Cov Thawj Coj thiab Cov Neeg Ua Hauj Lwm Tej Luag Hauj Lwm (7)

Yam Xya: Muab Tib Neeg Faib Thiab Siv Txhua Hom Tib Neeg Uas Sib Txawv Kom Tsim Nyog Raws Li Lawv Txoj Kev Ua Neeg thiab Qhov Lawv Ua Tau Zoo Kom Thiaj Li Muab Lawv Tso Tau Rau Qhov Uas Lawv Ua Tau Zoo (Ntu Ob)

Nyob hauv txoj kev sib qhia zaum tas los ntawd, peb tau sib qhia txog cov thawj coj thiab cov neeg ua hauj lwm lub luag hauj lwm xya: “Muab tib neeg faib thiab siv txhua hom tib neeg uas sib txawv kom tsim nyog raws li lawv txoj kev ua neeg thiab qhov lawv ua tau zoo kom thiaj li muab lawv tso tau rau qhov uas lawv ua tau zoo.” Peb tau sib qhia peb kis tseem ceeb txog lub luag hauj lwm no. Peb kis no yog dab tsi? (Ib kis yog siv ntau hom neeg kom tsim nyog raws li lawv txoj kev ua neeg; lwm kis yog siv ntau hom neeg kom tsim nyog raws li tej lawv ua tau zoo; thiab lwm kis yog yuav coj li cas thiab siv ob peb hom neeg tshwj xeeb li cas.) Peb kis ntawd ces yeej yog li no xwb. Saib los ntawm peb kis no, Vajtswv lub tsev lub hauv paus ntsiab lus ntawm qhov siv cov tib neeg zoo li ntawd puas yog ua kom siv tau txhua tus neeg raws li qhov ua tau zoo tshaj plaws? (Yog.) Lub hauv paus ntsiab lus no puas yog? Puas ncaj ncees rau tib neeg? (Ncaj ncees.) Hais txog cov neeg ruam uas kev txawj ntse tsis txaus, lawv tsis muaj peev xwm ua dab tsi li, thiab ua tsis tau ib qho dej num me me li. Yog koj muab ib txoj hauj lwm rau lawv, txawm yog sab kev txawj qib siab, sab thev naus laus ntsis los sis kev siv dag zog, lawv ua tsis tau kom tiav. Hom neeg zoo li no yeej siv tsis tau kiag li, txawm yog siv los ua dej num txhawb xwb los yeej tsis tau. Qhov no yog hais txog sab kev txawj ntse. Hais txog txoj kev ua neeg, rau cov uas lawv txoj kev ua neeg tsis zoo thiab yog cov tib neeg phem, txawm tias lawv ua tau qee yam hauj lwm thiab ua tau qee yam dej num los xij, vim lawv txoj kev ua neeg phem dhau, lawv yuav ua rau muaj kev cuam tshuam thiab kev tab kaum thaum ua lawv tes dej num, ua rau muaj qhov poob ntau dua qhov tau, ua tsis tau dab tsi zoo li. Hom neeg zoo li no tsis haum rau kev ua dej num thiab tsis tuaj yeem siv kiag li. Yog muaj cov neeg uas muaj qee yam uas lawv ua tau zoo, tsuav lawv ua tau raws li txhua yam uas Vajtswv lub tsev tes hauj lwm cheem tsum—raws li lub hauv paus ntawm qhov muaj txoj kev ua neeg uas tau raws li tus qauv—ces lawv tuaj yeem raug npaj thiab raug siv kom tsim nyog. Zaum tas los ntawd, peb kuj tau sib qhia txog qhov yuav siv thiab coj rau ob peb hom neeg tshwj xeeb ntawd li cas. Hom ib yog cov neeg uas zoo li Yudas, uas yog cov neeg siab yau heev. Saib los ntawm lawv txoj kev siab yau heev ntawd mas, thaum lawv raug tus zaj loj liab ploog ntes tau kiag, ces ib puas feem pua uas lawv yuav yog Yudas; yog kom lawv ua tes hauj lwm tseem ceeb, thaum muaj xwm txheej tshwm sim, lawv yuav muag txhua yam tawm. Cov no tsis yog cov neeg phom sij lod? Kuj tseem muaj ib hom neeg zoo li cov tsis ntseeg, uas peb hu lawv ua pawg ntseeg cov phooj ywg. Cov neeg no zoo li hauv lawv lub siab ntseeg tias muaj Yawm Saub nyob saum ntuj, tiam sis lawv tsis paub tias puas muaj Vajtswv tiag, Vajtswv nyob qhov twg, los sis Vajtswv puas tau ua tes hauj lwm tshiab tiag, lawv pheej ua xyem xyav txog Vajtswv qhov kev muaj nyob. Lawv tsis ntseeg thiab raws Vajtswv qab tiag tiag. Yog li ntawd, hom neeg zoo li no tsis tuaj yeem siv, lawv tsis haum rau kev ua dej num hauv Vajtswv lub tsev. Txawm cov uas ntseeg tiag tiag los twb ua tsis tau lawv tes dej num mus raws li tus qauv, tsis tas hais txog ib tug tsis ntseeg, ib tug phooj ywg ntawm pawg ntseeg li! Lwm hom neeg yog cov uas raug rho tawm; rau pab pawg no kuj muaj ntau yam xwm txheej.

Cov ntsiab lus ntawm qhov kev sib qhia zaum tas los uas hais txog lub luag hauj lwm xya ntawm cov thawj coj thiab cov neeg ua hauj lwm ntawd feem ntau yeej muaj peb lub ntsiab lus tseem ceeb li no: Ib kis yog siv ntau hom neeg kom tsim nyog raws li lawv txoj kev ua neeg; lwm kis yog siv ntau hom neeg kom tsim nyog raws li tej lawv ua tau zoo; thiab lwm kis yog yuav siv thiab coj rau ob peb hom neeg tshwj xeeb ntawd li cas. Peb lub ntsiab lus tseem ceeb no tau qhia raws li ntau yam uas tau hais hauv lub luag hauj lwm xya, thiab tej hauv paus ntsiab lus tau qhia meej tag nrho lawm. Ib txhia hais tias: “Txawm qhia tej hauv paus ntsiab lus meej lawm los xij, thaum ntsib qee yam teeb meem ntxaws ntxaws thiab qee yam xwm txheej tshwj xeeb mas, peb tseem tsis paub yuav siv tej hauv paus ntsiab lus no li cas, yuav coj rau tib neeg li cas, los sis yuav txhawb thiab siv tib neeg li cas; feem ntau peb tseem tsis paub meej.” Puas muaj ib qho teeb meem zoo li no? (Muaj.) Qhov teeb meem no yuav daws li cas? Thawj qhov yuav tsum xav txog hauv kev txhawb thiab siv tib neeg ntawd mas yog qhov kev cheem tsum ntawm Vajtswv lub tsev tes hauj lwm. Qhov ob uas yuav tsum xav txog mas yog seb qhov kev siv ib tug neeg ntawd puas muaj txiaj ntsim ntau dua qhov tsis zoo los sis muaj qhov tsis zoo ntau dua qhov muaj txiaj ntsim rau tes hauj lwm ntawm Vajtswv lub tsev. Yog ib tug neeg txoj kev ua neeg muaj qhov tsis zoo, tiam sis kev siv lawv muaj txiaj ntsim ntau dua qhov tsis zoo rau Vajtswv lub tsev tes hauj lwm, ces tus neeg zoo li no tuaj yeem siv ib ntus kom txog thaum nrhiav tau ib tug zoo dua. Yog siv tus neeg no es ua rau muaj qhov tsis zoo ntau dua qhov zoo, muaj qhov poob ntau dua qhov tau, ua rau pawg ntseeg tes hauj lwm puas tsuaj thiab ntxhov quav niab xwb, ces tus neeg zoo li no tsis tuaj yeem siv kiag li. Nyob hauv cov xwm txheej uas tsis muaj cov neeg tsim nyog, qhov no yog lub hauv paus ntsiab lus ntawm kev ntsuas qhov zoo thiab qhov tsis zoo uas yuav tsum tau nkag siab ua ntej, thiab qhov ntawd kuj yog lub hauv paus ntsiab lus rau kev siv tib neeg li ib ntus thiab. Thaum nrhiav tsis tau tus neeg tsim nyog thiab tsis paub meej tias leej twg yuav zoo dua me ntsis, thaum tsis pom tseeb tias leej twg tsim nyog rau tes hauj lwm thiab txhua tus dog dig ib yam xwb, yuav tsum ua li cas? Tib txoj kev xaiv ces tsuas yog nrhiav ob tug neeg uas muaj kev to taub ntawm sab ntsujplig zoo dua me ntsis, uas yog cov uas nkag siab qhov tseeb yog, los koom tes ua tes hauj lwm ua ke. Thaum lawv ua lawv tes dej num, yuav tsum tau sib qhia qhov tseeb rau lawv ntau ntxiv, thiab yuav tsum soj ntsuam thiab to taub lawv cov xwm txheej; qhov no ua rau tuaj yeem paub tseeb tias leej twg muaj peev xwm zoo dua me ntsis, kom ua rau nrhiav tau tus neeg tsim nyog yooj yim dua. Txawm npaj leej twg los ua dej num los xij, yuav tsum saib raws li lawv lub peev xwm, qhov lawv ua tau zoo, thiab tus yam ntxwv; qhov no yog qhov cheem tsum. Yog tsis tuaj yeem pom tshab los ntawm kis xwm txheej no thiab tsis to taub tias tus neeg ntawd muaj qhov ua tau zoo dab tsi, ces yuav tsum npaj lawv ua ib teg dej num yooj yim, los sis qee yam hauj lwm siv dag zog, los sis npaj kom ua tus mus ntsuas cov neeg uas yuav qhia txoj moo zoo rau kev tshaj tawm txoj moo zoo. Tom qab sim los tau ib ntus lawm, qhov taug qab thiab soj ntsuam mus ntxiv ntawd yuav tuaj yeem ntsuas tau lawv qhov xwm txheej kom yog thiab yooj yim dua los txiav txim siab seb tes dej num twg tsim nyog tshaj plaws rau lawv. Yog lawv lub peev xwm tsis zoo kiag li thiab tsis muaj qhov lawv ua tau zoo, ces muab qee yam hauj lwm siv dag zog rau lawv ua xwb ces tau lawm. Cov thawj coj thiab cov neeg ua hauj lwm yuav tsum muaj ib qho kev to taub txog cov neeg saib xyuas, cov coj kev tshaj tawm txoj moo zoo, txhua tus coj pab pawg, cov coj ntawm cov pab pawg ua yeeb yaj kiab uas ua tej hauj lwm tseem ceeb, thiab lwm yam, los ntawm ntau qhov chaw, thiab yuav tsum soj ntsuam thiab tshawb xyuas cov neeg no kom nruj ntxiv, ua ntej lawv yuav paub tseeb txog cov neeg no. Tsuas yog qhov ua tib zoo muab dej num faib rau tib neeg ua li no xwb mas thiaj li paub tseeb tias qhov kev npaj ntawd tsim nyog, thiab tias tib neeg yuav ua tau lawv tes dej num yam muaj txiaj ntsig. Ib txhia hais tias, “Txawm cov tsis ntseeg los yeej hais tias, ‘Tsis txhob ua xyem xyav rau cov uas koj siv thiab tsis txhob siv cov uas koj ua xyem xyav.’ Ua cas es Vajtswv lub tsev yuav tsis tso siab npaum li ntawd? Lawv puav leej yog cov ntseeg; lawv yuav phem npaum li cas? Lawv tsis yog neeg zoo tag nrho lod? Vim li cas Vajtswv lub tsev yuav tsum to taub, saib xyuas, thiab soj ntsuam lawv?” Cov lus no puas siv tau? Puas muaj teeb meem? (Muaj.) Qhov to taub thiab soj ntsuam ib tug twg ntawd kom tob, thiab nrog lawv nyob ua ke kom ze ntawd puas mus raws li tej hauv paus ntsiab lus? Qhov ntawd yeej mus raws nraim li tej hauv paus ntsiab lus. Qhov ntawd mus raws li tej hauv paus ntsiab lus twg? (Cov thawj coj thiab cov neeg ua hauj lwm tej luag hauj lwm yam plaub: “Paub tej xwm txheej ntawm cov saib xyuas tes hauj lwm uas sib txawv thiab cov neeg ua hauj lwm uas saib xyuas ntau txoj hauj lwm tseem ceeb, thiab hloov tej dej num uas muab rau lawv ua ntawd kom ncav sij hawm los sis muab lawv rho tawm mus yog tias tim tsum, kom thiaj li tiv thaiv tau los sis txo tau cov kev puas tsuaj uas tsim los ntawm qhov siv cov tib neeg uas tsis tsim nyog ntawd, thiab kom paub tseeb hais tias tes hauj lwm mus tau zoo thiab nce qib zoo.”) Qhov no yog ib lub ntsiab ua raws uas zoo, tiam sis qhov laj thawj tiag tiag ntawm qhov ua li no yog dab tsi? Yog vim tib neeg muaj tej moj yam qias vuab tsuab. Txawm tias niaj hnub no, ntau tus neeg ua dej num, tiam sis tsis muaj pes tsawg leej uas caum qhov tseeb. Muaj tsawg tus neeg caum qhov tseeb thiab nkag mus rau hauv qhov muaj tiag thaum lawv ua lawv tes dej num xwb; feem coob mas, lawv ua tej yam tseem tsis tau muaj tej hauv paus ntsiab lus, lawv tseem tsis tau yog cov neeg uas zwm rau Vajtswv tiag tiag; lawv tsuas hais ntawm ncauj tias lawv nyiam qhov tseeb, thiab txaus siab hlo caum qhov tseeb, thiab txaus siab hlo siv zog rau qhov tseeb, tiam sis tseem tsis tau paub tias lawv qhov kev txiav txim siab ntawd yuav nyob ntev npaum li cas. Cov neeg uas tsis caum qhov tseeb mas nthuav tawm lawv tej moj yam qias vuab tsuab tau txhua lub sij hawm los sis txhua qhov chaw. Lawv tsis muaj lub siab ris lub luag hauj lwm rau lawv tes dej num, lawv pheej ua dog ua dig, ua raws li lawv lub siab nyiam, thiab haj tseem tsis tuaj yeem lees txais kev ntuas thiab. Thaum lawv xav phem thiab qaug zog, lawv yuav tso lawv tes hauj lwm tseg—qhov no mas tshwm sim tas li, thiab yog yam uas pom muaj tas li; txhua tus uas tsis caum qhov tseeb yeej coj zoo li no. Ces yog li ntawd, thaum tib neeg tseem tsis tau tau qhov tseeb mas, vam khom tsis tau thiab tso siab tsis tau rau lawv. Qhov uas tso siab tsis tau rau lawv ntawd txhais tau li cas? Txhais tau hais tias thaum lawv ntsib kev nyuaj los sis kev ua tsis tiav, lawv yuav ntog, thiab yuav xav phem thiab qaug zog. Ib tug neeg twg uas pheej xav phem thiab qaug zog ntawd puas yog tus neeg uas tso siab tau? Yeej tsis yog. Tiam sis cov neeg uas to taub qhov tseeb mas txawv. Cov neeg uas to taub qhov tseeb tiag tiag yeej muaj lub siab hwm Vajtswv, thiab lub siab zwm rau Vajtswv, thiab tsuas yog cov neeg uas muaj lub siab hwm Vajtswv xwb mas thiaj li yog cov neeg tso siab tau; cov neeg uas tsis muaj lub siab hwm Vajtswv mas yog cov tso siab tsis tau li. Yuav tsum coj li cas rau cov neeg uas tsis muaj lub siab hwm Vajtswv? Muaj tseeb tias yuav tsum muaj lub siab hlub uas muab kev paub thiab kev txhawb rau lawv. Thaum lawv ua lawv tes dej num yuav tsum taug qab ntau ntxiv, muab kev pab thiab kev coj qhia ntau ntxiv rau lawv; tsuas yog ua li no xwb mas thiaj li paub tseeb tias lawv yuav ua lawv tes dej num tau muaj txiaj ntsig. Thiab lub hom phiaj ntawm qhov ua li no yog dab tsi? Lub hom phiaj tseem ceeb yog kom tiv thaiv tau Vajtswv lub tsev tes hauj lwm. Qhov ob yog kom nrhiav pom teeb meem tam sim ntawd, muab kev pab rau lawv, txhawb lawv, los sis ntuas lawv tam sim ntawd, kho lawv tej kev yuam kev, thiab ntxiv rau qhov uas lawv tu ncua thiab muaj tsis txaus. Qhov no muaj txiaj ntsim rau tib neeg; tsis muaj kev npaj siab phem nyob hauv qhov no li. Qhov saib xyuas, soj ntsuam, to taub ntawd—puav leej yog txhawm rau pab kom lawv nkag mus rau hauv txoj kev ntseeg Vajtswv uas yog, kom lawv ua tau lawv tes dej num mus raws li Vajtswv txoj kev cheem tsum thiab mus raws li lub hauv paus ntsiab lus, txwv lawv los ntawm qhov ua rau muaj kev tab kaum los sis kev cuam tshuam, thiab txwv lawv los ntawm qhov ua tes hauj lwm uas tsis muaj qab hau. Lub hom phiaj ntawm qhov ua li no yog muaj kev ris lub luag hauj lwm rau lawv thiab rau Vajtswv lub tsev tes hauj lwm xwb; tsis muaj kev npaj siab phem nyob hauv qhov no li. Piv txwv li muaj ib tug twg hais tias, “Qhov no yog tej hauv paus ntsiab lus uas vajtswv lub tsev coj rau tib neeg lod, cov no yog txoj kev uas lawv siv. Txij no mus kuv yuav tsum tau ceev faj. Nyob hauv vajtswv lub tsev tsis muaj kev ruaj siab. Pheej muaj neeg soj ntsoov tas li; tes dej num no mas nyuaj ua heev li!” Cov lus no puas yog? Hom neeg twg thiaj li hais tau cov lus zoo li no? (Cov tsis ntseeg.) Cov tsis ntseeg, cov neeg ruam, thiab cov uas tsis muaj kev to taub ntawm sab ntsujplig—lawv nyiam hais cov lus ruam tsis muaj qab hau yam tsis muaj kev to taub qhov tseeb. Qhov no yog teeb meem dab tsi? Cov lus no tsis yog cov lus uas txiav txim thiab teem txim rau pawg ntseeg tes hauj lwm lod? Qhov ntawd kuj yog ib qho kev txiav txim thiab kev teem txim rau qhov tseeb thiab tej yam zoo. Cov uas tuaj yeem hais cov lus zoo li no yeej yog cov neeg ruam feeb tsis meej uas tsis to taub qhov tseeb, lawv puav leej yog cov tsis ntseeg uas tsis nyiam qhov tseeb.

