Cov Thawj Coj thiab Cov Neeg Ua Hauj Lwm Tej Luag Hauj Lwm (16)

Yam Kaum Ob: Txheeb Ntau Hom Tib Neeg, Xwm Txheej, thiab Yam Khoom uas Tab Kaum thiab Cuam Tshuam Vajtswv Tes Hauj Lwm thiab Qhov Raws Qib Raws Duas uas Ib Txwm Muaj ntawm Pawg Ntseeg Kom Ncav Sij Hawm thiab Kom Yog; Cheem thiab Txwv Lawv, thiab Hloov Txhua Yam Kom Zoo Dua; Tsis Tas Li Ntawd Xwb, Qhia Qhov Tseeb Kom Cov Neeg Vajtswv Xaiv Tseg Thiaj Li Paub Cais Tej Yam Zoo Li No thiab Kawm Paub Los Ntawm Tej Yam Zoo Li No (Ntu Plaub)

Ntau Hom Tib Neeg, Xwm Txheej, thiab Yam Khoom Uas Tab Kaum thiab Cuam Tshuam Lub Neej Hauv Pawg Ntseeg

VIII. Tshaj Tawm Tej Kev Xav Phem

A. Tej Kev Qhia Tshwm Uas Pom Tau Meej ntawm Kev Tshaj Tawm Tej Kev Xav Phem

Hnub no peb yuav sib qhia ntxiv txog cov thawj coj thiab cov neeg ua hauj lwm lub luag hauj lwm yam kaum ob: “Txheeb ntau hom tib neeg, xwm txheej, thiab yam khoom uas tab kaum thiab cuam tshuam Vajtswv tes hauj lwm thiab qhov raws qib raws duas uas ib txwm muaj ntawm pawg ntseeg kom ncav sij hawm thiab kom yog; cheem thiab txwv lawv, thiab hloov txhua yam kom zoo dua; tsis tas li ntawd xwb, qhia qhov tseeb kom cov neeg Vajtswv xaiv tseg thiaj li paub cais tej yam zoo li no thiab kawm paub los ntawm tej yam zoo li no.” Hais txog ntau yam teeb meem ntawm tej kev tab kaum thiab kev cuam tshuam uas tshwm sim nyob rau hauv lub neej hauv pawg ntseeg, peb tau teev tawm kaum ib qho. Zaum tas los ntawd peb tau sib qhia txog qhov teeb meem xya: koom kev sib tawm tsam thiab kev sib cav sib ceg. Hnub no, peb yuav sib qhia txog qhov teeb meem yim: tshaj tawm tej kev xav phem. Kev tshaj tawm tej kev xav phem kuj pheej tshwm sim nyob rau hauv lub neej hauv pawg ntseeg thiab. Ib txhia tib neeg uas tsis lees txais qhov tseeb kiag li, ntseeg Vajtswv raws li lawv tej kev xav phem thiab tej kev xav hauv nruab siab, thiab lawv pheej tshaj tawm qee cov kev xav phem los cuam tshuam lub neej hauv pawg ntseeg tas li. Pawg ntseeg yuav tsum txwv txoj kev coj no thiab daws los ntawm kev sib qhia qhov tseeb nyob rau hauv lub neej hauv pawg ntseeg. Saib raws li cov lus sau cia, leej twg los yeej pom tau tias kev tshaj tawm tej kev xav phem tsis yog ib txoj kev coj uas tsim nyog, tias tsis yog ib yam uas zoo tiam sis yog ib yam uas tsis zoo. Yog li ntawd, qhov ntawd yuav tsum raug cheem thiab txwv nyob rau hauv lub neej hauv pawg ntseeg. Txawm yog hom neeg twg tshaj tawm tej kev xav phem los xij, txawm lawv txoj kev npaj siab yog dab tsi los xij, txawm lawv txhob txwm los sis tsis yog txhob txwm tshaj tawm tej kev xav phem los xij, tsuav lawv tshaj tawm tej kev xav phem xwb, ces qhov ntawd yuav tab kaum thiab cuam tshuam lub neej hauv pawg ntseeg, ua rau muaj kev cuam tshuam uas tsis zoo. Yog li ntawd, qhov teeb meem no yuav tsum raug txwv ib puas feem pua. Txawm saib los ntawm kis twg los los xij, kev tshaj tawm tej kev xav phem yeej tsis tuaj yeem ua tau ib qho hauj lwm uas zoo nyob rau hauv tib neeg txoj kev caum qhov tseeb, kev caum kom paub Vajtswv, los sis lawv txoj kev nkag mus rau hauv qhov tseeb qhov muaj tiag; qhov ntawd tsuas ua tau txoj hauj lwm uas cuam tshuam thiab ua kom puas tsuaj rau tej no xwb. Yog li ntawd, thaum muaj ib tug neeg twg tshaj tawm tej kev xav phem nyob rau hauv lub neej hauv pawg ntseeg, txhua tus—cov thawj coj pawg ntseeg thiab cov kwv tij thiab cov muam ib yam nkaus—yuav tsum paub cais qhov teeb meem no thiab sawv los cheem thiab txwv tus neeg ntawd kom ncav sij hawm, es tsis yog tso cai rau lawv tshaj tawm tej kev xav phem los coj lwm tus mus yuam kev thiab cuam tshuam lwm tus yam dig muag ntsuav. Cia peb xub sib qhia txog tias cov lus twg thiaj li yog kev tshaj tawm tej kev xav phem. Thaum muaj txoj kev paub cais txog qhov no lawm, tib neeg thiaj li tuaj yeem tshab txhais kom yog tias kev tshaj tawm tej kev xav phem yog dab tsi thiab kuj muaj peev xwm cheem thiab txwv qhov ntawd tau kom yog thiab, hos tsis yog ua txuj tsis pom thiab tsis quav ntsej txog qhov ntawd.

1. Kev Tshaj Tawm Tej Kev Xav Phem Txog Vajtswv

Tej kev xav phem uas raug tshaj tawm ntawd yeej muaj cov uas raug tsom ntsoov rau. Ua ntej, peb yuav tsum saib tias tej ntawd tsom ntsoov rau leej twg thiab tej kev xav phem twg uas tab tom tshaj tawm. Qhov to taub tej no yuav pab koj paub tias cov lus twg uas tib neeg hais thiab tej kev xam pom twg uas tib neeg tshaj tawm yog tej kev xav phem. Qhov paub tias cov lus twg yog tib neeg tej kev xav phem thiab tej kev ua twg yog kev tshaj tawm tej kev xav phem yuav ua rau tib neeg muaj peev xwm txwv txoj kev tshaj tawm tej kev xav phem kom raug dua thiab tsom ncaj qha dua. Ua ntej tshaj plaws, kev tshaj tawm tej kev xav phem uas hnyav tshaj plaws yog muaj feem xyuam txog tib neeg tej kev xav thiab tej kev to taub yuam kev txog Vajtswv. Qhov no yog ib hom loj. Kev tshaj tawm tej kev xam pom thiab cov lus hais uas tsis muaj tseeb txog qhov Vajtswv yog leej twg tiag tiag, Vajtswv lub ntsiab tseeb, Vajtswv tus moj yam, Vajtswv cov lus, Vajtswv tes hauj lwm, thiab qhov uas Vajtswv muaj nyob ntawd puav leej yog kev tshaj tawm tej kev xav phem. Qhov no yog ib kab lus hais dav dav; muab hais ntxaws ntxaws, cov lus zoo li cas thiaj li yog kev tshaj tawm tej kev xav phem? Kev tshaj tawm tej kev to taub yuam kev txog Vajtswv, tej kev txiav txim thiab kev teem txim rau Vajtswv, thiab haj tseem yog tej lus tuam mom Vajtswv ntawd puav leej yog kev tshaj tawm tej kev xav phem. Muab hais kom yooj yim tias, kev tshaj tawm tej kev to taub txog Vajtswv uas tsis mus raws li qhov muaj tiag thiab cov lus hais thiab tej kev txhais yuam kev uas tsis mus raws li qhov Vajtswv yog leej twg tiag tiag thiab Nws lub ntsiab tseeb puav leej yog kev tshaj tawm tej kev xav phem. Piv txwv li, nyob rau hauv lub neej hauv pawg ntseeg, ib txhia tib neeg pheej tham txog qhov Vajtswv yog leej twg tiag tiag thiab Vajtswv lub ntsiab tseeb. Lawv tsis muaj ib txoj kev to taub tseeb tiag txog qhov Vajtswv yog leej twg tiag tiag thiab Nws lub ntsiab tseeb. Lawv pheej ua xyem xyav thiab to taub yuam kev rau Vajtswv nyob rau hauv lawv lub siab, lawv zwm tsis tau rau qhov xwm txheej ua neej nyob thiab qhov xwm txheej uas ua lawv tej dej num uas Vajtswv npaj rau lawv, nrog rau lwm yam ntxiv. Ces tom qab ntawd lawv thiaj li tshaj tawm lawv tej kev to taub yuam kev txog Vajtswv thiab lawv tej kev xav txog qhov uas tsis to taub Vajtswv. Muab hais kom luv luv tias, tej kev xav no tsis yog hais txog kev lees txais thiab zwm rau Vajtswv lub hwj chim kav thiab kev npaj los ntawm ib tug tib neeg uas raug tsim tawm los qhov kev xam pom, tiam sis muaj tus kheej tej kev xav tsis ncaj, tej kev to taub yuam kev, thiab haj tseem muaj tej kev txiav txim thiab kev teem txim puv npo thiab. Tom qab hnov tej no lawm, lwm tus tib neeg muaj tej kev to taub yuam kev txog Vajtswv thiab kev ceev faj txog Nws, yog li ntawd thiaj li poob lawv txoj kev ntseeg Vajtswv tseeb tiag, ces tsis tas yuav hais txog qhov muaj txoj kev zwm rau tiag tiag lawm.

Ib txhia tib neeg xav hais tias kev ntseeg Vajtswv yuav tsum coj tau kev thaj yeeb nyab xeeb thiab kev xyiv fab los, thiab tias yog lawv ntsib tej xwm txheej, lawv tsuas yuav tsum thov Vajtswv xwb ces Vajtswv yuav mloog, pub hmoov hlub thiab koob hmoov rau lawv, thiab ua kom txhua yam mus tau thaj yeeb thiab zoo rau lawv. Lawv lub hom phiaj ntawm txoj kev ntseeg Vajtswv yog los nrhiav hmoov hlub, kom tau koob hmoov, thiab xyiv fab rau kev thaj yeeb nyab xeeb thiab kev zoo siab. Yog vim tej kev xam pom no lawv thiaj li tso lawv tsev neeg tseg los sis tso lawv tes hauj lwm tseg los muab lawv tus kheej fij rau Vajtswv thiab tuaj yeem tiv kev txom nyem thiab them tus nqi. Lawv ntseeg hais tias tsuav lawv tso tej yam tseg, muab lawv tus kheej fij rau Vajtswv, tiv kev txom nyem, thiab siv zog ua hauj lwm, qhia txoj kev coj uas zoo tshaj plaws tshwm xwb, ces lawv yuav tau txais Vajtswv cov koob hmoov thiab txoj kev nyiam lawm, thiab tias txawm lawv yuav ntsib kev nyuaj dab tsi los xij, tsuav lawv thov Vajtswv xwb, Nws yuav daws tej ntawd thiab qhib ib txoj kev rau lawv nyob hauv txhua yam. Qhov no yog txoj kev xam pom ntawm tib neeg feem coob uas ntseeg Vajtswv. Tib neeg xav hais tias txoj kev xam pom no yog qhov tsim nyog thiab yog lawm. Qhov uas ntau tus tib neeg muaj peev xwm tuav lawv txoj kev ntseeg Vajtswv tau ntau xyoo yam tsis tso lawv txoj kev ntseeg tseg ntawd muaj feem xyuam ncaj qha nrog txoj kev xam pom no. Lawv xav hais tias, “Kuv twb muab kuv tus kheej fij rau Vajtswv ntau npaum li no lawm, kuv txoj kev coj twb zoo npaum li no lawm, thiab kuv tsis tau ua ib qho kev ua phem li; Vajtswv yeej yuav foom koob hmoov rau kuv xwb xwb. Vim kuv tau raug kev txom nyem ntau heev thiab them ib tug nqi loj heev rau txhua tes hauj lwm, thiab ua txhua yam raws li Vajtswv cov lus thiab tej kev cheem tsum yam tsis ua yuam kev ib qho li, yog li Vajtswv yuav tsum foom koob hmoov rau kuv; Nws yuav tsum ua kom txhua yam mus tau zoo rau kuv, thiab kom kuv muaj kev thaj yeeb nyab xeeb thiab kev xyiv fab hauv kuv lub siab tas li, thiab xyiv fab nrog qhov uas Vajtswv nrog nraim kuv nyob.” Qhov no tsis yog tib neeg tej kev xav phem thiab tej kev xav hauv nruab siab lod? Saib los ntawm tib neeg txoj kev xam pom, tib neeg xyiv fab rau Vajtswv txoj hmoov hlub thiab tau txais txiaj ntsim, yog li ntawd qhov tiv kev txom nyem me ntsis rau qhov no mas yeej tsim nyog, thiab qhov muab tau txoj kev txom nyem no pauv Vajtswv cov koob hmoov mas yeej muaj nqis. Qhov no yog ib txoj kev xav ntawm kev nrog Vajtswv ua lag luam. Txawm li cas los xij, los ntawm qhov kev xam pom ntawm qhov tseeb thiab los ntawm Vajtswv qhov kev xam pom mas, qhov no yeej tsis mus raws li tej hauv paus ntsiab lus ntawm Vajtswv tes hauj lwm thiab tsis mus raws li cov qauv uas Vajtswv cheem tsum ntawm tib neeg li. Qhov ntawd tsuas yog kev xav raws li tib neeg lub siab nyiam tag nrho xwb, tsuas yog tib neeg tej kev xav phem thiab tej kev xav hauv nruab siab txog txoj kev ntseeg Vajtswv xwb. Txawm hais tias qhov ntawd yog kev nrog Vajtswv ua lag luam los sis thov tej yam ntawm Vajtswv, los sis muaj tib neeg tej kev xav phem thiab tej kev xav hauv nruab siab los xij, txawm yuav hais li cas los xij, tsis muaj ib qho twg uas mus raws li Vajtswv tej kev cheem tsum, thiab qhov ntawd ua tsis tau raws li Vajtswv tej hauv paus ntsiab lus thiab cov qauv rau kev foom koob hmoov rau tib neeg. Tshwj xeeb tshaj yog, txoj kev xav thiab kev xam pom ntawm kev ua lag luam no ua txhaum rau Vajtswv tus moj yam, tiam sis tib neeg tsis paub txog qhov ntawd li. Thaum yam uas Vajtswv ua tsis mus raws li tib neeg tej kev xav phem, lawv cia li muaj kev yws thiab tej kev to taub yuam kev txog Nws nyob hauv lawv lub siab sai heev. Lawv haj tseem xav tias lawv raug ua tsis ncaj ncees rau, ces pib cav nrog Vajtswv, thiab lawv haj tseem txiav txim thiab teem txim rau Nws thiab. Txawm tib neeg yuav muaj tej kev xav phem thiab tej kev to taub yuam kev dab tsi los xij, los ntawm Vajtswv qhov kev xam pom mas, Nws yeej tsis ua los sis coj rau leej twg raws li tib neeg tej kev xav phem los sis tej kev ntshaw li. Vajtswv yeej ib txwm ua yam uas Nws xav ua, raws li Nws tus kheej txoj kev thiab raws li Nws tus kheej tus moj yam lub ntsiab tseeb. Vajtswv muaj tej hauv paus ntsiab lus nyob hauv txoj kev uas Nws coj rau txhua tus tib neeg; tsis muaj ib yam dab tsi uas Nws ua rau txhua tus tib neeg raws li tib neeg tej kev xav phem, tej kev xav hauv nruab siab, los sis tej kev nyiam—qhov no yog qhov ntawm Vajtswv tes hauj lwm uas tsis mus raws li tib neeg tej kev xav phem tshaj plaws. Thaum Vajtswv tseeb tsa ib qho xwm txheej rau tib neeg uas tsis haum nrog lawv tej kev xav phem thiab tej kev xav hauv nruab siab tag nrho, lawv muaj tej kev xav phem, tej kev txiav txim, thiab kev teem txim rau Vajtswv nyob hauv lawv lub siab, thiab haj tseem yuav tsis lees paub Nws thiab. Lub sij hawm ntawd Vajtswv puas yuav ua raws li lawv tej kev tim tsum? Yeej tsis ua kiag li. Vajtswv yuav tsis muaj hnub hloov Nws txoj kev ua hauj lwm thiab Nws tej kev ntshaw raws li tib neeg tej kev xav phem li. Yog li leej twg thiaj li yog tus uas yuav tsum tau hloov? Yog tib neeg. Tib neeg yuav tsum tso lawv tej kev xav phem tseg, lees txais, zwm rau, thiab ntsib pom tej xwm txheej uas Vajtswv tau teeb tsa, thiab nrhiav qhov tseeb los daws lawv tus kheej tej kev xav phem, hos tsis txhob muab yam uas Vajtswv ua los ntsuas raws li lawv tej kev xav phem los saib seb qhov ntawd puas yog. Thaum tib neeg tuav rawv lawv tej kev xav phem ntawd, lawv muaj kev tawm tsam rau Vajtswv—qhov no yog ib yam uas ib txwm muaj. Lub hauv paus ntawm txoj kev tawm tsam nyob qhov twg? Qhov ntawd nyob rau qhov muaj tseeb tias yam uas tib neeg pheej muaj nyob tas li hauv lawv lub siab yam tsis ua xyem xyav li ces yog lawv tej kev xav phem thiab tej kev xav hauv nruab siab hos tsis yog qhov tseeb. Yog li ntawd, thaum ntsib Vajtswv tes hauj lwm uas tsis mus raws li tib neeg tej kev xav phem, tib neeg thiaj li tuaj yeem tawm tsam Vajtswv thiab txiav txim rau Nws. Qhov no ua pov thawj tias tib neeg yeej tsis muaj lub siab zwm rau Vajtswv hlo li, lawv tus moj yam qias vuab tsuab tseem nyob deb heev ntawm qhov raug ntxuav kom dawb huv, thiab ntawm lub hauv paus mas lawv yeej tseem ua neej nyob raws li lawv tus moj yam qias vuab tsuab xwb. Lawv tseem nyob deb dhau ntawm qhov tau txais kev cawm dim.

Thaum tib neeg muaj tej kev xav phem txog Vajtswv thiab muaj kev tawm tsam rau Nws nyob hauv lawv lub siab, cov uas muaj lub siab txawj xav me ntsis yuav lees txais yam uas Vajtswv ua yam tsis tshua txaus siab thiab sim yoog raws rau hauv qhov xwm txheej uas Vajtswv tau teeb tsa thiab lees txais Nws lub hwj chim kav tib neeg. Tib neeg muaj peev xwm tso tau tej kev xav phem ntau npaum li cas thiab tso tau mus txog theem twg ntawd mas, ib kis yog nyob ntawm lawv lub peev xwm, thiab lwm kis yog nyob ntawm seb lawv puas lees txais qhov tseeb thiab puas yog cov tib neeg uas nyiam qhov tseeb. Ib txhia tib neeg ua tus pib yam nquag plias mus tim ntsej tim muag rau tej xwm txheej uas Vajtswv teeb tsa los ntawm kev nyeem Vajtswv cov lus, nrhiav thiab sib qhia, thiab ua tib zoo xav. Lawv maj mam tau txais qee txoj kev to taub txog Vajtswv lub hwj chim kav txhua yam thiab yog li ntawd thiaj li ua rau lawv txoj kev zwm rau thiab kev ntseeg loj hlob tuaj. Txawm li cas los xij, ib txhia tib neeg, txawm lawv yuav ntsib xwm txheej dab tsi los xij, lawv tsis nrhiav qhov tseeb. Tiam sis, lawv ntsuas txhua qhov xwm txheej uas Vajtswv npaj raws li lawv tej kev xav phem, tej kev xav hauv nruab siab, thiab seb qhov ntawd puas muaj txiaj ntsim rau lawv. Lawv tej kev xav yeej yog ncig txog lawv tus kheej tej txiaj ntsim xwb; lawv yeej quav ntsej txog tias lawv yuav tau txais txiaj ntsig loj npaum li cas, yuav txaus siab npaum li cas rau lawv tej txiaj ntsim thaum hais txog ntawm cov khoom siv, nyiaj txiag, thiab kev xyiv fab ntawm sab cev nqaij daim tawv tas li; thiab lawv yeej txiav txim siab thiab coj rau txhua yam uas Vajtswv npaj raws li tej yam no tas li. Thiab thaum kawg, tom qab xav ntau zaus lawm, lawv xaiv tsis zwm rau qhov xwm txheej uas Vajtswv tau teeb tsa tiam sis khiav thiab zam qhov ntawd. Vim lawv txoj kev tawm tsam, kev tsis lees txais, thiab kev zam, lawv thiaj li nyob deb ntawm Vajtswv cov lus, plam txoj kev ntsib kev pom lub neej txoj sia, thiab raug kev puas tsuaj, uas coj kev mob thiab kev tsim txom los rau lawv lub siab. Lawv yim tawm tsam tej xwm txheej zoo li no, lawv yim tiv kev txom nyem ntau dua thiab loj dua. Thaum muaj ib qho xwm txheej zoo li no tshwm sim tuaj, ces txoj kev ntseeg me me uas lawv muaj rau Vajtswv ntawd thaum kawg yuav raug rhuav tshem lawm. Lub sij hawm no, tej kev xav phem uas kav lawv lub siab cia li tshwm tuaj ua ke: “Kuv twb muab kuv tus kheej fij rau vajtswv tau ntev npaum li no lawm, tiam sis kuv tsis xav tias vajtswv yuav coj li no rau kuv. Vajtswv tsis ncaj ncees, nws tsis hlub tib neeg! Vajtswv tau hais tias cov uas muab lawv tus kheej fij rau Nws tiag tiag yeej yuav tau txais koob hmoov loj heev. Kuv twb muab kuv tus kheej fij rau vajtswv tiag tiag lawm, kuv twb tso kuv tsev neeg thiab hauj lwm tseg, tiv kev txom nyem, thiab siv zog ua hauj lwm hnyav lawm—vim li cas vajtswv thiaj li tsis foom koob hmoov loj heev rau kuv? Vajtswv cov koob hmoov nyob qhov twg? Vim li cas kuv thiaj li hnov tsis tau los sis pom tsis tau tej ntawd? Vim li cas vajtswv thiaj li coj tsis ncaj ncees rau tib neeg? Vim li cas vajtswv thiaj li tsis ua raws li nws lo lus? Tib neeg hais tias vajtswv mas ntseeg siab tau, tiam sis vim li cas kuv ho hnov tsis tau qhov ntawd? Tsis hais txog lwm yam, tsuas yog hais txog qhov xwm txheej no xwb, kuv yeej tsis hnov tias vajtswv mas ntseeg siab tau kiag li!” Vim tib neeg muaj tej kev xav phem, lawv thiaj li raug tej ntawd dag thiab coj yuam kev yam yooj yim. Txawm thaum Vajtswv teeb tsa tej xwm txheej rau tib neeg tus moj yam kev hloov pauv thiab rau lawv lub neej txoj sia kev loj hlob los xij, lawv pom tias nyuaj lees txais thiab lawv to taub yuam kev rau Vajtswv. Lawv xav tias qhov no tsis yog Vajtswv cov koob hmoov thiab tias Vajtswv tsis nyiam lawv. Lawv ntseeg hais tias lawv twb muab lawv tus kheej fij rau Vajtswv tiag tiag lawm, tiam sis Vajtswv tsis ua raws li Nws cov lus cog tseg. Cov tib neeg uas tsis caum qhov tseeb no thiaj li raug nthuav tawm yam yooj yooj yim los ntawm ib qho kev sim siab hauv qhov xwm txheej me me no. Thaum lawv raug nthuav tawm, thaum kawg lawv thiaj li hais yam uas lawv xav hais tshaj plaws: “Vajtswv tsis ncaj ncees. Vajtswv tsis yog ib tug vajtswv uas ntseeg siab tau. Vajtswv cov lus tsis tshua muaj tiav. Vajtswv hais tias, ‘Vajtswv ua li Nws hais, yam Nws hais lawm yuav tsum tiav thiab yam uas Nws ua yuav nyob mus ib txhis.’ Qhov uas ua tiav cov lus no nyob qhov twg? Vim li cas kuv thiaj li pom tsis tau los sis hnov tsis tau qhov ntawd? Saib tus neeg ntawd: Txij thaum ntseeg vajtswv los, nws tsis tau tso tseg los sis muab nws tus kheej fij rau vajtswv ntau npaum li kuv, thiab nws kuj tsis tau fij dab tsi ntau npaum li kuv thiab. Tiam sis nws cov me nyuam tau nkag mus kawm hauv cov tsev kawm qib siab uas muaj koob npe, nws tus txiv tau nce hauj lwm, lawv txoj kev ua lag luam los zoo zuj zus, thiab txawm yog lawv cov qoob loo los tseem tau ntau dua lwm tus li thiab. Thiab kuv tau txais dab tsi? Kuv yuav tsis ntseeg vajtswv ntxiv lawm!” Cov lus no yog cov tib neeg no tej kev xav uas tseeb, lawv tej lus coj qhia tus kheej. Lawv muaj tej kev xav phem no puv npo, muaj tej kev xav thiab tej kev xam pom uas tsis muaj qab hau no puv npo, thiab muaj tej kev xav txog tej txiaj ntsim thiab tej kev sib pauv mus los no puv npo. Qhov no yog qhov uas lawv to taub thiab paub Vajtswv tes hauj lwm thiab Nws tej kev npaj siab uas siv zog heev, qhov no yog qhov uas lawv coj rau tej yam no. Yog li ntawd, nyob hauv tej xwm txheej uas Vajtswv siv zog teeb tsa zaum tag zaum thiab ntawd, lawv pheej muab Vajtswv ntsuas thiab to taub yuam kev rau Nws raws li lawv tej kev xav phem, thiab pheej ua tsis tiav thiab ntog tas li. Tsis tas li ntawd xwb, lawv pheej sim ua kom paub tseeb tias lawv tej kev xav phem ntawd yog lawm. Thaum lawv ntseeg hais tias tej kev xav phem no raug ua kom paub tseeb lawm thiab yog cov pov thawj txaus rau lawv los lam tau lam ntsuas, txiav txim, thiab teem txim rau Vajtswv, ces lawv pib tshaj tawm tej kev xav phem, vim lawv lub siab muaj tej kev xav phem txog Vajtswv puv nkaus. Muaj dab tsi xyaw nyob rau hauv tej kev xav phem no? Qhov ntawd yog tej lus yws, kev tsis txaus siab, thiab kev tu siab tias raug ua tsis ncaj ncees rau. Thaum lawv muaj tej yam no puv nkaus, lawv nrhiav cib fim los hais tawm. Lawv cia siab tias yuav nrhiav tau ib pab neeg uas yuav mloog “tej kev tsis ncaj ncees” uas lawv ntsib; lawv xav hais tej yam no tawm rau cov tib neeg no thiab qhia rau lawv txog qhov uas hu ua kev coj tsis ncaj ncees uas lawv “raug” ntawd. Tej kev xav phem uas cov tib neeg no tshaj tawm tshwm sim zoo li no nyob hauv lub neej hauv pawg ntseeg, qhov no yog qhov uas tej kev xav phem zoo li no tshwm tuaj. Cov tib neeg no lub siab muaj txoj kev tu siab tias raug ua tsis ncaj ncees rau puv nkaus, muaj kev tawm tsam thiab kev tsis txaus siab puv nkaus, nrog rau tej kev to taub yuam kev thiab kev yws txog Vajtswv, thiab haj tseem yog tej kev txiav txim thiab kev teem txim rau Vajtswv, uas thaum kawg ua rau lawv lub siab muaj kev tuam mom puv nkaus. Lawv ntshai tsam lawv yuav tsis tau koob hmoov thiab yog li ntawd lawv thiaj li tsis kam tawm mus, yog li ntawd lawv thiaj li tshaj tawm lawv tej kev to taub yuam kev txog Vajtswv thiab lawv txoj kev tsis txaus siab rau Nws nyob hauv cov tib neeg, thiab haj yam tshaj tawm lawv tej kev txiav txim thiab kev teem txim rau Vajtswv thiab lawv tej lus tuam mom Nws. Lawv tuam mom dab tsi? Lawv tuam mom Vajtswv, hais tias Nws tsis ncaj ncees rau lawv thiab tsis muab tej nqi zog uas tsim nyog thiab sib npaug rau yam uas lawv tau ua. Lawv txiav txim rau Vajtswv tias tsis pub hmoov hlub thiab koob hmoov loj heev rau lawv tom qab lawv tau muab khoom fij thiab them tus nqi lawm. Lawv tsis tau txais tej kev tim tsum ntawm sab cev nqaij daim tawv los ntawm Vajtswv los—cov khoom siv, nyiaj txiag, thiab ntau yam ntxiv—uas lawv cia siab tias yuav tau txais, yog li ntawd thiaj li ua rau lawv lub siab muaj lus yws thiab kev tu siab puv nkaus. Lawv lub hom phiaj uas tshaj tawm tej kev xav phem ntawd mas, nyob rau ib kis mas, yog los hais tawm thiab nrhiav kev ua pauj rov qab, yog li ntawd thiaj li ua tau kom lub siab nqig; thiab, nyob rau lwm kis mas, los txhawb kom tib neeg ntau ntxiv muaj tej kev to taub yuam kev thiab tej kev xav phem txog Vajtswv, yog li ntawd thiaj li ua rau cov tib neeg no ceev faj rau Vajtswv ib yam li lawv ua. Yog muaj tib neeg ntau ntxiv hais tias, “Peb yuav tsis ntseeg vajtswv ntxiv lawm,” lawv yuav hnov txaus siab nyob hauv lawv lub siab. Qhov no yog lub hom phiaj thiab lub hauv paus uas nyob tom qab ntawm lawv txoj kev tshaj tawm tej kev xav phem ntawd.

