26. Xav Ntes tiam sis Tsis Txhaum
Nyob rau lub Tsib Hlis xyoos 2014 ntawd, Tsoom Fwv Koom Tsham Suav tsim Zaumyuam Rooj Plaub nyob hauv Xasdoos los nkaug thiab hais lus phem rau Pawg Ntseeg ntawm Vajtswv Tus Uas Muaj Hwj Chim Loj Kawg Nkaus, thiab pib ntes Pawg Ntseeg ntawm Vajtswv Tus Uas Muaj Hwj Chim Loj Kawg Nkaus cov tswv cuab kiag tam sim ntawd thoob plaws teb chaws li “Ib Puas Hnub.” Muaj coob tus nus thiab viv ncaus raug ntes lawm. Nyuam qhuav tau ob lub hlis kiag xwb, txij li lub Cuaj Hlis mus txog rau lub Kaum Ib Hlis, twb muaj tshaj li 30 tus nus thiab viv ncaus uas nyob rau hauv kuv lub nroog raug ntes ua ntu zus lawm. Nyob rau lub sij hawm ntawd, kuv saib xyuas tes hauj lwm ntawm ntau pawg ntseeg, thiab txhua hnub, thaum tub ceev xwm saib xyuas nruj heev, kuv tau npaj kom cov nus thiab cov viv ncaus uas nyob rau hauv qhov chaw phom sij hloov chaw thiab kom muab cov phau ntawv uas hais txog txoj kev ntseeg Vajtswv ntawd hloov chaw. Txhua txhua lub sij hawm, kuv nyob rau hauv qhov phom sij ntawm qhov uas raug ntes. Muaj ib hmo, tus nus uas raug ntes thiab raug tso los lawm qhia kuv hais tias thaum tub ceev xwm nug nws, lawv hais txog kuv tus kheej, thiab haj tseem muab kuv daim duab rau nws saib thiab nug seb nws puas paub kuv thiab. Tus nus ntawd hais tias kuv yog tus tseem ceeb uas lawv xav ntes thiab hais kom kuv tawm mus kom sai. Kuv thiaj li xav hais tias, “Muaj coob tus nus thiab viv ncaus twb raug ntes lawm, thiab tseem tshuav ntau yam hauj lwm nyob rau tom qab uas yuav tsum tau ua. Tsis tas li ntawd, ib co nus thiab viv ncaus qaug zog vim tus zaj loj liab ploog txoj kev ntes thiab kev tsim txom, thiab lawv cheem tsum kev txhawb thiab kev pab. Tshuav ob peb hnub ntxiv xwb kuv yuav tau tawm mus.” Tiam sis kuv tus nus pheej hais tas zog hais tias, “Koj awm mus hmo no mas zoo tshaj plaws. Tsis txhob nyob ntawm no lawm. Muaj koob yees duab nyob rau txhua txoj kev, thiab tub ceev xwm yuav pom koj kiag thaum lawv tshawb xyuas cov kev soj ntsuam ntawd.” Thaum kuv hnov li ntawd lawm, kuv cia li ntshai kiag tam sid, thiab kuv txawm pib poob siab nthav. Yog li ntawd, kuv thiaj li npaj tsuag tsuag rau pawg ntseeg tes hauj lwm uas tseem tshuav thiab khiav mus rau lwm lub nroog uas nyob ze ntawd lawm.
Muaj ib tug nus uas laus lawm thiab niam laus tau pheej hmoo tuaj txais kuv. Vim muaj cov koob yees duab nyob sab nraud, ces kuv thiaj li tawm tsis tau, yog li ntawd kuv thiaj li yuav tsum tau nyob rau hauv nkawv lub tsev. Nkawv tus tub ua hauj lwm rau hauv ib lub tsev kawm ntawv, thiab tsoom fwv tau tshaj tawm hais tias txhua tus neeg ua hauj lwm qhia ntawv thiab lawv tsev neeg muaj tsis tau tej kev ntseeg ntawm sab kev lis kev cai ntseeg li, yog tsis li ntawd ces lawv yuav raug ntiab tawm ntawm lawv txoj hauj lwm mus, yog li ntawd nkawv tus tub thiaj li ntshai tsam nws lub neej yav tom ntej yuav raug cuam tshuam nws thiaj li tawm tsam nws niam nws txiv txoj kev ntseeg Vajtswv. Tus niam laus ntawd ntshai tsam nws tus tub pom kuv nyob rau hauv tsev thiab muab kuv qhia mus rau tub ceev xwm, yog li ntawd nws thiaj li tau npaj kom kuv mus nyob rau saum qab ru tsev. Txhua zaus uas kuv tus niam laus tus tub rov qab los mas, kuv ntshai heev. Muaj ib zaug, nws tus tub nce mus rau theem saud mus muab qee yam. Mas kuv ntshai tsam nws pom, yog li ntawd kuv thiaj li nkaum rau tom qab lub qhov rooj thiab tsis tau luag nti li. Thaum lub sij hawm ntawd cia li muaj cov pa roj hauv chav ua noj taug tus ncej tso pa taws tawm tuaj ces cia li ua rau kuv hnoos. Kuv muab ib daim ntaub los npog kuv lub taub hau thiab qhov ncauj, thiab kuv yuav luag ua tsis taus pa li. Kuv tus niam laus ntawd muaj dua lwm tus tub thiab uas nyob ntawm ib sab tsev ntawd, thiab kuv hnov lub suab ntawm nws lub This Vis, yog li ntawd yuav kom nkaum tau twj ywm, kuv thiaj li tsis tau luag taws teeb nyob rau saum qab ru tsev li, thiab feem ntau kuv ua suab yau tshaj plaws li xwb. Nws yog lub caij ntuj no, yog li ntawd chav ntawd thiaj li no heev, tiam sis kuv tsis tau luag tawm mus ziab tshav li. Ntev tom qab ntawd lawm, kuv txawm pib ntxhov siab heev, xav paub hais tias, “Thaum twg kuv mam li tsis tau nyob zoo li no lawm? Thaum twg kuv mam li tau nrog kuv tsev neeg nyob ua ke thiab nrog kuv cov nus thiab cov viv ncaus tawm mus ua kuv tes dej num kom tiav?” Nyob lub sij hawm ntawd, kuv pheej thov Vajtswv, thov kom Nws coj kuv kev thiab qhia kuv kom kuv to taub Nws lub siab nyiam thiab paub tias yuav mus kom dhau qhov xwm txheej no li cas.
