60. Kev Muab Ib Tug Thawj Coj Cuav Qhia Tawm: Ib Qho Teeb Meem ntawm Yus Tus Kheej
Tsaib no thaum lub Yim Hli, muaj ib tug thawj coj muab kuv xa mus rau lwm pawg ntseeg uas txawv lawm tom qab kuv raug rho tawm lawm. Kuv pom hais tias tus Nus Leej Hawj tuaj koom kuv thawj lub rooj sib txoos ua ke ib teev lig lawm. Viv Ncaus Tab Mim, uas yog tus thawj coj pawg ntseeg, kuj nyob tod thiab. Kuv xav hais tias, “Kuv twb hnov cov nus thiab cov viv ncaus hais tias tus Nus Leej Hawj mas tsis xyuam xim thiab ua li nws xav tau nyob rau hauv nws tes dej num, thiab tias nws tuaj koom tej rooj sib txoos ua ke lig tas li yam tsis muaj qab hau dab tsi li. Lub rooj sib txoos ua ke hnub no mas nws tuaj lig tiag tiag li, yog li ntawd Tab Mim yuav tsum qhia nws txog qhov teeb meem no.” Tiam sis nws yeej tsis kub siab txog qhov ntawd thiab tsis hais ib yam dab tsi li. Thaum tab tom sib txoos ua ke ntawd, muaj dua lwm tus nus tham txog qhov nws mloog zoo li raug nyiaj txiag quab yuam li cas, tias nws tswj tsis tau nws lub siab rau nws tes dej num, thiab ntxim zoo li nws qaug zog heev. Muab peb ob peb tug txawm nrhiav tau Vajtswv ib co lus los qhia thiab pab nws, tiam sis Viv Ncaus Tab Mim uas yog ib tug thawj coj tsis qhia ib yam dab tsi kiag li. Kuv pom hais tias nws tsis leg ib lub luag hauj lwm dab tsi nyob rau hauv lub rooj sib txoos ua ke ntawd li, thiab tsuas lam ua tej hauj lwm ntawd kom dhau xwb tsis pab daws lawv tej teeb meem li. Kuv xav nrog nws tham txog qhov teeb meem no. Tiam sis thaum ntawd kuv xav hais tias vim nws yog kuv thawj lub rooj sib txoos ua ke nyob rau ntawm no xwb, ces tej zaum kuv yuav tsis pom tag nrho, yog li ntawd kuv yuav tsum tos thiab saib ua ntej kuv hais tawm. Kuv ceeb tag li thaum pom tias nws yeej zoo tib yam nkaus li ntawd nyob rau ob peb lub rooj sib txoos ua ke tom qab ntawd. Qee zaus nws xaus rooj sib tham ntawd ceev heev yam tsis qhia ntau txog cov lus uas tom qab peb nyeem Vajtswv ib co lus ntawd li, thiab nws tsis mob siab qhia txog Vajtswv cov lus. Kuv thiaj li xav rau kuv tus kheej hais tias: “Qhov tseem ceeb ntawm ib tug thawj coj tes dej num ces yog los coj cov nus thiab cov viv ncaus kev los nyeem Vajtswv cov lus thiab qhia txog qhov tseeb, kom lawv thiaj li to taub qhov tseeb thiab to taub txog qhov muaj tiag ntawm Vajtswv cov lus ntag. Tiam sis Viv Ncaus Tab Mim mas tsis coj mus rau txoj kev qhia txog Vajtswv cov lus, thiab nws tsis daws tib neeg tej teeb meem li. Qhov no tsis yog ib qho kev txhob txwm tso tes dej num tseg lod? Qhov no tsis yog lam ua kom dhau xwb lod? Yog zoo li no xwb txhua yam yuav ua tau tiav li cas? Yog zoo li no txuas ntxiv mus mas yuav ua rau txhua tus to taub lub neej txoj sia qeeb. Kuv xav hais qee yam, tiam sis kuv ntshai tsam nws tsis lees txais qhov ntawd, tsam nws yuav hais tias kuv khav theeb thiab tias kuv tsim nyog tig xav txog kuv tus kheej tom qab raug rho tawm lawm ntshe yuav zoo dua li los cuam tshuam rau lwm tus tib neeg txoj hauj lwm.” Thaum xav li no lawm, kuv thiaj li txiav txim siab tso tseg thiab tsis quav ntsej txog qhov ntawd lawm, thiab mob siab rau kuv tus kheej lawm xwb.
