44. Kev Soj Ntsuam Lub Tsev Tos Qhua Zais Ntshis

Muaj ib hnub nyob rau Lub Ob Hlis xyoo 2013, ib tug viv ncaus thiab kuv tau teem caij yuav mus tim ib lub rooj sib tham. Thaj tsam li ob teev yav tav su dua ntawd, thaum kuv tab tom tos nws nyob ze rau ntawm ib lub khw muag khau, kuv pom ib tug txiv neej pheej ntsia kuv tsis tseg thaum tseem tham xov tooj, ces kuv hnov tias muaj qee yam tsis yog lawm. Kuv nyuam qhuav tab tom yuav sawv kev mus xwb, kuv txawm hnov tias “Txhob nti!” Kuv pom plaub los sis tsib leej neeg maj nroos los rau ntawm kuv, thiab kuv xav tias, “Au yau, yog tub ceev xwm lau!” Kuv txawm npaj khiav, tab sis ob tug txiv neej caum cuag kuv, muab kuv qhau ntog rau hauv piam teb, thiab tom qab ntawd sib zog thawb kuv rau hauv ib lub tsheb, ces kuv pom peb tug viv ncaus uas raug ntes nrog kuv nyob hauv lub tsheb ntawd.

Tub ceev xwm coj peb mus rau tim tub ceev xwm qhov chaw ua hauj lwm thiab hais kom peb sawv ib ntawm phab ntsa vaj. Kuv ntshai heev. Kuv thiaj li rau siab ntso thov Vajtswv, thiab xav txog Vajtswv cov lus tias, “Tsis txhob ntshai, Vajtswv Tus Uas Muaj Hwj Chim Loj Kawg Nkaus yuav nyob nrog nraim koj xwb xwb li; Nws sawv tom qab ntawm nej thiab Nws yog nej daim hlau tiv thaiv” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 26). Qhov tseeb tiag, muaj Vajtswv nyob ntawm kuv ib sab lawm, kuv yuav ntshai dab tsi? Kuv yuav tsum tau vam khom rau Vajtswv kom thiaj li paub qhov zoo li no. Kuv maj mam tswj kuv tus kheej kom ua siab txias txias. Tom qab ntawd, lawv coj kuv mus rau hauv ib chav. Kuv txaj muag thiab npau taws thaum ib tug tub ceev xwm uas yog poj niam yuam kom kuv hle ris tsho es yuav tshawb, thiab lom txwm kom kuv zaum ywb nrab ceg.

Hmo tom qab ntawd, tub ceev xwm coj kuv mus rau tim ib lub tsev tos qhua uas muaj rau tshooj. Lawv khiab peb tshooj saum toj kawg ntawm lub tsev tos qhua thiab muab hloov mus ua lub chaw tshuaj ntsuam zais ntshis los mus ceev thiab tsim txom cov ntseeg Vajtswv. Thaum kuv mus txog tshooj rau, kuv pom coob tshaj li 20 tus nus thiab viv ncaus sawv ua ib kab, thiab ua rau kuv ceeb tag li: Muaj tib neeg raug ntes coob ua luaj li! Nws zoo li Pawg Koom Tsham tau ntes lawv tag nrho rau tib lub sij hawm xwb. Kuv tsis paub tias tub ceev xwm yuav saib peb li cas, yog li thiaj li thov Vajtswv ntsiag to, thov kom Vajtswv tiv thaiv peb kom peb sawv khov kho tau. Tom qab ntawd tub ceev xwm thiaj li muab peb faib cais los tshuaj ntsuam.

Thaum tsib teev sawv ntxov nyob rau hnub peb ntawd, muaj ib tug tub ceev xwm rog rog nkag los thiab hais lus nthe nqho tias, “Tus txiv neej uas kuv tab tom tshuaj ntsuam ntawd yog ib tug thawj coj, thiab nws yog ib tug uas tawv ncauj tshaj. Qhov kev tshuaj ntsuam ntawd tsis xaus mus txog nthua rau thaum ob teev los sis peb teev.” Nws zoo siab hlo hais ntxiv tias, “Ua ntej tshaj, kuv siv zog ncaws nws lub ntsej muag, thiab tom qab ntawd kuv mam siv zog ncaws nws lwm sab ntsej muag, thiab tom qab ntawd, kuv xuas ob txhais tes npuaj nws lub ntsej muag mus mus los los.” Nws nyem nrig yoj mus los thiab yws npau taws ntsuav ntxiv tias, “Kuv sib zog ntaus nws tshaj li ua rau kuv ob txhais tes mob tag, yog li kuv ntsiab nkaus ib poom dej uas tshuav ib nta dej los ntaus thoob plaws nws lub ntsej muag ua rau kuv txav tsis tau kuv ob sab caj npab li lawm. Nws lub ntsej muag puas tag. Cim tsis tau nws li lawm.” Kuv mas ntshai tej uas tub ceev xwm ua tshaj li. Kuv lub siab mas dhia pig poog, thiab npau taws kawg, “Cov tub ceev xwm no mas siab phem tshaj, yog lawv ntaus kuv zoo li lawv ntaus kuv tus nus, kuv puas yuav tiv taus?” Kuv cia li tsis muaj cuab kav xav txog qhov ntawd mus ntxiv li lawm. Kuv maj nroos los thov Vajtswv thov kom Nws tiv thaiv tus nus uas raug ntaus ntawd, thiab kuj tiv thaiv kuv thiab, kom wb muaj lub siab ruaj khov los paub qhov zoo li no.

