45. Thaum Tawm ntawm Tsev Kho Mob Rau Neeg Vwm

Thaum lub Ib Hlis Xyoo 2012 lawm. Ib tug neeg uas nyob sib ze tau qhia txog Vajtswv Tus Uas Muaj Hwj Chim Loj Kawg Nkaus txoj moo zoo ntawm tiam kawg rau kuv, Kuv tus kheej sab heev vim txoj kev khiavib lub lag luam, ua rau kuv txoj leeg ntsag mob nruj nreem thiab ib sab xwb pwg txhav tag lawm. Mob tshaj plaws li es ua rau kuv ntsis tsis taus kuv tej plaub hau los sis hnav tsis taus ris tsho li lawm, thiab noj tshuaj los yeej pab tsis tau li lawm. Tom qab ntseeg Vajtswv lawm ces kuv cia li zoo hlo lawm, yog li ntawd kuv tus txiv thiab tus tub thiaj li zoo siab heev, thiab txhawb kuv txoj kev ntseeg heev li. Tab sis tau ob peb hlis tom qab ntawd, kuv tus txiv pom qee yam lus dag uas Tsoom Fwv Koom Tsham Suav tau tshaj tawm rau hauv os lais txog Pawg Ntseeg ntawm Vajtswv Tus Uas Muaj Hwj Chim Loj Kawg Nkaus ces txawm pib tawm tsam kuv txoj kev ntseeg. Nws hais tias, “Tsoom fwv tawm tsam koj tus Vajtswv no. Yog hais tias thaum kawg koj raug ntes vim qhov ntawd, ces nws yuav cuam tshuam wb tus tub txoj hauj lwm. Koj tsim nyog tso qhov no tseg.” Muaj ib zaug, thaum kuv nyuam qhuav mus tshaj tawm txoj moo zoo rov qab los, nws txawm ua ntsej muag dub nciab hais tias, “Lub Chaw Saib Xyuas Kev Ruaj Ntseg Hauv Teb Chaws tau hu kuv kom mus ntsib thiab nug seb koj puas yog ib tug ntseeg, thiab yog hais tias yog, no ces koj yuav tsum tau muab koj cov phau ntawv hais txog Vajtswv ntawd cob rau lawv. Lawv kuj hais kom kuv txheeb xyuas cov tib neeg nyob hauv ib pawg duab ntau ntaus. Yog hais tias koj tseem ua li no mus ces koj kawg raug ntes.” Kuv txawm teb tias, “Kuv tab tom taug txoj kev hauv lub neej uas yog lawm, thiab kuv yeej tsis tau ua ib yam dab tsi txhaum cai li. Lawv tsis muaj cai ntes kuv!” Nws thiaj li hais tias, “Koj mas tsis paub dab tsi li lau! Tsoom Fwv Koom Tsham Suav yuav rhuav tshem nej cov ntseeg tiag tiag li. Yog hais tias koj tseem pheej ntseeg mus, lawv yuav ntes koj thiab ntaus koj, ces koj yuav pom tias lawv phem npaum li cas.” Ces kuv txawm xav rau kuv tus kheej tias yog kuv tus txiv tawm tsam lawm, ces qhov taug txoj kev no mas yuav nyuaj xwb xwb li. Ces kuv thiaj li thov Vajtswv nyob rau hauv kuv lub siab thiab thov kom Nws coj kuv kev mus rau txoj kev taug tom ntej. Kuv kuj txiav txim siab tias txawm kuv tus txiv yuav tav kuv kev los xij, kuv yeej yuav tsis tso kuv txoj kev ntseeg tseg li.

Ntawd yog thaum lub Kaum Ob Hlis Xyoo 2012, yuav luag tau ib lub xyoos tom qab kuv los ua ib tug ntseeg lawm. Kuv raug ntes thiab raug kaw tau tsib hnub vim hais tias muaj ib tug neeg tau hais tawm tias kuv tshaj tawm txoj moo zoo. Hnub uas lawv tso kuv tawm ntawd, muaj ib tug tub ceev xwm ceeb toom rau kuv tias, “Thaum koj tawm lawm, qhov zoo dua ces tso qhov no tseg los sis tsis li ntawd ces koj yuav kawg raug kaw rau hauv nkuaj xwb xwb li!” Tom qab ib nrab teev los sis tshaj ntawd, kuv tus txiv tuaj tos kuv nws lub ntsej muag mas ntxim li chim siab heev thiab ntxim ntshai tshaj. Nws tawm hauv tsheb los thiab nkag los rau hauv tsev tub ceev xwm. Kuv tsis paub tias xyov lawv sib tham txog dab tsi tod, ces tom qab ntawd nws thiaj li coj kuv los tsev lawm. Thaum wb los txog tom tsev, kuv pom kuv tus nus, tus niam laus, thiab tus txiv laus puav leej tuaj tos kuv nyob rau sab nrauv. Kuv xav tias qhov laj thawj uas lawv puav leej tuaj rau tod mas yog tuaj cheem kom kuv txhob xyaum ua raws kuv txoj kev ntseeg lawm ntag. Tshaj qhov ntawd, kuv tus nus yog ib tug thawj coj hauv ib lub nroog, thiab nws twb yeej hais ua ntej rau kuv lawm tias kom kuv tso qhov no tseg vim hais tias nws twb pom tag nrho txhua yam ntawm Pawg Koom Tsham tej lus dag nyob hauv os lais lawm mas yog kev teem txim thiab hais lus thuam mom Pawg Ntseeg xwb. Nws kuj hais tias kuv txoj kev ntseeg tuaj yeem cuam tshuam rau kuv tus tub txoj hauj lwm, thiab qhov ntawd tuaj yeem cuam tshuam rau nws ib yam nkaus thiab, uas ua rau nws poob taus nws txoj hauj lwm ua ib tug nom. Kuv paub tias tej zaum qhov nws tuaj tod mas yog tuaj sim nias kom kuv tso kuv txoj kev ntseeg tseg dua xwb. Ces kuv thiaj li thov Vajtswv nrawm nroos, thov kom Vajtswv coj kuv kev thiab tiv thaiv kuv kom txhob raug tej kev cuam tshuam no. Kiag thaum kuv tawm hauv tsheb los, kuv tus nus txawm los rau ntawm kuv thiab hais luag nyav tias, “Koj yuav tsum tso tej hauj lwm ntawm tus Vajtswv no tseg. Es cia li nyob hauv tsev xwb thiab saib xyuas txhua yam ntawm no. Txhob tawv tawv ncauj nawb. Koj tus tub twb muaj ib txoj hauj lwm zoo lawm, thiab qhov ntawd yuav phom sij yog hais tias koj pheej