48. Ntshav Nrog thiab Kua Muag Ntws tau Kaum Cuaj Lub Xyoos Lawm
Kuv twb yog ib tug ntseeg tus Tswv txij thaum kuv yog ib tug me nyuam ntxhais, nrog kuv niam thiab kuv txiv los lawm. Thaum kuv muaj hnub nyoog 30 tawm xyoo, kuv tus txiv tau tag sim neej los ntawm ib tug mob, ces kuv tus kheej thiaj li tau tu ob tug tub thiab ib tug ntxhais. Vim Tswv txoj hmoov hlub, kuv cov me nyuam thiaj li muaj hauj lwm zoo ua thiab rais los muaj nyiaj npluas nuj heev lawm, muaj tsev neeg uas zoo siab. Ces nyob rau xyoo 1999 ntawd, tag nrho kuv tsev neeg thiab kuv tau lees txais Vajtswv Tus Uas Muaj Hwj Chim Loj Kawg Nkaus tes hauj lwm ntawm tiam kawg lawm, thiab peb pib mob siab mus tshaj tawm thiab ua tim khawv rau lub nceeg vaj txoj moo zoo. Txawm li cas los xij, qhov kev ntes uas xav tsis txog ntawd tau ua rau peb tsev neeg lub neej uas thaj yeeb lug ntawd tawg ua sab ua sua lawm.
Muaj ib hnub nyob rau thaum lub Rau Hli xyoo 2002, kuv paub tias tub ceev xwm tau mus rau tim kuv tus tub hlob lub chaw hauj lwm mus ntes nws, tab sis nws nyiag khiav dim thaum lub sij hawm uas tub ceev xwm tsis ceev faj lawm. Lawv nrhiav nws txhua qhov txhia chaw. Kuv nyuaj siab thiab poob siab tag thaum kuv hnov qhov xov xwm no. Lawv puas nrhiav tau nws? Yog hais tias nws raug ntes lawm, ces lawv yuav tsim txom thiab rhuav tshem nws hnyav heev xwb xwb li ntag. Peb twb yog ib tsev neeg zoo siab uas muaj txhua yam uas peb tim tsum lawm. Kuv cov me nyuam mas puav leej yog cov ntseeg thiab nquag ua lawv tej dej num—qhov ntawd zoo heev li! Tab sis tam sim no tub ceev xwm tau soj kuv tus tub qab, nws twb poob nws txoj hauj lwm thiab tsis muaj cuab kav rov qab los tsev li lawm. Peb tsev neeg tawg tag lawm. Ces kuv tsis paub tias peb yuav ua li cas li lawm. Kuv yim xav txog qhov ntawd ces kuv yim chim siab, yog li kuv thiaj li los taij thov rau ntawm Vajtswv xub ntiag, thov kom Nws saib xyuas kuv tus tub thiab coj kuv kev kom to taub Nws txoj kev xav. Kuv nco tau qee yam uas Vajtswv hais tom qab thov Vajtswv lawm tias: “Tsis txhob poob siab, tsis txhob qaug zog, thiab Kuv yuav ua tej ntawd kom meej rau koj. Txoj kev mus rau lub nceeg vaj yeej tsis tshua du pes tsawg; tsis muaj yam yuav yooj yim li! Koj xav kom tej koob hmoov los rau koj yooj yim, koj tsis xav lov? Hnub no, txhua tus yuav ntsib tej kev sim siab uas iab siab. Yog tsis muaj tej kev sim siab no, lub siab hlub uas nej muaj rau Kuv ntawd yuav tsis loj hlob kom muaj zog dua qub thiab nej yuav tsis muaj txoj tseem kev hlub rau Kuv li. Txawm tias yog tej kev sim siab no tsuas yog tej xwm txheej me me xwb los, txhua tus yuav tsum tau mus kom dhau tej no; tsuas yog tej kev sim siab uas nyuaj nyuaj mas thiaj li sib txawv ntawm ib tug mus rau lwm tus xwb” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 41). Vim Vajtswv cov lus, kuv thiaj li paub tias qhov muaj txoj kev ntseeg thiab qhov caum Vajtswv qab mas yeej tsis yog ib txoj kev du lug li—txhua tus yuav tsum tau raug kev nyuaj thiab kev sim siab. Qhov tub ceev xwm caum raws kuv tus tub ntawd yog qhov Vajtswv tso cai cia tshwm sim. Nws tab tom siv hom xwm txheej mob siab no los ua kom peb txoj kev ntseeg thiab txoj kev hlub zoo tiav log—qhov kev txom nyem no yog ib qho foom koob hmoov los ntawm Vajtswv los. Kuv hnov siab nqig me ntsis thaum kuv xav txog li ntawd, ces kuv thiaj li thov Vajtswv, npaj cia kuv tus tub nyob rau hauv Vajtswv ob txhais tes thiab zwm rau Nws txoj kev cai thiab tej kev npaj.
Tom qab ntawd, thaum tub ceev xwm paub tias kuv tus tub tau luam ntau phau ntawv ntawm Vajtswv cov lus nyob rau hauv pawg ntseeg lawm, ces lawv thiaj li muab nws sau npe tias yog ib tug ua txhaum cai uas xav tau nyob rau hauv lub teb chaws thiab tau hais kom coob tus tub ceev xwm los tshawb nrhiav nws, tshaj tawm tias lawv yuav tsum ua kom nws raug khi thiab raug txiav txim. Qhov xov xwm no ua rau kuv nyuaj siab thiab txhawj heev—nws yuav ua li cas khiav dim kom txhob raug ntes yog hais tias Pawg Koom Tsham yeej yuav ua kom ntes nws tau xwb xwb li? Tsis ntev los no kuv hnov txog ib tug nus uas raug tub ceev xwm ntes thiab tom qab ntawd raug ntaus tuag lawm. Vim Pawg Koom Tsham ntxub cov ntseeg heev, yog lawv ntes tau nws lawm no lawv yuav tsis tsim txom kuv tus tub lod? Kuv yim xav txog qhov no mas yim ua rau kuv ntshai, ua neej txhua hnub nyob tuav plig rawv xwb. Kuv noj tsis taus mov los sis pw tsis taus li, thiab kuv lub siab mas pib dhia pig poog txhua lub sij hawm thaum kuv hnov tub ceev xwm lub tsheb nrov. Kuv muaj tus yam ntxwv uas nyuaj siab heev rau nyob rau lub sij hawm ntawd, thiab lub cev los tseem tsis noj qab nyob zoo thiab. Ob peb hnub tom qab ntawd, tub ceev xwm hu tuaj rau tim peb tsev ob zaug tuaj nug txog kuv tus tub seb nyob rau qhov twg lawm thiab hais lus yam hem ntsuav, phom sim ntshuav tias, “Yog nej cov ko tsis coj nws tuaj cob, ces qhov ntawd yog kev zais npog ib tug neeg uas ua txhaum cai thiab yuav tsis muaj ib tug twg ntawm nej tsev neeg ko yuav khiav dim li!” Kuv mas ntshai heev thaum kuv hnov li ntawd thiab tsis paub tias thaum twg tub ceev xwm yuav tuaj tshawb nrhiav peb lub tsev thiab tej zaum tuaj ntes kuv, kuv tus tub ntxawg thiab nws poj niam. Kuv haj yam txhawj tias thaum twg lawv mam li txhom tau kuv tus tub hlob. Kuv thov Vajtswv tsis tseg, thov kom Nws muab txoj kev ntseeg thiab lub zog rau kuv, thiab thov kom Nws saib xyuas kuv tus tub hlob es kom nws thiaj li yuav nyob tau khov kho. Kuv xav txog qee yam uas los ntawm Vajtswv cov lus los tom qab thov Vajtswv lawm: “Koj yuav tsum tsis txhob ntshai qhov no thiab qhov tod; txawm koj yuav ntsib teeb meem thiab kev phom sij ntau npaum li cas los, koj muaj peev xwm nyob ruaj khov rau ntawm Kuv xub ntiag, tsis muaj kev cuam tshuam los ntawm ib qho kev tab kaum li, kom Kuv txoj kev xav raug ua mus kom tsis paub kawg. Qhov no yog koj txoj hauj lwm…. Tam sim no yog lub sij hawm uas Kuv yuav los sim koj lawm: Koj puas kam muab koj lub siab npuab rau Kuv? Koj puas kam caum raws Kuv qab yam muab siab npuab mus kom txog txoj kev kawg? Tsis txhob ntshai; nrog Kuv txoj kev pab txhawb, leej twg tuaj yeem thaiv txoj kev no?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 10). Vajtswv cov lus txhawb kuv txoj kev ntseeg—Vajtswv yog tus muaj hwj chim loj kawg nkaus thiab tag nrho txhua yam nyob rau hauv Nws ob txhais tes lawm, yog li tsis yog txhua tus hauv kuv tsev neeg txoj hmoo puav leej nyob rau hauv Nws ob txhais tes ib yam thiab pod? Yog Vajtswv tsis tso cai, ces tub ceev xwm yeej ua tsis tau ib qho dab tsi rau peb li. Kuv tej kev txhawj xeeb txog peb cov neeg tsam raug ntes, thiab kuv txoj kev ua neej nyob nrog tus yam ntxwv uas ntshai tas li ces txhais tau tias kuv tsis muaj kev ntseeg Vajtswv tiag. Kuv siab nqig me ntsis vim muaj txoj kev coj qhia ntawm Vajtswv cov lus. Muaj Vajtswv nyob ntawm kuv ib sab, ces kuv yeej tsis ntshai dab tsis li—kuv npaj txhij los muab tag nrho peb tsev neeg tso rau hauv Vajtswv ob txhais tes, thiab kuv txiav txim siab tias txawm yog kuv raug ntes lawm los xij, kuv yeej yuav tsis muab kuv cov nus thiab cov vim ncaus muag li, yeej tsis ntxeev siab rau Vajtswv li!
