79. Tsuas yog 300,000 Nyiaj Suav Xwb
Thaj tsam li 9 teev tsaus ntuj nyob rau lub Kaum Hli hnub tim 9 xyoo 2009 thaum kuv poj niam, tus ntxhais thiab kuv tab tom muaj ib qho kev sib txoos ua ke, ces peb txawm cia li hnov khob qhov rooj kiag tam sid. Kuv maj nroos muab peb cov phau ntawv ntawm Vajtswv cov lus coj mus zais, thiab kiag thaum kuv poj niam qhib qhov rooj lawm ces muaj xya tus tub ceev xwm nkag los, muaj ib tug txawm nthe tias, “Peb nyob ntawm Feem Saib Xyuas Kev Ruaj Ntseg Hauv Lub Teb Chaws. Nej cia li los nrog peb mus nawb!” Lawv yuam kuv nkag mus rau hauv tub ceev xwm ib lub tsheb thiab muaj peb tug tub ceev xwm nyob tom qub qab los tshawb peb lub tsev. Kuv paub tias tom qab ntawd li ib nrab teev tom qab lawv coj kuv los lawm, ces lawv kuj coj kuv poj niam mus rau hauv chav kaw lawm thiab.
Thaum nyob rau hauv lub tsev lawv txawm hem kuv tias: “Koj tus thawj coj los twb raug ntes lawm thiab. Tsuav yog koj qhia txhua yam uas koj paub rau peb xwb, ces peb yuav tsis ua ntau yam nyuaj rau koj li.” Lawv kuj tau hais qee yam phem txog pawg ntseeg thiab. Kuv mas npau taws heev thaum hnov tag nrho tej lus dag los ntawm lawv, tab sis kuv kuj ntshai tsim tsawv thiab, tsis paub tias lawv yuav tsim txom kuv li cas. Kuv thiaj li thov Vajtswv nyob hauv kuv lub siab thov kom Nws saib xyuas kuv txawm kuv raug txom nyem li cas los xij, kom kuv thiaj li yuav tsis rais los ua ib tug Yusdas thiab tsis ntxeev siab rau Vajtswv li. Lawv coj kuv mus rau hauv Feem Saib Xyuas Kev Ruaj Ntseg Hauv Lub Teb Chaws, thiab muaj ob tug tub ceev xwm uas nag ris tsho tsis yog tub ceev xwm txawm rub kuv mus rau chav saum toj, ces thawb kom kuv zaum ntawm lub rooj xas loos. Tus thawj tub ceev xwm txawm nug kuv tias, “Koj twb los ntseeg thaum twg lawm? Koj mus sib txoos ua ke rau qhov twg? Leej twg yog koj tus thawj coj? Muaj pes tsawg tus tib neeg nyob hauv koj pawg ntseeg?” Kuv tsis teb li. Ces nws txawm thau tau ob peb daim duab tawm hauv hnab ris los thiab nug kuv seb kuv puas paub cov tib neeg nyob hauv cov duab no, kuv thiaj li teb tias, “Tsis paub as.” Ces nws txawm hais tias, “Tus Vajtswv Uas Muaj Hwj Chim Loj Kawg Nkaus uas koj ntseeg ntawd mas twb raug txwv nyob rau hauv Teb Chaws Suav lawm. Pawg Saib Xyuas Loj twb txwv los ntev lawm tias txhua pawg ntseeg uas tsis raug raws cai ces yuav tsum raug muab tshem tawm mus, yog li koj pib qhia tam sim no ntshe yuav zoo dua nawb!” Nws nug mus ntxiv, xav paub seb pawg ntseeg cov nyiaj 300,000 Nyiaj Suav (thaj tsam 45,000 nyiaj daus las) ntawd nyob qhov twg. Muaj ib tug tub ceev xwm txawm npuaj rooj thiab nthe, rua qhov muag hlaws hlaws tias, “Peb twb tau cov tw ntawv tuav nyiaj lawm thiab peb paub tias nej muaj 300,000 nyiaj suav. Muab cov nyiaj ntawd rau peb tam sim no nawb!” Thaum pom nws lub ntsej muag tsiv nyaum li ntawd ces ua rau kuv npau taws thiab kuv txawm teb hais tias, “Ntawd tsis yog nej li nyiaj. Vim li cas nej ho xav tau cov nyiaj no? Vim li cas nej ho xav txheeb cov nyiaj no?” Ces muaj ob tug tub ceev xwm txawm ceev nrooj los rau ntawm kuv thiab pib ntaus kuv ntsej muag sab xis kiag, thiab tas zog ntaus kuv tsis tseg txij thaum 10 teev tsaus ntuj mus txog 12 teev ib tag hmo. Kuv lub ntsej muag thiab lub taub hau mas o wv thoob plaws, kuv ob lub pob ntseg quaj nrov zib, thiab mob thoob plaws kuv ib ce. Kuv pw xyab luas rau hauv pem teb, qi kuv qhov muag, thiab thov Vajtswv ntsiag to, thov kom Nws muab lub zog rau kuv thiab saib xyuas kuv lub siab, kom txawm tias yog kuv raug ntaus tuag kiag los xij kuv yeej yuav tsis tso Vajtswv tej khoom fij tseg, yeej tsis ua ib tug Yudas li. Tub ceev xwm pom tias kuv tsis hais ib yam dab tsi li, yog li lawv thiaj li coj kuv mus rau tim ib lub tsev kaw neeg thiab muab kuv xauv tes rau ntawm tus las hlau thawm hmo nkaus.
