19. Thaum Pom Tias Kuv Dhuav Qhov Tseeb Lawm
Muaj ib hnub, kuv pom tias ib tug los tshiab uas nyuam qhuav los koom pawg ntseeg xwb twb tsis tuaj sib txoos ua ke tau ob zaug lawm, yog li ntawd kuv thiaj li nug tus thawj coj pab pawg tias vim li cas thiaj zoo li no, tiam sis tus thawj coj pab pawg ntawd tsis teb li. Tom qab ntawd, kuv pom hais tias tus los tshiab ntawd rov qab pib tuaj koom tej kev sib txoos ua ke dua lawm thiab, yog li ntawd kuv thiaj li tsis nug tus thawj coj pab pawg ntawd tias vim li cas li lawm. Kuv xav hais tias, “Tsuav yog tus los tshiab ntawd tuaj koom tej kev sib txoos ua ke tas li xwb ces yeej tau lawm. Kiag tam sim no mas kuv khwv heev rau kuv tes dej num, thiab qhov tshawb xyuas kom ntxaws ntxaws ntawd mas yuav siv sij hawm thiab dag zog ntau heev li. Kuv mam li nug txog qhov ntawd dua rau thaum kuv muaj sij hawm.” Vim li ntawd, kuv thiaj li hnov qab txog qhov ntawd lawm. Tom qab ntawd, nyob rau lwm qhov kev sib txoos ua ke, kuv pom tias tus los tshiab no tawm mus thaum txog nrab xwb. Kuv thiaj li nug tus thawj coj pab pawg tias vim li cas, tiam sis nws tseem tsis teb kuv li thiab, thiab kuv yeej tsis nug kom kawg txog qhov teeb meem ntawd li. Kuv los kuj tsis mus nug tus los tshiab ntawd seb nws puas muaj ib qho teeb meem los sis tej kev nyuaj li thiab. Tau ib ntus tom qab ntawd lawm, kuv rov qab pom dua tias tus los tshiab no tsis tau tuaj koom tej kev sib txoos ua ke ntau zaus sib law liag lawm. Thaum no yog thaum kuv pib txhawj lawm. Kuv thiaj li hu ceev ceev mus rau tus los tshiab ntawd, tiam sis nws tsis teb li. Kuv txhawj tsam tus los tshiab ntawd tawm hauv pawg ntseeg mus lawm, yog li ntawd kuv thiaj li hu rau tus thawj coj pab pawg seb nws hu puas tau tus los tshiab ntawd, tiam sis tus thawj coj pab pawg ntawd hais rau kuv tias, “Tus los tshiab no yeej tsis txais qhov kuv thov ua phooj ywg li, yog li ntawd kuv thiaj li hu tsis tau.” Ces kuv txawm me ntsi tu siab rau qhov no. Yog kuv tshawb xyuas qhov no kom ntxov zog, ces ntshe kuv twb xav tau tej hau kev los daws qhov no lawm, tiam sis tam sim no lig dhau lawm. Txhua yam no puav leej yog tim kuv xwb vim tsis taug qab. Kuv thiaj li nyeem cov ntawv sau sib tham hauv xov tooj nrog tus los tshiab ntawd, cia siab tias yuav paub ntau ntxiv txog nws qhov xwm txheej. Kuv thiaj li paub hais tias tom qab hais ob peb lo lus nyob zoo rau nws lawm, ces kuv yeej tsis tham txog lwm yam rau nws li lawm. Kuv tsis paub dab tsi txog nws li. Kuv paub tias qhov cia siab tias yuav tau tus los tshiab no rov qab los mas tsawg zuj zus lawm. Qhov uas vim li cas txhua yam no thiaj li tau tshwm sim mas yog vim kuv tsuas lam ua kom dhaus xwb. Tiam sis nyob rau lub sij hawm ntawd, kuv tsis mob siab xav txog kuv tus kheej li. Kuv tsuas xav txog qhov ntawd tsuag tsuag xwb, lees tias kuv tsis tshua quav ntsej, ces txawm mus lawm.
Tsis ntev xwb tus thawj saib xyuas ntawd txawm siv nug kuv txog tus los tshiab no, thiab nug txog qhov tias vim li cas nws thiaj li tau tawm ntawm pawg ntseeg mus lawm. Qhov ntawd ua rau kuv ntshai heev. Kuv thiaj li xav hais tias, “Aub yau, kuv tab tom yuav raug muab nthuav tawm lau. Thaum tus thawj saib xyuas paub tias muaj dab tsi tshwm sim tiag tiag lawm, ces nws yeej yuav hais tias kuv tsuas lam ua kuv tes dej num kom dhau xwb thiab tso siab tsis taulawm. Kuv yuav ua li cas yog kuv raug muab rho tawm lawm?” Yeej paub tseeb lawm hais tias, tus thawj saib xyuas ntawd yuav muab kuv qhov teeb meem qhia tawm tom qab paub txog qhov xwm txheej ntawd lawm, hais tias kuv tsuas lam ua kom dhau xwb thiab tias kuv tsis quav ntsej los sis tsis ua txhua yam kom paub txog tus los tshiab ntawd tus yam ntxwv. Thaum kuv hnov li no lawm, kuv ceev nrooj sim los kho kuv tus kheej hais tias, “Tus los tshiab ntawd twb tsis teb kuv cov ntawv hais nyob zoo li, yog li ntawd kuv thiaj li tham tsis tau mus txuas ntxiv lawm.” Tus thawj saib xyuas ntawd qhuab ntuas kuv, hais tias, “Nws tsis yog qhov koj tham tsis tau mus txuas ntxiv lawm, nws yog qhov koj tsis quav ntsej txog tus los tshiab ntawd kiag li.” Kuv txhawj tsam yog kuv lees tias tsuas lam ua kom dhau xwb, ces kuv yuav tau ris lub nra ntawd, yog li ntawd kuv thiaj li maj nroos piav qhia hais tias, “Feem ntau tus thawj coj pab pawg ntawd yog tus thaj tsob tus los tshiab ntawd. Kuv xav tias nws muaj kev sib tham nrog tus lo tshiab ntawd lawm, yog li ntawd kuv thiaj li tsis nug txog tus los tshiab ntawd qhov xwm txheej kom ncav sij hawm. Kuv nug tus thawj coj pab pawg, tiam sis nws tsis teb kom ncav sij hawm.” Kuv muab cov ntawv uas kuv sau hauv xov tooj mus rau tus thawj coj pab pawg ntawd rau tus thawj saib xyuas saib los ua pov thawj qhia tias kuv yeej mob siab txog tus los tshiab ntawd tiag tiag. Tom qab ntawd kuv kuj muab cov ntawv uas kuv sau hauv xov tooj mus rau tus los tshiab ntawd rau tus thawj saib xyuas saib kom ua tau pov thawj qhia tias tom qab kuv pom tias nws tsis tuaj koom tej kev sib txoos ua ke tas li lawm, kuv tau ua txhua yam los sau ntawv rau nws kom ncav sij hawm, tiam sis nws tsis teb kuv xwb. Kuv haj tseem nrhiav ib qho laj thawj los hais tias kuv hu xov tooj rau tus los tshiab ntawd tsis tau li thiab vim tus tshaj tawm txoj moo zoo ntawd tsis muab tus los tshiab ntawd tus xov tooj rau kuv. Kuv hais ntau yam heev li, muab liam rau lwm tus tas li, cia siab hais tias tus thawj saib xyuas ntawd yuav xav tias muaj laj thawj rau qhov teeb meem ntawd, tias qhov ntawd tsis yog tim kuv, los sis yam tsawg kawg kom muaj lwm tus raug liam thiab, es tsis txhob yog kuv ib leeg xwb. Thaum pom hais tias kuv tsis lees kuv tej teeb meem thiab hle lub luag hauj lwm lawm, ces tus thawj saib xyuas thiaj li qhuab ntuas kuv hais tias, “Tus los tshiab no twb tuaj koom ntau qhov kev sib txoos ua ke lawm, uas qhia tau tseeb tseeb hais tias nws nyiam qhov tseeb, tiam sis koj tsis nug txog nws yam ntxwv thiab tej kev nyuaj kom ncav sij hawm, thiab tam sim no koj hle lub luag hauj lwm hais tias koj hu tsis tau nws vim koj tsis muaj nws tus xov tooj. Qhov no mas tsis muaj qab hau hlo li!” Kuv mam li paub tias tus thawj saib xyuas ntawd pom kuv tej teeb meem tseeb tseeb lawm thiab kuv yuav zam tsis dhau qhov ris lub nra ntawd. Kuv txhawj, thiab xav tias, “Tus thawj saib xyuas ntawd yuav xav