100. Txoj Kev Txom Nyem ntawm Kev Zais Kuv Tus Kheej
Muaj ib hnub nyob rau xyoo 2018, kuv tus thawj coj hais kom kuv mus txhawb ib pawg ntseeg uas nyuam qhuav tsim tsa tau tshiab tshiab. Thaum kuv txais tau qhov xov no, kuv ceeb tag thiab ntshai thiab. Zoo li tias kuv tus thawj coj me ntsis hwm kuv; tiam sis kuv cov nus thiab cov viv ncaus yuav xav li cas rau kuv yog kuv ua tsis tau ib teg hauj lwm uas muaj tiag li? Lawv puas yuav xav hais tias kuv tsis yog ib tug thawj coj zoo? Yog qhov ntawd tshwm sim, kuv tseem tshuav hwj chim dab tsi? Kiag thaum kuv xav txog tej no lawm, kuv cia li ntxhov siab thiab tsis muaj kev kaj siab thaum ua kuv tej dej num li lawm. Ib lub lim tiam tom qab ntawd, kuv cia li tsis paub tseeb li lawm, kuv txawm tawm mus rau pawg ntseeg tshiab ntawd. Thaum xub thawj mas, thaum cov nus thiab cov viv ncaus muaj lus nug, kuv muaj peev xwm teb tau tej lus nug ntawd los ntawm qhov muab Vajtswv cov lus thiab tej hauv paus ntsiab lus coj los ntxiv rau kuv tus kheej txoj kev ntsib kev pom hauv tej lus qhia. Tiam sis tom qab ntawd lawv ntsib qee yam teeb meem uas kuv to taub tsis tag, los sis kuv tsis paub xyov yuav daws tej teeb meem ntawd li cas, yog li ntawd kuv txawm pib ntshai lawm.
Kuv nco tau hais tias thaum muaj ib lub rooj sib tham, cov nus thiab cov viv ncaus tau qee lo lus nug thiab tej kev nyuaj uas lawv tab tom ntsib nyob rau hauv lawv tes hauj lwm, ces kuv cia li xav tsis tawm tias kis twg ntawm qhov tseeb uas kuv tsim nyog muab coj los qhia daws tej teeb meem no li. Kuv txhawj tsam lawv yuav tsis tshua hwm kuv lawm, thiab kuv ntxhov siab heev. Kuv xav nyuaj heev, xav kom xav tawm tej zaj lus ntawm Vajtswv cov lus los sis tej hauv paus ntsiab lus los qhia kom sai li sai tau, tiam sis kuv yim txob siab, ces kuv yim xav tsis tawm dab tsi li xwb. Thaum pom cov nus thiab cov viv ncaus zaum ntsiag to nyob ntawd tos kuv cov lus teb xwb, haj yam ua rau kuv ntshai, xav hais tias, “Yog kuv daws tsis tau lawv tej teeb meem, qhov ntawd tsis txhais hais tias kuv tsis to taub qhov tseeb thiab tsis muaj peev xwm ua tes hauj lwm uas muaj tiag lod? Cov nus thiab cov viv ncaus yuav xav li cas rau kuv? Ua li ntawd ntshe yuav txaj muag heev!” Thaum kawg, kuv cia li lam teb thiab xaiv ib zaj lus ntawm Vajtswv cov lus los qhia xwb. Qhov tseeb tiag, kuv paub tseeb tias kuv tsuas lam hais txoj kev paub ntawm kev qhuab qhia xwb thiab paub tias qhov no yeej daws tsis tau lawv tej teeb meem li. Tiam sis thaum pom hais tias kuv cov nus thiab cov viv ncaus tab tom mloog thiab ncaws hau, thiab tsis hais lus ntxiv lawm, ces kuv tsis xav txog qhov ntawd ntxiv li lawm. Muaj dua ib zaug, ib tug viv ncaus nug txog nws tus ntxhais uas ua hauj lwm khwv heev hais tias nws tus ntxhais tuaj koom tsis tau cov rooj sib tham ntawd txhua zaus. Tus viv ncaus ntawd txhawj hais tias vim nws tus ntxhais tsis nrhiav qhov tseeb li, ntshe nws yuav plam nws lub hwv tsam los txais txoj kev cawm dim, yog li ntawd tus viv ncaus ntawd thiaj li pheej hais kom nws tus ntxhais nco ntsoov nyeem Vajtswv cov lus thiab mus koom cov rooj sib tham kom ntau ntxiv. Tiam sis nyob rau tib lub sij hawm ntawd, nws txhawj hais tias yog siv zog thawb nws tus ntxhais heev dhau lawm ces yuav ua rau tus ntxhais chim. Qhov teeb meem no ua rau tus viv ncaus ntawd qaug zog, thiab nws tsis paub xyov yuav ua li cas li lawm. Nyob rau lub sij hawm ntawd, kuv tsis paub tseeb tias kuv yuav tsum qhia li cas rau tus viv ncaus ntawd kom daws tau nws qhov teeb meem. Kuv xav rau kuv tus kheej hais tias, “Tsis pom qab qhia ib yam dab tsi rau tus viv ncaus no nyob rau ntawm txhua tus lub xub ntiag kiag li lawm. Qhov no yog thawj zaug uas kuv tuaj rau ntawm pab pawg sib tham no xwb. Yog kuv kho tsis tau lawv tej teeb meem, ces cov nus thiab cov viv ncaus yuav tsis tshua hwm kuv thiab hais tias kuv tsis muaj peev xwm daws teeb meem los ntawm tej lus qhia txog qhov tseeb no lawm lod? Txawm yuav zoo li cas los xij, kuv yuav tsum tau siv ib lub tswv yim dab tsi los daws qhov xwm txheej no.” Yog li ntawd, kuv qhia, hais tias, “Hais txog qhov teeb meem no mas, peb yuav tsum nrhiav qhov tseeb thiab paub Vajtswv lub siab nyiam. Vajtswv cawm cov uas muaj txoj kev ntseeg Nws tseeb thiab cov uas nyiam qhov tseeb xwb. Nws yeej tsis yuam peb kom tuaj sib sau ua ke los sis ua peb tej dej num kom tiav li, yog li ntawd yog koj tus ntxhais tsis nrhiav qhov tseeb, koj yuam tsis tau nws kom ua li ntawd. Koj yuav tsum zwm rau Vajtswv tej kev npaj thiab tso tseg qhov ua raws li koj tej kev xav.” Tus viv ncaus ntawd