Tom qab ntawd lawv muab kuv tso rau hauv ib lub tsev kaw neeg. Ob peb hnub txuas ntxiv ntawd, tub ceev xwm tau coj kuv los nug peb zaug seb khaws pawg ntseeg cov nyiaj rau qhov twg, thiab kuv yeej tsis qhia ib yam dab tsi rau lawv li. Tom qab 8 teev sawv ntxov me ntsis nyob rau thaum sawv ntxov ntawm lub Kaum Hli hnub tim 17, tub ceev xwm tau coj kuv rov qab los rau ntawm Feem Saib Xyuas Kev Ruaj Ntseg Hauv Lub Teb Chaws, muab kuv xauv tes thiab xauv taw rau ntawm ib lub rooj hlau rau hauv ib chav nug, thiab tom qab ntawd xav paub tias cov nyiaj ntawd nyob qhov twg. Kuv tseem tsis hais dab tsi li. Ces ib tug tub ceev xwm txawm muab ob tug pa xoob nyias nyias los pib nplawm kuv lub taub hau thiab lub cev, thiab siv tej ntawd tas zog yuam kom kuv hais tawm. Kuv lub taub hau raug nplawm mus los. Thaum nws tsis muaj peev xwm ua kom kuv hais lus tau lawm, ces nws txawm tsawv nkaus kuv lub pob ntseg sib sib zog ntswj thiab nqa thiab nthe tias, “Kuv nug koj ib nqe lus yooj yim xwb nas! Puas yog koj lag ntseg los sis muaj qee yam? Koj xav tias koj yuav tsis quav ntsej kuv puas yog? Kuv yuav ntaus koj yog koj tawv tiag, ces wb mam pom tias leej twg thiaj li tawv tiag tiag!” Thaum hais li no lawm, nws txawm tuav nkaus cov plaub hau ntawm kuv sab pob ntseg rub, ces rub cov plaub hau saum kuv taub hau mus los. Kuv hnov zoo li kuv lub khauj khaum taub hau yuav dha tawm los thiab ua rau kiv taub hau heev.
Lawv tsim txom kuv tsis tseg mus txog ntua thaj tsam li 10 teev tsaus ntuj rau hmo ntawd, thiab thaum pom tias kuv tsis kam hais lus li, ces lawv txawm hais npau taws ntsuav tias, “Tag li ntawd rau hnub no lawm xwb, tab sis koj yuav tau ua tib zoo xav txog qee yam zoo rau hmo no es teb peb rau tag kis nawb!” Kuv muaj ntau kab nplawm thoob plaws kuv lub cev los ntawm qhov lawv ntaus kuv thiab kuv lub nrab qaum mas mob kub lug. Tsis paub tias hnub tom ntej no lawv yuav npaj tsim txom kuv li cas, ua rau kuv hnov qaug zog me ntsis, yog li kuv thiaj li thov Vajtswv ntsiag to tias, “Vajtswv Tus Uas Muaj Hwj Chim Loj Kawg Nkaus! Thov tiv thaiv kuv thiab muab txoj kev ntseeg rau kuv kom kuv txhob ua ib tug Yudas los sis ntxeev siab rau Koj, txawm tias qhov ntawd yuav yog kuv txoj kev tuag los xij.”
Ces hmo tom ntej ntawd, tus thawj tub ceev xwm ntawm Feem Saib Xyuas Kev Ruaj Ntseg Hauv Lub Teb Chaws txawm los nug kuv. Nws ntsia kuv thiab nthe tias, “Qhov pov thawj twb nyob kiag rau ntawm wb xub ntiag lawm tab sis koj tsis lees li. Kuv qhia koj tias koj yuav tau ntse thiab hais tawm, los sis tsis li ntawd ces koj yuav raug kev txom nyem ntag!” Thaum pom tias kuv tseem tsis hais lus li, ces nws npau taws heev nws thiaj li sawv tsees thiab nyem nrig nrog ua tau lub ntsej muag tsiv nyaum kawg. Kuv tsis paub tias kuv yuav ua li cas yog hais tias nws pib xua nrig rau kuv! Ces kuv txawm maj nroos thov Vajtswv tias, “Vajtswv Tus Uas Muaj Hwj Chim Loj Kawg Nkaus! Thov nyob nrog nraim kuv thiab muab kuv txoj kev ntshai tshem tawm mus. Coj kuv kev los ua tim khawv.” Tom qab kuv thov Vajtswv tag lawm ces kuv txawm nco tau qee yam uas Vajtswv hais tias: “Cov uas muaj hwj chim zoo li tuaj sab nraud, tab sis tsis txhob ntshai, vim qhov no yog vim nej muaj kev ntseeg tsawg. Tsuav nej txoj kev ntseeg loj hlob, tsis muaj ib yam dab tsi yuav nyuaj dhau” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 75). Txawm tub ceev xwm yuav tsiv nyaum npaum li cas los xij, lawv kuj nyob rau hauv Vajtswv ob txhais tes thiab. Lawv yeej ua tsis tau ib yam dab tsi rau kuv li yog tias Vajtswv tsis tso cai, yog li kuv paub tias kuv yuav tsum vam khom rau Vajtswv los ua tim khawv khov kho. Qhov kev xav no txhawb kuv txoj kev ntseeg ces kuv thiaj li tsis ntshai heev lawm. Kiag thaum ntawd, ib tug tub ceev xwm do hau txawm ntsia ntsoov kuv thiab nthe hais tias, “Peb muaj qee lub tswv yim los siv yog hais tias koj tsis hais lus li! Peb yuav coj koj mus rau tim chaw tub ceev xwm hauv xeev es lawv mam li ua kom koj hais lus xwb xwb li.” Tab sis kuv tseem tsis hais dab tsi li txawm tias lawv yuav hem kuv npaum li cas los xij.
