Cov Thawj Coj thiab Cov Neeg Ua Hauj Lwm Tej Luag Hauj Lwm (14)

Peb tau sib qhia txog cov thawj coj thiab cov neeg ua hauj lwm tej luag hauj lwm ntev npaum li cas lawm? (Plaub lub hlis thiab ib nrab.) Tom qab sib qhia txog qhov no tau ib lub sij hawm ntev li no lawm, tam sim no nej puas to taub meej me ntsis ntxiv txog tej hauj lwm ntxaws ntxaws uas cov thawj coj thiab cov neeg ua hauj lwm yuav tsum tau ua? (Peb txoj kev to taub txog qhov no meej me ntsis ntxiv lawm.) Nws yuav tsum meej dua yav tas los lawm. Kuv cov lus qhia mas ntxaws thiab meej heev es yog leej twg tseem tsis to taub thiab, ces txhais tau hais tias lawv ruam lawm, puas yog? (Yog.) Thaum saib qhov no tam sim no, nej xav tias qhov ua ib tug thawj coj los sis ib tug neeg ua hauj lwm uas zoo ntawd puas yooj yim? (Nws tsis yooj yim.) Yuav tsum tau muaj tej yam zoo dab tsi? (Yus yuav tsum muaj lub peev xwm thiab kev ua neeg uas cheem tsum rau cov thawj coj thiab cov neeg ua hauj lwm, nrog rau qhov tseeb qhov muaj tiag, thiab muaj lub siab ris lub luag hauj lwm.) Qhov tsawg kawg nkaus, ib tug yuav tsum muaj lub siab txawj xav, laj thawj, thiab kev ua siab ncaj, thiab tom qab ntawd, yog lub peev xwm thiab kev muaj peev xwm ua hauj lwm. Thaum ib tug tib neeg muaj tag nrho tej yam no, lawv thiaj li ua tau ib tug thawj coj los sis ib tug neeg ua hauj lwm uas zoo thiab ua tau lawv tej luag hauj lwm kom tiav.

Yam Kaum Ob: Txheeb Ntau Hom Tib Neeg, Xwm Txheej, thiab Yam Khoom uas Tab Kaum thiab Cuam Tshuam Vajtswv Tes Hauj Lwm thiab Qhov Raws Qib Raws Duas uas Ib Txwm Muaj ntawm Pawg Ntseeg Kom Ncav Sij Hawm thiab Kom Yog; Cheem thiab Txwv Lawv, thiab Hloov Txhua Yam Kom Zoo Dua; Tsis Tas Li Ntawd Xwb, Qhia Qhov Tseeb Kom Cov Neeg Vajtswv Xaiv Tseg Thiaj Li Paub Cais Tej Yam Zoo Li No thiab Kawm Paub Los Ntawm Tej Yam Zoo Li No (Ntu Ob)

Nyob rau kev sib txoos ua ke tas los ntawd, peb tau sib qhia txog cov thawj coj thiab cov neeg ua hauj lwm tej luag hauj lwm kaum ob: “Txheeb ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg kom ncav sij hawm thiab kom yog; cheem thiab txwv lawv, thiab hloov txhua yam kom zoo dua; tsis tas li ntawd xwb, qhia qhov tseeb kom cov neeg Vajtswv xaiv tseg thiaj li paub cais tej yam zoo li no thiab kawm paub los ntawm tej yam zoo li no.” Nyob rau hauv yam no, qhov tseem ceeb peb xub sib qhia txog tias cov tib neeg, tej xwm txheej, thiab tej yam khoom twg uas tab kaum thiab cuam tshuam Vajtswv tes hauj lwm thiab qhov raws qib raws duas ntawm pawg ntseeg. Yog cov thawj coj thiab cov neeg ua hauj lwm xav cheem thiab txwv ntau hom tib neeg, tej xwm txheej, thiab tej yam khoom uas ua rau muaj kev tab kaum thiab kev cuam tshuam nyob rau hauv pawg ntseeg, thiab xav ua tes hauj lwm no kom zoo, lawv yuav tsum xub paub thiab txheeb kom meej tias cov tib neeg, tej xwm txheej, thiab tej yam khoom twg uas tab kaum thiab cuam tshuam Vajtswv tes hauj lwm thiab pawg ntseeg qhov raws qib raws duas uas ib txwm muaj. Tom qab ntawd, lawv yuav tsum muab tej no los piv rau cov tib neeg, tej xwm txheej, thiab tej yam khoom nyob rau hauv pawg ntseeg tes hauj lwm tiag tiag thiab lub neej hauv pawg ntseeg, thiab tom qab ntawd mam li ua ntau yam hauj lwm xws li kev cheem thiab txwv lawv. Qhov no yog ib qho kev cheem tsum rau cov thawj coj thiab cov neeg ua hauj lwm. Nyob rau hauv peb txoj kev sib txoos ua ke tas los ntawd, peb tau sib qhia txog qee yam ntawm ntau hom tib neeg, tej xwm txheej, thiab tej yam khoom uas tab kaum thiab cuam tshuam pawg ntseeg tes hauj lwm thiab lub neej hauv pawg ntseeg, pib los ntawm cov uas muaj feem xyuam rau lub neej hauv pawg ntseeg. Peb kuj tau muab cov tib neeg, tej xwm txheej, thiab tej yam khoom nyob rau hauv lub neej hauv pawg ntseeg uas muaj lub ntsiab xeeb txawm ntawm kev ua rau muaj kev tab kaum thiab kev cuam tshuam ntawd cais ua hom. Tag nrho muaj pes tsawg yam teeb meem? (Kaum ib. Qhov ib, thaum qhia qhov tseeb pheej tham dhau ntawm lub ncauj lus mus lawm tas li; qhov ob, hais cov lus thiab cov kev qhuab qhia los coj tib neeg mus yuam kev thiab ua rau lawv qhuas; qhov peb, tham txog tsev neeg tej xwm txheej, tsim kev sib raug zoo ntawm tus kheej, thiab saib xyuas tej hauj lwm ntiag tug; qhov plaub, kev tsim pab tsim pawg; qhov tsib, kev txeeb lub meej mom; qhov rau, kev tsim kev sib cais; qhov xya, tawm tsam thiab tsim txom tib neeg; qhov yim, tshaj tawm tej kev xav phem; qhov cuaj, tso tej kev xav tsis zoo tawm; qhov kaum, kev tshaj tawm tej lus xaiv uas tsis muaj tseeb; thiab qhov kaum ib, kev ua txhaum rau tej hauv paus ntsiab lus ntawm kev xaiv tsa.) Qhov teeb meem rau yog kev tsim kev sib cais, uas muaj lub ntsiab xeeb txawm ntawm kev ua rau muaj kev tab kaum thiab kev cuam tshuam, tiam sis yog muab piv rau lwm qhov kev ua phem mas, qhov ntawd yog ib qho teeb meem me. Muab qhov ntawd hloov mus ua qhov “ua kev sib raug zoo uas tsis tsim nyog,” thiab lub ntsiab xeeb txawm ntawm qhov no mas loj dua qhov uas tsim kev sib cais ntawd. Qhov teeb meem uas xya mas yog qhov tawm tsam thiab tsim txom tib neeg. Muab qhov ntawd hloov mus ua qhov “koom kev sib tawm tsam thiab kev sib cav sib ceg”—qhov no tsis muaj lub ntsiab xeeb txawm uas hnyav dua, ntxaws dua thiab haum dua lod? (Yog.) Kev sib tawm tsam thiab sib cav sib ceg yog ib hom teeb meem uas nquag tshwm sim nyob rau hauv lub neej hauv pawg ntseeg uas ntsig txog kev tab kaum thiab kev cuam tshuam. Muab ob qho teeb meem no hloov li no ua rau haum dua thiab ze dua rau cov teeb meem uas tshwm sim nyob rau hauv lub neej hauv pawg ntseeg. Qhov teeb meem kaum ib yog kev ua txhaum rau tej hauv paus ntsiab lus ntawm kev xaiv tsa. Muab qhov ntawd hloov mus ua “kev tswj thiab tab kaum tej kev xaiv tsa.” Qhov no tsuas yog ib qho kev hloov ntawm cov lus hais xwb; lub ntsiab xeeb txawm ntawm qhov no tseem zoo li qub, tsuas yog theem ntawd nce hnyav ntxiv xwb—tam sim no qhov ntawd haj yam muaj feem xyuam rau lub ntsiab xeeb txawm ntawm kev ua rau muaj tej kev tab kaum thiab kev cuam tshuam.

Ntau Hom Tib Neeg, Xwm Txheej, thiab Yam Khoom Uas Tab Kaum thiab Cuam Tshuam Lub Neej Hauv Pawg Ntseeg

V. Kev Txeeb Lub Meej Mom

Zaum tas los ntawd, peb tau sib qhia txog qhov teeb meem plaub, kev tsim pab tsim pawg. Zaum no, peb yuav sib qhia txog qhov teeb meem tsib, kev txeeb lub meej mom. Qhov teeb meem ntawm kev txeeb lub meej mom yog ib qho teeb meem uas nquag tshwm sim nyob rau hauv lub neej hauv pawg ntseeg thiab yog ib yam uas yeej pom tau ntau heev. Ua li cov yam ntxwv, cov kev coj, thiab tej kev qhia tshwm uas pom twg uas suav tias yog kev txeeb lub meej mom? Tej kev qhia tshwm uas pom tau meej ntawm kev txeeb lub meej mom twg uas yog qhov teeb meem ntawm kev tab kaum thiab kev cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg? Txawm peb sib qhia txog qhov teeb meem twg los sis hom twg los xij, qhov ntawd yuav tsum muaj feem xyuam rau qhov uas tau hais nyob rau hauv yam kaum ob lawm, uas yog hais txog “ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg.” Qhov ntawd yuav tsum mus txog theem ntawm kev tab kaum thiab kev cuam tshuam, thiab yuav tsum ntsig txog lub ntsiab xeeb txawm no—tsuas yog thaum ntawd xwb mas thiaj li tsim nyog muab los sib qhia thiab soj ntsuam. Tej kev qhia tshwm uas pom tau meej twg ntawm kev txeeb lub meej mom uas muaj feem xyuam rau lub ntsiab xeeb txawm ntawm kev tab kaum thiab kev cuam tshuam tes hauj lwm ntawm Vajtswv lub tsev? Qhov uas pom ntau tshaj plaws mas yog qhov cov tib neeg txeeb lub meej mom nrog cov thawj coj pawg ntseeg, uas yog qhov qhia tshwm uas pom tau meej tseem ceeb nyob rau hauv qhov uas cov tib neeg ntawd tuav qee yam tsis zoo ntawm cov thawj coj thiab cov thawj coj tej kev ua yuam kev kom thiaj li thuam tau cov thawj coj ntawd thiab teem txim rau lawv, thiab txhob txwm muab lawv cov kev qhia tshwm txog txoj kev qias vuab tsuab thiab tej kev qaug zog thiab tej kev ua tsis tau zoo uas nyob rau hauv lawv txoj kev ua neeg thiab lub peev xwm ntawd nthuav tawm, tshwj xeeb tshaj mas yog thaum hais txog tej kev ua tsis yog thiab tej kev ua yuam kev uas lawv tau ua nyob rau hauv lawv tes hauj lwm los sis thaum daws tib neeg. Qhov no yog qhov kev qhia tshwm uas pom tau meej uas pom ntau tshaj plaws thiab pom tseeb tshaj ntawm kev txeeb lub meej mom nrog cov thawj coj pawg ntseeg. Tsis tas li ntawd, cov tib neeg no tsis quav ntsej tias cov thawj coj pawg ntseeg ua lawv tes hauj lwm tau zoo li cas, cov thawj coj puas ua raws li tej hauv paus ntsiab lus, los sis cov thawj coj txoj kev ua neeg puas muaj teeb meem, es cia li tsis mloog cov thawj coj no lus xwb. Vim li cas lawv thiaj li tsis mloog cov thawj coj lus? Vim lawv kuj xav ua ib tug thawj coj pawg ntseeg thiab—qhov no yog lawv tej kev xav ua, tej kev ntshaw, yog li ntawd lawv thiaj li tsis mloog cov thawj coj ntawd lus. Tsis hais cov thawj coj pawg ntseeg yuav ua hauj lwm los sis daws teeb meem li cas los, cov tib neeg no pheej tuav tej yam tsis zoo txog cov thawj coj, txiav txim thiab teem txim rau cov thawj coj, thiab haj tseem mus deb mus txog qhov uas muab tej yam ua kom loj tshaj qhov muaj tiag, ntxeev qhov muaj tiag, thiab muab tej yam hais kom loj tshaj plaws li qhov uas ua tau lawm thiab. Lawv tsis siv cov qauv uas Vajtswv lub tsev cheem tsum ntawm cov thawj coj thiab cov neeg ua hauj lwm los ntsuas seb cov thawj coj no puas ua raws li tej hauv paus ntsiab lus, seb lawv puas yog cov neeg uas yog, seb lawv puas yog cov tib neeg uas caum qhov tseeb, thiab seb lawv puas muaj lub siab txawj xav thiab laj thawj. Lawv tsis ntsuas cov thawj coj raws li tej hauv paus ntsiab lus no. Tiam sis, ua raws li lawv tus kheej tej kev npaj siab thiab tej hom phiaj, lawv pheej nrhiav qhov tsis zoo thiab tsim kom muaj lus yws, nrhiav tej yam los tawm tsam cov thawj coj los sis cov neeg ua hauj lwm, tshaj tawm tej lus xaiv txog qhov uas cov thawj coj thiab cov neeg ua hauj lwm ua tej yam uas tsis mus raws li qhov tseeb nyob rau tom qab nraub qaum, los sis muab cov thawj coj thiab cov neeg ua hauj lwm tej kev ua tsis tau zoo nthuav tawm. Piv txwv li, lawv yuav hais tias: “Tus thawj coj no tau ua yuam kev ib zaug thiab raug tus Nyob Saud ntuas lawm, thiab nej tsis muaj leej twg paub txog qhov ntawd li. Saib seb, lawv txawj ua txuj heev!” Lawv tsis xav txog thiab tsis quav ntsej tias tus thawj coj los sis tus neeg ua hauj lwm no puas yog ib lub hom phiaj rau Vajtswv lub tsev cob qhia, los sis tias lawv puas yog ib tug thawj coj los sis ib tug neeg ua hauj lwm uas mus raws li tus qauv, lawv tsuas pheej txiav txim rau cov thawj coj los sis cov neeg ua hauj lwm ntawd, ntxeev qhov muaj tiag, thiab ua tej yam me me tawm tsam lawv nyob rau tom qab lawv nraub qaum xwb. Thiab lawv ua tej yam no rau lub hom phiaj dab tsi? Qhov ntawd tsis yog txhawm rau txeeb lub meej mom lod? Txhua yam uas lawv hais thiab ua mas muaj ib lub hom phiaj. Lawv tsis xav txog pawg ntseeg tes hauj lwm, thiab lawv txoj kev ntsuas cov thawj coj thiab cov neeg ua hauj lwm ntawd tsis yog raws li Vajtswv cov lus los sis qhov tseeb, thiab haj yam tsis yog raws li Vajtswv lub tsev tej kev npaj tes hauj lwm los sis tej hauv paus ntsiab lus uas Vajtswv cheem tsum ntawm tib neeg, tiam sis yog raws li lawv tus kheej tej kev npaj siab thiab tej hom phiaj xwb. Lawv tawm tsam txhua yam uas cov thawj coj los sis cov neeg ua hauj lwm hais, thiab tom qab ntawd muab lawv tus kheej “tej tswv yim zoo” tawm. Tsis hais tej uas cov thawj coj thiab cov neeg ua hauj lwm hais ntawd yuav mus raws qhov tseeb npaum li cas los, lawv yeej tsis lees txais kiag li. Lawv tsis kam txais txhua yam uas cov thawj coj thiab cov neeg ua hauj lwm hais, thiab muab lawv tus kheej tej kev xav uas txawv ntawd tawm. Tshwj xeeb tshaj yog, thaum ib tug thawj coj los sis ib tug neeg ua hauj lwm qhib siab thiab nthuav lawv tus kheej tawm, tham txog lawv txoj kev paub lawv tus kheej, ces cov neeg no haj yam zoo siab, thiab xav tias lawv nrhiav pom lub cib fim lawm. Lub cib fim dab tsi? Lub cib fim los thuam tus thawj coj los sis tus neeg ua hauj lwm no, los qhia rau txhua tus paub tias tus thawj coj los sis tus neeg ua hauj lwm no lub peev xwm tsis zoo, tias lawv qaug zog tau, tias lawv kuj yog ib tug tib neeg uas qias vuab tsuab thiab, tias lawv kuj pheej ua yuam kev hauv tej yam uas lawv ua, thiab tias lawv tsis zoo dua lwm tus li. Qhov no yog lawv lub hwv tsam los nrhiav qee yam los tawm tsam tus thawj coj los sis tus neeg ua hauj lwm ntawd, lawv lub cib fim los txhawb kom txhua tus teem txim, rhuav tshem, thiab muab tus thawj coj los sis tus neeg ua hauj lwm ntawd ntaus vau. Thiab lub hom phiaj rau tag nrho tej kev coj thiab tej kev ua no tsis yog lwm yam tiam sis yog kev txeeb lub meej mom xwb. Yog hais tias ua raws li tej hauv paus ntsiab lus ntawm kev xaiv tsa thiab tej hauv paus ntsiab lus ntawm kev cob qhia thiab kev siv tib neeg nyob rau hauv Vajtswv lub tsev mas, raws li ib txwm muaj, cov tib neeg zoo li no yuav tsis raug xaiv los ua cov thawj coj los sis cov neeg ua hauj lwm li. Qhov no yog ib yam uas lawv pom tshab thiab to taub meej lawm, yog li ntawd lawv thiaj li siv txhua txoj hau kev los tawm tsam thiab teem txim rau cov thawj coj thiab cov neeg ua hauj lwm. Txawm leej twg los ua ib tug thawj coj los sis ib tug neeg ua hauj lwm los xij li, lawv yeej tsis mloog cov thawj coj ntawd lus li, thiab pheej nrhiav qhov tsis zoo thiab hais tej lus thuam uas tsis ris lub luag hauj lwm li. Txawm tias cov thawj coj thiab cov neeg ua hauj lwm no tej kev ua los sis tej lus hais tsis muaj dab tsi txhaum los, lawv pheej nrhiav tau qee qhov txhaum hauv tej ntawd—tseeb tiag, cov teeb meem uas lawv nrhiav tau ntawd tsis yog cov teeb meem ntawm lub hauv paus ntsiab lus tiam sis yog cov teeb meem tsis tseem ceeb xwb. Yog li, vim li cas lawv thiaj li tuav rawv tej teeb meem me me no tsis tso? Vim li cas lawv thiaj li muaj peev xwm tab meeg txiav txim thiab teem txim rau cov thawj coj thiab cov neeg ua hauj lwm li no txog tej yam zoo li no? Lawv tsuas muaj ib lub hom phiaj xwb, thiab qhov ntawd yog txhawm rau txeeb lub hwj chim thiab lub meej mom. Tsis hais Vajtswv lub tsev yuav qhia txog ntau qhov kev qhia tshwm uas pom tau meej ntawm cov thawj coj cuav thiab cov tawm tsam khetos li cas los, lawv yeej tsis muab cov kev qhia tshwm uas pom tau meej no piv rau lawv tus kheej li tiam sis tsuas muab piv rau cov thawj coj thiab cov neeg ua hauj lwm nyob rau txhua theem xwb. Thaum lawv nrhiav tau ib qho uas haum lawm, lawv xav hais tias, “Tam sim no kuv muaj pov thawj lawm; thaum kawg kuv nrhiav tau ib yam dab tsi los tawm tsam lawv thiab tau ib lub cib fim zoo lawm.” Tom qab ntawd lawv haj yam tsis raug txwv rau hauv kev nthuav tawm, kev txiav txim, kev soj ntsuam uas thuam, thiab teem txim rau txhua yam uas cov thawj coj thiab cov neeg ua hauj lwm no ua. Ib txhia teeb meem uas lawv hais los ntawd saib sab nraud mas tej zaum zoo li muaj teeb meem me ntsis, tiam sis thaum muab ntsuas raws li tej hauv paus ntsiab lus, tej ntawd tsis yog teeb meem loj. Yog li, vim li cas lawv thiaj li muab tej ntawd los hais? Tsis yog vim lwm qhov laj thawj tiam sis yog los nthuav tawm cov thawj coj thiab cov neeg ua hauj lwm, nrog rau lub hom phiaj uas yuav teem txim thiab rhuav tshem cov thawj coj thiab cov neeg ua hauj lwm. Yog cov thawj coj thiab cov neeg ua hauj lwm raug tawm tsam kom xav tsis zoo, thov kev hlub tshua, thiab nyo hau rau lawv, yog cov kwv tij thiab cov muam pom tias cov thawj coj no pheej xav tsis zoo thiab qaug zog, thiab tias lawv nquag ua yuam kev thaum lawv ua hauj lwm, thiab tsis xaiv lawv ua thawj coj ntxiv lawm, yog cov kwv tij thiab cov muam tsis ua tib zoo mloog thaum cov thawj coj no sib qhia qhov tseeb ntxiv lawm, thiab yog tib neeg tsis koom tes yam nquag plias thiab muab siab rau ntxiv lawm thaum cov thawj coj no tab tom nqis tes ua hauj lwm, ces cov uas txeeb lub meej mom ntawd yuav zoo siab, thiab lawv yuav muaj ib lub cib fim los siv rau lawv tus kheej. Qhov no yog qhov xwm txheej uas lawv xav pom tshaj plaws thiab yog qhov uas lawv cia siab kom tshwm sim tshaj plaws. Lawv lub hom phiaj hauv kev ua txhua yam no yog dab tsi? Qhov ntawd tsis yog pab tib neeg to taub qhov tseeb thiab paub cais cov thawj coj cuav thiab cov tawm tsam khetos, thiab tsis yog coj tib neeg los rau ntawm Vajtswv xub ntiag. Tiam sis, lawv lub hom phiaj yog los ntaus kom cov thawj coj thiab cov neeg ua hauj lwm ntawd vau thiab muab cov thawj coj thiab cov neeg ua hauj lwm rhuav tshem kom txhua tus pom tias lawv yog tus neeg uas tsim nyog tshaj plaws los ua ib tug thawj coj. Txog rau theem no, lawv lub hom phiaj yuav ua tau tiav lawm, thiab lawv tsuas tos kom cov kwv tij thiab cov muam xaiv lawv ua ib tug thawj coj xwb. Puas muaj cov tib neeg zoo li no nyob rau hauv pawg ntseeg? Lawv cov moj yam zoo li cas? Cov tib neeg no muaj tus moj yam lim hiam, lawv tsis nyiam qhov tseeb kiag li, thiab lawv kuj tsis xyaum ua raws qhov tseeb thiab; lawv tsuas ntshaw tuav lub hwj chim xwb. Ua li cov uas to taub qhov tseeb me ntsis thiab muaj kev paub cais me ntsis lawm—lawv puas yuav txaus siab cia cov tib neeg zoo li no tuav lub hwj chim? Lawv puas yuav txaus siab poob rau hauv cov tib neeg ntawd lub hwj chim? (Tsis txaus siab.) Vim li cas thiaj li tsis txaus siab? Yog tib neeg feem coob tuaj yeem pom meej txog tus yam ntxwv xeeb txawm lub ntsiab tseeb ntawm cov tib neeg zoo li no lawm, lawv puas tseem yuav xaiv cov tib neeg no los ua thawj coj? (Tsis xaiv.) Lawv yuav tsis xaiv, tshwj tsis yog txhua tus nyuam qhuav sib ntsib thiab tseem tsis tau sib paub zoo xwb. Tiam sis thaum lawv sib paub zoo lawm thiab pom meej tias cov tib neeg twg lub peev xwm tsis zoo thiab ruam feeb tsis meej, cov twg yog cov tib neeg phem uas muaj cov moj yam lim hiam thiab txawj dag, cov twg nyiam txeeb lub meej mom thiab taug cov tawm tsam khetos txoj kev, cov twg tuaj yeem caum qhov tseeb thiab ua lawv tej dej num yam ua siab ncaj, thiab lwm yam ntxiv, thaum lawv paub txog tus yam ntxwv xeeb txawm lub ntsiab tseeb thiab pab pawg ntawm ntau hom tib neeg lawm, ces kev xaiv tsa cov thawj coj yuav yog dua me ntsis thiab mus raws li tej hauv paus ntsiab lus dua me ntsis.