Ib hlis tom qab ntawd kuv txawm raug muab tso rau lwm tes dej num thiab raug xa mus koom ob pawg lub rooj sib txoos ua ke lawm. Cov nus thiab cov viv ncaus ntawm ob lub rooj sib txoos ua ke ntawd tsis mob siab qhia txog Vajtswv cov lus los sis tham txog lawv tus kheej tej kev ntsib kev pom thiab kev paub li thiab. Qee zaus ces lawv cia li sib tham laug sij hawm xwb. Kuv xav hais tias qhov lub neej ntawm pawg ntseeg ua tau zoo ntawd yog muaj feem xyuam ncaj nraim rau qhov seb leej twg coj pawg ntseeg ntawd nkaus xwb, thiab tias cov nus thiab cov viv ncaus txoj kev to taub lub neej txoj sia yuav raug cuam tshuam yog zoo li no mus ntxiv, yog li ntawd kuv thiaj li muab qhov no coj los tham rau Tab Mim. Ua rau kuv ceeb tag li, vim nws yeej tsis txais yuav kiag li, thiab haj tseem hais tias qhov lub neej ntawm pawg ntseeg ua tsis tau zoo ntawd yog cov nus thiab cov viv ncaus qhov teeb meem xwb. Kuv xav rau kuv tus kheej hais tias: “Nws tsis tig xav txog nws tus kheej li thiab muab tag nrho lub luag hauj lwm ntawd tso rau cov nus thiab cov viv ncaus xwb. Ua ib tug thawj coj pawg ntseeg los, nws tsis lees txais qhov tseeb los sis tsis mloog cov nus thiab cov viv ncaus tej lus qhia, thiab nws tsis ris ib lub nra rau lub neej ntawm pawg ntseeg kiag li. Nws yuav coj lwm tus kom to taub qhov tseeb, los sis to taub txog qhov muaj tiag ntawm Vajtswv txoj lus tau li cas? Qhov no tsuas rhuav tshem cov nus thiab cov viv ncaus xwb. Kuv yuav tsum tau nrog nws tham txog qhov no dua.” Tiam sis kiag thaum kuv yuav hais qee yam, kuv txawm pib txhawj, xav hais tias, “Tam sim no nws twb tsis lees txais kuv tej lus qhia, thiab nws twb muaj ib tug cwj pwm txog qhov ntawd lawm. Qhov kuv tus kheej rov qab hais dua ntawd zoo dab tsi? Nws yog ib tug thawj coj pawg ntseeg, yog li ntawd yog kuv nrog nws tham dua, nws yuav hais tias kuv mus dhau kuv tus ciam lawm thiab yuav tsis txaus siab rau kuv. Kuv yuav tsum cia li kaw kuv qhov ncauj xwb.” Kuv tsis kaj saib rau qhov ntawd li, tiam sis nyob rau thaum kawg, kuv txiav txim siab tsis hais ib yam dab tsi li. Ob peb hnub tom qab ntawd, Tab Mim qhia kuv hais tias nws tau qhuab ntuas cov nus thiab cov viv ncaus nyob rau ntawm ib lub rooj sib txoos ua ke lawm, thiab tom qab ntawd txawm piav qhia meej meej txog qhov nws qhuab ntuas lawv li cas. Kuv xav tsis thoob li thaum hnov qhov no, thiaj li xav hais tias: “Yog ua cas koj yuav tsis muaj kev paub txog koj tus kheej kiag li? Lub neej ntawm pawg ntseeg tsis muaj kev qhuab qhia vim koj uas yog ib tug thawj coj pawg ntseeg uas tsis mob siab leg lub luag hauj lwm thiab tsis xyuam xim li. Yog ua li cas koj thiaj li cem lwm tus rau qhov ntawd? Qhov cia li cem tib neeg yam tsis qhia txog qhov tseeb ntawd yuav daws tsis tau ib yam dab tsi li.” Kuv xav muab nws tej teeb meem coj los qhia dua tiag tiag li, tiam sis thaum pom nws ntseeg khov dhau lawm, ces kuv thiaj li tsis xav tias nws yuav lees txais qhov ntawd. Kuv xav hais tias, “Kuv twb nyuam qhuav raug rho tawm lawm, yog li ntawd kuv muaj txoj cai dab tsi los hais txog nws tej teeb meem? Ntxiv ntawd, wb pheej sib ntsib tas li, yog li ntawd nws yuav ua rau txhua yam nyuaj rau kuv nyob rau hauv pawg ntseeg yog nws chim lawm. Ces yog nws tsis kam muab ib teg dej num rau kuv ua, ces kuv kawg plam kuv lub hwv tsam los tau txoj kev cawm dim xwb. Yog li ntawd, kuv thiaj li tsis hais ib yam dab tsi li, thiab tsuas nyo hau, ua lub neej ntawm pawg ntseeg, thiab ua kuv tus kheej tes dej num xwb.”
