9. Txais Tsis Tau Qhov Tseeb nyob rau hauv Txoj Kev Lis Kev Cai Ntseeg

Tam li ib tug me nyuam kuv ua raws li kuv niam kuv txiv txog txoj kev ntseeg tus Tswv, thiab kuv kub siab lug caum kuv txoj kev ntseeg. Kuv rau siab ntso koom txhua yam dej num hauv pawg ntseeg heev, txawm tej ntawd yuav yog dab tsi los xij. Kuv muab ib feem kaum ntawm kuv cov nyiaj uas khwv tau los ntawd tso rau Vajtswv, thiab kuv koom pawg ntseeg tes hauj lwm tas li. Vim kuv txoj kev kub siab caum ntawd, kuv thiaj li dhau los ua pawg ntseeg ib tug tub leg num lawm, ces thaum muaj 30 xyoo lawm, kuv txawm dhau los ua pawg ntseeg ib tug txwj laug lawm. Tiam sis tab txawm tom qab ntseeg los tau ntau lub xyoo lawm los, yeej muaj qee yam uas pheej meem txom kuv. Kuv pom Tswv Yexus cov lus uas hais tias, “Tsis yog txhua tus uas hais rau Kuv tias, tus Tswv, tus Tswv, es yuav nkag tau mus rau hauv lub teb chaws saum ntuj ceeb tsheej; tab tsis nws uas ua raws li Kuv Leej Txiv uas nyob saum ntuj ceeb sheej lub siab nyiam. Coob leej yuav hais rau Kuv rau hnub ntawd tias, tus Tswv, tus Tswv, peb tsis tau tuav Koj lub npe tshaj tawm los, thiab tuav Koj lub npe ntiab dab tawm los, thiab tuav Koj lub npe ua ntau yam hauj lwm phim hwj los? Thiab thaum ntawd Kuv yuav hais meej rau lawv tias, Kuv yeej tsis paub nej li: cia li khiav ntawm Kuv mus, nej cov uas ua hauj lwm lim hiam” (Mathai 7:21–23). Qhov no ua rau kuv paub tsis meej li. Peb tsis yog cov tib neeg uas tshaj tawm thiab ua hauj lwm rau tus Tswv lub npe, thiab cov uas hu hais tias “tus Tswv, tus Tswv” lod? Vim li cas tus Tswv thiaj li hais tias Nws tsis paub cov tib neeg zoo li no, thiab hais tias cov tib neeg zoo li no yog cov neeg ua phem? Nws lub siab nyiam tsis yog kom peb ua hauj lwm rau Nws li no lod? Yog li ces tus Tswv lub siab nyiam yog dab tsi? Kuv yeej nrhiav tsis tau ib lo lus teb li.

Thaum lub Peb Hlis xyoo 2020 ntawd, muaj ib hnub, txawm muaj ib tug viv ncaus tau caw kuv mus mloog ib zaj lus qhuab qhia nyob os lai. Kuv xav hais tias, “Nyob rau lub sij hawm muaj kab mob sib kis thoob ntiaj teb no, peb mus koom tsis tau pawg ntseeg, yog li ntawd qhov no yog ib qho zoo.” Kuv zoo siab hlo pom zoo ua li ntawd. Nyob rau ntawm qhov kev sib txoos ua ke nyob os lai ntawd, Viv Ncaus Vejvej qhia txog lub ntsiab lus ntawm cov nkauj xwb ntse thiab cov nkauj xwb ruam, Khetos yog dab tsi, seb lub nceeg vaj saum ntuj ceeb tsheej yog nyob rau saum ntuj ceeb tsheej los sis hauv ntiaj teb, thiab lwm yam. Kuv xav hais tias nws hais txog tej no tau zoo heev li. Tej no puav leej yog tej teeb meem uas kuv qhia tsis tau kom meej meej nyob rau hauv kuv tej lus qhuab qhia, yog li ntawd nws tej lus qhia mas raug kuv siab heev. Nws kuj hais tias, “Peb cov ntseeg tus Tswv puav leej cia siab tias yuav tau nkag mus rau hauv lub nceeg vaj saum ntuj ceeb tsheej, tiam sis hom tib neeg twg thiaj li tau nkag mus rau hauv lub nceeg vaj saum ntuj ceeb tsheej?” Ces nws txawm nyeem cov nqe Vajluskub no, “Tsis yog txhua tus uas hais rau Kuv tias, tus Tswv, tus Tswv, es yuav nkag tau mus rau hauv lub teb chaws saum ntuj ceeb tsheej; tab tsis nws uas ua raws li Kuv Leej Txiv uas nyob saum ntuj ceeb sheej lub siab nyiam. Coob leej yuav hais rau Kuv rau hnub ntawd tias, tus Tswv, tus Tswv, peb tsis tau tuav Koj lub npe tshaj tawm los, thiab tuav Koj lub npe ntiab dab tawm los, thiab tuav Koj lub npe ua ntau yam hauj lwm phim hwj los? Thiab thaum ntawd Kuv yuav hais meej rau lawv tias, Kuv yeej tsis paub nej li: cia li khiav ntawm Kuv mus, nej cov uas ua hauj lwm lim hiam” (Mathai 7:21–23). Nws hais tias, “Tus Tswv hais tias tsis yog txhua tus ntseeg yuav nkag tau mus rau hauv lub nceeg vaj saum ntuj ceeb tsheej. Tsuas yog cov uas ua raws li Vajtswv lub siab nyiam xwb thiaj li nkag tau. Yog li ntawd qhov ua raws li Vajtswv lub siab nyiam ntawd yog txhais li cas? Ntau tus tib neeg xav hais tias tsuav lawv ua hauj lwm kom ntau ntxiv, nyeem Vajluskub, thov Vajtswv, thiab ua ntau yam num zoo xwb, ces yog lawv ua raws li Vajtswv lub siab nyiam lawm, thiab thaum tus Tswv rov qab los, lawv yuav nkag mus rau hauv lub nceeg vaj. Qhov kev xav no puas yog? Nws puas mus raws li Vajtswv lub siab nyiam? Cov Falixais uas coj txoj kev ntseeg Yudais muaj ntau tus cwj pwm zoo, tiam sis thaum Tswv Yexus los thiab nthuav ntau qhov tseeb tawm, lawv cia li tsis paub tus Tswv, lawv tawm tsam thiab teem txim rau Nws yam tsis tsum li, lawv haj tseem muab Tswv Yexus ntsia rau saum tus ntoo khaub lig thiab, thiab thaum kawg dhau los ua cov neeg ua phem lawm. Vim li no, peb pom tau hais tias qhov ua raws li Leej Txiv lub siab nyiam ntawd tsis yog lam, raws li peb xav hauv nruab siab, tshaj tawm txoj moo zoo, nyeem Vajluskub, thov Vajtswv, thiab ua tej num zoo xwb. Qhov no tsuas yog ib kis ntawm qhov ib tug Ntseeg Vajtswv yuav tsum tau ua xwb. Yog li ntawd qhov ua li Leej Txiv lub siab nyiam ntawd yog txhais li cas kiag? Vajluskub hais tias, ‘Yog li ntawd nej yuav tsum dawb huv, vim Kuv dawb huv’ (Levi Tej Kevcai 11:45). ‘Yog tsis muaj kev dawb huv ces tsis muaj tib neeg yuav pom tus Tswv li’ (Henplais 12:14). Vim li no, peb pom tau hais tias Vajtswv qhov kev cheem tsum yog kom tib neeg ua tau txoj kev dawb huv thiab dim ntawm txoj kev txhaum, uas txhais tau hais tias muaj peev xwm ua raws li Vajtswv hais, mloog Nws cov lus, tsis txhob ua txhaum ntxiv, tawm tsam Vajtswv, thiab ntxeev siab rau Vajtswv ntxiv lawm, thiab tab txawm yog thaum Vajtswv tes hauj lwm cov nyom rau noob neej tej kev xav phem los xij, yuav tsum muaj peev xwm ua raws li ntawd thiab lees txais qhov ntawd. Tsuas yog li no xwb thiaj li yog tus tib neeg ua raws li Vajtswv lub siab nyiam, thiab yog tus uas yuav nyob rau hauv Vajtswv lub nceeg vaj. Txawm peb ntseeg tus Tswv, thiab peb tso txhua yam tseg thiab siv txhua yam rau tus Tswv los xij, peb pheej dag thiab ua txhaum, pheej muaj kev khib thiab kev sib cav sib ceg rau ntawm cov neeg ua hauj lwm ua ke, thiab thaum peb ntsib tej kev puas tsuaj thiab kev mob nkeeg, peb yeej tseem yws Vajtswv, txiav txim rau Vajtswv, thiab haj tseem ntxeev siab rau Vajtswv thiab. Qhov no puas yog ua raws li Vajtswv lub siab nyiam tiag tiag?” Tom qab nws qhia tag lawm, kuv ras dheev hais tias: Qhov ua raws li Vajtswv lub siab nyiam ntawd tsis yog nyob rau ntawm qhov seb peb khwv npaum li cas nyob rau sab nraud, nws yog nyob rau ntawm qhov seb peb puas mloog Vajtswv cov lus, puas ua raws li Vajtswv hais, thiab puas tso txoj kev ua txhaum thiab tawm tsam Vajtswv tseg xwb. Tiam sis peb yeej tseem pheej ua txhaum, peb muaj ib tug yam ntxwv uas ua txhaum rau yav nruab hnub ces lees txim rau yav hmo ntuj, peb tseem tsis tau khiav dim txoj kev txhaum, peb ua tsis tau raws li Vajtswv txoj lus, thiab thaum muaj qee yam uas tsis txaus siab tshwm sim, peb chim siab thiab yws txog tus Tswv. Peb yuav ua li cas hais tau hais tias peb ua raws li Vajtswv lub siab nyiam?