Cov lus uas cov tib neeg tshaj tawm tej kev xav phem nco ntsoov hais ntawd yog dab tsi? Qhov paj lug uas lawv nquag hais ntawd yog dab tsi? Tom qab ntsib qee yam xwm txheej thiab tsis tau txais tej txiaj ntsim uas lawv ntshaw, lawv pheej hais rau lawv tus kheej tas li hais tias, “Kuv yuav tsis ntseeg vajtswv ntxiv lawm.” Txawm tom qab hais li no lawm los, lawv tseem xav tias daws tsis tau lawv txoj kev ntxub los sis ua tsis tau tiav lawv lub hom phiaj. Thaum lawv tuaj koom kev sib txoos ua ke, txawm lwm tus yuav sib qhia txog dab tsi los xij, lawv mloog tsis nkag pob ntseg li. Lawv yuav tsum hais cov lus no dua, hais ob peb zaug, thiab haj tseem ntau tshaj kaum zaug thiab. “Kuv yuav tsis ntseeg vajtswv ntxiv lawm”—cov lus no tsis yog muaj ntsiab lus puv npo lod? Muaj ib zaj keeb kwm nyob tom qab cov lus no. Lawv qhov “kev ntseeg” yog dab tsi? Yav tas los yog lawv ntseeg Vajtswv lod? Lawv txoj kev ntseeg yav tas los ntawd puas yog kev ntseeg tiag tiag? Qhov ntawd puas muaj txoj kev zwm rau uas ib tug neeg uas raug tsim tawm los tsim nyog muaj? (Tsis muaj.) Tsis muaj kiag li. Lawv muaj tej kev xav phem thiab tej kev xav hauv nruab siab txog Vajtswv puv nkaus. Qhov tseem ceeb tshaj mas, lawv muaj tej kev thaij thov thiab tej kev xav tau los ntawm Vajtswv, yam tsis muaj ib qho kev zwm rau hlo li. Lawv qhov “kev ntseeg” ntawd txhais li cas? “Kuv ntseeg hais tias vajtswv yog tus uas muaj hwj chim kav saum ntuj thiab ntiaj teb thiab tag nrho txhua yam. Kuv ntseeg hais tias vajtswv tuaj yeem tiv thaiv kuv kom tsis txhob raug lwm tus thab. Kuv ntseeg hais tias vajtswv tuaj yeem cia kuv xyiv fab rau kev tau zoo ntawm sab cev nqaij daim tawv, ua ib lub neej zoo, muaj nyiaj muaj txiaj, thiab ua kom txhua yam mus tau thaj yeeb thiab zoo rau kuv. Kuv ntseeg hais tias vajtswv tuaj yeem cia kuv nkag mus rau hauv lub nceeg vaj saum ntuj ceeb tsheej thiab tau txais koob hmoov loj heev, tau txais ib puas npaug nyob hauv lub neej no, thiab tau txoj sia ntev dhawv mus ib txhis nyob rau hauv lub ntiaj teb uas yuav los tom ntej no!” Qhov no puas yog kev ntseeg? Tsis muaj ib qho kev zwm rau me me nyob hauv cov “kev ntseeg” no li, thiab tsis muaj ib qho uas mus raws li Vajtswv tej kev cheem tsum rau tib neeg li. Cov kev ntseeg no puav leej yog los ntawm qhov kev xam pom uas kom tus kheej tau txiaj ntsim xwb. Vajtswv nthuav qhov tseeb tawm thiab ua hauj lwm rau hauv tib neeg. Thaum twg Vajtswv tau hais lawm tias Nws yuav ua kom tib neeg ua tau ib lub neej uas muaj kev zoo siab, ua neej nyob siab dua lwm tus, los sis muaj nyiaj muaj txiaj thiab vam meej, nrog rau muaj lub neej tom ntej uas tsis muaj chaw kawg li? (Yeej tsis tau hais li.) Yog li vim li cas lawv thiaj li saib lawv tus kheej txoj “kev ntseeg” muaj nqis ua luaj? Lawv haj tseem hais tias lawv yuav tsis ntseeg Vajtswv ntxiv lawm. Lawv txoj kev ntseeg puas muaj nqis dab tsi? Vajtswv puas lees txais qhov ntawd? Lawv tsis muaj qhov tseeb qhov muaj tiag me me li, tsis muaj kev zwm rau Vajtswv me me li, tsuas xav tau koob hmoov, txiaj ntsim, thiab qhov zoo los ntawm Vajtswv los xwb, thiab lawv hu qhov no tias yog kev ntseeg Vajtswv. Qhov no tsis yog kev tuam mom Vajtswv lod? Cov tib neeg zoo li no muaj tej kev xav phem puv nkaus thiab raug txoj kev npaj siab uas xav tau koob hmoov ntawd kav lawm. Lawv tsis ntsib pom Vajtswv tes hauj lwm hlo li thiab tsis xyaum ua raws Vajtswv cov lus. Lub hom phiaj thiab lub hauv paus pib ntawm txhua yam uas lawv ua yog txhawm rau tej txiaj ntsim ntawm lawv tus kheej lub cev nqaij daim tawv tag nrho xwb. Lawv xav tias lawv tus kheej zoo heev thiab saib qhov uas lawv hu ua kev ntseeg Vajtswv ntawd muaj nqis heev. Yog koj txoj kev ntseeg Vajtswv muaj nqis thiab siab npaum li ntawd, es vim li cas, thaum Vajtswv teeb tsa ib qho qhov xwm txheej me me rau koj, koj thiaj li to taub tsis tau qhov tseeb los ntawm qhov ntawd los sis tuav tsis tau koj tej lus tim khawv khov kho? Qhov no yog ua li cas lawm? Thaum Vajtswv sim koj txoj kev ntseeg, koj muab dab tsi rov qab rau Vajtswv? Puas yog tej kev to taub yuam kev, kev yws, thiab kev tawm tsam uas koj muab rov qab rau Vajtswv ntawd yog yam uas Nws xav tau? Tej no puas mus raws li qhov tseeb? Pom tseeb tias, tej no tsis yog. Yog li ntawd, qhov uas cov tib neeg no tuaj yeem tshaj tawm tej kev xav phem nyob hauv pawg ntseeg yam qhib lug ntawd ua pov thawj rau ib yam: Lawv tsis paub Vajtswv thiab haj yam tsis ntseeg hais tias Vajtswv muaj hwj chim kav txhua yam—tus vajtswv uas lawv ntseeg ntawd yeej tsis muaj nyob hlo li. Thaum cov tib neeg no tshaj tawm tej kev xav phem los coj lwm tus mus yuam kev thiab ntxias kom muaj neeg ntau ntxiv los koom nrog lawv tawm tsam, teem txim, thiab tuam mom Vajtswv, lawv tab tom tab meeg tshaj tawm yam tsis nco paub hais tias lawv tsis yog cov uas raws Vajtswv qab lawm, tsis yog cov ntseeg lawm, thiab tsis yog cov neeg uas raug tsim tawm los uas nyob hauv tus Tswv Tsim txoj kev tswj fwm lawm. Tej kev xav phem uas lawv tshaj tawm ntawd tsis yog tej tswv yim los sis cov lus hais uas yooj yim; tiam sis, lawv twb tsim ib qho kev thaiv Vajtswv uas hla tsis tau nyob hauv lawv lub siab lawm, thiab lawv tau txiav txim siab hais tias qhov siv tib neeg tej kev xav phem thiab tej kev xav hauv nruab siab los coj rau Vajtswv, daws lawv txoj kev sib raug zoo nrog Vajtswv, thiab coj rau Vajtswv cov lus thiab Vajtswv tes hauj lwm ntawd mas yog lawm thiab yog txoj kev uas lawv yuav tsum xyaum ua raws. Thaum cov tib neeg zoo li no tab meeg tshaj tawm tej kev xav phem nyob hauv lub neej hauv pawg ntseeg ntawd, lawv puas tsim nyog raug txwv? Los sis, hais tias lawv lub siab ntseeg tseem me thiab lub hauv paus los tseem ntiav, es tsim nyog muab kev ywj pheej rau lawv los qhia tawm lawv tej kev xam pom thiab muab sij hawm thiab chaw txaus rau lawv los lees txim hloov dua siab tshiab? Txoj kev ua uas tsim nyog yog dab tsi? (Qhov cheem thiab txwv lawv yog qhov tsim nyog.) Vim li cas qhov cheem thiab txwv lawv ntawd thiaj li tsim nyog? Ib txhia tib neeg hais tias, “Yog koj txwv lawv thiab tsis cia lawv hais lus ywj pheej, es yog lawv tsis ntseeg thiab tsis tuaj koom kev sib txoos ua ke lawm, qhov ntawd tsis yog ua phem rau lawv lod? Qhov ntawd yuav yog ib qho uas khuv xim heev! Vajtswv tsis yog xav cawm txhua tus tib neeg es tsis xav kom muaj ib tug tib neeg raug kev puas tsuaj lod? Tab txawm yog ib tug yaj uas ploj lawm los yuav tsum tau mus nrhiav rov qab los—tom qab siv zog nrhiav tus yaj uas ploj lawm rov qab los, Nws puas tseem yuav cia tus yaj ntawd ploj dua?” Cov lus no puas yog? (Tsis yog.) Vim li cas thiaj li tsis yog? (Vim cov tib neeg zoo li no tsis ntseeg Vajtswv tiag tiag; lawv tsuas ntseeg Vajtswv vim cia siab tias yuav tau koob hmoov xwb, thiab lawv txoj kev ntseeg muaj tej yam tsis huv xyaw rau hauv.) Leej twg thiaj li tsis muaj tej yam tsis huv xyaw rau hauv lawv txoj kev ntseeg Vajtswv? Koj tsis muaj thiab lod? Qhov no puas yog ib lub laj thawj uas tsim nyog? Koj saib cov tib neeg zoo li no cov lus: “Kuv yuav tsis ntseeg vajtswv ntxiv lawm.” Cov no yog hom lus dab tsi? Puas muaj qhov txawv ntawm cov lus no thiab cov lus tuam mom ntawm cov ib txwm tsis ntseeg, cov dab, thiab Ntxwgnyoog? (Tsis muaj.) Lub ntsiab lus ntawm cov lus no yog dab tsi? “Kuv tsis muaj kev ntseeg rau vajtswv ntxiv lawm. Yav tas los, kuv tau ntseeg thiab raws vajtswv qab tag nrho kuv lub siab, tiam sis vajtswv tsis foom koob hmoov rau kuv. Tiam sis, nws tau teeb tsa tej xwm txheej zoo li ntawd los ua kom nyuaj rau kuv thiab ua rau kuv ntog. Yam uas vajtswv hais tsis mus raws li yam uas nws ua hlo li, yog li ntawd kuv thiaj li tsis muaj cuab kav ntseeg vajtswv ntxiv lawm! Yav tas los kuv ruam dhau lawm. Kuv tau tso tseg, muab kuv tus kheej fij rau, thiab tiv kev txom nyem ntau heev rau vajtswv, tiam sis tsis pom kev tiv thaiv los ntawm vajtswv thaum kuv raug tus zaj loj liab ploog ntes thiab tsim txom. Kuv tsev neeg txoj kev ua lag luam kuj tsis zoo li lwm tus li, kuv khwv tsis tau nyiaj ntau npaum li lwm tus, thiab kuv niam kuv txiv tseem muaj mob. Kuv tsis tau txais dab tsi los ntawm txoj kev ntseeg vajtswv tau ntau xyoo li. Tsis yog vajtswv hais tias nws yuav foom koob hmoov loj heev rau tib neeg lod? Kuv tau txais koob hmoov dab tsi los ntawm vajtswv? Vajtswv cov lus yeej tsis tshwm sim muaj tseeb hlo li, yog li ntawd kuv yuav tsis ntseeg vajtswv ntxiv lawm!” Cov lus hais tias “Kuv yuav tsis ntseeg vajtswv ntxiv lawm!” muaj ntau yam zais nyob hauv. Qhov ntawd muaj tej kev yws, kev tsis txaus siab, thiab tej kev to taub yuam kev rau Vajtswv puv nkaus. Muab hais luv luv tias, tom qab lawv tiv kev txom nyem thiab muab lawv tus kheej fij rau los ntawm txoj kev xav raws li tus kheej siab nyiam lawm, Vajtswv tsis pub koob hmoov rau lawv raws li lawv tej kev thaij thov, thiab Vajtswv tsis tau them nqi los sis muab nqi zog rau lawv raws li lawv tej kev xav phem thiab tej kev xav hauv nruab siab, yog li ntawd lawv thiaj li tsis txaus siab thiab muaj kev chim siab puv nkaus rau Vajtswv, thiab lawv hais cov lus no tawm los nyob hauv tej xwm txheej zoo li no. Cov lus no tsis yog cia li tawm los xwb; thaum lawv hais cov lus no, lawv twb tau qhia tawm ntau txoj kev coj thiab tej kev qhia tshwm uas pom tau meej thiab tau raug nthuav tawm lawm. Cov tib neeg zoo li no txoj kev sib raug zoo nrog Vajtswv muaj teeb meem dab tsi lawm? Qhov teeb meem loj tshaj plaws nyob hauv lawv txoj kev sib raug zoo nrog Vajtswv yog dab tsi? Qhov ntawd yog qhov hais tias lawv yeej tsis saib lawv tus kheej li yog ib tug neeg uas raug tsim tawm los hlo li, thiab yeej tsis saib Vajtswv li yog tus Tswv Tsim los pe hawm ib qho me me li. Txij thaum pib lawv txoj kev ntseeg Vajtswv los, lawv saib Vajtswv li yog ib tsob ntoo nyiaj, ib lub txhab nyiaj txiag; lawv saib Vajtswv li yog ib tug Phau Xa los cawm lawv dim ntawm txoj kev txom nyem thiab kev puas tsuaj, thiab saib lawv tus kheej li yog ib tug uas raws tus Phau Xa, tus mlom no qab. Lawv xav hais tias qhov ntseeg Vajtswv ntawd zoo li qhov ntseeg Hauj Sam xwb, uas yog tsuas noj zaub, nyeem tej nqe vajluskub, thiab nquag hlawv xyab thiab txhos caug, ces lawv yeej tau txais yam uas lawv xav tau lawm. Yog li ntawd, txhua zaj keeb kwm uas tshwm sim tom qab lawv ntseeg Vajtswv ntawd puav leej tshwm sim nyob hauv ciaj ciam ntawm lawv tej kev xav phem thiab tej kev xav hauv nruab siab. Lawv tsis qhia tawm ib qho kev qhia tshwm uas pom tau meej ntawm ib tug neeg uas raug tsim tawm los uas lees txais qhov tseeb los ntawm tus Tswv Tsim li, thiab lawv tsis qhia tawm ib qho kev zwm rau uas ib tug neeg uas raug tsim tawm los tsim nyog muaj rau tus Tswv Tsim li; tsuas muaj kev thaij thov tas li, kev xam tas li, thiab kev xav tau tas li xwb. Thaum kawg tag nrho qhov no ua rau lawv txoj kev sib raug zoo nrog Vajtswv tawg. Txoj kev sib raug zoo zoo li no yog kev ua lag luam thiab yeej tsis muaj hnub sawv khov kho tau li; qhov ntawd tsuas yog tos sij hawm xwb uas cov tib neeg zoo li no raug nthuav tawm. Txawm hais tias lawv koom nrog lub neej hauv pawg ntseeg, tsis tshaj tawm tej kev xav phem, thiab qee zaus qhia txog tias Vajtswv tau coj lawv li cas, Vajtswv tau foom koob hmoov rau lawv li cas, lawv tau xyiv fab rau dab tsi, thiab lwm yam los, feem ntau ntawm yam uas lawv tham txog ntawd mas yog ntsig txog txoj hmoov hlub, kev xyiv fab, thiab tej txiaj ntsim ntawm sab cev nqaij daim tawv uas lawv tau txais los ntawm Vajtswv los. Cov kev sib tham no yeej tsis muaj feem xyuam nrog qhov tseeb thiab kev zwm rau Vajtswv hlo li, thiab tej ntawd yeej tsis muaj qhov tseeb qhov muaj tiag hlo li. Thaum xwm txheej zoo, lawv qhia tawm kev ntseeg rau Vajtswv thiab kev hlub rau Nws, thiab kev thev taus thiab kev ua siab ntev rau lwm tus tib neeg, tag nrho yog txhawm rau ua kom tiav ib lub hom phiaj: kom tau txais Vajtswv cov koob hmoov tag nrho. Thaum Vajtswv muab txoj hmoov hlub, tej txiaj ntsim, thiab tej txiaj ntsig ntawm sab khoom siv uas lawv xyiv fab rau ntawd tshem mus lawm, lawv tej kev xav phem thiaj li nthuav tawm tuaj. Cov tib neeg no uas raug txhawb los ntawm tus kheej tej txiaj ntsim thiab muab tus kheej tej txiaj ntsim tso ua ntej ntawd npau taws heev thaum lawv tsis tau txais yam uas lawv ntshaw; lawv pib tshaj tawm tej kev xav phem los hais tawm lawv txoj kev tsis txaus siab rau Vajtswv, tib lub sij hawm ntawd lawv kuj rub kom muaj neeg ntau ntxiv los khuv leej lawv thiab lees txais lawv tej kev xav phem txog Vajtswv ntawd. Cov tib neeg zoo li no puas tsim nyog raug cheem thiab txwv? (Tsim nyog.) Cov ncauj lus, tej kev xav, thiab tej kev xam pom uas lawv sib qhia tsis yog ib txoj kev to taub uas yog txog qhov tseeb, thiab tej ntawd tsis pab tib neeg zwm rau Vajtswv thiab muaj kev ntseeg tiag tiag rau Nws. Tiam sis, tej ntawd coj tib neeg kom nyob deb ntawm Vajtswv, ua rau muaj tej kev to taub yuam kev, kev ceev faj, thiab haj tseem yog kev tsis lees txais Vajtswv, thiab ua rau cov uas mloog tej kev xav phem uas cov tib neeg no tshaj tawm ntawd ceeb toom rau lawv tus kheej ntsiag to hais tias, “Kuv yuav tsis ntseeg vajtswv ntxiv lawm,” ib yam nkaus li lawv. Qhov no yog txoj kev cuam tshuam uas tej kev xav phem uas cov tib neeg zoo li no tshaj tawm ua rau lwm tus.

