17. Ib Txoj Kev Ntsib Kev Pom Tshwj Xeeb rau thaum Tseem Hluas

Nyob rau xyoo 2002, thaum kuv muaj 18 xyoo, kuv lees txais Vajtswv Tus Uas Muaj Hwj Chim Loj Kawg Nkaus tes hauj lwm ntawm tiam kawg lawm. Nyob rau lub Xya Hli Ntuj xyoo 2004 ntawd, Kwv Tij Vaj thiab kuv raug tub ceev xwm ntes thaum tab tom tshaj tawm txoj moo zoo nyob rau hauv lwm lub xeev. Nyob rau lub sij hawm ntawd, kuv xav tias, “Wb tsuas tshaj tawm txoj moo zoo xwb, thiab tsis tau ua txhaum ib txoj kev cai lij choj twg li. Dua ntawd, kuv tseem hluas, yog li tej zaum tub ceev xwm yuav tsis ua dab tsi rau kuv. Tej zaum lawv tsuas nug kuv xwb, ces tso kuv mus lawm.” Kuv xav tsis txog li, tom qab lawv coj wb mus txog tim chaw tub ceev xwm lawm, ib tug tub ceev xwm ntaus rooj thiab nug kuv phem ntsuav tias, “Koj lub npe hu li cas? Koj nyob qhov twg? Leej twg hais kom koj tuaj? Koj tshaj tawm txoj moo zoo rau leej twg?” Thaum kuv tsis teb, ces nws sib sib zog npuaj thoob plaws kuv lub ntsej muag ob zaug, sib zog npuaj heev uas ua rau kuv ob lub pob ntseg quaj nrov zib, thiab hais tias qhov tshaj tawm txoj moo zoo ntawd mas yog peb tab kaum txoj kev cai kav sawv daws thiab txoj kev cai lij choj lawm. Qhov no ua rau kuv npau taws, thiab xav tias, “Qhov ntawd phem ua luaj! Peb tshaj tawm txoj moo zoo vim peb xav kom kom lwm tus los ua tib neeg zoo thiab taug txoj kev uas yog xwb. Ua cas nej thiaj li hu tias tab kaum txoj kev cai kav sawv daws?” Tab sis thaum pom tias tub ceev xwm phem npaum li cas lawm, ces kuv paub tias yuav tsis muaj qab hau dab tsi los cam nrog lawv, yog li kuv thiaj li tsis hais dab tsi hlo li. Tom qab ntawd, lawv muab Kwv Tij Vaj thiab kuv xauv tes thiab muab wb tso rau hauv tub ceev xwm lub tsheb. Thaum lawv tsav tsheb, ua rau kuv nyuaj siab heev. Kuv mas ntshai tshaj tsam lawv ntaus thiab tsim txom kuv thaum wb mus txog tim chaw tub ceev xwm. Yog kuv tiv tsis taus qhov txom nyem thiab thaum kawg rais mus ua ib tug Yudas lawm, ces tsis yog kuv ua txhaum rau Vajtswv tus moj yam xwb, kuv kuj yuav ua rau ntau tus kwv tij thiab nkauj muam raug ntes thiab raug kev tsim txom ib yam nkaus li kuv thiab. Kuv thiaj li thov Vajtswv ntsiag to zaum tas zaum thiab tias: “Vajtswv, kuv mas ntshai tshaj. Thov tiv thaiv kuv, thiab muab kev ruaj siab thiab lub zog rau kuv.” Tom qab kuv thov Vajtswv, kuv hnov siab tus me ntsis tuaj lawm.

Lawv coj wb mus rau tim lub Tsev Nug Hauv Tuam Ceeb Nroog Txog Kev Ua Txhaum Cai. Thaum lawv tshawb wb, ib tug ntawm cov tub ceev xwm txawm pom kuv muaj ib lub xov tooj ntaus ntawv xa ntawv nyob ntawm kuv thiab hais tias kuv yuav tsum yog ib tug thawj coj. Thaum kuv hnov li no, kuv xav tias, “Yog lawv xav tias kuv yog ib tug thawj coj, kuv tsis xav tias lawv yuav tso kuv mus yooj yooj yim li.” Thaum pom tias kuv tsis hais dab tsi li, ib tug tub ceev xwm lub xeem hu ua Zaub hais lus luag nyav tias, “Yog koj tsis qhia qhov koj paub rau peb, peb yuav saib seb koj yuav tiv taus ntev npaum li cas!” Nws ncaws kuv ntau zaus, hu kuv lub npe thaum nws ncaws, thiab tom qab ntawd txawm ntaus kuv hauv siab, ua rau mob kuv tiag tiag thiab kuv ua yuav luag tsis taus pa. Nws ntaus thiab ncaws kuv ntau tes ntxiv, ua rau kuv pov rhees deb tshaj li 2 dag thiab kuv yuav luag ntog. Kuv thev qhov mob ntawd ntsiag to thiab tsis hais ib lo lus li. Thaum kawg uas nws sab lawm ces nws thiaj li tsum lawm xwb, tom qab ntawd nws hais lus nyaum tsawv tias, “Yog koj tsis pib hais lus, ces peb yuav muab koj pov rau hauv lub rooj tsov thiab cia koj saj peb peb tugqws hluav taws xob!” Kuv mas ntshai heev li. Twb mob mob kuv vim raug ncaws thiab raug ntaus lawm. Kuv tsis paub tias xyov kuv tiv puas taus qhov raug khi rau ntawm lub rooj tsov thiab raug hluav taws xob ntsw, yog li kuv thiaj li thov Vajtswv ntsiag to zaum tas zaum thiab tias, “Au Vajtswv, thov tiv thaiv kuv lub siab thiab muab kev ruaj siab thiab lub siab tawv rau kuv. Kuv xav vam khom rau Koj los ua tim khawv thiab kuv yeej yuav tsis ua ib tug Yudas li.” Tom qab ntawd, kuv txawm nco tau ib co ntawm Vajtswv Tus Uas Muaj Hwj Chim Loj Kawg Nkaus cov lus tias, “Koj yuav tsum tsis txhob ntshai qhov no thiab qhov tod; txawm koj yuav ntsib teeb meem thiab kev phom sij ntau npaum li cas los, koj muaj peev xwm nyob ruaj khov rau ntawm Kuv xub ntiag, tsis muaj kev cuam tshuam los ntawm ib qho kev tab kaum li, kom Kuv txoj kev xav raug ua mus kom tsis paub kawg. Qhov no yog koj txoj hauj lwm…. Tam sim no yog lub sij hawm uas Kuv yuav los sim koj lawm: Koj puas kam muab koj lub siab npuab rau Kuv? Koj puas kam caum raws Kuv qab yam muab siab npuab mus kom txog txoj kev kawg? Tsis txhob ntshai; nrog Kuv txoj kev pab txhawb, leej twg tuaj yeem thaiv txoj kev no?