Ob peb hnub tom qab ntawd ces lawv coj kuv mus nyob rau chav nug ntawm lwm Feem Saib Xyuas Kev Ruaj Ntseg Hauv Lub Teb Chaws lawm. Plaub sab phab ntsa mas xuas cov rwb tuab tuab thaiv thoob plaws thiab muaj ib lub rooj hlaus nyob hauv plawv ntawm chav ntawd. Ib tug tub ceev xwm hais kom kuv zaum rau ntawm lub rooj ntawd, muab kuv ob txhais tes thiab ob txhais taw xauv rau ntawd, ces mam li nug kuv txog pawg ntseeg cov nyiaj seb nyob rau qhov twg lawm. Nws nug kuv yam tsiv nyaum heev tias, “Koj puas muab los sis tsis muab 300,000 nyiaj ntawd? Koj puas xav tias yuav tsis ua li cas yog koj tsis hais dab tsi li no lod? Kuv tsis muaj sij hawm rau koj lawm nawb!” Ces nws txawm tsawv nkaus ib tug nplawm xyoob thiab pib sib sib zog nplawm kuv rau ntawm kuv lub cev thiab nthe hais tias, “Puas yog koj lag ntseg los sis muaj qee yam? Koj puas hnov kuv?” Ces nws txawm tuav kuv ob lub pob ntseg rub nqa sib sib zog thiab sib sib zog rub kuv cov plaub hau uas nyob saum kuv ob lub ntsos. Nws tsawv nkaus kuv cov plaub hau sib sib zog yoj mus yoj los raws li qhov nws ua tau. Mob tshaj plaws li, npaum nkaus li kuv lub khauj khaum taub hauv yuav rho tawm li lawm. Lawv pib siv tus nplawm xyoob nplawm kuv dua ntxiv ces tom qab ntawd kuv rov o wv dua lawm thiab, muaj tej kab nqaij doog ntshav siav thoob plaws kuv lub cev. Mob tiag tiag thev tsis tau li lawm. Kuv ntxub cov tub ceev xwm ntawd tshaj plaws thiab kuj hnov ntshai thiab, tsis paub tias lawv yuav tsim txom kuv ntau npaum li cas ntxiv los sis xyov kuv tseem puas thev taus li lawm thiab. Kuv thiaj li thov Vajtswv tias, “Au, Vajtswv, Ntxwgnyoog tab tom tsim txom kuv zuj zus, tas zog tsoo kuv txoj kev txiav txim siab kom tawg es kom kuv ntxeev siab rau Koj ces lawv thiaj li nyiag tau cov nyiaj ntawm Koj lub tsev. Vajtswv, kuv ntshai tsam kuv lub cev yuav tiv tsis taus lawm. Thov tiv thaiv kuv thiab muab txoj kev ntseeg rau kuv lau.” Tom qab kuv thov Vajtswv tag lawm, kuv txawm xav txog ib zaj nkauj ntawm Vajtswv cov lus uas hu ua “Txoj Kev Mob ntawm Tej Kev Sim Siab Yog ib Txoj Koob Hmoov Los Ntawm Vajtswv Los.” “Tsis txhob poob siab, tsis txhob qaug zog, thiab Kuv yuav ua tej ntawd kom meej rau koj. Txoj kev mus rau lub nceeg vaj yeej tsis tshua du pes tsawg; tsis muaj yam yuav yooj yim li! Koj xav kom tej koob hmoov los rau koj yooj yim, koj tsis xav lov? Hnub no, txhua tus yuav ntsib tej kev sim siab uas iab siab. Yog tsis muaj tej kev sim siab no, lub siab hlub uas nej muaj rau Kuv ntawd yuav tsis loj hlob kom muaj zog dua qub thiab nej yuav tsis muaj txoj tseem kev hlub rau Kuv li. Txawm tias yog tej kev sim siab no tsuas yog tej xwm txheej me me xwb los, txhua tus yuav tsum tau mus kom dhau tej no; tsuas yog tej kev sim siab uas nyuaj nyuaj mas thiaj li sib txawv ntawm ib tug mus rau lwm tus xwb. Kev sim siab yog koob hmoov los ntawm Kuv los, thiab muaj nej pes tsawg leej txeev los rau ntawm Kuv xub ntiag thiab txhos caug thov Kuv cov koob hmoov? Nej ib txwm xav tias nej tau Kuv ob peb lo lus zoo lawm ces twb suav hais tias yog Kuv tej koob hmoov lawm no, tiam sis nej tsis nco tias tej kev iab siab los yog ib qho ntawm Kuv tej koob hmoov thiab” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Khetos Cov Lus nyob rau thaum Pib, Tshooj 41). Thaum ua tib zoo xav txog Vajtswv cov lus, kuv thiaj li paub tias qhov raug txoj kev caij tsuj thiab kev nyuaj ntawd yog Vajtswv tab tom ua kom peb txoj kev ntseeg zoo tiav log ntag. Vajtswv cia siab tias kuv yuav ua tau tim khawv khov kho rau Nws rau ntawm Ntxwgnyoog xub ntiag—nws yog ib qho koob hmoov los ntawm Nws los. Txawm tias kuv yuav txom nyem rau hauv lub cev nqaij daim tawv npaum li cas los xij, kuv yuav tsis tuaj yeem swb rau Ntxwgnyoog li, tab sis kuv yuav tsum tau ua tim khawv khov kho rau Vajtswv thiab ua kom tau zoo raws Nws. Thaum xav txog li ntawd lawm, ces kuv thiaj li tsis xav tias nws yuav nyuaj kiag li, tab sis kuv tom hniav qawv tiv lawv qhov kev tsim txom. Lawv hem kuv thaum lawv pom tias kuv tseem tsis hais lus li tom qab lawv ntaus kuv ntev txog li 10 los sis 15 feeb lawm: “Koj yeej tsis hais ib lo lus li—koj tsis ntshai tsev kaw neeg li lod? Yog koj raug kaw ces nws yuav ua rau tsis zoo mus tag ib txhis. Koj cov me nyuam yeej tsis muaj hnub tau ua laj kam los sis tsis muaj peev xwm los koom Pawg Tsoom Fwv tau li lawm. Koj yuav rhuav tshem lawv lub neej pem suab lau!” Qhov lawv hais ntawd yeej tsis raug kuv li vim kuv paub rau hauv kuv lub siab tias tib neeg txoj hmoov mas yeej nyob tag nrho rau hauv Vajtswv ob txhais tes lawm. Kuv cov me nyuam lub neej pem suab los yeej nyob rau hauv Vajtswv txoj kev cai thiab tej kev npaj tseg lawm thiab, thiab tub ceev xwm twb tsis lus hais txog qhov ntawd li. Kiag thaum ntawd, muaj ib tug tub ceev xwm txawm hu rau kuv tus ntxhais, thiab kuv hnov nws lub suab