Tom qab ntawd, kuv nyeem ib zaj lus ntawm Vajtswv cov lus uas hais tias, “Tej zaum nej txhua tus nco cov lus no: ‘Rau qhov peb txoj kev txom nyem me me no, uas tsuas yog ib nyuag pliag xwb, ua hauj lwm rau peb kom tau lub yeeb koob uas zoo tshaj plaws thiab nyob mus ib txhis.’ Nej txhua tus yeej tau hnov cov lus no ua ntej lawm, tab sis nej tsis muaj ib tug nkag siab lawv lub ntsiab tseeb. Hnub no, nej paub meej tias lawv qhov tseeb tseem ceeb tiag. Cov lus no Vajtswv yuav ua kom tiav nyob rau hauv tiam kawg, thiab yuav ua kom tiav rau cov neeg raug tus zaj loj liab ploog ntaus tsim txom nyob hauv daim av uas nws chev. Tus zaj loj liab ploog tsim txom Vajtswv thiab yog Vajtswv tus yeeb ncuab, thiab ces, nyob thaj av no, tib neeg raug rhuav ntsej muag thiab tsim txom vim lawv txoj kev ntseeg Vajtswv, thiab qhov tau los ces yog cov lus no tshwm sim nyob hauv nej, pab neeg no. Vim tias, nws nqis tes mus rau ntawm thaj av uas tawm tsam Vajtswv, tag nrho Vajtswv tes dej num ntsib kev cuam tshuam loj heev, thiab Nws cov lus muaj ntau lo ua tsis tau kom tiav kiag tam sid; vim li ntawd, neeg lim hloov kom zoo dua los ntawm Vajtswv cov lus, uas kuj yog ib qhov ntawm kev txom nyem. Nws yog ib qho nyuaj kawg nkaus rau Vajtswv ua Nws tes dej num nyob ntawm thaj av uas tus zaj loj liab ploog nyob—tab sis nws yog los ntawm txoj kev nyuaj no uas Vajtswv ua ib theem ntawm Nws tes dej num, ua kom Nws txoj kev txawj ntse thiab txoj kev ua uas muaj hwj huaj loj tshwm tuaj, thiab siv lub cib fim no los ua kom pab neeg no muaj txhua yam txhij” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Tes Hauj Lwm Puas Yooj Yim Npaum Li Tib Neeg Xav?). Vim Vajtswv txoj lus, kuv thiaj li to taub hais tias thaum tib neeg ntseeg Vajtswv nyob rau hauv lub teb chaws uas raug Tsoom Fwv Koom Tsham Suav tswj lawm, ces yeej yuav zam tsis dhau txoj kev tsim txom li, tiam sis Vajtswv siv ib qho xwm txheej zoo li no los ua kom tib neeg txoj kev ntseeg zoo tiav log. Kuv rov qab xav mus rau thaum kuv tsis nyob rau hauv ib qho xwm txheej zoo li no, kuv xav hais tias kuv muaj peev xwm tiv kev txom nyem thiab muaj kev ntseeg Vajtswv. Txawm li cas los xij, thaum kuv raug caum txog ntua qhov uas tsis muaj tsev nyob, nkaum lawm xwb, thiab tsis muaj kev ywj pheej hlo li lawm, thiab kuv yuav tsum tau raug kev txom nyem tiag tiag, ces kuv thiaj li tsis muaj lus yws nyob rau hauv kuv lub siab lawm, thiab qhov uas kuv xav tau ces yog khiav lawm xwb. Tsuas yog los ntawm qhov muaj tseeb tau muab nthuav tawm lawm xwb kuv thiaj li ras dheev hais tias kuv tsis muaj txoj tseem kev ntseeg Vajtswv kiag li, tsis muaj kev mloog lus, thiab tias kuv lub siab mas me heev li. Nyob rau ob peb lub hlis no, Tsoom Fwv Koom Tsham Suav tau tshawb tej tsev thiab ntes tib neeg, txeeb pawg ntseeg tej nyiaj, thiab ua rau coob tus nus thiab viv ncaus tawm ntawm lawv tej tsev mus lawm, ua rau lawv lub neej rov qab rov quav tag thiab haj tseem ua rau lawv tsis muaj ib qho chaw nyob li lawm thiab. Tsoom Fwv Koom Tsham Suav ua kev phem ntau heev, ntes thiab tsim txom tib neeg. Lub hom phiaj tsis yog los ua kom tib neeg khiav tawm ntawm Vajtswv mus thiab ua rau lawv ntxeev siab rau Vajtswv lod? Yog kuv qaug zog, thim rov qab, los sis yws nyob rau hauv ib qho xwm txheej zoo li no, ces kuv poob mus rau Ntxwgnyoog tej tswv yim dag thiab plam kuv tej lus tim khawv lawm. Thaum kuv ras dheev txog qhov no lawm, kuv tsis tshuav hnov mob siab thiab tsim txom hauv kuv lub siab lawm. Kuv xav hais tias, “Txawm kuv yuav tsum tau nyob rau ntawm no ntev npaum li cas los sis kuv raug kev txom nyem npaum li cas los xij, kuv xav zwm rau Vajtswv tej kev npaj.”
Tom qab ob peb lub hlis lawm, zoo li qhov kev tshuaj xyuas ntawd tsis nruj heev lawm, yog li ntawd kuv thiaj li mus rau lwm lub zos mus ua kuv tes dej num lawm. Yuav kom nyab xeeb mas, kuv yuav tau txiav kuv cov plaub hau uas ntev ntev, thiab kuv ntoo ib lub kaus mom, looj ib daim ntaub npog qhov ntswg, thiab coj tsom iav thaum kuv tawm mus koom tej kev sib txoos ua ke. Kuv taug tej kev nqaim nqaim thiab tej kev nkhaus nkhaus xwb, kom lawv txhob pom. Kuv xav hais tias tsuav kuv ceev faj xwb, ces kuv yeej tseem ua tau kuv tes dej num. Kuv ceeb hais tias muaj ib zaug thaum yav tsaus ntuj, ob peb lub hlis tom qab ntawd, kuv tus thawj coj khiav maj nroos tuaj rau ntawm kuv thiab hais tias, “Tub ceev xwm twb muab koj tso rau hauv is taws nev lawm. Lawv tab tom nrhiav koj. Tsab ntawv tshaj tawm ntes twb muab xa mus rau cov tib neeg tej xov tooj uas nyob rau hauv peb lub plawv zos thiab ntau cheeb tsam uas nyob ib puag ncig nov mus qhia rau lawv kom lawv qhia tawm yog tias lawv pom koj. Tub ceev xwm paub hais tias koj tus dab laug qhia txoj moo zoo rau koj, yog li ntawd lawv twb ntes koj tus dab laug thiab tus niam dab laug lawm. Yuam kom nyab xeeb mas, koj tawm tsis tau mus ua koj tes dej num ntxiv lawm.” Tom qab ntawd, kuv tau txais xov xwm hais tias tub ceev xwm nrhiav tau kuv yawg uas muaj 80 xyoo thiab nug nws txog kuv qhov chaw nyob lawm. Lawv kuj tau muab kuv tus dab laug qhov chaw zuaj ib ce kaw lawm thiab. Ntxiv ntawd, tub ceev xwm tab tom nrhiav kuv niam thiab tus viv ncaus, yog li ntawd nkawv mus tsis tau tsev li. Thaum kuv hnov qhov xov xwm no lawm, kuv npau taws heev. Kuv txoj kev ntseeg Vajtswv yeej yog thiab tsim nyog lawm. Vim li cas Pawg Koom Tsham thiaj li caij tsuj cov tib neeg uas ntseeg Vajtswv yam lim hiam heev? Vim li cas thiaj li tsis muaj kev ncaj ncees thiab kev ywj pheej ntawm txoj kev ntseeg nyob rau hauv Teb Chaws Suav li? Kuv twb npaj lawm hais tias yuav rov qab mus tsev twj ywm mus saib kuv tsev neeg, tiam sis kuv yeej xav tsis txog li tias lawv yuav xav ntes kuv, los sis tias lawv yuav ua kom kuv tsev neeg ntshai