Tom qab ntawd, nyob rau txhua lub rooj sib txoos ua ke, Viv Ncaus Vejvej qhia qee cov lus rau kuv. Kuv xav hais tias cov lus no mas zoo, tshiab, thiab ntse heev. Ces kuv txawm pib maj mam nyiam tej rooj sib txoos ua ke zoo li no lawm, thiab kuv pheej tos ntsoov rau zaum tom ntej xwb. Thaum no yog lub sij hawm uas kuv tshawb pom hais tias tej lus qhuab qhia uas kuv twb qhia ib zaug lawm, nrog rau ntau tus xib fwb tej lus qhuab qhia, tsuas yog tej lus ntawm kev qhuab qhia uas peb siv mus txhawb tib neeg lub zog xwb. Hais tseeb tseeb hais tias, peb tsis muaj kev to taub txog Vajtswv thiab qhov tseeb kiag li. Tiam sis thaum kuv ntsib cov nus thiab cov viv ncaus nyob os lai thiab mloog lawv tej lus qhia mas, ua rau kuv mloog zoo li hais tias kuv raug pab, thiab kuv hnov muaj kev ywj pheej thiab dim lawm. Kuv tuaj yeem nug tau yog kuv tsis to taub Vajluskub los sis yog kuv tsis paub txhua yam, ces kuv txawm pheej nrhiav tau cov lus teb nyob rau tod. Kuv yeej tsis tau txais ntau yam nyob rau ntawm kuv pawg ntseeg tej kev sib txoos ua ke li.

Thaum tab tom sib txoos ua ke, Viv Ncaus Vejvej txawm xa ib zaj lus tuaj rau kuv nyeem. “Muaj ib zaug Kuv twb raug hu ua Yehauvas lawm. Kuv kuj raug hu ua tus Mexiyas, thiab tib neeg kuj hu Kuv ib zaug ua Yexus uas yog tus Cawm Seej nrog rau txoj kev hlub thiab kev hwm lawm. Hnub no, txawm li cas los xij, Kuv tsis yog tus Yehauvas los sis Yexus uas tib neeg paub rau yav tag dhau los lawm; Kuv yog tus Vajtswv uas tau rov los rau tiam kawg, tus Vajtswv uas yuav coj tiam no mus rau qhov chaw xaus. Kuv yog tus Vajtswv Tus Kheej kiag uas sawv los ntawm qhov kawg ntawm lub ntiaj teb los, muaj txhij tag nrho Kuv tus moj yam, thiab muaj lub hwj chim, meej mom thiab yeeb koob puv npo. Tib neeg yeej tsis tau nrog Kuv sib txuas ncauj txuas lus li, tsis tau paub Kuv dua li, thiab yeej ib txwm tsis paub txog Kuv tus moj yam. Txij puag thaum tsim lub ntiaj teb los txog ntua niaj hnub no, tsis tau muaj ib tug neeg tau pom Kuv li. Ntawm no yog tus Vajtswv uas tshwm sim rau tib neeg pom nyob rau tiam kawg tab sis nkaum nyob rau hauv cov tib neeg. Nws nyob nrog tib neeg, tseeb thiab tiag, zoo li lub hnub uas kub lug thiab tus nplaim taws cig liab vog, muaj hwj chim txaus nkaus thiab muaj hwj chim puv npo. Tsis muaj ib tug neeg twg los sis ib yam dab tsi uas yuav tsis raug Kuv tej lus txiav txim rau li, thiab tsis muaj ib tug neeg twg los sis ib yam dab tsi uas yuav tsis raug lim kom dawb huv los ntawm qhov kev kub hnyiab ntawm hluav taws li. Thaum kawg, txhua haiv neeg yuav tau txais koob hmoov vim Kuv tej lus, thiab kuj yuav raug tsoo ua tej daim mos mos vim yog Kuv tej lus. Nyob rau hauv txoj kev no, tag nrho cov tib neeg nyob rau tiam kawg yuav pom hais tias Kuv yog tus Cawm Seej uas tau rov qab los lawm, thiab hais tias Kuv yog Vajtswv Tus Uas Muaj Hwj Chim Loj Kawg Nkaus uas txeeb tau tag nrho noob neej. Thiab tag nrho sawv daws yuav pom hais tias Kuv yeej yog qhov khoom fij rau kev txhaum rau tib neeg ib zaug dhau los lawm, tab sis nyob rau tiam kawg Kuv kuj yuav rais mus ua cov nplaim taws ntawm lub hnub thiab kub tag nrho txhua yam, nrog rau lub Hnub ntawm txoj kev ncaj ncees uas nthuav tawm tag nrho txhua yam. Qhov no yog Kuv tes hauj lwm nyob rau tiam kawg. Kuv siv lub npe no thiab muaj tus moj yam no ces kom tag nrho tib neeg thiaj li pom hais tias Kuv yog ib tug Vajtswv uas ncaj ncees, lub hnub uas kub lug, tus nplaim taws uas cig liab vog, thiab kom tag nrho sawv daws thiaj li tau pe hawm Kuv, tib tug Vajtswv tseeb, thiab kom lawv thiaj li pom Kuv lub ntsej muag tseeb: Kuv tsis yog tus Vajtswv rau cov neeg Yixayee xwb, thiab Kuv tsis yog tus Txhiv Dim nkaus xwb, Kuv yog tus Vajtswv rau tag nrho tej uas raug tsim tawm los thoob plaws saum ntuj thiab ntiaj teb thiab hiav txwv” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Tus Cawm Seej Twb Rov Qab Los Saum ib tauv “Huab Dawb” Lawm). Tom qab kuv nyeem zaj lus no tag lawm, Viv Ncaus Vejvej txawm nug kuv hais tias, “Koj xav hais tias leej twg hais zaj lus no?” Kuv txawm nyeem ceev ceev rau kuv tus kheej dua. Kuv mloog zoo li cov lus no muaj cai thiab muaj hwj chim, thiab los ntawm cov lus uas hais tias “Kuv yog Vajtswv Tus Uas Muaj Hwj Chim Loj Kawg Nkaus uas txeeb tau tag nrho noob neej,” kuv hnov Vajtswv lub hwj chim. Kuv paub tseeb hais tias Vajtswv tau hais cov lus no lawm ntag, vim tsis muaj noob neej hais tau tej yam zoo li no li. Tsis muaj ib tug neeg muaj koob nrov npe, ib tug neeg zoo, los sis ib tug thawj coj ntawm sab kev lis kev cai ntseeg hais tau cov lus zoo li no li. Kuv hais rau Viv Ncaus Vejvej hais tias, “Qhov no yeej yog Vajtswv hais tiag tiag, vim tsuas yog Vajtswv Tus Kheej xwb thiaj li paub qhov Vajtswv yuav ua, thiab tsis muaj ib tug neeg twg yuav muaj cuab kav hais tias, ‘Muaj ib zaug Kuv twb raug hu ua Yehauvas lawm. Kuv kuj raug hu ua tus Mexiyas, thiab tib neeg kuj hu Kuv ib zaug ua Yexus uas yog tus Cawm Seej nrog rau txoj kev hlub thiab kev hwm lawm.’” Tom qab nws hnov kuv lo lus teb lawm, nws thiaj li hais yam zoo siab heev hais tias, “Amees! Qhov no yog Vajtswv lub suab ntag! Cov uas zeem tau Vajtswv cov lus Vajtswv twb foom koob hmoov rau lawm.” Kuv yeej tsis tau nyeem cov lus no nyob rau hauv phau Vajluskub li, yog li ntawd kuv thiaj li xav paub xav pom tias cov lus no los qhov twg los. Thaum no yog thaum nws qhia rau kuv hais tias Tswv Yexus twb rov qab los ua Vajtswv Tus Uas Muaj Hwj Chim Loj Kawg Nkaus, los ua tus Cawm Seej lawm. Vajtswv Tus Uas Muaj Hwj Chim Loj Kawg Nkaus twb nthuav thooj ntawv thiab muab xya lub cim ntawd tev lawm, cov lus no yog los ntawm thooj ntawv ntawd los, thiab cov lus no yog qhov tseeb uas Vajtswv twb muab nthuav tawm nyob rau tiam kawg lawm. Kuv zoo siab heev thaum kuv hnov qhov no, thiab xav hais tias, “Thooj ntawv ntawd twb muab nthuav lawm lod? Ces kuv yuav tsum tau maj nrawm nroos mus muab Vajtswv txoj lus nyeem!” Ces, nws txawm qhia txuas ntxiv hais tias, “Tswv Yexus rov qab los nyob rau tiam kawg. Nws tshwm los thiab ua hauj lwm uas muaj lub npe hu ua ‘Vajtswv Tus Uas Muaj Hwj Chim Loj Kawg Nkaus.’ Nws tau nthuav tawm ntau qhov tseeb lawm, thiab ua tes dej num ntawm kev txiav txim uas pib ntawm Vajtswv lub tsev mus, uas yog tes dej num uas ua tib zoo yaug tib neeg kom dawb huv thiab cawm tib neeg. Tsuas yog peb lees txais txoj kev txiav txim nyob rau hauv Vajtswv txoj lus xwb mas peb thiaj li yuav tso tau txoj kev txhaum thiab txoj kev qias vuab tsuab tseg thiab raug ntxuav kom dawb huv, raug cawm dim, thiab tau nkag mus rau hauv lub nceeg vaj saum ntuj ceeb tsheej. Vajtswv lub npe tshiab nyob rau tiam kawg, uas hu ua Vajtswv Tus Uas Muaj Hwj Chim Loj Kawg Nkaus, muaj tiav raws li lo lus faj lem uas nyob rau hauv phau Qhia Tshwm uas hais tias, ‘Kuv yog Alafas thiab Aumenkas, … uas yog, thiab uas yog dhau los lawm, thiab uas tseem yuav los rau yav tom ntej, tus Muaj Hwj Chim Loj Kawg Nkaus’ (Qhia Tshwm 1:8). ‘Haleluyas: vim tus Tswv uas yog Vajtswv Tus Uas Muaj Hwj Chim Loj Kawg Nkaus tswj kav’ (Qhia Tshwm 19:6). Yehauvas, Yexus, thiab Vajtswv Tus Uas Muaj Hwj Chim Loj Kawg Nkaus yog Vajtswv cov npe. Txawm Vajtswv muaj ntau lub npe sib txawv nyob rau ib tiam twg los xij, Nws yog tib tug Vajtswv thiab tib tug Ntsujplig xwb.” Tsuas yog tom qab hnov nws qhia tag lawm xwb kuv thiaj li ras dheev hais tias Vajtswv lub npe tshiab nyob rau tiam kawg ntawd twb tau muab hais ua lus faj lem nyob rau hauv phau Qhia Tshwm ua ntej ntev los lawm, tiam sis kuv twb tsis paub li. Kuv tsuas paub hais tias Vajtswv yeej ib txwm yog tus uas muaj hwj chim loj kawg nkaus xwb. Kuv yeej tsis paub hais tias “Vajtswv Tus Uas Muaj Hwj Chim Loj Kawg Nkaus” yog lub npe Vajtswv siv thaum Nws rov qab los nyob rau tiam kawg li. Kuv zoo siab heev thiab txaus siab heev. Qhov ntawd tshwm sim los hais tias Vajtswv twb rov qab los lawm, thiab Nws yog Vajtswv Tus Uas Muaj Hwj Chim Loj Kawg Nkaus ntag! Nws kuj qhia rau kuv hais tias, “Vajtswv Tus Uas Muaj Hwj Chim Loj Kawg Nkaus twb tshwm los thiab pib ua hauj lwm nyob rau xyoo 1991, twb tau peb caug xyoo dhau los lawm. Vajtswv Tus Uas Muaj Hwj Chim Loj Kawg Nkaus nthuav tawm ntau qhov tseeb thiab ntau plhom lo lus, tag nrho puav leej tau muab tso rau hauv is taws nev lawm. Tam sim no Nws cov lus twb nthuav ntawm Sab Hnub Tuaj mus rau Sab Hnub Poob, mus rau ntau lub teb chaws hauv ntiaj teb no lawm. Tib neeg hnov txog Vajtswv lub siab thiab lees txais Vajtswv Tus Uas Muaj Hwj Chim Loj Kawg Nkaus tes hauj lwm nyob rau tiam kawg coob zuj zus tuaj ntxiv. Qhov no muaj tiav kiag raws li Tswv Yexus lo lus faj lemuas hais tias, ‘Vim ib yam li xob laim tim sab hnub tuaj tuaj, thiab ci mus txog ntua rau sab hnub poob; yog li thaum Neeg Leej Tub los kuj yuav zoo ib yam nkaus li’ (Mathai 24:27).” Thaum kuv hnov qhov no, kuv ceeb tag li. Qhov ntawd tshwm sim los hais tias Qhov Xob Laim Sab Hnub Tuaj ntawd yog qhov kev tshwm sim ntawm Vajtswv tes hauj lwm ntag. Ob peb xyoo dhau los ntawd, kuv nyeem nyob rau hauv ntawv xov xwm hais tias Qhov Xob Laim Sab Hnub Tuaj ntawd ua tim khawv txog qhov tus Tswv rov qab los. Tiam sis nyob rau lub sij hawm ntawd, kuv pom hais tias cov xib fwb thiab cov txwj laug feem coob teem txim rau Qhov Xob Laim Sab Hnub Tuaj ntawd, thiab tsis cia cov ntseeg mloog lawv tej lus tshaj tawm li, yog li ntawd kuv thiaj li xav hais tias qhov no tsis yog txoj kev tseeb, ces kuv thiaj li tsis nrhiav thiab tsis tshuaj xyuas lawm, thiab kuv yeej tsis nyeem Vajtswv Tus Uas Muaj Hwj Chim Loj Kawg Nkaus txoj lus li. Kuv yeej tsis xav hais tias Vajtswv Tus Uas Muaj Hwj Chim Loj Kawg Nkaus yog tus Tswv Yexus uas twb rov qab los, thiab twb tau tshwm los ua hauj lwm tau peb caug xyoo lawm. Kuv ntshai me ntsis, thiab mloog zoo li kuv poob qab deb dhau lawm, yog li ntawd kuv thiaj li xav nyeem Vajtswv txoj lus kom ntau ntxiv. Ib lub caij tom qab ntawd, los ntawm tej kev sib txoos ua ke thiab kev kawm txog Vajtswv txoj lus nrog kuv tus viv ncaus, kuv thiaj li to taub ntxiv txog qhov hais tias vim li cas Vajtswv thiaj li tau los yug ua neeg los ua hauj lwm nyob rau tiam kawg, qhov Vajtswv siv Nws cov lus los ua tes dej num ntawm kev txiav txim li cas, qhov peb yuav tsum raug txoj kev txiav txim kom thiaj li raug yaug kom dawb huv thiab nkag mus rau hauv lub nceeg vaj saum ntuj ceeb tsheej li cas, thiab lwm yam ntxiv. Vajtswv Tus Uas Muaj Hwj Chim Loj Kawg Nkaus tau nthuav tag nrho tej lus zais tob no tawm huv si lawm, thiab nthuav tawm ntau qhov tseeb heev, uas muaj tiav raws li Tswv Yexus lo lus faj lem uas hais tias, “Thaum Nws, tus Ntsujplig ntawm qhov tseeb, los, Nws yuav coj nej mus rau qhov tseeb” (Yauhas 16:13). Kuv haj yam paub tseeb hais tias Vajtswv Tus Uas Muaj Hwj Chim Loj Kawg Nkaus yog qhov Tswv Yexus rov qab los zaum ob lawm. Tom qab ntawd, nws xa ib phau ntawv uas hais txog Vajtswv cov lus tuaj rau kuv. Kuv nyeem Vajtswv txoj lus txhua hnub, thiab kuv nrhiav tau txoj kev pab rau sab ntsujplig lawm.