Puas yog tib neeg feem coob xav xaiv ib tug neeg uas pheej txeeb lub meej mom los ua ib tug thawj coj, los sis lawv yuav xaiv ib tug neeg uas peev xwm thiab lub peev xwm ua hauj lwm nruab nrab, tiam sis yog ib tug neeg uas nquag thiab ruaj khov? Thaum tsis paub meej tias ob tug tib neeg no tus yam ntxwv zoo li cas, lawv tus yam ntxwv xeeb txawm lub ntsiab tseeb yog dab tsi, los sis lawv tab tom taug txoj kev twg, tib neeg feem coob xav xaiv tus twg los ua ib tug thawj coj? (Tus ob, tus uas ruaj khov.) Tib neeg feem coob xaiv tus ob. Tej kev qhia tshwm uas pom tau meej ntawm cov uas pheej txeeb lub meej mom ntawd yog cov pov thawj qhia txog lawv kev ua neeg thiab lub ntsiab tseeb. Tib neeg feem coob puas muaj peev xwm pom meej thiab paub cais lawv tej kev qhia tshwm uas pom tau meej ntawd? Tib neeg yuav hais tias, “Tus tib neeg no pheej ua teeb meem rau tus thawj coj pawg ntseeg tas li; nws tej kev ntshaw yog tsom mus rau qhov kom tau lub meej mom ntawm ib tug thawj coj pawg ntseeg, nws xav hloov tus thawj coj chaw los ua thawj coj. Txij thaum tus neeg ntawd raug xaiv los ua ib tug thawj coj pawg ntseeg lawm, nws pheej tawm tsam tus thawj coj ntawd thiab pom tias tus thawj coj ntawd tsis khuab qhov muag. Nws pheej teb rov qab rau tus thawj coj ntawd, thiab nrhiav qhov txhaum hauv txhua yam uas tus thawj coj ntawd ua, tuav rawv txhua yam tsis zoo uas nws tuav tau ntawm tus thawj coj ntawd, thiab nws kuj txiav txim rau tus thawj coj thiab nthuav tawm tej uas tus thawj coj ntawd muaj tsis txaus tom qab tus thawj coj ntawd nraub qaum thiab. Tshwj xeeb tshaj yog thaum sib txoos ua ke los sis thaum sib qhia txog tes hauj lwm, yog tus thawj coj qhia tsis tau meej ib lub sij hawm ntawd xwb, nws cia li txiav lus, qhia tawm yam tsis ua siab ntev kiag li. Nws haj tseem saib tsis taus tus thawj coj ntawd, thuam, thuam yam iab siab, thiab luag tus thawj coj ntawd thiab; nws ua rau txhua yam nyuaj rau tus thawj coj ntawd thiab cuab tus thawj coj ntawd rau hauv cov xwm txheej uas txaj muag.” Los ntawm cov cwj pwm no qhia tshwm rau txhua tus pom, tib neeg feem coob puas yog yuav muaj peev xwm paub cais tus tib neeg no lawm? (Yog.) Yog li, qhov no puas pab tau nws txeeb lub meej mom ntawm tus thawj coj? Yeej tsis pab kiag li. Cov tib neeg uas txeeb lub meej mom no ntse los sis ruam? Pom tseeb tias, lawv yog cov neeg ruam feeb tsis meej, cov neeg ruam. Kuj muaj lwm qhov teeb meem loj: Cov tib neeg no yog cov dab phem, thiab lawv tus yam ntxwv xeeb txawm hloov tsis tau! Lawv txoj kev ntshaw rau lub hwj chim thiab lub meej mom ntawd mas tswj tsis tau, haj tseem mus txog theem uas lawv tsis paub qab hau lawm, qhov ntawd tsis yog ib yam uas kev ua neeg li ib txwm ntawd muaj. Txoj kev ntshaw no dhau qhov ciaj ciam ntawm qhov kev paub tias dab tsi yog qhov tsim nyog thiab lub siab txawj xav ntawm kev ua neeg ib txwm muaj, mus txog theem uas siv tau txhua txoj hau kev. Cov tib neeg no yuav ua li no tsis hais lub sij hawm twg, qhov chaw twg, los sis qhov xwm txheej twg, yam tsis xav txog qhov yuav tshwm sim los li, tsis tas yuav hais txog qhov kev cuam tshuam ntawm lawv tej kev ua li. Cov no yog tej kev qhia tawm thiab tej kev ua uas pom tau meej tshaj plaws txog cov uas txeeb lub meej mom. Thaum twg muaj kev sib txoos ua ke los sis kev sib qhia txog tes hauj lwm, thaum txhua tus tuaj ua ke xwb, cov tib neeg no ua rau muaj kev cuam tshuam zoo li cov yoov uas ua rau xeeb txob, ua rau lub neej hauv pawg ntseeg thiab qhov raws qib raws duas ntawm kev sib qhia qhov tseeb puas tsuaj. Cov kev coj thiab cov kev ua zoo li no muaj lub ntsiab xeeb txawm ntawm kev ua rau muaj tej kev tab kaum thiab kev cuam tshuam. Cov tib neeg zoo li no puas tsim nyog raug txwv? Nyob rau hauv cov xwm txheej uas hnyav, lawv puas tsim nyog raug ntsaig tawm mus los sis ntiab tawm? (Tsim nyog.) Qee zaus, qhov vam khom rau cov thawj coj pawg ntseeg lub zog nkaus xwb los txwv cov tib neeg phem mas yuav yog ib qho kev siv zog uas tsis muaj zog, thiab ua ib leeg xwb—yog tias tom qab cov kwv tij thiab cov muam pom meej txog qhov hnyav ntawm kev tab kaum thiab kev cuam tshuam uas tshwm sim los ntawm cov tib neeg phem thiab paub cais lawv lub ntsiab tseeb kom tshab lawm, lawv muaj peev xwm koom ua ib lub siab thiab ib lub ntsws nrog cov thawj coj pawg ntseeg hauv kev cheem thiab txwv cov tib neeg phem zoo li no, qhov no puas yog yuav muaj txiaj ntsig dua? (Yog.) Yog ib tug neeg twg hais tias, “Kev txwv cov tib neeg phem yog cov thawj coj thiab cov neeg ua hauj lwm lub luag hauj lwm xwb, qhov ntawd tsis muaj feem xyuam nrog peb cov ntseeg dog dig no. Peb yuav tsis quav ntsej txog qhov ntawd! Cov tib neeg phem txeeb lub meej mom nrog cov thawj coj pawg ntseeg; lawv txeeb lub meej mom nrog cov uas muaj lub meej mom ntawd. Peb tsis muaj lub meej mom; lawv tsis txeeb ib yam dab tsi ntawm peb mus. Txawm li cas los xij, qhov ntawd tsis cuam tshuam rau peb. Cia lawv txeeb raws li lawv xav tau. Yog cov thawj coj pawg ntseeg muaj lub peev xwm, lawv yuav tsum txwv cov tib neeg ntawd; yog tsis muaj, lawv yuav tsum tsis txhob quav ntsej cov tib neeg ntawd. Qhov no muaj feem xyuam dab tsi nrog peb?” Qhov kev xam pom no puas zoo? (Tsis zoo.) Vim li cas qhov ntawd thiaj tsis zoo? (Lawv tsis tiv thaiv qhov raws qib raws duas uas ib txwm muaj ntawm pawg ntseeg.) Txhawm rau muab hais kom haum dua, qhov raws qib raws duas uas ib txwm muaj ntawm pawg ntseeg yog hais txog dab tsi? Qhov ntawd tsis yog hais txog lub neej hauv pawg ntseeg uas ib txwm muaj lod? (Yog.) Qhov no muaj feem xyuam nrog lub neej hauv pawg ntseeg uas ib txwm muaj thiab raws qib raws duas—qhov ntawd muaj feem xyuam nrog kev noj thiab haus Vajtswv cov lus raws qib raws duas, uas txhais tau hais tias tib neeg tuaj yeem nyeem thov Vajtswv thiab sib qhia txog Vajtswv txoj lus, thiab sib qhia txog tej kev ntsib kev pom ntawm tus kheej, nyob rau hauv lub neej hauv pawg ntseeg uas muaj Vajntsujplig ua hauj lwm, muaj Vajtswv nrog nraim, thiab muaj Vajtswv coj kev, thiab tib lub sij hawm ntawd, kuj tau txais kev qhia kom paub thiab kev coj kev los ntawm Vajntsujplig thiab tau txais qhov kaj. Qhov no yog qhov uas cov neeg Vajtswv xaiv tseg tsim nyog tau txais kev xyiv fab nyob rau hauv lub neej hauv pawg ntseeg. Yog ib txhia tib neeg rhuav tshem qhov raws qib raws duas no, ces lawv yuav tsum raug cheem thiab txwv raws li tej hauv paus ntsiab lus, thiab yuav tsum tsis txhob tso cai rau lawv ua. Qhov no tsis yog cov thawj coj thiab cov neeg ua hauj lwm lub luag hauj lwm thiab txoj hauj lwm xwb tiam sis kuj yog lub luag hauj lwm thiab txoj hauj lwm ntawm txhua tus uas to taub qhov tseeb thiab muaj kev paub cais thiab. Muaj tseeb tias, qhov zoo tshaj plaws yog cov thawj coj pawg ntseeg muaj peev xwm ua tus coj ua tes hauj lwm no, sib qhia nrog cov kwv tij thiab cov muam txog lub ntsiab xeeb txawm ntawm cov tib neeg no tej kev ua, cov tib neeg no yog hom neeg twg raws li lawv tej kev qhia tshwm uas pom tau meej, thiab cov kwv tij thiab cov muam yuav tsum paub cais thiab pom meej txog cov tib neeg zoo li no li cas. Yog cov tib neeg phem no tsis raug txwv thiab cov kwv tij thiab cov muam txhua tus raug cuam tshuam, raug coj mus yuam kev, thiab raug ntxias los ntawm lawv, thiab cov thawj coj pawg ntseeg thaum kawg raug cais tawm es tsis yog cov tib neeg phem ntawd, ces pawg ntseeg no yuav nres mus tsis taus thiab yeej yuav poob rau hauv qhov kev ntxhov hnyo. Ua li lub neej hauv pawg ntseeg uas ib txwm muaj puas tseem mus tau txuas ntxiv nyob rau hauv cov xwm txheej zoo li no? Yog qhov ntawd mus tsis tau txuas ntxiv, cov kev sib txoos ua ke hauv pawg ntseeg puas tseem yuav muaj txiaj ntsig? Cov neeg Vajtswv xaiv tseg puas tseem yuav tau txais ib yam dab tsi los ntawm cov kev sib txoos ua ke zoo li no? Yog cov neeg Vajtswv xaiv tseg tsis tau txais ib yam dab tsi los ntawm cov kev sib txoos ua ke ntawd, ces cov kev sib txoos ua ke zoo li no puas tau kev foom koob hmoov los ntawm Vajtswv los sis raug Nws ntxub? Tseeb tiag, cov kev sib txoos ua ke ntawd raug Vajtswv ntxub. Cov kev sib txoos ua ke uas tsis muaj Vajntsujplig tes hauj lwm thiab tsis muaj Vajtswv txoj koob hmoov ces yuav suav tsis tau tias yog lub neej hauv pawg ntseeg ntxiv lawm tiam sis dhau los ua cov kev sib txoos ua ke ntawm ib pab pawg hauv lub zej zog. Puas muaj leej twg nyiam lub neej hauv pawg ntseeg uas tsis raws qib raws duas? Qhov ntawd puas txhawb los sis puas muaj txiaj ntsim rau leej twg? (Tsis muaj.) Yog nyob rau ib ntu sij hawm no, koj tsis tau txais ib yam dab tsi ntawm kev nkag mus rau hauv lub neej txoj sia los ntawm ib qho kev sib txoos ua ke twg li, ces ib ntu sij hawm no tsis muaj nuj nqis los sis tseem ceeb rau koj li; koj tau nkim ib ntu sij hawm no lawm. Qhov no tsis txhais hais tias koj txoj kev nkag mus rau hauv lub neej txoj sia raug ib qho kev puas tsuaj lawm lod? (Yog.) Yog thaum nyob rau hauv ib qho kev sib txoos ua ke es muaj cov tib neeg phem uas txeeb lub meej mom, thiab sib cav sib ceg nrog ib tug thawj coj pawg ntseeg, thiab thaum kawg ua rau tib neeg ntxhov siab, ua rau tag nrho qhov kev sib txoos ua ke ntawd dhau los ua qhov uas muaj huab cua phem, thiab muaj Ntxwgnyoog lub zog lim hiam puv npo lawm, thiab yog tias dhau ntawm kev sib cav txog cov ncauj lus xws li leej twg yog thiab leej twg txhaum, es tsis muaj leej twg los rau ntawm Vajtswv xub ntiag los thov thiab nrhiav qhov tseeb, thiab tsis muaj leej twg ua raws li tej hauv paus ntsiab lus, ces tom qab hom kev sib txoos ua ke no, koj txoj kev ntseeg rau Vajtswv ntawd yuav nce ntxiv los sis txo nqis? Koj yuav to taub thiab tau txais qhov tseeb ntau dua, los sis koj lub siab yuav raug ua rau ntxhov los ntawm cov kev sib cav, yam tsis tau txais ib yam dab tsi kiag li? Qee zaus koj yuav xav tias, “Kuv tsis to taub vim li cas tib neeg thiaj li ntseeg Vajtswv. Lub ntsiab ntawm kev ntseeg Vajtswv yog dab tsi? Cov tib neeg no coj tus kheej li no tau li cas? Lawv puas tseem yog cov neeg ntseeg Vajtswv?” Vim yog ib qho kev cuam tshuam los ntawm cov Ntxwgnyoog, cov dab phem, tib neeg lub siab dhau los ntxhov quav niab thiab feeb tsis meej; lawv xav tias qhov ntseeg Vajtswv ntawd tsis muaj qab hau, thiab tsis paub txog qhov muaj nqis ntawm qhov ntseeg Vajtswv, ces lawv lub siab thiaj li tawg ua sab ua sua. Yog txhua tus tuaj yeem ceev faj, thiab tshwj xeeb tshaj yog paub txog thiab ntse txog cov xwm txheej zoo li no, es tsis yog loog thiab qeeb, ces thaum cov tib neeg phem pheej hais los sis ua tej yam nyob rau hauv lub neej hauv pawg ntseeg los txeeb lub meej mom, tib neeg feem coob yuav paub tau sai tias muaj ib qho teeb meem uas yuav tsum tau daws. Lawv yuav muaj peev xwm paub cais sai sai tias leej twg tab tom tswj cov xwm txheej no, thiab cov neeg ntawd tus moj yam lub ntsiab tseeb yog dab tsi, lawv yuav paub tau sai txog qhov hnyav ntawm qhov teeb meem, thiab muaj peev xwm cheem thiab txwv cov tib neeg phem nyob rau hauv ib lub sij hawm luv luv, tshem cov tib neeg phem ntawd tawm ntawm pawg ntseeg mus, thiab tiv thaiv tsis pub cov tib neeg phem cuam tshuam thiab txwv cov tib neeg nyob rau hauv pawg ntseeg txuas ntxiv lawm. Qhov no puas yog muaj txiaj ntsig thiab txhawb rau tib neeg feem coob? (Yog.)

Yog nej ntsib cov xwm txheej uas cov tib neeg phem tab tom txeeb lub meej mom, nej yuav daws tej ntawd li cas? Tib neeg feem coob txoj kev xam pom yog dab tsi? (Peb yuav cheem txoj kev coj no.) Tsuas cheem qhov ntawd xwb lod? Nej yuav cheem qhov ntawd li cas? Nej puas yuav txwv tsis pub lawv hais lus, los sis hais tias, “Peb tsis nyiam yam uas koj hais, yog li ntawd yav tom ntej nyob rau hauv cov kev sib txoos ua ke koj hais lus kom tsawg!”? Qhov ntawd puas yuav muaj qab hau? Lawv puas yuav mloog koj? (Tsis mloog.) Yog li, koj yuav tsum ua li cas? Koj yuav tsum nthuav tawm thiab soj ntsuam lawv tej kev npaj siab, tej kev txhawb siab, thiab tus yam ntxwv xeeb txawm lub ntsiab tseeb kom tshab raws li Vajtswv txoj lus, kom cov kwv tij thiab cov muam thiaj li paub cais thiab ceev faj txog cov tib neeg zoo li no thiab lub ntsiab xeeb txawm ntawm lawv tej kev ua, es tsis yog ua ib tug tib neeg uas ua kom lwm tus zoo siab, thiab tsuas tos kom cov thawj coj thiab cov neeg ua hauj lwm hauv pawg ntseeg nthuav tawm cov tib neeg phem ua ntej koj mam li sawv tawm suab hais tias, “Yuav tsum tsis pub lawv tuaj koom kev sib txoos ua ke ntxiv lawm.” Qhov ua ib tug tib neeg uas ua kom lwm tus zoo siab ntawd puas zoo? (Tsis zoo.) Thaum ntsib cov xwm txheej zoo li no, tib neeg feem coob xum zam thiab nyob deb ntawm cov teeb meem no, es tsis yog muaj kev sib cov nyom nrog cov tib neeg phem ntawd, kom lawv thiaj li zam tau qhov ua rau cov tib neeg phem ntawd chim thiab ua rau nyuaj rau kev sib raug zoo nrog cov neeg phem ntawd tom qab ntawd tsis yog lod? Tsis yog tib neeg feem coob yeej ua raws li lub hauv paus ntsiab lus rau kev ua neej hauv ntiaj teb ntawm kev ua ib tug tib neeg uas ua kom lwm tus zoo siab lod? (Yog.) Yog li ntawd qhov ntawd yog ib qho teeb meem. Muab xam hais tias yim caum feem pua ntawm cov tib neeg nyob rau hauv ib lub pawg ntseeg puav leej yog cov tib neeg uas ua kom lwm tus zoo siab, thiab thaum lawv pom cov tib neeg phem zoo li no txeeb lub meej mom, kev muaj yeej, thiab txoj hauj lwm ua thawj coj nyob rau hauv lub neej hauv pawg ntseeg, tsis muaj leej twg sawv los cheem los sis txwv lawv, thiab feem coob tuav txoj kev xam pom hauv qab no: “Qhov teeb meem tsawg npaum li cas, yim zoo npaum li ntawd. Kuv thab tsis tau lawv es kuv zam lawv tsis tau lod? Kuv cia li nyob deb ntawm lawv ces tag li ntawd xwb. Cia lawv txeeb lawv; thaum lub sij hawm los txog, Vajtswv yuav rau txim rau lawv. Qhov ntawd muaj feem xyuam dab tsi nrog kuv!” Nyob rau hauv cov xwm txheej no, es lub neej hauv pawg ntseeg puas tseem muaj txiaj ntsig tau? Tib neeg feem coob tub nkeeg thiab vam khom lwm tus; thaum xaiv tsa tau cov thawj coj pawg ntseeg lawm, lawv xav tias lawv tes hauj lwm tiav lawm, thiab lawv tsuas tos kom cov thawj coj pawg ntseeg ua txhua yam xwb. Yog koj nug lawv seb cov phau ntawv ntawm Vajtswv cov lus puas tau raug faib nyob rau hauv lawv pawg ntseeg, seb puas muaj tej kev tab kaum los sis kev cuam tshuam rau lub neej hauv pawg ntseeg, los sis seb puas muaj leej twg pheej hais cov lus thiab cov kev qhuab qhia los sis txeeb lub meej mom nrog cov thawj coj, lawv hais tias, “Cov thawj coj pawg ntseeg paub txhua yam txog tej no. Kuv tsis paub txog tej ntawd thiab tsis tas yuav quav ntsej txog tej ntawd. Cov thawj coj yuav saib xyuas tej ntawd thaum lub sij hawm los txog.” Lawv tsis quav ntsej los sis tsis nug txog ib yam dab tsi, lawv tsis paub txog ib yam dab tsi li, thiab lawv tsis paub thiab tsis quav ntsej txog cov tib neeg, tej xwm txheej, los sis tej yam khoom twg uas muaj feem xyuam rau hauv lub neej hauv pawg ntseeg, uas lawv tsim nyog paub txog. Thaum hais txog tej uas cov tib neeg phem uas tshwm sim hauv pawg ntseeg tau hais thiab tau ua thaum cov tib neeg ntawd txeeb lub meej mom, nrog rau cov kev cuam tshuam thiab qee yam tsis zoo uas cov tib neeg ntawd tsim rau lub neej hauv pawg ntseeg, lawv tsis quav ntsej txog qhov no kiag li, thiab lawv tsis tshawb xyuas los yog nug txog tej yam no li. Tom qab qhov xwm txheej dhau lawm, yog koj nug lawv seb lawv puas tau txais kev paub cais, seb lawv puas paub cais cov tib neeg phem thiab cov tib neeg phem tej kev qhia tshwm uas pom tau meej yog dab tsi, lawv hais tsis tau ib yam dab tsi li tsuas yog hais tias, “Nug cov thawj coj pawg ntseeg; lawv paub txhua yam.” Tus tib neeg zoo li no tsis yog ib tug qhev lod? Lawv yog ib tug qhev, lawv tais caus thiab tsis muaj txiaj ntsim, thiab ua ib lub neej uas qias neeg. Tej xwm txheej uas cov tib neeg phem txeeb lub meej mom yuav tsum muaj kev paub cais, kev saib xyuas, thiab kev daws. Qhov no tsis yog cov thawj coj pawg ntseeg lub luag hauj lwm xwb; cov neeg Vajtswv xaiv tseg txhua tus muaj feem nrog lub luag hauj lwm no. Cov thawj coj feem coob to taub qee qhov tseeb ntau dua li tus tib neeg dog dig, ceev faj txog cov teeb meem no, thiab pom tau cov hom phiaj thiab lub ntsiab tseeb ntawm cov tib neeg no tej kev ua. Tib lub sij hawm ntawd, tib neeg feem coob kuj yuav tsum tau kawm kom paub thiab muaj kev paub cais tiag tiag, thiab koom ua ib lub siab ib lub ntsws nrog cov uas nyob rau hauv pawg ntseeg uas paub txog kev ncaj ncees, to taub qhov tseeb thiab caum qhov tseeb, los nqis tes daws cov tib neeg phem uas cuam tshuam thiab tab kaum lub neej hauv pawg ntseeg no kom tsim nyog. Lawv yuav tsum muab cov tib neeg ntawd cais los sis ntsaig tawm mus, es tsis yog sawv ntsia xwb, thiab tsuas lam mloog kev sib qhia me ntsis, qhib lawv lub zeem muag me ntsis, thiab muaj qee qhov kev paub txog qhov teeb meem hauv lawv lub siab thaum ntsib cov teeb meem no, es tom qab ntawd txawm xav tias lawv tes hauj lwm tiav lawm. Qhov no yog vim lub neej hauv pawg ntseeg tsis yog ib yam uas tsuas muaj feem xyuam rau cov thawj coj pawg ntseeg xwb, thiab kev ua ib lub neej hauv pawg ntseeg uas zoo thiab tiv thaiv qhov raws qib raws duas uas ib txwm muaj ntawm lub neej hauv pawg ntseeg tsis yog cov thawj coj pawg ntseeg lub luag hauj lwm xwb—nws xav tau kev sib koom tes ntawm txhua tus sawv los tswj nws.

Cov tib neeg uas txeeb lub meej mom—hom uas tau hais nyob rau hauv qhov teeb meem tsib—mas nquag tshwm sim nyob rau hauv lub neej hauv pawg ntseeg. Lawv tej kev qhia tshwm uas pom tau meej tshaj plaws yog lawv txeeb lub meej mom nrog cov thawj coj pawg ntseeg, tom qab ntawd yog txeeb lub meej mom nrog cov uas muaj lub peev xwm zoo thiab nkag siab qhov tseeb yam yog dua me ntsis ntawd, cov uas muaj kev to taub ntawm sab ntsujplig, thiab cov uas to taub qhov tseeb tej hauv paus ntsiab lus uas nyob rau hauv cov kwv tij thiab cov nkauj muam, nquag sib cov nyom nrog cov tib neeg no. Cov tib neeg no pheej sib qhia txog qee qhov kev to taub uas yog thiab qhov kaj nyob rau hauv lub neej hauv pawg ntseeg, qhia qee qhov kev ntsib kev pom ntawm tus kheej uas muaj nuj nqis thiab qhia txog kev to taub uas muaj tiag; qhov no pab thiab txhawb tau cov kwv tij thiab cov nkauj muam heev. Tom qab hnov lawv kev sib qhia, cov kwv tij thiab cov muam muaj ib txoj hau kev, paub tias yuav xyaum ua raws thiab ntsib pom Vajtswv txoj lus li cas thiab yuav daws lawv tus kheej cov teeb meem li cas. Lawv ua tsaug ntau ntau rau Vajtswv txoj kev coj, thiab tib lub sij hawm ntawd, lawv qhuas thiab hwm cov uas muaj ib qho kev to taub yog txog qhov tseeb thiab cov kev ntsib kev pom uas muaj tiag. Yog li ntawd, lawv thiaj li nyiam saib cov tib neeg no siab me ntsis thiab txav ze rau cov neeg no me ntsis. Qhov muaj tej yam zoo uas ua rau Vajtswv zoo siab nyob rau hauv lub neej hauv pawg ntseeg yog qhov cov uas txeeb lub meej mom tsis xav pom tshaj plaws. Thaum twg lawv pom ib tug neeg sib qhia txog cov kev ntsib kev pom uas muaj tiag, lawv hnov tsis xis nyob thiab khib, hnov txaj muag tshwj xeeb. Nyob hauv lawv qhov txaj muag ntawd, lawv qhia ib tug cwj pwm txog qhov tsis kam mloog lus, saib tsis taus, thiab tsis txaus siab, pheej xam hauv lawv lub siab tias yuav ua li cas thiaj li ua rau cov uas muaj cov kev ntsib kev pom uas muaj tiag thiab to taub qhov tseeb ntawd poob ntsej muag, nrog rau qhov yuav ua li cas thiaj li ua rau cov kwv tij thiab cov nkauj muam pom cov tib neeg ntawd tej qhov ua tsis tau zoo thiab muaj tsis txaus, es tsis txhob saib cov tib neeg ntawd siab los sis tsis txhob txav ze rau cov tib neeg ntawd ntxiv lawm. Yog li ntawd, cov uas txeeb lub meej mom yeej yuav tsum hais qee yam thiab ua qee yam xwb xwb li. Lawv tawm tsam thiab cais cov uas qhia cov lus tim khawv uas hais txog txoj kev ntsib kev pom thiab cov uas nquag sib qhia txog qhov tseeb uas yug thiab pab tau cov kwv tij thiab cov nkauj muam txoj kev nkag mus rau hauv lub neej txoj sia. Lawv nquag tuav rawv qhov txhaum ntawm cov tib neeg uas zoo thiab muab cov tib neeg uas zoo ntawd tej qhov ua tsis tau zoo ntawd nthuav tawm, nrog lub hom phiaj uas yuav ua kom cov neeg Vajtswv xaiv tseg nyob deb ntawm txhua tus uas pheej sib qhia txog qhov tseeb thiab qhia cov lus tim khawv uas hais txog txoj kev ntsib kev pom. Muab hais luv luv ces, cov uas txeeb lub meej mom yog cov tib neeg tsis zoo uas nkag los rau hauv pawg ntseeg thiab ua lub luag hauj lwm ntawm Ntxwgnyoog cov tub qhe.

Ib tug nkauj muam, uas tau ua yuam kev nyob rau hauv sab kev sib raug zoo ntawm txiv neej thiab poj niam ua ntej ntseeg Vajtswv, tom qab los ua ib tug neeg ntseeg lawm nws tau lees txim hloov dua siab tshiab thiab yeej tsis tau ua tej kev ua yuam kev zoo li ntawd ntxiv lawm. Nws hnov tu siab tshwj xeeb txog nws tej kev ua txhaum yav tas los thiab yog li ntawd thiaj li qhib siab thiab sib qhia nrog cov kwv tij thiab cov muam. Lub hom phiaj thiab lub hauv paus ntsiab lus ntawm kev qhib siab thiab sib qhia yog dab tsi? Qhov ntawd yog txhawm rau txhawb kev sib to taub thiab tshem tawm cov kev thaiv hauv siab ntawm cov kwv tij thiab cov nkauj muam. Cov kwv tij thiab cov muam feem coob, tom qab to taub qhov tseeb, tuaj yeem qhib siab thiab sib qhia txog lawv tus kheej cov kev qhia tshwm txog txoj kev qias vuab tsuab thiab tej kev yuam cai yav tas los, tib lub sij hawm ntawd kuj qhia kev ua tsaug thiab qhuas rau Vajtswv txoj kev cawm dim. Qhov qhib siab thiab sib qhia zoo li no puas tsim nyog? (Tsim nyog.) Tom qab to taub qhov tseeb, cov kwv tij thiab cov muam feem coob tuaj yeem qhib siab thiab sib qhia li no; qhov no puas yog ib qho teeb meem? (Tsis yog.) Qhov ntawd yog ib qho ib txwm muaj heev uas tib neeg tau ua qee qhov kev ua yuam kev nyob rau hauv lawv txoj kev sib raug zoo ntawm txiv neej thiab poj niam los sis hauv lwm yam ua ntej los ntseeg Vajtswv. Ib txhia tib neeg tuaj yeem tham txog cov kev ua yuam kev no, tiam sis qee tus zais thiab ua txuj, thiab txawm lwm tus yuav xyaum qhib siab thiab nthuav lawv tus kheej tawm li cas los, lawv tsis hais ib yam dab tsi txog lawv tus kheej li. Lawv ntseeg tias cov kev ua yuam kev no yog tej yam zais ntshis, uas lawv qhia tsis tau rau leej twg paub li, tsam lawv lub suab npe, lub ntsej muag, thiab lub meej mom yuav ploj mus. Txawm li cas los xij, ib txhia tib neeg to taub tej yam txawv; lawv ntseeg tias txij li thaum lawv tau los ntseeg Vajtswv thiab tau lees txais Vajtswv txoj kev cawm dim lawm, tam sim no lawv yuav tsum qhib siab thiab sib qhia txog lawv tej kev ua txhaum yav tas los thiab tej txoj kev yuam kev uas lawv tau taug, thiab muab tej ntawd tawm los soj ntsuam, thiab tias cov no tsuas yog tej yam uas lawv tau ntsib tau pom raws li cov tib neeg uas raug Ntxwgnyoog ua kom qias vuab tsuab lawm xwb. Tam sim no, lawv tuaj yeem qhib siab lug, nthuav lawv tus kheej tawm, thiab sib qhia. Txawm hais tias qhov ntawd yog los soj ntsuam yav dhau los los sis muab qhov ntawd xaus mus los xij, qhov tseeb tias cov tib neeg no tuaj yeem ua qhov no ua pov thawj tias lawv tus cwj pwm rau kev xyaum ua raws qhov tseeb yog dab tsi: Lawv txaus siab xyaum ua raws qhov tseeb, thiab lawv muaj kev txiav txim siab los xyaum ua raws qhov tseeb. Yuav xyaum ua li cas tiag tiag ntawd mas nyob ntawm lawv txoj kev to taub thiab kev txiav txim siab. Txawm li cas los xij, kev qhib siab thiab nthuav tus kheej tawm ntawd yeej tsis yog ib qho kev ua yuam kev, thiab haj yam tsis yog ib qho kev txhaum. Yuav tsum tsis txhob muab qhov ntawd siv los ua ib yam dab tsi los tawm tsam ib tug neeg twg, thiab haj yam tsis txhob dhau los ua pov thawj uas lwm tus neeg siv los tawm tsam lawv. Feem coob ntawm cov tib neeg tuaj yeem coj kom yog rau qhov no, qhov ntawd yog, lawv qhov kev nkag siab txog qhov ntawd yeej yog lawm thiab mus raws li qhov tseeb tej hauv paus ntsiab lus. Txawm li cas los xij, cov tib neeg phem muaj cov kev npaj siab uas tsis yog; cov tib neeg phem ntawd pheej tuav rawv tej yam tsis zoo ntawm tib neeg los thuam luag lawv, muab lawv ua khoom ua si, thiab txiav txim rau lawv. Cov kev ua phem zoo li no pom tseeb heev. Cov uas muaj peev xwm nthuav lawv tus kheej tawm, qhib siab lug, thiab qhia lawv txoj kev qias vuab tsuab thiab tej txoj kev yuam kev uas lawv tau taug lawm ntawd, nyob hauv lawv qhov coj rau qhov tseeb thiab rau Vajtswv cov lus ntawd mas, lawv muaj lub siab uas tshaib thiab nqhis txoj kev ncaj ncees. Yog li ntawd, thaum lawv nyeem Vajtswv cov lus, lawv tau txais qee qhov kev to taub tiag tiag thiab kev paub kev pom uas muaj tiag yam tsis paub txog. Tej kev to taub thiab tej kev paub kev pom uas muaj tiag no pab lawv nrhiav tau txoj kev los xyaum ua raws thaum ntsib kev nyuaj thiab ntau yam xwm txheej uas tshwm sim hauv lawv lub neej, qhov no ua rau lawv muaj qee qhov kev to taub tiag tiag txog qhov tseeb los ntawm kev ntsib kev pom. Kev sib qhia cov kev to taub tiag tiag los ntawm kev ntsib kev pom no mas txhawb thiab pab tau lwm tus; cov kwv tij thiab cov muam yuav saib cov tib neeg no nrog kev qhuas thiab kev hwm, hais tias, “Koj cov kev ntsib kev pom uas muaj tiag yeej zoo kawg nkaus. Tom qab hnov txog tej ntawd lawm, kuv hnov tau zoo tib yam nkaus thiab. Kuv pom tias koj txoj kev xyaum ua raws mas yog lawm thiab Vajtswv foom koob hmoov rau. Kuv kuj txaus siab tso kuv tus kheej cov kev xav phem thiab kev xav nkhaus thiab tso kuv tej nra tseg thiab; kuv xav xyaum ua raws qhov tseeb nyob rau hauv ib txoj kev yooj yim thiab tau txais Vajtswv txoj kev qhia kom paub thiab kev coj zoo li koj. Txoj kev no yog txoj kev uas yog.” Tej kev qhia tshwm uas pom tau meej no puas yog ib txwm muaj? Qhov kev sib raug zoo uas zoo li no tshwm sim ntawm cov kwv tij thiab cov nkauj muam puas yog tsim nyog heev? Qhov no yog ib hom kev sib raug zoo ntawm tib neeg uas txawv ntawm hom uas pom nyob rau hauv cov uas tsis ntseeg Vajtswv; qhov ntawd yog ib qho uas Vajtswv lees paub thiab Nws xav pom. Tsuas yog thaum muaj kev sib raug zoo li ib txwm muaj li no ntawm cov kwv tij thiab cov muam thiaj li muaj lub neej hauv pawg ntseeg uas ib txwm muaj. Txawm li cas los xij, yuav muaj qee cov tib neeg phem los sis qee tus uas muaj kev npaj siab phem, uas yuav sawv los tawm tsam, thuam, thiab cais cov uas muaj kev ntsib kev pom uas muaj tiag tawm, cov uas tshaib thiab nqhis qhov tseeb, thiab cov uas qhuas thiab hwm cov tib neeg uas muaj kev ntsib kev pom. Vim li cas lawv thiaj tawm tsam cov tib neeg no? Lawv lub hom phiaj tsis yog lwm yam tiam sis yog txhawm rau txeeb ib lub meej mom nyob rau hauv pawg ntseeg. Vim lawv tsis nyiam qhov tseeb los sis tsis caum qhov tseeb, lawv ua txuj ua cov neeg caum qhov tseeb los ntawm kev tsim cov kev ntsib kev pom cuav los coj txhua tus mus yuam kev thiab kom tau txais tib neeg kev saib siab. Qhov no yog siv txoj kev uas Ntxwgnyoog siv los coj tib neeg mus yuam kev thiab tswj tib neeg kom tau lub meej mom thiab lub hwj chim uas lawv xav tau. Cov xwm txheej zoo li no nquag tshwm sim hauv cov pawg ntseeg txhua qhov chaw thiab txhua tus mas pom tau. Yog nej pom tias qee cov kwv tij thiab cov nkauj muam muaj qee qhov tseeb qhov muaj tiag, muaj peev xwm sib qhia txog txoj kev to taub tiag tiag los ntawm kev ntsib kev pom txog Vajtswv cov lus thaum sib txoos ua ke, thiab tau txais kev qhuas los ntawm ntau tus neeg, tiam sis vim qee yam laj thawj lawv raug tawm tsam, raug ua pauj, thiab poob mus rau hauv txoj kev mob siab los ntawm qee tus neeg, ces nej yuav tsum ceev faj, thiab paub cais tias hom tib neeg twg muaj txoj kev coj no. Vim li cas cov uas caum qhov tseeb pheej raug tawm tsam thiab raug cais tawm? Qhov no yog ua li cas tiag tiag? Qhov no yeej qhia tias muaj ib qho teeb meem.