2. Kev Tshaj Tawm Tej Kev Xav Phem Txog Vajtswv Cov Lus Thiab Tes Hauj Lwm

Cov tib neeg uas tshaj tawm tej kev xav phem no siv lawv tus kheej tej kev xav phem los ntsuas Vajtswv cov lus, los ntsuas Vajtswv tes hauj lwm, thiab kuj los ntsuas Vajtswv lub ntsiab tseeb thiab Vajtswv tus moj yam thiab. Lawv ntseeg Vajtswv nyob hauv lawv tej kev xav phem, saib Vajtswv nyob hauv lawv tej kev xav phem, thiab soj ntsuam thiab tshawb xyuas kom meej txhua lo lus uas Vajtswv hais, txhua yam hauj lwm uas Vajtswv ua, thiab txhua qhov xwm txheej uas Vajtswv teeb tsa nyob hauv lawv tej kev xav phem. Thaum yam uas Vajtswv ua mus raws li lawv tej kev xav phem, lawv qhuas Vajtswv nrov nrov, hais tias Vajtswv ncaj ncees, Vajtswv yog tus uas ntseeg siab tau, thiab Vajtswv yog tus dawb huv. Thaum yam uas Vajtswv ua tsis mus raws li lawv tej kev xav phem, thiab lawv tej txiaj ntsim raug puas tsuaj hnyav, thiab lawv tiv kev mob loj heev, ces lawv sawv los tsis lees paub cov lus uas Vajtswv hais thiab tes hauj lwm uas Nws ua; lawv haj tseem tshaj tawm tej kev xav phem los txhawb kom muaj neeg ntau ntxiv los to taub yuam kev thiab ceev faj rau Vajtswv, hais tias, “Tsis txhob ntseeg vajtswv cov lus yam yooj yooj yim, thiab tsis txhob xyaum ua raws li vajtswv cov lus yam yooj yooj yim thiab; yog tsis li ntawd, yog koj raug siv thiab poob peev, ces yuav tsis muaj leej twg ris rau qhov ntawd,” thiab ntau yam ntxiv. Piv txwv li, Vajtswv hais tias, “Rau cov uas muab tus kheej fij rau Kuv tiag tiag, Kuv yuav foom koob hmoov rau koj ntau heev”—cov lus no tsis yog qhov tseeb lod? Cov lus no yog qhov tseeb ib puas feem pua. Cov lus no tsis muaj kev siab kub los sis kev dag ntxias. Cov lus no tsis yog lus dag los sis tej tswv yim uas hais loj hais nrov, thiab haj yam tsis yog ib hom kev qhuab qhia ntawm sab ntsujplig—cov lus no yog qhov tseeb. Lub ntsiab tseeb ntawm cov lus uas yog qhov tseeb no yog dab tsi? Qhov ntawd yog qhov uas koj yuav tsum muaj lub siab dawb paug thaum koj muab koj tus kheej fij rau Vajtswv. Lo lus “lub siab dawb paug” txhais li cas? Txaus siab hlo thiab tsis muaj tej yam tsis huv xyaw rau hauv; tsis yog ua kom tau nyiaj los sis koob meej, thiab muaj tseeb tias tsis yog txhawm rau tus kheej tej kev npaj siab, tej kev ntshaw, thiab tej hom phiaj. Koj muab koj tus kheej fij tsis yog vim koj raug yuam, los sis vim koj raug txhawb, raug ntxias, los sis raug rub mus koom, tiam sis, qhov ntawd yog tawm hauv koj los, yam txaus siab hlo; qhov ntawd tshwm sim los ntawm lub siab txawj xav thiab qhov laj thawj. Qhov no yog qhov uas txhais hais tias lub siab dawb paug. Hais txog ntawm txoj kev txaus siab hlo los muab tus kheej fij rau Vajtswv ntawd mas, qhov no yog qhov uas txhais hais tias lub siab dawb paug. Yog li ntawd, thaum muab koj tus kheej fij rau Vajtswv, qhov ua lub siab dawb paug ntawd qhia tshwm tawm los nyob hauv tej yam uas muaj tiag li cas? Koj tsis ua txoj kev dag ntxias los sis kev ua tsis ncaj, tsis siv tswv yim dag los zam kom dim hauj lwm, thiab tsis ua dog ua dig; koj muab tag nrho koj lub siab thiab lub ntsws rau, ua txhua yam li koj ua tau, thiab lwm yam ntxiv—muaj ntau yam ntxaws heev uas hais tsis txheeb nyob rau ntawm no! Muab hais luv luv tias, qhov lub siab dawb paug ntawd muaj qhov tseeb tej hauv paus ntsiab lus nyob hauv. Vajtswv tej kev cheem tsum rau tib neeg muaj ib tug qauv thiab lub hauv paus ntsiab lus. Ib txhia tib neeg hais tias, “Yog kuv muab kuv lub siab dawb paug thiab tag nrho kuv cov nyiaj khaws tseg uas tsawg tsawg ntawd fij rau hauv kuv txoj kev ntseeg vajtswv, kuv puas yuav tau txais ntau dua? Yog kuv tau txais ntau dua, ces qhov muab txhua yam fij ntawd mas yeej tsim nyog!” Tom qab muab fij lawm, lawv pom hais tias Vajtswv tsis foom koob hmoov rau lawv, ces lawv ua tib zoo xav txog qhov ntawd, xav hais tias: “Tej zaum kuv muab fij tsis tau txaus, yog li ntawd kuv yuav muab fij ntxiv. Kuv yuav tawm mus tshaj tawm txoj moo zoo.” Thaum lawv tshaj tawm txoj moo zoo es ntsib kev nyuaj, lawv thov Vajtswv. Qee zaus, thaum lawv tsis tau mov noj thiab pw tsis zoo, lawv yeej tseem thov Vajtswv mus ntxiv. Lawv xav hais tias: “Vajtswv tau hais tias cov uas muab lawv tus kheej fij rau Vajtswv tiag tiag yuav tau txais koob hmoov loj heev xwb xwb. Tej zaum kuv lub siab dawb paug no tseem tsis tau txaus, yog li ntawd kuv yuav thov Vajtswv mus ntxiv.” Los ntawm kev thov Vajtswv, lawv tau txais kev ntseeg thiab tsis ntshai txog qhov tiv kev txom nyem me me ntawd. Lawv pib pom qee qhov txiaj ntsig tiag tiag los ntawm txoj kev tshaj tawm txoj moo zoo thiab xav hais tias: “Tam sim no kuv muaj lub siab dawb paug me ntsis lawm. Kuv yuav maj nroos mus tsev mus saib seb kuv tsev neeg lub neej puas zoo dua qub lawm, seb kuv tus me nyuam tus mob puas zoo zog lawm, thiab seb tsev neeg txoj kev ua lag luam puas mus tau zoo—seb puas muaj koob hmoov los ntawm vajtswv los.” Qhov no puas yog qhov muab tus kheej fij rau Vajtswv tiag tiag? (Tsis yog.) Qhov no yog dab tsi? (Kev ua lag luam.) Qhov no yog kev nrog Vajtswv ua lag luam. Lawv tab tom siv lawv tus kheej txoj kev thiab yam uas lawv suav tias yog “lub siab dawb paug” raws li lawv tej kev xav phem los ua yam uas lawv xav ua, thiab kom tau txais yam uas lawv xav tau los ntawm qhov ntawd. Lawv siv “lub siab dawb paug” uas lawv to taub los ua kom paub tseeb txog cov lus uas Vajtswv hais no yam tsis tu ncua, pheej soj xyuas seb Vajtswv npaj siab yuav ua dab tsi tiag tiag, Nws tau ua dab tsi lawm, thiab Nws tsis tau ua dab tsi, thiab pheej kwv yees seb Vajtswv puas yuav foom koob hmoov rau lawv los sis tsis foom, thiab seb Nws puas npaj siab yuav foom koob hmoov loj heev rau lawv. Lawv pheej xam seb lawv tau muab dab tsi fij lawm thiab lawv tsim nyog tau txais ntau npaum li cas, seb Vajtswv puas tau muab qhov ntawd rau lawv thiab seb Vajtswv cov lus puas tau raug ua tiav lawm. Lawv pheej nrhiav tej uas muaj tseeb los sim Vajtswv lo lus hais no. Thaum muab lawv tus kheej fij rau Vajtswv ntawd, lawv yeej ib txwm xav ua kom paub tseeb seb Vajtswv cov lus no puas muaj tseeb. Lawv lub hom phiaj yog los saib seb qhov muab lawv tus kheej fij rau Vajtswv ntawd puas tuaj yeem tau Vajtswv cov koob hmoov. Lawv pheej sim Vajtswv tas li, yeej ib txwm xav pom Vajtswv cov koob hmoov los rau saum lawv tus kheej kom thiaj li ua tau pov thawj rau Nws cov lus. Thaum lawv pom hais tias Vajtswv cov lus tsis raug ua tiav yam yooj yim li lawv xav hauv nruab siab, thiab nws nyuaj los ua pov thawj rau qhov tseeb qhov cuav ntawm Vajtswv cov lus ntawd, ces lawv tej kev xav phem txog Vajtswv haj yam hnyav ntxiv. Nyob rau tib lub sij hawm ntawd, lawv pib ntseeg khov kho hais tias tsis yog txhua lo lus uas Vajtswv hais yeej yuav tsum yog qhov tseeb. Thaum muaj qhov no zais nyob rau hauv lawv lub siab lawm, lawv txawm pib ua xyem xyav thiab nug Vajtswv, ces thiaj li pheej muaj tej kev xav phem txog Nws tas li. Qee zaus, cov tib neeg uas lawv lub siab muaj tej kev xav phem puv npo no, tau nthuav qee qhov ntawm lawv tej kev xav phem txog Vajtswv tawm thaum ua lub neej hauv pawg ntseeg thiab sib cuag nrog cov kwv tij thiab cov nkauj muam. Lawv muaj tej kev xav phem txog Vajtswv cov lus thiab kuj siv lawv tej kev xav phem los ntsuas Vajtswv tes hauj lwm thiab. Thaum Vajtswv tes hauj lwm pheej tsis mus raws li lawv tej kev xav phem thiab txawv kiag ntawm lawv tej kev cia siab tag nrho lawm, lawv thiaj li tshaj tawm lawv tej kev xav phem los hais tawm lawv txoj kev tsis txaus siab rau Vajtswv. Piv txwv li, Vajtswv hais tias Nws tes hauj lwm twb los txog qhov kawg lawm, thiab tib neeg yuav tsum tso txhua yam tseg los raws Vajtswv qab thiab muab lawv tus kheej fij rau Nws, koom tes nrog Vajtswv tes hauj lwm, thiab tsis txhob caum tej kev cia siab ntawm sab ntiaj teb, ib tsev neeg uas sib haum xeeb, thiab lwm yam uas zoo li no ntxiv lawm. Tom qab Vajtswv hais cov lus no, Vajtswv tseem ua ntau tes hauj lwm mus ntxiv. Peb, tsib, xya, los sis yim xyoo dhau mus, thiab ib txhia tib neeg pom hais tias Vajtswv tes hauj lwm tseem tab tom mus yam ruaj khov, tsis muaj cim qhia hais tias Nws tes hauj lwm tab tom xaus los sis tias tej kev puas ntsoog loj twb yuav los txog lawm thiab cov ntseeg puav leej nkag mus rau hauv qhov chaw nkaum lawm. Cov uas siv lawv tej kev xav phem los ntsuas Vajtswv tes hauj lwm ntawd tos tsis taus kom Vajtswv tes hauj lwm xaus sai sai kom cov ntseeg thiaj li tuaj yeem koom nrog hauv Vajtswv cov koob hmoov uas zoo heev. Tiam sis Vajtswv tsis ua li no; Nws tsis ua kom qhov xwm txheej no tiav raws li tib neeg tej kev xav phem thiab tej kev xav hauv nruab siab. Cov uas tos tsis taus ntawd pib ntxhov siab thiab pib muaj kev ua xyem xyav, hais tias: “Tsis yog vajtswv tes hauj lwm twb los txog qhov kawg lawm lod? Tsis yog yuav xaus lawm lod? Tsis yog vajtswv tau hais tias tej kev puas ntsoog loj twb yuav los txog lawm no lod? Vim li cas vajtswv lub tsev tseem ua ntau tes hauj lwm ua luaj? Thaum twg vajtswv tes hauj lwm thiaj li yuav xaus tiag tiag? Thiab yuav tag thaum twg?” Cov tib neeg no tsis nyiam qhov tseeb los sis Vajtswv tej kev cheem tsum ib qho me me li. Lawv tsis nyiam xyaum ua raws qhov tseeb, zwm rau Vajtswv, los sis khiav dim ntawm Ntxwgnyoog lub zog kom tau txais kev cawm dim. Lawv tsuas nyiam tshwj xeeb txog tej yam xws li thaum twg Vajtswv tes hauj lwm mam li xaus, seb lawv qhov kawg yuav yog ciaj sia los sis tuag, thaum twg lawv tuaj yeem nkag mus rau hauv lub nceeg vaj kom tau xyiv fab rau cov koob hmoov, thiab tej chaw zoo nkauj ntawm lub nceeg vaj yuav zoo li cas xwb. Tej no yog lawv tej kev txhawj xeeb uas loj tshaj plaws. Yog li ntawd, tom qab ua siab ntev tau ib ntus thiab pom hais tias lub ntuj thiab lub ntiaj teb tseem tsis hloov, thiab tias cov teb chaws hauv lub ntiaj teb tseem zoo ib txwm, lawv hais tias, “Thaum twg vajtswv cov lus no mam li tiav? Kuv twb tos tau ntau xyoos lawm—vim li cas cov lus ntawd tseem tsis tau tiav thiab? Cov lus uas vajtswv hais puas tuaj yeem tiav tiag tiag? Vajtswv puas ua raws li nws tau hais?” Yog li ntawd cov tib neeg no thiaj li tsis muaj kev ua siab ntev lawm, pib ntxhov siab, thiab pib xav nrhiav cib fim rov qab mus rau hauv lub ntiaj teb mus ua lawv tus kheej lub neej.

Vajtswv tes hauj lwm thiab tej qhov tseeb uas Vajtswv nthuav tawm yeej ib txwm siab tshaj tib neeg tej kev xav hauv nruab siab thiab yeej ib txwm siab tshaj tib neeg tej kev xav phem. Txawm tib neeg yuav sim npaum li cas los xij, lawv yeej to taub tsis tshab los sis ntsuas tsis tau Vajtswv tes hauj lwm thiab tej qhov tseeb ntawd. Lawv tsis paub tiag tiag tias tej hau kev ntawm Vajtswv tes hauj lwm yog dab tsi los sis tej hom phiaj uas Nws npaj siab yuav ua kom tiav yog dab tsi, yog li ntawd thaum kawg, ib txhia tib neeg pib ua xyem xyav: “Vajtswv puas muaj nyob tiag? Vajtswv nyob qhov twg tiag tiag? Vajtswv pheej nthuav qhov tseeb tawm tas li, nws tsis yog nthuav tawm ntau dhau lawm lod? Tsis yog vajtswv tau hais tias nws yuav coj peb nkag mus rau hauv nws lub nceeg vaj lod? Thaum twg peb thiaj li tuaj yeem nkag mus rau hauv lub nceeg vaj saum ntuj ceeb tsheej? Ua li cas tej yam no tseem tsis tau muaj tseeb los sis tsis tau raug ua tiav? Yuav siv sij hawm pes tsawg xyoo ntxiv tiag tiag? Pheej hais tias vajtswv hnub twb los txog lawm, tiam sis lo lus ‘los txog lawm’ no tau hais tau ntau xyoo lawm—vim li cas nws thiaj li nyob deb ua luaj thiab zoo li tsis muaj hnub kawg li?” Lawv tsis yog tsuas xav li no xwb, tiam sis lawv tshaj tawm tej kev ua xyem xyav no mus rau txhua qhov chaw. Qhov no qhia txog teeb meem dab tsi? Vim li cas, tom qab mloog tej lus qhuab qhia ntau heev lawm, lawv tseem tsis to taub qhov tseeb ib qho me me li? Vim li cas lawv thiaj li pheej siv tib neeg tej kev xav phem thiab tej kev xav hauv nruab siab los txwv Vajtswv tes hauj lwm? Vim li cas lawv thiaj li tsis tuaj yeem saib tej yam no raws li Vajtswv cov lus? Lawv puas tuaj yeem ua kom paub tseeb txog qhov muaj Vajtswv thiab txiav txim tau ib txoj kev mus rau txoj kev cawm dim los ntawm Vajtswv cov lus? Lawv puas to taub hais tias tag nrho cov lus uas Vajtswv hais thiab txhua yam uas Nws ua no puav leej yog txhawm rau cawm tib neeg? Lawv puas to taub hais tias tsuas yog los ntawm kev tau txais qhov tseeb thiab tau txais kev cawm dim xwb mas tib neeg thiaj li yuav tau txais tag nrho cov koob hmoov uas Vajtswv tau cog lus tseg rau noob neej? Los ntawm yam uas lawv hais thiab tej kev xav phem uas lawv tshaj tawm no, qhia pom meej hais tias lawv yeej tsis to taub tias Vajtswv tab tom ua dab tsi tiag tiag los sis lub hom phiaj ntawm qhov uas Vajtswv ua tag nrho tes hauj lwm no thiab hais tag nrho cov lus no yog dab tsi tiag tiag. Lawv yeej yog cov tsis ntseeg! Tom qab mloog tej lus qhuab qhia tau ntau xyoo thiab lam nyob dhau hnub hauv Vajtswv lub tsev tau ntau xyoo, lawv tau txais dab tsi? Lawv haj tseem tsis tau ua kom paub tseeb tias Vajtswv puas muaj nyob tiag, lawv tsis muaj lus teb tseeb tseeb rau qhov no. Lawv ua lub luag hauj lwm dab tsi nyob hauv pawg ntseeg? Tom qab siv zog ua hauj lwm los tau ib ntus yam tsis tau txais koob hmoov li, ces lawv thiaj li lam tau lam tshaj tawm tej kev xav phem los coj lwm tus mus yuam kev thiab cuam tshuam lwm tus. Tej yam uas lawv lam tau lam hais yog tej kev txiav txim rau Vajtswv thiab Nws tes hauj lwm. Ib txhia ntawm lawv hais tias, “Yav tas los kuv xav tias vajtswv tes hauj lwm yuav tiav nyob hauv peb mus rau tsib xyoos xwb; kuv xav tsis txog hais tias tam sim no kaum xyoo dhau mus lawm tseem tsis tau tiav. Tes hauj lwm no yuav tiav thaum twg? Cov ntawv tim khawv pheej sau tsis tsum; cov yeeb yaj kiab uas hu nkauj qhuas Vajtswv thiab cov yeeb yaj kiab pheej ua tsis tsum; txoj moo zoo pheej tshaj tawm tsis nres—tes hauj lwm ntawd yuav xaus thaum twg?” Lawv haj tseem nug lwm tus hais tias: “Nej tsis xav ib yam li ntawd lod? Tsis hais nej yuav xav li cas los xij, qhov ntawd yog yam uas kuv xav. Kuv yog ib tug neeg coj ncaj; kuv hais txhua yam uas nyob hauv kuv lub siab, tsis zoo li qee tus tib neeg uas tsis hais yam uas nyob hauv lawv lub siab, thiab muab zais cia tag nrho.” Lawv mas “coj ncaj” tiag tiag li, uas tsis ntshai hais txhua yam li! Qhov phem dua ntawd, lawv hais tias, “Yog vajtswv tes hauj lwm tsis xaus sai sai no, kuv yuav cia li mus nrhiav hauj lwm ua, khwv nyiaj, thiab ua kuv lub neej xwb. Los tau tag nrho cov xyoo uas ntseeg vajtswv no, kuv tau plam tsis tau noj ntau pluas mov uas qab, ntau qhov chaw uas zoo ua si, thiab ntau qhov kev xyiv fab ntawm tej khoom siv lawm! Yog kuv tsis ntseeg vajtswv, kuv yuav tau ua neej nyob hauv ib lub tsev loj heev, muaj ib lub tsheb, thiab tej zaum kuv twb tau mus ncig ntiaj teb ntau zaus lawm nyob rau hauv tej xyoo dhau los no. Thaum rov qab xav mas, lub neej uas tsis ntseeg vajtswv ntawd zoo heev; kuv zoo siab heev. Txawm hais tias khoob me ntsis los xij, kuv tuaj yeem xyiv fab rau tej kev lom zem ntawm sab cev nqaij daim tawv, noj thiab haus zoo, thiab ua txhua yam uas kuv xav ua, yam tsis muaj kev txwv. Nyob rau hauv tej xyoo uas ntseeg vajtswv no, kuv tau tiv kev txom nyem ntau heev, thiab ua nruj dhau rau kuv tus kheej! Txawm hais tias kuv tau txais qhov tseeb me ntsis thiab hnov muaj kev ruaj siab me ntsis hauv kuv lub siab los xij, tej qhov tseeb no hloov tsis tau tej kev lom zem ntawm sab cev nqaij daim tawv ntawd! Tsis tas li ntawd xwb, vajtswv tes hauj lwm yeej tsis xaus li, thiab vajtswv yeej tsis tshwm los rau tib neeg li, yog li ntawd kuv yeej tsis hnov muaj kev ruaj siab tiag tiag li. Lawv hais tias kev to taub qhov tseeb thiab kev tau txais qhov tseeb ntawd coj kev kaj siab thiab kev xyiv fab los, tiam sis qhov muaj kev kaj siab thiab kev xyiv fab ntawd muaj qab hau dab tsi? Kuv yeej tseem tsis muaj kev xyiv fab ntawm sab cev nqaij daim tawv li!” Tej kev xav no tau dhau mus los hauv lawv lub hlwb ntau zaus uas suav tsis txheeb, thiab lawv tau hais tej no rau lawv tus kheej ntau zaus lawm. Thaum lawv ntseeg hais tias lawv tej kev xav phem muaj laj thawj txaus los sawv khov kho thiab lawv xav hais tias lub sij hawm tsim nyog lawm thiab lawv tsim nyog txaus los nrhiav qhov txhaum ntawm Vajtswv tes hauj lwm lawm, lawv txwv tsis tau lawv tus kheej uas yuav tshaj tawm cov lus hais thiab tej kev xav phem uas tau muab hais los saum no lawm. Lawv tshaj tawm lawv txoj kev tsis txaus siab rau Vajtswv thiab lawv tej kev xav phem thiab tej kev to taub yuam kev txog Vajtswv tes hauj lwm, sim coj neeg ntau ntxiv mus yuam kev kom los to taub yuam kev rau Vajtswv thiab Nws tes hauj lwm. Muaj tseeb tias, kuj muaj qee tus uas muaj tej kev npaj siab uas zais ntshis uas xav txwv kom muaj neeg ntau ntxiv tsis txhob muab lawv tus kheej fij rau Vajtswv, xav kom lawv tso lawv tej dej num tam sim no tseg thiab tsis lees paub Vajtswv; yog pawg ntseeg tawg ua sab ua sua lawm, rau lawv mas qhov ntawd yuav yog qhov zoo tshaj plaws. Lawv lub hom phiaj yog dab tsi? “Yog kuv tsis tau txais koob hmoov, nej txhua tus kuj tsis txhob cia siab tias yuav tau txais thiab. Kuv yuav ua kom txhua yam ntxhov quav niab rau nej txhua tus kom nej tsis muaj leej twg tuaj yeem cia siab tias yuav tau txais qhov tseeb los sis cov koob hmoov uas vajtswv tau cog lus tseg!” Thaum pom tias tsis muaj kev cia siab tias yuav tau txais koob hmoov lawm, lawv tsis muaj lub siab ntev tos ntxiv lawm. Lawv tus kheej tsis tau txais koob hmoov, thiab lawv tsis xav kom lwm tus tau txais thiab. Yog li ntawd, thaum lawv tshaj tawm tej kev xav phem, nyob rau ib kis lawv tab tom hais tawm lawv txoj kev tsis txaus siab, yws tias tsis muaj ib yam dab tsi txog Vajtswv tes hauj lwm uas mus raws li tib neeg tej kev xav phem thiab tej kev xav hauv nruab siab li, thiab tias Vajtswv txoj kev ua hauj lwm mas tsis xav txog tib neeg tej kev xav. Nyob rau tib lub sij hawm ntawd, lawv xav coj ntau tus neeg mus yuam kev thiab rub kom muaj neeg ntau ntxiv los to taub yuam kev thiab yws txog Vajtswv, muaj tej kev xav phem txog Vajtswv, thiab poob kev ntseeg. Lawv xav kom muaj neeg ntau ntxiv tso Vajtswv tseg vim lawv tej kev to taub yuam kev thiab tej kev xav phem txog Nws, ib yam nkaus li lawv tau ua thiab.