ua li no mus ntxiv. Nws yuav ntxub koj mus tag ib txhis.” Tom qab ntawd kuv tus txiv laus txawm nthe rau kuv, tom hniav qawv thiab yoj teg yim taw tias, “Ntseeg Vajtswv lod? Vajtswv nyob qhov twg? Kuv tsis ntseeg Nws es kuv twb muaj ib lub neej zoo zoo ne!” Ces kuv tus txiv txawm hais npau taws ntsuav tias, “Yuav tsis yooj yim rau wb tus tub kom tau ib txoj hauj lwm zoo, kom luag qhuas. Yog hais tias nws poob nws txoj hauj lwm vim yog koj txoj kev ntseeg ne?” Kuv tus niam laus los hais rau kuv tias, “He, koj yuav tsum tso qhov no tseg nawb. Koj tus txiv mas coj zoo heev rau koj thiab koj tus tub muaj ib txoj hauj lwm zoo. Qhov ntawd tsim nyog txaus lawm. Tsuas saib xyuas koj tsev neeg kom zoo xwb.” Thaum hnov tag rho li no lawm, kuv thiaj li xav txog kuv tus txiv thiab qhov kuv sib zog ua hauj lwm kom tau nyiaj txaus rau wb tus tub txoj kev kawm, thiab tam sim no nws twb npaj tau ib lub neej zoo lawm, uas yeej tsis yog ib txoj hauj lwm yuav tau yooj yooj yim li. Yog hais tias Tsoom Fwv Koom Tsham Suav tshem nwstxoj hauj lwm tawm vim kuv txoj kev ntseeg, ntshe nws yuav ntxub kuv mus tag nws sim neej! Tab sis tom qab ntawd kuv ho xav tias qhov muab kuv txoj kev ntseeg tso tseg yuav yog kev ntxeev siab rau Vajtswv, thiab kuv xav txog qhov tseeb uas kuv tau xyaum los ua ib tug ntseeg. Kuv paub tias kev pe hawm Vajtswv mas yog qhov yog rau ib tug raug tsim tawm los, yog txoj kev taug uas yog lawm, thiab Vajtswv tau kho kuv tej kev raug mob zoo lawm thiab. Kuv yuav coj li qhov kev xav ntawd tsis tau. Ces kuv thiaj li thov Vajtswv twj ywm nyob rau hauv kuv lub siab tias, “Vajtswv, kuv tsev neeg tas zog yuam kom kuv tso kuv txoj kev ntseeg tseg, ces ua rau kuv tu siab heev. Thov muab txoj kev ntseeg thiab lub zog rau kuv.” Ces kuv txawm nco tau cov lus uas los ntawm Vajtswv los no tias: “Nyob rau txhua kauj ruam ntawm tes dej num uas Vajtswv ua rau hauv tib neeg, sab nraud ces nws tshwm muaj kev sib tshuam mus los ntawm tib neeg, li uas yog yug ntawm tib neeg tej kev npaj los sis los ntawm tib neeg txoj kev sib cuam tshuam. Tab sis nyob rau tom qab, txhua kauj ruam ntawm tes dej num, thiab txhua yam uas tshwm sim, yog ib lo lus twv los ntawm Ntxwgnyoog rau ntawm Vajtswv xub ntiag, thiab cheem tsum tib neeg tuav lawv tej lus tim khawv khov kho rau Vajtswv. Muab thaum Yauj raug sim coj los ua piv txwv: Nyob rau tom qab, Ntxwgnyoog muaj ib qho lus twv nrog Vajtswv, thiab yam uas muaj tshwm sim rau Yauj yog tej kev ua ntawm tib neeg thiab kev sib cuam tshuam ntawm tib neeg. Nyob rau tom qab txhua kauj ruam ntawm tes dej num uas Vajtswv ua rau hauv nej yog Ntxwgnyoog lo lus twv nrog Vajtswv—nyob rau tom qab nws yog ib ntsug rog” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Txoj Kev Hlub Vajtswv Xwb Thiaj Yog Txoj Kev Ntseeg Vajtswv Tiag). Kuv pom tias qhov kuv tsev neeg pheej koom siab coj li ntawd rau rau kuv mas qhov tseeb tiag ces yog Ntxwgnyoog tab tom sim thiab tawm tsam kuv xwb. Kuv tsev neeg raug Pawg Koom Tsham tejlus dag lawm thiab tab tom siv kuv tus tub tes hauj lwm los hem kuv es kom kuv ntxeev siab rau Vajtswv. Kuv yuav tsis poob rau Ntxwgnyoog lub tswv yim dag, tab sis kuv yuav tsum tau ua tim khawv rau Vajtswv. Ces qhov ntawd kuj tshwm sim rau kuv thiab tias tab txawm kuv tus tub yuav muaj txoj hauj lwm dab tsi los xij yog nyob rau ntawm Vajtswv txoj kev cai thiab tej kev npaj tseg tag nrho lawm. Tsis muaj leej twg tuaj yeem hloov qhov ntawd. Yog li ntawd kuv txawm hais tias, “Qhov muaj kev ntseeg mas thiaj li yog txoj kev taug uas yog nyob rau hauv lub neej, thiab kuv yeej tsis tau ua txhaum ib txoj kev cai li. Qhov Pawg Koom Tsham tau ntes kuv thiab muab nej cab los rau qhov ntawd mas yog Pawg Koom Tsham tus kheej txoj kev phem. Nej tsis tsim nyog muab kuv caij tsuj nrog rau qhov ntawd, los sis tav kuv txoj kev ntseeg kev. Nej sawv daws puav leej paub tias ua ntej kuv ntseeg Vajtswv, kuv tej kev raug mob mas phem tshaj thiab kuv twb saib xyuas tsis taus kuv tus kheej li. Kuv rov qab zoo los tom qab tau txais txoj kev ntseeg lawm, thiab qhov no puav leej yog vim Vajtswv txoj hmoov hlub xwb. Vajtswv Tus Uas Muaj Hwj Chim Loj Kawg Nkaus yog tus tseem Vajtswv, yog tus Cawm Seej uas tab tom los. Tej kev puas tsuaj mas muaj loj zuj zus ntxiv tuaj xwb, thiab Vajtswv Tus Uas Muaj Hwj Chim Loj Kawg Nkaus tau nthuav tawm ntau qhov tseeb lawm. Nws ua li ntawd los cawm tib neeg ntiaj teb los ntawm tej kev txhaum, los ntawm tej kev puas tsuaj, kom peb thiaj li muaj Nws txoj kev tiv thaiv thiab dim tej kev puas tsuaj, thiab nkag mus rau hauv Nws lub nceeg vaj tau. Yog