Kuv hnov ib co nus thiab viv ncaus hais tias Tab Mim yog tus saib xyuas tes hauj lwm tshaj tawm txoj moo zoo, tiam sis nws twb tsis sib txoos ua ke nrog lawv ib pliag li. Lawv kuj tau hais tias lawv hais tsis tau cov los tshiab ntawd tej teeb meem li, thiab ib co los tshiab ntawd raug cov xib fwb thiab cov txwj laug ntawm sab kev lis kev cai ntseeg cuam tshuam thiab tsis tuaj koom tej rooj sib txoos ua ke lawm. Kuv thiaj li xav hais tias, “Tes hauj lwm tshaj tawm txoj moo zoo ntawd mas tseem ceeb heev, tiam sis Tab Mim tsis ua ib yam dab tsi los hais tej teeb meem tiag tiag ntawd li. Qhov no mas yog qhov tsis mob siab leg lub luag hauj lwm kiag li! Tab Mim tsis ua ib yam hauj lwm dab tsi kom muaj qab hau li thiaj li ua rau cov los tshiab tso tseg vim lawv tsis tau txais kev saib xyuas los sis kev txhawb zog ib qho li!” Kuv mloog zoo li qhov no yog ib qho teeb meem uas loj heev, yog li ntawd kuv yuav tsum tau nrog nws tham txog qhov teeb meem ntawd tim ntsej tim muag. Tau ob peb hnub tom qab ntawd kuv thiaj li ntsib Tab Mim thiab muab tej teeb meem uas cov nus thiab cov viv ncaus hais ntawd coj los hais, tiam sis nws yeej tseem liam tag nrho tej ntawd rau cov nus thiab cov viv ncaus thiab. Zoo li nws tsis leg ib lub luag hauj lwm kiag li. Kuv kuj qhia tawm hais tias ua ib tug thawj coj pawg ntseeg uas tsis ua ib yam dab tsi los daws tej teeb meem tseem ceeb ntawd, yog nws tsis mob siab leg lub luag hauj lwm thiab tsis quav ntsej nws tes dej num ntawd ntag, thiab tias qhov no yuav ua rau pawg ntseeg tes dej num qeeb thiab ua rau cov nus thiab cov viv ncaus puas tsuaj. Tiam sis nws cia li tsis txaus siab thiab tsis kam hais ib lo lus li. Kuv xav thiaj li hais tias: “Nws tsis ua hauj lwm kom muaj qab hau, nws tsis ris ib lub nra rau nws tes dej num, thiab nws yeej tsis lees txais qhov tseeb li. Qhov no txhais tau hais tias nws yog ib tug thawj coj cuav uas raug muab nthuav tawm lawm, yog li ntawd kuv yuav tsum muab nws tej teeb meem qhia tawm rau tus thawj coj siab dua kom muab nws tshem tawm sai li sai tau.” Tiam sis kuv tsis ua li ntawd, vim xav hais tias, “Yog kuv muab nws qhia tawm es nws paub, nws puas yuav hais tias kuv thab nws thiab txhob txwm cuam tshuam nws xwb? Qhov nws raug rho tawm ntawd yeej yog ib qho zoo, tiam sis yog nws tsis raug rho tawm ne, tsis yog kuv ua rau nws chim xwb lod? Qhov ntawd yuav ua rau kuv nyob hauv pawg ntseeg no nyuaj heev. Yog nws muab kuv rho tawm es kuv poob kuv tes dej num lawm, kuv puas yuav plam kuv lub hwv tsam uas los tau txoj kev cawm dim? Yog li ntawd, kuv yuav tsis muab nws tej teeb meem qhia tawm, thiab kuv cia li tuav tes dej num uas kuv muaj xwb.” Tiam sis thaum kuv xav li ntawd, kuv mloog zoo li kuv ua txhaum loj heev. Kuv pom tau hais tias pawg ntseeg muaj ib tug thawj coj cuav, tiam sis cia kuv tus kheej paub xwb. Qhov no puas txhawb pawg ntseeg tes hauj lwm? Kuv nyuaj siab heev, yog li ntawd kuv thiaj li los rau ntawm Vajtswv lub xub ntiag los thov Vajtswv hais tais, “Au Vajtswv, kuv twb pom Tab Mim tej teeb meem lawm thiab kuv xav muab nws qhia tawm, tiam sis kuv muaj qee yam kev txhawj xeeb. Thov coj kuv kev kom kuv thiaj li kov yeej tej hwj chim ntawm txoj kev tsaus ntuj no es thiaj li tsom kwm tau pawg ntseeg tes hauj lwm.”
Tom qab ntawd, kuv txawm nyeem ib zaj lus ntawm Vajtswv txoj lus: “Tib neeg tsim nyog muaj tus yam ntxwv zoo li cas rau qhov uas lawv saib ib tug thawj coj los sis ib tug neeg ua hauj lwm? Yog hais tias qhov ib tug thawj coj los sis ib tug neeg ua hauj lwm yeej ua yog lawm, ces koj yuav tsum ua raws li lawv hais; yog hais tias qhov lawv ua tsis yog lawm, ces koj yuav tsum muab lawv qhia tshwm, thiab tawm tsam lawv kiag thiab hais tawm ib lub tswv yim txawv. Yog lawv tsis muaj peev xwm ua tau tes hauj lwm muaj qab hau, thiab raug nthuav tawm hais tias yog ib tug thawj coj cuav, ib tug neeg ua hauj lwm cuav los sis ib tug tawm tsam Khetos, ces koj yeej muaj peev xwm tsis lees txais lawv txoj kev coj, thiab koj kuj yuav hais qhia txog thiab muab lawv nthuav tawm. Txawm li cas los xij, ib txhia ntawm cov neeg uas Vajtswv xaiv tseg tsis to taub qhov tseeb thiab muab hais ces tais caus heev, thiab yog li ntawd lawv thiaj tsis tau luag ua ib yam dab tsi li. Lawv hais tias, ‘Yog tus thawj coj ncaws kuv tawm, ces kuv tag li ntawd xwb; yog nws kom txhua tus muab kuv nthuav tawm los sis tso pov tseg, ces kuv yuav tsis muaj peev xwm ntseeg Vajtswv ntxiv lawm. Yog kuv tawm ntawm pawg ntseeg mus, ces Vajtswv yuav tsis xav yuav kuv thiab yuav tsis cawm kuv lawm. Thiab kuv txoj kev ntseeg yuav tsis tau ib qho dab tsi li lod?’ Qhov kev xav zoo li ntawd tsis yog ruam heev lod? Cov tib neeg zoo li ntawd puas muaj kev ntseeg rau Vajtswv tiag? Ib tug thawj coj cuav los sis tus tawm tsam Khetos puas sawv cev rau Vajtswv thaum lawv tau ntiab koj tawm? Thaum ib tug thawj coj cuav los sis tus tawm tsam Khetos rau txim thiab ntiab koj, qhov no yog Ntxwgnyoog tes hauj lwm, thiab tsis muaj feem xyuam dab tsi nrog Vajtswv li; thaum cov tib neeg raug tshem tawm los sis raug ntiab tawm hauv pawg ntseeg lawm, qhov no tsuas haum nrog Vajtswv txoj kev xwb thaum muaj ib qho kev koom txiav txim siab los ntawm pawb ntseeg thiab tag nrho cov neeg Vajtswv xaiv, thiab thaum qhov tshem tawm los sis kev ntiab tawm ntawd puav leej haum raws li Vajtswv lub tsev tes hauj lwm npaj tseg thiab cov hauv paus ntsiab lus ntawm Vajtswv cov lus thiab qhov tseeb tag nrho lawm. Qhov ib tug thawj coj cuav los sis tus tawm tsam Khetos raug ntiab tawm ntawd puas txhais tau tias koj yuav tsis raug cawm? Qhov no yog Ntxwgnyoog thiab cov tawm tsam Khetos txoj kev tsim txom, thiab tsis txhais tias Vajtswv yuav tsis cawm koj. Txawm koj yuav raug cawm los sis tsis raug cawm los xij yog nyob ntawm Vajtswv. Tib neeg tsis muaj cuab kav txiav txim siab seb koj puas raug Vajtswv caum. Koj yuav tsum paub meej txog qhov no. Thiab xam tias qhov raug cov thawj coj cuav thiab cov tawm tsam Khetos ntiab tawm ntawd mas yog raug Vajtswv ntiab tawm ntag—tsis yog qhov no ntaus nqis rau Vajtswv yuam kev lawm lod? Yog kawg. Thiab tsis yog qhov no tsuas ntaus nqi yuam kev rau Vajtswv xwb, tab sis kuj tsis mloog Vajtswv lus thiab. Qhov ntawd kuj yog kev thuam mom rau Vajtswv. Thiab qhov ntaus nqi rau Vajtswv yuam kev li no es tsis yog tsis paub qab hau thiab ruam lod? Thaum ib tug thawj coj cuav los sis tus tawm tsam Khetos ntiab koj tawm, vim li cas koj thiaj li tsis nrhiav qhov tseeb? Vim li cas koj thiaj li tsis muaj peev xwm qhia kom tau qhov sib txawv? Thiab vim li cas koj thiaj li tsis hais qhov no mus rau tus nyob siab zog? Qhov no ua pov thawj tias koj tsis ntseeg tias qhov tseeb kav siab tshaj plaws rau hauv Vajtswv lub tsev, qhov ntawd qhia tawm tias koj tsis muaj txoj kev ntseeg rau Vajtswv tiag, tias koj tsis yog tus uas ntseeg Vajtswv tiag tiag. Yog koj ntseeg Vajtswv qhov hwj huaj uas loj tsis muaj chaw kawg, vim li cas koj ho ntshai kev ua pauj ntawm tus thawj coj cuav los sis tus tawm tsam Khetos mas? Lawv puas yuav txiav txim tau koj txoj hmoo? Yog koj paub tau, thiab tshuaj xyuas tau tias lawv tej kev ua tsis haum nrog qhov tseeb, vim li cas ho tsis qhia nrog cov neeg Vajtswv xaiv uas to taub qhov tseeb? Koj muaj qhov ncauj, cas koj ho tsis muaj cuab kav hais tawm? Vim li cas koj thiaj li ntshai ib tug thawj coj cuav los sis tus tawm tsam Khetos ua luaj? Qhov no ua pov thawj tau tias koj yog ib tug tais caus, tsis muaj qab hau, yog Ntxwgnyoog tus qhev” (Txoj Lus, Phau 4. Kev Nthuav Tawm Cov Tawm Tsam Khetos. Yam Peb: Lawv Cais thiab Tawm Tsam Cov Uas Caum Nrhiav Qhov Tseeb). Thaum nyeem qhov no mas ua rau kuv kaj siab heev. Thaum peb pom ib tug thawj coj cuav nyob rau hauv pawg ntseeg, peb yuav tsum tsis txhob txhos caug ua ntsej muag ti nkaus hauv av thiab raug lawv quab yuam rau txhua fab. Peb yuav tsum tau tawm tsam, muab lawv nthuav tawm, thiab muab lawv qhia tawm rau cov thawj coj theem siab. Qhov ntawd yog Vajtswv lub siab nyiam. Kuv paub hais tias Tab Mim tsis ua hauj lwm kom muaj qab hau, thiab tias nws yog ib tug thawj coj cuav, tiam sis kuv tsis muaj cuab kav hais txog nws tej teeb meem vim kuv xav yuam kev lawm. Kuv xav hais tias tus thawj coj ntawd muaj cai, thiab tias nws txiav txim siab seb kuv puas ua tau ib teg dej num los sis tsis tau xwb, thiab yog kuv ua rau nws chim lawm, ces kuv