B. Yuav Coj Li Cas Rau Cov Tib Neeg Uas Tshaj Tawm Tej Kev Xav Phem

Thaum muaj neeg nyob hauv pawg ntseeg tshaj tawm tej kev xav phem thiab kev tsis txaus siab rau Vajtswv, yuav muaj qhov tshwm sim los zoo li cas? Qhov no puas yog cuam tshuam ncaj qha rau cov txiaj ntsig ntawm lub neej hauv pawg ntseeg? Qhov ntawd puas cuam tshuam lub neej hauv pawg ntseeg uas ib txwm muaj thiab pawg ntseeg tes hauj lwm? (Cuam tshuam.) Qhov no cuam tshuam tib neeg txoj kev ntseeg Vajtswv thiab cuam tshuam lawv lub peev xwm los ua lawv tej dej num li ib txwm. Yog li ntawd, cov uas tshaj tawm tej kev xav phem ntawd yuav tsum raug txwv. Txawm yog lawv tsuas hais txog tej yam zoo li no qee zaus xwb los, yuav tsum txwv thiab paub cais lawv; saib seb lawv muaj kev ua neeg zoo li cas, seb lawv txoj kev tshaj tawm tej kev xav phem ntawd puas yog vim kev xav tsis zoo thiab kev qaug zog ib lub sij hawm los sis seb puas yog vim muaj teeb meem nrog lawv tus yam ntxwv xeeb txawm lub ntsiab tseeb—yog lawv yeej ib txwm tsis caum qhov tseeb thiab txhob txwm tshaj tawm tej kev xav phem los coj neeg ntau ntxiv mus yuam kev thiab cuam tshuam thiab ua kom puas tsuaj rau lub neej hauv pawg ntseeg. Yog qhov ntawd tsuas yog kev xav tsis zoo thiab kev qaug zog qee zaus xwb, ces kev txhawb thiab pab lawv los ntawm kev sib qhia qhov tseeb yeej txaus lawm. Yog lawv tsis mloog lus ntuas thiab tseem tshaj tawm tej kev xav phem thiab cuam tshuam lub neej hauv pawg ntseeg mus ntxiv—thiab haj tseem ua rau lwm tus xav tsis zoo thiab qaug zog, cuam tshuam lwm tus lub peev xwm los ua lawv tej dej num li ib txwm—ces qhov ntawd txhais hais tias lawv yog Ntxwgnyoog cov tub qhe thiab yuav tsum raug ntsaig tawm mus raws li tej hauv paus ntsiab lus. Vim li cas thiaj li tsis muab lwm lub cib fim rau lawv? Nej puas xav hais tias cov tib neeg zoo li no yog cov tsis ntseeg? (Yog.) Tsis hais lawv txoj kev ua neeg yuav zoo li cas los, cov tib neeg zoo li no yog cov tsis ntseeg. Cov tsis ntseeg mas zoo li cov txhauv uas nyob hauv cov nplej—lawv yuav tsum raug rho tawm mus. Yog lawv tsuas qhia tawm qee qhov kev qhia tshwm uas pom tau meej ntawm cov tsis ntseeg thiab tsis tau ua rau muaj kev cuam tshuam nyob rau hauv lub neej hauv pawg ntseeg, thiab tseem tuaj yeem ua hauj lwm li cov phooj ywg ntawm pawg ntseeg thiab ua dej num txhawb, ces tsis tas quav ntsej lawv. Tiam sis cov uas pheej tshaj tawm tej kev xav phem yeej ib txwm tso tawm cov tsis ntseeg tej kev xam pom thiab tej lus hais. Lawv tsis yog lam hais xwb; lawv lub hom phiaj yog los haub ntxias, coj mus yuam kev, thiab rub tib neeg ntau ntxiv kom khiav ntawm Vajtswv mus. Lawv txoj kev npaj siab yog: “Yog kuv tsis tau txais koob hmoov, ces kuv yuav tsis ntseeg ntxiv lawm. Nej los tsis txhob cia siab tias yuav tau koob hmoov, thiab nej los tsis txhob ntseeg lawm thiab! Yog nej tseem ntseeg, tsam muaj ib hnub nej tiv mus txog thaum kawg thiab tau txais koob hmoov lawm—qhov ntawd tsis ua rau kuv poob ntsej muag lod? Kuv lub siab yuav ua li cas nqig tau? Qhov ntawd tsis tau. Txhawm rau yav tom ntej kom kuv tsis txhob khuv xim, kuv yuav cuam tshuam nej thiab ua rau nej txoj kev ntseeg tsis ruaj khov, ua rau nej nyob deb ntawm vajtswv, thiab ntxeev siab rau vajtswv, thiab nrog kuv tawm hauv pawg ntseeg mus—qhov ntawd yuav zoo tshaj plaws li.” Qhov no yog lawv lub hom phiaj. Cov tsis ntseeg zoo li no puas tsim nyog raug ntsaig tawm mus? (Tsim nyog.) Lawv yuav tsum raug ntsaig tawm mus. Yog qee cov tsis ntseeg tso kev ntseeg tseg lawm, pawg ntseeg tsuas muab lawv cov phau ntawv ntawm Vajtswv cov lus nqa rov qab los thiab tshem lawv npe tawm xwb. Kuj muaj lwm cov tsis ntseeg uas muaj qee qhov kev xav zoo txog txoj kev ntseeg Vajtswv thiab rau cov ntseeg. Lawv ua tsis tau ib qho hauj lwm uas zoo nyob hauv pawg ntseeg; lawv tsuas pab tau qee zaus tam li pawg ntseeg ib tug phooj ywg xwb. Cov tib neeg zoo li no, txawm lawv tsis caum qhov tseeb los sis sib qhia qhov tseeb los, lawv tsis tshaj tawm tej kev xav phem los sis cuam tshuam lub neej hauv pawg ntseeg. Tsuav lawv ua tau dej num txhawb me ntsis xwb, lawv tsim nyog raug tso cai kom nyob hauv pawg ntseeg thiab tsis tas raug ntsaig tawm mus. Txawm li cas los xij, rau cov tsis ntseeg uas pheej tshaj tawm tej kev xav phem ntawd, tsis tsim nyog muaj kev hlub tshua rau lawv li. Lawv tshaj tawm lawv tej kev xav phem thiab tej kev to taub yuam kev txog Vajtswv, cuam tshuam lub neej hauv pawg ntseeg thiab ua rau muaj tej kev tab kaum thiab kev cuam tshuam rau pawg ntseeg tes hauj lwm. Cov tsis ntseeg no yog Ntxwgnyoog cov tub qhe. Lawv muaj tej kev xav phem; tiam sis tsis yog lawv tsis nrhiav qhov tseeb los daws tej ntawd xwb, tiam sis lawv haj tseem tshaj tawm lawv tej kev xav phem los coj cov neeg uas Vajtswv xaiv tseg mus yuam kev thiab. Lawv ntxeev siab rau Vajtswv thiab xav rub ob peb tug nrog lawv mus rau kev puas tsuaj thiab. Lawv siv cov kev npaj siab zoo li no los cuam tshuam pawg ntseeg tes hauj lwm. Vajtswv puas tuaj yeem zam txim rau lawv? Tsis tau, yuav tsum tsis txhob tso lawv tseg li. Qhov no tsis yog ib qho teeb meem uas yuav tsum tau txwv los sis cais lawv tawm xwb; lawv yuav tsum raug tshem tawm thiab rho npe tawm mus ib txhis, yam tsis ua siab mos siab muag ib qho me me li!

Nyob hauv pawg ntseeg, muaj qee tus tib neeg yeej ib txwm tsis caum qhov tseeb thiab yeej ib txwm tsis to taub tias Vajtswv ua hauj lwm cawm tib neeg li cas. Tom qab ntsib pom los ntawm qee yam xwm txheej lawm, lawv muaj tej kev to taub yuam kev, kev tawm tsam, thiab kev yws rau Vajtswv; qee yam uas lawv hais thiab ua ntawd mas yog los tshaj tawm tej kev xav phem. Tej kev xav phem uas lawv tshaj tawm tsis yog qhov yuam kev nyob hauv txoj kev nkag siab Vajtswv cov lus thiab tes hauj lwm los sis tej kev to taub yuam kev txog Vajtswv xwb. Qee qhov mas hnyav dua, uas tsis lees paub ncaj qha hais tias Vajtswv cov lus yog qhov tseeb—lawv txiav txim thiab teem txim rau Vajtswv tag nrho. Thiab lwm yam kev xav phem uas lawv tshaj tawm haj tseem tawm tsam thiab tuam mom Vajtswv yam qhib lug thiab. Lawv tsis yog soj ntsuam los sis paub txog lawv tus kheej txoj kev qias vuab tsuab thiab kev ntxeev siab yam muaj lub siab mloog lus, uas sawv hauv qhov kev xam pom ntawm ib tug neeg uas raug tsim tawm los los sis ib tug uas raws Vajtswv qab, thiab lawv kuj tsis yog lees txais qhov tseeb thiab sib qhia txog lawv txoj kev paub txog Vajtswv tes hauj lwm thiab lawv txoj kev to taub txog Nws tej kev npaj siab thiab. Tej kev xav phem uas lawv nthuav tawm ntawd mas txawv kiag ntawm tej kev to taub uas zoo no. Thaum lwm tus hnov lawv tej kev xav phem ntawd, lwm tus ntawd tsis tau txais txoj kev paub txog Vajtswv, thiab lawv tsis muaj txoj kev ntseeg tiag tiag, thiab muaj tseeb tias lawv txoj kev ntseeg rau Vajtswv kuj tsis loj hlob thiab. Tiam sis, lawv txoj kev ntseeg rau Vajtswv dhau los ua qhov tsis meej, tsawg zuj zus, los sis haj tseem ploj tag nrho. Nyob rau tib lub sij hawm ntawd, lub zeem muag ntawm Vajtswv tes hauj lwm dhau los ua qhov tsis meej rau lawv lawm. Tib neeg yim mloog tej kev xav phem uas lawv tshaj tawm ntawd, tib neeg lub siab yim ntxhov quav niab, mus txog rau theem uas cov tib neeg ntawd tsis paub meej tias vim li cas thiaj li yuav tsum ntseeg Vajtswv thiab cov neeg ntawd pib ua xyem xyav tias Vajtswv puas muaj nyob tiag. Seb Vajtswv cov lus puas yog qhov tseeb, seb Vajtswv cov lus thiab tes hauj lwm puas tuaj yeem ntxuav tib neeg kom dawb huv thiab cawm tau tib neeg, thiab lwm yam teeb meem uas zoo li no—tej no puav leej dhau los ua qhov tsis meej thiab ua rau cov tib neeg ntawd ua xyem xyav. Thaum tib neeg hnov tej kev xav phem thiab tej kev to taub yuam kev uas lawv tshaj tawm, cov tib neeg ntawd pib ua xyem xyav thiab ceev faj rau Vajtswv; cov neeg ntawd pib txwv Vajtswv nyob hauv lawv lub siab, muaj tej kev to taub yuam kev thiab kev yws rau Vajtswv, thiab haj tseem nyob deb ntawm Vajtswv hauv lawv lub siab lawm thiab. Qhov no muaj teeb meem heev. Kiag thaum tib neeg muaj tej kev xav, tej kev xam pom, tej kev npaj, thiab tej kev npaj siab uas tsis zoo no lawm, mas pom tau meej hais tias cov ntaub ntawv thiab cov lus hais uas lawv tau lees txais ntawd tsis mus raws li tej kev tim tsum ntawm kev ua neeg ib txwm muaj, tsis tas yuav hais txog qhov tseeb li—qhov ntawd yeej paub meej ib puas feem pua hais tias tej ntawd los ntawm Ntxwgnyoog los. Txawm cov uas tshaj tawm tej kev xav phem ntawd yuav muaj tej kev npaj siab los sis tej hauv paus pib dab tsi los xij, txawm lawv txhob txwm los sis tsis txhob txwm tshaj tawm tej lus cuav thiab tej lus xaiv uas tsis muaj hauv paus los xij, tsuav lawv ua rau muaj kev cuam tshuam uas tsis zoo nyob hauv pawg ntseeg xwb, lawv yuav tsum raug txwv. Muaj tseeb tias, yog pom thiab paub cais cov tib neeg zoo li no nyob sab nraum ntawm lub neej hauv pawg ntseeg, los lawv kuj yuav tsum raug cheem thiab txwv kom ncav sij hawm thiab. Yog ib tug neeg uas to taub qhov tseeb es tuaj yeem siv Vajtswv cov lus los sis lawv tus kheej txoj kev to taub los cam thiab muab cov uas tshaj tawm tej yam zoo li no nthuav tawm, pab cov kwv tij thiab cov nkauj muam kom paub cais lawv, ces qhov no mas haj yam zoo tshaj. Qhov no yog kev ua tsov rog nrog Ntxwgnyoog. Yog koj tsis muaj lub siab ntseeg txaus, koj yuav tsum kawm kom paub cais thiab nyob deb ntawm lawv. Yog koj muaj lub siab ntseeg, koj yuav tsum nthuav lawv tawm. Nej puas muaj cuab kav ua li no? Nej puas paub ua li no? Qhov no nthuav tawm tshaj plaws hais tias ib tug neeg twg puas muaj qhov tseeb qhov muaj tiag. Thaum qee cov ntseeg tshiab hnov tej kev xav phem thiab tej kev to taub yuam kev uas cov tib neeg zoo li no tshaj tawm txog Vajtswv, lawv ceeb thiab hais tias, “Ua li cas ib tug neeg uas ntseeg Vajtswv thiaj li hais lus zoo li no tau?” Yog cov tib neeg uas tsis muaj lub hauv paus hnov tej kev xav phem thiab tej lus cuav no, lawv puas yuav xav tsis zoo thiab qaug zog? Lawv puas yuav lees txais tej lus cuav no? Lawv puas yuav raug coj mus yuam kev thiab tawm hauv pawg ntseeg mus? Tej no puav leej muaj peev xwm tshwm sim tau. Thaum ib tug neeg twg uas tshaj tawm tej kev xav phem hais tias, “Kuv yuav tsis ntseeg vajtswv ntxiv lawm,” txawm lawv nyob rau hauv hom yam ntxwv twg thaum lawv hais li no los xij, qhov ntawd qhia hais tias lawv tau plam txoj kev ntseeg rau Vajtswv tag nrho lawm thiab yog ib tug tsis ntseeg. Txawm lawv lub hom phiaj ntawm kev tshaj tawm cov lus zoo li no yog dab tsi los xij, koj puas tuaj yeem tau txais kev txhawb los ntawm qhov hnov cov lus ntawd? (Tsis tau.) Thaum koj qaug zog thiab hnov cov lus no, koj yuav xav hais tias, “Tus neeg no muaj kev mob ib yam li kuv; thaum lawv tham txog lawv tej kev xav phem, qhov ntawd zoo li lawv tab tom hais tawm kuv tus kheej tej kev xav uas nyob tob tshaj plaws hauv kuv lub siab.” Txawm li cas los xij, yog ib tug neeg uas muaj kev ntseeg hnov cov lus no, lawv yuav xav hais tias, “Qhov no yog kev tig tawm tsam heev! Ua li cas thiaj li hais tau cov lus zoo li no tawm los? Qhov no tsis yog kev tuam mom Vajtswv lod? Kuv yeej tsis muaj cuab kav hais tej yam zoo li no, vim qhov ntawd ua txhaum rau Vajtswv tus moj yam!” Qhov uas lawv tuaj yeem tshaj tawm tej kev xav phem no qhia hais tias tej tswv yim no tau tshwm sim los ntev lawm thiab twb tuaj cag nyob hauv lawv lub siab lawm. Yog tej tswv yim zoo li no tsuas nyuam qhuav pib tshwm sim thiab tseem nyob rau theem pib xwb, thiab tseem tsis tau loj hlob tag nrho los ua tej kev xav phem, tsuav tsis hais tawm thiab tsis tau coj lwm tus mus yuam kev los sis cuam tshuam lwm tus xwb, qhov no qhia hais tias lawv muaj laj thawj me ntsis; lawv tuaj yeem ceev faj lawv lub qhov ncauj thiab yog li ntawd thiaj li zam tau qhov tshwm sim los ntawm kev raug ntsaig tawm mus. Tiam sis yog lawv hais tawm thiab cuam tshuam lub neej hauv pawg ntseeg lawm, ces yuav tsis muaj lub siab mos siab muag rau lawv ntxiv lawm; lawv yuav tsum raug nthuav tawm thiab raug ntsaig tawm mus. Cov tib neeg uas tsis nyiam qhov tseeb thiab tsis muaj lub peev xwm nkag siab qhov tseeb mas yooj yim muaj tej kev xav phem tas li. Txawm li cas los xij, cov uas pheej nyeem Vajtswv cov lus tas li thiab muaj lub peev xwm nkag siab mas yuav nrhiav qhov tseeb los daws lawv tej kev xav phem, txawm yog tej ntawd tshwm sim los. Cov uas pheej tshaj tawm tej kev xav phem ntawd mas yog raug nthuav tawm thiab raug tshem tawm los ntawm Vajtswv tes hauj lwm; lawv yog cov tib neeg uas tsis nyiam qhov tseeb hlo li thiab lees txais tsis tau qhov tseeb, lawv txhua tus puav leej tsis nyiam qhov tseeb kiag li thiab ntxub qhov tseeb. Qhov no yeej tsis muaj qhov ua xyem xyav li.

Nyob hauv lub neej hauv pawg ntseeg thoob plaws ntau lub teb chaws thiab ntau qhov chaw, qhov teeb meem ntawm kev tshaj tawm tej kev xav phem yeej muaj nyob vim cov tib neeg uas tsis nyiam qhov tseeb yeej muaj nyob txhua qhov chaw. Cov uas tsis caum qhov tseeb, cov uas tsis nyiam qhov tseeb kiag li, cov uas nrhiav kev lom zem ntawm sab cev nqaij daim tawv, nrog rau cov tsis ntseeg, cov tib neeg phem, thiab lwm tus, vim lawv tsis caum qhov tseeb, lawv yeej ib txwm muaj tej kev xav phem txog Vajtswv cov lus thiab txog tus Vajtswv uas yug los ua neeg. Lawv lub siab muaj tej kev xav phem puv nkaus, muaj tej kev xav hauv nruab siab txog Vajtswv thiab tej kev thov rau Nws puv nkaus, thiab lawv tsis muaj peev xwm nkag siab thiab to taub kom yog txog txhua lo lus uas Vajtswv hais; lawv tsuas to taub cov lus ntawd raws li lawv tus kheej tej kev xav phem, tej kev nyiam, thiab haj tseem raws li qhov tau thiab qhov poob ntawm lawv tus kheej tej txiaj ntsim xwb. Lawv lub siab muaj puv nkaus ntau yam kev xav phem, tej kev xav hauv nruab siab, thiab tej kev thov uas tsis tsim nyog rau Vajtswv, nrog rau ntau yam kev to taub yuam kev thiab kev txiav txim txog Vajtswv, thiab lwm yam ntxiv. Yog li ntawd, qhov uas cov tib neeg no tshaj tawm tej kev xav phem ntawd mas yog yam uas cia li muaj—qhov no tsis yog ib yam tshiab. Tsuav cov tib neeg zoo li no tseem muaj nyob xwb, ces kev tshaj tawm tej kev xav phem yeej yuav tshwm sim qee zaus thiab tuaj yeem tshwm sim tau txhua lub sij hawm. Thaum ib yam dab tsi uas Vajtswv hais los sis ua tsis mus raws li lawv tej kev xav phem thiab tej kev ntshaw, thiab thaum ua rau lawv tej txiaj ntsim puas tsuaj, lawv npau taws heev thiab pib hais tawm txhawm rau lawv tus kheej tej txiaj ntsim thiab tawm tsam nrog Vajtswv thiab Nws tes hauj lwm. Cov tib neeg no yeej ib txwm sawv tawm tsam qhov tseeb thiab tawm tsam Vajtswv, soj ntsuam thiab tshawb xyuas kom meej txog Vajtswv cov lus, Vajtswv tus moj yam, thiab Vajtswv tes hauj lwm. Lawv pheej tshawb fawb thiab tshuaj xyuas qhov raug ntawm Vajtswv cov lus thiab tes hauj lwm tas li, thiab lawv kuj xav ua kom paub tseeb tias seb Vajtswv lub cev nqaij daim tawv uas yug los ua neeg ntawd puas mus raws li qhov Vajtswv yog leej twg tiag tiag thiab Nws lub meej mom. Nyob hauv lawv txoj kev ua kom paub tseeb ntawd, lawv pom tias nyuaj heev los tau txais cov lus teb uas raug; raws li lawv txoj kev pom mas, haj tseem nyuaj heev rau Vajtswv cov lus uas yuav raug ua tiav hlo thiab muaj tseeb. Yog li ntawd, lawv thiaj li muaj ntau yam yuav hais thaum tshaj tawm tej kev xav phem. Lawv tshaj tawm lawv tej kev xav phem yam tsis xaiv lub sij hawm, qhov chaw, los sis qhov xwm txheej. Thaum twg lawv xav tias tsis txaus siab rau Vajtswv nyob rau ib txoj kev twg, lawv ntsuas txhua yam los ntawm kev siv lawv tej kev xav phem. Yog Vajtswv cov lus thiab tes hauj lwm tsis mus raws li lawv tej kev xav phem, mas lawv yuav tso lawv tej kev xav phem tawm los sai heev. Peb muab hom kev tso tawm zoo li no teem tias yog kev tshaj tawm. Vim li cas thiaj li hu ua “kev tshaj tawm”? Vim tej yam uas lawv tso tawm no ua tsis tau ib qho hauj lwm uas zoo rau cov neeg uas Vajtswv xaiv tseg, lub neej hauv pawg ntseeg, los sis tes hauj lwm ntawm Vajtswv lub tsev. Tiam sis, tej ntawd tsuas ua rau muaj tej kev cuam tshuam, kev tab kaum, thiab kev puas tsuaj xwb. Yog li ntawd, qhov uas muab cov lus hais zoo li no hu ua “kev tshaj tawm” mas yog ib qho uas raug.