Nyob rau thaum sawv ntxov ntawm hnub plaub ntawd, tub ceev xwm coj kuv mus rau tim tub ceev xwm qhov chaw ua hauj lwm. Ib tug tub ceev xwm xeem Vwj nug kuv tias kuv qib dej num nyob hauv pawg ntseeg yog dab tsi. Kuv hais tias kuv yog ib tug ntseeg dog dig xwb. Nws txawm sawv tsees kiag tam sim ntawd thiab hais tias, “Kuv xav mas koj tsis qhia qhov tseeb yog koj tsis hnov mob.” Nws hais kom kuv xyab kuv ob txhais tes ncaj ncaj, zaum ywb, sawv, thiab tom qab ntawd kom rov ua dua li qub mus mus los los. Tom qab ua li no tau ntev lawm, kuv mas sab tshaj vim kuv tawm fws ntau heev, thiab kuv ob sab ceg mas mob tag. Kuv ntog rau hauv piam teb. Nws hais lus thuam tias, “Koj puas paub qee yam mas? Txawm tib neeg yuav muaj hwj chim npaum li cas los xij, nyob rau ntawm no, ces lawv yuav tsum nyo hau rau kuv. Koj puas yog ib tug thawj coj? Koj tus yawg hlob yog leej twg?” Thaum kuv tsis hais dab tsi li, ces nws thiaj li hais kom kuv zaum ywb. Tom qab nyuam qhuav zaum ywb tau ntev li ob peb feeb xwb, kuv ob sab ceg txawm pib tshee, o tuaj, thiab tsis ntev, kuv txawm vau kiag lawm. Nws hais kom kuv sawv thiab zaum ywb mus ntxiv, ces kuv rov ua li no mus mus los los ntau tshaj 800 zaus. Ib tug tub ceev xwm txawm hais lus hem tias, “Saib seb koj tawm fws ntau npaum li cas lawm. Saib koj mas ntxim tshua kawg. Vim li cas koj yuav tiv kev txom nyem zoo li no? Tus Vajtswv no nyob qhov twg? Yog koj qhia yam koj paub rau peb, koj yuav tsis tau ntsib kev txom nyem. Yog koj tsis qhia, koj yuav ntsib kev txom nyem ntau tshaj qhov koj paub.” Thaum mloog tub ceev xwm cov lus, kuv hnov qias. Kuv txawm ua tav muag ntsia nws thiab hais tias kuv tsis paub dab tsi li. Lawv muab kuv ob sab tes xauv ntxeev tis qaib khi rau ntawm lub tog. Tom qab raug xauv tes tau ib pliag lawm, kuv hnov nruj nruj kuv hauv siab thiab ua pa nyuaj. Kuv ua pa yuav luag tsis taus. Kuv thov kom lawv daws lub xauv tes tawm, thiab tom qab ntev heev lawm, thaum kawg lawv mam li daws tawm. Tom qab ntawd, ib tug tub ceev xwm nkag los thiab hais tias, “Yuav tau to taub koj qhov xwm txheej. Txhua tus yeej lees txhaum lawm. Ntshe ruam xwb thiaj li tuaj zaum ntawm no thiab koj tus kheej tawv qhawv laiv, puas yog? Qhia qhov koj paub rau kuv tam sim no ces peb mam tso koj mus.” Tom qab ntawd ces nws txawm thau tau ob peb daim duab tawm los thiab hais kom kuv qhia cov neeg nyob hau cov duab ntawd. Nws hais tias, “Cov neeg no puav leej raug ntes tag lawm, thiab lawv hais tias lawv paub koj no laiv. Ua koj puas paub lawv? Lawv txoj hauj lwm hauv pawg ntseeg yog dab tsi?” Kuv xav tias, “Yog cov nus thiab cov viv ncaus lees paub kuv tiag tiag, tab sis yog kuv hais tias kuv tsis paub lawv, ntshe tub ceev xwm yeej yuav tsis tso kuv tseg li. Tab sis yog kuv hais tias kuv paub lawv, ces kuv yuav ntxeev siab rau kuv cov nus thiab cov viv ncaus. Qhov ntawd yuav ua rau kuv yog ib tug Yudas uas ntxeev siab rau Vajtswv. Kuv tsim nyog ua li cas?” Nyob rau lub sij hawm no, kuv nco tau ib zaj lus ntawm Vajtswv txoj lus tias, “Nyob rau txhua lub sij hawm, Kuv cov neeg yuav tsum ceev faj tej tswv yim ntxias dag ntawm Ntxwgnyoog, zov lub rooj vag ntawm Kuv lub tsev rau Kuv … ces koj zam dhau tsis txhob poob mus rau Ntxwgnyoog rooj ntxiab, uas thaum ntawd ces lig dhau heev lawm rau tej kev tu siab khuv xim” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Cov Lus rau Tag Nrho Lub Qab Ntuj Khwb, Tshooj 3). Kuv paub qhov no yog ib qho ntawm Ntxwgnyoog tej kev ntxias dag. Tej zaum tub ceev xwm yuav siv lub tswv yim no los ntxias kuv thiab ua kom kuv ntxeev siab rau kuv cov nus thiab cov viv ncaus, thiab ntxeev siab rau Vajtswv. Kuv yuav tsis poob mus rau qhov ntawd. Txawm tias kuv cov nus thiab cov viv ncaus lees tias lawv paub kuv los xij, kuv yeej tseem tsis ntxeev siab rau lawv. Thaum xav txog qhov no, kuv thiaj li hais tias kuv tsis paub lawv.

Tus tub ceev xwm xeem Vwj pom tias kuv tsis ruam thiaj li hais npau taws ntsuav tias, “Kuv xav pom seb koj yuav tawv ncauj npaum li cas!” Tom qab ntawd nws hais kom kuv sawv thiab muab kuv xauv tes khi rau ntawm cov las hlau uas thaiv qhov rai. Kuv lub cev raug muab dai vias, mob kuv tej dab teg tiv tsis taus li lawm, thiab thaum sij hawm ntawd, tub ceev xwm ntsia kuv thiab luag. Tom qab ib pliag ntawd, lawv coj kuv nqis thiab hais kom kuv zaum ywb txuas ntxiv. Hmo ntawd, tub ceev xwm coj kuv rov qab los rau tim tsev tos qhuas. Thaum sawv ntxov nyob rau hnub tom ntej, tus tub ceev xwm xeem Vwj hais tias, “Pib hnub no mus, kuv yuav xauv koj tes rau ntawm lub qhov rai. Yog koj tsis qhia qhov tseeb, koj haj tseem yuav tsis tau noj mov lawm thiab.” Tom qab ntawd, lawv xauv kuv ib sab tes rau ntawm cov las hlau. Tej thaum, lawv los nug kuv txog tej ub tej no ntawm kuv pawg ntseeg. Thaum ib tug tub ceev xwm pom tias kuv tseem tsis hais lus li thiab, nws thiaj li siv lub plhaub rau ntawv sib sib zog npuaj kuv, thiab txhob txwm qhib lub qhov rooj es kuv thiaj li hnov cov suab lus ntawm lwm cov viv ncaus uas tab tom raug tsim txom. Thaum hnov lawv quaj txom nyem ntsuav, ua rau kuv siab ntsws puas tag thiab npau taws heev.