Tom qab ntawd, kuv mus koom yuav luag txhua lub rooj sib txoos ua ke li kuv mus tau. Tiam sis vim kuv tseem koom ua tej dej num nyob rau hauv kuv pawg ntseeg thiab, ces cov sij hawm mus koom rooj sib txoos ua ke ntawd thiaj li pheej sib cov nyom. Kuv xav hais tias, “Puas tsim nyog kuv tawm ntawm kuv pawg ntseeg mus?” Tiam sis kuv twb ua ib tug txwj laug los tau kaum yim xyoo lawm. Ib zaug twg yog plaub xyoos, thiab zaum uas kuv tab tom ua no tseem tshuav li ib xyoos thiab thiaj li mam tag. Kuv cov nus thiab cov viv ncaus yuav xav li cas rau kuv yog kuv tawm ntawm pawg ntseeg mus thaum kuv tseem ua txwj laug txog nrab zoo li no? Lawv puas yuav xav hais tias kuv nyob nyob ces cia li tawm mus lawm xwb thiab tsis muaj kev ua siab ncaj ncees rau tus Tswv li? Tiam sis tom qab ntawd kuv ho xav hais tias, tus Tswv twb rov qab los lawm, yog li ntawd puas tsim nyog kuv nyob twj ywm rau hauv txoj kev lis kev cai ntseeg? Kuv paub zoo heev hais tias qhov cov xib fwb hais nyob rau saum sam thiaj ntawd pab tsis tau cov ntseeg mus ntxiv lawm. Lawv tham txog Tswv Yexus tej cim thiab tej txuj cim phim hwj tag los tham dua, thiab lawv pheej sib tham txog txoj kev ua ib yam li tus Tswv, uas yog hlub koj cov kwv tij zej zog ib yam li koj hlub koj tus kheej, kev ua siab ntev, thiab lwm yam. Tau ntau caum xyoo lawm, cov xib fwb tau qhuab qhia cov lus qhuab qhia uas qub qub, dhuav dhuav no. Cov lus ntawd yog cov lus qub qub thiab tsis muaj qab hau, thiab kuv los kuj pab tsis tau kuv cov nus thiab cov viv ncaus li lawm thiab. Kuv paub zoo heev hais tias lub ntiaj teb ntawm sab kev lis kev cai ntseeg twb nyob ntsiag to lawm. Nyob rau lub sij hawm ntawd, kuv muaj ntau yam cov nyom heev, yog li ntawd kuv thiaj li thov Vajtswv hais tias, “Vajtswv, kuv xav tawm ntawm pawg ntseeg mus, tiam sis kuv tseem muaj kev txhawj xeeb, thiab kuv txhawj tsam kuv cov nus thiab cov viv ncaus yuav taug xaiv txog kuv. Vajtswv, tsim nyog kuv ua li cas? Thov coj kuv kev.” Thaum kuv thov Vajtswv, kuv xav txog qhov Vajluskub hais tias, “Saib nawb, tej caij nyoog los lawm, … uas Kuv yuav tso kev tshaib kev nqhis los rau hauv daim av, tsis yog kev tshaib kev nqhis ntawm mov noj, los sis tsis yog nqhis dej, tab sis ntawm qhov hnov Yehauvas tej lus” (Amau 8:11). “Thiab Kuv kuj tau muab cov nag tshem tawm ntawm nej, thaum tseem tshuav kiag peb lub hlis ces mam txog caij sau qoob: thiab Kuv ua rau nws los nag rau ib lub nroog, thiab ua rau nws tsis los nag rau lwm lub nroog: ib qho ces los nag rau, thiab qhov uas tsis los nag rau ces qhuav qhawv xwb” (Amau 4:7). Kuv xav txog teb chaws Yixayee txoj kev tshaib nqhis tau xya xyoo, thaum tsis muaj zaub mov noj li lawm, ces tag nrho Yauxej cov kwv tij mus rau hauv teb chaws Iyiv mus thov yuav zaub mov ntawm nws. Tam sim no tag nrho lub ntiaj teb ntawm sab kev lis kev cai ntseeg muaj kev tshaib nqhis, thiab tsis muaj Vajntsujplig tes hauj lwm, tiam sis yam uas kuv noj thiab haus nyob rau hauv Pawg Ntseeg ntawm Vajtswv Tus Uas Muaj Hwj Chim Loj Kawg Nkaus yog Vajtswv cov lus tam sim no ntag, yam kuv tau txais yog txoj kev kaj tseeb, thiab kuv muaj Vajntsujplig txoj kev coj kev lawm tiag tiag. Yog kuv ceev tsis tau qhov ntawd, ces kuv yuav raug Vajntsujplig tes hauj lwm muab ntiab tawm mus. Tam sim no, kuv twb nrhiav tau pawg ntseeg uas muaj Vajntsujplig tes hauj lwm lawm, kuv twb hnov Vajtswv lub suab, thiab kuv twb txais tos tus Tswv lawm, yog li ntawd kuv tsis tsim nyog nyob rau hauv txoj kev lis kev cai ntseeg uas nyob ntsiag to txuas mus ntxiv lawm. Tom qab ntawd, tsuav pawg ntseeg tsis npaj kom kuv mus ua hauj lwm xwb, ces kuv cia li tsis mus tom pawg ntseeg tod li lawm, tiam sis vim kuv yog ib tug txwj laug, kuv thiaj li mus pe hawm qee zaus.

Muaj ib hnub, tau ib nrab xyoo tom qab ntawd, kuv txawm saib ib zaj yeeb yam ua saum sam thiaj nyob rau hauv is taws nev, Ib Txoj Kev Xaiv Uas Ntse. Zaj yeeb yam ntawd txhawb tau kuv heev li. Tus neeg tseem ceeb hauv zaj yeeb yam ntawd, uas yog Lis Meejtshis, yog ib tug neeg ua hauj lwm nyob rau hauv tsoom fwv lub nroog. Tom qab lees txais Vajtswv Tus Uas Muaj Hwj Chim Loj Kawg Nkaus tes hauj lwm nyob rau tiam kawg lawm, nws to taub qee qhov tseeb lawm. Nws tig xav txog ntau lub xyoo uas nws ua dej num rau Tsoom Fwv Koom Tsham Suav thiab qhov nws nrog lawv ua kev phem li cas ntawd. Nws ras dheev hais tias nws tab tom taug txoj kev mus rau kev puas tsuaj thiab pom tseeb tseeb hais tias tsuas yog raws Khetos qab thiab siv txhua yam rau Vajtswv xwb mas nws thiaj li yuav tau txais qhov tseeb thiab txoj sia. Nws thov Vajtswv hais tias nws txiav txim siab tawm nws txoj hauj lwm thiab muab nws tus kheej fij rau Vajtswv. Tom qab nws poj niam paub lawm, nws poj niam tawm tsam qhov ntawd heev, thiab tom qab ntawd nws tsev neeg txawm ua txhua yam los yuam nws kom tso kev ntseeg Vajtswv tseg. Thaum raug tag nrho nws tsev neeg tawm tsam lawm, nws tsis zam li, nws nrog nws tsev neeg sib cav, ces nyob rau thaum kawg, nws thiaj li txiav txim siab tawm nws txoj hauj lwm lawm tiag tiag thiab xaiv los raws Vajtswv qab lawm. Ces kuv txawm xav txog kuv tus kheej. Yog kuv nyob rau hauv txoj kev lis kev cai ntseeg thiab tsis raws Vajtswv qab kom kawg siab kiag, ces kuv yeej yuav tsis tau txais qhov tseeb li, thiab kuv yuav raug Vajtswv muab ntiab tawm mus. Thiab, los ntawm tej lus qhia txog qhov tseeb ntawd, kuv thiaj li pom qhov tseeb txog lub ntiaj teb ntawd sab kev lig kev cai ntseeg txoj kev tawm tsam Vajtswv tseeb zuj zus tuaj. Kuv paub tias nws yog lub sij hawm rau kuv tawm ntawm txoj kev lis kev cai ntseeg lawm.