Vajtswv lub tsev saib xyuas, soj ntsuam, thiab to taub cov neeg uas ua ib teg dej num. Nej puas lees txais tau Vajtswv lub tsev lub hauv paus ntsiab lus no? (Lees txais tau.) Yog koj lees txais tau Vajtswv lub tsev txoj kev saib xyuas, soj ntsuam, thiab kev to taub mas yog ib qho zoo heev li. Qhov ntawd pab tau koj ua koj tes dej num kom tiav, ua tau koj tes dej num kom mus raws li tus qauv thiab ua tau raws li Vajtswv tej kev npaj siab. Qhov ntawd muaj txiaj ntsim thiab pab tau koj, tsis muaj qhov tsis zoo kiag li. Thaum koj to taub lub hauv paus ntsiab lus no lawm, puas yog koj tsis tsim nyog muaj kev xav tawm tsam los sis thaiv qhov kev saib xyuas ntawm cov thawj coj, cov neeg ua hauj lwm, thiab cov neeg Vajtswv xaiv tseg lawm? Txawm tias qee zaus es muaj ib tug twg sim to taub koj, soj ntsuam koj, thiab saib xyuas koj tes hauj lwm los xij, qhov no tsis yog ib yam uas koj yuav tsum xav tias yog tawm tsam koj tus kheej. Vim li cas Kuv thiaj li hais li no? Vim tias cov hauj lwm uas tam sim no koj ua, tes dej num uas koj ua, thiab txhua tes hauj lwm uas koj ua tsis yog ib tug twg txoj hauj lwm ntiag tug los sis txoj hauj lwm ntawm tus kheej; tej ntawd muaj feem xyuam rau Vajtswv lub tsev tes hauj lwm thiab ntsig txog rau ib feem ntawm Vajtswv tes hauj lwm. Yog li ntawd, thaum leej twg saib xyuas los sis soj ntsuam koj me ntsis, los sis sim to taub koj kom tob, sim nrog koj sib qhia siab thiab nrhiav seb ib ntus no koj tus yam ntxwv zoo li cas, thiab qee zaus haj tseem muaj tus cwj pwm hnyav me ntsis rau koj, ntuas koj, qhuab ntuas, thiab cem koj me ntsis, tag nrho tej no yog vim lawv muaj tus cwj pwm uas mob siab thiab ris lub luag hauj lwm rau Vajtswv lub tsev tes hauj lwm xwb. Koj yuav tsum tsis txhob muaj kev xav tsis zoo, thiab koj yuav tsum tsis txhob teb los ntawm tej kev xav tsis zoo. Qhov lees txais tau lwm tus saib xyuas, soj ntsuam, thiab sim to taub koj ntawd txhais tau li cas? Txhais tau tias hauv koj lub siab, koj lees txais Vajtswv qhov kev tshawb xyuas kom meej. Yog koj tsis lees txais tib neeg qhov kev saib xyuas, soj ntsuam, thiab kev sim to taub koj ntawd, thiab koj haj tseem tawm tsam thiab, es koj puas tuaj yeem lees txais Vajtswv qhov kev tshawb xyuas kom meej? Vajtswv qhov kev tshawb xyuas kom meej mas ntxaws dua, tob dua, thiab yog dua li qhov tib neeg sim to taub koj lawm; Vajtswv tej kev cheem tsum mas meej dua, nruj dua, thiab tob dua. Yog koj lees txais tsis tau kev saib xyuas los ntawm cov neeg Vajtswv xaiv tseg, ces cov lus koj hais tias koj tuaj yeem lees txais Vajtswv qhov kev tshawb xyuas kom meej ntawd tsis yog ib kab lus qhuav xwb lod? Yuav kom koj lees txais tau Vajtswv txoj kev tshawb xyuas kom meej thiab kev soj ntsuam ntawd mas, koj yuav tsum xub lees txais kev saib xyuas los ntawm Vajtswv lub tsev, cov thawj coj thiab cov neeg ua hauj lwm, los sis cov kwv tij thiab cov muam tso. Ib txhia hais tias, “Kuv muaj leej tib neeg txoj cai, kuv muaj kuv txoj kev ywj pheej, kuv muaj kuv txoj hau kev ua hauj lwm. Qhov raug saib xyuas thiab tshuaj xyuas hauv txhua yam uas kuv ua ntawd, tsis yog txoj kev ua neej uas raug tswj dhau lawm lod? Kuv leej tib neeg txoj cai nyob qhov twg? Kuv txoj kev ywj pheej nyob qhov twg?” Cov lus no puas yog? Leej tib neeg txoj cai thiab kev ywj pheej puas yog qhov tseeb? Tej ntawd tsis yog qhov tseeb. Leej tib neeg txoj cai thiab kev ywj pheej tsuas yog txoj kev coj rau cov tib neeg uas vam meej thiab muaj kev nce qib me ntsis ntawm cov tib neeg nyob hauv lub zej zog xwb, tiam sis hauv Vajtswv lub tsev, Vajtswv txoj lus thiab qhov tseeb siab tshaj txhua yam—tej no tsis tuaj yeem muab piv rau “leej tib neeg txoj cai” thiab “kev ywj pheej.” Yog li ntawd, nyob hauv Vajtswv lub tsev, tsis yog ua txhua yam raws li cov tswv yim siab los sis kev paub siab ntawm lub ntiaj teb uas tsis ntseeg, tiam sis ua raws li Vajtswv txoj lus thiab qhov tseeb. Yog li, thaum qee tus neeg hais tias lawv xav tau leej tib neeg txoj cai thiab kev ywj pheej, qhov no puas mus raws li tej hauv paus ntsiab lus? (Tsis mus raws.) Pom tseeb tias qhov ntawd tsis mus raws li lub hauv paus ntsiab lus ntawm kev ua dej num. Koj nyob hauv Vajtswv lub tsev, ua tes dej num ntawm ib tug neeg uas raug tsim tawm los, tsis yog ua hauj lwm hauv zej zog kom tau nyiaj. Yog li ntawd, tsis tim tsum kom muaj leej twg sawv los tiv thaiv leej tib neeg txoj cai rau koj; tej yam zoo li no tsis tsim nyog. Tib neeg feem coob puas muaj kev paub cais txog leej tib neeg txoj cai thiab kev ywj pheej? Tej no yog tib neeg tej kev xav thiab tej kev xam pom thiab tsis tuaj yeem muab piv rau qhov tseeb; tej tswv yim zoo li no siv tsis tau hauv Vajtswv lub tsev. Qhov ib tug thawj coj saib xyuas koj tes hauj lwm ntawd mas yog ib qho zoo. Vim li cas? Vim qhov ntawd txhais tau tias lawv tab tom ris lub luag hauj lwm rau pawg ntseeg tes hauj lwm; qhov no yog lawv tes dej num, thiab lub luag hauj lwm. Qhov lawv tuaj yeem ua lub luag hauj lwm no tiav ntawd ua pov thawj tias lawv yog ib tug thawj coj uas tsim nyog, yog ib tug thawj coj zoo. Yog muab txoj kev ywj pheej thiab leej tib neeg txoj cai tag nrho rau koj, thiab koj ua tau txhua yam uas koj xav ua, ua raws li koj tej kev ntshaw, thiab xyiv fab rau txoj kev ywj pheej thiab kev muaj cai tag nrho, thiab txawm koj ua dab tsi los sis koj ua li cas los xij, tus thawj coj tsis quav ntsej los sis tsis saib xyuas, yeej tsis nug koj, tsis tshuaj xyuas koj tes hauj lwm, thaum pom teeb meem los tsis hais dab tsi li, thiab tsuas yog ntxias los sis sib tham kom haum nrog koj xwb, lawv puas yuav yog ib tug thawj coj zoo? Pom tseeb tias tsis yog. Tus thawj coj zoo li no tab tom ua phem rau koj. Lawv ywj koj ua phem, cia koj ua txhaum rau tej hauv paus ntsiab lus thiab ua raws li koj siab nyiam—lawv tab tom thawb koj mus rau hauv lub qhov hluav taws. Nov tsis yog ib tug thawj coj uas ris lub luag hauj lwm thiab mus raws li tus qauv. Tiam sis, yog ib tug thawj coj muaj peev xwm saib xyuas koj tsis tu ncua, pom tej teeb meem nyob hauv koj tes hauj lwm thiab qhia kom koj nco los sis cem koj thiab muab koj qhia tshwm tam sim ntawd, thiab kho kom koj ua yog thiab pab kho koj txoj kev caum uas tsis yog thiab qhov yuam kev nyob hauv qhov ua koj tes dej num kom raws sij hawm, thiab nyob hauv lawv txoj kev saib xyuas, kev cem, kev yug, thiab kev pab, koj tus cwj pwm tsis yog rau koj tes dej num hloov lawm, koj tuaj yeem tso qee qhov kev xam pom tsis muaj qab hau tseg, koj tus kheej tej kev xav thiab tej yam uas tshwm los ntawm kev siab kub maj mam txo qis, thiab koj tuaj yeem lees txais cov lus hais thiab kev xam pom uas yog thiab raws li qhov tseeb tej hauv paus ntsiab lus yam siab tus lawm, qhov no tsis muaj txiaj ntsim rau koj lod? Cov txiaj ntsim mas loj heev!

Vajtswv lub tsev coj rau cov thawj coj thiab cov neeg ua hauj lwm los ntawm kev saib xyuas, soj ntsuam, thiab to taub. Lub hauv paus ntawm kev coj rau tib neeg li no yog dab tsi? Vim li cas thiaj li coj rau tib neeg li no? Qhov no tsis yog ib txoj kev thiab ib txoj hau kev uas tshwm los ntawm tej hauv paus ntsiab lus ntawm kev ua siab ncaj, mob siab, thiab muaj lub siab ris lub luag hauj lwm rau yus tes dej num lod? (Yog.) Yog ib tug thawj coj tsis saib xyuas, soj ntsuam, los sis to taub cov neeg uas lawv muaj lub luag hauj lwm saib xyuas hauv kev ua lawv tej dej num, ces puas suav tau tias lawv yog ib tug thawj coj uas ua siab ncaj rau lawv tes dej num? Pom tseeb tias suav tsis tau. Nej cov thawj coj, cov neeg ua hauj lwm, thiab cov saib xyuas puas tau tshuaj xyuas koj tes hauj lwm li? Lawv puas tau nug txog kev nce qib ntawm koj tes hauj lwm li? Lawv puas tau daws tej teeb meem uas tshwm tuaj hauv koj tes hauj lwm li? Lawv puas tau kho ib qho tsis zoo twg los sis qhov yuam kev twg nyob hauv koj tes hauj lwm? Lawv puas tau muab kev pab, kev yug, kev txhawb, los sis kev ntuas txog ntau yam kev qhia tshwm uas pom tau meej thiab kev nthuav tawm ntawm koj txoj kev ua neeg thiab koj txoj kev caum kev nkag mus rau hauv lub neej txoj sia? Yog ib tug thawj coj tsis muab kev coj qhia rau cov uas ua tej dej num dog dig xwb, tiam sis kuj yeej tsis muab kev qhia, kev pab, los sis kev txhawb rau cov uas ua tes hauj lwm tseem ceeb li thiab—haj yam tsis muaj kev saib xyuas, kev soj ntsuam, los sis kev to taub kom tob—yog tsis muaj tej kev qhia tshwm uas pom tau meej thiab tej kev ua no, ces tus thawj coj no puas suav tau tias yog ib tug thawj coj uas ua tes hauj lwm tiag tiag? Lawv puas mus raws li tus qauv ntawm ib tug thawj coj? (Tsis mus raws.) Ib txhia hais tias, “Peb tus thawj coj tsuas tuav kev sib txoos ua ke rau peb ob zaug hauv ib lub lim tiam, qhia Vajtswv cov lus me ntsis, thiab tom qab ntawd nyeem qee qhov kev sib qhia los ntawm tus Nyob Saud, thiab qee zaus lawv qhia txog lawv tus kheej txoj kev to taub txog kev ntsib kev pom. Tiam sis lawv yeej tsis tau muab tswv yim, kev yug, los sis kev pab txog peb ntau tus yam ntxwv, nrog rau cov kev nyuaj uas peb ntsib thaum ua peb tes dej num los sis hauv kev nkag mus rau hauv lub neej txoj sia.” Koj pom tias tus thawj coj no zoo li cas? (Lawv tsis mus raws li tus qauv, lawv yog ib tug thawj coj cuav.) Yog ib tug thawj coj tsis quav ntsej txog lawv tus kheej txoj hauj lwm los sis ntau tus yam ntxwv ntawm cov neeg nyob hauv qab lawv, los sis tsis ua lawv lub luag hauj lwm kom tiav, ces lawv tsis mus raws li tus qauv ntawm ib tug thawj coj. Lawv tsis saib xyuas, tsis soj ntsuam, los sis tsis sim to taub leej twg hlo li. Txhua zaus, koj cov kev sib tham nrog lawv zoo li no: “Tus neeg no zoo li cas lawm?” “Kuv tab tom soj ntsuam lawv.” “Koj soj ntsuam los ntev npaum li cas lawm? Koj puas paub lawv zoo?” “Kuv soj ntsuam lawv tau ib los sis ob xyoos lawm. Kuv tseem tsis tau paub lawv zoo heev.” “Ua li tus neeg ntawd ne?” “Kuv tseem tsis tshua paub meej txog lawv, tiam sis lawv tiv taus kev txom nyem hauv kev ua lawv tes dej num, muaj kev txiav txim siab, thiab txaus siab hlo muab lawv tus kheej fij rau Vajtswv.” “Qhov ntawd tsuas yog sab nraud xwb. Ua li lawv txoj kev caum qhov tseeb ne?” “Kuv yuav tsum paub txog qhov ntawd thiab lod? Ua li, kuv mam li mus tshawb xyuas.” Koj yuav tsum tau tos ntev npaum li cas es thiaj li paub tom qab lawv hais tias lawv mam li mus tshawb xyuas ntawd yog qhov tsis paub, qhov ntawd yog ib qho tsis paub tseeb. Tus thawj coj cuav zoo li no tso siab tsis tau hauv lawv tes hauj lwm.

Nej pawg ntseeg cov thawj coj thiab cov neeg saib xyuas puas ris lub luag hauj lwm rau nej tes hauj lwm? Lawv puas nkag siab thiab to taub txog nej tej yam ntxwv hauv kev ua tes hauj lwm? Lawv puas ua tes hauj lwm no kom tsim nyog? (Tsis ua.) Tsis muaj ib tug ntawm lawv ua tes hauj lwm no kom tsim nyog; tsis muaj ib tug ua tiav qhov ua siab ncaj rau lawv tes dej num thiab mob siab thiab ris lub luag hauj lwm rau tes hauj lwm. Yog li qhov ua kom tau li no puas yooj yim? Puas nyuaj? Qhov ntawd tsis nyuaj. Yog koj muaj peev xwm mus txog ib theem twg, muaj ib qho kev to taub txog kev txawj qib siab nyob hauv koj lub luag hauj lwm tiag tiag, thiab tsis yog ib tug neeg nyob sab nraud rau koj txoj hauj lwm, ces tsuas yog koj ua tau raws li peb lo lus xwb, ces koj yuav muaj peev xwm ua siab ncaj rau koj tes dej num. Peb lo lus twg? “Muab siab rau.” Yog koj muab siab rau tej yam, thiab muab siab rau tib neeg, ces koj yuav muaj peev xwm ua siab ncaj thiab ris lub luag hauj lwm rau koj tes dej num. Kab lus no puas yooj yim xyaum ua raws? Koj yuav muab coj los xyaum ua raws li cas? Qhov ntawd tsis txhais hais tias siv koj lub pob ntseg mloog, los sis siv koj lub hlwb xav—qhov ntawd txhais hais tias muab siab rau. Yog ib tug neeg muaj peev xwm muab siab rau tiag tiag, ces thaum lawv lub qhov muag pom ib tug neeg twg ua ib yam dab tsi, ua ib yam li cas, los sis muaj kev teb rov qab rau ib yam dab tsi li cas, los sis thaum lawv ob lub pob ntseg hnov ib txhia tib neeg cov tswv yim los sis tej kev hais, los ntawm kev muab siab rau xav thiab ua tib zoo xav txog tej yam no, ces qee cov tswv yim, kev xam pom, thiab cov cwj pwm yuav tshwm tuaj hauv lawv lub hlwb. Cov tswv yim, kev xam pom, thiab cov cwj pwm no yuav ua rau lawv muaj kev to taub tob, yog, thiab ntxaws ntxaws txog tus neeg los sis yam khoom, thiab tib lub sij hawm ntawd, yuav ua rau muaj kev txiav txim thiab tej hauv paus ntsiab lus uas tsim nyog thiab yog. Tsuas yog thaum ib tug neeg muaj cov kev qhia tshwm uas pom tau meej ntawm kev muab siab rau xwb mas qhov ntawd thiaj li txhais tau tias lawv ua siab ncaj rau lawv tes dej num lawm. Tiam sis yog koj tsis muab siab rau tej yam, yog koj tsis muaj lub siab rau qhov no, ces koj ob lub qhov muag tsis teb rov qab mus rau txhua yam uas koj pom, thiab koj ob lub pob ntseg tsis teb rov qab mus rau txhua yam uas koj hnov. Koj ob lub qhov muag tsis soj ntsuam tib neeg, xwm txheej, thiab yam khoom; tsis soj ntsuam tej ntaub ntawv uas koj pom. Nyob hauv koj lub siab koj yuav tsis paub cais ntau lub suab thiab tej kev hais uas koj hnov, koj yuav tsis muaj peev xwm paub cais tej ntaub ntawv uas koj hnov. Qhov no zoo li dig muag txawm tias rua muag plias los xij. Thaum ib tug neeg lub siab dig lawm, ces lawv ob lub qhov muag los kuj dig lawm thiab. Yog li, dab tsi ua rau muaj cov tswv yim, kev xam pom, thiab cov cwj pwm los ntawm kev soj ntsuam tej yam ntawm ob lub qhov muag thiab tau txais tej ntaub ntawv ntawm lub pob ntseg? Tag nrho yog nyob ntawm kev muab siab rau tej yam thiab nrhiav qhov tseeb. Yog koj muab siab rau tej yam, thaum uas koj tau txais tej ntaub ntawv, txawm yog pom los sis hnov, koj yuav muaj peev xwm tsim cov kev xam pom thiab tau txais kev to taub tob txog ib tug neeg los sis ib yam khoom. Tiam sis yog koj tsis muab siab rau tej yam, ces txawm tau txais tej ntaub ntawv ntau npaum li cas los yeej tsis muaj txiaj ntsim; yog koj tsis muab siab los cais los sis pom tshab, ces koj yuav tsis tau txais dab tsi li, dhau los ua neeg tsis muaj nqis, tsis muaj txiaj ntsim. Ib tug neeg uas tsis muaj txiaj ntsim txhais tau li cas? Txhais tau hais tias ib tug neeg twg uas tsis muab siab rau kev ua lawv tes dej num—ces lawv muaj qhov muag thiab pob ntseg, tiam sis tej no tsis muaj txiaj ntsim dab tsi li. Ib tug neeg tsis muaj lub siab ces yuav tsis ua siab ncaj rau lawv tes dej num los sis ua tsis tiav tus cwj pwm mob siab thiab ris lub luag hauj lwm rau lawv tes hauj lwm.

Vajtswv lub tsev siv txoj kev saib xyuas rau cov thawj coj thiab cov neeg ua hauj lwm ntawm txhua qib, soj ntsuam thiab to taub lawv kom tob, lub hom phiaj yog ua kom pawg ntseeg tes hauj lwm zoo dua thiab coj cov neeg Vajtswv xaiv tseg nkag mus rau hauv txoj kev ntseeg Vajtswv uas yog kom sai li sai tau. Yog li ntawd, kev saib xyuas thiab soj ntsuam cov thawj coj thiab cov neeg ua hauj lwm mas yog qhov tim tsum thiab yuav tsum tau xyaum ua raws li no. Nrog rau kev saib xyuas ntawm cov neeg Vajtswv xaiv tseg, yog pom tias cov thawj coj thiab cov neeg ua hauj lwm tsis ua hauj lwm tiag tiag es tuaj yeem saib xyuas thiab daws lawv tam sim ntawd, qhov no muaj txiaj ntsim rau kev nce qib ntawm pawg ntseeg tes hauj lwm. Kev saib xyuas cov thawj coj thiab cov neeg ua hauj lwm yog cov neeg Vajtswv xaiv tseg lub luag hauj lwm, thiab qhov ua li no mus raws nraim li Vajtswv tej kev npaj siab. Vim cov thawj coj thiab cov neeg ua hauj lwm muaj tej moj yam qias vuab tsuab, yog lawv tsis raug saib xyuas, tsis yog tsis zoo rau lawv xwb tiam sis kuj yuav cuam tshuam ncaj qha rau pawg ntseeg tes hauj lwm thiab. Nyob rau cov xwm txheej twg cov thawj coj thiab cov neeg ua hauj lwm thiaj li tsis cheem tsum kev saib xyuas los ntawm cov neeg Vajtswv xaiv tseg lawm? Qhov ntawd yog thaum cov thawj coj thiab cov neeg ua hauj lwm to taub qhov tseeb tag nrho, nkag mus rau hauv qhov tseeb qhov muaj tiag, thiab ua tej yam mus raws li tej hauv paus ntsiab lus, dhau los ua cov neeg uas raug Vajtswv ua kom zoo tiav log thiab raug Vajtswv siv. Nyob hauv cov xwm txheej zoo li no, ces tsis cheem tsum kev saib xyuas los ntawm cov neeg Vajtswv xaiv tseg lawm, thiab Vajtswv lub tsev yuav tsis hais txog qhov no ntxiv lawm. Txawm li cas los xij, puas paub tseeb tias ib tug neeg uas twb raug Vajtswv ua zoo tiav log lawm yuav dim ntawm tej kev ua yuam kev thiab kev ua tsis tau zoo tag nrho lawm? Tsis paub tseeb li ntawd. Yog li ntawd, cheem tsum Vajtswv txoj kev tshawb xyuas kom meej, kuj cheem tsum kev saib xyuas los ntawm cov neeg uas to taub qhov tseeb thiab; txoj kev xyaum ua raws no mas mus raws nraim li Vajtswv tej kev npaj siab. Vim txhua tus tib neeg muaj tej moj yam qias vuab tsuab, tsuas yog los ntawm kev saib xyuas xwb thiaj li txhawb tau cov thawj coj thiab cov neeg ua hauj lwm kom ris lub luag hauj lwm rau lawv tes hauj lwm thiab ua siab ncaj rau lawv tes dej num. Yog tsis muaj kev saib xyuas, ces cov thawj coj thiab cov neeg ua hauj lwm feem coob yuav ua raws siab nyiam, thiab muaj tus cwj pwm ua dog ua dig—qhov no yog qhov tseeb uas muaj tiag. Yog koj yog ib tug thawj coj los sis ib tug neeg ua hauj lwm, thiab cov kwv tij thiab cov muam uas nyob ib puag ncig koj pheej saib xyuas thiab soj ntsuam koj, sim to taub seb koj puas yog ib tug neeg uas caum qhov tseeb los sis tsis yog, ces rau koj mas, qhov no yog ib qho zoo. Yog lawv pom ib qho teeb meem ntawm koj thiab koj daws tau kom sai li sai tau, ces qhov no muaj txiaj ntsim rau koj txoj kev caum qhov tseeb thiab koj txoj kev nkag mus rau hauv lub neej txoj sia. Yog lawv pom koj ua phem, thiab koj nthuav tawm ntau yam kev ua phem yam zais ntshis, thiab yeej tsis yog ib tug neeg uas caum qhov tseeb kiag li, lawv yuav muab koj qhia tshwm thiab rho koj tawm ntawm koj tes hauj lwm, uas yuav tshem ib qho puas tsuaj rau cov neeg Vajtswv xaiv tseg tawm, thiab tseem pab tau koj zam txoj kev rau txim hnyav dua: Kev saib xyuas zoo li no muaj txiaj ntsim rau txhua tus. Yog li ntawd, cov thawj coj thiab cov neeg ua hauj lwm yuav tsum muaj tus cwj pwm kom yog rau kev saib xyuas ntawm cov neeg Vajtswv xaiv tseg. Yog koj yog ib tug neeg uas hwm Vajtswv thiab zam kev phem, ces koj yuav xav tias koj cheem tsum kev saib xyuas ntawm cov neeg Vajtswv xaiv tseg, thiab ntau tshaj ntawd, koj cheem tsum lawv txoj kev pab. Yog koj yog ib tug neeg phem, thiab koj lub siab yuav tsis tus, ces koj yuav ntshai tsam raug saib xyuas thiab yuav zam kom dhau qhov ntawd; qhov no yeej yuav zam tsis dhau li. Yog li ntawd, tsis muaj qhov ua xyem xyav tias txhua tus uas tawm tsam thiab tsis nyiam kev saib xyuas ntawm cov neeg Vajtswv xaiv tseg kiag li ntawd muaj yam dab tsi zais, thiab yeej tsis yog cov neeg coj ncaj; tsuas yog cov neeg txawj dag thiaj li ntshai tib neeg saib xyuas tshaj plaws. Yog li cov thawj coj thiab cov neeg ua hauj lwm yuav tsum coj tus cwj pwm zoo li cas rau kev saib xyuas ntawm cov neeg Vajtswv xaiv tseg? Tsim nyog yog kev xav phem, kev ceev faj, kev tawm tsam, thiab kev chim los sis kev mloog lus rau Vajtswv txoj kev tswj hwm thiab kev npaj, thiab kev txo hwj chim lees txais? (Kev txo hwj chim lees txais.) Kev txo hwj chim lees txais txhais tau li cas? Txhais tau tias lees txais txhua yam los ntawm Vajtswv los, nrhiav qhov tseeb, coj tus cwj pwm uas yog, thiab tsis txhob ua raws lub siab kub. Yog ib tug twg nrhiav pom ib qho teeb meem ntawm koj tiag tiag thiab taw qhia rau koj, pab koj kom paub cais thiab to taub, pab koj daws qhov teeb meem no, ces lawv tab tom ris lub luag hauj lwm rau koj, thiab ris lub luag hauj lwm rau Vajtswv lub tsev tes hauj lwm thiab cov neeg Vajtswv xaiv tseg txoj kev nkag mus rau hauv lub neej txoj sia; qhov no yog qhov yog uas tsim nyog ua, thiab yeej zoo li ib txwm thiab ncaj ncees lawm. Yog muaj cov uas saib pawg ntseeg txoj kev saib xyuas tias yog los ntawm Ntxwgnyoog los, thiab los ntawm kev npaj siab phem, ces lawv yog cov dab phem thiab Ntxwgnyoog. Nrog rau tus yam ntxwv xeeb txawm dab zoo li no, lawv yeej yuav tsis lees txais Vajtswv txoj kev tshawb xyuas kom meej hlo li. Yog ib tug neeg nyiam qhov tseeb tiag tiag, lawv yuav muaj kev to taub uas yog txog cov neeg Vajtswv xaiv tseg qhov kev saib xyuas, lawv yuav muaj peev xwm saib tias qhov ntawd yog ua los ntawm lub siab hlub, yog los ntawm Vajtswv los, thiab yuav tuaj yeem lees txais qhov ntawd los ntawm Vajtswv los. Lawv yeej yuav tsis ua siab kub los sis ua raws li kev xav ib pliag xwb, haj yam tsis muaj kev tawm tsam, kev ceev faj, los sis kev ua xyem xyav tshwm nyob hauv lawv lub siab li. Tus cwj pwm uas yog tshaj plaws los coj rau cov neeg Vajtswv xaiv tseg txoj kev saib xyuas ntawd yog li no: Txhua lo lus, kev ua, kev saib xyuas, kev soj ntsuam, los sis kev kho—tab txawm yog kev ntuas—uas muaj txiaj ntsim rau koj, koj yuav tsum lees txais los ntawm Vajtswv los; tsis txhob ua raws lub siab kub. Kev siab kub los ntawm tus phem, los ntawm Ntxwgnyoog, tsis yog los ntawm Vajtswv los, thiab tsis yog tus cwj pwm uas tib neeg tsim nyog muaj rau qhov tseeb.