Plaub hnub tom qab ntawd, ib tug tub ceev xwm xeem Muas muab kuv phau ntawv sau mus lawm, taw tes rau cov zauv nyob ntawm phau ntawv ntawd, thiab nug kuv seb tej ntawd puas yog kuv cov nus thiab cov viv ncaus tej xov tooj ntawm tes. Thaum kuv tsis teb, nws nthe nrov nrov tias, “Txawm tias koj tsis hais ib lo lus li los xij, phau ntawv no yeej txaus muab phua ua lub txim rau koj lawm!” Nws thau ib daim duab tawm los, taw tes rau ntawm tus neeg nyob hauv daim duab ntawd, thiab nug kuv seb nws puas yog tus thawj coj ntawm pawg ntseeg. Tom qab ntawd nws thau peb daim duab ntawm cov tsev uas siv rau pawg ntseeg, thiab tom qab ntawd nws hais kom kuv txheeb xyuas cov tsev ntawd. Kuv paub tag nrho cov tsev no, tab sis kuv nco tsis tau cov tsev no lawm. Nws hais ntxiv tias, “Peb yuav muab koj tso rau hauv tsheb thiab thauj koj mus lawm tod. Koj tsuas qhia kev rau peb mus rau ntawm thaj chaw xwb. Thiab peb mam li npog qhov ntawd rau koj, yuav tsis muaj leej twg paub tias koj muab tej ntaub ntawv ntawd los.” Thaum pom tias kuv tseem tsis hais dab tsi li thiab, ces nws txawm hais rau tus tub ceev xwm uas nyob puab ntawm nws tias, “Muab nws hle liab qab, muab nws dai kom nws tig mus rau tim lub qhov rai, kom cov neeg hla mus los thiaj li pom. Ces, yees nws duab thiab muab tshaj tawm rau hauv Is Taws Nev, hais tias nws yog ib tug Yudas, thiab hais tias nws qhia txhua yam rau peb lawm.” Tom qab ntawd, nws txawm los hle kuv tej ris tsho tawm. Kuv mas ntshai tshaj plaws. Yog nws ua li no tiag tiag thiab muab kuv daim duab tso rau hauv Is Taws Nev, ces ntshe kuv cov neeg txheeb ze thiab cov phooj ywg yuav pom daim duab no. Tom qab ntawd kuv yuav ua neej nyob tau li cas? Kuv thov kom nws txhob hle kuv tej ris tsho, tab sis nws txawm thuam thiab hais tias, “Dab tsi? Koj puas ntshai?” Ces lawv sawv daws luag zom zaws. Thaum pom lawv lub ntsej muag zoo siab, kuv thiaj li paub tias qhov no yog ib lub tswv yim ntawm Ntxwgnyoog tej kev ntxias dag, yog li kuv maj nroos ua siab txias txias thiab quaj thov rau Vajtswv. Nyob rau lub sij hawm no, kuv nco tau ib zaj nkauj ntawm Vajtswv txoj lus tias, “Koj yuav tsum raug kev txom nyem rau qhov tseeb, koj yuav tsum muab koj tus kheej rau qhov tseeb, koj yuav tsum tiv kev poob ntsej muag rau qhov tseeb, thiab yog yuav kom tau qhov tseeb ntau dua ces koj yuav tsum muaj kev txom nyem kom ntau. Qhov no yog qhov uas koj tsim nyog ua. Koj yuav tsum tsis txhob muab qhov tseeb cuam pov tseg es tsuav kom tau lub neej thaj yeeb lug nrog tsev neeg xwb, thiab koj yuav tsum tsis txhob poob koj lub meej mom kom mus tag ib sim neej thiab txoj kev ncaj ncees rau tej qho kev zoo siab ib nyuag pliag xwb” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Petus Qhov Kev Ntsib Kev Pom: Nws Qhov Kev Paub txog Kev Qhuab Ntuas thiab Kev Txiav Txim). Vajtswv cov lus ua rau kuv muaj kev ruaj siab thiab muaj zog tuaj. Kuv ntseeg Vajtswv thiab taug txoj kev uas yog hauv lub neej txoj sia. Qhov raug tsim txom thiab raug txaj muag vim kuv txoj kev ntseeg Vajtswv ntawd mas yeej tsis muaj qhov yuav txaj muag li. Kuv raug tsim txom rau txoj kev ncaj ncees, thiab Vajtswv pom zoo rau qhov no lawm. Yog kuv yeem swb rau Ntxwgnyoog thiab ntxeev siab rau Vajtswv kom tiv thaiv tau kuv lub koob lub npe xwb, ces qhov ntawd yuav yog yam kuv ua uas txaj muag tshaj plaws, thiab kuv yuav poob kuv lub meej mom tib neeg tiag tiag. Kuv ntxub kuv tus kheej vim tsis muaj lub zog thiab thov kev hlub tshua los ntawm Ntxwgnyoog, thiaj li muab kuv tus kheej tig mus ua Ntxwgnyoog tej khoom thuam luag lawm. Kuv tsa tes cog lus rau kuv tus kheej tias txawm cov tub ceev xwm lim hiam no ua rau kuv txaj muag los xij, txawm tias lawv yuav hle kuv tej ris tsho tiag tiag los xij, kuv yeej yuav tsis nyo hau rau lawv thiab thov kev hlub tshua li, thiab yeej yuav tsis rais mus ua ib tugYudas li. Thaum tub ceev xwm pom tias kuv tsis ntshai li lawm, ua rau lawv npau taws heev ces lawv thiaj li xauv kuv ob sab tes rau ntawm cov las hlau. Ib tug tub ceev xwm uas yog poj niam txawm nthe tias, “Tsis yog koj tsis hle nws liab qab lod? Hle txhua yam mas, kom koj thiaj li pom tag nrho txhua yam.” Pawg tub ceev xwm txawm luag zov zaws, zoo li cov niag dab phem tuaj ntawm dab tuag teb tuaj. Nyob rau lub sij hawm ntawd, kuv txhais ko taw dai vias, thiab kuv lub cev tso tag nrho khuam rau ntawm kuv dab teg, uas mob npaum nkaus li dab teg yuav dam ntag. Kuv rau siab ntso thov Vajtswv rau hauv kuv lub siab, thov kom Nws muab kev ruaj siab thiab lub zog rau kuv kom kuv thiaj li tiv taus txoj kev tsim txom ntawm tub ceev xwm thiab txhob ua siab muag rau Ntxwgnyoog. Tom qab ntev dua li ib nrab teev lawm, tub ceev xwm mam txo kuv nqis. Kuv txhais ko taw loog tag thiab tsis hnov dab tsi li lawm, ces kuv thiaj li ntog kiag tam sid thaum kuv txhais ko taw chwv hauv pem teb. Ib tug tub ceev xwm hais phem ntsuav tias, “Xav txog koj qhov xwm txheej nawb. Yog koj tseem tsis hais lus li thiab, peb muaj ntau yam tswv yim ntxiv los qhuab ntuas koj.” Tom qab ntawd, ces lawv thiaj li tawm mus lawm.