thiab hem kuv tsev neeg li. Tab txawm kuv muaj tsev los, kuv rov qab mus tsis tau tsev li, thiab kuv tsev neeg raug cuam tshuam thiab raug ntes lawm. Tam sim no kuv mam li ras dheev hais tias kuv yog ib tug neeg ua txhaum kev cai uas lawv xav ntes, thiab kuv xav tias xyov kuv tej txheeb ze thiab tej phooj ywg yuav hais li cas txog kuv li. Lawv puas yuav xav hais tias kuv ua qee yam tsis zoo lawm? Kuv yuav ua li cas ntsib tau lawv nyob rau yav tom ntej? Thaum kuv xav txog qhov no, kuv teev tsis taus kuv lub kua muag li. Kuv yim xav txog qhov no, ces kuv yim nyuaj siab xwb. Kuv xav hais tias kev ntseeg Vajtswv nyob rau hauv Teb Chaws Suav mas nyuaj heev. Kuv thov Vajtswv yam mob siab heev hais tias, “Vajtswv! Kuv tsis paub xyov yuav ua li cas rau qhov xwm txheej no lawm. Thov pub kom kuv muaj cuab kav thiab muaj zog, thiab coj kuv kev kom to taub Koj lub siab nyiam.” Tom qab kuv thov Vajtswv tag lawm, kuv txawm xav txog ib zaj nkauj qhuas Vajtswv uas hais txog Vajtswv txoj lus hu ua “Lub Neej Muaj Nuj Nqis Tshaj Plaws” uas hais tias, “Koj yog ib yam muaj sia raug tsim los—koj yuav tsum pe hawm Vajtswv thiab caum raws ib lub neej muaj nuj nqis. Vim koj yog tib neeg, koj yuav tsum muab koj tus kheej fij rau Vajtswv thiab thev taus txhua yam kev txom nyem! Koj yuav tsum zoo siab thiab lees txais ib qho kev txom nyem me me uas koj tau ntsib rau niaj hnub no thiab ua ib lub neej muaj nuj nqis, zoo ib yam li Yauj thiab Petus. Nej yog cov neeg uas caum raws txoj hau kev yog, cov uas nrhiav kev tsim kho. Nej yog cov neeg uas sawv los hauv haiv neeg ntawm tus zaj loj liab ploog, cov uas Vajtswv hu ua cov ncaj ncees. Qhov ntawd tsis yog lub neej muaj nuj nqis tshaj plaws los?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Kev Xyaum Ua Raws (2)). Thaum mloog zaj nkauj no, kuv los kua muag. Qhov cov tib neeg uas raug tsim tawm los ntseeg Vajtswv thiab pe hawm Vajtswv ntawd yog qhov yog thiab tsim nyog lawm, thiab Vajtswv pom zoo rau qhov no. Kuv xav txog Yauj, tus uas ntshai Vajtswv thiab zam kev phem. Tab txawm nws plam nws cov me nyuam, tej khoom ntiag tug, muaj mob ua hlwv thoob plaws nws lub cev, thiab raug nws poj niam thiab tej phooj ywg txiav txim thiab to taub yuam kev, los nws tseem tuav rawv nws txoj kev ntseeg Vajtswv, qhuas Vajtswv thaum nws raug kev txom nyem, sawv khov kho thiab ua tim khawv rau Vajtswv, thiab ua rau Ntxwgnyoog poob ntsej muag. Kuj muaj Petus, tus uas caum txoj kev paub Vajtswv thiab Vajtswv txoj kev hlub tag nws sim neej li thiab, raug pua pua qhov kev sim siab thiab kev lim tib neeg kom dawb huv, tiv kev mob, thiab thaum kawg raug ntsia rau saum tus ntoo khaub lig rov quav rau Vajtswv, vim li ntawd thiaj li ua tau tim khawv zoo thiab nrov heev. Yog ib tug neeg uas raug tsim tawm los mas, nws yog ib qho tseem ceeb heev uas muaj peev xwm sawv khov kho thiab ua tim khawv rau Vajtswv thiab tau txais tus Tswv Tsim txoj kev pom zoo! Hnub no, Pawg Koom Tsham xav ntes kuv thiab caum kuv vim kuv txoj kev ntseeg Vajtswv xwb. Tab txawm kuv tej txheeb ze thiab tej phooj ywg to taub kuv yuam kev thiab tso kuv tseg los xij, tsis tas yuav txaj muag rau qhov no li, vim kuv taug txoj kev yog nyob rau hauv lub neej thiab ua yam uas ncaj ncees tshaj plaws lawm. Thaum kuv xav txog qhov no, kuv tsis tshua hnov mob siab lawm, tiam sis ho txaus siab rau kuv tus kheej vim muaj peev xwm raug kev txom nyem li no.
Muaj ib hnub thaum lub Ib Hlis xyoo 2016, kuv tus viv ncaus tau muab ib co yuaj ua si rau kuv. Kuv txais nkaus thiab pom hais tias nws muaj kuv daim duab thiab cov ntaub ntawv qhia tias kuv yog leej twg ntawd luam nyob rau hauv cov yuaj ua si ntawd. Kuv lub npe, tus zauv ntaub ntawv, thiab vaj tse chaw nyob puav leej nyob rau hauv, thiab nws sau hais tias kuv yog ib tug neeg khiav tawm nyob rau os lai los ntawm Qhov Chaw Ua Hauj Lwm Saib Xyuas Kev Ruaj Ntseg Rau Pej Xeem yam li yog ib “tug neeg ua txhaum kev cai uas tsis ntseeg txog txoj kev npaj thiab siv ib lub koom haum kev ntseeg los rhuav tshem txoj kev ua raws li txoj kev cai.” Kuj tseem muaj ib tug xov tooj tseem ceeb luam nyob rau ntawm cov yuaj ua si ntawd thiab, thiab hais tias yog leej twg qhia yuav tau txais nqi zog. Kuv tus viv ncaus hais tias tub ceev xwm tau muab cov yuaj ua si uas muaj cov duab thiab cov ntawv hais txog kuv tus kheej thiab peb tug viv ncaus uas saib xyuas pawg ntseeg tes hauj lwm nrog rau cov neeg tua neeg thiab cov tub sab faib tawm. Tom qab ntawd, kuv hnov los ntawm kuv cov nus thiab cov viv ncaus hais tias lawv pom tsab ntawv xav ntes kuv nyob rau hauv daim phiaj loj uas nyob sab nraum qhov chaw nres tsheb ciav hlau thiab qhov chaw tso xov xwm ntawm txoj kev nkag mus rau hauv Qhov Chaw Ua Hauj Lwm Saib Xyuas Kev Ruaj Ntseg Rau Pej Xeem. Thaum hnov tag nrho tej no lawm ua rau kuv xav tsis thoob li. Kuv thiaj li xav nug lawv tias, “Kuv ua txhaum txoj kev cai twg? Kuv ua dab tsi es txhaum txoj kev cai? Vim li cas nej thiaj li siv tej kev tsis ncaj ncees zoo li no los caum kuv thiab ntes kuv?” Kuv thiaj li nco txog ib zaj lus ntawm Vajtswv txoj lus uas hais tias, “Tau ntau txhiab xyoo los lawm uas qhov no yog daim av ntawm txoj kev qias neeg. Nws yog ib qho dub tsuas yam tiv tsis tau kiag li, muaj kev txom nyem loj kawg kiag, dab poj ntxoog mas khiav vig voog qhov txhia chaw, txawj ntxias thiab txawj dag, hais lus iab liam yam tsis muaj laj thawj, ua lim hiam thiab siab phem, tsuj kiag lub niag nroog dab poj ntxoog no thiab cia nws muaj tej niag cev tuag pov pawg lug rau ntawm tej; tus ntxhiab tsw lwj mas puv nkaus daim av thiab nthuav tawm puv nkaus tej huab cua, thiab nws raug zov zoo kawg kiag. Leej twg thiaj pom lub ntiaj teb uas dhau lub qab ntuj ntsuab? Tus dab phem ntawd muab tib neeg lub cev pav ntxeev