Qhov ntawd yog tag nrho tej uas peb yuav ntxiv thiab sib qhia txog cov thawj coj thiab cov neeg ua hauj lwm lub luag hauj lwm xya. Yog li ntawd qhov no puas txhais tau tias lub luag hauj lwm no tau qhia tag nrho lawm tsis muaj cov ntsiab lus ntxaws ntxaws ntxiv lawm? Tsis yog, txhua lub luag hauj lwm tseem muaj cov ntsiab lus meej thiab ntxaws ntau dua. Yam uas Kuv qhia txog yog cov hauv paus ntsiab lus loj xwb; qhov seem ntawd, yuav muab tau tej ntxaws ntxaws uas meej los xyaum raws thiab siv tau cov hauv paus ntsiab lus no, yog nyob ntawm nej txoj kev ntsib kev pom thiab kev paub xwb. Yog nej tseem pom tsis tshab txog cov hauv paus ntsiab lus no los sis tsis paub siv, ces cia li nrhiav thiab sib qhia ua ke. Yog sib qhia ua ke tseem tsis tau txiaj ntsig, ces nug rau txheej saud. Muab hais luv luv tias, txawm yog kev coj rau hom neeg twg los sis txiav txim siab tias yuav txhawb thiab siv leej twg los, txhua yam yuav tsum ua raws li tej hauv paus ntsiab lus. Rau qee cov neeg uas muaj peev xwm, nyob hauv cov xwm txheej uas tsis muaj leej twg pom tshab los sis to taub lawv tag nrho ntawd, ces tuaj yeem txhawb thiab siv lawv ua ntej raws li qhov kev cheem tsum ntawm pawg ntseeg tes hauj lwm—tsis txhob ncua tes hauj lwm, thiab tsis txhob ncua kev cob qhia tib neeg; qhov no yog qhov tseem ceeb. Ib txhia nug hais tias, “Yog tom qab siv lawv es lawv ua rau tes hauj lwm ntxhov quav niab lawm yuav ua li cas? Leej twg ris?” Thaum koj siv ib tug neeg, puas yog cuag nkaus li koj muab lawv tso rau ntawm ib lub pov txwv tsis muaj neeg nyob es tsis muaj kev rau leej twg mus sib cuag tau lawv li? Tsis yog tias muaj ntau tus neeg ua tej hauj lwm ntxaws ntxaws nyob ib puag ncig lawv lod? Muaj ntau txoj hau kev los daws txhua yam teeb meem no; xws li, saib xyuas, soj ntsuam, thiab to taub lawv, thiab yog muaj cib fim ces sib cuag nrog lawv kom ze ze. Kev sib cuag kom ze ze txhais tau li cas tiag? Txhais tau hais tias ua hauj lwm ua ke nrog lawv; txheej txheem ua hauj lwm yog txheej txheem to taub lawv. Los ntawm kev sib cuag ntawd tsis yog yuav maj mam to taub lawv lawm lod? Yog koj muaj lub cib fim sib cuag nrog lawv tiam sis koj tsis ua li ntawd, thiab tsuas hu xov tooj nug ob peb lo lus nug ces tso tseg li ntawd xwb, qhov ua li ntawd yeej tsis muaj hau kev to taub lawv li. Koj yuav tsum sib cuag nrog cov uas koj sib cuag tau kom thiaj li daws tau tej teeb meem. Yog li ntawd, cov thawj coj thiab cov neeg ua hauj lwm yuav tsum tsis txhob tub nkeeg hauv kev ua tes hauj lwm. Yog li, yog koj xav soj ntsuam thiab to taub ib tug neeg, koj yuav tsum ua li cas? (Los ntawm kev sib cuag nrog lawv.) Puas yog? Qhov tseem ceeb yog muab siab rau! Cov ntaub ntawv uas nej khaws cia tau hauv siab ces tuaj yeem muab piv rau ib tug liab ntais pob kws—ntais mus, poob mus, thiab thaum kawg, tsuas tshuav ib lub pob kws xwb, ua rau txoj kev siv zog tag nrho ntawd tsis muaj qab hau li. Thaum kawg ntawm kev mloog lus qhuab qhia, nej nco tsis tau cov ntsiab lus uas tau qhia ua ntej; qhov no yog vim li cas? (Peb tsis muab siab rau.) Feem ntau nej tsis tsom ntsoov rau kev xyaum ua raws qhov tseeb, yog li ntawd nej lub siab tsis tsom ntsoov rau tej yam no. Hais txog yuav to taub qhov tseeb thiab nkag mus rau hauv qhov muaj tiag li cas, yuav paub nej tus kheej li cas, thiab yuav siv qhov tseeb kom pom tshab txog lub ntsiab tseeb ntawm ntau hom neeg, xwm txheej, thiab yam khoom li cas, nej tsis muaj kev nkag mus rau hauv kiag li; yog li ntawd, tej yam no tsis muaj lub hauv paus hauv nej lub siab li. Hais txog tej yam uas muaj feem xyuam txog kev nkag mus rau hauv qhov tseeb qhov muaj tiag, nej pheej paub tsis meej. Tam sim no, nej tseem tuaj koom kev sib txoos ua ke txhua lub lim tiam mloog lus qhuab qhia. Yog nej tsis mloog lus qhuab qhia, qhov kev ntseeg me me hauv nej lub siab rau Vajtswv ntawd tsis yog yuav tsuag thiab ploj mus zuj zus lod? Qhov no yog ib lub cim phom sij! Nej puas tuaj yeem muab siab rau? Kuv tau qhia nej txhua yam ntxaws ntxaws lawm; yog koj muaj lub siab tiag tiag, koj yuav muaj peev xwm ua tau li ntawd. Yog koj tsis muaj lub siab, ces txawm Kuv hais li cas los xij, koj yuav tsis to taub. Tej ntawd yog tag nrho peb txoj kev sib qhia txog lub ncauj lus no.

Yam Yim: Qhia Tawm thiab Nrhiav Kev Los Daws Tej Yam Uas Paub Tsis Meej thiab Tej Kev Nyuaj Uas Ntsib Nyob Rau Hauv Tes Hauj Lwm Ntawd Kom Ncav Sij Hawm (Ntu Ib)

Cov Thawj Coj thiab Cov Neeg Ua Hauj Lwm Yuav Tsum Paub Txog thiab Daws Tej Kev Nyuaj Kom Ncav Sij Hawm

Hnub no peb yuav sib qhia txog cov thawj coj thiab cov neeg ua hauj lwm lub luag hauj lwm yim: “Qhia tawm thiab nrhiav kev los daws tej yam uas paub tsis meej thiab tej kev nyuaj uas ntsib nyob rau hauv tes hauj lwm ntawd kom ncav sij hawm.” Peb yuav nthuav tawm ntau yam kev qhia tshwm uas pom tau meej ntawm cov thawj coj cuav txog lub luag hauj lwm no. Kev qhia tawm thiab nrhiav kev los daws tej yam uas paub tsis meej thiab tej kev nyuaj uas ntsib nyob rau hauv tes hauj lwm ntawd kom ncav sij hawm—qhov no tsis yog ib feem ntawm tes hauj lwm thiab tej dej num ntawm cov thawj coj thiab cov neeg ua hauj lwm lod? (Yog.) Cov thawj coj thiab cov neeg ua hauj lwm yeej yuav ntsib qee yam teeb meem nyuaj nyob rau hauv lawv tes hauj lwm, los sis ntsib tej kev nyuaj uas nyob rau ciaj ciam sab nraud ntawm pawg ntseeg tes hauj lwm, los sis ntsib tej xwm txheej tshwj xeeb uas tsis muaj feem xyuam txog qhov tseeb tej hauv paus ntsiab lus, ces tsis paub tias yuav saib xyuas tej xwm txheej no li cas lawm. Los sis vim lawv lub peev xwm tsis zoo thiab tsis tuaj yeem nkag siab tau tej hauv paus ntsiab lus kom yog, lawv yeej yuav ntsib qee yam kev paub tsis meej thiab kev nyuaj uas nyuaj daws. Tej kev paub tsis meej thiab kev nyuaj no tej zaum yuav ntsig txog teeb meem ntawm kev siv tib neeg, teeb meem ntsig txog tes hauj lwm, teeb meem tshwm sim los ntawm xwm txheej sab nraud, teeb meem ntsig txog tib neeg txoj kev nkag mus rau hauv lub neej txoj sia, kev tab kaum thiab kev cuam tshuam uas tshwm los ntawm cov tib neeg phem, nrog rau teeb meem ntawm kev ntsaig los sis ntiab tib neeg tawm, thiab lwm yam. Rau tag nrho tej teeb meem no, Vajtswv lub tsev muaj tej kev cheem tsum thiab tej kev cai ntxaws ntxaws, los sis muaj qee cov lus qhia ntawm ncauj. Dhau ntawm tej kev cai ntxaws ntxaws no, yeej yuav muaj qee qhov xwm txheej tshwj xeeb uas tsis tau hais txog yam zam tsis dhau. Hais txog cov xwm txheej tshwj xeeb no, qee tus thawj coj tuaj yeem saib xyuas tau los ntawm kev ua raws li tej hauv paus ntsiab lus uas Vajtswv lub tsev cheem tsum, xws li tiv thaiv Vajtswv lub tsev tej txiaj ntsim, ua kom paub tseeb tias cov kwv tij thiab cov muam muaj kev nyab xeeb, thiab ua kom tes hauj lwm hauv pawg ntseeg mus tau zoo—thiab tsis tas li ntawd, lawv ua tau zoo heev—hos qee tus thawj coj ua tsis tau li ntawd. Cov teeb meem uas daws tsis tau ntawd yuav ua li cas? Qee cov thawj coj thiab cov neeg ua hauj lwm ua hauj lwm yam feeb tsis meej, pom tsis tau teeb meem, thiab txawm lawv pom los, lawv daws tsis tau. Lawv tsuas lam ua kom dhau yam tsis nrhiav kev daws teeb meem los ntawm tus Nyob Saud, tsuas hais rau cov kwv tij thiab cov muam tias, “Nej daws ntawm nej tus kheej; vam khom Vajtswv thiab ntsia ntsoov rau Vajtswv los nrhiav txoj hau kev daws,” thiab tom qab ntawd lawv xav tias txhua yam tiav lawm. Txawm muaj ib pawg teeb meem ntau npaum li cas los xij, lawv tus kheej daws tsis tau, tiam sis lawv tsis qhia tawm rau sab saud los sis nrhiav kev daws, tej zaum ntshai tias tus Nyob Saud yuav pom tshab txog qhov tseeb ntawm lawv thiab lawv yuav poob ntsej muag. Tseem muaj qee cov thawj coj thiab cov neeg ua hauj lwm uas tsis qhia teeb meem tawm rau tus Nyob Saud li, thiab Kuv tsis paub tias vim li cas. Qhov qhia tawm mus rau saud tsis tim tsum txhais hais tias yog qhia ncaj qha mus rau tus Nyob Saud; yus yeej qhia tau tawm mus rau cov thawj coj ntawm ib cheeb tsam me los sis ib cheeb tsam ua ntej tso. Thiab yog lawv daws tsis tau, ces koj tuaj yeem tso rau cov thawj coj thiab cov neeg ua hauj lwm qhia tawm ncaj qha rau tus Nyob Saud. Yog koj thov kom ib tug thawj coj los sis ib tug neeg ua hauj lwm qhia ib qho teeb meem tawm rau tus Nyob Saud, piav qhia qhov xwm txheej kom meej, lawv puas tuaj yeem muab tsuj cia thiab tsis quav ntsej txog qhov teeb meem ntawd? Cov neeg zoo li no tsis tshua muaj. Txawm hais tias muaj cov thawj coj zoo li no tiag, los koj tseem piav qhia tau qhov teeb meem rau lwm cov thawj coj thiab cov neeg ua hauj lwm kom meej los qhia tshwm tus uas muab teeb meem tsuj cia es tsis qhia tawm. Yog lwm cov thawj coj thiab cov neeg ua hauj lwm no tseem tsis qhia qhov teeb meem tawm thiab, ces tseem muaj ib txoj hau kev kawg thiab: Koj tuaj yeem sau ntawv ncaj qha rau Vajtswv lub tsev lub vej xaij kom xa mus rau tus Nyob Saud, ua li no thiaj li paub tseeb tias qhov teeb meem raug qhia tawm rau tus Nyob Saud lawm. Qhov no yog vim yav tas los tus Nyob Saud twb saib xyuas cov ntaub ntawv zoo li no los ntau zaus lawm, thiab tom qab ntawd tus Nyob Saud muab tso ncaj qha rau cov thawj coj thiab cov neeg ua hauj lwm kom mus saib xyuas qhov teeb meem. Qhov tseeb tiag, muaj ntau txoj hau kev qhia tawm ib qho teeb meem rau sab saud; qhov ntawd yooj yim xyaum ua raws, tsuas nyob ntawm seb tus neeg ntawd puas xav daws qhov teeb meem tiag tiag xwb. Txawm koj tsis ntseeg ib tug thawj coj los sis ib tug neeg ua hauj lwm twg los xij, koj tsim nyog ntseeg tias Vajtswv ncaj ncees thiab tus Nyob Saud ua hauj lwm raws li qhov tseeb tej hauv paus ntsiab lus. Yog koj tsis muaj kev ntseeg tiag tiag rau Vajtswv, thiab koj tsis ntseeg tias qhov tseeb kav hauv Vajtswv lub tsev, ces koj ua tsis tau ib yam dab tsi tiav li. Ntau tus neeg tsis to taub qhov tseeb; lawv tsis ntseeg tias qhov tseeb kav hauv Vajtswv lub tsev, thiab lawv tsis muaj lub siab hwm Vajtswv. Lawv pheej xav tias cov nom tswv hauv lub ntiaj teb puav leej ib leeg npog ib leeg, thiab Vajtswv lub tsev yeej zoo ib yam li ntawd thiab. Lawv tsis ntseeg tias Vajtswv yog qhov tseeb thiab kev ncaj ncees. Yog li ntawd, ib tug neeg zoo li no hu tau tias yog ib tug tsis ntseeg. Txawm li cas los xij, ib txhia neeg tsawg tsawg tuaj yeem qhia tawm cov teeb meem tiag tiag. Cov neeg zoo li no tuaj yeem hu tau tias yog cov uas tiv thaiv Vajtswv lub tsev tej txiaj ntsim; lawv yog cov neeg ris lub luag hauj lwm. Qee cov thawj coj thiab cov neeg ua hauj lwm tsis yog tsis daws cov teeb meem loj thaum lawv pom xwb; lawv kuj tsis qhia tawm rau sab saud thiab. Lawv tsuas pib paub txog qhov teeb meem loj ntawd thaum tus Nyob Saud tshawb xyuas xwb. Qhov no ua rau txhua yam qeeb. Yog li ntawd, tsis hais koj yog ib tug kwv tij los sis muam dog dig, los sis ib tug thawj coj los sis ib tug neeg ua hauj lwm li, thaum twg koj ntsib ib qho teeb meem uas koj daws tsis tau thiab muaj feem xyuam rau tej hauv paus ntsiab lus loj ntawm tes hauj lwm, koj yuav tsum qhia tawm rau sab saud thiab nrhiav kev daws teeb meem kom sai. Yog koj ntsib kev paub tsis meej los sis kev nyuaj tiam sis tsis daws, ces qee yam hauj lwm yuav mus tsis taus tom ntej; yuav tsum tau muab ncua tseg thiab nres. Qhov no yuav cuam tshuam rau qhov kev nce qib ntawm pawg ntseeg tes hauj lwm. Yog li ntawd, thaum ntsib cov teeb meem zoo li no uas tuaj yeem cuam tshuam ncaj qha rau qhov kev nce qib ntawm tes hauj lwm, ces yuav tsum nrhiav pom thiab daws kom sai li sai tau. Yog ib qho teeb meem tsis yooj yim daws, koj yuav tsum nrhiav cov neeg uas to taub qhov tseeb thiab cov neeg uas muaj kev paub hauv sab ntawd, tom qab ntawd zaum nrog lawv thiab tshawb xyuas thiab daws qhov teeb meem ua ke. Cov teeb meem zoo li no tsis tuaj yeem ncua sij hawm! Koj ncua sij hawm tsis daws cov teeb meem ntawd ib hnub ces yog ncua qhov kev nce qib ntawm tes hauj lwm ntawd ib hnub. Qhov ntawd tsis yog cuam tshuam rau ib tug neeg tej hauj lwm xwb; nws cuam tshuam rau pawg ntseeg tes hauj lwm, nrog rau qhov uas cov neeg Vajtswv xaiv tseg ua lawv tej dej num li cas. Yog li ntawd, thaum koj ntsib ib qho kev paub tsis meej los sis kev nyuaj zoo li no, yuav tsum tau daws kom sai, tsis tuaj yeem ncua sij hawm. Yog koj daws tsis tau tiag tiag, ces qhia rau tus Nyob Saud kom sai li sai tau. Tus Nyob Saud yuav daws qhov ntawd ncaj qha, los sis qhia txoj hau kev rau koj. Yog ib tug thawj coj los sis ib tug neeg ua hauj lwm saib xyuas tsis tau cov teeb meem zoo li no, thiab muab qhov teeb meem tsuj cia tsis qhia tawm rau tus Nyob Saud thiab tsis nrhiav kev daws teeb meem los ntawm tus Nyob Saud, ces cov thawj coj zoo li no dig muag lawm; lawv ruam feeb tsis meej, thiab lawv tsis muaj qab hau. Lawv yuav tsum raug muab rho tawm thiab tshem tawm ntawm lawv txoj hauj lwm. Yog lawv tsis raug tshem tawm ntawm lawv txoj hauj lwm mus, ces pawg ntseeg tes hauj lwm yuav mus tsis tau tom ntej; pawg ntseeg tes hauj lwm yuav raug puas tsuaj hauv lawv ob txhais tes. Yog li ntawd, qhov no yuav tsum tau daws tam sim ntawd.

