Cov Thawj Coj thiab Cov Neeg Ua Hauj Lwm Tej Luag Hauj Lwm (15)

Yam Kaum Ob: Txheeb Ntau Hom Tib Neeg, Xwm Txheej, thiab Yam Khoom uas Tab Kaum thiab Cuam Tshuam Vajtswv Tes Hauj Lwm thiab Qhov Raws Qib Raws Duas uas Ib Txwm Muaj ntawm Pawg Ntseeg Kom Ncav Sij Hawm thiab Kom Yog; Cheem thiab Txwv Lawv, thiab Hloov Txhua Yam Kom Zoo Dua; Tsis Tas Li Ntawd Xwb, Qhia Qhov Tseeb Kom Cov Neeg Vajtswv Xaiv Tseg Thiaj Li Paub Cais Tej Yam Zoo Li No thiab Kawm Paub Los Ntawm Tej Yam Zoo Li No (Ntu Peb)

Ntau Hom Tib Neeg, Xwm Txheej, thiab Yam Khoom Uas Tab Kaum thiab Cuam Tshuam Lub Neej Hauv Pawg Ntseeg

Nyob rau qhov kev sib txoos ua ke zaum tas los ntawd, peb tau sib qhia txog cov thawj coj thiab cov neeg ua hauj lwm lub luag hauj lwm kaum ob lawm: “Txheeb ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg kom ncav sij hawm thiab kom yog; cheem thiab txwv lawv, thiab hloov txhua yam kom zoo dua; tsis tas li ntawd xwb, qhia qhov tseeb kom cov neeg Vajtswv xaiv tseg thiaj li paub cais tej yam zoo li no thiab kawm paub los ntawm tej yam zoo li no.” Hais txog lub luag hauj lwm no mas, qhov tseem ceeb peb tau sib qhia txog ntau yam teeb meem uas ntsig txog lub neej hauv pawg ntseeg, uas peb muab faib ua kaum ib qho teeb meem. Cia li mus nyeem cov ntawd. (Qhov ib, thaum qhia qhov tseeb pheej tham dhau ntawm lub ncauj lus mus lawm tas li; qhov ob, hais cov lus thiab cov kev qhuab qhia los coj tib neeg mus yuam kev thiab ua rau lawv qhuas; qhov peb, tham txog tsev neeg tej xwm txheej, tsim kev sib raug zoo ntawm tus kheej, thiab saib xyuas tej hauj lwm ntiag tug; qhov plaub, kev tsim pab tsim pawg; qhov tsib, txeeb lub meej mom; qhov rau, ua kev sib raug zoo uas tsis tsim nyog; qhov xya, koom kev sib tawm tsam thiab kev sib cav sib ceg; qhov yim: tshaj tawm tej kev xav phem; qhov cuaj, tso tej kev xav tsis zoo tawm; qhov kaum, kev tshaj tawm cov lus xaiv uas tsis muaj tseeb; thiab qhov kaum ib, kev tswj thiab tab kaum tej kev xaiv tsa.) Zaum tas los ntawd, peb tau sib qhia txog qhov teeb meem tsib uas yog txeeb lub meej mom thiab qhov teeb meem rau uas yog ua kev sib raug zoo uas tsis tsim nyog. Ob hom teeb meem no, zoo ib yam li plaub qho teeb meem yav tas los, kuj ua rau muaj kev cuam tshuam thiab kev tab kaum rau lub neej hauv pawg ntseeg thiab qhov raws qib raws duas uas ib txwm muaj ntawm pawg ntseeg thiab. Saib rau lub ntsiab xeeb txawm ntawm ob hom teeb meem no mas, qhov kev puas tsuaj uas ob hom teeb meem no ua rau lub neej hauv pawg ntseeg, thiab qhov kev cuam tshuam rau tib neeg txoj kev nkag mus rau hauv lub neej txoj sia ntawd, ob qho no puav leej suav tau tias yog tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg thiab.

VII. Koom Kev Sib Tawm Tsam thiab Kev Sib Cav Sib Ceg

Hnub no, peb yuav sib qhia txog qhov teeb meem xya—koom kev sib tawm tsam thiab sib cav sib ceg. Tej teeb meem zoo li no mas yeej nquag muaj nyob rau hauv lub neej hauv pawg ntseeg thiab txhua tus yeej pom tau. Thaum tib neeg tuaj sib txoos ua ke tuaj noj thiab haus Vajtswv txoj lus, sib qhia txog lawv tus kheej tej kev ntsib kev pom, los sis sib tham txog qee qhov teeb meem tiag tiag, tej kev xam pom uas sib txawv los sis tej kev sib cav txog qhov yog thiab qhov tsis yog ntawd mas feem ntau ua rau tib neeg muaj kev sib ceg thiab sib cav. Yog tib neeg tsis sib pom zoo thiab muaj tej kev xam pom uas sib txawv, tiam sis qhov no tsis cuam tshuam rau lub neej hauv pawg ntseeg, qhov no puas suav tias yog kev sib tawm tsam thiab sib cav sib ceg? Qhov no tsis suav tias yog qhov ntawd; qhov ntawd yog ib qho kev sib qhia uas ib txwm muaj xwb. Yog li ntawd, saib sab nraud mas ntau qhov teeb meem zoo li muaj feem xyuam ntsig txog qhov teeb meem xya, tiam sis tseeb tiag, tsuas yog cov uas loj dua nyob rau hauv tej xwm txheej thiab lub ntsiab xeeb txawm uas ua rau muaj kev tab kaum thiab kev cuam tshuam ntawd mas thiaj li tso rau hauv qhov teeb meem no xwb. Tam sim no cia peb sib qhia seb lub ntsiab xeeb txawm ntawm cov teeb meem twg thiaj li tsim nyog muab tso rau hauv qhov teeb meem no.

Ua ntej tshaj, saib rau tej kev qhia tshwm uas pom tau meej ntawm qhov sib tawm tsam, qhov no yeej tsis yog hais txog txoj kev sib qhia qhov tseeb los sis nrhiav qhov tseeb li ib txwm muaj kiag li, los sis muaj kev to taub sib txawv los sis qhov kev kaj raws li txoj kev sib qhia qhov tseeb, los sis nrhiav, sib qhia, sib tham txog qhov tseeb tej hauv paus ntsiab lus, thiab nrhiav ib txoj kev xyaum ua raws txog ib qho tseeb twg li, tiam sis nws yog hais txog kev sib cav thiab kev sib ceg txog qhov yog thiab qhov tsis yog. Feem ntau mas nws yeej nthuav tawm zoo li no. Hom teeb meem no qee zaus puas tshwm sim nyob rau hauv lub neej hauv pawg ntseeg? (Tshwm sim.) Raws li qhov pom nyob sab nraud xwb mas, yeej pom tseeb hais tias ib qho kev ua uas zoo li qhov sib tawm tsam ntawd yeej tsis yog hais txog txoj kev nrhiav qhov tseeb, los sis hais txog txoj kev sib qhia qhov tseeb nyob rau hauv Vajntsujplig txoj kev coj kev, los sis hais txog txoj kev koom tes yam sib haum xeeb kiag li, tiam sis yog los ntawm kev siab kub, thiab hom lus uas siv nyob rau hauv es muaj kev txiav txim thiab kev teem txim, thiab haj tseem yog tej kev foom phem thiab—hom kev qhia tshwm uas pom tau meej zoo li no yeej yog ib qho kev nthuav tawm txog Ntxwgnyoog tus moj yam qias vuab tsuab tiag tiag li. Thaum tib neeg sib tawm tsam, txawm lawv hom lus yuav nkaug los sis txawj hais los xij li, qhov ntawd yeej muaj kev siab kub, kev phem, thiab kev ntxub nyob hauv, thiab qhov ntawd tsis muaj kev hlub, tsis muaj kev thev taus, thiab tsis muaj kev ua siab ntev, thiab yeej cia li haj yam tsis muaj kev koom tes yam sib haum xeeb li. Cov kev uas tib neeg siv los sib tawm tsam ntawd mas muaj ntau yam. Piv txwv li, thaum ob tug neeg sib tham txog ib qho xwm txheej, tus A hais rau tus B tias, “Ib txhia tib neeg mas muaj kev ua neeg tsis zoo thiab muaj ib tug moj yam khav theeb; lawv khav thaum twg lawv ua ib yam dab tsi me me, thiab lawv tsis mloog leej twg hais li. Lawv tsuas zoo li qhov uas Vajtswv cov lus hais txog cov uas lim hiam thiab tsis muaj kev ua neeg ib yam li cov tsiaj nyaum ntag.” Tom qab hnov li no lawm, tus B thiaj li xav hais tias, “Yam uas koj nyuam qhuav hais ntawd tsis yog hais ncaj nqa rau kuv lod? Koj haj tseem siv Vajtswv cov lus los muab kuv nthuav tawm thiab! Vim koj twb hais txog kuv lawm, kuv los yeej yuav tsis tseg li thiab. Koj twb ua tsis zoo rau kuv lawm, yog li ntawd kuv yuav ua phem rau koj thiab!” Yog li ntawd, tus B thiaj li hais tias, “Ib txhia tib neeg mas tej zaum saib sab nraud zoo li ntseeg tiag tiag, tiam sis tseeb tiag nyob hauv mas lawv siab phem tshaj lwm tus. Lawv haj tseem muaj kev sib raug zoo tsis tsim nyog nrog txiv neej los sis poj niam thiab, ib yam li cov niam ntiav thiab cov poj niam muag cev uas Vajtswv cov lus tau hais txog—Vajtswv qias cov neeg zoo li no heev, Nws tsis nyiam lawv kiag li. Qhov saib sab nraud zoo li ntseeg tiag tiag ntawd muaj qab hau dab tsi? Qhov ntawd puav leej yog kev ua txuj xwb. Vajtswv tsis nyiam cov neeg ua txuj tshaj plaws li; txhua tus neeg ua txuj puav leej yog cov Falixais!” Tom qab hnov li no lawm, tus A thiaj li xav hais tias, “Qhov no yog ib qho kev tawm tsam rov qab rau kuv! Tsis ua cas, koj twb ua tsis zoo rau kuv lawm, yog li ntawd tsis txhob liam rau kuv yog kuv tsis tseg!” Sib teb mus mus los los, ces nkawd ob leeg txawm pib sib cav lawm. Qhov no puas yog kev sib qhia txog Vajtswv cov lus? (Tsis yog.) Nkawd tab tom ua dab tsi? (Sib tawm tsam thiab sib cav.) Nkawd haj tseem tuav tau qee qhov chaw tuav thiab nrhiav tau ib lub “hauv paus” rau nkawd qhov kev tawm tsam thiab, siv Vajtswv cov lus los ua lub hauv paus—qhov no yog sib tawm tsam, thiab tib lub sij hawm ntawd, nws yog sib cav sib ceg thiab. Hom kev sib qhia no puas yog qee zaus pom nyob rau hauv lub neej hauv pawg ntseeg? Qhov no puas yog kev sib qhia uas ib txwm muaj? Qhov ntawd puas yog kev sib qhia nyob rau hauv kev ua neej li ib txwm muaj? (Tsis yog.) Yog li, hom kev sib qhia no puas ua rau muaj kev tab kaum thiab kev cuam tshuam rau lub neej hauv pawg ntseeg? Nws ua rau muaj hom kev tab kaum thiab kev cuam tshuam zoo li cas? (Cuam tshuam rau lub neej hauv pawg ntseeg uas ib txwm muaj, ua rau tib neeg muaj kev sib cav txog qhov yog thiab qhov tsis yog, thiab vim li ntawd thiaj li tsis muaj peev xwm ua tib zoo xav thiab sib qhia txog Vajtswv cov lus yam ntsiag to.) Thaum tib neeg sib tawm tsam thiab sib ceg txog qhov yog thiab qhov tsis yog, thiab ua kev tawm tsam lwm tus nyob rau hauv lub neej hauv pawg ntseeg lawm, Vajntsujplig puas tseem ua hauj lwm? Vajntsujplig tsis ua hauj lwm lawm; hom kev sib qhia no ua rau tib neeg lub siab ntxhov hnyo. Muaj ib co lus nyob hauv phau Vajluskub, nej puas nco qab cov lus ntawd lawm? (“Kuv rov hais dua rau nej, Tias yog nej ob leeg koom siab pom zoo hauv ntiaj teb rau ib yam dab tsi uas nkawd thov, Kuv Leej Txiv uas nyob saum ntuj ceeb tsheej yuav muab yam ntawd rau nkawd. Rau qhov yog ob leeg los sis peb leeg sib sau nyob ua ke rau hauv Kuv lub npe, Kuv yuav nyob rau hauv lawv nruab nrab rau qhov ntawd” (Mathai 18:19-20).) Cov lus no txhais li cas? Thaum tib neeg tuaj sib txoos ua ke nyob rau ntawm Vajtswv lub xub ntiag, lawv yuav tsum koom ua ib lub siab ib lub ntsws thiab koom siab nyob rau ntawm Vajtswv lub xub ntiag; Vajtswv tsuas yuav foom koob hmoov rau lawv, thiab Vajntsujplig tsuas yuav ua hauj lwm rau thaum tib neeg koom ua ib lub siab ib lub ntsws xwb. Tiam sis ob tug neeg sib cav uas Kuv nyuam qhuav hais txog ntawd puas koom ua ib lub siab ib lub ntsws? (Tsis koom.) Nkawd ua dab tsi? Sib tawm tsam, sib cav, thiab haj tseem txiav txim thiab teem txim thiab. Txawm nyob rau sab nraud es nkawd tsis tau siv cov lus foom phem los sis tuav npe los xij, qhov txhawb siab nyob rau tom qab ntawm nkawd cov lus ntawd tsis yog los sib qhia qhov tseeb los sis nrhiav qhov tseeb, thiab nkawd tsis hais lus nyob rau hauv lub siab txawj xav thiab qhov laj thawj ntawm txoj kev ua neeg li ib txwm muaj. Txhua lo lus uas nkawd hais ntawd tsis muaj kev ris lub luag hauj lwm, thiab muaj kev tawm tsam thiab kev phem nrog; txhua lo lus tsis mus raws li qhov muaj tseeb, thiab tsis muaj ib lub hauv paus li. Txhua lo lus tsis yog txiav txim txog ib qho xwm txheej raws li Vajtswv cov lus thiab Vajtswv tej kev cheem tsum, tiam sis yog qhov pib tawm tsam lwm tus, txiav txim, thiab teem txim raws li nkawd tus kheej tej kev nyiam thiab lub siab nyiam tawm tsam ib tug neeg uas nkawd ntxub thiab saib tsis taus kiag ntag. Tsis muaj ib yam ntawm tej no yog kev qhia tshwm uas pom tau meej txog qhov koom ua ib lub siab ib lub ntsws li; tiam sis, tej no yog tej lus thiab tej kev qhia tshwm uas pom tau meej uas los ntawm kev siab kub thiab Ntxwgnyoog tus moj yam qias vuab tsuab los, thiab tej no tsis ua rau Vajtswv txaus siab; yog li ntawd, tsis muaj Vajntsujplig tes hauj lwm nyob rau ntawd. Qhov no yog ib qho kev qhia tshwm uas pom tau meej txog qhov sib tawm tsam.

Nyob rau hauv lub neej hauv pawg ntseeg mas, kev sib cav thiab kev tsis sib haum xeeb nquag tshwm sim los ntawm tib neeg vim yog tej xwm txheej me me los sis tej kev xam pom thiab tej txiaj ntsim uas tsis sib haum xwb. Kev sib cav kuj nquag tshwm sim vim yog tus cwj pwm, lub hom phiaj, thiab kev nyiam uas tsis sib haum xwb. Ntau hom kev tsis sib pom zoo thiab kev tsis haum xeeb kuj tshwm sim nyob hauv tib neeg vim yog qhov txawv ntawm lub meej mom hauv zej zog thiab txoj kev kawm, los sis qhov txawv ntawm lawv txoj kev ua neeg thiab tus yam ntxwv xeeb txawm, thiab haj tseem yog txawv ntawm txoj kev hais lus thiab kev saib xyuas qee yam, nrog rau lwm qhov laj thawj thiab. Yog tib neeg tsis nrhiav kev los siv Vajtswv txoj lus los daws tej teeb meem no, yog tsis muaj kev sib to taub, kev thev taus, kev sib txhawb, thiab kev sib pab, thiab yog tib neeg rov qab khaws tej kev xav nkhaus thiab kev ntxub rau hauv lawv lub siab, thiab ib leeg coj rau ib leeg los ntawm qhov kev siab kub nyob hauv cov moj yam qias vuab tsuab, ces qhov no yeej yuav ua rau muaj kev sib tawm tsam thiab kev txiav txim. Ib txhia tib neeg muaj lub siab txawj xav thiab laj thawj me ntsis, thiab thaum muaj kev sib cav tshwm tuaj, lawv ua tau siab ntev, coj los ntawm qhov laj thawj, thiab pab lwm tus los ntawm txoj kev hlub. Txawm li cas los xij, ib txhia tib neeg ua tsis tau li no, lawv haj tseem tsis muaj txoj kev thev taus, kev ua siab ntev, kev ua neeg, thiab qhov laj thawj uas yog lub hauv paus kiag li thiab. Lawv nquag muaj kev xav nkhaus, kev ua xyem xyav, thiab kev to taub yuam kev tawm tsam lwm tus vim tej xwm txheej me me, los sis ib lo lus los sis ib lub ntsej muag xwb, uas ua rau lawv muaj ntau hom kev xav, kev ua xyem xyav, kev txiav txim, thiab kev teem txim rau lwm tus nyob hauv lawv lub siab. Cov xwm txheej no nquag tshwm sim nyob hauv pawg ntseeg thiab nquag cuam tshuam rau tej kev sib raug zoo uas ib txwm muaj ntawm tib neeg, kev sib txuas lus yam sib haum xeeb ntawm cov kwv tij thiab cov nkauj muam, thiab haj tseem cuam tshuam lawv txoj kev sib qhia Vajtswv cov lus thiab. Qhov ntawd yog ib qho uas ib txwm muaj tej kev sib cav tshwm sim thaum tib neeg ib leeg txuas lus nrog ib leeg, tiam sis yog cov teeb meem zoo li no pheej tshwm sim nyob hauv lub neej hauv pawg ntseeg, ces tej ntawd tuaj yeem cuam tshuam, tab kaum, thiab haj tseem rhuav tshem tau lub neej hauv pawg ntseeg uas ib txwm muaj thiab. Piv txwv li, yog ib tug neeg twg pib ib qho kev sib cav nyob rau hauv ib qho kev sib txoos ua ke, ces qhov kev sib txoos ua ke ntawd yuav raug cuam tshuam, lub neej hauv pawg ntseeg yuav tsis tawg paj txi txiv, thiab cov uas tuaj koom qhov kev sib txoos ua ke ntawd yuav tsis tau txais ib yam dab tsi li, thiab lawv yeej yuav tuaj sib txoos ua ke yam tsis muaj qab hau thiab nkim lawv lub sij hawm xwb. Vim li ntawd, cov teeb meem no twb yeej cuam tshuam qhov raws qib raws duas ntawm lub neej hauv pawg ntseeg lawm.

