ntawd xwb mas koj thiaj li yuav ras tias, “Au, kuv yuav tsum tig xav txog kuv tus kheej, kuv yuav tsum muab txoj kev xav txog kev nyuaj siab no tso tseg tuaj tom qab, es nyeem Vajtswv cov lus ntxiv, los rau ntawm Vajtswv lub xub ntiag los nrhiav Nws txoj kev pab thiab kev txhawb, nrhiav Nws txoj kev pub, nrhiav seb yuav ua raws li Nws txoj kev rau txim thiab kev txiav txim kom raug yaug kom dawb huv li cas, es kom kuv thiaj li muaj peev xwm zwm rau Nws lub hwj chim kav thiab teb kev teeb tseg.” Lig dhau lawm! Tam sim no txhua yam ntawd nyob tom koj qub qab lawm. Tam sim no mam sawv mas lig dhau lawm, thiab dab tsi tseem tos koj? Koj yuav ntaus koj lub hauv siab quaj thiab muaj kev tu siab puv npo. Txawm tias kev nyuaj siab tsuas yog ib hom ntawm txoj kev xav xwb los xij, vim kev nyuaj siab tus yeeb yam thiab lub txim uas nws coj los ntawd mas loj heev, koj yuav tsum ua tib zoo saib koj tus kheej kom meej es txhob cia txoj kev xav txog kev nyuaj siab no kav los sis tswj koj tej kev xav hauv lub hlwb thiab tej hom phiaj uas koj caum. Koj yuav tsum tau kho txoj kev xav no es txhob cia nws rais los ua ib qho chaw dawm rau koj txoj kev caum qhov tseeb los sis ua ib sab phab ntsa thaiv tsis pub koj los rau ntawm Vajtswv lub xub ntiag. Yog tias koj tuaj yeem paub tseeb tseeb txog qhov ntawd, los sis yog tias koj paub txog txoj kev xav txog kev nyuaj siab uas loj no los ntawm qhov saib tus kheej kom meej, ces koj yuav tsum hloov kev kiag tam sim no, tso txoj kev xav no tseg thiab tso txoj kev xav txog kev nyuaj siab ntawd tseg tuaj tom qab. Tsis txhob tuav rawv rau koj txoj kev khov khov, es xav yam tawv ncauj ntsuav tias, “Txawm Vajtswv yuav hais los sis ua dab tsi los xij, kuv paub tias kuv txoj hmoo yeej phem. Vim muaj ib txoj hmoo phem, ces kuv yeej tsim nyog nyuaj siab lawm. Vim muaj ib txoj hmoo phem, ces kuv tsim nyog cia li lees txais qhov ntawd xwb es tso txhua txoj kev cia siab tseg.” Qhov daws kom tau txhua yam uas tshwm sim los ntawm ib tug cwj pwm tsis zoo ntawd mas yog qhov tawv ncauj yam uas siab nqaim heev. Thaum koj ras tias koj muaj txoj kev xav txog kev nyuaj siab no lawm, koj yuav tsum hloov koj tus kheej thiab kho qhov ntawd kom sai npaum li qhov koj ua tau. Txhob tos kom txog ntua rau thaum qhov ntawd twb tswj koj tag nrho lawm, thaum ntawd mam sawv los ces lig dhau lawm.

Qhia Kuv seb, qhov ntseeg txoj hmoo ntawd puas yog ib qho kev nthuav tawm txog qhov caum qhov tseeb? (Tsis yog, qhov ntawd tsis yog.) Yog li ntawd, tus cwj pwm yog uas tib neeg yuav tsum muaj nyob rau hauv lawv txoj kev xav txog txoj hmoo ntawd yog dab tsi? (Lawv yuav tsum ntseeg Vajtswv tej kev coj kev qhia thiab tej kev teeb tseg thiab ua raws li tej ntawd.) Qhov ko yog lawm. Yog tias ib tug twg pheej rau siab ntso rau qhov seb lawv txoj hmoo zoo los sis phem ntawd xwb, qhov ntawd yuav daws tau teeb meem dab tsi? Thaum lees paub tias lawv txoj hmoo yeej phem tab sis hos ntseeg tias lawv txoj hmoo phem ntawd yog Vajtswv coj thiab npaj thiab txaus siab hlo zwm rau Vajtswv lub hwj chim kav thiab tej kev teeb tseg—txoj kev xam pom no puas yog los sis tsis yog? (Tsis yog, qhov ntawd tsis yog lawm.) Ua li cas qhov ntawd ho tsis yog? (Vim tias txoj kev xam pom ntawd tseem muaj qhov tshab txhais txog qhov lawv txoj hmoo zoo los sis phem ntawd.) Qhov no puas yog ib txoj kev cai? Qhov tseeb uas tib neeg yuav tsum to taub nyob rau ntawm no yog dab tsi? (Hais tsis tau tias txoj hmoo zoo los sis phem. Txhua yam uas Vajtswv npaj ua ntej lawm ntawd yeej zoo, thiab tib neeg yuav tsum ua raws li Vajtswv txhua qhov kev coj kev qhia.) Tib neeg yuav tsum ntseeg tias txoj hmoo yog Vajtswv coj thiab npaj, thiab vim txoj hmoo ntawd yog Vajtswv coj thiab npaj, ces lawv tham tsis tau txog qhov zoo los sis phem ntawd. Qhov seb txoj hmoo ntawd zoo los sis phem ntawd yog txiav txim raws li lub hauv paus ntawm tib neeg txoj kev xam, tej tswv yim, tej kev txiav txim thiab tej kev xav hauv siab, thiab txoj kev txiav txim no yog mus raws li lawv tej kev xav hauv nruab siab thiab tej kev xam pom xwb es tsis yog mus raws li qhov tseeb. Ib txia tib neeg hais tias, “Kuv muaj ib txoj hmoo zoo heev, kuv yug los rau hauv ib tsev neeg uas ntseeg. Kuv tsis tau raug hloov los ntawm qhov xwm txheej ntawm lub ntiaj teb thiab kuv tsis tau raug cov tsis ntseeg tej kev coj hloov, tswj los sis dag li. Txawm kuv muaj tus moj yam qias vuab tsuab los xij, kuv loj hlob nyob rau hauv pawg ntseeg thiab yeej tsis tau mus yuam kev li. Kuv thiaj li muaj ib txoj hmoo zoo heev li!” Qhov lawv hais ntawd puas yog? (Tsis yog.) Vim li cas tsis yog? (Qhov lawv yug los rau hauv ib tsev neeg uas ntseeg ntawd yog Vajtswv twb npaj ua ntej lawm, qhov ntawd yog Vajtswv lub hwj chim kav thiab tej kev teeeb tseg. Qhov ntawd tsis muaj feem xyuam dab tsi txog qhov lawv txoj hmoo zoo los sis phem.) Yog lawm, koj hais yog kawg lawm. Qhov no yog Vajtswv lub hwj chim kav thiab tej kev teeb tseg. Qhov ntawd yog ib qho uas Vajtswv npaj thiab tuav lub hwj chim kav tib neeg txoj hmoo, thiab qhov ntawd yog ib tug yam ntxwv uas txoj hmoo muaj—tib neeg yuav tsum txhob siv qhov seb lawv txoj hmoo zoo los sis phem ntawd los txiav txim rau qhov xwm txheej no. Ib txhia tib neeg hais tias lawv txoj hmoo yeej zoo vim lawv yug los rau hauv ib tsev neeg uas ntseeg Vajtswv, yog li ntawd koj yuav cav qhov no li cas? Tej zaum koj yuav hais tias, “Koj yug los rau hauv ib tsev neeg uas ntseeg Vajtswv thiab hais tias koj muaj ib txoj hmoo zoo, yog li ntawd txhua tus uas tsis yug los rau hauv ib tsev neeg uas ntseeg Vajtswv ces yuav tsum muaj ib txoj hmoo phem. Puas yog koj hais tias txoj hmoo uas Vajtswv tau npaj rau txhua tus tib neeg ntawd puav leej phem?” Qhov cav lawv li no puas yog lawm? (Yog.) Qhov cav lawv li no yeej yog lawm. Los ntawm qhov cav lawv li no, koj qhia tias qhov lawv hais txog cov tib neeg uas yug los rau hauv cov tsev neeg uas ntseeg Vajtswv uas muaj ib txoj hmoo zoo ntawd mas yeej txhawb tsis tau thiab tsis mus raws li qhov tseeb lawm. Tam sim no, nej lub tswv yim txog txoj hmoo zoo thiab phem ntawd puas raug me ntsis? (Raug me ntsis.) Txoj kev xam pom twg uas tsim nyog tib neeg muaj rau qhov xwm txheej ntawm qhov ntseeg txoj hmoo uas yog tshaj plaws, tsim nyog tshaj plaws, thiab raws li qhov tseeb? Ua ntej tshaj, nej txiav txim tsis tau tias txoj hmoo zoo los sis phem los ntawm tib neeg hauv lub ntiaj teb txoj kev xam los xwb. Ntxiv ntawd, nej yuav tsum ntseeg tias txhua tus ntawm haiv tib neeg txoj hmoo ntawd yog npaj los ntawm Vajtswv txhais tes. Ib txhia tib neeg nug tias, “Qhov npaj los ntawm Vajtswv txhais tes ntawd puas txhais tias Vajtswv Tus Kheej npaj txoj hmoo ntawd?” Tsis yog, tsis txhais li ntawd. Muaj ntau txoj kev, ntau lub ntsiab thiab ntau yam uas Vajtswv npaj tib neeg txoj hmoo thiab muaj ntau lub ntsiab uas nyuaj rau qhov no nyob rau hauv sab ntsujplig uas kuv yuav tsum txhob muab hais rau ntawm no. Qhov no mas yog ib qho uas nyuaj heev, tab sis yog muab hais kom dav dav mas, qhov ntawd puav leej yog tus Tswv Tsim npaj. Ib co ntawm tej kev teeb tseg no yog Vajtswv Tus Kheej tsim rau ntau hom tib neeg, hos ib co mas muaj feem cuam tshuam txog qhov muaj ntau hom tib neeg thiab ntau pab pawg tib neeg uas faib cais mus raws li tej kev cai tswj, tej kev cai tswj hwm, tej hauv paus ntsiab lus, tej kab ke uas Vajtswv teeb tseg; vim qhov mus raws li lawv txoj kev faib cais thiab txoj kev ntawm lawv txoj hmoo uas Vajtswv teeb tseg ntawd, tib neeg txoj hmoo thiaj li raug muab npaj thiab raug muab teeb nyob rau hauv sab ntsujplig lawm, ces tom qab ntawd lawv mam li yug los. Qhov no yog ib qho uas ntxaws tshaj plaws, tab sis yog muab hais kom dav dav mas, Vajtswv npaj thiab tuav lub hwj chim kav tag nrho tej no. Vajtswv lub hwj chim kav thiab tej kev teeb tseg ntawd muaj feem cuam tshuam txog tej hauv paus ntsiab lus, tej kev cai lij choj thiab tej kev cai ntawm Nws lub hwj chim kav thiab tej kev teeb tseg. Tsis muaj qhov zoo los sis qhov phem nyob rau ntawm no, txhua yam yog cia li muaj rau Vajtswv xwb, uas yog muaj feem cuam tshuam rau qhov tsim thiab tau los. Hais txog qhov seb tib neeg xav li cas txog txoj hmoo ntawd mas, lawv yeej muaj tau tej kev xav hauv siab uas zoo thiab tej kev xav hauv siab uas phem, yeej muaj txoj hmoo uas mus tau zoo, txoj hmoo uas muaj teeb meem ntau, txoj hmoo uas nyuaj, thiab txoj hmoo uas tsis muaj kev zoo siab li—tsis muaj txoj hmoo zoo los sis txoj hmoo phem li. Tib neeg yuav tsum muaj tus cwj pwm zoo li cas rau txoj hmoo? Nej yuav tsum ua raws li tus Tswv Txim tej kev teeb tseg, rau siab ntso thiab kub siab nrhiav tus Tswv Tsim lub hom phiaj thiab lub ntsiab uas nyob rau hauv Nws txoj kev teeb tseg txog txhua yam no es kom muaj kev to taub txog qhov tseeb, muab koj lub zog uas loj tshaj plaws los siv rau lub neej uas Vajtswv tau npaj rau koj lawm, ua tej dej num, tej luag hauj lwm, thiab tej uas ib tug neeg raug tsim tawm los yuav tsum tau ua, es ua koj lub neej kom muaj qab hau ntxiv thiab muaj nqis ntxiv, mus txog ntua thaum kawg es kom tus Tswv Tsim zoo siab rau koj thiab cim koj cia. Tseeb tiag, qhov uas haj tseem yuav zoo tshaj mas yuav yog qhov tau txais txoj kev cawm dim los ntawm koj txoj kev nrhiav thiab siv tag nrho lub zog—qhov no yuav yog qhov tau txiaj ntsim uas zoo tshaj plaws. Txawm li cas los xij, hais txog txoj hmoo ntawd, tus cwj pwm tsim nyog tshaj plaws uas cov tib neeg ntiaj teb uas raug tsim tawm los yuav tsum muaj mas tsis yog ib txoj kev txiav txim thiab lub ntsiab uas phem, los sis tsis yog siv tej tswv yim phem los daws. Tseeb tiag, tib neeg yuav tsum haj yam tsis txhob sim los tawm tsam, los xaiv, los sis los hloov lawv txoj hmoo, tab sis lawv yuav tsum siv lawv lub siab los ua tsaug, thiab nrhiav, tshawb, thiab ua raws li txoj hmoo ntawd, ua ntej yuav kho tau txoj hmoo ntawd mus rau qhov zoo. Thaum kawg no, nyob rau hauv qhov xwm txheej ntawm txoj kev ua neej thiab nyob rau txoj kev uas Vajtswv teeb tseg rau koj hauv lub neej ntawd, koj yuav tsum nrhiav txoj kev coj li Vajtswv qhuab qhia koj, nrhiav txoj kev uas Vajtswv cheem tsum kom koj taug, thiab paub txoj hmoo uas Vajtswv tau npaj rau koj li no lawm, ces thaum kawg koj thiaj li yuav tau koob hmoov. Thaum koj paub txoj hmoo uas tus Tswv Tsim tau npaj rau koj li no lawm, ces qhov koj yuav ua tsaug ntawd mas tsis yog nyuaj siab, tu siab, los kua muag, mob siab, tsis to taub, thiab ua tsis tau xwb tab sis, tseem ceeb tshaj ntawd, koj yuav muaj kev xyiv fab, kev thaj yeeb, thiab kev tau zoo, nrog rau txoj kev qhuab qhia thiab kev to taub txog qhov tseeb uas Vajtswv muab pub rau koj. Tshaj ntawd, thaum koj tsis paub txoj kev ua lub neej, thaum koj muaj kev tsis to taub thiab ua tsis tau, es koj muaj ib txoj kev yuav xaiv ntawd, koj yuav paub tus Tswv Tsim txoj kev coj qhia, ces thaum kawg koj yuav tau txais kev to taub, yuav paub thiab ua tsaug tias yuav ua lub neej kom muaj qab hau tshaj plaws li cas. Ces thaum ntawd koj yuav tsis muaj qhov tsis paub lub neej dua lawm, koj yuav tsis muaj ib tug yam ntxwv uas nyuaj siab dua li lawm thiab, tseeb tiag, koj yuav tsis yws txog qhov muaj ib txoj hmoo phem dua li lawm, koj haj yam yuav tsis poob mus rau hauv txoj kev xav txog kev nyuaj siab lawm vim koj xav tias koj txoj hmoo yeej phem. Yog tias koj muaj tus cwj pwm no thiab koj siv lub tswv yim no los kho txoj hmoo uas tus Tswv Tsim tau npaj rau koj lawm, ces tsis yog koj qhov kev ua neeg yuav zoo dua ntxiv, koj yuav muaj ib txoj kev ua neej, thiab muaj txoj kev xav hauv lub hlwb, tej kev xam pom thiab tej hauv paus ntsiab uas hais txog qhov yuav saib txhua yam ntawm txoj kev ua neej li cas xwb, tab sis tseeb tiag, koj kuj yuav los muaj tej kev xam pom thiab kev to taub txog lub ntsiab ntawm lub neej uas cov tsis ntseeg yeej yuav tsis muaj li. Cov tsis ntseeg yeej ib txwm hais tias, “Peb los qhov twg los? Peb yuav mus rau qhov twg? Vim li cas peb thiaj li ciaj sia?” Yeej muaj ib txhia nug cov lus nug no tas li, thiab thaum kawg lawv muaj tej lus teb twg? Lawv nug xwb, tsis teb li. Vim li cas lawv thiaj li nrhiav tsis tau tej lus teb rau cov lus nug no? Tab txawm tias ib txhia tib neeg uas txawj ntse ntseeg txoj hmoo los xij, lawv tsis muaj tswv yim los kho txoj hmoo ntawd li los sis yuav daws tej kev nyuaj, kev tsis to taub, kev ua tsis tau, thiab kev tsis zoo uas muaj nyob rau hauv lawv txoj hmoo li cas li; lawv los tsis paub tias yuav daws tej uas tshwm sim nyob rau hauv lawv txoj hmoo uas ua rau lawv hnov xyiv fab thiab zoo siab li cas li thiab—lawv tsis paub tias yuav daws tej ntawd li cas li. Ib lub sij hawm mas lawv hais tias lawv muaj ib txoj hmoo zoo, hos lwm lub sij hawm mas lawv hais tias lawv muaj ib txoj hmoo phem; ib lub sij hawm mas lawv hais tias lawv muaj ib lub neej zoo siab, hos lwm lub sij hawm mas lawv hais tias lawv muaj ib lub neej uas tsis muaj hmoo—lawv hais ob yam no los ntawm tib lub qhov ncauj xwb. Lawv hais ib yam thaum lawv zoo siab hos lwm yam thaum lawv tsis zoo siab; lawv hais ib yam thaum txhua yam mus zoo, hos lwm yam thaum txhua yan tsis mus zoo; lawv yog tus uas hais tias lawv tsis muaj hmoo, thiab lawv yog tus uas hais tias lawv txoj hmoo yeej zoo. Tseeb tiag, lawv ua lub neej tsis pom tseeb los sis tsis muaj kev to taub. Lawv pheej paub tsis tseeb, ua lub neej feeb tsis meej uas tsis muaj kev tawm li. Yog li ntawd, tib neeg yuav tsum muaj ib txoj kev to taub kom meej thiab ib txoj kev kom meej mus rau tom ntej thaum hais txog qhov lawv yuav saib txoj hmoo li cas thiaj li yog, lawv yuav ua li cas, thiab lawv yuav daws qhov teeb meej loj hauv lub neej no li cas. Thaum daws tau qhov teeb meem no lawm mas, tib neeg tus cwj pwm thiab tej kev xam pom rau txoj hmoo ntawd thiaj li yuav yog tiag tiag thiab mus raws li qhov tseeb tej hauv paus ntsiab lus, ces thaum ntawd lawv thiaj li yuav tsis mus ua phem thaum hais txog qhov no.