Tes hauj lwm ua yeeb yaj kiab kuj yog ib teg hauj lwm tseem ceeb ntawm Vajtswv lub tsev thiab. Cov pab pawg ua yeeb yaj kiab pheej ntsib ib qho teeb meem uas txhua tus muaj kev tsis sib haum txog cov ntawv. Piv txwv li, tus taw qhia ntseeg tias cov ntawv txawv los sis sib txawv ntawm lub neej tiag tiag lawm thiab xav tias tsis zoo li lub neej tiag thaum yees, ces yog li ntawd lawv xav muab hloov. Txawm li cas los xij, tus neeg sau cov ntawv ntawd tsis pom zoo kiag li, ntseeg tias cov ntawv ntawd yeej sau tau tsim nyog thiab hais kom tus taw qhia ntawd cia li yees raws li cov ntawv ntawd xwb. Cov neeg ua yeeb yam kuj muaj lawv tus kheej tej kev tsis pom zoo, tsis pom zoo nrog tus neeg sau cov ntawv thiab tus taw qhia. Ib tug neeg ua yeeb yam thiaj li hais tias, “Yog tus taw qhia hais kom yees li ntawd, ces kuv yuav tsis ua!” Tus neeg sau hais tias, “Yog tus taw qhia hloov cov ntawv ntawd, ces nej txhua tus yuav tsum ris thaum muaj teeb meem tshwm tuaj!” Tus taw qhia hais tias, “Yog kom kuv yees raws li cov ntawv thiab muaj qhov yuam kev tshwm tuaj, Vajtswv lub tsev yuav nrhiav kuv lub txim. Yog koj xav kom kuv yees, ces yuav tsum ua raws li kuv tus kheej txoj kev xav; yog tsis li ntawd, ces kuv yuav tsis yees.” Tam sim no, tag nrho peb sab muaj ib qho tsis sib haum, puas yog? Pom tseeb tias tes hauj lwm mus tsis tau tom ntej lawm. Qhov no tsis yog ib qho kev paub tsis meej uas tshwm tuaj lod? Yog li ntawd, leej twg thiaj li yog tus yog tiag? Txhua tus nyias muaj nyias tej tswv yim, nyias muaj nyias tej lus sib cav, thiab tsis muaj leej twg yeem thim. Thaum peb sab muaj qhov tsis sib haum zoo li no lawm, muaj dab tsi puas tsuaj? (Vajtswv lub tsev tes hauj lwm.) Vajtswv lub tsev tes hauj lwm raug thaiv thiab raug puas tsuaj. Thaum ntsib cov xwm txheej zoo li no nej puas ntxhov siab thiab txhawj xeeb? Yog tsis muaj, qhov ntawd ua pov thawj tau tias nej tsis tau muab nej lub siab tso rau hauv tiag. Thaum tej kev paub tsis meej thiab kev tsis sib haum zoo li no tshwm tuaj, qee leej neeg ntxhov siab heev noj tsis taus pw tsis tsaug zog, xav tias, “Yuav tsum ua li cas? Sib cav thiab tsis kam tso tseg zoo li no mus tsis txog qhov twg. Qhov no tsis yog cuam tshuam rau qhov kev nce qib ntawm kev yees yeeb yaj kiab lod? Qhov no twb ua rau ncua tau ob peb hnub lawm thiab ncua tsis tau ntxiv lawm. Peb yuav daws qhov teeb meem no li cas kom paub tseeb tias qhov kev yees mus tau zoo thiab tes hauj lwm tsis raug ncua? Peb yuav tsum nrhiav leej twg los daws qhov teeb meem no?” Yog koj muaj lub siab, koj yuav tsum nrhiav kev daws teeb meem los ntawm cov thawj coj, thiab yog cov thawj coj daws tsis tau, koj yuav tsum qhia tawm kom sai rau tus Nyob Saud. Yog koj ua tib zoo xav txog Vajtswv tej kev npaj siab tiag tiag, ces koj tsim nyog ua txhua yam li koj ua tau los daws qhov teeb meem kom sai li sai tau; qhov no yog qhov tseem ceeb tshaj plaws. Thiab yog tias koj tsis txhawj xeeb ne? Tej zaum koj yuav xav txog qhov ntawd, xav tias, “Lawv yog cov tsis yog. Kuv yuav tuav rawv kuv qhov kev xam pom—kuv saib seb lawv yuav ua tau li cas rau kuv. Tom qab noj mov tag kuv yuav pw ib pliag, vim tsis muaj dab tsi ua thaum tav su.” Koj ob txhais ceg hnyav, koj lub taub hau kiv, koj lub siab tsis muaj zog, thiab koj tub nkeeg. Muaj ib pawg kev nyuaj, tiam sis koj tsis quav ntsej thiab tub nkeeg, yog li ntawd ces yeej tsis muaj txoj hau kev daws qhov teeb meem. Vim li cas tsis muaj txoj hau kev? Vim koj tsis muaj lub zog thiab lub siab xav daws qhov teeb meem, yog li ntawd koj xav tsis tawm txoj hau kev daws. Koj xav hauv koj tus kheej tias: “Tsis tshua muaj kev nyuaj tshwm sim uas ua rau tes hauj lwm nres. Kuv yuav siv lub hwv tsam no los so ob peb hnub thiab los so kom xis siab me ntsis tso. Vim li cas thiaj li sab tas li xwb? Yog tam sim no kuv so, yuav tsis muaj leej twg hais tau dab tsi lawm. Txawm li cas los xij, tsis yog kuv tub nkeeg los sis tsis ris lub luag hauj lwm rau kuv tes hauj lwm. Kuv xav ris lub luag hauj lwm, tiam sis muaj qhov kev nyuaj no thaiv peb txoj kev—leej twg yuav daws qhov kev nyuaj ntawd? Peb yuav yees li cas yog tsis daws? Yog muaj kev nyuaj ua rau peb yees tsis tau, ces peb tsis tsim nyog so xwb lod?” Thaum muaj ib qho teeb meem loj npaum li no nyob ntawm koj xub ntiag, yog tsis daws kom sai yuav muaj qhov tshwm sim tau los dab tsi? Yog teeb meem pheej tshwm tuaj thiab daws tsis tau ib qho li, ces tes hauj lwm puas mus taus tom ntej? Qhov no yuav ua rau ncua sij hawm ntev yam suav tsis txheeb. Qhov kev nce qib ntawm tes hauj lwm yuav tsum mus rau tom ntej, thim rov qab tsis tau, yog li ntawd thaum paub tias qhov teeb meem no ua rau muaj tej kev nyuaj, koj tsis tsim nyog ncua sij hawm ntxiv lawm; koj yuav tsum daws kom sai li sai tau. Thaum daws tag qhov teeb meem no lawm, maj nroos daws qhov teeb meem tom ntej thaum nws tshwm tuaj, siv zog tsis txhob nkim sij hawm kom tes hauj lwm thiaj li mus tau zoo thiab ua tiav raws li lub sij hawm. Qhov ua li ntawd zoo li cas? (Zoo.) Cov neeg uas muaj lub siab yuav ntsib tej kev paub tsis meej thiab kev nyuaj nrog tus cwj pwm no. Lawv tsis nkim sij hawm, tsis nrhiav kev zam rau lawv tus kheej, thiab tsis ntshaw kev tau zoo ntawm lub cev nqaij daim tawv. Hos muab hais rau lwm sab ces, cov neeg uas tsis muaj lub siab ntawd yuav nrhiav qhov khoob; lawv yuav nrhiav kev los hais ub hais no thiab nrhiav lub cib fim los so, maj mam ua txhua yam thiab tsis muaj qhov maj los sis ntxhov siab li, tsis muaj kev txiav txim siab los tiv kev txom nyem los sis them tus nqi li. Thiab thaum kawg muaj dab tsi tshwm sim? Thaum ntsib ib qho kev paub tsis meej los sis ib qho kev nyuaj, txhua tus pom tias lawv tus kheej nyob rau ntawm qhov tsis sib haum tau ntau hnub. Tsis hais cov coj, cov neeg ua yeeb yam, los sis cov neeg sau cov ntawv tsis qhia qhov teeb meem tawm. Tib lub sij hawm ntawd, cov thawj coj dig muag thiab tsis muaj peev xwm paub tias qhov ntawd yog ib qho teeb meem; txawm hais tias lawv paub tias qhov ntawd yog ib qho teeb meem tiam sis lawv daws tsis tau ntawm lawv tus kheej, lawv kuj tsis qhia tawm rau sab saud thiab. Thaum lub sij hawm qhov teeb meem raug qhia tawm ib qib zuj zus mus txog tus Nyob Saud, kaum hnub los sis ib nrab hli dhau mus lawm. Nyob rau kaum hnub mus rau ib nrab hli no ua dab tsi xwb? Puas muaj leej twg ua lawv tej dej num? Tsis muaj, lawv tsuas nkim sij hawm rau kev noj, haus, thiab ua si xwb! Lawv tsis yog tsuas noj mov dawb xwb lod? Tag nrho cov neeg saib xyuas uas tsis tuaj yeem nrhiav kev los daws tej kev paub tsis meej thiab tej kev nyuaj uas ntsib nyob rau hauv lawv tes hauj lwm kom sai li sai tau ntawd ces tsuas yog xav tau dawb, lam nyob yam tsis muaj hom phiaj li. Cov neeg zoo li no hu luv luv ua “cov neeg xav tau dawb.” Vim li cas hu ua “cov neeg xav tau dawb”? Vim cov neeg no tsis ua lawv tej dej num nrog tus cwj pwm uas mob siab, ris lub luag hauj lwm, ua tib zoo, los sis nquag plias, tiam sis ua dog ua dig, xav phem, thiab tub nkeeg, es cia siab ntsoov kom tshwm sim qee qhov kev nyuaj los sis kev tsis sib haum kom lawv muaj laj thawj los tso tseg thiab nres hauj lwm.

Cov thawj coj thiab cov neeg ua hauj lwm tsis yog yuav tsum daws tej kev paub tsis meej thiab tej kev nyuaj uas ntsib hauv tes hauj lwm kom sai li sai tau xwb tiam sis kuj yuav tsum tshuaj xyuas thiab nrhiav pom tej teeb meem no kom sai li sai tau thiab. Vim li cas yuav tsum ua li no? Tsuas muaj ib lub hom phiaj hauv kev ua li no xwb: tiv thaiv Vajtswv tes hauj lwm thiab Vajtswv lub tsev tes hauj lwm, ua kom txhua tes hauj lwm mus zoo thiab ua tiav raws li lub sij hawm ua hauj lwm ib txwm muaj. Txhawm rau kom tes hauj lwm mus tau zoo, yuav tsum daws cov teeb meem twg? Ua ntej tshaj mas, yuav tsum ntsaig tej kev dawm thiab kev thaiv uas ua rau cuam tshuam pawg ntseeg tes hauj lwm tawm mus kom huv si, txwv cov tsis ntseeg thiab cov tib neeg phem kom lawv tsis txhob tsim teeb meem. Tsis tas li ntawd, yuav tsum coj qhia cov saib xyuas ntawm txhua tes hauj lwm thiab cov kwv tij thiab cov muam kom to taub qhov tseeb thiab nrhiav tau txoj hau kev xyaum ua raws, kom kawm paub sib koom tes kom sib haum xeeb thiab ib leeg saib xyuas ib leeg. Tsuas yog ua li no xwb mas thiaj li paub tseeb tias tes hauj lwm yuav ua tau tiav. Tsis hais ntsib tej kev nyuaj los sis kev paub tsis meej dab tsi, yog cov thawj coj thiab cov neeg saib xyuas daws tsis tau, ces yuav tsum qhia tawm kom sai rau tus Nyob Saud thiab nrhiav cov kev daws. Tsis hais ua tes hauj lwm dab tsi los xij, cov thawj coj thiab cov neeg saib xyuas yuav tsum muab qhov daws teeb meem ua qhov tseem ceeb, ib kis yog daws cov teeb meem txog cov thev naus laus ntsis thiab cov teeb meem ntawm lub hauv paus ntsiab lus uas muaj feem xyuam txog tes hauj lwm, lwm kis yog daws ntau yam teeb meem uas tib neeg ntsib hauv lawv txoj kev nkag mus rau hauv lub neej txoj sia. Yog koj daws tsis tau tej kev paub tsis meej thiab tej kev nyuaj, ces koj yuav ua tsis tau koj tes hauj lwm kom zoo. Yog li ntawd, thaum koj ntsib tej kev nyuaj los sis kev paub tsis meej tshwj xeeb uas koj daws tsis tau, ces koj yuav tsum qhia tawm kom sai rau tus Nyob Saud. Tsis txhob nkim sij hawm, vim qhov ncua peb mus rau tsib hnub ntawd xwb twb ua tau rau tes hauj lwm raug puas tsuaj, thiab yog ncua ib nrab hli los sis ib hlis, ces qhov kev puas tsuaj ntawd yuav loj dhau lawm. Tsis tas li ntawd, tsis hais yog qhov teeb meem dab tsi, yuav tsum tau daws raws li qhov tseeb tej hauv paus ntsiab lus. Txawm yuav zoo li cas los xij, tsis txhob siv tib neeg lub tswv yim rau kev ua neej hauv ntiaj teb los daws tej teeb meem kiag li. Tsis txhob muab teeb meem loj ua kom me, thiab muab teeb meem me ua kom tsis muaj, los sis cem ob tog uas muaj teeb meem thiab tom qab ntawd nplig lawv nrog lo lus mos, pheej siv txoj kev sib tham thiab hais zoo rau lawv, ntshai tsam teeb meem loj tuaj. Qhov no ua rau cov teeb meem tsis raug daws ntawm lub hauv paus, uas tseg teeb meem cia rau tom ntej. Qhov no tsis yog ib txoj hau kev uas tsuas lam ua kom dhau mus xwb lod? Yog koj xav tias koj twb siv tib neeg tej hau kev daws tag nrho rau ib qho teeb meem lawm thiab yeej daws tsis tau tiag tiag li, thiab koj nrhiav tsis tau tej hauv paus ntsiab lus txog cov teeb meem thev naus laus ntsis rau tes hauj lwm hlo li, ces koj yuav tsum qhia cov teeb meem no tawm kom sai rau tus Nyob Saud thiab nrhiav kev daws yam tsis tos los sis ncua li. Txhua qhov teeb meem uas daws tsis tau yuav tsum qhia tawm kom sai rau tus Nyob Saud kom nrhiav tau ib txoj kev daws. Lub hauv paus ntsiab lus no zoo li cas? (Zoo.)

Cov pab pawg ua yeeb yaj kiab thiab cov pab pawg sau ntawv puas yog pheej tsis sib haum txog teeb meem ntawm kev yees yeeb yaj kiab tas li? Txhua tus nyias muaj nyias laj thawj, thiab lawv tsis tuaj yeem pom zoo ua ke, pheej sib cav tas li. Thaum tshwm sim cov teeb meem no, cov thawj coj puas daws tau? (Qee zaus daws tau.) Nej puas tau ntsib ib qho xwm txheej uas ib tug thawj coj daws qee yam teeb meem los ntawm kev sib qhia, thiab mloog zoo li tsim nyog thiab yog raws li lub tswv yim, tiam sis tseem paub tsis tseeb tias puas mus raws li Vajtswv lub tsev tej kev cheem tsum los sis puas mus raws li qhov tseeb tej hauv paus ntsiab lus? (Muaj.) Nej saib xyuas cov xwm txheej zoo li no li cas? (Qee zaus peb yuav nrhiav los ntawm tus Nyob Saud.) Qhov ntawd yog txoj hau kev uas yog. Nej puas tau muaj ib qho xwm txheej uas nej txiav txim siab tsis nug txog ib qho teeb meem twg vim nej pom tias tus kwv tij uas Nyob Saud tsis khoom, thiab nej xav tias tsis ua li cas tsuav yog qhov ntawd yog mus raws li lub tswv yim xwb, ces tom qab ntawd txiav txim siab mus yees ua ntej txawm qhov ntawd mus raws li qhov tseeb los sis tsis mus raws qhov tseeb los xij? (Yav tas los peb muaj cov teeb meem hnyav txog kis no. Qhov ntawd ua rau peb yuav tsum tau rov ua dua thiab ua rau muaj kev tab kaum thiab kev cuam tshuam rau tes hauj lwm.) Qhov xwm txheej ntawd hnyav heev! Ntau yam teeb meem uas cov pab pawg ua yeeb yaj kiab ntsib ntawd thaum kawg yog lub luag hauj lwm tiag ntawm pab pawg sau ntawv. Piv txwv li, yog cov lus piav uas tsis muaj qab hau ntawm ib zaj yeeb yaj kiab ntev mus txog li ob teev thiab ib nrab lawm, ces cov neeg sau ntawv yog cov tseem ceeb uas yuav tsum ris. Tiam sis ua li cov coj lub luag hauj lwm ne? Yog cov ntawv tsis muaj qab hau, cov coj puas muaj peev xwm pom qhov no? Raws li lub tswv yim ces, lawv tsim nyog pom. Txawm li cas los xij, cov coj tseem tuaj yeem siv sij hawm ntau lub hlis thiab siv tib neeg, khoom siv, thiab nyiaj txiag ntau heev los yees kom tiav nyob rau cov xwm txheej zoo li no. Qhov no yog hom teeb meem dab tsi? Raws li cov coj, nej lub luag hauj lwm yog dab tsi? Thaum tau txais ib cov ntawv, nej yuav tsum xav tias, “Cov ntawv no ntev heev thiab muaj ntsiab lus nplua mias, tiam sis cov ntawv ntawd tsis muaj lub ntsiab tseem ceeb, tsis muaj lub ncauj lus; tag nrho cov qauv tsis muaj ntsujplig. Cov ntawv no yees tsis tau; yuav tsum tau xa rov qab rau cov neeg sau ntawv kom lawv kho dua.” Nej puas muaj peev xwm ua tau qhov no? Nej puas tau xa ib cov ntawv yeeb yaj kiab rov qab dua? (Tsis tau.) Puas yog vim nej tsis pom cov teeb meem, los sis vim nej ntshai xa rov qab? Los sis nej ntshai tias ib tug twg yuav txiav txim rau nej, hais tias, “Lawv muab cov ntawv uas sau tiav lawm no rau koj thiab koj tsis lees txais los ntawm ib lo lus xwb, thiab xa cov ntawv ntawd rov qab—koj khav theeb dhau lawm, tsis yog lod?” Nej ntshai dab tsi tiag? Nej pom qhov teeb meem, yog li ntawd vim li cas tsis xa cov ntawv rov qab rau cov neeg sau ntawv? (Peb tsis ris lub luag hauj lwm rau peb tes hauj lwm ua yeeb yaj kiab.) Rau cov pab pawg ua yeeb yaj kiab, dhau ntawm cov thawj coj pawg ntseeg, cov coj yuav tsum ua cov neeg saib xyuas, cov uas txiav txim siab thiab muaj lo lus kawg. Vim koj yog tus taw qhia, koj yuav tsum ris lub luag hauj lwm tag nrho rau qhov no, ua qhov kev tshuaj xyuas kom zoo txog cov ntawv txij kiag lub sij hawm koj txais tau cov ntawv. Piv txwv li hais tias koj txais tau ib cov ntawv thiab ua zoo saib txij thaum pib mus txog thaum kawg, pom tias cov ntsiab lus zoo heev. Nws muaj qhov tseem ceeb thiab lub ntsiab lus, zaj dab neeg tig ncig ib txoj kab tseem ceeb, thiab tag nrho cov ntawv zoo li tsis muaj teeb meem loj—nws zoo, tsim nyog yees, thiab yog li ntawd tuaj yeem txais cov ntawv no. Txawm li cas los xij, yog cov ntawv ntev, piav qhia ib tug neeg qhov keeb kwm txij thaum pib mus txog thaum kawg yam tsis muaj lub ntsiab los sis lub ncauj lus tseem ceeb li, ces ua rau paub tsis meej tias cov ntawv no yog qhia txog dab tsi, nws xav ua kom cov neeg saib paub dab tsi, los sis nws lub tswv yim tseem ceeb thiab lub ntsiab lus ntawm sab ntsujplig yog dab tsi—nws tsuas yog ib qho kev piav qhia tsis muaj qab hau, ib cov ntawv tsis meej xwb—puas txais yuav tau cov ntawv no? Nyob hauv qhov xwm txheej zoo li no cov coj yuav tsum ua li cas? Lawv yuav tsum xa cov ntawv rov qab thiab muab tswv yim rau cov neeg sau ntawv kho dua. Cov neeg los ntawm pab pawg sau ntawv tej zaum yuav tsis pom zoo, hais tias, “Qhov no tsis ncaj ncees! Lawv yog leej twg ua cas hos los tshuaj xyuas cov ntawv uas peb sau? Vim li cas lawv thiaj li muaj cai txiav txim siab? Vajtswv lub tsev yuav tsum coj rau tib neeg yam ncaj ncees thiab tsim nyog!” Qhov xwm txheej ntawd yuav tsum ua li cas? Yog cov coj tuaj yeem pom tej teeb meem hauv cov ntawv, lawv tsis tsim nyog maj nroos txiav txim siab tiam sis yuav tsum sib qhia qhov teeb meem no nrog cov thawj coj pawg ntseeg thiab cov tswv cuab ntawm pab pawg ua yeeb yaj kiab ua ntej. Yog saib raws li txhua tus cov kev ntsib kev pom los ntawm kev yees yeeb yaj kiab ntau xyoo thiab kev to taub txog cov ntawv, pom zoo tias cov ntawv ntawd tsis mus raws tus qauv, thiab ntseeg tias kev yees yuav tsis yog tsuas ua rau tes hauj lwm ua yeeb yaj kiab qeeb xwb tiam sis kuj yuav nkim tag nrho tib neeg, khoom siv, thiab nyiaj txiag uas muaj feem xyuam, thiab tsis muaj leej twg ris taus lub luag hauj lwm zoo li no, ces cov ntawv no yuav tsum tau xa rov qab. Ib cov ntawv uas tsis muaj qab hau yuav tsum tsis txhob yees kiag li; qhov no yog ib lub hauv paus ntsiab lus. Yog txhua tus xav zoo ib yam txog cov ntawv ntawd, ces cov neeg sau ntawv yuav tsum lees txais yam tsis hais dab tsi li thiab kho cov ntawv raws li cov tswv yim los ntawm pab pawg ua yeeb yaj kiab. Yog tseem muaj tej kev tsis sib pom zoo thiab, ces cov tswv cuab thiab cov thawj coj ntawm ob tog yeej sib tham tau ua ke los saib seb leej twg cov lus hais mus raws li qhov tseeb tej hauv paus ntsiab lus. Yog qhov tsis sib haum tseem muaj mus ntxiv yam tsis muaj qhov xaus lus, ces tsim nyog siv txoj hau kev kawg, uas yog cov thawj coj thiab cov neeg ua hauj lwm lub luag hauj lwm yim uas qhia hnub no: “Qhia tawm thiab nrhiav kev los daws tej yam uas paub tsis meej thiab tej kev nyuaj uas ntsib nyob rau hauv tes hauj lwm ntawd kom ncav sij hawm.” Cov teeb meem uas tsis sib haum thiab daws tsis tau hu ua kev paub tsis meej thiab kev nyuaj. Txhua sab xav tias lawv cov laj thawj yog lawm, thiab tsis muaj leej twg txiav txim siab tau. Hais mus hais los zoo li no ua rau qhov teeb meem tsis meej, ua rau txhua tus tsis to taub txog tag nrho paus ntsis ntawm qhov teeb meem thiab txoj hau kev uas yuav tsum taug. Lub sij hawm no, cov thawj coj thiab cov neeg ua hauj lwm yuav tsum ua lawv lub luag hauj lwm los qhia tawm kom sai thiab nrhiav kev daws rau cov teeb meem thiab kev paub tsis meej uas tshwm tuaj hauv tes hauj lwm, siv zog daws cov teeb meem kom sai li sai tau los tiv thaiv kom cov teeb meem tsis txhob tab kaum qhov kev nce qib ntawm tes hauj lwm, thiab haj yam tiv thaiv kom cov teeb meem tsis txhob ntau ntxiv. Qhov qhia tawm kom sai thiab nrhiav kev daws cov teeb meem no—qhov no tsis yog ua hauj lwm lod? Qhov no tsis yog qhia tshwm tus cwj pwm uas mob siab thiab ris lub luag hauj lwm rau tes hauj lwm lod? Qhov no tsis yog muab siab rau hauv kev ua yus tes dej num lod? Qhov no tsis yog kev ua siab ncaj lod? (Yog.) Qhov no yog muaj kev ua siab ncaj rau yus tes dej num.