hais tias kuv cia Pawg Koom Tsham txoj kev tsim txom los ua kom kuv ntshai es tawm ntawm kuv txoj kev ntseeg, ces kuv yuav plam kuv lub hwv tsam tau txais kev cawm dim. Txawm nej tawm tsam kuv li cas los xij, kuv cog lus tias kuv yuav taug kuv txoj kev ntseeg mus.” Ces kuv tus txiv, lub siab yeej tsis zoo li, los sawv kiag ntawm kuv xub ntiag thiab taw tes nki rau kuv, hais tias, “Koj yog ib tug uas hloov tsis tau li!” Tom qab ntawd nws thiab kuv tus nus txawm sib ntsia ces nkag mus rau hauv tsev ua ke thiab pib tham txog ntau yam lawm. Kuv paub tsis meej. Xyov nkawv tab tom sib tham zais ntsis txog dab tsi? Tsis ntev ntawd nkawv rov qab los, ces kuv tus nus txawm ntsia kuv tus niam laus ua lub ntsej muag luag nyav twj ywm hais tias, “Los peb tawm mus noj dab tsi tso!” Kuv tus niam laus thiab kuv tus vauv xeeb ntxwv txawm los rau ntawm kuv ces ib leeg rub kuv ib sab tes mus rau tom lub tsheb. Kuv mloog zoo li muaj qee yam tsis yog lawm. Ces kuv thiaj li tas zog nchos kom nkawv ob txhais tes plam thiab hais tias kuv tsis xav mus, tab sis nkawv muab kuv thawb ntiag nkag mus rau hauv lub tsheb lawm. Tom qab tsav tsheb mus tau li ib nrab teev lawm ces mam li nres, thiab ua rau kuv ceeb tag li, kuv pom tias peb nyob rau ntawm ib lub tsev kho mob puas hlwb lawm. Kuv tus txiv, tus nus thiab tus txiv laus puav leej tawm hauv tsheb los. Kuv yoob tag. Puas yog lawv tab tom muab kuv xa tuaj rau ntawm ib lub chaw kho neeg vwm tiag tiag li? Kuv xav tias kuv yuav tsum tawm hauv tsheb es khiav mus, tab sis kuv raug xauv rau hauv tsheb lawm. Kuv pom lawv sawv daws tab tom taug kev mus rau hauv tsev kho mob, ces thiaj li paub txhua yam meej kiag tam sid. Lawv twb npaj qhov no tas li los lawm. Lawv tau dag kuv kom nkag mus rau tod, hais tias peb tawm mus noj mov. Kuv mas npau taws thiab qias tshaj. Kuv yeej ntseeg tsis tau tias lawv yuav coj kuv mus tod, lawv mas tsis muaj siab ntsws kiag li. Cov niag uas hu ua cov yus hlub! Kuv rov xav txog qhov, thaum kuv tus xiv ntsib kuv rau tim tsev tub ceev xwm, nws tau tham rau tub ceev xwm nyob sab hauv tsev me ntsis li cas, thiab qhov kuv tsev neeg nyias sib ntsia nyias zom zaws li cas thaum lawv hais tias peb tawm mus nrhiav noj mov tso. Ces kuv thiaj li ras heev tias qhov no mas yeej yog ib txoj kev npaj dag los ntawm Pawg Koom Tsham xwb xwb li. Lawv tas zog ua txhua yam los ua kom kuv ntxeev siab rau Vajtswv. Kuv chim siab heev uas piav qhia tsis tau tawm thiab kua muag ntws sis tawm ntawm kuv ob lub qhov muag los. Kuv thiaj li hais npau taws ntsuav rau lawv tias, “Nej tab tom coj kuv tuaj rau ntawm no kom tau tsim txom kuv, vim kuv tsuas ntseeg Vajtswv xwb. Nej yog cov uas vwm ntag! Qhov nej tab tom ua no mas tsis yog tag nrho li lawm, puav leej tsis muaj laj thawj li. Nej yuav mag ua pauj xwb lau.” Kiag tam sis ntawd, muaj ob peb tug neeg ua hauj lwm tawm hauv tsev kho mob los, nqa daim ntawv txwv los rau kuv coj. Kuv tus txiv, tus nus, thiab tus txiv laus sawv tod ntsia ntsoov kuv, yeej tsis hais ib lo lus li. Kuv mob siab thiab tag kev cia siab nrho li lawm. Nyob rau hauv kuv tej npau suav kuv yeej xav tsis txog tias kuv tsev neeg, tsuas tiv thaiv lawv tus kheej tej kev ntshaw, zam kom dhau qhov raug cuam tshuam, yuav mloog Pawg Koom Tsham tej lus dag es coj kuv mus rau hauv ib lub tsev kho mob puas hlwb uas yog qhov chaw kuv yuav raug tsim txom, uas yeej tsis xav tias xyov kuv yuav ciaj los sis yuav tuag li, thaum uas kuvyeej zoo neej hlo. Lawv tsis yog ib hom neeg uas kuv hlub li—lawv yog cov niag dab phem. Thaum xav li ntawd, kuv teev tsis tau kuv cov kua muag mus ntxiv li lawm. Kuv haj tseem ntsia tsis taus lawv li lawm thiab. Kuv thiaj li hais npau taws ntsuav rau cov neeg ua hauj lwm tias, “Kuv yeej tsis muaj mob dab tsi li! Lawv rau tswv yim dag coj kuv tuaj rau ntawm no xwb. Lawv yuam kuv tuaj kho rau ntawm no vim kuv ntseeg Vajtswv xwb. Nej yeej tsis tau saib qhov no li. Vim li cas nej thiaj li txwv kuv mas?” Tab sis lawv yeej tsis quav ntsej kuv hlo li.