Ob peb lub hlis tom qab ntawd, thaum tub ceev xwm tseem nrhiav tsis tau tau kuv tus tub, lawv txawm pib hem tias yuav tuaj ntes peb tsev neeg tag nrho. Kuv tus tub yau, nws poj niam, thiab kuv tsis muaj kev xaiv lawm ces thiaj li tawm ntawm peb lub tsev mus nkaum. Kuv mas siab ntxhov quas niab ua ntej yuav tawm mus, xav tias kuv tus tub hlob tseem tab tom khiav nkaum thiab kuv tsis paub tias nws nyob qhov twg li lawm, thiab tam sim no peb yuav tsum tau khiav tawm ntawm peb lub tsev mus, Pawg Tsoom Fwv Koom Tsham Suav ua rau ib tsev neeg uas muaj kev zoo siab heev tawg tag li lawm. Kuv mas ntxhov siab tshaj. Qhov muaj kev ntseeg thiab pe hawm Vajtswv ntawd ho txhaum dab tsi? Pawg Koom Tsham txhob txwm yuam kom peb poob mus rau kev puas tsuaj. Lawv tsis xav cia ib txoj hau kev twg rau cov ntseeg ua neej nyob li—Pawg Koom Tsham mas ntxim ntxub tshaj plaws li! Kuv yog ib tug poj ntsuam thaum muaj 30 tawm xyoo xwb thiab kuv tus kheej tas zog peem los tu peb tug me nyiam thiab. Kuv twb ua hauj lwm tsis paub sab li nyob rau hauv kuv lub neej lawm ces thaum kawg kuv thiaj li peem los dhau lawm. Kuv yeej tsis xav tias, kuv twb muaj hnub nyoog laus li no lawm, kuv tseem raug Pawg Koom Tsham yuam ntes thiab. Qhov tawm mus li ntawd, es Pawg Koom Tsham yuav tsis txhav tag nrho peb tej khoom thiab peb lub tsev lod? Ces peb yuav nyob tau li cas mas? Tej kev xav no ua rau kuv mob siab tiag tiag li. Kuv thiaj li los rau ntawm Vajtswv xub ntiag los thov Vajtswv tias, “Vajtswv! Nyob hauv kuv lub siab kuv yuav tso tsis tau txhua yam uas peb muaj tseg, thiab kuv txhawj tias txij tam sim no mus kuv nyob tau li cas. Thov coj kuv kev kom to taub Koj txoj kev xav.” Kuv txawm nco tau ib nqe lus los ntawm Tswv Yexus los tom qab thov Vajtswv lawm tias: “Leej twg los xij uas tsis kam tso tag nrho tej nws muaj tseg, ces nws ua tsis tau Kuv tus thwj tim” (Luka 14:33). Tswv Yexus cov thwj tim muaj peev xwm tso txhua yam lawv muaj tseg los mus caum raws Nws qab xwb. Kuv xav txog Mathai—nws yog ib tug tub sau se, tab sis thaum Tswv Yexus hu nws, nws muab tag nrho txhua yam uas nws muaj tso tseg thiab muab txhua yam uas nws muaj fij kom nws tau caum raws tus Tswv qab. Thiab thaum tus Tswv hu Petus, ces nws muab nws tes hauj lwm ua ib tug neeg ntaus ntses tso tseg los caum raws tus Tswv qab. Tab sis thaum ntsib Pawg Koom Tsham txoj kev caij tsuj, ces kuv haj tseem tso qee yam khoom tseg tsis tau li. Kuv mas tsis muaj kev ntseeg hlo li. Tej noog uas nyob saum nruab ntuj yeej tsis tseb qoob loo thiab sau qoob loo li, tab sis Vajtswv saib xyuas tej noog ntawd—thiab yog tib neeg li peb ne ho zoo li cas? Qhov kev xav no pab txo tau kuv tej kev txhawj xeeb lawm. Nyob rau tiam kawg, Vajtswv twb los ua lub cev nqaij daim tawv lawm thiab tab tom nthuav tawm qhov tseeb los ntxuav kom peb dawb huv thiab cawm peb. Kuv mas muaj hmoov tshaj uas muaj peev xwm los caum raws Vajtswv qab thiab tau txais qhov tseeb thiab txoj sia—qhov raug kev txom me ntsis ntawd yeej tsim nyog heev lawm! Qhov tseeb yog ib yam muaj nqis tshaj uas tsis muaj ib yam khoom dab tsi yuav yuav tau, thiab kuv paub tias txawm muaj kev nyuaj rau yav tom ntej npaum li cas los yeej tsim nyog.
