1. Kuv Kho Kuv Txoj Kev Dag Li Cas
Nyob rau yav dhau los mas kuv nyiam dag thiab hais lus mos lus muag rau tib neeg yam tsis ua tib zoo xav li, vim kuv ntshai tsam ua rau tib neeg tag kev cia siab los sis ua rau tib neeg chim vim qhia qhov tseeb. Kuv lees txais Vajtswv Tus Uas Muaj Hwj Chim Loj Kawg Nkaus tes hauj lwm ntawm tiam kawg nyob rau lub Kaum Ib Hlis Ntuj xyoo 2018, thiab kuv kawm paub los ntawm Nws cov lus tias Nws ntxub cov tib neeg coj tsis ncaj thiab txawj ntxias dag thiab nyiam cov tib neeg dawb huv thiab coj ncaj. Kuv txiav txim siab muab Vajtswv cov lus coj los xyaum ua raws thiab ua ib tug tib neeg coj ncaj, ces tom qab siv zog ua qee yam lawm, feem ntau kuv muaj peev xwm hais lus ncaj ncees lawm. Piv txwv tias, thaum kuv twb tsim nyog them ntau dua li 50 yulauv nyiaj rau kuv cov tshuaj tiam sis tus kws muab tshuaj suav yuam kev lawm ces tshem ib nrab ntawm qhov ntawd tawm lawm, ces kuv cia li qhia kiag qhov yuam kev ntawd yam tsis xav txog li. Tiam sis coj ncaj mas nws nyuaj zog thaum muaj qee yam cuam tshuam rau kuv lub koob lub npe los sis tej kev nthsaw ntawm yus tus kheej.
Muaj ib tav su thaum kuv tab tom yuav tso dab ntub ib pliag, kuv tus phooj ywg, uas yog Viv Ncaus Xujxeem, cia li xa ib tsab xov tuaj rau kuv tias nws xav tham txog wb tes hauj lwm. Kuv tsis tshua xav saib nws tsab xov vim kuv khwv heev, tsis tau pw txaus, sab heev, thiab tsis xav tham dab tsi li lawm. Lub sij hawm ntawd kuv xav tsis tawm dab tsi li lawm tsuas yog xav so lawm xwb, tiam sis kuv tsis muaj cuab kav hais li ntawd ncaj qha rau Xujxeem vim kuv ntshai tsam nws yuav xav tias kuv mas tub nkeeg thiab txhawj txog qhov tau zoo ntawm sab cev nqaij daim tawv heev dhau lawm, thiab nws yuav xav phem heev rau kuv. Yog li ntawd vim txuag kuv tus yam ntxwv, kuv thiaj li tsuas hais rau nws hais tias, “Thov txim os, kuv teem tau ib lub sij hawm tseem ceeb lawm. Kuv yuav tsum tau mus ntsib kws kho mob.” Lo lus dag no cia li tawm plaws tuaj yam kuv xav tsis txog li. Tom qab dag rau Xujxeem lawm mas, kuv mloog zoo li txhaum loj heev uas kuv so tsis taus kiag li lawm, thiab tsis kaj siab txhua lub sij hawm. Vajtswv nyiam cov tib neeg coj ncaj. Yog ua li cas es kuv cia li dag tas li? Yog li ces luag yuav tso siab rau kuv tau li cas? Kuv paub tias kev dag kom kuv tus kheej sab cev nqaij daim tawv tau zoo ntawd yeej tsis yog lawm, tias Vajtswv yuav tsis nyiam qhov ntawd, thiab tias kuv yuav tsum muab pawg ntseeg tes hauj lwm tso ua ntej tso. Ces kuv txawm ntaus ntawv mus rau Xujxeem kiag tam sim ntawd. Nws txawm nug kuv tias seb kuv puas tau rov qab los ntawm kuv lub sij hawm teem los. Kuv tsis xav kom nws pom kuv tsis zoo thiab ua rau nws xav hais tias kuv yog ib tug neeg txawj dag, yog li kuv thiaj li tsis qhia qhov tseeb rau nws thiab pheej dag ntxiv xwb, hais tias, “Thaum sij hawm yuav tag ntawd kuv tus kws kho mob tsis khoom lawm, nws yuav tsum tau mus rau tom tsev txhaj tshuaj tiv thaiv kab mob.” Tom qab ntawd wb txoj kev sib tham thiaj li sib haum lawm, tiam sis kuv hnov meem txom heev. Kuv twb dag nws lawm, ces ho tsis lees paub qhov ntawd thiab, tiam sis pheej dag tas zog ntxiv li. Kuv pom hais tias kuv tus moj yam phem npaum li cas thiab kuv mas txaj muag heev rau kuv tus kheej. Kuv saib tsis tshua tau nws ob lub qhov muag li. Yog li ntawd kuv thiaj li maj nroos los rau ntawm Vajtswv lub xub ntiag los tig xav txog kuv tus kheej, thiab nyob hauv kuv txoj kev xav ntawd, kuv thiaj li ras dheev hais tias kuv txawj dag heev nyob rau hauv kuv lub neej lawm. Muaj ib zaug ib tug thawj coj nug kuv seb kuv puas tau