Cov lus hais txog txoj hmoo uas kuv nyuam qhuav tau qhia no lawm puas mus raws li qhov tseeb? (Cov lus ntawd mus raws kawg.) Nej puas paub tej yam ntxwv ntawm cov lus hais tias mus raws li qhov tseeb ntawd yog dab tsi? (Thaum tib neeg hnov cov lus hais ntawd, lawv paub meej dua thiab kaj siab dua ntxiv.) (Cov lus hais ntawd mas muaj qab hau thiab cov lus hais ntawd muaj tej kev xyaum ua.) Qhov ko yog lawm, cov lus hais ntawd mas muaj qab hau; qhov no yog txoj kev uas hais yog lawm. Haj tseem muaj ntau txoj kev uas piav qhov no kom yog dua thiab. Leej twg yuav hais lus ntxiv mus? (Cov lus hais ntawd daws tau tib neeg tej teeb meem tam sim no.) Qhov no yog qhov txiaj ntsim ntawm qhov cov lus hais ntawd muaj qab hau. Cov lus hais ntawd daws tau teeb meem vim cov lus ntawd mas muaj qab hau. Tib neeg ntseeg txoj hmoo, tab sis lawv lub siab mas yeej raug lub tswv yim ntawm txoj hmoo zoo thiab txoj hmoo phem ntawd khi tas li, yog li ntawd, qhia Kuv seb, nyob hauv tib neeg nruab siab, lawv puas muaj kev ywj pheej thiab kev kaj siab, los sis lawv raug khi lawm? (Lawv raug khi lawm.) Yog tias koj tsis to taub qhov tseeb, ces koj yeej yuav raug lub tswv yim no khi tas li. Thaum koj to taub qhov tseeb lawm, dhau ntawm qhov xav tias qhov ntawd mas muaj qab hau thiab tias koj muaj ib txoj kev mus rau tom ntej lawm, koj xav li cas ntxiv? (Ywj pheej.) Qhov ko yog lawm, koj yuav hnov kaj siab thiab ywj pheej. Thaum koj muaj ib txoj kev xyaum ua thiab tsis mag ntxiab ntxiv lawm, ces thaum ntawd koj tus ntsujplig yuav tsis muaj kev ywj pheej thiab kaj siab lod? Tej kev xam pom uas txawv txawv thiab tsis muaj qab hau ntawd yuav tsis muaj peev xwm khi koj tej kev xav hauv lub hlwb los sis koj ob txhais tes thiab ob txhais taw lawm; koj yuav muaj ib txoj kev taug, ces koj yuav tsis raug tej kev xam pom ntawd tswj mus ntxiv lawm. Thaum koj tau hnov Vajtswv qhia txog tib neeg txoj hmoo lawm, koj yuav hnov kaj siab thiab ywj pheej, ces koj yuav hais tias, “Au, qhov ntawd yog li ntawd sav! Vuag, yav tas los kuv txoj kev to taub txog txoj hmoo ntawd mas txawv thiab phem heev li! Tam sim no kuv to taub lawm, ces kuv tsis raug lub tswv yim tsis yog uas hais txog qhov txoj hmoo zoo thiab phem ntawd xeeb txhob mus ntxiv lawm. Kuv tsis meem txom vim txoj hmoo ntawd mus ntxiv lawm. Yog tias kuv tsis tau tau to taub qhov no mas ntshe, ib lub sij hawm kuv pheej yuav xav tias kuv txoj hmoo yeej zoo hos ib lub sij hawm mas cia li xav tias phem, thiab xav paub tias seb kuv txoj hmoo zoo los sis phem! Kuv yuav txhawj txog txoj hmoo ntawd tas li.” Thaum koj to taub qhov tseeb no lawm, ces koj yuav muaj ib txoj kev taug, koj yuav muaj ib lub tswv yim yog txog qhov ntawd, thiab koj yuav muaj txoj kev xyaum ua uas yog—qhov no txhais tias koj kaj siab thiab ywj pheej lawm. Yog li ntawd, yuav kom paub seb ib tug twg tej lus puas mus raws li qhov tseeb tej hauv paus ntsiab lus, thiab seb cov lus ntawd puas yog qhov tseeb mas, koj yuav tsum mloog seb cov lus no puas muaj qab hau los sis tsis muaj; nyob rau tib lub sij hawm no, koj yuav tsum tshuaj xyuas seb koj tej kev nyuaj thiab tej teeb meem puas tau raug daws thaum koj tau hnov cov lus no lawm—yog tias daws tau lawm, ces koj yuav hnov kaj siab thiab ywj pheej, zoo ib yam li ib lub nra hnyav uas raug muab tshem ntawm koj mus lawm. Yog li ntawd, txhua zaus uas koj to taub ib qho tseeb lub hauv paus ntsiab lus lawm, koj yuav muaj peev xwm los daws ib co teeb meem uas zoo li ntawd thiab muab qee qhov tseeb coj los xyaum ua raws, ces qhov no yuav ua rau koj hnov ywj pheej thiab kaj siab. Qhov no tsis yog qhov txiaj ntsim lod? (Qhov ntawd yog.) Tam sim no koj puas to taub qhov txiaj ntsim uas qhov tseeb muaj kiag? (To taub lawm.) Qhov tseeb muaj qhov txiaj ntsim twg? (Qhov tseeb ntawd ua tau rau tib neeg tus ntsujplig hnov kaj siab thiab ywj pheej.) Qhov tseeb tsuas muaj tib qho txiaj ntsim no xwb lod? Tsuas muaj tib txoj kev xav li no xwb lod? (Feem ntau mas, qhov txiaj ntsim ntawd kho tau tej kev xam pom uas tsis yog thiab txawv txawv uas tib neeg muaj rau txhua yam. Thaum tib neeg saib txhua yam raws li txoj kev uas dawb huv thiab mus raws li qhov tseeb lawm, lawv yuav hnov ywj pheej thiab kaj siab rau hauv lawv tus ntsujplig, thiab lawv yuav tsis raug tej kev xav tsis zoo hauv lub hlwb khi los sis raug cuam tshuam los ntawm Ntxwgnyoog los ntxiv lawm.) Dhau ntawm qhov hnov kaj siab thiab ywj pheej nyob hauv koj tus ntsujplig lawm, qhov tseem ceeb ces yog qhov tias qhov ntawd pab tau koj to taub qee qhov tseeb qhov muaj tiag, kom koj thiaj li tsis raug tej kev xav hauv lub hlwb thiab tej kev xam pom uas tsis yog los sis txawv txawv ntawd khi los sis tswj kav mus ntxiv lawm. Tej kev xav hauv lub hlwb thiab tej kev xam pom ntawd raug hloov los ntawm tej hauv paus ntsiab lus ntawm qhov xyaum ua raws li qhov tseeb lawm ces tom qab ntawd koj thiaj li tuaj yeem nkag siab qhov tseeb qhov muaj tiag ntawd. Kuv yuav muab Kuv txoj kev sib qhia txog tej kev tshwm sim ntawm cov tib neeg uas nyuaj siab vim lawv xav tias lawv muaj ib txoj hmoo phem ntawd xaus rau ntawm no.

Lwm lub ntsiab uas vim li cas ib txhia tib neeg thiaj li nyuaj siab ces yog qhov tias, txawm lawv tsis xav tias lawv txoj hmoo phem los xij, lawv yeej xav tias lawv pheej tsis muaj hmoo thiab tias tsis muaj ib yam dab tsi zoo tshwm sim rau lawv li, ib yam li cov tsis ntseeg hais tias, “Tus Vajtswv uas Muaj Hmoo yeej hla kuv tas li xwb.” Tab txawm lawv tsis txav tias lawv tej xwm txheej phem, thiab lawv siab thiab zoo nkauj zoo nraug, muaj kev kawm thiab txawj ntse, thiab lawv yog cov neeg ua hauj lwm uas muaj peev xwm los xij, lawv xav paub tias vim li cas tus Vajtswv uas Muaj Hmoo ntawd thiaj li tsis nyiam lawv li. Qhov no ua rau lawv tsis txaus siab, ces lawv thiaj li pheej xav tias lawv tus kheej mas tsis muaj hmoo li. Thaum pib lub xyoo uas yog thaum lawv xeem es lawv yuav nkag mus kawm ntawv qib siab ntawd mas, lawv lub siab muaj kev cia siab puv npo kom tau nkag mus kawm ntawv qib siab, tab sis thaum hnub xeem los txog mas, lawv tau khaub thuas thiab ua npaws. Qhov no muaj feem cuam tshuam rau qhov seb lawv xeem tau zoo li cas, thiab lawv poob ob los sis peb teeb tsis tau nkag mus kawm ntawv qib siab lawm. Lawv thiaj li xav rau lawv tus kheej tias, “Ua li cas kuv tsis muaj hmoo kiag li? Kuv kawm tau zoo thiab rau siab kawg li. Vim li cas kuv thiaj li ua npaws rau hnub xeem nkag mus kawm ntawv qib siab, tag hnub li? Au yau! Thawj qhov xwm txheej loj nyob rau hauv kuv lub neej thiab kuv raug poob rov qab lawm. Tam sim no kuv yuav tsum ua li cas? Kuv cia siab tias kuv txoj hmoo yuav zoo dua nyob rau yav tom ntej.” Tab sis nyob rau lawv lub neej tom ntej, lawv ntsib txhua yam kev nyuaj thiab teeb meem. Piv txwv li, tej lub lag luam txais neeg tshiab thiab cov neeg tshiab ntawd tab tom npaj txhij mus tso npe rau tab sis lawv paub tias txhua txoj hauj lwm tawm tshiab ntawd twb puv lawm thiab lub tuam txhab ntawd tsis xav tau lwm tus lawm. Ces lawv txawm xav tias, “Ua li cas kuv muaj txoj hmoo phem ua luaj li? Thaum twg muaj qee yam zoo los mas, vim li cas yam ntawd cia li hla kuv lawm xwb? Ua cas hmoo phem ua luaj li!” Thiab nyob rau thawj hnub uas lawv pib ua hawj lwm rau qee qhov chaw mas, lwm cov tib neeg nyuam qhuav raug nce qib mus ua tus tswj, tus lwm tswj, thiab ua thawj coj rau tej phab lawm. Txawm lawv rau siab ua hauj lwm npaum li cas los, tsis muaj qab hau li; lawv yuav tsum tau tos rau lwm zaus kom raug nce qib xwb. Vim lawv ua hauj lwm zoo thiab lawv cov thawj coj theem siab saib taus lawv, ces lawv thiaj li xav tias lawv yuav raug nce qib rau lwm zaus, tab sis thaum kawg lawv cov thawj coj theem siab txais ib tug tswj los lwm qhov los lawm, ces lawv thiaj li rov plam dua lawm thiab. Lawv thiaj li xav rau lawv tus kheej tias, “Au yau! Zoo li kuv muaj txoj hmoo phem tiag tiag li. Kuv yeej tsis muaj ib txoj hmoo zoo li—tus Vajtswv uas Muaj Hmoo yeej tsis nyiam kuv li.” Tom qab ntawd, lawv los ntseeg Vajtswv thiab thaum lawv xyiv fab rau txoj kev sau ntawv, ces lawv cia siab tias yuav muaj peev xwm ua ib teg dej num sau ntawv, tab sis thaum kawg lawv xeem tsis tau zoo kiag li ces lawv thiaj li poob lawm. Lawv xav tias, “Raws li ib txwm mas kuv sau tau zoo heev li, yog li ntawd vim li cas kuv ho xeem tsis tau zoo? Vajtswv tsis qhia los sis tsis coj kuv kev! Kuv xav tias los ntawm qhov ua ib teg dej num sau ntawv ntawd, kuv yuav muaj peev xwm noj thiab haus Vajtswv cov lus ntxiv thiab to taub qhov tseeb ntxiv. Phem heev li uas kuv tsis muaj hmoo. Txawm tias txoj kev npaj yog ib qho zoo los, qhov ntawd tsis xaus mus zoo.” Thaum kawg lawv thiaj li xaiv lwm cov dej num lawm, es hais tias, “Kuv yuav nrog ib pab pawg tshaj tawm txoj moo zoo mus tshaj tawm txoj moo zoo.” Thaum pib mas txhua yam uas nrog pab pawg tshaj tawm txoj moo zoo ntawd mas zoo heev thiab lawv mloog zoo li tias zaum no lawv nrhiav tau lawv qhov chaw lawm, xws li lawv muab tau lawv tej kev txawj los siv mus rau qhov zoo lawm. Lawv xav tias lawv ntse, lawv muaj peev xwm ua lawv tes hauj lwm, thiab lawv txaus siab hlo ua tes hauj lwm uas tseem ceeb ntawd. Vim rau siab ua ces lawv thiaj li ua tau qee yam zoo, thiab lawv tau los ua ib tug thawj saib xyuas. Txawm li cas los xij, lawv ua qee yam tsis yog, thiab lawv tus thawj coj txawm paub txog. Thiaj li hais rau lawv tias yam uas lawv tau ua ntawd lawm mas tsis mus raws li tej hauv paus ntsiab lus