li cas rau kuv? Nws puas yuav hais tias kuv tsis ua ib teg hauj lwm kom muaj qab hau li? Kuv puas yuav raug rho tawm?” Kuv ntxhov siab heev, thiab kuv tus kheej nyob tsis tswm li. Tom qab ntawd, kuv rov qab mus xyuas txhua yam uas ua rau muaj qhov no nyob hauv kuv lub siab, ces kuv mam li paub tias kuv tsis yog ib tug neeg coj ncaj rau qhov teeb meem no los sis lees txais qhov kev qhuab qhia thiab qhov kev qhuab ntuas no li. Kuv yeej tsis tau ua kuv tes dej num kom zoo tiag tiag, kuv tsuas lam ua kom dhau xwb, thiab txawm li ntawd los kuv tseem siv tej tswv yim dag thiab hais ub hais no los daws kuv tus kheej thiab. Kuv haj tseem liam tus tshaj tawm txoj moo zoo ntawd tias vim tsis muab tus xov tooj rau kuv thiab. Kuv tsis kam lees qhov tseeb tias kuv tsuas lam ua kuv tes dej num kom dhau xwb, thiab kuv tsis tig xav txog kuv tus kheej li. Thaum xav txog kuv tus cwj pwm mas ua rau kuv meem txom heev. Txawm kuv noj thiab haus Vajtswv txoj lus txhua hnub los xij, thaum muaj ib qho xwm txheej tiag tiag los raug rau kuv, thiab thaum kuv raug qhuab qhia thiab raug qhuab ntuas lawm, kuv tseem ua neej raws li kuv tus moj yam qias vuab tsuab thiab tsis lees txais qhov tseeb li thiab. Kuv mloog zoo li kuv txoj kev qias vuab tsuab mas tob heev, thiab kuv txiav txim siab tias qhov kuv yuav hloov ntawd mas nyuaj, yog li ntawd kuv thiaj li me ntsis xav phem.
Tom qab ntawd, kuv nyeem ib zaj lus ntawm Vajtswv cov lus. “Kev caum raws qhov tseeb ntawd mas yog yus yeem yus xwb. Yog koj nyiam qhov tseeb, ces Vajntsujplig yuav ua hauj lwm rau koj. Thaum koj nyiam qhov tseeb; thaum koj thov Vajtswv thiab vam khom rau Vajtswv, xav txog koj tus kheej thiab ua txhua yam kom paub koj tus kheej txawm koj yuav raug txoj kev tsim txom los sis kev ceeb laj txom nyem dab tsi los xij; thaum koj rau siab ntso nrhiav qhov tseeb los daws tej teeb meem uas koj pom nyob rau hauv koj tus kheej lawm, ces koj thiaj li yuav muaj peev xwm ua koj tes dej num kom zoo txaus. Ua li no, koj thiaj li yuav muaj peev xwm tuav koj tej lus tim khawv khov kho. Thaum tib neeg nyiam qhov tseeb lawm, txhua yam kev qhia kom pom tseeb no cia li los rau lawv xwb. Tej kev qhia kom pom tseeb no cia li tshwm tuaj yam zoo siab heev, thiab tsis muaj kev quab yuam, tsis muaj ib yam dab tsi txuam li. Yog tib neeg raws tau Vajtswv qab li no, ces thaum kawg lawv yuav tau txais qhov tseeb thiab txoj sia, lawv yuav to taub qhov muaj tiag ntawm qhov tseeb, thiab lawv yuav ua neej raws li tib neeg tus yam ntxwv. … Txawm koj qhov laj thawj rau txoj kev ntseeg Vajtswv yuav yog dab tsi los xij li, thaum kawg Vajtswv mam li txiav txim siab seb koj qhov xaus puas mus raws li qhov seb koj puas tau txais qhov tseeb xwb. Yog koj tsis tau txais qhov tseeb li, ces tej kev daws los sis tej kev hais ub hais no uas koj hais ntawd yuav tsis muaj qab hau li. Sim cam raws li qhov koj nyiam, tso koj tus kheej rau qhov uas koj txaus siab—Vajtswv puas yuav quav ntsej txog? Vajtswv puas yuav tham nrog koj? Nws puas nrog koj sib cav thiab tuav tswv yim? Nws puas yuav sab laj rau koj? Lo lus teb yog dab tsi? Nws yeej yuav tsis ua tej ntawd kiag li. Txawm koj qhov laj thawj yuav khov npaum li cas los xij li, nws yeej siv tsis tau. Koj yuav tsum tsis txhob nkag siab Vajtswv tej kev npaj siab yuam kev, es xav tias yog koj muaj txhua hom laj thawj thiab kev hais ub hais no es koj thiaj li tsis caum qhov tseeb. Vajtswv xav kom koj muaj peev xwm los nrhiav qhov tseeb rau txhua qhov chaw thiab txhua qhov xwm txheej uas raug rau koj, es kom thaum kawg thiaj li to taub qhov muaj tiag ntawm qhov tseeb thiab tau txais qhov tseeb. Txawm Vajtswv tau npaj tej xwm txheej dab tsi rau koj, koj yuav ntsib cov tib neeg thiab tej xwm txheej twg, thiab koj tus kheej nyob rau thawj chaw twg los xij li, koj yuav tsum thov Vajtswv thiab nrhiav qhov tseeb mas thiaj li tiv taus tej ntawd. Tej no yog kiag tej kev qhuab qhia uas koj yuav tsum kawm kom paub caum rqhov tseeb. Yog koj pheej nrhiav kev hais ub hais no kom dim, kom zam dhau, tsis kam lees, los sis tawm tsam tej xwm txheej no tas li xwb, ces Vajtswv yuav muab koj tso tseg. Tsis muaj qab hau dab tsi los cam, los sis tawv ncauj los sis ua kom nyuaj—yog Vajtswv Tus Kheej tsis txhawj txog koj, ces koj yuav plam lub hwv tsam tau txais kev cawm dim” (Txoj Lus, Phau 6. Hais Txog Qhov Kev Caum Qhov Tseeb. Qhov Nrhiav Qhov Tseeb Yog Dab Tsi (1)). Kuv pom nyob hauv Vajtswv txoj lus tias qhov los daws ib tug moj yam qias vuab tsuab thiab to taub txog qhov muaj tiag ntawm qhov tseeb ntawd mas tsis nyuaj li. Qhov tseem ceeb ces yog qhov tib neeg xaiv thiab seb lawv puas nrhiav thiab xyaum ua raws li qhov tseeb xwb. Txawm yuav yog qhov xwm txheej dab tsi los xij, txawm yuav yog raug qhuab qhia thiab qhuab ntuas, los sis ua tsis tiav thiab ua tsis tau los xij, tib neeg yuav tsum muaj peev xwm los xav kom paub lawv tus kheej thiab rau siab ntso nrhiav qhov tseeb. Thaum koj to taub me ntsis lawm, ces muab qhov ntawd coj los xyaum ua raws, thiab ua raws li tej hauv paus ntsiab lus ntawm qhov tseeb ntag. Ua li no es koj thiaj li yuav pom txoj kev loj hlob thiab kev hloov. Txawm li cas los xij, thaum koj raug qhuab qhia thiab raug qhuab ntuas, yog koj pheej zam kom dhau, tsis lees, thiab hle ub hle no xwb, ces yuav tsis yog koj tsis tau txais qhov tseeb xwb, Vajtswv kuj yuav ntxub thiab tsis kam txais yuav koj thiab. Rov qab saib kuv tus kheej dua, thaum kuv raug qhuab qhia thiab raug qhuab ntuas ntawd, kuv tsis lees txais, tsis mloog lus, tsis lees kiag qhov ntawd, tsis xav txog kuv qhov teeb meem, los sis rau siab ntso nrhiav qhov tseeb los daws kuv tus moj yam qias vuab tsuab li. Tiam sis, kuv ho txwv kuv tus kheej, xav phem, thiab tawm tsam qhov ntawd. Tsis yog kuv ua tsis muaj qab hau li lod? Qhov no tsis yog tus cwj pwm uas lees txais qhov tseeb! Thaum kuv paub li no, kuv tsis xav muaj tus yam ntxwv xav phem thiab txwv kuv tus kheej li lawm. Kuv xav nrhiav qhov tseeb los daws kuv tej teeb meem lawm xwb. Ces kuv txawm pib xav thiab xav paub tias vim li cas feem ntau kuv hais lus ntxim siab heev, tiam sis thaum kuv raug qhuab qhia thiab raug qhuab ntuas, kuv tsis lees txais qhov ntawd li, thiab muaj kev xav phem thiab tawm tsam. Kuv nthuav tawm txog tus moj yam dab tsi?