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 10). Qhov tseeb tiag, Vajtswv yog kuv lub zog ruaj khov, thiab kuv txoj sia yog nyob rau hauv Nws ob txhais tes lawm. Vajtswv tso cai kom kuv raug ntes. Qhov no yog Vajtswv qhov kev sim kuv. Txawm tub ceev xwm tsim txom kuv ntau npaum li cas los xij, kuv yeej yuav hais lus tim khawv kom khov kho. Ib tug ntawm cov tub ceev xwm nug kuv lub npe thiab qhov chaw nyob. Kuv xav tias, “Tam sim no kuv tsev neeg tab tom txais tos cov thawj coj pawg ntseeg rau tim tsev. Yog kuv qhia tias kuv nyob qhov twges tub ceev xwm mus tshawb peb lub tsev, ces kuv cov neeg hauv tsev thiab cov thawj coj yuav raug ntes, yog li kuv qhia tsis tau rau lawv.” Thaum nws pom tias kuv tsis hais dab tsi li, nws thiaj li chim siab heev, thiab tsis hais ib lo lus li, tsawv nkaus phau ntawv ntawm Vajtswv txoj lus thiab muab phau ntawv no sib sib zog ntaus thoob plaws kuv lub ntsej muag, ua rau kuv lub ntsej muag mob tiag tiag, thiab tom qab ntawd nws txawm ncaws kuv ua lwj ua liam. Tib lub sij hawm ntawd, lwm tus tub ceev xwm sib sib zog xuas nrig rau kuv hauv siab. Lawv tsis tsum li mus txog ntua thaum lawv ua tsis taus pa lawm. Thaum pom tias kuv tseem tsis hais lus li thiab, ces ib tug ntawm lawv cov ntawd thiaj li hais tias, “Nws yog ib tug neeg ntseeg tiag. Muab nws kaw rau hauv tsev kaw neeg thiab tsim kom nws txom nyem!” Thaum kuv hnov tias tab tom yuav coj kuv mus kaw, kuv ntshai me ntsis. Kuv twb hnov lawm tias nyob hauv tsev kaw neeg mas, cov neeg raug txim yeej ntaus cov neeg raug txim tas li xwb. Yog kuv raug kaw tiag tiag lawm, kuv yuav tau tiv hom kev tsim txom dab tsi ne? Tej kev tsim txom ntawd puas ua rau kuv tuag tes tuag taw ne? Yog kuv tiv tsis taus no ho yuav zoo li cas? Kuv xav txog qhov no ntev heev, tab sis kuv yeej paub lawm tias, yam tsawg kawg, kuv rais tsis tau mus ua ib tug Yudas thiab ntxeev siab rau Vajtswv, txawm yuav zoo li cas los xij. Kuv tsa tes cog lus rau Vajtswv tias, “Vajtswv! Kuv lub siab me dhau lawm thiab kuv tus kheej sawv tsis tau kom khov kho, tab sis kuv los vam khom rau Koj. Thov nrog nraim kuv, thiab muab lub siab rau kuv kom thev taus kev txom nyem. Kuv yeej yuav tsis ua ib tug Yudas, thiab yuav tsis ntxeev siab rau kuv cov kwv tij thiab cov nkauj muam li!” Tom qab kuv thov Vajtswv lawm, kuv hnov muaj zog thiab ruaj siab lawm.

Tom qab ntawd, ib tug tub ceev xwm thaj tsam li ib nrab neej ntawd ua txuj coj zoo zoo rau kuv, hais tias, “Saib koj mas. Koj tseem hluas, siab, thiab zoo nraug. Vim li cas koj tsis nrhiav ib tug hluas nkauj zoo los sis nrhiav ib txoj hauj lwm zoo? Vim li cas thiaj li ntseeg Vajtswv?” Ces nws txawm thau ib tsab ntawv lees txim hloov dua siab tshiab los rau kuv kos npe. Kuv nyeem tsab ntawv ntawd thiab paub tias qhov kos npe rau daim ntawv ntawd ces txhais tau tias kuv tab tom ntxeev siab rau Vajtswv ntag. Kuv tsis tuaj yeem kos npe rau daim ntawv ntawd! Thaum kuv tsis kam kos npe rau daim ntawv ntawd, tus tub ceev xwm ntawd thiaj li siv lub plhaub qhwv phau ntawv ntawm Vajtswv txoj lus ntawd los sib sib zog ntaus kuv lub ntsos, ua rau kuv lub pob ntseg quaj nrov zib dua, thiab nyob nyob txawm tshwm ib kab nqaij siav loj rau saum kuv taub hau. Tom qab raug ntaus zoo li ntawd lawm, kuv lub taub hau loog tag thiab kuv lub ntsej muag o o, thiab kuv ob sab ceg mob mob thiab o nkoos lam tom qab mag raug ncaws sib sib zog lawm. Kuv hnov cuag nkaus li ib ce tuag tag, thiab mob kuv lub cev tshaj plaws uas kuv cia li teev tsis taus kuv lub kua muag li lawm. Kuv xav tias, “Yog kuv pheej tsis kam kos npe rau daim ntawv lees txim hloov dua siab tshiab ntawd, lawv puas yuav haj yam ntaus kuv sab dua no? Lawv puas