lawm thiab qhov ntawd tau cuam tshuam rau pawg ntseeg tes hauj lwm lawm. Tom qab lawv pab pawg ntawd raug qhuab ntuas thiab raug qhuab qhia lawm, ib txhia thiaj li hais rau lawv tias, “Peb yeej ua tau zoo ua ntej koj los lawm. Thaum koj los txog lawm ces peb txawm raug qhuab ntuas thawj zaug.” Lawv thiaj li xav paub tias, “Qhov no tseem tsis yog kuv txoj hmoo phem thiab lod?” Qee zaus tom qab ntawd, tib neeg raug tshais chaw vim muaj kev hloov nyob rau hauv tes hauj lwm tshaj tawm txoj moo zoo ntawd ces lawv tawm ntawm qhov ua ib tug thawj saib xyuas mus ua ib tug tswv cuab ntawm pab pawg lawm xwb, ces lawv thiaj li raug xa mus rau ib thawj chaw tshiab mus tshaj tawm txoj moo zoo. Lawv thiaj li xav tias, “Au yau, tsis hais tias mus nce ho kuv mus nqi lawm xwb. Tsis muaj leej twg raug tshai chaw ua ntej kuv los li, yog li ntawd vim li cas tam sim no ho muaj qhov kev tshais chaw loj no tshwm sim rau thaum kuv los txog?” Tam sim no kuv raug xa los rau ntawm no lawm, ces kuv tsis muaj kev cia siab txog qhov raug nce qib lawm.” Muaj ob peb pawg ntseeg thiab ob peb tug tswv cuab hauv pawg ntseeg nyob thaj chaw tshiab no xwb. Lawv muaj ntau yam kev nyuaj txog qhov pib tes hauj lwm thiab lawv tsis muaj ib qho kev paub li. Lawv yuav tsum tau xav ib ntus tso, thiab kuj muaj kev nyuaj txog kev hais lus thiab, yog li ntawd lawv yuav ua li cas? Lawv xav tso tes plau khiav lawm xwb, tab sis lawv tsis muaj cuab kav; lawv xav ua lawv tej dej num kom zoo tab sis qhov ntawd nyuaj thiab sab heev, ces lawv thiaj li xav tias, “Au, qhov ntawd yog vim kuv tsis muaj hmoo kiag li! Kuv yuav ua li cas hloov tau kuv txoj hmoo?” Lawv tig rau sab twg los lawv tsoo phab ntsa xwb, pheej xav tias lawv mas muaj txoj hmoo phem, es thiaj li muaj qee yam thaiv lawv txhua txoj kev, thiab txhua kauj ruam uas lawv rhais mas thiaj li nyuaj heev li. Siv dag zog ntau rau lawv thiaj li ua tau qee yam zoo, thiab thiaj li pom ib qho kev cia siab me me, ces tom qab ntawd lawv tej xwm txheej hloov, thiab txoj kev cia siab ploj lawm, ces lawv tsis muaj kev xaiv li tsuas yog rov qab pib txhua yam dua lawm xwb. Lawv haj yam nyuaj siab ntxiv, thiaj li xav tias, “Vim li cas qhov ua kom tau ob peb yam zoo es kom tib neeg pom zoo ntawd yuav nyuaj rau kuv ua luaj li? Vim li cas qhov ua kom muaj ib qho chaw ruaj nyob rau hauv ib pab pawg tib neeg ntawd yuav nyuaj ua luaj li? Vim li cas qhov ua kom tau los ua ib tug uas tib neeg pom zoo thiab nyiam ntawd yuav nyuaj ua luaj li? Vim li cas qhov ua kom txhua yam mus tau zoo ntawd yuav nyuaj ua luaj li? Vim li cas muaj ntau yam tsis zoo nyob rau hauv kuv lub neej ua luaj li? Vim li cas muaj ntau qhov teeb meem ua luaj li? Vim li cas kuv pheej tsoo phab ntsa rau hauv txhua yam uas kuv ua?” Tshwj xeeb ces, ib txhia tib neeg yeej tsis ua lawv tej dej num kom zoo, txawm lawv mus qhov twg los xij, es lawv thiaj li pheej raug muab hloov chaw thiab raug ntiab tawm. Lawv nyuaj siab heev thiab pheej ntseeg tias tsis muaj hmoo, xav tias, “Kuv zoo li ib tug nees uas khiav ceev ceev es tsis muaj leej twg paub. Raws li lo lus no hais mus tias, “Muaj ntau tus nees uas khiav ceev ceev, tab sis muaj tsawg tus thiaj li paub cov nees ntawd xwb.’ Kuv zoo li ib tug nees uas khiav ceev ceev es tsis tau muaj leej twg paub. Hais tas hnub los, kuv tsuas yog tsis muaj hmoo xwb es kuv thiaj li ua tsis tau ib yam dab tsi tiav los sis ua tsis tau zoo nyob rau hauv ib qho chaw twg li txawm kuv mus qhov twg los xij. Kuv yeej muab tsis tau kuv lub zog los siv, los sis khav txog lub zog ntawd, los sis tsis tau yam kuv xav tau li. Au, cas kuv yuav tsis muaj hmoo ua luaj li! Muaj dab tsi tshwm sim rau ntawm no?” Lawv pheej xav tias lawv muaj txoj hmoo phem es txhua hnub thiaj li ntxhov siab heev li, thiaj li xav tias, “Au! Thov txhob cia kuv raug hloov chaw mus ua lwm tes dej num,” los sis “Au! Thov txhob cia ib yam dab tsi phem tshwm sim li,” los sis “Au! Thov txhob cia ib yam dab tsi hloov li,” los sis “Au! Thov txhob cia kom muaj ib qho teeb meem loj li.” Tsis yog lawv tsuas nyuaj siab xwb, tab sis lawv kuj tsis kaj siab, tsis tau so, xeeb txob, thiab ntxhov siab heev li thiab. Lawv pheej xav tias lawv txoj hmoo yeej phem, yog li ntawd lawv thiaj li nyuaj siab heev li, thiab muaj txoj kev nyuaj siab no los ntawm lawv txoj kev xav hauv siab txog qhov tsis muaj hmoo no. Lawv pheej xav tias tsis muaj hmoo, lawv yeej tsis raug nce qib, lawv yeej ua tsis tau ib tug thawj coj pab pawg los sis ib tug thawj saib xyuas, thiab lawv yeej tsis muaj ib lub hwv tsam los ua kom tseem ceeb tshaj lwm tus. Tej yam zoo no yeej tsis tshwm sim rau lawv li, thiab lawv yeej xav tsis tau tawm tias vim li cas thiaj li muaj li no. Lawv thiaj li xav tias, “Kuv twb muaj kev hwm thiab, yog li ntawd vim li cas kuv mus qhov twg los tsis muaj ib tug twg nyiam kuv li? Kuv twb tsis tau ua rau ib tug twg chim los sis xav ua kom nyuaj rau ib tug twg li, yog li ntawd vim li cas kuv thiaj li tsis muaj hmoo kiag li?” Vim lawv pheej tuav rawv rau tej kev xav hauv siab zoo li no, ces txoj kev xav txog kev nyuaj siab no thiaj pheej hais kom lawv nco hais tias, “Koj tsis muaj hmoo, yog li ntawd txhob lam tau lam ua, txhob khav theeb, thiab txhob pheej xav kom tseem ceeb tshaj. Koj tsis muaj hmoo, yog li ntawd txhob xav txog qhov los ua ib tug thawj coj li. Koj tsis muaj hmoo, yog li ntawd koj yuav tsum tau ua tib zoo thaum ua koj tes dej num es thim xav me ntsis, tsam muaj ib hnub koj hos raug muab qhia tshwm thiab raug hloov chaw, los sis tsam muaj ib tug twg tuaj tom koj nrab qaum muab koj qhia tawm thiab nrhiav qee yam los ua kom koj puas tsuaj, los sis tsam koj pheej ua tus coj kev thiab koj ho ua ib qho yuam kev ces raug qhuab ntuas. Txawm koj los ua ib tug thawj coj los, koj yeej tseem yuav tsum tau ua tib zoo thiab ceev faj txhua lub sij hawm, ib yam li koj tab tom taug ib sab hniav riam ntag. Txhob khav theeb, koj yuav tsum txo hwj chim.” Txoj kev xav tsis zoo no yeej hais kom lawv nco txhua lub sij hawm kom txo hwj chim, kom txhob ncig mus los yam muaj plhus ntsuav thiab txhob coj lawv tus kheej yam muaj koob muaj npe dua li lawm. Lub tswv yim, txoj kev xav hauv lub hlwb, txoj kev xam, los sis txoj kev paub tias lawv txoj hmoo yeej phem ntawd hais kom lawv nco txhua lub sij hawm tias kom txhob ua zoo los sis rau siab, txhob ntseeg lawv tus kheej, thiab txhob pheej hmoo. Tiam sis, lawv yuav tsum nyuaj siab tas zog mus, txhob muaj cuab kav ua neej rau ntawm lwm tus xub ntiag. Txawm yog txhua tus nyob hauv ib lub tseb los, lawv yuav tsum tau nrhiav ib qho chaw nraim nkoos los zaum es kom txhob pom lawv heev heev. Lawv yuav tsum txhob khav theeb heev heev, vim lub sij hawm lawv pib khav theeeb ntawd, ces lawv txoj hmoo phem yuav nrhiav tau lawv. Vim txoj kev xav txog kev nyuaj siab nyob puag ncig lawv tas li thiab pheej ceeb toom rau lawv txog tej no nyob rau hauv lawv nruab siab, ces lawv thiaj li ntshai thiab raug ceeb toom nyob rau hauv txhua yam uas lawv ua. Nyob hauv lawv lub siab mas lawv pheej tsis kaj siab li, lawv yeej nrhiav tsis tau ib qho chaw kom tsim nyog es kom lawv thiaj li ua tau lawv tej luag hauj lwm thiab tej uas yuav tsum tau ua ntawd kom kawg lawv lub siab lub ntsws thiab kawg dag kawg zog li. Ncuag nkaus li lawv tiv thaiv qee yam thiab tos kom qee yam tshwm sim. Lawv tiv thaiv qhov uas txoj hmoo phem los, tiv thaiv yam phem thiab tej kev txaj muag uas lawv txoj hmoo phem yuav coj los rau lawv. Yog li ntawd, dhau ntawm tej kev meem txom nyob hauv lawv nruab siab lawm, ces feem ntau yog txoj kev xav txog kev nyuaj siab uas tswj tej kev thiab tej tswv yim uas lawv saib tib neeg thiab txhua yam, thiab coj lawv tus kheej thiab ua. Lawv pheej siv txoj hmoo zoo thiab txoj hmoo phem los ntsuas lawv tus kheej tus cwj pwm, thiab los ntsuas seb tej kev uas lawv saib tib neeg thiab txhua yam, thiab coj lawv tus kheej thiab ua ntawd puas yog, ces vim li ntawd es lawv thiaj li rov qab poob mus rau hauv txoj kev xav txog kev nyuaj siab no thiab tso tsis tau lawv tus kheej kom dim, thiab vim li ntawd lawv thiaj li tsis muaj peev xwm los siv txoj kev xav hauv lub hlwb thiab tej kev xam pom los daws tej uas hu ua “tsis muaj hmoo” ntawd, los sis los saib xyuas thiab kho qhov lawv hu ua lawv txoj hmoo uas phem tshaj plaws ntawd. Lawv pheej raug txoj kev xav txog kev nyuaj siab no tswj thiab hloov nyob rau hauv ib lub voj voog uas phem zoo li no. Vim siv zog heev, lawv thiaj li tswj tau los qhib lawv lub siab thiab qhia txog lawv tus yam ntxwv los sis lawv lub tswv yim rau lwm tus, tab sis tom qab ntawd mas, nyob rau ntawm tej kev sib txoos ua ke, cov kwv tij thiab cov muam tej lus hais uas nyob hauv txoj kev sib qhia ntawd yog txhob txwm los sis tsis yog txhob txwm hais kom raug lawv tus yam ntxwv thiab qhov tseem ceeb ntawm lawv qhov teeb meem, uas ua rau lawv mloog zoo li lawv txoj kev khav theeb thiab lub koob lub npej raug puas tsuaj lawm. Los lawv tseem ntseeg tias qhov no yog ib qho kev tshwm sim ntawm lawv tus kheej txoj hmoo phem xwb, ces lawv thiaj li xav tias, “Koj pom lod? Nyuaj heev rau kuv los tham txog yam uas nyob hauv kuv lub siab, thiab kiag thaum kuv tham txog ntawd mas, ib txhia txeeb kiag qhov ntawd lawm thiab sim ua kom kuv puas tsuaj. Kuv mas tsis muaj hmoo kiag li!” Lawv ntseeg tias qhov no yog lawv txoj hmoo phem nyob tom hauj lwm thiab tias thaum ib tug tib neeg tsis muaj hmoo mas txhua yam yeej tawm tsam lawv heev kawg li.