Thaum kuv nrhiav, kuv txawm nyeem ob zaj lus ntawm Vajtswv txoj lus. “Ib txhia tib neeg mas muaj peev xwm lees hais tias lawv yog cov dab phem, Ntxwgnyoog, thiab yog cov xeeb leej xeeb ntxwv ntawm tus zaj loj liab ploog, thiab lawv hais lus zoo zoo txog lawv txoj kev paub lawv tus kheej. Tab sis thaum ib tug moj yam qias vuab tsuab tawm thiab lwm tus muab lawv qhia tshwm, qhuab ntuas lawv, thiab qhuab qhia lawv, mas lawv yuav ua txhua yam kom kawg lawv lub zog los kho lawv tus kheej es kom lawv thiaj li yuav tsis kam lees txais qhov tseeb kiag li. Qhov teeb meem nyob rau ntawm no yog dab tsi? Nyob rau qhov no, cov tib neeg no raug muab qhia tshwm du lug. Lawv hais lus tau zoo heev thaum lawv tham txog qhov paub lawv tus kheej, yog li vim li cas es thaum lawv raug qhuab qhia thiab raug qhuab ntuas ntawd, lawv lees txais qhov tseeb tsis tau li? Nws muaj ib qho teeb meem nyob rau ntawm no. Qhov no tsis yog yam uas tsis tshua tshwm sim lod? Nws puas yog yam uas paub tau yooj yim? Qhov tseeb tiag, nws yeej yog mas. Muaj ob peb tug tib neeg yeej lees tias lawv yog cov dab phem thiab yog cov Ntxwgnyoog thaum lawv hais txog txoj kev paub lawv tus kheej, tab sis tsis kam lees txim hloov dua siab tshiab los sis tsis hloov tom qab ntawd xwb. Yog li, qhov kev tham txog txoj kev paub lawv tus kheej uas lawv hais txog ntawd tseeb los sis cuav? Lawv puas muaj txoj kev paub uas ua siab dawb paug txog lawv tus kheej, los sis tsuas yog ib txoj kev ntxias dag lwm tus xwb? Lo lus teb ces yog kev ntseeg yus tus kheej xwb. Yog li ntawd, yuav kom pom tau tias seb ib tug neeg twg puas muaj txoj kev paub tus kheej ntawd, ces koj yuav tsum txhob tsuas lam mloog lawv tham txog txoj kev paub ntawd xwb—koj yuav tsum saib rau tus cwj pwm uas lawv coj rau qhov raug qhuab qhia thiab raug qhuab ntuas, thiab seb lawv puas tuaj yeem lees txais qhov tseeb. Qhov ntawd yog qhov tseem ceeb tshaj plaws. Leej twgtsis kam lees qhov raug qhuab ntuas thiab raug qhuab qhia ces yog muaj ib lub ntsiab tseeb ntawm qhov tsis kam lees txais qhov tseeb, ntawm qhov tsis kam lees txais qhov tseeb ntawd, thiab lawv tus moj yam mas dhuav qhov tseeb lawm. Qhov ntawd mas ntseeg tsis tau li lawm. Ib txhia tib neeg mas tsis cia lwm tus qhuab ntuas lawv, txawm lawv tau nthuav qhov lawv qias vuab tsuab tawm ntau npaum li cas lawm los xij—tsis muaj leej twg yuav qhuab qhia thiab qhuab ntuas tau lawv li. Lawv tham tau txog qhov kev paub lawv tus kheej, raws li lawv siab nyiam, tab sis yog ib tug twg muab lawv qhia tshwm, thuam lawv, los sis qhuab ntuas lawv, ces txawm yuav yog tawm tsam npaum li cas npaum li cas los xij los sis raws li qhov muaj tseeb los xij li, lawv yeej yuav tsis kam lees txais li. Txawm lwm tus yuav muab lawv tus moj yam qias vuab tsuab nthuav tawm rau kis twg los xij, lawv yog cov tawm tsam heev tshaj thiab yeej yuav muab cov laj thawj uas tshwj xeeb los tsim kho lawv tus kheej xwb, yeej tsis muaj kev zwm tseeb ib qho me me kiag li. Yog cov tib neeg zoo li ntawd tsis caum raws qhov tseeb li, ces yeej yuav ntsib teeb meem” (Txoj Lus, Phau 6. Hais Txog Qhov Kev Caum Qhov Tseeb. Qhov Nrhiav Qhov Tseeb Yog Dab Tsi (1)). “Tej qhov uas qhia tshwm meej txog kev dhuav qhov tseeb mas tsis yog kev ntxub qhov tseeb thaum yus hnov qhov ntawd xwb; tej ntawd kuj suav nrog rau qhov kev tsis txaus siab xyaum ua raws li qhov tseeb thiab. Thaum txog sij hawm los muab qhov tseeb coj los xyaum ua raws lawm, ib tug neeg zoo li ntawd yuav thau, thiab qhov tseeb tsis muaj feem xyuam dab tsi rau tej ntawd li. Thaum ib txhia tib neeg sib qhia rau thaum tuaj sib txoos ua ke, zoo li lawv mob siab kawg, lawv nyiam rov qab hais cov lus qhuab qhia qub dua thiab hais tej lus muaj meej mom siab los ntxias dag lwm tus kom kov yeej lawv; ua kom saib mas lawv zoo, xav zoo, thiab lawv mus tau ntxiv yam tsis paub kawg li. Thiab tom qab ntawd tseem muaj cov uas khwv tas hnub rau tej xwm txheej ntawm txoj kev ntseeg xws li: nyeem Vajtswv cov lus, thov Vajtswv, mloog cov nkauj qhuas Vajtswv, sau ntawv, cuag nkaus li lawv mas niam ncaim Vajtswv mus tsis tau ib pliag li. Suav