Lawv lees txais kuv li yog ib tug neeg mob loj thiab muab kuv xauv tseg rau hauv Kem 1 uas yog qhov tag nrho tej kev taug mus los, tej qhov rooj thiab qhov rai muaj las hlau thaiv du lug. Kuv chav dav xwm fab xwm yeem li thaj tsam 40 los sis 50 fij thiab cuab ntshuv. Tsuas muaj ib lub txaj nrog rau ib daim pam pua qub qub uas tseem lo zis laus thoob plaws. Muaj ib tug ntxhiab tsw zis laus ntxiag. Yeej tsis muaj chav plob nyob hauv chav ntawd li, tsuas muaj ib chav da dej rau sawv daws siv ua ke uas raug xauv cia lawm xwb. Txhua zaus uas kuv xav siv chav plob ces kuv yuav tsum tau mus nrhiav ib tug neeg ua hauj lwm, thiab yog lawv tsis khoom, lawv yuav tsis qhib qhov rooj. Ces kuv yuav tsum tau uv. Tsev kho mob mas yeej muaj tej suab ntsaj ntawm cov neeg puas hlwb puv nkaus tas li. Tej thaum lawv hu nkauj los sis quaj, los sis pib qws tias, “Tso kuv tawm! Tso kuv tawm!” Lawv kuj ntaus tej las hlau tsis tseg li thiab. Tag nrho lub chaw no muaj suab nrov zoo li suab dab thiab suab hma puv nkaus. Qhov ntawd ua rau kuv ntshai heev. Kuv mloog zoo li tsis muaj chaw rau tib neeg lil awm. Tsuas yog vim kuv txoj kev ntseeg xwb, kuv thiaj li raug Pawg Koom Tsam ntes thiab xauv, thiab kiag thaum kuv dim plaws lawm, ces kuv tus kheej tsev neeg ho coj kuv mus tsim txom rau hauv ib lub tsev kho neeg vwm. Qhov ntawd yog tawm ntawm ib qho xwm txheej mus ntsib ib qho xwm txheej uas haj tseem phem tshaj, nkag mus rau hauv lub qhov tsom ntxhuav. Kuv yuav ua li cas nyob tau li ntawd? Kuv yim xav txog qhov ntawd mas yim xav phem, ces txawm pib quaj. Thaum kuv quaj, kuv xav txog peb cov nus thiab cov viv ncaus nyob hauv cov rooj sib txoos ua ke, hu nkauj qhuas Vajtswv. Kuv xav nyeem Vajtswv cov lus thiab ua kuv tes dej num nrog lawv heev, tab sis kuv tawm tsis tau, thiab tsis paub tias xyov yuav raug ceev rau tod ntev npaum li cas. Thaum twg kuv txoj kev txom nyem mam li xaus? Kuv thiaj li thov Vajtswv tias, “Au Vajtswv, kuv raug xauv nrog cov neeg mob puas hlwb lawm. Kuv mas ntxhov siab heev li. Vajtswv, kuv tsis paub tias xyov yuav tawm ntawm no mus tau li cas. Thov coj kuv kev.” Kuv nco tau ib zaj lus ntawm Vajtswv cov lus tom qab thov Vajtswv lawm: “Tej zaum nej txhua tus nco cov lus no: ‘Rau qhov peb txoj kev txom nyem me me no, uas tsuas yog ib nyuag pliag xwb, ua hauj lwm rau peb kom tau lub yeeb koob uas zoo tshaj plaws thiab nyob mus ib txhis.’ Nej txhua tus yeej tau hnov cov lus no ua ntej lawm, tab sis nej tsis muaj ib tug nkag siab lawv lub ntsiab tseeb. Hnub no, nej paub meej tias lawv qhov tseeb tseem ceeb tiag. Cov lus no Vajtswv yuav ua kom tiav nyob rau hauv tiam kawg, thiab yuav ua kom tiav rau cov neeg raug tus zaj loj liab ploog ntaus tsim txom nyob hauv daim av uas nws chev. Tus zaj loj liab ploog tsim txom Vajtswv thiab yog Vajtswv tus yeeb ncuab, thiab ces, nyob thaj av no, cov uas ntseeg Vajtswv yog cov raug rau kev poob ntsej muag thiab kev caij tsuj, thiab qhov tau los ces yog cov lus no tshwm sim nyob hauv nej, pab neeg no. Vim tias, nws nqis tes mus rau ntawm thaj av uas tawm tsam Vajtswv, tag nrho Vajtswv tes dej num ntsib kev cuam tshuam loj heev, thiab siv sij hawm ntev mas Nws cov lus thiaj tiav; vim li ntawd, neeg lim hloov kom zoo dua los ntawm Vajtswv cov lus, uas kuj yog ib qhov ntawm kev txom nyem. Nws yog ib qho nyuaj kawg nkaus rau Vajtswv ua Nws tes dej num nyob ntawm thaj av uas tus zaj loj liab ploog nyob tab sis nws yog los ntawm txoj kev nyuaj no uas Vajtswv ua ib theem ntawm nws tes dej num, ua kom nws txoj kev thoob tsib thiab txoj kev ua uas muaj hwj huaj loj tshwm tuaj, thiab siv lub hwv tsam no ua kom nws pab neeg muaj txhua yam txhij” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Tes Hauj Lwm Puas Yooj Yim Npaum Li Tib Neeg Xav?). Kuv to taub tias Pawg Koom Tsham yog Vajtswv tus yeeb ncuab uas txawj tuag, thiab nws tsis tso cai rau tib neeg muaj kev ntseeg thiab raws Vajtswv qab. Vajtswv Tus Uas Muaj Hwj Chim Loj Kawg Nkaus tab tom nthuav tawm ntau qhov tseeb los mus cawm tib neeg, yog li ntawd nws thiaj li ntes thiab tsim txom cov ntseeg vwm ntsuav, thiab thiaj li tshaj tawm txhua yam lus xaiv thiab tej lus dag, teem txim rau Pawg Ntseeg ntawm Vajtswv Tus Uas Muaj Hwj Chim Loj Kawg Nkaus los mus dag cov uas tsis paub qhov tseeb. Nws cuam tshuam cov ntseeg tsev neeg mus ntau tiam, rhuav tshem lawv txoj hauj lwm thiab ua kom lawv tig los ua pauj rau tus ntseeg nyob rau hauv lawv lub neej. Nws siv lawv los yuam cov ntseeg kom ntxeev siab rau Vajtswv. Pawg Koom Tsham mas phem tshaj plaws. Kuv tsev neeg raug Pawg Koom Tsham dag thiab tuaj nws tog, tsim txom kuv vim kuv txoj kev ntseeg, haj tseem coj kuv mus nyob hauv tsev kho mob puas hlwb thiab. Tsev kho mob mas yog ib lub chaw phem tshaj, tab sis kuv tuaj yeem pom Pawg Koom Tsham lub ntsiab tseeb phem, thiab qhov ntawd kuj yog ib qho kev sim txog kuv txoj kev ntseeg thiab, yog li ntawd kuv yuav tsum tau vam khom rau Vajtswv thiab ua tim khawv. Thaum xav txog qhov no, kuv thiaj li thov Vajtswv, thov kom Vajtswv nyob nrog nraim kuv thiab tiv thaiv kuv los ntawm Ntxwgnyoog uas yog tus dab phem. Ntxwgnyoog yim caij tsuj kuv, ces kuv yim ntseeg Vajtswv.