Cov tib neeg uas pheej xav tias lawv tsis muaj hmoo ntawd qhov teeb meem yog dab tsi? Lawv pheej siv tus qauv ntawm txoj hmoo los ntsuas seb lawv tej kev ua puas yog los sis tsis yog, thiab los ntsuas seb lawv yuav taug txoj kev twg, seb tej yam twg uas lawv yuav tsum paub, thiab seb lawv yuav raug yam teeb meem twg. Qhov ntawd yog los sis tsis yog? (Tsis yog lawm.) Lawv muab tej uas phem piav li yog qhov tsis muaj hmoo thiab tej uas zoo piav li yog qhov muaj hmoo los sis muaj txiaj ntsim. Txoj kev xam li no yog los sis tsis yog? (Tsis yog lawm.) Qhov ntsuas tej no los ntawm hom kev xam no mas tsis yog lawm. Qhov ntawd yog ib qho phem heev thiab yog ib lub tswv yim thiab ib tug qauv uas tsis yog rau txoj kev ntsuas tej no. Hom tswv yim no mas feem ntau ua rau tib neeg poob mus rau hauv txoj kev nyuaj siab xwb, thiab feem ntau qhov no yuav ua rau lawv tsis kaj siab, thiab tsis muaj dab tsi mus raws li qhov lawv xav, thiab lawv yeej tsis tau yam lawv xav tau li, uas thaum kawg ua rau lawv ntxhov siab, xeeb txob, thiab tsis kaj siab tas li xwb. Thaum tsis kho tej kev xav tsis zoo no lawm, ces cov tib neeg no yeej poob mus rau hauv txoj kev nyuaj siab tas li thiab xav tias Vajtswv tsis nyiam lawv. Lawv xav tias Vajtswv saib lwm tus rau nqi tab sis tsis saib lawv rau nqi, thiab tias Vajtswv saib xyuas lwm tus tab sis tsis saib xyuas lawv. “Vim li cas kuv thiaj li pheej tsis kaj siab thiab pheej ntxhov siab? Vim li cas tej uas phem pheej tshwm sim rau kuv? Vim li cas tej uas zoo yeej tsis los rau kuv li? Kuv tsuas thov kom muaj ib zaug xwb!” Thaum koj saib tej no los ntawm hom kev xav hauv lub hlwb thiab txoj kev xam uas tsis yog no lawm, ces koj yeej yuav poob mus rau hauv rooj ntxiab ntawm txoj hmoo zoo thiab phem xwb. Thaum koj pheej poob mus rau hauv rooj ntxiab no ntxiv mus, ces koj yeej yuav nyuaj siab tas li. Thaum muaj txoj kev nyuaj siab no lawm mas, tshwj xeeb koj yeej yuav xav tias seb tej uas los raug koj ntawd yog muaj hmoo los sis tsis muaj hmoo. Thaum muaj qhov no tshwm sim, qhov no ua pov thawj qhia tias koj raug txoj kev xam no thiab lub tswv yim ntawm txoj hmoo zoo thiab txoj hmoo phem tswj lawm. Thaum koj raug hom kev xam no tswj lawm, ces koj tej kev xam pom thiab tus cwj pwm coj rau tib neeg, tej xwm txheej, thiab txhua yam ntawd tsis nyob rau hauv lub siab txawj xav thiab lub ntsiab ntawm txoj kev ua neej lawm, tab sis tau poob mus rau hauv ib hom kev phem lawm. Thaum koj poob mus rau txoj kev phem no lawm, ces koj yuav tawm tsis tau hauv koj txoj kev nyuaj siab los lawm. Koj pheej yuav nyuaj siab zaum tas zaum dua mus lawm xwb, thiab txawm yog koj tsis ib txwm nyuaj siab los, kiag thaum muaj qee yam tsis yog lawm, kiag thaum koj xav tias muaj qee yam tsis muaj hmoo tau tshwm sim lawm, ces koj yeej yuav poob mus rau hauv txoj kev nyuaj siab kiag tam sim ntawd. Txoj kev nyuaj siab no yuav cuam tshuam koj txoj kev txiav txim thiab txoj kev txiam txim siab uas zoo, thiab haj tseem cuam tshuam koj txoj kev zoo siab, kev chim siab, kev tu siab, thiab kev xyiv fab thiab. Thaum txoj kev nyuaj siab cuam tshuam koj txoj kev zoo siab, kev chim siab, kev tu siab, thiab kev xyiv fab lawm, ces nws yuav tsim teeb meem thiab rhuav tshem txoj kev ua koj tes dej num, nrog rau koj lub siab nyiam thiab txoj kev ntshaw caum Vajtswv qab. Thaum tej uas zoo no raug rhuav tshem lawm mas, ob peb qhov tseeb uas koj to taub lawm ntawd yuav yaj ntsis mus ua huab ua cua thiab yuav pab tsis tau koj kiag li lawm. Yog vim li ntawd, thaum koj poob mus rau hauv lub voj voog uas phem no lawm, thiaj li nyuaj rau koj los muab ob peb qhov tseeb tej hauv paus ntsiab lus uas koj to taub ntawd coj los xyaum ua raws lawm. Tsuas yog thaum koj xav tias koj muaj hmoo, thaum koj tsis raug txoj kev nyuaj siab caij tsuj xwb mas koj thiaj li tiv taus ib txoj kev txom nyem, ib txoj kev nyuaj siab ntxhov plawv, thiab qhia tau ib txoj kev ua lub siab dawb paug me me rau thaum ua tej uas txaus siab hlo ua. Kiag thaum koj xav tias txoj hmoo tau tso koj tseg lawm thiab tias tej uas tsis muaj hmoo tab tom tshwm sim rau koj dua lawm, ces tsis ntev xwb koj txoj kev nyuaj siab rov qab tswj koj dua, thiab koj lub siab dawb paug, lub siab ncaj ncees, thiab lub siab nyiam los tiv kev nyuaj siab ntxhov plawv ntawd ncaim koj mus kiag tam sim ntawd lawm. Yog li ntawd, cov tib neeg uas xav tias lawv tsis muaj hmoo los sis cov uas saib txoj hmoo muaj nqis heev ntawd tsuas zoo ib yam li cov tib neeg uas xav tias lawv txoj hmoo yeej phem ntawd xwb. Lawv nquag muaj tej kev xav uas phem heev li—tshwj xeeb mas, lawv nquag poob mus rau hauv tej kev xav xws li kev nyuaj siab. Tshwj xeeb mas lawv xav phem thiab qaug zog, thiab lawv haj tseem hloov kev xav sai heev li thiab. Thaum lawv muaj hmoo, lawv muaj kev xyiv puv npo, muaj zog puv npo, thiab lawv tiv taus kev nyuaj siab ntxhov plawv thiab kev txom nyem; lawv pw tsawg rau yav hmo ntuj los tau, thiab noj tsawg rau yav nruab hnub, lawv yeej txaus siab hlo raug txhua qhov kev nyuaj siab ntxhov plawv, thiab yog lawv zoo siab ib nyuag pliag xwb los, lawv yeej zoo siab muab lawv lub neej tso tseg. Txawm li cas los xij, lub sij hawm uas lawv xav tias lawv nyuam qhuav tsis muaj hmoo lawm, thaum zoo li tsis muaj dab tsi zoo rau lawv kiag li lawm, ces txoj kev xav txog kev nyuaj siab ntawd txawm txeeb kiag tau lawv lub siab tam sim ntawd lawm. Tej lus cog tseg thiab tej kev txiav txim siab uas lawv cog yav tas los ntawd tsis muaj qab hau li lawm; kiag tam sim ntawd lawv zoo li ib lub paub uas tsis muaj cua nyob rau hauv, tsis muaj peev xwm ua kom muaj ib lub zog li lawm, los sis zoo ib yam li ib pob hmoov qos lawm xwb, tsis kam ua ib yam dab tsi los sis hais ib yam dab tsi kiag li lawm. Lawv xav tias, “Qhov tseeb tej hauv puas ntsiab lus, qhov caum qhov tseeb, qhov tau txais txoj kev cawm dim, qhov mloog Vajtswv lus—tsis muaj ib yam no muaj dab tsi cuam tshuam rau kuv li. Kuv tsis muaj hmoo ces tsis muaj qab hau li txawm kuv yuav xyaum ua raws li pes tsawg qhov tseeb los xij los sis tiv kev txom nyem npaum li cas los xij, kuv yeej yuav tsis tau txais kev cawm dim li. Kuv ces tag lawm. Kuv zoo ib yam li ib tug uas tsis muaj hmoo, ib tug neeg uas tsis muaj hmoo li. Yog li ntawd ces cia yuav li ntawd xwb, txawm li cas los kuv yeej tsis muaj hmoo!” Pom tias, ib lub sij hawm mas lawv zoo li ib lub pob uas muaj cua puv nkaus es tab tom yuav tawg, hos lwm lub sij hawm mas lawv tsis muaj cua nyob rau hauv li lawm. Qhov no tsis yog teeb meem lod? Qhov teeb meem no los li cas los? Lub hauv paus yog dab tsi? Lawv pheej saib ntsoov lawv tus kheej txoj hmoo xwb, cuag nkaus li lawv tab tom saib ntsoov lub lag luam tso nyiaj ntag, saib seb lub lag luam ntawd nce los sis nqis, seb lub lag luam ntawd yog ib lub lag luam nyuj los sis ib lub lag luam dais. Lawv pheej cov nyom, xav txog qhov teeb meem ntawm lawv txoj hmoo heev li, thiab tawv ncauj heev li. Hom tib neeg phem no mas feem ntau yuav daig rau hauv txoj kev xav txog kev nyuaj siab vim lawv quav ntsej txog lawv tus kheej txoj hmoo heev dhau lawm thiab lawv ua neej nyob raws li tus kheej tej kev xav xwb. Lawv xav phem heev thaum lawv sawv los nyob rau thaum sawv ntxov, lawv thiaj li xav tias, “Au yau! Kuv twv tias hnub no los yuav tsis yog ib hnub muaj hmoo thiab. Kuv daim tawv muag sab luag twb laim laim los tau ntau hnub lawm, kuv tus nplaig txhav txhav, thiab kuv lub hlwb khiav qeeb qeeb lawm. Kuv tom kuv tus nplaig thaum kuv noj mov, thiab kuv tsis muaj ib tug npau suav zoo thaum kuv pw nag hmo li.” Los sis lawv xav tias, “Thawj cov lus uas kuv hnov ib txhia hais hnub no mas zoo li yog ib qho kev ceeb toom uas phem.” Lawv pheej ntshai, paub tsis meej txog txoj kev feeb tsis meej no, ces thiaj li kawm txog tej zoo li no. Lawv txhawj txog lawv tus kheej txoj hmoo, txoj xub ke, thiab txoj kev xav txhua hnub thiab txhua lub caij heev li. Lawv kuj tshuaj xyuas qhov zoo qhov phem, tus cwj pwm, thiab lub suab uas lawv txhua tus kwv tij thiab txhua tus muam hauv pawg ntseeg siv rau lawv thiab. Lawv lub siab raug tej no kav lawm, es thiaj li pheej ua rau lawv nyuaj siab. Lawv paub tias lawv tsis muaj ib tug yam ntxwv zoo tiam sis lawv tsis thov Vajtswv, los sis tsis nrhiav qhov tseeb los kho li, thiab txawm lawv nthuav tus moj yam qias vuab tsuab twg tawm los, lawv yeej tsis cuab pob ntseg mloog los sis saib tus moj yam ntawd kom tseem ceeb kiag li. Qhov no tsis yog ib qho teeb meem lod? (Yog.)

Cov tib neeg uas pheej txhawj txog seb lawv muaj txoj hmoo zoo los sis txoj hmoo phem no—txoj kev uas lawv saib txhua yam li ntawd puas yog lawm? Puas muaj txoj hmoo zoo los sis txoj hmoo phem? (Tsis muaj.) Lub hauv paus uas hais tias tsis muaj txoj hmoo ntawd yog dab tsi? (Cov tib neeg uas peb ntsib thiab txhua yam uas tshwm sim rau peb txhua hnub ntawd yog Vajtswv lub hwj chim kav thiab tej kev teeb tseg txiav txim siab xwb. Tsis muaj qhov tias txoj hmoo zoo los sis txoj hmoo phem li; txhua yam tshwm sim raws li qhov cheem tsum thiab yeej muaj lub ntsiab txhawb qhov ntawd.) Puas yog li ntawd? (Yog.) Txoj kev xam pom no yog lawm, thiab qhov no yog lub hauv paus muaj tseeb rau lo lus uas hais tias tsis muaj txoj hmoo lawm. Txawm yuav muaj dab tsi tshwm sim rau koj los, txawm zoo los sis phem los xij, qhov ntawd yeej zoo li ib txwm muaj xwb, tsuas zoo ib yam li tej huab cua uas thoob plaws plaub lub caij nyoog xwb—tsis yog txhua hnub es yuav tshav ntuj. Koj hais tsis tau tias tej hnub uas tshav ntuj ntawd mas yog Vajtswv npaj, hos tej hnub uas pos huab, los nag, cua hlob, thiab muaj cuab daj cua dub ntawd mas tsis yog. Txhua yam yog Vajtswv lub hwj chim kav thiab tej kev teeb tseg txiav txim siab xwb, thiab yeej khiav mus los raws li tej huab cua uas ib txwm muaj. Tej huab cua uas ib txwm muaj no mus raws li tej kev cai thiab tej kev tswj uas Vajtswv npaj thiab rhawv lawm xwb. Txhua yam no mas yeej cheem tsum thiab tseem ceeb heev li, yog li ntawd txawm tej huab cua yuav zoo li cas los, qhov ntawd yeej khiav mus los thiab muaj tej ntawd mus raws li tej kev cai xwb. Tsis muaj dab tsi zoo los sis phem nyob rau hauv li—tsuas yog tib neeg tej kev xav hauv siab txog qhov ntawd thiaj li zoo los sis phem xwb. Tib neeg tsis zoo siab thaum los nag, cua hlob los sis pos huab, los sis thaum muaj lawg los hlob. Tshwj xeeb mas tib neeg tsis nyiam thaum los nag es ntub ntub; ua rau lawv tej pob qij txha mob thiab lawv tsis muaj zog. Tej zaum koj yuav tsis zoo siab txog tej hnub uas los nag, tab sis koj hais puas tau tias tej hnub uas los nag ntawd mas tsis muaj hmoo? Qhov no tsuas yog ib txoj kev xav hauv siab uas muaj nyob hauv tib neeg xwb—txoj hmoo tsis muaj dab tsi cuam tshuam rau qhov muaj tseeb hais tias los nag li. Tej zaum koj yuav hais tias tej hnub uas los nag ntawd mas zoo. Yog tias tshav ntuj tau peb hlis, tsis poob ib lub nag li, ces tib neeg zoo siab. Lawv pom lub hnub txhua hnub, es qhuav qhawv thiab sov so nrog rau ib kob cua txias zias raws caij nyog, thiab thaum twg lawv xav tawm mus rau sab nraud los tau. Tab sis tej xyoob ntoo ua tsis tau li ntawd, thiab tej qoob loo tuag vim ntuj qhuav, yog li ntawd tsis muaj qoob loo sau rau xyoo ntawd. Yog li ntawd, qhov koj zoo siab ntawd puas txhais tias zoo tiag tiag? Lub caij nplooj ntoos zeeg los txog, thaum koj tsis muaj zaub mov noj, koj yeej yuav hais tias, “Au yau, qhov muaj hnub tshav ntuj ntawd ntau dhau lawm mas tsis zoo li thiab. Yog tias tsis los nag, ces tej qoob loo tuag, tsis muaj zaub mov sau, ces tib neeg tshaib plab.” Thaum nyob rau theem no lawm, koj mam li paub tias qhov muaj hnub tshav ntuj tsis paub xaus ntawd mas tsis zoo li thiab. Qhov muaj tseeb uas seb ib tug tib neeg zoo siab los sis tsis zoo siab txog qee yam ntawd yog mus raws li lawv tus kheej tej kev xav tau, kev ntshaws, thiab tus kheej txoj kev ntshaw uas twm xeeb xwb, tsis yog mus raws li lub ntsiab tseeb ntawm yam ntawd kiag. Yog li ntawd, lub hauv paus ntawm qhov uas tib neeg ntsuas seb qee yam zoo los sis phem ntawd mas tsis yog lawm. Vim lub hauv paus ntawd tsis yog lawm, ces tej kev txiav txim siab uas lawv txiav ntawd kuj tsis yog lawm thiab. Rov qab hais txog lub ncauj lug ntawm txoj hmoo zoo thiab txoj hmoo phem ntawd, tam sim no txhua tus paub tias lo lus hais tias txoj hmoo ntawd tsis tseem ceeb, thiab qhov ntawd los kuj tsis zoo thiab tsis phem thiab. Tib neeg, tej xwm txheej, thiab txhua yam uas koj ntsib ntawd, txawm zoo los sis phem los xij, puav leej yog Vajtswv lub hwj chim kav thiab tej kev teeb tseg txiav txim siab, yog li ntawd koj yuav tsum saib tej ntawd kom tsim nyog. Lees txais yam zoo los ntawm Vajtswv, thiab lees txais yam phem los ntawm Vajtswv thiab. Txhob hais tias koj muaj hmoo thaum tej uas zoo tshwm sim, thiab txhob hais tias koj tsis muaj hmoo thaum tej uas phem tshwm sim. Tsuas hais tau hais tias muaj kev kawm rau tib neeg kawm nyob rau hauv txhua yam no, ces lawm yuav tsum tsis txhob tsis lees los sis zam kom dhau tej ntawd. Ua Vajtswv tsaug rau tej uas zoo, tab sis kuj ua Vajtswv tsaug rau tej uas phem thiab, vim txhua yam no puav leej yog Nws npaj lawm. Tib neeg, tej xwm txheej, txhua yam, thiab tej cheeb tsam uas zoo mas yeej muaj kev kawm uas lawv yuav tsum kawm, tab sis haj yam kawm tau ntau los ntawm tej tib neeg, tej xwm txheej, txhua yam, thiab tej cheeb tsam uas phem thiab. Tej no puav leej yog kev ntsib kev pom thiab tej xwm txheej uas tsim nyog yog ib feem ntawm yus lub neej. Tib neeg yuav tsum txhob siv lub tswv yim ntawm txoj hmoo los ntsuas tej ntawd. Yog li ntawd, tej kev xav hauv lub hlwb thiab tej kev xam ntawm cov tib neeg uas siv txoj hmoo los ntsuas seb txhua yam zoo los sis phem ntawd yog dab tsi? Lub ntsiab tseeb ntawm cov tib neeg zoo li ntawd yog dab tsi? Vim li cas thiaj li qauv ntsej heev ua luaj li rau txoj hmoo zoo thiab txoj hmoo phem? Cov tib neeg uas tsom ntsoov heev heev rau txoj hmoo ntawd puas cia siab tias lawv txoj hmoo zoo, los sis lawv puas cia siab tias yog txoj hmoo phem? (Lawv cia siab tias yog txoj hmoo zoo.) Qhov ko yog lawm. Tseeb tiag, lawv caum txoj hmoo zoo es kom yam zoo tshwm sim rau lawv, thiab lawv tsuas siv tej ntawd kom tau txiaj ntsim rau lawv xwb. Lawv tsis quav ntsej tias lwm tus txom nyem npaum li cas, los sis lwm tus tiv kev nyuaj siab ntxhov plawv thiab kev nyuaj npaum li cas. Lawv tsis xav kom ib yam uas lawv paub tias tsis muaj hmoo tshwm sim rau lawv li. Muab ua lwm lo lus hais ces, lawv tsis xav kom ib yam phem tshwm sim rau lawv li: tsis muaj qhov thim rov qab, tsis muaj qhov ua tsis tau los sis tsis muaj kev txaj muag, tsis raug qhuab ntuas los sis tsis raug qhuab qhia, tsis poob dab tsi, tsis swb li, thiab tsis raug dag li. Yog muaj ib yam ntawd tshwm sim mas, lawv muab xam tias yog txoj hmoo phem. Txawm leej twg npaj qhov ntawd los xij, yog txhua yam phem tshwm sim, ces yeej yog tsis muaj hmoo xwb. Lawv cia siab tias txhua yam zoo—los ntawm qhov raug nce qib, tseem ceeb tshaj lwm tus, thiab tau txiaj ntsim los ntawm lwm tus txoj kev siv nyiaj txiag, tau txiaj ntsim los ntawm qee yam, khwv tau nyiaj ntau, los sis tau los ua ib tug nom tswv qib siab—tshwm sim rau lawv, thiab lawv xav tias qhov ntawd yog txoj hmoo zoo. Lawv pheej ntsuas tib neeg, tej xwm txheej, thiab txhua yam uas lawv ntsib raws li txoj hmoo xwb. Lawv caum txoj hmoo zoo, tsis caum txoj hmoo phem. Kiag thaum muaj ib yam tsis yog lawm mas, lawv yeej chim, xeeb txob, thiab tsis txaus siab li. Yog muab hais yam tsis paub cai ces, hom tib neeg no mas twm xeeb heev. Lawv caum kom tau txiaj ntsim rau lawv tus kheej los ntawm lwm cov tib neeg txoj kev siv nyiaj txiag, ua kom tau ib qho txiaj ntsim rau lawv tus kheej, kom tuaj sab sauv, thiab kom tseem ceeb tshaj lwm tus xwb. Lawv yuav txaus siab yog tias txhua yam zoo tshwm sim rau lawv nkaus xwb. No yog lawv tus yeeb yam lub ntsiab tseeb; no yog lawv lub ntsej muag tiag tiag.