qhia rau Viv Ncaus Tshaus paub txog lub rooj sib txoos ua ke rau hmo ntawd. Kuv mam li ras dheev hais tias kuv tsis tau, tiam sis kuv tsis qhia qhov tseeb rau tus thawj coj ntawd, xav tiv thaiv kuv tus yam ntxwv kom nws txhob paub. Kuv dag, hais tias kuv nyuam qhuav qhia rau nws paub lawm. Ces kuv txawm maj nroos xa kiag ib tsab xov mus qhia rau Tshaus paub txog lub rooj sib txoos ua ke ntawd. Feem ntau kuv kuj tau tawm mus yuav zaub noj txhua txhua hnub tsib thaum sawv ntxov thiab, yog li ntawd kuv thiaj li koom tsis tau txhua lub rooj sib txoos ua ke thaum yuav tag. Tiam sis kuv tsis qhia qhov tseeb, thiab qhia rau tus thawj coj ntawd hais tias kuv muaj lwm lub rooj tsib txoos ua ke lawm, los sis teem tau ib lub sij hawm lawm, vim yog li ntawd kuv thiaj li mus tsis tau. Kuv ntxeev txhua yam, txawj ntxias thiab dag ntxias tsuas yog los tiv thaiv kuv tus kheej tus yam ntxwv kom nws txhob paub xwb thiab ua kom tus thawj coj ntawd xav hais tias kuv mas khwv heev rau kuv tes dej num tas li xwb. Kuv pom tias kuv ua tsis tau kom raws li Vajtswv tej kev cheem tsum rau txoj kev coj ncaj li. Yog li ntawd kuv thiaj li thov Vajtswv hais tias, “Vajtswv Tus Uas Muaj Hwj Chim Loj Kawg Nkaus, kuv tu siab heev li rau kuv tej lus dag thiab kev dag ntxias. Kuv cia li cheem tsis tau txoj kev dag thiab txawj ntxias kom lwm tus txhob paub kuv tus yam ntxwv zoo. Kuv tsis yog ib tug neeg coj ncaj kiag li. Vajtswv, thov coj kuv kev thiab pab kom kuv to taub qhov tseeb, kom dim ntawm txoj kev qias vuab tsuab no mus.”
Kuv nyeem zaj lus no ntawm Vajtswv cov lus: “Nyob rau hauv lawv lub neej txhua hnub mas, tib neeg nquag tham txog tej uas tsis muaj qab hau, hais lus dag, thiab hais tej uas tsis paub dab tsi, ruam, thiab tiv thaiv xwb. Feem ntau mas tej no yog khav txiv thiab theeb khav txiv kom tau raws li lawv tus kheej tej kev xav xwb. Qhov hais cov lus cuav zoo li no nthuav lawv tej moj yam qias vuab tsuab tawm xwb. Yog koj kho tej uas qias vuab tsuab no, mas yuav ntxuav tau koj lub siab dawb huv, thiab koj yuav maj mam dawb huv thiab coj ncaj tuaj. Tseeb tiag, txhua tus tib neegyeej paub tias vim li cas lawv thiaj li dag. Vim txhawm rau lawv tus kheej qhov txiaj ntsim thiab kev khav theeb los sis kev khav txiv thiab lub meej mom ntawd, lawv thiaj li ua txhua yam los nrog lwm tus sib tw thiab lawv tus kheej ua txuj yog yam uas lawv tsis yog. Txawm li cas los xij, thaum kawg lawv tej lus dag ntawd raug lwm tus muab nthuav tawm thiab muab qhia tshwm, ces thaum kawg lawv thiaj li poob ntsej muag, thiab lawv poob koob meej thiab cwj pwm thiab. Qhov no puav leej yog los ntawm tej lus dag uas ntau dhau lawm xwb. Koj tau dag ntau dhau lawm. Txhua lo lus uas koj hais mas tsis zoo thiab tsis hais tiag tiag, thiab tsis muaj ib lo uas suav tau hais tias muaj tseeb los sis tiag tiag li. Tab txawm koj tsis xav tias koj poob ntsej muag thaum koj hais tej lus dag ntawd los xij, hauv nruab siab mas koj txaj muag heev. Koj lub siab uas txawj xav ntawd thiaj li cem koj, thiab koj xav tsis zoo rau koj tus kheej, thiaj li xav hais tias, ‘Vim li cas kuv thiaj li ua ib lub neej uas tu siab ua luaj li no? Qhov hais lus tseeb ntawd nyuaj heev lod? Kuv yuav tsum dag txhawm rau kuv txoj kev khav theeb lod? Vim li cas kuv lub neej yuav qaug zog ua luaj?’ Koj tsis tas yuav ua ib lub neej qaug zog. Yog koj xyaum ua tau ib tug tib neeg coj ncaj, mas koj yuav ua tau ib lub neej uas kaj siab, ywj siab, thiab ywj pheej. Txawm li cas los xij, koj xaiv los txhawb koj txoj kev khav theeb thiab khav txiv los ntawm qhov hais tej lus dag lawm. Yog li ntawd, koj ua ib lub neej uas dhuav thiab nyuaj siab heev, uas yog cov nyom koj tus kheej xwb. Tej zaum yus yuav paub txog kev khav theeb los ntawm qhov hais tej lus dag ntawd, tiam sis qhov paub txog kev khav theeb ntawd yog dab tsi? Qhov ntawd tsuas yog ib qho qhuav qhawv xwb, thiab tsis muaj nqis kiag li. Kev hais lus dag txhais hais tias muab yus tus cwj pwm thiab lub koob meej muag tawm ntag. Txoj kev hais lus dag ntawd muab yus lub koob meej thiab yus tus cwj pwm tshem tawm mus; txoj kev hais lus dag ntawd ua rau Vajtswv tsis txaus siab, thiab Nws ntxub txoj kev hais lus dag ntawd. Qhov no puas tsim nyog? Tsis tsim nyog! Qhov no puas yog txoj kev yog? Tsis yog, qhov no tsis yog. Cov tib neeeg uas pheej dag mas yeej ua neej raws li lawv tus moj yam phem xwb; lawv ua neej nyob hauv Ntxwgnyoog lub hwj chim. Lawv tsis nyob rau hauv txoj kev kaj, thiab lawv tsis nyob rau hauv Vajtswv lub xub ntiag. Koj pheej xav txog qhov yuav dag li cas thiab tom qab koj dag lawm, koj yuav tsum xav txog qhov yuav npog lo lus dag ntawd li cas xwb. Ces thaum koj tsis npog lo lus dag ntawd kom zoo txaus es lo lus dag ntawd tshwm tuaj lawm, koj yuav tau xav nyuaj heev los ua txhua yam daws tej kev cov nyom ntawd thiab ua kom mus tau. Ces thaum koj tsis npog lo lus dag ntawd kom zoo txaus es lo lus dag ntawd tshwm tuaj lawm, mas koj yuav tau xav nyuaj heev los ua txhua yam daws tej kev cov nyom ntawd thiab ua kom mus tau. Qhov ua neej li ntawd tsis dhuav lod? … Yog koj xav hais tias tej lus dag ntawd txhawb tau lub koob lub npe, lub meej mom, thiab txoj kev khav txiv, thiab kev khav theeb uas koj ntshaw ntawd, ces koj yuam kev hlo li lawm. Tseeb tiag, qhov hais tej lus dag ntawd, tsis yog koj tsuas tuav tsis tau koj txoj kev khav txiv thiab khav thee, thiab koj lub koob meej thiab tus cwj pwm xwb, tshaj ntawd ntxiv, koj tseem plam lub cib fim los xyaum ua raws li qhov tseeb thiab ua tus neeg coj ncaj thiab. Tab txawm yog koj tiv thaiv tau koj lub koob lub npe, lub meej mom, txoj kev khav txiv, thiab khav theeb txiv nyob rau lub sij hawm ntawd los xij, koj tau muab qhov tseeb tso tseg thiab ntxeev siab rau Vajtswv lawm. Qhov no txhais hais tias koj plam lub hwv tsam uas Nws los cawm koj thiab ua kom koj zoo tiav log lawm, uas yog qhov kev plam loj tshaj plaws thiab yog ib qho uas tu siab mus tag sim neej. Cov uas txawj dag yeej yuav tsis to taub qhov no li” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Tsuas Yog ib tug Neeg Coj Ncaj Xwb Mas Thiaj Li Ua Neej Tau Zoo LiTib Neeg Tiag). Vajtswv cov lus piav qhia kuv tus yam ntxwv tau zoo tshaj plaws li. Kuv pom hais tias kuv tsis ncaj thiab txawj dag. Thaum kuv tsuas xav so lawm xwb, ces kuv qhia tsis tau qhov tseeb txog qee yam me me li lawm. Kuv tsis qhia kuv tus thawj coj ncaj qha hais tias kuv yuav tsum tau tso dab ntub ib pliag es mam li nrog nws tham me ntsis tom qab ntawd, tiam sis kuv ho dag lawm. Qhov uas txhawb kuv siab yog los tiv thaiv kuv lub ntsej muag thiab lub meej mom, los tiv thaiv kom lwm tus tib neeg txhob paub kuv tus yam ntxwv. Vajtswv ntxub hom cwj pwm zoo li ntawd, thiab kuv ua txhaum rau qhov ntawd. Ib yam li Vajtswv cov lus hais tias, “Tab txawm koj tsis xav tias koj poob ntsej muag thaum koj hais tej lus dag ntawd los xij, hauv nruab siab mas koj txaj muag heev. Koj lub siab uas txawj xav ntawd thiaj li cem koj, thiab koj xav tsis zoo rau koj tus kheej, thiaj li xav hais tias, ‘Vim li cas kuv thiaj li ua ib lub neej uas tu siab ua luaj li no? Qhov hais lus tseeb ntawd nyuaj heev lod? Kuv yuav tsum dag txhawm rau kuv txoj kev khav theeb