Cov thawj coj thiab cov neeg ua hauj lwm uas tuav tes hauj lwm yuav tsum pom thiab daws txhua qhov teeb meem uas tshwm sim hauv tes hauj lwm kom sai li sai tau, vim tsuas yog ua li no xwb mas thiaj li paub tseeb tias tes hauj lwm mus tau zoo. Txhua cov thawj coj thiab cov neeg ua hauj lwm uas daws tsis tau teeb meem ntawd puav leej tsis muaj qhov tseeb qhov muaj tiag thiab yog cov thawj coj thiab cov neeg ua hauj lwm cuav. Leej twg uas pom teeb meem tiam sis daws tsis tau, thiab ho zam los sis npog cia, ces yog ib tug neeg tsis muaj qab hau uas tsuas ua rau tes hauj lwm puas tsuaj xwb. Cov teeb meem uas tsis sib pom zoo ntawd yuav tsum muab daws los ntawm kev sib qhia thiab kev sib cav. Yog tej no ua tsis tau kom muaj txiaj ntsig uas yog tiam sis ua rau qhov teeb meem ntxhov ntxiv, ces tus thawj coj tseem ceeb yuav tsum los saib xyuas daws qhov teeb meem ntawd ntawm nws tus kheej, muab txoj kev daws thiab txoj hau kev kom sai li sai tau thiab kuj yuav tsum soj ntsuam, to taub, thiab txiav txim kom sai los saib seb qhov xwm txheej ntawd yuav mus zoo li cas. Thaum tseem muaj kev sib cav txog ib qho teeb meem twg thiab txiav txim tsis tau, ces yuav tsum qhia qhov teeb meem ntawd tawm kom sai rau tus Nyob Saud kom nrhiav tau kev daws, tsis yog hais tias tsuas lam ua kom dhau, tos, los sis ncua sij hawm xwb, thiab tshwj xeeb tshaj yog tsis txhob tsis quav ntsej qhov teeb meem ntawd. Tam sim no nej cov thawj coj thiab cov neeg ua hauj lwm puas yog ua hauj lwm li no? Lawv yuav tsum taug qab thiab txhawb qhov kev nce qib ntawm tes hauj lwm kom sai, thiab tib lub sij hawm ntawd nrhiav pom ntau yam kev tsis sib haum uas tshwm sim hauv tes hauj lwm thiab kuj tsis txhob hla dhau ntau yam teeb meem me me thiab. Thaum pom cov teeb meem loj, cov thawj coj thiab cov neeg ua hauj lwm tseem ceeb yuav tsum nyob ntawm qhov chaw ntawd los koom nrog daws cov teeb meem, kom muaj kev to taub meej txog qhov pib thiab qhov xaus, qhov laj thawj uas tshwm sim qhov teeb meem, thiab cov kev xam pom ntawm cov uas muaj feem xyuam, kom thiaj li nkag siab tau meej tias muaj dab tsi tshwm sim tiag tiag. Tib lub sij hawm ntawd, lawv yuav tsum koom nrog kev sib qhia, kev sib tham, thiab haj tseem yog kev sib cav txog cov teeb meem no. Qhov no yog qhov yuav tsum muaj; kev koom nrog tseem ceeb heev, vim qhov ntawd pab tau koj txiav txim thiab daws cov teeb meem uas tshwm sim hauv tes hauj lwm. Yog koj tsuas mloog yam tsis koom nrog, pheej sawv ntawm ib sab ntsia thiab ua zoo li ib tug tub kawm ntawv uas tuaj zaum mloog xwb, xav tias txhua qhov teeb meem uas tshwm sim hauv tes hauj lwm tsis cuam tshuam txog koj thiab koj tsis muaj kev xam pom los sis cwj pwm rau qhov teeb meem ntawd li, ces koj yog ib tug thawj coj cuav tseeb tseeb. Thaum koj koom nrog, koj yuav paub meej tias muaj teeb meem dab tsi tshwm sim hauv tes hauj lwm, dab tsi ua rau muaj teeb meem, leej twg yuav tsum ris, qhov teeb meem tseem ceeb nyob qhov twg, thiab seb yog vim tib neeg tej kev xav phem thiab kev xav hauv nruab siab los sis vim tsis txawj txaus txog thev naus laus ntsis thiab kev txawj qib siab—tag nrho tej no yuav tsum tau ua kom meej kom thiaj li saib xyuas thiab daws tau teeb meem yam ncaj ncees. Thaum koj koom nrog tes hauj lwm no thiab pom tias cov teeb meem tsis yog tib neeg ua los sis tsis yog leej twg txhob txwm ua, tiam sis koj pom tias nyuaj heev los qhia lub ntsiab tseeb ntawm qhov teeb meem thiab tsis paub tias yuav daws li cas, nrog rau ob tog sib cav tau ntev heev, los sis thaum txhua tus twb ua kawg lub siab thiab kawg lub zog rau qhov teeb meem tiam sis tseem daws tsis tau, thiab nrhiav tsis tau tej hauv paus ntsiab lus los sis nrhiav tsis tau txoj hau kev, ua rau tes hauj lwm nres, thiab tseem ntshai tias yog ua ntxiv mus yuav ua rau muaj kev yuam kev, kev tab kaum, thiab muaj yam tsis zoo tshwm sim ntxiv, ces koj yuav tsum ua li cas? Yam uas cov thawj coj thiab cov neeg ua hauj lwm tsim nyog ua tshaj plaws tsis yog sib tham txog kev daws teeb meem nrog txhua tus, tiam sis yog qhia qhov teeb meem tawm rau tus Nyob Saud kom sai li sai tau. Cov thawj coj thiab cov neeg ua hauj lwm yuav tsum xaus lus thiab sau cov teeb meem hauv tes hauj lwm cia thiab qhia tawm kom sai rau tus Nyob Saud yam tsis ncua sij hawm, tsis tos, los sis tsis txhob cia siab tias yuav muaj hmoo, xav tias pw ib hmos tej zaum yuav muaj kev tshoov siab los sis cia li pom kev meej—uas yog ib yam tsis tshua muaj tshwm sim thiab tsis ntxim yuav tshwm sim. Yog li ntawd, txoj kev daws zoo tshaj plaws yog qhia qhov teeb meem tawm rau tus Nyob Saud thiab nrhiav kev daws kom sai li sai tau, ua kom paub tseeb tias qhov teeb meem raug daws ncav sij hawm thiab sai li sai tau; qhov no yog kev ua hauj lwm tiag tiag.

Tej Kev Paub Tsis Meej thiab Tej Kev Nyuaj Uas Cov Thawj Coj thiab Cov Neeg Ua Hauj Lwm Pheej Ntsib Hauv Lawv Tes Hauj Lwm

I. Kev Paub Tsis Meej

Raws li cov ntsiab lus uas peb nyuam qhuav sib tham ntawd, cia peb xaus lus saib “kev paub tsis meej” thiab “kev nyuaj” yog dab tsi tiag. Ob yam no tsis yog tib yam. Ua ntej, Kuv yuav piav qhia lo lus “kev paub tsis meej.” Kev paub tsis meej yog thaum koj pom tsis tshab txog ib yam twg; koj tsis paub tias yuav txiav txim los sis cais li cas kom mus raws li tej hauv paus ntsiab lus los sis kom yog. Txawm hais tias koj pom tshab me ntsis los xij, koj tsis paub tseeb tias koj qhov kev xam pom puas yog, koj tsis paub tias yuav saib xyuas los sis daws qhov teeb meem ntawd li cas, thiab nyuaj rau koj txiav txim txog qhov ntawd. Muab hais luv luv, koj tsis paub tseeb txog qhov ntawd thiab txiav txim siab tsis tau. Yog koj tsis to taub qhov tseeb me ntsis li thiab tsis muaj lwm tus los daws qhov teeb meem, ces qhov teeb meem yuav daws tsis tau. Qhov no tsis yog ntsib ib qho teeb meem nyuaj lod? Thaum ntsib cov teeb meem zoo li no, cov thawj coj thiab cov neeg ua hauj lwm yuav tsum qhia tawm rau tus Nyob Saud thiab nrhiav los ntawm tus Nyob Saud kom thiaj li daws tau cov teeb meem sai dua. Puas yog nej pheej ntsib kev paub tsis meej tas li? (Yog.) Qhov pheej ntsib kev paub tsis meej ntawd yog ib qho teeb meem lawm. Piv txwv li hais tias koj ntsib ib qho teeb meem thiab koj tsis paub txoj hau kev tsim nyog los saib xyuas qhov teeb meem ntawd. Ib tug neeg tawm tswv yim daws teeb meem uas koj xav tias muaj laj thawj hos lwm tus tawm lwm lub tswv yim uas koj kuj xav tias muaj laj thawj thiab, thiab yog koj tsis tuaj yeem pom meej tias txoj kev daws twg tsim nyog dua, nrog rau txhua tus nyias muaj nyias lub tswv yim sib txawv thiab tsis muaj leej twg nkag siab tau lub hauv paus los sis lub ntsiab tseeb ntawm qhov teeb meem, ces yeej yuav muaj qhov yuam kev tshwm sim hauv txoj kev daws qhov teeb meem ntawd xwb xwb li. Yog li ntawd, yuav daws ib qho teeb meem mas, qhov uas yuav tsum txiav txim lub hauv paus thiab lub ntsiab tseeb ntawm qhov teeb meem mas tseem ceeb thiab tsim nyog heev. Yog cov thawj coj thiab cov neeg ua hauj lwm tsis paub cais, tsis nkag siab lub ntsiab tseeb ntawm qhov teeb meem, thiab tsis tuaj yeem txiav txim kom yog, lawv yuav tsum qhia qhov teeb meem tawm kom sai rau tus Nyob Saud thiab nrhiav kev daws teeb meem los ntawm tus Nyob Saud; qhov no yog qhov yuav tsum tau ua thiab tsis yog muab ua teeb meem loj. Cov teeb meem uas daws tsis tau tuaj yeem ua rau muaj qhov tshwm sim tau los loj thiab cuam tshuam rau pawg ntseeg tes hauj lwm—qhov no yuav tsum tau to taub kom meej. Yog koj muaj kev txhawj xeeb heev, pheej ntshai tias tus Nyob Saud yuav pom tshab koj lub peev xwm tiag, los sis ntshai tias tus Nyob Saud yuav hloov koj tes dej num los sis rho koj tawm thaum pom qhov tseeb tias koj ua tsis tau tes hauj lwm tiag tiag, thiab vim li ntawd koj thiaj li tsis kam qhia qhov teeb meem tawm, qhov no yooj yim ua rau hauj lwm qeeb. Yog koj ntsib kev paub tsis meej pem uas koj daws tsis tau ntawm koj tus kheej, tiam sis tsis qhia tawm rau tus Nyob Saud, thaum qhov no ua rau muaj teeb meem loj ces tus Nyob Saud yuav nrhiav txim ntawm koj, ces koj yuav ris tsis taus li. Qhov no tsis yog koj tsuas cem tau koj tus kheej xwb lod? Thaum ntsib tej kev paub tsis meej zoo li no, yog cov thawj coj thiab cov neeg ua hauj lwm tsis ris lub luag hauj lwm thiab tsuas hais qee yam kev qhuab qhia thiab siv qee yam kev cai tswj los ua dog ua dig daws rau qhov teeb meem xwb, ces qhov teeb meem tseem daws tsis tau thiab txhua yam nyob li qub, tes hauj lwm mus tsis taus tom ntej. Qhov no yog qhov tau los tiag tiag thaum tej kev paub tsis meej tsis raug daws; qhov ntawd ua rau qeeb hauj lwm tau yooj yim heev.

Thaum muaj kev paub tsis meej tshwm tuaj ntawd, qee cov thawj coj thiab cov neeg ua hauj lwm hnov tias muaj teeb meem tshwm sim lawm, hos lwm cov thawj coj thiab cov neeg ua hauj lwm ho pom tsis tau qhov teeb meem—cov pab pawg tom qab no lub peev xwm tsis zoo kiag li, thiab loog thiab ruam; lawv tsis hnov txog ib qho teeb meem li. Txawm qhov kev paub tsis meej uas tshwm nyob ntawm lawv xub ntiag ntawd yuav loj npaum li cas los xij, yam uas lawv qhia tshwm tuaj ces yog qhov loog thiab ruam; lawv tsis quav ntsej qhov teeb meem thiab sim zam qhov teeb meem mus—qhov no yog cov thawj coj cuav uas tsis ua hauj lwm tiag tiag. Cov thawj coj thiab cov neeg ua hauj lwm uas muaj qee lub peev xwm thiab muaj peev xwm ua hauj lwm ntawd mas tuaj yeem paub thaum muaj tej xwm txheej zoo li no tshwm tuaj: “Qhov no yog ib qho teeb meem. Kuv yuav tsum sau cia. Tus Nyob Saud yeej tsis tau hais txog hom teeb meem no dua li, thiab qhov no yog thawj zaug peb ntsib, yog li ntawd tej hauv paus ntsiab lus rau txoj kev daws hom xwm txheej no yog dab tsi tiag? Yuav daws qhov teeb meem tiag tiag no li cas? Zoo li kuv muaj qee qhov kev xav hauv nruab siab tiam sis tsis meej, thiab kuv muaj tus cwj pwm me ntsis rau tej teeb meem zoo li no, tiam sis qhov muaj tus cwj pwm xwb tsis txaus; qhov tseem ceeb yog nrhiav qhov tseeb los daws qhov teeb meem. Peb yuav tsum muab qhov teeb meem no coj los rau sawv daws sib qhia thiab sib tham ua ke.” Tom qab sib qhia thiab sib tham ib lwm lawm, yog tseem tsis paub tias yuav ua li cas thiab, tsis muaj ib txoj kev xyaum ua uas yog los daws qhov teeb meem, thiab qhov kev paub tsis meej ntawd tseem nyob, ces lawv yuav tsum nrhiav kev daws los ntawm tus Nyob Saud. Lub sij hawm no, cov thawj coj thiab cov neeg ua hauj lwm lub luag hauj lwm yog sau cov ntsiab lus ntawm qhov kev paub tsis meej ntawm qhov teeb meem ntawd cia, kom thaum txog lub sij hawm lawv thiaj li tuaj yeem piav qhia meej hais tias qhov teeb meem ntawm qhov kev paub tsis meej ntawd yog dab tsi tiag thiab qhov uas tab tom nrhiav ntawd yog dab tsi tiag. Qhov no yog qhov uas cov thawj coj thiab cov neeg ua hauj lwm tsim nyog ua.

II. Tej Kev Nyuaj

A. Tej Kev Nyuaj Yog Dab Tsi

Txuas ntxiv no, cia peb saib lo lus “kev nyuaj.” Los ntawm lub ntsiab lus ntawm lo lus mas, kev nyuaj yuav hnyav dua li kev paub tsis meej. Yog li ntawd, kev nyuaj yog hais txog dab tsi tiag? Ib tug piav qhia seb. (Vajtswv, peb txoj kev to taub mas kev nyuaj yog cov teeb meem uas ntsib tiag tiag, uas yus twb sim daws lawm tiam sis tseem daws tsis tau; tej no suav hais tias yog kev nyuaj.) (Ntxiv ib qho, qee zaus yus yuav ntsib qee qhov teeb meem uas nyuaj heev uas yeej tsis tau ntsib dua li, uas txhua tus tsis muaj kev ntsib kev pom, tsis paub yuav ua li cas kiag li, thiab tsis muaj tswv yim los sis kev xav li—tej no yog ib hom teeb meem uas nyuaj heev.) Cov teeb meem uas nyuaj heev hu ua kev nyuaj, puas yog? Qhov kev piav qhia uas yooj yim tshaj plaws, ncaj tshaj plaws txog kev nyuaj ces yog cov teeb meem uas muaj tiag tiag. Piv txwv li, ib tug neeg lub peev xwm, kev txawj ntse ntawm txoj hauj lwm, kev mob nkeeg ntawm lub cev, nrog rau tej teeb meem ntawm qhov xwm txheej thiab lub sij hawm, thiab lwm yam, cov teeb meem uas muaj tiag tiag no hu ua kev nyuaj. Txawm li cas los xij, lub luag hauj lwm yim ntawm cov thawj coj thiab cov neeg ua hauj lwm uas peb tab tom sib qhia txog tam sim no tau hais tias lawv yuav tsum qhia tawm thiab nrhiav kev daws tej kev paub tsis meej thiab tej kev nyuaj uas ntsib hauv tes hauj lwm kom sai. Ntawm no, tej kev nyuaj uas hais txog tsis yog tej teeb meem uas muaj tiag tiag uas hais dav dav ntawd, tiam sis yog tej teeb meem nyuaj tshwj xeeb uas ntsib hauv tes hauj lwm uas daws tsis tau. Tej no yog hom teeb meem twg? Tej ntawd yog tej hauj lwm sab nraud uas tsis tshua muaj feem xyuam nrog qhov tseeb tej hauv paus ntsiab lus. Txawm tias cov teeb meem no tsis ntsig txog qhov tseeb tej hauv paus ntsiab lus los xij, cov teeb meem ntawd nyuaj tshaj li cov teeb meem ib txwm. Nyuaj tshaj li cas? Piv txwv li, tej teeb meem ntawd cuam tshuam txog kev cai lij choj thiab tsoom fwv tej kev cai tswj, los sis muaj feem xyuam txog kev nyab xeeb ntawm qee tus neeg hauv pawg ntseeg, thiab lwm yam. Tej no puav leej yog tej kev nyuaj uas cov thawj coj thiab cov neeg ua hauj lwm ntsib hauv lawv tes hauj lwm. Piv txwv li, hauv kev ntseeg Vajtswv nyob txawv teb chaws, txawm nyob rau lub teb chaws twg los xij, txhua tes hauj lwm hauv pawg ntseeg thiab cov kwv tij thiab cov muam qhov chaw nyob yuav tsum ua raws li tsoom fwv ntawm qhov chaw ntawd tej kev cai tswj thiab cheem tsum kom to taub txog cov kev cai lij choj thiab cov cai ntawm qhov chaw ntawd. Tej no cuam tshuam txog kev nrog lub ntiaj teb sab nraud sib txuas lus thiab kev saib xyuas tej xwm txheej sab nraud; tej ntawd thiaj li ntxhov me ntsis yog muab piv rau cov teeb meem ntawm cov neeg ua hauj lwm sab hauv pawg ntseeg. Qhov ntxhov ntawd nyob qhov twg? Qhov ntawd tsis yooj yim li qhov tsuas hais rau cov neeg hauv pawg ntseeg kom zwm rau Vajtswv, mloog hais, xyaum ua raws qhov tseeb, ua dej num yam ua siab ncaj, to taub qhov tseeb thiab saib xyuas tej yam raws li tej hauv paus ntsiab lus—tsuas hais tej no xwb yuav daws tsis tau tej teeb meem. Tiam sis, yuav tsum to taub txog txhua kis ntawm lub teb chaws ntawd tej kev cai lij choj, cov cai, thiab cov kev cai tswj, thiab cov kev coj noj coj ua ntawm qhov chaw ntawd, thiab lwm yam. Muaj ntau yam cuam tshuam rau tej xwm txheej sab nraud, thiab qhov ntawd yog ib qho uas yeej ib txwm muaj uas yuav muaj tej teeb meem uas xav tsis txog los sis tej teeb meem uas nyuaj daws los ntawm qhov siv pawg ntseeg tej hauv paus ntsiab lus, thiab qhov tshwm sim ntawm tej teeb meem no ua rau tsim muaj tej kev nyuaj. Piv txwv li, nyob sab hauv pawg ntseeg mas, yog qee tus neeg ua lawv tej dej num ua dog ua dig, ces cov teeb meem no daws tau los ntawm kev sib qhia qhov tseeb, kev ntuas, los sis kev pab thiab txhawb. Tiam sis nyob sab nraud, koj puas siv tau tej hauv paus ntsiab lus thiab tej hau kev no los daws tej teeb meem? Txoj kev no puas daws tau cov teeb meem zoo li no? (Tsis tau.) Yog li yuav ua li cas? Yuav tsum siv qee txoj hau kev uas muaj kev txawj ntse los daws thiab teb rov qab rau tej teeb meem zoo li no. Nyob hauv tus txheej txheem ntawm kev saib xyuas tej xwm txheej sab nraud no mas, Vajtswv lub tsev kuj tau teeb tsa qee lub hauv paus ntsiab lus, tiam sis txawm yuav piav qhia li cas los xij, txhua yam kev nyuaj tseem tshwm tuaj tas li. Vim lub ntiaj teb no, lub zej zog no, thiab cov noob neej no tsaus ntuj dhau thiab ntxhov dhau, thiab vim muaj kev cuam tshuam ntawm tus zaj loj liab ploog tej hwj chim phem, ces thaum saib xyuas tej xwm txheej sab nraud, thiaj li yuav tshwm sim qee qhov kev nyuaj uas xav tsis txog thiab muaj los ntxiv. Thaum tej kev nyuaj no tshwm tuaj, yog tsuas muab ib lub hauv paus ntsiab lus yooj yim rau nej xwb, hais tias, “Cia li zwm rau Vajtswv tej kev npaj; txhua yam yog Vajtswv tswj hwm, cia li tsis txhob quav ntsej qhov teeb meem xwb,” qhov no puas daws tau qhov teeb meem? (Tsis tau.) Yog daws tsis tau qhov teeb meem, ces qhov tshwm los yog qhov xwm txheej uas cov kwv tij thiab cov muam ua lawv tej dej num, thiab qhov xwm txheej uas lawv nyob, yuav raug cuam tshuam, raug thab plaub, thiab raug puas tsuaj. Qhov no tsis yog ua rau muaj kev nyuaj tshwm sim lod? Yog li yuav ua li cas? Puas tuaj yeem daws tau los ntawm kev siab kub? Yeej tsis tau li. Ib txhia hais tias, “Yog li ntawd peb siv txoj kev cai lij choj los daws puas tau?” Muaj ntau yam uas txoj kev cai lij choj daws tsis tau. Piv txwv li, nyob hauv tej chaw uas tus zaj loj liab ploog nkag los cuam tshuam thiab tsim teeb meem ntawd, txoj kev cai lij choj puas daws tau tej teeb meem ntawd? Txoj kev cai lij choj tsis muaj qab hau dab tsi nyob rau qhov ntawd. Nyob rau ntau qhov chaw, feem ntau tib neeg lub hwj chim loj dua txoj kev cai lij choj, yog li ntawd tsis txhob cia siab tias yuav daws tau tej teeb meem ntawd los ntawm qhov vam khom rau txoj kev cai lij choj xwb. Qhov siv tib neeg tej hau kev los sis kev siab kub los daws tej teeb meem ntawd los kuj tsis haum thiab. Cov thawj coj thiab cov neeg ua hauj lwm yuav tsum ua li cas nyob hauv cov xwm txheej zoo li no? Cov uas tsuas paub hais cov lus thiab cov kev qhuab qhia xwb puas daws tau thaum tej teeb meem no tshwm sim? Cov no tsis yog cov teeb meem uas nyuaj heev lod? Koj xav tias qhov ntiav ib tug kws lij choj thiab mus rau hauv tsev hais plaub kom daws tej teeb meem ntawd puas tau? Cov neeg ntawd puas to taub qhov tseeb? Tsis muaj chaw rau kev hais laj thawj nyob hauv lub ntiaj teb no; txawm yog cov kws txiav txim plaub ntug hauv lub teb chaws uas muaj kev cai lij choj los tsis yog ib txwm ua raws li txoj kev cai lij choj, tiam sis, lawv hloov lawv tej kev txiav txim raws li tus neeg uas muaj feem xyuam, tsis muaj kev ncaj ncees. Nyob hauv lub ntiaj teb no, txawm nyob qhov twg los xij, tib neeg vam khom rau lub zog, lub hwj chim, los txhawb lawv cov lus. Yog li ntawd, peb cov uas ntseeg Vajtswv yuav tsum vam khom rau dab tsi? Peb yuav tsum coj rau tib neeg thiab saib xyuas rau tej yam raws li Vajtswv cov lus, raws li qhov tseeb. Tiam sis puas yog txhua yam yuav mus tau zoo rau peb nyob hauv lub ntiaj teb yog peb vam khom rau Vajtswv cov lus thiab qhov tseeb? Tsis yog, yeej ua tsis tau li ntawd; qhov no yuav tsum muaj kev txawj ntse. Yog li ntawd, thaum cov thawj coj thiab cov neeg ua hauj lwm ntsib cov teeb meem zoo li no, yog lawv xav tias qhov teeb meem tseem ceeb heev thiab ntshai tias lawv yuav saib xyuas tau tsis tsim nyog thiab coj teeb meem los rau Vajtswv lub tsev, ua rau muaj kev cuam tshuam los sis qhov tshwm sim tau los uas tsis zoo, ces cov teeb meem zoo li no yog kev nyuaj rau lawv. Thaum ntsib tej kev nyuaj uas lawv daws tsis tau, lawv yuav tsum qhia tawm rau tus Nyob Saud tam sim ntawd thiab nrhiav txoj hau kev uas tsim nyog los daws tej teeb meem; qhov no yog qhov uas cov thawj coj thiab cov neeg ua hauj lwm yuav tsum ua.