tis qaib ruaj heev, nws npog nws ob lub qhov muag, thiab muab nws ob daim di ncauj lo khov kho. Tus vaj ntxwv ntawm cov dab tau rhuav tshem qhov ub qhov no los tau ntau txhiab xyoo lawm, los txog ntua rau niaj hnub no, thaum nws tseem zov lub nroog dab no zoo zoo, cuag li nws yog ib lub tsev huab tais rau cov dab uas tsis muaj leej twg yuav nkag mus tau rau li; pab dev zov tsev no, nyob rau tib lub sij hawm ntawd, ntsia qhov muag ci quv tuaj xwb, ntshai rwg tsam Vajtswv tos lawv tsis nco qab ces muab lawv so tawm du lug, tsis cia lawv muaj ib lub chaw rau kev thaj yeeb thiab kev zoo siab li. Cov neeg ntawm ib lub nroog dab zoo li no es yuav ua cas thiaj yuav muaj hnub pom Vajtswv mas? Lawv puas tau nyiam qhov paub zoo thiab kev ntxim hlub ntawm Vajtswv dua li mas? Lawv ho muaj kev txaus siab dab tsi rau tej xwm txheej ntawm tib neeg lub ntiaj teb? Leej twg ntawm lawv ho muaj cuab kav to taub Vajtswv txoj kev xav uas maj nroos ntawd? Tos li ntawd, ces, Vajtswv uas yug los ua neeg tseem nkaum tag nrho: Nyob rau ib lub meem xeeb coj tsaus ntuj nti li lub no, uas cov dab mas siab phem thiab lim hiam heev, yuav ua cas es tus vaj ntxwv ntawm cov dab, tus uas tua neeg yam tsis ntsais muag li, yuav zam tau cia kom muaj ib tug Vajtswv uas txaus hlub, siab zoo, thiab dawb huv ntawd nyob? Nws yuav ua cas npuaj teg thiab qw txais tos qhov kev los txog ntawm Vajtswv? Cov niag qhev no! Lawv pauj kev zoo siab nrog kev ntxub, lawv twb pib saib Vajtswv li yog ib tug yeeb ncuab los ntev lawm, lawv tsim txom Vajtswv, lawv yog cov niag mab qus phem tshaj plaws li, lawv yeej tsis muaj ib qho kev saib taus Vajtswv me me hlo li, lawv huab noj huab haus thiab ua tub sab tub nyiag, lawv plam tag nrho tej kev txawj xav, lawv tawm tsam tag nrho txhua yam kev txawj xav, thiab lawv ntxias cov neeg dawb huv mus rau txoj kev ruam. Tej poj koob yawm txwv ntawm cov neeg txheej thaum ub? Cov thawj coj uas ntxim hlub tshaj? Lawv tag nrho yeej tawm tsam Vajtswv! Lawv tej kev cuam tshuam ua rau tag nrho cov nyob hauv qab ntuj raug tso tseg rau hauv ib qho xwm txheej ntawm txoj kev tsaus ntuj thiab kev kub ntxhov. Kev ywj pheej fab kev ntseeg? Tej cai yam raug cai thiab tej uas pej xeem xav tau? Tag nrho tej no ces yog kev ntxias dag los npog kev txhaum xwb!” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tes Hauj Lwm thiab Kev To Taub (8)). Vajtswv cov lus nthuav tawm txog tus tus zaj loj liab ploog ntawd tus yeeb yam tseeb. Tsoom Fwv Koom Tsham Suav yog Vajtswv ib tug yeeb ncuab, yog ib tug dab phem uas tawm tsam thiab ntxub Vajtswv, thiab qhov chaw uas lawv kav ntawd yog Ntxwgnyoog uas yog tus dab phem lub qhov ntag. Lawv yeej tsis kam cia muaj Vajtswv, thiab lawv haj yam tsis kam cia tib neeg los ntseeg tus tseem Vajtswv thiab taug txoj kev yog li. Vim li no lawv thiaj li tshab txhais txoj Kev Ntseeg Vajtswv yam li yog ib “txoj kev cai ntseeg” thiab phau Vajluskub yam li cov ntaub ntawv qhia txog “txoj kev cai ntseeg,” thiab xav ntes cov Ntseeg Vajtswv heev. Niaj hnub no, vim yog xav rhuav tshem Vajtswv tes hauj lwm ntawm tiam kawg, lawv thiaj li tsim txhua yam lus xaiv thiab tsim tej plaub txhaum kev cai uas tsis muaj tseeb los liam thiab ua kom Pawg Ntseeg ntawm Vajtswv Tus Uas Muaj Hwj Chim Loj Kawg Nkaus puas koob puas npe, lawv caum thiab soj cov ntseeg Vajtswv cuag nkaus li cov ntseeg Vajtswv yog cov neeg ua txhaum kev cai uas phem tshaj plaws, thiab lawv dag thiab ua rau cov uas tsis paub qhov tseeb ntxub cov ntseeg Vajtswv thiab nrog lawv tawm tsam Vajtswv. Pawg Koom Tsham yeej hais txhua lo lus dag li hais tau thiab ua txhua yam kev phem li ua tau! Thaum kuv paub txog qhov no lawm, nws txhawb kuv txiav txim siab los muab tus zaj loj liab ploog ntawd tso tseg thiab raws Vajtswv qab kom mus txog qhov kawg! Tom qab ntawd, kuv hnov los ntawm kuv tus thawj coj hais tias ob tug viv ncaus uas muaj npe nrog kuv nyob rau hauv cov yuaj ua si uas lawv xav ntes ntawd twb raug ntes thiab raug txiav txim mus kaw plaub xyoos nyob rau hauv tsev laj cuj lawm.
Plaub lub hlis tom qab ntawd, tub ceev xwm tau muab 10,000 nyiaj yuaj los ua nqi zog ntxiv rau tus uas qhia es ntes tau kuv. Muaj ib tug viv ncaus uas nyob hauv kuv lub zos xa ib tsab ntawv tuaj qhia rau kuv hais tias tus thawj coj hauv zos tau tshaj tawm ntau qhov lus xaiv hais tias vim kuv ntseeg Vajtswv es kuv thiaj li tsis xav pom kuv tsev neeg los sis tej txheeb ze ntxiv lawm, thiab tias kuv tawm tsam tsoom fwv. Thaum lub sij hawm dhau mus lawm, ces tej lus xaiv ntawd txawm phem zuj zus tuaj, thiab ib txhia txawm pib hais tias kuv vwm lawm los sis tias kuv tab tom muag yeeb muag tshuaj. Thaum cov tib neeg uas nyob ze hauv zos hnov cov lus xaiv no, lawv sawv daws puav leej hais lus phem thiab teem txim rau kuv. Kuv tus nus yau pom hais tias cov lus xaiv no mas yuav tsis taus li lawm thiab txhawj txog kuv heev ces nws thiaj li quaj thiab xav tuaj nrhiav kuv. Thaum kuv hnov qhov xov no lawm, kuv tswj tsis tau kuv tus kheej los sis cheem tsis tau kuv lub kua muag kom txhob ntws li. Kuv xav mus sawv rau ntawm kuv tej txheeb ze thiab tej phooj ywg lub xub ntiag piav mus qhia hais tias kuv ntseeg tus tseem Vajtswv, taug txoj kev yog, thiab yeej tsis tau ua txhaum dab tsi li. Kuv xav ya ncaj qha mus cuag kuv tus nus, mus nplij nws siab, thiab mus qhia rau nws paub kom txhob txhawj txog kuv. Tiam sis yog kuv rov qab mus zoo li no, kuv yeej yuav raug tub ceev xwm ntes xwb xwb li, thiab kuv kuj yuav ua rau cov nus thiab cov viv ncaus uas kuv muaj kev sib txuas lus nrog ntawd raug kev phom sij thiab. Kuv mus mus los los nyob rau hauv kuv chav yam ntxhov siab heev. Kuv yim xav txog tej no, ces kuv yim zaum tsis tswm li. Thaum kawg, kuv thiaj li pheej hmoo txiav txim siab hu kuv tus nus.