Kuv hnub ob uas nyob rau hauv lub chaw no, ib tug neeg ua hauj lwm nqa tau ib lub tshuaj ntsiav los rau kuv noj. Kuv txawm hais npau taws ntsuav rau nws tias, “Kuv twb hais rau koj lawm tias kuv yeej tsis muaj mob dab tsi no ne. Kuv yeej zoo neej hlo li qub, ces kuv yuav tsis noj lub tshuaj no.” Nws thiaj li hais tias, “Tsis muaj leej twg yuav nyob rau ntawm no tshwj tsis yog lawv muaj qee yam mob. Yog hais tias koj koom tes nrog qhov kev kho, ces koj yuav zoo tuaj thiab yuav tau tawm sai dua.” Tab sis txawm nws yuav hais li cas los xij, kuv yeej ntshai noj lub tshuaj ntawd. Nyob rau hnub peb, tau lees txais ib tug neeg mob loj nkag los ces kuv thiaj li raug hloov mus rau Kem 3 vim hais tias kuv kem tsis muaj txaj seem li lawm. Kem ntawd mas tsis kav nruj—kuv tuaj yeem tawm hauv kuv chav mus ua ub no tau. Nyob rau tod mas kuv pom qee tus neeg mob lub ris ntuag ntau heev uas pom kiag lawv yav nrav, lawv tej ntsej muag thiab tej caj dab mas qias neeg ntsuav, thiab lawv tej plaub hau mas zoo li lub ze noog xwb. Qee tus tib neeg muaj tej khaub ncaws uas lo av li cuag li tsuas roj—qhov ntawd ua rau xeev siab tshaj. Kuv muaj ob tug neeg raug txim nyob hauv kem ntawd. Ib tug mas qhov muag tsis pom kev zoo thiab hais tsis tau lus, thiab tej thaum yws daws dom puag tom qa rau nws tus kheej. Kuv tsis paub tias xyov lwm tus ntawd raug kaw rau tod ntev npaum li cas lawm. Txhua tag kis nws tsim los ces taug kev mus los tsis tseg rau ntawm txoj kev taug, haus luam yeeb. Nkawv ua rau kuv ntshai heev. Kuv ntshai tsam nyob rau lub sij hawm thaum nkawv ib tug twg coj li ntawd, ces nkawv yuav ntaus kuv los sis rub kuv plaub hau thaum kuv tsis ceev faj, los sis nkawv yuav nyem kuv caj pas tuag thaum kuv tsaug zog lawm, yog li ntawd kuv yeej tsis tsaug zog zoo rau yav hmo ntuj li. Txhua zaus ua ntej kuv yuav tsaug zog, kuv yeej thov Vajtswv twj ywm zaum tas zaum tuaj, thov kom Nws tiv thaiv kuv. Tsuas yog qhov ntawd nkaus xwb thiaj li ua rau kuv tau so thiab tau tsaug zog txaus. Muaj ib tug neeg ua hauj lwm yeej tuaj txhua hnub tuaj muab tshuaj rau peb noj ib tug zuj zus. Kuv tsuas noj thaum nws ntsia kuv nruj nruj xwb, tsis li ntawd ces, kuv yeej tsis nqos lub tshuaj ntsiav ntawd li, tab sis kuv muab lub tshuaj ntawd pov tseg thaum kuv siv chav dej. Muaj ib zaug lwm tus neeg mob txawm pom kuv muab lub tshuaj ntawd pov tseg ces nws thiajli hais rau kuv tias, “Koj ua tsis tau li ntawd.” Kuv raug tus neeg ua hauj lwm ntes tau ib zaug thaum muab tshuaj pov tseg. Nws npuaj kuv ob peb teg, ces muab ib lub fwj roj hmab los txhaws kuv qhov ntswg, thiab yuam kom nqos cov tshuaj ntawd. Qhov ntawd mas mob tiag tiag li. Kuv yeej tsis paub tias xyov tus poj niam ntawd puas qhia rau cov neeg ua hauj lwm txog qhov kuv muab kuv lub tshuaj ntsiav ntawd pov tseg, tab sis cov neeg leg hauj lwm hauv tsev kho mob yeej saib ntsoov rau cov neeg mob tom qab lawv noj tshuaj tag lawm. Cov neeg ua hauj lwm yuav sawv saum ib lub rooj dav xwm yeem txhua hnub saib ntsoov peb, siv ib lub teeb nyem tsom saib thiab ua kom peb rua qhov ncauj thiab nqos tshuaj. Kuv ua tsis tau li cas ces kawg noj cov tshuaj ntsiav ntawd.

Ob peb hnub tom qab ntawd, tus thawj coj ntawm tsev kho mob tuaj tshuaj xyuas cov chav nyob thiab txawm nug kuv yam xav tsis txog tias, “Nyob rau tiam 21 no puas muaj kev puas tsuaj loj?” Kuv xav tias nqe lus nug ntawd mas txawv heev, ces kuv txawm hais tias, “Tsuas yog Vajtswv nkaus xwb thiaj li hais tau tias kev puas tsuaj yuav los thaum twg.” Ces nws thiaj li teb tias, “Kuv pom tias koj tsis xis nyob heev lawm. Peb yuav tsum tau ntxiv tshuaj kom ntau rau koj.” Tom qab ntawd, kuv yuav tsum tau noj ob lub tshuaj ntsiav tsis yog ib lub lawm. Kuv npau taws heev. Tus thawj coj ntawd yeej tsis paub tias xyov kuv muaj yam mob dab tsi tiag tiag, tab sis cia li ntxiv tshuaj rau kuv noj ob npaug xwb. Nws yeej tsis xav rau tib neeg txoj sia li. Ib lub tsev kho mob mas yuav tsum yog ib qho chaw cawm txoj sia thiab pab cov raug mob, tab sis nws tau rais los ua ib qho chaw rau Pawg Koom Tsham siv tsim txom Cov Ntseeg Vajtswv lawm. Lawv rhuav tshem kuv phem heev tsuas yog vim kuv txoj kev ntseeg xwb. Kuv ntxub Pawg Koom Tsham tshaj plaws.

Kaum hnub tom qab kuv noj tshuaj kawn, kuv txawm pib hnov qaug zog heev, thiab haj yam ua rau taug kev nyuaj. Kuv xav paub tias puas yog vim los ntawm yam tshuaj uas lawv muab rau kuv noj ntawd. Kuv hnov tu siab heev kiag tom qab ib pliag ntawd xwb. Yam tshuaj ntawd yuav ua rau kuv tsis noj qab nyob zoo yog hais tias kuv pheej noj mus ntxiv, txawm tias kuv tsis tau pib mob li ntawd los xij. Thiab qhov ntsib tag nrho cov neeg muaj mob puas hlwb txhua hnub ntawd ua rau kuv nyuaj siab thiab ntxhov siab, kuv mloog zoo li kuv tab tom yuav pib muaj teeb meem puas hlwb los ntawm qhov kev tsim txom no. Kuv thov Vajtswv heev li, thiab kuv tsuas peem dhau tej ntawd vim txoj kev coj qhia ntawm Vajtswv cov lus xwb. Kuv nco tau tias muaj ib zaug tom qab thov Vajtswv lawm, kuv xav txog qhov Tswv Yexus tsa Laxalau tawm hauv nws lub qhov ntxa los. Nws twb tuag tau plaub hnub, thiab nws lub cev twb tsw lwj lawm, tab sis Vajtswv ua rau nws rov qab ciaj los ntawm txoj kev tuag los ntawm qhov hais ob peb lo lus xwb. Vajtswv mas muaj hwj chim loj kawg nkaus. Nws kav tag nrho tib neeg txoj hmoo. Yog li ntawd kuv thiaj li paub tias kuv txoj sia yog nyob rau hauv Vajtswv ob txhais tes ib yam nkaus thiab. Kuv xav txog qee yam uas Vajtswv hais tias: “Ntawm txhua yam uas tshwm sim nyob rau hauv qab ntuj khwb, tsis muaj ib yam dab tsi li uas Kuv yuav tsis tau ua tus hais lo lus kawg rau li. Puas muaj ib yam dab tsi uas tsis nyob rau hauv Kuv ob txhais tes li?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Cov Lus rau Tag Nrho Lub Qab Ntuj Khwb, Tshooj 1). Tab txawm yam tshuaj ntawd yuav ua rau kuv vwm thiab kuv yuav tawm thaum twg los xij puav leej nyob rau hauv Vajtswv ob txhais tes lawm. Kuv yuav tsum peem kom dhau qhov no los ntawm kuv txoj kev ntseeg thiab qhov vam khom rau Vajtswv. Qhov kev xav no txhawb kuv txoj kev ntseeg thiab kuv tsis hnov ntshai mus ntxiv lawm.