poob kuv tes dej num tau thiab tom qab ntawd kuv yuav tsis dim. Kuv pom hais tias kuv ntseeg los tau npaum li no lub xyoo lawm los kuv yeej tseem tsis muaj kev to taub txog Vajtswv li. Nyob rau hauv Vajtswv lub tsev, qhov tseeb thiab Vajtswv Tus Kheej muaj hwj chim kav. Qhov seb kuv puas muaj ib teg dej num los sis seb kuv puas yuav dim ntawd yog nyob ntawm Vajtswv xwb, tsis yog nyob tawm ib tug thawj coj twg. Tab txawm yog tus thawj coj cuav ntawd muaj cai thiab kuv raug caij tsuj tiag tiag los xij, qhov ntawd tsuas nyob ib ntus xwb. Vajtswv pom txhua yam thiab Vajntsujplig yuav muab txhua yam nthuav tawm, yog li ntawd cov thawj coj cuav thiab cov tawm tsam Khetos yuav raug muab nthuav tawm thiab muab ntiab tawm sai sai no. Kuv tsis to taub Vajtswv tus moj yam ncaj ncees, thiab kuv ntshai tsam ua rau lwm tus tib neeg chim, tiam sis ho tsis ntshai tsam ua rau Vajtswv chim. Vajtswv tsis muaj ib qho chaw nyob rau hauv kuv lub siab li. Kuv yog hom tib neeg ntseeg dab tsi? Kuv twb xav lawm hais tias vim kuv tsis yog ib tug thawj coj, ces kuv tsis muaj cai los tshuaj xyuas Tab Mim thiab kuv txhawj tsam lwm tus tib neeg yuav hais tias kuv yuav tsum xav txog kuv tus kheej txoj hauj lwm xwb. Qhov uas kuv saib txhua yam ntawd mas txaus luag kawg li. Yog ib tug tswv cuab ntawm Vajtswv lub tsev lawm, qhov kuv raug rho tawm los sis tes dej num dab tsi uas kuv yuav ua ntawd nws tsis tseem ceeb—yog kuv tshawb pom ib tug thawj coj cuav nyob rau hauv pawg ntseeg, ces nws yog kuv lub luag hauj lwm, kuv tes dej num los muab lawv qhia tawm. Qhov ntawd yog kev tsom kwm pawg ntseeg tes hauj lwm thiab nws yog ib qho zoo. Nws kuj yog qhov leg lub luag hauj lwm txhawm rau cov nus thiab cov viv ncaus lub neej txoj sia thiab, thiab qhov ntawd yeej tsis yog hla kuv tusciam los sis cuam tshuam li, thiab tshwj xeeb nws tsis yog khav theeb thiab nce rau ib qho chaw siab li. Qhov no yog ua tes dej num ntawm ib tug neeg uas Vajtswv xaiv tseg lawm. Thaum paub li no lawm ua rau kuv xav txog tias vim li cas kuv thiaj li ntshai muab tus thawj coj cuav ntawd nthuav tawm ua luaj li. Lub hauv paus ntawm qhov teeb meem ntawd yog dab tsi tiag?
Thaum kuv nrhiav kuv txawm nyeem cov lus no los ntawm Vajtswv los: “Lub siab zoo thiab qhov laj thawj yuav tsum yog ob yam ntawm ib tug neeg txoj kev ua neeg. Ob qho no yog lub hauv paus thiab qhov tseem ceeb tshaj plaws. Tus neeg uas tsis muaj lub siab zoo thiab tsis muaj laj thawj txog kev ua neeg yog hom neeg dab tsi? Muab hais kom dav dav tias, nws yog ib tug neeg uas tsis muaj kev ua neeg, ib tug neeg uas muaj kev ua neeg phem tshaj plaws. Cia peb txheeb xyuas qhov no kom zoo. Qhov qhia tshwm ntawm kev plam txoj kev ua neeg uas tus tib neeg no qhia tawm puas ua rau cov tib neeg ntawd hais tias nws tsis muaj kev ua neeg? Cov tib neeg zoo li no coj cov yam ntxwv zoo li cas? Lawv qhia tshwm cov kev qhia tawm twg kiag mas? Tus neeg zoo li no tsuas lam ua dog ua dig rau hauv lawv cov kev nqis tes ua thiab sawv deb ntawm txhua yam uas tsis cuam tshuam rau lawv tus kheej kiag. Lawv tsis xav txog tej kev ntshaw ntawm Vajtswv lub tsev li, los sis tsis xav txog Vajtswv lub siab nyiam li. Lawv tsis ris lub nra ntawm qhov kev ua tim khawv rau Vajtswv los sis qhov kev ua lawv tej dej num, thiab lawv tsis muaj kevpaub txog lub luag hauj lwm li. … Haj tseem muaj co tib neeg uas, thaum pom dheev ib qho teeb meem hauv qhov kev ua lawv tes dej num, tseem nyob ntsiag to. Lawv pom tias lwm tus ua rau muaj kev cuam tshuam thiab kev thab plaub, tab sis ho tis ua dab tsi los cheem lawv li. Lawv tsis xav txog tej kev ntshaw ntawm Vajtswv lub tsev me me li, los sis lawv yeej tsis xav txog lawv tus kheej tej dej num los sis lub luag hauj lwm li lawm. Lawv tsuas yog hais lus, ua, sawv, tawm dag zog, thiab siv dag zog rau lawv tus kheej txoj kev khav theeb, lub meej mom, txoj hauj lwm, kev ntshaw, thiab kev hwm xwb. Cov kev ua thiab cov kev npaj siab ntawm ib tug neeg zoo li ntawd ces yeej pom meej rau txhua tus lawm: Lawv tawm los thaum twg los xij uas yuav muaj ib lub cib fim tau txais kev hwm los sis tau txais koob hmoov. Tab sis, thaum tsis muaj ib lub cib fim tau txais kev