tsis hais ib yam dab tsi li tom qab kuv qhia tag lawm, tiam sis nws tseem hnya hnya thiab. Thaum pom hais tias tseem daws tsis tau tus viv ncaus ntawd qhov teeb meem, ces tus thawj coj, uas yog tus Viv Ncaus Vaj, txawm qhia hais tias: “Koj tsim nyog tseem yuav pab koj tus ntxhais thiab muaj txoj kev hlub qhia rau. Thaum kawg, yeej yuav paub xwb tias koj tus ntxhais puas yog ib tug nrhiav qhov tseeb. Yog nws yog ib tug ntseeg Vajtswv tiag tiag, ces tab txawm hais tias thaum xub thawj nws muaj tej kev ntshaw ntawm lub ntiaj teb thiab tsis nrhiav qhov tseeb los xij, koj yuav tsum ua siab ntev, lees txais thiab muaj lub siab hlub txhawb nws. Ces, thaum nws pib to taub qee qhov tseeb lawm, nws yeej yuav cia li pib saib qhov ntawd tseem ceeb tuaj li lawm xwb. Yog nws tsis yog ib tug uas nyiam qhov tseeb, thiab tsuas yog lam ntseeg Vajtswv kom tau txais koob hmoov xwb, ces txawm yuav pab los sis thov Vajtswv rau nws ntau npaum li cas los yuav tsis muaj nuj nqis dab tsi li, vim Vajtswv tsis cawm cov tsis ntseeg. Yog li ntawd, cia peb xub pab thiab txhawb nws los ntawm txoj kev hlub tso ces tom qab ntawd, thaum peb paub tseeb tseeb lawm hais tias nws yog hom tib neeg twg lawm, ces peb mam li txiav txim siab seb yuav ua li cas rau nws raws li lub hauv paus ntsiab lus.” Tus viv ncaus ntawd ncaws hau tas zog li, thiab kuv los kuj to taub meej me ntsis txog qhov teeb meem no lawm thiab. Viv Ncaus Vaj tej lus qhia qhia tau ib txoj kev xyaum ua uas meej heev. Tiam sis kuv tsis kam hais ib lo lus los lees paub qhov no li; yog kuv lees paub qhov zoo li no lawm, ces kuv xav hais tias, cov nus thiab cov viv ncaus haj yam yuav paub hais tias kuv tsuas qhia raws li txoj kev paub ntawm kev qhuab qhia xwb, thiab yuav ua rau kuv txaj muag heev. Txij li thaum ntawd los, kuv ntxhov siab zuj zus tuaj lawm, ntshai tsam kuv tsis muaj peev xwm daws tau tej teeb meem uas kuv cov nus thiab cov viv ncaus coj tuaj lawm. Qee zaus thaum kuv ntsib tej kev nyuaj, kuv xav qhia rau kuv cov nus thiab cov viv ncaus seb lawv tej tswv yim thiab tej kev xav ho zoo li cas. Tiam sis tom qab ntawd kuv nco tau hais tias kuv mus rau qhov ntawd yog mus saib xyuas thiab txhawb lawv xwb, yog kuv muab qab tes ua qaum tes thiab mus kom lawv pab, ces lawv yeej yuav tsis tshua hwm kuv xwb xwb li. Kuv xav mus xav los, thiab kiag thaum kuv yuav hais ib yam dab tsi, kuv ua ob siab thiab nyob ntsiag to xwb. Muaj ntau zaus uas kuv tus kheej thov zam txim mus siv chav dej, los sis thov zam txim mus ua lwm yam hauj lwm thaum muaj ib qho teeb meem nyuaj tshwm tuaj thiab hais kom cov nus thiab cov viv ncaus sib tham ntawm lawv tus kheej ua ntej. Thaum kuv rov qab los txog, ntshe lawv twb nrhiav tau ob peb qho kev daws teeb meem uas siv tau lawm, ua li ntawd thiaj li yuav tsis muaj leej twg pom tias kuv zoo li cas tiag tiag. Thaum twg uas kuv ua tej yam zoo li no, kuv thuam kuv tus kheej heev, kuv yeej paub tias kuv tsis muaj ib txoj kev to taub zoo txog qhov teeb meem ntawd, thiab yog kuv cia li qhia tawm thiab thov kom kuv cov nus thiab cov viv ncaus pab ces kuv yeej yuav tau txais ib txoj kev to taub uas tob dua. Nyob rau tej sij hawm zoo li no, kuv yeej ib txwm txiav txim siab tsis zam tej xwm txheej zoo li no nyob rau yav tom ntej lawm, tiam sis thaum twg muaj qee qhov kev nyuaj tshwm tuaj, kuv cia li xav los tsom kwm kuv lub meej mom thiab hwj chim lawm xwb. Kuv ces cia li lam tham tej lus uas paub tsis meej los ntawm kev qog qee yam kev paub ntawm kev qhuab qhia, los sis cia li zam qhov xwm txheej ntawd tag nrho li lawm thiab. Nyob rau lub caij ntawd, kuv tus yam ntxwv maj mam phem zuj zus—kuv tsis muaj kev paub tob thaum kuv qhia nyob rau hauv tej kev sib txoos ua ke, kuv pheej ua tsis tau kuv tes hauj lwm, thiab nws siv dag siv zov ntau zuj zus los ua kuv tej dej num kom tiav lawm. Kuv ntxhov siab thiab kev txom nyem heev los ntawm qhov pheej dag thiab zais kuv tus kheej. Kuv haj tseem xav hais tias tej zaum tes dej num no ua rau kuv sab dhau lawm, thiab kuv rov qab mus ua kuv tes dej num yav dhau los ntshe yuav zoo dua. Kuv ras dheev hais tias kuv muaj ib tug yam ntxwv phem lawm, yog li ntawd kuv thiaj li thov Vajtswv hais tias, “Hawm txog Vajtswv! Nyuam qhuav kiag no kuv pom hais tias kuv tes hauj lwm yog siv dag siv zog ua ntau lawm xwb thiab kuv txoj kev xav tsis muaj qhov pom tseeb lawm. Nws zoo li Koj twb fee ntawm kuv mus lawm, tiam sis kuv tsis paub tias kuv tau mus yuam kev rau qhov twg lawm. Au Vajtswv, kuv xav kom Koj coj kuv kev los to taub kuv tus kheej kom zoo dua tuaj.”