lod? Vim li cas kuv lub neej yuav qaug zog ua luaj?’” Kuv qhia tau hais tias cov lus no yog los ntawm Vajtswv los tiag tiag. Kev hais lus dag los tiv thaiv kuv lub koob lub npe yog ib txoj kev ua neej uas sab heev. Kuv yuav tsum tau hais tej lus dag tas li los npog kuv lo lus dag uas xub hais ua ntej lawm. Kuv lub siab uas txawj xav mas tsis kaj li tom qab kuv dag lawm, kuv tu siab thiab quaj, thiab kuv txaj muag heev rau kuv txoj kev hais lus dag. Tiam sis tom qab qhov muaj tseeb lawm, los kuv pheej hais tej lus dag ntau ntxiv xwb. Nws ua rau kuv qias vuab tsuab thiab txaj muag heev! Kev hais lus dag tau dhau los ua kuv tus yeeb yam lawm. Kuv nco tau qee yam uas Tswv Yexus hais tias: “Tab sis cia koj tej kev cev ncauj cev lus kom zoo li, Yog, ces yog; Tsis yog, ces tsis yog: vim dab tsi los xij yog tshaj tej no lawm ces yog qhov phem lawm xwb” (Mathai 5:37). “Nej yog los ntawm nej txiv dab los, thiab nej yuav ua raws li nej txiv dab tej kev phem kev qias. Nws yog ib tug neeg tua neeg thaum pib kiag los lawm, thiab tsis nyob rau hauv qhov tseeb, vim yeej tsis muaj qhov tseeb nyob rau hauv nws li. Thaum nws hais ib qho lus dag, nws hais kiag ntawm nws tus kheej los xwb: vim nws yog ib tug neeg dag, thiab yog leej txiv ntawm qhov ntawd” (Yauhas 8:44). Muaj tseeb. Kuv txoj kev pheej hais lus dag ntawd qhia hais tias kuv yog dab tug, thiab kuv ua li ntawd tsuas yog los tiv thaiv kuv tus kheej tus yam ntxwv thiab lub koob lub npe xwb. Tiam sis qhov ntawd tshem tag nrho kuv tus cwj pwm thiab lub koob meej mus lawm. Kuv ruam heev! Vajtswv vam tias kuv yuav xyaum ua raws qhov tseeb thiab ua ib tug neeg coj ncaj, los ua tim khawv rau Nws thiab ua kom Ntxwgnyoog txaj muag, tiam sis kuv poob rau Ntxwgnyoog tej tswv yim dag lawm, dag txhawm rau kuv tus kheej txoj kev khav theeb thiab lub koob lub npe, dag cov nus thiab cov viv ncaus, thiab los ua Ntxwgnyoog cov khoom txaus luag xwb. Kuv tus cwj pwm ua rau Vajtswv tu siab heev dhau lawm thiab mob Nws lub siab. Kuv tsis yog ib tug neeg coj ncaj, thiab kuv tus yeeb yam yeej txawj dag.
Tom qab ntawd, kuv nyeem qhov no nyob rau hauv ib zaj lus ntawm Vajtswv cov lus: “Nej yuav tsum tau paub tias Vajtswv nyiam cov uas coj ncaj. Hauv lub ntsiab tseeb mas, Vajtswv yeej ncaj ncees, thiab yog li no Nws cov lus yeej ib txwm tso siab tau rau; Nws tej kev ua, ntau tshaj no, yog yam tsis muaj chaw thuam thiab tsis muaj lus nug li, twb vim yog li no Vajtswv thiaj li nyiam cov uas coj ncaj rau Nws xwb. Kev coj ncaj txhais tias muab nej lub siab rau Vajtswv, ua siab tseeb tiag tiag rau Vajtswv rau hauv txhua yam, qhib siab hlo rau Nws rau hauv txhua yam, tsis txhob zais tej uas muaj tseeb, tsis txhob sim dag cov nyob siab saud thiab cov nyob hauv qab koj, thiab tsis txhob ua tej yam uas ntxim li haum Vajtswv siab xwb. Muab hais kom luv luv ces, kev coj ncaj yog ua kom dawb huv rau txhua yam hauv nej tej kev ua thiab cov lus, thiab tsis txhob dag Vajtswv los sis dag tib neeg li” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Peb Qhov Lus Ceeb Toom). Kuv pom hais tias kev coj ncaj mas txhais hais tias tsis muaj kev dag ntxias nyob hauv koj lub siab, tsis muaj tej lus dag nyob hauv koj tus nplaig, thiab yeej tsis muaj hnub dag Vajtswv los sis tib neeg txog ib yam dab tsi li. Kuv pheej hais lus dag thiab dag tas li los tiv thaiv kuv tus yam ntxwv thiab tej kev ntshaw. Kuv sab heev thiab xav tso dab ntub ib pliag, yog li ntawd kuv thiaj li tsis xav nrog Xujxeem tham txog pawg ntseeg tes hauj lwm kiag tam sim ntawd, tiam sis kom nws txhob paub kuv tus yam ntxwv ces kuv thiaj