hwm, los sis kiag thaum muaj ib lub sij hawm uas raug kev txom nyem, lawv ploj ntais ntawm qhov muag mus lawm zoo li tus vaub kib nkaum nws lub taub hau. Hom neeg no puas muaj lub siab zoo thiab muaj laj thawj mas? Ib tug neeg tsis muaj lub siab zoo thiab lub laj thawj uas coj tus cwj pwm zoo li no puas hnov tus kheej raug cem mas? Lub siab zoo ntawm hom neeg zoo li no siv tsis muaj qab hau li, thiab lawv tsis hnov tus kheej raug cem li. Yog li, lawv puas tuaj yeem hnov tau cov kev thuam los sis kev qhuab qhia ntawm tus Vajntsujplig? Tsis tuaj, lawv tsis tuaj yeem” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Muab Yus Lub Siab rau Vajtswv, Es Yus Thiaj Li Tuaj Yeem Tau Txais Qhov Tseeb). Vajtswv cov lus pab kuv to taub tias qhov ntshai muab ib tug thawj coj cuav nthuav tawm thiab qhia tawm ntawd yog los ntawm qhov kev vam khom rau tej tswv yim phem xws li “Cia txhua yam dhau mus xwb yog hais tias tej ntawd tsis raug yus tus kheej,” “Nyob ntsiag to txhawm rau kev tiv thaiv-tus kheej thiab tsuas nrhiav kev kom zam dhau qhov yws,” thiab “Nyias pab nyias tus kheej xwb, leej twg lawv qab ces raug tsov tom xwb.” Tej tswv yim phem no tau dhau los ua ib feem ntawm kuv sob lus thiab tswj kuv txoj kev xav lawm, yog li ntawd kuv thiaj li pheej ua txhua yam los tiv thaiv kuv tus kheej tej kev ntshaw yam tsis xav txog pawg ntseeg tes hauj lwm li. Kuv yuav ntxim ntxub, twm xeeb, thiab txawj dag zuj zus tuaj xwb. Kuv pom tseeb tseeb hais tias Tab Mim tsis ua hauj lwm kom muaj qab hau thiab yuav tsis lees txais qhov tseeb, tias nws yog ib tug thawj coj cuav. Nws tus cwj pwm twb cuam tshuam rau pawg ntseeg tes hauj lwm thiab twb ua rau cov nus thiab cov viv ncaus to taub lub neej txoj sia qeeb lawm, yog li ntawd kuv tsim nyog muab qhov teeb meem no nthuav tawm thiab muab nws qhia tawm. Tiam sis kuv ntshai tsam raug nws teem txim thiab caij tsuj yog nws chim lawm, yog li ntawd kuv thiaj li tsis muaj cuab kav muab nws qhia tawm. Kuv xav tiv thaiv kuv lub koob lub npe, lub meej mom, thiab kuv lub hom phiaj yav tom ntej, yog li ntawd kuv thiaj cia li saib pawg ntseeg tes hauj lwm thiab cov nus thiab cov viv ncaus txoj kev to taub lub neej txoj sia raug teeb meem yam tsis raus tes rau li, ua ntsej lag muag dig rau tus thawj coj cuav ntawd xwb. Kuv tab tom tuaj Ntxwgnyoog tog, cia ib tug thawj coj cuav uas tab kaum pawg ntseeg tes hauj lwm ua li nws lub siab nyiam xwb. Kuv ua neej raws li Ntxwgnyoog cov kuab lom thiab tau los ua nws tus qhev lawm, tsuas saib xyuas kuv tus kheej xwb, yeej tsis mob siab rau Vajtswv, thiab tsis muaj lub siab uas txawj xav thiab qab hau hlo li. Kuv tsis yog ua neej kom zoo nkaus li tib neeg kiag li. Kuv pom hais tias kuv tseem nyob rau hauv thaj chaw Ntxwgnyoog tswj fwm thiab yog Ntxwgnyoog tug. Kuv yuav tsum tau caum qhov tseeb, tso Ntxwgnyoog tseg, thiab ua tus neeg uas mloog Vajtswv lus. Thaum txhua yam no meej rau kuv lawm, ces kuv mloog zoo li kuv yeej tshuav Vajtswv nqi tiag tiag thiab kuv ntxub qhov kuv twm xeeb thiab tsis paub qab hau npaum li cas lawm. Kuv yuav tsum tau muab tus thawj coj cuav ntawd qhia tawm kiag tam sim ntawd thiab tso txoj kev ua rau Vajtswv mob siab tseg. Yog li ntawd, kuv thiaj li qhia txhua yam txog Tab Mim tej teeb meem uas tsis ua hauj lwm tiag tiag los sis tsis lees txais qhov tseeb ntawd rau tus thawj coj theem siab. Tiam sis twb tau ob peb hnub lawm los kuv tsis hnov ib yam dab tsi los ntawm tus thawj coj theem siab ntawd txog qhov seb lawv ua li cas rau Tab Mim li lawm. Kuv me ntsis ntxhov siab. Yog tus thawj coj cuav no tsis raug rho tawm kom sai ces nws yuav tuav pawg ntseeg tes hauj lwm txuas ntxiv mus, yog li ntawd kuv thiaj li xav rov qab sau ntawv dua mus nug seb zoo li cas lawm. Tiam sis tom qab ntawd kuv xav hais tias, “Yog kuv rov qab muab coj los hais dua, ces tej zaum tus thawj coj theem siab ntawd yuav xav hais tias kuv kub siab dhau lawm. Txawm li cas los xij, vim kuv twb hais li qhov kuv xav tag lawm, ces tej zaum kuv twb ua tau kuv lub luag hauj lwm tiav lawm thiab tsis tsim nyog txhawj txog lwm yam.” Tiam sis qhov xav li no ua rau kuv tsis kaj siab, thiab kuv pw tsis tsaug zog rau hmo ntawd li.