Kuv paub hais tias tej zaum tub ceev xwm twb soj rawv kuv tus nus lub xov tooj ntawm tes lawm, tiam sis yam uas kuv xav ua thaum lub sij hawm ntawd ces yog nrog nws tham xwb, yog li ntawd kuv thiaj li tsis ua tib zoo txhawj txog kuv tus kheej li. Kuv zais kuv tus kheej thiab caij tsheb kauj vab mus rau ib qho chaw uas deb li kaum tawm mais mus hu nws, tiam sis hu tsis tau. Kuv tsis xav tso tseg, yog li ntawd kuv thiaj li sim hu dua, tiam sis zoo tib yam li qub xwb. Ces kuv thiaj li cia li muaj ib txoj kev xav phem uas paub tsis meej hais tias tej zaum qhov no yog Vajtswv txoj kev tav kev. Yog kuv tus nus lub xov tooj ntawm tes raug soj lawm, ces ntshe nws thiab kuv wb nyob rau hauv qhov kev phom sij lawm. Thaum xav li no, kuv thiaj li thov Vajtswv hais tias, “Vajtswv! Hnub no kuv twb yuav luag poob rau ib qho ntawm Ntxwgnyoog tej tswv yim dag ntawd. Yog Koj cheem kuv tsis ncav sij hawm, ces ntshe kuv twb raug kev phom sij lawm. Vajtswv, Koj paub kuv tej kev qaug zog. Thov coj kuv thiab coj kuv kev, thiab pub kom kuv muaj kev ruaj siab thiab muaj lub zog….” Thaum kuv rov qab los rau hauv kuv tus tswv tsev lub tsev los pe hawm sab ntsuj plig, kuv pom ib zaj lus ntawm Vajtswv cov lus uas hais tias, “Cov neeg uas Vajtswv hais txog tias yog ‘cov neeg muaj yeej’ yog cov neeg uas tseem muaj peev xwm ua tim khawv thiab tswj lawv txoj kev ruaj siab tau li qhov qub thiab muab kev fij ncaj ncees rau Vajtswv thaum nyob rau hauv Ntxwgnyoog txoj kev haub ntxias thiab thaum raug Ntxwgnyoog cuam tshuam, lawv nrhiav pom lawv tus kheej tias nyob rau hauv txoj kev tsaus ntuj. Yog koj tseem muaj peev xwm ua tau lub siab dawb huv rau ntawm Vajtswv xub ntiag thiab tuav tau koj txoj kev hlub tiag rau Vajtswv li qhov qub, txawm yuav muaj dab tsi los xij, koj yeej tseem ua tim khawv rau ntawm Vajtswv xub ntiag, thiab qho no yog yam uas Vajtswv hais txog kev ua ‘tib tug neeg muaj yeej’” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Koj Yuav Tsum Tuav Koj Txoj Kev Mob Siab rau Vajtswv). Vim Vajtswv txoj lus, kuv thiaj li to taub hais tias Vajtswv tsim ib pab los ua cov kov yeej nyob rau tiam kawg. Txawm lawv yuav nyiaj kev mob los sis kev lim tib neeg kom dawb huv ntau npaum li cas, los sis Ntxwgnyoog lub hwj chim yuav cuam tshuam thiab tawm tsam lawv li cas los xij, lawv muaj peev xwm tuav lawv txoj kev ntseeg Vajtswv thiab raws Vajtswv qab kom mus txog qhov kawg. Ces kuv xav txog qhov thaum kuv raug cem thiab raug thuam kom puas koob puas npe, kuv txawm xav phem thiab qaug zog vim kuv ntshai tsam kuv lub koob lub npe yuav raug puas tsuaj. Kuv kuj ntshai tsam kuv tus nus yau tsis to taub, yog li ntawd yuav kom nws muaj kev kaj siab, kuv thiaj li tsis quav ntsej qhov kev nyab xeeb ntawm kuv cov nus thiab cov viv ncaus li. Kuv pom hais tias kuv tsis muaj kev ntseeg los sis tsis muaj lub siab ncaj ncees rau Vajtswv li. Tsis yog kuv tab tom plam kuv tej lus tim khawv lod? Tam sim no tus zaj loj liab ploog ntawd tab tom caum kuv cuag nkaus li kuv yog ib tug niag neeg raug txim, ntxias txhua tus kom tawm tsam thiab cem kuv, thiab ua rau kuv tej txheeb ze to taub kuv yuam kev. Nws txhob txwm ua tej no vim nws xav ua kom kuv xav phem thiab qaug zog thiab yuam kuv kom ntxeev siab rau Vajtswv. Kuv tsis tuaj yeem cia tus zaj loj liab ploog ntawd tej tswv yim dag tiav li. Thaum kuv ras dheev li no lawm, kuv txiav txim siab hais tias: kuv yuav hais lus tim khawv thaum Ntxwgnyoog tawm tsam kom Vajtswv txaus siab, thiab kuv yuav ua kom tus zaj loj liab ploog ntawd poob ntsej muag!
Kev mob nkeeg los kuj yog ib qho teeb meem uas raug rau kuv thaum kuv tab tom khiav thiab. Kuv tau phais ntsws sab laug thaum kuv muaj 15 xyoos lawm, thiab kuv lub ntsws sab xis los kuj tsis zoo ib yam nkaus lawm thiab. Nyob rau lub sij hawm ntawd, kws kho mob hais kom kuv ua pa kom tau cov huab cua zoo ntau ntxiv thiab qoj ib ce kom zoo kom kuv lub ntsws thiaj li muaj zog tuaj. Tiam sis vim tub ceev xwm xav ntes kuv, kuv thiaj li raug yuam kom nkaum nyob rau hauv tsev tau ntev heev. Kuv tawm tsis tau mus rau sab nraud kom tau cov huab cua zoo li. Kuv haj tseem tsis muaj hwv tsam los sawv rau ntawm lub las tshav los qoj ib ce li thiab. Kuv yuav tsum tau ceev faj heev thaum kuv qhib lub qhov rais kom tau qee cov huab cua zoo, vim yog hais tias yog cov neeg zej zog pom kuv, ces yuav tsis yog kuv raug kev phom sij xwb, kuv kuj yuav ua rau cov nus thiab cov viv ncaus uas npog kuv ntawd raug kev phom sij thiab. Tom qab nyob rau hauv ib qho xwm txheej zoo li no tau ntev lawm, ces kuv tus mob ntawm lub cev txawm pib tsis zoo lawm. Kuv hloov tsis tau cov huab cua uas nyob hauv tsev lawm, yog li ntawd kuv thiaj li ua pa nyuaj tuaj, kuv lub hauv siab ceev ceev, thiab tom qab ntawd ces kuv lub ntsws txawm pib mob, thiab kuv pheej hnoos lawm. Thaum kuv txhos caug thov Vajtswv, kuv mloog zoo li dej yuav tawm hauv kuv lub qhov ncauj los li. Thaum kuv pw ua ntsais, kuv tuaj yeem hnov cov dej ntawd txav mus txav los hauv kuv lub ntsws. Tom qab ntawd, thaum nws mob tshaj qub lawm, kuv txawm pib hnoos tau ntshav. Kuv cov nus thiab cov viv ncaus hais kom kuv mus tsev kho mob, tiam sis qhov mus tsev kho mob thiab mus ntsib ib tug kws khob mob ntawd, kuv yuav tsum tau siv kuv daim yuaj uas qhia txog kuv tus kheej los sau npe. Kuv yog ib tug neeg khiav nkaum xwb, yog li ntawd yog muaj qee yam tshwm sim, ces kuv yuav raug ntes ces yuav cuam tshuam rau cov nus thiab cov viv ncaus uas saib xyuas kuv ntawd, yog li ntawd kuv thiaj li tsis tau luag mus tsev kho mob. Ib co nus thiab viv ncaus nqa cov tshuaj ntsuab Suav tuaj rau kuv, tiam sis tom qab siv cov tshuaj ntsuab ntawd tag los kuv tus mob tsis zoo li. Kuv yeej tseem hnoos tau ntshav. Kuv noj tsis taus mov, thiab kuv lub cev tsis muaj zog zuj zus li lawm. Kuv ntshai me ntsis, vim hais tias yog kuv pheej tsis kho kuv tus mob txuas ntxiv thiab nws mob zuj zus tuaj, ces thaum kawg tsis yog kuv yuav cia li tsis ua pa thiab ua tsis taus pa li lawm xwb lod? Qhov ntawd yuav tsis txhais hais tias kuv txoj kev cia siab rau txoj kev cawm dim thiab lub hom phiaj zoo ntawd ploj mus lawm lod? Lub sij hawm uas kuv tau tso txhua yam tseg, siv txhua yam, thiab siv zog ua hauj lwm nyob rau hauv kuv txoj kev ntseeg ntawd yuav tsis muaj qab hau li lod? Kuv yeej tsis xav tuag kiag li. Thaum kuv pom hais tias ib hnub kuv tus mob loj zuj zus thiab kuv hnoos tau ntshav lawm xwb, ces kuv quaj tas li xwb, thiab kuv nyuaj siab heev.