nyob rau lwm sab tias: “Txiv! Koj thiab Niam neb puas ua li cas rau hauv qhov chaw tom ko nas?” Kuv qhia nws tias, “Wb tsis ua li cas os, txhob txhawj nawb. Tsuas nyob hauv tsev xwb thiab saib xyuas koj tus nus nawb.” Ces tub ceev xwm txawm tas zog siv lwm lub tswv yim thaum lawv pom tias lub tswv yim ntawd siv tsis tau lawm, uas hais tias, “Kuv yuav hais ncaj qha rau koj. Koj tus yawm yij thiab kuv tuaj ntawm tib lub nroog tuaj thiab wb ua hauj lwm rau hauv tib lub chaw. Koj tus neeg tuav ntaub ntawv hauv zos thiab kuv los ua dej num hauv feem tub rog ua ke ib yam nkaus thiab. Kuv nug ib ncig txog koj thiab txhua tus hais tias koj yog ib tug txiv neej zoo, yog li tsuas qhia yam uas koj paub rau peb xwb ces peb yuav tso koj mus.” Qhov no yog ib lub tswv yim ntawm Ntxwgnyoog ntag, ces kuv txawm thov Vajtswv ntsiag to, thov kom Nws pov hwm kuv lub siab. Thaum kuv tsis teb, ces nws txawm hais ntxiv tias: “Koj poj niam twb qhia lawm, yog li cia li qhia yam uas peb xav paub rau peb xwb. Qhov nyiaj 300,000 ntawd nyob qhov twg? Kuv thiaj li hais tias, “Kuv tsis muaj dab tsi hais lawm.” Ces lawv txawm pib tsim txom kuv dua thaum lawv pom tias tej tswv yim ntxias dag ntawd tsis ua hauj lwm.
Muaj ib hmo lawv tsis pub kuv noj los sis pw li, thiab thaum kuv qi kiag kuv ob lub qhov, ces lawv pib siv tus nplawm xyoob nplawm kuv lub taub hau. Yog kuv lub nrab qaum tseem nkhaus me ntsis xwb, ces lawv yuav sib sib zog nplawm ntag. Nws yog lub Kaum Hli lawm, yog li yav hmo ntuj mas no heev thiab kuv tsis hnav dab tsi li tab sis tsuas hnav ib lub tsho nrog rau cev hnav tawm rooj xwb. Thaum sawv ntxov tsees mas no kuv heev li ua rau kuv tshees nyho thoob ib ce. Muaj ib tug tub ceev xwm nthe tias, “Txhob xav tias koj yuav dim yooj yim yog koj tsis hais lus. Koj yuav tuag txom nyem ntsuav ntag!” Thaum hnov li no lawm ua rau kuv qaug zog tsim tsawv. Kuv tsis paub tias lawv yuav tsim txom kuv mus ntev npaum li cas los sis xyov kuv puas thev taus qhov ntawd mus ntxiv lawm. Kuv thiaj li thov Vajtswv tsis tseg, thov kom Nws coj kuv kev thiab tsom kwm kuv. Kuv kuj txiav txim siab tias txawm kuv yuav ntsib dab tsi los xij, kuv yeej yuav tsis ntxeev siab rau Vajtswv li. Cov tub ceev xwm uas sib hloov rau thaum lub sij hawm ntawd mas hnav tej ris tsho sov heev los lawv puav leej tau khaub thuas hnoos, tab sis txawm kuv tsuas hnav kuv lub tsho nyias nyias xwb thiab raug lawv tsim txom thawm hmo los xij, kuv yeej tsis ua li cas hlo li. Kuv ua Vajtswv tsaug rau Nws qhov kev saib xyuas. Muaj ib tug tub ceev xwm txawm cem hnoos rau kuv tias, “Qhov kuv tau khaub thuas hnoos no puav leej yog tim koj xwb!” Ces lawv txawm muaj ib tug los thiab sib sib zog xuas tib nrig rau ntawm kuv ntsej muag sab laug ces qhov ntawd ua rau kuv pom hnub qub liab vog. Kuv hnov zoo li chav ntawd mas tig tag nrho. Ho lwm tus uas nyob ntawm ib sab ntawd mas luag tas luag thiab, ces nws txawm los sib sib zog xuas tib nrig rau kuv lub ntsej muag sab xis, nthe tias, “Koj puas hais lus los sis tsis hais? Cov nyiaj ntawd nyob qhov twg? Peb puav leej muaj mob vim qhov kev nug no xwb. Peb yuav ntaus kom koj tuag ces mam li hu tias yeej pom zoo lawm!” Thaum hais li no ces nws txawm sib sib zog thawb daim kauj xauv tes los rau ntawm kuv dab teg, siv luj tshib sib sib zog nias daim kauj xauv tes ntau zaus kom nws zawm mus tob rau hauv kuv cov nqaij. Kuv hnov zoo li kuv ob txhais tes twb yuav dam li lawm. Tsis ntev ces ob txhais tes txawm doog dub nciab thiab xiav lus lawm—kuv hnov mob tiag tiag, kuv lub cev tshee tag nrho, thiab kuv tawm fws lug. Tsis paub piav tias qhov mob ntawd zoo li cas li. Nyob rau thaum lub sij hawm ntawd mas kuv hnov zoo li kuv thev tsis taus li lawm ces kawg xaus li ntawd lawm xwb, yog li kuv thiaj li thov Vajtswv zaum tas zaum thiab, thov kom Nws tiv thaiv kuv es kuv thiaj li nyob khov kho tau. Thaum pom kuv lub ntsej muag mob li no lawm, ces tus tub ceev xwm sawv ntawm ib sab txawm luag hnyos kuv tias, “Koj ntseeg Vajtswv, yog li kom koj tus Vajtswv los cawm koj seb!” Kuv paub tias Ntxwgnyoog tab tom sim kuv lawm ntag. Kuv tab tom xav tias Pawg Koom Tsham xav siv kev tsim txom los ua kom kuv txhob lees thiab ntxeev siab rau Vajtswv, tab sis nws yim tsim txom kuv, ces kuv yim pom meej tseeb txog nws lub niag ntsej muag phem ntawm txoj kev ntxub thiab kev tawm tsam Vajtswv, thiab kuv yim muaj kev txiav txim siab rau txoj kev ntseeg thiab kev raws Vajtswv qab. Tom qab ntawd kuv thov Vajtswv tias, “Vajtswv! Pawg Koom Tsham txoj kev tsim txom phem rau kuv hnub no yog qee yam uas Koj tso cai kom tshwm sim kom kuv pom tau tias nws yog Ntxwgnyoog phem, tias nws yog Koj tus yeeb ncuab. Kuv npaj txij tso qhov ntawd tseg lawm thiab tsis lees txais yuav qhov ntawd rau hauv kuv lub siab, thiab kuv txiav txim siab khov kho tias yuav raws Koj qab xwb!”