B. Tej Kev Xam Pom thiab Tus Cwj Pwm Uas Yog Uas Ib Tug Neeg Yuav Tsum Muaj Thaum Ntsib Tej Kev Nyuaj

Yam uas Kuv yuav tsum piav qhia rau nej ntawm no tsis yog tsuas hais rau cov thawj coj thiab cov neeg ua hauj lwm xwb, tiam sis kuj hais rau txhua tus uas nyob ntawm no—yog ib lub hauv paus ntsiab lus tseem ceeb tshaj plaws. Qhov twg los xij uas nej ua pawg ntseeg tes hauj lwm, ua nej tej dej num, los sis tshaj tawm txoj moo zoo, yeej ib txwm yuav muaj kev nyuaj. Txawm yog Vajtswv tus kheej tes hauj lwm los yeej muaj kev nyuaj puv npo—nej txhua tus puas tau pom qhov tseeb no? Txawm hais tias tej zaum nej yuav tsis paub los sis tsis to taub meej txog tej yam ntxaws ntxaws los xij, nej txhua tus paub txog tej xwm txheej dav dav. Kev nthuav Vajtswv tes hauj lwm tshaj tawm txoj moo zoo kom dav tsis yog qhov uas mus tau zoo du lug, thiab nej txhua tus yuav tsum npaj lub siab kom txhij thiab paub txog qhov no. Qhov muaj tseeb no twb muab tso rau ntawm no lawm, yog li ntawd peb yuav tsum coj tus cwj pwm zoo li cas rau cov teeb meem no thiaj li tsim nyog tshaj plaws, thiaj li muaj laj thawj tshaj plaws, thiab yog tshaj plaws? Qhov ua siab yau thiab ntshai hauv nruab siab ntawd puas yog? (Tsis yog.) Vim qhov ua siab yau thiab ntshai ntawd tsis yog lawm, ces qhov coj tus cwj pwm thiab kev xam pom tias tsis ntshai ntuj thiab teb, ces qhov ua yeeb ncuab nrog lub ntiaj teb tag nrho, tawm tsam tag nrho lub ntiaj teb mus txog thaum kawg, thiab tsis pom zoo nrog lwm tus lub tswv yim ntawd puas yog? (Tsis yog.) Qhov no puas yog kev paub tias dab tsi yog qhov tsim nyog ntawm kev ua neeg ib txwm muaj los sis yog kev siab kub? Cov kev xam pom uas tsis yog no puav leej yog qhov kev nthuav tawm ntawm kev siab kub, tsis yog kev ntseeg tiag tiag. Yog li ntawd, cov kev xam pom thiab cov cwj pwm twg thiaj li yog? Cia Kuv teev ob peb yam rau nej. Qhov no yog thawj yam kev xam pom uas tib neeg tsim nyog muaj: Tsis hais nyob txawv teb chaws los sis nyob hauv Teb Chaws Suav, qhov uas tib neeg muab tag nrho lawv lub siab lub cev fij rau Vajtswv thiab ua lawv tej dej num yog txoj hauj lwm ncaj ncees tshaj plaws hauv tib neeg ntiaj teb txij puag thaum ub los txog tam sim no. Tes dej num uas peb ua ntawd mas yog ua tab meeg thiab ncaj ncees, tsis yog ua zais ntshis, vim yam uas peb tab tom ua tam sim no yog tes hauj lwm ncaj ncees tshaj plaws hauv tib neeg ntiaj teb. Qhov “ncaj ncees” no hais txog dab tsi? Qhov ntawd hais txog qhov tseeb, hais txog Vajtswv lub siab nyiam, hais txog tus Tswv Tsim tej kev npaj thiab tej lus txib; qhov ntawd siab tshaj li tib neeg tej kev coj ncaj, kev coj kev ua, thiab kev cai lij choj, thiab yog ib teg hauj lwm uas ua nyob rau hauv tus Tswv Tsim txoj kev coj thiab kev saib xyuas. Qhov no tsis yog qhov kev xam pom uas yog tshaj plaws lod? Rau ib qho, qhov kev xam pom no yog ib qho tseeb uas muaj nyob tiag; rau lwm qhov, qhov kev xam pom no kuj yog qhov kev paub txog uas yog tshaj plaws txog qhov dej num uas ib tug neeg ua. Qhov no yog yam kev xam pom ob uas tib neeg tsim nyog muaj: Vajtswv muaj hwj chim kav txhua yam thiab txhua qhov xwm txheej. Txhua yam, nrog rau cov tswj hwm hauv lub ntiaj teb thiab txhua lub hwj chim, kab lis kev cai ntseeg, koom haum, thiab haiv neeg hauv lub ntiaj teb puav leej nyob hauv qab lub hwj chim kav thiab kev tswj hwm ntawm Vajtswv ob txhais tes—tsis muaj leej twg txoj hmoo uas lawv tswj hwm tau ntawm lawv tus kheej li. Peb los yeej ib yam; peb txoj hmoo nyob hauv qab lub hwj chim kav thiab kev tswj hwm ntawm Vajtswv ob txhais tes, thiab tsis muaj leej twg hloov tau txoj kev uas peb mus thiab qhov chaw peb nyob, thiab tsis muaj leej twg hloov tau peb lub neej yav tom ntej thiab qhov chaw kawg. Ib yam li phau Vajluskub hais tias, “Tus vajntxwv lub siab nyob rau hauv Yehauvas txhais tes, zoo li tus dej ntws ntawm cov dej: Nws muab Nws tig mus raws li qhov Nws nyiam” (Paj Lug 21:1). Yim huab yuav ntau npaum li cas rau peb cov tib neeg tsis tseem ceeb txoj hmoo! Txoj kev tswj thiab kev coj ntawm tus tswj hwm hauv lub teb chaws uas peb nyob, nrog rau qhov xwm txheej uas muaj nyob ntawm lub teb chaws no, txawm tej ntawd yog kev phom sij, kev ua yeeb ncuab, los sis ua phooj ywg rau peb los xij—tag nrho tej no puav leej nyob hauv Vajtswv lub hwj chim kav, thiab tsis tas yuav txhawj los sis ntxhov siab dab tsi. Qhov no yog qhov kev xam pom uas tib neeg yuav tsum tuav thiab qhov kev paub uas lawv yuav tsum muaj, thiab kuj yog qhov tseeb uas lawv yuav tsum muaj thiab to taub. Thiab qhov no yog yam kev xam pom peb, uas muaj tseeb tias kuj yog qhov tseem ceeb tshaj plaws: Txawm peb yuav nyob qhov twg, nyob hauv lub teb chaws twg los xij, thiab tsis hais txog peb txoj kev muaj peev xwm los sis lub peev xwm li, peb tsuas yog ib feem ntawm cov neeg uas raug tsim tawm los uas tsis tseem ceeb xwb. Tib lub luag hauj lwm thiab tes dej num uas peb tsim nyog ua kom tiav ntawd ces yog zwm rau Tus Tswv Tsim lub hwj chim kav, kev npaj, thiab kev tswj hwm; tsis muaj lwm yam lawm, nws yooj yim li ntawd xwb. Txawm hais tias tam sim no peb nyob hauv ib lub teb chaws uas muaj kev ywj pheej thiab ib qho xwm txheej uas muaj kev ywj pheej los, yog muaj ib hnub Vajtswv tsa ib pab pawg ua yeeb ncuab los tsim txom thiab ua phem rau peb, peb yuav tsum tsis txhob muaj lus yws hlo li. Vim li cas peb yuav tsum tsis txhob muaj lus yws? Vim peb twb npaj txhij ntev los lawm; peb txoj hauj lwm, lub luag hauj lwm, thiab tes dej num ces yog zwm rau txhua yam uas Vajtswv ua thiab txhua yam uas Vajtswv npaj. Qhov kev zwm rau no puas yog qhov tseeb? Puas yog tus cwj pwm uas tib neeg yuav tsum muaj? (Yog.) Yog muaj ib hnub, tag nrho noob neej thiab tag nrho tej xwm txheej tig los tawm tsam peb, thiab peb ntsib txoj kev tuag, peb puas tsim nyog muaj lus yws? (Peb tsis tsim nyog.) Ib txhia hais tias, “Tsis yog Vajtswv coj peb tuaj rau txawv teb chaws kom peb tsis txhob raug Ntxwgnyoog txoj kev tsim txom uas lim haim ntxiv lawm lod? Tsis yog kom peb tuaj yeem ua tau peb tej dej num yam ywj pheej thiab ua pa ntawm cov huab cua uas ywj pheej lod? Yog li ntawd vim li cas Vajtswv tseem npaj kom peb ntsib txoj kev tuag?” Cov lus no tsis yog. Qhov zwm rau Vajtswv tej kev npaj thiab kev tswj hwm ntawd yog ib tug cwj pwm, tus cwj pwm uas tib neeg tsim nyog muaj rau Vajtswv, rau Vajtswv lub hwj chim kav. Nws yog tus cwj pwm uas ib tug neeg uas raug tsim tawm los tsim nyog muaj.

Kuj muaj lwm lub ntsiab lus tseem ceeb tshaj plaws uas tib neeg tsim nyog paub thiab: Txawm hais tias nyob txawv teb chaws yuav ruaj ntseg thiab muaj kev ywj pheej, los tseem nyuaj uas yuav zam kom dhau qhov kev thab plaub los ntawm tus zaj loj liab ploog tas li. Thaum ntsib tus zaj loj liab ploog txoj kev thab plaub, ib txhia txhawj hais tias: “Tus zaj loj liab ploog lub hwj chim loj dhau lawm. Nws muaj peev xwm siv nyiaj yuav cov neeg tseem ceeb hauv ntiaj teb los ua dej num txhawb thiab los ua hauj lwm rau nws. Yog li ntawd, txawm yog peb khiav mus rau txawv teb chaws los, peb yeej tseem muaj kev phom sij, tseem nyob hauv qhov phom sij uas yuav los txog ze ze no! Peb yuav ua li cas?” Txhua zaus hnov cov xov xwm no, ib txhia tib neeg txhawj thiab ntshai, xav tso tseg, xav khiav, tsis paub tias xyov yuav mus nkaum rau qhov twg. Thaum twg uas qhov no tshwm sim, ib txhia xav tias, “Lub ntiaj teb dav npaum li no, tiam sis tsis muaj chaw rau kuv nyob! Nyob hauv tus zaj loj liab ploog txoj kev tswj hwm, kuv raug nws tsim txom, thiab txawm nyob ciaj ciam sab nraud ntawm nws txoj kev tswj hwm, vim li cas kuv haj tseem raug nws cuam tshuam thiab? Tus zaj loj liab ploog lub zog loj dhau lawm; txawm kuv khiav mus txog qhov kawg ntawm lub ntiaj teb los, vim li cas nws tseem nrhiav tau kuv thiab?” Tib neeg tsis muaj txoj hau kev lawm tsuas yog ntshai heev thiab tsis paub xyov yuav ua li cas. Qhov no puas yog qhov kev qhia tshwm uas pom tau meej ntawm qhov muaj kev ntseeg? Qhov no yog teeb meem dab tsi? (Tsis muaj kev ntseeg rau Vajtswv.) Puas yog tsuas tsis muaj kev ntseeg rau Vajtswv xwb? Nej puas hnov tob tob hauv nej nruab siab tias nej qis tshaj lwm tus? Nej puas hnov tias qhov ntseeg Vajtswv Tus Uas Muaj Hwj Chim Loj Kawg Nkaus thiab ua nej tes dej num hauv pawg ntseeg ntawd mas zoo li zais ntshis, zoo li ua tub sab? Nej puas hnov tias nej qis dua cov uas nyob hauv lub ntiaj teb ntawm sab kab lis kev cai ntseeg me ntsis? “Saib lawv lub hwj chim seb; lawv muaj cov xib fwb uas raug cai thiab muaj cov tsev pe hawm loj uas tsoom fwv lees paub, zoo nkauj heev! Lawv muaj cov pab hu nkauj thiab kev lag luam nyob hauv ntau lub teb chaws. Tiam sis saib peb seb, pheej raug thab, raug ntxub ntxaug tsis hais peb mus qhov twg li—vim li cas peb hos txawv ntawm lawv? Vim li cas peb tsis kam qhia tab meeg txog qhov tias peb mus qhov twg? Vim li cas peb ua neej nyob thiaj li tsis tsim txiaj ua luaj? Tshwj xeeb tshaj mas yog, muaj txhua yam lus tsis zoo nyob os lais. Vim li cas lwm cov pawg ntseeg tsis raug tej no, vim li cas peb pheej yuav tsum raug tej no? Lwm cov ntseeg Vajtswv tsis hais mus txog qhov twg yeej qhia tawm tias lawv ntseeg Kev Ntseeg Vajtswv yam tab meeg, tiam sis peb cov uas ntseeg Vajtswv Tus Uas Muaj Hwj Chim Loj Kawg Nkaus tsis kam qhia qhib siab lug, ntshai tsam cov neeg phem yuav muab peb qhia tawm ces peb yuav raug ntes.” Thaum tsis ntev los no, Kuv hnov tias muaj ib tug neeg uas hais tias yog nom tswv ntawm tsoom fwv tau nug ob peb tug kwv tij thiab muam qee cov lus nug. Thaum pom tias yog ib tug nom tswv nug lawv, lawv cia li ntshai thiab qhia txhua yam uas lawv paub, teb txhua yam uas raug nug. Qhov lawv ua li no yog teeb meem dab tsi? Koj yog ib tug ntseeg Vajtswv—vim li cas koj thiaj li ntshai cov nom tswv? Yog koj tsis tau ua dab tsi txhaum cai, ces tsis tas yuav ntshai. Yog koj muaj qhov tseeb, vim li cas yuav ntshai cov dab phem thiab Ntxwgnyoog? Puas yog koj xav tias kev ntseeg Vajtswv tsis yog txoj hau kev yog lod? Koj xav tias koj tau ua ib yam dab tsi txhaum cai lawm lod? Yog li ntawd vim li cas koj thiaj li ntshai ib tug nom tswv? Cov neeg zoo li no tsis yog cov neeg ruam thiab tsis paub dab tsi li lod? Ib txhia tib neeg raug caum thiab raug tsim txom loj heev nyob hauv Teb Chaws Suav av loj; tom qab tuaj txog txawv teb chaws, lawv puas xav tias lawv ua txhaum uas ntseeg Vajtswv? Lawv puas xav tias poob ntsej muag vim tus zaj loj liab ploog txoj kev tsim txom? Lawv puas xav tias tsis muaj ntsej muag mus ntsib lawv cov poj koob yawm txwv thiab poob meej mom vim lawv raug yuam kom khiav mus txawv teb chaws mus ntseeg Vajtswv thiab ua lawv tes dej num? Lawv pom ntxwgnyoog txoj kev tswj hwm thiab lub ntiaj teb ntawm sab kab lis kev cai ntseeg ua yeeb ncuab rau Vajtswv thiab pawg ntseeg, thiab xav tias yus qis dua, tej zaum haj tseem poob ntsej muag tshaj qhov uas tau ua txhaum ib qho cai thiab? Nej puas muaj tej kev xav no? (Tsis muaj.) Tej zaum nej yuav co hau sab nraud xwb, tsis xav muaj tej kev xav thiab tej kev hnov no, tiam sis thaum ntsib cov xwm txheej tiag tiag lawm, ib tug neeg lub siab xav, lawv tus cwj pwm, thiab tej kev lawv ua yam tsis paub meej ntawd yeej yuav qhia qhov tob tshaj plaws, tej uas zais ntshis ntawm lawv lub siab tshaj plaws ntawd tshwm. Qhov no yog ua li cas? Yog koj tsis muaj tej no, vim li cas koj thiaj li ntshai? Ib tug neeg uas tsis tau ua txhaum cai puas ntshai tub ceev xwm? Puas ntshai tus kws txiav txim plaub ntug? Tsis ntshai. Tsuas yog cov uas tau ua txhaum cai xwb thiaj li ntshai tub ceev xwm tshaj plaws, thiab tsuas yog cov neeg Suav, uas twb swm qhov raug tub ceev xwm tsim txom lawm, thiaj li ntshai lawv tshaj plaws vim Tsoom Fwv Koom Tshas Suav cov tub ceev xwm tsis muaj kev cai thiab ua txhua yam uas lawv xav ua. Vim li ntawd, thaum cov neeg Suav nyuam qhuav tuaj txog txawv teb chaws, tsuas yog pom tub ceev xwm xwb los ua rau lawv ntshai lawm. Qhov no yog qhov tau los ntawm qhov ntshai tus zaj loj liab ploog txoj kev tswj hwm, nws yog qee yam uas nthuav tawm hauv lawv lub nruab siab. Nyob hauv cov teb chaws Sab Hnub Poob, koj txoj cai nyob ntawd yeej raug cai, koj muaj cai nyob, koj tsis tau ua txhaum ib txoj kev cai lij choj twg li, thiab koj tsis tau tawm tsam tsoom fwv, thiab koj tsis tau ua txhaum dab tsi li. Txawm koj txoj kev ntseeg yuav ua rau muaj kev sib cav ntau npaum li cas hauv lub ntiaj teb ntawm sab kab lis kev cai ntseeg los xij, muaj ib qho muaj tiag uas tseem muaj tseeb: Koj txoj kev ntseeg raug txoj kev cai lij choj tiv thaiv, raug cai thiab muaj kev ywj pheej, thiab qhov no yog txoj cai rau leej tib neeg uas koj tsim nyog muaj. Koj tsis tau ua txhaum ib txoj kev cai lij choj twg, yog li ntawd yog muaj ib tug neeg hais tias yog tub ceev xwm thiab nug tshuaj xyuas koj hais tias, “Koj puas yog ntseeg Vajtswv Tus Uas Muaj Hwj Chim Loj Kawg Nkaus? Muab koj daim ntawv qhia tias koj yog leej twg tiag tiag ntawd los rau kuv saib! Koj tuaj qhov twg tuaj? Koj muaj pes tsawg xyoo? Koj ntseeg Vajtswv los tau pes tsawg xyoo lawm? Koj nyob qhov twg? Qhia koj qhov chaw nyob rau kuv!” koj yuav teb li cas? Rau thawj lo lus nug, “Koj puas yog ntseeg Vajtswv Tus Uas Muaj Hwj Chim Loj Kawg Nkaus?” koj yuav teb li cas? (Yog.) Vim li cas nej thiaj li hais tias “yog”? Qhov no puas yog raws li qhov muaj tseeb? Los sis qhov no yog koj lub luag hauj lwm ntawm ib tug pej xeem, uas yog muaj neeg nug koj ces koj yuav tsum hais tias “yog”? Los sis yog Vajtswv tau qhia koj kom hais tias “yog”? Nej lub hauv paus yog dab tsi? Hais txog qhov ob uas lawv nug tias, “Muab koj daim ntawv qhia tias koj yog leej twg tiag tiag ntawd los rau kuv saib!” nej puas muab rau lawv saib? (Tsis muab.) Thiab kab lus nug peb: “Koj tsev nyob qhov twg? Sau koj qhov chaw nyob los.” Koj puas sau? (Tsis sau.) Kab lus nug plaub: “Koj ntseeg Vajtswv tau pes tsawg xyoo lawm? Leej twg qhia koj ntseeg? Vim li cas koj thiaj li ntseeg? Koj tuaj txawv teb chaws tau pes tsawg xyoo lawm?” Koj puas teb cov lus nug no? (Tsis teb.) Kab lus nug tsib: “Nyob ntawm no koj ua tes dej num dab tsi? Koj tus thawj coj yog leej twg?” Koj puas teb cov lus nug no? (Tsis teb.) Vim li cas tsis teb? (Kuv tsis muaj lub luag hauj lwm yuav tsum qhia rau lawv.) Yog li ntawd rov qab mus rau thawj kab lus nug: Yog raug nug hais tias koj puas yog ntseeg Vajtswv Tus Uas Muaj Hwj Chim Loj Kawg Nkaus, nej txhua tus puav leej teb ua ib lub suab hais tias nej yuav teb tias “yog.” Qhov teb li no puas yog? (Tsis yog.) Vim li cas tsis yog? (Vim kev ntseeg yog tib neeg txoj kev ywj pheej. Tub ceev xwm tsis muaj cai los cuam tshuam. Yog li ntawd, kuv muaj cai tsis qhia rau lawv.) Yog li ntawd vim li cas koj thiaj li tsis qhia rau lawv? (Vim kuv yuav tsum xub paub meej tias vim li cas lawv thiaj li nug kuv, lawv nug kuv hauv lub meej mom dab tsi, thiab seb lawv qhov kev nug ntawd puas raug cai los sis tsis raug cai. Yog lawv lub hom phiaj thiab qhov lawv yog leej twg tiag tiag ntawd tsis meej, ces kuv tsis tas yuav tsum teb lawv cov lus nug.) Cov lus no yog lawm. Thaum pib, nej txhua tus hais tias nej yuav teb tias “yog,” tiam sis thaum Kuv nug ntxiv, nej pib hnov tias muaj qee yam tsis yog lawm, xav tias nej cov lus teb tsis yog lawm. Nej puas nrhiav tau tias qhov teeb meem nyob qhov twg lawm? Nyob rau hauv qhov teeb meem no, nej yuav tsum muaj kev to taub li no tias: Peb tsis tau ua txhaum ib txoj kev cai lij choj twg los ntawm qhov ntseeg Vajtswv, peb tsis yog cov neeg ua txhaum cai, peb muaj leej tib neeg txoj cai thiab kev ywj pheej ntawm peb. Tsis yog leej twg los xij xav nug xyuas los sis nug peb los nug tau li. Tsis yog hais tias leej twg nug cov lus nug rau peb, ces peb yuav tsum teb raws li qhov tseeb; peb tsis muaj lub luag hauj lwm uas yuav tsum ua li no. Cov lus no puas yog? (Yog.) Tsis hais leej twg los xij, qhov nug peb yam tsis muaj laj thawj ntawd yog qhov txhaum cai; peb yuav tsum to taub txoj kev cai lij choj thiab kawm kom paub siv txoj kev cai lij choj los tiv thaiv peb tus kheej. Qhov no yog qhov kev txawj ntse uas cov neeg Vajtswv xaiv tseg yuav tsum muaj. Yog li ntawd, yav tom ntej yog koj ntsib ib qho xwm txheej zoo li no koj yuav tsum ua li cas? Yog muaj neeg nug koj hais tias koj puas yog ntseeg Vajtswv Tus Uas Muaj Hwj Chim Loj Kawg Nkaus, koj yuav teb li cas, koj yuav saib xyuas li cas? Thawj lo lus uas koj hais yog, “Koj yog leej twg? Koj muaj cai dab tsi los nug kuv li no? Kuv puas paub koj?” Yog lawv hais tias lawv yog ib tug neeg ua hauj lwm ntawm tsoom fwv ib lub koom haum, ces koj yuav tsum hais kom lawv qhia lawv daim ntawv pov thawj. Yog lawv tsis qhia lawv daim ntawv pov thawj, koj hais tias, “Koj tsis muaj cai los nrog kuv hais lus, thiab kuv tsis tas yuav tsum teb koj. Muaj ntau tus neeg ua hauj lwm hauv tsoom fwv; kuv yuav tsum teb lawv txhua tus lod? Tsoom fwv tau teeb tsa tib neeg los saib xyuas qee yam hauj lwm—koj puas yog tus uas saib xyuas qhov hauj lwm no tiag? Txawm koj yog los xij, kuv tsis tau ua txhaum cai, yog li ntawd vim li cas kuv yuav tsum teb koj? Vim li cas kuv yuav tsum qhia txhua yam rau koj? Yog koj xav tias kuv tau ua ib yam dab tsi tsis yog thiab ua txhaum cai, ces koj tuaj yeem qhia cov pov thawj tawm los. Tiam sis yog koj xav kom kuv teb koj cov lus nug, ces mus nrog kuv tus kws lij choj tham. Kuv tsis muaj lub luag hauj lwm yuav tsum teb koj, thiab koj tsis muaj cai nug!” Txoj kev teb no zoo li cas? Qhov no puas qhia tias muaj meej mom? (Yog.) Yog li ntawd nej cov lus teb qhia dab tsi? Qhov no puas qhia tias muaj meej mom? (Tsis muaj.) Qhov teb raws li nej txoj kev ntawd mas qhia tias tsis paub txog txoj kev cai lij choj li. Koj teb txhua yam uas lwm tus nug, thiab thaum kawg muaj dab tsi tshwm sim? Koj dhau los ua ib tug Yudas. Nej tuaj yeem teb yam tsis xyuam xim, thiab qhov ntawd muaj ib qho laj thawj: Cov tib neeg nyob hauv lub teb chaws ntawm tus zaj loj liab ploog tau raug qhia thiab ntxuav hlwb kom xav tias cov ntseeg Vajtswv yog cov neeg tsis paub dab tsi, cov neeg qis, thiab raug lub teb chaws tsim txom, tias nyob hauv lub teb chaws no lawv yuav tsum ua neej nyob yam tsis muaj txoj cai rau leej tib neeg los sis meej mom; vim li ntawd, cov ntseeg muab lawv tus kheej tso rau hauv qhov chaw qis dua. Tom qab tuaj txog cov teb chaws Sab Hnub Poob, lawv tsis to taub tej yam xws li txoj cai rau leej tib neeg yog dab tsi, meej mom yog dab tsi, los sis lub luag hauj lwm ntawm ib tug pej xeem yog dab tsi. Yog li ntawd, thaum muaj neeg nug hais tias koj puas ntseeg Vajtswv, koj maj nroos lees vim ntshai, qhia txhua yam uas koj paub rau lawv thiab tsis muaj lub siab ntseeg me me li. Tag nrho tej no yog leej twg ua rau tshwm sim? Qhov ntawd yog tus zaj loj liab ploog txoj kev qhia thiab kev tswj hwm uas ua rau tshwm sim. Nyob tob tob rau hauv txhua tus neeg hauv Teb Chaws Suav av loj nruab siab mas, muaj ib lub tswv yim hais tias thaum koj ntseeg Vajtswv lawm, koj muaj lub meej mom qis tshaj plaws hauv lub zej zog no, hauv ntiaj teb noob neej no; koj dhau los ua tus uas tawm ntawm lub zej zog thiab ntiaj teb noob neej mus lawm. Yog li ntawd, cov tib neeg no tsis muaj meej mom, tsis muaj leej tib neeg txoj cai, thiab tsis muaj kev paub tiv thaiv lawv tus kheej; lawv ruam, tsis paub dab tsi, thiab tsis muaj kev pom, cia lwm tus thab thiab tswj lawv raws li lwm tus siab nyiam. Qhov no yog nej txoj kev xav. Tsis tas hais txog qhov sawv khov kho hauv nej cov lus tim khawv rau Vajtswv li, koj muab Nws muag tau txhua lub sij hawm, dhau los ua ib tug Yudas tau txhua lub sij hawm. Yog li ntawd, koj yuav ua li cas thiaj li muaj meej mom? Koj yuav teb ib tug neeg txawv ntsej muag uas nug koj ntau qhov lus nug li cas? Ua ntej, nug hais tias lawv yog leej twg, tom qab ntawd hais kom lawv qhia lawv daim ntawv pov thawj. Qhov no yog txheej txheem ntawm txoj kev cai lij choj uas yog. Nyob hauv cov teb chaws Sab Hnub Poob, tub ceev xwm los sis lwm tus neeg ua hauj lwm hauv nom tswv, thaum nrog cov pej xeem sib tham raws li cov neeg sawv cev ua hauj lwm rau tsoom fwv, ib txwm qhia lawv daim ntawv pov thawj ua ntej. Tom qab paub tseeb tias lawv yog leej twg tiag tiag raws li lawv daim ntawv pov thawj lawm, koj mam li txiav txim siab tias yuav teb lawv cov lus nug li cas los sis yuav saib xyuas lawv tej kev cheem tsum rau koj ntawd li cas. Muaj tseeb tias, nyob rau hauv qhov xwm txheej no, koj yeej muaj chaw rau txoj kev xaiv, koj yeej muaj kev ywj pheej rau kev txiav txim siab tiag, koj tsis yog ib tug me nyuam roj hmab. Txawm hais tias koj yog neeg Suav thiab yog ib tug tswv cuab ntawm Pawg Ntseeg ntawm Vajtswv Tus Uas Muaj Hwj Chim Loj Kawg Nkaus, koj kuj yog ib tug tswv cuab uas raug cai thiab raug lees paub ntawm lub teb chaws uas koj nyob thiab. Tsis txhob hnov qab tias koj muaj kev ywj pheej rau kev txiav txim siab; koj tsis yog ib tug qhev los sis ib tug neeg raug txim ntawm ib lub teb chaws twg, koj yog ib tug neeg uas xyiv fab tau rau kev cai lij choj, leej tib neeg txoj kev muaj cai, thiab cov txheej txheem ntawm lub teb chaws no.