Tom qab ntawd, kuv txawm pom zaj lus no ntawm Vajtswv cov lus: “Tag nrho cov tib neeg qias vuab tsuab puav leej raug qhov teeb meem uas zoo ib yam nkaus: Thaum lawv tsis muaj meej mom lawm, ces lawv tsis ua tej yam kom pom tias lawv zoo tshaj lwm tus thaum sib txuas lus los sis hais lus nrog ib tug neeg twg, los sis lawv tsis coj ib hom xeeb ceem los sis ib lub suab nthe rau hauv lawv qhov kev hais lus; lawv tsuas yog neeg dog dig thiab zoo li sawv daws xwb, thiab tsis nthuav lawv tus kheej tawm. Lawv tsis hnov muaj ib qho dab tsi nias qees rau qhov kev xav, thiab muaj peev xwm sib qhia tau yam qhib siab lug thiab tawm hauv nruab siab tuaj. Mus cuag lawv tau thiab sib txuas lus nrog lawv yooj yim; lwm tus xav tias lawv yog cov neeg zoo heev. Kiag thaum lawv muaj meej mom lawm, ces lawv txawm rais los ua tus siab thiab muaj zog, lawv tsis quav ntsej cov tib neeg dog dig, tsis muaj leej twg mus cuag tau lawv li; lawv xav tias lawv muaj ib qho zoo, thiab tias lawv thiab cov neeg dog dig mas sib txawv deb heev. Lawv saib tsis taus cov neeg dog dig, ua kom pom tias lawv zoo tshaj lwm tus thaum lawv hais lus, thiab tso qhov kev sib qhia yam qhib siab lug nrog lwm tus tseg ntawd lawm. Vim li cas lawv thiaj li tsis sib qhia yam qhib siab lug mus ntxiv lawm? Lawv xav tias tam sim no lawv muaj meej mom, thiab yog cov thawj coj lawm. Lawv xav tias cov thawj coj yuav tsum muaj ib tug yam ntxwv, ib nyuag siab zog cov neeg dog dig, muaj ntau lub siab thiab muaj peev xwm zoo tshaj los tuav tau ntau lub luag hauj lwm; lawv ntseeg tias thaum muab sib piv rau cov neeg dog dig, cov thawj coj yuav tsum muaj lub siab ntev dua, muaj peev xwm tiv kev txom nyem thiab muab fij rau ntau dua, thiab muaj peev xwm tiv taus txhua yam kev sim siab los ntawm Ntxwgnyoog. Tab txawm yog lawv niam lawv txiv los sis lwm tus tuag los xij, lawv xav hais tias lawv muaj qhov tswj tau lawv tus kheej kom txhob quaj, los sis tias yam tsawg kawg lawv yuav tsum quaj twj ywm xwb kom lwm tus txhob pom, es kom thiaj li tsis muaj leej twg pom tej uas lawv ua tsis tau zoo, tej uas lawv tu ncua, los sis tej kev qaug zog. Lawv haj tseem xav hais tias yog cov thawj coj xav phem mas cov thawj coj tsis txhob cia leej twg paub li; tiam sis lawv yuav tsum muab tej uas zoo li no zais. Lawv ntseeg hais tias qhov no yog qhov uas tus neeg muaj meej mom tsim nyog ua. Thaum lawv tswj lawv tus kheej li no lawm no, lub meej mom tsis dhau los ua lawv tus vajtswv, lawv tus tswv lod? Thiab thaum zoo li no lawm, lawv puas tseem muaj txoj kev ua neej? Thaum lawv muaj cov tswv yim no—thaum lawv muab lawv tus kheej tso rau hauv lub thawv no, thiab ua li no lawm—tsis yog lawv nyiam lub meej mom lawm lod?” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Yuav Daws Tej Kev Sim Siab thiab Kev Ua Ntxwgnyoog Qhev Li Cas). Los ntawm txoj kev qhia tshwm ntawm Vajtswv cov lus, kuv thiaj li ras dheev hais tias qhov laj thawj uas kuv pom hais tias kuv tes hauj lwm yog ib teg uas sab thiab nkees heev ntawd yog vim kuv ntshaw lub koob lub npe thiab lub meej mom dhau lawm. Ua ntej kuv mus rau ntawm pawg ntseeg ntawd, kuv muaj kev ywj pheej thiab tsis raug txwv nyob rau hauv tej rooj sib tham nrog kuv cov nus thiab cov viv ncaus li—tsis muaj kev nyuaj siab, thiab yog kuv tsis to taub qee yam, kuv cia li muab qhov ntawd coj los qhia. Tiam sis txij li thaum mus txhawb pawg ntseeg ntawd, kuv tau muab kuv tus kheej tso rau ib qho chaw siab, xav hais tias kuv yuav tsum ua tau zoo dua thiab txawj dua cov tib neeg uas nyob rau ntawm pawg ntseeg ntawd vim qhov kuv mus nyob rau ntawd yog mus txhawb lawv ntag. Kuv ntseeg hais tias tsuas yog txoj kev daws txhua qhov teeb meem uas kuv cov nus thiab cov viv ncaus nug xwb thiaj li yog kuv ua hauj lwm los tuav kuv lub meej mom. Yuav kom kuv cov nus thiab cov viv ncaus qhuas thiab lees txais mas, kuv yuav tsum tau zais kuv tus kheej thiab ua txuj. Tab txawm kuv tsis muaj ib txoj kev to taub zoo kom meej txog tej teeb meem ntawd li los xij, kuv tsis kam qhia siab thiab nrhiav li, tiam sis pheej lam muab txoj kev paub ntawm kev qhuab qhia coj los qhia, dag ntxias kuv cov nus thiab cov viv ncaus kom dhau xwb, thiab qee zaus haj tseem thov zam txim kom zam dhau qhov xwm txheej ntawd tag nrho xwb thiab. Kuv tsis muaj ib qho kev xav me me txog li tias seb daws tau kuv cov nus thiab cov viv ncaus tej teeb meem lawm los tsis tau li, thiab kuv haj tseem ua tsis tau kom kuv tus kheej hais tej yam yooj yooj yim xws li “Kuv tsis to taub qhov teeb meem no” li thiab. Tsuas yog thaum ntawd xwb kuv thiaj li ras dheev hais tias kuv muab lub meej mom saib tseem ceeb dhau lawm, thiab tias txhua yam uas kuv ua ntawd yog ua los tsom kwm lub meej mom ntawd xwb. Vajtswv tau txhawb kuv mus rau qhov ntawd thiab mus ua hauj lwm nrog kuv cov nus thiab cov viv ncaus los daws tej teeb meem thiab tej teeb meem uas los raug rau pawg ntseeg ntawd, tiam sis kuv tsis xav seb yuav ua kuv tes dej num thiab ua tes hauj lwm uas muaj tiag ntawd kom zoo tshaj plaws li cas kiag li, tiam sis ho cia li xav txog qhov seb cov nus thiab cov viv ncaus yuav xav li cas rau kuv, thiab yuav ua li cas kom zoo tshaj plaws los tiv thaiv kuv lub meej mom thiab lub hwj chim xwb. Kuv haj tseem yuav nrhiav kev los dag ntxias lawv kom txuag tau kuv lub hwj chim thiab lub meej mom thiab. Vim txoj kev tsis quav ntsej kuv tej dej num, es thiaj li tsis yog tsuas ua rau kuv tus kheej raug kev txom nyem xwb, kuv kuj rhuav tshem kuv cov nus thiab cov viv ncaus thiab ua rau pawg ntseeg tes hauj lwm qeeb thiab. Qhov ntawd ua rau Vajtswv pom hais tias kuv tsis ntxim nyiam thiab ntxim ntxub tshaj plaws li. Kuv tau poob mus rau hauv txoj kev tsaus ntuj lawm—qhov no yog Vajtswv tus moj yam ncaj ncees ua rau kuv ntag, yog li ntawd kuv yuav tsum tau rov tig xav txog kuv tus kheej thiab lees txim hloov dua siab tshiab rau Vajtswv.