yuav tua kuv? Tab sis kuv kos npe tsis tau daim ntawv ntawd. Qhov kos npe rau daim ntawv ntawd ces yog ntxeev siab rau Vajtswv ntag.” Nyob rau lub sij hawm ntawd, kuv xav txog ib zaj lus ntawm Vajtswv Tus Uas Muaj Hwj Chim Loj Kawg Nkaus cov lus: “Thaum koj ntsib kev tsim txom, koj yuav tsum muaj peev xwm tso kev txhawj xeeb ntawm sab cev nqaij tawv tseg thiab tsis txhob yws tawm tsam Vajtswv. Thaum Vajtswv zais Nws Tus Kheej ntawm koj lawm, koj yuav tsum muaj peev xwm muaj kev ntseeg raws Nws qab, kom tuav tau koj txoj kev hlub yav dhau los tsis pub kom nws poob los sis ploj mus. Tsis hais Vajtswv yuav ua dab tsi los xij, koj yuav tsum zwm rau Nws tus qauv thiab npaj foom phem rau koj tus kheej sab nqaij tawv zoo dua li uas yws tawm tsam Nws. Thaum koj raug kev sim siab, koj yuav tsum ua rau Vajtswv zoo siab, txawm hais tias koj yuav quaj los kua muag iab los sis tsis txaus siab rau qee yam hom phiaj uas koj nyiam. Tsuas yog qhov no xwb thiaj li yog kev hlub thiab kev ntseeg tseeb tiag” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Cov Tib Neeg Uas yuav Raug Ua Kom Zoo Tshaj Plaws Yuav Tsum Raug Kev Tsim Kho Kom Zoo). Kuv to taub tias qhov no yog Vajtswv qhov kev sim kuv, saib seb kuv puas muaj kev ntseeg Nws tiag thaum kuv ntsib kev nyuaj thiab kev ceeb laj txom nyem, thiab seb kuv puas ua tim khawv khov kho rau Nws tau. Vajtswv hais tias txoj kev ntseeg tiag mas txhais tau tias yog kev zwm rau Nws tej kev npaj tseg rau txhua qhov xwm txheej thiab ua kom tau zoo raws Nws txawm tias qhov ntawd txhais tau tias yog kev tiv kev tsim txom thiab kev mob los xij. Kuv yuav tsum tso kuv tus kheej tag nrho rau Vajtswv, thiab txawm tias kuv yuav tiv kev txom nyem ntau npaum li cas los xij, kuv yuav tsis zwm rau Ntxwgnyoog. Kuv yuav tsum tau vam khom rau Vajtswv thiab ua tim khawv. Thaum muaj qhov no rau hauv siab lawm, kuv thiaj li thov Vajtswv tias, “Vajtswv, txawm lawv yuav ntaus kuv npaum li cas los xij, txawm yog lawv ntaus kuv tuag kiag los xij, kuv yeej yuav tsis kos npe rau daim ntawv lees txim hloov dua siab tshiab ntawd li.” Hmo ntawd, cov tub ceev xwm ntawd xa kuv thiab Kwv Tij Vaj mus rau tim tsev kaw neeg, qhov chaws uas wb raug muab faib nyias kaw nyias.

Tus tub ceev xwm ua hauj lwm ntawd coj kuv mus rau hauv ib chav kaw neeg. Muaj ntau dua kaum tawm leej neeg nyob hauv, uas puav leej muaj ntsej muag thiab hais lus tsiv nyaum. Chav kaw neeg ntawd mas zoo li xob ib ce thiab txaus ntshai uas kuv mas ntshai tiag tiag li. Tus tub ceev xwm ntawd hais rau cov neeg raug txim tias, “Tus no yog ib tug ntseeg Vajtswv. Ua ‘tib zoo saib xyuas’ nws nawb.” Nws nyuam qhuav hais lus tag kiag xwb, ob tug neeg raug txim txawm los ntaus thiab ncaws kuv, tom qab ntawd hais kom kuv hle ris tsho liab qab. Nkawv coj txoj xov dej los thiab tso dej txias rau kuv lub cev ntev txog ib nrab teev, ua rau kuv no thiab tshee nkaws. Nkawv pheej nug kuv lub npe mus ntxiv thiab kuv tshaj twm txoj moo zoo rau leej twg lawm. Ces kuv thov Vajtswv ntsiag to mus ntxiv, thov kom Nws tiv thaiv kuv lub siab. Kuv tsis hais ib lo lus li. Hnub tom qab ntawd, nkawv rov qab ntaus kuv dua. Ib tug neeg raug txim tsawv nkaus kuv cov plaub hau thiab muab kuv lub taub hau tsoo sab phab ntsa sib sib zog ua rau kuv pob ntseg quaj nrov zib thiab ntshav ntswg los. Tom qab ntawd, nkau muab kuv “pov ya”, txhais tau tias nkawv muab kuv khoov hos ob tug neeg raug txim tsawv nkaus kuv ob sab tes rub tib teg sib sib zog mus tsoo tim phab ntsa, ua rau kuv taub hau siav tib kab thiab ua rau kuv kiv pes lees thiab qaug pes coog. Ua ntej kuv hnov rov los, nkawv muab kuv ua “pai gow,” txhais tau tias lawv tuav kuv ob txhais ceg rau hauv pem teb nrog rau qhov muab kuv ob sab tes ntxeev tis qaib, hos ib tug neeg nyob tom hau ntej tuav rawv kub ob sab tes thiab rub kuv mus tom ntej, hos lwm tus neeg zawm rau ntawm kuv nrab qaum tuav kuv txhais npab thiab muab thawb mus tom ntej. Kuv ob sab npab mob npaum nkaus li rho tawm ntawm pob qij txha mus lawm. Kuv mob qw tsheej zag. Nkawv tsim txom kuv ntev tshaj li kaum feeb ua ntej hais kom tsum, ces thaum kawg nkawv thiaj li tso kuv, kuv ob sab npab loog tag li lawm. Kuv xav tias, “Puas yog tam sim