Nyob rau hauv lub neej hauv pawg ntseeg, yuav tsum ua tib zoo saib xyuas cov uas pheej nrhiav cov thawj coj thiab cov neeg ua hauj lwm qhov txhaum tas li ntawd. Tsis tas li ntawd xwb, ib txhia tib neeg pheej thuam, thuam luag, los sis tawm tsam cov uas caum qhov tseeb dua me ntsis thiab ntshaw Vajtswv cov lus ntawd. Cov neeg tsis zoo no kuj yuav tsum tau saib xyuas kom zoo thiab ua tib zoo saib seb lawv cov kev ua tom ntej yuav yog dab tsi. Yog muaj leej twg muaj peev xwm nthuav tawm qhov tsis zoo ntawm cov thawj coj pawg ntseeg los sis tawm tsam cov tib neeg uas muaj qhov tseeb qhov muaj tiag yam tsis muaj laj thawj dab tsi thaum koom lub neej hauv pawg ntseeg, ces yeej muaj ib qho teeb meem thiab ib qho laj thawj nyob tom qab; yeej tsis yog tias tsis muaj laj thawj li. Cov kwv tij thiab cov nkauj muam yuav tsum ua tib zoo saib xyuas cov tib neeg zoo li no vim qhov no tsis yog ib qho teeb meem me. Qee zaus, tom qab nyuam qhuav hnov ib zaj lus tim khawv txog txoj kev ntsib kev pom tiag tiag thiab hnov muaj kev xyiv fab puv npo hauv yus lub siab, los sis tom qab nyuam qhuav tau txais ib qho kev kaj thiab kev to taub me ntsis, es tseem raug ua rau ntxhov siab los ntawm ob peb lo lus coj mus yuam kev uas cov tib neeg phem hais, yog li ntawd thiaj li poob txhua yam uas nyuam qhuav tau txais los ntawd lawm. Kiag thaum nyuam qhuav pib tsim tau txoj kev ntseeg me ntsis, ces cia li raug cov tib neeg phem cuam tshuam thiab rov qab mus rau tus yam ntxwv qub lawm; kiag thaum pib muaj kev ntshaw me ntsis rau qhov tseeb thiab Vajtswv cov lus, nrog rau kev txiav txim siab me ntsis uas los xyaum ua raws qhov tseeb, cia li raug cov tib neeg phem cuam tshuam, ua rau poob siab thiab tsis muaj zog, ces tom qab ntawd xav tawm ntawm qhov chaw uas muaj kev tsis sib haum xeeb no mus kom sai li sai tau. Tej qhov tshwm sim los no puas hnyav? Tej no mas hnyav heev. Yog li ntawd, nyob rau hauv pawg ntseeg, yog muaj leej twg uas pheej pib kev sib cav txog qee yam uas tsis mus raws li lawv lub siab nyiam, sib cav txog tias leej twg yog tus yog, sib cav txog qhov yog thiab qhov txhaum, thiab haj tseem sib cav tias leej twg siab dua los sis qis dua, ces yuav tsum tau ua tib zoo ceev faj cov tib neeg zoo li no. Saib seb lawv ua lub luag hauj lwm dab tsi nyob rau hauv pawg ntseeg, lawv coj tej qhov tshwm sim dab tsi los, thiab los ntawm qhov no, koj yuav pom tau tshab tias lawv tus yam ntxwv xeeb txawm lub ntsiab tseeb yog dab tsi.

Nyob rau hauv lub neej hauv pawg ntseeg, kuj muaj lwm hom kev qhia tshwm uas pom tau meej ntawm kev txeeb lub meej mom uas muaj feem xyuam txog kev tab kaum thiab cuam tshuam lub neej hauv pawg ntseeg thiab pawg ntseeg tes hauj lwm. Piv txwv li, qee zaus thaum cov kwv tij thiab cov muam tab tom sib qhia txog ib qho teeb meem ua ke, txhua tus txoj kev sib qhia muaj kev kaj me ntsis; lawv yim sib qhia, yim pom tseeb thiab meej dua txog qhov tseeb tej hauv paus ntsiab lus, thiab kuj to taub txog txoj kev xyaum ua raws tau sai thiab. Txawm li cas los xij, tej zaum muaj neeg yuav cia li muab ib lub “tswv yim zoo,” uas yog lawv ib qho kev tawm tswv yim los, ua rau txiav txoj kev sib qhia thiab hloov lub ncauj lus mus rau lwm lub, ua rau txoj kev sib qhia txog lub ntsiab lus tseem ceeb ntawd tsis tau tiav es cia li muab tso cia lawm. Saib sab nraud mas, zoo li lawv tsis tau ua kev cuam tshuam, thiab haj yam tsis yog tias lawv txwv lwm tus kom txhob sib qhia qhov tseeb, tiam sis lawv tsis xaiv lub sij hawm uas tsim nyog los muab lub ncauj lus no los hais. Los ntawm qhov ntxig ib qho teeb meem tshiab los sib qhia thiab sib tham nyob rau lub sij hawm tseem ceeb thaum tab tom sib qhia qhov tseeb los daws ib qho teeb meem, qhov teeb meem ua ntej ntawd raug txiav tu ua ntej yuav daws tau kom tiav hlo. Qhov no tsis yog muab txoj hauj lwm tso tseg ntawm ib nruab nrab ke lod? Qhov no tsis yog ua rau ncua kev daws qhov teeb meem lod? Tsis yog qhov teeb meem daws tsis tau xwb, tiam sis tib neeg txoj kev to taub txog qhov tseeb kuj raug ncua thiab. Cov tib neeg uas muaj laj thawj puas yuav ua li no? Puas yog qhov hais tias tej yam zoo li no tab kaum thiab cuam tshuam lub neej hauv pawg ntseeg dhau hwv lawm? Kuv xav tias yeej tsis dhau kiag li. Qhov cuam tshuam kev sib txoos ua ke zoo li no thaum tib neeg tab tom sib qhia qhov tseeb los daws ib qho teeb meem—qhov no tsis yog txhob txwm tab kaum thiab cuam tshuam lub neej hauv pawg ntseeg lod? Yog muaj leej twg pheej tuaj cuam tshuam nyob rau lub sij hawm tseem ceeb thaum tab tom sib qhia qhov tseeb los daws ib qho teeb meem, yog lawv pheej sim txiav lus kom tu, ces qhov no tsis yog ib qho teeb meem ntawm qhov tsis muaj laj thawj lawm; qhov ntawd yeej yog txhob txwm cuam tshuam kev sib txoos ua ke thaum tab tom sib qhia qhov tseeb los daws ib qho teeb meem, qhov ntawd yeej yog kev ua phem ntawm kev tab kaum thiab kev cuam tshuam lub neej hauv pawg ntseeg tiag tiag li—tsuas yog cov tawm tsam khetos thiab cov tib neeg phem thiaj li ua tau li no, tsuas yog cov tib neeg uas ntxub qhov tseeb thiaj li ua tau li no xwb. Txawm nyob rau ib puag ncig los sis qhov xwm txheej twg los xij, cov tib neeg zoo li no mas yeej yuav tsum hais lawv “cov tswv yim zoo” tawm los tas li, lawv pheej xav kom lwm tus ntsia lawv, kom sawv daws tsom ntsoov rau lawv. Txawm lub ncauj lus uas tib neeg tab tom sib qhia ntawd yuav tseem ceeb npaum li cas los, lawv pheej yuav tsum tuaj cuam tshuam los hloov tib neeg qhov kev tsom ntsoov thiab hais tej lus uas mloog zoo li siab heev, xav ua kom lawv txawv lwm tus. Lawv sim ua yam tswv yim dab tsi tiag? Lawv tsis yog tab tom txeeb lub meej mom lod? Lawv xav tswj qhov xwm txheej ntawd. Lawv tsis xav kom tib neeg muaj kev to taub zoo dua thiab pom meej dua rau hauv qhov tseeb; yam uas lawv quav ntsej tshaj plaws mas yog ua kom txhua tus tsom ntsoov rau lawv, mloog lawv hais, thiab mloog lawv lus, thiab kom txhua tus ua raws li lawv hais. Qhov no pom meej meej tias yog kev txeeb lub meej mom. Rau ib txhia tib neeg mas, txawm lawv yuav ua tes hauj lwm twg los, thaum koj nug kom lawv sib qhia txog tej tswv yim thiab tej kev npaj tiag tiag los ua kom tiav ib yam dab tsi, thiab tej kauj ruam tiag tiag los xyaum ua tej ntawd kom ntxaws, lawv yeej hais tsis tau ib yam dab tsi li. Tiam sis, lawv nyiam hais tej lus uas mloog zoo li siab heev, ua kom lawv txawv lwm tus, thiab ua tej yam tshiab uas ua rau lwm tus xav tsis thoob. Txawm qhov xwm txheej tam sim ntawd yuav yog dab tsi los xij, kiag thaum lawv muaj ib lub tswv yim tshiab, lawv muab los qhia yam li lawv tau txais kev tshoov siab, maj nrawm nroos muab tawm los hais kom lwm tus lees txais thiab pom zoo, yam tsis tau ua tib zoo xav li. Tiam sis thaum kawg raug nug kom tham txog tej txoj kev xyaum ua raws ntxaws ntxaws mas, lawv cia li hais tsis tau li lawm. Lawv tsis muaj peev xwm, tiam sis tseem xav nthuav tawm lawv tus kheej, pheej xav kom lwm tus ntsia lawv. Lawv tsis kam ua tus nyob tom qab; lawv tsis xav ua ib tug neeg raws qab dog dig. Lawv pheej ntshai tsam lwm tus saib tsis taus lawv, thiab lawv pheej xav ua kom lwm tus pom lawv. Yog li ntawd lawv thiaj li pheej hais tej lus uas mloog zoo li siab heev los nthuav tawm lawv tus kheej. Qhov uas pheej ua li no yog ua li cas tiag? Thaum muaj ib lub tswv yim tshwm rau hauv lawv lub siab, lawv ntseeg yam dig muag ntsuav tias lub tswv yim ntawd zoo thiab tsim nyog xyaum ua raws yam tsis ua tib zoo xav los sis ua ntej lub tswv yim ntawd yuav khov txaus. Thaum lawv maj nrawm nroos muab lub tswv yim no tawm los, lwm tus tib neeg tsis to taub lub tswv yim ntawd thiab yeej yuav cia li nug qee cov lus nug. Thaum teb tsis tau, lawv tseem tuav rawv hais tias lawv qhov kev xav yog lawm thiab txhua tus yuav tsum lees txais. Qhov no yog hom moj yam twg? Qhov uas lawv pheej tuav rawv lawv tus kheej tej kev xam pom yam tsis muaj hauv paus hauv ntsis ntawd yuav coj tej qhov tshwm sim dab tsi los? Qhov ntawd puas muaj txiaj ntsim los sis cuam tshuam rau pawg ntseeg tes hauj lwm? Qhov ntawd muaj txiaj ntsim los sis muaj kev puas tsuaj rau cov neeg Vajtswv xaiv tseg? Lawv muaj peev xwm hais li no yam tsis muaj kev ris lub luag hauj lwm hlo li ntawd—lawv lub hom phiaj yog dab tsi? Qhov ntawd tsuas yog kom lwm tus pom lawv xwb. Lawv ntshai tsam lwm tus yuav tsis paub tias lawv muaj cov “tswv yim zoo” no, yuav tsis paub tias lawv muaj peev xwm, txawj ntse, thiab ua tau hauj lwm; lawv siv zog txeeb kom tau ntsej muag, kom cov tib neeg feem coob saib lawv rau qhov siab. Thaum kawg zoo li cas? Lawv maj nrawm nroos tawm tswv yim, thiab thaum xub thawj lwm tus xav tias lawv yeej muaj peev xwm tiag tiag, muaj qee yam dab tsi uas muaj tseeb. Tiam sis thaum sij hawm dhau mus, thiaj li pom tseeb tias lawv tsuas yog cov neeg ruam xwb, tsis muaj kev paub los sis kev txawj tiag tiag tiam sis pheej xav ua tus txiav txim siab kawg. Qhov no yog kev txeeb lub meej mom. Tsis muaj peev xwm tiag tiag, lawv tseem xav ua tus txiav txim siab; lawv pheej hais tej lus uas mloog zoo li siab heev yam muab tsis tau ib qho kev npaj tiag tiag tawm los, tsis muaj ib txoj kev tiag tiag rau qhov kev xyaum ua raws li. Yog tso ib txoj hauj lwm rau cov tib neeg zoo li no ua tiag tiag, tej qhov tshwm sim los yuav yog dab tsi? Qhov ntawd yeej yuav ua rau muaj kev qeeb xwb. Vim li cas lawv thiaj li pheej nrhiav kev txeeb lub meej mom, kom muaj hwj chim, thaum lawv ua tsis tau ib yam dab tsi tiav li? Lawv ces yog cov neeg ruam uas tsis muaj hlwb xwb; muab hais kom zoo mloog me ntsis, lawv tsis muaj laj thawj kiag li. Nyob hauv cov ib txwm tsis ntseeg, muaj cov tib neeg zoo li no coob heev, tsuas txawj hais xwb tiam sis tsis ua. Tib neeg feem coob muaj peev xwm paub cais me ntsis txog hom neeg no. Yog muaj leej twg pheej hais tej lus uas mloog zoo li siab heev thiab xav ua kom lawv txawv lwm tus, ces yus yuav tsum tau ceev faj kom thiaj li tsis raug lawv dag. Yog muaj ib tug neeg uas muaj cov tswv yim zoo tiag uas tuaj yeem coj tau ib qho kev npaj tiag tiag tawm los, qhov ntawd tsuas lees txais tau yog tias ua tau tiag xwb; yog lawv tsuas hais tej lus uas mloog zoo li siab heev yam coj tsis tau tej kev npaj tiag tiag tawm los, ces yus yuav tsum tau ceev faj lawv. Tsim nyog sib qhia seb puas muaj txoj kev ua tau tiag hauv lawv cov tswv yim ntawd los tsis muaj. Yog feem coob xav tias lawv lub tswv yim ntawd ua tau tiag thiab muaj ib txoj kev xyaum ua raws, ces yuav tsum tau sim ua ib ntus los saib seb cov txiaj ntsig zoo li cas ua ntej yuav txiav txim siab.

Txawm pawg ntseeg yuav sib qhia txog qhov tseeb sab twg los sis daws qhov teeb meem twg los xij, txhua hom tib neeg yeej yuav nthuav lawv tus kheej tawm. Tom qab sib cuag tau ntev lawm, ces tuaj yeem pom tias leej twg yog tus uas nyiam thiab lees txais tau qhov tseeb tiag tiag, thiab leej twg yog cov uas tab kaum thiab cuam tshuam, tsis quav ntsej txog tej tes hauj lwm uas tsim nyog ua. Nej xav tias cov uas nyiam hais tej lus uas mloog zoo li siab heev thiab muab tej tswv yim tshiab tawm los ntawd puas lees txais tau qhov tseeb thiab taug tau txoj kev yog ntawm kev ntseeg Vajtswv? Kuv xav mas tsis yooj yim rau lawv ua li no. Cov tib neeg no ua lub luag hauj lwm dab tsi nyob rau hauv lub neej hauv pawg ntseeg? Tej qhov tshwm sim los ntawm qhov uas lawv nquag hais tej lus uas mloog zoo li siab heev thiab tsis quav ntsej txog tej tes hauj lwm uas tsim nyog ua ntawd yog dab tsi? Qhov ntawd tab kaum thiab cuam tshuam lub neej hauv pawg ntseeg, raws li tib neeg feem coob pom tau, thiab yog qhov no tseem muaj mus ntxiv, nws yuav ua rau cov neeg Vajtswv xaiv tseg txoj kev caum qhov tseeb thiab kev nkag mus rau hauv qhov muaj tiag ntawd raug ncua. Txawm cov uas nyiam hais tej lus uas mloog zoo li siab heev ntawd tej zaum tsis yog cov tib neeg phem los, tej qhov tshwm sim los ntawm lawv cov kev ua mas ua kev puas tsuaj rau txoj kev nkag mus rau hauv lub neej txoj sia ntawm cov neeg Vajtswv xaiv tseg heev, thiab nyob rau tib lub sij hawm ntawd, lawv cov kev ua kuj ncua thiab cuam tshuam pawg ntseeg tes hauj lwm thiab. Yog li, qhov teeb meem no yuav tsum daws li cas? Cov tib neeg uas nyiam hais tej lus uas mloog zoo li siab heev thiab muab tej tswv yim tshiab tawm los ntawd yuav tsum daws kom tsim nyog li cas? Thawj txoj kev yog li no: Yog lawv nyiam hais tej lus uas mloog zoo li siab heev thiab pheej muaj kev xam pom, ces cia lawv xub hais, tom qab ntawd siv kev paub cais. Tsis hais leej twg, txhua tus muaj cai hais thiab nthuav lawv tej kev xav tawm; leej twg los yuav tsum tsis txhob txwv qhov no. Leej twg uas yeej muaj cov kev xav thiab tej tswv yim uas zoo tiag tiag yuav tsum cia kom lawv hais tawm thiab hais kom meej, kom txhua tus pom, ces tom qab ntawd sib qhia thiab sib tham saib seb qhov ntawd puas yog, puas mus raws li qhov tseeb tej hauv paus ntsiab lus, thiab seb puas muaj ib feem twg uas tuaj yeem txais yuav tau. Yog qhov ntawd tsim nyog kawm thiab tuaj yeem tau txais qee yam txiaj ntsim los ntawm qhov ntawd, ces qhov ntawd yog yam zoo; yog tom qab kev sib qhia thiab kev sib tham, es raug txiav txim tias yam uas lawv hais ntawd tsis muaj nuj nqis thiab tsis tsim nyog ua raws, ces yuav tsum muab tso tseg. Los ntawm kev xyaum ua li no, txhua tus yuav muaj kev paub cais ntau ntxiv lawm; thaum twg muaj ib yam dab tsi tshwm sim tuaj, lawv txhua tus yuav paub tias yuav ua tib zoo xav txog qhov teeb meem no li cas, thiab lawv yuav to taub ntau hom tib neeg zoo dua. Kev xyaum ua zoo li no muaj txiaj ntsim rau cov neeg Vajtswv xaiv tseg thiab yuav tsis coj kev cuam tshuam los rau pawg ntseeg tes hauj lwm; txoj kev xyaum ua no yog lawm. Txoj kev ob yog li no: Thaum yam uas hais tawm los ntawd tsis muaj nuj nqis, thiab txawm yuav sib qhia thiab sib tham txog qhov ntawd los yuav tsis tau txais ib yam txiaj ntsim dab tsi los ntawm qhov ntawd, ces yuav tsum tsis lees txais tej kev tawm tswv yim zoo li no ncaj qha, thiab tsis tas yuav muaj kev sib qhia los sis kev sib tham dab tsi li. Yog ib tug neeg pheej muab tej teeb meem uas tsis muaj nuj nqis thiab cov “tswv yim zoo” no tawm los, ua rau cov neeg Vajtswv xaiv tseg tsis nyiam kiag li thiab tsis xav mloog lawv hais, ces tus neeg zoo li no puas tsim nyog raug txwv? Qhov zoo tshaj yog ntuas lawv kom muaj laj thawj me ntsis, kom tsis txhob hais tej yam uas tsis tsim nyog hais kom thiaj li tsis cuam tshuam lwm tus. Yog tus neeg no tsis muaj laj thawj thiab tseem tuav rawv yuav ua li no mus ntxiv, ua rau muaj kev cuam tshuam rau lub neej hauv pawg ntseeg thiab ua rau txhua tus tsis nyiam kiag li, haj tseem mus txog theem npau taws thiab, ces lawv yog ib tug tib neeg phem uas cuam tshuam lub neej hauv pawg ntseeg. Lawv yuav tsum raug daws raws li Vajtswv lub tsev tej hauv paus ntsiab lus rau kev yaug pawg ntseeg kom dawb huv—ntsaig lawv tawm hauv pawg ntseeg mus; qhov no thiaj li tsim nyog. Nej hais seb, feem coob ntawm cov uas nyiam hais tej lus uas mloog zoo li siab heev ntawd yog hom neeg zoo li cas? Lawv puas yog hom uas caum qhov tseeb? Lawv puas muab lawv tus kheej fij rau Vajtswv tiag tiag? Yeej tsis yog kiag li. Yog li, lawv muaj lub hom phiaj thiab kev npaj siab dab tsi thaum ua rau muaj tej kev cuam tshuam rau lub neej hauv pawg ntseeg zoo li no? Qhov no cheem tsum kev paub cais. Yog txhua tus twb muaj kev to taub txaus txog cov tib neeg zoo li no lawm, paub tias lawv tsis muaj kev txawj ntse, peev xwm, thiab laj thawj—tias lawv tsuas yog cov neeg ruam xwb—txoj kev tsim nyog tshaj plaws los daws lawv thaum lawv nthuav lawv cov “tswv yim zoo” tawm tuaj ntawd yog cheem thiab txwv lawv, kom lawv kaw qhov ncauj. Yog lawv yeej yuav hais, yeej yuav ua tej kev cuam tshuam rau lub neej hauv pawg ntseeg, ces lawv yuav tsum raug ntsaig tawm hauv pawg ntseeg mus tiv thaiv kom tsis txhob muaj tej teeb meem tom ntej. Ib txhia hais tias, “Qhov no tsis yog rhuav tshem lawv lub cib fim uas yuav tau txais kev cawm dim lod?” Qhov hais li no mas yog yuam kev lawm. Vajtswv puas yuav cawm cov tib neeg zoo li no? Cov tib neeg uas muaj cov moj yam zoo li no puas lees txais tau qhov tseeb? Lawv puas tuaj yeem tau txais kev cawm dim yog tsis lees txais qhov tseeb kiag li? Qhov uas tsis tuaj yeem pom tshab tej xwm txheej zoo li no ntawd tsis yog ruam thiab tsis paub dab tsi dhau lawm lod? Txawm yuav zoo li cas los xij, cov uas pheej ua kev cuam tshuam rau lub neej hauv pawg ntseeg ntawd yog cov tib neeg phem, thiab Vajtswv tsis cawm lawv. Qhov tseg ib tug neeg uas Vajtswv tsis cawm cia nyob hauv pawg ntseeg, qhov ntawd tsis yog txhob txwm ua phem rau cov neeg Vajtswv xaiv tseg lod? Tus neeg uas khuv leej cov tib neeg phem zoo li no puas muaj kev hlub tiag tiag? Kuv xav tias tsis muaj; qhov ntawd yog kev hlub cuav. Qhov tseeb yog lawv muaj kev npaj siab yuav ua phem rau cov neeg Vajtswv xaiv tseg. Yog li ntawd, cov neeg Vajtswv xaiv tseg yuav tsum tau ceev faj rau txhua tus uas tiv thaiv cov tib neeg phem, kom tsis txhob raug lawv tej lus dab coj mus yuam kev. Ib txhia uas nyiam hais tej lus uas mloog zoo li siab heev, txawm lawv tsis zoo li cov tib neeg phem thiab tsis ua tej kev phem uas pom tseeb los, lawv tuaj yeem ua tej kev cuam tshuam rau lub neej hauv pawg ntseeg los ntawm qhov pheej hais lawv tej lus uas mloog zoo li siab heev; yam tsawg tshaj plaws, cov tib neeg no yog cov tib neeg ruam feeb tsis meej. Nej xav li cas, cov tib neeg ruam feeb tsis meej puas tuaj yeem tau txais kev cawm dim? Yeej tsis tau kiag li. Yog cov tib neeg ruam feeb tsis meej pheej cuam tshuam lub neej hauv pawg ntseeg, ces yuav tsum ntsaig lawv tawm hauv pawg ntseeg mus thiab. Cov tib neeg ruam feeb tsis meej tsis lees txais qhov tseeb, tawv ncauj tsis kam lees txim hloov dua siab tshiab, thiab lawv qhov kawg yog zoo ib yam nkaus li cov tib neeg phem thiab. Txawm yog cov tib neeg phem los sis cov neeg ruam feeb tsis meej, yog lawv pheej tab kaum thiab cuam tshuam lub neej hauv pawg ntseeg, tsis mloog lus ntuas, thiab hais lus tswj tsis tau zoo li ib lub tsheb puas uas nres tsis tau, qhov no tsis yog ib lub cim ntawm qhov laj thawj uas tsis zoo li ib txwm lod? Yog cov tib neeg ruam feeb tsis meej no cuam tshuam pawg ntseeg zoo li no mus ntev es tej qhov tshwm sim los yuav yog dab tsi? Tsis tas li ntawd xwb, lawv puas lees txim hloov dua siab tshiab tau tiag tiag? Vajtswv puas cawm cov tib neeg ruam feeb tsis meej uas muaj qhov laj thawj tsis zoo li ib txwm no? Thaum to taub cov lus nug no kom tshab lawm, ces yuav pom meej tias yuav daws cov tib neeg zoo li no kom tsim nyog li cas lawm. Cov tib neeg ruam feeb tsis meej yeej tsis nyiam qhov tseeb, thiab qhov tseeb nyob deb tshaj qhov uas lawv mus txog. Cov tib neeg ruam feeb tsis meej to taub tsis tau tib neeg cov lus; tuaj yeem hais tau tias cov tib neeg ruam feeb tsis meej ntawd tsis muaj kev ua neeg uas ib txwm muaj thiab vwm ib nrab lawm—tseeb tiag, lawv tsuas yog cov tsis muaj qab hau xwb. Cov tib neeg ruam feeb tsis meej puas ua tau dej num txhawb kom zoo? Yeej hais tau tias txawm ua dej num txhawb xwb los twb tsis mus raws li tus qauv vim lawv qhov laj thawj tsis zoo; lawv yog cov tib neeg uas tsis to taub qab hau dab tsi li. Yog muaj leej twg xav qhia kev hlub rau cov tib neeg ruam feeb tsis meej, ces cia lawv txhawb cov tib neeg ruam feeb tsis meej ntawd. Tus cwj pwm uas Vajtswv lub tsev coj rau cov tib neeg ruam feeb tsis meej ces yog yuav tsum muab lawv ntsaig tawm mus. Leej twg uas tsis lees txais qhov tseeb kiag li, leej twg uas tsis muaj lub siab dawb paug ua lawv tes dej num, ib txwm ua dog ua dig, yog lawv pheej ua kev cuam tshuam rau lub neej hauv pawg ntseeg tas li ces yuav tsum raug txwv. Yog ib txhia ntawm lawv hnov tu siab thiab txaus siab hlo lees txim hloov dua siab tshiab, ces yuav tsum muab lub cib fim rau lawv. Cov uas tseem pom tsis tau tshab lawv lub ntsiab tseeb ces yuav tsum tseg cia nyob hauv pawg ntseeg mus ib ntus, kom cov neeg Vajtswv xaiv tseg saib xyuas lawv, soj ntsuam lawv, thiab muaj kev paub cais ntau ntxiv. Yog muaj cov uas pheej tab kaum thiab cuam tshuam, thiab txawm raug ntuas los, tseem tawv ncauj tsis kam lees txim hloov dua siab tshiab, tseem txeeb lub koob npe thiab txiaj ntsim, tawm tsam thiab cais cov tib neeg zoo tawm—tshwj xeeb yog tawm tsam cov uas caum qhov tseeb thiab sib qhia tau cov lus tim khawv uas hais txog txoj kev ntsib kev pom, thiab cov uas muaj lub siab dawb paug muab lawv tus kheej fij rau Vajtswv thiab ua lawv tej dej num—ces cov tib neeg no yog cov tib neeg phem thiab cov tawm tsam khetos, lawv yog cov tsis ntseeg. Rau cov tib neeg zoo li no, ces tsis yog tsuas hais txog kev cheem thiab txwv lawv xwb; lawv yuav tsum raug ntsaig tawm hauv pawg ntseeg mus kom sai li sai tau kom tiv thaiv tau es tsis muaj tej teeb meem rau tom ntej. Txoj kev xyaum ua raws no yog mus raws li Vajtswv tej kev npaj siab tag nrho.