Txhua tus yuav tsum raug ntau qhov teeb meem thiab ntau qhov ua tsis tau nyob hauv lub neej. Leej twg thiaj li muaj ib lub neej uas muaj kev txaus siab nkaus xwb? Leej twg yeej tsis muaj ib qho ua tsis tau los sis ib qho teeb meem li? Thaum qee yam tsis mus zoo rau koj lawm, los sis koj muaj teeb meem thiab ua tsis tau lawm, los qhov no tsis yog txoj hmoo phem, nws yog yam uas koj yuav tsum tau raug xwb. Qhov ntawd zoo ib yam li noj zaub mov—koj yuav tsum tau noj yam qaub, yam qab zib, yam iab, thiab yam ntsim ib yam thiab. Tib neeg noj tsis taus yog tsis muaj ntsev thiab yuav tsum noj qee yam zaub mov uas daw ntsev, tab sis yog koj noj ntsev ntau dhau lawm, ces yuav ua rau koj ob lub raum puas tsuaj thiab. Koj yuav tsum tau noj qee yam zaub mov uas qaub rau qee lub caij, tab sis txhob noj ntau ntau, tsam tsis zoo rau koj cov hniav los sis koj lub plab. Yuav tsum tau noj txhua yam kom haum xwb. Koj noj cov zaub mov uas qaub, cov zaub mov uas daw ntsev thiab cov zaub mov uas qab zib, thiab koj yuav tsum tau noj qee cov zaub mov uas iab thiab. Cov zaub mov uas iab mas zoo rau qee cov plab hnyuv sab hauv, yog li ntawd koj yuav tsum tau noj me ntsis. Ib tug tib neeg lub neej los zoo ib yam li thiab. Feem ntau ntawm cov tib neeg, tej xwm txheej, thiab txhua yam uas koj ntsib nyob rau txhua theem ntawm koj lub neej los yeej yuav tsis zoo li qhov koj nyiam thiab. Vim li cas muaj li no? Yog vim tias tib neeg caum tej uas tsis zoo ib yam. Yog koj caum lub koob meej thiab txoj hmoo, lub meej mom, thiab kev muaj txiag nplua nuj, kom tseem ceeb tshaj lwm tus thiab ua tau zoo tshaj, thiab ntau yam ntxiv, ces 99 feem pua ntawm tej ntawd yeej yuav tsis zoo li qhov koj nyiam. Tsuas zoo ib yam li qhov tib neeg hais tias: Txhua yam yog txoj hmoo phem thiab tsis muaj hmoo xwb. Txawm li cas los xij, yog koj tso lub tswv yim ntawm qhov uas koj muaj hmoo los sis tsis muaj hmoo npaum li cas ntawd tseg, es ua tib zoo saib tej no kom yog yog, ces koj yeej yuav pom tias feem ntau txhua yam yeej txaus nyiam los sis tsis nyuaj daws ua luaj twg. Thaum koj tso koj tej hom phiaj thiab tej kev ntshaw tseg, thaum koj tso qhov tsis lees txais los sis qhov zam kom dhau yam tsis muaj hmoo uas los raug koj ntawd tseg, thiab koj tso qhov ntsuas tej zoo li ntawd los ntawm qhov seb koj muaj hmoo los sis tsis muaj hmoo npaum li cas, ntau yam uas koj keev pom tias tsis muaj hmoo thiab phem ntawd tseg, ces tam sim no koj yeej yuav xav txog qhov zoo xwb—yam phem yuav tig los ua yam zoo. Koj lub hlwb thiab qhov uas koj saib txhua yam ntawd yuav hloov, uas yuav pab koj pom qhov txawv txog tej kev paub hauv koj lub neej, thiab nyob rau tib lub sij hawm no yuav tau txais tej qi zog uas tsis zoo ib yam. Qhov no yog ib qho kev paub uas tseem ceeb heev, ib qho uas yuav coj tej qi zog uas xav tsis txog los rau koj. Qhov ntawd yog ib qho zoo, tsis yog ib qho phem. Piv txwv li, ib txhia tib neeg mas yeej tau txais kev ua tsaug tas li, lawv yeej tau txais kev nce qib tas li, lawv yeej tau txais kev qhuas thiab kev txhawb zog tas li, lawv nquag tau txais kev pom zoo los ntawm lawv cov kwv tij thiab cov muam los, thiab txhua tus khib lawv heev. Qhov no puas yog ib qho zoo? Tib neeg feem coob xav tias muaj tej no tshwm sim vim cov tib neeg ntawd muaj txoj hmoo nyob rau lawv sab. Lawv thiaj li hais tias, “Saib mas, tus txiv neej ntawd muaj lub peev xwm zoo, nws yog tus muaj hmoo es nws thiaj li ua tau zoo nyob rau hauv nws lub neej—nws tau tej cib fim zoo thiab tau txais kev nce qib. Nws mas muaj hmoo tiag tiag li!” Lawv mas khib heev li. Tiam sis, thaum kawg, ob peb xyoo tom qab no tus neeg ntawd raug muab rho tawm lawm ces los ua ib tug ntseeg dog dig lawm xwb. Nws quaj rau qhov ntawd thiab sim muab nws tus kheej dais caj dab, ces ob peb hnub tom qab ntawd nws raug muab tshem tawm lawm. Qhov no puas yog txoj hmoo zoo? Yog koj muab saib li ntawd mas, nws tsis muaj hmoo kiag li. Tab sis qhov ntawd puas yog ib txoj hmoo phem tiag tiag? (Tsis yog.) Tseeb tiag, yeej tsis yog tias nws muaj txoj hmoo phem, tsuas yog tias nws tsis taug txoj kev yog xwb. Vim nws tsis taug txoj kev yog, ces thaum tej uas tib neeg to taub tias yog “txoj hmoo” tshwm sim rau nws, tej ntawd thiaj li rais los ua ib txoj kev sim siab, ib rooj ntxiab, thiab ib qho txhawb kom mws muaj kev puas tsuaj. Qhov no puas yog ib qho zoo? Nws pheej xav kom raug nce qib, kom tau mus ua ntej tshaj lwm tus, kom tau ua tus tseem ceeb tshaj, thiab kom txhua yam mus tau zoo thiab kom mus raws li qhov nws xav tau, tab sis muaj dab tsi tshwm sim rau thaum kawg? Nws tsis raug ntiab tawm lod? Qhov no yog qhov tshwm sim uas tau los thaum tib neeg tsis taug txoj kev yog. Qhov caum txoj hmoo zoo nkaus xwb mas tsis yog txoj kev yog lawm. Cov tib neeg uas caum txoj hmoo yeej yuav tsis lees thiab zam kom dhau txhua yam phem, txhua yam uas tib neeg muab saib tias tsis txaus ntshaw, tej uas tsis mus raws li tib neeg tej kev xav thiab tej kev ntshaw ntawm sab cev nqaij daim tawv. Lawv ntshai, zam kom dhau, thiab tsis lees qhov tshwm sim ntawm tej no. Thaum tej no tshwm sim, lawv muab tej no piav tias “tsis muaj hmoo.” Lawv puas tuaj yeem nrhiav qhov tseeb thaum lawv xav tias lawv tsis muaj hmoo? (Tsis tuaj yeem.) Koj puas xav tias cov tib neeg uas tsis tuaj yeem nrhiav qhov tseeb thiab cov uas pheej xav tias lawv tsis muaj hmoo ntawd tuaj yeem taug txoj kev yog? (Tsis tuaj yeem.) Lawv yeej tsis tuaj yeem kiag li. Yog li ntawd, cov tib neeg uas pheej caum txoj hmoo, cov uas pheej tsuas tsoom ntsoov rau lawv txoj hmoo thiab xav txog lawv txoj hmoo xwb, yog cov tib neeg uas tsis taug txoj kev yog. Cov tib neeg zoo li no tsis xav ua lawv tej dej num kom zoo, thiab lawv tsis taug txoj kev yog, yog li ntawd lawv thiaj li pheej poob mus rau hauv txoj kev nyuaj siab. Qhov no yog lawv tus kheej txoj kev txhaum, thiab lawv tsim nyog tau txais qhov ntawd. Yog vim tias lawv taug txoj kev tsis yog lawm! Ces lawv yeej tsim nyog poob mus rau hauv txoj kev nyuaj siab lawm. Puas yooj yim tawm ntawm txoj kev nyuaj siab no? Tseeb tiag, nws yooj yim xwb. Tsuas tso koj tej kev xam uas tsis yog lawm tseg xwb, txhob xav kom txhua yam mus tau zoo, los sis yog kiag li qhov koj xav tau, los sis mus tau zoo. Txhob ntshai, txhob tawm tsam, los sis txhob tsis lees tej uas mus tsis yog lawm. Tiam sis, tso koj txoj kev tawm tsam tseg, ua siab txias txias, es muaj ib tug cwj pwm mloog lus los rau ntawm Vajtswv lub xub ntiag, thiab lees txais txhua yam uas Vajtswv npaj. Txhob caum qhov hu ua “txoj hmoo zoo,” thiab txhob tsis lees qhov hu ua “txoj hmoo phem.” Muab koj lub siab thiab tag nrho koj tus kheej rau Vajtswv, es cia Nws coj thiab qhia ua, thiab zwm rau Nws tej kev coj thiab tej kev teeb tseg. Vajtswv yuav muab yam koj tim tsum rau koj tsuas yog ntsuas seb koj tim tshum thaum twg xwb. Nws yuav coj tej huab cua, tib neeg, tej xwm txheej, thiab txhua yam uas koj cheem tsum, raws li koj tej kev tim tsum thiab kev tsis muaj txaus, es kom koj thiaj li kawm tau tej kev kawm uas koj yuav tsum tau kawm los ntawm tib neeg, tej xwm txheej, thiab txhua yam uas koj ntsib. Tseeb tiag, qhov yuav tsum muaj ua ntej mas yog qhov tias koj yuav tsum muaj ib lub hlwb uas mloong Vatjswv tej kev coj thiab tej kev teeb tseg. Yog li ntawd, txhob caum qhov uas zoo tiav log; txhob tsis lees los sis txhob ntshai qhov tshwm sim ntawm yam uas tsis txaus ntshaw, txoj kev txaj muag, los sis tej uas tsis ntxim nyiam; thiab txhob siv koj txoj kev nyuaj siab los tawm tsam qhov tshwm sim ntawm tej uas phem nyob sab hauv. Piv txwv li, muaj ib hnub es ib tug tub hu nkauj muaj ib qho mob qa es hu tsis tau nkauj zoo, ces lawv txawm xav tias, “Kuv tsis muaj hmoo kiag li! Vim li cas Vajtswv tsis saib xyuas kuv lub suab? Ib txwm mas kuv yeej hu nkauj zoo heev thaum kuv nyob kuv tus kheej xwb, tab sis hnub no kuv ua rau kuv tus kheej txaj muag thaum tab tom hu nkauj rau ntawm txhua tus xub ntiag. Kuv hu tsis yog li, thiab caum tsis tau lub suab paj nruag. Kuv ua rau kuv tus kheej txaj muag heev!” Qhov ua rau kuv tus kheej txaj muag yog ib qho zoo. Qhov ntawd pab kom koj pom koj tus kheej tej kev tsis zoo txaus thiab koj txoj kev nyiam yam tsis muaj qab hau. Qhov ntawd qhia koj tias koj tej teeb meem nyob qhov twg thiab qhov ntawd pab kom koj to taub meej tias koj tsis yog ib tug tib neeg uas zoo tiav log. Tsis muaj cov tib neeg uas zoo tiav log thiab qhov ua rau koj tus kheej txaj muag ntawd mas yeej zoo li ib txwm muaj xwb. Yeej muaj tej lub sij hawm uas txhua tus tib neeg ua rau lawv tus kheej txaj muag los sis raug txaj muag. Txhua tus tib neeg ua tsis tau, ntsib teeb meem, thiab muaj kev qaug zog. Qhov ua rau koj tus kheej txaj muag ntawd tsis phem. Thaum koj ua rau koj tus kheej txaj muag tab sis hos tsis txaj muag, thiab tsis nyuaj siab rau hauv nruab siab, qhov ntawd tsis txhais tias koj tawv tuab; qhov ntawd txhais tias koj tsis quav ntsej seb qhov ua rau koj tus kheej txaj muag ntawd puas cuam tshuam rau koj lub koob lub npe thiab qhov ntawd txhais tias koj txoj kev ua tsis muaj qab hau ntawd tsis tswj kav koj tej kev xav hauv lub hlwb mus ntxiv lawm. Qhov ntawd txhais tias koj paub tab nyob hauv koj txoj kev ua neej lawm. Qhov no mas zoo heev li! Qhov no tsis yog ib qho zoo lod? Qhov no yog ib qho zoo. Txhob xav tias koj ua tsis tau zoo los sis tias koj muaj txoj hmoo phem, thiab txhob saib rau lub hauv paus uas txhawb qhov ntawd. Qhov ntawd yeej zoo li ib txwm muaj xwb. Tej zaum koj ua rau koj tus kheej txaj muag, tej zaum lwm tus ua rau lawv tus kheej txaj muag, tej zaum txhua tus yeej ua rau lawv tus kheej txaj muag—thaum kawg koj yuav paub tias txhua tus yeej zoo ib yam xwb, txhua tus puav leej yog cov tib neeg dog dig, txhua tus puav leej txawj tuag, tias tsis muaj ib tug twg loj tshaj lwm tus li, thiab tsis muaj ib tug twg zoo tshaj lwm tus li. Qee zaus txhua tus yeej ua rau lawv tus kheej txaj muag, yog li ntawd ib tug twg yuav tsum txhob thuam lwm tus. Thaum koj ua ntau yam tsis tau lawm mas, koj mam li maj mam paub tab nyob rau hauv koj txoj kev ua neej; yog li ntawd thaum twg koj rov qab ntsib tej no dua, ces koj yuav tsis raug txwv mus ntxiv lawm, thiab tej no yuav tsis muaj ib qho kev cuam tshuam rau txoj kev ua koj tes dej num kom zoo lawm. Koj txoj ua neej yuav zoo li qub, thiab thaum koj txoj kev ua neej zoo li qub lawm, ces koj lub ntsiab yeej yuav zoo li qub thiab.