li dag kom tawm tau ntawm lub rooj sib tham ntawd mus. Tab txawm yog tom qab kuv ras txog qhov kuv ua yuam kev lawm los xij li, kuv yeej tsis lees qhov ntawd kiag tam sid, tiam sis pheej hais lus dag tas li xwb. Tiag tiag ces yeej muaj tej co hauj lwm uas kuv ua tsis tau tiav tiam sis thaum kuv tus thawj coj nug txog, kuv dag tias nyuam qhuav ua tiav qhov ntawd lawm. Kuv hais lus dag ntau heev los tiv thaiv kuv txoj kev khav theeb thiab lub koob lub npe thiab kuv pom hais tias kuv muaj ib tug yeeb yam uas txawj dag thiab txawj ntxias dag. Kuv qhia tsis tau qhov tseeb tab txawm yog tej yam yooj yim tshaj plaws los xij. Kuv raug Ntxwgnyoog muab ua qias vuab tsuab tob dhau heev lawm. Kuv tsis yog ib tug tib neeg uas coj ncaj kiag li.
Muaj lwm zaj lus ntawm Vajtswv cov lus uas kuv nyeem tom qab ntawd hais tias. “Tsuas yog cov tib neeg uas nrhiav los ua neeg ncaj ncees nkaus xwb mas lawv thiaj li paub tias lawv qias vuab tsuab tob npaum li cas, seb lawv puas muaj ib qho zoo li tib neeg los tsis muaj. Thiab ntsuas lawv tus kheej kom meej los sis pom qhov lawv tsis muaj txaus. Tsuas yog thaum lawv tab tom xyaum txoj kev ncaj ncees nkaus xwb lawv thiaj li dhau los ras tias lawv hais qhia dag ntau npaum li cas thiab lawv qhov txawj dag thiab coj tsis ncaj ncees yuav zais npog tob npaum li cas. Tsuas yog thaum muaj kev ntsib pom ntawm kev xyaum ua raws kev ncaj ncees nkaus xwb tib neeg thiaj li maj mam los paub qhov tseeb ntawm lawv tus kheej txoj kev qias vuab tsuab thiab paub lawv tus kheej tus yeeb yam lub ntsiab tseeb, thiab tsuas yog thaum ntawd xwb mas lawv tej moj yam qias vuab tsuab thiaj li raug ntxuav kom dawb huv. Tsuas yog lub hauv paus ntawm lawv tej moj yam lwj liam raug ntxuav kom dawb huv xwm yeem lawm xwb thiaj li yuav yog cov tib neeg uas muaj peev xwm muab tau qhov tseeb. Siv koj lub sij hawm kom ntsib pom cov lus no. Vajtswv tsis ua cov neeg uas txawj dag kom zoo tiav log. Yog koj hnov tias tsis yog neeg ncaj ncees—yog koj tsis yog ib tug neeg ncaj ncees—ces Vajtswv yeej yuav muab tsis tau koj li. Ib yam nkaus thiab, koj yuav muab tsis tau qhov tseeb thiab, thiab kuj yuav tsis muaj peev xwm muab tau Vajtswv li thiab. Nws txhais li cas yog tias koj muab tsis tau Vajtswv? Yog tias koj muab tsis tau Vajtswv thiab tsis tau to taub qhov tseeb, ces koj yuav tsis paub Vajtswv, yog li ntawd yuav tsis muaj txoj hau kev uas koj yuav nrog tau Vajtswv sib raug zoo, ces koj yuav yog Vajtswv tus yeeb ncuab. Yog tias koj tsis sib raug zoo nrog Vajtswv, ces Vajtswv tsis yog koj tus Vajtswv; thiab yog tias Vajtswv tsis yog koj tus Vajtswv, ces koj yuav tsis dim. Yog tias koj tsis nrhiav kom tau txais kev cawm dim no, vim li cas koj ho ntseeg Vajtswv? Yog koj tsis tuaj yeem tau txais kev cawm dim, koj yuav yog tus yeeb ncuab iab ntawm Vajtswv mus tag ib txhiab ib txhis, thiab koj qhov ua tau los yuav raug teev tseg. Yog li ntawd, yog tib neeg xav kom raug cawm dim, ces lawv yuav tsum pib ua neeg ncaj ncees. Thaum kawg, cov uas Vajtswv muab tau ntawd muaj ib lub cim ntau rau. Nej puas paub txog qhov no yog dab tsi? Nws raug sau rau hauv Kev Qhia Tshwm, rau hauv phau Vajluskub tias: ‘Thiab nyob hauv lawv lub qhov ncauj tsis pom muaj lus dag li; lawv tsis muaj chaw thuam li’ (Qhia Tshwm 14:5). ‘Lawv’ yog leej twg? Lawv yog cov uas raug cawm dim, raug ua tau zoo tiav log thiab Vajtswv muab tau. Vajtswv piav qhia txog cov neeg no li cas? Tej cwj pwm thiab tej kev nthuav tawm ntawm lawv txoj kev coj yog dab tsi? Lawv tsis muaj chaw thuam li. Lawv tsis hais lus dag li. Tej zaum nej txhua tus yeej to taub