Tom qab peb tawm hauv tsev mus lawm, ces tub ceev xwm thiaj li paub tias kuv thiab tag nrho kuv tsev neeg yog cov ntseeg Vajtswv Tus Uas Muaj Hwj Chim Loj Kawg Nkaus ces lawv txawm pib nrhiav peb thoob plaws lub nroog. Peb tsiv tawm ntawm ib qho chaw mus rau ib qho chaw kom txhob raug ntes, tej thaum tsis txog hli los twb tsiv tawm ntawm ib qho chaw mus lawm. Txhua zaus, kuv sab heev thiab mob kuv nrab qaum. Ntshai tsam tub ceev xwm nrhiav pom, ces peb thiaj li yuav tsum tau nyias nyob nyias rau ntawm tej tsev ib tshooj uas me me. Nyob rau lub caij ntuj no, mas no tshaj tej dej hauv tsev yuav khov tag, thiab txawm rauv qhov cub tsheej lim tiam, los tsev yeej tseem tsis sov li. Tej tawv nqaij ntawm kuv ob txhais tes mas tawg pleb tag vim txias heev thiab yog chwv dej me ntsis xwb los yeej mob ntsim tshaj. Lub chaw zaum kawg uas peb tau tsiv mus nyob yog ib lub tsev pheeb suab me me uas cia tu me nyuam qaib nyob hauv ib lub zos uas tsaus ntuj nti thiab noo, muaj kab ntau heev. Qhov ntawd ua rau kuv xeev siab heev thiab noj tsis tau mov li. Kuv tab tom xav txog lub sij hawm peb nyob tim tsev, hauv ib lub tsev zoo uas sov so thiab kaj siab lug. Muab qhov ntawd piv rau peb tej xwm txheej tam sim no mas ua rau kuv chim siab tshaj. Kuv tsis paub tias thaum twg mam li los xaus. Thaum paub tias kuv muaj tus yam ntxwv uas tsis yog lawm, ces kuv thiaj li los taij thov rau ntawm Vajtswv xub ntiag kiag tam sid, thov kom Nws qhia kuv thiab coj kuv kev los to taub Nws txoj kev xav. Muaj qee yam los ntawm Vajtswv cov lus los tau tshwm sim rau kuv tom qab thov Vajtswv lawm tias: “Koj yog ib yam muaj sia raug tsim los—koj yuav tsum pe hawm Vajtswv thiab caum raws ib lub neej muaj nuj nqis. Yog koj tsis pe hawm Vajtswv tiam sis nyob rau hauv cev nqaij daim tawv qias vuab tsuab, ces koj tseem tsis yog ib tug tsiaj nyaum uas hnav tib neeg tej ris tsho los? Vim koj yog tib neeg, koj yuav tsum muab koj tus kheej fij rau Vajtswv thiab thev taus txhua yam kev txom nyem! Koj yuav tsum zoo siab thiab lees txais ib qho kev txom nyem me me uas koj tau ntsib rau niaj hnub no thiab ua ib lub neej muaj nuj nqis, zoo ib yam li Yauj thiab Petus. … Nej yog cov neeg uas caum raws txoj hau kev yog, cov uas nrhiav kev tsim kho. Nej yog cov neeg uas sawv los hauv haiv neeg ntawm tus zaj loj liab ploog, cov uas Vajtswv hu ua cov ncaj ncees. Qhov ntawd tsis yog lub neej muaj nuj nqis tshaj plaws los?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Kev Xyaum Ua Raws (2)). Vajtswv cov lus mas txhawb kuv lub zog heev li. Kuv xav txog qhov Ntxwgnyoog sim Yauj siab—Yauj poob tag nrho txhua yam ntawm nws tsev tej khoom ntiag tug lawm thiab nws cov me nyuam raug ntaus tuag tag. Nws tus kheej muaj mob sawv hlwv thoob plaws nws ib ce. Txawm tias muaj kev txom nyem phem loj tag npaum li no los xij, nws tseem qhua Vajtswv lub npe thiab ua tim khawv nrov ntxhe ntws rau Vajtswv. Vajtswv thiaj li pom zoo rau Yauj thiab foom koob hmoov rau nws. Petus txoj kev nrhiav mas yog los hlub thiab paub Vajtswv. Nws raug sim siab ntau pua zaus yam tsis tso txoj kev ntseeg tseg li, ces thaum kawg thiaj li raug ntsia rau saum tus ntoo khaub lig rov quav rau Vajtswv. Nws muaj peev xwm zwm rau kom mus txog ntua hnub tuag, ua tim khawv zoo thiab ua neej nyob muaj qab hau heev. Tab sis rau kuv mas, tab txawm tsiv tawm ob peb zaug thiab ntsib kev txom nyem me ntsis xwb los kuv yeej tiv tsis taus. Kuv yeej tsis muaj ib qho kev zwm rau Vajtswv tiag li! Txoj kev txom nyem uas kuv tab tom thev rau thaum lub sij hawm ntawd mas puav leej yog vim tus zaj loj liab ploog txoj kev tsim txom xwb. Tsis hais tias ntxub tus zaj loj liab ploog hos, kuv ho tseem xav phem thiab yws—kuv mas tsis muaj qab hau ua luaj li! Qhov raug tus zaj loj liab ploog ntawd raws nrhiav ua rau kuv ntsib kev txom nyem me ntsis thiab, tab sis kuv tau txais kev thoob tsib txog tus zaj loj liab ploog ntawd lub ntsiab tseeb, pom nws lub ntsiab tseeb phem ntawm txoj kev ntxub thiab kev tawm tsam Vajtswv meej meej lawm. Vajtswv tsim peb, yog li qhov pe hawm Nws ntawd yeej yog thiab tsim nyog lawm. Qhov ntawd yog txoj kev yog nyob rau hauv hauv lub neej txoj sia lawm, thiab kev tshaj tawm txoj moo zoo mas yog los pab kom txhua tus hnov Vajtswv lub suab thiab lees txais qhov tseeb, ces lawv thiaj li dim. Tab sis Pawg Koom Tsham caij tsuj peb thiab tav peb kev tas li, haj tseem yuam kom leej niam tawm ntawm nws cov me nyuam mus thiab. Kuv pom tau tias qhov ntawd yog ib pawg neeg phem heev thiab yog Vajtswv ib tug yeeb ncuab phem—kuv ntxub nws thiab foom phem rau nws tawm puag hauv kuv nruab siab los. Yog kuv tsis tau raug qhov mob siab ntawd, tab sis tsuas ua lub neej nyob thaj yeeb lug rau tim tsev xwb, ces ntshe kuv yuav tsis tau pom tshab plaws tus zaj loj liab ploog ntawd lub ntsiab tseeb, thiab yuav tsis tau muaj peev xwm tso nws tseg thiab tsis kam lees txais nws tawm hauv siab los li. Kuv raug kev txom nyem me ntsis los mus raws Vajtswv qab nyob rau theem ntawd, tab sis kuv tau txais qhov tseeb thiab txoj sai lawm—qhov kev txom nyem ntawd mas muaj qab hau heev li. Vajtswv los ua lub cev nqaij daim tawv, los ua hauj lwm nyob rau hauv tus zaj loj liab ploog lub teb chaws, raug Pawg Koom Tsham tsim txom thiab raws nrhiav, yam tsis muaj ib lub tog hauv ncoo tiag Nws lub taub hau li. Qhov kev txom nyem uas nws raug ntawd mas ntsuas tsis tau li. Tam sim no peb tsev neeg raws Vajtswv qab thiab raug Pawg Koom Tsham tsim txom lawm ces yuav tsum tau khiav tawm, uas raug muab qhia rau hauv Khetos qhov kev nyuaj. Qhov no yog Vajtswv qhov kev txhawb! Ces kuv thiaj li txiav txim siab twj ywm tias txawm kuv yuav ntsib kev txom nyem ntau npaum li cas los xij, kuv yuav raws Vajtswv qab kom mus txog ntua thaum kawg kiag.