Muaj ib tag kis kuv txawm nyeem Vajtswv cov lus no: “Yog tias ib pawg ntseeg twg tsis muaj ib tug neeg txaus siab hlo los xyaum ua raws li qhov tseeb thiab tsis muaj leej twg tuaj yeem ua tim khawv tau rau Vajtswv, ces pawg ntseeg ntawd yuav tsum raug cais tawm kom du lug, thiab nws txoj kev sib cuag nrog rau lwm cov pawg ntseeg yuav tsum raug txiav. Qhov no hu tias ‘kev faus neeg tuag’; qhov no yog yam txhais tau tias tsis lees yuav Ntxwgnyoog lawm. Yog tias ib pawg ntseeg twg muaj kev sib thab plaub hauv pawg ntseeg, thiab lawv raug caum raws los ntawm ‘cov me nyuam yoov me me’ uas tsis muaj kev thoob tsib to nrog, thiab yog tias cov ntseeg, txawm tias tom qab twb tau pom qhov tseeb lawm, tseem tsis muaj peev xwm tawm tsam qhov kev sib khi thiab kev dag ntxias ntawm cov kev sib thab plaub no thiab, ces thaum kawg txhua tus neeg ruam yuav raug tshem tawm mus. Cov me nyuam yoov me me no tej zaum yuav tsis ua tau ib yam dab tsi phem, tiam sis lawv haj yam txawj ntxias tshaj, txawj hais lus mos lus muag thiab txawj zais kom tsis muaj leej twg paub, thiab txhua tus uas zoo li no yuav raug tshem tawm mus. Tsis tseg ib tug cia kiag li! Cov neeg uas yog Ntxwgnyoog li yuav raug xa rov qab mus rau Ntxwgnyoog, hos cov neeg uas yog Vajtswv li yuav mus nrhiav qhov tseeb; qhov no yog raug txiav txim siab los ntawm lawv tus yeeb yam. Cia cov neeg uas caum raws Ntxwgnyoog qab puas tsuaj mus! Tsis tas yuav hlub cov neeg zoo li no kiag li. Cia cov neeg uas nrhiav qhov tseeb tau txais, thiab thov kom lawv txaus siab hlo txais Vajtswv cov lus rau hauv lawv lub siab kom txaus. Vajtswv ncaj ncees; Nws tsis xaiv leej twg ntsej muag. Yog tias koj yog ib tug dab, ces koj tsis tuaj yeem xyaum ua raws li qhov tseeb; yog tias koj yog ib tug neeg uas nrhiav qhov tseeb, ces nws yog ib qho tseeb lawm tias koj yuav tsis raug kaw los ntawm Ntxwgnyoog. Qhov no dhau ntawm qhov ua xyem xyav mus lawm” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Kev Ceeb Toom rau Cov Neeg Uas Tsis Xyaum Ua Raws Li Qhov Tseeb). Kuv pom tau los ntawm Vajtswv cov lus los hais tias Nws tus moj yam mas dawb huv thiab ncaj ncees, thiab tsis zam ib qho kev txhaum kiag li. Nws ntxub cov thawj coj cuav thiab cov tawm tsam Khetos uas tab kaum pawg ntseeg tes hauj lwm thiab ua rau cov nus thiab cov viv ncaus to taub lub neej txoj sia qeeb ntawd. Vajtswv ntxub cov uas tsis xyaum ua raws li qhov tseeb los sis tsis tsom kwm pawg ntseeg tej kev ntshaw thaum cov thawj coj cuav thiab cov tawm tsam Khetos tshwm tuaj. Hom tib neeg no mas to taub qhov tseeb tiam sis tseem tsis xyaum ua raws li qhov tseeb ntawd li thiab, thiab ho cia li xav txog lawv tus kheej tej kev ntshaw xwb. Lawv yeej txawj dag thiab txawj ntxias tiag tiag li, thiab lawv yuav raug ntiab tawm yog lawv tsis kam lees txim hloov dua siab tshiab. Kuv paub hais tias Tab Mim yog ib tug thawj coj cuav, thiab tam sim no paub tias tus thawj coj uas siab dua nws ntawd tsis teb kom sai txaus, yog li ntawd kuv yuav tsum tau hais tawm tas li thiab saib qhov no mus kom txog thaum kawg. Tiam sis kuv tsuas xav tiv thaiv kuv tus kheej xwb thiab tsis quav ntsej txhua yam uas tsis cuam tshuam rau kuv tus kheej li. Kuv cia nws khiav rau txhua qho txhia chaw thiab tab kaum pawg ntseeg tes hauj lwm. Kuv tsis xav txog Vajtswv lub siab