no kuv ob sab npab tuag tag lawm mas? Yog tias tuag tag lawm, kuv tseem hluas, yog li kuv yuav muaj sia nyob rau yav tom ntej tau li cas? Kuv tsis paub qhov nkawv yuav tsim txom kuv txuas ntxiv lawm. Nkawv puas yuav ntaus kom kuv tuag ne?” Kuv yim xav txog qhov ntawd, ces kuv yim ntshai xwb. Tab sis tom qab ntawd kuv xav txog Vajtswv Tus Uas Muaj Hwj Chim Loj Kawj Nkaus cov lus: “Thaum tib neeg npaj txhij yuav muab lawv txoj sia fij lawm, ces txhua yam cia li rais los ua tej yam me me tsis tseem ceeb lawm xwb, ces tsis muaj leej twg yuav ua tau li cas rau lawv li lawm. Dab tsi tseem ho tseem ceeb tshaj txoj sia lawm thiab? Yog li ntawd, Ntxwgnyoog tsis muaj cuab kav yuav ua tau dab tsi ntxiv rau hauv tib neeg lawm, tsis muaj ib yam dab tsi uas nws ua tau rau tib neeg li lawm” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Kev txhais lub ntsiab ntawm Cov Lus Zais Tob ntawm “Vajtswv Cov Lus rau Tag Nrho Lub Qab Ntuj Khwb”, Tshooj 36). Kuv paub tias Ntxwgnyoog paub tias tib neeg nyiam txoj sia thiab ntshai txoj kev tuag, yog li nws thiaj li siv peb txoj kev qaug zog los tawm tsam peb thiab yuam kom peb ntxeev siab rau Vajtswv. Tam sim no, Vajtswv siv hom kev txom nyem no los ua kom kuv txoj kev ntseegzoo tiav log. Kuv xav txog cov neeg dawb huv ntawm ntau tiam dhau los lawm, uas ntsib kev txom nyem ntau heev los tshaj tawm txoj moo zoo. Ib txhia raug ntes thiab raug kaw, thiab ib txhia haj tseem tso lawv lub neej tseg thiab. Vajtswv twb npaj tseg ua ntej lawm tias kuv yuav yug los rau tiam kawg, kom kuv thiaj li hnov Vajtswv lub suab, tshaj tawm txoj moo zoo, thiab ua tim khawv rau Vajtswv tau. Qhov no yog ib lub meej mom, yog li txawm tias cov tib neeg no tsim txom kuv tuag los xij, kuv raug tsim txom txhawm rau txoj kev ncaj ncees. Qhov no yog ib yam muaj ntsej muag, thiab nws yuav txhais tau tias kuv tsis tau ua lub neej yam tsis muaj qab hau. Kiag thaum kuv ras dheev li no lawm, ces kuv txawm mauj zog nyob hauv kuv lub siab. Txawm nkawv yuav tsim txom kuv li cas los xij, kuv yuav hais lus tim khawv khov kho tab sis tsis ntxeev siab rau Vajtswv.

Tom qab ntawd, thaum tub ceev xwm coj kuv mus nug, lawv hem kuv, hais tias, “Koj tseem muaj hwv tsam los lees txhaum. Koj yog ib tug neeg raug txim rau fab nom tswv, thiab yog koj tsis lees txhaum, ces koj yuav mag kaw. Cov neeg uas koj ntsib hauv tsev kaw neeg mas phem tshaj. Koj yuav tu siab! Qhov ntawd hais tsis tau tias xyov koj tawm los tseem puas yuav muaj txoj sia lawm.” Kiag thaum kuv hnov tias kuv yuav mag kaw, thiab raug teem txim li ib tug neeg raug txim rau fab nom tswv, ces kuv paub tias qhov no yog ib qho kev txhaum cai loj lawm. Kuv yuav pw lub txim ntawd pes tsawg xyoo? Kuv puas yuav nyob txim mus tag kuv txoj kev hluas? Kuv hnov los ntawm lwm tus neeg raug txim tias coob tus tib neeg uas nyob hauv tsev kaw neeg raug ntaus tuag lawm. Kuv haj yam txhawj heev. Kuv tsis paub xyov cov neeg raug txim yuav siv tej tswv yim dab tsi los tsim txom kuv, los sis xyov kuv puas yuav ciaj sia lawm. Kuv yim xav txog qhov ntawd, kuv yim hnov ntxhov siab. Kuv tsis xav kom mag kaw kiag li, thiab tsuas xav tuag kom tawm tau ntawm lub chaw ntawd lawm xwb. Kuv thiaj li thov Vajtswv zaum tas zaum thiab, hais tias, “Vajtswv! Tam sim no kiag mas kuv qaug zog heev, thiab kuv tsis to taub Koj txoj kev xav, tab sis kuv paub tias qhov xwm txheej no los rau kuv vim Koj tso cai. Thov qhia thiab coj kuv kev kom kuv sawv khov kho tau.” Tom qab thov Vajtswv, kuv nco tau Vajtswv Tus Uas Muaj Hwj Chim Loj Kawg Nkaus cov lus: “Tej zaum nej txhua tus nco cov lus no: ‘Rau qhov peb txoj kev txom nyem me me no, uas tsuas yog ib nyuag pliag xwb, ua hauj lwm rau peb kom tau lub yeeb koob uas zoo tshaj plaws thiab nyob mus ib txhis.’ Nej txhua tus yeej tau hnov cov lus no ua ntej lawm, tab sis nej tsis muaj ib tug nkag siab lawv lub ntsiab tseeb. Hnub no, nej paub meej tias lawv qhov tseeb tseem ceeb tiag. Cov lus no Vajtswv yuav ua kom tiav nyob rau hauv tiam kawg, thiab yuav ua kom tiav rau cov neeg raug tus zaj loj liab ploog ntaus tsim txom nyob hauv daim av uas nws chev. Tus zaj loj liab ploog tsim txom Vajtswv thiab yog Vajtswv tus yeeb ncuab, thiab ces, nyob thaj av no, tib neeg raug rhuav ntsej muag thiab tsim txom vim lawv txoj kev ntseeg Vajtswv, thiab qhov tau los ces yog cov lus no tshwm sim nyob hauv nej, pab neeg no. Vim tias, nws nqis tes mus rau ntawm thaj av uas tawm tsam Vajtswv, tag nrho Vajtswv tes dej num ntsib kev cuam tshuam loj heev, thiab Nws cov lus muaj ntau lo ua tsis tau kom tiav kiag tam sid; vim li ntawd, neeg lim hloov kom zoo dua los ntawm Vajtswv cov lus, uas kuj yog ib qhov ntawm kev txom nyem. Nws yog ib qho nyuaj kawg nkaus rau Vajtswv ua Nws tes dej num nyob ntawm thaj av uas tus zaj loj liab ploog nyob—tab sis nws yog los ntawm txoj kev nyuaj no uas Vajtswv ua ib theem ntawm Nws tes dej num, ua kom Nws txoj kev txawj ntse thiab txoj kev ua uas muaj hwj huaj loj tshwm tuaj, thiab siv lub cib fim no los ua kom pab neeg no muaj txhua yam txhij” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Tes Hauj Lwm Puas Yooj Yim Npaum Li Tib Neeg Xav?). Tom qab ua tib zoo xav txog Vajtswv cov lus lawm, kuv thiaj li to taub tias kuv txoj kev tsim txom thiab kev ceeb laj txom nyem niaj hnub nim no yog yam uas kuv tsim nyog raug lawm. Qhov no yog kev tsim txom txhawm rau txoj kev ncaj ncees thiab txom nyem nrog Khetos. Qhov ntawd muaj txiaj ntsig heev. Kev raug ntes thiab raug tsim txom li no ua rau kuv pom meej meej txog lub ntsiab tseeb uas phem ntawm tus zaj loj liab ploog. Tus zaj loj liab ploog yog Vajtswv ib tug yeeb ncuab thiab ib tug dab phem uas tawm tsam Nws. Qhov xwm txheej no kuj qhia rau kuv tias tus Vajtswv uas yug los ua neeg ntawd ua hauj lwm thiab cawm tib neeg hauv tus zaj loj liab ploog lub teb chaws li cas. Qhov tseeb tiag, yog ib teg hauj lwm nyuaj heev. Thaum xav li no, txhawb tau kuv tshaj. Kuv hnov zoo li kuv tsis tuaj yeem ua kom Vajtswv tag kev cia siab. Txawm lawv ntaus kuv tuag los xij, kuv yeej npaj txhij los ua tim khawv thiab ua kom tau zoo raws Vajtswv.

Kaum plaub hnub tom qab ntawd, tub ceev xwm coj kuv thiab ob peb tug kwv tij thiab nkauj muam los nce tub ceev xwm ib lub tsheb, hais tias peb lub txim yog raug rov qab mus kawm ntxiv los ntawm kev ua hauj lwm, thiab tias lawv tab tom coj peb mus rau tim lub chaw ua hauj lwm. Thaum txog tog kev, kuv xav tias, “Kuv tsis paub tias xyov kuv yuav nyob tim lub chaw ua hauj lwm pes tsawg xyoo. Kuv vam tias nws yuav tsis ntev heev ces kuv yuav tau tawm lawm, yuav tau mus sib txoos ua ke nrog kuv cov kwv tij thiab cov nkauj muam sai sai no, thiab ua kuv tes dej num kom tiav log mus ntxiv. Nyob rau yav tag los, kuv mas ua si dhau lawm, thiab tsis ua kuv tes hauj lwm kom zoo li. Thaum kuv tawm lawm, kuv cog lus tias yuav caum raws qhov tseeb thiab ua kuv tes dej num kom zoo.” Thaum peb mus txog rau ntawm Lub Chaw Saib Xyuas Kev Ruaj Ntseg Hauv Tuam Cheeb Nroog lawm, ces tub ceev xwm nkag mus nqa cov ntawv phua lub txim ntawm kev rov qab mus kawm ntxiv los ntawm kev ua hauj lwm, thiab nyeem cov ntawv ntawd rau peb mloog hauv tsheb. Coob tus kwv tij thiab nkauj muam mag lub txim ntev txog ib lub xyoos los sis ib xyoos thiab ib nrab xyoo, tab sis kuv lub txim mas yog peb lub xyoos diam. Kiag thaum hnov li no, kuv hnov ib ce tuag tag. Kuv xav tias, “Peb lub xyoos diam lod? Kuv yuav ua li cas muaj txoj sia nyob ntev npaum ntawd mas?” Kuv hnov mob siab tshaj li qhov hais tau lawm, thiab tsis tuaj yeem lees txais qhov ntawd li. Kuv yeej tsis ntxeev siab rau Vajtswv los sis tsis muab kuv cov kwv tij thiab cov nkauj mum muag tawm li, yog li Vajtswv yuav cia lawv rov qab los qhia kuv ntxiv los ntawm kev ua hauj lwm ntev tag npaum ntawd tau li cas? Kuv lees txais qhov ntawd tsis tau, thiab kuv tag kev cia siab lawm. Tab sis tom qab ntawd, kuv txawm nco tau Vajtswv Tus Uas Muaj Hwj Chim Loj Kawg Nkaus cov lus: “Thaum tab tom raug kev sim siab, nws yog ib yam uas tib neeg yeej ib txwm qaug zog, los sis muaj kev xav phem nyob hauv lawv, los sis tu ncua kev kom pom tseeb rau Vajtswv lub siab nyiam los sis lawv txoj kev ua. Tiam sis qhov twg los xij, koj yuav tsum muaj kev ntseeg rau Vajtswv txoj hauj lwm…. Vajtswv ua txoj hauj lwm ntawm kev ua kom zoo tshaj plaws rau tib neeg, thiab lawv tsis tuaj yeem pom nws, tsis tuaj yeem paub nws; nyob hauv cov xwm txheej