Ob hnub tom qab, ib tug tub ceev xwm rog rog txawm nkag los. Kiag thaum nws nkag los ntawd, nws hais rau ob tug tub ceev xwm uas saib xyuas kuv ntawd tias, “Neb puas paub tias vim li cas neb ntaus tsis tau tus poj niam no? Vim tias neb muag dhau lawm, thiab neb tsis siv lub tswv yim uas yog. Hnub no, kuv yuav qhia ob peb lub tswv yim rau neb, thiab qhia rau neb pom tias kuv siv li cas!” Nws hais kom kuv zaum ywb, thiab tom qab ntawd kom zaum ywb mus txog ib nrab xwb, thiab tom qab kom rov qab ua li ntawd mus mus los los txog ntua qhov uas kuv lub zog tag nrho thiab vau hlo. Ces nws hais rau ob tug tub ceev xwm kom ib leeg tuav kuv ib sab caj npab, muab kuv thawb rau hauv thiab tsa kuv sawv, thiab tsim txom kuv zoo li no txuas ntxiv mus mus los los. Thaum ntsia rau lawv tej lus tsiv nyaum ntawd, kuv paub tias kev tsim txom hnyav tab tom yuav los ntxiv. Kuv xav txog kuv tus yeeb yam mloog lus thaum nyo hau rau Ntxwgnyoog thiab thov kev hlub tshua ob hnub ua ntej vim kuv txoj kev ntshai txaj muag, yog li kuv thiaj li txiav txim siab rau hnub ntawd tias kuv yuav vam khom rau Vajtswv thiab ua tim khawv rau Nws rau ntawm Ntxwgnyoog xub ntiag. Kuv thiaj li thov Vajtswv rau hauv kuv lub siab tias, “Vajtswv, kuv tsis paub lwm lub tswv yim phem uas tub ceev xwm yuav siv los tsim txom kuv, tab sis kuv xav tsim cov lus tim khawv ruaj khov thiab nrov nroo ntws rau Koj, yog li kuv thov kom Koj muab kev ruaj siab thiab lub zog rau kuv.” Tom qab ib pliag ntawd, lawv sab heev thiab tawm fws lug uas ua rau lawv nqa tsis taus kuv lawm. Kiag thaum lawv txhais tes tso plhuav kuv, ces kuv vau nrov poog rau hauv npoo tsev lawm. Law hais kom kuv sawv thiab zaum ywb mus mus los los. Tus tub ceev xwm rog rog thuam thiab hais tias, “Zoo li nws kub heev. Hliv ib co dej txias rau nws. Kuv yeej paub tseeb tias nws nyiam qhov ntawd.” Ces lawv txawm hliv dej txias rau kuv txog ntua thaum kuv ntub tag lawm. Tab sis qhov txawv heev mas yog qhov tias kuv hnov ib co pa tawm ntawm kuv los, thiab kuv tsis hnov txias kiag li. Kuv paub tias qhov no yog Vajtswv txoj kev tiv thaiv kuv. Kuv ua Vajtswv tsaug tas li rau hauv kuv lub siab, thiab kuv hnov kuv txoj kev ntseeg Vajtswv loj hlob tuaj lawm.