Tom qab ntawd, kuv tus ntxhais thiaj li raug tub ceev xwm soj qab thiab raws qab thaum tawm mus qhia txoj moo zoo. Nws khiav dim lawv los ntawm qhov nkag mus rau hauv ib lub khw muag khoom loj thiab hloov nws cev ris tsho. Ces nws raug yuam kom khiav tawm ntawm thaj chaw ntawd mus tom qab ntawd. Tos peb paub xwb, peb tsev neeg twb sib ncaim lawm, khiav los tau ib xyoos kiag lawm. Kuv xav tas li tias kuv tus tub hlob thiab tus ntxhais nyob rau qhov xwm txheej zoo li cas lawm, txhawj tas li tsam nkawv raug ntes. Kuv noj tsis taus mov los sis pw tsis txaus li, thiab kuv qhov mob hawb pob txawm huam tuaj. Kuv txawm pib meem txom yooj yim thiab nyuaj siab tas li. Kuv tus tub yau thev tsis taus qhov pom kuv zoo li ntawd, yog li nws thiaj li txiav txim siab pheej hmoo rov qab los tsev thiab saib seb muaj dab tsi tshwm sim. Tom qab nws mus lawm, kuv tsuas nyob tod tos, cia siab tias…. Thaum sij hawm dhau 7 teev tsaus ntuj me ntsis lawm es kuv tseem tsis tau pom nws rov qab los, ces kuv txawm pib nyuaj siab. Kuv xav paub tias: Nws nyob qhov twg lawm? Tub ceev xwmntes tau nws lawm lod? Tsis tau li, tom qab tshaj li ib lub xyoos lawm, es lawv tseem tsis tso tsis taus tseg qhovsoj peb lub tsev thiab lod? Tab sis kuv tos ib hmo nkaus los tseem tsis pom nws rov qab li. Kuv ntseeg tias muaj qee yam tau tshwm sim lawm xwb xwb li, vim hais tias nws yeej tsis muaj lwm qhov chaw yuav mus li lawm. Yog hais tias nws raug ntes lawm tiag tiag, ces kuv tsis paub tias tub ceev xwm yuav siv lub tswv yim phem npaum li cas los tsim txom nws. Tej zaum lawv yuav ntaus nws kom tuag tes tuag taws los kuj muaj thiab. Ces thaum xav txog qhov no, kuv teev tsis tau lub kua muag li. Kuv noj tsis taus los sis pw tsis taus tau ob peb hnub, tab sis tsuas zaum rau saum kuv lub txaj xwb, ntsia tawm mus rau sab nraum zoov los tsis pom dab tsi li. Kuv mas mob siab kawg li—kuv mloog zoo li muaj ib rab riam chob tmus rau hauv kuv lub plawv lawm. Yeej tsis muaj xov xwm ntab ntws dab tsi tias kuv tus tub hlob tuag los si ciaj li, kuv tsis paub xyov kuv tus ntxhais ntsib kev phom sij los sis tsis ntsib, thiab tam sis no yog kuv tus tub yau raug ntes lawm thiab, kuv yuav ua li cas? Vim kuv qhov kev mob siab thiab tag kev cia siab, ces kuv thiaj li los rau ntawm Vajtswv xub ntiag los thov Vajtswv, thiab tom qab ntawd txawm muaj Nws cov lus no tshwm sim rau hauv nruab siab tias: “Tib neeg txoj hmoo ces yog Vajtswv ob txhais tes tswj. Koj tsis muaj peev xwm yuav tswj tau koj tus kheej: Txawm hais tias tib neeg mas yeej tsuas maj nroos thiab ua ub ua no rau lawv tus kheej tag mus li xwb, los lawv yeej tsis muaj peev xwm yuav tswj tau lawv tus kheej li. Yog koj muaj cuab kav paub tau koj tus kheej tej yam uas yuav tshwm sim tom ntej, yog koj muaj cuab kav tswj tau koj tus kheej txoj hmoo, es ua koj puas tseem yuav yog ib tug uas raug tsim tawm mas?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Rov Tsim Kho Tib Neeg lub Neej Raws Li Ib Txwm Muaj thiab Coj Lawv mus rau ib Txoj Hau Kev Kawg Uas Zoo Kawg Nkaus). Thaum xav txog qhov no, kuv pom tau tias tib neeg txoj hmoo mas nyob tag nrho rau hauv Vajtswv xib teg, yog li txawm peb yuav ntsib kev txom nyem ntau npaum li cas los xij thiab txawm peb yuav ntsib tej xwm txheej dab tsi los xij puav leej yog Vajtswv npaj tseg ua ntej lawm. Kuv ces pab tsis tau txog yam uas kuv txhawj li. Kuv thiaj li thov Vajtswv rau hauv kuv lub siab, txaus siab hlo muab kuv cov me nyuam tso rau hauv Vajtswv ob txhais tes. Tom qab ntawd, kuv tus nyab paub los ntawm ib tug viv ncaus nyob hauv pawg ntseeg tias kuv tus tub yau raug cov tub ceev xwm uas soj peb lub tsev ntes lawm. Tub ceev xwm coj nws mus rau tim lub chaw ua hauj lwm, ntaus nws thiab nthe nws, xav paub seb peb nyob qhov twg. Nws yeej tsis hais ib lo lus dab tsi li, yog li tub ceev xwm tau muab nws ceev tseg yam tsis raws kev raws cai tau txog 15 hnub ua ntej yuav muab nws tso. Nws nyuam qhuav raug tso tawm los xwb. Pom meej tseeb tias tub ceev xwm khuv xim heev uas tau muab nws tso tawm lawm ces yog li lawv txawm pib nrhiav nws dua. Ntshai tsam yuav coj tej ntawd los rau peb, ces kuv tus tub yeej tsis muaj cuab kav rov qab los tsev li, tab tsis cia li khiav tawm mus lawm xwb. Kuv chim siab heev thaum hnov txog qhov no. Peb tsis tau rov qab los tsev tshaj ib lub xyoos lawm, tab sis tub ceev xwm tseem tas zog raws peb, soj peb qab, tas zog ua txhua yam kom lawv ntes tau peb. Lawv xav rhuav tshem peb. Tus zaj loj liab ploog mas phem tshaj! Nws yim caij tsuj kuv, kuv yim pom nws lub niag ntsej muag phem, thiab kuv yim muaj txoj kev ntseeg ntau ntxiv thiab caum raws Vajtswv qab.