txij thaum sawv ntxov mus ti nkaus rau thaum tsaus ntuj, lawv mas ua lawv tej dej num khwv kawg nkaus li. Yog li ces cov tib neeg no puas nyiam qhov tseeb tiag tiag mas? Lawv puas muaj tus moj yam dhuav qhov tseeb? Thaum twg yus thiaj li yuav pom yus tus yam ntxwv tiag? (Thaum txog lub sij hawm los xyaum ua raws li qhov tseeb, lawv thau tawm, thiab thaum lawv raug qhuab ntuas thiab raug qhuab qhia, ces lawv tsis kam lees txais tej ntawd.) Qhov no puas yog tej zaum vim lawv tsis to taub yam uas lawv hnov los sis vim lawv tsis to taub qhov tseeb es thiaj li tsis txaus siab los lees txais qhov tseeb? Lawv raug tswj los ntawm lawv tus yeeb yam, thiab qhov teeb meem yog ntsig txog tus moj yam. Nyob rau hauv lawv lub siab, lawv paub zoo tias Vajtswv cov lus mas muaj tseeb thiab yog qhov zoo, tias kev xyaum ua raws li qhov tseeb thiaj li ua rau muaj kev hloov pauv rau hauv yus tus moj yam thiab ua rau ib tug neeg ua tau raws li Vajtswv txoj kev xav, tab sis lawv yeej tsis kam lees tej ntawd los sis tsis xyaum ua raws li tej ntawd li. Ntawd yog yam uas dhuav qhov tseeb lawm” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Tsuas Yog Paub Rau Hom Moj Yam Qias Vuab Tsuab Mas Thiaj Li Paub Yus Tus Kheej Tiag Xwb). Vim Vajtswv txoj lus, kuv thiaj li pom tias tib neeg mas muaj ib tug moj yam uas dhuav qhov tseeb, txawm qhov twg los, lawv yeej muaj ib txoj kev tsis kam txais yuav qhov tseeb, ib txoj kev tsis kam kom raug qhuab qhia los sis raug qhuab ntuas, thiab ib txoj kev tsis kam xyaum ua raws li qhov tseeb li. Kuv tig xav txog kuv tus kheej ces mam li paub hais tias txawm kuv noj thiab haus Vajtswv cov lus thiab ua kuv tes dej num txhua hnub, thiab thaum tuaj sib txoos ua ke, kuv tuaj yeem lees tias kuv muaj tus moj yam qias vuab tsuab raws li Vajtswv cov lus los xij, kuv yeej tseem yog Ntxwgnyoog tug, yog tus zaj loj liab ploog ntawd ib tug me nyuam, thiab lwm yam. Nyob sab nraud mas, zoo li kuv lees txais qhov tseeb, tiam sis thaum kuv raug qhuab qhia thiab raug qhuab ntuas vim qhov lam ua kuv tes dej num kom dhau xwb, mas kuv ua txhua yam los daws kuv tus kheej, muab liam rau lwm tus, thiab tsis lees kuv tus kheej txoj kev qias vuab tsuab li. Kuv paub hais tias kuv tsis yog ib tug neeg uas lees txais qhov tseeb los sis xyaum ua raws li qhov tseeb kiag li, thiab tias kuv nthuav tus moj yam phem uas dhuav qhov tseeb tawm nyob rau hauv txhua yam lawm. Kuv paub tias yog ib tug saib xyuas lawm mas, qhov kev cheem tsum uas tsawg kawg ntawd yuav tsum yog muaj kev thaj tsob thiab kev ua siab ntev. Cov los tshiab tseem tsis tau nrhau cag rau hauv txoj kev tseeb, thiab lawv zoo li cov me nyuam mos liab xwb, thiab lawv siab muag heev nyob rau hauv lub neej txoj sia. Yog lawv tsis tuaj koom tej kev sib txoos ua ke, ces peb yuav tsum tau tshawb xyuas lawv tus yam ntxwv, thiab nrhiav ib txoj hau kev los saib xyuas thiab txhawb lawv kom sai. Kuv to taub tej hauv paus ntsiab lus no lawm ntag, tiam sis thaum txog lub sij hawm los xyaum ua, raug kev txom nyem, thiab them nqi lawm, ces kuv tsis xav ua qhov ntawd lawm. Kuv yeej paub qhov tseeb zoo zoo tiam sis tsis xyaum ua raws li qhov tseeb ntawd xwb. Tsuas yog ob peb zaug uas kuv hais nyob zoo rau tus los tshiab no xwb, kuv thiaj li tsis saib xyuas los sis txhawb li. Thaum kuv paub tias nws tsis tuaj koom tej kev sib txoos ua ke tas li lawm, kuv tsis ntxhov siab, tsis xav txog tias yuav ua cas kuv thiaj li hu tau nws kom sai, los sis ua kom to taub txog nws tej teeb meem thiab tej kev nyuaj li. Kuv tsis quav ntsej thiab tsis thaj tsob li, ces thiaj li ua rau nws tawm ntawm pawg ntseeg mus lawm. Tab txawm tom qab ntawd los, kuv tsis tig xav txog kuv tus kheej li thiab. Thaum tus thawj saib xyuas muab kuv tej teeb meem nthuav tawm, kuv siv txhua txoj hau kev los daws kuv txoj kev uas lam ua kom dhau xwb, cia siab tias yuav pov tau lub nra ntawd rau tus thawj coj pab pawg thiab tus tshaj tawm txoj moo zoo ntawd. Qhov no yog tus cwj pwm uas lees txais thiab ua raws li qhov tseeb tau li cas? Txhua yam uas kuv nthuav tawm no yog ib tug moj yam uas dhuav qhov tseeb ntag!