Muaj ib hmo tom qab ob peb lub lim tiam lawm, kuv xav tias kuv yuav tau hu rau kuv tsev neeg thiab saib seb kuv puas tawm tau sai dua. Tag kis sawv ntxov tom qab ntawd, kuv tus txiv tsav tsheb tuaj rau tim tsev kho mob ces kuv txawm hais kom nws coj kuv tawm ntawm qhov chaw ntawd. Kuv hais rau nws tias qhov ntawd tsis yog ib qho chaw uas phim rau tib neeg nyob, thiab tias yog nyob ntev dhau lawm ces yuav ua rau ib tug neeg hlwb zoo vwm tau. Nws thiaj li hu xov tooj mus sib tham nrog kuv tus nus txog qhov ntawd, thiab kuv hnov kuv tus nus hais tshwm hauv xov tooj tias, “Ua ntej tshaj mas kom nws kos npe rau daim ntawv lees tso nws txoj kev ntseeg tseg tso, ces nws thiaj li tawm tau. Cia nws tuag rau hauv los tau yog hais tias nws pheej tseem ntseeg mus.” Kuv yeej tsis tau xav tias kuv tus nus, kuv tus nus uas koom lub cev nqaij daim tawv thiab roj ntshav, yuav hais tej yam zoo li ntawd li. Kuv mas tshee heev li. Nws tsis yog ib tsev neeg, nws yog ib tug niag dab phem xwb! Thaum pom tias nws tsis muaj kev xav cia kuv tawm, ces kuv thiaj li xav rau kuv tus kheej tias yog hais tias nws tso kuv tseg rau tod, ntshe kuv yeej yuav nrhiav tsis tau kev tawm li, yog li ces kuv yuav ua li cas xyaum ua kuv txoj kev ntseeg? Yog li ntawd kuv thiaj li ua txuj pom zoo. Ces nws thiaj li coj kuv los tsev lawm. Kuv tus txiv mas yeej raws kuv qab rau ub rau no tas li xwb. Nws tsis cia kuv mus koom cov rooj sib txoos ua ke los sis nyeem Vajtswv cov lus li. Tej thaum kuv tso dab ntub rau thaum tav su los nws haj tseem nkag los saib seb kuv puas nyeem Vajtswv cov lus thiab, tab sis kuv yeej tseem nyiag nyeem Vajtswv cov lus hauv kuv lub MP5 thiab. Ces muaj ib tag kis sawv ntxov nws txhom tau kuv thaum kuv tab tom sam hluav taws xob rau lub MP5 ntawd. Nws txeeb lub MP5 mus lawm thiab nthe npau taws ntsuav rau kuv tias, “Koj tseem ntseeg tau li cas? Yog hais tias koj raug ntes thiab koj tau mus nyob nkuaj thiab wb tus tub poob nws txoj hauj lwm vim yog koj, ces koj yuav muaj peev xwm ntsib nws tau li cas? Tsis tso cai rau koj raws Vajtswv qab mus ntxiv lawm!” Thaum nws hais li no, nws sib sib zog thawb kuv ces kuv lub taub hau txawm mus tsoo ib sab txaj muaj ceem heev. Kuv tsis to taub tias ua li cas nws yuav ua phem ua luaj. Kuv tsuas ntseeg Vajtswv xwb. Kuv tsis tau ua ib yam dab tsi txhaum, tab sis nws coj phem heev rau kuv. Nws tsis yog coj kuv mus tim qhov chaw kho cov pluas hlwb xwb, tab sis tam sim no nws tsa tes ntaus kuv, thiab tsis cia kuv nyeem Vajtsw cov lus lawm. Thaum paub tias tsis zoo zuj zus lawm, ces kuv thiaj li thov Vajtswv tias, “Au Vajtswv! Kuv tus txiv coj phem heev rau kuv, thiab kuv qaug zog heev. Kuv tsis paub tias xyov yuav taug txoj kev no li cas lawm. Thov coj kuv kev!” Ces kuv txawm xav txog qee yam los ntawm Vajtswv cov lus los tias: “Niaj hnub no, tib neeg feem ntau tsis muaj qhov kev paub ntawd. Lawv ntseeg tias kev txom nyem yog ib yam tsis muaj nuj nqis dab tsi, lawv raug ntiaj teb muab tso tseg, lawv lub neej hauv cuab yim neej muaj teeb meem, lawv tsis tau txais kev hlub los ntawm Vajtswv, thiab lawv lub neej yav tom ntej mas tsaus ntuj nti xwb. Kev txom nyem ntawm qee leej mas mus txog rau theem kawg, thiab lawv txoj kev xav tig mus rau kev tuag. Qhov no tsis yog kev hlub tiag rau Vajtswv; cov neeg zoo li no yog neeg tais caus, lawv tsis muaj kev mob siab rau li, lawv yog neeg qaug zog thiab tsis muaj hwj chim dab tsis li! Vajtswv xav kom tib neeg hlub Nws, tab sis tib neeg yim hlub Nws ntau npaum li cas, tib neeg yim huab ntsib kev txom nyem ntau npaum li ntawd, thiab tib neeg yim hlub Nws ntau npaum li cas, tib neeg yuav ntsib kev sim siab ntau npaum li ntawd. … Vim yog li ntawd, nyob rau lub sij hawm kawg nej yuav tsum ua tim khawv rau Vajtswv. Tsis hais nej txoj kev txom nyem yuav loj npaum li cas, koj tsim nyog taug kev mus kom txog thaum kawg, thiab kom kawg koj tus pa, koj yuav tsum ncaj ncees rau Vajtswv thiab ntawm Vajtswv txoj kev hlub tshua; tsuas yog qhov no xwb thiaj yog kev hlub Vajtswv tiag tiag, thiab tsuas yog qhov no xwb thiaj yog qhov kev ua tim khawv muaj zog thiab zoo kawg nkaus” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Kev Sim Siab Uas Mob Heev Xwb Thiaj Muaj Peev Xwm Paub Txog Vajtswv Txoj Kev Zoo Ntxim Hlub). Thaum ua tib zoo xav txog Vajtswv cov lus, ces kuv thiaj li pom meej tias txawm kuv yuav txom nyem los ntawm qhov kev nyuaj ntawd los xij, yog tsis muaj tej xwm txheej tiag uas muab kuv nthuav tawm no, ces kuv yuav tsis tuaj yeem pom kuv tus yeeb yam tiag li los sis yuav tsis muaj kev ntseeg tiag. Qhov kev txom nyem no mas tsim nyom lawm. Tab sis yog tsis muaj kev to taub Vajtswv txoj kev xav, ces kuv qaug zog thiab xav phem vim kuv txoj kev txom nyem. Kuv pom tias kuv yog neeg tais caus. Ces kuv txawm xav txog qhov kuv tus txiv tas zog ua kom kuv tso Vajtswv tseg. Tsis quav ntsej tias kuv yuav ciaj los sis yuav tuag li, nws tus kheej coj kuv mus rau tim ib qho chaw kho cov puas hlwb thiab tam sim no nws haj tseem ntaus kuv thiab. Nyob rau theem ntawd kuv pom tias nws yog ib tug ntxub Vajtswv tiag tiag, ib tug niag dab phem uas tawm tsam Vajtswv tshaj. Kuv nco tau qhov Vajtswv hais tias: “Cov ntseeg thiab cov tsis ntseeg ces tsis sib haum; tsis li ntawd xwb, lawv tseem sib tawm tsam ib leeg rau ib leeg thiab” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv thiab Tib Neeg Yuav Nkag Mus So Ua Ke). Kuv tus txiv thiab kuv wb yog ob hom tib neeg sib txawv nyob rau ntawm ob txoj kev taug sib txawv. Kuv yuav raws Vajtswv qab mus txawm nws yuav caij tsuj kuv li cas los