Tom qab kuv lees txais Vajtswv Tus Uas Muaj Hwj Chim Loj Kawg Nkaus tes hauj lwm ntawm tiam kawg lawm, kuv nco tau hais tias, ob peb xyoos dhau los, Vajtswv tes hauj lwm ntawm tiam kawg nthuav mus rau Taisvam lawm. Nyob rau lub sij hawm ntawd, Vajtswv Tus Uas Muaj Hwj Chim Loj Kawg Nkaus cov lus raug muab luam tawm rau hauv ntawv xov xwm lawm, tiam sis tag nrho cov kev lis kev cai ntseeg hauv Taisvam koom siab tshaj tawm lawv txoj kev tawm tsam Qhov Xob Laim Sab Hnub Tuaj, muaj ib nqe lus uas ntau tus xib fwb koom tes ko npe rau. Cov xib fwb no paub ntev los lawm hais tias tus Tswv twb rov qab los lawm, tiam sis lawv tsis nrhiav los sis tshuaj xyuas, thiab lawv tsis qhia qhov xov xwm uas hais txog qhov tus Tswv rov qab los ntawd rau lawv cov ntseeg li. Lawv kuj koom siab tawm tsam Vajtswv thiab thaiv txoj kev tshaj tawm txog Vajtswv lub nceeg vaj txoj moo zoo rau hauv Taisvam thiab. Qhov no ua rau kuv nco txog cov pov thawj hlob, cov xib fwb uas qhia Vajtswv txoj kev cai, thiab cov Falixais ob txhiab xyoo dhau los lawm. Lawv pom tseeb tseeb hais tias Tswv Yexus cov lus thiab tes hauj lwm yeej muaj cai thiab muaj hwj chim, tiam sis lawv tsis lees hais tias Tswv Yexus yog tus Mexiyas li vim lawv txhawj tsam tag nrho cov ntseeg yuav raws Tswv Yexus qab lawm, ces lawv yuav poob lawv lub meej mom thiab nyiaj txiag. Vim li ntawd, lawv thiaj li tau txiav txim thiab teem txim tsis yog rau Tswv Yexus lawm. Niaj hnub no los lub ntiaj teb ntawm sab kev lis kev cai ntseeg kuj zoo tib yam nkaus thiab. Cov xib fwb ntshai tias yog txhua tus tib neeg ntseeg Vajtswv Tus Uas Muaj Hwj Chim Loj Kawg Nkaus thiab tsis mus koom pawg ntseeg lawm, ces yuav tsis muaj neeg muab khoom fij, thiab lawv yuav tsis tau nyiaj hli lawm, yog li ntawd yuav kom ceev tau lawv lub meej mom thiab nyiaj txiag mas, lawv yuav tsum koom siab teem txim thiab tawm tsam Vajtswv Tus Uas Muaj Hwj Chim Loj Kawg Nkaus tes hauj lwm nyob rau tiam kawg. Qhov no ua rau kuv nco txog qhov Tswv Yexus hais thaum nws foom tsis zoo rau cov Falixais hais tias, “Muab kev puas tsuaj rau nej, cov kws sau ntawv, cov Falixais, cov neeg ncauj lus zoo siab nkhaus! Vim nej kaw lub nceeg vaj saum ntuj ceeb tsheej rau tib neeg lawm: vim nej tus kheej yuav tsis tau nkag mus, los sis nej yeej txwv cov uas yuav nkag mus rau hauv tib si. … Muab kev puas tsuaj rau nej, cov kws sau ntawv, cov Falixais, cov neeg ncauj lus zoo siab nkhaus! Vim nej ncig lub hiav txwv thiab daim av mus muab ib tug neeg hloov nws txoj kev ntseeg, thiab thaum nws ua tau li ntawd lawm, nej muab nws ua ib tug me nyuam rau ntuj tawg tshaj nej tus kheej lawm ob npaug” (Mathai 23:13–15). Cov xib fwb uas nyob rau hauv txoj kev lis kev cai ntseeg no yeej paub tseeb tseeb hais tias tus Tswv twb rov qab los lawm thiab nthuav tawm ntau qhov tseeb heev lawm, tiam sis lawv tsis tshuaj xyuas xwb, thiab lawv dag thiab txwv lwm tus kom tsis txhob tshuaj xyuas Vajtswv tes hauj lwm tshiab, thiab thaiv cov ntseeg kom tsis txhob txais tos tus Tswv. Cov thawj coj ntawm sab kev lis kev cai ntseeg no mas ntxim ntxub tshaj plaws li! Lawv tsis yog cov tib neeg uas raws tus Tswv qab tiag tiag, lawv yog cov Falixais tiam tshiab no.

Thaum tab tom nyob rau hauv ib lub rooj sib txoos ua ke, kuv nyeem Vajtswv Tus Uas Muaj Hwj Chim Loj Kawg Nkaus cov lus no uas hais tias, “Muaj ib txhia nyeem Vajluskub hauv tej tsev teev hawm uas loj kawg nkaus thiab qog cov lus ntawd tas hnub, tab sis tsis muaj ib tug twg ntawm lawv cov ntawd to taub lub hom phiaj ntawm Vajtswv tes hauj lwm li. Tsis muaj ib tug twg ntawm lawv cov ntawd muaj peev xwm paub txog Vajtswv; tseem muaj tsawg tus ntawm lawv cov ntawd thiaj muaj peev xwm ua raws li Vajtswv lub siab nyiam. Lawv txhua tus tsis tsim nqi dab tsi li, yog neeg phem, txhua tus sawv siab qhuab ntuas Vajtswv. Lawv txaus siab hlo tawm tsam Vajtswv rau thaum lawv tseem kwv rawv Nws tus chij. Hais tias ntseeg Vajtswv, lawv tseem noj noob neej li nqaij thiab haus noob neej li ntshav. Tag nrho cov tib neeg zoo li no yog cov dab phem uas nqos tib neeg tus ntsuj, cov thawj dab uas tav txoj kev ntawm cov uas xav taug mus rau txoj kev yog, thiab dawm thaiv cov uas nrhiav Vajtswv. Tej zaum lawv yuav mas zoo li ‘muaj lub cev zoo khov kho,’ tab sis cov uas caum raws lawv yuav ua cas paub tau tias lawv ces twb yog kiag cov tawm tsam khetos uas coj tib neeg sawv tawm tsam Vajtswv ntag? Cov caum raws lawv yuav ua cas paub tau tias lawv yog cov dab phem ciaj sia uas rau siab ntso nqos tib neeg tej ntsuj?” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Txhua Tus Tib Neeg Uas Tsis Paub Vajtswv Yog Cov Tib Neeg Uas Tawm Tsam Vajtswv). Thaum kuv xav txog Vajtswv txoj lus, kuv txawm ras dheev hais tias cov xib fwb uas nyob rau hauv lub ntiaj teb ntawm sab kev lis kev cai ntseeg ntawd yog xuas cov nyiaj uas cov nus thiab cov viv ncaus coj tuaj fij rau Vajtswv ntawd them xwb, tiam sis lawv tseem txwv tib neeg kom tsis txhob tig los cuag Vajtswv thiab, ua li ntawd thiaj li rhuav tshem tau tib neeg lub hwv tsam uas los txais tos tus Tswv thiab nkag mus rau hauv lub nceeg vaj saum ntuj ceeb tsheej. Lawv tsis yog cov dab phem uas nqos tib neeg cov ntsuj lod? Kuv kuj xav hais tias vim muaj kab mob sib kis thoob ntiaj teb, cov pawg ntseeg thiaj li tau ncua txhua yam dej num lawm. Thaum tab tom nyob rau hauv ib lub rooj sib txoos ua, cov xib fwb sib tham txog qhov muab cov nus thiab cov viv ncaus tej khoom txhiam laj