Kuv txawm nrhiav qhov tseeb txuas ntxiv mus thiab nyeem lwm zaj lus ntawm Vajtswv txoj lus: “Tsis hais txog tej xwm txheej uas ua rau ib tug neeg twg raug qhuab ntuas los sis raug qhuab qhia li, qhov muaj tus cwj pwm uas tseem ceeb tshaj plaws rau tej xwm txheej ntawd yog dab tsi? Ua ntej tshaj, koj yuav tsum lees txais qhov ntawd tso, txawm leej twg qhuab ntuas koj rau qhov laj thawj twg los xij, txawm tias yuav hais lo lus sib lus hnyav, los sis lub suab thiab lo lus mos lus muag li cas los xij, koj yuav tsum lees txais qhov ntawd. Ces, koj thiaj li yuav paub yam uas koj tau ua txhaum lawm, dab tsi yog tus moj yam qias vuab tsuab uas koj tau qhia tshwm lawm, thiab seb koj ua puas haum raws los sis tsis haum raws li cov hauv paus ntsiab lus ntawm qhov tseeb. Thaum koj raug qhuab qhia thiab raug qhuab ntuas, yam xub thawj thiab tseem ceeb tshaj plaws, koj yuav tsum muaj tus cwj pwm li no. Thiab cov tawm tsam Khetos puas muaj tus cwj pwm zoo li ntawd? Lawv tsis muaj; txij thaum pib mus txog thaum tiav, tus cwj pwm uas lawv qhia tshwm ntawd yog ib yam ntawm kev tawm tsam thiab kev dhuav. Muaj tus cwj pwm zoo li ntawd, lawv puas muaj peev xwm los rau ntawm Vajtswv xub ntiag ntsiag to thiab lees txais kev qhuab qhia thiab qhuab ntaus? Tsis muaj li ntawd li. Yog li ces, lawv yuav ua dab tsi? Ua ntej tshaj plaws, lawv yuav cav heev hlo thiab nrhiav kev kho, tiv thaiv thiab cav rau yam uas lawv tau ua txhaum lawm thiab tus moj yam qias vuab tsuab uas lawv tau nnthuav tawm lawm, cia siab tias yuav kov yeej tib neeg txoj kev to taub thiab kev zam lub txim, kom lawv thiaj li tsis tau thaj tsob los sis lees txais cov lus qhuab ntuas lawv thiab qhuab qhia lawv. Thaum raug qhuab ntuas thiab qhuab qhia lawv yuav qhia tawm tus cwj pwm dab tsi? ‘Kuv tsis tau ua txhaum. Kuv tsis tau ua ib yam dab tsi tsis yog li. Yog koj ua yuam kev, ces yeej muaj laj thawj rau qhov ua yuam kev ntawd; yog kuv ua yuam kev, uas kuv tsis tau lom txwm ua, ces kuv yuav tsis tau thaj tsob qhov ntawd li. Leej twg thiaj li tsis tau ua yuam kev li?’ Lawv tuav rawv tej lus thiab koog lus no, tuav rawv tej ntawd nruj heev thiab tsis tso tej ntawd tseg li, tab sis lawv tsis nrhiav qhov tseeb, thiab lawv tsis lees paub qhov lawv tau ua yuam kev lawm los sis tus moj yam qias vuab tsuab uas lawv tau nthuav tawm lawm—thiab lawv yuav tsis lees qhov lawv txhob txwm ua thiab lub hom phiaj ua phem. … Txawm tias qhov tseeb ntawm lawv tus moj yam qias vuab tsuab yuav ua rau muaj kev tsis zoo tshwm sim los rau qhov kaj los xij, lawv tsis lees paub los sis tsis kam lees txais qhov ntawd li, tab sis tseem tawv thiab tawm tsam. Lwm tus yuav hais dab tsi los xij, lawv tsis kam lees txais qhov ntawd los sis tsis lees paub qhov ntawd li, tab sis xav tias, ‘Los saib seb leej twg yuav kov yeej leej twg; los saib seb leej twg lub qhov ncauj hais tau ceev dua.’ Qhov no yog ib hom cwj pwm uas cov tawm tsam Khetos xav rau qhov raug qhuab ntuas thiab raug qhuab qhia ntag” (Txoj Lus, Phau 4. Kev Nthuav Tawm Cov Tawm Tsam Khetos. Yam Cuaj: (Ntu Yim)). Vim qhov Vajtswv txoj lus nthuav tawm ntawd, kuv thiaj li pom tias thaum cov tib neeg dog dig raug qhuab qhia thiab raug qhuab ntuas lawm, lawv thiaj li tuaj yeem lees txais qhov ntawd los ntawm Vajtswv los, lees txais thiab mloog lus, tig xav txog lawv tus kheej, thiab lees txim hloov dua siab tshiab thiab hloov tiag tiag. Tab txawm yog lawv lees txais tsis tau qhov ntawd rau tam sim ntawd los xij, tom qab ntawd, los ntawm qhov nrhiav thiab xav tas li, ces lawv yuav kawm paub cov lus qhia los ntawm qhov raug qhuab qhia thiab raug qhuab ntuas. Tiam sis tus tawm tsam Khetos tus yeeb yam mas yeej dhuav thiab tsis nyiam qhov tseeb kiag li. Thaum lawv raug qhuab qhia thiab raug qhuab ntuas mas, lawv yeej tsis tig xav txog lawv tus kheej li. Lawv tsuas muaj tus cwj pwm uas tawm tsam, tsis kam txais yuav, thiab ntxub ntxaug xwb. Thaum tig xav txog kuv tus kheej, kuv yeej lam ua kom dhau thiab tsis txhawb tus los tshiab ntawd kom ncav sij hawm tiag tiag, ces thiaj li ua rau nws tawm ntawm pawg ntseeg mus lawm. Qhov no twb yog ib txoj kev ua txhaum lawm. Txhua tus uas txawj xav los sis paub tab yuav nyuaj siab thiab paub tias ua txhaum, thiab tig xav txog lawv tej teeb meem, thiab tsis hais ib yam dab tsi ntxiv txog qhov teeb meem ntawd li lawm. Tiam sis tsis yog kuv tsis hnov tias tshuav nuj nqis xwb, kuv kuj tsis lees kuv tus kheej tej teeb meem li thiab. Kuv ntsib ib qho uas muaj tseeb npaum li no los kuv yeej tseem ua txhua yam los hle lub nra ntawd thiab, hais tias thaum xub thawj tus los tshiab ntawd tsis teb kuv, thiab tom qab ntawd hais tias tus thawj coj pab pawg tsis thaj tsob, thiab thaum kawg, ces kuv liam rau tus tshaj tawm txoj moo zoo ntawd, cia siab tias yuav tshem tau kuv tus kheej tawm ntawm lub nra ntawd thiab tias tus thawj saib xyuas ntawd yuav to taub. Twb raug qhov uas Vajtswv muab nthuav tawm thiab raug qhuab qhia thiab raug qhuab ntuas lawm los, kuv yeej tsis tig xav txog kuv tus kheej kiag li. Tiam sis, kuv tawv nyom, tawm tsam thiab hais li ub li no los daws thiab tiv thaiv kuv tus kheej xwb, vim kuv tsis xav ris lub nra ntawd. Kuv muaj kev ua neej los sis muaj qab hau rau txoj kev twg? Kuv pom tias qhov kuv nthuav tawm ntawd ces yog tej moj yam uas tawv ncauj thiab kev dhuav qhov tseeb xwb. Kuv tsis muaj kev hwm Vajtswv li. Kuv pom tias tom qab ntseeg Vajtswv los tau ntau lub xyoo lawm, los kuv tus moj yam yeej tsis hloov hlo li, mas ua rau kuv nyuaj siab heev.