xij. Kuv yuav tsis thim rov qab. Yog li ntawd kuv thiaj li hais rau nws tias, “Cia wb sib nrauj. Koj taug txoj kev ntawm sab ntiaj teb, uas yog txoj kev nrhiav nyiaj txiag, hos kuv taug txoj kev ntseeg. Wb taug ob txoj kev sib txawv thiab wb tsis muaj dab tsi sib thooj li. Koj ntshai rau wb tus tub, yog li ntawd wb tsim nyog sib nrauj. Ces kuv txoj kev ntseeg thiaj li tsis cuam tshuam neb ob leeg. Kuv tsis tim tsum wb ib yam khoom vaj khoom tsev dab tsi li. Kuv tsuas tim tsum ib chav, uas yog ib qho chaw nyob xwb, kom kuv thiaj li raws tau Vajtswv qab.” Nws hais tias, “Kuv pom tias koj yog ib tug poj niam zoo. Kuv tsis xav sib nrauj.” Kuv hais rau nws tias, “Yog koj tsis xav sib nrauj, ces muab kuv txoj kev ywj pheej rau kuv. Kuv yog ib tug ntseeg, yog li koj tav tsis tau kuv kev.” Nws hais tias, “Koj muaj tau kev ywj pheej mas, tab sis ua ntej tshaj koj yuav tsum kos ib daim ntawv pom zoo rau kuv tso tias koj yuav tso Vajtswv Tus Uas Muaj Hwj Chim Loj Kawg Nkaus tseg!” Thaum hnov li no lawm, kuv thiaj li hais tias, “Kuv yuav tsum tau tuav kuv txoj kev ntseeg mus—kuv kos tsis tau qhov kev pom zoo ntawd.” Ces nws txawm tsis hais dab tsi li lawm. Tom qab ntawd, thaum pom tias nws txwv tsis tau kuv kom txhob ntseeg lawm, ces nws thiaj li tsis tav kuv kev rau txoj kev xyaum ua raws kuv txoj kev ntseeg ntau lawm. Ces kuv thiaj li muaj peev xwm ua ib lub neej rau ntawm pawg ntseeg thiab ua ib teg dej num raws li qhov ib txwm ua lawm.

Muaj ib hmo, kuv txawm mus saib tus viv ncaus uas nyob sib puab ntawd mus sib tham txog qhov saib xyuas cov los tshiab. Tom qab wb zaum kiag xwb ces kuv tus tub txawm siv tshwm kiag ces txawm hais hnyav heev rau tus viv ncaus ntawd tias, “Koj yog tus uas hloov kuv niam sav!” Ces nws yuav ntau tus viv ncaus ntawd. Kuv maj nroos los puag nkaus nws, muab nws cheem rov qab. Nws muab kuv cab rov los tsev ces txawm cem thiab hais npau taws ntsuav tias, “Koj yuav tau tso qhov no tseg. Saib seb lawv hais li cas txog nej Pawg Ntseeg nyob os lai!” Ces nws thiaj li rov qab hais txog Pawg Koom Tsham tej lus dag uas hais lus phem rau Pawg Ntseeg ntawm Vajtswv Tus Uas Muaj Hwj Chim Loj Kawg Nkaus ob peb zaug ntxiv dua. Tom qab ntawd, nws txawm nthe tias, “Txiv, hu xov tooj mus rau lub tsev kho mob puas hlwb es muab nws xa rov qab mus rau tod!” Kuv mloog zoo li kuv lub taub hau yuav luag tawg thaum hnov nws hais li ntawd. Kuv yeej tsis tau xav tias kuv tus tub yuav koom nrog nws txiv los yuam kom kuv tawm ntawm kuv txoj kev ntseeg, vim nws txoj hauj lwm xwb. Qhov ntawd mas phem tshaj. Kuv yeej hnov kuv tus txiv hu rau qhov chaw kho cov puas hlwb, thiab kuv hnov qhov chaw ntawd hais tias puv tag lawm. Ces kuv tus txiv txawm hais tias, “Cia li hu rau tub ceev xwm kom lawv tuaj coj nws mus.” Kuv tus tub thiaj li teb tias, “Yuav cia nws raug kaw rau tod tsis tau. Wb cia nws nyob rau hauv chav tsaus tsaus uas wb keev tu luav ntawd pua zoo ne?” Ces nkawv ob leeg txawm yuam qees coj kuv nkag mus rau hauv chav ntawd, xauv lub qhov hlau ces tawm mus lawm. Thaum pom kuv tus txiv thiab tus tub raug dag los ntawm Pawg Koom Tsham kom tsim txom phem rau kuv li cas ntawd mas ua rau kuv chim siab tshee hna, thiab haj yam ntxub Pawg Koom Tsham puag hauv kuv nruab siab los. Kuv xav txog Vajtswv cov lus tias: “Tau ntau txhiab xyoo los lawm uas qhov no yog daim av ntawm txoj kev qias neeg. Nws yog ib qho dub tsuas yam tiv tsis tau kiag li, muaj kev txom nyem loj kawg kiag, dab poj ntxoog mas khiav vig voog qhov txhia chaw, txawj ntxias thiab txawj dag, hais lus iab liam yam tsis muaj laj thawj, ua lim hiam thiab siab phem, tsuj kiag lub niag nroog dab poj ntxoog no thiab cia nws muaj tej niag cev tuag pov pawg lug rau ntawm tej; tus ntxhiab tsw lwj mas puv nkaus daim av thiab nthuav tawm puv nkaus tej huab cua, thiab nws raug zov zoo kawg kiag. Leej twg thiaj pom lub ntiaj teb uas dhau lub qab ntuj ntsuab? Tus dab phem ntawd muab tib neeg lub cev pav ntxeev tis qaib ruaj heev, nws npog nws ob lub qhov muag, thiab muab nws ob daim di ncauj lo khov kho. Tus vaj ntxwv ntawm cov dab tau rhuav tshem qhov ub qhov no los tau ntau txhiab xyoo lawm, los txog ntua rau niaj hnub no, thaum nws tseem zov lub nroog dab no zoo zoo, cuag li nws yog ib lub tsev huab tais rau cov dab uas tsis muaj leej twg yuav nkag mus tau rau li…. Tej poj koob yawm txwv ntawm cov neeg txheej thaum ub? Cov thawj coj uas ntxim hlub tshaj? Lawv tag nrho yeej tawm tsam Vajtswv! Lawv tej kev cuam tshuam ua rau tag nrho cov nyob hauv qab ntuj raug tso tseg rau hauv ib qho xwm txheej ntawm txoj kev tsaus ntuj thiab kev kub ntxhov. Kev ywj pheej fab kev ntseeg? Tej cai yam raug cai thiab tej uas pej xeem xav tau? Tag nrho tej no ces yog kev ntxias dag los npog kev txhaum xwb!” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tes Hauj Lwm thiab Kev To Taub (8)). Pawg Koom Tsham ntes thiab tsim txom Cov Ntseeg Vajtswv, tshaj tawm txhua hom lus xaiv thiab hais lus phem rau Pawg Ntseeg ntawm Vajtswv Tus Uas Muaj Hwj Chim Loj Kawg Nkaus thiab tseem cuam tshuam lawv cov tswv cuab hauv tsev neeg thiab. Yog li ntawd kuv tsev neeg thiaj li raug Pawg Koom Tsham dag thiab tuaj nws tog lawm, es tas zog ua kom kuv tso qhov ntseeg Vajtswv tseg, haj tseem coj kuv mus rau tim qhov chaw kho cov puas hlwb uas yog qhov chaw kuv raug tsim txom, thiab nkawv tseem muab kuv kaw dua lawm thiab. Ib tsev neeg uas muaj kev zoo siab heev cia li poob qis los zoo li no lawm. Pawg Koom Tsham yog tus ua txhaum cai tiag tiag thiab kuv ntxub nws, uas yog tus niag dab phem ntawd, puag hauv kuv nruab siab los.