Tom qab ntawd ces ob tug tub ceev xwm txawm muab kuv rub sawv thiab muab kuv sab tes laug xauv khi rau ntawm cov las hlau. Kuv lub dab teg twb yeej raug mob los ntawm qhov muab dai ua ntej dhau los lawm, yog li thaum xauv kuv tes zaum no, nws haj yam mob tshaj lawm thiab. Tub ceev xwm luag thaum lawv pom kuv qhov mob, thiab kuv tsis xav kom lawv pom kuv txoj kev qaug qheb, yog li kuv thiaj li tiv qhov mob ntawd tsis ua suab sab hlo li. Yuav kom txo tau qhov mob ntawd, ces kuv thiaj li sim siv kuv cov ntsis ntiv taw sawv tas zog. Kuv ib tug ntiv taw tseem chwv tau av, tab sis yuav luag tsis tau, txawm li ntawd los thaum ib tug tub ceev xwm pom qhov no, nws siv nws txhais ko taw sib zog tsuj kuv lub luj taw, dai kuv lub cev ib pliag ntxiv, ces tshem nws txhais taw lawm, sib sib zog ntsiab kuv txhais tes mas mob tshaj plaws li. Thaum pom tias kuv tseem nyob ntsiag to xwb, ces tub ceev xwm khi ib txoj hlua rau kuv ib sab ko taw, rub txoj hlua ntawd los dai kuv lub cev rau saud, ces tom qab ntawd cia li tso plhuav txoj hlua tam sim ntawd. Lawv ua li ntawd mus mus los los li. Tsuas zoo li ntawd xwb los, kuv lub cev yeej yoj ib sab mus rau ib sab, thiab qhov ntawd hnov zoo li muaj ib rab riam hlais kuv lub dab teg. Vim tseem ua li no mus txuas ntxiv, kuv thiaj li rau siab ntso thov Vajtswv rau hauv kuv lub siab. Tom qab ntawd, tus tub ceev xwm rog rog nqa ib lub rooj zaum kav theej los. Ob tug tub ceev xwm ib leeg tuav kuv ib sab ceg, muab ob sab ceg tso rau theem kawg ntawm lub rooj zaum, thiab tom qab ntawd mam tshem lub rooj zaum tawm. Tag nrho kuv lub cev dai rau ntawm kuv dab teg, ua rau lub kauj xauv tes sawv nkag mus rau hauv cov nqaij. Qhov mob mas yuav luag tiv tsis taus li. Peb caug los sis plaub feeb tom qab ntawd, tub ceev xwm mam li txo kuv sab tes laug los, muab kuv sab tes xis xauv rau ntawm cov las hlau, thiab tsim txom kuv txuas ntxiv mus. Kuv txawm pib ua pa tsis nto, thiab xav tias, “Kuv tsis paub tias tub ceev xwm yuav tsim txom kuv mus ntev li cas. Yog lawv pheej muab kuv dai zoo li no mus ntxiv, ntshe kuv ob txhais tes yuav piam tag li, thiab yog kuv ob txhais tes piam lawm, kuv yuav muaj sia nyob tau li cas mus rau yav tom ntej?” Kuv yim xav, kuv yim tu siab, txog ntua rau thaum nyuaj rau kuv ua pa. Kuv xav tias kuv yuav tiv tsis taus mus ntxiv lawm, yog li kuv thiaj li thov Vajtswv tiag tiag tias, “Vajtswv, kuv lub cev nqaij daim tawv mas qaug zog tag li lawm. Kuv tiv tsis taus mus ntxiv lawm. Thov muab lub zog rau kuv, kom kuv thiaj li sawv khov kho thiab ua kom Ntxwgnyoog txaj muag.” Nyob rau lub sij hawm ntawd, kuv nco tau ib zaj lus ntawm Vajtswv cov lus tias, “Ntawm txoj kev mus rau Yeluxalees, Yexus muaj kev ntxhov siab, zoo li rab riam ntsia hauv Nws lub siab, tab sis Nws tsis tau muaj lub siab xav rov qab ua raws li Nws txoj lus; Nws ib txwm muaj zog txhawb nqa Nws mus rau qhov chaw uas lawv yuav muab Nws ntsia rau saum tus ntoo khaub lig. Thaum kawg, Nws raug ntsia rau saum tus ntoo khaub lig thiab rais los ua tus neeg tuag nyob txim txhaum, kev ua tiav txoj num kev cawm dim ntawm tib neeg. Nws tsoo tawm ntawm lub xauv tes kev tuag thiab Ntuj Tawg. Nyob rau ntawm Nws lub xub ntiag mas, txoj kev txawj tuag, dab teb, thiab Ntuj Tawg tsis muaj lub hwj chim li, thiab tau swb rau Nws lawm” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Yuav Ua Li Cas Ua Dej Num yam Muaj Kev Sib Raug Zoo Nrog Vajtswv Lub Siab Nyiam). Vajtswv txoj lus muab lub zog rau kuv. Yuav kom txhiv tau tib neeg dim, ces Tswv Yexus thiaj li raug ntsia rau saum tus ntoo khaub lig thiab raug txoj kev txaj muag thiab kev mob loj tshaj, tiam sis Nws ua li ntawd yam tsis yig li. Vajtswv txoj kev hlub rau tib neeg mas loj tshaj plaws, thiab nyob hauv qhov no, Vajtswv twb ua ib tug qauv rau peb lawm. Tab sis thaum kuv ntsib tub ceev xwm txoj kev tsim txom, kuv txawm tsis xav txog qhov yuav ua tim khawv lawm. Tiam sis, kuv xav txog kuv tus kheej lub cev xwb. Kuv mas twm xeeb thiab ntxim ntxub tshaj! Thaum xav txog qhov no, kuv txaj muag kawg. Zaum no, kuv xav tias kuv yuav ua kom tau zoo raws Vajtswv. Qhov xav txog Vajtswv txoj kev hlub ntawd txhawb tau kuv thiab muab lub zog rau los tawm tsam Ntxwgnyoog mus kom txog thaum kawg. Nyob rau lub sij hawm no, ib tug tub ceev xwm pom kuv qi muag nti thiab hais tias, “Nws tab tom thov lawv tus Vajtswv, thiab nws yuav muaj lub zog tuaj txhua zaus nws ua li ntawd.” Lwm tus txawm muab ib txoj xov hlau los dig kuv cov plaub muag. Thaum nws dig kuv cov plaub muag, nws hais tias, “Rua koj ob lub qhov muag. Tsis tso cai rau koj thov koj tus Vajtswv.” Thaum nws pom tias kuv tseem nyob ntsiag to, nws thiaj li muab txoj siv tawv npuaj kuv ntsej muag peb los sis plaub zaug, tab sis kuv tsis hnov mob hlo li. Tom qab ntev dua ib nrab teev lawm, ces ib tug tub ceev xwm txawm hais tias, “Rub nws kom siab zog, kom nws txhob chwv hauv piam teb. Saib seb nws yuav xyiv fab qhov ntawd li cas.” Ces, ob tug tub ceev xwm muab kuv nqa, ho lwm tus qhib lub kauj xauv tes thiab tab tom yuav muab nws swb rau tus las kom siab zog, ces lub kauj xauv tes txawm dam kiag tam sid thiab xauv tsis taus lawm. Lawv sim lwm lub, tab sis tej ntawd los tseem tsis ua hauj lwm li thiab. Kuv paub tias qhov no yog Vajtswv txoj kev tiv thaiv, thiab kuv ua Vajtswv tsaug nyob hauv kuv lub siab. Ua rau tub ceev xwm sab heev tuav tsis tau kuv nqa kom siab li ntawd mus ntxiv lawm, yog li lawv thiaj li tso plhuav, ces kuv vau kiag tam sid rau hauv piam teb. Lawv tau tsim txom kuv ntev yuav luag txog ob teev, thiab ua rau kuv sab heev ces kuv thiaj li pw ntawd tsis nti li lawm. Thaum rov qab xav txog tag nrho qhov tub ceev xwm tsim txom kuv ntawd mas, kuv pom meej meej txog tub ceev xwm tus yeeb yam lim hiam thiab phem lawm. Kuv kuj hnov Vajtswv txoj kev txhawj rau kuv thiab, thiab kuv rais los ruaj siab ntau ntxiv rau Vajtswv lawm. Ib pliag tom qab ntawd, ib tug tub ceev xwm txawm los thiab ncaws kuv ob peb teg. Thaum pom tias kuv tseem tsis nti li, nws muab ib fwj tshuaj nplaum txias coj los pleev thoob plaws kuv lub qhov muag, tab sis kuv yeej tsis hnov dab tsi li lawm. Tub ceev xwm pom tias kuv tsis nti li ces thiaj li mus lawm. Kuv paub tias qhov no yog Vajtswv txoj kev tiv thaiv kuv lawm.