Cov tib neeg uas xyiv fab rau txoj kev caum txoj hmoo no yog cov tib neeg uas caum txoj hmoo zoo nyob rau hauv lub neej no, yog cov uas saib txhua yam mus rau qhov phem. Qhov cov tib neeg no caum mas tsis yog lawm thiab lawv yuav tsum muab qhov ntawd tso tseg. Tam sim no peb tsuas sib qhia txog qhov seb yuav daws thiab yuav kho tej uas tsis txaus ntshaw no li cas xwb—tam sim no nej puas to taub? Peb sib qhia txog qhov no li cas lawm? (Tib neeg yuav tsum ua raws li txhua yam uas Vajtswv coj. Lawv yuav tsum txhob nrhiav los ua cov tib neeg uas zoo tiav log, thiab lawv yuav tsum txhob ntshai ib yam uas ua rau lawv txaj muag los sis ntshai ib yam tsis ntxim nyiam uas muaj tshwm sim li, thiab tib neeg yuav tsum txhob siv lawv txoj kev xav txog kev nyuaj siab los tawm tsam tej no thaum tej no tshwm sim.) Ua koj lub siab kom txias txias thiab daws txhua yam ntawd los ntawm lub siab uas yog. Thaum txhua yam phem tshwm sim rau koj, koj yuav tsum muaj txoj kev yog los kho thiab los daws tej ntawd, thiab txawm yog koj daws tej ntawd tsis tau zoo los xij, koj tseem yuav tsum tsis txhob poob mus rau hauv txoj kev nyuaj siab. Yog koj ua tsis tau, koj rov qab ua dua los tau; qhov phem tshaj, qhov ua tsis tau ntawd yog ib qho kev kawm, thiab txawm yog koj ua tsis tau los xij, qhov ntawd tseem zoo dua li qhov thim rov qab, tawm tsam, tsis lees, thiab khiav mus lawm. Yog li ntawd, txawm yuav muaj dab tsi tshwm sim los sis koj yuav ntsib dab tsi rau yav tom ntej los xij, koj yuav tsum txhob tsis lees qhov ntawd los sis khiav kom dim qhov ntawd, haj yam txhob muab qhov ntawd ntsuas los ntawm txoj kev xam pom txog koj txoj hmoo zoo los sis phem thiab. Vim koj hais tseeb tias txhua yam yog Vajtswv txhais tes coj no, koj yuav tsum txhob ntsuas txhua yam no los ntawm txoj kev xam pom thiab lub siab uas xav txog koj txoj hmoo zoo los sis phem ntawd, haj yam txhob tsis lees yam phem uas tshwm sim ntawd. Tseeb tiag, koj yuav tsum txhob siv txoj kev xav txog kev nyuaj siab los daws tej no thiab. Tiam sis, kuv yuav tsum muaj ib tug cwj pwm zoo thiab txoj kev xav zoo los kho thiab daws tej no, es saib seb muaj tej kev kawm dab tsi uas yuav tau kawm thiab txoj kev to taub dab tsi uas koj yuav tsum tau txais los ntawm tej no los—qhov no yog qhov uas koj yuav tsum tau ua. Thaum ntawd koj tej kev xav hauv lub hlwb thiab tej kev xam pom yuav tsis yog lod? (Tej kev xav hauv lub hlwb thiab tej kev xam pom yeej yuav yog.) Thiab thaum koj muaj qee yam phem los sis qee yam tsis muaj hmoo tshwm sim, koj yuav daws tau tej ntawd mus raws li Vajtswv cov lus, koj yuav muaj tej kev xav hauv lub hlwb thiab tej kev xam pom uas yog thiab ua li no, koj txoj kev ua neej thiab lub ntsiab yuav rov zoo li qub. Thaum koj saib rau qhov ntawd zoo li no lawm, qhov muaj txoj kev xam pom uas yog ntawd tsis tseem ceeb heev lod? Qhov to taub kom meej txog qhov teeb meem ntawm txoj hmoo mus raws li Vajtswv cov lus ntawd tsis tseem ceeb heev lod? (Tseem ceeb.) Tam sim no peb twb sib qhia txog lo lus hais txog txoj hmoo zoo los sis phem ntawd yuav luag tag lawm, tam sim no nej puas to taub? (To taub.) Yog nej tuaj yeem to taub lub ntsiab tseeb ntawm qhov teeb meem no meej lawm, ces nej yeej yuav muaj txoj kev xam pom uas yog txog qhov teeb meem ntawm txoj hmoo.

Kuj muaj lwm yam uas ua rau tib neeg poob mus rau hauv txoj kev xav txog kev nyuaj siab thiab, uas yog qhov tias qee yam tshwj xeeb tshwm sim rau tib neeg ua ntej lawv loj hlob los sis tom qab lawv tau los ua neeg laus lawm, qhov ntawd yog, lawv ua qee qhov kev txhaum los sis ua qee yam phem, qee yam ruam ruam, thiab qee yam uas tsis paub tab li. Lawv poob mus rau hauv txoj kev nyuaj siab vim ntawm tej kev txhaum no, vim ntawm tej uas phem thiab tsis paub tab no es lawv thiaj li tau ua txhaum lawm. Hom kev nyuaj siab no yog ib qho kev teem txim rau yus tus kheej xwb, thiab qhov ntawd kuj yog ib hom kev txiav txim siab txog tias lawv yog hom tib neeg twg. Hom kev txhaum no tsis yog tuaj tom lawv nrob qaum tsa tes twv rau ib tug twg los sis hais lus phem rau ib tug twg, los sis qee yam tsis tseem ceeb zoo li ntawd xwb, tab sis qhov ntawd yog qee yam uas cuam tshuam rau txoj kev txaj muag, yus tus yam ntxwv thiab lub koob npe, thiab txoj cai thiab. Thaum lawv pheej xav txog qhov xwm txheej ntawd rau hauv siab, ces txoj kev xav txog kev nyuaj siab ntawd thiaj li sib sau ib qho zuj zus tuaj rau hauv lawv lub siab los txog rau tam sim no. Tej kev txhaum no yog dab tsi? Li kuv nyuam qhuav hais tam sim no tias, tej kev txhaum ntawd yog tej uas tsis paub tab, phem thiab ruam uas tib neeg tau ua lawm thaum tseem yog me nyuam yaus los sis laus lawm. Nej puas paub tias tej no muaj dab tsi nyob rau hauv? Phem, ruam thiab tsis paub tab—tej no muaj tej uas ua rau lwm tus puas tsuaj tab sis muaj txiaj ntsim rau koj tus kheej, tej uas nyuaj tham txog, thiab tej uas koj txaj muag txog. Tej zaum yog qee yam tsis huv, qias neeg, liam, los sis tsis tsim nyog, uas ua rau koj poob mus rau hauv txoj kev xav txog kev nyuaj siab. Txoj kev nyuaj siab no tsis lam yog ib hom ntawm txoj kev kho tus kheej xwb tab sis yog ib txoj kev teem txim rau yus tus kheej. Nej xav puas tau tias muaj dab tsi nyob rau hauv tus ciaj ciam uas kuv tau hais no lawm? Muab ua ib qho piv txwv. (Kev sib daj sib dee.) Yog kawg, kev sib daj sib dee yog ib qho. Piv txwv li, ib txhia tib neeg tau ntxeev siab rau lawv tus txiv los sis tus poj niam nyob rau hauv txoj kev xav hauv lub hlwb los sis txoj kev ua; ib txhia tib neeg tau deev luag poj luag txiv thiab tau koom rau hauv txoj kev sib daj sib dee lawm, tab sis lawv tseem tsis tso tseg thiab pheej xav txog tias lawv xav nrog leej twg ua nkauj ua nraug; ib txhia tib neeg tau dag lwm tus tej nyiaj txiag lawm, tej zaum tseem yog dag tau nyiaj ntau ntau thiab; ib txhia tib neeg tau nyiag tej uas yog lwm tus tug; thiab ib txhia tib neeg tau liam los sis pauj kua zaub ntsuab rau lwm tus. Ib co ntawm tej no mas ze rau qhov ua txhaum txoj kev cai li choj lawm, hos ib co mas tseeb tiag ua tsis raws li txoj kev cai lij choj lawm; tej zaum ib co mas nyob ze ze ntawm ntug lawm, hos ib co mas tej zaum tawm tsam tej kev coj ntawm txoj kev ua neeg. Muaj tej no nyob tob tob puag hauv tib neeg lub siab lawm, thiab qee lub sij hawm yeej nco tau tej no. Thaum koj nyob ib leeg, thaum koj pw tsis tsaug zog rau yav hmo ntuj mas, koj xav txog tej no xwb. Muaj tej no nyob rau hauv koj lub siab zoo ib yam li ib zaj yeeb yaj kiab, uas tawm ib qho zuj zus los, thiab koj tsis muaj peev xwm muaj tej no tshem tawm los sis tso tej no tseg li. Txhua zaus koj xav txog tej no mas, koj yeej nyuaj siab, koj lub ntsej muag kub lug, koj lub siab dhia pig pog, koj txaj muag, thiab koj lub siab tsis kaj li. Txawm koj ntseeg Vajtswv los xij, koj tseem mloog zoo li tej uas koj tau ua lawm no tshwm sim rau nag hmo xwb. Koj khiav tsis dim tej no, koj nkaum tsis tau tej no, thiab tsis paub tias xyov yuav muab tej no tso tseg tuaj tom qab li cas. Tab txawm tias muaj ob peb tug paub tias koj tau ua dab tsi lawm, los sis tej zaum tsis muaj ib tug twg paub li los xij, nyob hauv koj lub siab koj yeej muaj ib qho tsis kaj siab. Dhau ntawm txoj kev tsis kaj siab no lawm ces muaj txoj kev nyuaj siab, thiab txoj kev nyuaj siab no ua rau koj hnov txhaum thaum koj caum Vajtswv qab thiab ua koj tes dej num. Txawm txoj kev xav hauv siab txog txoj kev txhaum no los ntawm koj tus kheej lub siab zoo los, los ntawm txoj kev cai los, los sis los ntawm koj txoj kev xav txog txoj kev zoo thiab kev coj los los xij, koj yeej hais tsis tau kom tseeb li. Txawm li cas los xij, cov tib neeg uas tau ua tej no lawm mas yeej tsis kaj siab kiag li, tshwj xeeb yog thaum muaj qee yam tshwm sim, los sis thaum nyog rau hauv qee qhov xwm txheej thiab tej ntsiab lus. Txoj kev xav hauv siab txog qhov tsis kaj siab no ua rau lawv poob mus rau hauv txoj kev nyuaj siab yam tsis paub txog, ces lawv thiaj li raug lawv txoj kev nyuaj siab no khi thiab txwv. Thaum twg lawv mloog ib qho kev qhuab qhia los sis ib qho kev sib qhia txog qhov tseeb mas, txoj kev nyuaj siab no yeej maj mam nkag los rau hauv lawv lub siab thiab los rau hauv lawv nruab siab, ces lawv thiaj li ua rau lawv tus kheej nyuaj siab, thiaj li nug tias, “Kuv ua puas tau qhov no? Kuv puas muaj peev xwm caum qhov tseeb? Kuv puas muaj peev xwm tau txais txoj kev cawm dim? Kuv yog hom tib neeg twg? Kuv tau ua yam ntawd dhau los lawm, kuv keev yog hom tib neeg ntawd lawm. Cawm tsis tau kuv lawm lod? Vajtswv puas tseem yuav cawm kuv?” Ib txhia tib neeg mas qee zaum yeej tso tau lawv txoj kev xav txog kev nyuaj siab tseg thiab muab tso tuaj rau tom qub qab. Lawv siv lawv lub siab dawb paug thiab txhua lub zog uas lawv tswj tau thiab siv tej ntawd los ua lawv tes dej num, lawv tej uas yuav tsum tau ua, thiab lawv tej luag hauj lwm, thiab muab tag nrho lawv lub siab lub ntsws rau hauv qhov caum qhov tseeb thiab xav txog Vajtswv cov lus, thiab lawv siv lawv lub zog rau Vajtswv cov lus. Txawm li cas los xij, lub sij hawm uas muaj qee qhov teeb meem los sis xwm txheej tshwj xeeb tshwm sim, txoj kev xav txog kev nyuaj siab ntawd rov qab tswj lawv dua lawm thiab rov qab ua rau lawv ua txhaum nyob rau hauv lawv nruab siab dua lawm thiab. Lawv thiaj li xav rau lawv tus kheej tias, “Yav tas los koj twb ua li ntawd lawm, thiab koj yog hom neeg ntawd ntag. Koj puas yuav tau txais txoj kev cawm dim? Puas muaj ib lub ntsiab nyob hauv qhov xyaum ua raws li qhov tseeb li? Vajtswv xav li cas txog qhov uas koj tau ua lawm? Tam sim no qhov raug kev txom nyem li no puas hloov tau txoj kev txhaum ntawd chaw?” Lawv nquag kho lawv tus kheej thiab hnov ua txhaum nyob rau hauv nruab siab, thiab lawv pheej tsis ntseeg li, pheej ua rau lawv tus kheej nyuaj siab vim muaj lus nug ntau. Lawv yeej tso tsis tau txoj kev xav txog kev nyuaj siab no tseg tuaj tom lawv qub qab los sis muab ntiab tawm li, thiab lawv muaj ib txoj kev xav uas tsis kaj siab txog yam uas txaj muag tshaj uas lawv tau ua lawm. Yog li ntawd, txawm lawv twb ntseeg Vajtswv los tau ntau xyoo lawm los xij, cuag nkaus li lawv yeej tsis tau mloog ib yam uas Vajtswv tau hais lawm thiab tsis to taub yam ntawd li. Cuag nkaus li lawv tsis paub tias seb qhov tau txais txoj kev cawm dim ntawd puas muaj ib yam dab tsi cuam tshuam rau lawv li, seb puas cawm thiab txhiv tau lawv li, los sis seb lawv puas tsim nyog tau txais Vajtswv txoj kev txiav txim thiab kev rau txim thiab Nws txoj kev cawm dim. Lawv tsis paub txog txhua yam no li. Vim lawv tsis tau txais ib lo lus teb li, thiab vim lawv tsis tau txais ib txoj kev txiav txim uas yog li, ces lawv thiaj li pheej nyuaj siab nyob rau hauv nruab siab. Nyob hauv nruab siab mas, lawv yeej nco tau yam uas lawv tau ua lawm ntawd tas li, lawv xav txog qhov ntawd nyob rau hauv lawv lub siab zaum tag zaum thiab, nco tau tias qhov ntawd pib li cas thiab xaus li cas, nco tau qhov ntawd txij thaum pib mus txog rau thaum kawg. Txawm lawv nco tau qhov ntawd li cas los xij, lawv pheej hnov muaj kev txhaum, ces yog li ntawd lawv thiaj li pheej nyuaj siab txog qhov no los tau ntau lub xyoo lawm. Txawm thaum lawv tab tom ua lawv tes dej num los xij, txawm thaum lawv tab tom saib xyuas ib txoj hauj lwm twg los xij, lawv tseem mloog zoo li lawv tsis muaj kev cia siab txog qhov raug cawm dim li. Yog li ntawd, lawv thiaj li tsis muaj cuab kav txog qhov caum qhov tseeb thiab xam tias qhov tseeb ntawd yog ib yam uas yog thiab tseem ceeb tshaj plaws li. Lawv ntseeg tias qhov kev ua yuam kev uas lawv tau ua lawm ntawd los sis yam uas lawv tau ua nyob rau yav tas los lawm ntawd yog yam uas tib neeg feem coob saib tsis taus kiag li, los sis tej zaum lawv yuav raug tib neeg teem txim thiab ntxub, los sis haj tseem raug Vajtswv teem txim thiab. Txawm Vajtswv tes hauj lwm nyob rau theem twg los sis Nws tau hais pes tsawg cov lus hais lawm los xij, lawv yeej tsis muaj cuab kav txog qhov caum qhov tseeb kom yog li. Vim li cas muaj li no? Lawv tsis muaj lub peev xwm tso lawv txoj kev nyuaj siab tuaj rau tom qub qab li. Qhov no yog cov lus hais xaus thaum kawg uas hom tib neeg no muab ntawm qhov tau raug yam zoo li no los, thiab vim lawv tsis muaj tej lus hais xaus uas yog, ces lawv thiaj li tsis muaj peev xwm tso lawv txoj kev nyuaj siab tuaj rau tom lawv qub qab.