thiab nkag siab hais tias tsis hais lus dag yog txhais tau li cas: Nws txhais tias yog kev ncaj ncees. Qhov hais tias ‘tsis muaj chaw thuam li’ ntawd hais txog dab tsi? Qhov ntawd txhais hais tias tsis ua phem. Yog li ntawd no lub hauv paus ntawm qhov tsis ua phem ntawd yog dab tsi? Lub hauv paus ntawd yeej yuav tsum yog txoj kev hwm Vajtswv xwb. Yog li ntawd, qhov tsis muaj chaw thuam ntawd yog txhais hais tias hwm Vajtswv thiab zam kev phem. Vajtswv yuav ua li cas paub tus uas tsis muaj chaw thuam ntawd? Raws li Vajtswv pom mas, tsuas yog cov uas hwm Vajtswv thiab zam kev phem xwb thiaj li yog cov uas zoo tiav log; yog li ntawd, cov tib neeg uas tsis muaj chaw thuam ntawd yog cov uas hwm Vajtswv thiab zam kev phem, thiab tsuas yog cov uas zoo tiav log xwb mas thiaj li yog cov uas tsis muaj chaw thuam. Qhov no thiaj li yog tiag tiag” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Rau Yam Ua Tau Tshwm Sim Tiag ntawm Lub Neej Kev Loj Hlob). Thaum xav txog qhov no ua rau kuv ntshai heev vim Vajtswv hais tais: “Yog koj tsis yog ib tug neeg ncaj ncees—ces Vajtswv yeej yuav muab tsis tau koj li. Ib yam nkaus thiab, koj yuav muab tsis tau qhov tseeb thiab, thiab kuj yuav tsis muaj peev xwm muab tau Vajtswv li thiab.” “Yog koj tsis tuaj yeem tau txais kev cawm dim, koj yuav yog tus yeeb ncuab iab ntawm Vajtswv mus tag ib txhiab ib txhis, thiab koj qhov ua tau los yuav raug teev tseg.” Yeej muaj tseeb tias Vajtswv tsis cawm cov tib neeg txawj dag. Kuv paub hais tias yog kuv tsis lees txim hloov dua siab tshiab, ces kuv yeej yuav kawg raug Vajtswv muab ntiab tawm mus. Vim Vajtswv cov lus, thaum kawg kuv thiaj li muaj ib txoj kev to taub tseeb txog kuv tus kheej thiab paub tias tej lus dag ntawd yog los ntawm dab los. Nyob rau hauv lub ntiaj teb uas raug Ntxwgnyoog tswj kav, yus txoj kev loj hlob tuaj thiab txoj kev haub ntxias ntawm zej tsoom sawv daws ua rau tib neeg txawj dag thiab phem zuj zus tuaj. Txij thaum tseem hluas hluas los, kuv niam yeej ib txwm hais rau kuv hais tias txawm lwm tus tej plaub hau los sis tej khaub ncaws yuav zoo li cas los xij, kuv tseem yuav tsum tau hais yam zoo kom kuv thiaj li yuav tsis ua rau lawv mob siab. Yog tsis li ntawd, ces lawv yuav tsis pab kuv thaum kuv cheem tsum kev pab. Vim txoj kev kawm zoo li ntawd, kuv thiaj li tsis muaj cuab kav los coj ncaj. Kuv tsuas hais cov lus cuav uas zoo zoo mloog xwb es kom tib neeg thiaj li yuav xav hais tias kuv mas zoo thiab muaj kev khuv leej. Tiam sis qhov tseeb tiag, thaum kawg kuv yog ib tug neeg cuav, thiab txawj dag xwb. Nws ua rau kuv nco txog Yauj 1:7 hauv Vajluskub: “Thiab Yehauvas hais rau Ntxwgnyoog tias, Koj mus qhov twg los? Ces Ntxwgnyoog txawm teb Yehauvas, thiab hais tias, Mus ncig ntuj ncig teb los xwb, thiab mus nce toj nqis taug hauv lub ntiaj teb los xwb.” Ntxwgnyoog cov lus mas txawj ntxias thiab tsis ncaj. Vim txoj kev hais lus dag tas li, tsis yog kuv txawj ntxias, zoo ib yam li Ntxwgnyoog thiab lod? Kuv pom tias kuv muaj tib hom yeeb yam li Ntxwgnyoog ntag, tias kuv ua lub neej nyob rau hauv Ntxwgnyoog lub hwj chim, thiab kuv tsis dim ntawm kuv tus moj yam phem hlo li. Kuv yuav ua li cas haum nrog rau Khetos los sis tau txais Vajtswv txoj kev pom zoo li ntawd mas? Kuv thiaj li los rau ntawm Vajtswv lub xub ntiag los lees txim hloov dua siab tshiab, thiab thov kom Nws zam txim rau kuv. Kuv ntxub kuv tus kheej tiag tiag thiab kuv mloog zoo li kuv muaj kev txhaum ntau heev. Vajtswv tus moj yam mas ncaj ncees, thiab kuv paub tias kuv tsis tuaj yeem pheej hais lus dag thiab ua rau Nws chim mus ntxiv lawm.