Tom qab koj tau txais qee txoj kev paub cais ntawm lub hauv paus txog qhov teeb meem ntawm kev tshaj tawm tej kev xav phem lawm, koj yuav tsum soj ntsuam thiab paub cais ntau hom tib neeg tej kev xav phem thiab tej lus hais uas yuam kev ntawd raws li qhov tseeb, thiab tom qab ntawd saib xyuas thiab daws tej ntawd raws li tej kev cai tswj ntawm Vajtswv lub tsev. Muaj tseeb tias, cov thawj coj thiab cov neeg ua hauj lwm yeej muaj ib lub luag hauj lwm uas tsis tuaj yeem zam tau rau kev daws tej teeb meem zoo li no. Nyob rau tib lub sij hawm ntawd, tag nrho cov neeg uas Vajtswv xaiv tseg, tom qab mloog txoj kev sib qhia no lawm, kuj muaj txoj hauj lwm thiab lub luag hauj lwm los nthuav tawm thiab soj ntsuam cov tib neeg uas tshaj tawm tej kev xav phem thiab lawv cov lus hais thiab tej kev coj thiab. Yog koj tsis muaj lub siab tawv los cheem los sis txwv lawv, koj tuaj yeem sib qhia thiab cav nrog lawv raws li Vajtswv cov lus thiab qhov tseeb uas koj to taub. Lub hom phiaj ntawm kev cav zoo li no yog dab tsi? Qhov ntawd yog los pab cov uas muaj lub siab ntseeg me thiab tsis to taub qhov tseeb kom paub tias leej twg cov lus mus raws li qhov tseeb tom qab lawv mloog txoj kev cav ntawd lawm, es tsis txhob raug coj mus yuam kev yam tsis paub meej los ntawm tej kev xav phem thiab tej lus cuav uas qee tus tib neeg ntawd tshaj tawm. Qhov no muaj txiaj ntsim rau cov neeg uas Vajtswv xaiv tseg thiab rau lub neej hauv pawg ntseeg. Thaum pom tias muaj neeg tab tom hais cov lus uas tsis mus raws li qhov tseeb—txawm tej ntawd yog tib neeg tej kev xav phem los sis tej lus cuav los xij—yuav tsum muaj ib qho kev cav. Tej kev cav zoo li no muaj txiaj ntsim rau tib neeg. Yam tsawg tshaj plaws mas, tom qab cov uas nyob ib sab saib ntawd mloog tej kev cav no lawm, lawv tuaj yeem pom meej hais tias cov lus ntawm cov uas tshaj tawm tej kev xav phem ntawd yeej yog tej kev xav phem tiag tiag, thiab lawv tuaj yeem to taub tias qhov twg ntawm tej kev xav phem no tsis mus raws li qhov tseeb, lub ntsiab tseeb ntawm tej kev xav phem yog dab tsi, vim li cas tej ntawd tsis mus raws li qhov tseeb, vim li cas tej ntawd thiaj li raug teem tias yog tej kev xav phem, vim li cas cov tib neeg uas tshaj tawm tej ntawd yuav tsum raug txwv, thiab lwm yam ntxiv—lawv muaj peev xwm muaj txoj kev pom uas yog txog tej teeb meem no, es tsis yog raug coj mus yuam kev thiab raug muab ua khoom ua si yam paub tsis meej. Txawm hais tias tej kev xav phem uas tib neeg tshaj tawm tuaj yeem ua rau muaj qee qhov kev cuam tshuam thiab kev puas tsuaj rau txoj kev nkag mus rau hauv lub neej txoj sia ntawm cov neeg uas Vajtswv xaiv tseg thiab rau lub neej hauv pawg ntseeg los, qhov tau ntsib tau pom tej yam no kuj tsis yog ib yam tsis zoo rau tib neeg thiab. Yam tsawg tshaj plaws mas, qhov ntawd pab kom lawv txawj paub cais ntxiv, pom tias lub ntsej muag tiag tiag ntawm cov uas tshaj tawm tej kev xav phem yog zoo li cas, pom tias lawv nthuav tawm tej moj yam twg thaum tshaj tawm tej kev xav phem, thiab pom qhov sib txawv ntawm tej kev xav phem uas lawv tshaj tawm thiab qhov tseeb. Ib qho mas, tib neeg yuav muaj peev xwm paub cais cov lus hais no thiab muaj kev tiv thaiv rau tej ntawd. Lwm qhov mas, lawv kuj yuav muaj qee txoj kev paub cais txog cov tib neeg zoo li no, thiab paub tias cov lus zoo li cas uas cov tsis ntseeg hais, uas cov uas tsis muaj qhov tseeb kiag li thiab pheej muaj tej kev xav phem txog Vajtswv hais, thiab paub tias lawv txoj kev ntseeg tsis yog tiag tiag—yam tsawg tshaj plaws mas, tib neeg tuaj yeem tau txais hom kev paub cais no. Muaj tseeb tias, yog koj tseem tsis tau ntsib tej teeb meem no, tsis txhob lam tau lam thov Vajtswv, hais tias, “Au Vajtswv, thov npaj ib qho xwm txheej rau kuv kom kuv thiaj li pom tau tias ‘tej kev xav phem uas tib neeg tshaj tawm’ ntawd txhais li cas.” Qhov pom kev tshaj tawm tej kev xav phem ntawd tsis yog ib qho zoo ua si thiab qhov ntawd yooj yim ua rau koj raug coj mus yuam kev. Thiab thaum tej yam no tshwm sim tiag, koj yuav tsum daws tej ntawd kom yog. Tsis txhob cia tej ntawd hla dhau mus los sis zam tej ntawd; tim ntsej tim muag nrog tej ntawd kom yog, thiab coj rau txhua qhov xwm txheej uas Vajtswv tau teeb tsa rau koj nrog rau ib tug cwj pwm uas mob siab thiab nruj. Qhov no yog tus cwj pwm uas ib tug neeg uas caum qhov tseeb yuav tsum muaj kom thiaj li tau qhov tseeb. Thaum koj ntsib ib tug neeg twg uas tshaj tawm tej kev xav phem, koj yuav tsum kawm paub thov Vajtswv hais tias: “Au Vajtswv, thov nrog nraim kuv nyob, qhia kuv, thiab coj kuv kev, kom kuv thiaj li paub cais cov lus no thiab hom neeg no, thiab pab kom kuv paub hais tias kuv puas muaj cov tib neeg no tej kev xav phem nyob hauv kuv thiab.” Tom qab ntawd, thaum thov Vajtswv tag, mus thiab ntsib pom qhov xwm txheej no. Muaj tseeb tias, qhov no kuj yuav yog lub sij hawm uas sim koj seb koj to taub qhov tseeb npaum li cas thiab koj lub siab ntseeg loj npaum li cas tiag tiag. Thaum ib tug neeg twg tab tom tshaj tawm tej kev xav phem, yog koj hnov tej ntawd thiab tsis muaj kev teb rov qab los sis kev xav hauv koj lub siab li, tiam sis tsuas zoo li lub xov tooj cua xwb—lees txais txhua yam kev xav phem uas lawv tso tawm thiab tshaj tawm, yam tsis muaj lub zog tiv thaiv los sis lub peev xwm los tsis lees txais tej ntawd, thiab haj tseem tsis muaj lub peev xwm los paub cais tej ntawd thiab—qhov no tsis yog muaj teeb meem heev lod? Ib txhia tib neeg, thaum lawv hnov ib tug neeg tso tawm tej kev xav phem, lawv xav hauv lawv lub siab tias yam uas tus neeg ntawd tab tom hais mas tsis yog, thiab lawv xav sib qhia thiab cav nrog tus neeg ntawd, tiam sis lawv tsis paub xyov yuav hais li cas thiaj li tsim nyog, los sis lawv yuav tsum nthuav tawm thiab soj ntsuam tus neeg ntawd li cas. Lawv kuj ntshai tsam yog lawv cav tsis yeej, lawv yuav ntsej muag liab ploog, thiab thaum kawg thaum lawv swb lawm lawv yuav poob ntsej muag thiab nyob rau hauv ib qho xwm txheej uas txaj muag. Txawm li cas los xij, lawv kuj tsis txaus siab tso tseg yam tsis cav, xav hais tias: “Kuv twb mloog ntau zaj lus qhia thiab to taub ntau heev lawm, yog li vim li cas kuv thiaj li tsis muaj lus los cam lawv? Kuv tsis muaj tej kev xav phem txog Vajtswv, thiab kuv muaj kev ntseeg tiag tiag rau Vajtswv, yog li ntawd vim li cas tam sim no kuv thiaj li piav tsis tau kom meej thaum txog lub sij hawm los cam lawv tej lus cuav?” Lawv saib tus neeg uas tshaj tawm tej kev xav phem hais ntau zuj zus, nrog rau lawv cov lus uas haj yam dhau cai thiab ntxim ntxub, tiam sis lawv tus kheej yeej cam los sis soj ntsuam tsis tau, thiab lawv tsis muaj peev xwm sawv tsees los nthuav lawv tawm, tsis tas yuav hais txog qhov cheem lawv, uas ua rau lawv hnov ntxhov siab thiab txhawj xeeb tshwj xeeb hauv lawv lub siab. Tsuas yog nyob rau lub sij hawm no xwb lawv thiaj li paub tias lawv lub siab ntseeg me dhau lawm thiab pom tias lawv txoj kev to taub txog qhov tseeb tseem tsis tau tsim ua ib txoj kev xam pom uas txhij txhua thiab yog, tias txoj kev to taub txog qhov tseeb ntawd tsuas yog qee cov lus uas tsis tiav hlo, qee qhov kev kaj thiab kev xav uas tsawg yam ua sab ua sua xwb, thiab tsis yog kev paub tiag tiag txog qhov tseeb hlo li. Lawv paub zoo heev hais tias tus neeg no tab tom tshaj tawm tej kev xav phem thiab coj tib neeg mus yuam kev, thiab tias tus neeg ntawd yog ib tug tsis ntseeg, thiab lawv xav muab tus neeg ntawd nthuav tawm thiab cam kom yeej tus neeg ntawd tej kev xam pom, tsuas yog tias lawv tsis muaj hom lus uas tsim nyog thiab muaj zog los ua li ntawd xwb. Lawv tsuas tuaj yeem hais tau tias, “Txhua yam uas Vajtswv ua puav leej zoo; koj yuav tsum lees txais. Vajtswv dawb huv thiab zoo tag nrho; Nws yeej tsis zoo li koj hais li. Vajtswv muaj hwj chim kav txhua yam, thiab tib neeg yog cov neeg uas raug tsim tawm los. Tib neeg yuav tsum zwm rau Vajtswv. Tib neeg tsis poob peev dab tsi los ntawm kev zwm rau Vajtswv.” Lawv tsuas tuaj yeem hais tau cov tswv yim uas ntiav ntiav no uas yeej tsis raug cov ntsiab lus tseem ceeb hlo li. Tom qab tau ntsib tau pom qhov xwm txheej tshwj xeeb no lawm, lawv paub tias lawv lub siab ntseeg me dhau lawm thiab xav hais tias, “Vim li cas kuv thiaj li tsis muaj peev xwm ua luaj? Raws li ib txwm mas, kuv tuaj yeem hais tau cov kev qhuab qhia loj ntau heev, hais lus npliag kawg; kuv tuaj yeem hais lus tau ib teev nyob hauv kev sib txoos ua ke yam tsis muaj teeb meem, thiab sau tau peb mus rau tsib nplooj ntawv ntawm cov lus qhuab qhia yam yooj yim, xav tias muaj kev ruaj siab heev nyob rau hauv qhov no. Tiam sis thaum ntsib ib tug neeg uas tshaj tawm tej kev xav phem zoo li no, txiav txim thiab hais lus tuam mom Vajtswv zoo li no, vim li cas kuv ho tsis muaj kev ceev faj, tsis muaj lus teb rov qab li? Vim li cas kuv thiaj li nthuav tawm thiab teb rov qab tsis tau kom muaj zog zis?” Lawv pom dab tsi los ntawm qhov no? Qhov ntawd tsis yog lawv paub tias lawv tsis to taub qhov tseeb lod? Qhov kev paub no yog ib yam zoo los sis ib yam tsis zoo? (Yog ib yam zoo.) Thaum kawg, lawv pom lawv lub siab ntseeg tiag tiag. Yog lawv tsis tau ntsib ib tug neeg uas tshaj tawm tej kev xav phem, tej zaum lawv tseem yuav xav tias lawv muaj lub siab ntseeg, to taub qhov tseeb, muaj txoj kev paub cais, tuaj yeem pom tshab txhua yam, tuaj yeem qhuab qhia tau ntau yam kev qhuab qhia ntawm sab ntsujplig, thiab tuaj yeem sib qhia me ntsis txog txhua qhov tseeb nrog rau kev swm heev. Txawm li cas los xij, thaum ntsib ib tug neeg uas tshaj tawm tej kev xav phem, txawm hais tias lawv paub tias qhov ntawd tsis yog los xij, lawv pom tias lawv tus kheej tsis paub yuav ua li cas, tsis muaj peev xwm ua tau ib yam dab tsi, thiab thaum kawg ces swb lawm. Qhov no puas poob ntsej muag? Qhov ntawd puas yog ib qho xwm txheej uas muaj koob meej? (Tsis yog.) Yog li, yuav daws qhov no li cas? Yog koj tsis muaj cov lus uas yog los cav nrog lawv, thiab koj kuj xav zam kev poob ntsej muag thiab tuav koj tej lus tim khawv khov kho kom ua rau Ntxwgnyoog txaj muag thiab swb tag nrho, koj yuav tsum ua li cas? Kuv yuav qhia nej ib txoj kev uas muaj txiaj ntsig: Yog koj pom lawv tshaj tawm tej kev xav phem yam tsis paub kawg li, thiab cov tib neeg feem coob tsis muaj txoj kev paub cais thiab raug lawv cuam tshuam lawm, tiam sis koj cav tsis yeej lawv, ces txog lub sij hawm uas yuav tsum ua nruj me ntsis lawm; npuaj rooj thiab hais tias, “Kaw qhov ncauj! Koj tab tom tham txog dab tsi? Tej zaum kuv cav tsis yeej koj, tiam sis kuv paub tias koj yog ib tug tsis ntseeg! Saib yam uas koj tab tom hais; puas muaj ib lo lus twg uas mus raws li qhov tseeb? Koj twb xyiv fab rau Vajtswv txoj hmoov hlub tau ntau xyoo lawm—koj puas tau hais ib lo lus qhuas los sis ua tim khawv rau Vajtswv li? Koj muaj kev chim siab rau Vajtswv; yog koj muaj peev xwm, mus ncaj qha rau lub ceeb tsheej thib peb thiab hais rau Vajtswv ncaj qha. Tsis txhob ua rau muaj kev cuam tshuam nyob ntawm no. Tam sim no kuv sam hwm rau koj yam raws kev raws cai tias tawm mus!” Nej puas muaj cuab kav hais li no? Qhov no puas yog kev siab kub? (Tsis yog.) Qhov no yog kev tshaj tawm rau Ntxwgnyoog. Tsuas ua li no xwb. Qhia lawv tias, “Tawm mus, koj tus tsis ntseeg no! Koj twb xyiv fab rau Vajtswv txoj hmoov hlub ntau heev yam dawb dawb xwb, koj tus neeg uas tsis muaj lub siab txawj xav no; koj tsis tsim nyog ua neeg!” Tsuas yog ob lo lus: “Tawm mus!” Qhov ntawd zoo li cas? Qhov ntawd muaj zog, tiam sis tsis tuaj yeem lam tau lam siv. Koj yuav tsum tsis txhob hais li no rau cov kwv tij thiab cov nkauj muam uas ntseeg tshiab uas tseem tsis tau to taub qhov tseeb, tiam sis rau cov tsis ntseeg thiab Ntxwgnyoog cov tub qhe, koj tuaj yeem muab cov lus sam hwm zoo li no yam tsis muaj kev hlub tshua li: “Ntawm no yog Vajtswv lub tsev, yog cov kwv tij thiab cov nkauj muam tiag tiag lub tsev, yog cov uas raws Vajtswv qab lub tsev. Ntawm no tsis yog cov dab thiab cov Ntxwgnyoog lub tsev. Ntawm no tsis cheem tsum cov dab thiab cov Ntxwgnyoog. Koj yog ib tug dab thiab ib tug Ntxwgnyoog, yog li ntawd tawm mus!” Qhov no puas tsim nyog? (Tsim nyog.) Qhov no tsis yog txoj hau kev uas zoo tshaj plaws; tsuas yog vim nej lub siab ntseeg me, vim nej tsis muaj lub siab ntseeg txaus los tawm tsam nrog Ntxwgnyoog, es Kuv thiaj li qhia nej txoj hau kev no xwb. Tseeb tiag, qhov no tsis yog txoj hau kev zoo tshaj plaws. Txoj hau kev uas zoo tshaj plaws mas yog tias—yog nej to taub ntau qhov tseeb thiab muaj kev ntseeg tiag tiag rau Vajtswv thiab kev paub tiag tiag txog Vajtswv—nej muaj peev xwm cam yeej lawv, thiab nej cam yeej lawv kom tag nrho kom lawv txaj muag kawg nkaus, kom thaum kawg lawv hais rau txhua tus tias: “Kuv tuav tsis tau kuv txoj kev ntseeg lawm; kuv txaj muag dhau uas yuav los tim ntsej tim muag nrog nej txhua tus. Kuv yog ib tug dab thiab ib tug Ntxwgnyoog; kuv tus kheej yuav tawm hauv pawg ntseeg mus.” Vim tam sim no nej tsis muaj lub peev xwm no, nej yuav tsum ua rau cov uas pheej tshaj tawm tej kev xav phem tas li ntawd raws li txoj hau kev uas Kuv tau qhia nej.

Tam sim no nej puas paub yuav daws cov uas pheej tshaj tawm tej kev xav phem tas li nyob hauv pawg ntseeg ntawd li cas lawm? Tam sim no nej puas paub cais cov uas tshaj tawm tej kev xav phem los coj tib neeg mus yuam kev ntawd lawm? (Paub lawm.) Cov hom lus hais tseem ceeb uas tshaj tawm tej kev xav phem yog dab tsi? Ib hom tsom ntsoov rau Vajtswv cov lus, lwm hom tsom ntsoov rau Vajtswv tes hauj lwm, thiab lwm hom tsom ntsoov rau Vajtswv tus moj yam thiab lub ntsiab tseeb. Cov hom lus hais no muaj txij li qib uas sib—tej kev xav hauv nruab siab thiab tej kev to taub yuam kev txog Vajtswv—mus rau qib uas hnyav, xws li kev txiav txim, kev teem txim, thiab kev tuam mom Vajtswv. Dhau ntawm tej no lawm, kuj tseem muaj tib neeg cov lus xav tsis zoo thiab tawm tsam—uas nthuav tawm tej yam xws li lawv tej kev yws, kev tawm tsam, thiab kev tsis txaus siab rau Vajtswv. Muab hais luv luv tias, cov lus hais uas tshaj tawm tej kev xav phem puav leej yog lub ntsiab xeeb txawm ntawm kev tawm tsam, kev txiav txim, kev teem txim, thiab kev tuam mom Vajtswv, thiab qhov tshwm sim los uas tej ntawd ua rau ces yog ua kom tib neeg ua kwv yees thiab ceev faj rau Vajtswv, to taub yuam kev thiab nyob deb ntawm Nws, thiab haj tseem tsis lees paub Nws thiab. Tej no tsim nyog yuav yooj yim paub cais.

C. Tej Hauv Paus Ntsiab Lus thiab Tej Kev rau Kev Daws Tej Kev Xav Phem

Tseem tshuav qee yam txog kev tshaj tawm tej kev xav phem uas yuav tsum tau sib qhia. Ib txhia tib neeg hais tias: “Peb yuav tsum xyaum nthuav tawm thiab soj ntsuam nyob hauv lub neej hauv pawg ntseeg thaum hais txog kev tshaj tawm tej kev xav phem, thiab txwv qhov ntawd. Txawm li cas los xij, nyob hauv txoj kev ntseeg Vajtswv mas, peb yeej yooj yim muaj ntau yam kev xav phem; qhov no yog ib yam uas peb tswj tsis tau. Yog li ntawd, thaum hais txog tej kev xav phem, peb yuav tsum xyaum ua raws hom kev twg kom peb thiaj li xyaum ua tau raug, thiab tsis ua rau muaj kev tab kaum thiab kev cuam tshuam nyob hauv lub neej hauv pawg ntseeg, tsis ua rau muaj kev cuam tshuam tsis zoo rau lwm tus, los sis tsis ua rau lwm tus lub neej txoj sia raug kev puas tsuaj? Txoj kev ua uas tsim nyog yog dab tsi?” Qhov uas tib neeg muaj tej kev xav phem ntawd tsis yog ib qho muaj tseeb lod? Qhov ntawd tsis yog ib yam uas zam tsis tau lod? (Yog.) Ib txhia tib neeg hais tias, “Tsuas yog cov uas tsis caum qhov tseeb xwb thiaj li yuav muaj tej kev xav phem.” Cov lus no puas raug? Cov lus no tsuas raug ib nrab xwb. Cov uas caum qhov tseeb tej zaum kuj muaj tej kev xav phem txog Vajtswv thaum lawv ntsib tej xwm txheej tshwj xeeb vim hais tias ua ntej tib neeg to taub qhov tseeb thiab Vajtswv tej kev npaj siab, thiab ua ntej lawv muaj kev paub txog Vajtswv, lawv yuav muaj ib txhia kev xav phem txog Vajtswv cov lus thiab tes hauj lwm. Tej kev xav phem no yog tib neeg qee yam kev xav uas yuam kev uas tsis mus raws li qhov tseeb. Ib txhia kev xav phem mas tej zaum yuav mus raws li kev coj ncaj ncees, lub tswv yim, txoj kab lis kev cai qub, tej kev xav txog kev coj ncaj ncees, thiab lwm yam, thiab saib sab nraud mas, tej kev xav no tej zaum yuav zoo li yog lawm. Txawm li cas los xij, tej ntawd yeej tsis mus raws li qhov tseeb thiab sib tawm tsam nrog qhov tseeb. Qhov no yog ib qho muaj tseeb. Tib neeg yuav tsum tim ntsej tim muag nrog tej kev xav phem no li cas? Ua ntej tib neeg caum qhov tseeb, lawv twb muaj ntau yam kev xav phem nrog lawv lawm; tej no yog tej kev xav phem uas ib txwm muaj. Nyob hauv tus txheej txheem uas tib neeg caum qhov tseeb, muaj ntau yam kev xav phem tshiab yuav tshwm tuaj hauv lawv vim muaj tej xwm txheej uas hloov pauv thiab ntau yam keeb kwm; tej no yog tej kev xav phem uas tau los tom qab no. Ob hom kev xav phem no puav leej yog tej yam uas tib neeg yuav tsum tau tim ntsej tim muag nrog nyob hauv lawv txoj kev ntseeg Vajtswv. Yog li ntawd, puas muaj ib txoj kev daws tej kev xav phem no? Puas muaj ib txoj kev xyaum ua raws? Ib txhia hais tias, “Qhov no yooj yim daws. Peb tuaj yeem ntxeev siab tawm tsam peb tej kev xav phem uas ib txwm muaj ntawd; peb tsis tas yuav quav ntsej txog tej ntawd. Peb ntseeg hais tias nyob hauv tus txheej txheem ntawm kev caum qhov tseeb, tej kev xav phem no yuav maj mam raug daws thiab raug tshem tawm thaum peb to taub qhov tseeb. Hais txog tej kev xav phem uas tau los tom qab no, peb vam khom Vajtswv los daws tej ntawd, thiab peb kuj tsis raug tej ntawd txwv thiab. Yog li ntawd, los txog tam sim no, peb tsis tau tsim muaj tej kev xav phem nyob hauv peb lub siab uas yuav ua rau muaj kev tawm tsam, kev teem txim, los sis kev tuam mom Vajtswv.” Txoj kev xyaum ua raws no, txoj kev tim ntsej tim muag nrog thiab daws tej kev xav phem no zoo li cas? Qhov ntawd puas daws tau tej kev xav phem? Qhov ntawd puas muaj qhov tsis zoo? Tus cwj pwm uas muaj rau tej kev xav phem no puas yog ib qho uas nquag plias thiab zoo? (Tsis yog.) Tus cwj pwm no puas muaj ib qho txiaj ntsig zoo dab tsi rau tib neeg? Yog koj siv ib txoj kev nyob twj ywm es koj tsis quav ntsej tej kev xav phem no, muab tej ntawd khaws cia rau hauv qhov chaw zais tob tshaj plaws hauv koj lub siab, thaum twg tej ntawd tawm los ces muab nias cia thiab thov Vajtswv thiab tom qab ntawd xav tias daws tau lawm, thaum twg tej ntawd rov qab tshwm los dua, ces siv txoj hau kev daws zoo ib yam nkaus ntawd, thiab tsis xav txog tej ntawd tom qab ntawd thiab ua zoo li tej ntawd tsis yog ib qho teeb meem, ntseeg hais tias, “Txawm yuav zoo li cas los xij, tus Vajtswv uas kuv ntseeg yeej tseem yog kuv tus Vajtswv, kuv yeej tseem yog Vajtswv tus neeg uas raug tsim tawm los, thiab Vajtswv yeej tseem yog kuv tus Tswv Tsim; qhov no tsis tau hloov li”—qhov no puas yog txoj kev uas muaj txiaj ntsig tshaj plaws los daws tej kev xav phem? Qhov no puas ua tau ib qho txiaj ntsig zoo? Txoj kev xyaum ua raws zoo li no puas yog daws tau tej kev xav phem kom tag nrho los ntawm lub hauv paus? Pom tseeb tias tsis yog. Tsis hais tej kev xav phem no yuav loj los sis me, los sis muaj ntau los sis tsawg li cas los xij, tsuav tej ntawd tseem muaj nyob hauv tib neeg lub siab xwb, tej ntawd yuav muaj qee qhov kev cuam tshuam tsis zoo rau lawv txoj kev nkag mus rau hauv lub neej txoj sia thiab lawv txoj kev sib raug zoo nrog Vajtswv, ua rau muaj kev cuam tshuam. Tshwj xeeb tshaj yog thaum tib neeg qaug zog; thaum lawv ntsib ib qho xwm txheej uas lawv kov tsis yeej; thaum lawv tsis to taub Vajtswv tej kev npaj siab, tsis muaj ib txoj kev xyaum ua, thiab tsis paub yuav ua kom Vajtswv txaus siab li cas; thiab thaum lawv xav tias lawv tsis muaj kev cia siab rau txoj kev cawm dim lawm, tej kev xav phem no yuav cia li tshwm plaws tuaj yam sai heev nyob hauv lawv, kav lawv tej kev xav, nyob puv nkaus hauv lawv lub siab, thiab tej zaum yuav cuam tshuam txog lawv qhov nyob los sis tawm mus, thiab cuam tshuam txoj kev uas lawv xaiv. Tej zaum yuav muaj ib qho kev xav phem uas koj yeej tsis tau quav ntsej txog thiab uas yeej tsis tau cuam tshuam rau koj los sis ua rau koj ntog—koj yeej ib txwm ntseeg hais tias koj yog tus kav qhov kev xav phem ntawd, tias koj muaj peev xwm tswj tau qhov kev xav phem ntawd—tiam sis tom qab tau ntsib tau pom ib qho kev ua tsis tiav, kev rho tawm los sis kev tshem tawm, los sis kev qhuab ntuas thiab kev nplawm uas hnyav heev los ntawm Vajtswv los, los sis haj tseem yog thaum koj xav tias zoo li koj tau poob mus rau hauv lub qhov ntuj tob tsis muaj chaw tws lawm, lub sij hawm ntawd, qhov kev xav phem ntawd tsis yog ib yam khoom ntxiv uas tsis tseem ceeb rau koj lawm. Tab txawm yog koj tsis quav ntsej txog nws los, nws muaj peev xwm cuam tshuam thiab coj koj tej kev xav mus yuam kev, haj tseem kav tau koj tej kev xav thiab tej kev xam pom, koj tus cwj pwm rau Vajtswv, thiab koj txoj kev ntseeg rau Vajtswv. Yog koj tsis muaj ib txoj kev uas tsim nyog los sis lub hauv paus ntsiab lus ntawm txoj kev xyaum ua raws los saib xyuas tej kev xav phem no, los sis yog koj tsis muaj ib txoj kev to taub meej txog tej ntawd, ces tej kev xav phem no yuav cuam tshuam koj txoj kev nkag mus rau hauv lub neej txoj sia los sis koj tej kev xaiv tam sim ntawd ua ntu zus. Tej zaum tej ntawd haj tseem yuav cuam tshuam koj txoj kev sib raug zoo nrog Vajtswv thiab koj tus cwj pwm rau Vajtswv thiab. Yog li ntawd, thaum tim ntsej tim muag nrog ntau yam kev xav phem uas tshwm sim nyob hauv txhua yam xwm txheej ntawd, tib neeg yuav tsum coj hom cwj pwm twg thiab siv txoj kev twg los tim ntsej tim muag nrog thiab daws tej ntawd kom thiaj li zam tau kev raug puas tsuaj thiab ua tau ib qho txiaj ntsig zoo? Qhov no yog ib lo lus nug uas yuav tsum tau sib qhia kom meej.