Tom qab ntawd ib tug tub ceev xwm siv nws lub luj taws ntawm nws txhais khau los sib sib zog tsuj kuv daim kauj xauv tes ob peb zaug, ua rau daim kauj xauv tes ntawd zawm tob ntxiv rau hauv cov nqaij ntawm kuv dab teg. Nws mob heev uas kuv yuav luag ua tsis taus pa. Ib teev tom qab ntawd ces kuv ob txhais tes txawm pib doog dub nciab thiab tej hlab ntsha thoob plaws hauv kuv lub cev mas o nruj nreem lawm. Kuv lub taub hau ces hnov zoo li tshuav tawg lawm xwb thiab haj yam mob kuv lub siab thiab. Kuv mob thoob plaws ib ce uas kuv piav qhia tsis tau hlo li. Kuv ntshai tsam thaum kawg es kuv ob txhais tes yuav siv tsis tau yog pheej tseem ua li ntawd mus ntxiv. Ces kuv txawm xav txog kuv txiv uas twb muaj hnub nyoog laus lawm uas yuav tau saib xyuas thiab kuv tus ntxhais thiab tus tub uas wb tseem tab tom tu. Kuv yuav saib xyuas lawv li cas, cov hluas thiab tus laus, yog hais tias kuv tsis muaj kuv ob txhais tes lawm? Tej zaum ntshe kuv yuav tau qhia qee yam uas tsis tseem ceeb rau lawv pob? Tab sis tom qab kuv paub lawm tias qhov hais tawm tej ntawd ces txhais tau tias kuv yuav yog ib tug txhaum mus tag txhua tiam. Tiam sis, kuv yuav thev tsis taus qhov kev tsim txom ntawd mus ntxiv tiag tiag li lawm, thiab tsuas xav tuag kiag es thiaj li tsis hnov txom nyem lawm xwb, thiab ua li ntawd kuv thiaj li yuav tsis ntxeev siab rau Vajtswv tau. Kuv ces xav hno kuv tus kheej rau ntawm lub ces kaum rooj kom tuag tes thiaj li tag. Ces kuv thiaj li thov Vajtswv zaum kawg nrog kua muag hais tias: “Vajtswv Tus Uas Muaj Hwj Chim Loj Kawg Nkaus! Kuv hnov muaj hwj chim tshaj uas Koj tau xaiv kuv thiab kuv tau paub Koj tes hauj lwm ntawm tiam kawg lawm. Kuv tsis xav tuag sai rau qhov no xwb, tab sis kuv yuav tiv tsis taus Ntxwgnyoog txoj kev tsim txom mus ntxiv tiag tiag li lawm thiab kuv ntshai tsam thaum kawg es kuv yuav ntxeev siab rau Koj. Kuv tsis xav ua rau Koj mob siab.” Sij hawm thaum kuv thov Vajtswv ntawd ces txawm muaj qee yam ntawm Vajtswv cov lus tshwm los rau hauv nruab siab tias: “Nyob rau lub sij hawm kawg nej yuav tsum ua tim khawv rau Vajtswv. Tsis hais nej txoj kev txom nyem yuav loj npaum li cas, koj tsim nyog taug kev mus kom txog thaum kawg, thiab kom kawg koj tus pa, koj yuav tsum ncaj ncees rau Vajtswv thiab ntawm Vajtswv txoj kev hlub tshua; tsuas yog qhov no xwb thiaj yog kev hlub Vajtswv tiag tiag, thiab tsuas yog qhov no xwb thiaj yog qhov kev ua tim khawv muaj zog thiab zoo kawg nkaus” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tsuas Yog Kev Sim Siab Uas Mob Heev Xwb Thiaj Muaj Peev Xwm Paub Txog Vajtswv Txoj Kev Zoo Ntxim Hlub). Vajtswv cov lus txhawb kuv txoj kev ntseeg. Vajtswv cia kuv thev kom dhau qhov mob ntawd los mus ua kom kuv txoj kev ntseeg zoo tiav log, tab sis tsis to taub Vajtswv txoj kev xav, ces kuv thiaj li tsis xav tias yuav ua tim khawv khov kho li cas rau Vajtswv rau ntawm Ntxwgnyoog xub ntiag. Kuv tsuas xav tias yuav khiav kom dim qhov xwm txheej ntawd li cas xwb. Kuv mas twm xeeb ua luaj li! Kuv paub tias kuv yuav tuag tsis tau li ntawd—tsuav yog kuv tseem tshuav txoj pa nyob rau hauv kuv xwb, ces kuv yuav tsum ua tim khawv khov kho rau Vajtswv xwb! Kuv thiaj li thov Vajtswv hais tias, “Vajtswv, kuv txoj sia nyob rau hauv Koj ob txhais tes lawm thiab kuv xav zwm rau yam uas Koj npaj rau kuv. Thov muab txoj kev ntseeg rau kuv thiab tiv thaiv kuv kom kuv thiaj li muaj muaj zog khov kho.” Ces tub ceev xwm pom tia lawv muab tsis tau ib yam dab tsi ntawm kuv li ces thiaj li hais lus hem tias, “Hmo no mus xav kom zoo zoo nawb, es tag kis peb mam rov los nug koj.”