Tom qab ntawd, kuv tshawb nrhiav tej ntu ntawm Vajtswv txoj lus uas raug rau kuv qhov xwm txheej, ces kuv txawm pom zaj lus no uas hais tias, “Yauj tsis tau tham txog tej kev sib pauv mus los nrog Vajtswv, thiab tsis tau thov los sis tsis tau yuam Vajtswv li. Nws txoj kev qhuas Vajtswv lub npe yog vim ntawm Vajtswv lub hwj chim thiab qhov muaj cai loj los tswj kav tag nrho txhua yam, thiab tsis yog nyob ntawm qhov seb nws tau txais cov koob hmoov los sis raug kev puas tsuaj. Nws tau ntseeg tias txawm Vajtswv foom koob hmoov rau tib neeg los sis coj kev puas tsuaj los rau lawv los xij, Vajtswv lub hwj chim thiab qhov muaj cai yuav tsis hloov li, thiab yog li ntawd, txawm hais tias ib tug neeg twg yuav nyob rau kis xwm txheej dab tsi los xij, yuav tsum tau qhuas Vajtswv lub npe. Tias tib neeg tau txais koob hmoov los ntawm Vajtswv yog vim ntawm Vajtswv lub hwj chim kav, thiab thaum kev puas tsuaj los raug tib neeg, yog li, ib yam nkaus thiab, nws yog vim ntawm Vajtswv lub hwj chim kav. Vajtswv lub hwj chim thiab qhov muaj cai tswj kav tag nrho thiab npaj txhua yam txog tib neeg; tej kev tswj tib neeg txoj kev muaj txiag nplua nuj yog tej uas pom tshwm sim ntawm Vajtswv lub hwj chim thiab qhov muaj cai, thiab txawm tias yus txoj kev xam pom yuav zoo li cas los xij, yuav tsum qhuas Vajtswv lub npe. Qhov no yog yam uas Yauj tau ntsib tau pom thiab tau paub rau hauv lub sij hawm ntawm nws lub neej txoj sia. Tag nrho Yauj tej kev xav thiab tej kev ua tau hnov mus txog rau ntawm Vajtswv ob lub pob ntseg thiab tau mus txog rau ntawm Vajtswv xub ntiag lawm, thiab Vajtswv tau pom lawm tias tseem ceeb. Vajtswv saib Yauj qhov kev paub no tseem ceeb, thiab tau saib Yauj muaj nqis vim qhov muaj ib lub siab zoo li no. Lub siab no yeej tau tos ntsoov Vajtswv cov lus txib tas li, thiab nyob rau txhua qhov txhia chaw, thiab txawm tias yuav yog lub sij hawm twg los sis lub chaw twg los xij yeej txaus siab tos txais yam yuav tshwm sim rau nws. Yauj tsis yuam Vajtswv li. Yam uas nws yuam nws tus kheej yog tos rau, lees txais, ntsib, thiab mloog txhua yam ntawm tej kev npaj uas los ntawm Vajtswv los; Yauj tau ntseeg qhov no tias yog nws tes hauj lwm, thiab nws yog kiag yam uas Vajtswv xav tau ntag” (Txoj Lus, Phau 2. Hais Txog Qhov Kev Paub Vajtswv. Vajtswv Tes Hauj Lwm, Vajtswv Tus Moj Yam, thiab Vajtswv Tus Kheej II). Tom qab nyeem Vajtswv cov lus lawm, kuv to taub me ntsis txog Vajtswv lub siab nyiam lawm. Qhov tseeb tiag uas kuv tus mob ntawd mob loj zuj zus tuaj mas yog Vajtswv pom zoo xwb. Nws yog Vajtswv txoj kev sim kuv seb kuv puas muaj txoj kev ntseeg thiab kev mloog lus tseeb xwb. Tiam sis thaum kuv mob, yam uas kuv xav txog ces yog kuv tus kheej txoj sia, txoj kev tuag, thiab lub hom phiaj kawg xwb. Kuv ntshai tias kuv yuav plam kuv txoj kev cawm dim yog tias kuv tuag lawm. Kuv pom hais tias kuv tsuas ntseeg Vajtswv kom tau txais koob hmoov xwb, tias kuv tab tom sim nrog Vajtswv sib khom, tias kuv tsis muaj lub siab zoo thiab qhov laj thawj uas ib tug neeg raug tsim tawm los tsim nyog muaj, thiab tias kuv tsis muaj kev mloog Vajtswv lus kiag li. Kuv xav txog Yauj. Txawm Vajtswv cia nws muaj txiag nplua nuj los sis cia Ntxwgnyoog tshem txhua yam ntawm nws mus los xij, nws qhuas Vajtswv lub npe, thiab ntseeg hais tias txawm Vajtswv muab thiab tshem tawm mus los xij, Vajtswv yeej ncaj ncees. Yauj txoj kev ntseeg Vajtswv mas tsis muaj tej kev txhawb siab ntawm nws tus kheej li, nws tsis xav txog nws tus kheej tej kev ntshaw, tej tshaj thawj, tej yuav poob, thiab txawm Vajtswv yuav ua li cas los xij, nws tuaj yeem sawv nyob rau hauv qhov chaw uas yog ib tug neeg raug tsim tawm los thiab tsuas mloog Vajtswv lus xwb. Nws saib txoj kev mloog Vajtswv lus tseem ceeb dua li nws tus kheej txoj sia lawm. Yauj txoj kev ua neej thiab lub siab zoo ua rau kuv txaj muag heev. Txij thaum kuv ntseeg Vajtswv los txog ntua rau theem no, kuv tau sim los nrog Vajtswv sib khom, thiab kuv yeej tseem ntxeev siab thiab qias vuab tsuab heev li. Tab txawm yog kuv tuag lawm tiag tiag vim kuv tus mob los xij, qhov ntawd yeej yog Vajtswv txoj kev ncaj ncees. Thaum kuv paub li no lawm, kuv thiab li paub tias yuav tiv kev mob nkeeg thiab kev tuag li cas, yog li ntawd kuv thiaj li xav rau kuv tus kheej hais tias, “Txawm kuv tus mob yuav loj npaum li cas los xij, kuv yuav muab kuv tus kheej tso rau Vajtswv ob txhais tes thiab zwm rau Vajtswv tej kev npaj.”
Muaj ib tag kis nyob rau lub Kaum Ib Hlis xyoo 2016 ntawd, kiag thaum kuv xav sawv, kuv lub ntsws txawm pib mob. Kuv siv sij hawm li kaum feeb thiab siv tag nrho kuv lub zog sawv los pheeb rau ntawm hauv ncoo txaj. Nyob rau lub sij hawm ntawd, cov cua txias txias uas tuaj ntawm qhov rais tuaj nkag los rau hauv ntawd ua rau kuv mloog zoo li tag kev cia siab kiag li lawm. Kuv tswj tsis tau kuv tus kheej kom txhob quaj li. Ib pliag tom qab ntawd, kuv txawm pib ua pa ceev zus ceev zus tuaj lawm, kuv lub plawv dhia ceev tuaj, kuv lub cev nruj thoob plaws, kuv tso pa thiab nqus pa nyuaj, thiab meem txom thoob plaws kuv ib ce. Kuv mloog zoo li kuv tuaj yeem ua tsis taus pa thaum twg los tau li, ces kuv thiaj li xav hais tias zaum no lau, tej zaum ntshe kuv yuav tsis muaj sia nyob lawm. Thaum lawv pom kuv zoo li no lawm, cov civ ncaus uas nrog kuv nyob ntawd ntxhov siab heev ces lawv tsis paub tias yuav ua li cas li lawm, yog li ntawd lawv thiaj li hu ib tug viv ncaus uas muaj ib qho chaw kho mob tuaj. Nws maj nroos dai dej rau kuv, tiam sis tab txawm tom qab nws muab rab koob hno tau rau hauv lawm los, cov dej ntawd tsis nqis li vim kuv cov ntshav ntws ntawd twb nres lawm. Tsis muaj kev cia siab li lawm ces nws thiaj li mus rau ntawm lub qhov rooj ntawm chav ntawd, co nws lub taub hau, thiab hais tias, “Peb ua tsis tau li cas lawm.” Ib txhia viv ncaus txawm tig mus thiab so kua muag twj ywm lawm. Kuv paub hais tias kuv tab tom yuav tuag, ces kuv txawm me ntsis ntshai lawm. Kuv ntshai hais tias yog kuv tuag lawm, ces kuv yuav tsis pom qhov muaj lub nceeg vaj tiag tiag. Nyob rau lub sij hawm no, kuv lub siab pheej xav txog Yauj cov lus uas hais tias, “Yehauvas muab, thiab Yehauvas tau muab tshem mus lawm; thov kom Yehauvas lub npe raug qhuas” (Yauj 1:21). Kuv kuj xav txog zaj lus ntawm Vajtswv txoj lus uas kuv twb tau nyeem ua ntej lawm hais tias, “Thaum koj ntsib kev tsim txom, koj yuav tsum muaj peev xwm tso kev txhawj xeeb ntawm sab cev nqaij tawv tseg thiab tsis txhob yws tawm tsam Vajtswv. Thaum Vajtswv zais Nws Tus Kheej ntawm koj lawm, koj yuav tsum muaj peev xwm muaj kev ntseeg raws Nws qab, kom tuav tau koj txoj kev hlub yav dhau los tsis pub kom nws poob los sis ploj mus. Tsis hais Vajtswv yuav ua dab tsi los xij, koj yuav tsum zwm rau Nws tus qauv thiab npaj foom phem rau koj tus kheej sab nqaij tawv zoo dua li uas yws tawm tsam Nws. Thaum koj raug kev sim siab, koj yuav tsum ua rau Vajtswv zoo