txhiam xws uas nyob sab nraum peb cov chaw ua hauj lwm mus muag ua ib txoj kev rau cov ntseeg khwv kom tau nyiaj ntau tuaj. Ua li ntawd, es kom cov nus thiab cov viv ncaus thiaj li yuav tso tau ib feem kaum txuas ntxiv. Kuv npau taws heev thaum kuv hnov qhov no, thiab kuv tsis pom zoo hlo li. Kuv thiaj li hais tias, “Yog ib co xib fwb lawm, nej yuav tsum mob siab txog tib neeg lub neej txoj sia. Ua li cas es nej tsuas txhawj txog nyiaj txiag nkaus xwb?” Tus thawj tuav ntaub ntawv txawm hais rau kuv hais tias, “Thaum pawg ntseeg ncua tej rooj sib txoos ua ke ntawd lawm, ces tej khoom fij uas tuaj ntawd cov nus thiab cov viv ncaus tuaj ntawd txawm tsawg zuj zus tuaj lawm, uas ua rau cov nyiaj hauv pawg ntseeg tsawg heev lawm.” Kuv pom hais tias cov xib fwb tsuas quav ntsej txog lawv cov nyiaj hli thiab nyiaj txiag nkaus xwb, tsis saib xyuas cov nus thiab cov viv ncaus thiab txhawb lawv txoj kev ntseeg li. Lawv yog cov Falixais uas ntsej muag ncaj siab nkhaus uas Tswv Yexus hais txog ntag. Lawv ntshaw tej khoom fij uas cov nus thiab cov viv ncaus twb muab fij rau Vajtswv lawm ntawd heev. Lawv tsis quav ntsej txog lawv cov ntseeg lub neej txoj sia li, lawv txwv tib neeg kom tsis txhob txais tos tus Tswv, thiab lawv ua txhua yam los tuav lawv cov ntseeg yam khov heev. Kuv pom cov xib fwb ntawd lub ntsej muag tseeb tseeb lawm. Cov xib fwb ntawm sab kev lis kev cai ntseeg no tsuas yog cov tawm tsam Khetos uas tsis lees paub Vajtswv thiab tawm tsam Vajtswv xwb. Tom qab ntseeg tus Tswv los tau ntau lub xyoo lawm, thaum kawg kuv thiaj li mam thoob tsib to nrog txog lawv. Thaum kawg kuv thiaj li tsim dheev los lawm. Kuv ua Vajtswv tsaug rau Nws txoj kev hlub tshua, thiab rau txoj kev muab lub hwv tsam rau kuv tau los hnov Nws lub suab thiab lees txais Nws tes hauj lwm nyob rau tiam kawg. Yog tsis li ntawd, ces ntshe kuv twb nrog cov xib fwb ua kev phem thiab tawm tsam Vajtswv lawm, thiab ntshe kuv yuav plam kuv lub hwv tsam los tau txoj kev cawm dim lawm.

Tom qab ntawd, kuv pom ib daim yeeb yaj duab uas nyeem txog Vajtswv Tus Uas Muaj Hwj Chim Loj Kawg Nkaus txoj lus. “Kiag tam sim no, nej puas to taub tias txoj kev ntseeg fab kab lis kev cai thiab txoj kev ntseeg Vajtswv yog dab tsi tiag tiag? Puas muaj ib qho sib txawv ntawm txoj kev ntseeg fab kab lis kev cai thiab txoj kev ntseeg Vajtswv li? Qhov sib txawv ntawd nyob qhov twg? Nej puas tau xav txog cov lus nug no li? Cov ntseeg fab kab lis kev cai ntawd ib txwm zoo li cas? Lawv mob siab rau dab tsi xwb? Txoj kev ntseeg fab kab lis kev cai ntawd muab txhais tau li cas? Thaum tib neeg ntseeg fab kab lis kev cai, lawv lees paub tias muaj ib tug Vajtswv, thiab lawv hloov pauv qee yam rau lawv tus cwj pwm: Lawv tsis ntaus los sis tsis twv tib neeg, lawv tsis ua tej yam phem uas rhuav tshem tib neeg, thiab lawv tsis ua phem loj los sis ua txhaum txoj kev cai. Nyob rau hnub Xya, lawv mus teev hawm ua ke. Qhov no yog cov uas ntseeg fab kab lis kev cai. Qhov coj tus cwj pwm zoo thiab qhov nquag mus koom kev teev hawm ua ke, ces ua pov thawj qhia tau tias yog ib tug ntseeg fab kab lis kev cai tiag. Thaum ib tug neeg twg ntseeg fab kab lis kev cai lawm, lawv lees paub tias muaj ib tug Vajtswv, thiab lawv xav tias qhov ntseeg Vajtswv ntawd yog qhov yuav tsum ua ib tug neeg zoo; tsuav yog lawv tsis ua txhaum los sis ua tej yam phem xwb, ces tom qab lawv tuag lawv yuav mus rau saum ntuj ceeb tsheej, lawv yuav muaj qhov kawg uas zoo. Lawv txoj kev ntseeg txhawb lawv ntawm sab ntsujplig. Vim li ntawd, txoj kev ntseeg fab kab lis kev cai ntawd kuj muab txhais tau xws li nram qab no thiab: Qhov ntseeg fab kab lis kev cai ntawd mas yog qhov lees paub, nyob rau hauv koj lub siab, tias muaj ib tug Vajtswv, tso siab tias tom qab koj tuag ces koj yuav mus rau saum ntuj ceeb tsheej, qhov ntawd txhais tau tias muaj ib txoj kev xav uas txhawb zog nyob rau hauv koj lub siab, nrog rau qhov hloov pauv qee yam ntawm koj tus cwj pwm—coj zoo, ces tsis muaj dab tsi tshaj qhov no lawm. Hais txog qhov seb puas muaj tus Vajtswv uas lawv ntseeg los sis tsis muaj, seb tus Vajtswv no tab tom ua dab tsi tam sim no, seb tus Vajtswv no hais kom lawv ua dab tsi ntawd—lawv tsis paub li, tag nrho tej uas lawv xam pom thiab xav hauv nruab siab txog qhov no mas yog saib mus raws li cov kev qhuab qhia ntawm phau Vajluskub xwb. Qhov no yog txoj kev ntseeg fab kab lis kev cai. Txoj kev ntseeg fab kab lis kev cai mas yog kev nrhiav kev tseem ceeb uas hloov pauv tus cwj pwm thiab txoj kev txhawb zog ntawm sab ntsujplig. Tab sis txoj kev uas cov tib neeg no taug—txoj kev ntawm kev nrhiav koob hmoov—yeej tsis tau hloov pauv li. Yeej tsis muaj kev hloov kho nyob rau hauv lawv tej kev xav uas yuam kev, tej kev xav phem thiab tej kev xav hauv nruab siab txog txoj kev ntseeg Vajtswv li. Lub hauv paus ntawm qhov muaj lawv, thiab cov hom phiaj ntawm lub neej txoj sia thiab txoj kev uas lawv nrhiav ntawd mas mus raws li tej tswv yim thiab tej kev xam pom ntawm txoj kab lis kev cai qub xwb, ces yeej tsis tau hloov pauv hlo li. Qhov zoo li ntawd yog tus yam ntxwv ntawm txhua tus uas ntseeg fab kab lis kev cai. Yog li ntawd txoj kev ntseeg Vajtswv ho yog dab tsi? Vajtswv lub ntsiab lus ntawm txoj ntseeg Vajtswv yog dab tsi? (Tso siab rau Vajtswv lub hwj chim kav.) Qhov ntawd yog tso siab tias muaj Vajtswv, thiab tso siab rau Vajtswv lub hwj chim kav—tej no yog lub hauv paus tseem ceeb tshaj plaws. Kev ntseeg Vajtswv