Tom qab ntawd, kuv txawm nyeem ib zaj lus ntawm Vajtswv cov lus uas ua rau kuv paub txog kuv qhov teeb meem uas tsis lees txais qhov raug qhuab ntuas thiab raug qhuab qhia ntxiv. Vajtswv Tus Uas Muaj Hwj Chim Loj Kawg Nkaus hais tias: “Cov tawm tsam Khetos tus cwj pwm phem rau kev qhuab ntuas thiab kev qhuab qhia mas yog tsis kam lees txais yuav los sis tsis lees paub qhov ntawd hlo li. Txawm hais tias lawv ua phem npaum li cas los sis ua liam sim npaum li cas rau tes hauj lwm ntawm Vajtswv lub tsev thiab kev to taub lub neej txoj sia ntawm cov neeg Vajtswv xaiv lawm los xij, lawv yeej tsis hnov tu siab ib qho me me los sis tias lawv tshuav ib qho nqi dab tsi li. Los ntawm qhov kev xam pom no ne, cov neeg tawm tsam Khetos puas muaj kev ua neej? Yeej tsis muaj hlo li. Lawv ua txhua hom kev piam sij rau cov neeg Vajtswv xaiv thiab ua rau pawg ntseeg tes hauj lwm liam sim—cov neeg Vajtswv xaiv pom tau qhov no meej meej li yav nruab hnub, thiab lawv pom tau tej kev ua phem ntawm cov tawm tsam Khetos. Thiab tiam sis cov tawm tsam Khetos tsis lees txais yuav los sis tsis lees paub qhov tseeb no li; lawv tawv ncauj tsis kam lees tias lawv ua yuam kev lawm los sis tias lawv yog tus thaj tsob qhov no. Qhov no tsis yog ib qho qhia tias lawv dhuav qhov tseeb lawm lod? Qhov zoo li ntawd yog lub ntsiab ntawm cov tawm tsam Khetos uas dhuav qhov tseeb lawm. Txawm tias lawv ua lim hiam loj npaum li cas los xij, lawv tsis kam lees txais qhov ntawd li, thiab lawv tseem tsis lees mus txog thaum kawg. Qhov no ua pov thawj qhia tias cov tawm tsam Khetos ntawd yeej tsis mob siab ua tes hauj lwm ntawm Vajtswv lub tsev los sis tsis kam lees txais qhov tseeb li. Lawv tsis los ntseeg Vajtswv; lawv raug Ntxwgnyoog txoj kev tswj fwm, los cuam tshuam thiab tab kaum tes hauj lwm ntawm Vajtswv lub tsev lawm. Nyob rau hauv cov tawm tsam Khetos lub siab mas tsuas muaj lub koob lub npe thiab lub meej mom xwb. Lawv ntseeg tias yog lawv lees paub qhov lawv ua tsis yog, ces lawv yuav tsum tau lees lub luag hauj lwm, thiab tom qab ntawd yuav puas loj rau lawv lub koob lub npe thiab lub meej mom. Vim li ntawd, lawv thiaj li tawm tsam tus cwj pwm ntawm ‘kev tsis lees mus txog thaum koj tuag.’ Txawm tias tib neeg yuav nthuav tawm los sis txheeb xyuas dab tsi los xij, lawv yeej tsis lees txais tej ntawd hlo li. Txawm hais tias yuav yog lawv txhob txwm tsis lees paub xwb los sis tsis yog los, yog muab hais kom luv luv mas, ib qho ces yog qhov muab cov tawm tsam Khetos ntawd tus yeeb yam thiab lub ntsiab tseeb ntawm qhov dhuav thiab ntxub qhov tseeb qhia tshwm. Lwm qhov ces yog qhov qhia tias cov tawm tsam Khetos saib lawv tus kheej lub meej mom, kev muaj koob nrov npe, thiab tej kev ntshaw muaj nqis npaum li cas. Nyob rau tib lub sij hawm no, tus cwj pwm lawv coj rau pawg ntseeg tes hauj lwm thiab tej kev ntshaw ntawd yog dab tsi? Nws yog ib qho kev txob thuam thiab tsis lees paub txog lub luag hauj lwm. Lawv tsis muaj kev txawj xav thiab tsis muaj qab hau li. Cov tawm tsam Khetos txoj kev zam tsis leg lub luag hauj lwm ntawd puas qhia txog cov teeb meem no? Hais txog ib qho, qhov kev zam tsis leg lub luag hauj lwm ntawd ua pov thawj qhia tias lawv lub ntsiab tseeb thiab tus yeeb yam yeej dhuav thiab ntxub qhov tseeb, hos hais txog lwm qhov ces yog, nws qhia txog qhov lawv tsis muaj kev txawj xav, qab hau, thiab kev ua neej. Txawm hais tias cov kwv tij thiab cov muam qhov kev to taub lub neej txoj sia raug puas tsuaj ntau npaum li cas los ntawm lawv txoj kev cuam tshuam thiab kev ua phem los xij, lawv yeej tsis hnov tu siab rau lawv tus kheej thiab yeej tsis muaj hnub raug teeb meem los ntawm qhov no li. Hom uas raug tsim tawm los no yog neeg dab tsi? Txawm tias tsuas lees ib feem ntawm qhov lawv ua yuam kev xwb los yeej xam tias lawv muaj kev txawj xav thiab kev paub me ntsis lawm, tiam sis cov tawm tsam Khetos ntawd yeej tsis muaj txoj kev ua neej ib qho me me li ntawd kiag li. Yog li ntawd nej yuav hais tias lawv yog dab tsi mas? Lub ntsiab tseeb ntawm cov tawm tsam Khetos mas yog tus dab phem. Txawm lawv ua piam sij ntau npaum li cas rau tej kev ntshaw ntawm Vajtswv lub tsev los xij, lawv yeej tsis pom qhov ntawd li. Lawv yeej tsis muaj kev ntxhov siab nyob hauv lawv lub siab li, los sis lawv yeej tsis cem lawv tus kheej li, haj yam tsis xav tias tshuav nuj nqis li thiab. Qhov no tsis yog yam uas tsim nyog pom muaj nyob rau hauv cov tib neeg dog dig. Qhov no yog tus dab phem, thiab tus dab phem yeej tsis muaj kev txawj xav los sis kev paub li” (Txoj Lus, Phau 4. Kev Nthuav Tawm Cov Tawm Tsam Khetos. Yam Cuaj: (Ntu Peb)). Vim Vajtswv txoj lus, kuv thiaj li pom tias cov tawm tsam Khetos mas tsis lees txais qhov raug qhuab ntuas los sis raug qhuab qhia vim yog lawv tus yeeb yam uas dhuav thiab tsis nyiam qhov tseeb kiag li, thiab tshwj xeeb mas kuj yog vim lawv saib lawv tus kheej tej kev ntshaw muaj nuj nqis dua. Thaum muaj ib yam dab tsi cuam tshuam thiab rhuav lawv lub koob lub npe los sis lub meej mom mas, lawv ua txhua yam li lawv ua tau los kho lawv tus kheej thiab nrhiav laj thawj los hle lub nra ntawd xwb. Tab txawm thaum tej lawv ua ntawd tsim kev puas tsuaj rau pawg ntseeg tej kev ntshaw los sis rau cov nus thiab cov viv ncaus lub neej txoj sia ntawm sab ntsujplig los xij, lawv tsis xav li cas los sis tsis tu siab li. Yog pom hais tias lawv ua tej no, mas lawv tawv qhawv tsis kam lees li vim ntshai tias yog lees lub nra ntawd lawm ces yuav ua rau lawv lub koob lub npe thiab lub meej mom puas. Kuv pom tias cov tawm tsam Khetos mas yeej twm xeeb thiab ntxim ntxub heev, tsis muaj kev ua neej, thiab yog cov dab phem xwb. Thaum kuv pom lo lus tias “dab phem,” mas kuv tsis nyiam li, vim kuv tus cwj pwm thiab tus moj yam uas kuv nthuav tawm ntawd mas thooj kiag li ib tug tawm tsam Khetos ntag. Kuv tau ua ib qho yuam kev thiab ua rau pawg ntseeg tes hauj lwm puas tsuaj lawm tiag tiag, tiam sis kuv yeej tseem tsis lees qhov ntawd li. Thaum kuv raug qhuab qhia thiab raug qhuab ntuas lawm, kuv tsuas daws kuv tus kheej thiab ua txhua yam los muab lub nra ntawd hloov rau lwm tus xwb. Nws tsis yog ib tug txheej txheem uas yooj yim npaum li ntawd rau cov los ntseeg tshiab los lees txais txoj moo zoo li—qhov ntawd cheem tsum ib co tib neeg los tiv kev txom nyem, thiab los saib xyuas thiab pab coj lawv los rau ntawm Vajtswv lub xub ntiag. Tshwj xeeb mas Vajtswv yeej saib xyuas txhua tus. Ib puas tus yaj, yog tsuas muaj ib tug ploj lawm xwb, ces Nws yuav tso cuaj caum cuaj tug ntawd tseg es mus nrhiav Nws tus yaj uas ploj lawm ntawd, thiab Nws yeej hlub tshua txhua tus neeg txoj sia. Tiam sis thaum kuv saib xyuas cov los tshiab