Thaj tsam li xya teev thaum tsaus ntuj, ib tug tub ceev xwm txawm nkag los. Thaum nws pom tias kuv tsau dej ntub tag thiab tshee nkuj nkaws vim no no, nws thiaj li cem lwm tus tub ceev xwm. Vim txoj kev ua siab zoo cuav, nws thiaj li hais kom lawv nqa cov ris tsho qhuav los rau kuv hloov, thiab tom qab ntawd nqa ib taig peev choj los rau kuv noj, tom qab uas nws tus kheej sim ua siab zoo rau kuv. Nws hais tias, “Koj nyob deb ntawm koj tsev heev lawm, thiab tam sim no koj rov qab mus tsis tau lawm. Koj cov me nyuam tsis nco koj lod? Cas koj yuav ntseeg Vajtswv rau thaum tseem hluas ua luaj li no? Kuv hnov tias koj yog ib tug thawj coj, yog li cia li qhia qhov peb xav paub rau peb xwb, ces kuv cog lus tias peb yuav tso koj mus. Koj muaj peev xwm rov mus tsev thiab nyob nrog koj tsev neeg.” Thaum kuv hnov li no, kuv paub tias nws tas zog ntxias dag kuv kom ntseeg nws siab thiab qhia tej ntaub ntawv txog pawg ntseeg rau nws xwb. Kuv hais tias, “Kuv twb qhia txhua yam uas kuv paub rau nej tag lawm. Kuv tsis paub dab tsi ntxiv lawm.” Nws txawm npuaj rooj tam sid, sawv tsees, thiab hais lus phem tias, “Txhob xav tias peb yuav ua tsis tau dab tsi rau koj yog koj tsis hais lus! Tsoom fwv qib siab txib kom peb tuaj rhuav tshem tag nrho cov ntseeg Vajtswv Tus Uas Muaj Hwj Chim Loj Kawg Nkaus. Peb tab tom yuav tuaj rhuav tshem koj lub koom haum. Yog koj tsis pib koom tes, ces koj yuav raug rau txim.” Ces nws txawm mus lawm. Nyob rau lub sij hawm no, tus tub ceev xwm xeem Vwj txawm hais tias, “Koj tsim nyog ua qhov ntse thiab tej ntaub ntawv uas peb xav tau rau peb. Ua li ntawd koj thiaj li tsis ntsib kev txom nyem ntau.” Kuv xav tias, “Tub ceev xwm yuav tsis tsum yog lawv tsis tau tej ntaub ntawv uas lawv xav tau. Yog kuv tiv tsis taus qhov kev tsim txom thiab rais los ua ib tug Yudas, ces qhov ntawd yuav yog ntxeev siab rau Vajtswv, yog li qhov zoo ces tua kuv tus kheej kom tuag xwb.” Kuv xav txog qhov tua yus tus kheej. Nyob rau lub sij hawm ntawd, kuv paub tias kuv tus yam ntxwv mas tsis yog lawm, yog li kuv thiaj li thov Vajtswv ntsiag to tias, “Vajtswv! Kuv lub cev nqaij daim tawv qaug zog lawm, thiab kuv xav tuag kom khiav dim xwm txheej qhov no. Kuv qaug zog dhau lawm, thiab kuv lub siab mas me heev. Thov qhia thiab coj kuv kev, thiab muab kev ruaj siab thiab lub zog rau kuv kom sawv tau khov kho.” Tom qab kuv thov Vajtswv lawm, kuv txawm nco tau tias kuv muaj ib co ntaub ntawv ntawm Vajtswv txoj lus kaw rau hauv kuv lub MP5. Kuv thiaj li hais rau tus tub ceev xwm hluas tias, “Muab kuv lub MP5 rau kuv. Tsis muaj dab tsi tiam sis kuv xav muab qee yam qhia rau koj.” Nws xav tias ntshe kuv tab tom yuav lees txim txhaum ntag, yog li nws thiaj li cev lub MP5 rau kuv. Kuv qhib lub MP5, ces kuv txawm pom ib zaj lus ntawm Vajtswv cov lus tias, “Cov neeg uas Vajtswv hais txog tias yog ‘cov neeg muaj yeej’ yog cov neeg uas tseem muaj peev xwm ua tim khawv thiab tswj lawv txoj kev ruaj siab tau li qhov qub thiab muab kev fij ncaj ncees rau Vajtswv thaum nyob rau hauv Ntxwgnyoog txoj kev haub ntxias thiab thaum raug Ntxwgnyoog cuam tshuam, lawv nrhiav pom lawv tus kheej tias nyob rau hauv txoj kev tsaus ntuj. Yog koj tseem muaj peev xwm ua tau lub siab dawb huv rau ntawm Vajtswv xub ntiag thiab tuav tau koj txoj kev hlub tiag rau Vajtswv li qhov qub, txawm yuav muaj dab tsi los xij, koj yeej tseem ua tim khawv rau ntawm Vajtswv xub ntiag, thiab qho no yog yam uas Vajtswv hais txog kev ua ‘tib tug neeg muaj yeej’” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Koj Yuav Tsum Tuav Koj Txoj Kev Mob Siab rau Vajtswv). Vim Vajtswv cov lus los, kuv thiaj li to taub Vajtswv txoj kev xav lawm. Thaum kuv ntsib kev tsim txom thiab kev ceeb laj txom nyem, qhov Vajtswv xav tau yog kuv txoj kev ntseeg thiab kev ua siab ncaj. Vajtswv xav kom kuv hais lus tim khawv muaj yeej thaum tseem raug Ntxwgnyoog vij. Cov niag tub ceev xwm lim hiam no tsim txom kuv li no los yuam kom kuv ntxeev siab rau Vajtswv. Yog kuv tua kuv tus kheej, plam kuv cov lus tim khawv lawm, qhov ntawd yuav poob rau Ntxwgnyoog tej tswv yim ntxias dag, thiab ua lub neej tsis tau raws li qhov Vajtswv muab fij rau kuv—qhov ntawd yuav ua rau mob Vajtswv tshaj plaws. Kuv tuag tsis tau, kuv yuav tsum ua neej nyob mus, muaj lub zog, sawv khov kho thiab ua kom tau zoo raws Vajtswv. Thaum xav txog qhov no, kuv hnov muaj zog tuaj. Kuv txhos caug ntua thiab hais lus thov ua Vajtswv tsaug. Tus tub ceev xwm hluas txawm hais ceeb tag tias, “Koj mas siab tawv kawg, muaj cuab kav txhos caug ntua thiab thov Vajtswv rau ntawm no!” Kuv tsis quav ntsej nws li. Tom qab kuv thov Vajtswv tag, nws nug kuv tias, “Koj twb txiav txim siab lawm lod? Thaum koj xav txog qhov ntawd thoob lawm, ces qhia qhov koj paub rau kuv.” Kuv txiav txim siab hais tias, “Kuv twb hais txhua yam li qhov kuv xav hais lawm. Kuv tsis muaj dab tsis yuav hais ntxiv lawm.” Ces ua rau tus tub ceev xwm xeem Vwj ntawd npau taws heev nws thiaj li muab lub kauj xauv tes los xauv kuv ib sab tes rau ntawm cov las hlau. Tus tub ceev xwm hluas hais tias, “Cov lus thov mas muaj hwj chim tiag tiag. Qhov ntawd zoo li ua rau nws rais mus ua ib tug neeg txawv huv si tag nrho lawm. Nws tsis ntshai dab tsi, thiab tsis hais dab tsi li.” Thaum kuv hnov li ntawd, kuv ua Vajtswv tsaug tawm puag hauv kuv nruab lub siab tuaj, ces kuv thiaj li ruaj siab tuaj ntxiv tias kuv yeej sawv tau kom khov kho.