Tej no yog ntau hom kev qhia tshwm uas pom tau meej ntawm kev txeeb lub meej mom uas tsis ntau los tsawg, txij li cov uas me me mus rau cov uas hnyav. Tej kev qhia tshwm uas pom tau meej uas me me ntawd tseem ceeb yog hais txog kev thuam cov thawj coj thiab cov neeg ua hauj lwm los ntawm cov lus hnyav, thuam qhov me me, thiab tawm tsam txoj kev kub siab lug ntawm cov thawj coj thiab cov neeg ua hauj lwm, vim lub hom phiaj ntawm qhov xav muab lawv rhuav tshem thiab rhuav lawv lub npe. Tej kev qhia tshwm uas pom tau meej uas hnyav tshaj plaws yog kev tawm tsam cov thawj coj thiab cov neeg ua hauj lwm ncaj qha yam tab meeg, nrhiav tej yam los siv tawm tsam lawv thiab txiav txim, teem txim, tawm tsam, thiab cais lawv tawm, ces tom qab ntawd muab lawv cais tawm nyob ib leeg, thiab yuam kom lawv lees qhov txhaum thiab kom tawm hauj lwm es thiaj li txeeb tau lawv lub meej mom. Tej no yog tej teeb meem uas hnyav tshaj plaws ntawm kev tab kaum thiab kev cuam tshuam uas tshwm sim nyob rau hauv lub neej hauv pawg ntseeg. Cov uas tab meeg qw tawm tsam cov thawj coj los sis cov neeg ua hauj lwm ncaj qha thiab txeeb lub meej mom ntawm cov thawj coj los sis cov neeg ua hauj lwm ntawd yog cov uas cuam tshuam pawg ntseeg tes hauj lwm thiab tawm tsam Vajtswv, lawv yog cov tib neeg phem thiab cov tawm tsam khetos, thiab tsis yog tsuas yuav tsum cheem thiab txwv lawv xwb—yog qhov xwm txheej hnyav thiab cheem tsum kom ntsaig lawv tawm mus los sis ntiab lawv tawm, ces lawv yuav tsum raug daws raws li tej hauv paus ntsiab lus. Kuj tseem muaj lwm hom kev qhia tshwm uas pom tau meej ntawm kev txeeb lub meej mom thiab: cais tawm thiab tawm tsam cov uas caum qhov tseeb dua me ntsis nyob rau hauv pawg ntseeg. Vim cov uas caum qhov tseeb muaj ib txoj kev nkag siab uas yog, thiab lawv muaj kev ntsib kev pom thiab kev paub tiag tiag txog Vajtswv cov lus, thiab lawv nquag sib qhia qhov tseeb los daws tej teeb meem hauv cov kwv tij thiab cov muam, thiab yog li ntawd thiaj li txhawb tau cov neeg Vajtswv xaiv tseg, thiab maj mam tau txais lub koob meej nyob rau hauv pawg ntseeg, cov tib neeg phem thiab cov tawm tsam khetos no thiaj li khib thiab tsis kam zwm rau lawv, thiab cov tib neeg phem thiab cov tawm tsam khetos ntawd cais tawm thiab tawm tsam cov tib neeg no. Txhua txoj kev coj uas yog kev tawm tsam los sis cais cov uas caum qhov tseeb tawm ntawd mas yeej ua rau muaj tej kev tab kaum thiab kev cuam tshuam rau lub neej hauv pawg ntseeg ncaj qha. Ib txhia tib neeg tej zaum yuav tsis tsom mus rau cov thawj coj pawg ntseeg ncaj qha, tiam sis lawv tsis nyiam kiag li thiab saib tsis taus cov tib neeg uas to taub qhov tseeb thiab muaj kev ntsib kev pom tiag tiag hauv pawg ntseeg. Lawv kuj cais thiab tsim txom cov tib neeg zoo li no, nquag thuam thiab thuam luag, haj tseem cuab ntxiab rau cov tib neeg ntawd thiab xav tswv yim phem tawm tsam cov tib neeg ntawd, thiab ntau yam ntxiv. Txawm tej teeb meem zoo li no yuav tsis hnyav npaum li kev txeeb lub meej mom nrog cov thawj coj pawg ntseeg raws li lub ntsiab xeeb txawm thiab qhov xwm txheej ntawm tej teeb meem ntawd los xij, tej no kuj ua rau muaj kev tab kaum thiab kev cuam tshuam rau lub neej hauv pawg ntseeg thiab, thiab yuav tsum cheem thiab txwv. Yog cov kwv tij thiab cov nkauj muam feem coob nyob rau hauv pawg ntseeg raug kev cuam tshuam, thiab pheej poob mus rau hauv txoj kev xav tsis zoo thiab kev qaug zog tas li—yog tej teeb meem no coj mus rau tej qhov tshwm sim los zoo li no, ces tej ntawd yog kev tab kaum thiab kev cuam tshuam lawm. Hom tib neeg phem uas ua rau muaj tej kev tab kaum thiab kev cuam tshuam no yuav tsum tsis yog tsuas raug txwv xwb, lawv yuav tsum raug muab faib mus rau pab pawg B kom cais tawm thiab thim xav, los sis tsis li ntawd ces ntsaig tawm mus. Cov uas ua tej yam uas muaj lub ntsiab xeeb txawm ntawm qhov ua rau muaj tej kev tab kaum thiab kev cuam tshuam ces suav tau tias lawv yog cov tib neeg uas ib txwm ua phem. Yuav tsum muaj txoj kev coj sib txawv rau cov tib neeg phem uas nquag ua phem thiab cov uas qee zaus ua phem. Cov uas ua ntau yam kev phem yog cov tawm tsam khetos; cov uas ua phem qee zaus yog cov uas muaj kev ua neeg tsis zoo. Yog ob tug neeg sib cav los sis muaj kev tsis sib haum xeeb qee zaus vim lawv tus cwj pwm tsis sib haum, los sis vim lawv muaj kev xam pom tsis sib xws thaum ua tej yam, los sis vim lawv muaj kev hais lus tsis sib xws, tiam sis tsis muaj kev cuam tshuam rau lub neej hauv pawg ntseeg, ces qhov no tsis muaj lub ntsiab xeeb txawm ntawm kev ua rau muaj tej kev tab kaum thiab kev cuam tshuam; qhov ntawd txawv ntawm cov tib neeg phem uas tab kaum thiab cuam tshuam lub neej hauv pawg ntseeg. Txhua yam uas muaj lub ntsiab xeeb txawm ntawm kev ua rau muaj tej kev tab kaum thiab kev cuam tshuam rau lub neej hauv pawg ntseeg, uas peb tab tom hais txog no, puav leej yog tej kev qhia tshwm uas pom tau meej ntawm kev ua phem uas cov tib neeg phem ua. Thaum cov tib neeg phem ua phem, qhov ntawd yog ib txwm ua. Qhov uas cov tib neeg phem ntxub tshaj plaws ntawd mas yog cov tib neeg uas caum qhov tseeb. Thaum lawv pom tias ib tug twg uas caum qhov tseeb sib qhia tau lawv tus kheej cov lus tim khawv uas hais txog txoj kev ntsib kev pom, thiab yog li ntawd thiaj li tau txais kev ntshaw tshwj xeeb los ntawm lwm tus, ces lawv thiaj li khib, ntxub, thiab lawv lub qhov muag cig ua nplaim taws vim kev npau taws. Leej twg uas tig xav txog thiab paub lawv tus kheej, leej twg uas sib qhia lawv qhov kev ntsib kev pom tiag tiag, thiab leej twg uas ua tim khawv rau Vajtswv, ces yeej ntsib kev thuam luag, kev saib tsis taus, kev tsuj nias, kev cais tawm, kev txiav txim, thiab haj tseem yog kev tsim txom ntawm cov tib neeg phem no thiab. Lawv ib txwm ua li no. Lawv tsis pub rau leej twg kom zoo dua lawv, lawv ntsia tsis taus cov tib neeg uas zoo dua lawv. Thaum lawv pom leej twg uas zoo dua lawv, lawv khib, npau taws, chim heev, thiab xav txog kev ua phem thiab tsim txom cov neeg ntawd. Cov tib neeg zoo li no twb ua rau muaj kev tab kaum thiab kev cuam tshuam hnyav heev rau lub neej hauv pawg ntseeg thiab qhov raws qib raws duas uas ib txwm muaj ntawm pawg ntseeg lawm, thiab cov thawj coj thiab cov neeg ua hauj lwm yuav tsum koom tes nrog cov kwv tij thiab cov nkauj muam los nthuav tawm, cheem, thiab txwv cov tib neeg zoo li no. Yog tsis muaj peev xwm txwv tau lawv, thiab lawv tsis lees txim hloov dua siab tshiab los sis tsis hloov tom qab qhia qhov tseeb rau lawv lawm, ces lawv yog cov tib neeg phem, thiab cov tib neeg phem yuav tsum raug ntsuas thiab daws raws li Vajtswv lub tsev tej hauv paus ntsiab lus rau kev yaug pawg ntseeg kom dawb huv. Yog los ntawm kev sib qhia, cov thawj coj thiab cov neeg ua hauj lwm pom zoo ua ke, thiab paub tseeb tias qhov ntawd yog ib tug tib neeg phem cuam tshuam pawg ntseeg, ces qhov teeb meem no yuav tsum raug daws raws li qhov tseeb tej hauv paus ntsiab lus: Tus neeg ntawd yuav tsum raug ntsaig tawm hauv pawg ntseeg mus. Yuav tsum tsis txhob tso cai rau cov tib neeg phem zoo li no uas cuam tshuam lub neej hauv pawg ntseeg ntxiv lawm. Yog cov thawj coj thiab cov neeg ua hauj lwm pom meej tias qhov no yog ib tug tib neeg phem ua kev cuam tshuam, tiam sis lawv tseem ua txuj tsis paub thiab tso cai rau tus tib neeg phem ntawd ua phem thiab ua kev cuam tshuam, ces lawv yeej tsis ris lawv tej luag hauj lwm rau cov kwv tij thiab cov nkauj muam, thiab yeej tsis ua siab ncaj rau Vajtswv thiab rau Vajtswv cov lus txib.

Ib txhia tib neeg tej zaum yuav zoo li tsis ua li cas thaum saib lawv sab nraud, tiam sis tseeb tiag, lawv qhov kev txawj ntse zoo li cov neeg ruam feeb tsis meej. Lawv hais lus thiab ua hauj lwm yam tsis paub kev paub cai, tsis muaj kev paub tias dab tsi yog qhov tsim nyog ntawm kev ua neeg li ib txwm muaj. Cov tib neeg zoo li no kuj nyiam txeeb lub meej mom thiab lub koob meej, txeeb kom tau ua tus txiav txim siab kawg, thiab sib tw kom tau txais kev saib rau qhov siab los ntawm lwm tus. Nyob rau hauv lub neej hauv pawg ntseeg lawv nquag muab tej kev xam pom thiab kev sib cav uas saib zoo li yog tiam sis tseeb tiag yog yuam kev tawm los hais kom tau txais kev tsom ntsoov thiab kev saib rau qhov siab los ntawm lwm cov tib neeg feem coob, uas cuam tshuam tib neeg tej kev xav, cuam tshuam lawv txoj kev nkag siab thiab kev paub uas yog ntawm Vajtswv cov lus, thiab cuam tshuam lawv txoj kev to taub uas zoo txog txhua yam. Thaum lwm tus tab tom sib qhia txog Vajtswv cov lus thiab txog lawv txoj kev to taub uas yog, cov tib neeg no nquag dhia tawm los zoo li cov neeg ua txaus luag kom lwm tus pom lawv, thiab kom txhua tus tsom ntsoov rau lawv, pheej xav qhia rau cov kwv tij thiab cov nkauj muam paub tias lawv muaj peev xwm, thiab lawv txawj ntse, thiab muaj kev paub thiab kev kawm siab, thiab lwm yam ntxiv. Txawm lawv tseem tsis tau muaj tej hom phiaj meej meej tias yuav tsom mus rau tus thawj coj twg, los sis yuav txeeb tus thawj coj twg lub meej mom los, vim lawv tej kev ntshaw thiab tej kev xav ua loj dhau es lawv tej lus thiab tej kev ua tau ua rau muaj tej kev cuam tshuam rau lub neej hauv pawg ntseeg, yog li ntawd kuj yuav tsum txwv lawv raws li qhov hnyav ntawm qhov xwm txheej thiab lub ntsiab xeeb txawm. Qhov zoo tshaj mas yog xub qhia qhov tseeb rau lawv los coj qhia lawv kom yog, thiab muab ib txoj kev rau lawv coj lawv tus kheej, es pab lawv hloov lawv tus kheej, thiab to taub tias yuav ua lub neej hauv pawg ntseeg li ib txwm li cas, yuav sib raug zoo nrog lwm tus li cas, yuav nyob rau hauv lawv qhov chaw uas tsim nyog li cas, thiab yuav ua li cas thiaj li tsim nyog. Yog qhov ntawd vim lawv tseem hluas, tsis muaj kev paub, thiab khav theeb li cov hluas, thiab yog lawv tau lees txim hloov dua siab tshiab tom qab kev sib qhia ntau zaus, paub tias lawv cov kev ua yav tas los yog yuam kev, poob ntsej muag, ua rau txhua tus tsis nyiam kiag li, thiab coj teeb meem los rau txhua tus, thiab lawv tau qhia lawv txoj kev thov txim thiab kev tu siab rau qhov no, ces tsis tas yuav xam qhov no lawm—es yuav tsum tau pab lawv los ntawm lub siab hlub xwb ces tau lawm. Txawm li cas los xij, yog lawv cov kev ua yuam kev uas cuam tshuam txhua tus ntawd tsis yog vim kev khav theeb li cov hluas los sis kev tsis to taub qhov tseeb, tiam sis yog raug txhawb los ntawm lwm yam kev npaj siab uas zais ntshis, thiab lawv tseem coj lawv tus cwj pwm mus ntxiv txawm muaj kev txwv ntau zaus los xij; thiab yog, tsis tas li ntawd xwb, lawv tau raug ntuas, thiab cov kwv tij thiab cov nkauj muam tau sib qhia nrog lawv txog qhov hnyav ntawm qhov teeb meem no—tau muab kev sib qhia thiab kev pab rau lawv los ntawm sab uas tsis zoo thiab sab uas zoo—tiam sis lawv tseem tsis tuaj yeem paub txog lawv tus kheej tus yam ntxwv xeeb txawm lub ntsiab tseeb, tsis tuaj yeem pom qhov kev cuam tshuam uas cov kev ua no coj los rau lwm tus thiab tej qhov tshwm sim los uas hnyav ntawm tej kev ua no, thiab tseem ua rau muaj tej kev cuam tshuam thiab kev tab kaum los ntawm qhov ua cov kev ua no thaum twg lawv muaj lub hwv tsam thiab, ces nyob rau hauv qhov xwm txheej no, yuav tsum tau siv txoj kev daws uas hnyav dua. Yog tau txais lub cib fim ntau txaus los lees txim hloov dua siab tshiab, los lawv tsis tig xav los sis paub txog lawv tus kheej kiag li, thiab txawm yuav sib qhia qhov tseeb nrog lawv li cas los, lawv tsis to taub li, thiab lawv tsis paub tias yuav ua li cas thiaj li tsim nyog thiab mus raws li tej hauv paus ntsiab lus, tiam sis, lawv tawv ncauj tuav rawv lawv tus kheej txoj kev ua, ces cov tib neeg no muaj teeb meem lawm. Yam tsawg tshaj plaws, raws li qhov kev xam pom uas tsim nyog, lawv tsis muaj laj thawj ntawm ib tug neeg uas ib txwm muaj. Qhov no yog kev saib nyob sab nraud. Yog saib qhov ntawd raws li lub ntsiab tseeb mas, txawm yuav sib qhia nrog lawv li cas los xij, lawv tsis tuaj yeem paub txog qhov hnyav ntawm qhov teeb meem, thiab lawv haj yam nrhiav tsis tau lawv qhov chaw uas tsim nyog, thiab lawv lees txais tsis tau txoj kev sib qhia thiab kev pab, los sis sim xyaum ua raws li txoj kev uas cov kwv tij thiab cov muam tau sib qhia—yog tej no xwb los twb ua tsis tau, ces lawv qhov teeb meem tsis yog qhov tsis muaj laj thawj xwb, tiam sis yog ib qho teeb meem ntawm lawv txoj kev ua neeg. Txawm saib sab nraud zoo li tsis yog lawv txhob txwm ua rau muaj tej kev tab kaum thiab kev cuam tshuam los, tej kev ua no yeej tsis yog tias tsis muaj kev npaj siab, tiam sis, lawv ua los ntawm lub hom phiaj thiab tej kev npaj siab. Cia tsis hais txog cov neeg no txoj kev npaj siab los sis lub hom phiaj yog dab tsi, yog yam uas lawv hais thiab ua ntawd ua rau muaj kev tab kaum thiab kev cuam tshuam hnyav heev rau kev nkag mus rau hauv lub neej txoj sia ntawm cov kwv tij thiab cov nkauj muam, thiab lub neej hauv pawg ntseeg, ua rau ntau tus tib neeg tsis tau txais ib yam dab tsi los ntawm kev ua lub neej hauv pawg ntseeg, mus txog theem uas lwm tus tsis xav tuaj sib txoos ua ke tsuas yog vim muaj lawv nyob ntawd, los sis thaum twg lawv hais lus, tib neeg cia li tsis nyiam kiag li thiab xav tawm mus, ces lub ntsiab xeeb txawm ntawm qhov teeb meem no hnyav lawm. Cov tib neeg zoo li no yuav tsum raug daws li cas? Yog tau muab kev sib qhia thiab kev pab ntau zaus rau lawv, thiab tau txais lub cib fim los lees txim hloov dua siab tshiab los lawv yeej tuav rawv ua tej yam no, ces qhov ntawd yog lawv tus yam ntxwv xeeb txawm lub ntsiab tseeb muaj teeb meem lawm. Lawv tsis yog cov tib neeg uas ntseeg Vajtswv tiag tiag thiab lees txais tau qhov tseeb, tiam sis muaj lwm yam kev npaj siab. Saib raws li lawv tus yam ntxwv xeeb txawm lub ntsiab tseeb, ces tej kev tab kaum thiab kev cuam tshuam uas lawv ua rau lub neej hauv pawg ntseeg ntawd yeej tsis yog tias tsis txhob txwm ua, tiam sis, cov tib neeg no muaj ib lub hom phiaj thiab tej kev npaj siab. Yog cov tib neeg zoo li no tseem tau txais lub cib fim ntxiv, qhov ntawd puas ncaj ncees rau cov neeg Vajtswv xaiv tseg uas tab tom ua lub neej hauv pawg ntseeg li ib txwm? (Tsis ncaj ncees.) Cov tib neeg zoo li no qhov teeb meem twb raug nthuav tawm los txog theem no lawm; yog lawv tseem tau txais lub cib fim tos kom lees txim hloov dua siab tshiab, ces qhov tshwm sim los yog thaum kawg lawv haj yam ua kev phem ntau ntxiv, ua rau tib neeg ntau ntxiv poob mus rau hauv qhov kev xav phem, kev qaug zog, thiab tsis muaj txoj kev tawm, ces leej twg yuav kho qhov kev puas tsuaj no? Yog li ntawd, yog tias tau muab kev sib qhia thiab kev pab nrog kev hlub rau cov neeg no, los sis tau ua tej yam los cheem thiab txwv lawv lawm, tiam sis lawv tseem tsis hloov lawv txoj kev qub, thiab tseem tuav rawv ua raws lawv txoj kev coj qub, ces lawv yuav tsum raug daws raws li tej hauv paus ntsiab lus: Yog qhov xwm txheej me, lawv yuav tsum raug cais tawm; yog qhov xwm txheej hnyav, lawv yuav tsum raug ntsaig tawm hauv pawg ntseeg mus. Lub hauv paus ntsiab lus no zoo li cas? Qhov ntawd puas yog hais txog kev muab ib tug neeg txiav txim tuag yam tsis muaj kev hlub tshua, yam tsis muab lub cib fim rau lawv lees txim hloov dua siab tshiab? Los sis cia li txiav txim siab yam tsis siv kev paub cais thiab yam tsis to taub meej tias lawv tus yam ntxwv xeeb txawm lub ntsiab tseeb tiag tiag yog dab tsi? (Tsis yog.) Yog txawm muab kev sib qhia thiab kev pab, thiab tau txais lub cib fim los lees txim hloov dua siab tshiab lawm los, cov tib neeg no txoj kev ua thiab tus moj yam tsis hloov kiag li, thiab lawv kuj tsis lees txim hloov dua siab tshiab thiab, yeej tseem zoo nkaus li lawv yav tas los xwb—uas qhov txawv tsuas yog yam uas yav tas los lawv ua mas tab meeg thiab pom tseeb, tam sim no lawv ua zais ntshis thiab tsis pub leej twg paub, tiam sis tseem muaj kev cuam tshuam thiab kev tab kaum zoo li qub—ces pawg ntseeg yuav tseg lawv cia tsis tau ntxiv lawm. Cov tib neeg zoo li no tsis yog cov tswv cuab ntawm Vajtswv lub tsev; lawv tsis yog Vajtswv cov yaj. Qhov uas lawv nyob hauv Vajtswv lub tsev tsuas yog los ua tej kev cuam tshuam thiab kev tab kaum xwb, thiab lawv yog Ntxwgnyoog cov tub qhe, tsis yog cov kwv tij thiab cov nkauj muam. Yog koj pheej saib lawv zoo li cov kwv tij thiab cov nkauj muam, pheej txhawb thiab pab lawv, thiab sib qhia qhov tseeb nrog lawv, thiab thaum kawg nkim dag zog ntau heev yam tsis tau txais txiaj ntsig dab tsi li, qhov ntawd tsis yog tsis paub dab tsi lod? Qhov ntawd tsis yog tsis paub dab tsi xwb; qhov ntawd yog ruam, ruam dhau lawm!

Yog saib raws li lub ntsiab xeeb txawm ntawm cov teeb meem, ntau hom kev qhia tshwm uas pom tau meej thiab ntau hom tib neeg, xwm txheej, thiab yam khoom uas muaj feem xyuam txog kev txeeb lub meej mom feem ntau tuaj yeem muab faib ua peb hom no. Kev txeeb lub meej mom yog ib qho teeb meem uas nquag muaj nyob rau hauv lub neej hauv pawg ntseeg, uas tshwm sim nyob rau ntau pab pawg neeg sib txawv thiab nyob rau ntau kis ntawm lub neej hauv pawg ntseeg. Rau cov uas txeeb lub meej mom, yog qhov xwm txheej me ces yuav tsum tau muab kev sib qhia qhov tseeb kom ntau los txhawb thiab pab lawv kom lawv thiaj li to taub qhov tseeb, thiab tau txais lub cib fim los lees txim hloov dua siab tshiab. Yog qhov xwm txheej hnyav, lawv yuav tsum tau ua tib zoo saib xyuas, thiab kiag thaum pom tias lawv hais lus los sis ua dab tsi uas tsom mus rau kev ua kom tiav qee qhov kev npaj siab los sis qee lub hom phiaj twg, ces yuav tsum cheem thiab txwv lawv kiag tam sim ntawd. Yog qhov xwm txheej haj yam hnyav dua, ces lawv yuav tsum raug daws thiab ua raws li pawg ntseeg tej hauv paus ntsiab lus rau kev ntsaig tawm mus thiab ntiab tib neeg tawm. Qhov no yog lub luag hauj lwm uas cov thawj coj thiab cov neeg ua hauj lwm yuav tsum ua kom tiav thaum cov tib neeg, xwm txheej, thiab yam khoom uas muaj feem xyuam txog kev txeeb lub meej mom no tshwm sim nyob rau hauv lub neej hauv pawg ntseeg. Muaj tseeb tias, qhov ntawd kuj cheem tsum kom txhua tus kwv tij thiab nkauj muam sawv los thiab koom tes nrog cov thawj coj thiab cov neeg ua hauj lwm nyob rau tes hauj lwm no, koom ua ke txwv ntau yam kev coj thiab kev ua ntawm cov tib neeg phem uas ua rau muaj kev tab kaum thiab kev cuam tshuam, ua kom paub tseeb tias tsis muaj kev tab kaum los sis kev cuam tshuam los ntawm cov tib neeg phem nyob rau hauv lub neej hauv pawg ntseeg ntxiv lawm, siv zog ua kom paub tseeb tias txhua zaus ntawm lub neej hauv pawg ntseeg raug qhia kom paub los ntawm Vajntsujplig, es puv npo nrog kev kaj siab thiab kev xyiv fab thiab qhov uas muaj Vajtswv nyob nrog nraim, thiab muaj Vajtswv txoj koob hmoov thiab kev coj, thiab ua kom paub tseeb tias txhua qhov kev sib txoos ua ke yog ib lub sij hawm ntawm kev xyiv fab thiab kev tau txais qee yam. Qhov no yog lub neej hauv pawg ntseeg uas zoo tshaj plaws, yog yam uas Vajtswv xav pom. Kev ua tes hauj lwm no kuj nyuaj me ntsis rau cov thawj coj thiab cov neeg ua hauj lwm, vim tes hauj lwm ntawd muaj feem xyuam txog kev sib raug zoo ntawm tib neeg, thiab muaj feem xyuam txog tib neeg lub ntsej muag thiab tej txiaj ntsim, thiab kuj muaj feem cuam tshuam rau tib neeg qib ntawm txoj kev to taub qhov tseeb thiab, ua rau qhov ntawd nyuaj zog me ntsis. Txawm li cas los xij, thaum muaj teeb meem tshwm tuaj, tsis txhob zam tej ntawd, thiab tsis txhob muab cov teeb meem loj saib ua cov teeb meem me thiab thaum kawg cia tej ntawd tsis raug daws; thiab yuav tsis txhob coj rau tej teeb meem ntawd los ntawm kev siv tej tswv yim rau kev ua neej hauv ntiaj teb, los ntawm qhov ua txuj tsis pom tej ntawd. Haj yam tsis txhob ua ib tug tib neeg uas ua kom lwm tus zoo siab, tiam sis, coj rau ntau hom tib neeg uas txeeb lub meej mom ntawd raws li qhov tseeb tej hauv paus ntsiab lus. Txoj kev sib qhia no puas meej lawm? (Meej lawm.) Yog li ntawd qhov teeb meem tsib peb sib qhia los xaus li no.