Tsis ntev ntawd, kuv tus tub yau thiaj li khiav tawm tau ntawm thaj chaw ntawd mus lawm vim muaj kev pab los ntawm cov nus thiab cov viv ncaus. Tom qab ntawd tsis ntev kuv tus nyab thiab kuv mus nyob rau lwm lub xeev lawm. Vim xav kom wb muaj kev nyab xeeb, ces nws thiab kuv thiaj li nyias mus nkaum nyias. Thaum xav txog qhov Pawg Koom Tsham tau ua rau peb tsev neeg nyias tawg nyias tag mas ua rau kuv mob siab tshaj. Tshwj xeeb mas thaum kuv pom lwm cov neeg rau siab saib xyuas lawv niam thiab lawv txiv heev, ces kuv haj yam nco kuv cov me nyuam. Kuv yuav luag vau. Kuv thiaj li los rau ntawm Vajtswv xub ntiag los nrhiav, thiab xav txog zaj lus no ntawm Vajtswv cov lus tias: “Txoj kev uas Vajtswv coj peb kev ntawd yuav tsis ncaj tas li, tiam sis yog ib txoj kev nkhaus mus los thiab muaj tej qhov to thoob plaws; Vajtswv hais tias, tshaj qhov no, txoj kev yim muaj pob zeb ntau npaum li cas, nws yim nthuav tawm peb lub siab hlub ntau npaum li ntawd. Tiam sis tsis muaj leej twg ntawm peb cov no qhib tau txoj kev ntawd li. Hauv Kuv txoj kev ntsib kev pom mas, Kuv tau taug ntau txoj kev muaj pob zeb, tej kev phom sij thiab Kuv tau thev txoj kev txom nyem loj; tej thaum Kuv kuj tau mluas-tu siab kawg nkaus uas Kuv xav quaj kiag lawm xwb, tiam sis Kuv tau taug txoj kev no los txog rau hnub no. Kuv ntseeg tias qhov no yog txoj kev uas Vajtswv coj, yog li Kuv thiaj li tiv txoj kev tsim txom ntawm txhua txoj kev txom nyem thiab mus tom ntej txuas ntxiv. Vim qhov no yog yam uas Vajtswv tau npaj tseg lawm, yog li leej twg thiaj li khiav dim qhov no tau mas? Kuv tsis thov kom tau txais ib qho koob hmoov twg li; txhua yam uas Kuv thov ces yog kom Kuv muaj peev xwm taug txoj kev uas Kuv tsim nyog taug kom mus raws li Vajtswv txoj kev xav xwb. Kuv tsis nrhiav kev los xyaum raws lwm tus, tsis taug txoj kev uas lawv taug; txhua yam uas Kuv nrhiav ces yog qhov tias thov kom Kuv ua tau tiav hlo Kuv txoj kev mob siab taug Kuv txoj kev kom mus txog thaum kawg. … Ib tug neeg twg yuav tsum tau ntsib kev txom nyem thiab qhov deb uas lawv yuav tsum tau taug ntawm lawv txoj kev ntawd yog twb raug Vajtswv npaj tseg lawm, thiab tias tsis muaj leej twg yuav pab tau lwm tus kiag li lawm” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Txoj Kev … (6)). Thaum xav txog Vajtswv cov lus, kuv thiaj li pom tau tias txawm ib tug neeg twg yuav ntsib kev txom nyem ntau npaum li cas los xij, lawv yuav taug ntau txoj kev npaum li cas los xij yeej yog Vajtswv npaj ua ntej lawm. Kuv txoj kev yim muaj cua hlob, ces yim pom kuv tus yeeb yam tseeb xwb. Nyob rau yav dhau los ntawd mas kuv cov me nyuam puav leej nyob ntawm kuv ib sab thiab peb muaj kev thaj yeeb lug, yog tsev neeg sib haum zoo. Thaum ntawd kuv mas mob siab nrhiav tshaj. Tab sis tam sim no vim tus zaj loj liab ploog txoj kev caij tsuj thiab kev nrhiav, thiab kuv cov me nyuam tab tom khiav tawm, ces kuv thiaj li nyuaj siab, ntxhov siab, thiab muaj kev yws puv npo. Qhov kev caij tsuj thiab kev nyuaj ntawd tau muab kuv qhia tshwm. Tsuas yog thaum ntawd xwb kuv thiaj li paub tias tib qho laj thawj uas kuv muaj kev ntseeg ntawd yog kom tau txais koob hmoov thiab txoj hmoov hlub los ntawm Vajtswv, kom muaj kev lom zem xauv npo rau lub cev nqaij dim tawv. Nws tsis yog caum raws qhov tseeb los sis zwm rau Vajtswv kiag li. Qhov ntawd yog txoj kev ntseeg tiag tau li cas? Yog tej xwm txheej nyuaj ntawd tsis muab kuv qhia tshwm li ntawd, ces kuv yeej yuav tsis pom kuv tej kev xav uas yuam kev rau ntawm kev nrhiav kuv txoj kev ntseeg li. Kuv thiaj li tsis tau txais ib qho kev to taub zoo li no nyob rau hauv qhov xwm txheej thaj yeeb li. Thaum kawg kuv thiaj li pom tias txoj hmoov hlub ntawd yog ib qho koob hmoov los ntawm Vajtswv los, tab sis tshaj qhov ntawd, txoj kev nyuaj thiab tej kev sim siab yog Vajtswv qhov koob hmoov. Kuv paub tias txawm kuv txoj kev taug rau yav tom ntej yuav nyuaj npaum li cas los xij, kuv yuav tsum mus kom dhau los ntawm txoj kev vam khom rau Vajtswv—kuv yuav tsum tau zwm rau Vajtswv txoj kev cai thiab tej kev npaj tseg. Kuv tas zog nyeem Vajtswv cov lus nrog lwm cov viv ncaus tas li, thiab sib sau ua ke thiab sib qhia txog Vajtswv cov lus. Ces kuv thiaj li pib zoo siab dua qub lawm.
Sij hawm dhau mus ntev lawm, thiab Pawg Koom Tsham rov pib raws thiab ntes cov ntseeg rau txhua qhov txhia chaw vwm ntsuav dua, xa cov neeg soj qab, cov neeg qhia xov xwm, thiab “cov tub ceev xwm tes tsho liab” mus rau txhua qhov chaw. Kuv tsis yog tuaj hauv thaj chaw no tuaj, thiab kuv yog ib tug uas xav tau tshaj. Nyob rau lub sij hawm ntawd, kuv mas ntshai tsam kuv raug ntes, thiab kuv ntshai tas li tsam kuv cov me nyuam raug ntes. Kuv pw tsis tsaug zog rau yav hmo ntuj li, thiab tej thaum kuv haj tseem npau suav phem thiab. Kuv npau suav txog qhov tub ceev xwm tsim txom kuv cov me nyuam. Vim txoj kev ua neej nyob rau hauv tus yam ntxwv nyuaj siab thiab ntshai los ntev heev lawm, ntxhov siab heev, ces kuv tus mob thiaj li huam tuaj thiab tsis muaj ceeb thawj lawm ntau heev kuv ces tsuas tshuav ib pawg pob txha lawm xwb. Kuv lub plawv dhia tsis muaj zog li thiab taug kev mas ua rau kuv qaug zog heev. Kuv mas tas zog peem sawv ntawm lub txaj. Kuv xav txog qhov yuav rov qab los tsev. Thaum twg kuv muaj mob, kuv cov me nyuam puav leej nyob txhij rau tod, saib xyuas kuv, thiab kuv tus tub xeeb ntxwv yuav qw tias, “Pog! Pog!” Qhov ntawd mas sov siab tshaj li. Tab sis Pawg Koom Tsham tau yuam kom peb txhua tus sib ncaim, kuv tsis pom kuv cov me nyuam li, thiab kuv tsis paub tias lawv nyob qhov twg lawm. Kuv yim xav txog qhov ntawd ces kuv yim chim siab. Peem tas zog sawv, kuv txhos caug rau ntawm kuv lub txaj, mob quaj qaws thiab thov Vajtswv tias, “Vajtswv! Tam sim no kuv peem tiag tiag lawm! Kuv nyob