Cov tib neeg uas ua neej nyob hauv lub cev nqaij daim tawv muaj kev txiav txim siab ywj pheej thiab muaj tej kev xav ywj pheej. Tsis hais lawv puas muaj kev kawm, lawv lub peev xwm zoo li cas, los sis lawv yog poj niam los txiv neej los xij li, tsuav tib neeg muaj kev xav xwb, lawv yuav tsim muaj tej kev xav phem. Yog ib qho kev xav phem kav koj tus moj yam qias vuab tsuab, ces koj yuav tawm tsam Vajtswv vim qhov kev xav phem no. Yog li ntawd, qhov teeb meem uas tib neeg muaj tej kev xav phem no yuav tsum tau daws. Tsis yog tsuas muaj cov uas tshaj tawm tej kev xav phem xwb thiaj li tsim muaj tej kev xav phem; qhov ntawd tsuas yog tias lawv tshaj tawm lawv tej kev xav phem, sawv tawm tsam Vajtswv yam tsis xav txog qhov yuav tshwm los tom qab thiab tshaj tawm ntau yam kev xam pom thiab kev txiav txim txog Nws xwb. Tiam sis puas yog cov uas tsis tshaj tawm tej kev xav phem ntawd tsis muaj tej kev xav phem li? Txhua tus puav leej muaj tej kev xav phem; qhov no yog ib qho muaj tseeb. Qhov txawv ces yog cov uas txhob txwm tshaj tawm tej kev xav phem muaj tus yam ntxwv xeeb txawm lub ntsiab tseeb uas yeej ib txwm tsis nyiam qhov tseeb kiag li. Vim lawv tsis lees txais qhov tseeb thiab haj tseem ntseeg hais tias lawv tej kev xav phem yog lawm thiab mus raws li qhov tseeb tag nrho, yog lawv tej kev xav phem sib cov nyom nrog qhov tseeb, lawv xaiv lees txais lawv tej kev xav phem es tsis lees txais qhov tseeb. Qhov no yog qhov uas lawv swb thiab yog qhov laj thawj uas lawv raug txwv thiab raug teem txim. Yog li ntawd vim li cas cov tib neeg dog dig uas zoo li sawv daws thiaj li tsis raug teem txim thaum lawv tsim muaj tej kev xav phem? Qhov no yog vim lawv feem coob hais lus thiab ua tej yam raws li kev paub tias dab tsi yog qhov tsim nyog, thiab paub hauv lawv lub siab hais tias tib neeg tej kev xav phem tsis mus raws li qhov tseeb thiab tsis yog; txawm lawv tsis muaj peev xwm daws lawv tej kev xav phem kiag tam sid los, lawv txaus siab tso tej ntawd tseg. Thaum lawv xaiv lees txais qhov tseeb, lawv tej kev xav phem nyob sab hauv thiaj li raug qhov tseeb muab hloov chaw thiab daws lawm; lawv tso lawv tej kev xav phem tseg thiab tsis raug tej ntawd cuam tshuam, txwv, los sis kav ntxiv lawm. Yog li ntawd, cov tib neeg no, txawm lawv muaj tej kev xav phem los, lawv tsis tshaj tawm tej kev xav phem ntawd. Lawv tseem muaj peev xwm ua lawv tej dej num li ib txwm, raws Vajtswv qab li ib txwm, lees txais Vajtswv cov lus thiab Vajtswv tes hauj lwm, zwm rau Vajtswv lub hwj chim kav thiab tej kev npaj, thiab zwm rau Vajtswv txoj kev cawm dim. Lawv yeej ib txwm lees paub hais tias lawv yog cov neeg uas raug tsim tawm los thiab Vajtswv yog tus Tswv Tsim. Txawm lawv yuav muaj tej kev xav phem dab tsi nyob hauv lawv lub siab los xij, lawv muaj peev xwm tuav tau ib txoj kev sib raug zoo nrog Vajtswv li ib txwm muaj, tuav tau txoj kev sib raug zoo ntawm ib tug neeg uas raug tsim tawm los thiab tus Tswv Tsim, tsis tso lawv tej dej num tseg, tsis tso Vajtswv lub npe tseg, thiab lawv txoj kev ntseeg rau Vajtswv tseem tsis hloov li. Txawm hais tias qhov no yog li ntawd los, yog tej kev xav phem yeej tsis raug daws li, tej ntawd tseem muaj peev xwm ua rau tib neeg puas tsuaj thiab coj lawv mus rau txoj kev puas ntsoog. Yog li ntawd, peb tseem yuav tsum tau sib qhia txog tias yuav tim ntsej tim muag thiab daws tej kev xav phem li cas thiaj li zoo tshaj plaws.

Nej xav hais tias qhov twg yooj yim daws dua: tej kev xav phem uas ib txwm muaj uas tib neeg muaj ua ntej ntseeg Vajtswv, los sis tej kev xav phem uas tib neeg muaj nyob hauv tej xwm txheej ib puag ncig thiab tej xwm txheej uas tshwj xeeb tom qab lawv los ntseeg Vajtswv lawm? (Tej kev xav phem uas ib txwm muaj yooj yim daws dua.) Tej kev xav hauv nruab siab thiab tej kev xav phem uas tib neeg muaj txog Vajtswv thaum lawv nyuam qhuav pib ntseeg Nws mas yooj yim daws dua, hos tej kev xav phem uas lawv muaj thaum lawv tau ntsib tau pom Vajtswv tes hauj lwm tom qab los ntseeg Nws lawm mas tsis yooj yim daws npaum li ntawd—qhov no yog ib lo lus hais raws li txoj kev xav ntawm lub hlwb xwb, tiam sis thaum kawg qhov ntawd tsis mus raws li qhov muaj tseeb. “Raws li txoj kev xav ntawm lub hlwb” txhais li cas? Qhov ntawd txhais hais tias cov lus xaus zoo li no yog tib neeg xav tawm los raws li lub tswv yim thiab laj thawj. Tom qab tib neeg nyuam qhuav pib ntseeg Vajtswv thiab to taub qhov tseeb txog tej zeem muag, lawv qee cov kev xav phem raug muab tso tseg thiab raug daws. Tseeb tiag, txoj kev daws no tsuas yog ua tau tiav nyob rau theem kev qhuab qhia xwb; qhov ntawd zoo li tej kev xav phem no raug daws lawm, tiam sis ntau yam kev xav phem uas tib neeg muaj thaum raws Vajtswv qab yog muaj feem xyuam nrog lawv tej kev xav phem uas ib txwm muaj. Raws li txoj kev xav ntawm lub hlwb, ntawm ob hom kev xav phem no, tej kev xav phem uas ib txwm muaj ntawd yooj yim daws dua, tiam sis qhov tseeb tiag, tsuav tib neeg muaj peev xwm lees txais qhov tseeb thiab nyiam tej yam uas zoo xwb, tsuav lawv mus txog qhov to taub qhov tseeb, ob hom kev xav phem no puav leej yooj yim daws. Piv txwv li, nej ib txhia hais tias tej kev xav phem uas ib txwm muaj los ua ntej yug yooj yim daws dua, tiam sis tej zaum nej yuav ntsib qee tus tib neeg uas muaj tej kev to taub nkhaus uas tawv ncauj heev thiab tuav rawv rau tej yam me me uas tsis tseem ceeb, uas tshawb xyuas phau Vajluskub, cov ntawv tseem ceeb ntawm sab ntsujplig, thiab cov lus tshab txhais txog cov kws txhais Vajluskub; cov tib neeg no pheej hais tej yam uas lawv nrhiav tau rau koj, thiab txawm koj yuav qhia txog qhov tseeb li cas los xij, lawv tsis lees txais qhov ntawd li. Lawv lees txais tsis tau cov lus qhuab qhia uas yog, qhov tseeb, los sis cov lus uas yog; lawv mloog tsis nkag pob ntseg. Ib kis mas, lawv lub peev xwm nkag siab muaj teeb meem; hos lwm kis mas, lawv tsis nyiam tej yam uas zoo los sis qhov tseeb, tiam sis lawv nyiam tawv ncauj thiab tuav rawv rau tej yam me me uas tsis tseem ceeb, thiab ua si nrog rau hom lus, thiab lawv nyiam tej tswv yim thiab kev kawm txog kev ntseeg vajtswv. Cov tib neeg zoo li no puas tso tau lawv tej kev xav phem tseg? (Tsis tau.) Saib raws li qhov muaj tseeb, saib raws li tus moj yam thiab tej kev nyiam ntawm cov tib neeg zoo li no, lawv lees txais tsis tau qhov tseeb. Tib neeg tej kev xav phem thaum pib ntawd mas tseeb tiag ntiav heev thiab nyob sab nraud xwb, tej ntawd yooj yim daws heev. Yog ib tug tib neeg muaj kev xav li ib txwm muaj thiab lub peev xwm nkag siab li ib txwm muaj, thaum koj sib qhia nrog lawv txog qhov tseeb uas ntsig txog tej zeem muag, tsuav lawv to taub qhov ntawd xwb, lawv yooj yim tso tau lawv tej kev xav phem tseg. Tiam sis muaj ib hom tib neeg uas tsis muaj kev xav li ib txwm muaj, to taub tsis tau qhov tseeb, thiab tsis lees txais qhov tseeb. Cov tib neeg zoo li no puas tso tau lawv tej kev xav phem tseg? (Tsis tau.) Yog li ntawd, tej kev xav phem ntawm cov tib neeg zoo li no mas nyuaj daws. Yog ib tug tib neeg muaj qhov laj thawj uas ib txwm muaj thiab muaj peev xwm lees txais qhov tseeb, ces txawm lawv yuav muaj tej kev xav phem dab tsi txog Vajtswv tom qab ntseeg Vajtswv lawm, thiab txawm tej kev xav phem no tshwm sim nyob hauv qhov xwm txheej ib puag ncig los sis qhov xwm txheej dab tsi los xij, lawv tsis nrog Vajtswv sib cav. Lawv hais tias, “Kuv yog tib neeg, kuv muaj tej moj yam qias vuab tsuab, kuv txoj kev xav thiab tej kev ua mas yuam kev tau. Vajtswv yog qhov tseeb, Vajtswv yeej tsis muaj hnub yuam kev li. Txawm kuv tej kev xav yuav tsim nyog npaum li cas los xij, tej ntawd yeej tseem yog tib neeg tej kev xav, tej ntawd los ntawm ib tug tib neeg los thiab tsis yog qhov tseeb. Yog tej ntawd sib cov nyom nrog Vajtswv cov lus los sis qhov tseeb, ces tej kev xav no, txawm yuav tsim nyog npaum li cas los xij, puav leej yuam kev.” Tej zaum tam sim no lawv tsis paub meej tias tej kev xav phem no yuam kev nyob qhov twg, yog li ntawd lawv xyaum ua raws li cas? Lawv xyaum zwm rau, tsis tawv ncauj thiab tsis tuav rawv rau qee yam me me uas tsis tseem ceeb, thiab tso qhov teeb meem ntawd tseg, ntseeg hais tias muaj ib hnub Vajtswv yuav nthuav qhov ntawd tawm. Muaj neeg nug lawv hais tias, “Yog Vajtswv tsis nthuav qhov ntawd tawm ne yuav ua li cas?” Lawv teb hais tias, “Yog li ntawd kuv yuav zwm rau mus ib txhis. Vajtswv yeej tsis muaj hnub yuam kev, thiab yam uas Vajtswv ua yeej tsis muaj hnub yuam kev. Yog yam uas Vajtswv ua tsis mus raws li tib neeg tej kev xav phem, qhov ntawd tsis tau txhais hais tias Vajtswv yuam kev, tiam sis yog tib neeg nkag siab tsis tau los sis to taub tsis tau xwb. Yog li ntawd, yam uas tib neeg yuav tsum ua tshaj plaws tsis yog kev tshawb xyuas kom meej, tsis yog xav mus xav los nyob hauv lawv tej kev xav phem, thiab tsis yog kev siv lawv tej kev xav phem los nrhiav Vajtswv qhov txhaum, siv lawv tej kev xav phem ua ib qho laj thawj tsis zwm rau Vajtswv thiab tawm tsam Nws.” Qhov no yog txoj kev uas lawv coj rau lawv tej kev xav phem. Txoj kev xyaum ua raws uas zoo li no puas yog kev xyaum ua raws qhov tseeb? Qhov no yeej yog kev xyaum ua raws qhov tseeb lawm. Thaum lawv muaj tej kev xav phem, lawv tsis muab Vajtswv los piv rau tej ntawd los sis siv tej ntawd los tshawb xyuas Vajtswv kom meej, los ua kom paub tseeb tias Vajtswv puas muaj tseeb los sis Nws puas muaj nyob tiag. Tiam sis, lawv tso lawv tej kev xav phem tseg thiab siv zog los lees txais qhov tseeb thiab los paub Vajtswv. Txawm hais tias lawv siv tag nrho lawv lub zog los paub Vajtswv los, lawv yeej tseem paub tsis tau Nws. Ces lawv ua li cas? Lawv yeej tseem zwm rau. Lawv hais tias, “Vajtswv yeej tsis muaj hnub yuam kev. Vajtswv yeej ib txwm yog Vajtswv. Vajtswv yog Tus uas nthuav tawm qhov tseeb. Vajtswv yog lub hauv paus ntawm qhov tseeb.” Ua ntej tshaj plaws, lawv muab Vajtswv tso rau ntawm Vajtswv lub meej mom thiab muab lawv tus kheej tso rau ntawm cov neeg uas raug tsim tawm los lub meej mom thaum daws tej kev xav phem no. Yog li ntawd, txawm yog lawv tsis tau tso lawv tej kev xav phem tseg los sis daws tej ntawd los xij, lawv tus cwj pwm ntawm kev zwm rau Vajtswv yeej tsis hloov li. Tus cwj pwm no tiv thaiv lawv, ua rau lawv tseem raug Vajtswv lees paub tias yog cov neeg uas raug tsim tawm los nyob ntawm Nws lub xub ntiag. Yog li ntawd, tej kev xav phem ntawm cov tib neeg zoo li no puas yog yooj yim daws? (Yog.) Qhov no ua tau tiav li cas? Yog hais tias lawv hais li no thaum ntsib qee qhov xwm txheej: “Qhov hais tias txhua yam uas vajtswv ua mas yog qhov tseeb thiab yog lawm, tias vajtswv muaj hwj chim loj kawg nkaus thiab ua tsis tau qhov yuam kev—qhov ntawd tsis yog lawm puas yog? Txawm hais tias muaj lus hais tias vajtswv ua tsis tau qhov yuam kev los, qhov no tsuas yog ib lo lus hais raws li txoj kev xav ntawm lub hlwb xwb. Qhov tseeb tiag, muaj qee yam uas vajtswv ua uas tsis xav txog tib neeg thiab tsis mus raws li tib neeg tej kev xav hauv siab. Kuv xav hais tias qhov teeb meem no tsis tshua yog lawm. Rau tej yam uas tsis tshua yog, kuv tsis tas yuav zwm rau los sis lees txais tej ntawd, puas yog? Txawm hais tias kuv tsis tau tsis lees paub vajtswv lub npe los sis qhov uas nws yog leej twg tiag tiag los, tej kev xav phem uas kuv muaj tam sim no tau ua rau kuv muaj kev paub kev pom ntau ntxiv thiab to taub vajtswv zoo dua—vajtswv kuj ua qee yam yuam kev thiab muaj qee lub sij hawm uas nws ua qhov yuam kev thiab. Yog li ntawd, txij tam sim no mus, kuv yuav tsis ntseeg thaum tib neeg hais tias vajtswv ncaj ncees, zoo tag nrho, thiab dawb huv. Kuv yuav muab ib lub cim nug me me tso rau cov lus no. Txawm hais tias vajtswv yog tus tswv tsim thiab kuv lees txais tau nws lub hwj chim kav los, yav tom ntej kuv yuav tsum tau xaiv lees txais thiab tsis tuaj yeem lam tau lam zwm rau yam paub tsis meej thiab dig muag ntsuav. Yog kuv zwm rau yuam kev ne yuav ua li cas? Tsis yog kuv yuav poob peev lod? Kuv ua tsis tau ib tug neeg uas zwm rau yam ruam ruam.” Yog lawv siv tus cwj pwm no los coj rau tej kev xav phem thiab Vajtswv, lawv puas tso tau lawv tej kev xav phem tseg yam yooj yim? Txoj kev xyaum ua raws zoo li no puas yog kev xyaum ua raws qhov tseeb? (Tsis yog.) Txoj kev sib raug zoo ntawm lawv thiab Vajtswv tsis yog muaj teeb meem lawm lod? Lawv tsis yog tshawb xyuas Vajtswv kom meej tas li lod? Vajtswv tau dhau los ua tus uas lawv tshawb xyuas kom meej hos tsis yog tus Kav uas tswj hwm lawv txoj hmoo. Txawm lawv lees paub tias lawv yog ib tug neeg uas raug tsim tawm los nyob hauv tus Tswv Tsim txoj kev tswj fwm los, yam uas lawv ua tsis yog kev ua tej dej num thiab tej luag hauj lwm ntawm ib tug neeg uas raug tsim tawm los. Lawv tsis coj rau tus Tswv Tsim los ntawm lawv lub meej mom qub li ib tug neeg uas raug tsim tawm los tiam sis hos sawv tawm tsam tus Tswv Tsim, tshawb xyuas tus Tswv Tsim kom meej thiab soj ntsuam tus Tswv Tsim tej kev coj kev ua, xaiv seb puas yuav zwm rau thiab lees txais raws li lawv tus kheej txoj kev txiav txim siab. Tus cwj pwm thiab txoj kev xyaum ua raws no puas yog tej kev qhia tshwm uas pom tau meej uas ib tug neeg uas lees txais qhov tseeb tsim nyog muaj? Lawv tej kev xav phem puas yuav daws tau? (Daws tsis tau.) Tej ntawd yeej tsis muaj hnub daws tau li. Qhov no yog vim lawv txoj kev sib raug zoo nrog Vajtswv tau raug ua kom nkhaus lawm; qhov ntawd tsis yog ib txoj kev sib raug zoo li ib txwm muaj, tsis yog txoj kev sib raug zoo ntawm ib tug neeg uas raug tsim tawm los thiab tus Tswv Tsim. Lawv saib Vajtswv ua tus uas lawv tshawb xyuas kom meej, es pheej tshawb xyuas Nws kom meej tas li. Lawv lees txais yam uas lawv xav tias yog thiab zoo, tiam sis nyob hauv lawv lub siab lawv tawm tsam thiab sib cav nrog Vajtswv txog yam uas tsis mus raws li tib neeg tej kev xav phem thiab tej kev xav hauv nruab siab los sis tib neeg tej kev nyiam, thiab muaj kev sib nrug deb ntawm Vajtswv. Ib tug tib neeg zoo li no puas yog tus uas lees txais qhov tseeb? Saib sab nraud mas, thaum tsis muaj xwm txheej dab tsi thiab tsis muaj tej kev xav phem dab tsi txog Vajtswv, lawv zwm tau rau cov lus uas Vajtswv hais. Tiam sis kiag thaum lawv muaj tej kev xav phem lawm, lawv txoj kev zwm rau ploj mus; tsis pom nyob qhov twg li, thiab muab coj los xyaum ua raws tsis tau lawm. Qhov no yog ua li cas lawm? Pom tseeb tias lawv tsis yog cov tib neeg uas xyaum ua raws qhov tseeb. Lawv tsis lees txais Vajtswv tam li yog lub hauv paus ntawm qhov tseeb los sis yog qhov tseeb. Cov tib neeg uas tsis lees txais qhov tseeb yuav daws los sis tso lawv tej kev xav phem tseg nyuaj heev, txawm tej kev xav phem ntawd tshwm sim thaum twg los xij.