ntawd, kuv tsis ua tib zoo saib xyuas li. Thaum kuv pom tias tus los tshiab ntawd tsis tuaj koom tej kev sib txoos ua ke lawm, kuv tsis txhawj los sis tsis quav ntsej li. Qee zaus kuv tsuas lam nug, thiab lam taug tus thawj coj pab pawg tes hauj lwm qab kom dhau xwb, kuv tsuas lam ua kom dhau xwb thiab tsis mob siab leg lub luag hauj lwm li. Thaum kuv pom tias nws tsis teb kuv ntau zaus lawm, kuv tsis nug ceev nrooj tias vim li cas li, kuv kuj tsis tshawb xyuas seb nws puas muaj ib qho teeb meem dab tsi los sis tej kev nyuaj li thiab. Kuv coj tus cwj pwm uas tsis quav ntsej thiab tsis mob siab leg lub luag hauj lwm rau tus los tshiab ntawd thiab tsis mob siab rau nws txoj sia kiag li. Tiam sis tab txawm tom qab ntawd los, kuv yeej tseem tsis tu siab los sis tsis paub tias kuv muaj kev txhaum li, thiab kuv tsis siv zog los kho qhov teeb meem ntawd li. Thaum tus thawj saib xyuas qhia tawm hais tias kuv lam ua kom dhau xwb thiab tsis mob siab leg lub luag hauj lwm li, mas kuv siv tag nrho kuv lub peev xwm los cav thiab daws kuv tus kheej, thiab nrhiav laj thawj los hle lub nra ntawd, vim kuv ntshai tsam tau ris lub nra ntawd yog kuv lees kuv tej teeb meem, tsam kuv yuav ua rau tus thawj saib xyuas ntawd tsis nyiam, thiab tsam kuv yuav raug rho tawm. Txij thaum pib los txog thaum xaus, kuv yeej tsis xav txog pawg ntseeg tes hauj lwm, thiab kuv yeej tsis xav seb cov los tshiab ntawd txoj sia puas yuav muaj kev puas tsuaj li. Kuv tsuas xav seb kuv tej kev ntshaw puas yuav raug rhuav tshem, thiab seb kuv puas tuav tau kuv lub ntsej muag thiab lub meej mom xwb. Kuv mas twm xeeb thiab ntxim ntxub tshaj plaws, thiab txhua yam uas kuv tiv thaiv ces yog kuv tus kheej tej kev ntshaw xwb. Kuv yeej tsis muaj kev ua neej tiag tiag li, thiab Vajtswv ntxub kuv. Ces tom qab ntawd, kuv thiaj li los rau ntawm Vajtswv lub xub ntiag los thov Vajtswv, hais tias, “Vajtswv, kuv lam ua kuv tes dej num kom dhau xwb, ua rau muaj txim loj heev, thiab tsis lees qhov ntawd li. Qhov kuv xav txog tsis yog cov neeg Vajtswv xaiv txoj kev to taub lub neej txoj sia, tiam sis yog kuv tus kheej lub koob lub npe thiab lub meej mom xwb. Kuv yeej tsis muaj kev ua neej tiag tiag li! Vajtswv, kuv xav los lees txim hloov dua siab tshiab.”
Tom qab ntawd, kuv thiaj li nyeem Vajtswv cov lus ntxiv, thiab nrhiav tau ib txoj kev xyaum ua raws lawm. Vajtswv Tus Uas Muaj Hwj Chim Loj Kawg Nkaus hais tias: “Qhov tau txais qhov tseeb ntawd mas tsis nyuaj, thiab yog kev to taub qhov muaj tiag ntawm qhov tseeb, tab sis yog tib neeg pheej dhuav qhov tseeb, ces lawv puas muaj peev xwm tau txais qhov tseeb ma? Lawv tsis muaj peev xwm tau txais li. Yog li koj yuav tsum los rau ntawm Vajtswv xub ntiag tas li, tshuaj xyuas koj tus yam ntxwv sab hauv uas dhuav qhov tseeb uas koj muaj, thiab tej hau kev ua txhua yam uas ua rau dhuav qhov tseeb, thiab yam uas koj muaj tus cwj pwm dhuav qhov tseeb—koj yuav tsum nquag tig xav txog tej yam no” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb). “Yog koj xav caum Vajtswv qab thiab ua koj tes dej num kom tau zoo, ces ua ntej tshaj koj yuav tsum txhob thau thaum txhua yam tsis mus raws li koj siab xav. Xub ua kom siab tus thiab nyob ntsiag to rau ntawm Vajtswv xub ntiag, thiab nyob rau hauv koj lub siab, thov Nws thiab nrhiav los ntawm Nws. Txhob siab tawv ncauj; xub los zwm ua ntej tso. Tsuas yog muaj lub siab lub ntsws zoo li ntawd xwb koj thiaj li daws tej teeb meem tau zoo dua. Yog koj tiv taus qhov nyob rau ntawm Vajtswv xub ntiag, thiab txawm muaj dab tsi tshwm sim rau koj los xij, koj muaj peev xwm thov Nws thiab nrhiav los ntawm Nws, thiab muaj lub siab zwm rau thaum ntsib yam ntawd, ces txawm yuav hais tawm txog koj tus moj yam qias vuab tsuab pes tsawg zaus los yeej tsis ua cas li, thiab txawm yav tas los koj tej kev ua txhaum zoo li cas los yeej tsis tseem ceeb li—yeej yuav daws tau tej ntawd tsuav yog koj nrhiav qhov tseeb xwb. Txawm yuav muaj tej kev sim siab dab tsi tshwm sim rau koj los xij, koj yuav muaj peev xwm tiv khov kho. Tsuav yog koj muaj txoj kev xav uas yog, muaj peev xwm lees txais qhov tseeb, thiab mloog Vajtswv lus kom haum raws li Nws tej kev cheem tsum xwb, ces koj yeej muaj peev xwm muab qhov tseeb coj los xyaum ua tau tag nrho lawm. Txawm tias tej thaum koj muaj kev ntxeev siab thiab kev tawm tsam me ntsis los xij, thiab tej thaum nrhiav laj thawj los tiv thaiv thiab tsis muaj peev xwm zwm rau los xij, yog koj thov Vajtswv tau thiab hloov tau koj tus yam ntxwv ntxeev siab ntawd, ces koj yeej lees txais qhov tseeb tau. Thaum ua tiav li ntawd lawm, ces tig xav tias vim li cas thiaj li tshwm sim txoj kev ntxeev siab thiab kev tawm tsam ntawd rau koj. Nrhiav qhov laj thawj, ces tom qab ntawd nrhiav qhov tseeb los daws qhov ntawd, ces kis ntawm koj tus moj yam qias vuab ntawd thiaj li yuav raug ntxuav kom dawb huv tau. Tom qab dawm thiab ntog ntau zaus sawv los, los txog ntua qhov uas koj muab qhov tseeb coj los xyaum ua raws tau lawm, ces mam li tshem koj tus moj yam qias vuab tsuab tawm tau zuj zus. Thiab tom qab ntawd, qhov tseeb mam li los kav sab hauv koj lub siab thiab rais los ua koj lub neej txoj sia, thiab yuav tsis muaj kev cuam tshuam rau koj qhov xyaum ua raws li qhov tseeb ntxiv lawm. Koj thiaj li muaj peev xwm los zwm rau Vajtswv tau tiag tiag, thiab koj yuav ua lub neej nrog qhov muaj tiag ntawm qhov tseeb tau” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb). Vim Vajtswv txoj lus, kuv thiaj li to taub tias yuav kom daws tau tus moj yam uas dhuav qhov tseeb ntawd mas, kuv yuav tsum tig xav txog tus kheej tas li, thiab saib kom meej seb kuv tej lus hais, tej kev xyaum ua raws, tej kev npaj siab, tej cwj pwm, thiab tej kev xav puas qhia txog txoj kev dhuav qhov tseeb. Thaum muaj tej yam tshwm sim, txawm xyov tej ntawd puas mus raws li qhov kuv xav tau los xij, kuv yuav tsum xub tswj kuv tus kheej kom tus es tsis txhob tawm tsam. Yog kuv lees txais tsis tau qhov lwm tus hais thiab paub tias kuv tus kheej xav nrhiav laj thawj los kho kuv tus kheej, ces kuv yuav tsum tau los rau ntawm Vajtswv lub xub ntiag, los thov Vajtswv thiab nrhiav qhov tseeb ntxiv, saib seb Vajtswv txoj lus hais li cas, thiab siv Vajtswv txoj lus los xav txog kuv tus kheej, los sis nrhiav kev sib qhia nrog cov nus thiab cov viv ncaus uas to taub qhov tseeb. Ua li no, kuv thiaj li yuav maj mam lees txais tau qhov tseeb thiab to taub txog qhov muaj tiag ntawm qhov tseeb ntawd, thiab tsuas yog tom qab ntawd xwb, kuv thiaj li yuav muaj peev xwm ntiab tau kuv tus moj yam qias vuab tsuab tawm mus. Thaum kuv to taub txoj kev xyaum ua raws lawm, ces kuv thiaj li txiav txim siab los hloov lawm.