rau theem uas phem heev. Au Vajtswv, thov muab txoj kev txiav txim siab thiab txoj kev ntseeg rau kuv los tiv qhov kev txom nyem no, kom kuv thiaj li nyob tau khov kho.” Kuv nyeem qhov no nyob rau hauv Vajtswv cov lus tom qab kuv thov Vajtswv lawm: “Txoj kev ntseeg thiab kev hlub ntau tshaj plaws mas yog cheem tsum tau los ntawm peb rau hauv theem no ntawm txoj dej num. Peb yuav rhais ruam yuam kev los ntawm ib qho kev tsis xyuam xim me me, vim theem no ntawm txoj dej num mas txawv ntawm tag nrho cov theem uas muaj dhau los lawm: Yam uas Vajtswv tab tom ua kom zoo tiav log yog tib neeg txoj kev ntseeg, uas yog ob qho ntawm qhov pom tsis tau thiab tuav tsis tau. Yam uas Vajtswv ua yog hloov cov lus los ua txoj kev ntseeg, los ua txoj kev hlub, thiab los ua txoj sia. Tib neeg yuav tsum ua mus kom txog ib theem uas lawv thev taus ntau puas zaus ntawm tej kev lim kom tib neeg dawb huv thiab muaj kev ntseeg kom ntau dua Yauj, uas cheem tsum kom lawv thev taus kev txom nyem thiab txhua yam ntawm kev tsim txom yam tsis tso Vajtswv tseg li. Thaum lawv ua raws li ntawd mus txog thaum tuag, thiab muaj kev ntseeg loj rau Vajtswv lawm, ces theem no ntawm Vajtswv txoj dej num thiaj raug ua tiav hlo lawm” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Txoj Kev … (8)). Kuv pom los ntawm Vajtswv cov lus los tias Nws tes hauj lwm nyob rau tiam kawg yog los ua kom tib neeg txoj kev ntseeg zoo tiav log. Thaum peb raug kev mob nkeeg, Vajtswv tej kev xav zoo nyob rau hauv qhov ntawd; peb yuav tsum nrhiav qhov tseeb thiab ua raws li tus qauv ntawm Yauj txoj kev ntseeg. Yauj ntsib tej kev sim siab uas phem heev thiab mob sawv hlwv thoob plaws rau nws lub cev, thiab thaum nws tiv tsis taus ntxiv lawm, nws thiaj li zaum rau hauv cov tshauv thiab siv ib nplais lauj kaub av nti los txhuam nws tus kheej. Thaum Yauj poj niam pheej kom nws tso nws txoj kev ntseeg Vajtswv tseg, ces nws txawm hais tias, “Peb yuav tau txais qhov zoo ntawm Vajtswv txhais tes thiab peb yuav tsis tau txais qhov phem los?” (Yauj 2:10). Yauj yeej tsis muaj ib qho kev to taub yuam kev los sis tsis liam rau Vajtswv li—nws tseem tuav rawv nws txoj kev ntseeg mus ntxiv. Tab sis rau ntawm kuv ces, kuv liam Vajtswv kiag thaum kuv qhov mob huam tuaj. Kuv pom tias kuv mas muaj kev ntseeg Vajtswv tsawg npaum li cas, thiab kuv yuav tsis to taub Vajtswv txoj kev xav li. Yuav kom cawm tau peb mas, Vajtswv yuav tsum tau los ua lub cev nqaij daim tawv thiab nqis los rau hauv lub ntiaj teb, tiv taus tej kev txaj muag, thev taus Pawg Koom Tsham txoj kev caij tsuj thiab kev txwv thiab kev tsis kam lees txais yuav txoj kev ntseeg sab yeeb ceeb. Vajtswv tau tso txhua yam tseg los cawm tib neeg ntiaj teb, tab sis kuv ho muqj kev xav phem los ntawm ib qho kev txom nyem me me xwb, thiab kuv haj tseem liam rau Vajtswv thiab. Kuv tshuav Vajtswv nqi ntau heev. Tom qab ntawd kuv xav txog cov neeg dawb huv ntawm tiam dhau los uas raug tsim txom thiab txom nyem rau Vajtswv. Lawv tau ua tim khawv rau Vajtswv los ntawm lawv txoj sia kiag—tsis muaj ib yam dab tsi ntxim hwm tshaj qhov ntawd lawm. Txawm tias tag nrho peb tsev neeg raug Pawg Koom Tsham tsim txom los xij, peb muaj lub hwv tsam los ua tim khawv rau Vajtswv lawm. Qhov no yog Vajtswv qhov kev txhawb. Saib raws li peb tus kheej txoj kev qias neeg thiab kev qias vuab tsuab, saib raws li qhov peb yog leej twg tiag tiag, ces peb yeej tsis tsim nyog ua tim khawv rau Vajtswv li. Thaum kuv to taub Vajtswv txoj kev xav lawm, kuv thiaj li tsis xav phem mus ntxiv lawm. Muaj ib tug viv ncaus paub txog kuv qhov teeb meem kev noj qab nyob zoo ces thiaj li mus yuav ib co tshuaj tim tsev kho mob rau kuv, thiab nqa cov tshuaj ntawd los rau kuv. Kuv thiaj li pib zoo ib hnub rau ib hnub zuj zus lawm. Ua tsaug rau Vajtswv tiag tiag li!
Kuv tau khiav nkaum los tau ntau lub xyoos lawm, thiab yuav kom zam dhau tub ceev xwm tej kev nrhiav thiab ntes tau, ces kuv yuav tsum nkaum rau hauv cov thawv thiab chav rau qos yaj ywm, thiab vim Vajtswv txoj kev tiv thaiv zoo, ces kuv thiaj li zam dhau ib qho xwm txheej phom sij zaus tas zaum thiab. Nyob rau lub Kaum Ob Hlis xyoo 2008 ntawd, kuv raug muab qhia tawm vim txoj kev tshaj tawm txoj moo zoo. Qhov ntawd yog ib qho xwm txheej uas nruj heev—cov pov thawj ntawm fab kev ntseeg tau coj cov tub ceev xwm tuaj ntes peb. Kuv yog tus lawv xav tau ntag, yog li yog lawv ntes tau kuv tiag tiag lawm, ces tub ceev xwm yeej yuav tsis tso kuv dim yooj yim li. Kuv cov nus thiab cov viv ncaus thiaj li coj kuv mus zais rau ntawm ib lub zos me me kiag tam sid, thiab tus Viv Ncaus Lis Ximyus tau nqa khoom noj thiab lwm yam khoom siv tseem ceeb tuaj rau kuv. Tab sis ob peb lub hlis tom qab ntawd, nyob nyob Ximyus txawm tso tseg tsis tuaj lawm—kuv tsis paub tias yog vim li cas. Lawv hlawv quav nyuj qhuav tsim ua cua kub rau ntawm thaj chaw ntawd. Nyob rau lub Kaum Ob Hlis mas txias heev, thiab txias dua li rho 20 lawm. Kuv thiaj li siv quav nyuj kom tsawg thaum pom tias twb hlawv yuav tag lawm. Nws txias heev rau sab hauv thiab muaj dej khov rau ntawm tej phab ntsa. Thiab thaum kuv sawv los rau thaum sawv ntxov, dej khov tag rau kuv lub taub hau. Kuv cia siab tias Ximyus yuav tuaj tshwm sai sai, tab sis kuv tos tas zog, los yeej tsis pom nws tuaj tshwm li. Nws txias heev uas ua rau kuv tsuas mus los tau rau hauv tsev xwb. Kuv xav tias kuv yog ib tug neeg txawv rau ntawm lub chaw ntawd. Kuv haj tseem tsis muaj cuab kav tawm mus yuav taws rau sab nrauv thiab kuv nrhiav tsis tau lwm cov nus thiab viv ncaus li. Thaj chaw ntawd muaj daus puv nkaus ces kuv thiaj li tawm mus sau taws rauv rau sab nrauv tsis tau. Yog Ximyus tsis tuaj, ces kuv yuav ua li cas? Kuv yuav txias khov tuag rau tod xwb lod? Qhov xav li ntawd ua rau kuv hnov