Nyob rau lub sij hawm ntawd mas kuv tsis tau pw peb hnub thiab ob hmo. Ces kuv yuav luag tag zog, mob kuv lub siab, thiab mob thoob plaws kuv ib ce heev txog qhov yuav tiv tsis tau li lawm. Xav txog qhov tub ceev xwm tseem yuav nug kuv ntxiv rau hnub tom ntej ntshe kuv yuav tsis tau pw thawm hmo, ces thiaj li thov Vajtswv tsis tseg tias, “Au Vajtswv! Kuv ntshai tsam tub ceev xwm yuav tsim txom kuv ntxiv rau tag kis es kuv lub cev yuav thev tsis taus. Vajtswv, thov tiv thaiv kuv thiab muab txoj kev ntseeg thiab lub zog rau kuv. Kuv xav ua tim khawv khov kho thiab ua kom Ntxwgnyoog txaj muag.” Ces kuv txawm nco tau qee yam los ntawm Vajtswv cov lus los tom qab kuv thov Vajtswv tag lawm: “Thaum koj ntsib kev tsim txom, koj yuav tsum muaj peev xwm tso kev txhawj xeeb ntawm sab cev nqaij tawv tseg thiab tsis txhob yws tawm tsam Vajtswv. Thaum Vajtswv zais Nws Tus Kheej ntawm koj lawm, koj yuav tsum muaj peev xwm muaj kev ntseeg raws Nws qab, kom tuav tau koj txoj kev hlub yav dhau los tsis pub kom nws poob los sis ploj mus. Tsis hais Vajtswv yuav ua dab tsi los xij, koj yuav tsum zwm rau Nws tus qauv thiab npaj foom phem rau koj tus kheej sab nqaij tawv zoo dua li uas yws tawm tsam Nws. Thaum koj raug kev sim siab, koj yuav tsum ua rau Vajtswv zoo siab, txawm hais tias koj yuav quaj los kua muag iab los sis tsis txaus siab rau qee yam hom phiaj uas koj nyiam. Tsuas yog qhov no xwb thiaj li yog kev hlub thiab kev ntseeg tseeb tiag” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Cov Tib Neeg Uas yuav Raug Ua Kom Zoo Tshaj Plaws Yuav Tsum Raug Kev Tsim Kho Kom Zoo). Kuv xav txog Vajtswv cov lus thiab pom tau tias Nws cia kom qhov ntawd tshwm sim rau kuv los mus sim seb kuv puas muaj los sis tsis muaj kev ntseeg tiag, thiab muab lub hwv tsam rau kuv los ua tim khawv khov kho rau Vajtswv. Kuv xav txog qhov Yauj raug Ntxwgnyoog sim, poob tag nrho txhua yam uas nws muaj, nws cov me nyuam, thiab ua rau nws lub cev mob ua kua yig daws thoob plaws. Txawm li ntawd los xij, Yauj yeej tsis liam rau Vajtswv li, tab sis qhuas Nws lub npe, ua tim khawv rau Nws xwb. Petus los kuj raug kev tsim txom txom nyem ntsuav thiab txaus siab hlo raug muab ntsia rau saum tus ntoo khaub lig rov quav tam rau Vajtswv, hlub Vajtswv thiab zwm rau Nws kom mus txog theem uas yeem muab nws txoj sia tso tseg. Tab sis tom qab raug ib txhia tub ceev xwm tsim txom hnyav lawm, ces tag nrho tej uas kuv xav mas yog kuv tus kheej lub cev nqaij daim tawv thiab tsuas yog ntsib kev txom nyem me ntsis xwb los kuv cia li xav khiav kom dim lawm. Kuv yeej tsis muaj txoj kev ntseeg tiag thiab tsis mloog Vajtswv lus li, tsis muaj lus ua tim khawv ib qho me me kiag li. Kuv yim xav txog qhov ntawd ces kuv yim hnov txaj muag xwb ces thiaj li thov Vajtswv tias, “Vajtswv, kuv lub neej mas tsis muaj nqis li. Txawm tias tub ceev xwm yuav ua li cas rau kuv tom qab qhov no los xij, txawm tias kuv lub cev yuav raug kev txom nyem ntau npaum li cas los xij, kuv yuav tsis xav txog kuv tus kheej mus ntxiv lawm. Kuv xav muab kuv tus kheej tso rau hauv Koj ob txhais tes, thiab zwm rau Koj tej kev coj kev qhia thiab tej kev npaj tseg.” Tom qab qhov thov Vajtswv ntawd tag lawm ces txawm muaj qee yam phim hwj tshwm simtuaj—tag nrho tej kev mob hauv kuv lub cev cia li ploj ntais mus lawm thiab kuv hnov kaj siab lawm ntau heev kiag tam sim ntawd. Kuv ua siab dawb paug ua tsaug rau Vajtswv. Hnub tom ntej thaj tsam li 8 teev sawv ntxov ntawd tub ceev xwm rov qab los nug kuv dua, xav paub tias cov nyiaj nyob qhov tswg, tab sis txawm lawv yuav nug kuv li cas los kuv tsuas teb tias kuv tsis paub xwb. Lawv nug ntau lwm ntxiv, thiab thaum lawv tseem muab tsis tau tej xov xwm muaj txiaj ntsim los ntawm kuv, ces lawv thiaj li tso kuv tseg lawm, “Npaj tos mus tim tsev kaw neeg nawb!” Kuv xav rau kuv tus kheej tias txawm yog kuv nyob hauv tsev kaw neeg mus txog kuv hnub kawg los xij, kuv yeej yuav tsis ntxeev siab rau Vajtswv li.