Hnub tom qab ntawd, kuv qhib siab lug qhia rau kuv cov nus thiab cov viv ncaus txog kuv tus yam ntxwv tsis ntev los no, thiab kuj nug txog ib co lus nug uas kuv muaj teeb meem txog rau txoj kev qhia thiab. Los ntawm txoj kev sib qhia ua ke, thiab muaj Vajtswv txoj kev coj qhia, thaum kawg peb thiaj li tau txais ib txoj kev to taub zoo dua txog tej teeb meem no, thiab nrhiav tau ib txoj kev xyaum ua raws lawm. Tom qab ntawd, vim kuv yeej tseem yuav cia li zais kuv tus kheej thaum kuv ntsib tej kev nyuaj los sis tsis to taub tej teeb meem tseem ceeb, tsis xav muab tej uas kuv tsis muaj peev xwm ua qhia tshwm rau kuv cov nus thiab cov viv ncaus, kuv thiaj li thov Vajtswv, thov txoj kev coj qhia. Ces kuv thiaj li pom ib zaj lus ntawm Vajtswv cov lus uas ua rau kuv muaj ib txoj kev xyaum ua raws lawm. Vajtswv Tus Uas Muaj Hwj Chim Loj Kawg Nkaus hais tias: “Yuav kom khiav dim ntawm lub meej mom txoj kev tswj koj ntawd, koj yuav tsum xub ua dab tsi ua ntej? Koj yuav tsum xub muab lub meej mom uas tswj koj ntawd tshem tawm ntawm koj tej kev npaj siab, koj tej kev xav, thiab koj lub siab mus tso. Yuav ua li cas thiaj li ua tau? Yav dhau los mas, thaum koj tsis muaj meej mom, koj tsis quav ntsej cov uas tsis nyiam koj. Tam sim no koj muaj meej mom lawm, yog koj pom ib tug tib neeg uas tsis nyiam koj, los sis tus uas muaj teeb meem, mas koj xav hais tias koj yuav tau pab lawv, yog li ntawd koj thiaj li siv sij hawm ntau ntxiv los qhia lawv, sim daws qee qhov teeb meem uas muaj qab hau uas lawv muaj ntawd. Yog li ntawd nyob hauv koj lub siab koj xav li cas thaum koj ua tej yam zoo li no? Yog ib qho kev xyiv fab thiab kaj siab. Yog li ntawd, koj yuav tsum tso siab plhuav qhia rau tib neeg thiab qhib siab lug rau lawv tas li thaum koj pom hais tias koj tus kheej nyob rau hauv qhov kev nyuaj los sis muaj qhov ua tsis tau, qhia koj tej teeb meem thiab tej kev qaug zog, qhov koj ntxeev siab rau Vajtswv li cas, thiab qhov tom qab ntawd koj tawm ntawm qhov no los li cas, thiab muaj peev xwm ua tau raws li Vajtswv tej kev npaj siab li cas ntawd thiab. Yog li ntawd qhov txiaj ntsim ntawm qhov tso siab plhuav qhia rau lawv li no ntawd yog dab tsi? Yog qhov zoo xwb. Tsis muaj leej twg yuav saib tsis taus koj—thiab tej zaum lawv tseem yuav ntshaw koj lub peev xwm uas paub tej no thiab. Ib txhia tib neeg pheej xav hais tias thaum tib neeg muaj meej mom lawm, lawv yuav tsum ua zoo li cov nom tswv thiab hais lus kom tseem ceeb kom luag thiaj li saib taus thiab hwm. Qhov xav li no puas yog? Yog koj muaj peev xwm paub hais tias qhov xav no tsis yog lawm, ces koj yuav tsum thov Vajtswv thiab tawm tsam tej uas ntawm sab cev nqaij daim tawv. Tsis txhob ua zoo li zoo tshaj lwm tus, thiab tsis txhob taug txoj kev uas ua neeg siab phem. Kiag thaum koj muaj ib qho kev xav zoo li no lawm, koj yuav tsum kho qhov kev xav no los ntawm qhov nrhiav qhov tseeb. Yog koj tsis nrhiav qhov tseeb, ces qhov kev xav no, qhov kev xam pom no, yuav tshwm sim thiab loj hlob rau hauv koj lub siab. Vim li ntawd, qhov ntawd thiaj li yuav los tswj koj thiab koj yuav zais koj tus kheej thiab coj koj tus yam ntxwv zoo li no kom tsis muaj leej twg pom tias koj zoo li cas los sis to taub koj tej kev xav. Koj yuav nrog lwm tus tham tiam sis zais koj lub siab tseeb kom lawv txhob paub. Koj yuav tsum xyaum cia lwm tus pom koj lub siab, thiab xyaum qhib koj lub siab rau lwm tus thiab ua phooj ywg kom zoo rau lawv. Koj yuav tsum tawm tsam tej uas koj cev nqaij daim tawv nyiam thiab coj koj tus kheej raws li Vajtswv tej kev cheem tsum. Ua li no mas koj lub siab thiaj li yuav muaj kev thaj yeeb thiab kev zoo siab” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Yuav Daws Tej Kev Sim Siab thiab Kev Ua Ntxwgnyoog Qhev Li Cas). Vajtswv cov lus pab kuv paub hais tias yuav kom daws tau txoj saw hlau ntawm lub koob lub npe thiab lub meej mom pov tseg mas, kuv yuav tsum tau xyaum los muab kuv txoj kev ntshaw lub meej mom uas nyob rau hauv kuv lub siab tso tseg. Tseeb tiag, txawm kuv yuav ua tes dej num dab tsi los sis kuv yuav muaj meej mom npaum li cas los xij, kuv yeej tseem raug Ntxwgnyoog muab ua qias vuab tsuab loj heev thiab muaj ntau yam kev ua tsis tau zoo thiab kev tu ncua. Qhov no yeej ib txwm zoo li qub xwb—nws tsis yog hais tias los ua ib tug thawj coj thiab muaj meej mom lawm ces txhais hais tias tus tib neeg ntawd cia li ua tau zoo dua lwm tus, tau lub meej mom siab, to taub qhov tseeb thiab tuaj yeem to taub thiab daws tau txhua qhov teeb meem huv si li lawm. Kuv tus kheej yuav tsum tau muaj ib lub tswv yim zoo. Tom qab ntawd, thaum twg uas kuv xav los tsom kwm kuv lub meej mom thiab zais tej uas kuv tus kheej ua tsis tau zoo, ces kuv tsis ua li ntawd li: Kuv qhib siab lug thiab muab kuv tus kheej qhia tawm tag nrho rau ntawm txhua tus lub xub ntiag yam tsis ua txuj li, cia kom kuv cov nus thiab cov viv ncaus pom kuv tus yeeb yam tseeb. Thaum kuv ntsib ib qho teeb meem uas kuv daws tsis tau, kuv cia li lees kiag hais tias kuv tsis to taub thiab nrog kuv cov nus thiab cov viv ncaus nrhiav qhov tseeb ua ke, ib leeg txhawb ib leeg tej uas ua tau zoo thiab tej uas ua tsis tau zoo. Los ntawm txoj kev xyaum ua li no, kuv muaj kev thaj yeeb thiab kaj siab heev dua, thiab kuv tes dej num tsis hnov zoo li sab ntxiv li lawm.