loog tag thiab tsis muaj kev cia siab li lawm. Kuv thiaj li thov Vajtswv thiab nquas Vajtswv rau hauv kuv lub siab zaum tas zaum thiab. Ces thaum kuv xav txog tus cev Vajtswv lus Eliya—thaum nws nyob rau hav suab puam uas tsis muaj ib yam dab tsi noj thiab haus li, ces Vajtswv thiaj li txib kom cov noog dub nqa ncuav ci thiab nqaij tuaj rau nws noj. Qhov no tsis yog qee yam uas Vajtswv Tus Kheej ua ntev heev los lawm lod? Yog tias kuv tsis muaj kev ntseeg Vajtswv thaum kuv ntsib hom xwm txheej zoo li ntawd ces nws yuav zoo li cas? Kuv thiaj li nyeem qhov no nyob rau hauv Vajtswv cov lus tias: “Tus zaj loj liab ploog tsim txom Vajtswv thiab yog Vajtswv tus yeeb ncuab, thiab ces, nyob thaj av no, tib neeg raug rhuav ntsej muag thiab tsim txom vim lawv txoj kev ntseeg Vajtswv…. Nws yog ib qho nyuaj kawg nkaus rau Vajtswv ua Nws tes dej num nyob ntawm thaj av uas tus zaj loj liab ploog nyob—tab sis nws yog los ntawm txoj kev nyuaj no uas Vajtswv ua ib theem ntawm Nws tes dej num, ua kom Nws txoj kev txawj ntse thiab txoj kev ua uas muaj hwj huaj loj tshwm tuaj, thiab siv lub cib fim no los ua kom pab neeg no muaj txhua yam txhij. Nws yog los ntawm neeg txoj kev txom nyem, los ntawm lawv tej peev xwm, thiab los ntawm tag nrho tus moj yam phem ntawm cov neeg nyob ntawm thaj av phem no uas Vajtswv ua Nws tes dej num ua kom huv thiab muaj yeej, es kom, dhau ntawm no mus, Nws yuav tau yeeb koob, thiab Nws yuav tau cov uas yuav ua tim khawv rau tej yam Nws ua. Cov ntawd yog tag nrho qhov tseem ceeb ntawm tag nrho tej kev raug txhiv Vajtswv tau ua rau pab neeg no” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Vajtswv Tes Hauj Lwm Puas Yooj Yim Npaum Li Tib Neeg Xav?). Thaum nyeem qhov no qhia rau kuv paub kiag tam sid. Nyob rau tiam kawg, Vajtswv siv tus zaj loj liab ploog ua ib tug neeg ua Vajtswv tes dej num rau Nws tes hauj lwm ntawm qhov ua tiav ib pawg neeg kov yeej. Kuv yog ib tug neeg qias vuab tsuab, thiaj li muaj hwv tsam los ntsib los pom Vajtswv tes hauj lwm, los ua tim khawv rau Vajtswv nyob rau hauv tus zaj loj liab ploog txoj kev caij tsuj thiab kev ntes mas yog ib lub meej mom los ntawm Vajtswv los, thiab ib qho kev txom nyem twg los yeej muaj nqis heev li lawm! Thaum paub li ntawd lawm, ces kuv thiaj li thov Vajtswv, npaj txhij los zwm rau Nws txoj kev cai thiab tej kev npaj. Txawm tias kuv no khov tuag kiag rau tod los xij, kuv yuav tsis yws ib qho dab tsi li. Thaum kuv zwm rau lawm, ces lwm tus viv ncaus txawm tuaj txog yam xav tsis txog li. Kuv los paub tias Ximyus raug tub ceev xwm soj qab lawm, yog li nws thiaj li tsis rov qab los lawm, ntshai tsam muaj feem xyuam txog rau kuv. Lwm tus viv ncaus pom tias lub chaw ntawd zoo li cas lawm ces thiaj li coj kuv rov qab mus nyob rau tim nws tsev. Nws qhia kuv tias nws tus txiv tsis yog ib tug ntseeg thiab tsis tau ua hauj lwm los tau ntau xyoo lawm. Tam sim no nws txiav txim siab tawm mus ua hauj lwm thiab cheem tsis tau lawm. Tsis muaj hnub kuv yuav nyob tod yog nws tus txiv nyob hauv tsev—qhov no yog Vajtswv qhib ib txoj kev taug rau kuv tiag tiag! Thaum kuv hnov nws hais li no lawm, kuv zoo siab heev ua rau kua muag ntws sis tawm tawm kuv qhov muag los. Kuv pom tias Vajtswv twb npaj txhua yam tseg rau kuv lawm—thaum kuv ntsib qee yam kev nyuaj, tsis yog ua rau kuv tsis muaj kev ntseeg xwb, qhov ntawd tseem ua rau kuv xav phem thiab qaug zog thiab. Vajtswv txoj kev hlub mas yeej muaj tiag thiab kuv tau saj txoj kev hlub ntawd lawm.
Nyob rau xyoo 2014, Pawg Koom Tsham tau tsim txom ntxiv rau Pawg Ntseeg ntawm Vajtswv Tus Uas Muaj Hwj Chim Loj Kawg Nkaus, hais kom pawg koom tsham cov tub ceev xwm txhom Cov Ntseeg Vajtswv thoob plaws lub teb chaws yam vwm ntsuav. Ces kuv txawm pib txhawj dua ntxiv rau kuv cov me nyuam lawm thiab, thiab kuv tsis paub tias lawv nyob li cas rau lub sij hawm ntawd lawm. Tom qab ntawd muaj ib hnub thaum kuv tab tom saib ib daim yeeb yaj duab nrog kuv cov viv ncaus, thaum peb tseem tab tom saib, nyob nyob txawm tshwm plaws ib daim duab zoo li yog kuv tus tub hlob nyob rau hauv. Kuv yuav luag tsis ntseeg qhov kuv pom ntawd—kuv so qhov muag thiab pib saib daim yeeb yaj dua no dua, ntshai tsam kuv ho plam plam qee yam lawm. Tsis ntev ntawd, kuv tus tub rov tshwm los dua, ces zaum no thiaj li yog daim duab uas pom tseeb. Kuv paub tias yeej yog nws xwb xwb li. Kuv txawm qw tias, “Au yau!” thiab tom qab ntawd txawm nthe tias, “Kuv tus me tub, kuv tus me tub! Nws tawm hauv teb chaws mus lawm!” Kiag tom qab ntawd, ho tshwm lwm daim duab los ib vuag ces kuv pom kuv tus tub yau thiab. Kuv zoo siab heev uas kuv dhia tawm ntawm kuv lub rooj zaum kiag. Nkawv tawm hauv Teb Chaws Suav thaum twg? Vajtswv mas muaj hwj chim loj kawg nkaus! Kuv saib mus ntxiv thiab pom kuv tus nyab nyob rau hauv thiab. Lawv puav leej tawm hauv teb chaws mus lawm ces kuv thiaj li tsis txhawj txog txoj kev nyab xeeb ntawm lawv ntxiv lawm. Kuv mas zoo siab tshaj uas ua rau kua muag ntws sis los plooj kuv qhov muag, ces kuv thiaj li ua Vajtswv tsaug twj wm zaum tas zaum thiab. Kuv cov viv ncaus mas kuj zoo siab los qhuas Vajtswv lub hwj chim loj kawg nkaus thiab. Pawg Koom Tsham puav leej xav tau kuv ob tug tub thiab kuv tus nyab, tab sis lawv khiav tawm mus txawv teb chaws lawm, vim nyob hauv qab kev saib xyuas ntawm Pawg Koom Tsham—qhov no yog Vajtswv txoj kev muaj cai thiab lub hwj chim. Yav dhau los mas, kuv ib txwm txhawj txoj kev nyab xeeb ntawm kuv cov me nyuam, tab sis hnub ntawd kuv pom tias txawm Ntxwgnyoog yuav tsiv nyaum npaum li cas los xij, nws yeej tseem nyob hauv qab Vajtswv txoj kev hlub tshua. Yog Vajtswv tsis tso cai rau qhov ntawd, ces Ntxwgnyoog yeej txhom tsis tau peb li. Thaum paub li no lawm mas txhawb kuv txoj kev ntseeg Vajtswv heev li.