A. Ntau Hom Kev Qhia Tshwm Uas Pom Tau Meej ntawm Kev Koom Kev Sib Tawm Tsam thiab Kev Sib Cav Sib Ceg

1. Kev Sib Nthuav Tawm txog Tej Kev Ua Tsis Tau Zoo

Ib txhia tib neeg mas pheej nyiam tham txog tej xwm txheej hauv tsev neeg thiab cov ncauj lus uas tsis tseem ceeb nyob rau hauv tej kev sib txoos ua ke, thiab lawv tham txog tej xwm txheej me me hauv tsev thiab tham dog tham dig rau cov kwv tij thiab cov nkauj muam thaum twg lawv ntsib cov kwv tij thiab cov nkauj muam ntawd, uas ua rau cov kwv tij thiab cov nkauj muam ntawd xav tias tsis paub yuav ua li cas li. Tej zaum muaj ib tug neeg twg yuav sawv los txiav lawv cov lus, tiam sis muaj dab tsi tshwm sim tom qab ntawd? Yog txiav lawv lus tas li, ces lawv yuav tsis zoo siab, thiab qhov lawv tsis zoo siab ntawd txhais tias muaj teeb meem. Lawv xav tias: “Koj pheej txiav kuv lus es tsis pub kuv hais lus li. Yog li ntawd tsis ua li cas. Kuv yuav txiav koj lus thaum koj hais lus thiab! Thaum koj qhia Vajtswv cov lus, kuv yuav los txiav lus los ntawm lwm nqe Vajtswv cov lus thiab. Thaum koj qhia txog qhov paub koj tus kheej ntawd, kuv yuav qhia txog Vajtswv cov lus uas txiav txim rau tib neeg. Thaum koj qhia txog kev to taub koj tus moj yam khav theeb, kuv yuav qhia Vajtswv cov lus txog txoj kev txiav txim rau tib neeg qhov kawg thiab qhov hau kev kawg. Txawm koj yuav hais dab tsi los, kuv yuav hais ib yam uas txawv!” Tsis tas li ntawd xwb, yog lwm cov koom tes los txiav lawv lus, ces lawv yeej yuav sawv los tawm tsam lwm cov ntawd. Tib lub sij hawm no, vim lawv khaws kev chim siab thiab kev ntxub nyob hauv lawv lub siab, ces nyob rau hauv tej kev sib txoos ua ke ntawd lawv thiaj li nquag muab tej uas ua tsis tau zoo ntawm tus neeg uas txiav lawv lus ntawd nthuav tawm, tham txog tias tus neeg ntawd keev dag lwm tus li cas nyob rau hauv txoj kev ua lag luam ua ntej lawv los ntseeg Vajtswv, lawv siv txhua yam tswv yim phem npaum li cas nyob rau hauv lawv txoj kev sib khom nrog lwm tus, thiab ntau yam ntxiv—lawv tham txog tej no txhua zaus thaum tus neeg ntawd hais lus. Thaum xub thawj mas, tus neeg ntawd ua taus siab ntev, tiam sis sij hawm dhau mus, lawv txawm pib xav tias: “Kuv ib txwm pab koj, kuv ib txwm thev taus thiab ua siab ntev rau koj, tiam sis koj thev tsis taus kuv ib qho li. Yog koj ua li no rau kuv, ces tsis txhob liam tias vim li cas kuv tsis tseg! Wb twb nyob hauv tib lub zos los tau ntev heev lawm—wb ib leeg paub ib leeg zoo. Koj tau tawm tsam kuv lawm, yog li kuv yuav tawm tsam koj thiab; koj tau muab tej uas kuv ua tsis tau zoo ntawd nthuav tawm lawm, tiam sis koj tus kheej los yeej muaj tej ntawd ntau heev li thiab.” Yog li ntawd, lawv thiaj li hais tias, “Koj haj tseem nyiag khoom thaum koj tseem yau thiab; tej kev nyiag me me uas koj ua ntawd haj yam txaj muag heev! Yam tsawg kawg los yam kuv ua ntawd yog kev ua lag luam, qhov ntawd puav leej yog kev khwv noj khwv haus. Leej twg thiaj li tsis ua ob peb qho yuam kev nyob rau hauv lub ntiaj teb no? Ua li koj tus cwj pwm ne? Koj tus cwj pwm yog tus cwj pwm ntawm ib tug neeg tub sab, ib tug neeg nyiag khoom!” Qhov no tsis yog sib tawm tsam lod? Txoj hau kev ntawm cov kev tawm tsam no yog dab tsi? Nws yog ib qho kev sib muab tej uas ua tsis tau zoo nthuav tawm, puas yog? (Yog.) Lawv haj tseem xav rau lawv tus kheej tias: “Koj pheej muab kuv tej tsis zoo ntawd nthuav tawm, muab tej ntawd qhia rau txhua tus paub txog thiab paub txog kuv lub neej yav tas los uas tsis muaj koob meej, ua kom lwm tus tsis saib kuv siab ntxiv lawm—tsis ua li cas, kuv los yeej yuav tsis txuag koj li thiab. Kuv paub tag nrho txog tias koj tau muaj pes tsawg tus hluas, koj tau nrog pes tsawg tus txiv neej los sis poj niam nyob ua ke lawm; kuv twb npaj txhij tag nrho cov mos txwv no lawm. Yog koj muab tej uas kuv ua tsis tau zoo ntawd nthuav tawm dua thiab ua rau kuv chim heev lawm, ces kuv yuav coj tag nrho koj tej kev ua phem ntawd los qhia rau sawv daws pom!” Qhov kev sib muab tej uas ua tsis tau zoo ntawd nthuav tawm yog ib qho teeb meem uas nquag tshwm sim nyob hauv cov neeg uas ib leeg ncawg ib leeg zoo thiab cov uas ib leeg paub ib leeg zoo. Tej zaum vim yog ib qho kev tsis sib pom zoo los sis vim muaj kev tsis sib haum xeeb los sis kev khaws cia hauv siab nyob hauv nkawd, es ob tug neeg no thiaj li rub cov xwm txheej qub thiab tsis tseem ceeb tawm los siv ua cuab yeej los sib tawm tsam nyob rau hauv tej kev sib txoos ua ke. Ob tug neeg no ib leeg muab ib leeg tej kev ua tsis tau zoo los nthuav tawm thiab sib tawm tsam thiab ib leeg teem txim rau ib leeg, siv txhua tus lub sij hawm uas noj thiab haus Vajtswv txoj lus, thiab cuam tshuam rau lub neej hauv pawg ntseeg uas ib txwm muaj. Cov kev sib txoos ua ke zoo li no puas tawg taus paj txi taus txiv? Cov neeg nyob ib puag ncig ntawm nkawd ntawd puas tseem muaj lub siab sib txoos ua ke? Ib txhia kwv tij thiab nkauj muam txawm pib xav tias: “Ob tug no mas muaj teeb meem tiag tiag, qhov muab cov xwm txheej yav tas los ntawd hais tawm los ho muaj qab hau dab tsi! Tam sim no nkawd ob leeg twb ntseeg Vajtswv lawm, nkawd yuav tsum muab tej ntawd tso tseg. Leej twg thiaj li tsis muaj teeb meem? Tam sim no nkawd ob leeg tsis yog twb los rau ntawm Vajtswv lub xub ntiag lawm lod? Yeej daws tau tag nrho cov teeb meem no los ntawm Vajtswv txoj lus. Qhov muab tej uas ua tsis tau zoo ntawd nthuav tawm tsis yog kev xyaum ua raws qhov tseeb, thiab qhov ntawd tsis yog kev kawm kom paub los ntawm qhov ib tug neeg ua tau zoo los kho lwm tus qhov tsis zoo; qhov ntawd yog kev sib tawm tsam, yog ntxwgnyoog txoj kev coj xwb.” Nkawd qhov kev sib tawm tsam ntawd cuam tshuam thiab rhuav tshem lub neej hauv pawg ntseeg uas ib txwm muaj. Tsis muaj leej twg tuaj yeem cheem tau nkawd, thiab nkawd yuav tsis mloog txawm leej twg qhia qhov tseeb rau nkawd los xij. Ib txhia tib neeg ntuas nkawd tias: “Tsum txoj kev uas ib leeg muab ib leeg qhov ua tsis tau zoo ntawd nthuav tawm. Tseeb tiag, tag nrho qhov no tsis yog ib qho teeb meem loj npaum li ntawd; qhov ntawd tsis yog ib qho kev tsis sib haum ntawm kev hais lus ib pliag xwb lod? Tsis muaj kev ntxub loj nyob hauv neb ob leeg. Yog neb ob leeg tuaj yeem qhib siab lug, nthuav neb tus kheej tawm, tso neb tej kev xav nkhaus, kev chim siab, thiab kev ntxub tseg los thov Vajtswv thiab nrhiav qhov tseeb nyob rau ntawm Vajtswv lub xub ntiag, ces yeej daws tau tag nrho cov teeb meem no lawm.” Tiam sis ob tug neeg no tseem sib cav tsis thim li. Ib tug ntawm nkawd txawm hais tias, “Yog nws tuaj yeem thov txim rau kuv ua ntej, thiab yog nws qhib siab thiab nthuav nws tus kheej tawm ua ntej, ces kuv yuav ua ib yam nkaus thiab. Tiam sis, ib yam li yav tas los, yog nws tsis tso qhov no tseg, ces kuv yuav tsis tseg nws li thiab! Koj hais kom kuv xyaum ua raws li qhov tseeb—vim li cas nws ho tsis xyaum ua raws li qhov tseeb ntawd thiab? Koj hais kom kuv tso tej ntawd tseg—vim li cas nws ho tsis tso ua ua ntej?” Qhov no tsis yog qhov tsis muaj laj thawj lawm lod? (Yog.) Nkawd pib ua yam uas tsis muaj laj thawj lawm. Tsis muaj leej twg cov lus ntuas muaj ib qho txiaj ntsig rau nkawd li, thiab nkawd tsis mloog kev qhia txog qhov tseeb li thiab. Kiag thaum nkawd ib leeg pom ib leeg xwb, nkawd sib cav, nkawd ib leeg muab ib leeg qhov ua tsis tau zoo nthuav tawm thiab nkawd sib tawm tsam. Tsuas yog tsis sib ntaus xwb, muaj kev ntxub nyob hauv txhua yam uas nkawd ib leeg ua rau ib leeg, thiab txhua lo lus uas nkawd hais yeej muaj tej uas qhia tias muaj kev tawm tsam thiab kev foom phem. Yog nyob hauv lub neej hauv pawg ntseeg es muaj ob tug neeg zoo li no uas sib tawm tsam thiab sib cav sib ceg kiag thaum nkawd ib leeg pom ib leeg, lub neej hauv pawg ntseeg zoo li no puas tawg paj txi txiv tau? Tib neeg puas tau txais ib yam dab tsi zoo los ntawm qhov ntawd los li? (Tsis tau li.) Thaum cov xwm txheej zoo li no tshwm sim tuaj, ces tib neeg feem coob yeej pib txhawj xeeb hais tias, “Txhua zaus peb tuaj sib txoos ua ke mas, ob tug ntawd yeej sib cav tas li xwb, thiab nkawd tsis mloog leej twg cov lus ntuas li. Peb yuav ua li cas?” Tsuav nkawd nyob ntawd xwb, ces tej kev sib txoos ua ke yeej tsis muaj kev thaj yeeb li, thiab nkawd cuam tshuam txhua tus. Nyob hauv cov xwm txheej zoo li no mas, cov thawj coj pawg ntseeg yuav tsum tuaj daws qhov teeb meem; lawv yuav tsum tsis txhob cia cov neeg zoo li no cuam tshuam lub neej hauv pawg ntseeg mus ntxiv lawm. Yog tom qab twb ntuas, sib qhia, thiab coj qhia uas zoo zaum tag zaum thiab lawm, es tsis tau txiaj ntsig dab tsi, thiab ob sab tseem tuav nkawd tej kev xav nkhaus txuas ntxiv thiab ib leeg tsis kam zam txim rau ib leeg, thiab sib tawm tsam thiab cuam tshuam lub neej hauv pawg ntseeg txuas ntxiv, ces tsim nyog daws qhov xwm txheej ntawd raws li tej hauv paus ntsiab lus. Yuav tsum qhia rau nkawd tias: “Neb ob leeg twb muaj qhov xwm txheej no los tau ntev heev lawm, thiab qhov ntawd tau ua rau muaj kev cuam tshuam loj rau lub neej hauv pawg ntseeg thiab rau txhua tus kwv tij thiab nkauj muam lawm. Tib neeg feem coob npau taws rau neb txoj kev coj no, tiam sis lawv ntshai tsis kam hais dab tsi txog qhov no. Raws li neb tus cwj pwm thiab qhov kev qhia tshwm uas pom tau meej tam sim no, pawg ntseeg yuav tsum ua raws li tej hauv paus ntsiab lus, muab neb txoj kev koom lub neej hauv pawg ntseeg ncua tseg thiab muab neb cais tawm mus thim xav. Thaum twg neb tuaj yeem sib raug zoo yam sib haum xeeb, muaj kev sib qhia li ib txwm muaj, thiab muaj kev sib raug zoo li ib txwm muaj lawm, ces thaum ntawd neb mam rov qab tuaj koom lub neej hauv pawg ntseeg tau.” Txawm yog nkawd pom zoo los sis tsis pom zoo rau qhov no los xij, pawg ntseeg yuav tsum txiav txim siab li no; qhov no yog kev daws teeb meem raws li tej hauv paus ntsiab lus. Cov teeb meem no yuav tsum tau daws li no. Ib kis mas, qhov no muaj txiaj ntsim rau ob tug neeg ntawd; qhov ntawd tuaj yeem txhawb nkawd kom thim xav thiab paub nkawd tus kheej. Lwm kis mas, qhov ntawd tseem ceeb yog tiv thaiv ntau tus kwv tij thiab nkauj muam kom tsis txhob raug cuam tshuam los ntawm cov tib neeg phem ntxiv lawm. Ib txhia tib neeg hais tias, “Nkawd twb tsis tau ua ib yam dab tsi phem; raws li nkawd lub ntsiab tseeb mas, nkawd kuj tsis yog cov tib neeg phem thiab. Nkawd tsuas muaj qhov tsis zoo me me nyob hauv nkawd txoj kev ua neeg, nkawd tsuas yog yuav tus kheej siab, nquag ua tej uas tsis muaj laj thawj, thiab nquag khib thiab sib cav xwb. Vim li cas thiaj li cais nkawd tawm tsuas yog vim qhov no xwb?” Txawm nkawd txoj kev ua neeg yuav zoo li cas los xij, tsuav nkawd ua rau muaj kev cuam tshuam rau lub neej hauv pawg ntseeg xwb, ces cov thawj coj pawg ntseeg yuav tsum tuaj daws thiab saib xyuas qhov teeb meem ntawd. Yog ob tug neeg no yog tib neeg phem, ces thaum paub cais qhov no lawm, qhov kev daws ntawd yuav tsum tsis yog qhov kev cais nkawd tawm xwb; yuav tsum txiav txim siab kiag tam sid los ntsaig nkawd tawm mus ncaj qha. Yog nkawd tej kev ua tsuas yog sib tawm tsam thiab sib cav txog qhov yog thiab qhov tsis yog yam tsis ua rau lwm tus raug mob los sis ua lwm yam phem uas yuav ua rau tej txiaj ntsim ntawm Vajtswv lub tsev puas tsuaj, thiab nkawd tsis yog tib neeg phem, ces tsis tas yuav ntsaig nkawd tawm mus. Tiam sis, nkawd lub neej hauv pawg ntseeg yuav tsum raug muab ncua tseg, thiab nkawd yuav tsum raug muab cais tawm mus tig xav txog tus kheej tso. Txoj kev no yog qhov tsim nyog tshaj plaws lawm. Lub hom phiaj ntawm qhov daws qhov teeb meem li no yog los ua kom paub tseeb txog qhov raws qib raws duas li ib txwm muaj ntawm lub neej hauv pawg ntseeg thiab paub tseeb tias pawg ntseeg tes hauj lwm tuaj yeem ua mus li ib txwm muaj.

2. Kev Sib Nthuav Tawm thiab Sib Tawm Tsam

Ib txhia tib neeg tsis muaj lub peev xwm nkag siab thaum noj thiab haus Vajtswv cov lus thiab tsis paub yuav sib qhia lawv txoj kev to taub ntawm kev ntsib kev pom txog Vajtswv cov lus li cas. Lawv tsuas paub muab Vajtswv cov lus uas nthuav tawm tib neeg ntawd los piv rau lwm tus xwb. Yog li ntawd, thaum twg lawv sib qhia qhov tseeb uas nyob hauv Vajtswv cov lus, lawv pheej muaj tej kev npaj siab ntawm tus kheej; lawv pheej xav siv lub cib fim ntawd los nthuav tawm thiab tawm tsam lwm tus, uas ua rau pawg ntseeg tsis muaj kev thaj yeeb. Yog cov uas raug nthuav tawm ntawd muaj peev xwm coj kom yog rau tej yam uas lawv ntsib, to taub tej ntawd ntawm Vajtswv los, thiab kawm paub mloog lus thiab ua siab ntev, ces yuav tsis muaj kev sib cav sib ceg dab tsi li. Txawm li cas los xij, yeej zam tsis tau qhov uas qee tus yuav tsis kam mloog lus thaum lawv hnov lwm tus sib qhia thiab nthuav tawm lawv tej teeb meem. Lawv xav hauv nruab siab tias, “Vim li cas tom qab koj nyeem Vajtswv cov lus lawm, koj tsis qhia koj txoj kev to taub ntawm kev ntsib kev pom txog cov lus ntawd, los sis tham txog qhov paub koj tus kheej, es cia li tsuas tawm tsam thiab tsom ntsoov rau kuv xwb? Koj saib kuv tsis khuab qhov muag lod? Vajtswv cov lus twb qhia meej tias kuv muaj ib tug moj yam qias vuab tsuab lawm—puas tseem tim tsum kom koj hais thiab? Kuv muaj ib tug moj yam qias vuab tsuab, tiam sis koj tsis muaj ib tug moj yam qias vuab tsuab thiab lod? Koj pheej tsom ntsoov rau kuv, hais tias kuv txawj dag, tiam sis koj los yeej txawj dag tsis tsawg thiab!” Lawv lub siab puv nkaus kev chim siab thiab tsis kam mloog lus, tej zaum lawv yuav ua siab ntev ib zaug los sis ob zaug, tiam sis thaum sij hawm dhau mus, thiab lawv tej kev chim siab tau sib sau ntau tuaj ces yuav cia li tawg. Thiab thaum tawg lawm, qhov ntawd mas yuav phem heev. Lawv hais tias, “Thaum qee tus tib neeg ua thiab hais lus mas, lawv ua txuj ua neeg coj ncaj thiab qhib siab lug nyob rau sab nraud, tiam sis tseeb tiag lawm, lawv puv nkaus ntau yam tswv yim phem, thiab pheej npaj tawm tsam lwm tus. Tsis muaj leej twg to taub tau lawv tej kev xav los sis tej kev npaj siab thaum nrog lawv tham; lawv yog cov tib neeg txawj dag. Thaum peb ntsib cov tib neeg zoo li no, peb tsis tuaj yeem nrog lawv tham los sis nrog lawv sib raug zoo; lawv txaus ntshai dhau lawm. Yog koj tsis xyuam xim, koj yuav poob rau hauv lawv rooj ntxiab thiab raug lawv dag thiab siv. Cov tib neeg zoo li no yog cov phem tshaj plaws, yog hom uas Vajtswv ntxub thiab qias tshaj plaws. Lawv tsim nyog raug muab pov mus rau hauv lub qhov ntuj tob tsis muaj chaw tws thiab pov mus rau hauv lub pas hluav taws thiab leej faj!” Tom qab hnov li no, lwm tus ntawd xav tias, “Koj muaj tej moj yam qias vuab tsuab tiam sis koj tsis pub lwm tus nthuav koj tawm? Koj khav theeb thiab qhuas tias koj tus kheej coj ncaj dhau lawm, yog li ntawd kuv yuav nrhiav dua ib nqe Vajtswv cov lus los nthuav koj tawm, thiab saib seb koj tseem yuav muaj lus dab tsi hais!” Tus neeg ntawd haj yam npau taws ntxiv tom qab raug nthuav tawm, thiab xav tias: “Li no koj yuav tsis tso qhov no tseg li, puas yog? Koj tseem yuav tuav rawv qhov no, puas yog? Koj yeej yog saib kuv tsis khuab qhov muag, thiab xav tias kuv muaj ib tus moj yam qias vuab tsuab, puas yog? Zoo, ces kuv yuav nthuav tawm koj thiab!” Yog li ntawd lawv thiaj li hais tias, “Ib txhia tib neeg yeej yog cov tawm tsam khetos ntag; lawv nyiam lub meej mom thiab kev qhuas los ntawm lwm tus, lawv nyiam qhuab qhia lwm tus, siv Vajtswv cov lus los nthuav tawm thiab teem txim rau lwm tus, ua rau lwm tus xav tias lawv tus kheej tsis muaj ib tug moj yam qias vuab tsuab. Lawv ua tus neeg nyob siab siab thiab muaj hwj chim, thiab xav tias lawv tau dhau los ua neeg dawb huv lawm, tiam sis lawv tsis yog cov dab tsis huv xwb lod? Lawv tsis yog cov Ntxwgnyoog thiab cov ntsujplig phem xwb lod? Cov tawm tsam khetos yog dab tsi? Cov tawm tsam khetos ces yog cov Ntxwgnyoog ntag!” Lawv tau sib cav pes tsawg zaus lawm? Puas muaj tus yeej? (Tsis muaj.) Lawv puas tau hais ib yam dab tsi uas muaj txiaj ntsim rau lwm tus? (Tsis tau.) Yog li, cov lus no yog lus dab tsi? (Lus txiav txim, lus teem txim.) Cov lus ntawd yog lus txiav txim. Lawv lam tau lam hais lus yam tsis quav ntsej txog qhov xwm txheej tiag tiag los sis qhov muaj tseeb, cia li txiav txim thiab teem txim rau lwm tus raws siab nyiam, haj tseem foom phem rau tib neeg thiab. Lawv puas muaj lub hauv paus uas muaj tseeb rau qhov hu lwm tus neeg tias yog ib tug tawm tsam khetos? Tus neeg ntawd muaj tej kev ua phem thiab tej kev qhia tshwm uas pom tau meej ntawm ib tug tawm tsam khetos twg? Tus neeg ntawd tus moj yam qias vuab tsuab puas mus txog theem ntawm lub ntsiab tseeb ntawm ib tug tawm tsam khetos? Thaum cov neeg Vajtswv xaiv tseg hnov lawv nthuav tawm lwm tus neeg, lawv puas yuav xav tias qhov ntawd ncaj ncees thiab muaj tseeb? Puas muaj kev siab zoo los sis kev npaj siab zoo nyob hauv cov lus uas ob tug neeg no hais? (Tsis muaj.) Lawv lub hom phiaj puas yog los sib pab kom lwm tus ntawd paub lawv tus kheej, thiab sib pab kom lawv tso tau lawv tus moj yam qias vuab tsuab tseg thiab nkag mus rau hauv qhov tseeb qhov muaj tiag kom sai li sai tau? (Tsis yog.) Yog li ntawd lawv ua qhov no txhawm rau dab tsi? Qhov ntawd yog los tso lawv tus kheej txoj kev chim siab tawm, los tawm tsam thiab ua pauj rov qab rau lwm tus, yog li ntawd lawv thiaj cia li iab liam lwm tus txog ib yam dab tsi raws li lawv siab nyiam uas tsis mus raws li qhov tseeb kiag li. Lawv tsis sib ntsuas thiab sib txiav txim kom raug raws li Vajtswv cov lus thiab lwm tus ntawd tej kev nthuav tawm thiab lub ntsiab tseeb, tiam sis lawv siv Vajtswv cov lus los sib tawm tsam, ua pauj rov qab, thiab tso lawv tus kheej txoj kev chim siab tawm; lawv yeej tsis yog sib qhia qhov tseeb kiag li. Qhov no yog ib qho teeb meem loj. Lawv pheej tuav lwm tus tej yam yuam kev los tawm tsam thiab teem txim rau lwm tus tias muaj ib tug moj yam khav theeb—tus cwj pwm no siab phem thiab lim hiam, thiab qhov no yeej tsis yog kev nthuav tawm uas muaj kev npaj siab zoo kiag li. Yog li ntawd qhov no tsuas coj mus rau kev sib ua yeeb ncuab thiab kev sib ntxub xwb. Yog kev nthuav tawm ua nrog ib tug cwj pwm uas pab lwm tus los ntawm lub siab hlub, ces tib neeg yeej hnov tau qhov no thiab lawv tuaj yeem coj kom yog rau qhov ntawd. Tiam sis yog muaj ib tug twg ho muab lwm tus tus moj yam khav theeb los teem txim thiab tawm tsam lawv, ces qhov no yeej yog los ntaus thiab tsim txom tus neeg ntawd tag nrho lawm ntag. Txhua tus puav leej muaj ib tug moj yam khav theeb, yog li ntawd vim li cas thiaj li pheej tsom ntsoov rau ib tug neeg? Vim li cas thiaj li pheej tsom ntsoov rau ib tug neeg yam tsis tso lawv tseg li? Qhov pheej nthuav tawm tus neeg ntawd tus moj yam khav theeb tas li—lub hom phiaj puas yog los pab kom lawv tso tau tus moj yam ntawd tseg tiag? (Tsis yog.) Yog li ntawd vim li cas thiaj li ua li ntawd? Qhov ntawd yog vim lawv saib lwm tus ntawd tsis khuab qhov muag, yog li ntawd lawv thiaj li nrhiav cib fim los tawm tsam thiab ua pauj rov qab, pheej xav tsim txom lwm tus ntawd. Yog li ntawd, thaum lawv hais tias lwm tus yog ib tug tawm tsam khetos, ib tug Ntxwgnyoog, ib tug dab phem, ib tug neeg txawj dag thiab siab phem, qhov ntawd puas muaj tseeb? Tej zaum qhov ntawd yuav muaj tseeb me ntsis, tiam sis lawv lub hom phiaj ntawm kev hais tej no tsis yog los pab lwm tus ntawd los sis los sib qhia qhov tseeb tiam sis yog los tso lawv tus kheej txoj kev chim siab tawm thiab ua pauj rov qab. Lawv tau raug tsim txom lawm, yog li ntawd lawv thiaj li xav ua pauj rov qab. Lawv ua pauj rov qab li cas? Los ntawm kev nthuav tawm lwm tus ntawd, teem txim rau lawv, hais tias lawv yog ib tug dab phem, ib tug Ntxwgnyoog, ib tug ntsujplig phem, ib tug tawm tsam khetos—muab lub npe twg uas phem tshaj plaws thiab qhov kev iab liam twg uas hnyav tshaj plaws rau lwm tus ntawd. Qhov no tsis yog kev txiav txim thiab kev teem txim raws siab nyiam lod? Qhov kev npaj siab, lub hom phiaj, thiab lub hauv paus pib ntawm ob tog hauv qhov kev hais tej lus no tsis yog los pab lwm tus ntawd kom paub lawv tus kheej thiab daws lawv tej moj yam qias vuab tsuab, thiab haj yam tsis yog los pab lawv kom nkag mus rau hauv qhov muaj tiag ntawm Vajtswv cov lus los sis to taub qhov tseeb tej hauv paus ntsiab lus. Tiam sis, lawv tab tom tawm tsam thiab ntaus lwm tus ntawd, los nthuav tawm lwm tus ntawd kom lawv thiaj li ua tau raws li lawv lub hom phiaj ntawm kev tso lawv tus kheej txoj kev chim siab tawm thiab ua pauj rov qab. Qhov no yog koom kev sib tawm tsam thiab sib cav sib ceg. Txawm hais tias txoj kev tawm tsam lwm tus no tej zaum yuav zoo li muaj hauv paus ntau dua li kev sib nthuav tawm txog tej kev ua tsis tau zoo, thiab yog kev muab Vajtswv cov lus piv rau lwm tus ntawd es hais tias lawv muaj ib tug moj yam qias vuab tsuab thiab tias lawv yog ib tug dab phem thiab ib tug Ntxwgnyoog, thiab saib sab nraud mas zoo li yog sab ntsujplig heev, tiam sis lub ntsiab xeeb txawm ntawm ob txoj hau kev no yeej zoo tib yam nkaus. Tsis muaj ib txoj hau kev twg ntawm cov no uas yog hais txog kev sib qhia Vajtswv cov lus thiab qhov tseeb nyob hauv kev ua neeg li ib txwm muaj, tiam sis tej ntawd yog hais txog kev txiav txim, teem txim, thiab foom phem rau lwm tus yam tsis muaj kev ris lub luag hauj lwm thiab lam tau lam ua raws li tus kheej txoj kev nyiam, thiab tawm tsam lwm tus xwb. Tej kev sib tham uas muaj lub ntsiab xeeb txawm zoo li no kuj ua rau muaj kev tab kaum thiab kev cuam tshuam rau hauv lub neej hauv pawg ntseeg, thiab tej kev sib tham ntawd cuam tshuam thiab ua kev puas tsuaj rau cov neeg Vajtswv xaiv tseg txoj kev nkag mus rau hauv lub neej txoj sia.