Txawm li cas los xij, tseem muaj ntau zaus uas kuv tsis muab qhov tseeb coj los xyaum ua raws. Muaj ib zaug, Viv Ncaus Vaj, uas yog tus thawj coj, tuaj txog rau ntawm ib lub rooj sib tham ua ntej kuv. Kuv xav rau kuv tus kheej hais tias: “Viv Ncaus Vaj twb paub txog tej uas kuv ua tsis tau zoo thiab tej kev tu ncua ntawm kuv tej lus qhia zaum tas los no lawm thaum uas kuv tsuas tham txog txoj kev paub ntawm kev qhuab qhia xwb. Yog kuv rov daws tsis tau kuv cov nus thiab cov viv ncaus tej teeb meem ib zaug dua, ces nws yeej yuav haj yam tsis hwm kuv li lawm. Kuv yuav ua li cas muaj ntsej muag tom qab ntawd?” Kuv ntxhov siab me ntsis tom qab qhov no tshwm sim rau kuv thiab mloog zoo li tias yuav muaj kev nyuaj siab ntau yam heev rau kuv los nrog nws coj lub rooj sib tham ntawd. Kuv thiaj li hais rau Viv Ncaus Vaj hais tias, “Yog koj muaj lwm yam dej num uas yuav tsum tau mus koom, ces kav tsij cia li mus xwb, kuv tus kheej yeej saib xyuas tau lub rooj sib tham no.” Ces Viv Ncaus Vaj cia li tawm mus lawm tsis teb li. Ua rau kuv ceeb tag, ob peb hnub tom qab ntawd, Viv Ncaus Vaj hais rau kuv hais tias, “Hnub ntawd, kuv twb npaj yuav daws qee yam teeb meem thiab tej kev ua yuam kev nyob rau hauv tes hauj lwm thaum tag lub rooj sib tham lawm, tiam sis kiag thaum kuv tuaj txog rau ntawm qhov chaw sib tham ntawd, koj hais tias qhov chaw ntawd tsis cheem tsum kuv. Kuv ua tib zoo xav txog qhov no thiab txiav txim siab hais tias kuv yuav tsum qhia qee yam teeb meem uas koj muaj rau koj. Qhov no yuav muaj txiaj ntsim rau koj thiab rau tes hauj lwm ntawm Vajtswv lub tsev.” Viv Ncaus Vaj hais rau kuv hais tias kuv tab tom tsom kwm kuv lub meej mom thiab lub hwj chim nyob rau hauv txhua yam uas kuv ua xwb, pheej zais tej kev uas kuv ua tsis tau zoo thiab zais kuv tus kheej, thiab tias kuv tsis koom dab tsi nrog kuv cov nus thiab cov viv ncaus kiag li. Qhov kuv yuav tau txais Vajntsujplig tes hauj lwm thiab ua tiav ib yam txiaj ntsim dab tsi nyob rau hauv kuv tes hauj lwm ntawd mas nyuaj vim tias kuv twb muaj qhov kev npaj siab yuam kev thaum ua kuv tej dej num lawm. Viv Ncaus Vaj tej lus ua rau kuv lub ntsej muag liab tag vim txaj muag heev. Kuv txaj muag rau kuv tus kheej, thiab tu siab heev. Yam uas nws hais yeej yog lawm: Kuv txoj hauj lwm yog mus txhawb pawg ntseeg ntawd xwb, tiam sis vim kuv txhawj tsam lawv paub ces txaj muag, kuv thiaj li nrhiav ib txoj hau kev los muab nws xa tawm mus thaum nws xav los ua hauj lwm nrog kuv los txheeb xyuas thiab daws tej teeb meem ntawd kom sai li sai tau. Nws paub txog pawg ntseeg tes hauj lwm ntau dua, yog li ntawd kuv yuav ua li cas ua tau txiaj ntsim zoo yog kuv tsis koom tes nrog nws los ua wb tej dej num? Viv Ncaus Vaj tsis yog tsuas paub tias kuv tsis muaj qhov muaj tiag ntawm qhov tseeb thiab tsis muaj peev xwm daws teeb meem xwb, nws kuj tau tshawb pom hais tais kuv ntshaw lub meej mom thiab lub koob lub npe npaum li cas thiab. Nyob rau lub sij hawm ntawd, kuv poob ntsej muag kawg li. Thaum kuv tab tom raug kev txom nyem, kuv los rau ntawm Vajtswv lub xub ntiag los thov Vajtswv hais tais: “Hawm txog Vajtswv! Hnub no Viv Ncaus Vaj muab kuv tej teeb meem thiab tej kev tu ncua qhia tawm lawm. Kuv yuav tsum tau kawm los ntawm qhov xwm txheej no es kuv thov Koj coj qhia kuv kom muaj ib txoj kev to taub txog kuv tus kheej zoo dua es kom kuv thiaj li kho tau kuv tus moj yam qias vuab tsuab thiab muaj ib txoj kev hloov pauv tiag tiag.” Tom qab thov Vajtswv lawm, kuv los nyeem ib zaj lus ntawm Vajtswv cov lus uas muab kuv tus yam ntxwv qhia tshwm nyob rau lub sij hawm ntawd. Vajtswv Tus Uas Muaj Hwj Chim Loj Kawg Nkaus hais tias: “Tib neeg tus kheej yog cov raug tsim tawm los xwb. Cov raug tsim tawm los ntawd puas muaj peev xwm ua tau qhov hwj huaj uas loj tsis muaj chaw kawg? Lawv puas muaj peev xwm ua tau kom zoo tiav log thiab tsis muaj chaw thuam li? Lawv puas muaj peev xwm ua tau zoo rau txhua yam, to taub txhua yam, pom txhua yam, thiab muaj peev xwm ua txhua yam? Lawv tsis muaj peev xwm ua tau. Txawm li cas los xij, nyob rau hauv tib neeg, yeej muaj tej moj yam qias vuab tsuab, thiab muaj ib qho kev qaug zog heev: Kiag thaum lawv kawm tau ib qho txuj ci los sis ib qho kev txawj ua twg, ces tib neeg txawm xav tias lawv muaj peev xwm lawm, tias lawv yog cov neeg muaj meej mom thiab muaj nqis lawm, thiab tias lawv yog cov txawj ua lawm. Txawm lawv yuav tshwj xeeb npaum li cas los xij, lawv sawv daws puav leej xav sau lawv tus kheej los ua li tus neeg nrov koob nrov npe los sis tshwj xeeb, los muab lawv tus kheej tig mus kom zoo li cov neeg ua yeeb yaj kiab, thiab ua kom tib neeg xav tias lawv zoo tiav log thiab tsis muaj chaw thuam li, tsis muaj ib qho uas yuav tsuas li; raws li qhov lwm tus pom mas, lawv xav kom los ua tus nrov koob nrov npe, muaj hwj chim, los sis ib cov neeg zoo, thiab lawv xav kom muaj zog tshaj, muaj peev xwm