VI. Ua Kev Sib Raug Zoo Uas Tsis Tsim Nyog

Qhov rau uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg ntawd yog ua kev sib raug zoo uas tsis tsim nyog. Tsuav tib neeg sib cuag thiab sib txoos ua ke tau xwb, ces yuav muaj lub neej ua pab ua pawg lawm, thiab ntau yam kev sib raug zoo yuav tshwm sim los ntawm qhov no. Yog li ntawd, cov kev sib raug zoo twg ntawm cov no yog qhov tsim nyog, thiab cov twg yog qhov tsis tsim nyog? Cia peb xub tham txog seb dab tsi yog kev sib raug zoo uas tsim nyog, thiab tom qab ntawd mam li sib qhia txog cov uas tsis tsim nyog. Thaum cov kwv tij thiab cov muam sib ntsib thiab sib nug moo, tej zaum lawv yuav hais tej yam xws li, “Ib ntus no koj nyob li cas lawm? Koj puas nyob zoo? Puas yog koj tus me nyuam yuav pib kawm ntawv rau theem nrab rau xyoo tom ntej no? Koj tus txij nkawm txoj kev lag luam zoo li cas lawm?” Qhov kev sib nug moo zoo li no puas suav tias yog ib qho kev sib raug zoo uas tsim nyog? (Suav.) Vim li cas thiaj li hais li ntawd? Vim thaum ob tug neeg uas tsis tau sib pom ntev lawm cia li sib ntsib, qhov hais ob peb lo lus sib nug moo ntawd yog kev paub cai uas yog lub hauv paus tshaj plaws, thiab yog qhov kev qhia txog kev txhawj xeeb thiab kev sib nug moo uas yog lub hauv paus tshaj plaws. Tej no puav leej yog cov lus, tej kev ua, thiab cov ncauj lus uas tib neeg hais tawm nyob rau hauv tus ciaj ciam ntawm kev ua neeg li ib txwm muaj. Raws li saib lawv txoj kev sib tham los txog tam sim no, yeej pom tseeb tias lawv txoj kev sib raug zoo mas tsim nyog heev. Lawv txoj kev sib tham yog raws li kev paub cai thiab kev ua neeg li ib txwm muaj, thiab los ntawm ob lub ntsiab no, mas tuaj yeem txiav txim tau tias txoj kev sib raug zoo ntawm ob tug neeg uas tab tom sib tham ntawd yog qhov tsim nyog, uas sawv cev rau ib txoj kev sib raug zoo ntawm tib neeg uas ib txwm muaj. Yog ob tug neeg uas sib swm zoo heev, tiam sis thaum nkawd sib ntsib, nkawd ob leeg ua ntsej muag dub txig thiab tsis sib tham, thiab thaum nkawd sib ntsia, nkawd ob lub qhov muag puav leej muaj kev ua tsiv ua nyaum, txoj kev sib raug zoo no puas yog qhov ib txwm muaj? (Tsis yog.) Vim li cas thiaj li tsis yog qhov ib txwm muaj? Yuav tsum tshab txhais qhov no li cas tiag? Thaum ob tug tib neeg sib ntsib tiam sis tsis sib nug moo los sis txawm lo lus “nyob zoo” los twb tsis hais, thiab haj yam tsis muaj kev sib tham thiab sib txuas lus li ib txwm muaj, yeej pom tseeb tias lawv tej kev qhia tshwm uas pom tau meej ntawd tsis yog qhov uas kev ua neeg nyob tsim nyog muaj. Lawv txoj kev sib raug zoo tsis yog ib txoj kev sib raug zoo ntawm tib neeg uas ib txwm muaj; txoj kev sib raug zoo ntawd me ntsis txawv txawv, tiam sis qhov kev sib raug zoo ntawd tseem tsis tau yog ib txoj kev sib raug zoo uas tsis tsim nyog, tseem nrug me ntsis ntawm qhov ntawd. Feem ntau mas, yog txoj kev sib raug zoo ntawm tib neeg raug tsim los ntawm lub hauv paus ntawm kev ua neeg li ib txwm muaj, uas tib neeg tuaj yeem sib raug zoo thiab sib txuas lus li ib txwm muaj thiab raws li tej hauv paus ntsiab lus, thiab sib pab, sib txhawb, thiab sib muab kev pab, tej no puav leej qhia txog kev sib raug zoo uas tsim nyog ntawm tib neeg. Qhov ntawd txhais hais tias saib xyuas tej yam yam ncaj ncees, tsis yog ua kev lag luam, tsis muaj kev cov nyom ntawm tej txiaj ntsim, thiab haj yam tsis muaj kev ntxub, thiab tej kev ua ntawd tsis yog raug thawb los ntawm tej kev ntshaw ntawm sab cev nqaij daim tawv. Tag nrho tej no puav leej nyob rau hauv tus ciaj ciam ntawm kev sib raug zoo uas tsim nyog. Tus ciaj ciam no tsis yog dav heev lod? Txoj kev sib raug zoo ntawm tib neeg uas ib txwm muaj mas muaj kev sib tham thiab kev sib txuas lus nyob rau hauv tus ciaj ciam ntawm kev ua neeg li ib txwm muaj, sib raug zoo thiab sib txuas lus nrog lwm tus, thiab ua hauj lwm ua ke raws li lub siab txawj xav thiab laj thawj ntawm kev ua neeg li ib txwm muaj. Nyob rau theem siab dua mas, muaj kev sib raug zoo thiab sib txuas lus raws li qhov tseeb tej hauv paus ntsiab lus. Qhov no yog ib qho kev tshab txhais dav dav txog kev sib raug zoo ntawm tib neeg uas tsim nyog. Qhov sib nug moo thaum sib ntsib yog hom kev sib raug zoo uas ib txwm muaj tshaj plaws. Qhov muaj peev xwm sib nug moo thiab sib tham li ib txwm muaj yam tsis khav theeb, tsis lam xav tias muaj kev hlub thaum tsis muaj, tsis ua txuj tias zoo dua lwm tus, hais lus yam tsis quab yuam lwm tus los sis tsa yus tus kheej, hais lus thiab sib txuas lus li ib txwm muaj—qhov no yog txoj hau kev uas cov uas muaj kev ua neeg nyob tsim nyog hais lus thiab sib tham lus, thiab qhov ntawd yog txoj hau kev hauv paus ntawm txoj kev sib cuag nyob rau hauv txoj kev sib raug zoo ntawm tib neeg uas ib txwm muaj. Qhov tsawg kawg nkaus mas, cov neeg Vajtswv xaiv tseg yuav tsum muaj lub siab txawj xav thiab laj thawj, thiab sib raug zoo, sib txuas lus, thiab ua hauj lwm ua ke nrog lwm tus raws li tej hauv paus ntsiab lus thiab cov qauv uas Vajtswv cheem tsum ntawm tib neeg. Qhov no yog txoj hau kev zoo tshaj plaws. Qhov no muaj peev xwm ua kom Vajtswv txaus siab. Yog li ntawd, qhov tseeb tej hauv paus ntsiab lus uas Vajtswv cheem tsum yog dab tsi? Tias tib neeg yuav tsum to taub txog lwm tus thaum lawv qaug zog thiab xav phem, ua tib zoo xav txog lawv txoj kev mob siab thiab tej kev nyuaj, thiab tom qab ntawd nug txog tej no, muab kev pab thiab kev txhawb, thiab nyeem Vajtswv cov lus rau lawv mloog los pab lawv daws lawv tej teeb meem, ua rau lawv to taub Vajtswv tej kev npaj siab thiab tsis qaug zog ntxiv lawm, thiab coj lawv los rau ntawm Vajtswv xub ntiag. Txoj kev xyaum ua raws no tsis mus raws li tej hauv paus ntsiab lus lod? Qhov xyaum ua raws li no yog mus raws li qhov tseeb tej hauv paus ntsiab lus. Muaj tseeb tias, txoj kev sib raug zoo uas zoo li no mas haj yam mus raws li qhov tseeb tej hauv paus ntsiab lus. Thaum tib neeg txhob txwm ua rau muaj tej kev cuam tshuam thiab kev tab kaum, los sis txhob txwm ua lawv tes dej num yam ua dog ua dig, yog koj pom qhov no thiab muaj peev xwm taw qhia tej no rau lawv, ntuas lawv, thiab pab lawv raws li tej hauv paus ntsiab lus, ces qhov no mus raws li qhov tseeb tej hauv paus ntsiab lus lawm. Yog koj ua ntsej lag muag dig, los sis tso cai rau lawv txoj kev coj thiab npog lawv, thiab haj tseem hais lus zoo los qhuas lawv thiab txhawb lawv, cov kev sib cuag nrog tib neeg, kev saib xyuas tej xwm txheej, thiab kev daws teeb meem no, yeej pom tseeb tias tsis mus raws li qhov tseeb tej hauv paus ntsiab lus, thiab tsis muaj hauv paus nyob rau hauv Vajtswv cov lus. Yog li ntawd, cov kev sib cuag nrog tib neeg thiab kev saib xyuas tej xwm txheej no yeej pom tseeb tias tsis tsim nyog, thiab qhov no yeej tsis yooj yim nrhiav pom yog tias tsis muaj kev soj ntsuam thiab paub cais raws li Vajtswv cov lus. Cov tib neeg uas tsis to taub qhov tseeb yuav tsis yooj yim pom tau cov teeb meem no, thiab txawm yog lawv lees paub hais tias cov no yog teeb meem los xij, kuj tsis yooj yim rau lawv daws tej ntawd. Peb pheej hais tias cov tib neeg ntiaj teb uas qias vuab tsuab puav leej ua neej nyob raws li Ntxwgnyoog tus moj yam, thiab tej kev qhia tshwm uas pom tau meej no yog cov pov thawj ntawm qhov ntawd. Tam sim no, nej puas pom meej lawm?

Hnub no lub ntsiab tseem ceeb hauv peb txoj kev sib qhia yog los nthuav tawm tej kev qhia tshwm uas pom tau meej ntawm plaub hom kev sib raug zoo uas tsis tsim nyog uas ua rau muaj tej kev tab kaum thiab cuam tshuam rau lub neej hauv pawg ntseeg. Leej twg yog cov uas muaj kev sib raug zoo uas tsis tsim nyog nyob rau hauv pawg ntseeg? Qhov kev sib raug zoo uas tsis tsim nyog ntawd yog dab tsi tiag tiag? Cov teeb meem twg uas muaj feem xyuam rau qhov muaj kev sib raug zoo uas tsis tsim nyog? Vim peb lub ncauj lus tseem ceeb ntawm kev sib qhia muaj feem xyuam txog ntau hom tib neeg, tej xwm txheej, thiab tej yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg, yog li ntawd qhov kev sib tham txog qhov muaj kev sib raug zoo uas tsis tsim nyog no tsuas yog txwv nyob rau tus ciaj ciam uas ua rau muaj tej kev tab kaum thiab cuam tshuam rau lub neej hauv pawg ntseeg xwb. Peb tsis yog muab txhua hom kev sib raug zoo uas tsis tsim nyog los xyaw ua ke yam tsis muaj kev cais kom meej, thiab tej yam uas nyob sab nraud ntawm lub neej hauv pawg ntseeg ntawd tsis yog yam uas peb yuav mus quav ntsej. Nej yuav tsum to taub qhov no kom yog, yam tsis muaj qhov yuam kev. Yog li ntawd, thaum hais txog qhov muaj kev sib raug zoo uas tsis tsim nyog, cov teeb meem twg, thiab cov kev sib raug zoo twg ntawm tib neeg uas yog qhov tsis tsim nyog? Cov kev sib raug zoo uas tsis tsim nyog twg ua rau muaj tej kev tab kaum thiab cuam tshuam rau lub neej hauv pawg ntseeg thiab rau tib neeg feem coob? Cov teeb meem no puas tsim nyog sib qhia? (Tsim nyog.) Tej no yog tej yam uas yuav tsum tau hais kom meej nyob rau hauv peb txoj kev sib qhia.

A. Kev Sib Raug Zoo Uas Tsis Tsim Nyog ntawm Txiv Neej thiab Poj Niam

Nyob rau hauv lub neej hauv pawg ntseeg, hom kev sib raug zoo uas tsis tsim nyog uas pheej muaj tshaj plaws, yooj yim to taub tshaj plaws, thiab yooj yim txiav txim rau tshaj plaws yog hom twg? (Kev sib raug zoo ntawm txiv neej thiab poj niam.) Qhov no yog thawj qhov uas tshwm hauv tib neeg lub siab thaum lawv xav txog qhov muaj kev sib raug zoo uas tsis tsim nyog. Ib txhia tib neeg, thaum twg lawv nyob rau hauv ib pab pawg, lawv pheej nrog cov txiv neej los sis poj niam sib thab sib zes; lawv piav tes piav taw thiab ua ntsej ua muag, tshwj xeeb mas yog hais lus uas nthuav tawm ntau yam, thiab nyiam khav. Yog siv ib lo lus uas tsis tsim nyog los hais, qhov ntawd yog khav txog txoj kev ua plees ua yi. Lawv nyiam ua txuj ua neeg ntse, txawj tso dag, txawj hlub, ua neeg zoo, ua neeg tshaj lij, muaj tsim, thiab kawm paub, nrog rau lwm yam zoo, nyob rau ntawm cov txiv neej los sis poj niam xub ntiag; lawv tshwj xeeb yog nyiam khav. Vim li cas lawv thiaj li khav? Qhov ntawd tsis yog txhawm rau txeeb lub meej mom, tiam sis yog rub cov txiv neej los sis poj niam lub siab. Yim muaj cov txiv neej los sis poj niam tsom ntsoov rau lawv ntau npaum li cas, ntsia lawv nrog lub qhov muag ntshaw, qhov muag hwm, thiab qhov muag pe hawm, lawv yim kub siab thiab muaj zog ntxiv. Thaum lawv siv sij hawm ntau ntxiv los koom nrog lub neej hauv pawg ntseeg thiab sib cuag nrog tib neeg coob ntxiv, lawv thiaj li tsom rau ob peb tug, sib thab sib zes thiab sib ntsia nrog qee cov txiv neej los sis poj niam, pheej hais lus muaj qhov ntxias rau kev plees kev yi, haj tseem muaj me ntsis kev thab txog kev ua plees ua yi thiab. Txoj kev sib raug zoo ntawm tib neeg zoo li no puas tsim nyog? (Tsis tsim nyog.) Qhov no yog kev muaj kev sib raug zoo uas tsis tsim nyog. Cov neeg zoo li no haj tseem siv lub sij hawm sib txoos ua ke los khav, hais lus lom zem ntxim nyiam thiab ntxim hlub tshwj xeeb nyob rau ntawm tus neeg uas lawv nyiam los sis muaj siab rau ntawd xub ntiag, piav tes piav taw thiab laim muag ntsia, ua lub ntsej muag khav theeb thiab kub siab, haj tseem dhia mus dhia los thiab, tag nrho tej no yog ua rau lub hom phiaj dab tsi? Qhov ntawd yog los haub ntxias cov txiv neej los sis poj niam kom muaj kev sib raug zoo uas tsis tsim nyog. Txawm hais tias ntau tus kwv tij thiab nkauj muam tsis nyiam qhov no kiag li, thiab txawm hais tias muaj ntau cov lus ceeb toom los ntawm cov neeg nyob ib puag ncig lawv los los xij, lawv yeej tseem tsis tso tseg thiab pheej ua siab tawv qhawv haub ntxias mus ntxiv. Yog cov kev sib raug zoo uas tsis tsim nyog zoo li no tsuas muaj feem xyuam txog ob tug neeg uas sib thab sib zes nyob sab nraum ntawm lub neej hauv pawg ntseeg thiab tsis cuam tshuam rau lub neej hauv pawg ntseeg los sis pawg ntseeg tes hauj lwm, ces qhov xwm txheej no tuaj yeem muab tso rau ib sab ua ntej. Txawm li cas los xij, yog cov uas muaj kev sib raug zoo uas tsis tsim nyog ntawd ib txwm ua cov cwj pwm zoo li no nyob rau hauv lub neej hauv pawg ntseeg thiab ua rau muaj tej kev cuam tshuam rau lwm tus, lawv yuav tsum raug ceeb toom thiab txwv. Yog raug ntuas ntau zaus lawv tseem tsis hloov li thiab twb ua rau muaj kev cuam tshuam loj rau lub neej hauv pawg ntseeg lawm, ces lawv yuav tsum raug ntsaig tawm hauv pawg ntseeg mus los ntawm kev pov ntawv ntawm cov neeg Vajtswv xaiv tseg. Txoj kev ua li no puas tsim nyog? (Tsim nyog.) Yog tsuas yog cov hluas sib tham ua nkauj nraug li ib txwm xwb, lawv kuj yuav tsum paub txwv lawv tus kheej thaum sib txoos ua ke kom tsis txhob cuam tshuam rau lwm tus. Pawg ntseeg yog ib qho chaw rau kev pe hawm Vajtswv, nyeem thov Vajtswv cov lus, thiab ua lub neej hauv pawg ntseeg; tsis tsim nyog coj tej kev xav hauv siab ntawm tus kheej tuaj rau hauv lub neej hauv pawg ntseeg los cuam tshuam lwm tus. Yog qhov ntawd ua rau muaj tej kev cuam tshuam rau lwm tus, cuam tshuam rau lwm tus lub siab thaum sib txoos ua ke, cuam tshuam rau lwm tus txoj kev nyeem Vajtswv cov lus thiab lawv txoj kev to taub thiab kev paub txog Vajtswv cov lus, ua rau muaj neeg coob ntxiv tsis tsom ntsoov thiab raug cuam tshuam, ces txoj kev sib raug zoo zoo li no raug txiav txim tias yog ib txoj kev sib raug zoo uas tsis tsim nyog. Txawm yog txoj kev sib tham ua nkauj nraug uas tsim nyog, yog qhov ntawd ua rau muaj kev cuam tshuam rau lwm tus, kuj yuav raug txiav txim tias yog ib txoj kev sib raug zoo uas tsis tsim nyog, haj yam tsis tas hais txog kev haub ntxias cov txiv neej los sis poj niam uas nyob sab nraud ntawm kev sib tham ua nkauj nraug. Yog li ntawd, yog muaj leej twg muaj kev sib raug zoo uas tsis tsim nyog nyob rau hauv lub neej hauv pawg ntseeg, yuav tsum tsis txhob ua txuj tsis pom los sis tso cai rau lawv tiam sis yuav tsum ceeb toom, txwv, thiab haj tseem ntsaig tawm mus raws li tej hauv paus ntsiab lus. Qhov no yog tes hauj lwm uas cov thawj coj thiab cov neeg ua hauj lwm yuav tsum tau ua. Yog pom hais tias leej twg muaj kev sib raug zoo uas tsis tsim nyog thiab ua rau muaj kev cuam tshuam rau cov tib neeg feem coob hauv pawg ntseeg, qhov muaj lawv nyob ntawd ua rau lwm tus tsis tsom ntsoov thiab poob mus rau hauv kev ntshaw ntawm cev nqaij daim tawv, haj tseem ua rau tsev neeg tawg thiab ua rau qee cov ntseeg tshiab tsis xav koom kev sib txoos ua ke, nyeem Vajtswv cov lus, los sis haj tseem tsis xav ntseeg lawm thiab, tiam sis haj yam nyiam tus neeg uas lawv qhuas ntawd, xav nrog lawv khiav mus ua neej nyob ua ke, thiab tso lawv txoj kev ntseeg tseg—yog qhov xwm txheej no hnyav mus txog qib no lawm, tiam sis cov thawj coj thiab cov neeg ua hauj lwm tseem tsis quav ntsej, xav hais tias qhov ntawd tsuas yog tib neeg txoj kev ntshaw ntawm cev nqaij daim tawv xwb, tias qhov ntawd tsis yog ib qho teeb meem loj thiab yog ib yam uas cov neeg sawv daws puav leej ua, tsis pom qhov hnyav ntawm qhov teeb meem los sis haj yam tsis paub txog tias qhov teeb meem no yuav loj mus txog qib twg, tiam sis cia li tsis quav ntsej, thaum teb rov qab rau tej yam zoo li no mas loog thiab qeeb tshwj xeeb, thaum kawg ua rau muaj kev cuam tshuam tsis zoo rau cov neeg feem coob nyob rau hauv pawg ntseeg—ces lub ntsiab xeeb txawm ntawm tej yam no yog tej kev tab kaum thiab kev cuam tshuam uas loj heev. Vim li cas Kuv thiaj li hais tias qhov ntawd yog tej kev tab kaum thiab kev cuam tshuam uas loj heev? Vim tej yam no cuam tshuam thiab ua puas tsuaj rau qhov raws qib raws duas uas ib txwm muaj ntawm lub neej hauv pawg ntseeg. Yog li ntawd, thaum cov neeg zoo li no tshwm sim nyob rau hauv pawg ntseeg, lawv yuav tsum raug txwv, txawm yuav muaj tsawg los sis ntau npaum li cas los xij, ua kom paub tseeb tias txhua qhov xwm txheej raug daws, thiab yog qhov xwm txheej ntawd hnyav, lawv yuav tsum raug muab cais tawm. Yog kev muab cais tawm tsis muaj txiaj ntsig, thiab lawv tseem pheej haub ntxias cov txiv neej los sis poj niam, cuam tshuam lub neej hauv pawg ntseeg, thiab ua puas tsuaj rau qhov raws qib raws duas uas ib txwm muaj ntawm pawg ntseeg, ces lawv yuav tsum raug ntsaig tawm hauv pawg ntseeg mus raws li tej hauv paus ntsiab lus. Txoj kev ua li no puas tsim nyog? (Tsim nyog.) Qhov kev cuam tshuam ntawm tej yam zoo li no rau lub neej hauv pawg ntseeg thiab rau pawg ntseeg tes hauj lwm mas phem tshaj plaws; tej ntawd zoo li ib tug kab mob sib kis, thiab yuav tsum raug rhuav tshem tag nrho.

Txhua tus uas nyiam haub ntxias cov txiv neej los sis poj niam yeej ua li ntawd txawm lawv yuav mus qhov twg los xij, thiab ua tej zoo li no yam tsis paub dhuav li. Lawv cov hom phiaj rau kev haub ntxias thiab kev thab mas feem ntau yog cov hluas thiab cov ntxim nyiam xwb, tiam sis qee zaus kuj muaj feem xyuam txog cov neeg hnub nyoog nruab nrab lawm thiab—leej twg uas lawv pom tias ntxim nyiam, ces lawv yeej nrhiav cib fim mus haub ntxias. Yog lawv xav haub ntxias lwm tus, qee leej tib neeg tiv tsis taus qhov kev ntxias thiab yuav raug dag, uas yooj yim ua rau muaj kev sib raug zoo uas tsis tsim nyog. Vim tib neeg lub siab ntseeg me dhau thiab lawv tsis muaj kev ntseeg tiag tiag rau Vajtswv, nrog rau tsis to taub txog qhov tseeb, lawv yuav ua li cas kov yeej tej kev dag ntxias no thiab tiv taus tej kev haub ntxias zoo li no? Tib neeg lub siab ntseeg me dhau; tshwj xeeb yog lawv qaug zog thiab tsis muaj zog thaum ntsib tej kev dag ntxias thiab kev haub ntxias no. Yeej nyuaj rau lawv uas yuav tsis raug cuam tshuam. Muaj ib tug thawj coj txiv neej uas haub ntxias txhua tus poj niam zoo nkauj uas nws pom; qee zaus, haub ntxias ib tug xwb tsis txaus—tej zaum nws yuav haub ntxias peb los sis plaub tug poj niam, ua rau lawv txhua tus vwm rau nws mus txog qib uas noj tsis qab thiab pw tsis tsaug zog, thiab haj tseem tsis xav ua lawv tej dej num lawm. Tus txiv neej no qhov “ntxim nyiam” mas loj npaum li ntawd. Yog nws tsuas sib raug zoo nrog tib neeg li ib txwm muaj, yam tsis txhob txwm mus haub ntxias lawv, nws qhov kev cuam tshuam yuav tsis dav npaum li ntawd. Tsuas yog thaum nws txhob txwm ua yeeb yam thiab haub ntxias lwm tus xwb mas thiaj li muaj neeg raug dag coob zuj zus, ua rau cov neeg uas raug haub ntxias kom muaj kev sib raug zoo uas tsis tsim nyog nrog nws muaj coob zuj zus. Tib neeg tsis muaj zog tiv thaiv thiab poob mus rau hauv tej kev dag ntxias no. Qhov no yog qhov “ntxim nyiam” ntawm kev ntshaw ntawm cev nqaij daim tawv; yam uas nws ua ntawd tau tsim tej kev dag ntxias, kev haub ntxias, thiab kev cuam tshuam rau ob sab. Ib tug txiv neej haub ntxias ntau tus poj niam ua ke—nws lub siab puas ntxhov? Yuav saib xyuas tus poj niam twg ua ntej, yuav ua kom tus twg txaus siab ua ntej—nws lub siab tsis sab lod? (Sab.) Yog nws sab npaum li ntawd, vim li cas nws tseem pheej ua tej yam zoo li no? Qhov no yog kev lim hiam; nws yog hom niag zoo li no, qhov no yog nws tus yam ntxwv xeeb txawm. Kiag thaum cov neeg raug ua phem ntawd raug haub ntxias thiab poob rau hauv kev dag ntxias lawm, qhov ntawd puas yooj yim rau lawv khiav dim ntawm txoj kev dag ntxias ntawd? Kiag thaum poob rau hauv kev dag ntxias lawm, mas nyuaj uas yuav khiav dim. Noj mov, pw tsaug zog, taug kev, ua tej dej num—txawm lawv yuav ua dab tsi los xij, lawv lub hlwb puav leej xav txog tus neeg no, lawv lub siab muaj tus neeg no nyob puv nkaus. Tej kev cuam tshuam zoo li no mas hnyav heev! Qhov tshwm sim los tom qab ntawd yog qhov pheej xav txog seb yuav ua li cas kom tus neeg no zoo siab, yuav ua li cas muab tus kheej rau lawv, yuav ua li cas kom tau lawv, yuav ua li cas kom tau lawv los ua yus tug xwb, yuav ua li cas sib tw thiab sib tawm tsam nrog lwm tus uas txeeb lawv. Tej no tsis yog qhov tshwm sim los ntawm qhov raug cuam tshuam lod? Puas yooj yim khiav dim ntawm tus yam ntxwv zoo li no? (Tsis yooj yim.) Qhov tshwm sim los mas hnyav heev. Lub sij hawm no, ib tug neeg lub siab puas tseem nyob ntsiag to tau rau ntawm Vajtswv lub xub ntiag? Thaum lawv nyeem Vajtswv cov lus, lawv puas tseem txais tau rau hauv siab? Puas tseem yuav muaj kev kaj? Thaum sib txoos ua ke, lawv puas tseem muaj lub siab ua tib zoo xav thiab sib qhia Vajtswv cov lus, thiab mloog lwm tus sib qhia txog Vajtswv cov lus? Lawv yuav tsis muaj; lawv lub siab puv npo nrog kev ntshaw cev nqaij daim tawv, nrog tus neeg uas lawv pe hawm ntawd, tsis muaj tej yam tseem ceeb li lawm—tab txawm Vajtswv los yuav ploj ntawm lawv lub siab mus. Qhov tom qab ntawd ces yog kev xav txog seb yuav ntsib yuav pom txoj kev hlub li cas, yuav ua li cas thiaj li muaj kev sib hlub tau, thiab ntau yam ntxiv, thiab lub siab xav ntseeg Vajtswv ntawd ploj tag nrho lawm. Tej qhov tshwm sim los no puas zoo? Qhov no puas yog yam uas tib neeg xav pom? (Tsis yog.) Qhov tshwm sim los ntawm qhov raug haub ntxias thiab poob rau hauv kev dag ntxias ntawd puas yog ib yam uas tib neeg tuaj yeem tiv thaiv tau? Tib neeg puas tuaj yeem tswj tau tej qhov tshwm sim los no? Qhov ntawd puas nyob ntawm lawv txiav txim siab? Lawv puas tuaj yeem mus txog theem uas muaj peev xwm tso tseg thaum lawv xav tso hauv lawv lub siab? Tsis muaj leej twg ua tau li no. Qhov no yog qhov tshwm sim los ntawm cov kev cuam tshuam uas tej kev sib raug zoo uas tsis tsim nyog ntawd coj los rau tib neeg. Thaum tsis muaj Vajtswv nyob hauv tib neeg lub siab, thiab tsis xav nyeem Vajtswv cov lus ntxiv lawm, qhov tshwm sim los yog dab tsi? Puas tseem muaj kev cia siab rau kev cawm dim lawm? Txoj kev cia siab rau kev cawm dim tsis tshuav kiag li lawm. Txhua yam ploj tag nrho lawm; cov kev qhuab qhia me me uas to taub yav tas los, txoj kev txiav txim siab thiab lub siab xav muab yus tus kheej fij rau Vajtswv, thiab txoj kev ntshaw kom tau txais Vajtswv txoj kev cawm dim raug muab pov tseg tag nrho—tej no yog tej qhov tshwm sim los. Tib neeg nyob deb ntawm Vajtswv thiab tsis lees paub Nws hauv lawv lub siab, thiab lawv kuj raug Vajtswv tsis lees paub thiab. Qhov tshwm sim los no tsis yog ib yam uas ib tug uas ntseeg thiab raws Vajtswv qab twg xav pom, thiab kuj tsis yog ib qho muaj tseeb uas ib tug uas raws Vajtswv qab twg yuav lees txais tau. Txawm li cas los xij, thaum tib neeg poob rau hauv tej kev dag ntxias zoo li no thiab poob rau hauv lub yis ntawm qhov muaj kev sib raug zoo uas tsis tsim nyog ntawd lawm, lawv pom tias nyuaj heev uas yuav rub lawv tus kheej tawm thiab haj yam tsis muaj peev xwm tswj tau lawv tus kheej. Yog li ntawd, tej kev sib raug zoo uas tsis tsim nyog zoo li no yuav tsum raug txwv. Nyob rau cov xwm txheej hnyav, rau cov uas pheej cuam tshuam thiab thab cov txiv neej los sis poj niam, lawv yuav tsum raug tshem tawm hauv pawg ntseeg mus kom sai thiab ncav sij hawm, kom lawv tsis txhob cuam tshuam lub neej hauv pawg ntseeg thiab tseem ceeb tshaj ces yog, tiv thaiv kom tsis txhob muaj neeg ntau ntxiv poob mus rau hauv txoj kev dag ntxias. Txoj kev ua li no puas tsim nyog? (Tsim nyog.)