Thaum nej ntsib ob tug neeg uas sib tawm tsam los ntawm qhov ib leeg nthuav tawm ib leeg tej moj yam qias vuab tsuab ntawd nej tsim nyog ua li cas? Puas tsim nyog npuaj rooj thiab qhuab qhia nkawd? Puas tsim nyog muab ib thoob dej txias hliv rau nkawd kom nkawd txias tuaj, thiab ua kom nkawd paub tias nkawd tsis yog thiab sib thov txim rau lwm tus ntawd? Tej hau kev no puas daws tau qhov teeb meem? (Daws tsis tau.) Ob tug neeg no pheej sib cav nyob rau txhua qhov kev sib txoos, thiab tom qab txhua qhov kev sib txoos xaus lawm, nkawd tseem npaj rau kev sib cav lwm zaus thiab. Thaum nyob hauv tsev, nkawd nrhiav Vajtswv cov lus thiab cov hauv paus los siv hauv nkawd tej kev tawm tsam, nkawd haj tseem muab sau cia, thiab xav seb yuav tawm tsam lwm tus ntawd li cas, yuav tawm tsam sab twg, yuav txiav txim thiab teem txim rau lwm tus ntawd li cas, yuav siv lub suab li cas, thiab yuav siv Vajtswv cov lus twg los tawm tsam thiab teem txim kom thiaj li ntseeg tau tshaj plaws. Nkawd kuj nrhiav ntau yam lus ntawm sab ntsujplig thiab siv ntau txoj kev qhia tawm los teem txim thiab tawm tsam lwm tus ntawd, thaiv kom lwm tus ntawd tsis txhob tig qhov xwm txheej rov qab, thiab nkawd siv zog los tawm tsam lwm tus ntawd kom vau nyob rau qhov kev sib cav lwm zaus, thiab ua kom lwm tus ntawd sawv tsis taus ntxiv li lawm. Tej kev coj no puav leej yog koom kev sib tawm tsam thiab sib cav sib ceg. Ua li tej teeb meem zoo li no puas yooj yim daws? Yog hais tias, tom qab tau txais kev ntuas, kev pab, thiab kev sib qhia txog qhov tseeb los ntawm tib neeg feem coob lawm, nkawd yeej tseem tsis lees txim hloov dua siab tshiab los sis tsis hloov li—qhov ntawd yog, kiag thaum nkawd sib ntsib nkawd ib leeg sib cav thiab foom phem rau ib leeg, tsis mloog leej twg cov lus qhia li, thiab tsis lees txais thaum leej twg sib qhia qhov tseeb los sis ntuas nkawd—qhov no tsim nyog ua li cas? Qhov no yooj yim daws: Yuav tsum muab nkawd tshem tawm mus. Qhov ntawd tsis yog daws tau qhov teeb meem lawm lod? Qhov ntawd tsis yooj yim lod? Puas tsim nyog sib qhia nrog nkawd txuas ntxiv? Puas tsim nyog pab nkawd nrog lub siab hlub ntxiv lawm? Qhia Kuv seb, puas tsim nyog ua siab ntev thiab thev taus rau cov tib neeg zoo li no nrog lub siab hlub lawm? (Tsis tsim nyog.) Vim li cas thiaj li tsis tsim nyog? (Lawv tsis lees txais qhov tseeb—qhov kev sib qhia nrog lawv tsis muaj qab hau.) Yog lawm, lawv tsis lees txais qhov tseeb. Lawv tuaj sib txoos ua ke yog tuaj sib cav sib ceg xwb. Lawv ntseeg Vajtswv tsis yog los caum qhov tseeb, thiab lawv tsuas nyiam sib cav sib ceg xwb. Qhov no puas yog ib qho kev nthuav tawm thiab kev qhia tshwm uas pom tau meej ntawm kev ua neeg li ib txwm muaj? Lawv puas muaj kev paub tias dab tsi yog qhov tsim nyog uas kev ua neeg li ib txwm muaj tsim nyog muaj? (Tsis muaj.) Lawv tsis muaj kev paub tias dab tsi yog qhov tsim nyog ntawm kev ua neeg li ib txwm muaj. Thaum sib txoos ua ke, cov tib neeg zoo li no tsis nyeem Vajtswv cov lus yam tsom ntsoov thiab tsim nyog kom lawv thiaj li to taub thiab tau txais qhov tseeb los ntawm Vajtswv cov lus, thiab los ntawm qhov ntawd daws lawv tej moj yam qias vuab tsuab thiab lawv tej teeb meem. Tiam sis, lawv pheej xav daws lwm tus tej teeb meem. Lawv txoj kev tsom ntsoov yeej ib txwm nyob rau ntawm lwm tus, nrhiav qhov txhaum hauv lwm tus; lawv ib txwm muaj hom phiaj los nrhiav lwm tus tej teeb meem hauv Vajtswv cov lus. Lawv siv lub cib fim ntawm kev nyeem thiab sib qhia Vajtswv cov lus los nthuav tawm thiab tawm tsam lwm tus, thiab lawv siv Vajtswv cov lus los txiav txim, saib tsis taus, thiab teem txim rau lwm tus. Thiab lawv tseem muab lawv tus kheej cais tawm ntawm Vajtswv cov lus. Lawv yog hom neeg zoo li cas? Cov no puas yog cov tib neeg uas lees txais qhov tseeb? (Tsis yog.) Lawv tshwj xeeb tshaj yog txawj thiab nyiam ib yam: Tom qab nyeem Vajtswv cov lus, lawv nquag nrhiav tau tej teeb meem, tej yam ntxwv, thiab tej kev qhia tshwm uas pom tau meej uas Nws cov lus nthuav tawm ntawd nyob rau hauv lwm tus. Lawv yim nrhiav tau tej teeb meem no, lawv yim xav tias lawv ris ib lub luag hauj lwm tseem ceeb thiab ntseeg tias muaj ntau yam uas lawv ua tau, xav tias lawv yuav tsum nthuav tawm cov teeb meem no. Lawv yuav tsis tso ib tug neeg twg uas muaj cov teeb meem no tseg li. Lawv yog hom neeg zoo li cas? Cov tib neeg zoo li no puas muaj laj thawj? Lawv puas muaj lub peev xwm nkag siab qhov tseeb? (Tsis muaj.) Nyob rau hauv pawg ntseeg, yog cov tib neeg zoo li no tsis hais lus los sis tsis ua kev cuam tshuam, ces tsis tas quav ntsej lawv. Txawm li cas los xij, yog lawv pheej ua li no, pheej tawm tsam, txiav txim, thiab teem txim rau lwm tus, ces pawg ntseeg yuav tsum ua raws li ntawd los daws lawv, tshem lawv tawm mus. Hos hais txog cov uas tau raug lwm tus nthuav tawm, thiab tom qab ntawd tawm tsam, txiav txim, thiab teem txim rau tus uas nthuav tawm lawv ntawd los ntawm kev siv tib txoj kev thiab txoj hau kev, yog cov xwm txheej hnyav thiab lawv tau tab kaum thiab cuam tshuam lub neej hauv pawg ntseeg, ces lawv kuj yuav tsum raug tshem tawm thiab cais tawm ntawm cov neeg Vajtswv xaiv tseg—tsis tuaj yeem ua siab mos siab muag rau lawv.

Tseem muaj cov kev qhia tshwm uas pom tau meej ntawm qhov koom kev sib tawm tsam thiab sib cav sib ceg twg ntxiv uas suav tau hais tias muaj ib lub ntsiab xeeb txawm ntawm kev tab kaum thiab kev cuam tshuam lub neej hauv pawg ntseeg? Kev sib nthuav tawm txog tej kev ua tsis tau zoo, thiab kev ib leeg nthuav tawm ib leeg tej moj yam qias vuab tsuab los tso tus kheej txoj kev chim siab tawm thiab ua pauj rov qab rau lwm tus ntawd, puav leej yog tej kev qhia tshwm uas pom tau meej uas meej tseeb ntawm kev tab kaum thiab cuam tshuam lub neej hauv pawg ntseeg. Dhau ntawm ob qho kev qhia tshwm uas pom tau meej no, kuj muaj kev ua txuj qhib siab thiab qhia tus kheej tawm thiab soj ntsuam tus kheej kom thiaj li txhob txwm nthuav tawm thiab soj ntsuam lwm tus—hom kev tawm tsam no kuj yog ib qho kev qhia tshwm uas pom tau meej ntawm kev tab kaum thiab kev cuam tshuam lub neej hauv pawg ntseeg thiab. Yog li ntawd, ib yam dab tsi uas ib tug neeg hais ntawd puas yog ib qho kev tawm tsam tsuav qhov ntawd tsis yog hais txog lawv tus kheej cov teeb meem tiam sis yog hais txog lwm tus cov teeb meem, txawm yog yam ntawd hais yam chob siab los sis hais tsis ncaj qha thaum lam hais kom dhau xwb, es hais yam xyuam xim heev? (Tsis yog.) Yog li ntawd, cov xwm txheej twg thiaj li yog kev tawm tsam? Qhov ntawd nyob ntawm qhov kev npaj siab thiab lub hom phiaj uas nyob hauv tej lus hais ntawd. Yog hais qee yam los ntaus thiab ua pauj rov qab rau tib neeg, los sis los tso tus kheej txoj kev chim siab tawm, ces qhov no yog ib qho kev tawm tsam. Qhov no yog ib qho xwm txheej. Tsis tas li ntawd, qhov muab ib qho teeb meem tej xwm txheej uas pom sab nraud los ua kom loj heev los txiav txim thiab teem txim rau tib neeg uas yog qhov tsis raws li qhov muaj tseeb thiab qhov muaj tiag li, tsis muaj kev ris lub luag hauj lwm es cia li xaus lus raws siab nyiam yam tsis saib kiag li tias lub ntsiab tseeb ntawm qhov teeb meem yog dab tsi—qhov no kuj yog kev tso tus kheej txoj kev chim siab tawm thiab kev ua pauj rov qab, qhov ntawd yog kev txiav txim thiab teem txim, thiab hom xwm txheej zoo li no los kuj yog ib qho kev tawm tsam thiab. Tshuav dab tsi ntxiv? (Kev tsim cov lus xaiv uas tsis muaj hauv paus hauv ntsis txog tib neeg, qhov ntawd puas yog ib qho?) Kev tsim cov lus xaiv uas tsis muaj hauv paus hauv ntsis ntawd yeej suav nrog, haj yam yog. Muaj pes tsawg qhov xwm txheej uas yog kev tawm tsam? (Peb qho.) Muab cov xwm txheej no zuaj zog los hais. (Qhov ib yog ntaus lwm tus vim ib lub hom phiaj tshwj xeeb. Qhov ob yog txiav txim thiab teem txim rau lwm tus hauv ib txoj kev uas tsis mus raws li qhov tseeb thiab yam uas muaj tseeb, qhov no yog kev txiav txim rau lwm tus raws siab nyiam yam tsis muaj kev ris lub luag hauj lwm. Qhov peb yog tsim cov lus xaiv uas tsis muaj hauv paus hauv ntsis txog tib neeg.) Lub ntsiab xeeb txawm ntawm peb qhov xwm txheej no yeej tsim nyog hu tias yog kev tawm tsam lwm tus. Peb yuav cais li cas tias cov xwm txheej twg tsim nyog hu tias yog kev tawm tsam lwm tus thiab cov twg tsis tsim nyog? Thaum hais txog cov uas ua kev tawm tsam ntawd, cov kev ua twg los sis cov lus twg yog ib qho kev tawm tsam? Piv txwv hais tias ib tug neeg cov lus muaj ib lub ntsiab xeeb txawm me ntsis uas coj kev, thiab muaj peev xwm coj lwm tus mus yuam kev, thiab kuj muaj ib lub ntsiab xeeb txawm ntawm qhov tsim cov lus xaiv thiab. Tus neeg ntawd muab qhov tsis muaj los ua qhov muaj thiab tsim cov lus xaiv thiab lus dag los coj tib neeg mus yuam kev thiab ua rau tib neeg yuam kev. Lawv qhov kev npaj siab thiab lub hom phiaj yog los ua kom tib neeg ntau ntxiv lees paub thiab ntseeg tias yam uas lawv hais ntawd yog, thiab pom zoo tias yam uas lawv hais mus raws li qhov tseeb. Nyob rau tib lub sij hawm ntawd, lawv kuj xav ua pauj rov qab rau lwm tus ntawd, ua kom lwm tus ntawd xav tsis zoo thiab qaug zog. Lawv xav tias, “Koj muaj ib tug cwj pwm uas qias heev—kuv yuav tsum muab koj qhov xwm txheej tiag tiag ntawd nthuav tawm, thiab tsuj koj txoj kev khav theeb ntawd, ces tom qab ntawd peb mam li saib seb koj muaj dab tsi los qhia tawm thiab khav txog! Kuv yuav ua li cas thiaj li tshwm tau zoo nyob rau ntawm koj ib sab? Kuv txoj kev ntxub yuav tsis nqig mus txog thaum kuv muab koj ntaus kom xav tsis zoo thiab ntaus koj kom vau. Kuv yuav qhia rau txhua tus paub tias koj tuaj yeem xav phem thiab muaj tej kev qaug zog thiab!” Yog qhov no yog lawv lub hom phiaj, ces cov lus lawv hais ntawd yog ib qho kev tawm tsam. Tiam sis piv txwv hais tias lawv qhov kev npaj siab tsuas yog los qhia tej uas muaj tseeb, thiab yam uas tseeb txog ib yam dab tsi kom meej xwb—ces tom qab muaj ib qho kev to taub tob uas yog txog qhov ntawd thiab paub lub ntsiab tseeb ntawm qhov teeb meem ntawd los ntawm ib ntu sij hawm ntawm kev ntsib kev pom lawm, mas lawv mam li xav tias yuav tsum muab qhov ntawd los sib qhia es kom feem coob thiaj li to taub thiab paub tias hom kev nkag siab twg thiaj li yog, qhov ntawd yog, lawv lub hom phiaj yog los kho tib neeg ntau ntxiv cov kev xam pom uas nkhaus los sis tej kev xam pom ntawm ib sab xwb txog qhov teeb meem no—qhov no puas yog ib qho kev tawm tsam? (Tsis yog.) Lawv tsis yuam ib tug neeg kom los lees txais lawv tus kheej lub tswv yim, thiab lawv haj yam tsis muaj ib qho kev npaj siab txog qhov kev ua pauj rov qab rau kev chim ntiag tug. Tiam sis, lawv tsuas xav qhia kom meej txog qhov tseeb ntawm qhov muaj tseeb ntawd xwb; lawv siv lub siab hlub los pab lwm tus ntawd kom to taub, thiab tom qab uas to taub lawm es kom tsis txhob mus yuam kev. Tsis hais lwm tus ntawd puas lees txais qhov no, lawv muaj peev xwm ua lawv lub luag hauj lwm kom tiav. Yog li ntawd txoj kev coj no, txoj kev ua no, tsis yog ib qho kev tawm tsam. Los ntawm cov lus, kev xaiv cov lus, thiab txoj kev hais lus, lub suab, thiab tus cwj pwm ntawm kev hais lus hauv ob qho kev qhia tshwm uas pom tau meej uas sib txawv no mas tuaj yeem qhia tau tias tus neeg ntawd qhov kev npaj siab thiab lub hom phiaj yog dab tsi. Yog ib tug neeg xav tawm tsam lwm tus, ces lawv hom lus yuav tsum yog lus nkaug, thiab lawv qhov kev npaj siab thiab lub hom phiaj yuav pom tseeb nyob hauv lawv lub suab hais lus, lub suab nce nqis, kev xaiv cov lus, thiab tus cwj pwm. Yog lawv tsis yuam lwm tus ntawd kom lees txais yam uas lawv hais, thiab lawv yeej tsis tawm tsam lwm tus ntawd, ces lawv cov lus yeej yuav mus raws li tej kev qhia tshwm uas pom tau meej ntawm lub siab txawj xav thiab laj thawj ntawm kev ua neeg li ib txwm muaj. Tsis tas li ntawd, lawv tus cwj pwm hais lus, lub suab, thiab kev xaiv cov lus yeej yuav tsim nyog, yog nyob rau hauv tus ciaj ciam ntawm kev ua neeg li ib txwm muaj.

Tom qab sib qhia txog tej hauv paus ntsiab lus ntawm txoj kev cais tias dab tsi yog ib qho kev tawm tsam lwm tus thiab dab tsi tsis yog lawm, tam sim no nej puas muaj peev xwm paub cais qhov no? Yog nej tseem tsis paub cais qhov no, ces nej yuav tsis muaj peev xwm pom tshab mus rau lub ntsiab tseeb ntawm qhov teeb meem lawm. Tsis hais ib tug neeg txoj kev sib qhia yuav zoo mloog npaum li cas, yog lawv tsis xyaum ua raws li tej hauv paus ntsiab lus, yog lawv lub hom phiaj tsis yog los pab tib neeg kom to taub qhov tseeb thiab ua lawv tej dej num kom zoo, tiam sis yog nrhiav tej yam los siv tawm tsam tib neeg los thab lawv yam tsis tso tseg li, tas zog los txiav txim thiab teem txim rau lawv, thiab txawm saib sab nraud mas zoo li lawv tab tom cais tib neeg, qhov tseeb tiag lawv qhov kev npaj siab thiab lub hom phiaj yog los teem txim thiab tawm tsam lwm tus, ces qhov xwm txheej no yog ib qho kev tawm tsam lwm tus. Tej yam me me uas tshwm sim nyob ntawm tib neeg mas yooj yim thiab pom tseeb heev; yog tias kev sib qhia qhov tseeb txog tej yam no, tsis siv sij hawm ntev npaum li kev sib txoos ua ke ib zaug. Yog li ntawd, puas tsim nyog muab cov kwv tij thiab cov muam lub sij hawm los hais ntau ntau txog tej yam no nyob rau txhua zaug uas sib txoos ua ke? Tsis tsim nyog. Yog tib neeg pheej thab lwm tus yam tsis tso tseg li, ces qhov ntawd yog kev tawm tsam tib neeg thiab ua rau muaj kev cuam tshuam. Yog vim li cas tib neeg thiaj li tuav rawv rau ib qho xwb es tham txog qhov ntawd tsis tsum li? Qhov ntawd yog vim tsis muaj leej twg txaus siab hlo tso lawv tus kheej cov kev npaj siab thiab cov hom phiaj tseg, tsis muaj leej twg sim paub txog lawv tus kheej, thiab tsis muaj leej twg lees txais qhov tseeb, los sis tej qhov muaj tseeb thiab qhov uas tseeb, yog li ntawd lawv thiaj li thab lwm tus yam tsis tso tseg li. Lub ntsiab xeeb txawm ntawm kev thab lwm tus yam tsis tso tseg ntawd yog dab tsi? Qhov ntawd yog ib qho kev tawm tsam. Qhov ntawd yog kev nrhiav tej yam los tawm tsam lwm tus, nrhiav qhov tsis yog hauv lwm tus kev xaiv cov lus hais, thiab muab lwm tus tej qhov tsis txaus los tawm tsam lawv, tuav rawv rau ib yam xwb es tsis tso tseg li thiab sib cav mus txog thaum lub ntsej muag liab ploog. Yog tib neeg sib qhia los ntawm kev ua neeg li ib txwm muaj, sib txhawb thiab sib pab—qhov ntawd yog ua lawv lub luag hauj lwm kom tiav—ces txoj kev sib raug zoo ntawm lawv yuav zoo zuj zus tuaj. Tiam sis yog lawv sib tawm tsam thiab sib cav, lawv tus kheej ib leeg thab ib leeg los ua kom pom lawv cov laj thawj meej, ib txwm xav kom muaj yeej xwb, tsis kam swb thiab tsis kam los sib haum, tsis tso cov kev chim siab ntawm tus kheej tseg li, ces txoj kev sib raug zoo ntawm nkawd ob leeg thaum kawg yuav nruj zuj zus thiab phem zuj zus tuaj xwb; qhov ntawd yuav tsis yog ib txoj kev sib raug zoo ntawm tib neeg li ib txwm muaj, thiab haj tseem mus txog theem uas thaum twg nkawd sib ntsib ces nkawd ob lub qhov muag yuav liab ploog. Koj saib seb thaum dev sib tog, tus uas tsiv nyaum ntawd lub qhov muag mas liab. Vim li cas lub qhov muag thiaj li liab? Qhov ntawd tsis yog puv nkaus kev ntxub lod? Tib neeg txoj kev sib tawm tsam tsis yog zoo tib yam li no lod? Yog hais tias, thaum tib neeg sib qhia qhov tseeb, lawv tsis sib tawm tsam, tiam sis tuaj yeem pab txhawb tus uas ua tsis tau zoo los ntawm qhov lwm tus ua tau zoo, thiab sib txhawb, lawv txoj kev sib raug zoo yuav tsis zoo lod? Lawv txoj kev sib raug zoo yeej yuav zoo li ib txwm zuj zus tuaj. Thaum ob tug neeg hais lus, tham, sib qhia, los sis txawm yog sib cav hauv lub siab uas txawj xav thiab qhov laj thawj txog txoj kev ua neeg li ib txwm muaj los xij, nkawd txoj kev sib raug zoo yuav zoo li ib txwm muaj, thiab nkawd yuav tsis npau taws los sis tsis pib sib ntaus kiag thaum nkawd sib ntsib. Yog kev ntxub thiab ib qho kev npau taws uas piav tsis tau tshwm sim rau hauv tib neeg thaum lawv twb tsis tau sib ntsib tim ntsej tim muag, tsuas yog vim hais txog lwm tus xwb, ces qhov no tsis yog ib qho kev qhia tshwm uas pom tau meej txog kev muaj laj thawj thiab lub siab txawj xav ntawm kev ua neeg li ib txwm muaj. Tib neeg sib tawm tsam vim lawv muaj tej moj yam qias vuab tsuab; qhov ntawd tsis muaj feem xyuam txog qhov xwm txheej ib puag ncig. Qhov no puav leej yog vim tib neeg tsis nyiam qhov tseeb, lees txais tsis tau qhov tseeb, thiab tsis xyaum ua raws qhov tseeb los sis tsis saib xyuas tej yam raws li tej hauv paus ntsiab lus thaum muaj kev sib cav tshwm tuaj, yog li ntawd thiaj li pheej tshwm sim muaj cov xwm txheej ntawm qhov muab tej uas ua tsis tau zoo los sib nthuav tawm, tej kev txiav txim, thiab haj tseem yog tej kev sib tawm tsam thiab kev teem txim nyob rau hauv lub neej hauv pawg ntseeg. Vim tib neeg muaj tej moj yam qias vuab tsuab, thiab lawv pheej nyob hauv ib tug yam ntxwv uas tsis muaj laj thawj, thiab lawv ua neej raws li lawv tej moj yam qias vuab tsuab, thiab tab txawm yog lawv to taub qee qhov tseeb los, nws nyuaj rau lawv los muab qhov ntawd xyaum ua raws, ces kev sib cav thiab ntau hom kev tawm tsam thiaj li tshwm sim ntawm lawv yam yooj yim heev. Yog cov kev tawm tsam no tshwm sim qee zaus, ces cov kev tawm tsam ntawd tsuas muaj ib qho kev cuam tshuam rau lub neej hauv pawg ntseeg ntawd ib ntus xwb, tiam sis cov uas pheej nyiam sib tawm tsam ntawd ua rau muaj tej kev tab kaum thiab kev cuam tshuam loj rau lub neej hauv pawg ntseeg, thiab tej ntawd kuj cuam tshuam cov neeg Vajtswv xaiv tseg txoj kev nkag mus rau hauv lub neej txoj sia loj heev.