ua txhua yam, es tsis muaj ib yam dab tsi uas lawv ua tsis tau li. Lawv xav tias yog lawv nrhiav lwm tus qhov kev pab, ces lawv yuav zoo li tus tsis muaj peev xwm, qaug zog, thiab phem dua, thiab tias tib neeg yuav saib tsis taus lawv. Vim li no, lawv thiaj liua txuj tas li xwb. … Hom moj yam no yog dab tsi? Cov tib neeg zoo li no txoj kev khav theeb tsis muaj qhov kawg li, lawv tsis muaj peev xwm ua dab tsi li lawm. Lawv tsis xav kom zoo li lwm tus, lawv tsis xav ua cov tib neeg dog dig, cov tib neeg uas zoo li sawv daws, tiam sis lawv xav ua cov tshaj lij tshaj plaws, cov zoo tshaj plaws, los sis cov txawj ntse. Qhov no yog ib qho teeb meem loj heev! Hais txog tej kev qaug zog, tej uas ua tsis tau zoo, txoj kev tsis paub dab tsi, kev ruam, thiab tsis muaj kev to taub txog txoj kev ua neej ntawd mas, lawv yuav muab npog tag nrho, thiab tsis cia lwm tus tib neeg pom li, ces tom qab ntawd tas zog muab lawv tus kheej zais xwb. … Lawv tsis paub tias lawv tus kheej yog leej twg, thiab lawv tsis paub tias yuav ua neej li ib txwm ua li cas. Lawv yeej tsis tau ua zoo li cov tib neeg uas siv tau ib zaug li. Yog koj ua npau suav nruab hnub, lam ua kom dhau xwb es tsis ua ib yam dab tsi tiag tiag li, pheej ua raws li koj tus kheej txoj kev xav hauv nruab siab xwb, ces qhov no yog teeb meem. Txoj kev hauv lub neej uas koj xaiv ntawd tsis yog lawm. Yog koj ua li no, ces txawm koj yuav ntseeg Vajtswv li cas los xij li, koj yeej yuav tsis to taub qhov tseeb, thiab koj yuav tsis tau txais qhov tseeb li. Hais tseeb tseeb rau koj hais tias, koj tsis tau qhov tseeb, vim qhov koj pib ntawd tsis yog lawm” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Tsib Tug Yam Ntxwv Uas Yuav Tsum Muaj Thiaj Li Taug Tau Txoj Kev Yog Mus Rau Txoj Kev Ntseeg Vajtswv). Txoj kev nthuav tawm ntawm Vajtswv cov lus pab kuv paub txog qhov laj thawj uas kuv pheej zais kuv tus kheej tas li kom lwm tus qhuas ntawd yog qhov tias kuv raug kuv tus moj yam khav theeb tswj lawm. Kuv tsuas yog ib qho khoom uas tsim tawm los xwb, yog li ntawd kuv yeej tsis tuaj yeem to taub txhua yam thiab paub meej meej txog txhua qho teeb meem li. Qhov ntsib teeb meem thiab tej kev nyuaj nyob rau hauv txoj kev ua kuv tes dej num ntawd yeej yog ib qho uas yuav tsum tau ntsib. Txawm li cas los xij, kiag thaum kuv tau ib lub meej mom tseem ceeb lawm, kuv ntseeg hais tias kuv tus kheej mas “zoo tshaj plaws” li, thiab tsis lees paub kuv tus kheej tiag tiag thiab tsis daws tej kev uas kuv ua tsis tau zoo ntawd li. Kuv yeej ib txwm ua txhua yam kom tau los ua ib tug neeg zoo, tseem ceeb, ua tus qauv ntawm txoj kev zoo tiav log, yog li ntawd kuv thiaj li zais kuv tus kheej thiab ua txuj ua txhua yam los tsom kwm kuv tus yam ntxwv thiab lub meej mom rau kuv cov nus thiab cov viv ncaus pom. Kuv raug tej kab lus phem muab ua qias vuab tsuab thiab raug haub ntxias zoo li “Ib tug neeg qhov qub txeeg qub teg ces yog lub suab ntxhe rov qab ntawm nws lub neej” thiab “Yam li tsob ntoo muaj txoj sia pub rau nws daim tawv, ib tug tib neeg ua lub neej txhawm rau nws lub ntsej muag.” Txawm kuv yuav koom nrog pab tib neeg twg los xij, kuv pheej xav ua kom raug lawv siab thiab kom txhua tus cav thiab qhuas xwb, ntseeg hais tias tsuas yog txoj kev ua li no xwb mas kuv thiaj li yuav ua neej nyob muaj hwj chim thiab muaj suab npe. Ces, thaum tej kev uas kuv tu ncua thiab tej kev ua tsis tau zoo raug muab qhia tshwm rau ntawm txhua tus lub xub ntiag lawm, kuv raug puas tsuaj loj heev thiab nrhiav txhua txoj hau kev los zais thiab npog tej kev ua tsis tau zoo ntawd. Qhov xwm txheej tshiab tshiab no yog ib qho piv txwv uas zoo tshaj plaws: Vim kuv tau txhawj tsam Viv Ncaus Vaj yuav pom tias kuv zoo li cas tiag tiag, kuv thiaj li txhob txwm muab nws xa tawm mus kom kuv thiaj li zais tau qhov muaj tseeb uas kuv tsis to taub qhov tseeb ntawd. Hais txog qhov kuv thov kom tsom kwm kuv tus kheej lub meej mom thiab lub hwj chim ntawd, kuv tsis xav txog pawg ntseeg tes hauj lwm los sis kuv tsis xav txog kuv tus kheej tes dej num ib qho me me li. Kuv siab twb xeeb thiab phem heev! Kuv paub hais tias tseem tshuav ntau qhov teeb meem tiag uas yuav tau daws nyob rau hauv pawg ntseeg ntawd, thiab yog kuv tsis koom tes nrog viv ncaus Vaj, ces yuav daws tsis tau tej teeb meem ntawd li. Qhov ntawd yuav ua rau tag nrho pawg ntseeg tes hauj lwm qeeb, thiab ua rau wb cov nus thiab cov viv ncaus lub neej txoj sia puas tsuaj. Kuv muab pawg ntseeg tej kev ntshaw tso tseg kom txuag tau kuv tus yam ntxwv xwb—tsis yog kuv ua phem lod? Vajtswv tsim peb kom peb thiaj li ua tau neej zoo li tib neeg, pe hawm thiab zwm rau Vajtswv, thiab tshwj xeeb yog ua peb tej hauj lwm thiab ua peb tej dej num raws li Vajtswv hais. Tiam sis kuv, vim kuv txoj kev khav theeb uas phem, tsis muaj qhov kev paub tias dab tsi yog qhov tsim nyog uas txhua tus tib neeg dog dig tsim nyog muaj, pheej tsi ntsees rau ib tug yam ntxwv uas zoo tshaj plaws ntawm kuv tus kheej kom lwm tus qhuas. Kuv thiaj li taug ib txoj kev uas tawm tsam Vajtswv. Yog kuv tsis lees txim hloov dua siab tshiab, ces nyob rau thaum kawg kuv yeej yuav raug muab pov mus rau hauv ntuj tawg mus txais txoj kev rau txim xwb. Thaum kuv ras dheev txog txhua yam no lawm, kuv qias thiab txaj muag rau kuv tus kheej, thiab thov Vajtswv, txaus siab hlo los lees txim hloov dua siab tshiab thiab ua kuv tes dej num kom tiav yam ncaj ncees hlo thiab muaj qab hau li yog ib tug neeg uas raug tsim tawm los.