Tom qab ceev kuv los tau ib lub hlis lawm, thaum kawg lawv thiaj li phua lub txim ib lub xyoos rau kuv rov qab los muab kev qhuab qhia dua los ntawm kev siv dag zog, iab liam lub txim rau kuv “los ntawm kev siv ib lub koom haum fab kev ntseeg los yuam siv txoj cai.” Thaum pom tias Pawg Koom Tsham ntxub cov tib neeg muaj kev ntseeg ntau npaum li cas lawm, ua rau kuv xav txog qee yam ntawm qhov Vajtswv hais tias: “Tos li ntawd, ces, Vajtswv uas yug los ua neeg tseem nkaum tag nrho: Nyob rau ib lub meem xeeb coj tsaus ntuj nti li lub no, uas cov dab mas siab phem thiab lim hiam heev, yuav ua cas es tus vaj ntxwv ntawm cov dab, tus uas tua neeg yam tsis ntsais muag li, yuav zam tau cia kom muaj ib tug Vajtswv uas txaus hlub, siab zoo, thiab dawb huv ntawd nyob? Nws yuav ua cas npuaj teg thiab qw txais tos qhov kev los txog ntawm Vajtswv? Cov niag qhev no! Lawv pauj kev zoo siab nrog kev ntxub, lawv twb pib saib Vajtswv li yog ib tug yeeb ncuab los ntev lawm, lawv tsim txom Vajtswv, lawv yog cov niag mab qus phem tshaj plaws li, lawv yeej tsis muaj ib qho kev saib taus Vajtswv me me hlo li, lawv huab noj huab haus thiab ua tub sab tub nyiag, lawv plam tag nrho tej kev txawj xav, lawv tawm tsam tag nrho txhua yam kev txawj xav, thiab lawv ntxias cov neeg dawb huv mus rau txoj kev ruam. Tej poj koob yawm txwv ntawm cov neeg txheej thaum ub? Cov thawj coj uas ntxim hlub tshaj? Lawv tag nrho yeej tawm tsam Vajtswv! Lawv tej kev cuam tshuam ua rau tag nrho cov nyob hauv qab ntuj raug tso tseg rau hauv ib qho xwm txheej ntawm txoj kev tsaus ntuj thiab kev kub ntxhov. Kev ywj pheej fab kev ntseeg? Tej cai yam raug cai thiab tej uas pej xeem xav tau? Tag nrho tej no ces yog kev ntxias dag los npog kev txhaum xwb! … Vim li cas ho yuav tsim tej kev tav kev uas tua tsis tshab no rau Vajtswv tes hauj lwm? Vim li cas ho siv ntau yam kev ntxias dag uas sib txawv los dag Vajtswv cov neeg? Qhov kev ywj pheej tiag thiab tej cai thiab tej yam tib neeg nyiam uas raug kev cai ntawd nyob qhov twg? Txoj kev ncaj ncees nyob qhov twg? Txoj kev kaj siab nyob qhov twg? Kev sov siab ntawd nyob qhov twg? Vim li cas ho siv tej tswv yim ntxias dag los dag Vajtswv cov neeg? Vim li cas ho siv dag zog los caij tsuj qhov kev los ntawm Vajtswv? Vim li cas ho tsis pub Vajtswv ncig mus los yam ywj siab lug rau hauv lub ntiaj teb uas Nws tsim tawm los? Vim li cas ho caum tua Vajtswv kom txog ntua thaum uas Nws tsis muaj chaw so Nws lub tob hau? Txoj kev sov siab ntawm tib neeg dua twg tag lawm?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tes Hauj Lwm thiab Kev To Taub (8)). Pawg Koom Tsham tas zog ua kom ntsia zoo li nws mas muaj kev zoo thiab tus qauv zoo puv npo, tham ntev tham ntau txog txoj kev ntseeg uas ywj pheej tas li tab sis ho siv tej tswv yim phem twj ywm los ntes thiab tsim txom cov neeg uas Vajtswv xaiv, xav tias lawv yuav ntxuav tau cov ntseeg. Vajtswv tsim tib neeg ntiaj teb thiab qhov peb muaj kev ntseeg thiab kev pe hawm Vajtswv mas yeej yog lawm thiab yeej ib txwm muaj, tab sis Pawg Koom Tsham ntes peb yam vwm ntsuav thiab caij tsuj peb, tas zog ua kom peb tsis lees thiab ntxeev siab rau Vajtswv. Kuv pom tau tias qhov Pawg Koom Tsham muaj hwj chim ces yog Ntxwgnyoog muaj hwj cim ntag—Pawg Koom Tsham ntxub qhov tseeb thiab ntxub Vajtswv. Lub ntsiab tseeb tiag ces, tus Ntxwgnyoog phem ntawd yog Vajtswv tus yeeb ncuab. Yav dhau los kuv yeej tsis txeev pom Pawg Koom Tsham lub ntsiab tseeb phem li, tab sis qhov kev ntes ntawd ua rau kuv paub qee yam thiab kuv lub siab cia li muaj peev xwm tso tseg tau thiab tsis lees txais yuav qhov ntawd lawm. Kuv los kuj muaj kev ruaj siab ntxiv los mus raws Vajtswv qab lawm thiab.