nyiam thiab tuaj qhov tseeb tog, tiam sis yog tuaj Ntxwgnyoog tog. Qhov ntawd yog koom tes nrog ib tug thawj coj cuav txoj kev lim hiam lawm. Txawm nws tsis zoo li kuv tau ua ib yam dab tsi phem los xij, yog kuv tsis xyaum ua raws li qhov tseeb los sis tiv thaiv pawg ntseeg tes hauj lwm thaum ntsib teeb meem, ces thaum kawg kuv kawg raug ntiab tawm xwb. Kuv paub hais tias zaum no kuv tsis tuaj yeem xav txog kuv tus kheej tej kev ntshaw lawm thiab tias kuv cia tus thawj coj cuav no ua rau pawg ntseeg tes hauj lwm puas tsuaj tsis tau mus ntxiv lawm. Tus thawj coj theem siab saib xyuas Tab Mim qeeb, yog li ntawd tab txawm kuv tsis paub tias vim li cas los xij, qhov ntawd yog ib qho kev Vajtswv sim kuv seb kuv puas muab kuv tus kheej tej kev ntshaw ntawd tso tseg es ua raws li tej hauv paus ntsiab lus ntawm qhov tseeb. Kuv yuav tsum tau muab tus thawj coj cuav no qhia tawm txuas ntxiv mus los tiv thaiv pawg ntseeg tej kev ntshaw. Yog li ntawd, kuv thiaj li muab qhov xwm txheej no qhia tawm rau tus thawj coj uas nyob theem siab dua dua thiab qhia qhov phom sij thiab lub txim uas tsis muab tus thawj coj cuav ntawd rho tawm. Nws thiaj li teb thiab hais tias ob peb hnub dhau los no, nws muaj qee yam hauj lwm tseem ceeb uas yuav tau ua, thiab tias nws mam li muab Tab Mim rho tawm kiag tam sim ntawd, kom mus raws li tej hauv paus ntsiab lus. Thaum pom cov lus teb ntawd lawm mas ua rau kuv kaj siab tiag tiag li thiab kuv kawm paub hais tias tib txoj kev kom muaj kev thaj yeeb ces yog xyaum ua raws li qhov tseeb xwb.
Tsis ntev ntawd Tab Mim txawm raug muab tshem tawm lawm thiab xaiv dua lwm tus thawj coj los ua pawg ntseeg tes hauj lwm ntawd lawm. Ib ntus tom qab ntawd, lub neej ntawm pawg ntseeg ua tau ntau yam zoo thiab txhua yam ntawm peb tes hauj lwm pib zoo tuaj lawm. Kuv zoo siab heev uas pom txhua yam tshwm sim li no, tiam sis nyob rau tib lub sij hawm ntawd, kuv kuj paub tias kuv tau ua txhaum qee yam thiab tu siab thiab. Tom qab pom ib tug thawj coj cuav lawm, kuv tsis tau muab nws qhia tawm kom sai txaus. Kuv tsuas xav txog kuv tus kheej tej kev ntshaw, thiab qhia txog kuv tus moj yam phem, ua rau pawg ntseeg tes hauj lwm puas tsuaj xwb. Kuv pom hais tias qhov ua neej raws li tus moj yam phem thiab tsis xyaum ua raws li qhov tseeb ntawd yog ua kev phem ntag, thiab tias Vajtswv teem txim thiab ntxub txhua yam ntawd. Kuv kuj pom hais tias Vajtswv tes hauj lwm mas ntse npaum li cas, thiab qhov pom tus thawj coj cuav nyob rau hauv pawg ntseeg no ua rau kuv muaj kev thoob tsib to nrog thiab. Kuv kuj tau ntsib tau pom qhov kev puas tsuaj loj uas ib tug thawj coj cuav hauv pawg ntseeg ua tau rau cov neeg Vajtswv xaiv lawm thiab. Kuv kuj tau kawm paub txog Vajtswv tus moj yam ncaj ncees lawm thiab, thiab kuv pom hais tias nyob rau hauv Vajtswv lub tsev mas, Khetos thiab qhov tseeb muaj hwj chim kav, thiab tsis muaj ib tug twg ua tus tswj li. Txawm ib tug neeg twg txoj hauj lwm yuav siab npaum li cas los xij, yog lawv tsis xyaum ua raws li qhov tseeb thiab ua li Vajtswv hais, ces lawv yeej yuav tsis nyob ruaj khov rau hauv Vajtswv lub tsev li. Nyob rau haum kawg lawv yuav raug muab ntiab tawm. Tsuas yog muab Vajtswv cov lus coj los xyaum ua thiab ua txhua yam raws li tej hauv paus ntsiab lus xwb mas thiaj raws li Nws lub siab nyiam.