Thaum muaj tej kev ras li no lawm, kuv thiaj li nrhiav ib txoj hau kev los xyaum daws kuv tej teeb meem. Kuv los pom ob zaj lus ntawm Vajtswv cov lus uas mus raws nram qab no hais tias: “Nyob rau ntawm Vajtswv lub xub ntiag mas, txawm koj yuav muab koj tus kheej zais npaum li cas, koj yuav muab koj tus kheej npog npaum li cas, los sis koj yuav hais tej lus dag rau koj tus kheej npaum li cas los xij li, Vajtswv muaj ib txoj kev to taub txog txhua yam ntawm koj tej kev xav thiab tej uas zais tob tshaj plaws hauv koj nruab siab nruab ntsws ntawd tseeb heev; tsis muaj ib tug tib neeg twg uas nws txoj kev zais, tej uas nyob hauv nruab siab nruab ntsws ntawd tuaj yeem khiav dim Vajtswv txoj kev tshawb xyuas kom meej li” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Rau Yam Ua Tau Tshwm Sim Tiag ntawm Lub Neej Kev Loj Hlob). “Koj yuav tsum nrhiav qhov tseeb los daws txhua yam teeb meem uas tshwm sim tuaj, txawm tias nws yuav yog dab tsi los xij, thiab tsis txhob npog koj tus kheej los sis looj lub ntsej muag cuav rau lwm tus pom. Koj tej kev ua tsis tau zoo, koj tej kev tu ncua, koj tej kev ua txhaum, koj tus moj yam qias vuab tsuab—cia li qhib tej ntawd kom tag nrho, thiab sib qhia txog tej ntawd kom tag nrho. Tsis txhob muab tej ntawd khaws cia rau hauv nruab siab. Kev xyaum kom paub los qhib koj tus kheej li cas ntawd yog thawj kauj ruam mus rau txoj kev to taub txog lub neej txoj sia, thiab nws yog thawj qhov teeb meem, uas yog qhov kov yeej nyuaj tshaj plaws. Thaum koj kov yeej qhov ntawd lawm, ces kev to taub txog qhov tseeb yooj yim lawm. Qhov ua kauj ruam no qhia txog dab tsi? Nws txhais hais tias koj qhib siab lug thiab qhia txhua yam uas koj muaj, qhov zoo los sis qhov phem, yam uas zoo los sis yam uas phem; nthuav koj tus kheej kom tag nrho rau lwm tus thiab rau Vajtswv pom; tsis txhob zais ib yam dab tsi los ntawm Vajtswv, tsis txhob npog ib yam dab tsi, tsis txhob ua ib yam dab tsi cuav, txav deb ntawm kev dag thiab kev dag ntxias, thiab ua tus neeg qhib siab lug thiab ncaj ncees rau lwm tus tib neeg ib yam nkaus thiab. Ua li no, ces yog koj nyob rau hauv txoj kev kaj lawm, thiab tsis yog hais tias Vajtswv yuav tshawb xyuas koj kom meej xwb, tiam sis lwm tus tib neeg los kuj yuav muaj peev xwm pom tias koj ua muaj hauv paus ntsiab lus thiab muaj ib qib uas pom tseeb ib yam nkaus thiab. Koj tsis tas siv ib lub tswv yim twg los tiv thaiv koj lub koob lub npe, tus yam ntxwv, thiab lub meej mom, thiab koj tsis tas npog los sis xav zais koj tej kev ua yuam kev li. Koj tsis tas mob siab rau tej uas tsis muaj qab hau no li. Yog koj tso tau tej no tseg, ces koj yuav kaj siab heev, koj yuav ua neej nyob tau yam tsis muaj sawv hlau khi los sis tsis muaj kev mob siab, thiab koj yuav ua neej nyob rau hauv txoj kev kaj” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb). Vajtswv tshawb tib neeg lub siab lub ntsws—hais txog kuv tus kheej tiag tiag, kuv txoj kev qias neeg thiab txoj kev qias vuab tsuab, kuv tej kev npaj siab thiab tej kev tsis dawb huv ntawd, Vajtswv yeej paub txog txhua kis ntawm tej no huv si. Txawm kuv yuav zais kuv tus kheej thiab npog npaum li cas los xij, kuv tus moj yam qias vuab tsuab yeej tseem nyob li qub, kuv tus yeeb yam yeej tsis hloov pauv li, thiab kuv yeej tseem tsis to taub qhov tseeb los sis muaj qhov muaj tiag ntawm qhov tseeb li. Tseeb tiag, tsis yog Vajtswv pom kuv txoj kev ua txhua yam los zais xwb, txhua tus viv ncaus los sis txhua tus nus uas to taub qhov tseeb kuj pom tshab plaws kuv txoj kev ua txuj thiab. Kuv lub zog uas los zais kuv tus kheej kom zoo li ib tug neeg uas zoo tiav log ntawd yog ib tug qauv ntawm txoj kev nkag siab yuam kev txog yus tus kheej thiab kev dag ntxias yus tus kheej ntag. Los txog ntua thaum ntawd kuv thiaj li mam ras dheev hais tias qhov npog thiab zais yus tus kheej txhawm rau lub meej mom thiab lub hwj chim ntawd yog ib txoj kev caum uas tsis muaj qab hau dab tsi li, thiab kuv yim npog kuv tus kheej, ces yim pom kuv tseeb xwb. Qhov no yog ib txoj kev ua neej uas ruam heev. Thaum tau paub txog tej no lawm, kuv thiaj li lees txais Vajtswv txoj kev tshawb xyuas kom meej yam meej pem hlo, thiab thaum kuv mloog zoo li kuv tsom kwm kuv lub meej mom thiab lub hwj chim lawm, kuv kub siab qhib siab lug qhia thiab xyaum ua raws qhov tseeb.