siab, txawm hais tias koj yuav quaj los kua muag iab los sis tsis txaus siab rau qee yam hom phiaj uas koj nyiam. Tsuas yog qhov no xwb thiaj li yog kev hlub thiab kev ntseeg tseeb tiag” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Cov Tib Neeg Uas yuav Raug Ua Kom Zoo Tshaj Plaws Yuav Tsum Raug Kev Tsim Kho Kom Zoo). Vajtswv cov lus txhawb tau kuv lub zog heev. Yav dhau los kuv ntshai txoj kev tuag, yog li ntawd kuv thiaj li tsis mloog Vajtswv lus kiag li, tiam sis zaum no kuv tsis mloog Vajtswv lus tsis tau ntxiv lawm. Tab txawm yog kuv tuag lawm los xij, kuv tsis muaj lus yws li lawm. Kuv yog ib tug neeg uas raug tsim tawm los, yog li ntawd kuv tsim nyog mloog Vajtswv lus. Tsis tas li ntawd xwb, kuv muaj hmoo uas tau txais Vajtswv txoj moo zoo ntawm tiam kawg thiab hnov ntau qhov tseeb uas cov neeg dawb huv nyob rau txhua tiam dhau los yeej tsis tau hnov dua li. Qhov no twb yog Vajtswv txoj hmoov hlub thiab kev pab kuv lawm. Tab txawm yog kuv yuav tuag los xij, kuv yeej tseem yuav tsum tau ua Vajtswv tsaug! Yog li ntawd, kuv thiaj li peem tiag hais ob lo lus uas hais tias—ntawv, cwj mem. Cov viv ncaus ntawd txawm maj nroos nqa ntawv thiab cwj mem los, ces kuv txawm pheeb rau cov viv ncaus ntawd thiab siv tag nrho kuv lub zog los sau rau hauv phau ntawv hais tias: Vajtswv yeej ncaj ncees mus ib txhis li! Nws yeej ib txwm tsim nyog peb qhuas! Thaum lub sij hawm uas kuv tso tseg tsis sau ntawv lawm, ces kuv txawm pom tsis tseeb zuj zus lawm.
Cov viv ncaus ntawd quaj thiab tuav kuv txhais tes, txhawb kuv zog kom vam khom rau Vajtswv thiab ua siab ntev, tiam sis thaum ntsib qhov tseeb tiag nyob rau ntawm kuv xub ntiag lawm, kuv mloog zoo li kuv tiv tsis taus ntxiv li lawm. Kuv mloog zoo li kuv yuav muaj tsis taus txoj sia nyob lawm. Nyob rau lub sij hawm ntawd mas, kuv mloog cuag nkaus li tsis muaj kev cia siab li lawm, thiab tej suab uas nrov ib puag ncig kuv ploj lawm zuj zus. Tiam sis kiag thaum kuv mloog hais tias tsis muaj kev cia siab li lawm ntawd, txawm muaj ib zaj lus ntawm Vajtswv cov lus tshwm plaws los rau hauv kuv lub siab yam meej heev hais tias, “Tib neeg txoj kev ntseeg yog qhov cheem tsum thaum muaj qee yam uas lub qhov muag tsis tuaj yeem pom tau, thiab koj txoj kev ntseeg yog qhov cheem tsum thaum koj tsis tuaj yeem tso koj cov kev xav phem mus. Thaum koj tsis muaj kev pom meej txog Vajtswv txoj hauj lwm, yam uas cheem tsum ntawm koj yog kom muaj kev ntseeg thiab kom muaj txoj kev sawv khov kho thiab sawv ua tim khawv. Thaum Yauj nce txog qib no lawm, Vajtswv tshwm los rau nws pom thiab hais lus rau nws. Qhov ntawd yog tias, nws tsuas yog los ntawm koj txoj kev ntseeg xwb, uas koj thiaj li muaj peev xwm pom Vajtswv, thiab thaum koj muaj kev ntseeg lawm Vajtswv yuav ua kom koj zoo tshaj plaws. Yog tsis muaj kev ntseeg, Nws tsis tuaj yeem ua tau li no” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Cov Tib Neeg Uas yuav Raug Ua Kom Zoo Tshaj Plaws Yuav Tsum Raug Kev Tsim Kho Kom Zoo). Qhov kev qhia hauv Vajtswv txoj lus ntawd nplij kuv lub siab thiab txhawb kuv lub zog heev. Kuv txoj sia yog los ntawm Vajtswv los, thiab txawm kuv ciaj thiab tuag los hnub ntawd yog nyob rau hauv Vajtswv ob txhais tes. Yog Vajtswv tsis pom zoo, ces txawm Ntxwgnyoog lub hwj chim phem thiab kab mob los yeej txov tsis tau kuv txoj sia li. Tsuav kuv tseem muaj ib txoj pa nyob hauv kuv xwb, ces kuv yeej tso tseg tsis tau, thiab kuv yeej tsis qaug zog los sis tag kev cia siab rau Vajtswv li. Kuv thov Vajtswv hais tias, “Vajtswv! Txawm yog kuv tuag hnub no los xij, kuv xav hais tias Koj yeej ib txwm nyob rawv ntawm kuv ib sab. Vajtswv, kuv xav muab kuv tus kheej tso plhuav rau Koj tag nrho, thiab muab kuv txoj sia thiab txoj kev tuag ntawd tso rau ntawm Koj tag nrho! Kuv ntseeg hais tias txawm Koj yuav ua dab tsi los xij, Koj yeej ncaj ncees. Kuv los rau ntawm Koj lub xub ntiag nyob rau tiam neej no thiab tau txais qee qhov kev paub txog Koj, yog li ntawd tab txawm yog kuv tuag los xij, kuv yuav tsis muaj lus yws thiab tsis tu siab li. Yog kuv tsis tuag hnub no, yog kuv muaj txoj sia nyob mus ntxiv, kuv txaus siab hlo caum qhov tseeb, ua kuv tes dej num kom zoo, thiab pauj Koj txoj kev hlub loj rov qab.” Nyob rau sij hawm ntawd, muaj ib tug viv ncaus txawm tso ib zaj nkauj qhuas Vajtswv uas hu ua “Kev Hlub Dawb Huv Tsis Muaj Chaw Thuam,” “‘Kev hlub,’ yog hais txog ib txoj kev hlub tshua uas dawb huv thiab tsis muaj chaw thuam, qhov koj siv koj lub siab los hlub, los xav tawm, thiab los ua tib zoo xav. Hauv txoj kev hlub yeej tsis muaj tus yam ntxwv, tsis muaj yam dab tsi los thaiv tau, thiab tsis muaj qhov sib nrug deb. Hauv txoj kev hlub yeej tsis muaj kev ua xyem xyav, tsis muaj qhov txawj dag, thiab tsis muaj kev txawj ntxias li. Hauv txoj kev hlub yeej tsis muaj kev sib pauv los sis tsis muaj qhov ua kom tsis zoo li. Yog tias koj hlub tiag, ces koj yuav zoo siab hlo muab koj tus kheej, yuav zoo siab tiv txoj kev txom nyem, koj yuav sib raug zoo nrog Kuv…” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Muaj Coob Leej Raug Hu, tiam sis Muaj Tsawg Leej Thiaj Li Raug Xaiv Xwb). Tom qab hnov cov ntsiab nkauj no lawm, mloog zoo li kuv ua txhaum loj heev. Tom qab ntseeg Vajtswv los tau ntev heev lawm, kuv yeej tsis tau muab Vajtswv ib lo lus twg coj los xyaum ua raws li, thiab kuv haj yam tsis tau hlub Vajtswv kiag li thiab. Tam sim no, txawm kuv yuav ciaj thiab tuag los xij, kuv tsuas xav mloog Vajtswv lus lawm xwb. Thaum kuv tab tom xav txog Vajtswv cov lus, cia li muaj ib yam txuj ci tseem ceeb tshwm sim. Tos kuv paub xwb, kuv txoj pa maj mam ntaug, kuv ua pa tsis tshua ceev, thiab kuv lub plawv ntaug lawm ntau lawm. Thaum cov viv ncaus ntawd pom hais tias kuv zoo lawm, lawv ua Vajtswv tsaug yam zoo siab heev, thiab kuv pom Vajtswv tej num uas tseem ceeb kawg li. Txawm kuv rov qab ua taus pa li qub lawm los xij, kuv lub cev sab heev li lawm, yog li ntawd kuv cov viv ncaus thiaj li tseem hais kom kuv mus pw tsev kho mob. Lawv muaj ib tug muab nws daim yuaj uas qhia txog nws tus kheej rau kuv, tiam sis kuv ntshai tsam cuam tshuam nws. Nws tuav kuv txhais tes thiab hais tias, “Cia peb thov Vajtswv ua ke. Qhov tseem ceeb tam sim no yog mus rau tsev kho mob xwb. Cia li thov Vajtswv kom ua siab ntev xwb ces yeej tsis ua li cas lawm.” Kuv tu siab heev uas kuv tsis paub xyov yuav hais li cas li lawm, thiab kuv tsis muaj ib lub zog los hais lus li, yog li ntawd kuv tsuas ncaw hau, paub hais tias tag nrho tej no yog Vajtswv txoj kev hlub xwb. Tom qab mus txog rau hauv tsev kho mob lawm, txawm tus kws kho mob ntawd tsis paub tseeb txog kuv daim yuaj uas qhia txog kuv tus kheej los xij, lawv tsis tshawb xyuas tias kuv yog leej twg tiag tiag kom ntxaws ntxaws li, thiab qhov kev kho mob ntawd mus tau zoo heev. Kuv tus mob zoo zuj zus tuaj, thiab tau li ib lub lim tiam tom qab xwb kuv tawm tsev kho mob los lawm.