zoo li no, koj txoj kev ntseeg yog qhov cheem tsum. Tib neeg txoj kev ntseeg yog qhov cheem tsum thaum muaj qee yam uas lub qhov muag tsis tuaj yeem pom tau, thiab koj txoj kev ntseeg yog qhov cheem tsum thaum koj tsis tuaj yeem tso koj cov kev xav phem mus. Thaum koj tsis muaj kev pom meej txog Vajtswv txoj hauj lwm, yam uas cheem tsum ntawm koj yog kom muaj kev ntseeg thiab kom muaj txoj kev sawv khov kho thiab sawv ua tim khawv. Thaum Yauj nce txog qib no lawm, Vajtswv tshwm los rau nws pom thiab hais lus rau nws. Qhov ntawd yog tias, nws tsuas yog los ntawm koj txoj kev ntseeg xwb, uas koj thiaj li muaj peev xwm pom Vajtswv, thiab thaum koj muaj kev ntseeg lawm Vajtswv yuav ua kom koj zoo tshaj plaws. Yog tsis muaj kev ntseeg, Nws tsis tuaj yeem ua tau li no” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Cov Tib Neeg Uas yuav Raug Ua Kom Zoo Tshaj Plaws Yuav Tsum Raug Kev Tsim Kho Kom Zoo). Tom qab kuv ua tib zoo xav txog Vajtswv cov lus, kuv thiaj li to taub tias, txawm tias kuv yuav ntsib hom xwm txheej txom nyem dab tsi los xij, los sis tej ntawd ntxim ntxub npaum li cas los xij, kuv tuaj yeem sawv tau yog kuv muaj kev ntseeg Vajtswv. Tab sis kuv tsis muaj kev ntseeg Vajtswv li. Kiag thaum kuv hnov tias kuv yuav raug xa rov qab mus kawm ntxiv los ntawm kev ua hauj lwm ntev txog peb lub xyoos diam, kuv lees txais qhov ntawd tsis tau, yog li kuv tas zog cam nrog Vajtswv, thiab yws rau Nws. Kuv xav tias kuv raug ntes thiab raug tsim txom, tiam sis kuv twb tsis tau ntxeev siab rau Vajtswv li, yog li ntawd Nws yuav tsum tiv thaiv kuv. Kuv siv qhov tseeb no ua qhov tseem ceeb los taij thov Vajtswv, vam tias lub txim yuav sib zog, thiab kuv yuav txom nyem tsawg dua. Kuv mas tsis muaj qab hau kiag li. Kuv yeej tsis mloog Vajtswv hais li. Nyob rau yav tag los, kuv cog lus rau ntawm Vajtswv xub ntiag tias kuv yuav caum Nws qab txawm tias txhua yam yuav nyuaj li cas los xij, tab sis tam sim no, ntsib qhov xwm txheej zoo li no uas tsis haum nrog kuv tej kev xav phem, ces kuv rais los xav phem thiab yws. Kuv mas ntxeev siab tshaj. Kuv ua tsis tau li no mus ntxiv lawm. Kuv yuav tsum vam khom rau Vajtswv thiaj li paub qhov xwm txheej nyob rau tom ntej.

Nyob rau ntawm lub chaw ua hauj lwm ntawd, txhua hnub kuv noj tsis txaus, thiab kuv ua hauj lwm hnyav dhau lawm rau thaum plab khoob lug. Tej thaum kuv ua hauj lwm mus txog ntua ob teev los sis peb teev yav sawv ntxov, thiab yog kuv hais tsis yog thaum tab tom ua hauj lwm los sis ua yuam kev ib qho, ces lawv yeej yuav ntau kuv. Txhua zaus kuv rov qab los tim hauj lwm los, kuv raug tsim txom thiab raug xauv rau hauv chav dej ntev txog ib teev. Ua li no mus thawm xyoo. Chav dej mas vaum heev, thiab sij hawm dhau mus, coob tus tib neeg thiaj li muaj mob. Ib txhia muaj kab mob ruas, ib txhia muaj kab mob pob qij txha, thiab kuv ces ua pob xoo liab thoob plaws kuv ib ce. Txhua hmo mas khaus kuv heev uas kuv pw tsis tsaug zog li, thiab kuv khawb kuv tus kheej tas zog ua rau ntshav los, ua rau tej kiav txhab tshiab nti, thiab kuv ib txhia tawv nqaij txawm hlaws tawm ntawm kuv ib ce. Kuv qhia rau tus thawj zov tias kuv xav tau ib tug kws kho mob, tab sis nws tsis hais dab tsi li, “Qhov ntawd tsuas yog ua pob xoo liab xwb. Koj yeej tsis ua li cas. Qhov ntawd yuav tsis cuam tshuam qhov ua koj tes hauj lwm.” Nyob rau theem no, kuv txom nyem tshaj plaws. Kuv xav tias, “Kuv tau tus mob no thaum hnub nyoog tseem hluas li no. Yog tus mob tsis ploj kuv yuav ua li cas? Kuv ua hauj lwm hnyav txhua hnub, thiab kuv yuav tsum tiv kev ntaus thiab kev txaj muag los ntawm cov neeg raug txim. Thaum twg qhov mob no mam li xaus?” Qhov nyob li no mus tsuas ua rau kuv yim nyuaj siab ntxiv xwb. Kuv nyuaj siab heev thaum kuv pom lwm cov kwv tij thiab nkauj muam raug kaw ua ke, thiab ib tug tuaj yeem sib qhia thiab sib txhawb ib tug, hos kuv ces nyob kho siab zim nrog cov tsis ntseeg, thiab tsis muaj leej twg nyob ib ncig uas kuv yuav tham tau nrog li. Kuv keev pw caws vos rau saum kuv lub txaj tsheej tag hmo thiab kua muag ntws twj ywm xwb. Kuv thiaj li thov Vajtswv tias, “Vajtswv, kuv qaug zog heev rau ntawm no lawm. Thov qhia kuv kom kuv to taub Koj txoj kev xav.”