3. Kev Sib Cav Sib Ceg

Nyob rau hauv pawg ntseeg mas, kuj tseem muaj lwm hom tib neeg thiab—hom tib neeg no mas tshwj xeeb nyiam hais lus los daws tus kheej. Piv txwv li, yog lawv ua los sis hais qee yam txhaum lawm, lawv ntshai tsam lwm tus yuav muaj kev xav tsis zoo txog lawv, thiab qhov no yuav cuam tshuam rau lawv tus yam ntxwv nyob rau hauv feem coob lub qhov muag, yog li ntawd lawv thiaj li hais lus los daws tus kheej thiab piav qhia txog qhov xwm txheej ntawd thaum sib txoos ua ke. Lawv lub hom phiaj ntawm qhov kev piav qhia ntawd yog kom tiv thaiv tsis pub tib neeg muaj kev xav tsis zoo txog lawv, yog li ntawd lawv thiaj li siv zog thiab xav ntau heev rau qhov no, ua tib zoo xav tas hnub hais tias: “Kuv yuav ua li cas thiaj li piav tau qhov xwm txheej no kom meej? Kuv yuav ua li cas thiaj li piav tau kom meej rau tus neeg ntawd? Kuv yuav ua li cas thiaj li hais tawm tsam tau tej kev xav tsis zoo uas lawv muaj txog kuv ntawd? Hnub no qhov kev sib txoos ua ke yog ib lub cib fim zoo los tham txog qhov no.” Thaum tuaj sib txoos ua ke, lawv hais tias, “Yam uas kuv tau ua zaum tas los ntawd tsis yog xav ua kom leej twg raug mob los sis nthuav leej twg tawm; kuv txoj kev npaj siab mas zoo, yog txhawm rau pab tib neeg xwb. Tiam sis, ib txhia tib neeg pheej to taub kuv yuam kev, pheej xav tsom ntsoov rau kuv, thiab pheej xav tias kuv yog neeg ntshaw thiab muaj lub siab xav ua loj, thiab tias kuv txoj kev ua neeg mas tsis zoo. Tiam sis qhov tseeb tiag kuv yeej tsis yog tus neeg zoo li ntawd kiag li, puas yog? Kuv tsis tau ua los sis hais tej yam zoo li ntawd. Thaum kuv hais txog ib tug neeg twg thaum lawv tsis nyob ntawd, qhov ntawd tsis yog tias kuv txhob txwm tsim teeb meem rau lawv. Thaum tib neeg ua tej yam phem lawm, yuav ua li cas lawv thiaj li tsis pub lwm tus tham txog qhov ntawd?” Lawv hais ntau heev, ob yam tib si yog hais lus los daws lawv tus kheej thiab tiv thaiv lawv tus kheej xwb, thiab tib lub sij hawm ntawd kuj nthuav tawm lwm tus ntawd tej teeb meem ntau heev thiab, txhua yam no yog txhawm rau muab lawv tus kheej cais tawm ntawm qhov xwm txheej ntawd, kom txhua tus ntseeg hais tias yam uas lawv nthuav tawm ntawd tsis yog ib tug moj yam qias vuab tsuab, thiab tias tsis yog lawv txoj kev ua neeg tsis zoo los sis tsis yog lawv tsis nyiam qhov tseeb, thiab haj yam tsis yog lawv muaj txoj kev npaj siab phem, tiam sis xav tias lawv yog tus uas muaj txoj kev npaj siab zoo xwb, tias lawv tej kev npaj siab zoo ntawd pheej raug to taub yuam kev tas li, thiab tias lawv pheej raug teem txim vim yog lwm tus tej kev to taub yuam kev. Txawm hais tawm ncaj qha thiab tsis hais ncaj qha los xij, lawv cov lus ua rau cov neeg mloog xav hais tias lawv tsis muaj txim, thiab tias cov neeg uas xav tias lawv ua tsis yog thiab ua tsis zoo ntawd yog cov tib neeg phem thiab cov uas tsis nyiam qhov tseeb. Tom qab hnov li no, lwm tus ntawd to taub hais tias: “Lub ntsiab lus ntawm koj cov lus tsis yog xav qhia hais tias koj tsis muaj ib tug moj yam qias vuab tsuab lod? Tsis yog tsuas xav ua kom koj tus kheej zoo saib xwb lod? Qhov no tsis yog qhov uas tsis paub koj tus kheej, tsis lees txais qhov tseeb, tsis lees txais qhov muaj tseeb lod? Yog koj tsis lees txais tej no los tsis ua cas, tiam sis vim li cas thiaj li tsom ntsoov rau kuv? Kuv tsis tau xav tsom ntsoov rau koj, thiab kuv kuj tsis xav tawm tsam koj thiab. Koj xav li cas los nyob ntawm koj xav xwb; qhov ntawd muaj feem xyuam dab tsi rau kuv?” Yog li ntawd lawv thiaj li thev tsis taus, thiab hais tias, “Thaum ib txhia tib neeg ntsib ib qho teeb meem me me, raug kev tsis ncaj ncees los sis kev mob me ntsis xwb, los lawv tsis kam lees txais qhov ntawd, thiab xav hais lus los daws tus kheej thiab piav qhia tus kheej; lawv pheej muab lawv tus kheej cais tawm ntawm qhov teeb meem ntawd, lawv pheej xav ua kom lawv tus kheej zoo saib, thiab qhuas lawv tus kheej. Lawv tsis yog hom neeg zoo li ntawd, yog li ntawd vim li cas lawv thiaj li ua kom lawv tus kheej zoo saib, ua kom lawv tus kheej zoo tag nrho? Tsis tas li ntawd, kuv sib qhia qhov tseeb, kuv tsis tsom ntsoov rau leej twg, thiab kuv kuj tsis xav tawm tsam los sis ua pauj rov qab rau leej twg thiab. Cia tib neeg xav li lawv xav xwb!” Ob tug neeg no puas yog tab tom sib qhia qhov tseeb? (Tsis yog.) Yog li, nkawd tab tom ua dab tsi? Ib tog hais tias, “Kuv ua tej yam ntawd yog txhawm rau pawg ntseeg tes hauj lwm xwb. Kuv tsis quav ntsej tias koj xav li cas.” Lwm tus hais tias, “Thaum tib neeg ua, Lub Ntuj yeej saib ntsoov. Vajtswv paub tib neeg tej kev xav. Tsis txhob xav tias tsuas yog vim koj muaj lub siab zoo me ntsis, muaj peev xwm, txawj hais lus, thiab koj tsis ua tej yam phem es Vajtswv yuav tsis tshawb xyuas koj kom meej; tsis txhob xav tias koj muab koj tej kev xav zais tob tob es Vajtswv yuav tsis pom tej ntawd. Cov kwv tij thiab cov muam txhua tus puav leej pom tej ntawd—tsis tas yuav hais txog Vajtswv li! Koj tsis paub hais tias Vajtswv tshawb xyuas kom meej txog qhov tob tshaj plaws ntawm tib neeg lub siab no lod?” Nkawd ob leeg tab tom sib cav txog dab tsi? Ib tog tab tom siv zog ntsos los hais lus daws tus kheej, ua kom dim qhov txhaum, tsis xav kom lwm tus muaj kev xav tsis zoo txog lawv, hos lwm tog tsis kam tso tseg, tsis pub tus neeg ntawd ua kom lawv tus kheej zoo saib, thiab tib lub sij hawm ntawd kuj tsom ntsoov nthuav tawm thiab teem txim rau lawv los ntawm kev cem. Saib sab nraud mas, nkawd ob leeg tsis tau sib cem ncaj qha los sis sib nthuav tawm ncaj qha, tiam sis nkawd cov lus mas muaj hom phiaj: Ib tog tiv thaiv kom lwm tus txhob to taub yuam kev txog lawv, thiab hais kom lwm tus ntxuav lawv lub npe, hos lwm tog mas tsis kam ua li ntawd, tiam sis ho muab lawv tis npe phem thiab teem txim rau lawv, hais kom lawv lees paub. Qhov kev sib tham no puas yog ib qho kev sib qhia qhov tseeb li ib txwm muaj? (Tsis yog.) Qhov ntawd puas yog ib qho kev sib tham uas ua raws li lub siab txawj xav thiab laj thawj? (Tsis yog.) Yog li ntawd lub ntsiab xeeb txawm ntawm hom kev sib tham no yog dab tsi? Hom kev sib tham no puas yog kev sib tawm tsam? (Yog.) Tus uas hais daws tus kheej ntawd puas yog tab tom sib qhia txog qhov lawv lees txais tej yam los ntawm Vajtswv los thiab paub txog lawv tus kheej li cas, thiab nrhiav tau tej hauv paus ntsiab lus uas tsim nyog muab coj los xyaum ua raws? Tsis yog, lawv tab tom hais daws lawv tus kheej rau lwm tus tib neeg. Lawv xav piav qhia lawv tej kev xav, tej kev xam pom, tej kev npaj siab, thiab lub hom phiaj rau lwm tus, los piav qhia lawv tus kheej rau lwm tog, thiab kom lwm tog ntxuav lawv lub npe. Tsis tas li ntawd, lawv xav tsis lees paub qhov uas lwm tog nthuav tawm thiab teem txim rau lawv, thiab txawm yam uas lwm tus hais ntawd puas mus raws li qhov muaj tseeb los sis qhov tseeb los xij, tsuav lawv tsis lees paub, los sis tsis kam lees txais qhov ntawd xwb, ces lawv xav tias yam uas lwm tus hais ntawd mas tsis yog lawm, thiab lawv xav kho qhov ntawd kom yog. Hos lwm tog tsis xav ntxuav lawv lub npe tiam sis ho muab lawv nthuav tawm, yuam kom lawv lees txais qhov uas teem txim rau lawv ntawd. Ib tog tsis kam lees txais, thiab lwm tog yuam kom lawv lees txais, ua rau nkawd muaj kev tawm tsam. Lub ntsiab xeeb txawm ntawm hom kev sib tham no yog kev sib tawm tsam. Yog li, lub ntsiab xeeb txawm ntawm hom kev sib tawm tsam no yog dab tsi? Qhov kev sib tham no puas yog kev tsis sib lees paub, kev sib yws, thiab kev sib teem txim? (Yog.) Hom kev sib tham no puas yog tshwm sim nyob rau hauv lub neej hauv pawg ntseeg thiab? (Yog.) Hom kev sib tham zoo li no puav leej yog kev sib cav sib ceg.

Vim li cas thiaj li hu cov kev sib tham zoo li no tias yog kev sib cav sib ceg? (Qhov ntawd yog vim cov tib neeg uas muaj feem xyuam ntawd tab tom sib cav txog qhov yog thiab qhov tsis yog, tsis muaj leej twg paub lawv tus kheej, thiab tsis muaj leej twg tau txais ib yam dab tsi li; lawv tsuas pheej tsom ntsoov rau qhov teeb meem ntawd xwb, thiab cov kev sib tham ntawd tsis muaj qab hau dab tsi li.) Lawv tsuas hais lus ntau ntau thiab nkim pa ntau heev los sib cav txog tias leej twg yog leej twg tsis yog, leej twg siab dua leej twg qis dua. Lawv sib cav tsis tseg yam tsis muaj tus yeej li, ces tom qab ntawd lawv tseem sib cav mus ntxiv. Thaum kawg lawv tau txais dab tsi los ntawm qhov no? Puas yog to taub qhov tseeb, to taub Vajtswv tej kev npaj siab lawm? Puas yog muaj peev xwm lees txim hloov dua siab tshiab thiab lees txais Vajtswv txoj kev tshawb xyuas kom meej lawm? Puas yog muaj peev xwm lees txais tej yam los ntawm Vajtswv los thiab paub txog lawv tus kheej ntxiv lawm? Lawv tsis tau tej no ib yam kiag li. Cov kev sib cav uas tsis muaj qab hau no thiab cov kev sib tham txog qhov yog thiab qhov tsis yog no yog kev sib cav sib ceg. Muab hais yooj yim tias, kev sib cav sib ceg yog cov kev sib tham uas tsis muaj qab hau kiag li, txhua yam uas lawv hais tawm ntawd puav leej yog cov lus tsis muaj qab hau, tsis muaj ib lo lus twg uas txhawb los sis muaj txiaj ntsim rau lwm tus li, tiam sis, cov lus uas hais tawm ntawd puav leej ua rau tib neeg raug mob, thiab tshwm sim los ntawm tib neeg lub siab nyiam, kev siab kub, tib neeg lub hlwb xav, thiab tseeb tiag lawm, haj yam tshwm sim los ntawm tib neeg tej moj yam qias vuab tsuab. Txhua lo lus uas hais tawm los ntawd yog txhawm rau tib neeg tus kheej tej txiaj ntsim, tus kheej lub ntsej muag thiab lub suab npe, tsis yog txhawm rau txhawb los sis pab rau lwm tus, tsis yog kom tus kheej to taub txog qee sab ntawm qhov tseeb los sis kom to taub Vajtswv tej kev npaj siab, thiab muaj tseeb tias tsis yog los sib tham txog tias Vajtswv cov lus nthuav tawm yus tus kheej tej moj yam qias vuab tsuab twg, seb tej moj yam qias vuab tsuab puas haum nrog Vajtswv cov lus, los sis seb yus tus kheej txoj kev to taub puas yog. Txawm cov kev hais lus los daws tus kheej thiab kev piav qhia uas tsis muaj qab hau no yuav zoo mloog, siab dawb paug, los sis muaj kev hwm npaum li cas los xij, tej no puav leej yog kev sib cav sib ceg thiab kev sib tawm tsam thiab kev txiav txim, uas tsis muaj txiaj ntsim rau lwm tus los sis rau yus tus kheej li. Tej no tsis yog tsuas ua rau lwm tus raug mob thiab cuam tshuam rau yus tus kheej txoj kev sib raug zoo nrog lwm tus li ib txwm muaj xwb, kuj tab kaum yus tus kheej txoj kev loj hlob ntawm lub neej txoj sia thiab. Muab hais kom luv luv tias, txawm yuav muaj kev hais ub hais no, kev npaj siab, tus cwj pwm, lub suab hais lus, los sis siv tej hau kev thiab tswv yim dab tsi los xij, tsuav yog muaj kev txiav txim thiab teem txim rau lwm tus raws siab nyiam xwb, ces tej lus, tej hau kev, thiab lwm yam no puav leej nyob rau hauv hom kev sib tawm tsam, tej no puav leej yog kev sib cav sib ceg. Qhov ciaj ciam no puas dav? (Dav kawg.) Yog li, thaum nej ntsib tib neeg tej kev tawm tsam, kev txiav txim, thiab kev teem txim, nej puas muaj peev xwm zam tsis txhob ua tej kev ua uas tawm tsam thiab teem txim rau lwm tus? Thaum nej ntsib tej xwm txheej zoo li no, nej tsim nyog xyaum ua raws li cas? (Peb yuav tsum nyob tau ntsiag to rau ntawm Vajtswv lub xub ntiag los ntawm kev thov Vajtswv, ces nyob hauv peb lub siab thiaj li tsis muaj kev ntxub ntxaug ntxiv lawm.) Tsuav yog ib tug neeg muaj kev to taub thiab muaj laj thawj, tsuav lawv nyob tau ntsiag to rau ntawm Vajtswv lub xub ntiag thiab thov Nws, thiab lees txais qhov tseeb xwb, ces lawv yeej tswj tau lawv tej kev npaj siab thiab tej kev ntshaw, thiab tom qab ntawd lawv tuaj yeem mus txog rau theem uas tsis txiav txim los sis tawm tsam lwm tus lawm. Tsuav yog ib tug neeg twg txoj kev npaj siab thiab lub hom phiaj tsis yog los tso lawv txoj kev chim siab tawm los sis nrhiav kev ua pauj rov qab, thiab muaj tseeb tias tsis yog xav los tawm tsam lwm tus ntawd, tiam sis lawv ho ua rau lwm tus ntawd raug mob yam tsis yog txhob txwm vim lawv tsis to taub qhov tseeb los sis to taub qhov tseeb ntiav dhau, thiab vim lawv ruam me ntsis thiab tsis paub dab tsi los sis ua raws siab nyiam xwb, ces los ntawm kev pab, kev txhawb, thiab kev sib qhia los ntawm lwm tus, tom qab to taub qhov tseeb lawm, lawv cov lus yuav yog dua ntxiv, lawv tej kev ntsuas thiab tej kev pom txog lwm tus los kuj yuav raug dua ntxiv thiab, thiab lawv yuav muaj peev xwm coj tau yog rau cov moj yam qias vuab tsuab uas lwm tus tib neeg nthuav tawm thiab lawv tej kev ua uas yuam kev ntawd, yog li ntawd thiaj li maj mam txo tsawg lawv tej kev tawm tsam thiab kev txiav txim rau lwm tus lawm. Txawm li cas los xij, yog ib tug neeg pheej ua neej nyob hauv lawv cov moj yam qias vuab tsuab, nrhiav cib fim los ua pauj rov qab rau leej twg uas lawv pom tias tsis khuab qhov muag los sis tau ua txhaum los sis ua rau lawv raug mob yav tas los, lawv pheej muaj tej kev npaj siab zoo li no, thiab tsis nrhiav qhov tseeb los sis thov Vajtswv los sis vam khom rau Vajtswv ib qho me me li, ces lawv muaj peev xwm tawm tsam lwm tus tau txhua lub sij hawm thiab txhua qhov chaw, thiab qhov no mas nyuaj daws heev. Qhov kev tawm tsam lwm tus yam tsis yog txhob txwm ntawd mas yooj yim daws, tiam sis qhov txhob txwm thiab npaj siab tawm tsam ntawd mas tsis yooj yim daws. Yog ib tug neeg tawm tsam thiab txiav txim rau lwm tus qee zaus yam tsis yog txhob txwm, los ntawm qhov uas lwm tus sib qhia qhov tseeb los txhawb thiab pab lawv, lawv yuav muaj peev xwm hloov tau thaum lawv to taub qhov tseeb lawm. Txawm li cas los xij, yog ib tug neeg twg pheej nrhiav kev ua pauj rov qab thiab tso lawv txoj kev chim siab tawm tas li, pheej xav tsim txom los sis rhuav lwm tus, thiab lawv muaj tej kev npaj siab zoo li no los tawm tsam lwm tus, txhua tus tib neeg puav leej hnov thiab pom tau, ces txoj kev coj zoo li no dhau los ua ib qho kev tab kaum thiab kev cuam tshuam rau lub neej hauv pawg ntseeg lawm; qhov ntawd yeej yog ib qho kev txhob txwm tab kaum thiab cuam tshuam ntag. Yog li ntawd, qhov muaj tus moj yam uas tawm tsam lwm tus no mas hloov nyuaj heev.

Tam sim no, nej puas to taub tias yuav daws qhov teeb meem uas tawm tsam thiab teem txim rau lwm tus ntawd li cas lawm? Tsuas muaj ib txoj kev xwb—yuav tsum thov Vajtswv thiab vam khom Vajtswv, ces txoj kev ntxub ntxaug thiaj li maj mam ploj mus. Tseem ceeb mas muaj ob hom neeg uas tuaj yeem tawm tsam lwm tus. Ib hom yog cov uas hais lus yam tsis xav, cov uas hais ncaj qha thiab hais tawm plaws, thiab cov uas tej zaum yuav hais qee yam lus mob tib neeg thaum twg lawv pom tias ib tug twg tsis khuab qhov muag. Txawm li cas los xij feem ntau, lawv tsis yog txhob txwm los sis npaj siab tawm tsam tib neeg—lawv tswj tsis tau lawv tus kheej, qhov no ces yog lawv tus moj yam xwb, thiab lawv cia li tsim kev tawm tsam rau lwm tus tib neeg yam tsis paub. Yog lawv raug ntuas, lawv kuj lees txais tau thiab, yog li ntawd cov no tsis yog cov tib neeg phem, thiab lawv tsis yog cov uas yuav raug tshem tawm mus. Tiam sis cov tib neeg phem tsis kam lees txais kev raug ntuas, thiab lawv pheej ua rau muaj tej kev tab kaum thiab kev cuam tshuam rau lub neej hauv pawg ntseeg tas li, lawv pheej tawm tsam, txiav txim, ntaus, thiab ua pauj rov qab rau lwm tus, thiab yeej tsis lees txais qhov tseeb kiag li. Lawv yog cov tib neeg phem, thiab lawv yog cov uas pawg ntseeg yuav tsum tau daws thiab tshem tawm mus. Vim li cas thiaj li yuav tsum tau daws lawv thiab tshem lawv tawm? Saib raws li lawv tus yam ntxwv xeeb txawm lub ntsiab tseeb mas, lawv txoj kev coj uas tawm tsam lwm tus ntawd tsis yog tias tsis txhob txwm, tiam sis yog txhob txwm kiag. Qhov no yog vim cov tib neeg no muaj txoj kev ua neeg uas lim hiam—tsis muaj leej twg tuaj yeem ua txhaum rau lawv los sis thuam lawv tau, thiab yog muaj leej twg tsis ceev faj hais ib yam dab tsi uas ua rau lawv raug mob me ntsis lawm, lawv yuav xav txog qhov nrhiav cib fim los ua pauj rov qab—yog li ntawd, cov tib neeg zoo li no thiaj li muaj peev xwm tsim kev tawm tsam rau lwm tus. Qhov no yog ib hom neeg uas pawg ntseeg yuav tsum tau daws thiab tshem tawm mus. Txhua tus uas koom kev sib tawm tsam thiab kev sib cav sib ceg—tsis hais lawv yog sab twg los xij, txawm lawv yog tus pib tawm tsam los sis raug tawm tsam los xij—tsuav lawv koom nrog cov kev tawm tsam zoo li no xwb, lawv yog ib tug tib neeg phem uas muaj tej kev npaj siab phem, uas yuav tsim txom lwm tus thaum tsis haum siab me ntsis xwb. Cov tib neeg zoo li no ua rau muaj tej kev tab kaum thiab kev cuam tshuam hnyav heev rau lub neej hauv pawg ntseeg. Lawv yog ib hom tib neeg phem uas nyob hauv pawg ntseeg. Cov xwm txheej uas tsis tshua hnyav ces tuaj yeem daws tau los ntawm kev cais tus neeg ntawd tawm kom lawv thim xav; nyob rau hauv cov xwm txheej uas hnyav, ces tus neeg ntawd yuav tsum raug ntsaig tawm mus los sis raug ntiab tawm mus. Qhov no yog lub hauv paus ntsiab lus uas cov thawj coj thiab cov neeg ua hauj lwm yuav tsum to taub thaum hais txog kev daws qhov teeb meem no.

Los ntawm qhov kev sib qhia no, tam sim no nej puas to taub tias qhov kev tawm tsam lwm tus ntawd txhais li cas? Nej puas paub cais qhov ntawd? Tom qab Kuv tshab txhais tias kev tawm tsam yog dab tsi lawm, ib txhia tib neeg xav tias, “Yog tshab txhais qhov kev tawm tsam lwm tus dav npaum li no, yav tom ntej leej twg thiaj li kam hais lus? Peb cov tib neeg no tsis muaj leej twg to taub qhov tseeb, yog li ntawd qhov qhib qhov ncauj xwb los yuav ua rau peb tawm tsam lwm tus lawm, qhov no mas phem heev! Yav tom ntej, peb tsuas tsim nyog noj mov thiab haus dej thiab nyob ntsiag to xwb, kaw peb lub qhov ncauj thiab tsis txhob hais lus dog dig txij thaum peb sawv ntxov los kom thiaj li zam tau qhov tawm tsam lwm tus. Qhov ntawd yuav zoo heev, thiab peb lub neej yuav muaj kev thaj yeeb nyab xeeb dua.” Qhov kev xav li no puas yog? Kev kaw qhov ncauj daws tsis tau qhov teeb meem; lub ntsiab tseeb ntawm qhov teeb meem uas tawm tsam lwm tus ntawd yog ib qho teeb meem nyob hauv lub siab, qhov ntawd tshwm sim los ntawm tib neeg tej moj yam qias vuab tsuab, thiab tsis yog ib qho teeb meem ntawm tib neeg lub qhov ncauj. Yam uas tib neeg lub qhov ncauj hais tawm ntawd yog raug tswj los ntawm lawv tej moj yam qias vuab tsuab thiab lawv tej kev xav. Yog ib tug neeg tej moj yam qias vuab tsuab raug daws lawm, thiab lawv to taub qee qhov tseeb tiag tiag, thiab lawv cov lus kuj muaj hauv paus ntsiab lus thiab paub qhov tsim nyog me ntsis lawm, ces qhov teeb meem uas lawv tawm tsam lwm tus ntawd yuav raug daws ib feem lawm. Muaj tseeb tias, nyob rau hauv lub neej hauv pawg ntseeg, yuav kom tib neeg muaj txoj kev sib raug zoo nrog lwm tus li ib txwm muaj, thiab tsis koom kev sib tawm tsam thiab kev sib cav sib ceg, lawv yuav tsum los thov Vajtswv rau ntawm Vajtswv lub xub ntiag tas li, thov Vajtswv txoj kev coj, thiab kom lawv los nyob ntsiag to rau ntawm Vajtswv lub xub ntiag los ntawm lub siab hwm uas tshaib thiab nqhis txoj kev ncaj ncees. Ua li ntawd, thaum muaj neeg hais ib yam dab tsi uas ua rau koj raug mob yam tsis yog txhob txwm, koj lub siab yuav nyob ntsiag to tau rau ntawm Vajtswv lub xub ntiag, koj yuav tsis khaws rau hauv siab, thiab koj yuav tsis xav nrog tus neeg ntawd sib cav, thiab haj yam tsis xav tiv thaiv thiab hais lus los daws koj tus kheej. Tiam sis, koj yuav lees txais qhov ntawd los ntawm Vajtswv los, ua Vajtswv tsaug uas muab ib lub cib fim zoo rau koj los paub koj tus kheej, thiab ua Nws tsaug uas Nws pub rau koj paub tias koj tseem muaj qhov teeb meem zoo li no los ntawm lwm tus cov lus. Qhov no yog ib lub cib fim zoo rau koj los paub koj tus kheej, qhov ntawd yog Vajtswv txoj hmoov hlub, thiab koj yuav tsum lees txais qhov ntawd los ntawm Vajtswv los. Koj yuav tsum tsis txhob khaws kev chim siab rau tus neeg uas ua rau koj raug mob, thiab tsis txhob hnov tsis nyiam kiag li thiab ntxub tus neeg uas tsis tau txhob txwm hais txog koj tej qhov tsis zoo los sis nthuav tawm koj tej kev muaj tsis txaus, txawm yog txhob txwm los sis tsis txhob txwm zam lawv los sis siv txhua txoj kev los ua pauj rov qab rau lawv. Tej kev no yeej tsis ua rau Vajtswv txaus siab li. Pheej los rau ntawm Vajtswv lub xub ntiag thov Vajtswv, thiab tom qab koj lub siab nyob ntsiag to lawm, koj yuav muaj peev xwm coj tau yog thaum lwm tus ua rau koj raug mob yam tsis txhob txwm, koj yuav muaj peev xwm ua siab ntev thiab thev taus lawv. Yog muaj neeg txhob txwm ua rau koj raug mob, koj yuav tsum ua li cas? Koj yuav coj li cas rau qhov ntawd—koj puas yuav nrog lawv sib cav los ntawm kev siab kub, los sis koj puas yuav nyob ntsiag to rau ntawm Vajtswv lub xub ntiag thiab nrhiav qhov tseeb? Muaj tseeb tias, tsis tas Kuv hais, nej txhua tus yeej paub meej tias txoj kev nkag mus twg thiaj li yog txoj kev xaiv uas yog.