Nyob rau hauv cov thawj coj thiab cov neeg ua hauj lwm tej luag hauj lwm yam kaum ob, cov thawj coj thiab cov neeg ua hauj lwm yuav tsum siv lawv lub zog kom ntau tshaj plaws nyob rau hauv txhua tes hauj lwm los ua kom paub tseeb tias cov neeg Vajtswv xaiv tseg tuaj yeem ua lub neej hauv pawg ntseeg li ib txwm muaj, tiv thaiv cov kwv tij thiab cov nkauj muam kom tsis txhob raug kev cuam tshuam nyob rau hauv lub neej hauv pawg ntseeg. Qhov no txhais hais tias tiv thaiv tag nrho cov kwv tij thiab cov muam uas tuaj yeem ua lub neej hauv pawg ntseeg li ib txwm muaj ntawd. Yuav tsum tiv thaiv dab tsi tiag tiag? Yuav tsum tiv thaiv cov kwv tij thiab cov muam kom lawv thiaj li los tau rau ntawm Vajtswv xub ntiag yam ntsiag to thaum sib txoos ua ke thiab nyeem thov Vajtswv thiab sib qhia Vajtswv cov lus yam siab tus; nyob rau tib lub sij hawm ntawd, cov kwv tij thiab cov muam muaj peev xwm koom ua ib lub siab ib lub ntsws thov Vajtswv, nrhiav Vajtswv tej kev npaj siab, nrhiav kev qhia thiab kev paub tseeb los ntawm Vajtswv, tau txais Vajtswv txoj kev nyob nrog nraim, thiab tau txais Vajtswv tej koob hmoov thiab kev coj qhia. Qhov no yog tag nrho cov kwv tij thiab cov muam qhov txiaj ntsim uas loj tshaj plaws thiab tseem ceeb tshaj plaws, thiab qhov ntawd tseem ceeb heev rau txhua tus; qhov ntawd muaj feem xyuam txog seb lawv puas tuaj yeem raug cawm dim thiab seb lawv puas tuaj yeem muaj ib qhov chaw kawg uas zoo. Yog li ntawd, thiaj li yuav tsum tau txwv, muab cais tawm, los sis ntsaig tawm cov uas muaj kev sib raug zoo uas tsis tsim nyog nyob rau hauv pawg ntseeg kom nruj heev; tshwj xeeb tshaj yog, cov uas muaj kev sib raug zoo ntawm txiv neej thiab poj niam yuav tsum raug saib xyuas kom nruj heev. Kev saib xyuas txhais li cas? Yog qhov ntawd tsuas yog ib qho xwm txheej me me, lawv yuav tsum raug qhia tshwm thiab ntuas, thiab raug cheem thiab txwv kom ncav sij hawm, thiab tiv thaiv tsis pub cuam tshuam rau lwm tus. Yog qhov ntawd yog ib qho xwm txheej hnyav, ces yuav tsum tau txiav txim siab kiag tam sim ntawd thiab tsis txhob ua ywj fab ywj fwj; lawv yuav tsum raug ntsaig tawm hauv pawg ntseeg mus kom sai li sai tau los tiv thaiv kom lawv tsis txhob cuam tshuam tib neeg ntau ntxiv. Yog lawv xav ua rau muaj tej kev cuam tshuam, cia lawv mus ua nyob sab nraud hauv ntiaj teb, cuam tshuam leej twg los tau uas lawv xav cuam tshuam; muab hais kom luv luv tias tag nrho cov kwv tij thiab cov muam nyob rau hauv lub neej hauv pawg ntseeg uas caum qhov tseeb yuav tsum tsis txhob raug lawv cuam tshuam. Qhov no yog lub hauv paus ntsiab lus thiab lub hom phiaj tseem ceeb rau tes hauj lwm ntawm cov thawj coj thiab cov neeg ua hauj lwm hais txog lub luag hauj lwm yam kaum ob no.

B. Kev Sib Raug Zoo ntawm Cov Uas Txiv Neej Nrog Txiv Neej los sis Poj Niam Nrog Poj Niam

Hais txog qhov teeb meem ntawm kev sib raug zoo uas tsis tsim nyog, yam uas peb nyuam qhuav sib qhia ntawd tseem ceeb yog qhov muaj kev sib raug zoo uas tsis tsim nyog ntawm txiv neej thiab poj niam. Qhov ntawd ntsig txog kev haub, kev ntxias, kev khav, thiab kev thab cov txiv neej los sis poj niam; nquag txav mus ze thiab sim ua kom sib raug zoo nrog lawv; thiab pheej txhob txwm los sis tsis txhob txwm nrhiav chaw zaum ze lawv thaum nyob rau hauv tej kev sib txoos ua ke; tsis tas li ntawd xwb, tsis yog haub ntxias ib tug xwb, tiam sis yog tias thawj zaug tsis tau, ces lawv yuav hloov mus haub ntxias lwm tus ntxiv, ua rau ntau tus txiv neej los sis poj niam hauv pawg ntseeg raug thab, ces qhov no dhau los ua qhov teeb meem loj lawm. Qhov no yog hais txog kev sib raug zoo uas tsis tsim nyog ntawm txiv neej thiab poj niam. Dhau ntawm kev sib raug zoo nrog cov txiv neej los sis poj niam lawm, kuj tseem muaj qee txoj kev sib raug zoo uas tsis tsim nyog ntawm cov tib neeg uas yog txiv neej nrog txiv neej, los sis poj niam nrog poj niam thiab. Yog ob tug tib neeg uas yog txiv neej nrog txiv neej los sis poj niam nrog poj niam sib raug zoo heev, sib paub los ntev lawm thiab sib raug zoo dua me ntsis, ces qhov ntawd yog ib qho tsim nyog uas nkawd pheej sib ntsib sib tham xwb. Txawm li cas los xij, thaum qhov ntawd nce mus txog theem uas muaj kev sib raug zoo ntawm kev ntshaw ntawm sab cev nqaij daim tawv lawm, ces tej kev sib raug zoo uas zoo li no kuj yuav tsum raug muab cais ua kev sib raug zoo uas tsis tsim nyog thiab. Yog hais tias, ntawm ob tug tib neeg uas yog txiv neej nrog txiv neej los sis poj niam nrog poj niam, pheej muaj kev sib kov ntawm lub cev, haj tseem mus txog theem uas ib leeg nquag siv cov lus uas muaj lub ntsiab xeeb txawm haub ntxias rau ib leeg, thiab tej zaum pheej pom nkawd ob leeg sib puag xub pwg los sis qhia tawm tej kev coj thiab tej kev qhia tshwm uas pom tau meej uas pom tseeb dua, ces thaum sij hawm dhau mus, txhua tus yuav pom meej hais tias: “Tsis yog ob tug no sib pab los sis sib haum xeeb ntawm tus cwj pwm; nkawd tsis yog sib raug zoo nyob rau hauv tus ciaj ciam ntawm txoj kev ua neeg li ib txwm muaj. Qhov no yog kev nyiam txiv neej nrog txiv neej los sis poj niam nrog poj niam!” Tam sim no, tib neeg feem coob to taub hais tias kev nyiam txiv neej nrog txiv neej los sis poj niam nrog poj niam ntawd yog ib txoj kev sib raug zoo uas tsis tsim nyog, uas lub ntsiab xeeb txawm hnyav dua thiab tsis tsim nyog dua qhov kev sib raug zoo ntawm txiv neej thiab poj niam. Yog tej kev sib raug zoo uas zoo li no muaj nyob rau hauv pawg ntseeg, tej kev sib raug zoo ntawd yuav kis mus zoo li ib tug kab mob sib kis, uas yuav coj qee leej nkag mus rau hauv cov kev dag ntxias thiab kev haub ntxias no. Ib txhia tib neeg hais tias yav tas los lawv tau muaj kev sib nyiam ntawm txiv neej nrog txiv neej los sis poj niam nrog poj niam tiam sis tsis yog lawv yeem ua. Tsis hais txog tias lawv puas yog cov neeg uas nyiam txiv neej nrog txiv neej los sis poj niam nrog poj niam tiag tiag los sis lawv txoj kev nyiam ntawm sab kev ua plees ua yi ntawd yog dab tsi, yog lawv tuaj yeem poob rau hauv txoj kev dag ntxias zoo li no hauv qab kev haub ntxias—tam sim no muab tso rau ib sab tsis hais txog tias lawv txaus siab hlo ua los sis raug yuam—ces ua ntej tshaj plaws, lawv raug cuam tshuam los ntawm qhov ntawd. Saib raws li qhov lawv hais tias tsis yog lawv txaus siab hlo ua, ces lawv yog cov uas raug ua phem rau. Yog li ntawd, yog cov neeg uas nyiam txiv neej nrog txiv neej los sis poj niam nrog poj niam ntawd ntxias thiab haub lwm tus uas yog txiv neej los sis poj niam ib yam li lawv, cov uas raug haub ntxias ntawd, txawm lawv tus kheej tsis yog cov neeg uas nyiam txiv neej nrog txiv neej los sis poj niam nrog poj niam los xij, tuaj yeem dhau los ua cov neeg uas nyiam txiv neej nrog txiv neej los sis poj niam nrog poj niam tom qab raug ib tug haub ntxias lawm. Qhov no tsis yog ib qho uas phom sij lod? Vim li cas thiaj li hais tias cov tib neeg zoo li no yog cov neeg uas nyiam txiv neej nrog txiv neej los sis poj niam nrog poj niam? Qhov uas cov txiv neej los sis poj niam haub ntxias ntau tus tib neeg ntawd yog poob rau hauv tus ciaj ciam ntawm qhov kev ua plees ua yig, qhov no yog ib txoj kev sib raug zoo uas tsis tsim nyog. Yog li thaum ob tug tib neeg uas yog txiv neej nrog txiv neej los sis poj niam nrog poj niam uas muaj kev sib raug zoo heev thiab sib haum xeeb sib tuav tes, thiab sib puag, uas puav leej yog ib txwm muaj xwb, qhov ntawd yuav nce mus txog theem uas txhais tau tias nkawd yog cov neeg uas nyiam txiv neej nrog txiv neej los sis poj niam nrog poj niam tau li cas? Qhov ntawd yog txoj kev plees kev yig ntawm nkawd—thaum theem kev sib raug zoo no tshwm sim lawm, qhov ntawd dhau los ua kev ua plees ua yig ntawm cov uas yog txiv neej nrog txiv neej los sis poj niam nrog poj niam lawm. Thaum nkawd sib puag xub pwg, sib khawm caj dab, los sis sib puag duav, qhov no tsis yog kev sib kov ntawm lub cev li ib txwm muaj ntawm cov tib neeg uas yog txiv neej nrog txiv neej los sis poj niam nrog poj niam; tiam sis, qhov ntawd yog kev sib kov ntawm lub cev uas raug txhawb los ntawm kev ntshaw, qhov ntawd lub ntsiab xeeb txawm txawv thiab yog li ntawd thiaj li poob rau hauv qhov kev sib raug zoo uas tsis tsim nyog. Rau cov neeg feem coob hauv pawg ntseeg, qhov pom cov neeg uas nyiam cov uas yog txiv neej nrog txiv neej los sis poj niam nrog poj niam zoo li no puas muaj txiaj ntsim los sis tsis muaj txiaj ntsim rau lawv? (Tsis muaj txiaj ntsim.) Tib neeg feem coob puas hnov raug cuam tshuam tom qab pom qhov no? Yog koj tsis paub txog qhov xwm txheej no thiab lawv muab tes khawm koj caj dab los sis duav, los sis haj tseem hnia koj sab phlu, koj puas yuav hnov raug cuam tshuam? (Hnov.) Tom qab hnov raug cuam tshuam lawm, koj lub siab puas yuav kaj lug, los sis tsis kaj siab? (Kuv yuav hnov qias neeg.) Yog li ntawd, puas yuav muaj ib qho kev xav tias tau ua txhaum lawm? Yog koj tsis to taub meej meej tias lub ntsiab tseeb ntawm hom teeb meem no yog dab tsi, thiab koj tsuas raug chwv los sis raug kov ntawm lub cev los ntawm ib tug uas yog txiv neej los sis poj niam ib yam li koj yam tsis tau xav ntau txog qhov ntawd tom qab ntawd, ces tsis muaj teeb meem dab tsi. Txawm li cas los xij, yog koj xav txog qhov ntawd, thiab pheej xav mus ntxiv, thiab koj cia li tso tsis tau tus tib neeg no tseg lawm, zoo ib yam li qhov uas ib tug neeg nco txog cov txiv neej los sis poj niam, tsis hais txawm nyob hauv koj lub siab txawj xav es koj yuav tawm tsam los sis tsis tawm tsam los xij, ces qhov tshwm sim ntawm tej kev xav zoo li no hauv koj qhia tias koj twb raug cuam tshuam lawm, tsis yog lod? Yog li ntawd, lub ntsiab xeeb txawm ntawm kev sib raug zoo ntawm cov uas yog txiv neej nrog txiv neej los sis poj niam nrog poj niam, hom kev sib raug zoo uas tsis tsim nyog no, mas hnyav ntau dua. Ib txhia tib neeg pom tsis tshab qhov txawv ntawm kev ua plees ua yig ntawm cov txiv neej thiab poj niam thiab kev ua plees ua yig ntawm cov uas yog txiv neej nrog txiv neej los sis poj niam nrog poj niam, thiab saib ob qho teeb meem no ib yam nkaus. Tseeb tiag, qhov teeb meem ntawm kev ua plees ua yig ntawm cov uas yog txiv neej nrog txiv neej los sis poj niam nrog poj niam mas hnyav ntau dua qhov teeb meem ntawm kev ua plees ua yig ntawm cov txiv neej thiab poj niam.

Yog cov tib neeg uas muaj kev sib raug zoo uas tsis tsim nyog ntawm kev sib nyiam uas yog txiv neej nrog txiv neej los sis poj niam nrog poj niam tshwm sim hauv pawg ntseeg thiab yog tsis raug txwv, lawv yuav tsim kev phom sij thiab ua kev cuam tshuam rau txhua tus. Yog hom kev cuam tshuam dab tsi? Saib sab nraud mas, tib neeg feem coob pom tsis tau teeb meem dab tsi txog lawv txoj kev ua neeg thaum sib cuag nrog lawv, tiam sis kev sib raug zoo ntev ua rau lawv tej kev xav ntxhov quav niab thiab ua rau lawv lub siab tsaus ntuj nti. Lawv poob txoj kev kub siab rau kev ntseeg Vajtswv, thiab yam tsis tau ntsib tej teeb meem tshwj xeeb twg, lawv cia li tsis xav ntseeg Vajtswv lawm, tsis nyiam nyeem Vajtswv cov lus, nyob hauv lawv lub siab lawv hnov nyob deb ntawm Vajtswv zuj zus, thiab muaj tej kev xav uas phem txog qhov tso lawv txoj kev ntseeg tseg. Yog li ntawd, qhov muaj kev sib raug zoo uas tsis tsim nyog ntawm kev sib nyiam uas yog txiv neej nrog txiv neej los sis poj niam nrog poj niam zoo li no hauv pawg ntseeg mas yuav tsum tsis yog tsuas raug cheem thiab txwv xwb; tiam sis yuav tsum muab lawv tshem tawm ntawm pawg ntseeg mus tam sim ntawd thiab. Qhov no yog qhov yuav tsum ua tiag tiag. Kiag thaum pom cov tib neeg zoo li no, txawm lawv ua tej dej num dab tsi los sis lawv muaj lub meej mom dab tsi los xij, lawv yuav tsum raug tshem tawm ntawm pawg ntseeg mus tam sim ntawd, yam tsis muaj kev zam kiag li! Qhov no yog pawg ntseeg txoj kev cai tswj. Vim li cas thiaj li muaj txoj kev cai tswj no? Qhov ntawd muaj lub hauv paus uas ruaj khov. Vajtswv tsim tib neeg muaj txiv neej thiab poj niam; tom qab tsim Adas lawm, nws tus txij nkawm yog Evas, tsis yog lwm tus Adas. Qhov ua tej yam zoo li no rau cov uas muaj kev sib raug zoo uas tsis tsim nyog ntawm kev sib nyiam uas yog txiv neej nrog txiv neej los sis poj niam nrog poj niam ntawd yog raws li Vajtswv cov lus, thiab yog qhov yog tshaj plaws. Ib txhia yuav hais tias, “Vim li cas tsis muab lub cib fim rau cov tib neeg no lees txim hloov dua siab tshiab? Lawv tseem hluas; es tsis tsim nyog tso cai rau lawv ua qee yam uas tsis muaj qab hau lod?” Tsis tau! Lwm yam uas tsis muaj qab hau tuaj yeem saib xyuas sib txawv raws li cov xwm txheej thiab lub ntsiab xeeb txawm, tiam sis qhov kev ua uas tsis muaj qab hau tshwj xeeb no yeej tsis yog ib yam uas tsis muaj qab hau dog dig xwb; qhov ntawd yeej zam tsis tau kiag li, thiab leej twg uas ua ib yam zoo li no hauv pawg ntseeg yuav tsum raug tshem tawm mus tam sim ntawd! Yog ib pawg ntseeg puav leej yog cov neeg uas nyiam txiv neej nrog txiv neej los sis poj niam nrog poj niam xwb, ces txhua tus yuav raug tshem tawm mus. Pawg ntseeg zoo li no tsis xav tau, txawm ib pawg xwb los yeej tsis xav tau! Qhov no yog lub hauv paus ntsiab lus. Ib txhia hais tias, “Ib txhia tib neeg muaj kev nyiam txiv neej nrog txiv neej los sis poj niam nrog poj niam nrog ib tug tib neeg xwb, tiam sis lawv tsis tau haub ntxias lwm tus los sis pib cuam tshuam lwm tus. Cov tib neeg zoo li no puas tsim nyog daws thiab ntsaig tawm mus?” Yog lawv yog cov neeg uas nyiam txiv neej nrog txiv neej los sis poj niam nrog poj niam tiag tiag, qhov cia lawv nyob hauv pawg ntseeg ntawd mas cuag nkaus li muab ib lub foob pob uas teem sij hawm tso rau hauv cov neeg Vajtswv xaiv tseg nruab nrab—tsis ntxov los lig lub foob pob ntawd yeej yuav tawg. Txawm yog lawv tsis tau cuam tshuam, tsis tau haub ntxias, los sis tsis tau thab cov tib neeg uas yog txiv neej los sis poj niam ib yam li lawv, qhov ntawd yuav tsis txhais hais tias lawv yuav tsis ua nyob rau yav tom ntej. Tej zaum yog lawv tseem tsis tau nrhiav tau ib tug uas haum lawv siab, ib tug uas lawv nyiam, los sis tej zaum tsis tau txog lub sij hawm uas yog, thiab txhua tus tseem tsis tau sib paub thiab sib to taub. Tiam sis thaum lub sij hawm yog thiab tsim nyog rau cov tib neeg zoo li no lawm, lawv yuav pib nqis tes. Yog li ntawd, cov tib neeg zoo li no yuav tsum tsis txhob raug zam los sis tso cai kom nyob hauv pawg ntseeg kiag li, vim lawv tsis yog cov ib txwm muaj thiab tsis yog tib neeg. Pawg ntseeg tsis xav tau cov tib neeg zoo li no. Qhov daws cov uas muaj kev sib raug zoo uas tsis tsim nyog raws li txoj kev no tsis yog qhov yuam kev los sis tshaj dhau. Txawm li cas los xij, ib txhia hais tias, “Qee tus neeg uas nyiam txiv neej nrog txiv neej los sis poj niam nrog poj niam ntawd mas saib zoo li kuj zoo kawg; lawv tsis tau ua dab tsi phem li, lawv ua raws li cov kev cai lij choj thiab kev cai tswj, hwm cov laus thiab hlub cov hluas, yeej ib txwm ua tej yam zoo, ib txhia haj tseem muaj khoom pub thiab kev txawj, thiab ib txhia mas tshwj xeeb muaj kev hlub tshua pub khoom thiab pab lwm tus nyob hauv pawg ntseeg. Peb yuav tsum cia lawv nyob rau hauv pawg ntseeg.” Qhov kev xav no puas yog? (Tsis yog.) Txawm koj tej kev xav yuav yog los sis tsis yog los xij, koj yuav tsum muaj peev xwm pom tshab lub ntsiab xeeb txawm ntawm cov neeg uas nyiam txiv neej nrog txiv neej los sis poj niam nrog poj niam. Pawg ntseeg lub hauv paus ntsiab lus ntawm txoj kev xyaum ua rau cov tib neeg uas muaj kev sib raug zoo uas tsis tsim nyog ntawm kev nyiam txiv neej nrog txiv neej los sis poj niam nrog poj niam yog kom ntsaig lawv tawm mus. Qhov no yog ib txoj kev cai tswj fwm uas tsis muaj leej twg yuam cai tau; txhua tus yuav tsum xyaum ua raws li lub hauv paus ntsiab lus no.

Cov kev qhia tshwm uas pom tau meej ntawm ob hom kev muaj kev sib raug zoo uas tsis tsim nyog uas peb nyuam qhuav sib qhia txog no yog qhov yooj yim tshaj plaws rau tib neeg paub cais, pom tshab, thiab txiav txim. Hais txog cov uas muaj tej kev sib raug zoo uas tsis tsim nyog zoo li no, ib kis mas, cov thawj coj thiab cov neeg ua hauj lwm yuav tsum ua lawv tej luag hauj lwm kom tiav los ntawm kev siv tej kev xws li kev cheem, kev txwv, kev cais tawm, thiab kev ntsaig tawm mus los daws lawv. Lwm kis mas, cov kwv tij thiab cov muam kuj yuav tsum paub cais thiab nyob deb ntawm cov uas muaj ob hom kev sib raug zoo uas tsis tsim nyog no, kom thiaj li zam tau kev raug haub ntxias thiab poob rau hauv kev dag ntxias, uas tuaj yeem cuam tshuam lawv txoj kev ntseeg Vajtswv thiab lawv txoj kev caum qhov tseeb kom tau txais kev cawm dim. Kiag thaum poob rau hauv kev dag ntxias lawm, mas nyuaj heev kom tshem tau tus kheej tawm. Tib neeg feem coob tsim nyog muaj peev xwm paub cais ob hom tib neeg no. Tsis txhob ua zoo li cov tib neeg uas nyob hauv lub zej zog, ua txuj tsis pom tias leej twg thab leej twg, tsis muaj ib qho kev xam pom los sis qhov chaw sawv uas yog rau cov uas muaj kev ua plees ua yig, tsuav yog yus tus kheej tej txiaj ntsim tsis raug cuam tshuam ces muaj peev xwm nrog cov tib neeg zoo li no sib cuag tau li ib txwm, hais lus li ib txwm hais, cuag li tsis muaj dab tsi txawv. Cov tib neeg zoo li no puas muaj tej hauv paus ntsiab lus hauv txoj kev lawv coj rau lwm tus? Tsis muaj kiag li. Txhua tus uas ib txwm tsis ntseeg ua neej raws li lub tswv yim rau kev ua neej hauv ntiaj teb, siv zog kom tsis txhob ua txhaum rau leej twg los tiv thaiv lawv tus kheej, tiam sis Vajtswv lub tsev yeej txawv kiag ntawm lub zej zog uas ib txwm tsis ntseeg. Nyob hauv Vajtswv lub tsev mas, qhov tseeb tuav lub hwj chim. Vajtswv cheem tsum kom tib neeg coj rau lwm tus raws li qhov tseeb tej hauv paus ntsiab lus. Cov neeg Vajtswv xaiv tseg txhua tus tab tom lees txais thiab npaj qhov tseeb, thiab siv qhov tseeb los cais thiab coj rau lwm tus, tsis yog tsuas tiv thaiv lub neej hauv pawg ntseeg thiab tiv thaiv cov kwv tij thiab cov muam xwb tiam sis, qhov tseem ceeb tshaj, yog tiv thaiv tus kheej ntawm txoj kev txom nyem ntawm kev dag ntxias thiab zam tsis txhob raug haub ntxias mus rau hauv kev dag ntxias. Koj yim paub cais thiab nyob deb ntawm cov tib neeg zoo li no ntxov npaum li cas, ces koj yim yuav muaj peev xwm nyob deb ntawm kev dag ntxias thiab raug tiv thaiv. Qhov no yog txoj kev koj yuav tsum coj rau cov tib neeg uas muaj kev sib raug zoo uas tsis tsim nyog; qhov no yog mus raws li qhov tseeb tej hauv paus ntsiab lus thiab mus raws li Vajtswv tej kev npaj siab.