Kuv tig xav txuas ntxiv mus thiab kuv nyeem ib zaj lus ntawm Vajtswv txoj lus: “Thaum kawg, cov uas Vajtswv muab tau ntawd muaj ib lub cim ntau rau. Nej puas paub txog qhov no yog dab tsi? Nws raug sau rau hauv Kev Qhia Tshwm, rau hauv phau Vajluskub tias: ‘Thiab nyob hauv lawv lub qhov ncauj tsis pom muaj lus dag li; lawv tsis muaj chaw thuam li’ (Qhia Tshwm 14:5). ‘Lawv’ yog leej twg? Lawv yog cov uas raug cawm dim, raug ua tau zoo tiav log thiab Vajtswv muab tau” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Rau Yam Ua Tau Tshwm Sim Tiag ntawm Lub Neej Kev Loj Hlob). Kuv xav txog Vajtswv cov lus thiab ras hais tias Vajtswv saib cov uas coj ncaj muaj nqis, thiab cov tib neeg coj tsis ncaj yeej yuav tsis muaj lub hwv tsam tau nkag mus rau hauv Nws lub nceeg vaj hlo li. Kuv yeej xav los ua ib tug tib neeg coj ncaj thiab tsum tsis hais lus dag thiab ntxias dag lawm, tiam sis kuv ua tsis tau li ntawd los ntawm kuv tus kheej. Kuv yuav tsum tau nrhiav Vajtswv txoj kev pab kom kuv tsis txhob mag Ntxwgnyoog rooj ntxiab dua lawm. Tab txawm qhov qhia qhov tseeb ntawd yuav ua rau txaj muag qee zaus los xij, kuv xav tsum tsis hais tej lus dag ntawd lawm. Ces kuv rov qab nyeem “Cov Hauv Paus Ntsiab Lus ntawm Qhov Ua ib tug Tib Neeg Coj Ncaj.” “(1) Nyob rau hauv txoj kev cob qhia koj tus kheej mus ua ib tug tib neeg coj ncaj ntawd mas, koj yuav tsum tau vam khom rau Vajtswv. Muab koj lub siab rau Nws, thiab lees txais Nws txoj kev tshawb xyuas kom meej. Tsuas yog ua li ntawd xwb mas thaum lub sij hawm dhau mus koj thiaj li muab tau koj tej lus dag thiab kev txias dag ntawd ntiab tawm tau mus; (2) Nws cheem tsum los lees txais qhov tseeb thiab tig xav txog koj txhua lo lus thiab txoj kev ua. Muab lub hauv paus thiab lub ntsiab tseeb ntawm txoj kev qias vuab tsuab uas nthuav tawm nyob hauv koj ntawd cais tawm es los paub koj tus kheej tiag tiag; (3) Nws cheem tsum los tshuaj xyuas seb koj nyob rau qhov xwm txheej twg thiab zais txoj kev dag ntxias rau qhov twg lawm. Yuav tsum muaj cuab kav muab koj tus kheej cais tawm thiab nthuav koj tus kheej tawm, es thov txim rau lwm tus thiab tsim kho” (170 Cov Hauv Paus Ntsiab ntawm Kev Xyaum Ua Raws qhov Tseeb). Kuv txiav txim siab hais tias kuv yuav tsum tau qhib siab lug rau Xujxeem txog kuv txoj kev qias vuab tsuab thiab tej txhawb siab. Kuv zais tsis tau tej uas muaj tiag thiab dag nws ntxiv lawm. Txawm li cas los xij, kuv yuav tsum tau qhia qhov tseeb thiab ua ib tug neeg coj ncaj. Kuv paub tias Vajtswv saib ntsoov kuv thiab tos rawv kuv los lees txim hloov dua siab tshiab. Tom qab thov Vajtswv ob peb zaug ntxiv lawm, kuv thiaj li muaj lub siab tawv los muab kuv tus kheej nthuav tawm tag nrho rau Xujxeem. Kuv qhia txhua yam ntxaws ntxaws rau nws txog qhov kuv tau dag ntxias nws li cas lawm thiab tias kuv twb lees txim hloov dua siab tshiab rau ntawm Vajtswv lub xub ntiag lawm tiag tiag. Kuv hnov zoo li ib qho uas hnyav hnyav ntawd tau raug muab tshem tawm ntawm kuv mus lawm, thiab kuv kaj siab dua tuaj lawm.