Nyob rau hauv lub neej hauv pawg ntseeg qhov uas zam kom tsis txhob muaj kev sib tawm tsam thiab kev sib cav sib ceg los ntawm kev vam khom rau tib neeg lub zog, tib neeg txoj kev tswj tus kheej, thiab tib neeg txoj kev ua siab ntev ntawd mas nyuaj heev. Txawm koj txoj kev ua neeg yuav zoo npaum li cas, koj yuav mos muag thiab ua siab zoo npaum li cas, los sis muaj lub siab dav npaum li cas los xij, qhov ntawd yeej zam tsis tau qhov uas koj yuav ntsib qee tus tib neeg los sis tej yam uas ua rau koj lub meej mom, koj txoj kev coj ncaj, thiab lwm yam raug mob. Koj yuav tsum muaj ib lub hauv paus ntsiab lus hauv koj lub siab txog qhov uas yuav daws thiab coj li cas rau cov teeb meem zoo li no. Yog koj yuav daws cov teeb meem no nrog kev siab kub, qhov ntawd yooj yim heev: Lawv cem koj, thiab koj cem lawv, lawv tawm tsam koj, thiab koj tawm tsam lawv, muab hniav pauj hniav, muab qhov muag pauj qhov muag, muab txhua yam uas lawv ua rau koj ntawd pauj rov qab rau lawv los ntawm kev siv tej hau kev tib yam nkaus, thiab koj tiv thaiv koj lub meej mom, kev coj ncaj, thiab lub ntsej muag. Qhov no mas yooj yim ua tau heev. Txawm li cas los xij, koj yuav tsum ua tib zoo luj hauv koj lub siab seb txoj kev no puas tsim nyog, seb puas muaj txiaj ntsim rau koj thiab lwm tus, thiab seb puas ua rau Vajtswv txaus siab. Feem ntau, thaum tib neeg tsis tau xav txog lub ntsiab tseeb ntawm qhov teeb meem no, lawv tej kev xav tam sim ntawd yog, “Nws tsis hlub tshua kuv, yog li ntawd vim li cas kuv thiaj li yuav tsum hlub tshua nws? Nws tsis muaj lub siab hlub rau kuv, yog li ntawd vim li cas kuv thiaj li yuav tsum coj rau nws nrog lub siab hlub? Nws tsis ua siab ntev rau kuv thiab tsis pab kuv, yog li ntawd vim li cas kuv thiaj li yuav tsum ua siab ntev rau nws los sis pab nws? Nws ua tsis zoo rau kuv, yog li ntawd kuv yuav ua tsis zoo rau nws thiab. Vim li cas kuv thiaj li muab hniav pauj hniav, muab qhov muag pauj qhov muag tsis tau?” Cov no yog thawj cov kev xav uas tshwm sim hauv tib neeg lub hlwb. Tiam sis thaum koj ua li ntawd tiag tiag, koj xav tias yuav muaj kev thaj yeeb nyab xeeb hauv nruab siab los sis tsis kaj siab thiab mob siab? Thaum koj xaiv qhov no tiag tiag, koj tau txais dab tsi? Koj tau txais dab tsi? Ntau tus tib neeg tau paub txog tias thaum lawv ua li no tiag tiag, lawv hnov tsis kaj siab nyob hauv lawv nruab siab. Muaj tseeb tiag, rau tib neeg feem coob mas, tsis yog ib qho teeb meem ntawm lub siab txawj xav uas tsis kaj li, thiab haj yam tsis yog qhov tsis kaj siab uas tshwm sim los ntawm ib txoj kev xav tias lawv tshuav Vajtswv nqi; tib neeg tsis muaj lub siab ntseeg zoo li ntawd. Dab tsi ua rau muaj qhov kev tsis kaj siab no hauv lawv? Qhov ntawd tshwm sim los ntawm tib neeg txoj kev ntxub ntxaug, qhov kev tawm tsam rau lawv lub meej mom thiab kev coj ncaj thaum lawv raug thuam, nrog rau qhov uas lawv hnov mob thiab cov kev npau taws, kev ntxub, kev tawm tsam, thiab kev chim siab uas tshwm sim nyob hauv lawv lub siab tom qab raug hais lus thab, uas txhua yam no ua rau tib neeg xav tias tsis kaj siab. Qhov tshwm sim los ntawm qhov kev tsis kaj siab no yog dab tsi? Tam sim ntawd tom qab xav li ntawd, koj yuav pib xav txog tias yuav siv cov lus li cas los daws tus neeg ntawd, yuav siv li cas kom mus raws li kev cai lij choj thiab tsim nyog los ntaus lawv kom vau, los qhia rau lawv tias koj muaj lub meej mom thiab kev coj ncaj thiab tsis yooj yim thab. Thaum koj hnov tsis kaj siab, thaum koj tsim kev ntxub ntxaug, yam uas koj xav txog tsis yog qhov kev ua siab ntev thiab kev thev taus rau tus neeg ntawd, los sis coj rau lawv kom yog, los sis lwm yam zoo no, tiam sis yog txhua yam tsis zoo, xws li kev khib, kev tsis nyiam kiag li, kev dhuav, kev ntxub ntxaug, kev ntxub, thiab kev teem txim, mus txog rau theem uas koj foom phem rau lawv ntau zaus hauv koj lub siab, thiab, tsis hais lub sij hawm twg—txawm yog thaum koj tab tom noj mov los sis pw tsaug zog—koj xav txog tias yuav ua pauj rau lawv li cas, thiab xav txog tias koj yuav ua li cas rau lawv thiab yuav daws cov xwm txheej zoo li ntawd li cas yog tias lawv tawm tsam los sis teem txim rau koj, thiab lwm yam. Koj siv sij hawm tas hnub los xav txog tias yuav rhuav lwm tus li cas, yuav tso koj txoj kev chim siab thiab kev ntxub ntxaug tawm li cas, thiab ua rau lwm tus zwm rau koj thiab ntshai koj, thiab tsis kam thab koj ntxiv lawm. Koj kuj pheej xav txog tias yuav muab ib qho kev qhia rau lwm tus li cas, kom lawv paub tias koj tshaj lij npaum li cas. Thaum cov kev xav zoo li no tshwm tuaj, thiab thaum cov duab uas xav hauv nruab siab tshwm tuaj ntau zaus hauv koj lub hlwb, qhov kev cuam tshuam thiab qhov tshwm sim los uas tej ntawd ua rau koj ntawd mas ntsuas tsis tau li. Thaum koj poob rau hauv qhov xwm txheej uas sib cav sib ceg thiab sib tawm tsam lawm, qhov tshwm sim los yog dab tsi? Thaum ntawd puas yooj yim nyob ntsiag to rau ntawm Vajtswv lub xub ntiag lawm? Qhov ntawd tsis yog tab kaum koj txoj kev nkag mus rau hauv lub neej txoj sia lod? (Yog.) Qhov no yog qhov cuam tshuam rau ib tug neeg uas xaiv txoj kev tsis yog los daws. Yog koj xaiv txoj kev yog, thaum ib tug neeg twg hais lus es ua rau rhuav koj tus yam ntxwv los sis koj lub ntsej muag, los sis thuam koj txoj kev coj ncaj thiab lub meej mom, koj tuaj yeem xaiv los thev taus. Koj yuav tsis sib cav nrog lawv los ntawm kev siv cov lus twg li los sis txhob txwm hais lus los daws koj tus kheej thiab hais lus tawm tsam thiab tawm tsam lwm tus, uas ua rau muaj kev ntxub nyob hauv koj tus kheej. Lub ntsiab tseeb thiab qhov tseem ceeb ntawm kev thev taus yog dab tsi? Koj hais tias, “Qee yam uas nws hais tsis mus raws li qhov muaj tseeb, tiam sis txhua tus yeej yog li ntawd ua ntej to taub qhov tseeb thiab tau txais kev cawm dim, thiab yav tas los kuv kuj zoo ib yam nkaus li no thiab. Tam sim no kuv to taub qhov tseeb lawm, kuv tsis taug cov ib txwm tsis ntseeg txoj kev uas sib cav txog qhov yog thiab qhov tsis yog los sis koom nrog lub tswv yim ntawm kev sib ntaus—kuv xaiv kev thev taus thiab coj rau lwm tus nrog lub siab hlub. Qee yam uas nws hais tsis mus raws li qhov muaj tseeb, tiam sis kuv tsis quav ntsej txog tej ntawd. Kuv lees txais yam uas kuv tuaj yeem paub tau thiab nkag siab. Kuv lees txais qhov ntawd los ntawm Vajtswv los thiab nqa qhov ntawd los rau ntawm Vajtswv lub xub ntiag hauv kev thov Vajtswv, thov kom Nws npaj tej xwm txheej los nthuav tawm kuv tej moj yam qias vuab tsuab, kom kuv paub lub ntsiab tseeb ntawm tej moj yam qias vuab tsuab no thiab muaj cib fim pib daws tej teeb meem no, maj mam kov yeej tej teeb meem, thiab nkag mus rau hauv qhov tseeb qhov muaj tiag. Hos hais txog tias leej twg hais lus ua rau kuv raug mob thiab seb tej yam uas lawv hais ntawd puas yog los sis tsis yog, los sis lawv tej kev npaj siab yog dab tsi, nyob rau ib kis, kuv xyaum kev paub cais txog qhov ntawd, thiab nyob rau lwm kis, kuv thev taus lawv.” Yog tus neeg no yog ib tug neeg uas lees txais qhov tseeb, koj tuaj yeem zaum thiab sib qhia nrog lawv yam siab tus. Yog lawv tsis yog ib tug neeg uas lees txais qhov tseeb, yog lawv yog ib tug tib neeg phem, ces tsis txhob quav ntsej txog lawv. Tos kom txog thaum lawv ua txaus lawm, thiab txhua tus kwv tij thiab nkauj muam paub cais lawv kom tshab, thiab koj kuj paub cais tshab lawm thiab, thiab cov thawj coj thiab cov neeg ua hauj lwm tab tom yuav ntsaig lawv tawm mus thiab daws lawv—qhov ntawd yog thaum lub sij hawm Vajtswv daws lawv los txog lawm, thiab muaj tseeb tiag, koj kuj yuav dhia zoo siab hauv koj lub siab thiab. Txawm li cas los xij, txoj kev uas koj xaiv yuav tsum tsis yog los nrog cov tib neeg phem sib cav sib ceg los sis los sib cav nrog lawv thiab hais lus los daws koj tus kheej kiag li. Tiam sis, yog los xyaum ua raws li qhov tseeb tej hauv paus ntsiab lus thaum twg uas muaj dab tsi tshwm sim. Tsis hais yog kev coj rau cov neeg uas tau ua rau koj raug mob los sis cov uas tsis tau ua thiab muaj txiaj ntsim rau koj, tej hauv paus ntsiab lus ntawm txoj kev xyaum ua raws ntawd tsim nyog zoo ib yam. Thaum koj xaiv txoj kev no, puas yuav muaj kev ntxub ntxaug nyob hauv koj lub siab? Tej zaum yuav muaj kev tsis xis nyob me ntsis. Leej twg yuav tsis hnov tias tsis xis nyob thaum lawv lub meej mom raug rhuav? Yog muaj neeg hais tias tsis hnov tsis xis nyob, qhov ntawd yuav yog lus dag, yog kev dag ntxias xwb, tiam sis koj tuaj yeem ua siab ntev thiab tiv qhov kev txom nyem no txhawm rau xyaum ua raws qhov tseeb. Thaum koj xaiv txoj kev no, koj yuav tsis hnov txhaum hauv koj lub siab thaum koj rov qab los rau ntawm Vajtswv lub xub ntiag dua. Vim li cas koj thiaj li tsis hnov txhaum hauv koj lub siab? Vim koj paub meej tias koj cov lus tsis yog tshwm los ntawm kev siab kub, tias koj tsis tau sib cav nrog lwm tus kom txog thaum koj lub ntsej muag liab ploog rau koj tus kheej tej kev ntshaw, thiab tias, raws li lub hauv paus ntawm kev to taub qhov tseeb, koj ho ua raws Vajtswv txoj kev thiab taug koj tus kheej txoj kev. Koj paub meej meej hauv koj lub siab tias txoj kev uas koj tau xaiv yog raug coj los ntawm Vajtswv, yog Vajtswv txoj kev cheem tsum, yog li ntawd koj yuav hnov muaj kev thaj yeeb nyab xeeb nyob hauv nruab siab. Thaum koj muaj qhov kev thaj yeeb nyab xeeb zoo li no lawm, kev ntxub ntxaug thiab kev chim siab ntawm koj thiab lwm tus puas yuav cuam tshuam koj lawm? (Tsis cuam tshuam lawm.) Thaum koj tso tseg tiag tiag thiab txaus siab hlo xaiv txoj kev zoo, koj lub siab yuav nyob ntsiag to thiab thaj yeeb nyab xeeb. Koj yuav tsis raug cuam tshuam los ntawm kev chim siab, kev ntxub ntxaug, thiab kev xav ua pauj rov qab thiab cov tswv yim uas tshwm sim los ntawm kev ntxub ntxaug ntawd, nrog rau lwm yam uas yog kev siab kub. Txoj kev uas koj xaiv yuav coj kev thaj yeeb nyab xeeb thiab lub siab nyob ntsiag to rau koj, thiab tej yam uas yog kev siab kub ntawd yuav tsis muaj peev xwm cuam tshuam koj ntxiv lawm. Thaum tej ntawd cuam tshuam tsis tau koj ntxiv lawm, koj puas tseem yuav xav txog cov hau kev los tawm tsam cov uas hais lus ua rau koj raug mob ntawd los sis nrog lawv sib cav sib ceg? Koj yuav tsis xav txog lawm. Muaj tseeb tiag, qee zaus vim koj lub siab ntseeg me los sis vim qee qhov xwm txheej tshwj xeeb, es yuav ua rau txhawb koj txoj kev siab kub, kev ua yam tsis xav, thiab kev chim siab sawv los. Txawm li cas los xij, koj txoj kev txiav txim siab, kev npaj siab, thiab lub siab xav xyaum ua raws qhov tseeb yuav tiv thaiv tsis pub tej no cuam tshuam koj lub siab. Qhov ntawd yog, tej no cuam tshuam tsis tau koj lawm. Tej zaum koj tseem yuav muaj kev siab kub tawm los, xws li xav tias, “Nws pheej ua rau kuv nyuaj tas li xwb. Muaj ib hnub kuv yuav tsum nrog nws tham, thiab nug nws tias vim li cas nws thiaj li pheej tsom ntsoov rau kuv thiab pheej ua rau kuv nyuaj tas li. Kuv yuav tsum nug nws tias vim li cas nws thiaj li pheej saib tsis taus kuv thiab thuam kuv.” Qee zaus koj yuav muaj cov kev xav zoo li no. Txawm li cas los xij, tom qab xav ntxiv lawm, koj yuav paub tias tej ntawd tsis yog, thiab tias kev ua li ntawd yuav ua rau Vajtswv tsis nyiam. Thaum cov kev xav zoo li no tshwm sim tuaj, koj yuav rov qab los rau ntawm Vajtswv lub xub ntiag sai sai los hloov tus yam ntxwv no, yog li ntawd cov kev xav uas yuam kev no yuav tsis tswj koj lawm. Vim li ntawd, qee yam zoo yuav pib tshwm sim tuaj hauv koj—xws li kev paub koj tus kheej, nrog rau qee qhov kev qhia thiab kev paub tseeb uas Vajtswv muab rau koj, uas yuav ua rau koj muaj peev xwm paub cais tib neeg thiab pom tshab tej xwm txheej—thiab, tej yam zoo no yuav ua rau koj to taub thiab nkag mus rau hauv qhov tseeb qhov muaj tiag ntau ntxiv yam tsis paub. Thaum txog theem no lawm, koj lub zog tiv thaiv, qhov ntawd yog, cov “tshuaj tiv thaiv lub cev” uas tiv thaiv kev ntxub, kev ntshaw ntawm tus kheej, thiab kev siab kub, yuav muaj zog zuj zus tuaj, thiab koj lub siab ntseeg yuav loj zuj zus. Tej yam uas yog kev siab kub ntawd yuav tswj tsis tau koj ntxiv lawm. Txawm qee zaus koj yuav muaj qee cov tswv yim, kev xav, thiab kev ua yam tsis xav uas tsis yog los xij, tej no yuav ploj mus sai sai, tej ntawd yuav raug tshem tawm thiab rhuav tshem los ntawm koj lub zog tiv thaiv thiab lub siab ntseeg. Lub sij hawm no, tej yam zoo, qhov muaj tiag ntawm qhov tseeb, thiab Vajtswv cov lus yuav tswj nyob rau hauv koj lawm. Thaum tej yam zoo no tswj lawm, koj yuav tsis raug cuam tshuam los ntawm cov tib neeg, xwm txheej, thiab yam khoom sab nraud ntxiv lawm. Koj lub siab ntseeg yuav loj hlob tuaj, koj tus yam ntxwv yuav zoo li ib txwm muaj zuj zus tuaj, thiab koj yuav tsis ua neej nyob raws li tej moj yam qias vuab tsuab thiab poob mus rau txoj kev ntawm ib lub voj voog uas phem ntxiv lawm, thiab ua li no, koj lub siab ntseeg yuav loj hlob yam tsis tu ncua.

Thaum koj nyob hauv pawg ntseeg los sis nyob hauv ib pab pawg neeg, yog koj muaj peev xwm xaiv thev taus thiab ua siab ntev thiab xaiv txoj kev xyaum ua raws uas yog thaum ntsib kev tawm tsam ncaj nqa rau koj uas ua rau koj lub meej mom thiab koj txoj kev coj ncaj raug rhuav, qhov ntawd muaj txiaj ntsim rau tib neeg. Tej zaum koj yuav tsis pom qhov txiaj ntsim no, tiam sis thaum koj tau ntsib tau pom qhov xwm txheej zoo li no lawm, koj yuav pom yam tsis paub tias Vajtswv tej kev cheem tsum rau tib neeg thiab txoj kev uas Nws muab rau lawv ntawd yog ib txoj kev uas kaj lug thiab yog ib txoj kev uas muaj tseeb thiab muaj sia nyob, tias tej ntawd ua rau tib neeg muaj peev xwm tau qhov tseeb thiab muaj txiaj ntsim rau tib neeg, thiab tias tej ntawd yog txoj kev uas muaj qab hau tshaj plaws. Thaum koj nyob hauv ib pab pawg neeg, tshwj xeeb tshaj yog thaum koj nyob hauv lub neej hauv pawg ntseeg, koj tuaj yeem kov yeej ntau yam kev dag ntxias thiab kev haub ntxias. Thaum muaj neeg tawm tsam thiab ua rau koj raug mob nrog lub siab lim hiam los sis txhob txwm nrhiav kev ua pauj rau koj thiab tso lawv txoj kev ntxub tawm rau koj, qhov uas koj muaj peev xwm coj rau thiab xyaum ua raws li qhov tseeb tej hauv paus ntsiab lus, qhov ntawd tseem ceeb heev. Vim Vajtswv ntxub tib neeg tej moj yam qias vuab tsuab, Vajtswv thiaj li qhia rau tib neeg kom tsis txhob coj rau tej yam uas lawv ntsib nrog kev siab kub, tiam sis kom nyob ntsiag to rau ntawm Vajtswv lub xub ntiag thiab nrhiav qhov tseeb thiab nrhiav Vajtswv tej kev npaj siab, thiab tom qab ntawd los to taub tias Vajtswv tej kev cheem tsum rau tib neeg tiag tiag yog dab tsi. Tib neeg txoj kev ua siab ntev mas muaj qhov txwv, tiam sis thaum ib tug neeg to taub qhov tseeb lawm, lawv yuav muaj hauv paus ntsiab lus rau lawv txoj kev ua siab ntev, thiab qhov ntawd muaj peev xwm dhau los ua ib lub zog thiab kev pab rau tus neeg ntawd los xyaum ua raws qhov tseeb. Txawm li cas los xij, yog ib tug neeg tsis nyiam qhov tseeb, nyiam sib cav txog qhov yog thiab qhov tsis yog thiab nyiam tawm tsam lwm tus, thiab nyiam ua neej nyob hauv lawv txoj kev siab kub, ces thaum lawv raug tawm tsam, lawv yuav nyiam nrog tib neeg sib cav sib ceg thiab sib tawm tsam. Qhov no coj kev raug mob rau txhua tus uas koom nrog, tsis muab kev txhawb los sis kev pab rau leej twg li. Thaum twg leej twg koom nrog kev sib tawm tsam thiab kev sib cav sib ceg, tom qab ntawd lawv yuav sab tshaj plaws, sab txog qhov uas piav tsis tau, thiab ob tog puav leej raug mob; lawv tsis muaj peev xwm tau txais ib qho qhov tseeb li, thiab thaum kawg lawv tsis tau txais ib yam dab tsi li. Yam uas tshuav tsuas yog kev ntxub ntxaug thiab kev npaj siab yuav ua pauj thaum lawv tau cib fim xwb. Qhov no yog qhov tshwm sim los uas phem uas kev sib tawm tsam thiab sib cav sib ceg coj los rau tib neeg thaum kawg.