Tom qab kuv tawm hauv tsev kho mob los lawm, kuv rov qab ua kuv lub neej nkaum dua. Vim cov nus thiab cov viv ncaus uas nyob puag ncig kuv ntawd pheej raug ntes tas li, kuv thiaj li pheej nquag tsiv mus rau ib qho chaw tshiab, uas yog ib qho hauj lwm nyuaj heev rau kuv. Kuv yuav tsum tau looj ib daim ntaub npog qhov ntswg thaum kuv mus rau ub rau no kom koob yees duab thiaj li ntes tsis tau kuv, tiam sis qhov ntawd ua rau kuv ua pa nyuaj. Muaj ib zaug, thaum kuv tab tom taug kev looj daim ntaub npog qhov ntswg ntawd, kuv ua tsis taus pa li. Qhov mus caij tsheb npav ntawd mas nyuaj heev, thiab kuv tau mus caij ib zaug, muaj tib neeg coob heev nyob rau hauv, ces cov huab cua tsis txaus kuv thiaj li yuav tsum tau siv zog ua pa, thiab nqus pa. Kuv lub hauv siab ceev mob heev, thiab kuv ob lub qhov muag cia li hlaws hlo lawm xwb. Kuv xav tias yog kuv tsis tawm ntawm lub tsheb npav ntawd mus, ces tej zaum kuv yuav tuag rau hauv li. Kuv thov thiab hu Vajtswv tas zog hauv kuv lub siab, ces tom qab ntawd me ntsis xwb kuv txawm pib zoo tuaj lawm. Tom qab hloov chaw ntau zaus lawm, ua rau kuv qaug zog, thiab kuv ntshai tsam kuv lub cev yuav tiv tsis taus, thiab tias txoj kev tsim txom no yuav tua kuv yog zoo li no mus ntxiv. Tom qab ntawd, kuv pom ib zaj lus ntawm Vajtswv cov lus uas hais tias, “Txoj kev ntseeg thiab kev hlub ntau tshaj plaws mas yog cheem tsum tau los ntawm peb rau hauv theem no ntawm txoj dej num. Peb yuav rhais ruam yuam kev los ntawm ib qho kev tsis xyuam xim me me, vim theem no ntawm txoj dej num mas txawv ntawm tag nrho cov theem uas muaj dhau los lawm: Yam uas Vajtswv tab tom ua kom zoo tiav log yog tib neeg txoj kev ntseeg, uas yog ob qho ntawm qhov pom tsis tau thiab tuav tsis tau. Yam uas Vajtswv ua yog hloov cov lus los ua txoj kev ntseeg, los ua txoj kev hlub, thiab los ua txoj sia. Tib neeg yuav tsum ua mus kom txog ib theem uas lawv thev taus ntau puas zaus ntawm tej kev lim kom tib neeg dawb huv thiab muaj kev ntseeg kom ntau dua Yauj, uas cheem tsum kom lawv thev taus kev txom nyem thiab txhua yam ntawm kev tsim txom yam tsis tso Vajtswv tseg li. Thaum lawv ua raws li ntawd mus txog thaum tuag, thiab muaj kev ntseeg loj rau Vajtswv lawm, ces theem no ntawm Vajtswv txoj dej num thiaj raug ua tiav hlo lawm” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Txoj Kev … (8)). Yeej muaj tseeb tias txoj kev raws Vajtswv qab ntawd mas yeej ua theem thiab nyuaj heev li. Pawg Koom Tsham txoj kev tsim txom cov Ntseeg Vajtswv mas yeej tsis muaj hnub tso tseg li. Yog peb ntseeg Vajtswv, peb ntsib txoj kev phom sij uas raug ntes, raug tsim txom, los sis haj tseem raug tua lub sij hawm twg los tau thiab, ces yog Vajtswv siv tej xwm txheej zoo li no los ua kom tib neeg txoj kev ntseeg zoo tiav log ntag. Tam sim no, tom qab raug tej kev tsim txom thiab kev ceeb laj txom nyem no lawm, kuv paub hais tias yog ib tug neeg uas ntseeg thiab raws Vajtswv qab lawm ces kuv kuj yuav tsum tau nyiaj txoj kev txom nyem no thiab. Thaum kuv xav txog qhov no, kuv txoj kev ntseeg hloov dua tshiab lawm.
Rov qab tig saib txog kuv txoj kev ntseeg Vajtswv los tau ntau lub xyoo lawm, kuv pom hais tias Tsoom Fwv Koom Tsham Suav siv txhua txoj kev los thawb kuv, ib kauj ruam zuj zus, mus rau qhov kawg kiag, tiam sis Vajtswv cov lus tau coj thiab qhia kuv tas li. Tam sim no, kuv paub Tsoom Fwv Koom Tsham Suav lub ntsiab tseeb uas phem lawm, thiab kuv twb muaj kev to taub qee yam txog txoj kev tsis dawb huv ntawm qhov nrhiav koob hmoov nyob rau hauv kuv txoj kev ntseeg lawm, thiab kuv twb kawm paub tias yuav ua li cas kom tsim nyog nyob rau ntawm Vajtswv lub xub ntiag lawm. Kuv kuj pom Vajtswv tej num uas peem fwj heev lawm thiab. Thaum kuv yuav luag tuag, Vajtswv coj kuv kev mus rau txoj kev ciaj sia, thiab kuv txoj kev ntseeg Vajtswv ruaj khov dua lawm. Tag nrho tej no yog tej uas kuv yeej yuav tsis tau txais nyob rau hauv ib qho xwm txheej uas tau zoo nyob kiag li. Kuv txiav txim siab hais tias txawm Tsoom Fwv Koom Tsham Suav yuav tsim txom kuv li cas, los sis txawm txhua yam yuav nyuaj los sis tsis yooj yim li cas los xij, kuv yuav raws Vajtswv qab, ua kuv tes dej num kom zoo, thiab pauj Vajtswv txoj kev hlub rov qab.