Muaj ib zaug, thaum kuv tawm mus qoj ib ce, ib tug kwv tij tuaj ntawm lwm pab pawg tuaj txawm nyiag cev ib lub hnab ntawv me me rau kuv. Kuv nqa lub hnub ntawv ntawd mus rau tom lub chaw ua hauj lwm thiab muab qhib saib, thiab muaj ib co ntawv sau nyob hauv, nrog rau Vajtswv cov lus uas muab luam cia tso rau hauv. Kuv xav tsis txog tias yuav tau pom Vajtswv cov lus nyob hauv tsev kaw neeg, thiab kuv zoo siab thiab raug siab heev. Zaj lus no nyeem raws li nram qab no: “Tib neeg yuav raug tsim kho kom muaj txhua yam puv npo nyob rau Tiam Lub Nceeg Vaj. Tom qab kev kov yeej lawm, tib neeg yuav raug cob rau kev lim tib neeg kom dawb huv thiab raug kev ceeb laj txom nyem loj. Cov uas muaj cuab kav kov yeej thiab sawv ua tim khawv rau lub sij hawm raug kev ceeb laj txom nyem loj no yog cov uas thaum kawg yuav tau txhua yam puv npo; lawv yog cov kov yeej. Nyob rau thaum lub sij hawm muaj kev ceeb laj txom nyem loj no, mas tib neeg yuav tsum txais yuav kev lim tib neeg kom dawb huv, thiab qhov kev lim tib neeg kom dawb huv no mas yog qhov kev piv txwv kawg ntawm Vajtswv tes hauj lwm. Nws yog zaum kawg uas tib neeg yuav raug lim kom dawb huv ua ntej tag nrho Vajtswv qhov kev cawm tib neeg ntawd yuav xaus, thiab tag nrho cov ua ntseeg Vajtswv yuav tsum txais yuav qhov kev sim siab zaum kawg no, thiab lawv yuav tsum txais yuav qhov kev lim tib neeg kom dawb huv zaum kawg no. Cov uas raug kev ceeb laj txom nyem loj yog cov uas tsis muaj Vajntsujplig Dawb Huv tes hauj lwm thiab Vajtswv txoj kev coj qhia, tab sis cov uas tau raug kov yeej lawm tiag thiab cov uas nrhiav Vajtswv tiag ces thaum kawg yuav sawv tau ntseg ntsos; lawv yog cov uas muaj kev ua neeg thiab cov uas hlub Vajtswv tiag. Tsis hais Vajtswv yuav ua dab tsi li, cov neeg kov yeej no yuav tsis plam cov zeem muag thiab tseem yuav muab qhov tseeb coj los xyaum ua yam tsis pub plam lawv cov lus tim khawv li. Lawv yog cov uas thaum kawg yuav tawm hauv qhov kev ceeb laj txom nyem loj ntawd los” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Tes Hauj Lwm thiab Tib Neeg Qhov Kev Xyaum Ua). Qhov nyeem Vajtswv cov lus ntawd txhawb kuv kawg li. Kuv pom tias thaum raug txoj kev nyuaj, kuv yuav tau muaj kev ntseeg Vajtswv thiab vam khom rau Vajtswv los hais lus tim khawv kom tau khov kho. Muaj kuv tus kheej tib leeg nyob hauv ib pab pawg xwb, tsis muaj cov kwv tij nyob ib puag ncig ntawm kuv li, thiab muaj kev cov nyom thiab kev nyuaj ntau kawg li. Qhov no yog ib qho kev sim kuv. Qhov ntawd ua rau kuv pom kuv tus kheej qhov ua tsis tau zoo txaus thiab kuv tus yeeb yam tseeb. Qhov ntawd kuj ua rau kuv tau txais kev ywj pheej, qhov xwm txheej zoo li no los ntawm kev vam khom rau Vajtswv, thiab kov yeej txoj kev nyuaj thiab kev mob siab. Thaum kuv qaug zog lawm, Vajtswv npaj kuv tus kwv tij xa Nws cov lus tuaj rau kuv, uas txhawb kuv zog tiag tiag li. Kuv hnov Vajtswv txoj kev hlub, thiab paub tias Vajtswv yeej ib txwm nyob ntawm kuv ib sab. Thaum xav li no, kuv thiaj li muaj zog mus ntxiv, thiab kuv muaj kev ruaj siab los tiv taus qhov xwm txheej zoo li no lawm.

Nyob rau xyoo 2006, kuv mob rwj phem heev rau ntawm ko taw. Kuv cov ntiv taw mob heev uas ua rau kuv mus tsis taus kev li. Tub ceev xwm tsis muaj ib yam tshuaj los kho li, thiab tsuas muab me ntsis tshuaj nplaum rau kuv xwb, tab sis tsis yog yuav ua kom kuv ko taw ntaug tau xwb, nws haj yam ua rau tej ntiv taw mob ntxiv tuaj xwb. Qhov no ua rau kuv tu siab heev, thiab kuv hnov zoo li qhov chaw no mas txom nyem heev thiab tsaus ntuj nti tshaj qhov yuav tiv taus lawm. Tsis muaj leej twg tsim nyog tau tiv qhov no li. Tab sis tom qab ntawd, kuv nco tau ib zaj nkauj ntawm Vajtswv cov lus: “Nej puas tau lees txais cov koob hmoov uas tau muab rau nej ntawd? Nej puas tau nrhiav tej lus cog tseg uas tau tsim rau nej? Nej yeej yuav, nyob hauv qab txoj kev qhia ntawm Kuv txoj kev kaj, tsoo kom tej zog ntawm txoj kev tsaus nti tawg du lug. Nej yeej yuav tsis, nyob rau hauv nruab nrab ntawm txoj kev tsaus ntuj nti, poob txoj kev kaj coj kev rau nej. Nej yeej yuav yog tus tswv ntawm tag nrho txhua yam raug tsim los. Nej yeej yuav yog ib tug muaj yeej rau ntawm Ntxwgnyoog xub ntiag. Nej yeej yuav rhuav tshem lub teb chaw ntawm tus zaj loj liab ploog kom puas ntsoog, sawv ntseg ntsos rau ntawm tej pab pawg neeg coob ua npoj ntws los ua tim khawv rau Kuv txoj kev muaj yeej. Nej yeej yuav ua tim khawv khov kho thiab ruaj khov rau hauv daim av Xi-ene. Los ntawm txoj kev txom nyem uas nej tau thev taus, nej yuav tau txais Kuv