Rau lub ncauj lus txog kev sib tawm tsam thiab sib cav sib ceg uas peb nyuam qhuav sib qhia ntawd, tam sim no nej puas to taub tej hauv paus ntsiab lus ntawm kev paub cais lawm? Nej puas tuaj yeem paub cais tias cov xwm txheej twg yog kev sib tawm tsam thiab sib cav sib ceg? Kev sib tawm tsam thiab sib cav sib ceg mas nquag tshwm sim nyob hauv cov pab pawg neeg thiab feem ntau yeej pom tau. Kev sib tawm tsam mas tseem ceeb yog txhob txwm tsom ntsoov rau ib tug neeg twg tej teeb meem los tawm tsam lwm tus, txiav txim rau lawv, teem txim rau lawv, thiab haj tseem foom phem rau lawv thiab, nrog lub hom phiaj uas yuav ua pauj rov qab, tawm tsam rov qab, tso kev chim siab ntawm tus kheej tawm, thiab lwm yam ntxiv. Txawm li cas los xij, kev sib tawm tsam thiab sib cav sib ceg ntawd tsis yog hais txog kev sib qhia qhov tseeb, thiab kuj tsis ntsig txog kev xyaum ua raws qhov tseeb, thiab muaj tseeb tias tej ntawd tsis yog ib qho kev qhia tshwm uas pom tau meej ntawm kev sib koom tes uas sib haum xeeb. Tiam sis, tej ntawd yog ib qho kev qhia tshwm uas pom tau meej ntawm kev ua pauj rov qab thiab tawm tsam lwm tus vim yog kev siab kub thiab Ntxwgnyoog tus moj yam qias vuab tsuab. Lub hom phiaj ntawm kev sib tawm tsam thiab sib cav sib ceg yeej tsis yog los sib qhia qhov tseeb kom meej kiag li, thiab haj yam tsis yog los sib cav kom to taub qhov tseeb. Tiam sis, lub hom phiaj yog los ua kom tau raws li yus tus kheej tej moj yam qias vuab tsuab, tej kev xav ua, tej kev ntshaw ntawm tus kheej, thiab kev nyiam ntawm lub cev nqaij daim tawv. Pom tau meej tias, kev sib tawm tsam tsis yog hais txog kev sib qhia qhov tseeb, thiab muaj tseeb tias tej ntawd tsis yog ntsig txog kev pab thiab coj rau tib neeg nrog lub siab hlub; tiam sis, tej ntawd yog ib qho ntawm Ntxwgnyoog cov tswv yim thiab cov hau kev rau txoj kev tsim txom, muab tib neeg ua khoom ua si, thiab dag tib neeg. Tib neeg ua neej nyob hauv tej moj yam qias vuab tsuab thiab tsis to taub qhov tseeb. Yog lawv tsis xaiv los xyaum ua raws qhov tseeb, ces yuav yooj yim heev rau lawv poob rau hauv tej ntxiab thiab tej kev dag ntxias zoo li no, thiab nyob hauv lub tshav rog ntawm kev sib tawm tsam thiab sib cav sib ceg. Lawv sib cav kom txog thaum lawv lub ntsej muag liab ploog thiab haj tseem mus ntxiv tsis paub xaus, txhua yam vim yog ib lo lus, ib kab lus, los sis ib qho kev ntsia xwb, sib cav tau ntau xyoo kom yeej lwm tus, mus txog rau theem uas ob tog puav leej poob, tsuas yog vim ib yam xwm txheej xwb. Thaum lawv sib ntsib xwb, lawv sib cav tsis tseg, thiab qee tus haj tseem sib tawm tsam, sib cem, thiab sib teem txim nyob hauv cov pab pawg sib tham hauv khoos phis tawj thiab. Qhov kev ntxub ntxaug no tau hnyav npaum li cas lawm! Lawv tsis tau sib foom txaus thaum sib txoos ua ke, txoj kev ntxub tseem tsis tau ploj, lawv tsis tau ua tiav lawv tej hom phiaj, thiab tom qab lawv mus tsev, lawv yim xav txog qhov ntawd, lawv yim npau taws ntxiv, thiab nyob ntawd lawv tseem sib cem ntxiv. Qhov no yog hom ntsujplig dab tsi? Qhov ntawd puas tsim nyog txhawb nqa, puas tsim nyog muab tshaj tawm? (Tsis tsim nyog.) Qhov “ntsujplig uas tsis ntshai dab tsi” no yog hom dab tsi? Qhov no yog ib tug ntsujplig uas tsis ntshai dab tsi, yog ib tug ntsujplig uas tsis muaj kev cai, qhov ntawd yog qhov tshwm sim los ntawm Ntxwgnyoog txoj kev ua rau tib neeg qias vuab tsuab. Muaj tseeb tias, tej kev coj thiab kev ua zoo li no coj kev cuam tshuam thiab kev puas tsuaj loj heev los rau cov tib neeg no txoj kev nkag mus rau hauv lub neej txoj sia, thiab tej ntawd kuj ua rau muaj kev cuam tshuam thiab kev tab kaum rau lub neej hauv pawg ntseeg thiab. Yog li ntawd, thaum ntsib cov xwm txheej no, yog cov thawj coj thiab cov neeg ua hauj lwm pom tias muaj ob tug neeg tab tom sib tawm tsam thiab sib cav sib ceg, thiab cog lus tias yuav sib cav kom txog thaum kawg, cov thawj coj thiab cov neeg ua hauj lwm yuav tsum muab lawv tshem tawm mus kom sai, thiab yuav tsum tsis txhob zam rau lawv thiab muaj tseeb tias yuav tsum tsis txhob tso cai rau lawv. Cov thawj coj thiab cov neeg ua hauj lwm yuav tsum tiv thaiv lwm cov kwv tij thiab cov muam thiab tiv thaiv lub neej hauv pawg ntseeg kom zoo li ib txwm muaj, ua kom paub tseeb tias txhua qhov kev sib txoos ua ke ua tiav cov txiaj ntsim, thiab tsis txhob tso cai rau cov tib neeg zoo li no los siv cov kwv tij thiab cov muam lub sij hawm rau kev nyeem Vajtswv cov lus thiab kev sib qhia qhov tseeb, uas cuam tshuam lub neej hauv pawg ntseeg li ib txwm muaj. Yog pom thaum sib txoos ua ke tias lawv tab tom sib tawm tsam thiab sib cav sib ceg, yuav tsum cheem thiab daws qhov no tam sim ntawd. Yog tias txwv tsis tau, ces yuav tsum maj nroos nthuav tawm thiab soj ntsuam cov tib neeg no los ntawm kev sib txoos ua ke, thiab lawv yuav tsum raug tshem tawm mus. Pawg ntseeg yog ib qho chaw rau kev noj thiab haus Vajtswv cov lus, rau kev pe hawm Vajtswv; pawg ntseeg tsis yog ib qho chaw rau kev sib tawm tsam los sis kev sib cav sib ceg los tso kev chim siab ntawm tus kheej tawm. Txhua tus uas pheej cuam tshuam lub neej hauv pawg ntseeg, uas cuam tshuam cov neeg Vajtswv xaiv tseg txoj kev nkag mus rau hauv lub neej txoj sia, yuav tsum raug tshem tawm mus. Pawg ntseeg tsis txais tos cov tib neeg zoo li no, tsis tso cai rau kev cuam tshuam los ntawm cov dab phem los sis qhov muaj nyob ntawm cov tib neeg phem—tshem cov tib neeg no tawm mus, ces qhov teeb meem yuav raug daws lawm.

Nyob rau hauv pawg ntseeg, yog pom tias qee tus tib neeg tab tom koom kev sib tawm tsam thiab kev sib cav sib ceg, ces txawm lawv tej kev hais ub hais no thiab cov laj thawj yog dab tsi los xij, thiab txawm lub ntsiab lus ntawm lawv qhov kev sib tham ntawd yog dab tsi los xij—txawm lub ntsiab lus ntawd puas yog ib yam uas txhua tus quav ntsej txog los xij—tsuav yog tsim muaj tej kev tab kaum thiab kev cuam tshuam rau lub neej hauv pawg ntseeg xwb, ces qhov teeb meem no yuav tsum raug daws tam sid thiab tsis txhob tos. Yog tias cheem tsis tau los sis txwv tsis tau cov uas muaj feem xyuam nrog ntawd, ces yuav tsum muab lawv tshem tawm mus. Qhov no yog tes hauj lwm uas cov thawj coj thiab cov neeg ua hauj lwm yuav tsum ua thaum ntsib cov xwm txheej zoo li no. Lub hauv paus ntsiab lus tseem ceeb tsis yog kom koj mus txhawb cov neeg no tej kev coj tsis zoo los ntawm kev thev taus los sis tso cai rau lawv, thiab kuj tsis yog kom koj los ua ib tug “nom tswv ncaj ncees” txiav txim qhov yog thiab qhov tsis yog rau cov tib neeg no, seb leej twg yog tus yog thiab leej twg yog tus tsis yog, leej twg yog tus raug thiab leej twg yog tus tsis raug, es cais kom meej tias leej twg yog tus yog thiab leej twg yog tus txhaum, thiab tom qab ntawd muab kev rau txim sib npaug rau ob tog, los sis rau txim rau tus uas koj pom tias muaj txim thiab muab nqi zog rau lwm tus—qhov no tsis yog txoj kev los daws qhov teeb meem. Thaum daws qhov teeb meem no, koj yuav tsum tsis txhob ntsuas raws li txoj cai lij choj, thiab haj yam tsis tsim nyog rau koj los ntsuas thiab txiav txim rau qhov ntawd raws li cov qauv ntawm kev coj ncaj ncees, tiam sis, koj yuav tsum ntsuas thiab daws raws li tej hauv paus ntsiab lus ntawm pawg ntseeg tes hauj lwm. Hais txog ob tog uas sib tawm tsam, tsuav lawv ua rau muaj tej kev tab kaum thiab kev cuam tshuam rau lub neej hauv pawg ntseeg xwb, cov thawj coj thiab cov neeg ua hauj lwm hauv pawg ntseeg yuav tsum suav tias qhov ntawd yog yus tes dej num uas yuav tsum tau cheem thiab txwv lawv, los sis cais lawv tawm los sis ntsaig lawv tawm mus, tsis yog ua zoo mloog rau ob tog piav txog qhov xwm txheej uas tau tshwm sim thiab tham txog nyias cov laj thawj thiab cov lus hais ub hais no, thiab kev npaj siab, lub hom phiaj, thiab lub hauv paus uas nyob tom qab lawv txoj kev sib tawm tsam thiab kev sib cav sib ceg nrog lwm tus—cov thawj coj thiab cov neeg ua hauj lwm tsis tsim nyog ua kom to taub tag nrho qhov xwm txheej, tiam sis lawv yuav tsum daws qhov teeb meem, tshem tawm cov kev tab kaum thiab kev cuam tshuam lub neej hauv pawg ntseeg no, thiab daws cov neeg uas ua rau muaj cov kev tab kaum thiab kev cuam tshuam ntawd. Yog hais tias cov thawj coj thiab cov neeg ua hauj lwm lam ua kom haum ob tog yam tsis daws qhov teeb meem tiag tiag thiab taug txoj kev “nruab nrab,” siv txoj cai ua kom haum xeeb rau ob tug neeg uas muaj feem xyuam rau txoj kev sib tawm tsam ntawd, cia nkawd lam tau lam ua raws siab nyiam kom muaj tej kev tab kaum thiab kev cuam tshuam rau lub neej hauv pawg ntseeg yam tsis txwv los sis tsis daws li—lawv pheej tso cai rau ob tug tib neeg no. Lawv tsuas ntuas thiab qhia nkawd txhua zaus xwb, thiab tsis muaj peev xwm daws qhov teeb meem kom huv si mus. Cov thawj coj thiab cov neeg ua hauj lwm zoo li no yog cov uas tsis ua lawv lub luag hauj lwm. Yog qhov teeb meem uas tib neeg ua kev sib tawm tsam thiab sib cav sib ceg ntawd tshwm sim nyob hauv pawg ntseeg, ua rau muaj tej kev cuam tshuam thiab kev puas tsuaj loj rau lub neej hauv pawg ntseeg, vim li ntawd ua rau muaj kev chim siab thiab kev tsis nyiam kiag li hauv cov tib neeg feem coob, cov thawj coj thiab cov neeg ua hauj lwm yuav tsum ua kom sai, muab ob tog cais los sis ntsaig tawm mus raws li Vajtswv lub tsev cov kev npaj tes hauj lwm thiab cov hauv paus ntsiab lus rau txoj kev yaug pawg ntseeg kom dawb huv. Lawv yuav tsum tsis txhob ua li cov “nom tswv ncaj ncees” uas txiav txim rau qhov xwm txheej rau cov uas muaj feem xyuam nrog thiab txiav txim txog cov kev sib cav ntawm ntiag tug no, lawv yuav tsum tsis txhob mus ua zoo mloog cov tib neeg no hais cov lus tsis muaj qab hau uas qias neeg thiab ntev heev ntawd es los saib seb leej twg yog tus yog thiab leej twg yog tus txhaum, leej twg yog tus raug thiab leej twg yog tus tsis raug, thiab tom qab txiav txim tej no lawm, es kom ntau tus tib neeg los ua kev sib tham thiab sib qhia txog tej no, ua rau ntau tus tib neeg khaws kev tsis nyiam kiag li thiab kev ntxub hauv lawv lub siab. Qhov no yuav nkim lub sij hawm uas tib neeg tsim nyog siv los noj, haus, thiab sib qhia Vajtswv cov lus. Qhov no haj yam yog ib qho kev tsis ua lub luag hauj lwm los ntawm cov thawj coj thiab cov neeg ua hauj lwm, thiab lub hauv paus ntsiab lus ntawm txoj kev xyaum ua raws no mas tsis yog lawm. Yog ob tog uas raug txwv ntawd lees txim hloov dua siab tshiab rau ib lub sij hawm twg, thiab tsis siv lub sij hawm sib txoos ua ke los ua kev sib tawm tsam thiab sib cav sib ceg ntxiv lawm, ces qhov kev cais tawm uas tau muab tso rau lawv ntawd thiaj li tshem tawm tau. Yog lawv yog cov tib neeg phem es raug ntsaig tawm mus lawm, thiab muaj neeg hais tias lawv tau hloov zoo lawm, ces cheem tsum los saib seb lawv puas muaj tej kev qhia tshwm uas pom tau meej tiag tiag ntawm qhov kev lees txim hloov dua siab tshiab, thiab kuj yuav tsum nrhiav tib neeg feem coob lub tswv yim txog qhov teeb meem no thiab. Txawm yog lawv raug txais rov qab los lawm los xij, lawv yuav tsum raug saib xyuas kom zoo, thiab lawv lub sij hawm hais lus yuav tsum raug txwv kom nruj, thiab tom qab ntawd lawv yuav tsum raug daws kom haum raws li lawv tej kev qhia tshwm uas pom tau meej. Tej no yog tej hauv paus ntsiab lus uas cov thawj coj thiab cov neeg ua hauj lwm hauv pawg ntseeg yuav tsum to taub thiab ua tib zoo saib xyuas. Muaj tseeb tias, kev daws qhov teeb meem no tsis tuaj yeem ua raws li kev xav ntawm tus kheej xwb; yuav tsum muaj lub ntsiab xeeb txawm txog ib theem twg uas ua rau muaj tej kev tab kaum thiab kev cuam tshuam nyob hauv kev sib tawm tsam ntawm ob tog. Yuav tsum tsis txhob txwv tsis pub tib neeg hais lus thiab cais tib neeg tawm tsuas yog vim ib tug ntawm lawv tau hais ib yam dab tsi uas ua rau lwm tus mob ib nyuag ntu xwb, ces tom qab ntawd tus neeg ntawd ho ua pauj rov qab los ntawm lawv tus kheej cov lus. Kev saib xyuas tib neeg zoo li ntawd yeej tsis mus raws li tej hauv paus ntsiab lus kiag li! Cov thawj coj thiab cov neeg ua hauj lwm yuav tsum to taub tej hauv paus ntsiab lus kom zoo, ua kom paub tseeb tias tib neeg feem coob pom zoo tias cov thawj coj thiab cov neeg ua hauj lwm tej kev ua yeej mus raws li tej hauv paus ntsiab lus lawm, tsis yog ua phem yam tsis muaj kev tswj los sis ua kom qhov teeb meem hnyav tshaj plaws li ua tau. Thaum hais txog tes hauj lwm sab no, nyob rau ib sab mas, tib neeg feem coob yuav tsum kawm paub cais tias dab tsi yog kev tawm tsam, thiab nyob rau lwm sab mas, cov thawj coj thiab cov neeg ua hauj lwm hauv pawg ntseeg kuj yuav tsum paub cov hauv paus ntsiab lus uas yuav tsum tau to taub thiab tej luag hauj lwm uas yuav tsum tau ua kom tiav thaum ua tes hauj lwm no.

4. Kev Lam Tau Lam Teem Txim Rau Tib Neeg

Tseem muaj lwm qhov kev qhia tshwm uas pom tau meej txog kev sib tawm tsam thiab. Ib txhia tib neeg paub qee cov lus ntawm sab ntsujplig, thiab lawv pheej siv qee cov lus no thaum lawv hais lus, xws li “dab,” “Ntxwgnyoog,” “tsis xyaum ua raws qhov tseeb,” “tsis nyiam qhov tseeb,” “Falixais,” thiab lwm yam ntxiv—lawv siv cov lus no lam tau lam txiav txim rau ib txhia tib neeg. Qhov no tsis yog muaj lub ntsiab xeeb txawm ntawm txoj kev tawm tsam me ntsis lod? Yav tas los, muaj ib tug tib neeg uas xav cem txhua tus uas tsis ua raws li nws lub siab nyiam thaum nws sib cuag nrog cov kwv tij thiab cov nkauj muam. Tiam sis nws xav hauv nws lub siab tias: “Tam sim no uas kuv ntseeg vajtswv lawm, qhov cem lwm tus ntawd zoo li tsis zoo saib. Qhov ntawd ua rau kuv saib zoo li tsis haum rau tus cwj pwm coj zoo ntawm cov neeg dawb huv. Kuv cem tsis tau los sis siv tsis tau lus phem, tiam sis yog kuv tsis cem, kuv lub siab yuav tsis kaj, kuv yuav daws tsis tau kuv txoj kev ntxub—kuv pheej xav cem lwm tus xwb. Yog li ntawd, kuv yuav cem lawv li cas?” Yog li ntawd nws thiaj li tsim tau ib lo lus tshiab. Leej twg ua txhaum rau nws, ua rau nws mob los ntawm lawv tej kev ua, los sis tsis mloog nws hais, ces nws yuav cem tus neeg ntawd li no: “Niag dab phem!” “Koj yog ib niag dab phem!” “Tus ub tus no yog ib niag dab phem!” Nws ntxiv lo lus “phem” rau ntawm lo lus “dab”—Kuv yeej tsis tau hnov leej twg siv lo lus no dua li. Qhov ntawd tsis yog ib qho tshiab kawg lod? Cov kwv tij thiab cov nkauj muam raug nws lam tau lam cem tias yog “cov niag dab phem”—hnov li ntawd leej twg thiaj li yuav mloog taus? Piv txwv li, yog nws hais kom ib tug kwv tij los sis ib tug nkauj muam hliv ib khob dej rau nws, es tus ntawd tsis khoom thiab hais kom nws hliv nws, nws yuav cem tus ntawd tias: “Koj niag dab phem no!” Yog nws los tom ib qho kev sib txoos ua ke los thiab pom tias tseem tsis tau ua zaub mov tiav, nws yuav npau taws: “Nej cov niag dab phem no, nej txhua tus mas tub nkeeg dhau. Kuv tawm mus ua kuv tes dej num, es thaum kuv rov los txawm yog zaub mov los twb tsis muaj txhij rau kuv noj!” Txhua tus uas sib cuag nrog nws puav leej muaj feem raug cem tias yog ib “niag dab phem.” Qhov no yog hom tib neeg dab tsi? (Ib tug tib neeg phem.) Nws phem li cas? Raws li nws qhov muag pom mas, leej twg uas ua txhaum rau nws los sis tsis ua raws li nws lub siab nyiam ces yog ib niag dab phem—nws tus kheej tsis yog, tiam sis lwm tus puav leej yog. Qhov nws hais li no puas muaj hauv paus? Tsis muaj kiag li; nws tsuas lam xaiv ib lo lus los cem tib neeg uas yuav ua rau daws tau nws txoj kev ntxub thiab tso nws txoj kev npau taws tawm xwb. Nws ntseeg hais tias yog nws cem lwm tus tiag tiag, ces lwm tus yuav hais tias nws tsis zoo li ib tug uas ntseeg Vajtswv, tiam sis nws xav hais tias yog nws hu lwm tus tias yog ib niag dab, qhov ntawd tsis yog kev cem, thiab qhov ntawd yuav mloog zoo li tsim nyog rau lwm tus, ua tau raws li nws tus kheej tej kev ntshaw thiab tsis muaj chaw rau lwm tus nrhiav tau nws qhov txhaum. Tus tib neeg no txawj dag thiab phem tiag tiag, nws siv cov lus uas lim hiam tshaj plaws, yog hom lus uas ua rau tib neeg tsis muaj hau kev tawm tsam, txhawm rau ua pauj thiab teem txim rau lwm tus ntawd, tiam sis tib neeg liam tsis tau nws tias yog nws cem los sis hais lus tsis tsim nyog. Thaum ntsib ib tug tib neeg zoo li no, tib neeg feem coob yuav zam deb nws los sis txav mus ze nws? (Lawv yuav zam deb nws.) Vim li cas? Lawv thab tsis tau nws, yog li ntawd lawv tsuas zam deb nws xwb; qhov no yog qhov uas cov tib neeg ntse ua.