Saib raws li cov ntsiab lus ntawm kev sib qhia saum toj no, nej xav hais tias hom kev xav phem twg yooj yim daws dua? Qhov no nyob ntawm qhov xwm txheej. Rau cov uas lees txais tau qhov tseeb, uas muaj laj thawj thiab yog cov neeg uas yog, lawv tej kev xav phem yooj yim daws txawm tej kev xav phem ntawd tshwm sim thaum twg los xij. Rau cov uas lees txais tsis tau qhov tseeb, lawv tej kev xav phem nyuaj daws txawm tej kev xav phem ntawd tshwm sim thaum twg los xij. Ib txhia tib neeg twb ntseeg Vajtswv los tau nees nkaum los sis peb caug xyoo lawm, thiab txawm yog tam sim no los tsis muaj ib yam dab tsi uas lawv hais mus raws li qhov tseeb li; qhov ntawd tsuas yog cov lus thiab cov kev qhuab qhia thiab tib neeg tej kev xav phem tag nrho xwb. Lawv tsis to taub qhov tseeb ib qho li—lawv puas tuaj yeem tso lawv tej kev xav phem tseg thaum tej ntawd tshwm tuaj? Qhov no mas nyuaj hais. Yog lawv tsis lees txais qhov tseeb, lawv yuav tsis muaj peev xwm tso lawv tej kev xav phem tseg. Qhov tib neeg muaj tej kev xav phem mas yog ib yam uas zam tsis tau. Txhua tus lub siab lub ntsws tuaj yeem tsim muaj ntau yam kev xav phem tau txhua lub sij hawm, txawm tej ntawd yog ib txwm muaj los sis tau los tom qab no. Txawm tib neeg ntseeg Vajtswv los tau pes tsawg xyoo lawm los, tseem muaj tej kev xav phem nyob hauv lawv lub siab thiab. Yog li ntawd tsim nyog ua li cas? Qhov teeb meem no puas yog ib qho uas daws tsis tau li? Tuaj yeem daws tau; muaj ob peb lub hauv paus ntsiab lus uas nej yuav tsum nco ntsoov. Tej hauv paus ntsiab lus no tseem ceeb heev. Thaum nej ntsib tej xwm txheej zoo li no, ces xyaum ua raws li tej hauv paus ntsiab lus no. Tom qab xyaum ua raws tau ib ntus, koj yuav pom txiaj ntsig, thiab koj yuav nkag mus rau hauv qhov tseeb qhov muaj tiag lawm. Thaum tej kev xav phem tshwm tuaj, txawm qhov kev xav phem ntawd yog dab tsi los xij, xub ua tib zoo xav thiab soj ntsuam nyob hauv koj lub siab seb qhov kev xav li no puas yog. Yog koj hnov meej meej hais tias qhov kev xav li no tsis yog thiab nkhaus, thiab tias qhov ntawd yog tuam mom Vajtswv, ces thov Vajtswv kiag tam sid, thov kom Vajtswv qhia thiab coj koj kom paub txog lub ntsiab tseeb ntawm qhov teeb meem no, thiab tom qab ntawd, tham txog koj txoj kev to taub thaum tuaj sib txoos ua ke. Thaum tab tom tau txais kev to taub thiab muaj kev ntsib kev pom txog tej yam lawm, es tsom ntsoov rau txoj kev daws koj tej kev xav phem. Yog qhov xyaum ua raws zoo li no ua tsis tau ib qho txiaj ntsig uas pom tseeb, ces koj yuav tsum nrog ib tug neeg twg uas to taub qhov tseeb sib qhia txog qhov tseeb sab no, siv zog kom tau txais kev pab los ntawm lwm tus thiab tej kev daws los ntawm Vajtswv cov lus. Los ntawm Vajtswv cov lus thiab koj tej kev ntsib kev pom, koj yuav maj mam ua kom paub tseeb tias Vajtswv cov lus yeej yog, thiab koj yuav tau txais tej txiaj ntsig loj heev thaum hais txog kev daws koj tus kheej tej kev xav phem. Los ntawm kev lees txais thiab tau ntsib tau pom cov lus thiab tes hauj lwm zoo li no los ntawm Vajtswv, thaum kawg koj yuav to taub Vajtswv tej kev npaj siab thiab tau txais qee txoj kev paub txog Vajtswv tus moj yam, es ua rau koj tuaj yeem tso tseg thiab daws tau koj tej kev xav phem. Koj yuav tsis to taub yuam kev los sis ceev faj txog Vajtswv ntxiv lawm, thiab koj yuav tsis thov tej yam uas tsis tsim nyog thiab. Qhov no yog rau tej kev xav phem uas yooj yim daws. Tiam sis muaj lwm hom kev xav phem uas nyuaj rau tib neeg to taub thiab daws. Rau tej kev xav phem uas nyuaj daws, muaj ib lub hauv paus ntsiab lus uas koj yuav tsum tuav rawv: Tsis txhob tso tawm los sis tshaj tawm tej kev xav phem ntawd, vim qhov kev tso tej kev xav phem zoo li no tawm tsis muaj qhov zoo rau lwm tus; qhov ntawd yog ib qho muaj tseeb tias yog kev tawm tsam Vajtswv. Yog koj to taub txog lub ntsiab xeeb txawm thiab qhov yuav tshwm sim los ntawm qhov tshaj tawm tej kev xav phem, ces qhov zoo tshaj plaws koj tus kheej yuav tsum ua tib zoo ntsuas kom meej meej es tsis txhob lam tau lam hais lus. Yog koj hais tias, “Qhov khaws kuv cov lus cia tsis hais nyob rau hauv pawg ntseeg ntawd mas nyuaj heev li; kuv xav tias tej zaum kuv yuav tawg li,” koj yeej tseem yuav tsum tau xav seb kev tshaj tawm tej kev xav phem no puas muaj txiaj ntsim tiag tiag rau cov neeg uas Vajtswv xaiv tseg. Yog qhov ntawd tsis muaj txiaj ntsim thiab tuaj yeem ua rau lwm tus muaj tej kev xav phem txog Vajtswv, los sis haj tseem tawm tsam thiab txiav txim rau Vajtswv thiab, ces koj tsis yog tab tom ua phem rau cov neeg uas Vajtswv xaiv tseg lod? Koj tab tom ua phem rau tib neeg; qhov ntawd yeej tsis txawv ntawm kev nthuav ib tus kab mob sib kis kom dav li. Yog koj muaj laj thawj tiag tiag, koj yuav xum tiv txoj kev mob ntawm koj tus kheej zoo dua li tshaj tawm tej kev xav phem thiab tsis ua phem rau lwm tus. Txawm li cas los xij, yog koj pom tias qhov khaws koj cov lus cia ntawd mas nyuaj heev, ces koj yuav tsum thov Vajtswv. Yog qhov teeb meem ntawd raug daws lawm, qhov ntawd tsis yog ib yam uas zoo lod? Yog tias txawm yog thaum koj thov Vajtswv los, koj tseem siv koj tej kev xav phem los txiav txim rau Vajtswv thiab to taub Vajtswv yuam kev, ces koj tsuas yog nrhiav teeb meem rau koj tus kheej xwb. Koj yuav tsum thov Vajtswv li no: “Vajtswv, kuv muaj tej kev xav li no, thiab kuv xav tso tseg, tiam sis kuv ua tsis tau. Thov qhuab ntuas kuv, nthuav kuv tawm los ntawm ntau yam xwm txheej, thiab cia kuv paub hais tias kuv tej kev xav phem yog yuam kev. Txawm Koj yuav qhuab ntuas kuv li cas los xij, kuv txaus siab hlo lees txais.” Txoj kev xav no yog lawm. Tom qab thov Vajtswv los ntawm txoj kev xav li no lawm, koj puas yuav hnov tias tsis tshua ntxhov siab lawm? Yog koj thov thiab nrhiav txuas ntxiv, es tau txais kev qhia thiab kev paub tseeb los ntawm Vajtswv los, koj to taub Vajtswv tej kev npaj siab lawm, thiab koj lub siab kaj lug, koj yuav tsis hnov ntxhov siab ntxiv lawm. Qhov teeb meem ntawd tsis yog raug daws lawm lod? Koj tej kev xav phem, kev tawm tsam, thiab kev ntxeev siab rau Vajtswv ploj mus yuav luag tag lawm; yam tsawg kawg, koj yuav tsis xav tias yuav tsum tau tso tej ntawd tawm lawm. Yog qhov ntawd tseem tsis tau txiaj ntsig thiab qhov teeb meem tseem tsis tau raug daws kom tag nrho, ces nrhiav ib tug neeg twg uas muaj kev ntsib kev pom los pab koj daws koj tej kev xav phem ntawd. Kom lawv nrhiav ob peb nqe Vajtswv cov lus uas muaj feem xyuam txog kev daws tej kev xav phem uas koj muaj ntawd, thiab koj nyeem cov lus ntawd ntau caum zaus los sis ntau pua zaus; ces tej zaum koj tej kev xav phem yuav raug daws kom tag nrho lawm. Tej zaum ib txhia yuav hais tias, “Yog kuv tso tej kev xav phem tawm thaum sib txoos ua ke nrog cov kwv tij thiab cov muam, qhov ntawd yuav yog kev tshaj tawm tej kev xav phem, yog li ntawd kuv ua tsis tau li ntawd. Tiam sis qhov khaws tej ntawd cia mas nyuaj siab heev. Kuv puas tuaj yeem tham txog tej ntawd nrog kuv tsev neeg?” Yog koj cov neeg hauv tsev neeg kuj yog cov kwv tij thiab cov muam uas ntseeg ib yam nkaus thiab, kev tso tej kev xav phem no tawm nyob ntawm lawv xub ntiag kuj yuav cuam tshuam lawv thiab. Qhov no puas tsim nyog? (Tsis tsim nyog.) Yog yam uas koj hais yuav muaj kev cuam tshuam tsis zoo rau lwm tus, ua phem thiab coj lawv mus yuam kev, ces koj yuav tsum tsis txhob hais kiag li. Tiam sis, thov Vajtswv los daws qhov teeb meem ntawd. Tsuav koj thov thiab noj thiab haus Vajtswv cov lus los ntawm ib lub siab uas mob siab pe hawm, ib lub siab uas tshaib thiab nqhis txoj kev ncaj ncees xwb, ces yeej daws tau koj tej kev xav phem. Vajtswv cov lus muaj qhov tseeb uas tag nrho; tej ntawd daws tau txhua qhov teeb meem. Qhov ntawd tsuas yog nyob ntawm seb koj puas tuaj yeem lees txais qhov tseeb thiab puas yeem xyaum ua raws Vajtswv cov lus, thiab seb koj puas tuaj yeem tso koj tus kheej tej kev xav phem tseg xwb. Yog koj ntseeg hais tias Vajtswv cov lus muaj qhov tseeb uas tag nrho, koj yuav tsum thov Vajtswv thiab nrhiav qhov tseeb los daws tej teeb meem thaum tej teeb meem ntawd tshwm tuaj. Yog hais tias tom qab thov Vajtswv tau ib ntus, koj tseem tsis hnov tias Vajtswv qhia koj thiab tsis tau txais cov lus meej meej los ntawm Vajtswv los tias yuav ua li cas, tiam sis koj tej kev xav phem tsis cuam tshuam koj nyob rau sab hauv yam tsis paub txog mus ntxiv, tsis cuam tshuam koj lub neej, maj mam ploj mus lawm, tsis cuam tshuam koj txoj kev sib raug zoo nrog Vajtswv li ib txwm muaj, thiab yeej tsis cuam tshuam koj txoj kev ua tes dej num lawm, ces qhov kev xav phem no tsis yog feem ntau twb daws lawm lod? (Yog.) Qhov no yog txoj kev xyaum ua raws.

Cov uas tsis to taub qhov tseeb yuav tsum nco ntsoov ua ntej tias thaum lawv muaj tej kev xav phem, lawv yuav tsum nrhiav qhov tseeb los daws. Lawv yeej yuav tsum tsis txhob tshaj tawm los sis lam tau lam hais, uas hais tias, “Kuv muaj cai hais lus ywj pheej. Qhov no yog kuv lub qhov ncauj; kuv xav hais dab tsi los tau, xav hais rau leej twg los tau, thiab xav hais nyob rau qhov chaw twg los tau.” Qhov hais li no yog yuam kev lawm. Qee cov lus zoo los sis cov lus yog thaum hais tawm los tej zaum yuav tsis muaj txiaj ntsim rau lwm tus, tiam sis cov lus uas yog tej kev xav phem los sis Ntxwgnyoog tej kev dag ntxias ntawd mas thaum hais tawm los yuav ua rau muaj tej yam tshwm sim los uas ntsuas tsis tau li. Raws li tej yam tshwm sim los no, yog koj muaj ib qho kev xav phem uas koj pheej yuav hais tawm kom tau, thiab koj xav tias qhov ua li ntawd ua rau koj kaj siab thiab zoo siab, ces koj tej kev ua yuav raug muab cais tias yog kev ua phem, thiab Vajtswv yuav muab tej ntawd sau tseg los tawm tsam koj. Vim li cas thiaj li muab tej ntawd sau tseg los tawm tsam koj? Twb tau qhia ntau txoj hau kev zoo, txoj kev, thiab tej hauv paus ntsiab lus ntawm kev xyaum ua raws rau koj lawm, tiam sis koj tsis xaiv tej ntawd; tiam sis koj ho xaiv ib txoj kev uas coj kev puas tsuaj los rau tib neeg—qhov no yog koj txhob txwm ua, tsis yog lod? Yog li ntawd, qhov uas hu koj tej kev ua tias yog kev ua phem ntawd puas tshaj dhau lawm? (Tsis tshaj dhau.) Koj yeej tuaj yeem xaiv daws qhov teeb meem no ntawm koj tus kheej los ntawm txoj kev ntsib kev pom thiab los ntawm txoj kev thov Vajtswv thiab kev nrhiav, es tsis txhob muab koj tej kev xav phem ntawd coj los cuam tshuam thiab coj lwm tus mus yuam kev. Qhov no yog txoj kev uas ib tug neeg uas muaj lub siab txawj xav thiab laj thawj tsim nyog xaiv. Yog li vim li cas koj thiaj li tsis xaiv txoj kev no? Vim li cas thiaj li xaiv ib txoj kev uas ua phem thiab ua mob rau lwm tus? Qhov no tsis yog yam uas Ntxwgnyoog yuav ua lod? Cov tib neeg phem ua tej yam uas ua phem rau lwm tus thiab lawv tus kheej. Yog koj kuj ua tej yam zoo li no thiab, Vajtswv puas ntxub qhov ntawd? (Ntxub.) Tab txawm yog Vajtswv tsis teem txim rau koj tej kev xav phem los, koj yuav tsum nrhiav qhov tseeb ntawm koj tus kheej los daws koj tej kev xav phem thiab koj yuav tsum muaj ib txoj kev los xyaum ua raws qhov tseeb. Yog koj txoj kev daws tej kev xav phem yog qhov tshaj tawm tej kev xav phem ntawd los txhob txwm coj lwm tus mus yuam kev thiab ua phem rau lwm tus, cuam tshuam lub neej hauv pawg ntseeg thiab kev nkag mus rau hauv lub neej txoj sia thiab cov yam ntxwv uas ib txwm muaj ntawm cov kwv tij thiab cov nkauj muam, ces koj tej kev ua yog kev ua phem. Thaum ntsib ib qho xwm txheej zoo li no, tib neeg yuav tsum xaiv li cas? Ib tug neeg uas muaj txoj kev ua neeg thiab caum qhov tseeb yuav tsis xaiv ib txoj kev uas coj lwm tus mus yuam kev thiab ua phem rau lwm tus; lawv yuav xaiv xyaum ua thiab ua raws li tej hauv paus ntsiab lus uas nquag plias thiab zoo, los rau ntawm Vajtswv lub xub ntiag los thov Vajtswv thiab nrhiav qhov tseeb, thiab thov Vajtswv pab daws qhov teeb meem ntawd. Ib txhia hais tias, “Thaum kuv thov Vajtswv pab kuv mas, kuv pheej xav tias Nws txoj kev pab ntawd kov tsis tau thiab pom tsis tau. Kuv xaiv nrhiav kev pab los ntawm tib neeg xwb puas tau?” Tau, koj tuaj yeem xaiv ib tug neeg twg uas to taub qhov tseeb ntau dua koj thiab muaj lub siab ntseeg loj dua koj, ib tug neeg twg uas koj ntseeg tias daws tau koj qhov teeb meem yam tsis raug cuam tshuam los ntawm koj tej kev xav phem kom dhau los qaug zog, ib tug neeg twg uas tau ntsib tau pom tej teeb meem zoo li no thiab tuaj yeem qhia koj tias yuav daws tej ntawd li cas—txoj kev no los kuj tsim nyog thiab. Yog koj xaiv ib tug neeg uas feem ntau ruam feeb tsis meej thiab pom tsis tshab ib yam dab tsi li, thaum hnov txog qhov xwm txheej no, lawv cia li ua ntxhov hnyo tam sid, xav tshaj tawm tej kev xav phem mus rau txhua qhov chaw thiab ua rau muaj tej kev cuam tshuam, thiab xav tso txoj kev ntseeg tseg—ces koj tej kev ua yuav cia li cuam tshuam lub neej hauv pawg ntseeg yam tsis yog txhob txwm. Koj tej kev ua tsis yog yuav raug muab cais tias yog kev ua phem lod? (Yog.) Yog li ntawd, thaum hais txog tias yuav tsum daws tej kev xav phem li cas, koj yuav tsum ua tib zoo xyuam xim, koj yuav tsum tsis txhob ua yam feeb tsis meej los sis ua raws li kev siab kub, thiab koj yeej yuav tsum tsis txhob saib tej kev xav phem tam li yog qhov tseeb—txawm tib neeg tej kev xav yuav yog npaum li cas los xij, tej ntawd tsis yog qhov tseeb. Ua li no, koj yuav siab tus ntau tuaj, thiab koj tej kev xav phem yuav tsis muaj peev xwm tsim tau teeb meem dab tsi li lawm. Qhov muaj tej kev xav phem tsis yog ib yam uas txaus ntshai—tsuav koj nrhiav qhov tseeb xwb, thaum kawg tej ntawd yeej yuav raug daws xwb. Ib txhia tib neeg hais tias, “Tiam sis tej kev xav phem mas tsis yooj yim daws li.” Qee yam kev xav phem mas yeej nyuaj daws tiag, yog li ntawd yuav tsum ua li cas? Qhov ntawd yooj yim xwb. Qee yam kev xav phem yeej ib txwm daws tsis tau nyob hauv ib txhia tib neeg tej kev xav thiab lub hlwb li. Qhov no yeej yog ib qho muaj tseeb lawm, tiam sis txawm ib qho kev xav phem yuav nyuaj daws npaum li cas los xij, nws yeej tseem tsis yog qhov tseeb. Tsuav koj to taub lub ntsiab no xwb, qhov teeb meem ntawd yeej yooj yim daws xwb. Muaj ib qho muaj tseeb nyob ntawm no uas Kuv yuav tsum qhia rau nej: Vajtswv tsis cheem tsum kom txhua tus to taub tag nrho los sis paub tau meej meej txog txhua yam uas Nws ua; Nws tsis cheem tsum kom txhua tus paub qhov tseeb uas nyob hauv qhov ntawd los sis vim li cas Nws thiaj li ua li ntawd. Qhov no tsis yog yam uas Vajtswv ntshaw; Nws tsis cheem tsum cov qauv no ntawm tib neeg. Yog koj lub peev xwm zoo txaus lawm, txawm koj yuav to taub txog theem twg los yeej zoo lawm—tsuas ua qhov koj ua tau xwb. Yog koj to taub tsis tau, thaum koj muaj hnub nyoog ntau zuj zus tuaj, thiab koj tej kev ntsib kev pom pheej tob zuj zus tuaj, thiab koj khaws tau kev ntsib kev pom ntau ntxiv, es koj txoj kev to taub txog qhov tseeb kuj yuav maj mam tob zuj zus tuaj thiab, thiab koj tej kev xav phem yuav tsawg zuj zus. Txawm li cas los xij, tib neeg feem coob tsis muaj peev xwm nkag siab qee qhov xwm txheej tshwj xeeb thiab yeej tsis to taub tej ntawd li. Vajtswv puas yuam lawv kom to taub tej xwm txheej no? Vajtswv tsis yuam; Vajtswv tsis quab yuam kom lawv to taub. Piv txwv li, muaj ntau yam zais tob nyob hauv txhua yam uas Vajtswv tsim tawm los uas tib neeg xav paub tiam sis paub tsis tau. Txawm li cas los xij, nyob hauv Vajtswv cov lus thiab tes hauj lwm, Nws tsuas tsom ntsoov rau qhov nthuav qhov tseeb tawm los ntxuav tib neeg kom dawb huv thiab cawm tib neeg dim xwb. Nws tsis tshua hais txog lwm yam, thiab txawm qee zaus Nws yuav hais txog los xij, Nws tsuas hais luv luv xwb; Vajtswv yeej tsis piav tej yam no ntev ntev rau tib neeg li. Vim li cas thiaj li tsis piav? Vim tib neeg tsis tas yuav to taub tej yam no. Nyob hauv tes hauj lwm uas Vajtswv ua rau tib neeg, ib qho mas, Nws nthuav Nws tus moj yam lub ntsiab tseeb tawm; lwm qhov mas, Vajtswv muaj Nws tej kev xav, Nws tej kev npaj, cov hauv paus thiab tej hom phiaj rau tej yam uas Nws ua, tej kev thiab tej hau kev uas Nws siv los ua hauj lwm rau ntau hom tib neeg, tej kev thiab tej hau kev txog qhov uas Nws muaj hwj chim kav txhua yam, thiab lwm yam ntxiv. Vajtswv yeej tsis tau hais tias tib neeg yuav tsum to taub thiab nkag mus rau hauv txhua qhov tseeb thiaj li suav tau tias lawv tau txais kev cawm dim lawm. Qhov no yog vim Vajtswv muaj hwj chim loj kawg nkaus dhau lawm! Vajtswv tej kev ua, kev hais lus, kev ua hauj lwm, thiab kev muaj lub hwj chim kav txhua yam ntawd cia li nthuav tawm Nws tus moj yam, lub ntsiab tseeb, qhov Nws yog leej twg tiag tiag, thiab ntau yam ntxiv. Txawm Vajtswv cia li nthuav tawm yam uas Nws muaj thiab yam uas yog Nws no los xij, Nws tsis hais kom tib neeg to taub los sis nkag siab tej ntawd tag nrho. Qhov no yog vim Vajtswv yeej ib txwm yog Vajtswv, thiab Nws muaj hwj chim loj kawg nkaus, hos cov noob neej uas raug tsim tawm los mas me me thiab tsis muaj hwj chim kiag li; muaj ib qho kev sib txawv loj npaum ntuj thiab av nyob ntawm tib neeg thiab Vajtswv! Yog li ntawd, qhov uas tib neeg muaj qee yam kev xav phem thiab tej kev xav hauv nruab siab txog Vajtswv ntawd yeej yog ib yam uas ib txwm muaj heev. Vajtswv twb tsis muab qhov no tso rau hauv siab, tiam sis koj pheej ua tiag tiag thiab pheej tuav rawv qhov ntawd tsis tso. Txoj kev ua li no mas tsis tau. Yog koj yog ib tug neeg uas caum qhov tseeb thiab muaj peev xwm siab, tsuav koj to taub qhov tseeb thiab muaj kev paub tiag tiag txog Vajtswv xwb, tej kev xav phem thiab tej kev xav hauv nruab siab no yeej yuav cia li raug daws xwb. Yog koj tsis caum qhov tseeb, thiab txawm leej twg yuav qhia qhov tseeb rau koj los xij, koj tsis lees txais thiab yeej ib txwm tuav rawv koj tej kev xav phem, qhov tshwm sim los ntawm qhov no yuav yog dab tsi? Qhov tshwm sim los yuav yog tias txawm koj mus txog thaum kawg ntawm koj lub neej txoj sia los sis lub sij hawm uas Vajtswv tes hauj lwm ua tiav hlo lawm los xij, koj tsis tau qhov tseeb tiam sis yuav raug koj tej kev xav phem thiab tej kev xav hauv nruab siab coj mus rau txoj kev tuag. Txawm koj pom Vajtswv lub cev ntsujplig tshwm los los xij, koj yeej tseem yuav daws tsis tau koj qee cov kev xav phem thiab kev xav hauv nruab siab txog Vajtswv. Ua li Vajtswv puas yuav qhia tag nrho tej uas muaj tseeb thiab yam uas yog qhov tseeb rau koj tsuas yog vim koj daws tsis tau tej kev xav phem no xwb? Ib qho mas, Vajtswv tsis tas yuav ua li ntawd; lwm qhov mas, muaj ib qho muaj tseeb uas yog tib neeg lub hlwb thiab lub siab tsis muaj peev xwm loj npaum li ntawd uas los lees txais tej yam no. Tes hauj lwm uas Vajtswv ua ntawd mas siab tshaj tib neeg txoj kev xav hauv nruab siab thiab siab tshaj txhua yam. Thaum muab piv rau txhua yam, tib neeg tsuas zoo li ib lub xuab zeb nyob ntawm ntug hiav txwv xwb. Kev piav qhia li no mas ze rau qhov muaj tseeb thiab suav tau tias tsim nyog. Txawm Vajtswv xav qhia txhua yam rau koj los xij, koj puas muaj lub peev xwm lees txais tau tag nrho tej ntawd? Ib txhia tib neeg hais tias, “Vim li cas kuv thiaj li lees txais tsis tau tag nrho? Yog Vajtswv hais ntau ntxiv, kuv yuav to taub ntau ntxiv thiab tau txais ntau ntxiv. Yog zoo li ntawd, kuv yuav tau txais txiaj ntsim tshwj xeeb!” Qhov ntawd yog kev ua npau suav nruab hnub xwb; koj ntsuas koj lub peev xwm siab dhau lawm. Qhov muaj tseeb mas tsis yog zoo li ntawd. Nyob hauv Vajtswv lub qhov muag saib mas, tej yam uas Nws qhia rau koj ntawd mas puav leej yooj yim thiab pom tseeb heev; tej ntawd yog tej yam uas tib neeg tuaj yeem nkag siab tau. Tseeb tiag, muaj ntau yam uas Vajtswv tsis tau hais txog vim tib neeg to taub tsis tau tej ntawd. Yog li ntawd, qhov uas txog thaum kawg daws tsis tau qee yam ntawm koj tej kev xav phem ntawd mas yeej yog ib yam uas ib txwm muaj xwb. Tej yam uas Vajtswv cheem tsum kom koj to taub thiab xav qhia rau koj, los sis yam uas koj tiv taus thiab to taub tau, koj yeej yuav to taub. Hais txog tej yam uas koj tiv tsis taus los sis nkag siab tsis tau, uas koj ob lub qhov muag ntawm sab cev nqaij daim tawv pom tsis tshab, txawm Vajtswv yuav qhia tej ntawd rau koj los xij, qhov ntawd yuav tsis muaj qab hau thiab nkim zog xwb. Yog li ntawd, Vajtswv thiaj li tsis qhia tej yam no rau koj. Hais txog tej kev xav phem zoo li no, txawm txog lub sij hawm uas koj tuag los sis txog lub sij hawm uas Vajtswv tes hauj lwm ua tiav hlo lawm koj tseem tsis to taub los xij, qhov no cuam tshuam dab tsi? Qhov ntawd puas cuam tshuam koj txoj kev zwm rau Vajtswv? Puas cuam tshuam koj txoj kev ua lub hauj lwm ntawm ib tug neeg uas raug tsim tawm los? Puas cuam tshuam koj txoj kev paub qhov Vajtswv yog leej twg tiag tiag thiab Nws lub ntsiab tseeb? Yog koj tsis raug cuam tshuam nyob rau hauv tej kev no, ces koj yeej yuav tau txais kev cawm dim lawm. Yog li, hom kev xav phem zoo li no puas tseem cheem tsum daws thiab? Tsis cheem tsum lawm. Qhov no yog hom kev xav phem kawg, hom uas daws tsis tau tab txawm txog thaum tuag los xij. Ib txhia tib neeg hais tias, “Au Vajtswv, kuv tseem tsis to taub tes hauj lwm uas Koj tau ua no, cov lus uas Koj tau hais no, thiab qhov xwm txheej uas Koj tau npaj no. Koj puas tuaj yeem qhia kuv ua ntej kuv tuag kom kuv thiaj li tuag tau yam kaj siab lug?” Vajtswv tsis quav ntsej tej kev thov zoo li no. Koj tuaj yeem mus yam muaj kev kaj siab lug; koj yuav to taub txhua yam nyob hauv sab ntsujplig.