C. Kev Sib Raug Zoo Uas Tsis Tsim Nyog ntawm Tej Txiaj Ntsim

Lwm hom kev sib raug zoo uas tsis tsim nyog yog qhov uas ntsig txog tej txiaj ntsim. Tib neeg ua tej yam xws li sib qhuas cuav, sib txhawb nqa, sib qhuas, thiab sib ua kom haum siab txhawm rau tej txiaj ntsim. Qhov coj txoj kev coj nkhaus thiab tej xwm txheej phem zoo li no los rau hauv lub neej hauv pawg ntseeg mas cuam tshuam rau lwm tus uas nyeem Vajtswv cov lus ntsiag to los sis mloog cov kev ntsib kev pom uas sib qhia ntawd hnyav heev. Kiag thaum tsim tau ib txoj kev sib raug zoo uas ntsig txog tej txiaj ntsim lawm, cov tib neeg uas muaj feem xyuam ntawd yuav nquag hais los sis ua tej yam uas sib cov nyom nrog lawv lub siab xav, txhawm rau lawv tus kheej qhov txiaj ntsim. Piv txwv li, yog ib tug neeg twg pom hais tias lwm tus muaj txiaj ntsig rau lawv txoj kev lag luam los sis tej txiaj ntsim nyob rau qee txoj kev, txhawm rau ua kom tus ntawd zoo siab, ces tej zaum lawv yuav xaiv tus tib neeg ntawd los ua ib tug thawj coj, muab tus neeg ntawd npe mus ua ib teg dej num tshwj xeeb, los sis pom zoo nrog txhua yam uas tus tib neeg ntawd hais, hais tias qhov ntawd yog lawm txawm qhov ntawd puas mus raws li qhov tseeb los xij li. Txhawm rau kom ua rau cov neeg ntawd zoo siab, lawv ua ntau yam uas tsis mus raws li tej hauv paus ntsiab lus thiab tawm tsam qhov tseeb, tej no cuam tshuam cov neeg Vajtswv xaiv tseg hauv kev paub cais tib neeg, xwm txheej, thiab yam khoom thiab kev nkag mus rau hauv qhov tseeb. Lawv piav qhov uas yuam kev thiab nkhaus tias yog, piav tib neeg tej kev xav phem thiab tej kev xav hauv nruab siab tias mus raws li Vajtswv tej kev npaj siab, thiab lwm yam ntxiv, yog li ntawd cuam tshuam tib neeg tej kev xav thiab txoj xub ke thiab lub hom phiaj uas yog ntawm lawv txoj kev caum. Txhua yam ntawm tej kev coj no yog tshwm los ntawm lawv txoj kev tiv thaiv ib txoj kev sib raug zoo uas ntsig txog tej txiaj ntsim. Txhawm rau tiv thaiv thiab pov hwm lawv tus kheej tej txiaj ntsim, lawv tuaj yeem hais lus tawm tsam lawv lub siab txawj xav thiab ua tawm tsam tej hauv paus ntsiab lus. Yam uas lawv hais thiab ua ntawd ua rau muaj kev cuam tshuam thiab kev puas tsuaj rau lub neej hauv pawg ntseeg, thaum kawg coj ntau tus tib neeg mus rau qhov tsis muaj peev xwm sib qhia Vajtswv cov lus, nyeem thov Vajtswv cov lus, los sis sib qhia cov kev ntsib kev pom ntawm tus kheej nyob rau hauv qhov uas ib txwm muaj thiab raws qib raws duas, ua rau muaj kev puas tsuaj rau tib neeg txoj kev nkag mus rau hauv lub neej txoj sia. Thaum tib neeg sib qhia lawv cov kev to taub ntawm kev ntsib kev pom ntawm tus kheej, lawv nquag ntsib kev cuam tshuam los ntawm tib neeg cov kev sib raug zoo uas ntsig txog tej txiaj ntsim; qee qhov yog kev cuam tshuam ntawm lus hais, qee qhov yog ntawm txoj kev coj, thiab lwm qhov yog ntsig txog tej hom phiaj thiab tej xub ke. Tib neeg pheej raug txiav thaum sib qhia qhov tseeb thiab nyeem thov Vajtswv cov lus, pheej raug coj dhau ntawm lub ncauj lus mus lawm, thiab pheej raug cuam tshuam rau ntau theem uas sib txawv. Yog li ntawd, cov uas muaj kev sib raug zoo uas tsis tsim nyog ntawm tej txiaj ntsim thiab tej kev coj uas muaj feem xyuam ntawd yuav tsum raug txwv. Cov thawj coj pawg ntseeg uas ntsib cov teeb meem no yuav tsum tsis txhob ua txuj tsis pom, thiab muaj tseeb tias yuav tsum tsis txhob tso cai rau txoj kev ua phem zoo li no, tsis txhob tso cai rau tej xwm txheej zoo li no tshwm sim hauv lub neej hauv pawg ntseeg. Tiam sis, lawv yuav tsum ceev faj thiab pom tau sai, thiab cheem thiab txwv tej ntawd kom ncav sij hawm.

Qhov muaj kev sib raug zoo uas tsis tsim nyog ntawm tej txiaj ntsim yog ib qho xwm txheej uas nquag tshwm sim nyob rau hauv pawg ntseeg. Piv txwv li, yog ib tug twg npaj yuav koom nrog kev xaiv tsa los ua tus thawj coj pawg ntseeg tom ntej, tej zaum lawv yuav rub ib pab tib neeg los thiab qhia lawv tej tswv yim rau cov tib neeg ntawd. Cov tib neeg no tsis ruam; lawv hais zais ntshis tias: “Yog peb xaiv koj, koj yuav muab txiaj ntsim dab tsi rau peb?” Yog li, ib txoj kev sib raug zoo uas raws li tej txiaj ntsim raug tsim tsa nyob hauv lawv. Txhawm rau tiv thaiv lawv tej txiaj ntsim, lawv pheej sawv ua ib tog ntawm cov teeb meem thaum nyob rau hauv tej kev sib txoos ua ke. Yam tsis muaj lwm tus ras txog los sis paub txog lub hauv paus xwm txheej, lawv pheej tham txog tias ib tug tib neeg zoo npaum li cas, tias yam uas lwm tus ua ntawd raug tso cai thiab foom koob hmoov los ntawm Vajtswv npaum li cas, leej twg tau muab khoom fij thiab lawv muab fij ntau npaum li cas, thiab leej twg tau ua tej kev pab cuam dawb dab tsi rau Vajtswv lub tsev lawm, lawv nquag sib qhuas cuav thiab sib qhuas tas li. Nyob hauv lub neej hauv pawg ntseeg, lawv pheej tso tej yam no tawm tas li txhawm rau txhawb qhov kev pom zoo uas lawv tau muaj ua ntej lawm thiab los tiv thaiv lawv tej txiaj ntsim uas ib leeg ua rau ib leeg. Piv txwv li, tej zaum ib tug twg yuav hais tias, “Yog koj xaiv kuv ua thawj coj, thaum kuv tau ua thawj coj lawm, kuv yuav cia koj los ua ib tug coj pab pawg.” Tsis yog lawv txhua tus nrhiav kev tau txais txiaj ntsim ntawm tus kheej lod? Txhawm rau kom tau lawv tej txiaj ntsim, tsis yog lawv yuav tsum tau hais qee yam, los sis ua qee yam lod? Yog li, lawv qhia ntau yam kev qhia tshwm uas pom tau meej uas sib txawv thaum tuaj sib txoos ua ke, txhua yam yog tsom mus rau txoj kev txhawb qhov kev pom zoo uas lawv tau muaj ua ntej lawm thiab tej txiaj ntsim uas muaj feem xyuam nyob rau hauv. Ua ntej ua tiav lawv lub hom phiaj, feem ntau ntawm txhua yam uas lawv ua yog raug txhawb los ntawm tej txiaj ntsim. Yog li, tej kev npaj siab thiab tej hom phiaj tom qab ntawm yam uas lawv hais thiab ua ntawd puas yog tias tsis tsim nyog heev? Txoj kev sib raug zoo uas tsim tsa hauv lawv ntawd tsis yog ib qho uas tsis tsim nyog lod? Tej kev sib raug zoo uas tsis tsim nyog zoo li no hauv pawg ntseeg tsis tsim nyog raug txwv lod? Ib txhia hais tias, “Peb yuav txwv qhov ntawd li cas yog tias tsis pom?” Tej yam zoo li no, tshwj tsis yog tsis ua xwb, thaum ua lawm, ces yeej yuav pom thiab yuav raug qhia tshwm. Yog tib neeg sib qhia qhov tseeb thiab lawv cov kev to taub thiab cov kev ntsib kev pom ntawm tus kheej kom tsim nyog, yam tsis xyaw ib yam dab tsi uas tsis muaj feem xyuam txog qhov tseeb, ces txhua tus yeej paub tau qhov no. Yog muaj kev xyaw, ces tib neeg kuj paub cais tau qhov no thiab. Yog li ntawd, nyob rau hauv pawg ntseeg, ntau txoj kev sib raug zoo ntawm kev lag luam uas tshwm sim rau ib leeg tiv thaiv ib leeg tej txiaj ntsim ntawd kuj yuav tsum raug txwv thiab; yam tsawg tshaj plaws, yuav tsum ceeb toom thiab sib qhia nrog cov uas muaj feem xyuam, cia kom lawv paub txog lawv tus kheej tej teeb meem thiab to taub txog qhov hnyav uas tshwm sim los ntawm kev koom nrog tej kev ua zoo li no, tib lub sij hawm ntawd kuj cia kom cov kwv tij thiab cov muam muaj peev xwm paub cais lub ntsiab xeeb txawm ntawm tej yam no. Hom kev ua no muaj kev cuam tshuam dab tsi rau tib neeg feem coob? Qhov ntawd ua rau tib neeg los xav tias pawg ntseeg thiab lub zej zog tsis muaj qhov txawv ntau, ob qho no puav leej yog qhov chaw uas txhua tus ib leeg siv ib leeg thiab tib neeg kev ua lag luam kom tau txiaj ntsim rau lawv tus kheej. Txoj kev coj no tsis yog ib qho kev cuam tshuam me me tiam sis tsim ib qho kev cuam tshuam hnyav rau lub neej hauv pawg ntseeg. Qhia Kuv seb, ib tug neeg uas pheej rub tib neeg los kom yeej lawv cov suab rau ib qho kev xaiv tsa ntawd, siv tej kev uas tsis ib txwm muaj los tswj txoj kev xaiv tsa kom tau txais lub meej mom ntawm ib tug thawj coj, puas yog ib tug tib neeg zoo? Pom tseeb tias, cov thawj coj uas raug xaiv los ntawm txoj kev no tsis yog tib neeg zoo. Cov kwv tij thiab cov nkauj muam uas poob rau hauv lawv ob txhais tes lawm cia siab puas tau rau ib yam zoo dab tsi li? Yog ib tug twg dhau los ua ib tug thawj coj los ntawm qee txoj kev uas tsis ib txwm muaj, es tsis yog raug xaiv raws li tej hauv paus ntsiab lus, ces tus thawj coj zoo li no yeej tsis yog ib tug tib neeg zoo li. Yog tso cai rau lawv los coj, qhov ntawd mas cuag nkaus li qhov uas tab meeg muab cov kwv tij thiab cov muam rau ib tug tib neeg phem, rau ib tug tawm tsam khetos, uas cuag nkaus li tib neeg feem coob raug muab xa mus rau hauv Ntxwgnyoog ob txhais tes; nyob rau hauv ib qho xwm txheej zoo li no, qhov txiaj ntsig ntawm lawv lub neej hauv pawg ntseeg ces yeej pom tau meej lawm. Qhov no yog ib hom kev sib raug zoo uas tsis tsim nyog uas muaj feem xyuam txog tej txiaj ntsim. Txawm nyob nruab nrab ntawm pab pawg los sis cov tib neeg, thaum kev sib raug zoo ntawm cov tib neeg muaj feem xyuam nrog tej txiaj ntsim lawm, nyob hauv lawv tej kev ua yuav tig mus rau tej txiaj ntsim ntawm lawv tus kheej ntau dua tiam sis tsis yog ua raws li tej hauv paus ntsiab lus los tiv thaiv Vajtswv lub tsev tej txiaj ntsim. Tej kev sib raug zoo uas zoo li no tsis yog raug tsim ntawm lub siab txawj xav thiab qhov laj thawj ntawm txoj kev ua neeg li ib txwm muaj tiam sis yog tawm tsam rau lub siab txawj xav thiab qhov laj thawj, thiab haj yam tawm tsam qhov tseeb tej hauv paus ntsiab lus. Yam uas lawv hais, ua, thiab qhia kom pom, nrog rau lawv tej kev npaj siab, tej hom phiaj, tej kev txhawb siab, tej hauv paus, thiab ntau yam ntxiv, puav leej raug txhawb los ntawm tej txiaj ntsim xwb; yog li, tej kev sib raug zoo no thiaj li muab teem tau tias tsis tsim nyog. Vim qhov kev tshwm sim ntawm tej kev sib raug zoo uas zoo li no mas cuam tshuam rau cov neeg Vajtswv xaiv tseg ua lub neej hauv pawg ntseeg, ua rau qhov ntawd nyuaj rau cov tib neeg feem coob los nyeem Vajtswv cov lus thiab sib qhia qhov tseeb kom ntsiag to rau ntawm Vajtswv lub xub ntiag, yog li ntawd tej kev sib raug zoo uas tsis tsim nyog zoo li no yuav tsum raug txwv hauv pawg ntseeg. Rau cov xwm txheej uas hnyav thiab muaj tej kev coj ntawm cov tib neeg phem, yuav tsum muaj kev ceeb toom rau lawv, thiab yog cov uas muaj feem xyuam nrog yeej tsis lees txim hloov dua siab tshiab txawm yuav ua li cas los xij, lawv yuav tsum raug ntsaig tawm ntawm pawg ntseeg mus.

D. Kev Ntxub Ntawm Cov Tib Neeg

Kev sib raug zoo uas tsis tsim nyog muaj ntau yam kev qhia tshwm uas pom tau meej. Ib qho ntxiv yog kev sib ntxub ntawm ntiag tug. Piv txwv li, tej zaum yuav muaj kev sib txhuam los sis kev sib cav nyob rau hauv tsev neeg ntawm niam pog thiab nyab, ntawm cov niam tij niam ntxawm, los sis ntawm cov kwv tij, los sis tej zaum yuav tshwm sim nyob rau ntawm cov neeg zej zog. Qee zaus qhov no haj tseem dhau los ua kev sib ntxub, thiab zoo li cov yeeb ncuab, cov tib neeg no thiaj li tsis muaj peev xwm sib koom tes los sis ua hauj lwm ua ke, mus txog theem uas lawv sib pom tsis tau kiag li, thiab sib cav sib ceg thiab sib ntaus thaum twg lawv sib ntsib. Thaum lawv sib pom nyob rau hauv tej kev sib txoos ua ke, lawv lub siab kuj muaj kev sib ntxub puv npo, thiab lawv tsis muaj peev xwm nyob ntsiag to rau ntawm Vajtswv lub xub ntiag los xyiv fab rau Vajtswv txoj lus thiab tig xav txog thiab paub lawv tus kheej, thiab lawv yeej tsis muaj peev xwm tso lawv tej kev xav nkhaus thiab kev sib ntxub tseg kom muaj ib qho kev sib txoos ua ke li ib txwm muaj. Tiam sis, thaum twg lawv sib ntsib mas, lawv sib cav thiab sib ceg, lawv ib leeg muab ib leeg tej kev ua tsis tau zoo nthuav tawm thiab ib leeg tawm tsam ib leeg, thiab haj tseem sib foom thiab, uas ua rau muaj kev cuam tshuam phem tshaj plaws rau cov neeg Vajtswv xaiv tseg. Cov tib neeg zoo li no yog cov tsis ntseeg, lawv yog cov ib txwm tsis ntseeg. Rau cov uas ntseeg Vajtswv tiag tiag thiab nyiam qhov tseeb, txawm yuav muaj dab tsi tshwm sim, los sis lawv yuav sib cav nrog leej twg, los sis lawv yuav muaj kev xav nkhaus rau leej twg los xij, lawv muaj peev xwm nrhiav qhov tseeb, tig xav txog thiab paub lawv tus kheej, thiab daws tej teeb meem ntawd raws li qhov tseeb tej hauv paus ntsiab lus. Yog lawv tau ua ib yam dab tsi txhaum thiab tshuav ib tug twg nqi lawm, lawv tuaj yeem mus thov txim ua ntej thiab lees lawv tej kev ua yuam kev; lawv yeej yuav tsis ua rau muaj kev sib cav los sis teeb meem nyob rau hauv tej kev sib txoos ua ke kiag li. Qhov uas sib cav thiab ua ntxhov hnyo rau hauv pawg ntseeg ntawd mas yeej tsis haum raws li cov neeg dawb huv li; txoj kev coj zoo li no ua rau Vajtswv poob ntsej muag hnyav heev. Cov tib neeg uas zoo li no tsis muaj kev ua neeg, lub siab txawj xav, thiab laj thawj dhau lawm; lawv yeej tsis yog cov ntseeg Vajtswv tiag tiag hlo li. Qhov teeb meem no mas nquag tshwm sim rau cov ntseeg tshiab ntau dua me ntsis. Vim cov ntseeg tshiab tsis to taub qhov tseeb, thiab lawv cov moj yam qias vuab tsuab tseem tsis tau raug ntxuav kom dawb huv, qhov ntawd thiaj li yooj yim rau lawv muaj tej kev sib cav txog ntau yam, thiab haj tseem nthuav lawv qhov kev siab kub tawm los thiab ua rau lawv sib ntaus. Yog cov moj yam qias vuab tsuab no tsis raug daws, tib neeg yuav khaws kev sib ntxub cia rau hauv lawv lub siab, thiab txawm yog thaum ua lub neej hauv pawg ntseeg los, lawv yeej tseem yuav sib cav tsis tu ncua nrog qhov kev siab kub thiab kev sib ntxub no. Qhov no mas cuam tshuam rau lub neej hauv pawg ntseeg, cuam tshuam rau cov neeg Vajtswv xaiv tseg txoj kev noj thiab haus Vajtswv txoj lus, kev qhuas Vajtswv, thiab kev sib qhia txog lawv tej kev to taub ntawm txoj kev ntsib kev pom txog Vajtswv cov lus. Nws kuj cuam tshuam ncaj qha rau cov neeg Vajtswv xaiv tseg txoj kev nkag mus rau hauv lub neej txoj sia thiab. Ib txhia ntseeg tshiab yooj yim muaj kev sib cav vim kev tsis sib haum xeeb txog tej teeb meem me me. Piv txwv li, ua ntej pib kev sib txoos ua ke, tej zaum qee leej xav hu zaj nkauj no hos lwm tus ho xav hu lwm zaj—tab txawm yog ib qho teeb meem me me li no xwb los yeej yooj yim ua rau muaj kev sib cav. Ib yam nkaus li ntawd, qee zaus kev muaj tswv yim tsis sib xws txog ib qho teeb meem kuj yooj yim ua rau muaj kev sib cav, thiab haj tseem yog ua mob rau ib tug twg vim tsis ua tib zoo xav thaum hais lus los yeej ua rau muaj kev sib cav tau. Tej xwm txheej zoo li no mas nquag tshwm sim nyob rau hauv cov ntseeg tshiab. Kiag thaum kev sib cav tshwm sim hauv kev sib txoos ua ke ntawd, ces yeej cia li cuam tshuam rau lub neej hauv pawg ntseeg lawm. Qhov no tsis yog cuam tshuam rau cov neeg Vajtswv xaiv tseg lawm thiab lod? Cov uas nyiam sib cav thiab sib ceg txog qhov yog qhov tsis yog ntawd mas yog cov uas yooj yim cuam tshuam rau lub neej hauv pawg ntseeg tshaj plaws. Lawv tsuas quav ntsej txog kev ua kom tau raws li lawv tus kheej txoj kev khav theeb thiab lub ntsej muag yam tsis xav txog cov neeg Vajtswv xaiv tseg tej txiaj ntsim li. Qhov ua li no, tsis yog ua rau muaj kev cuam tshuam rau lub neej hauv pawg ntseeg lod? (Yog.) Pawg ntseeg yog ib qho chaw uas cov kwv tij thiab cov nkauj muam tuaj sib sau ua ke noj, haus, thiab xyiv fab rau Vajtswv cov lus; nws yog ib qho chaw rau kev zwm rau thiab pe hawm Vajtswv. Pawg ntseeg yeej tsis yog ib qho chaw rau kev tso tus kheej tej kev tsis txaus siab tawm, thiab haj yam tsis yog rau kev sib cav los sis sib ceg txog qhov yog qhov tsis yog. Thaum cov tib neeg zoo li no ua rau muaj kev cuam tshuam li no, qhov no yuav ua rau muaj qhov tshwm sim los zoo li cas? Qhov ntawd yuav ua rau tsis muaj kev xyiv fab kiag li nyob rau hauv tej kev sib txoos ua ke; qhov ntawd ua rau cov neeg Vajtswv xaiv tseg tsis muaj peev xwm tau txais txiaj ntsim hauv lub neej txoj sia, thiab haj tseem ua rau cov tib neeg feem coob nrhiav tsis tau kev thaj yeeb nyab xeeb, raug kev txom nyem yam piav tsis tau li. Sij hawm dhau mus, ib txhia cia li muaj kev xav tsis zoo thiab qaug zog, haj tseem tsis xav tuaj koom kev sib txoos ua ke lawm thiab. Qhov xwm txheej no pheej tshwm sim nyob rau hauv cov pawg ntseeg feem ntau tas li thiab yog ib yam uas txhua tus neeg Vajtswv xaiv tseg tau ntsib tau pom dua. Yog li yuav daws qhov teeb meem ntawm qhov pheej sib cav thiab sib ntaus thaum sib txoos ua ke ntawd li cas? Yuav tsum xaiv ob peb nqe Vajtswv cov lus uas muaj feem xyuam rau qhov teeb meem ntawd thiab nrog sawv daws nyeem ua ke ntau zaus thaum sib txoos ua ke; tom qab ntawd, txhua tus yuav tsum sib qhia qhov tseeb, qhia txog lawv txoj kev to taub. Txoj kev no tuaj yeem ua rau tau txais qee qhov txiaj ntsig. Tsis yog cov uas nyiam sib cav muaj peev xwm paub txog lawv tej kev yuam cai thiab hnov tu siab xwb, tiam sis txawm yog cov uas nyob ib sab saib los kuj muaj peev xwm tig xav txog seb lawv puas tau nthuav lawv cov moj yam qias vuab tsuab tawm nyob rau hauv tej xwm txheej zoo li ntawd thiab seb lawv puas muaj peev xwm sib cav nrog lwm tus—ua li no, cov uas nyob ib sab saib xwb los kuj tuaj yeem los paub lawv tus kheej thiab. Tsis hais tus uas koom nrog kev sib cav los sis tsis koom los xij, tom qab nyeem ob peb nqe Vajtswv cov lus ntawd ob peb zaug lawm, lawv muaj peev xwm paub txog lawv tus kheej cov moj yam qias vuab tsuab thiab pom hais tias kev ua neej raws li cov moj yam qias vuab tsuab ntawd mas yeej txhais tau hais tias tsis muaj lub siab txawj xav thiab laj thawj, thiab tsis muaj kev ua neeg ib qho me me li. Tej txiaj ntsig ntawm kev ua lub neej hauv pawg ntseeg zoo li no kuj zoo kawg thiab, tsis yog lod? Txawm hais tias tej zaum yuav muaj kev sib cav thaum pib kev sib txoos ua ke los, yog tom qab ntawd txhua tus muaj peev xwm nyeem Vajtswv cov lus, nyob ntsiag to rau ntawm Vajtswv lub xub ntiag los tig xav txog lawv tus kheej, siv qhov tseeb los daws tej teeb meem, thiab lees txim hloov dua siab tshiab tiag tiag—yog ua tau cov txiaj ntsig no tiav—ces qhov no yog lub neej hauv pawg ntseeg li ib txwm muaj lawm. Yog li ntawd, txawm yuav muaj dab tsi tshwm sim thaum sib txoos ua ke los yeej tsis yog qhov phem tas li; tsuav txhua tus muaj ib lub siab ib lub ntsws los nrhiav qhov tseeb, thiab nrog sawv daws nyeem ob peb nqe Vajtswv cov lus uas muaj feem xyuam txog ntawd ua ke ob peb zaug xwb, txawm hais tias daws tsis tau cov teeb meem ntawd kom tag nrho los, tib neeg yuav muaj peev xwm pom tshab tej ntawd me ntsis thiab muaj kev paub cais me ntsis—txhua tus yuav tau txais txiaj ntsim los ntawm qhov no. Nej hais lub neej hauv pawg ntseeg zoo li no puas yog nyuaj nrhiav tau heev? Qhov no yog kev hloov ib yam phem los ua ib yam zoo, qhov ntawd zoo nkaus li tau txais koob hmoov los ntawm kev txom nyem. Txawm li cas los xij, qhov no yuav tsum tsis txhob ua rau tib neeg txhawb lub tswv yim uas hais tias kev sib cav thiab kev sib ceg yog yam uas tsim nyog muaj nyob rau hauv lub neej hauv pawg ntseeg; qhov no yeej txhawb tsis tau kiag li. Kev sib cav thiab kev sib ceg yooj yim ua rau muaj kev siab kub thiab kev tsis sib haum, uas tsis zoo rau txhua tus thiab ua rau muaj kev mob rau cov uas muaj feem xyuam txog ntawd. Yog li ntawd, kev nrhiav qhov tseeb los daws tej teeb meem ntawd yog txoj kev zoo tshaj plaws, thiab kev to taub qhov tseeb muaj peev xwm zam tau tej xwm txheej zoo li no nyob rau yav tom ntej yam muaj txiaj ntsig. Cov tib neeg ntse yuav tsum muaj ib tug cwj pwm ua siab ntev thiab thev taus thaum muaj kev sib txhuam thiab kev tsis sib haum tshwm tuaj. Vim lawv kuj muaj cov moj yam qias vuab tsuab thiab yooj yim ua mob rau lwm tus, thaum lawv nthuav lawv cov moj yam qias vuab tsuab tawm, lawv yuav tsum maj nroos thov Vajtswv thiab nrhiav qhov tseeb los daws tej teeb meem ntawd. Ua li no, thaum txog lub sij hawm sib txoos ua ke ntawd, kev chim siab thiab kev sib ntxub ntawm ib leeg rau ib leeg twb ploj tag lawm, ua rau muaj kev ywj pheej nyob rau hauv lawv lub siab thiab ua rau yooj yim dua los nrog cov kwv tij thiab cov nkauj muam sib raug zoo, vim qhov ntawd thiaj li tsim muaj kev sib koom tes uas sib haum xeeb. Thaum twg leej twg pom ib tug kwv tij los sis ib tug muam nthuav lawv tus moj yam qias vuab tsuab tawm, lawv yuav tsum pab nrog txoj kev hlub, tsis txhob txiav txim, teem txim, los sis tso lawv tseg. Tej zaum tej teeb meem yuav tsis raug daws tom qab pab ib los sis ob zaug, tiam sis yuav tsum tau ua siab ntev thiab zam. Tsuav lawv tsis cuam tshuam rau lub neej hauv pawg ntseeg los sis txhob txwm ua phem, ces yuav tsum ua siab ntev thiab zam rau lawv mus txog thaum kawg—yeej yuav muaj ib hnub uas lawv yuav xeev los. Yog ib tug twg muaj kev ua neeg phem thiab tsis lees txais kev pab hlo li, txawm yuav sib qhia qhov tseeb li cas los yeej tsis lees txais li, ces lawv tsis yog cov ntseeg Vajtswv tiag tiag, thiab yuav tsum tau nyob kom deb ntawm cov tib neeg zoo li no. Yog lawv pheej cuam tshuam lub neej hauv pawg ntseeg tas li, ces yuav tsum coj rau thiab daws lawv raws li tej hauv paus ntsiab lus. Yog lawv tsis yog cov tib neeg phem tiam sis tsuas yog pheej nthuav lawv tus moj yam qias vuab tsuab tawm xwb, lawv ntxub lawv tus kheej tiam sis hnov tias tswj tsis tau tus kheej nyob rau lub sij hawm ntawd, ces cov tib neeg zoo li no yuav tsum tau pab nrog txoj kev hlub; pab kom lawv to taub qhov tseeb thiab kom paub cais thiab paub txog lawv tej kev nthuav tawm txog txoj kev qias vuab tsuab—ua li no, lawv cov kev nthuav tawm txog txoj kev qias vuab tsuab yuav maj mam tsawg zuj zus. Yog cov kwv tij thiab cov muam tsuas raug cuam tshuam qee zaus los ntawm cov tib neeg no xwb, qhov no zam txim tau rau lawv; tsuav lawv txoj kev ua neeg tsis muaj teeb meem loj, thiab lawv tsis yog cov tib neeg txawj dag los sis cov tib neeg phem, ces yuav tsum tau txhawb thiab pab lawv los ntawm kev sib qhia qhov tseeb. Yog lawv lees txais tau qhov tseeb, yuav tsum coj rau lawv nrog txoj kev hlub. Txawm li cas los xij, yog lawv tsis kam lees txim hloov dua siab tshiab thiab ua rau muaj kev cuam tshuam tsis zoo rau lub neej hauv pawg ntseeg rau ib lub sij hawm ntev lawm, ces cov thawj coj pawg ntseeg yuav tsum ceeb toom thiab muab kev txwv. Yog lawv pheej tsis kam lees txais qhov tseeb li, cov tib neeg zoo li no yog cov tib neeg phem. Cov tib neeg phem tsis haum nrog leej twg li, lawv yog cov neeg ua phem rau pab pawg thiab cov dab phem. Kev tseg lawv nyob hauv pawg ntseeg tsuas yog yuav ua rau muaj kev tab kaum thiab kev cuam tshuam xwb. Yog li ntawd, cov uas tsis kam hloov txawm yuav raug qhuab ntuas ntau zaus los xij yuav tsum tau raug saib xyuas yam li cov tib neeg phem thiab raug ntsaig tawm ntawm pawg ntseeg mus. Txhua tus uas pheej cuam tshuam rau lub neej hauv pawg ntseeg thiab cov neeg Vajtswv xaiv tseg txoj kev nkag mus rau hauv lub neej txoj sia ntawd puav leej yog ib tug tsis ntseeg thiab ib tug tib neeg phem, thiab lawv yuav tsum raug ntsaig tawm ntawm pawg ntseeg mus. Tsis hais tus tib neeg ntawd yog leej twg los sis lawv tau ua li cas yav dhau los, yog lawv pheej cuam tshuam pawg ntseeg tes hauj lwm thiab lub neej hauv pawg ntseeg tas li, tsis kam txais kev raug ntuas, thiab pheej tiv thaiv lawv tus kheej los ntawm qhov laj thawj uas yuam kev, lawv yuav tsum raug ntsaig tawm ntawm pawg ntseeg mus. Qhov ua li no mas yog txhawm rau tiv thaiv qhov kev nce qib uas ib txwm muaj ntawm pawg ntseeg tes hauj lwm thiab tiv thaiv cov neeg Vajtswv xaiv tseg tej txiaj ntsim, qhov ua li no mas mus raws li qhov tseeb tej hauv paus ntsiab lus thiab Vajtswv tej kev npaj siab lawm. Cov neeg Vajtswv xaiv tseg txoj kev nkag mus rau hauv lub neej txoj sia thiab pawg ntseeg tes hauj lwm yuav tsum tsis txhob raug cuam tshuam los ntawm kev sib cav thiab kev tsim teeb meem uas tsis muaj qab hau ntawm ob peb tug tib neeg phem—qhov no tsis tsim nyog thiab kuj tsis ncaj ncees rau cov neeg Vajtswv xaiv tseg thiab.