cov koob hmoov, thiab yuav ua rau Kuv lub yeeb koob ci ntsa iab mus thoob plaws hauv lub qab ntuj khwb xwb xwb li” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Cov Lus rau Tag Nrho Lub Qab Ntuj Khwb, Tshooj 19). Tom qab kuv ua tib zoo xav txog zaj nkauj ntawm Vajtswv cov lus no, kuv thiaj li to taub Vajtswv tej kev xav zoo lawm. Nws txoj kev xav yog los ua ib pawg neeg kom zoo tiav log mus ua cov kov yeej nyob rau hauv tus zaj loj liab ploog lub teb chaws uas muaj peev xwm khiav dim Ntxwgnyoog txoj kev tswj fwm uas tsaus ntuj thiab raug cawm dim los ntawm Vajtswv, thiab cov uas tsim nyog nkag mus rau hauv Vajtswv lub nceeg vaj thiab tau txais Vajtswv tej lus cog tseg thiab tej koob hmoov. Thaum kuv ua tib zoo xav txog qhov no, kuv paub tias yog kuv tsis tau ntsib tsis tau pom txoj kev tsim txom phem ntawm Pawg Tsoom Fwv Koom Tsham thiab txoj kev coj tsis ncaj xws li tib neeg nyob rau ntawm qhov chaw ua hauj lwm ntawd, ntshe kuv yuav tsis muaj peev xwm pom meej meej txog lub ntsiab phem ntawm Pawg Tsoom Fwv Koom Tsham txoj kev ntxub Vajtswv thiab kev ua yeeb ncuab rau Vajtswv, haj yam tsis kam txais yuav qhov ntawd tawm hauv kuv nruab siab los kiag li. Yog tsis muaj txoj kev tsim txom ntawm qhov xwm txheej txom nyem li no thiab yog qhov tseeb tsis raug qhia tshwm, ces ntshe kuv yuav tsis paub tias kuv tseem taij thov Vajtswv, los sis tias thaum Vajtswv tej kev ua tsis haum raws li kuv tej kev xav phem, ces kuv tseem yws thiab cam nrog Vajtswv thiab, los sis tias kuv lub siab mas me heev thiab tias kuv muaj kev ntseeg Vajtswv tsawg heev. Kuv tsis tau txais tag nrho txoj kev paub thiab qhov txiaj ntsig no los ntawm qhov xwm txheej txom nyem li no thiab lod? Qhov no yog Vajtswv txoj koob hmoov rau kuv! Qhov xav txog Vajtswv txoj kev hlub thiab kev cawm dim rau kuv ntawd ua rau kuv muaj kev ruaj siab lawm. Kuv kuj xav txog qhov Yauj tau poob tag nrho nws cov me nyuam, ua mob thoob plaws nws lub cev, thiab cev nqaij daim tawv tiv kev txom nyem ntau tshaj plaws, tiam sis tseem pe hawm Vajtswv tsis yws hlo li. Qhov mob me ntsis thiab tiv kev txom nyem me ntsis uas kuv tau tiv twb tsis tsim nyog muab hais piv rau Yauj. Muaj tej kev qhia rau kuv los kawm nyob rau hauv qhov chaw no, yog li kuv yuav tsum mloog lus thiab vam khom rau Vajtswv los ua tim khawv. Thaum kuv xav txog qhov no, kuv thov Vajtswv tias, “Vajtswv, txawm qhov chaw no yuav phem li cas los sis txawm kuv lub cev yuav tiv kev txom nyem li cas los xij, kuv yuav txaus siab hlo los ua raws li ntawd. Kuv tsis xav xav phem ntxiv lawm, kuv yuav tsum loj hlob, kom Koj thiaj li tsis txhawj txog kuv ntxiv lawm.”

Nyob rau ntau hnub tom qab ntawd, ib yam uas kuv tsis ua tsis tau yog thov Vajtswv. Thaum twg los xij kuv ua hauj lwm sab sab los sis mob tiv tsis taus lawm thiab kuv xav phem thiab qaug zog, ces kuv maj nroos los thov Vajtswv. Kuv thiaj li muaj zog zuj zus tuaj lawm, kuv tsis tshua xav phem thiab tsis tshua qaug zog lawm, thiab kuv muaj peev xwm ntsib qhov xwm txheej uas Vajtswv tau npaj rau kuv li no tau zoo lawm. Ua Vajtswv tsaug. Hauv lub sij hawm peb lub xyoos ntawd, los ntawm kev thov Vajtswv, kev vam khom rau Vajtswv, thiab kev vam khom rau txoj kev coj qhia ntawm Vajtswv cov lus, ces kuv thiaj li muaj peev xwm mus dhau lub sij hawm nyuaj ntawd tau.

Tom qab tau ntsib tau pom tag nrho qhov no lawm, kuv pom meej meej tias tus zaj loj liab ploog yog Ntxwgnyoog ntag, tus dab phem uas ntxub Vajtswv thiab ua rau tib neeg puas tsuaj thiab qias vuab tsuab. Tsuas yog Vajtswv nkaus xwb thiaj li yog txoj kev hlub, thiab tsuas yog Nws nkaus xwb thiaj li cawm tau tib neeg dim. Thaum kuv raug tsim txom, nws yog Vajtswv txoj lus uas coj kuv kev, ua rau kuv muaj kev ruaj siab thiab lub zog, thiab pab kuv kov yeej tus niag dab phem txoj kev phem lim hiam. Nws yog qhov xwm txheej txom nyem zoo li no uas ua rau kuv tus kheej uas tseem hluas, tsis paub qab hau thiab tseem mos no rais los muaj lub zog nchav, paub qab hau thiab ruaj khov, thiab kuv kawm paub los vam khom rau Vajtswv thiab hwm Nws thaum kuv muaj teeb meem. Qhov ntawd kuj ua rau kuv pom Vajtswv lub hwj huaj loj kawg nkaus thiab lub hwj chim kav, thiab tias Vajtswv ib txwm nyob tod rau kuv tas li, nyob ntawm kuv ib sab los saib xyuas thiab tiv thaiv kuv, thiab npaj txhij los txhawb thiab pab kuv txhua lub sij hawm. Txawm tias txoj kev tsim txom thiab kev ceeb laj txom nyem uas kuv yuav ntsib rau yav tom ntej ntawd yuav loj npaum li cas los xij, kuv txiav txim siab tuag nthi los caum Vajtswv qab!