Tom qab khiav tawm tau 16 xyoo lawm, nyob rau xyoo 2018 ntawd, kuv tus ntxhais tau pheej hmoo los saib tsev kom paub tias muaj dab tsi tshwm sim, thiab coj tau qee qhov xov xwm tsis zoo kiag los tsev—kuv tus tub xeeb ntxwv uas muaj 12 xyoos tiv tsis taus tus zaj loj liab ploog txoj kev tsim txom, ces tau tua nws tus kheej tuag lawm. Tom qab kuv tus tub hlob khiav dim lawm, thiaj li pom tseeb tias tub ceev xwm tau tuaj tim kuv tsev thiab tim tsev kawm ntawv tas li, tuaj hem thiab hawv kuv tus tub xeeb ntxwv, tas zog yuam kom nws qhia nws txiv qhov chaw nyob, hais tias lawv yuav muab nws kaw mus tag sim neej yog nws tsis qhia rau lawv. Nws mas ntshai heev, yog li nws txawm pib npau suav phem tas li. Tub ceev xwm kuj tau hais kom nws cov xib fwb cia li kom nws cov phooj ywg hauv chav kawm zes thiab thab nws thiab. Nws mas ntshai nws cov xib fwb thiab cov phooj ywg hauv chav kawm ntawv heev, thiab haj yam ntshai tsam pom tub ceev xwm nres tsis muaj qab hau es los nug nws thiab ua rau nws txaj muag. Tom qab ntshai los tau plaub lub xyoo rau ntawm tub ceev xwm txoj kev thab zes thiab kev hawv lawm, ces thaum kawg kuv tus tub xeeb ntxwv thiaj li tiv tsis tau qhov ntawd lawm. Nws tus kheej thiaj li dai tuag rau tim tsev lawm. Thaum kuv hnov qhov xov xwm no ua rau kuv lub taub hau loog tag thiab kuv yuav luag tsaus muag. Kuv thiaj li tsis tshwm tau ib ntus. Pawg Koom Tsham, tus dab phem laus, tsis yog ua tag nrho peb tsev neeg kom sib ncaim xwb, tab sis haj tseem tsis tseg kuv tus tub xeeb ntxwv uas tseem me no thiab. Nws nyuam qhuav muaj 12 xyoo xwb, nws nyuam qhuav nyob rau lub hnub nyoog uas muaj kev lom zem puv npo thiab loj hlob xwb, tab sis Pawg Koom Tsham tau ua rau nws tag sim neej lawm. Kuv tu siab heev, thiab chim siab kawg rau Pawg Koom Tsham phem ntawd. Thaum kuv tus ntxhais pom tias kuv mob siab npaum li cas, ces nws thiaj li nyeem zaj lus no ntawm Vajtswv cov lus rau kuv tias: “Nyob rau ib lub meem xeeb coj tsaus ntuj nti li lub no, uas cov dab mas siab phem thiab lim hiam heev, yuav ua cas es tus vaj ntxwv ntawm cov dab, tus uas tua neeg yam tsis ntsais muag li, yuav zam tau cia kom muaj ib tug Vajtswv uas txaus hlub, siab zoo, thiab dawb huv ntawd nyob? Nws yuav ua cas npuaj teg thiab qw txais tos qhov kev los txog ntawm Vajtswv? Cov niag qhev no! Lawv pauj kev zoo siab nrog kev ntxub, lawv twb pib saib Vajtswv li yog ib tug yeeb ncuab los ntev lawm, lawv tsim txom Vajtswv, lawv yog cov niag mab qus phem tshaj plaws li, lawv yeej tsis muaj ib qho kev saib taus Vajtswv me me hlo li, lawv huab noj huab haus thiab ua tub sab tub nyiag, lawv plam tag nrho tej kev txawj xav, lawv tawm tsam tag nrho txhua yam kev txawj xav, thiab lawv ntxias cov neeg dawb huv mus rau txoj kev ruam. Tej poj koob yawm txwv ntawm cov neeg txheej thaum ub? Cov thawj coj uas ntxim hlub tshaj? Lawv tag nrho yeej tawm tsam Vajtswv! Lawv tej kev cuam tshuam ua rau tag nrho cov nyob hauv qab ntuj raug tso tseg rau hauv ib qho xwm txheej ntawm txoj kev tsaus ntuj thiab kev kub ntxhov. Kev ywj pheej fab kev ntseeg? Tej cai yam raug cai thiab tej uas pej xeem xav tau? Tag nrho tej no ces yog kev ntxias dag los npog kev txhaum xwb! … Tam sim no yog lub sij hawm: Tib neeg twb yeej sau zog lawv lub zog los ua ke ntev los lawm, lawv tau muab tag nrho lawv tej zog no thiab them txhua tus nqi rau qhov no, los mus dua rhe lub ntsej muag phem phem ntawm tus dab no thiab cia tib neeg, cov uas tau raug ua rau dig muag lawm, thiab cov uas tau tiv txhua yam kev mob kev ntsaj thiab kev txom nyem, kom sawv tseem hauv lawv lub lav mob los thiab tig kiag lawv lub nrab qaum rau tus dab phem laus laus no” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tes Hauj Lwm thiab Kev To Taub (8)). Pawg Koom Tsham yog Vajtswv tus yeeb ncuab—nws yog ib tug dab phem uas tawm tsam Vajtswv thiab noj tib neeg. Nws nyiam txhom tag nrho cov ntseeg thiab rhuav tshem Vajtswv tes hauj lwm tawm huv si—nws tab tom yuav tuag rau qhov tswj tag nrho tib neeg ntiaj teb mus ib txhis. Vajtswv tab tom ua hauj lwm nyob rau tiam kawg los cawm tib neeg ntiaj teb, thiab Pawg Koom Tsham mas tas zog vwm ntsuav cheem qhov ntawd, los tab kaum qhov ntawd. Yeej yuav rhuav tshem tag nrho cov ntseeg tawm tsis tau huv si—lawv haj tseem tsis cia ib tug me nyuam uas muaj 12 xyoos dim tau li thiab. Lawv tau tsim txom peb mus txog theem uas peb tsev neeg rov los tsev tsis tau, uas peb tau sib ncaim thiab ua rau kuv tus tub xeeb ntxwv tau tag sim neej lawm. Pawg KoomTsham ntawd mas phem tshaj, lim hiam tshaj tsis muaj kev xav txog tib neeg lub neej txoj sia li. Nws yog tus tub vajntxwv ntawm cov dab phem uas yuav tua neeg yam tsis ntsais qhov muag li. Kuv ntxub nws tawm puag hauv kuv nruab siab los, thiab yim tsim txom kuv li no, yim ua rau kuv mob siab los caum raws Vajtswv qab thiab yim ua rau tus niag dab phem laus no txaj muag.
Niaj hnub tam sim no los Pawg Koom Tsham haj tseem nrhiav peb tsev neeg. Rov qab saib txog lub neej khiav nkaum thaum muaj 19 xyoo, Vajtswv cov lus tau coj kuv kev thiab qhia rau kuv paub, muab txoj kev ntseeg thiab lub zog rau kuv, coj kuv los txog rau niaj hnub tam sis no. Yog tsis muaj Vajtswv txoj kev tiv thaiv, yog tsis muaj Vajtswv cov lus coj kuv kev thiab muab kev saib xyuas rau kuv, ntshe kuv twb ncaim lub ntiaj teb no mus ntev lawm, ntshe kuv twb tuag los sis vwm lawm. Pawg Koom Tsham nrhiav peb vwm ntsuav rau txhua txoj kev, vim tsuas yog peb yog cov ntseeg Vajtswv xwb, ua rau kuv rov los tsev tsis tau thiab ua rau kuv tsev neeg sib ncaim tag. Pawg Koom Tsham mas phem tshaj—nws yog tus ntxub-Vajtswv, tus dab phem uas tawm tsam-Vajtswv. Kuv thiaj li tso nws tseg thiab tsis kam lees txais yuav nws tawm puag hauv kuv nruab siab los! Qhov muaj hmoo tseem muaj txoj sia los txog niaj hnub no mas thov ua tsaug rau Vajtswv txoj kev saib xyuas thiab kev tiv thaiv. Tsuas yog Vajtswv xwb thiaj li hlub tib neeg tiag tiag, tsuas yog Vajtswv xwb thiaj li cawm tib neeg tau tiag tiag. Kuv pom tias Vajtswv mas ntxim hlub tshaj plaws, txawm txhua yam yuav nyuaj npaum li cas los xij, kuv yuav caum Vajtswv qab kom mus txog thaum kawg kiag, ua kuv tes dej num, thiab pauj Vajtswv txoj kev hlub rov qab! Ua tsaug rau Vajtswv!