Vajtswv muaj Nws tus qauv rau txoj kev cawm tib neeg; tus qauv ntawd tsis yog nyob ntawm seb koj daws koj tej kev xav phem tau zoo li cas los sis koj tso tau tej kev xav phem ntawd tseg ntau npaum li cas. Tiam sis, yog nyob ntawm seb koj hwm Vajtswv npaum li cas thiab koj zwm rau Nws npaum li cas, seb koj puas hwm thiab zwm rau Nws tiag tiag xwb. Txhua yam uas Vajtswv ua puav leej muaj qab hau, thiab txawm qhov ntawd yuav yooj yim rau tib neeg lees txais, los sis nyuaj rau tib neeg lees txais thiab yooj yim ua rau tib neeg muaj tej kev xav phem los, txawm li cas los xij, qhov Vajtswv yog leej twg tiag tiag ntawd yuav tsis hloov vim qhov no; Nws yuav ib txwm yog tus Tswv Tsim, thiab koj yuav ib txwm yog ib tug neeg uas raug tsim tawm los. Yog koj muaj peev xwm tsis raug txwv los ntawm ib qho kev xav phem twg, thiab tseem tuav tau txoj kev sib raug zoo ntawm ib tug neeg uas raug tsim tawm los thiab tus Tswv Tsim nrog Vajtswv, ces koj yog ib tug neeg uas raug tsim tawm los tiag tiag ntawm Vajtswv. Yog koj muaj peev xwm tsis raug cuam tshuam los ntawm ib qho kev xav phem twg, thiab muaj peev xwm zwm rau Vajtswv tiag tiag los ntawm qhov tob tshaj plaws hauv koj lub siab, thiab yog hais tias, txawm koj txoj kev to taub txog qhov tseeb yuav tob los sis ntiav los xij, koj muaj peev xwm muab tej kev xav phem tso tseg, thiab tsis raug tej kev xav phem ntawd txwv, tsuas ntseeg hais tias Vajtswv yog qhov tseeb, txoj kev, thiab txoj sia, tias Vajtswv yuav ib txwm yog Vajtswv, thiab tias yam uas Vajtswv ua yeej tsis muaj hnub yuam kev li, ces koj tuaj yeem tau txais kev cawm dim lawm. Tseeb tiag, txhua tus lub siab ntseeg yeej muaj qhov txwv. Tib neeg lub hlwb yuav ntim tau ntau npaum li cas? Lawv puas tuaj yeem to taub tau Vajtswv tshab? Qhov ntawd yog kev ua npau suav nruab hnub xwb! Tsis txhob hnov qab tias: Tib neeg yuav ib txwm yog me nyuam mos nyob rau ntawm Vajtswv lub xub ntiag. Yog koj xav tias koj ntse, yog koj yeej ib txwm khav tias koj ntse, thiab xav kom to taub txhua yam, xav hais tias, “Yog kuv to taub tsis tau, ces kuv tsis tuaj yeem lees paub tias koj yog kuv tus vajtswv, kuv lees txais tsis tau tias koj yog kuv tus vajtswv, kuv tsis tuaj yeem lees paub tias koj yog tus tswv tsim. Yog koj tsis daws kuv tej kev xav phem, ces koj tsis txhob npau suav tias kuv yuav lees paub tias koj yog vajtswv, tias kuv yuav lees txais koj lub hwj chim kav, thiab tias kuv yuav zwm rau koj li,” qhov no ces muaj teeb meem lawm. Muaj teeb meem li cas? Vajtswv tsis cav txog tej yam zoo li no nrog koj. Rau tib neeg mas Nws yeej ib txwm yuav yog li no: Yog koj tsis lees txais tias Vajtswv yog koj tus Vajtswv, Nws yuav tsis lees txais tias koj yog ib tug ntawm Nws cov neeg uas raug tsim tawm los thiab. Thaum Vajtswv tsis lees txais tias koj yog ib tug ntawm Nws cov neeg uas raug tsim tawm los, ib qho kev hloov tshwm sim nyob hauv koj txoj kev sib raug zoo nrog Vajtswv uas yog los ntawm koj tus cwj pwm uas muaj rau Nws. Yog koj tsis muaj peev xwm zwm rau Vajtswv, thiab lees txais qhov Vajtswv yog leej twg tiag tiag thiab Vajtswv lub ntsiab tseeb, thiab txhua yam uas Vajtswv ua, ces koj qhov uas yog leej twg tiag tiag ntawd yuav muaj ib qho kev hloov lawm. Koj puas tseem yog ib tug neeg uas raug tsim tawm los? Vajtswv tsis lees paub koj; koj cav laj thawj dab tsi los yeej tsis muaj qab hau. Thiab yog koj tsis yog ib tug neeg uas raug tsim tawm los, thiab Vajtswv tsis xav tau koj lawm, koj puas tseem muaj kev cia siab ntawm txoj kev cawm dim? (Tsis muaj lawm.) Vim li cas Vajtswv thiaj li tsis saib koj tam li ib tug neeg uas raug tsim tawm los? Koj tsis muaj peev xwm ua tau tej luag hauj lwm thiab tej dej num uas ib tug neeg uas raug tsim tawm los tsim nyog ua kom tiav, thiab koj tsis coj rau tus Tswv Tsim los ntawm lub meej mom ntawm ib tug neeg uas raug tsim tawm los. Yog li Vajtswv yuav coj rau koj li cas? Nws yuav saib koj li cas? Vajtswv yuav tsis saib tias koj yog ib tug neeg uas raug tsim tawm los uas mus raws li tus qauv, tiam sis yog ib tug neeg phem qias vuab tsuab, ib tug dab thiab ib tug Ntxwgnyoog. Tsis yog koj xav tias koj ntse lod? Ua li cas koj thiaj li ua rau koj tus kheej dhau los ua ib tug dab thiab ib tug Ntxwgnyoog lawm? Qhov no tsis yog ntse, yog ruam xwb. Cov lus no pab kom tib neeg to taub dab tsi? Tias tib neeg nyob ntawm Vajtswv lub xub ntiag yuav tsum coj kom raws kev cai. Tab txawm yog koj muaj ib lub laj thawj rau koj tej kev xav phem los xij, tsis txhob xav tias koj muaj qhov tseeb, thiab tias koj muaj peev xwm los qw nthe tawm tsam Vajtswv thiab txwv Nws. Txawm li cas los xij, tsis txhob ua li ntawd. Thaum koj poob koj qhov uas yog leej twg tiag tiag li ib tug neeg uas raug tsim tawm los lawm, ces koj yuav raug rhuav tshem—qhov no tsis yog kev tso dag li. Qhov ntawd yog vim hais tias, thaum tib neeg muaj tej kev xav phem, lawv siv cov kev coj uas sib txawv, thiab siv cov kev daws uas sib txawv, es qhov tshwm sim los thiaj li txawv kiag lawm.

Hais txog tej kev xav phem, nej puas muaj tej hauv paus ntsiab lus ntawm txoj kev xyaum ua raws lawm? Cov hauv paus ntsiab lus no puas tiv thaiv tau nej kom thiaj li coj tau nej tus kheej tsim nyog li cov neeg uas raug tsim tawm los? Txoj kev no puas zoo? (Zoo.) Yog li ntawd muab xaus lus seb. (Yog qhov ntawd yog ib qho kev xav phem uas tsis tshua nyuaj daws, peb yuav tsum thov Vajtswv thiab nrhiav, nrhiav qhov tseeb uas soj ntsuam hom kev xav phem no los ntawm Vajtswv cov lus, thiab peb kuj tuaj yeem nrog cov kwv tij thiab cov nkauj muam uas to taub qhov tseeb sib qhia thiab; ua li no, peb yuav muaj peev xwm pom tshab tej kev yuam kev ntawm qhov kev xav phem ntawd, yog li ntawd thiaj li daws tau qhov kev xav phem ntawd. Kuj muaj qee yam kev xav phem uas tsis yooj yim daws thiab, tiam sis peb yuav tsum tsis txhob tuav rawv tej kev xav phem ntawd. Peb cheem tsum muaj ib tus cwj pwm uas lees txais qhov tseeb thiab zwm rau Vajtswv, paub tias peb yog cov neeg uas raug tsim tawm los thiab tias yam uas Vajtswv ua yeej yog lawm, thiab tsuas yog peb tsis tau paub txog qhov no xwb. Txawm peb to taub los sis tsis to taub los xij, peb yuav tsum tsis txhob tshaj tawm tej kev xav phem. Peb yuav tsum kawm paub los thov Vajtswv thiab nrhiav tas li, thiab maj mam tej kev xav phem no kuj yuav raug daws tau thiab. Qhov xwm txheej peb yog, muaj qee yam kev xav phem txog thaum kawg los yeej tseem daws tsis tau. Nyob rau hauv tej xwm txheej zoo li no, tsuav peb tsis raug txwv los ntawm tej kev xav phem no thiab tsis tshaj tawm tej kev xav phem ntawd xwb, ces yeej tau lawm. Txawm tej kev xav phem no txog thaum kawg tseem daws tsis tau los, tsuav peb tsis tuav rawv tej kev xav phem ntawd thiab tsis ua phem vim tej ntawd xwb, Vajtswv yuav tsis teem txim rau peb, thiab qhov ntawd yuav tsis cuam tshuam peb txoj kev cawm dim.) Tag nrho muaj pes tsawg lub hauv paus ntsiab lus? (Peb.) Tag nrho muaj peb lub hauv paus ntsiab lus. Nej twb sau tej ntawd tseg tag nrho lawm, puas yog? Thaum nej to taub qhov tseeb thiab nkag siab tau tej hauv paus ntsiab lus lawm, nej tej kev xav phem yuav cia li raug daws lawm. Nej yuav tsum tsis txhob cia tej kev xav phem ntawd thaiv los sis ua rau nej dawm ntog; daws tej kev xav phem uas daws tau ntawd kom zoo tshaj plaws li nej ua tau, thiab rau cov uas daws tsis tau ib lub sij hawm ntawd, yam tsawg tshaj plaws tsis txhob cia tej kev xav phem ntawd cuam tshuam nej. Tej ntawd yuav tsum tsis txhob tab kaum txoj kev ua koj tes dej num, thiab tej ntawd kuj yuav tsum tsis txhob cuam tshuam koj txoj kev sib raug zoo nrog Vajtswv thiab. Yam tsawg tshaj plaws uas koj yuav tsum ua yog tsis txhob tshaj tawm tej kev xav phem, tsis txhob ua phem, tsis txhob ua rau muaj kev tab kaum los sis kev cuam tshuam, thiab tsis txhob ua Ntxwgnyoog ib tug tub qhe los sis ib lub qhov ncauj rau Ntxwgnyoog. Yog hais tias, txawm koj yuav siv zog npaum li cas los xij, qee yam kev xav phem tsuas daws tau sab nraud xwb thiab daws tsis tau kom tag nrho li, ces cia li txhob quav ntsej tej kev xav phem ntawd xwb. Tsis txhob cia tej kev xav phem cuam tshuam koj txoj kev caum qhov tseeb los sis koj txoj kev nkag mus rau hauv lub neej txoj sia. Tuav tau tej hauv paus ntsiab lus no, thiab nyob hauv tej xwm txheej uas ib txwm muaj, koj yuav raug tiv thaiv lawm. Yog koj yog ib tug neeg uas lees txais qhov tseeb, nyiam tej yam uas zoo, tsis yog ib tug tib neeg phem, tsis txaus siab ua rau muaj tej kev tab kaum los sis kev cuam tshuam, thiab tsis txhob txwm ua rau muaj tej kev tab kaum thiab kev cuam tshuam, ces feem ntau thaum koj ntsib qhov teeb meem uas muaj tej kev xav phem tshwm tuaj los, feem ntau koj yeej yuav raug tiv thaiv xwb. Lub hauv paus ntsiab lus ntawm txoj kev xyaum ua raws uas tsawg tshaj plaws yog li no: Yog muaj ib qho kev xav phem tshwm tuaj uas nyuaj daws, tsis txhob maj ua raws li qhov kev xav phem ntawd. Ua ntej, tos thiab nrhiav qhov tseeb los daws, ntseeg hais tias yam uas Vajtswv ua yeej tsis muaj hnub yuam kev. Nco ntsoov lub hauv paus ntsiab lus no. Tsis tas li ntawd xwb, tsis txhob muab koj tes dej num tso tseg los sis cia qhov kev xav phem ntawd cuam tshuam txoj kev ua koj tes dej num. Yog koj muaj tej kev xav phem thiab xav hais tias, “Kuv tsuas ua dog ua dig rau kuv tes dej num no xwb; kuv lub siab tsis zoo li, yog li ntawd kuv yuav tsis ua hauj lwm zoo rau koj!” qhov no yeej tsis tau li. Thaum koj tus cwj pwm hloov mus xav tsis zoo thiab ua dog ua dig lawm, qhov ntawd yuav muaj teeb meem; qhov no yog tej kev xav phem tab tom ua phem nyob hauv koj. Thaum tej kev xav phem ua phem nyob hauv koj thiab cuam tshuam txoj kev ua koj tes dej num lawm, qhov ntawd txhais hais tias txog rau lub sij hawm no koj txoj kev sib raug zoo nrog Vajtswv tseeb tiag twb muaj ib qho kev hloov pauv lawm. Qee cov kev xav phem tuaj yeem cuam tshuam txoj kev ua koj tes dej num, uas yog ib qho teeb meem loj, thiab tej ntawd yuav tsum raug daws kom ncav sij hawm. Lwm cov kev xav phem tsis cuam tshuam txoj kev ua koj tes dej num los sis koj txoj kev sib raug zoo nrog Vajtswv, yog li ntawd tej ntawd tsis yog tej teeb meem loj. Yog tej kev xav phem uas koj muaj ntawd tuaj yeem cuam tshuam txoj kev ua koj tes dej num, ua rau koj ua xyem xyav rau Vajtswv, tsis mob siab ua koj tes dej num—thiab haj tseem xav tias qhov tsis ua koj tes dej num mas yeej tsis muaj qhov tshwm sim los dab tsi—thiab tsis muaj kev ntshai los sis ib lub siab hwm Vajtswv, qhov no mas phom sij heev. Qhov no txhais hais tias koj yuav poob rau hauv kev dag ntxias, thiab raug Ntxwgnyoog dag thiab ntes mus. Koj tus cwj pwm rau koj tej kev xav phem thiab tej kev xaiv uas koj xaiv mas tseem ceeb heev; txawm tej kev xav phem ntawd yuav daws tau los sis tsis tau, thiab txawm yuav daws tau mus txog theem twg los xij, txoj kev sib raug zoo li ib txwm muaj nyob nruab nrab ntawm koj thiab Vajtswv yuav tsum tsis txhob hloov. Ib qho mas, koj yuav tsum muaj peev xwm zwm rau txhua qhov xwm txheej uas Vajtswv tswj hwm, thiab paub tseeb tias txhua yam uas Vajtswv ua yeej yog lawm thiab muaj qab hau, thiab txoj kev paub no thiab qhov tseeb sab no yuav tsum tsis txhob muaj hnub hloov rau koj. Lwm qhov mas, koj yuav tsum tsis txhob muab tes dej num uas Vajtswv tau tso rau koj ntawd tso tseg, koj yuav tsum tsis txhob muab lub nra no tshem tawm ntawm koj tus kheej mus. Yog hais tias, nyob hauv koj nruab siab los sis sab nraud, koj tsis muaj kev tawm tsam, kev tsis lees txais, los sis kev ntxeev siab rau Vajtswv, Vajtswv tsuas yog yuav pom koj txoj kev zwm rau, thiab tias koj tab tom tos xwb. Tej zaum koj tseem yuav muaj tej kev xav phem, tiam sis Vajtswv tsis pom koj txoj kev ntxeev siab. Vim tsis muaj kev ntxeev siab thiab kev tawm tsam nyob hauv koj, Vajtswv tseem saib koj li yog ib tug ntawm Nws cov neeg uas raug tsim tawm los. Tiam sis, yog koj lub siab muaj kev yws thiab kev tawm tsam puv npo, koj tab tom nrhiav ib lub cib fim los ua pauj rov qab, thiab tsis xav ua koj tes dej num, hos xav muab lub nra ntawd tshem tawm ntawm koj tus kheej mus—haj tseem mus txog theem uas, nyob hauv koj lub siab, muaj ntau hom kev yws txog Vajtswv, thiab qee cov kev qhia tshwm uas pom tau meej ntawm kev tawm tsam thiab kev tsis txaus siab raug nthuav tawm nyob hauv txoj kev ua koj tes dej num—ces lub sij hawm no, koj txoj kev sib raug zoo nrog Vajtswv twb muaj ib qho kev hloov loj heev lawm. Koj twb hloov tawm ntawm koj lub meej mom li ib tug neeg uas raug tsim tawm los lawm; koj tsis yog ib tug neeg uas raug tsim tawm los ntxiv lawm, tiam sis tau dhau los ua ib lub qhov ncauj rau cov dab thiab Ntxwgnyoog—thiab yog li ntawd Vajtswv yuav tsis muaj kev hlub tshua rau koj li lawm. Thaum ib tug neeg mus txog theem no, lawv tab tom mus ze rau qhov chaw phom sij lawm. Txawm Vajtswv tsis ua ib yam dab tsi li los xij, lawv yuav tsis muaj peev xwm sawv khov kho nyob hauv pawg ntseeg li. Thiab yog li ntawd, nyob hauv txhua yam uas lawv ua—tshwj xeeb tshaj yog thaum qhov ntawd muaj feem xyuam txog tej teeb meem xws li kev daws tej kev xav phem—tib neeg yuav tsum ua tib zoo xyuam xim kom zam qhov ua tej yam uas ua txhaum rau Vajtswv, los sis raug Vajtswv teem txim, los sis ua mob los sis ua phem rau lwm tus. Qhov no yog lub hauv paus ntsiab lus.

Qhov teeb meem uas tib neeg muaj tej kev xav phem txog Vajtswv tsis yog ib qho teeb meem me me li! Qhov uas tib neeg tuav tau txoj kev sib raug zoo li ib txwm muaj nrog Vajtswv mas yeej tseem ceeb heev, tiam sis yam uas cuam tshuam txoj kev sib raug zoo no tshaj plaws ntawd mas yog tib neeg tej kev xav phem. Tsuas yog thaum tib neeg tej kev xav phem txog Vajtswv raug daws lawm xwb mas thiaj li tuav tau txoj kev sib raug zoo li ib txwm muaj nrog Vajtswv. Tam sim no, ntau tus tib neeg muaj ib qho teeb meem loj. Txawm lawv yuav ntseeg Vajtswv tau ntau xyoo npaum li cas los xij, txawm lawv yuav muaj peev xwm tiv kev txom nyem thiab them tus nqi nyob hauv txoj kev ua lawv tej dej num los xij, tiam sis txij thaum pib los txog thaum kawg, lawv tej kev xav phem yeej daws tsis tau kom tag nrho li. Qhov no cuam tshuam loj heev rau lawv txoj kev sib raug zoo nrog Vajtswv thiab cuam tshuam ncaj qha rau lawv txoj kev hlub rau Vajtswv thiab lawv txoj kev zwm rau Nws. Yog li ntawd, txawm tib neeg muaj tej kev xav phem dab tsi txog Vajtswv los, qhov ntawd yog ib qho xwm txheej loj uas tsis quav ntsej tsis tau kiag li. Tej kev xav phem zoo li ib sab phab ntsa; tej ntawd txiav tib neeg txoj kev sib raug zoo nrog Vajtswv, ua rau lawv tsis muaj feem xyuam nrog Vajtswv tes hauj lwm cawm dim lawm. Yog li ntawd, qhov uas tib neeg muaj tej kev xav phem txog Vajtswv yog ib qho teeb meem loj heev uas tsis tuaj yeem tsis quav ntsej! Yog tib neeg muaj tej kev xav phem es tsis tuaj yeem nrhiav qhov tseeb los daws kom ncav sij hawm, qhov no yuav ua rau muaj kev xav tsis zoo, kev tawm tsam Vajtswv, thiab haj tseem yog kev ua yeeb ncuab rau Nws yam yooj yim heev. Lawv puas tseem yuav lees txais tau qhov tseeb? Lawv txoj kev nkag mus rau hauv lub neej txoj sia yuav nyob twj ywm tsis mus tom ntej lawm. Txoj kev ntsib kev pom Vajtswv tes hauj lwm mas ntxhab thiab tsis du tsis tus. Vim tib neeg muaj tej moj yam qias vuab tsuab, lawv tuaj yeem taug ntau txoj kev nkhaus, thiab tej zaum lawv yuav muaj tej kev xav phem nyob hauv ib qho xwm txheej twg los tau. Yog tej kev xav phem no tsis raug daws los ntawm txoj kev nrhiav qhov tseeb, ces tib neeg tuaj yeem ntxeev siab rau Vajtswv thiab tawm tsam Nws, taug txoj kev ua yeeb ncuab rau Nws. Thaum tib neeg taug cov tawm tsam khetos txoj kev lawm, nej xav tias puas tseem tshuav ib lub cib fim rau lawv tau txais kev cawm dim? Txog lub sij hawm ntawd tsis yooj yim daws qhov ntawd lawm, thiab yuav tsis tshuav cib fim lawm. Yog li ntawd, ua ntej Vajtswv tsis lees paub tias koj yog Nws ib tug neeg uas raug tsim tawm los ntawd, koj yuav tsum kawm seb yuav ua Vajtswv ib tug neeg uas raug tsim tawm los li cas. Tsis txhob sim tshawb xyuas kom meej txog tus Tswv Tsim los sis sim nrhiav txoj kev los ua pov thawj thiab ua kom paub tseeb tias tus Vajtswv uas koj ntseeg ntawd yog tus Tswv Tsim. Qhov no tsis yog koj txoj hauj lwm los sis koj lub luag hauj lwm. Yam uas koj tsim nyog xav txog thiab ua tib zoo xav hauv koj lub siab txhua hnub ntawd mas yog seb yuav ua koj tej dej num kom tiav thiab dhau los ua ib tug neeg uas raug tsim tawm los uas mus raws li tus qauv li cas, hos tsis yog seb yuav ua pov thawj tias Vajtswv puas yog tus Tswv Tsim, Nws puas yog Vajtswv tiag tiag, los sis tshawb xyuas kom meej txog yam uas Vajtswv tau ua thiab seb Nws tej kev ua puas yog los tsis yog. Tej no tsis yog yam uas koj tsim nyog tshawb xyuas kom meej.

Lub Rau Hli Ntuj Hnub Tim 19, Xyoo 2021