Qhov xwm txheej uas teem txim rau ib txhia tib neeg raws siab nyiam, muab npe phem rau lawv, thiab tsim txom lawv ntawd mas nquag tshwm sim nyob rau hauv txhua pawg ntseeg. Piv txwv li, ib txhia tib neeg muaj ib qho kev xav tsis zoo rau ib tug thawj coj los sis ib tug neeg ua hauj lwm twg, txhawm rau kom pauj tau, thiaj li hais lus txog lawv nyob tom lawv qub qab, muab lawv nthuav tawm thiab soj ntsuam lawv los ntawm qhov ua txuj sib qhia txog qhov tseeb. Txoj kev npaj siab thiab tej hom phiaj ntawm tej kev ua zoo li no mas tsis yog lawm. Yog ib tug tib neeg sib qhia txog qhov tseeb yog los ua tim khawv rau Vajtswv tiag tiag thiab kom pab tau lwm tus, lawv yuav tsum sib qhia txog lawv tus kheej tej kev ntsib kev pom tiag tiag, thiab los ntawm txoj kev soj ntsuam thiab paub lawv tus kheej es kom pab tau rau lwm tus. Txoj kev xyaum ua raws zoo li no coj tau txiaj ntsig zoo dua los, thiab cov neeg Vajtswv xaiv tseg yuav pom zoo rau qhov ntawd. Yog ib tug tib neeg txoj kev nthuav tawm, tawm tsam, thiab saib tsis taus lwm tus ntawd yog txhawm rau ntaus los sis ua pauj rov qab rau lwm tus, ces txoj kev npaj siab ntawd tsis yog lawm, qhov ntawd tsis muaj laj thawj ncaj ncees, Vajtswv ntxub qhov ntawd thiab tsis muaj txiaj ntsim rau cov kwv tij thiab cov nkauj muam. Yog ib tug tib neeg txoj kev npaj siab yog los teem txim rau lwm tus los sis tsim txom lwm tus, ces lawv yog ib tug tib neeg phem thiab lawv tab tom ua phem. Txhua tus neeg Vajtswv xaiv tseg yuav tsum muaj kev paub cais thaum hais txog cov tib neeg phem. Yog ib tug tib neeg tawm tsam, nthuav tawm, los sis saib tsis taus tib neeg raws li siab nyiam, ces yuav tsum pab lawv los ntawm lub siab hlub, nrog lawv sib qhia thiab soj ntsuam lawv, los sis ntuas lawv. Yog lawv lees txais tsis tau qhov tseeb, thiab tawv ncauj tsis kam hloov, ces qhov no yog lwm qhov teeb meem tag nrho lawm. Thaum hais txog cov tib neeg phem uas pheej lam tau lam teem txim, muab npe phem thiab tsim txom lwm tus ntawd, yuav tsum muab lawv nthuav tawm kom tag nrho, kom txhua tus thiaj li kawm paub cais lawv, thiab tom qab ntawd yuav tsum txwv lawv los sis ntiab lawv tawm hauv pawg ntseeg mus. Qhov no tseem ceeb heev, vim cov tib neeg zoo li no cuam tshuam lub neej hauv pawg ntseeg thiab pawg ntseeg tes hauj lwm, thiab lawv muaj feem coj tib neeg mus yuam kev thiab coj kev ntxhov quav niab los rau hauv pawg ntseeg. Tshwj xeeb tshaj yog, qee tus tib neeg phem pheej tawm tsam thiab teem txim rau lwm tus, yeej yog txhawm rau ua kom tiav lawv lub hom phiaj uas khav lawv tus kheej thiab ua kom lwm tus saib lawv rau qhov siab. Cov tib neeg phem no pheej siv lub cib fim ntawm kev sib qhia qhov tseeb thaum sib txoos ua ke los nthuav tawm, soj ntsuam thiab tsuj nias lwm tus yam tsis ncaj qha. Lawv haj tseem hais tias lawv ua li no yog los pab tib neeg thiab los daws tej teeb meem uas muaj nyob hauv pawg ntseeg, thiab siv tej kev ua txuj no los npog kom ua tau lawv tej hom phiaj tiav. Lawv yog hom tib neeg uas tawm tsam thiab tsim txom lwm tus, thiab pom meej meej tias lawv txhua tus yog cov tib neeg phem. Txhua tus uas tawm tsam thiab teem txim rau cov tib neeg uas caum qhov tseeb mas lim hiam thiab tsiv nyaum tshaj plaws, thiab tsuas yog cov uas nthuav tawm thiab soj ntsuam cov tib neeg phem los tiv thaiv tes hauj lwm ntawm Vajtswv lub tsev xwb thiaj li paub txog kev ncaj ncees thiab tau txais kev pom zoo los ntawm Vajtswv. Cov tib neeg phem yeej ib txwm txawj dag heev nyob rau hauv lawv txoj kev ua phem; lawv puav leej txawj siv kev qhuab qhia los tiv thaiv lawv tus kheej thiab ua kom lawv lub hom phiaj uas coj lwm tus mus yuam kev ntawd tiav. Yog cov neeg Vajtswv xaiv tseg tsis muaj kev paub cais lawv thiab tsis muaj peev xwm txwv cov tib neeg phem no, ces lub neej hauv pawg ntseeg thiab pawg ntseeg tes hauj lwm yuav ntxhov quav niab tag nrho—los sis haj tseem kub ntxhov heev thiab. Thaum cov tib neeg phem sib qhia txog tej teeb meem thiab soj ntsuam tej teeb meem ntawd, lawv pheej muaj ib txoj kev npaj siab thiab ib lub hom phiaj, thiab qhov ntawd pheej taw ncaj qha rau ib tug neeg twg. Lawv tsis soj ntsuam los sis paub lawv tus kheej, thiab tsis qhib siab thiab nthuav lawv tus kheej tawm los daws lawv tus kheej tej teeb meem—tiam sis, lawv siv lub cib fim no los nthuav tawm, soj ntsuam, thiab tawm tsam lwm tus. Lawv pheej siv lub cib fim ntawm kev sib qhia txog lawv txoj kev paub lawv tus kheej los soj ntsuam thiab teem txim rau lwm tus, thiab los ntawm txoj kev sib qhia Vajtswv cov lus thiab qhov tseeb, lawv muab tib neeg nthuav tawm, saib tsis taus tib neeg, thiab hais phem rau tib neeg. Tshwj xeeb tshaj yog lawv tsis nyiam kiag li thiab ntxub cov uas caum qhov tseeb, cov uas ris lub nra rau pawg ntseeg tes hauj lwm, thiab cov uas pheej ua lawv tej dej num. Cov tib neeg phem yuav siv txhua qhov laj thawj thiab hais ub hais no los tawm tsam cov tib neeg no txoj kev kub siab lug thiab txwv tsis pub lawv ua pawg ntseeg tes hauj lwm. Ib feem ntawm qhov lawv xav rau cov neeg no yog kev khib thiab kev ntxub; lwm feem yog qhov ntshai tsam cov tib neeg no sawv los ua hauj lwm, yuav tsim kev hem thawj rau lawv lub koob meej thiab kev tau txais txiaj ntsim thiab lub meej mom. Yog li ntawd, lawv thiaj li kub siab lug sim txhua txoj hau kev los ceeb toom, caij tsuj, thiab txwv cov tib neeg ntawd, haj tseem mus txog theem uas nrhiav kev los liam lawv thiab ntxeev tej uas muaj tseeb kom tau teem txim rau lawv. Qhov no nthuav tawm tag nrho hais tias tus moj yam ntawm cov tib neeg phem no yog tus uas ntxub qhov tseeb thiab ntxub tej yam uas zoo. Lawv muaj kev ntxub tshwj xeeb rau cov uas caum qhov tseeb thiab nyiam tej yam uas zoo, thiab rau cov uas kuj tsis txawj dag, coj zoo, thiab ncaj ncees ntawd thiab. Tej zaum lawv yuav tsis hais li ntawd, tiam sis qhov no yog hom kev xav uas lawv muaj. Yog li ntawd vim li cas lawv thiaj li tsom ncaj qha rau cov uas caum qhov tseeb, thiab cov tib neeg coj zoo thiab ncaj ncees, los nthuav tawm, saib tsis taus, tsuj nias, thiab cais tawm? Qhov no qhia meej meej tias yog lawv xav rhuav tshem thiab ntaus cov tib neeg zoo thiab cov uas caum qhov tseeb kom vau, tsuj rau hauv qab xib taws, kom lawv thiaj li tswj tau pawg ntseeg. Ib txhia tib neeg tsis ntseeg hais tias qhov no yog tseeb. Yog li Kuv nug ib lo lus nug: Vim li cas thaum lawv sib qhia qhov tseeb, cov tib neeg phem no tsis nthuav tawm los sis soj ntsuam lawv tus kheej, thiab pheej tsom ncaj qha thiab nthuav tawm lwm tus xwb? Puas yog tias lawv tsis nthuav txoj kev qias vuab tsuab tawm tiag tiag, los sis tias lawv tsis muaj tej moj yam qias vuab tsuab? Yeej tsis yog li ntawd kiag li. Yog li ntawd, vim li cas lawv thiaj li pheej tsom ncaj qha rau lwm tus los nthuav tawm thiab soj ntsuam? Lawv lub hom phiaj tiag tiag yog dab tsi? Lo lus nug no cheem tsum kev ua tib zoo xav. Yog lawv nthuav cov tib neeg phem tej kev ua phem uas cuam tshuam pawg ntseeg tawm, ces qhov ntawd yog ib yam uas tsim nyog ua. Tiam sis cov tib neeg no ho nthuav tawm thiab tsim txom cov tib neeg zoo, es ua txuj tias sib qhia txog qhov tseeb. Lawv txoj kev npaj siab thiab lub hom phiaj yog dab tsi? Puas yog lawv npau taws heev vim pom tias Vajtswv cawm cov tib neeg zoo? Qhov ntawd yog qhov uas muaj tseeb tiag tiag. Vajtswv tsis cawm cov tib neeg phem, yog li ntawd cov tib neeg phem thiaj li ntxub Vajtswv thiab ntxub cov tib neeg zoo—qhov no puav leej yog ib txwm muaj. Cov tib neeg phem tsis lees txais qhov tseeb los sis tsis caum qhov tseeb; lawv tus kheej tsis muaj feem raug cawm dim, tiam sis lawv tsim txom cov tib neeg zoo uas caum qhov tseeb thiab muaj feem raug cawm dim. Qhov no yog teeb meem dab tsi? Yog cov tib neeg no muaj kev paub txog lawv tus kheej thiab qhov tseeb, lawv tuaj yeem qhib siab thiab sib qhia, tiam sis lawv pheej tsom ncaj qha rau lwm tus thiab thab lwm tus—lawv pheej muaj tus yam ntxwv uas tawm tsam lwm tus—thiab lawv pheej muab cov uas caum qhov tseeb ua lawv cov yeeb ncuab uas lawv xav hauv nruab siab. Tej no yog cov cim ntawm cov tib neeg phem. Cov uas muaj peev xwm ua tau kev phem zoo li no yog cov dab thiab cov Ntxwgnyoog tiag tiag, yog cov tawm tsam khetos tiag tiag, uas yuav tsum raug txwv, thiab yog lawv ua kev phem ntau heev, yuav tsum daws lawv tam sim ntawd—ntiab lawv tawm hauv pawg ntseeg mus. Txhua tus uas tawm tsam thiab cais cov tib neeg zoo tawm ntawd puav leej yog cov neeg ua phem rau pab pawg. Vim li cas Kuv thiaj li hu lawv ua cov neeg ua phem rau pab pawg? Vim lawv yuav thab kom muaj kev sib cav thiab kev tsis sib haum xeeb uas tsis tim tsum nyob rau hauv pawg ntseeg, ua rau tej xwm txheej ntawd yim loj zuj zus tuaj. Hnub no lawv tsom ncaj qha rau tus no, tag kis ho tsom ncaj qha rau tus tod, thiab lawv pheej tsom mus rau lwm tus, rau cov uas nyiam qhov tseeb thiab caum qhov tseeb. Qhov no yooj yim cuam tshuam lub neej hauv pawg ntseeg thiab muaj kev cuam tshuam rau cov neeg Vajtswv xaiv tseg txoj kev noj thiab haus Vajtswv cov lus li ib txwm muaj, nrog rau lawv txoj kev sib qhia txog qhov tseeb li ib txwm muaj. Cov tib neeg phem no pheej siv lub cib fim ntawm kev ua lub neej hauv pawg ntseeg los tawm tsam lwm tus los ntawm lub npe tias sib qhia txog qhov tseeb. Muaj kev ua yeeb ncuab nyob rau hauv txhua yam uas lawv hais; lawv hais tej lus ua kom lwm tus chim txhawm rau tawm tsam thiab teem txim rau cov uas caum qhov tseeb thiab cov uas muab lawv tus kheej fij rau Vajtswv. Qhov no yuav coj qhov tshwm sim los uas zoo li cas? Qhov ntawd yuav tab kaum thiab cuam tshuam lub neej hauv pawg ntseeg, thiab ua rau tib neeg lub siab tsis kaj thiab tsis muaj peev xwm nyob tau ntsiag to rau ntawm Vajtswv lub xub ntiag. Tshwj xeeb tshaj mas yog, tej lus lim hiam uas cov tib neeg phem no hais los teem txim, tawm tsam, thiab ua kom mob lwm tus ntawd tuaj yeem thab kom muaj kev tawm tsam. Qhov no tsis pab daws teeb meem; tiam sis, qhov ntawd ua kom muaj kev ntshai thiab kev ntxhov siab nyob rau hauv pawg ntseeg thiab ua rau kev sib raug zoo ntawm tib neeg nruj tuaj, ua rau muaj kev chim loj rau ntawm lawv thiab ua rau lawv poob rau hauv kev sib cav sib ceg. Cov tib neeg no txoj kev ua tsis yog tsuas cuam tshuam lub neej hauv pawg ntseeg xwb, tiam sis kuj ua rau muaj kev tsis sib haum xeeb nyob rau hauv pawg ntseeg thiab. Qhov ntawd haj tseem tuaj yeem cuam tshuam pawg ntseeg tes hauj lwm tag nrho thiab txoj kev tshaj tawm txoj moo zoo. Yog li ntawd, cov thawj coj thiab cov neeg ua hauj lwm yuav tsum ceeb toom rau hom tib neeg no, thiab kuj yuav tsum txwv lawv thiab daws lawv thiab. Ib kis mas, cov kwv tij thiab cov nkauj muam yuav tsum txwv nruj rau cov tib neeg phem uas pheej tawm tsam thiab teem txim rau lwm tus no. Lwm kis mas, cov thawj coj pawg ntseeg yuav tsum nthuav tawm thiab cheem cov uas lam tau lam tawm tsam thiab teem txim rau lwm tus ntawd kom sai, thiab yog lawv tseem tawv ncauj tsis kam hloov, ces ntsaig lawv tawm hauv pawg ntseeg mus. Yuav tsum tiv thaiv tsis pub cov tib neeg phem cuam tshuam lub neej hauv pawg ntseeg thaum sib txoos ua ke, thiab tib lub sij hawm ntawd, yuav tsum txwv cov tib neeg ruam feeb tsis meej tsis pub hais lus uas cuam tshuam lub neej hauv pawg ntseeg. Yog pom ib tug tib neeg phem ua phem, yuav tsum muab lawv nthuav tawm los. Yuav tsum tsis txhob cia lawv ua raws li siab nyiam, ua phem raws li lawv xav ua kiag li. Qhov no tseem ceeb heev los tiv thaiv lub neej hauv pawg ntseeg kom zoo li ib txwm muaj thiab ua kom paub tseeb tias cov neeg Vajtswv xaiv tseg tuaj yeem sib txoos ua ke, noj thiab haus Vajtswv cov lus, thiab sib qhia qhov tseeb li ib txwm muaj, cia lawv ua lawv tej dej num kom tiav li ib txwm muaj. Tsuas yog thaum ntawd xwb Vajtswv lub siab nyiam thiaj li yuav ua tau tiav nyob rau hauv pawg ntseeg, thiab tsuas yog ua li no xwb cov neeg uas Nws xaiv tseg thiaj li yuav to taub qhov tseeb, nkag mus rau hauv qhov muaj tiag, thiab tau Vajtswv tej koob hmoov. Nej puas tau pom cov tib neeg phem zoo li no nyob rau hauv pawg ntseeg? Lawv pheej muaj kev khib thiab kev ntxub rau cov tib neeg zoo, thiab lawv pheej tsom ncaj qha rau cov tib neeg zoo. Hnub no lawv tsis nyiam tus neeg zoo no, tag kis ho tsis nyiam lwm tus; lawv muaj peev xwm thuam txhua tus thiab nrhiav tau ntau qhov txhaum nyob rau hauv cov neeg ntawd, thiab tsis tas li ntawd xwb, yam uas lawv hais ntawd mas mloog zoo li muaj hauv paus hauv ntsis thiab tsim nyog heev, thiab thaum kawg lawv ua rau sawv daws npau taws heev, es lawv dhau los ua cov neeg ua phem rau pab pawg. Lawv cuam tshuam pawg ntseeg mus txog qib uas tib neeg lub siab ntxhov ua sab ua sua, ntau tus tib neeg xav phem thiab qaug zog, thiab tsis tau txais txiaj ntsim los sis kev txhawb los ntawm kev sib txoos ua ke, thiab qee tus haj tseem tsis xav tuaj koom kev sib txoos ua ke lawm thiab. Cov tib neeg phem zoo li no tsis yog cov neeg ua phem rau pab pawg lod? Yog lawv tseem tsis tau mus txog theem uas tsim nyog muab ntsaig tawm mus, ces yuav tsum cais lawv tawm los sis txwv lawv. Piv txwv li, thaum sib txoos ua ke, muab ib qho chaw zaum uas nyob ib leeg rau lawv kom tiv thaiv tsis pub lawv cuam tshuam lwm tus. Yog lawv pheej nrhiav lub cib fim los hais lus thiab tawm tsam tib neeg, yuav tsum txwv lawv—txwv tsis pub hais tej lus uas tsis muaj qab hau. Yog hais tias txwv tsis tau lawv li lawm thiab lawv twb yuav tawg los sis tawm tsam, yuav tsum ntsaig lawv tawm mus kom ncav sij hawm. Qhov ntawd yog, thaum lawv tsis xav raug txwv ntxiv lawm, thiab hais tias, “Nej muaj laj thawj dab tsi los txwv kuv txoj kev hais lus? Vim li cas txhua tus thiaj li tau hais lus tsib feeb, es kuv tsuas tau hais ib feeb xwb?”—thaum lawv pheej nug cov lus nug no, qhov ntawd txhais hais tias lawv yuav tawm tsam. Thaum lawv tab tom yuav tawm tsam ntawd, tsis yog lawv tab tom tsis kam lees txais lod? Tsis yog lawv tab tom tsim teeb meem, tsim kev kub ntxhov lod? Tsis yog lawv tab tom yuav cuam tshuam lub neej hauv pawg ntseeg lod? Lawv tab tom yuav nthuav tawm tias lawv yog leej twg tiag tiag; lub sij hawm daws lawv tau los txog lawm—yuav tsum tshem lawv tawm mus kom sai. Qhov no puas tsim nyog? Qhov ntawd tsim nyog. Qhov ua kom paub tseeb tias tib neeg feem coob tuaj yeem ua lub neej hauv pawg ntseeg li ib txwm muaj ntawd mas yeej tsis yooj yim tiag tiag, vim muaj txhua hom tib neeg phem, ntsujplig phem, ntsujplig tsis huv, thiab “cov neeg muaj peev xwm tshwj xeeb” uas nrhiav kev los ua kom txhua yam puas tsuaj. Peb tsis txwv lawv puas tau? Ib txhia “neeg muaj peev xwm tshwj xeeb” pib saib tsis taus thiab tawm tsam lwm tus kiag thaum lawv qhib lawv lub qhov ncauj—yog koj rau tsom iav los sis yog koj cov plaub hau tsawg los lawv tawm tsam koj; yog koj qhia koj cov lus tim khawv uas hais txog txoj kev ntsib kev pom thaum sib txoos ua ke los sis yog koj nquag plias thiab muaj kev lav lub luag hauj lwm thaum ua koj tej dej num, lawv tawm tsam koj thiab txiav txim rau koj; yog koj muaj kev ntseeg rau Vajtswv thaum raug kev sim siab, yog koj qaug zog, los sis yog koj kov yeej tsev neeg tej kev nyuaj los ntawm kev siv koj txoj kev ntseeg yam tsis yws txog Vajtswv, lawv tawm tsam koj. Qhov kev tawm tsam nyob ntawm no txhais li cas? Qhov ntawd txhais hais tias txawm lwm tus yuav ua dab tsi los xij, yeej tsis ua rau cov tib neeg no txaus siab li; lawv pheej tsis nyiam qhov ntawd, lawv pheej nrhiav tej qhov txhaum uas tsis muaj nyob, lawv pheej nrhiav kev los liam lwm tus txog ntau yam, thiab nyob rau hauv lawv lub qhov muag mas tsis muaj ib yam dab tsi uas lwm tus ua es yog li. Tab txawm yog koj sib qhia qhov tseeb thiab daws tej teeb meem raws li Vajtswv lub tsev tej kev npaj tes hauj lwm los xij, lawv yuav nrhiav qhov tsis zoo thiab thuam, nrhiav qhov txhaum nyob rau hauv txhua yam uas koj ua. Lawv txhob txwm ua teeb meem, thiab txhua tus puav leej raug lawv tawm tsam. Txhua zaus uas ib tug tib neeg zoo li no tshwm sim nyob rau hauv pawg ntseeg, nej yuav tsum daws lawv; yog ob tug tshwm sim, ces nej yuav tsum daws nkawd ob leeg. Qhov no yog vim qhov kev puas tsuaj uas lawv ua rau lub neej hauv pawg ntseeg ntawd mas loj heev, lawv ua rau muaj tej kev tab kaum thiab kev cuam tshuam rau pawg ntseeg tes hauj lwm, thiab qhov tshwm sim los ntawm qhov no mas hnyav tshaj plaws.

B. Cov Yam Ntxwv ntawm Txoj Kev Ua Neeg ntawm Cov Tib Neeg Uas Pheej Tawm Tsam Lwm Tus Tas Li

Hnub no, peb tau sib qhia txog ob peb yam uas muaj feem xyuam txog qhov teeb meem ntawm kev sib tawm tsam thiab sib cav sib ceg. Nej puas tau to taub lub ntsiab xeeb txawm ntawm tej kev qhia tshwm uas pom tau meej uas ntau hom tib neeg tau nthuav tawm nyob rau hauv txhua yam ntawm tej no? Cia peb pib hais ntawm cov uas nyiam tawm tsam lwm tus—lawv puas muaj laj thawj ntawm txoj kev ua neeg li ib txwm muaj? (Tsis muaj.) Qhov uas lawv tsis muaj laj thawj ntawd qhia tawm li cas? Lawv cov cwj pwm thiab tej hauv paus ntsiab lus uas muaj rau cov tib neeg, tej xwm txheej, thiab tej yam khoom yog dab tsi? Lawv xaiv txoj kev thiab cov cwj pwm twg los coj rau ntau hom tib neeg, xwm txheej, thiab yam khoom? Piv txwv li, nyiam sib cav txog qhov yog thiab qhov tsis yog, qhov no tsis yog ib tug cwj pwm uas lawv muaj rau cov tib neeg, tej xwm txheej, thiab tej yam khoom lod? (Yog lawm.) Qhov nyiam sib cav txog qhov yog thiab qhov tsis yog txhais hais tias sim los hais kom meej tias dab tsi yog qhov yog los sis dab tsi yog qhov tsis yog nyob rau hauv txhua yam, tsis tso tseg kom txog thaum piav qhov teeb meem ntawd meej thiab to taub tias leej twg yog tus yog thiab leej twg yog tus tsis yog lawm, thiab pheej tuav rawv tej yam uas tsis muaj qab hau khov heev. Qhov ua li no muaj qab hau dab tsi tiag tiag? Thaum kawg qhov sib cav txog qhov yog thiab qhov tsis yog ntawd puas yog? (Tsis yog.) Qhov yuam kev ntawd nyob qhov twg? Qhov no puas muaj kev sib txuas nrog txoj kev xyaum ua raws qhov tseeb? (Tsis muaj kev sib txuas.) Vim li cas thiaj li hais tias tsis muaj kev sib txuas? Qhov sib cav txog qhov yog thiab qhov txhaum ntawd tsis yog kev tuav rawv qhov tseeb tej hauv paus ntsiab lus, tsis yog kev sib tham los sis sib qhia txog qhov tseeb tej hauv paus ntsiab lus; tiam sis, tib neeg pheej tham txog tias leej twg yog tus yog thiab leej twg yog tus tsis yog, leej twg yog tus raug thiab leej twg yog tus yuam kev, leej twg yog tus nyob rau qhov yog thiab leej twg tsis nyob, leej twg muaj qhov laj thawj zoo, thiab leej twg tsis muaj, leej twg nthuav tawm txoj kev qhuab qhia uas siab dua; qhov no yog qhov uas lawv tshawb fawb. Thaum Vajtswv muab tib neeg tso rau hauv tej kev sim siab, lawv pheej cav nrog Vajtswv, lawv pheej hais qhov laj thawj no los sis qhov laj thawj tod. Vajtswv puas tham txog tej yam zoo li no nrog koj? Vajtswv puas nug tias qhov xwm txheej yog dab tsi? Vajtswv puas nug txog koj tias vim li cas thiab koj tej laj thawj yog dab tsi? Nws tsis nug. Vajtswv nug seb koj muaj ib tug cwj pwm ntawm txoj kev zwm rau los sis kev tawm tsam thaum Nws sim koj siab xwb. Vajtswv nug tias koj puas to taub qhov tseeb, koj puas zwm rau. Qhov no yog tag nrho tej uas Vajtswv nug, tsis muaj lwm yam lawm. Vajtswv tsis nug koj tias qhov laj thawj uas koj tsis zwm rau ntawd yog dab tsi, Nws tsis saib seb koj puas muaj ib qho laj thawj uas zoo—Nws yeej tsis xav txog tej yam zoo li no kiag li. Vajtswv tsuas saib seb koj puas zwm rau xwb. Txawm koj qhov chaw nyob thiab qhov xwm txheej yog dab tsi los xij, Vajtswv tsuas tshawb xyuas kom meej seb puas muaj txoj kev zwm rau nyob hauv koj lub siab, seb koj puas muaj ib tug cwj pwm ntawm txoj kev zwm rau. Vajtswv tsis nrog koj sib cav txog qhov yog thiab qhov tsis yog; Vajtswv tsis quav ntsej tias koj tej laj thawj yog dab tsi. Vajtswv tsuas saib seb koj puas zwm rau tiag tiag—qhov no yog tag nrho tej uas Vajtswv nug koj. Qhov no tsis yog qhov tseeb lub hauv paus ntsiab lus lod? Hom tib neeg uas nyiam sib cav txog qhov yog thiab qhov tsis yog, uas nyiam nrog lwm tus sib cav sib ceg—puas muaj qhov tseeb tej hauv paus ntsiab lus nyob hauv lawv lub siab? (Tsis muaj.) Vim li cas thiaj li tsis muaj? Lawv puas tau tsom ntsoov rau qhov tseeb tej hauv paus ntsiab lus? Lawv puas tau caum tej ntawd? Lawv puas tau nrhiav tej ntawd? Lawv yeej tsis tau tsom ntsoov rau tej ntawd, los sis caum tej ntawd los sis nrhiav tej ntawd, thiab tej ntawd yeej tsis muaj nyob hauv lawv lub siab kiag li. Yog li ntawd, lawv tsuas tuaj yeem ua neej nyob hauv tib neeg tej kev xav phem xwb, txhua yam uas nyob hauv lawv lub siab ntawd mas yog qhov yog thiab qhov tsis yog, qhov raug thiab qhov yuam kev, tej kev hais ub hais no, tej laj thawj, nrhiav lus los tiv thaiv tus kheej, thiab kev sib cav, txuas ntxiv ntawd ces yog lawv ib leeg tawm tsam, txiav txim, thiab teem txim rau ib leeg. Hom tib neeg zoo li no tus moj yam ces yog lawv nyiam sib cav txog qhov yog thiab qhov tsis yog thiab txiav txim thiab teem txim rau tib neeg. Cov tib neeg zoo li no tsis nyiam qhov tseeb los sis tsis lees txais qhov tseeb kiag li, lawv muaj feem los sim nrog Vajtswv sib cav, haj tseem txiav txim rau Vajtswv thiab tawm tsam Vajtswv. Thaum kawg, lawv yuav raug rau txim.