ces yog mloog Vajtswv cov lus, muaj nyob, muaj txoj sia, ua yus tes dej num, thiab koom tag nrho tej hauj lwm ntawm txoj kev ua neej raws li Vajtswv cov lus hais. Lub ntsiab ces yog qhov hais tias kev ntseeg Vajtswv ces yog raws Vajtswv qab, ua yam uas Vajtswv hais kom ua, ua neej nyob raws li qhov Vajtswv hais; kev ntseeg Vajtswv ces yog ua raws li Vajtswv txoj hau kev. Puas yog cov hom phiaj ntawm lub neej txoj sia thiab txoj xub ke ntawm cov tib neeg uas ntseeg Vajtswv yeej tsis txawv ntawm cov tib neeg uas ntseeg fab kab lis kev cai cov hlo li? Txoj kev ntseeg Vajtswv cuam tshuam rau dab tsi? Tib neeg yuav tsum ua neej kom muaj kev ua neej; lawv yuav tsum mloog Vajtswv cov lus, txawm hais tias Vajtswv yuav hais kom lawv ua dab tsi los xij; thiab lawv yuav tsum xyaum ua raws li Vajtswv cov lus. Txhua yam no puav leej cuam tshuam txog Vajtswv cov lus. … Txoj kev ntseeg Vajtswv mas yuav tsum mus raws li Vajtswv cov lus thiab qhov Vajtswv hais, tib neeg yuav tsum xyaum ua raws li qhov Vajtswv hais; ces tsuas yog qhov no xwb thiaj li yog txoj kev ntseeg Vajtswv tseeb—qhov no thiaj li mus cuag tau lub hauv paus ntawm qhov xwm txheej. Kev xyaum ua raws qhov tseeb, kev ua raws li Vajtswv cov lus, thiab kev ua neej nyob raws li Vajtswv cov lus: qhov no yog txoj kev uas yog ntawm tib neeg lub neej txoj sia; txoj kev ntseeg Vajtswv mas muaj feem ntsig txog rau tib neeg txoj kev taug ntawm lub neej txoj sia. Txoj kev ntseeg Vajtswv mas muaj feem ntsig txog rau ntau qhov tseeb heev, thiab cov raws Vajtswv qab yuav tsum to taub ntau qhov tseeb no; yog lawv tsis to taub thiab tsis lees txais ntau qhov tseeb no ces lawv yuav raws Vajtswv qab tau li cas? Cov tib neeg uas ntseeg fab kab lis kev cai ntawd mas tsuas lees paub tias muaj ib tug Vajtswv xwb—tab sis lawv tsis to taub ntau qhov tseeb no, thiab lawv tsis lees txais tej ntawd li, ces yog li ntawd cov tib neeg uas ntseeg fab kab lis kev cai thiaj li tsis yog cov raws Vajtswv qab” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Yus Yeej Yuav Dim Tsis Tau los ntawm Txoj Kev Ntseeg sab Kev Lis Kev Cai Ntseeg los sis Txoj Kev Koom sab Kev Lis Kev Cai Ntseeg). Vajtswv cov lus mas muaj tseeb heev! Kuv xav txog kuv tus kheej uas nyob rau hauv txoj kev lis kev cai ntseeg, uas tsis muaj Vajntsujplig tes hauj lwm, thiab tsis muaj txoj kev pab cuam ntawm Vajtswv cov lus tam sim no. Kuv tsuas ua raws li tej kev cai thiab tej kab ke ntawm sab kev lis kev cai ntseeg, thiab ua qee yam num zoo nyob rau sab nraud xwb. Thaum kuv pom ib tug nus los sis viv ncaus xav phem, kuv txhawb lawv. Kuv pheej tsa ob txhais tes npuab lawv thiab thov Vajtswv, thiab nquag koom ua hauj lwm heev, ces kuv txawm xav hais tias qhov no mus raws li Vajtswv lub siab nyiam lawm. Tsuas yog tom qab nyeem Vajtswv cov lus lawm xwb kuv thiaj li paub hais tias yog kuv ntseeg txoj kev lis kev cai ntseeg xwb, tsis yog ntseeg Vajtswv. Tej no tsuas yog tej num zoo sab nraud xwb, tsis yog xyaum ua raws li Vajtswv cov lus thiab mloog Vajtswv lus, thiab qhov no yuav tsis hloov pauv kuv tus moj yam li. Peb txoj kev siv zog ua hauj lwm thiab kev ua hauj lwm hnyav tsuas yog peb tus kheej txoj kev xav tau xwb, tsis mus raws li Vajtswv lub siab nyiam li. Kuv kuj nco hais tias kuv pheej txeev qhia kom kuv cov nus thiab cov viv ncaus caum thiab siv zog ua hauj lwm rau tus Tswv. Thaum lawv mus txog saum ntuj ceeb tsheej lawm, lawv yuav tswj tsib los sis kaum lub nroog. Tam sim no, tom qab nyeem Vajtswv txoj lus lawm, kuv mloog zoo li kuv tej lus qhia mas ruam thiab tsis tseeb li. Peb tsis muaj ib tug twg tau raug Vajtswv txoj kev txiav txim nyob rau tiam kawg li, peb tus moj yam qias vuab tsuab tseem tsis tau raug muab ntxuav kom dawb huv, thiab peb tsis tsim nyog nkag mus rau hauv Vajtswv lub nceeg vaj kiag li. Tej num zoo sab nraud mas yeej tsis txaus rau txoj kev ntseeg Vajtswv li. Qhov tseem ceeb ces yog kom paub Vajtswv tes hauj lwm thiab cov lus, hloov pauv tau tus moj yam, mloog lus thiab pe hawm Vajtswv. Qhov no mus raws li Vajtswv lub siab nyiam. Kuv pom hais tias nyob rau yav tas los ntawd mas, kuv txoj kev ntseeg tus Tswv nyob rau hauv txoj kev lis kev cai ntseeg tsuas yog txoj kev ntseeg uas paub tsis meej xwb, thiab tsis yog ib yam uas Vajtswv yuav qhuas li. Yog kuv ntseeg Vajtswv thiab sib sau nyob rau hauv txoj kev lis kev cai ntseeg ua ke txuas ntxiv mus, ces kuv yeej yuav tsis tau txais qhov tseeb hlo li. Tiam sis tom qab ntawd kuv txawm xav hais tias, kuv muaj kuv txoj hauj lwm uas yog ib tug txwj laug lawm, yog li ntawd kuv tseem yuav tsum tau mus koom pawg ntseeg thiab. Yog kuv tawm ntawm pawg ntseeg mus lawm, ces kuv yeej yuav raug muab tso pov tseg thiab ntxub xwb xwb li, thiab lwm tus yuav tsis hwm kuv thiab xav hais tias kuv tsis ncaj ncees rau tus Tswv. Thaum kuv xav txog qhov no, kuv txawm ua xyem xyav lawm. Kuv kuj xav txog qhov qhia rau lawv hais tias kuv twb txais tos tus Tswv thiab lees txais Vajtswv Tus Uas Muaj Hwj Chim Loj Kawg Nkaus lawm, tiam sis kuv paub hais tias lub sij hawm uas kuv hais qhov ntawd, ces ntshe kuv yuav raug xib fwb thiab lwm tus neeg uas ua hauj lwm ua ke tsim txom thiab txwv. Kuv xav mus xav los rau hauv kuv lub siab. Kuv paub hais tias tsis ntev ntawd ces kuv yuav tawm ntawm txoj kev lis kev cai ntseeg ntawd mus lawm, tiam sis kuv tsis paub xyov yuav hais qhov kuv tawm ntawd rau lawv li cas. Kuv pheej thov Vajtswv thiab nrhiav ntawm Vajtswv txog qhov no.