Hnub ua ntej uas kuv tawm ntawm pawg ntseeg ntawd, kuv xav nug Viv Ncaus Vaj seb nws puas tseem muaj teeb meem los sis tej kev nyuaj dab tsi los tham, tiam sis kuv kuj txhawj tias yog kuv pab daws tsis tau nws tej teeb meem, ces kuv yuav ua rau kuv tus kheej zoo li ib tug neeg ruam rau ntawm nws lub xub ntiag xwb. Kuv thiaj li xav rau kuv tus kheej hais tias, “Tag kis kuv twb yuav ncaim ntawm no mus lawm; kuv mam li xyaum ua raws qhov tseeb rau lwm zaus.” Kiag thaum ntawd xwb, kuv txawm nco tau ib zaj lus ntawm Vajtswv cov lus uas hais tias: “Thaum muaj qee yam kev nyuaj uas tshwj xeeb los raug rau koj los sis koj ntsib qee qhov xwm txheej kiag lawm, yog koj tus cwj pwm pheej zam tej ntawd los sis khiav tawm ntawm tej ntawd xwb es txhob txwm tsis kam txais yuav tej ntawd thiab muab tej ntawd tshem tawm mus—yog koj tsis xav muab koj tus kheej tso rau ntawm txoj kev hlub tshua ntawm Vajtswv tej kev coj kev qhia thiab tej kev npaj, thiab tsis xav cia qhov tseeb saib xyuas koj—yog koj pheej xav ua tus txiav txim siab thiab tswj txhua yam txog koj tus kheej raws li koj tus moj yam phem xwb, ces lub txim yuav yog qhov hais tias, tsis ntev, Vajtswv yeej yuav muab koj tso tseg los sis xa koj mus cuag Ntxwgnyoog xwb. Yog tib neeg to taub qhov no, lawv yuav tsum ceev nrooj tig rov qab los taug lawv txoj kev hauv lub neej raws li txoj kev yog uas Vajtswv cheem tsum ntawd. Txoj kev no thiaj li yog txoj yog, thiab thaum txoj kev no yog txoj yog lawm, ces qhov ntawd txhais hais tias yog txoj xub ke uas yog lawm” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Ntu Peb). Vajtswv cov lus pab kuv paub hais tias, tab txawm qhov nug kuv tus viv ncaus seb nws puas muaj teeb meem los sis tej kev nyuaj ntawd zoo li tsis tseem ceeb los xij, qhov ntawd yeej tseem yog ib lub hwv tsam los tso kuv txoj kev ntshaw lub meej mom thiab lub hwj chim tseg es los xyaum ua raws qhov tseeb. Yog kuv pheej tseem zais kuv tus kheej thiab muab lub hwj chim cuav coj los ntxias dag lwm tus thiab tsom kwm kuv lub meej mom thiab lub hwj chim ntawd txuas ntxiv xwb, ces kuv yeej yuav tsis muaj peev xwm tso tau kuv tus kheej kom dim ntawm txoj saw hlau thiab tej kev txwv ntawm kuv tus moj yam qias vuab tsuab li. Kuv tsis tuaj yeem swb rau kuv tej kev ntshaw ntxiv lawm—kuv yuav tsum tau xyaum ua raws qhov tseeb thiab ua ib lub neej kom zoo kom Ntxwgnyoog txaj muag. Yog li ntawd, ua ntej kuv ncaim mus, kuv thiaj li nug kuv tus viv ncaus seb nws puas muaj teeb meem los sis tej kev nyuaj dab tsi. Thaum kuv mloog zoo li kuv muaj ib txoj kev to taub txog nws qhov xwm txheej ces kuv cia li qhia, thiab thaum kuv tsis muaj ib lo lus teb kuv hais tias, “Kuv tsis paub xyov yuav daws qhov teeb meem no li cas, cia wb nrhiav lo lus teb ua ke.” Tom qab xyaum ua li no lawm, kuv hnov muaj kev thaj yeeb thiab kaj siab heev, thiab kuv paub hais tias qhov no yog Vajtswv txoj koob hmoov.
Yog kuv tsis tau mus rau ntawm pawg ntseeg ntawd mus ua kuv tej dej num kom tiav, kom raug muab qhia tshwm los ntawm qhov xwm txheej uas muaj tiag no, ces ntshe kuv yeej yuav tsis paub tias kuv muaj ib txoj kev ntshaw lub meej mom zoo li no, thiab tias qhov kev tsom kwm yus lub meej mom thiab lub hwj chim ntawd yog ib txoj kev tawm tsam Vajtswv ntag. Vajtswv txoj kev txiav txim thiab txoj kev qhia tshwm txog Vajtswv cov lus ntawd pab kuv dim ntawm txoj saw hlau ntawm lub meej mom thiab lub hwj chim thiab tso txoj kev zais kuv tus kheej tseg lawm. Ua tsaug rau Vajtswv Tus Uas Muaj Hwj Chim Loj Kawg Nkaus uas tau cawm kuv dim lawm!