Tag kis sawv ntxov nyob rau hnub tom ntej, thaum tub ceev xwm pom tias lawv tej tswv yim siv tsis tau rau kuv lawm, lawv thiaj li hais tias, “Pib hnub no mus, peb yuav muab koj xauv rau ntawm lub qhov rai txhua hnub, thiab peb yuav tsis pub koj noj, haus dej, los sis pw. Saib seb koj yuav nyob tau pes tsawg hnub.” Kuv txawm thov Vajtswv ntsiag to tias, “Vajtswv, kuv ntseeg tias kuv txoj sia thiab txoj kev tuag yog nyob rau hauv Koj ob txhais tes lawm. Thov tiv thaiv kuv. Txawm tias kuv tuag los xij, kuv yuav sawv khov kho thiab ua tim khawv rau Koj!” Tom qab ntawd, tub ceev xwm tig los saib kuv, ces lawv thiaj li nthe nqho kom kuv sawv thaum lawv pom kuv tsaug zog. Nyob rau hnub peb, muaj ib tug txiv neej nyob sab kev tid txawm pom kuv raug xauv rau ntawm lub qhov rai thiab hu rau kuv tias, “Puas yog muaj neeg nyiag koj? Yog hais tias yog, ces yoj koj txhais tes rau kuv, es kuv mam li hu 110 rau koj nawb.” Kuv xav tias, “Tub ceev xwm muab kuv kaw rau ntawm no. Koj puas xav tias tub ceev xwm coj zoo rau cov tib neeg dog dig thiab? Pawg Tsoom Fwv Koom Tsham cov tub ceev xwm mas yog cov niag dab phem xwb.” Tom qab ob peb hnub ntxiv lawm, muaj neeg coob zuj zus nyob theem sab hauv pom kuv raug xauv rau ntawm lub qhov rai. Lawv txawm taw tes rau kuv thiab tham txog qhov ntawd zom zaws, yog li tub ceev xwm thiaj li tshem kuv tawm mus rau lwm chav lawm.

Muaj ib hmo, thaj tsam li hnub tim 20 lub Peb Hlis Ntuj, kuv raug coj mus nug xyuas tshwj xeeb rau tim ib lub tsev ua hauj lwm. Muaj ob tug tub ceev xwm los ntxuav kuv hlwb txog nthua plaub teev sawv ntxov, thaum ib tug tub ceev xwm xeem Lis hais rau kuv tias, “Pawg Ntseeg ntawm Vajtswv Tus Uas Muaj Hwj Chim Loj Kawg Nkaus tau muaj neeg coob zuj zus txog ntau plhom leej rau tam sim no lawm, thiab qhov no mas phom sij ncaj qha rau tej kev ntshaw ntawm Pawg Tsoom Fwv Koom Tsham. Yog peb tsis caij tsuj tej ntawd, leej twg yuav mloog Tsoom Fwv Koom Tsham? Tus thawj kav teb chaws Xi tus kheej tau txib kom muab ‘Qhov Xob Laim Sab Hnub Tuaj’ rhuav tshem kom tag nrho mus, thiab tias cov ntseeg Vajtswv Tus Uas Muaj Hwj Chim Loj Kawg Nkaus rov tau txais kev qhia ntxiv, kom lawv tso lawv tej kev ntseeg tseg thiab kam lees txais Pawg Koom Tsham txoj kev qhia thiab kev coj. Yog lawv tsis lees txais yuav, ces lawv yuav raug phua lub txim coj mus kaw, thiab yuav tsis muaj leej twg txhawj txog yog lawv raug ntaus tuag.” Nws hais ntxiv tias, “Tam sim no kiag, tag nrho hauv lub xeev thiab hauv lub teb chaws tab tom ntes cov tswv cuab ntawm Pawg Ntseeg ntawm Vajtswv Tus Uas Muaj Hwj Chim Loj Kawg Nkaus. Thaum kawg, tej ntawd thiaj li raug tshem tawm mus du lug. Yog koj xav tias koj tseem yuav ntseeg Vajtswv Tus Uas Muaj Hwj Chim Loj Kawg Nkaus mus ntxiv tau thiab, ces kuv qhia rau koj tam sim no tias yeej tsis muaj hnub ua tau li ntawd li!” Kuv hais tias, “Peb yog cov ntseeg Vajtswv tsuas mus koom tej rooj sib tham, nyeem Vajtswv txoj lus, nrhiav hloov tus moj yam kom rais los ua neeg coj ncaj, thiab taug txoj kev uas yog hauv lub neej. Peb yuav ua kom piam sij rau tej kev ntshaw ntawm Pawg Tsoom Fwv Koom Tsham tau li cas? Yog koj tsis ntseeg kuv, ces nyeem cov lus ntawm Vajtswv Tus Uas Muaj Hwj Chim Loj Kawg Nkaus es koj mam li paub. Koj twb txhav cov phau ntawv ntau heev ntawm Vajtswv Tus Uas Muaj Hwj Chim Loj Kawg Nkaus txoj lus mus lawm, yog vim li cas thiaj li tsis nthuav ib phau saib?” Lwm tus tub ceev xwm txawm hais nrov nrov tias, “Txhob qhia peb txog txoj kev ntseeg Vajtswv! Peb tsis ntseeg li no, peb tsuas ntseeg Pawg Tsoom Fwv Koom Tsham thiab Tus Thawj Kav Teb Chaws Xi nkaus xwb.” Ces nws txawm hem kuv tias, “Ua tib zoo xav txog qhov ntawd. Yog koj qhia peb qhov uas peb xav paub, ces kuv cog lus tias yuav tsis phua lub txim kaw koj. Peb mam li cia koj mus tsev kiag tam sid. Yog koj tseem tsis to taub koj qhov xwm txheej, ces kuv mam li xa koj mus rau tim lub tsev kho mob uas kho neeg puas hlwb. Kws kho mob mam li txhaj tshuaj rau koj txhua hnub, kom koj cia li tsis paub xav lawm. Koj yuav ua neej nyob nrog txhua hom neeg muaj mob puas siab ntsws, ces lawv yuav ntaus koj thiab cem koj txhua hnub. Peb yuav saib seb koj yuav nyob taus tod ntev npaum li cas.” Tom qab kuv hnov li no lawm, ua rau kuv ntshai tshaj. Yog kuv raug xa mus rau tim lub tsev kho mob uas kho neeg puas hlwb, ces kuv yuav nyob nrog cov neeg mob puas hlwb txhua hnub. Kev nyob nrog cov neeg zoo li no mas haj yam yuav ua rau ib tug neeg dog dig vwm tuaj xwb. Thaum tub ceev xwm pom tias kuv nyob ntsiag to lawm, lawv txawm hem kuv ntxiv tias, “Rov qab mus xav txog qhov ntawd dua. Sau txhua yam uas peb yuav tsum tau paub. Saib raws li qhov pov thawj uas peb muaj mas, peb yeej phua tau lub txim rau koj ntev txog peb mus txog xya lub xyoo.”