Cov uas nyiam sib cav txog qhov yog thiab qhov tsis yog ntawd puas nrhiav qhov tseeb? Lawv puas nrhiav Vajtswv tej kev npaj siab, Vajtswv tej kev cheem tsum, los sis nrhiav qhov tseeb tej hauv paus ntsiab lus uas yuav tsum tau muab coj los xyaum ua raws nyob rau hauv cov xwm txheej no los ntawm cov tib neeg, tej xwm txheej, thiab tej yam khoom uas lawv ntsib nyob rau hauv tej ntawd? Lawv tsis nrhiav. Thaum ntsib tej xwm txheej, lawv nyiam tshawb fawb txog tias “qhov xwm txheej ntawd zoo li cas” los sis “tus tib neeg ntawd zoo li cas.” Tus cwj pwm no yog dab tsi? Qhov no tsis yog qhov uas tib neeg pheej hais tias yog qhov pheej tuav rawv cov tib neeg thiab tej yam lod? Lawv sib cav txog tib neeg tej laj thawj thiab qhov tshwm sim ntawm tej xwm txheej, lawv pheej yuav ua kom tej no meej, tiam sis lawv tsis hais txog tias lawv nrhiav tau qhov tseeb, to taub qhov tseeb, los sis tau txais kev qhia kom paub nyob rau hauv ntu twg ntawm qhov txheej txheem uas nyuaj no. Lawv tsis muaj tej kev ntsib kev pom thiab tej kev xyaum ua raws no li. Lawv tsuas pheej hais tias: “Yeej pom meej meej tias qhov ntawd yog koj tsom ncaj qha rau kuv, koj tab tom saib tsis taus kuv. Koj xav tias kuv ruam es mloog tsis tawm no lod? Vim li cas koj thiaj li saib tsis taus kuv? Kuv tsis tau ua txhaum rau koj; vim li cas koj thiaj li tsom ncaj qha rau kuv? Vim koj tsom ncaj qha rau kuv, ces kuv yuav tsis tseg koj li! Kuv ua siab ntev rau koj tau ntev heev lawm, tiam sis kuv txoj kev ua siab ntev muaj qhov txwv. Tsis txhob xav tias kuv zoo thab; kuv tsis ntshai koj li!” Tuav rawv tej yam no tsis tso, lawv pheej hais lawv tej laj thawj tsis tsum, pheej tuav rawv qhov yog thiab qhov tsis yog thiab qhov raug thiab qhov yuam kev ntawm qhov teeb meem ntawd, tiam sis lawv tej uas hu ua laj thawj ntawd tsis mus raws qhov tseeb kiag li, thiab tsis muaj ib lo lus twg ntawm tej ntawd uas ua raws li Vajtswv tej kev cheem tsum li. Lawv pheej tuav rawv cov tib neeg, tej xwm txheej, thiab tej yam khoom mus txog qib uas lwm tus dhuav tag nrho thiab tsis muaj leej twg xav mloog lawv, tiam sis lawv tus kheej yeej tsis dhuav txog qhov kev hais txog tej no li, lawv tham txog tej ntawd txhua qhov chaw uas lawv mus, cuag nkaus li lawv raug dab nkag. Qhov no raug hu ua qhov pheej tuav rawv rau tib neeg thiab tej yam, thiab yeej tsis nrhiav qhov tseeb li. Tus yam ntxwv ob ntawm cov tib neeg uas muaj kev sib tawm tsam thiab sib cav sib ceg yog lawv txoj kev nyiam tshwj xeeb rau qhov pheej tuav rawv rau cov tib neeg thiab tej yam. Cov uas pheej tuav rawv rau tib neeg thiab tej yam ntawd puas nyiam qhov tseeb? (Tsis nyiam.) Lawv tsis nyiam qhov tseeb, qhov no pom tau meej heev. Yog li ntawd, cov tib neeg no puas to taub qhov tseeb? Lawv puas paub tias qhov tseeb uas Vajtswv hais txog ntawd yog dab tsi tiag tiag? Raws li saib lawv txoj kev coj sab nraud ntawm qhov pheej tuav rawv rau tib neeg thiab tej yam, lawv puas paub tias qhov tseeb yog dab tsi tiag tiag? Pom meej meej tias lawv tsis paub. Lub tswv yim uas lawv hwm yog dab tsi? Qhov ntawd yog lub tswv yim uas seb leej twg cov lus uas muaj laj thawj tshaj plaws ces yog qhov yog, leej twg tej kev ua uas coj ncaj thiab muab nthuav tau rau txhua tus pom ces yog qhov yog, thiab leej twg ua raws li txoj kev coj ncaj ncees, kev coj zoo, thiab txoj kab lis kev cai qub, tau txais kev pom zoo los ntawm cov tib neeg feem coob ces yog qhov yog. Raws li lawv qhov kev xam pom mas, qhov “yog” no sawv cev rau qhov tseeb, yog li ntawd lawv tuaj yeem tuav rawv rau tib neeg thiab tej yam yam tawv ncauj heev, thiab lawv yeej tsis tso tseg qhov pheej tuav tej no. Lawv ntseeg hais tias qhov muaj laj thawj ntawd sib npaug nrog qhov muaj qhov tseeb—qhov no tsis yog ib qho teeb meem heev lod? Ib txhia tib neeg hais tias, “Kuv tsis tau tab kaum los sis cuam tshuam pawg ntseeg tes hauj lwm, kuv tsis tau siv lwm tus, kuv tsis nyiam nyiag lwm tus tej khoom, thiab kuv tsis yog ib tug neeg thab plaub; kuv tsis yog ib tug tib neeg phem.” Lub ntsiab lus zais nyob hauv tej lus ntawd puas yog hais tias koj yog ib tug tib neeg uas xyaum ua raws qhov tseeb, yog ib tug tib neeg uas muaj qhov tseeb? Ib feem coob coob ntawm cov uas pheej tuav rawv rau tib neeg thiab tej yam ntawd ntseeg tias lawv tus kheej yog cov tib neeg ncaj ncees uas yog li ntawd tsis tas yuav txhawj txog cov lus xaiv, thiab xav tias lawv tus kheej yog cov tib neeg coj zoo, muaj meej mom uas yeej yuav tsis lam qhuas lwm tus li. Yog li ntawd, thaum ntsib tej xwm txheej, lawv nquag sib cav thiab sib cav sib ceg, thiab pheej ua pov thawj tias lawv qhov laj thawj yog qhov raug los ntawm tej kev no. Lawv ntseeg hais tias yog lawv qhov laj thawj khov kho, thiab tuaj yeem raug nthuav tawm yam tab meeg, thiab tib neeg feem coob pom zoo nrog qhov ntawd, ces lawv yog ib tug tib neeg uas muaj qhov tseeb. Lawv “qhov tseeb” yog dab tsi? Qhov ntawd raug ntsuas los ntawm tus qauv dab tsi? Nej puas xav tias cov tib neeg zoo li no tuaj yeem to taub qhov tseeb? (Tsis tuaj yeem.) Yog li ntawd, lawv pheej tuav rawv rau tib neeg thiab tej yam thiab tawv ncauj tuav tej ntawd tsis tso. Cov tib neeg no tsis to taub qhov tseeb, yog li ntawd lawv pheej hais tias, “Kuv tsis tau ua txhaum rau koj. Vim li cas koj thiaj li pheej tsom ncaj qha rau kuv? Qhov koj tsom ncaj qha rau kuv ntawd mas yeej tsis yog!” Lawv ntseeg tias, “Yog kuv tsis tau ua txhaum rau koj, koj yuav tsum tsis txhob ua rau kuv li no. Vim koj ua li no rau kuv, kuv yuav ua pauj rov qab rau koj, kuv yuav ua pauj, thiab kuv txoj kev ua pauj yog kev tiv thaiv tus kheej uas tsim nyog, qhov ntawd raug cai. Qhov no yog qhov tseeb lub hauv paus ntsiab lus. Yog li ntawd, yam uas koj ua ntawd tsis mus raws li qhov tseeb tej hauv paus ntsiab lus, tiam sis yam uas kuv ua mas mus raws li ntawd. Yog li ntawd kuv yuav pheej tuav rawv qhov teeb meem no, kuv yuav hais txog qhov teeb meem no tas li, thiab hais txog koj tas li!” Lawv ntseeg hais tias qhov pheej tuav rawv rau tib neeg thiab tej yam ntawd mus raws li qhov tseeb tej hauv paus ntsiab lus, tiam sis qhov no tsis yog ib qho kev ua yuam kev loj heev lod? Qhov ntawd yeej yog ib qho kev ua yuam kev loj tiag tiag, thiab lawv tau yuam kev lawm. Qhov pheej tuav rawv rau tib neeg thiab tej yam ntawd yog ib qho teeb meem uas txawv tag nrho ntawm txoj kev xyaum ua raws qhov tseeb. Qhov no yog qhov teeb meem ob ntawm cov tib neeg no txoj kev ua neeg—lawv pheej tuav rawv rau tib neeg thiab tej yam. Cov teeb meem ntawm txoj kev ua neeg muaj feem xyuam txog dab tsi? Tej ntawd tsis yog muaj feem xyuam txog tus yam ntxwv xeeb txawm lod? Cov tib neeg no ntseeg Vajtswv tau ntau xyoo, tiam sis lawv tsis to taub qhov tseeb, thiab lawv xav hais tias cov lus uas lawv paub, xws li kev coj ncaj thiab pom tseeb, ncaj ncees thiab siab ncaj, qhib lug thiab kam hais, hais ncaj qha thiab coj zoo, thiab lwm yam yog tej hauv paus ntawm qhov kev coj yus tus kheej, thiab lawv xav tias tej yam no thiaj li yog qhov tseeb tej hauv paus ntsiab lus. Qhov no yog ib qho kev xam pom uas tsis yog tshaj plaws li.

Cov tib neeg uas nyiam kev sib tawm tsam thiab sib cav sib ceg ntawd txoj kev ua neeg mas tsis zoo li ib txwm muaj. Thawj qhov ntawm qhov no yog nyiam sib cav txog qhov yog thiab qhov tsis yog; qhov ob yog qhov pheej tuav rawv rau tib neeg thiab tej yam. Qhov peb yog dab tsi? Qhov ntawd tsis yog qhov tsis lees txais qhov tseeb kiag li lod? Tab txawm ib lo lus uas yog xwb los lawv twb tsis lees txais. Lawv xav tias, “Txawm yog yam uas koj hais ntawd yog los xij, koj tseem yuav tsum ua kom kuv tsis txhob poob ntsej muag, koj yuav tsum hais lus kom zoo thiab tsis txhob ua rau kuv mob. Yog koj cov lus nkaug siab thiab tuaj yeem ua rau kuv poob ntsej muag, koj yuav tsum hais tej ntawd rau kuv nyob rau qhov chaw uas tsis muaj neeg. Koj yuav tsum tsis txhob ua rau kuv mob nyob rau ntawm ntau tus tib neeg lub xub ntiag, tsis xav txog kuv lub ntsej muag thiab tsis muab ib txoj hau kev rau kuv tawm ntawm qhov xwm txheej uas txaj muag no. Tsis tas li ntawd xwb, yam uas koj hais ntawd tsis yog, yog li ntawd kuv yuav tsum pauj rov qab!” Nyob rau hauv cov xwm txheej uas loj dua, cov tib neeg zoo li no tawm tsam tias: “Txawm koj cov lus yuav raug npaum li cas los xij, kuv yuav tsis lees txais tej ntawd! Yog koj tham txog lwm tus mas tsis ua cas, tiam sis qhov tsom ncaj qha rau kuv mas tsis tau, tab txawm yog koj hais yog los xij!” Tab txawm thaum nyeem Vajtswv cov lus, yog lawv hnov tias Vajtswv cov lus tab tom tsom ncaj qha rau lawv los sis nthuav tawm lawv, ces lawv tsis nyiam cov lus ntawd thiab tsis xav mloog tej ntawd kiag li—tsuas yog hais tias, vim lawv tsuas ntsib Vajtswv cov lus xwb, lawv thiaj li cav tsis tau nrog Nws. Yog ib tug tib neeg twg qhia txog lawv tej teeb meem los sis lawv tus yam ntxwv rau lawv tim ntsej tim muag, los sis hais ntsig txog lawv yam tsis txhob txwm thiab tsis yog txhob txwm tsom ncaj qha rau lawv, los lawv muaj peev xwm pauj rov qab thiab ua tus pib sib cav sib ceg. Qhov no tsis yog txhais hais tias cov tib neeg zoo li no tsis lees txais qhov tseeb kiag li lod? (Yog lawm.) Qhov no yog lawv txoj kev ua neeg lub ntsiab tseeb—ib qho kev tsis lees txais qhov tseeb kiag li. Yog li ntawd, txawm cov ntsiab lus ntawm lawv txoj kev sib cav sib ceg yog dab tsi los sis txoj kev sib cav sib ceg no tshwm sim nyob qhov twg los xij, txoj kev ua neeg ntawm cov tib neeg zoo li no mas pom tau meej heev. Lawv tsis to taub qhov tseeb, thiab txawm yog thaum mloog lus qhuab qhia lawv to taub cov lus ntawd los xij, lawv tsis lees txais qhov tseeb; lawv tseem koom kev sib tawm tsam thiab sib cav sib ceg mus txuas ntxiv, los sis pheej nyiam tawm tsam lwm tus. Raws li saib lawv tej kev qhia tshwm uas pom tau meej no, lawv yog hom tib neeg zoo li cas? Ua ntej tshaj, lawv puas yog cov uas nyiam qhov tseeb? Lawv puas yog cov tib neeg uas tuaj yeem xyaum ua raws qhov tseeb thaum lawv to taub qhov tseeb ntawd? (Tsis yog.) Thaum lawv pom tej teeb meem, lawv puas tuaj yeem nrhiav qhov tseeb los daws tej teeb meem ntawd? (Tsis tuaj yeem.) Thaum lawv muaj tej kev xav phem, thiab tej kev xav nkhaus los sis tej kev xam pom ntawm tus kheej txog lwm tus tib neeg, lawv puas tuaj yeem muab tej ntawd tso tseg es los nrhiav qhov tseeb? (Tsis tuaj yeem.) Lawv ua tsis tau ib yam dab tsi ntawm tej no. Thaum saib txhua yam uas lawv ua tsis tau no, ces pom meej meej tias txhua tus tib neeg uas nyiam koom kev sib tawm tsam thiab sib cav sib ceg no mas tsis zoo. Raws li saib lawv ntau yam kev qhia tshwm uas pom tau meej, lawv tsis nyiam qhov tseeb thiab tsis txaus siab hlo nrhiav qhov tseeb. Nyob rau hauv tej yam uas muaj feem xyuam txog qhov tseeb ntawd, txawm yog lawv yuav tshwm sim muaj tej kev pom tsis ncaj los sis tej kev xam pom uas yuam kev twg los xij, lawv tseem qhuas tias lawv tus kheej coj ncaj thiab tsis nrhiav qhov tseeb kiag li, thiab txawm thaum muaj neeg muab qhov tseeb qhia meej meej rau lawv lawm los, lawv tsis lees txais, thiab haj yam tsis txaus siab hlo xyaum ua raws qhov tseeb ntawd. Nyob rau tib lub sij hawm ntawd, cov tib neeg no tseem nthuav tawm ib qho kev qhia tshwm uas haj yam ntxim ntxub: Tom qab tau txais kev to taub txog qee cov lus thiab cov kev qhuab qhia, lawv siv cov kev qhuab qhia loj uas lawv to taub no los lam tau lam tawm tsam, txiav txim, thiab teem txim rau lwm tus, thiab haj tseem txwv thiab tswj lwm tus. Yog lawv siv lawv tej kev txiav txim thiab kev teem txim los tswj tsis tau koj, ces lawv yuav xav txog txhua txoj hau kev los siv tej kev qhuab qhia uas tsis muaj ntsiab ntawd los txwv koj. Yog koj tseem tsis kam nyo hau, lawv yuav siv tej txoj kev uas qias thiab phem dua los tawm tsam koj, kom txog thaum koj nyo hau rau lawv, dhau los ua tus neeg qaug zog thiab xav phem, los sis pib qhuas lawv thiab raug lawv kav—ces lawv thiaj li yuav hnov txaus siab lawm. Yog li ntawd, raws li saib cov kev coj, tej kev qhia tshwm uas pom tau meej, thiab tus cwj pwm uas cov tib neeg no muaj rau qhov tseeb, lawv yog hom tib neeg dab tsi? Lawv tsis lees txais qhov tseeb kiag li—qhov no yog tus cwj pwm uas lawv muaj rau qhov tseeb. Thiab lawv txoj kev ua neeg ne ho yog dab tsi? Feem coob ntawm cov tib neeg no yog cov tib neeg phem; hais yam tsis tshaj dhau mas, ntau tshaj 90% ntawm lawv yog cov tib neeg phem. Cov tib neeg phem nyiam ua kom meej txog qhov yog thiab qhov tsis yog nyob rau hauv txhua yam, yog tsis li ntawd, lawv yuav tsis tso tseg, thiab lawv yeej muaj hom yam ntxwv zoo li no. Tsis tas li ntawd xwb, thaum ntsib tej xwm txheej, cov tib neeg phem mas tuav rau tib neeg thiab tej yam, thiab tuav rawv rau tej ntawd, pheej qhia lawv tus kheej tej laj thawj tawm, pheej ua kom txhua tus pom zoo nrog lawv thiab txhawb nqa lawv, thiab hais tias lawv yog tus uas yog, thiab tsis pub leej twg hais ib yam dab tsi phem txog lawv li. Tsis tas li ntawd xwb, thaum cov tib neeg phem ntsib tej xwm txheej, lawv pheej nrhiav lub cib fim los kaw thiab tswj tib neeg. Lawv siv txoj kev twg los tswj tib neeg? Lawv teem txim rau txhua tus, ua rau txhua tus tib neeg ntseeg hais tias lawv tus kheej tsis muaj peev xwm, tias lawv tus kheej muaj teeb meem thiab muaj qhov tsis zoo, thiab tias lawv tus kheej qis dua cov tib neeg phem no, tom qab ntawd ces cov tib neeg phem ntawd txaus siab thiab zoo siab. Thaum lawv ntaus tau txhua tus kom ntog lawm, tsuas tshuav lawv tus kheej sawv lawm xwb, puas yog tias lawv twb muab txhua tus tso rau hauv lawv txoj kev tswj lawm? Lub hom phiaj uas lawv ua tiav los ntawm kev tswj tib neeg ces yog los teem txim thiab ntaus txhua tus kom vau, ua rau txhua tus ntseeg hais tias lawv tus kheej tsis muaj peev xwm, dhau los ua cov neeg xav phem thiab qaug zog, poob kev ntseeg rau Vajtswv cov lus thiab rau qhov tseeb, thiab poob kev ntseeg rau Vajtswv thiab tsis muaj ib txoj kev taug—tom qab ntawd cov tib neeg phem no zoo siab thiab txaus siab. Saib los ntawm tej yam no, qhov ntawd tsis meej tias cov tib neeg phem yog feem coob ntawm hom tib neeg no lod? Saib seb hom tib neeg twg pheej nyiam tawm tsam lwm tus thaum lawv nyob hauv ib pab pawg, txawm yog tim ntsej tim muag los sis tom qab tib neeg nraub qaum, siv ntau txoj kev los tawm tsam lwm tus—cov tib neeg zoo li no yog cov tib neeg phem. Cov tib neeg no tsis lees txais qhov tseeb kiag li, thiab lawv tsis sib qhia qhov tseeb, thiab lawv nquag siv lub cib fim ntawm ib qho xwm txheej los qhuas tias lawv yog cov tib neeg zoo, tias txawm lawv ua dab tsi los xij yeej muaj laj thawj thiab muaj hauv paus hauv ntsis, thiab tias lawv txoj kev coj ncaj ncees thiab qhib lug—lawv pheej qhuas tias lawv yog cov tib neeg coj zoo thiab muaj meej mom, thiab yog cov tib neeg uas hais ncaj qha thiab ncaj ncees. Cov tib neeg no yeej tsis ua tim khawv rau qhov tseeb, thiab lawv tsis ua tim khawv rau Vajtswv cov lus, lawv tsuas pheej nyiam tuav rawv rau tib neeg thiab tej yam, thiab qhia lawv tus kheej tej laj thawj tawm. Lawv txoj kev npaj siab thiab lub hom phiaj yog ua kom tib neeg ntseeg hais tias lawv yog cov tib neeg zoo, thiab tias lawv to taub txhua yam. Hais txog cov uas nyob hauv pawg ntseeg uas pheej koom kev sib tawm tsam thiab sib cav sib ceg, txawm yog cov uas pib qhov kev tawm tsam los sis cov uas raug tawm tsam, yog lub neej hauv pawg ntseeg raug tab kaum thiab cuam tshuam, ces cov tib neeg feem coob yuav tsum sawv los ceeb toom thiab txwv lawv. Yuav tsum tsis txhob muab sij hawm rau cov tib neeg no los ua phem yam tsis muaj kev tswj hlo li, thiab yuav tsum tsis txhob cia lawv los cuam tshuam lwm tus los ntawm qhov tso lawv txoj kev chim siab ntawm tus kheej tawm thiab nrhiav kev los ua pauj rov qab vim lawv tej kev chim siab ntawm tus kheej thiab kev npau taws ib nyuag ntus xwb. Muaj tseeb tias, cov thawj coj pawg ntseeg kuj yuav tsum ua lawv tej luag hauj lwm kom tiav, txwv cov tib neeg no yam muaj txiaj ntsig tsis pub tab kaum thiab cuam tshuam lub neej hauv pawg ntseeg, thiab tiv thaiv feem coob ntawm cov tib neeg tsis pub raug cuam tshuam. Thaum cov tib neeg sib tawm tsam thiab sib cav sib ceg, cov thawj coj pawg ntseeg yuav tsum muaj peev xwm cheem thiab txwv lawv kom ncav sij hawm. Yog kev cheem thiab txwv lawv daws tsis tau qhov teeb meem, thiab lawv tseem sib tawm tsam thiab sib cav sib ceg, cuam tshuam lwm tus, thiab lawv tseem ua rau lub neej hauv pawg ntseeg puas tsuaj, ces cov tib neeg zoo li no yuav tsum raug ntsaig tawm mus los sis ntiab tawm mus. Qhov no yog cov thawj coj pawg ntseeg lub luag hauj lwm.

Peb tau sib qhia ntau heev txog tej kev coj thiab tej kev qhia tshwm uas pom tau meej ntawm cov uas sib tawm tsam thiab sib cav sib ceg. Nyuam qhuav no peb kuj tau soj ntsuam me ntsis thiab sib qhia txog lawv txoj kev ua neeg, qhov no ua rau nej muaj kev paub cais ntau ntxiv txog lawv, thiab ua rau nej feem coob paub txog tias muaj dab tsi tshwm sim thiab paub cais lawv kom ncav sij hawm thaum lawv hais lus thiab ua tej yam. Nej yim to taub thiab paub lub ntsiab tseeb ntawm cov tib neeg no ntau npaum li cas, nej yim paub cais lawv tau sai npaum li ntawd, thiab yog li ntawd nej yuav raug lawv cuam tshuam tsawg zuj zus. Nej feem coob tsim nyog paub meej txog qhov kev puas tsuaj uas cov uas sib tawm tsam thiab sib cav sib ceg ua rau lub neej hauv pawg ntseeg thiab rau cov neeg Vajtswv xaiv tseg. Cov tib neeg zoo li no yuav tsis thim xav txog lawv tus kheej thiab tsis tso kev sib tawm tsam tseg li. Yog lawv tsis raug daws thiab ntsaig tawm mus kom sai, lawv yuav ua rau muaj tej kev tab kaum thiab kev cuam tshuam tsis tu ncua rau lub neej hauv pawg ntseeg. Yog li ntawd, qhov daws thiab ntsaig cov tib neeg zoo li no tawm mus yog ib teg hauj lwm tseem ceeb heev rau cov thawj coj pawg ntseeg thiab yuav tsum tsis txhob tsis quav ntsej.

Lub Rau Hli Ntuj Hnub Tim 5, Xyoo 2021