Muaj tseeb tias muaj coob tus tib neeg uas tau ua qee qhov kev yuam cai los sis lwm yam lawm, tsis hais loj los sis me, tab sis muaj tsawg tsawg tus uas tau ua kev yuam cai loj lawm, uas yog hom kev yuam cai uas loj tshaj li txoj kev zoo lawm. Peb tsis tham txog cov uas tau ua ntau yam kev yuam cai rau ntawm no, peb tsuas yuav tham txog seb cov tib neeg uas tau ua kev yuam cai loj lawm, thiab cov uas tau ua hom kev yuam cai uas loj tshaj li txoj kev ua zoo thiab tej kev coj zoo ntawd yog dab tsi xwb. Hais txog cov tib neeg uas tau ua kev yuam cai loj lawm—thiab nyob rau ntawm no kuv yog tham txog tej kev yuam cai uas loj tshaj li tej kev ua zoo lawm—qhov no tsis muaj feem cuam tshuam txog qhov ua txhaum rau Vajtswv tus moj yam thiab ua txhaum Nws tej kev cai tswj hwm. Nej puas to taub? Kuv tsis yog tham txog tej kev ua yuam cai uas ua txhaum rau Vajtswv tus moj yam, Nws lub ntsiab tseeb, los sis qhov Nws yog leej twg tiag thiab lub meej mom, thiab kuv tsis yog thaum txog tej kev ua yuam cai uas tuam mom Vajtswv. Qhov kuv tham txog no yog tej kev ua yuam cai uas loj tshaj li tej kev ua zoo lawm xwb. Kuj muaj qee yam hais txog cov tib neeg uas tau ua tej kev ua yuam cai li no lawm es ho kho tau lawv txoj kev xav txog kev nyuaj siab li cas thiab. Cov tib neeg zoo li no muaj ob txoj kev uas lawv taug tau, thiab qhov ntawd yog ib qho yooj yim xwb. Ua ntej tshaj plaws, yog xav rau hauv koj lub siab tias koj yeej tso tau yam uas koj tau ua lawm ntawd tseg, los sis koj muaj lub cib fim los thov txim rau lwm tus tib neeg es ua zoo rau lawv, ces koj yeej mus ua zoo rau lawv thiab thov txim tau, ces hauv koj lub siab yuav rov qab muaj kev thaj yeeb thiab kev kaj siab; yog koj tsis muaj lub cib fim los ua li no, yog ua tsis tau li no li, yog koj yeej paub koj tus kheej qhov teeb meem nyob hauv koj nruab siab tiag tiag, yog koj ras tias qhov koj tau ua lawm no loj npaum li cas, thiab koj tu siab tiag tiag li, ces koj yuav tsum los rau ntawm Vajtswv lub xub ntiag los lees thiab lees txim hloov dua siab tshiab. Thaum twg koj xav txog yam uas koj tau ua lawm thiab paub tias txhaum lawm, ces yog kiag lub sij hawm uas koj yuav tsum los rau ntawm Vajtswv lub xub ntiag los lees thiab lees txim hloov dua siab tshiab, koj yuav tsum ua koj lub siab dawb paug thiab muaj tej kev xav hauv siab tiag tiag mas thiaj li tau txais Vajtswv txoj kev zam thiab txoj kev zam txim. Thiab Vajtswv yuav tso thiab zam txim rau koj li cas? Qhov no mas nyob ntawm koj lub siab xwb. Yog koj yeej lees tiag tiag, paub koj txoj kev ua yuam kev thiab koj qhov teeb meem tiag tiag, thiab seb qhov koj tau ua lawm ntawd yog ib txoj kev ua yuam cai los sis ib txoj kev txhaum, seb koj puas muaj ib tug cwj pwm lees tiag tiag, seb koj puas ntxub yam uas koj tau ua lawm ntawd tiag tiag, thiab seb koj puas hloov koj tus kheej tiag tiag, es kom koj txhob ua yam uas txhaum ntawd dua lawm, ces muaj ib hnub twg, koj yeej yuav tau txais Vajtswv txoj kev zam thiab kev zam txim, qhov ntawd yog, Vajtswv yuav tsis txiav txim siab rau koj qhov kawg mus raws li tej uas tsis paub dab tsi, ruam, thiab tsis huv uas koj tau ua yav dhau los lawm. Thaum koj mus txog theem no lawm mas, Vajtswv mam li tsis nco qhov no li lawm; ces koj yuav zoo ib yam li lwm cov tib neeg dog dig lawm xwb, tsis muaj ib qho txawv me me li lawm. Txawm li cas los xij, lo lus hais tseeb rau qhov no ces yog qhov tias koj yuav tsum ua lub siab dawb paug thiab muaj ib tug cwj pwm lees txim hloov dua siab tshiab tiag tiag uas zoo ib yam li Davi. Davi tau so pes tsawg lub kua muag rau txoj kev ua yuam cai uas nws tau ua lawm? Ntau lub kua muag uas suav tsis txheeb. Nws quaj pes tsawg zaus lawm? Ntau zaus lawm uas suav tsis txheeb. Tej kua muag uas nws so ntawd muab ua tau cov lus no piav tias: “Txhua hmo mas kuv da dej saum kuv lub txaj.” Kuv tsis paub tias koj txoj kev ua yuam cai ntawd loj npaum li cas. Yog tias loj tiag tiag li, ces tej zaum koj yuav tsum tau quaj mus kom txog ntua rau thaum koj lub txaj ntab yuj yees saum cov dej uas yog koj cov kua muag—tej zaum koj yuav tsum tau lees thiab lees txim hloov dua siab tshiab mus kom txog theem ntawd ua ntej koj yuav tau txais Vajtswv txoj kev zam txim. Yog koj tsis ua li no, ces kuv ntshai tsam koj txoj kev ua yuam cai ntawd yuav rais los ua ib txoj kev txhaum rau ntawm Vajtswv ob lub qhov muag, thiab koj yuav tsis raug tso kom dim ntawm qhov ntawd. Ces koj yuav raug teeb meem thiab yuav tsis muaj qab hau dab tsi txog qhov hais li no ntxiv lawm. Yog li ntawd, thawj kuaj ruam uas yuav tau txais Vajtswv txoj kev zam thiab kev zam txim ces yog qhov tias koj yuav tsum ua lub siab dawb paug thiab ua tiag tiag los lees thiab lees txim hloov dua siab tshiab. Ib txhia tib neeg nug tias, “Kuv puas yuav tsum tau qhia txhua tus paub txog qhov ntawd?” Qhov ko tsis cheem tsum; koj tus kheej cia li thov Vajtswv xwb. Thaum koj tsis muaj kev kaj siab thiab ua txhaum hauv koj lub siab lawm, koj yuav tsum maj nroos los rau ntawm Vajtswv lub xub ntiag los thov Vajtswv kom thiaj li tau txais Nws txoj kev zam txim. Ib txhia tib neeg nug tias, “Kuv yuav tsum tau thov Vajtswv npaum li cas ua ntej es kuv thiaj li paub tias Vajtswv zam txim rau kuv lawm?” Thaum koj paub tias tsis txhaum ntxiv los ntawm qhov no lawm, thaum koj tsis poob mus rau hauv txoj kev nyuaj siab vim qhov no lawm, ces thaum ntawd yog thaum koj ua tau zoo lawm, thiab qhov ntawd yuav qhia tias Vajtswv tau tso koj dim lawm. Thaum tsis muaj ib tug twg, tsis muaj ib lub hwj chim twg, thiab tsis muaj ib lub zog twg nyob sab nraud cuam tshuam tau koj lawm, thiab thaum koj tsis raug ib tug tib neeg, ib qho xwm txheej, los sis ib yam dab tsi haub ntxias lawm, ces thaum ntawd yog thaum koj ua tau zoo lawm. Qhov no yog thawj kauj ruam uas koj yuav tsum tau ua. Kauj ruam ob ces yog qhov tias, thaum tab tom thov kom tau Vajtswv txoj kev zam ntawd, koj yuav tsum rau siab nrhiav tej hauv paus ntsiab lus uas koj yuav tsum ua raws thaum koj ua koj tes dej num ntawd—tsuas yog ua li no xwb mas koj thiaj li yuav muaj peev xwm ua tau koj tes dej num kom zoo. Tseeb tiag, qhov no kuj yog ib txoj kev ua uas tseem ceeb, ib txoj kev nthuav tawm thiab tus cwj pwm tseem ceeb uas hloov koj txoj kev ua yuam cai, thiab qhov ntawd ua pov thawj qhia tias koj lees txim hloov dua siab tshiab thiab tias koj tau hloov koj tus kheej lawm; qhov no yog qee yam uas koj yuav tsum tau ua. Koj ua koj tes dej num, cov lus txib uas Vajtswv muab rau koj, tau zoo npaum li cas? Koj puas ua tes dej num ntawd los ntawm ib tug cwj pwm uas nyuaj siab, los sis los ntawm tej hauv paus ntsiab lus uas Vajtswv cheem tsum kom koj ua raws? Koj puas ua siab ncaj ncees rau? Koj puas muaj ib qho kev lees txim hloov dua siab tshiab li? Koj qhia dab tsi rau Vajtswv? Yog koj xav kom tau txais Vajtswv txoj kev zam, ces koj yuav tsum xub ua lub siab dawb pawg: Koj yuav tsum muaj ib tug cwj pwm uas lees txim tiag tiag, thiab koj kuj yuav tsum ua koj lub siab kom dawb paug thiab ua koj tes dej num kom zoo, yog tsis li ntawd ces tsis muaj dab tsi tham txog. Yog koj ua tau ob yam no, yog koj ua tau rau Vajtswv zoo siab los ntawm koj lub siab dawb paug thiab txoj kev ntseeg uas zoo, es kom Vajtswv tso koj dim ntawm koj tej kev txhaum, ces koj yeej yuav zoo ib yam li lwm cov tib neeg thiab. Vajtswv yeej yuav saib koj zoo ib yam li Nws saib rau lwm cov tib neeg thiab, Nws yeej yuav coj rau koj ib yam li Nws coj rau lwm cov tib neeg thiab, thiab Nws yuav txiav txim thiab rau txim, sim thiab tsim kho kom koj zoo ib yam li Nws ua rau lwm cov tib neeg thiab—yuav tsis coj rau koj kom txawv li. Ua li no es koj thiaj li yuav tsis yog tsuas muaj txoj kev txiav txim siab thiab kev ntshaw caum qhov tseeb xwb, tab sis Vajtswv kuj yuav qhia koj, coj koj kev, thiab pub rau koj ib yam li qhov koj caum qhov tseeb thiab. Tseeb tiag, vim tam sim no koj muaj ib lub siab dawb paug thiab txoj kev ntshaw tiag tiag thiab ib tug cwj pwm tiag tiag lawm, ces Vajtswv yeej yuav tsis coj rau koj txawv dua li lwm tus li thiab, zoo ib yam li lwm cov tib neeg, koj yuav muaj lub hwv tsam los txais txoj kev cawm dim. Koj to taub qhov no lawm, puas yog? (Yog.) Qhov tau ua ib txoj kev ua yuam cai loj ntawd yog ib qho tshwj xeeb. Peb hais tsis tau tias qhov ntawd tsis txaus ntshai; nws yog ib qho teeb meem loj heev. Qhov ntawd tsis zoo ib yam li ib tug moj yam qias vuab tsuab dog dig los sis ib txhia uas muaj qee txoj kev xav hauv lub hlwb thiab qee txoj kev xam pom uas tsis yog xwb. Qhov ntawd yeej yog qee yam uas tau tshwm sim lawm tiag tiag, uas muaj tseeb, thiab ua rau muaj tej kev tshwm sim uas loj los. Vim li ntawd es thiaj li yuav tsum saib qhov ntawd kom tshwj xeeb. Txawm li cas los xij, txawm yog saib qhov ntawd tshwj xeeb los sis zoo li ib txwm muaj xwb los xij, yeej muaj txoj kev mus lawm tom ntej thiab ib txoj kev los kho qhov ntawd, thiab qhov no yog nyob ntawm qhov seb koj puas xyaum tau raws li tej kev thiab tej tswv yim uas kuv qhia rau koj thiab coj koj kev mus rau tom ntej xwb. Yog koj xyaum ua tau li no tiag tiag, ces koj tej kev cia siab txog qhov tau txais txoj kev cawm dim nyob rau thaum kawg ntawd yeej yuav zoo ib yam li lwm cov tib neeg tej kev cia siab thiab. Tseeb tiag, qhov kho txhua yam no tsis yog tsuas ua kom tib neeg tso tau lawv txoj kev xav txog kev nyuaj siab tseg tuaj rau tom qub qab xwb. Lub hom phiaj loj ces yog qhov tias, los ntawm qhov kho lawv txoj kev xav txog kev nyuaj siab ntawd, lawv thiaj li kho tau txhua yam no kom yog nyob rau hauv lub siab ntshaw thiab lub ntsiab ntawm txoj kev ua neej thaum lawv ntsib tib neeg, tej txwm txheej, thiab txhua yam. Lawv yuav tsum txhob mus ua phem, thiab lawv yuav tsum txhob tawv ncauj; lawv yuav tsum nrhiav Vajtswv lub siab nyiam thiab nrhiav qhov tseeb ntxiv, ua tej luag hauj lwm thiab tej dej num uas ib tug raug tsim tawm los yuav tsum tau ua, mus txog ntua rau thaum lawv saib taus tib neeg thiab txhua yam thiab coj tau lawv tus kheej thiab ua mus raws li Vajtswv cov lus tag nrho lawm, uas yog siv qhov tseeb ua lawv tus qauv. Thaum tib neeg to taub qhov muaj tiag no lawm mas, lawv mam li maj mam los taug txoj kev ntawm txoj kev cawm dim, thiab ua li no, lawv thiaj li yuav muaj txoj kev cia siab txog qhov tau txais txoj kev cawm dim. Tam sim no txoj kev uas yuav kho txoj kev xav txog kev nyuaj siab uas muaj los ntawm tej kev ua yuam cai ntawd puas meej rau koj? (Meej, meej lawm.)