Rov qab los txog tim tsev tos qhua, xav txog qhov tub ceev xwm hais, ua rau kuv pw tsis tsaug zog kiag li. Qhov kev xav txog qhov mob puas hlwb ntawd pheej caum rawv kuv thiab ntaus kuv, thiab kuv tus kheej tus duab vwm ntsuav thiab khiav liab qab ploog rau ntawm txoj kev ua rau kuv tawm fws txias zias thiab pw ncaj qha rau saum txaj. Kuv quaj thiab thov Vajtswv tias, “Vajtswv! Kuv ntshai tsam rais los ua ib tug neeg vwm. Thov pab kuv, coj kuv, thiab ua kom kuv siab tus. Txawm kuv ntsib hom xwm txheej dab tsi los xij, kuv yeej yuav tsis muaj hnub ntxeev siab rau Koj li.” Tom qab kuv thov Vajtswv lawm, kuv xav txog ib zaj lus ntawm Vajtswv cov lus tias, “Thaum tib neeg npaj txhij yuav muab lawv txoj sia fij lawm, ces txhua yam cia li rais los ua tej yam me me tsis tseem ceeb lawm xwb, ces tsis muaj leej twg yuav ua tau li cas rau lawv li lawm. Dab tsi tseem ho tseem ceeb tshaj txoj sia lawm thiab? Yog li ntawd, Ntxwgnyoog tsis muaj cuab kav yuav ua tau dab tsi ntxiv rau hauv tib neeg lawm, tsis muaj ib yam dab tsi uas nws ua tau rau tib neeg li lawm” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Kev txhais lub ntsiab ntawm Cov Lus Zais Tob ntawm “Vajtswv Cov Lus rau Tag Nrho Lub Qab Ntuj Khwb”, Tshooj 36). Thaum kuv xav txog Vajtswv cov lus lawm, kuv thiaj li maj mam ua siab tus tus. Yog kuv txaus siab hlo yeem muab kuv txoj sia los pheej hmoo, ces ntshe kuv yuav tiv tsis taus kev txom nyem dab tsi li pob? Kuv txoj sia thiab txoj kev tuag yog nyob rau hauv Vajtswv ob txhais tes lawm, thiab kuv yuav tsis muaj mob puas hlwb yog tsis muaj Vajtswv qhov kev tso cai. Tom qab kaj ntug lawm, kuv muab tus cwj mem kua thiab ib daim ntawv los sau ib kab ntawv tias, “Tus laj kab siab thiab lub tiaj nyom dav, ntshe yuav lwj mus ib txhis rau hauv tsev kaw neeg.” Thaum tub ceev xwm pom kab ntawv no, nws lub ntsej muag txawm hloov kiag. Nws mas npau taws heev ces thiaj li kaw qhov rooj thiab tawm mus lawm.

Tom qab ntev dua li ib lub hlis lawm, kuv raug xa mus rau tim lub tsev kaw neeg. Vim hais tias tseem sau qhov nug xyuas tsis tau tiav, lawv muab kuv rau txim rau hauv lub chaw nyob ntev txog rau lub hlis, thiab ceeb toom rau kuv tias, “Tam sim no poob siab tias koj yog ib tug ua txhaum cai, thiab koj tsis muaj cai yuav tawm tau mus qhov txhia chaw tau ywj pheej lawm. Yog koj ntseeg Vajtswv dua, yog peb txom tau koj ces yuav rau txim rau koj.” Tub ceev xwm hu xov tooj tuaj tim kuv tsev rau tej thaum, thiab cov neeg tuaj hauv Lub Chaw Kev Ntseeg tuaj tim kuv tsev tuaj nug txog kuv txoj kev ntseeg Vajtswv. Kuv tsis muaj cuab kav hu rau kuv cov nus thiab cov viv ncaus, thiab kuv ua lub neej raws li pawg ntseeg tsis tau. Vim raug tsim txom los ntawm tub ceev xwm, kuv tej ntiv tes ntawm ob sab tes thiaj li ncab tsis tau lawm thiab mob heev rau kuv lub dab teg qhov ntawd ua rau kuv txav tsis tau li. Kuv haj tseem tsis muaj zog tuav lub zuag, thiab tam sim no haj tseem tsis muaj ib lub zog rau ntawm kuv dab teg li lawm thiab.

Tom qab raug ntes, raug tsim txom, thiab raug tsim txom los ntawm Pawg Tsoom Fwv Koom Tsham, kuv pom meej meej tias nws yog tus yeeb yam uas tsiv nyaum, phem, thiab ua txhaum rau Ntuj Ceeb Tsheej. Kuv kuj pom meej meej tias nws yog Ntxwgnyoog thiab, uas tawm tsam Vajtswv thiab nqos tib neeg. Nyob rau tib lub sij hawm no, kuv pom tias Vajtswv yog lub hwj chim loj kawg nkaus thiab muaj kev txawj ntse, thiab kuv hnov zoo li muaj Vajtswv txoj kev tiv thaiv thiab saib xyuas rau kuv. Nyob rau feem kev sib ntsuas zog sab ntsujplig, qhov ntawd yog Vajtswv cov lus uas coj kuv kev, ib kauj ruam zuj zus, kom tau txais kev muaj yeej Ntxwgnyoog, thiab sawv khov kho. Ua tsaug rau Vajtsw!