Raws li cov ntsiab lus uas Kuv tau qhia lawm ntawd, nej yuav tsum tim ntsej muag nrog tej xwm txheej uas tshwm sim kiag tam sid thiab tej xwm txheej uas xav tsis txog ntawd li cas? Qhov no yog lub ntsiab lus plaub uas peb yuav sib qhia—tsis txhob ntshai. Ib txhia neeg nug hais tias, “Qhov tsis ntshai ntawd puas txhais hais tias ua siab tawv yam ruam?” Tsis yog, qhov tsis ntshai ntawd txhais hais tias tsis ntshai ib lub hwj chim twg vim peb tsis yog neeg ua txhaum cai, peb tsis yog qhev; peb yog cov neeg Vajtswv xaiv tseg uas muaj meej mom, yog cov neeg raug tsim tawm los uas muaj meej mom nyob hauv tus Tswv Tsim lub hwj chim kav. Nyob rau hauv txoj kev uas koj coj rau qhov teeb meem no, qhov tseem ceeb tshaj plaws, tsis txhob ntshai; ntxiv rau qhov ntawd, yuav tsum kub siab lug tiv thaiv koj tes dej num thiab qhov chaw uas koj ua koj tes dej num, thiab kuj yuav tsum siv tus cwj pwm uas nquag plias los ntsib ntau yam xwm txheej thiab cov lus hais, tej kev ua, thiab lwm yam ntawm ntau lub hwj chim uas tsom ntsoov rau peb. Ntsib tej ntawd yam nquag plias thiab tsis ntshai—nej xav li cas txog tus cwj pwm no? (Zoo.) Ua neej nyob zoo li no muaj meej mom, zoo li ib tug neeg; tsis yog ua neej nyob kom dhau hnub dhau hmo yam tsis muaj meej mom xwb. Peb tuaj rau txawv teb chaws ua peb tes dej num, tsis yog tuaj nrhiav mov noj los sis nrhiav noj nrhiav haus kom dhau hnub dhau hmo xwb; peb tsis tau ua txhaum cai, tsis tau tsim teeb meem rau ib lub teb chaws twg, thiab peb yeej tsis yog qhev rau ib lub teb chaws twg thiab. Peb tab tom ua cov neeg uas raug tsim tawm los tes dej num nyob hauv Vajtswv lub tsev; peb yug peb tus kheej, tsis vam khom lwm tus; qhov no raug cai tag nrho.

Ntawm plaub lub ntsiab lus uas peb nyuam qhuav tham txog ntawd, txhua lub puav leej tseem ceeb heev. Lub ntsiab lus ib yog dab tsi? (Tsis hais nyob txawv teb chaws los sis hauv Teb Chaws Suav, qhov uas tib neeg muab tag nrho lawv lub siab lub cev fij rau Vajtswv thiab ua lawv tej dej num yog txoj hauj lwm ncaj ncees tshaj plaws hauv tib neeg ntiaj teb txij puag thaum ub los txog tam sim no. Tes dej num uas peb ua ntawd mas yog ua tab meeg thiab ncaj ncees, tsis yog ua zais ntshis, vim yam uas peb tab tom ua tam sim no yog txoj hauj lwm ncaj ncees tshaj plaws rau tib neeg ntiaj teb.) Thiab yam ob? (Vajtswv muaj hwj chim kav txhua yam thiab txhua qhov xwm txheej. Txhua yam, nrog rau cov tswj hwm hauv ntiaj teb thiab txhua lub hwj chim hauv ntiaj teb puav leej nyob hauv Vajtswv txhais tes lub hwj chim kav thiab kev tswj—tsis muaj leej twg tswj tau lawv tus kheej txoj hmoo. Peb los yeej ib yam; peb txoj hmoo nyob hauv qab lub hwj chim kav thiab kev tswj hwm ntawm Vajtswv ob txhais tes, thiab tsis muaj leej twg hloov tau txoj kev uas peb mus thiab qhov chaw peb nyob. Txoj kev tswj hwm thiab txheej txheem ntawm tus tswj hwm hauv lub teb chaws uas peb nyob zoo li cas, qhov chaw ib puag ncig nyob hauv lub teb chaws no zoo li cas, thiab seb lawv hem, ua yeeb ncuab, los sis ua phooj ywg rau peb ntawd—tag nrho tej no puav leej nyob hauv Vajtswv lub hwj chim kav, thiab peb tsis tas yuav txhawj los sis ntxhov siab dab tsi.) Lub ntsiab lus peb? (Txawm peb yuav nyob qhov twg thiab tsis hais txog peb txoj kev muaj peev xwm los sis lub peev xwm li, peb tsuas yog ib feem ntawm cov neeg raug tsim tawm los uas tsis tseem ceeb xwb. Tib lub luag hauj lwm thiab tes dej num uas peb tsim nyog ua kom tiav ntawd ces yog zwm rau tus Tswv Tsim lub hwj chim kav, kev npaj, thiab kev tswj hwm. Txawm hais tias tam sim no peb nyob hauv ib lub teb chaws uas muaj kev ywj pheej, yog muaj ib hnub Vajtswv tsa ib pab pawg ua yeeb ncuab los tsim txom thiab ua phem rau peb, peb yuav tsum tsis txhob muaj lus yws hlo li. Qhov no yog vim peb txoj hauj lwm, lub luag hauj lwm, thiab tes dej num ces yog zwm rau txhua yam uas Vajtswv ua thiab txhua yam uas Vajtswv npaj.) Lub ntsiab lus plaub yog ntsib txhua tus neeg, tej xwm txheej, thiab tej yam khoom sab nraud yam nquag plias, yam tsis muaj kev ntshai. Plaub lub ntsiab lus no yog tus cwj pwm thiab kev paub uas txhua tus uas ua lawv tes dej num tsim nyog muaj, thiab kuj yog qhov tseeb uas txhua tus uas ua lawv tes dej num tsim nyog to taub. Txawm hais tias plaub lub ntsiab lus no tsis tshua muaj feem xyuam txog cov thawj coj thiab cov neeg ua hauj lwm lub luag hauj lwm yim uas tau sib qhia hnub no, vim peb tab tom tham txog tej kev nyuaj hauv kev ua tes hauj lwm, peb thiaj li tsim nyog hais txog cov ntsiab lus no; qhov ntawd tsis yog hais yam tsis muaj qab hau.

C. Tej Hauv Paus Ntsiab Lus Uas Yuav Tsum Xyaum Ua Raws Thaum Ntsib Tej Kev Nyuaj

Qee cov thawj coj thiab cov neeg ua hauj lwm ntsib tej teeb meem uas nyuaj daws nyob rau hauv tej hauj lwm sab nraud thiab thaum kawg tsis paub yuav ua li cas, pom tsis tshab tias lub hauv paus ntawm qhov teeb meem nyob qhov twg, thiab tsis paub tias yuav coj rau qhov teeb meem ntawd li cas. Lawv cia li tsis quav ntsej, ua rau qhov teeb meem ntawd qeeb. Qhov teeb meem no yog dab tsi? Nws yog cov thawj coj cuav uas ua tsis tau tes hauj lwm thiab tsuas ua rau tej yam qeeb xwb. Cov thawj coj cuav tsis muaj qhov laj thawj ntawm tus tib neeg li ib txwm muaj; vim lawv daws tsis tau teeb meem, ua cas lawv tsis qhia tawm rau tus Nyob Saud? Yog koj qhia ib qho teeb meem tawm rau tus Nyob Saud, peb tuaj yeem ntsib mus ua ke, thiab thaum kawg yuav daws tau qhov teeb meem ntawd. Muaj qee yam uas nej pom tsis tshab; Kuv yuav pab nej soj ntsuam tej ntawd. Tsuav peb tsis ua txhaum txoj cai lij choj los sis tsis ua txhaum tsoom fwv tej kev cai tswj xwb, yeej tsis muaj teeb meem loj uas kov tsis yeej li. Rau cov teeb meem uas muaj feem xyuam rau qhov tseeb tej hauv paus ntsiab lus, peb daws peb xwb; rau cov teeb meem uas muaj feem xyuam rau txoj cai lij choj, peb mam li nrhiav tswv yim ntawm sab kev cai los pab thiab daws tej ntawd los ntawm txoj kev cai. Tsis hais tej hwj chim phem twg uas txhob txwm cuam tshuam thiab rhuav tshem Vajtswv lub tsev tes hauj lwm, nco ntsoov ib yam: Tsuav peb tsis ua txhaum txoj cai lij choj los sis tsis ua txhaum tsoom fwv tej kev cai tswj xwb, tsis muaj leej twg ua tau li cas rau peb li. Qhov no yog vim hais tias feem ntau ntawm cov teb chaws uas txawv teb chaws ntawd yog cov teb chaws uas tswj los ntawm cov pej xeem thiab tswj los ntawm txoj cai lij choj; txawm hais tias cov hwj chim phem ua txhaum txoj cai lij choj los xij, lawv kuj ntshai tsam raug nthuav tawm thiab raug txoj cai rau txim thiab. Qhov no yog qhov tseeb. Tsis hais tus zaj loj liab ploog txhais tes dub cuam tshuam thiab rhuav tshem Vajtswv lub tsev tes hauj lwm li cas, los sis thab peb lub neej txhua hnub, los sis ntiav qee tus los ua tej yam phem, peb yuav tsum yees duab thiab yees cov yeeb yaj kiab tiag tiag, ua tib zoo sau cia kom yog, thiab sau lub sij hawm, qhov chaw, thiab cov neeg uas muaj feem xyuam kom meej. Thaum txog lub sij hawm uas tsim nyog, peb yuav daws qhov ntawd los ntawm txoj cai, thiab peb tsis tas yuav ntshai nws li. Txawm hais tias tus zaj loj liab ploog txoj kev tsim txom vwm npaum li cas los xij, peb tsis ntshai nws vim Vajtswv yog tus txhawb peb, thiab muaj ib hnub Vajtswv yuav tso tej kev puas tsuaj los rhuav tshem nws, Vajtswv yuav pauj rau nws ncaj qha, thiab peb tsis tas yuav ua dab tsi li. Qee zaus nej pom tsis tshab txog qee cov teeb meem; yog li ntawd, nej yuav tsum ceev nrooj qhia tawm rau tus Nyob Saud, thiab tus Nyob Saud yuav qhia ib txoj hau kev rau nej, ua rau tej yam loj dhau los ua tej yam me thiab tej yam me raug daws. Qhov tseeb tiag, rau ntau qhov teeb meem mas, nej tsis paub tias yuav soj ntsuam li cas thiab pom tsis tshab txog lub ntsiab tseeb, thiab xav tias qhov xwm txheej ntawd loj thiab hnyav, tiam sis tom qab tus Nyob Saud soj ntsuam tag lawm, nej yuav paub tias qhov ntawd tsis muaj dab tsi hlo li; tsis muaj dab tsi yuav ntshai thiab tsis muaj dab tsi tseem ceeb—tsuas yog tsis txhob quav ntsej xwb, ces qhov ntawd yuav ploj mus tom qab ib ntus. Cov hwj chim phem txoj kev cuam tshuam tsis tuaj yeem ua rau muaj kev kub ntxhov loj; lawv ntshai tshaj plaws tsam raug nthuav tawm rau sawv daws paub tshaj plaws, yog li ntawd lawv tsis muaj cuab kav hla tus ciam. Yog muaj ob peb leej neeg ruam muaj cuab kav hla tej ciam, peb daws tau qhov ntawd raws li txoj cai, siv txoj cai los saib xyuas. Qhov no yog qee yam uas txhua tus thawj coj thiab neeg ua hauj lwm yuav tsum pom kom tshab. Tsis hais nej ntsib qhov xwm txheej zoo li cas, nej yuav tsum tsis txhob feeb tsis meej los sis tsis txhob ruam kiag li. Yog koj pom tsis tshab ib qho xwm txheej los sis saib xyuas tsis tau qhov xwm txheej ntawd, ces koj yuav tsum qhia tawm ceev nrooj mus lawm saud es cia tus Nyob Saud muab tswv yim thiab tej hau kev zoo rau koj. Qhov uas ntshai tiag tsuas yog cov thawj coj cuav pom tsis tshab txog tej teeb meem los sis daws tsis tau tiam sis tsis qhia tawm rau tus Nyob Saud los sis tsis ceeb toom rau tus Nyob Saud paub txog tej ntawd; lawv tos kom txog thaum qhov xwm txheej loj tuaj thiab ua rau tes hauj lwm qeeb lawm mam li qhia tawm rau tus Nyob Saud, tej zaum yuav plam lub sij hawm zoo tshaj plaws los daws qhov teeb meem ntawd lawm. Qhov ntawd zoo ib yam li tus neeg uas muaj khee xaws tiam sis tsis mus tshuaj xyuas los sis tsis kho kom ncav sij hawm, tsuas mus rau tim tsev kho mob thaum tus mob ntawd twb loj heev lawm xwb, tiam sis thaum ntawd lig dhau lawm thiab lawv tsuas tos tuag lawm xwb. Yog li ntawd, cov thawj coj cuav yog cov uas ua rau tej yam hauv lawv tes hauj lwm qeeb tshaj plaws. Cov thawj coj cuav mas ruam heev li, lawv yog cov neeg qias, tsis ris lub luag hauj lwm thiab tsis tiv thaiv Vajtswv lub tsev tes hauj lwm. Vim li cas thiaj li hais tias cov thawj coj cuav yog cov neeg qias, cov neeg uas coj kev puas tsuaj los, cov neeg ruam uas tsis muaj laj thawj tshaj plaws? Yog vim li ntawd ntag. Txhua tus thawj coj cuav uas lub peev xwm tsis zoo kiag li uas lawv twb saib xyuas tsis tau tej yam sab nraud ntawd yuav tsum muab lawv rho tawm thiab tshem tawm kom sai, tsis txhob siv dua li lawm, kom tiv thaiv tsis pub ua rau Vajtswv lub tsev tes hauj lwm qeeb ntxiv. Cov thawj coj cuav tes hauj lwm yog qhov uas ua rau qeeb tshaj plaws. Feem ntau mas, thaum muaj ib qho teeb meem tshwm tuaj, yeej daws tau qhov teeb meem ntawd los ntawm txoj kev sab laj nrog txhua tus raws sij hawm; tib qho uas txhawj ces yog tsam tus thawj coj cuav uas saib xyuas ntawd ruam, thiab lawv tsis muaj peev xwm daws qhov teeb meem ntawd ntawm lawv tus kheej tiam sis tsis sib tham nrog pawg txiav txim siab los sis qhia tawm rau tus Nyob Saud, thiab lawv siv tus cwj pwm uas tsis quav ntsej, npog thiab tsuj qhov teeb meem ntawd cia—qhov no yog qhov uas ua rau tej yam qeeb tshaj plaws. Yog qhov teeb meem raug ncua ntev thiab tej xwm txheej hloov, ces tej zaum yuav ua rau poob txoj cai tswj los daws qhov teeb meem ntawd, ua rau raug thawb mus raws ib qho xwm txheej xwb. Qhov no ua pov thawj qhia dab tsi? Qee yam ua qeeb tsis tau thiab yuav tsum tau daws tam sim ntawd, thaum thawj lub sij hawm. Tiam sis, cov thawj coj cuav tsis paub txog qhov no, yog li ntawd cov tib neeg uas lub peev xwm tsis zoo kiag li ntawd thiaj li yuav tsum tsis txhob ua thawj coj kiag li. Cov thawj coj cuav tsuas paub hais qee cov lus thiab cov kev qhuab qhia xwb thiab daws tsis tau ib qho teeb meem tiag tiag li; lawv tsuas yog ua phem rau tib neeg los sis ua rau tej yam qeeb xwb. Tsuas yog muab cov thawj coj cuav no rho tawm thiab xaiv cov tib neeg uas muaj lub nra thiab muaj lub siab ris lub luag hauj lwm los ua cov thawj coj thiab cov neeg ua hauj lwm xwb mas pawg ntseeg tes hauj lwm thiaj li yuav mus tau zoo li ib txwm. Tsis hais ntsib teeb meem dab tsi, tsuav koj muaj peev xwm nrhiav qhov tseeb xwb, ces yeej muaj txoj hau kev daws. Tej yam sab nraud thiab tej kev cuam tshuam uas tshwm los ntawm tus zaj loj liab ploog ntawd tuaj yeem daws tau los ntawm txoj cai thaum tsim nyog, qhov ntawd tsis yog yam loj dab tsi. Tsuav yog peb tsis ua txhaum txoj cai lij choj los sis tsis ua txhaum tsoom fwv tej kev cai tswj xwb, tsis muaj leej twg ua tau li cas rau peb li, thiab nrog rau txoj kev ntseeg no, peb tsis tas yuav ntshai txhua yam kev cuam tshuam los ntawm Ntxwgnyoog los sis cov dab phem lawm.