Tom qab ntawd, kuv nyeem ib zaj lus ntawm Vajtswv Tus Uas Muaj Hwj Chim Loj Kawg Nkaus cov lus uas hais tias, “Vajtswv nrhiav cov uas tos ntsoov kom Nws tshwm sim. Nws nrhiav cov uas muaj cuab kav hnov Nws cov lus, cov uas tseem tsis tau nov qab Nws tes hauj lwm thiab muab lawv lub siab thiab lub cev cob fim rau Nws. Nws nrhiav cov uas mloog lus cuag tej me nyuam yaus ntawm Nws lub xub ntiag thiab tsis tawm tsam Nws. Yog koj muab koj tus kheej zwm rau Vajtswv, yam tsis muaj ib qho hwj huaj los sis ib lub zog dab tsi los cuam tshuam tau li, ces Vajtswv yeej yuav saib xyuas koj thiab foom Nws tej koob hmoov rau koj. Yog tias koj yog ib tug muaj meej mom, muaj koob nrov npe, muaj kev txawj ntse, muaj txiag nplua nuj, thiab muaj neeg coob txhawb nqa, tab sis tej yam no tsis txwv txiav koj kom txhob los rau ntawm Vajtswv lub xub ntiag los txais qhov Nws hu thiab Nws cov lus txib thiab los ua yam uas Vajtswv hais kom koj ua, ces txhua yam uas koj ua ntawd yuav yog qhov muaj qab hau tshaj plaws nyob rau hauv lub ntiaj teb thiab qhov dej num ncaj ncees tshaj plaws ntawm tib neeg. Yog koj tsis kam txais yuav Vajtswv tej kev txib kev khaiv vim koj lub meej mom thiab koj tus kheej tej hom phiaj xwb, ces txhua yam koj ua ntawd yuav raug foom phem thiab Vajtswv tsis nyiam kiag li” (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Zaj Txuas Tom Kawg 2: Vajtswv Tswj Fwm Tag Nrho Noob Neej Txoj Hmoo). Vim Vajtswv txoj lus, es kuv thiaj li to taub hais tias kuv ua xyem xyav ntau zaus txog qhov tawm ntawm pawg ntseeg mus lawm vim kuv tso tsis tau kuv txoj hauj lwm ua txwj laug tseg. Vim kuv lub meej mom, es kuv cov nus thiab cov viv ncaus thiaj li cia siab rau kuv thiab hwm kuv. Lawv ua zoo rau kuv, thiab lawv ib txwm xav txog kuv thaum muaj txiaj ntsim. Kuv txhawj hais tias kuv yuav plam tag nrho tej no thaum kuv tawm ntawm pawg ntseeg mus lawm. Kuv xav tau lub meej mom thiab ntshaw tej txiaj ntsim ntawm lub meej mom ntawd. Qhov no tsis yog txoj kev zoo, thiab nws ua rau Vajtswv tsis txaus siab. Kuv paub tseeb tseeb hais tias kuv yuav tsum tau tso kuv tus kheej tawm ntawm lub meej mom txoj saw hlau khi. Yog kuv tsis hloov pauv txhua yam, ces kuv yuav taug txoj kev uas tawm tsam Vajtswv. Qhov no tsis yog qhov kuv xav tau. Kuv txhawj txog qhov kuv cov nus thiab cov viv ncaus muab kuv saib tseem ceeb ntawd tsis tau mus ntxiv lawm. Nws tsis tseem ceeb txawm lwm tus yuav muab kuv saib li cas los xij. Qhov tseem ceeb ces yog qhov seb kuv puas tau txais Vajtswv txoj kev pom zoo xwb. Kuv yuav tsum ua siab ncaj ncees rau Vajtswv, tsis yog rau lub meej mom. Thaum paub li no lawm, kuv txoj kev txiav txim siab tawm ntawm pawg ntseeg mus ntawd thiaj li muaj zog dua tuaj lawm.

Muaj ib hnub, kuv mus koom pawg ntseeg li ib txwm mus, ces tom qab pe hawm tag lawm, kuv qhia rau txhua tus hais tias kuv yuav tawm kuv txoj hauj lwm ua ib tug txwj laug. Txhua tus ceeb tag li thaum lawv hnov qhov no, thiab lawv txhua tus puav leej cheem kom kuv nyob. Tom qab ntawd, qee tus xib fwb hu kuv, hais tias qhov ua ib tug txwj laug ntawd mas yog ib co lus cog tseg nrog Vajtswv uas rhuav tsis tau li. Kuv thiaj li xav hais tias, “Tus Tswv twb rov qab los, nthuav ntau qhov tseeb tawm, thiab ua tiav ib teg hauj lwm tshiab lawm. Kuv tseem yuav tau khaws cov lus cog tseg no es tsis txais tos tus Tswv thiab lod?” Kuv nco txog qhov cov pov thawj hlob, cov xib fwb uas qhia Vajtswv txoj kev cai, thiab cov Falixais ua dej num rau Vajtswv nyob rau hauv lub tuam tsev thawm niaj thawm xyoo, tiam sis thaum Tswv Yexus los ua hauj lwm, lawv teem txim, tawm tsam, thiab muab Tswv Yexus ntsia rau saum tus ntoo khaub lig. Qhov no puas yog kev ua siab ncaj ncees rau Vajtswv? Lawv tsis yog cov tib neeg uas ua siab ncaj ncees rau Vajtswv kiag li. Lawv tawm tsam Vajtswv. Hnub no Tswv Yexus twb rov qab los lawm, thiab nthuav cov lus tshiab tawm lawm. Yog kuv khaws qhov hu ua “cov lus cog tseg” no thiab nyob rau hauv pawg ntseeg, es tsis ua raws li Vajtswv cov lus thiab tes hauj lwm tam sim no, ces yog kuv tsis ua siab ncaj ncees rau Vajtswv! Kuv xav txog qhov Tswv Yexus hais tias, “Kuv cov yaj yeej hnov Kuv lub suab, thiab Kuv paub lawv, thiab lawv caum raws Kuv qab” (Yauhas 10:27). Vajtswv cov yaj yuav tsum mloog Vajtswv cov lus thiab caum Nws qab yam tsis yig li. Yog li ntawd, txawm cov xib fwb yuav yaum kuv li cas los xij, kuv tsis ua ywj fab ywj fwj li. Kuv ua tsaug ntau rau Vajtswv vim txoj kev coj kuv tawm ntawm txoj kev lis kev cai ntseeg ntawd, cia kuv noj thiab haus Vajtswv cov lus uas muaj qab hau, thiab muab Vajntsujplig tes hauj lwm rau kuv, uas ua rau kuv paub txoj kev kaj siab uas tsis tau muaj dua los li. Thaum kuv lub meej mom ua txwj laug ntawd ploj mus lawm, kuv tsis hais cov lus uas tsis muaj qab hau thiab qhuav qhawv txog kev qhuab qhia saum sam thiaj mus ntxiv lawm. Tiam sis, kuv mob siab txog txoj kev npaj kuv tus kheej kom muaj Vajtswv Tus Uas Muaj Hwj Chim Loj Kawg Nkaus txoj lus, thiab txhua hnub hnov muaj kev txaus siab thiab xyiv fab heev.

Tsis ntev ntawd, muaj lus tshaj tawm hais tias kuv twb tawm ntawm pawg ntseeg mus lawm. Ob lub hli tom qab ntawd, kuv mam li paub hais tias muaj ib tug viv ncaus tau tso ib daim yeeb yaj duab uas tuaj ntawm Pawg Ntseeg ntawm Vajtswv Tus Uas Muaj Hwj Chim Loj Kawg Nkaus tuaj rau hauv ib pab pawg nyob os lai, yog li ntawd cov xib fwb txawm pib kaw pawg ntseeg lawm thiab tso ib tsab xov tawm hais tias vim muaj qee tus neeg twb tawm ntawm pawg ntseeg mus lawm, ces pawg ntseeg thiaj li yuav tsum tau ceev faj Qhov Xob Laim Sab Hnub Tuaj kom zoo. Kuv tu siab uas hnov qhov xov xwm no, thiab tu siab rau cov xib fwb ntawd, tiam sis kuv paub tseeb dua qub lawm hais tias cov xib fwb feem coob uas nyob rau hauv lub ntiaj teb ntawm sab kev lis kev cai ntseeg ntawd tsis nyiam qhov tseeb. Lawv tus yeeb yam, lawv yeej dhuav thiab ntxub qhov tseeb. Lawv xav hais tias lawv paub Vajluskub thiab Vajtswv, tiam sis tseeb tiag lawv yog tus uas dig muag coj tus dig muag kev mus poob rau hauv qhov ntuj xwb. Tseem tshuav Vajtswv cov yaj coob tus uas ua loj leeb nyob rau sab nraud uas tsis tau txais tos qhov tus Tswv rov qab los. Kuv yuav tsum tau tshaj tawm txoj moo zoo uas hais txog lub nceeg vaj rau lawv, ua kuv tej luag hauj lwm kom tiav, thiab pauj Vajtswv txoj kev hlub. Yog li ntawd, kuv txawm pib tshaj tawm Vajtswv txoj moo zoo ntawm tiam kawg, thiab kuv pom hais tias cov tib neeg uas ntseeg Vajtswv tiag tiag tig zom zaws los cuag Vajtswv ib tug zuj zus lawm, uas ua rau kuv zoo siab thiab txaus siab heev. Kuv kuj mloog zoo li txhua hnub mas zoo heev thiab muaj nuj nqis heev. Kuv ua Vajtswv tsaug rau txoj kev coj kuv tawm ntawm txoj kev lis kev cai ntseeg mus, cia kuv taug Nws cov hneev taw, thiab cia kuv paub Vajtswv tes hauj lwm nyob rau tiam kawg. Vim qhov no, kuv thiaj mloog zoo li kuv tau koob hmoov ntau heev.