Thaum paub tias qhov tsis tshawb xyuas tus los tshiab no qhov xwm txheej kom ncav sij hawm ntawd twb yog ib txoj kev ua txhaum lawm, ces kuv thiaj li maj nroos los hloov txhua yam. Kuv xyuas seb puas yog kuv tsis saib xyuas cov los tshiab uas kuv saib xyuas ntawd ib tug twg zoo li. Thaum kuv tab tom sau ntawv hauv xov tooj nrog ib tug los tshiab sib tham, kuv pom tias nws tsis tshua to taub qhov tseeb uas hais txog qhov tus Tswv rov qab los thiab peb theem ntawm Vajtswv tes hauj lwm. Kuv txawm nug kuv tus thawj coj seb puas tsim nyog tus tshaj tawm txoj moo zoo qhia nws, tiam sis tus thawj coj hais kom kuv qhia nws. Txawm kuv paub tias qhov kev daws cov los tshiab tej teeb meem kom sai ntawd yog kuv lub luag hauj lwm los xij, kuv yeej tseem tawv qhawv xwb. Kuv xav cav rov qab, thiab kuv tsis xav mloog lus li. Kuv xav tias qhov no tau tshwm sim vim yog tus tshaj tawm txoj moo zoo ntawd tsis qhia kom meej meej, yog li ntawd vim li cas kuv thiaj li yuav tau ris qhov teeb meem no? Muaj cov los tshiab coob heev, kuv tsis muaj sij hawm txaus, yog li ntawd tsim nyog yog tus tshaj tawm txoj moo zoo ua tus qhia nws. Ces kuv mam li paub tias kuv tus yam ntxwv tsis yog lawm. Tseeb tiag, qhov kuv tus thawj coj hais ntawd yeej tsim nyog lawm. Qhov tawm tswv yim ntawd yeej yog lawm, yog li vim li cas kuv thiaj li lees txais tsis tau qhov ntawd? Vim li cas kuv thiaj li tseem xav cav rov qab ua luaj li? Vim li cas kuv thiaj li tsis mloog lus? Yog li ntawd, kuv thiaj li thov Vajtswv, thov kom Nws coj kuv kev los zwm rau, tsis txhob xav txog kuv cev nqaij daim tawv tej kev ntshaw, thiab mob siab rau tus los tshiab ntawd txoj sia. Kuv mam li paub hais tias txhua tus nyias muaj nyias peev xwm los txais. Ib co tib neeg mas hnov tus tshaj tawm txoj moo zoo ntawd tej lus qhia thiab to taub tej lus qhia ntawd nyob rau lub sij hawm ntawd kiag, tiam sis tom qab ntawd mas muaj qee kis tsis to taub meej lawm. Qhov no thiaj li cheem tsum cov saib xyuas los qhia thiab ntxiv rau tej kis uas to taub tsis meej ntawd. Qhov no yog txoj kev koom tes uas sib haum xeeb. Yog ib tug saib xyuas lawm, kuv yuav tsum daws teeb meem thaum kuv pom muaj teeb meem. Kuv yuav tsum tsis txhob xaiv xaiv, es ua qhov yooj yim xwb, es muab tej teeb meem nyuaj rau lwm tus, thiab kuv yuav tsum tsis txhob txeeb ua kom kaj siab xwb. Kuv yuav tsum tsis txhob pheej hais txog tej xwm txheej ntawd los sis nrhiav kev hle kuv tes dej num. Yog tias muab ib tug los tshiab cob rau kuv lawm, ces nws yog kuv lub luag hauj lwm los saib xyuas lawv kom zoo, xyuas kom lawv to taub qhov tseeb, kom muaj ib lub hauv paus kev ntseeg rau txoj kev tseeb. Qhov no yog kuv tes dej num. Qhov no thiaj li yog kev xyaum ua raws li qhov tseeb tiag tiag, thiab hloov tiag tiag. Thaum xav li no, kuv lub siab thiaj li kaj lawm. Kuv maj nroos los nrhiav tus los tshiab no thiab qhia rau nws txog nws qhov teeb meem. Thaum kuv xyaum ua li no lawm, tsis yog kuv hnov tsis muaj kev tawm tsam lawm xwb, kuv kuj zoo siab heev thiab. Kuv thiaj li to taub tias kev xyaum ua raws li qhov tseeb ntawd mas tsis yog ib qho kev ua sab nraud xwb. Tiam sis, nws yog kev lees txais Vajtswv cov lus tawm hauv lub siab tuaj, yog kev xyaum ua raws li tej hauv paus ntsiab lus ntawm qhov tseeb, thiab yog kev siv Vajtswv txoj lus los ua tus qauv rau peb saib tib neeg thiab teeb meem, kev ua, thiab kev coj. Ua li no mas, tos nco xwb Vajtswv txoj lus thiab qhov tseeb thiaj li yuav hloov tau peb tej kev npaj siab thiab tej kev xam pom uas yuam kev, thiab peb tus moj yam uas qias vuab tsuab.
Tom qab paub li ntawd lawm, kuv thiaj li muaj qee qhov kev to taub txog kuv tus moj yam phem uas tawv ncauj thiab dhuav qhov tseeb ntawd lawm. Kuv kuj pom qhov tseem ceeb ntawm txoj kev nrhiav qhov tseeb thiab kev ua raws li tej hauv paus ntsiab lus nyob rau hauv txhua yam lawm thiab. Qhov no puav leej yog qhov tawg paj txi txiv ntawm txoj kev nyeem Vajtswv cov lus xwb. Ua Vajtswv tsaug!