Nyob rau lub Kaum Ib Hlis hnub tim 9 xyoo 2009 ntawd kuv thiaj li raug coj mus rau tim lub chaw siv dag zog uas tub ceev xwm tau hais kom ob tug neeg raug txim los saib kuv. Nkawv yeej nyob rawv ntawm kuv ib sab, thiab yuav siv chav plob xwb los yeej yuav tau hais nkawv tso. Tus neeg saib tsev kaw neeg tsis pub kuv tham nrog ib tug twg li, ntshai tsam kuv qhia txoj moo zoo rau lwm tus, ces kuv yuav tsum nco kom tau cov kev cai ntawm lub tsev kaw neeg txhua hnub. Yog kuv nco yuam kev, ces yuav rau txim rau kuv kom sawv ntsug. Kuv ua hauj lwm hnyav heev txij thaum sawv ntxov mus txog ntua rau yav hmo ntuj hnub tas hnub tuaj, thiab yog kuv ua kuv tes hauj lwm tsis tiav ces kuv yuav raug foom phem, raug ntaus, thiab yuav tsum raug rau txim sawv ntsug. Yam lawv pub rau kuv noj mas tseem phem tshaj li tej nyuag qhauv npua txeej lawm thiab. Txhua pluas mov noj ces kuv tsuas tau ib lub ncuav cub me me thiab ib tais kua zaub uas muaj tib daim qos ntug hauv paus luaj li tus ntiv tes rwg qab nyob rau hauv xwb. Kuv ib txwm ua hauj lwm plab qhuav qhawv tas li. Thaum uas kuv nyuaj siab thiab ntxhov siab, ces kuv thov Vajtswv los sis hu qee zaj nkauj ntsiag to txog Vajtswv cov lus rau kuv tus kheej xwb. Qhov ntawd yog qhov kuv ua neej nyob rau hauv tsev kaw neeg rau xyoo ntawd.
Tom qab tawm hauv tsev kaw neeg los lawm ces tub ceev xwm hais rau kuv tias, “Koj yuav mus deb ntawm tsev tsis tau mus thawm xyoo. Koj yuav tsum npaj txhij tuaj tshwm ntsej muag thaum sij hawm peb hu koj.” Tom qab kuv los txog tsev lawm kuv mam li paub tias tom qab kuv poj niam raug ntes lawm, tub ceev xwm kuj nug nws tsis tseg txog qhov muab pawg ntseeg cov nyiaj khaw cia rau qhov twg thiab. Nws yeej tsis qhia ib yam dab tsi rau lawv thiab raug tso tawm hauv lub chaw ceev tseg tom qab raug ceev tseeg tau 23 hnub. Thaum tub ceev xwm muab tsis tau ib qho xov xwm tias cov nyiaj nyob qhov twg, ces lawv txawm tuaj tshawb tim wb tsev ob zaug, qhib tag nrho wb tej qab ntab thiab hais tsis zoo txog wb txoj kev ntseeg rau wb ob tug me nyuam. Lawv haj tseem tau mus tim wb tus tub lub tsev kawm ntawv mus ua kom nws txaj muag thiab. Wb ob tug me nyuam ntshai heev nkawv ua neej nyob tsis muaj qab hau thiab yeej tsis muaj kev nyab xeeb li. Thaum pom tias cov tub ceev xwm ntawd tsis pub cia ib qho nyiaj nyob rau ntawm ob tug me nyuam no tes li ces ua rau kuv haj yam ntxub cov niag dab phem ntawm Pawg Koom Tsham. Tom qab kuv tawm los lawm, tub ceev tas zog tiv thaiv tsis pub kuv nyeem Vajtswv cov lus los sis tsis pub mus koom tej rooj sib txoos ua ke li. Kuv thiaj li tsis muaj kev xaiv lawm tab sis tau tawm mus sab nraum nroog mus tshaj tawm txoj moo zoo thiab ua kuv tes dej num. Tub ceev xwm tseem soj kuv qab los txog niaj hnub no, thiab lawv pheej nias qees kuv cov neeg txheeb ze thiab cov kwv tij thiab cov muam uas kuv keev sib txuas lus nrog kom tau tej xov xwm ntawm kuv qhov chaw nyob.
Kuv lub cev raug kev txom nyem los ntawm qhov kev tsim txom thiab kev nyuaj no, tab sis kuv pom Vajtswv txoj kev hlub tiag tiag lawm. Thaum kuv raug tsim txom, txhua zaus uas txog qhov kuv thev tsis taus li lawm, ces Vajtswv cov lus ntawd tau muab txoj kev ntseeg thiab lub zog rau kuv thiab qhia tawm txog kev tiv khov kho rau kuv. Qhov ntawd kuj yog Vajtswv cov lus uas coj kuv los pom Ntxwgnyoog tej tswv yim ntxias dag thiab kov yeej Ntxwgnyoog tej kev sim siab zaum tas zaum tuaj. Los ntawm txhua qhov no, kuv thiaj li muaj peev xwm pom lub hwj chim thiab kev muaj cai ntawm Vajtswv cov lus thiab tias tsuas yog Vajtswv xwb thiaj li cawm tau tib neeg ntiaj teb. Kuv kuj pom meej meej txog Pawg Koom Tsham lub ntsej muag phem lawm thiab, tias lawv ntxub Vajtswv thiab tawm tsam Nws. Kuv muaj peev xwm tso qhov ntawd tseg thiab tsis kam lees txais yuav qhov tau ntawd tawm hauv kuv nruab siab tuaj. Txawm kuv yuav ntsib kev txom nyem thiab kev nyuaj siab ntau npaum li cas nyob rau yav tom ntej los xij, kuv yeej yuav ua kuv tes dej num kom Vajtswv txaus siab xwb xwb li!