Kuv paub tias kuv txoj kev hais lus dag tsis yog ib qho teeb meem uas yuav ua ib zaug kho tau, yog li tom qab ntawd kuv thiaj li pib los rau ntawm Vajtswv lub xub ntiag los thov Vajtswv txhua lub sij hawm, thov kom Nws tshawb xyuas kuv lub siab kom meej. Thaum kuv nthuav tawm txog txoj kev npaj siab uas tsis coj ncaj, los sis yog kuv xav dag los sis ntxias dag, ces kuv txawm thov Vajtswv hais tias, “Vajtswv, kuv ntsib ib qho teeb meem lawm, thiab kuv mloog zoo li kuv khiav tsis dhau qhov teeb meem ntawd yog tsis dag. Thov qhia kom kuv to taub qhov tseeb es kuv thiaj li ntxeev siab tawm tsam tau cev nqaij daim tawv. Au Vajtswv, kuv xav xyaum ua raws qhov tseeb thiab ua ib tug neeg coj ncaj. Thov pab kuv.”
Muaj ib zaug tom qab ib lub rooj sib txoos ua ke lawm, ib tug thawj coj txawm nug kuv hais tias kuv xav li cas txog lub rooj sib txoos ua ke ntawd. Kuv mam li paub hais tias nws khav theeb nyob rau hauv nws cov lus qhia, thiab hais tias muaj lwm yam teeb meem. Tiam sis kuv ntshai tsam ua rau nws txoj kev khav theeb ntawd puas vim qhov tseeb, ces tom qab ntawd nws yuav tsis nyiam kuv lawm. Tiv thaiv kom nws txhob paub kuv tus yam ntxwv ces kuv thiaj li dag hais tias, “Nws zoo heev.” Ces kuv tsis kaj siab kiag li thaum kuv hais li ntawd lawm. Kuv ras dheev hais tias kuv tau dag lawm, yog li ntawd kuv thiaj li thov Vajtswv thiab thov kom Nws coj kuv kev los ua ib tug neeg coj ncaj thiab qhia qhov tseeb. Yog li tom qab ntawd kuv thiaj li mus nrog tus thawj coj ntawd tham txog tej teeb meem ntawm lub rooj sib txoos ua ke ntawd ces kuv hnov kaj siab lawm ntau heev. Peb tej rooj sib txoos ua ke tom ntej uas wb tuav ntawd mas zoo dua li yav dhau los lawm. Kuv pom hais tias tom qab ib ntus lawm, kuv maj mam hloov pauv lawm. Yav dhau los kuv yeej ib txwm dag los tiv thaiv kuv lub ntsej muag thiab lub meej mom. Tiam sis thaum kuv muab kuv lub siab rau Vajtswv, thov kom Nws saib xyuas kuv lub siab lawm, ces kuv pom kuv tus kheej tus yam ntxwv tseeb tseeb lawm. Kuv muaj peev xwm los tab meeg hlo vam khom rau Vajtswv los muab kuv lub cev nqaij daim tawv tso pov tseg, xyaum ua raws qhov tseeb, thiab ua ib tug tib neeg coj ncaj. Tab txawm muaj qee zaus es kuv yuav raug txaj muag los sis yuav ua rau ib tug twg chim los xij, qhov ua ib tug neeg coj ncaj rau ntawm Vajtswv lub xub ntiag ntawd mas tseem ceeb tshaj rau kuv.
Tam sim no, kuv tab tom xyaum ua ib tug neeg coj ncaj nyob rau txhua qhov xwm txheej uas Vajtswv npaj rau kuv. Kuv ua tsaug ntau ntau rau Vajtswv. Txoj kev txiav txim thiab kev qhia tshwm ntawm Nws cov lus tau pab kuv pom kuv txoj kev qias vuab tsuab thiab kev phem thiab tau hloov pauv qee yam lawm. Kuv paub hais tias kev daws qhov teeb meem ntawm kev hais lus dag mas cheem tsum Vajtswv los npaj xwm txheej kom ntau rau kuv tau ntsib tau pom. Kuv yuav tsum tau ceev faj thiab tig xav txog kuv tus kheej kom ntau ntxiv rau ntawm Vajtswv lub xub ntiag, es kom kuv thiaj li tsis hais ib lo lus dag uas qias Vajtswv lawm. Yam tseem ceeb tshaj plaws yog los lees txais txoj kev txiav txim thiab kev rau txim ntawm Vajtswv cov lus, thiab los thov Vajtswv thiab vam khom rau Nws kom dim plaws ntawm lub siab mos muag uas hais lus dag tiag tiag. Thov kom Vajtswv coj kuv kev mus ua ib tug neeg coj ncaj.