Qhov kho txoj kev xav txog kev nyuaj siab puas yog ib qho teeb meem nyuaj? Kuv xav tias qhov ntawd mas nyuaj heev, vim qhov ntawd cuam tshuam rau tej uas tseem ceeb nyob rau hauv lub neej, qhov ntawd cuam tshuam txoj kev uas tib neeg taug nyob rau hauv lawv txoj kev ntseeg Vajtswv, txawm lawv tau txais txoj kev cawm dim rau yav tom ntej los sis txawm lawv txoj kev ntseeg tsis muaj qab hau los xij—qhov no yog ib qho teeb meem loj. Qhov ntiav ntiav ces, yam uas nthuav tawm ntawd yeej yog ib txoj kev xav, qhov muaj tseeb ces yeej muaj ntau lub ntsiab tias vim li cas thiaj li muaj txoj kev xav no. Hnub no kuv twb qhia meej meej txog cov ntsiab no lawm, tam sim no kuv twb muaj ib txoj kev los daws qhov teeb meem ntawm tej no lawm, yog li ntawd tam sim no kho puas tau txoj kev xav txog kev nyuaj siab no? (Kho tau.) Twb kho tau raws li lub tswv yim lawm. Thaum muaj txoj kev to taub ntawm sab kev qhuab qhia lawm, ces muab txoj kev qhuab qhia no los piv rau yam uas koj tau ua nyob rau tas los lawm, uas yog siv txoj kev qhuab qhia no ua ib lub hauv paus los maj mam daws koj tej kev nyuaj hauv lub neej, tej kev nyuaj hauv koj txoj kev xav hauv lub hlwb, thiab qhov taug txoj kev no tas zog mus ntawd yuav ua rau koj maj mam taug tau txoj kev uas caum qhov tseeb. Koj xav li cas txog txoj kev daws teeb meem li no? (Txoj kev no zoo.) Qhov no yog qhov tib neeg yuav tsum daws teeb meem li cas. Yog lawv tsis daws, ces tej teeb meem cov nyom uas nyob hauv lawv siab ntawd—tej teeb meem uas nyob hauv lawv txoj kev xav hauv lub hlwb, tej teeb meem uas nyob hauv lub siab, lawv tej teeb meem ntawm lub hlwb, nrog rau lawv tus moj yam qias vuab tsuab—tej no khi lawv ruaj heev. Lawv raug khi thiab raug cuab zoo li no lawm, es lawv thiaj li txom nyem thiab sab txhua lub sij hawm, lawv tsis paub xyov yuav luag los sis yuav quaj, ces lawv thiaj li nrhiav tsis tau ib txoj kev tawm. Thaum koj mloog qhov kev sib qhia hnub no tag lawm, koj tuaj yeem ua tib zoo xav txog qhov ntawd ces thiaj li yuav muaj ib txoj kev to taub ntawm sab kev qhuab qhia txog qhov ntawd. Thaum ntawd, los ntawm koj tej kev paub uas tseem ceeb thiab kev paub txog tus kheej nyob hauv koj lub neej txhua hnub ntawd, koj thiaj li maj mam tawm tau ntawm tej kev xav tsis zoo thiab ntau tus yam ntxwv ntawm koj tus moj yam qias vuab tsuab no los. Thaum koj tau muab tej ntawd tso tseg tuaj rau tom qub qab lawm, ces tsis yog koj tsuas yuav muaj kev ywj pheej thiab kaj siab xwb, thiab tsis yog koj tsuas yuav muaj kev to taub qhov tseeb qhov muaj tiag xwb tab sis, tseem ceeb tshaj ntawd, koj yuav to taub qhov tseeb, koj yuav tau txais qhov tseeb, thiab koj yuav muaj peev xwm ua neej raws li qhov tseeb qhov muaj tiag. Thaum ntawd koj yuav muaj txiaj ntsim heev, thiab koj yuav ua ib lub neej uas muaj nqis heev. Koj puas xav ua lub neej zoo li ntawd thiab? (Xav.) Tib neeg feem coob xav kom to taub qhov tseeb thiab to taub qhov tseeb qhov muaj tiag, thiab lawv tsis xav siv lawv lub neej rau hauv txoj kev xav tsis zoo ntawm cev nqaij daim tawv, kev ntshaw ua nkauj ua nraug ntawm cev nqaij daim tawv, kev coj noj coj ua hauv lub ntiaj teb, thiab tus moj yam qias vuab tsuab—hom neej no mas nyuaj thiab sab heev li. Koj lub neej puas yuav muaj txiaj ntsim zoo yog koj ua lub neej muaj tus moj yam qias vuab tsuab thiab tej kev xav tsis zoo no? Qhov ua lub neej muaj tej kev xav tsis zoo no yog ua lub neej nyob rau hauv Ntxwgnyoog qab hwj chim. Qhov ntawd zoo ib yam li ua neej nyob rau hauv ib lub tshuab zom nqaij ntag—tsis ntev ntawd koj yuav raug zom, ces yuav nrhiav ib txoj kev tawm nyuaj. Txawm li cas los xij, yog koj lees txais tau qhov tseeb, ces koj yuav muaj kev cia siab txog qhov tso txoj kev feeb tsis meej thiab kev mob siab tseg tuaj rau tom qub qab, thiab koj yuav muaj peev xwm khiav kom dim txoj kev mob siab uas los ntawm qhov raug tej kev xav tsis zoo khi thiab ua kom feeb tsis meej ntawd.

Thaum xub thawj mas kuv tau npaj txoj kev sib qhia kom ntau tshaj li ib lub ncauj lug rau hnub no, tab sis thaum kawg kuv ho qhia txog kev nyuaj siab los tau ntev lawm. Muaj ntau yam hais txog txhua qhov xwm txheej; tsis muaj ib yam dab tsi uas muab ua tau ob peb lo lus piav kom meej meej xwb. Txawm kuv tham txog dab tsi los xij, kuv piav tsis tau txoj kev qhuab qhia txog ib qho xwm txheej es tom qab ntawd muab qhov ntawd hu ua ib hnub lawm. Txhua qhov xwm txheej yeej cuam tshuam rau ntau kis ntawm qhov tseeb thiab qhov muaj tiag; qhov xwm txheej ntawd cuam tshuam tib neeg tej kev xav hauv lub hlwb thiab tej kev xam pom, tej kev thiab tej ntsiab lus hauv qhov uas lawv coj lawv tus kheej, txoj kev lawv taug, thiab txhua yam no muaj feem ntsig txog nej txoj kev tau txais kev cawm dim. Kuv tsis quav ntsej tsis tau thaum qhia txog ib qho tseeb los sis ib lub ncauj lug, thiab vim li ntawd kuv thiaj li sim ua txhua yam li kuv ua tau, zoo ib yam li ib tug pog laus uas yws yws taus, es hais tej no tas li rau nej. Txhob yws txog qhov raug teeb meem, thiab txhob yws txog qhov hais lus ntev ntev. Tej zaum kuv twb hais txog ib lub ncauj lug yav tas los lawm, yog li ntawd vim li cas thiaj li rov qab hais txog dua? Yog kuv rov qab hais txog lub ncauj lug ntawd dua, koj yeej mloog tau lub ncauj lug ntawd dua es muab xam tias yog ib qho hais kom nco tau xwb. Qhov ntawd yeej tsis ua li cas, tsis yog lod? (Yog.) Muab hais kom luv luv ces, koj yuav tsum daws tej uas muaj feem ntsig txog qhov tseeb thiab txoj kev uas tib neeg taug ntawd kom zoo, thiab koj yuav tsum txhob tsis quav ntsej. Kuv yim hais kom ntxaws thiab kuv yim hais ncaj, ces nej txoj kev to taub yim ntxaws thiab meej txog qhov kev sib cuam tshuam ntawm ntau qhov tseeb xwb, nrog rau tej kev sib txawv thiab kev sib txuas uas nyob hauv cov ntsiab ntawm ntau qhov tseeb ntawd, nrog rau lwm kis thiab. Yog kuv muab hais ua cov ntsiab lus dav dav thiab tsuas tham txog qee yam tag nrho xwb, ces nej yuav pom tias tej ntawd mas to taub nyuaj heev, thiab yuav sab heev rau nej tus kheej los xav txog thiab paub txog tej no, puas yog? (Yog.) Piv txwv li, peb lub ncauj lug rau hnub no—txoj hmoo thiab tej kev xav tsis zoo uas muaj los ntawm tej kev ua yuam cai los es tib neeg tau ua nyob rau yav tas los lawm—nej tus kheej yuav tsis muaj peev xwm xav txog tej no, thiab txawm yog koj muaj los xij, koj yeej yuav tsis muaj kev tawm ntawm tej ntawd li. Vim koj tsis to taub qhov tseeb uas nyob rau hauv tej no, ces koj yeej yuav tsis muaj peev xwm los nrhiav tau lo lus teb uas yog rau qhov uas tau ua tej kev ua yuam cai ntawd nyob rau yav tas los lawm, ces qhov ntawd yeej yuav ua ib qho kev to taub nyuaj rau koj, yuav xeeb txob koj thiab khi koj, tswj koj txoj kev thaj yeeb hauv koj nruab siab, txoj kev xyiv fab, kev ywj siab thiab kev ywj pheej. Los sis tej zaum vim koj tsis saib xyuas qhov teeb meem kom yog thiab koj tsis taug txoj kev yog, ces qhov no thiaj li muaj ib qho kev cuam tshuam rau koj txoj kev tau txais kev cawm dim. Thaum kawg ib txhia tib neeg thiaj li raug muab tso tseg thiab raug ntiab tawm lawm. Vim li cas thiaj li muaj li no? Vim lawv ua qee yam uas hais tsis tau tawm nyob rau yav tas los lawm thiab lawv tsis saib xyuas tej ntawd kom zoo es kom tau txais kev zam rau lawv. Lawv lub siab raug tej no khi lawm tiag tiag; lawv tsis mloog zoo li caum qhov tseeb, lawv lam ua lawv tes dej num kom dhau xwb, lawv tsis to taub qhov tseeb qhov muaj tiag li, thiab lawv mloog zoo li tsis muaj kev cia siab rau lawv los caum qhov tseeb li lawm. Lawv coj txoj kev xam pom tsis zoo no mus txog ntua rau thaum kawg kiag, lawv yeej tsis tham txog cov lus tim khawv uas hais txog txoj kev ntsib kev pom li, ces lawv thiaj li tsis tau txais qhov tseeb. Tsuas yog thaum ntawd xwb lawv thiaj li pib los muaj kev tu siab, tab sis qhov ntawd lig dhau lawm. Yog li ntawd, tag nrho tej no puas muaj feem ntsig txog qhov tseeb thiab qhov tau txais kev cawm dim? (Tej ntawd muaj.) Txhob xav tias vim tej no tsis tau tshwm sim rau koj, los sis tej no tsis tau tshwm sim rau lwm tus, los sis tej no tsis tau tshwm sim rau cov tib neeg nyob ib puag ncig koj, ces tsis muaj tej no. Cia Kuv qhia koj tias, tej zaum koj tau ua qee yam uas tsis raug ntsej raug muag nyob rau yav tas los lawm uas tsis tau muaj ib yam dab tsi txaus ntshai tshwm sim li, los sis tej zaum koj tau nyuaj siab rau hom kev xav tsis zoo no nyob rau yav tas los lawm los sis nyuaj siab rau txoj kev xav tsis zoo no tam sim no, tsuas yog koj xwb thiaj li tsis paub thiab tsis ras txog qhov ntawd li, es tom qab ntawd muaj ib hnub hos muaj qee yam tshwm sim tiag tiag thiab txoj kev xav no muaj ib qho kev cuam tshuam uas phem heev rau koj es muaj ntau qhov tshwm sim uas tsis zoo kiag li. Tsuas yog thaum koj saib koj tus kheej kom meej lawm xwb mas koj thiaj li paub tias koj twb nyuaj siab rau txoj kev xav tsis zoo no los tau ntau xyoo lawm los sis ntev tshaj ntawd lawm es tsis ras txog li. Vim li ntawd tib neeg thiaj li yuav tsum tau xav, tig xav, to taub, ua tsaug, thiab paub tej no es kom thiaj li maj mam paub txog tej no. Tseeb tiag, qhov thaum kawg es paub tej no lawm mas txhais tias yog xov xwm zoo heev rau koj thiab yog ib lub cib fim zoo heev los txais txoj kev cawm dim. Thaum koj paub txog tej no, qhov no yuav yog thaum koj muaj lub hwv tsam los sis txoj kev cia siab los muab tej no tso tseg tuaj rau tom qub qab, ces yam kuv tau hais txog hnub no lawm ntawd yuav tsis yog hais yam tsis muaj qab hau. Tsis muaj qhov tseeb twg, tsis muaj lub ncauj lug twg, thiab tsis muaj cov lus twg es yuav to taub kom tau tag nrho li thiab ib hnub los sis ob hnub xwb es txawm siv paub tag nrho lawm. Vim qhov ntawd cuam tshuam rau qhov tseeb, ces qhov ntawd thiaj li cuam tshuam rau noob neej, rau tib neeg tus moj yam qias vuab tsuab, rau txoj kev uas tib neeg taug, thiab rau tib neeg txoj kev tau txais kev cawm dim tib si. Yog li ntawd, koj txhob saib tsis taus ib qho tseeb li, tab sis yuav tsum ua tib zoo saib rau txhua qhov tseeb huv si. Txawm yog koj tseem tsis tau to taub cov tseeb no zoo heev thiab tsis paub tias yuav saib koj tus kheej kom meej li cas es thiaj li pom tias koj muaj tej teeb meem dab tsi raws li cov tseeb no los, tej zaum thaum ntawd tom qab koj tau paub tej ntawd los tau ntau xyoo lawm ces cov tseeb no yuav cawm koj dim los ntawm koj tus moj yam qias vuab tsuab, ces cov tseeb no yuav rais los ua cov tseeb uas muaj nuj nqis tshaj uas cawm koj dim. Thaum qhov ntawd tshwm sim, cov tseeb no yuav coj koj kev mus rau txoj kev uas yog thoob plaws hauv lub neej, thiab tej zaum nyob rau kaum xyoo los sis tshaj ntawd, cov lus no thiab cov tseeb no yuav hloov koj tej kev xav hauv lub hlwb thiab tej kev xam pom tag nrho thiab hloov koj tej hom phiaj thiab txoj xub ke hauv lub neej tag nrho.

Ntawd yog qhov xaus ntawm peb txoj kev sib qhia rau hnub no lawm. Sib ntsib dua!

Lub Kaum Hli Tim 1, Xyoo 2022