Tsis ntev ntawd, kuv tus tub nqa ib lub rooj zaum, los zaum rau ntawm ib sab qhov rooj hlau thiab hais tias, “Niam, koj tsim nyog tso txoj kev ntseeg Vajtswv tseg lawm. Koj sib zog ua hauj lwm heev thaum koj tseem ua lag luam thiab qhov pab nyiaj rau kuv txoj kev kawm ntawd mas yeej tsis yooj yim li. Tam sim no kuv twb ua hauj lwm thiab tseg tau nyiaj me ntsis lawm. Yog kuv them nyiaj rau koj mus ntoj ncig ua si ne?” Thaum nws hais li no, kuv ras dheev tias qhov ntawd yog Ntxwgnyoog lub tswv yim dag, yog li ntawd kuv thiaj li hais rau nws tias, “Ua ntej kuv yog ib tug ntseeg, kuv tsuas xav khwv nyiaj xwb. Qhov ntawd yog ib qho nyuaj, yog txoj kev ua neej uas sab heev li. Tam sim no kuv twb nrhiav tau Vajtswv thiab to taub qee qhov tseeb lawm, ces kuv lub neej muaj kev ywj pheej dua thiab muaj kev zoo siab dua lawm. Neb ob leeg txawm yuav tso tsis tau kuv tseg lod? Kuv yuav tuav kuv txoj kev ntseeg mus tab txawm neb tsis lees tias kuv tsis yog koj niam thiab txawm koj txiv yuav nrauj kuv los xij. Kuv cog lus tias yuav taug txoj kev no.” Nws tsis hais ib lo lus teb li, ces cia li tawm mus lawm xwb. Kuv ua tsaug ntau ntau rau Vajtswv vim txhawb kuv txoj kev ntseeg, thiab ua rau kuv hnov thaj yeeb tshaj. Ces kuv txawm pib hu zaj nkauj qhuas no tias: “Vajtswv Tus Uas Muaj Hwj Chim Loj Kawg Nkaus uas tseeb, kuv lub siab yog koj li. Kev raug kaw tsuas yog tswj tau kuv lub cev xwb. Nws tsis tuaj yeem cheem tau kuv txhua kauj ruam uas nrog Koj mus. Txawm txoj kev yuav nyuaj, yuav nce toj nqes taug los, los ntawm Koj cov lus coj kuv, kuv tsis ntshai li; los ntawm Koj txoj kev hlub ua kuv phooj ywg, kuv lub siab puv npo” (Raws Tus Me Nyuam Yaj Qab thiab Hu Cov Nkauj Tshiab, Ib Txoj Kev Xaiv Uas Tsis Khuv Xim). Kuv tuaj yeem hnov tias Vajtswv nyob ntawm kuv ib sab. Txawm yuav zaum rau hauv chav me me tsaus ntuj nti uas tsis pom ib yam dab tsi rau ib ncig ntawm kuv li los xij, kuv yeej tsis nyuaj siab li. Tag kis sawv ntxov tom qab ntawd, kuv tus tub txawm los qhib qhov rooj thiab cia kuv tawm yam xav tsis txog li, thiab hais tias, “Niam, tam sim no wb yuav tso koj tseg. Koj ua dab tsi los tau.” Thaum nws hais li ntawd, kuv paub tias nkawv txaj muag thiab nkawv ua tsis tau dab tsi rau kuv lawm, ces kuv thiaj li ua tsaug rau Vajtswv.

Qhov raug Pawg Koom Tsham ntes thiab ntsib kuv tsev neeg txoj kev caij tsuj pab ua rau kuv pom tag nrho Pawg Koom Tsham lub ntsiab tseeb uas phem tawm tsam Vajtswv lawm. Nws ntes thiab tsim txom cov ntseeg thiab nthuav txhua hom ntawm tej lus dag los ntxias dag tib neeg, ua kom cov ntseeg tsev neeg los lawv txoj kev ntseeg kev. Qhov ntawd yog lub tswv yim rhuav tshem Cov Ntseeg Vajtswv tsev neeg. Kuv tsev neeg txawm mus tuaj Pawg Koom Tsham tog, cuam tshuam kuv txoj kev ntseeg vim lawv tej kev ntshaw xwb, thiab haj tseem tau muab kuv tso rau qhov chaw kho cov puas hlwb yam tsis xav tias xyov kuv yuav ciaj los sis yuav tuag li. Kuv pom lawv lub ntsiab tseeb uas tawm tsam Vajtswv tag nrho lawm, thiab kuv yeej yuav tsis cia lawv cheem kuv dua ntxiv lawm. Qhov kev ntsib kev pom no qhia kuv tias tsuas yog Vajtswv xwb thiaj li hlub peb, thiab tsuas yog Vajtswv xwb thiaj li tuaj yeem cawm tau peb dim xwb. Thaum kuv nyob rau qhov nyuaj siab tshaj plaws thiab tag kev cia siab lawm, Vajtswv siv Nws cov lus los qhia kuv, los nplij kuv thiab txhawb kuv zog, thiab coj kuv kev kom peem dhau cov sij hawm nyuaj ntawd. Tam sim no kuv tus kheej tau paub lawm tias Vajtswv txoj kev hlub mas muaj tseeb heev, thiab kuv xav raws Vajtswv qab thiab ua kuv tes dej num. Kuv yeej yuav tsis khuv xim qhov ntawd li.