Yog cov tib neeg phem pheej ua rau muaj kev cuam tshuam hauv pawg ntseeg, ua rau lub neej hauv pawg ntseeg tsis muaj txiaj ntsig zoo, txoj kev daws zoo tshaj plaws yog muab tib neeg faib ua hom thiab faib kev sib txoos ua ke ua ntau pab pawg: Cov uas nyiam qhov tseeb thiab ua lawv tej dej num tiag tiag tuaj sib txoos ua ke; cov uas xav caum qhov tseeb tiam sis tsis ua lawv tej dej num tuaj sib txoos ua ke; thiab cov uas nyiam ua rau muaj tej kev tab kaum thiab kev cuam tshuam, hais lus xaiv txog lwm tus, thiab txiav txim thiab teem txim rau lwm tus tuaj sib txoos ua ke. Ua li no, qhov tseem ceeb mas pawg ntseeg raug faib ua peb pab pawg tib neeg—muab txhua tus faib raws li lawv hom, kuj hais tau li ntawd—yog li ntawd thiaj li paub tseeb tias cov pab pawg no tsis sib cuam tshuam thaum sib txoos ua ke. Cov tib neeg uas muaj kev ua neeg phem, txawm lawv yuav ua phem yam tsis muaj kev tswj npaum li cas los xij, yuav tsis cuam tshuam rau lwm tus tiam sis tsuas ua phem rau lawv tus kheej xwb. Ib txhia tib neeg muaj tus moj yam tsiv nyaum. Yog ib tug twg hais ib yam dab tsi uas ua mob los sis ua txhaum rau lawv, lawv yuav ntxub tus tib neeg ntawd, thiab nrhiav tej hau kev los tawm tsam thiab ua pauj rov qab. Txawm yuav sib qhia qhov tseeb rau lawv li cas, los sis yuav ntuas lawv li cas los, lawv yeej tsis lees txais. Lawv yeem tuag zoo dua li lees txim hloov dua siab tshiab, thiab tseem cuam tshuam rau lub neej hauv pawg ntseeg txuas ntxiv mus. Qhov no ua pov thawj tias lawv yog cov tib neeg phem. Peb tsis tuaj yeem zam rau cov tib neeg phem zoo li no ntxiv lawm. Lawv yuav tsum raug ntsaig tawm ntawm pawg ntseeg mus raws li qhov tseeb tej hauv paus ntsiab lus. Qhov no thiaj li yog tib txoj kev daws qhov teeb meem no kom tag nrho. Cov tib neeg uas muaj cov moj yam tsiv nyaum ntawd txawm lawv tau ua yuam kev los sis ua phem li cas los xij, lawv yeej yuav tsis tso cai rau leej twg los nthuav tawm lawv los sis ntuas lawv li. Yog muaj leej twg nthuav tawm thiab ua txhaum rau lawv, lawv yuav npau taws heev, ua pauj rov qab, thiab yeej tsis tso qhov teeb meem ntawd tseg hlo li. Lawv tsis muaj kev ua siab ntev thiab kev thev taus rau lwm tus tib neeg, thiab tsis xyaum ua lub siab thev taus rau lawv. Lawv coj lawv tus kheej mus raws li lub hauv paus ntsiab lus twg? “Kuv xum ntxeev siab zoo dua li raug ntxeev siab rau.” Muab ua lwm lo lus hais, lawv thev tsis taus qhov raug lwm tus ua txhaum rau li. Qhov no tsis yog cov tib neeg phem txoj kev xav lod? Qhov no yog cov tib neeg phem txoj kev xav ntag. Tsis tso cai rau leej twg ua txhaum rau lawv. Rau lawv mas, qhov ntawd yog qhov lees txais tsis tau rau leej twg los ua rau lawv chim tab txawm yog me ntsis xwb los xij, thiab lawv ntxub txhua tus uas ua li ntawd. Lawv yuav caum tus tib neeg ntawd tas li thiab yeej tsis tso qhov teeb meem ntawd tseg li—qhov ntawd yog cov tib neeg phem. Koj yuav tsum muab cov tib neeg phem cais tawm los sis muab lawv ntsaig tawm mus sai li sai tau thaum koj pom tias lawv muaj lub ntsiab tseeb ntawm cov tib neeg phem, ua ntej lawv yuav ua ib qho kev phem loj. Qhov no yuav txo qhov kev puas tsuaj uas lawv ua kom tsawg tshaj plaws; qhov ntawd yog txoj kev xaiv uas ntse. Yog cov thawj coj thiab cov neeg ua hauj lwm tos txog thaum ib tug tib neeg phem ua rau muaj qee yam kev puas tsuaj lawm es mam li saib xyuas, ces lawv tab tom ua qeeb lawm. Qhov ntawd yuav ua pov thawj tias cov thawj coj thiab cov neeg ua hauj lwm ruam heev, thiab tsis muaj hauv paus ntsiab lus rau lawv tej kev ua. Muaj ib txhia thawj coj thiab neeg ua hauj lwm uas ruam thiab tsis paub dab tsi li no. Lawv yuav tos kom txog thaum lawv muaj pov thawj meej ua ntej yuav saib xyuas cov tib neeg phem vim lawv xav tias qhov ntawd xwb thiaj li yog tib txoj kev uas lawv lub siab yuav nyob tau kaj lug. Tiam sis qhov tseeb tiag, tsis tim tsum muaj pov thawj meej los paub tseeb tias ib tug twg yog tib neeg phem. Koj tuaj yeem paub los ntawm lawv cov lus thiab tej kev ua txhua hnub. Thaum koj paub tseeb tias lawv yog cov tib neeg phem lawm, ces koj tuaj yeem pib txwv los sis cais lawv tawm. Qhov no yuav ua kom paub tseeb tias pawg ntseeg tes hauj lwm thiab cov neeg Vajtswv xaiv tseg txoj kev nkag mus rau hauv lub neej txoj sia yuav tsis raug kev puas tsuaj. Ib txhia thawj coj thiab neeg ua hauj lwm tsis muaj kev paub cais tias leej twg yog cov tib neeg phem, thiab lawv kuj saib xyuas tsis tau cov tib neeg phem kom raws sij hawm thiab. Vim li ntawd, pawg ntseeg tes hauj lwm thiab lub neej hauv pawg ntseeg thiaj li raug cuam tshuam, thiab cov neeg Vajtswv xaiv tseg txoj kev nkag mus rau hauv lub neej txoj sia thiaj li raug tab kaum. Qhov no mas ruam heev. Qhov no yog qhov uas cov thawj coj cuav ua hauj lwm. Ib kis mas, lawv tsis muaj kev paub cais, thiab lwm kis mas, lawv yog cov tib neeg uas ua kom lwm tus zoo siab uas ntshai tsam ua txhaum rau lwm tus. Thaum cov tib neeg zoo li no ua cov thawj coj, qhov ib, lawv ua tsis tau tes hauj lwm tiag tiag; thiab qhov ob, lawv ua phem rau cov neeg Vajtswv xaiv tseg. Txawm yog qhov teeb meem uas cov tib neeg phem cuam tshuam los lawv twb daws tsis tau kom raws sij hawm, thiab lawv kuj tiv thaiv tsis tau cov kwv tij thiab cov muam thiab; cov tib neeg zoo li no tsis tsim nyog ua cov thawj coj thiab cov neeg ua hauj lwm. Qhia Kuv seb, yog ib tug twg raug txiav txim tias yog ib tug tib neeg phem lawm no, puas tseem cheem tsum sib qhia qhov tseeb los pab lawv? (Tsis cheem tsum lawm.) Tsis tas yuav muab cib fim rau lawv lawm. Ib txhia tib neeg muaj “kev hlub” loj dhau, pheej muab cib fim rau cov tib neeg phem los lees txim hloov dua siab tshiab, tiam sis qhov no puas ua rau tau txais txiaj ntsig? Qhov no puas mus raws li tej hauv paus ntsiab lus ntawm Vajtswv cov lus? Koj puas tau pom ib tug tib neeg phem twg uas muaj peev xwm lees txim hloov dua siab tshiab tiag tiag? Yeej tsis muaj leej twg tau pom qhov ntawd li. Qhov cia siab kom cov tib neeg phem lees txim hloov dua siab tshiab ntawd mas yog zoo li kev hlub tshua cov nab muaj taug; qhov ntawd yog kev hlub tshua cov tsiaj qus. Qhov no yog vim raws li lub ntsiab tseeb ntawm cov tib neeg phem, ces tuaj yeem txiav txim tau tias cov tib neeg phem yeej tsis muaj hnub nyiam tej yam uas zoo, yeej tsis muaj hnub lees txais qhov tseeb, thiab yeej tsis muaj hnub lees txim hloov dua siab tshiab. Koj yuav nrhiav tsis tau lo lus “lees txim hloov dua siab tshiab” nyob rau hauv lawv phau ntawv txhais lus. Txawm koj yuav sib qhia qhov tseeb rau lawv li cas los xij, lawv yuav tsis tso lawv tus kheej tej kev npaj siab thiab tej txiaj ntsim tseg li, thiab yuav nrhiav ntau yam laj thawj thiab hais ub hais no los tiv thaiv lawv tus kheej, thiab tsis muaj leej twg hais tau lawv mloog li. Yog lawv poob peev lawm mas, lawv thev tsis taus li, thiab lawv yuav thab lwm tus txog qhov ntawd tsis tu ncua li. Cov tib neeg zoo li no, uas tsis txaus siab raug ib qho kev poob peev twg li, yuav ua li cas lees txim hloov dua siab tshiab tiag tiag tau? Cov tib neeg uas twm xeeb dhau yog cov uas muab lawv tus kheej tej txiaj ntsim tso ua ntej txhua yam; lawv yog cov tib neeg phem, thiab lawv yeej tsis muaj hnub lees txim hloov dua siab tshiab li. Yog koj twb pom tshab tag nrho lawm tias tus tib neeg zoo li no yog tib neeg phem thiab koj tseem muab cib fim rau lawv los lees txim hloov dua siab tshiab, ces qhov ntawd tsis ruam lod? Qhov no mas cuag nkaus li muab ib tug nab muaj taug uas khov lawm los tso rau hauv yus lub xub ntiag kom nws sov, tsuas yog tom qab ntawd raug nws tom xwb. Tsuas yog neeg ruam xwb thiaj li yuav ua ib yam ruam ruam li no. Nyob hauv pawg ntseeg mas, qhov uas cov neeg Vajtswv xaiv tseg ntxub cov tib neeg phem ntawd yog ib qho xwm txheej ib txwm muaj xwb, vim cov tib neeg phem tsis muaj kev ua neeg thiab pheej ua tej yam tsis zoo. Kev ntxub cov tib neeg phem yog txoj kev xav uas yog. Qhov ntawd yog ib feem ntawm yam uas tib neeg yuav tsum muaj nyob rau hauv lawv txoj kev ua neeg li ib txwm muaj.

Qhia Kuv seb, tus tib neeg uas tsis muaj kev hlub rau cov kwv tij thiab cov muam ib qho me me li ntawd yog hom neeg zoo li cas? Vim li cas lawv thiaj li tsis muaj ib qho kev sib raug zoo li ib txwm muaj nrog cov kwv tij thiab cov muam li? Hom neeg zoo li no, txawm lawv yuav nrog leej twg sib raug zoo los, tsuas yog txuas tej kev sib raug zoo no rau tej txiaj ntsim thiab kev sib pauv xwb; yog tsis muaj txiaj ntsim los sis kev sib pauv, lawv yuav tsis quav ntsej lwm tus li. Tus tib neeg zoo li no tsis yog tib neeg phem lod? Ib txhia tib neeg tsis caum qhov tseeb thiab tsuas ua neej raws li tej kev xav hauv siab xwb; leej twg ua zoo rau lawv, lawv yuav nyob ze nrog tus ntawd, thiab leej twg pab lawv, lawv yuav xav tias tus ntawd zoo. Cov tib neeg zoo li no kuj tsis muaj kev sib raug zoo li ib txwm muaj thiab. Lawv tsuas ua neej raws li tej kev xav hauv siab xwb, yog li lawv puas ua tau ncaj ncees rau cov kwv tij thiab cov muam? Qhov no yeej ua tsis tau kiag li. Yog li ntawd, txhua tus uas tsis muaj kev sib raug zoo li ib txwm muaj nrog cov kwv tij thiab cov muam, los sis nrog cov uas ntseeg Vajtswv tiag tiag, yeej yog ib tug uas tsis muaj lub siab txawj xav thiab laj thawj, yog ib tug uas tsis muaj kev ua neeg li ib txwm muaj, thiab yeej tsis yog ib tug uas nyiam qhov tseeb. Cov tib neeg no yeej tsis txawv ntawm cov neeg siab me siab nqiam nyob hauv cov uas ib txwm tsis ntseeg; lawv sib raug zoo nrog leej twg uas muaj txiaj ntsim rau lawv thiab tsis quav ntsej cov uas tsis muaj. Tsis tas li ntawd xwb, thaum lawv pom ib tug twg caum qhov tseeb los sis ib tug twg uas muaj peev xwm sib qhia cov lus tim khawv uas hais txog txoj kev ntsib kev pom—yog ib tug uas txhua tus ntshaw thiab nyiam—lawv yuav khib thiab ntxub thiab yuav ua txhua yam los nrhiav qhov txhaum los txiav txim thiab teem txim rau cov tib neeg uas caum qhov tseeb no. Qhov no tsis yog yam uas cov tib neeg phem ua lod? Cov tib neeg zoo li no tsis muaj lub siab txawj xav thiab laj thawj—lawv phem tshaj tsiaj nyaum. Lawv coj tsis yog rau lwm tus, nrog lwm tus sib cuag tsis tau li ib txwm, tsim tsis tau kev sib raug zoo li ib txwm muaj nrog cov neeg Vajtswv xaiv tseg, thiab haj tseem ntxub cov uas caum qhov tseeb thiab. Cov tib neeg zoo li no yeej yuav tsum hnov tias nyob ib leeg thiab kho siab khuav hauv lawv lub siab, pheej yws txog Lub Ntuj thiab lwm tus tib neeg. Lawv kev ua neej nyob muaj kev zoo siab los sis muaj qab hau dab tsi? Cov tib neeg no muaj tus moj yam tsiv nyaum, thiab txawm lawv yuav nrog leej twg sib cuag los, lawv tuaj yeem muaj kev sib ntxub vim tej teeb meem me me xwb, teem txim thiab ua pauj rov qab, coj kev puas tsuaj los rau cov tib neeg ntawd. Cov tib neeg phem zoo li no yog cov dab phem tiag tiag, lawv tseem nyob hauv pawg ntseeg ib hnub, ces lawv yuav coj kev puas tsuaj los rau pawg ntseeg ib hnub. Yog lawv nyob ntev, ces kev puas tsuaj yuav tsis tu ncua. Tsuas yog ntsaig lawv tawm ntawm pawg ntseeg mus xwb mas thiaj li zam tau kev puas tsuaj. Tsis tas li ntawd xwb, muaj cov uas saib zoo li yog neeg coj zoo nyob sab nraud tiam sis muaj ib qho kev nyiam txiaj ntsim tshwj xeeb. Yog li ntawd, lawv txoj kev ntseeg Vajtswv los kuj yog los caum tej txiaj ntsim thiab. Yog lawv tsis tau txais txiaj ntsim dab tsi tau ib ntus mas, lawv lub ntsej muag dub txig, cuag nkaus li muaj neeg tshuav lawv nqi ntau heev. Txhua tus uas pom lawv lub ntsej muag uas muaj kev chim siab thiab kev tu siab ntawd yuav raug cuam tshuam rau lawv lub siab kiag tam sim ntawd thiab. Nej xav tias lub ntsej muag zoo li no yog tshwm sim nyob rau hauv lub neej hauv pawg ntseeg yuav coj qhov kev cuam tshuam zoo li cas los? Cov neeg Vajtswv xaiv tseg feem coob yeej yuav hnov tias tsis xis nyob thaum pom lub ntsej muag ntawd, thiab lawv txoj kev nyeem Vajtswv cov lus thiab kev sib qhia qhov tseeb yuav raug cuam tshuam yam tsis ntau los tsawg. Tshwj xeeb tshaj yog rau cov uas tseem tsis tau cog tau lub hauv paus rau hauv txoj hau kev tseeb, qhov uas pheej pom lub ntsej muag dub txig tas li no nyob rau hauv lub neej hauv pawg ntseeg mas yuav yooj yim cuam tshuam rau lawv heev! Pawg ntseeg tsim nyog muaj cov tib neeg uas muaj tus cwj pwm zoo siab ntau dua, uas hais lus yooj yim thiab qhib siab lug, thiab muaj cov tib neeg uas lawv lub siab muaj kev thaj yeeb thiab kev xyiv fab puv npo ntau dua, thiab cov uas lawv tus ntsujplig muaj kev ywj pheej thiab tau kev tso dim. Qhov no yuav ua rau lub neej hauv pawg ntseeg muaj kev xyiv fab. Cov tib neeg uas muaj ntsej muag dub txig tas li yuav tsum thov Vajtswv hauv tsev thiab kho lawv lub siab kom zoo ua ntej tuaj koom kev sib txoos ua ke. Ua li no, lawv lub siab yuav zoo, thiab lawv yuav tau txais qee yam los ntawm kev sib txoos ua ke. Tsis tas li ntawd xwb, qhov no kuj yuav muaj txiaj ntsim rau lwm tus thiab; yam tsawg tshaj plaws mas, lwm tus tsis raug cuam tshuam. Txhawm rau ua kom paub tseeb tias cov neeg Vajtswv xaiv tseg ua tau lub neej hauv pawg ntseeg li ib txwm muaj, cov thawj coj thiab cov neeg ua hauj lwm yuav tsum kawm paub sib qhia qhov tseeb los daws tej teeb meem. Yog ib tug twg tuaj koom kev sib txoos ua ke nrog lub ntsej muag dub txig, cov thawj coj thiab cov neeg ua hauj lwm yuav tsum mus cuag lawv thiab nug tias, “Koj puas cheem tsum kev pab?” Qhov no hu ua kev mus pab lwm tus los ntawm lub siab hlub. Yog cov thawj coj thiab cov neeg ua hauj lwm pom ib tug twg muaj teeb meem los tsis quav ntsej li, zam thiab nyob kom deb ntawm cov “ntsej muag dub txig” yam tsis sib qhia qhov tseeb los ua kom lawv lub siab kaj, ces cov thawj coj thiab cov neeg ua hauj lwm ntawd tsis ua tes hauj lwm tiag tiag. Txhawm rau ua pawg ntseeg tes hauj lwm kom muaj txiaj ntsig, ua ntej tshaj plaws cov thawj coj thiab cov neeg ua hauj lwm yuav tsum kawm paub ua cov neeg ntseeg siab ntawm cov neeg Vajtswv xaiv tseg, zoo ib yam li qhov cov ib txwm tsis ntseeg hu ua cov nom tswv uas mob siab rau tib neeg. Ib txhia tib neeg tsis kam ua lub luag hauj lwm zoo li no, pheej nyiam ua tus nyob ib sab saib xwb—ua li no lawv yuav ua li cas thiaj li coj tau cov neeg Vajtswv xaiv tseg ua lub neej hauv pawg ntseeg kom zoo? Qhov tseeb tiag, seb ib tug twg puas muaj teeb meem hauv lawv lub siab ntawd mas pom tau me ntsis los ntawm lawv lub ntsej muag. Yog ib tug twg lub ntsej muag dub txig tas li, qhov ntawd yeej txhais tau hais tias lawv lub siab tsaus ntuj nti yam tsis muaj kev kaj ib qho me me li. Yog lawv nyob hauv kev sib cav txog qhov yog qhov tsis yog tas hnub xwb, lawv lub ntsej muag puas yuav luag ntxhi tau? Cov tib neeg no lub ntsej muag pheej raug cov huab dub npog, tsis muaj ib lub sij hawm uas tshav ntuj li, thiab qhov no kuj cuam tshuam rau lawv txoj kev ua lawv tej dej num thiab. Yog cov thawj coj thiab cov neeg ua hauj lwm pheej ncua tsis saib xyuas thiab daws qhov teeb meem no, ua rau cov kwv tij thiab cov muam raug kev cuam tshuam tsis tu ncua thiab raug kev txom nyem uas piav tsis tau, ces qhov no ua pov thawj tau tias cov thawj coj thiab cov neeg ua hauj lwm no ua tsis tau tes hauj lwm tiag tiag, tsis muaj peev xwm siv qhov tseeb los daws tej teeb meem, thiab yeej tsis muaj nuj nqis kiag li. Yog cov thawj coj thiab cov neeg ua hauj lwm to taub qhov tseeb thiab muaj peev xwm pom cov kwv tij thiab cov muam tej teeb meem, thiab muaj peev xwm muab kev txhawb thiab kev pab kom raws sij hawm, tsis yog pab daws tau tib neeg tej teeb meem xwb, tiam sis kuj pab tau tib neeg kom to taub qhov tseeb tej hauv paus ntsiab lus thiab ua tau lawv tej dej num kom tiav, ces lawv txoj kev ua dej num thiab kev saib xyuas tej yam ntawd yuav mus tau zoo, thiab pawg ntseeg tes hauj lwm yuav tsis raug cuam tshuam lawm. Yog cov thawj coj thiab cov neeg ua hauj lwm tsis muaj peev xwm pom thiab daws tej teeb meem kom raws sij hawm, qhov no yuav cuam tshuam rau pawg ntseeg tes hauj lwm lawm. Yog cov thawj coj thiab cov neeg ua hauj lwm pom tsis tau thiab daws tsis tau tej teeb meem, ua rau muaj kev puas tsuaj rau pawg ntseeg tes hauj lwm thiab tab kaum cov neeg Vajtswv xaiv tseg txoj kev nkag mus rau hauv lub neej txoj sia, lawv tsis tau ua rau Vajtswv thiab cov neeg Nws xaiv tseg tag kev cia siab lod? Qhov no tsis yog lawv tsis muaj hauv paus ntsiab lus hauv kev saib xyuas tej yam lod? Kev daws tej teeb meem kom raws sij hawm thiab tsis ua ywj fab ywj fwj tom qab pom tshab lub ntsiab tseeb ntawm tej teeb meem—qhov no hu ua kev ua tej luag hauj lwm kom tiav thiab ua siab ncaj, thiab qhov no yog kev ua yus tes dej num mus raws li tus qauv lawm.

Lub ncauj lus ntawm kev sib qhia hnub no yog qhov rau—ua kev sib raug zoo uas tsis tsim nyog. Hom teeb meem no uas tshwm sim nyob rau hauv lub neej hauv pawg ntseeg mas feem ntau yog tej no: kev sib raug zoo uas tsis tsim nyog ntawm txiv neej thiab poj niam, kev sib raug zoo ntawm cov uas yog txiv neej nrog txiv neej los sis poj niam nrog poj niam, kev sib raug zoo ntawm tej txiaj ntsim, thiab kev sib ntxub ntawm tib neeg. Txawm yog kev sib raug zoo uas raws li sab cev nqaij daim tawv tej kev ntshaw, tej txiaj ntsim ntawm sab cev nqaij daim tawv, los sis tej kev xav hauv siab uas ntxhov quav niab ntawm sab cev nqaij daim tawv los xij, tej no puav leej nyob rau hauv ciaj ciam ntawm kev sib raug zoo uas tsis tsim nyog vim tej kev sib raug zoo uas tsis tsim nyog no dhau ntawm tus ciaj ciam ntawm lub siab txawj xav thiab qhov laj thawj ntawm kev ua neeg li ib txwm muaj mus lawm. Qhov muaj cov kev sib raug zoo uas tsis tsim nyog no tuaj yeem cuam tshuam tib neeg mus txog rau ib theem twg. Qhov uas hnyav dua ntawd mas, tej no tuaj yeem cuam tshuam tib neeg txoj kev nkag mus rau hauv lub neej txoj sia, lawv txoj kev caum qhov tseeb, thiab lawv txoj kev caum kom paub Vajtswv. Ntau hom kev sib raug zoo uas tsis tsim nyog no tsis yog los ntawm lub siab txawj xav los sis qhov laj thawj los, thiab tej no cov nyom rau txoj kev ua neeg li ib txwm muaj. Nws nyuaj rau tib neeg lees txais thiab xyaum ua raws qhov tseeb thaum lawv ua neej nyob hauv cov kev sib raug zoo uas tsis zoo li ib txwm no, thiab qhov no kuj cuam tshuam lawv qhov kev ua lub neej hauv pawg ntseeg thiab kev caum txoj kev loj hlob ntawm lub neej txoj sia, nrog rau qhov raws qib raws duas ntawm lub neej hauv pawg ntseeg thiab. Qhov no tsis muaj txiaj ntsim rau cov neeg Vajtswv xaiv tseg txoj kev nkag mus rau hauv lub neej txoj sia thiab kuj ua rau pawg ntseeg tes hauj lwm raug puas tsuaj thiab. Vim tag nrho tej no, qhov ntawd thiaj li tseem ceeb heev rau cov thawj coj thiab cov neeg ua hauj lwm kom maj nroos pom thiab daws tej teeb meem no.

Hais txog tej kev sib raug zoo uas tsis tsim nyog ntawd, peb twb tau teev ntau qhov xwm txheej uas sib txawv thiab muab tej ntawd faib ua hom lawm. Nej muab puas tau qee qhov piv txwv los xyaum ua raws li txoj kev paub cais? Lub hom phiaj ntawm qhov kev kawm txog kev paub cais ntawd yog dab tsi? Qhov ntawd yog ua kom nej muaj peev xwm paub cais thiab tshab txhais tau lub ntsiab tseeb ntawm cov tib neeg, tej xwm txheej, thiab tej yam khoom, kom thiaj li txiav txim tau raug, thiab tom qab ntawd coj rau tej ntawd raws li tej hauv paus ntsiab lus. Qhov no yog qhov txiaj ntsig thaum kawg. Puas muaj leej twg hais tias, “Koj tham tas hnub txog tej teeb meem ntawm qhov yog thiab qhov tsis yog no, tej teeb meem txhua hnub no—peb tsis xav mloog tej no ntxiv lawm; peb haj tseem tsis xav tuaj koom kev sib txoos ua ke ntxiv lawm. Tsis yog yuav tsum sib qhia qhov tseeb lod? Vim li cas pheej tham txog tej xwm txheej no xwb?” Nej puas tau pom cov tib neeg zoo li no? Lawv yog hom neeg zoo li cas? (Cov tib neeg uas tsis muaj kev to taub ntawm sab ntsujplig.) Peb sib qhia li no, tiam sis lawv yeej tseem to taub tsis tau qhov tseeb—lawv tsis muaj kev txawj ntse li ib tug tib neeg uas ib txwm muaj; cov tib neeg zoo li no yeej tsis muaj qab hau kiag li lawm. Ib tug uas tsis muaj txoj kev txawj ntse li ib tug tib neeg ntawd puas tsim nyog cia tuaj mloog tej lus qhuab qhia? Yog lawv hais tias: “Kev sib txoos ua ke mas pheej hais txog kev sib qhia qhov tseeb, pheej tham txog tej yam xws li kev xyaum ua raws qhov tseeb—kuv dhuav mloog tej no lawm. Kuv tsis xav tuaj koom kev sib txoos ua ke ntxiv lawm.” Yog lawv yeej muaj txoj kev xam pom zoo li no tiag, ces lawv yog ib tug uas tsis nyiam qhov tseeb kiag li. Rau cov tib neeg zoo li no mas, Vajtswv lub tsev tsis yuam kom lawv tuaj koom; maj nroos xa lawv tawm mus. Yog lawv tus kheej tsis xav tuaj koom kev sib txoos ua ke, thiab tsis kam lees txais yam uas sib tham nyob rau ntawd, peb tsis yuam—peb tsis ua nyuaj rau lawv. Cov tib neeg zoo li no, txawm lawv yuav ntseeg Vajtswv mus tag sim neej los xij, yuav to taub tsis tau qhov tseeb thiab nkag mus tsis tau rau hauv qhov muaj tiag; qhov ntawd yog kev nkim zog xwb. Yog lawv nyiam mloog kev paub txog kev kawm txog vajtswv, ces cia lawv mus kawm txog kev paub txog vajtswv; muaj ib hnub, thaum lawv tsis tau qhov tseeb los ua txoj sia, lawv yuav khuv xim.

Lub Tsib Hlis Hnub Tim 29, Xyoo 2021