Tam sim no, qhov teeb meem ntawm cov thawj coj cuav yuav tsum tau muab soj ntsuam thiab to taub. Qhov no tseem ceeb heev rau kev ua tes hauj lwm ntawm pawg ntseeg kom zoo! Cia peb sib qhia txog qhov hais tias vim li cas cov thawj coj cuav tseem tsis qhia tawm rau tus Nyob Saud, thaum ntsib tej teeb meem uas lawv daws tsis tau ntawm lawv tus kheej. Peb yuav tsum saib qhov no li cas? Nej txhua tus tuaj yeem soj ntsuam qhov no thiab tau txais txiaj ntsim los ntawm qhov ua li ntawd. Qhov teeb meem ntawm cov thawj coj cuav uas tsis ua hauj lwm tiag tiag ntawd twb loj heev lawm, tiam sis haj tseem muaj ib qho teeb meem uas loj dua thiab: Thaum pawg ntseeg raug kev cuam tshuam los ntawm cov neeg phem thiab cov tawm tsam khetos, cov thawj coj cuav tsis yog tsis daws xwb; qhov phem tshaj ntawd yog lawv kuj tsis qhia tawm rau tus Nyob Saud thiab, cia cov neeg phem thiab cov tawm tsam khetos cuam tshuam pawg ntseeg—lawv tsuas tuaj sab nraud saib yam tsis muaj teeb meem li xwb, tsis ua rau leej twg chim li. Tsis hais tes hauj lwm ntawm pawg ntseeg raug cuam tshuam mus txog qib twg los, cov thawj coj cuav tsis quav ntsej li. Qhov no yog teeb meem dab tsi? Cov thawj coj cuav zoo li no puas yog tsis muaj kev coj ncaj kiag li? Tsuas yog qhov muaj tseeb no xwb twb txaus ntiab cov thawj coj cuav zoo li no tawm lawm. Cov thawj coj cuav uas cia cov neeg phem thiab cov tawm tsam khetos cuam tshuam pawg ntseeg yam ywj siab ntawd mas cuag nkaus li muab pawg ntseeg thiab cov neeg Vajtswv xaiv tseg cob rau cov neeg phem thiab cov tawm tsam khetos no, qhov no yog ua ib qho kev tiv thaiv rau cov neeg phem thiab cov tawm tsam khetos. Qhov no coj kev puas tsuaj loj dhau los rau pawg ntseeg tes hauj lwm! Tsuas yog los ntawm tib yam no xwb, lo lus nug tsis yog hais tias cov thawj coj cuav puas tsim nyog raug rho tawm, tiam sis yog hais tias lawv puas tsim nyog raug ntsaig tawm mus. Qhov cov thawj coj cuav tsis ua tes hauj lwm tiag tiag thiab qhov cov thawj coj cuav cia cov neeg phem thiab cov tawm tsam khetos cuam tshuam pawg ntseeg ntawd, qhov twg hnyav dua? Qhov tsis ua tes hauj lwm tiag tiag tuaj yeem cuam tshuam rau cov neeg Vajtswv xaiv tseg txoj kev nkag mus rau hauv lub neej txoj sia thiab kev nce qib ntawm pawg ntseeg tes hauj lwm; qhov no twb ua rau tej yam tseem ceeb qeeb lawm. Txawm li cas los xij, thaum cov thawj coj cuav cia cov neeg phem thiab cov tawm tsam khetos cuam tshuam pawg ntseeg yam ywj siab, yam tsis nrhiav txoj hau kev daws los sis tsis qhia tawm rau tus Nyob Saud, qhov tshwm sim los yuav yog yam uas xav tsis txog li. Yam tsawg tshaj plaws mas, lub neej hauv pawg ntseeg raug cov neeg phem thiab cov tawm tsam khetos ua rau ntxhov quav niab thiab tsis muaj paus muaj ntsis, thiab ntxiv rau qhov ntawd, pawg ntseeg tes hauj lwm raug ua kom puas thiab nres mus tsis taus. Qhov no tsis cuam tshuam ncaj qha rau kev nthuav tes hauj lwm tshaj moo zoo kom dav lod? Qhov tshwm sim los no mas yeej loj tiag tiag li! Yog li ntawd, yog cov thawj coj cuav ua qhov yuam kev no, ces lawv yuav tsum raug ntiab tawm. Ntau tus thawj coj thiab neeg ua hauj lwm pheej muaj kev xav thiab kev xav phem uas sib txawv txog qhov qhia tej teeb meem tawm rau tus Nyob Saud. Ib txhia hais tias, “Txawm qhia tej teeb meem tawm rau tus Nyob Saud los tej zaum yuav daws tsis tau.” Qhov no yog lus tsis muaj qab hau! Koj cov lus tias “tej zaum yuav daws tsis tau” ntawd txhais li cas? Vim koj daws tsis tau tsis txhais hais tias tus Nyob Saud daws tsis tau. Yog tus Nyob Saud muab ib txoj hau kev rau koj, ces feem ntau yeej daws tau qhov teeb meem ntawd tiag tiag li; yog tus Nyob Saud tsis muab ib txoj hau kev rau koj, ces koj yuav tsis muaj hau kev. Koj pom tsis tshab txog qhov teeb meem me me no li; koj khav theeb thiab qhuas tias koj tus kheej coj ncaj dhau lawm! Ib txhia kuj hais tias, “Thaum peb ntsib tej kev nyuaj los sis tej teeb meem, peb yuav tsum xav ob peb hnub ua ntej tso, thiab tsuas qhia tawm yog peb nrhiav tsis tau txoj hau kev daws tiag tiag lawm xwb.” Tej zaum mloog zoo li cov uas hais li no muaj laj thawj, tiam sis ob peb hnub uas xav ntawd yuav tsis ua rau hauj lwm qeeb lod? Koj puas ntseeg siab tau tias ob peb hnub uas xav ntawd yuav daws tau qhov teeb meem? Koj puas paub tseeb tias ob peb hnub uas xav ntawd yuav tsis ua rau qeeb ntxiv? Lwm tus hais tias, “Yog peb qhia ib qho teeb meem tawm kiag tam sim ntawd, tus Nyob Saud puas yuav xav tias qhov teeb meem me me no xwb peb twb pom tsis tshab? Tus Nyob Saud puas yuav hais tias peb ruam thiab tsis paub dab tsi es ntuas peb?” Lawv hais li no tsis yog lawm—tsis hais koj qhia tawm qhov teeb meem los sis tsis qhia tawm, koj lub peev xwm zoo li cas ntawd twb pom tseeb lawm; tus Nyob Saud paub tag nrho. Koj puas xav tias tus Nyob Saud yuav saib koj siab yog koj tsis qhia qee qhov teeb meem tawm? Yog koj qhia qhov teeb meem tawm, es tsis ua rau tej yam tseem ceeb qeeb, ces Vajtswv lub tsev yuav tsis suav txim rau koj. Txawm li cas los xij, yog koj tsis qhia qhov teeb meem ntawd tawm es ua rau qeeb lawm, ces yuav suav txim ncaj nqa rau koj, thiab koj yuav raug rho tawm tam sim ntawd, tsis muaj hnub siv dua li lawm. Cov neeg Vajtswv xaiv tseg kuj yuav pom tias koj tsis paub dab tsi, ruam, hlwb tsis zoo, thiab vwm, thiab lawv yuav ntxub koj thiab saib tsis taus koj mus ib txhis. Cov uas pheej ntshai tsam raug ntuas los sis raug tus Nyob Saud saib tsis taus vim qhia tej teeb meem tawm, ces lawv yog cov uas lub peev xwm tsis zoo thiab ruam tshaj plaws; yuav tsum raug rho tawm, tsis siv dua li lawm. Lub peev xwm tsis zoo npaum li ntawd thiab tseem xav kom tau ntsej muag—qhov ntawd tsis yog tsis paub txaj muag kiag li lod? Qhia Kuv seb, cov thawj coj cuav uas tsis yog ua lawv tes hauj lwm tsis zoo xwb tiam sis tseem ua rau tej yam tseem ceeb ntawd qeeb, puas ntxim ntxub? Lawv puas tsim nyog raug rho tawm? (Tsim nyog.) Yog ntsib ib qho teeb meem loj thiab lawv tuaj yeem qhia tawm tam sim ntawd yam tsis ua rau qeeb los sis tsis ua rau muaj qhov tshwm sim los hnyav, tsim nyog saib cov thawj coj zoo li no li cas? Yam tsawg tshaj plaws mas suav tau tias lawv muaj laj thawj thiab tuaj yeem tiv thaiv pawg ntseeg tes hauj lwm. Puas tsim nyog siv cov thawj coj zoo li no ntxiv? (Tsim nyog.) Tsuas yog cov thawj coj uas hlwb tsis zoo tshaj plaws xwb thiaj li tsis qhia teeb meem tawm vim ntshai tsam raug ntuas. Puas tseem siv tau cov thawj coj zoo li no nyob rau yav tom ntej? Kuv xav tias siv tsis tau lawm vim qhov siv lawv ua rau qeeb dhau lawm. Tam sim no, nej txhua tus tsim nyog pom tshab txog cov teeb meem zoo li no, puas yog? Thaum nej ntsib teeb meem uas nej daws tsis tau, ceev nrooj qhia tawm thiab sib qhia txog txoj hau kev daws nrog pawg txiav txim siab. Yog pawg txiav txim siab daws tsis tau, maj nroos qhia tawm rau tus Nyob Saud; tsis txhob txhawj txog qhov no los sis qhov tod, qhov tuaj yeem daws qhov teeb meem tam sim ntawd yog qhov tseem ceeb tshaj plaws. Qhov piv txwv uas nyuam qhuav hais ntawd tshwm tuaj hauv txhua lub pawg ntseeg; tej kev nyuaj thiab tej teeb meem no yeej yuav tshwm sim. Thaum piv rau qee qhov teeb meem sab hauv ntawm pawg ntseeg, cov teeb meem sab nraud no yuav muaj qhov tshwm sim los hnyav dua. Yog li ntawd, qhov nyuaj ntawm cov teeb meem sab nraud loj dua me ntsis thaum piv rau pawg ntseeg cov teeb meem sab hauv. Yog nej ntsib tej teeb meem sab nraud, nej yuav tsum ceev nrooj daws tej ntawd los ntawm kev sab laj los sis qhia tawm rau tus Nyob Saud; qhov no yog qhov uas yuav tsum ua. Tsuas yog xyaum ua raws li no xwb mas thiaj li tuaj yeem paub tseeb tias pawg ntseeg tes hauj lwm mus tau zoo li ib txwm thiab ua kom paub tseeb tias txoj kev nthuav lub nceeg vaj txoj moo zoo kom dav ntawd tsis raug thaiv. Peb txoj kev sib qhia txog tej hauv paus ntsiab lus ntawm kev daws pawg ntseeg cov teeb meem sab nraud muaj npaum li no xwb.

Nyob hauv txhua lub pawg ntseeg, muaj ib txhia tib neeg uas lub peev xwm tsis zoo, thiab lawv pheej ntsib kev nyuaj hauv kev ua lawv tej dej num tas li, txawm hais tias qhia qhov tseeb rau lawv npaum li cas los xij lawv nrhiav tsis tau tej hauv paus ntsiab lus ntawm txoj kev xyaum ua raws li, tsuas yog ua raws li tej kev cai tswj yam dig muag ntsuav yam tsis muaj txiaj ntsig tiag tiag li. Vim tej uas zoo li no, thiaj li yuav tsum muab cov tib neeg no tes dej num hloov. Qhov kev hloov no yog kev hloov cov neeg ua hauj lwm. Piv txwv li, muaj ib tug tib neeg uas raug muab faib ib txoj hauj lwm tseem ceeb, tiam sis lawv muaj qee cov teeb meem hauv lawv tes hauj lwm uas daws tsis tau txawm hais tias koj sib qhia nrog lawv npaum li cas los xij li. Koj pom tsis tshab txog lub ntsiab tseeb ntawm qhov teeb meem los sis seb tus neeg no puas tseem siv tau, thiab qhov soj ntsuam los sis kev sib qhia ntxiv los yeej tsis muaj txiaj ntsig. Txawm hais tias tus neeg no tsis ua rau tes hauj lwm qeeb ntau los xij, cov teeb meem tseem ceeb yeej daws tsis tau li, uas pheej ua rau koj tsis tshua kaj siab. Koj yuav tsum ua li cas thaum ntsib qhov no? Qhov no yog ib qho teeb meem tseem ceeb. Yog koj daws tsis tau ntawm koj tus kheej, koj yuav tsum muab coj mus rau hauv kev sib txoos ua ke ntawm cov thawj coj thiab cov neeg ua hauj lwm los sib qhia, soj ntsuam, thiab tshuaj xyuas kom meej. Yog thaum kawg sawv daws pom zoo ib yam, qhov teeb meem yuav daws tau lawm. Yog qhov xyaum ua raws li no daws tsis tau qhov teeb meem, thaum qhov teeb meem tseem ncua ntev mus, puas tuaj yeem ua rau tej yam tseem ceeb qeeb? Yog qhov ntawd ua tau, ces koj yuav tsum qhia tawm rau tus Nyob Saud thiab nrhiav txoj hau kev daws kom sai li sai tau. Muab hais luv luv tias, tsis hais koj ntsib kev paub tsis meej los sis kev nyuaj dab tsi hauv koj tes hauj lwm, tsuav tej ntawd tuaj yeem cuam tshuam rau cov neeg Vajtswv xaiv tseg nyob hauv kev ua lawv tej dej num los sis thaiv txoj kev nce qib ntawm pawg ntseeg tes hauj lwm, ces yuav tsum tau daws cov teeb meem ntawd tam sim ntawd. Yog koj tus kheej daws tsis tau ib qho teeb meem, koj yuav tsum nrhiav ob peb tug neeg uas to taub qhov tseeb los nrog daws. Yog qhov no tseem daws tsis tau thiab, ces koj yuav tsum muab qhov teeb meem coj los thiab qhia tawm rau tus Nyob Saud kom nrhiav tau txoj hau kev daws. Qhov no yog lub luag hauj lwm thiab txoj hauj lwm ntawm cov thawj coj thiab cov neeg ua hauj lwm. Cov thawj coj thiab cov neeg ua hauj lwm yuav tsum ua tib zoo saib rau txhua yam kev nyuaj los sis kev paub tsis meej uas lawv ntsib, tsis yog tom qab pom teeb meem los sis kev nyuaj es tsuas hais qee cov lus thiab cov kev qhuab qhia, qw cov lus tsis muaj ntsiab los txhawb cov kwv tij thiab cov muam zog, los sis ntuas lawv ces xav tias ua tiav lawm. Qee zaus qhov hais cov lus thiab cov kev qhuab qhia ntawd tej zaum yuav daws tau qee qhov teeb meem sab nraud, tiam sis thaum kawg yeej daws tsis tau lub hauv paus ntawm cov teeb meem. Cov teeb meem uas ntsig txog lub hauv paus, tej moj yam qias vuab tsuab, thiab tib neeg tej kev xav phem thiab tej kev xav hauv nruab siab ntawd yuav tsum tau daws los ntawm kev sib qhia qhov tseeb raws li Vajtswv cov lus. Kuj tseem muaj tib neeg tej kev nyuaj ntawm ntiag tug, tej teeb meem ib puag ncig, thiab tej teeb meem uas ntsig txog rau kev paub txog txoj hauj lwm uas cheem tsum rau kev ua tej dej num; cov teeb meem tiag tiag no puav leej cheem tsum kom cov thawj coj thiab cov neeg ua hauj lwm daws. Nyob hauv cov teeb meem no, txhua yam kev paub tsis meej thiab kev nyuaj uas cov thawj coj thiab cov neeg ua hauj lwm daws tsis tau ntawd tuaj yeem coj mus rau hauv kev sib txoos ua ke ntawm cov thawj coj thiab cov neeg ua hauj lwm kom soj ntsuam, tshuaj xyuas kom meej, thiab daws, los sis lawv tuaj yeem qhia tawm ncaj qha rau tus Nyob Saud kom nrhiav tau qhov tseeb los daws. Qhov no hu ua ua hauj lwm tiag tiag, thiab tsuas yog xyaum ua hauj lwm tiag tiag li no xwb mas tib neeg lub siab ntseeg thiaj li loj hlob tau thiab thiaj li ua tau lawv tej dej num zoo. Cov thawj coj thiab cov neeg ua hauj lwm, tsuav lawv muaj lub siab ris lub luag hauj lwm xwb, mas yuav pom teeb meem txhua lub sij hawm thiab txhua qhov chaw; muaj teeb meem uas lawv yuav tsum tau daws txhua hnub. Piv txwv li, Kuv nyuam qhuav hais txog ib qho xwm txheej uas muaj neeg nug tias koj puas yog ntseeg Vajtswv Tus Uas Muaj Hwj Chim Loj Kawg Nkaus, thiab nej puav leej paub tsis meej. Thaum pib, txhua tus hais tias lawv yuav teb tias “yog,” tiam sis tom qab ntawd ib txhia hais tias qhov teb li ntawd tsis yog, thiab lwm tus hais tias lawv tsis paub; muaj ntau yam lus teb. Thaum kawg, cov thawj coj thiab cov neeg ua hauj lwm los kuj paub tsis meej thiab, xav tias, “Qhov hais tias ‘tsis yog ntseeg’ Vajtswv Tus Uas Muaj Hwj Chim Loj Kawg Nkaus mas yog qhov tsis lees paub Vajtswv ntawm tib neeg xub ntiag, ces Vajtswv yuav tsis lees paub peb—tiam sis qhov tshwm sim los ntawm qhov hais tias ‘ntseeg’ Vajtswv Tus Uas Muaj Hwj Chim Loj Kawg Nkaus yuav yog dab tsi? Ob qho kev xaiv zoo li tsis yog li.” Cov thawj coj thiab cov neeg ua hauj lwm tsis paub tias yuav daws qhov no li cas thiab txiav txim siab tsis tau; yog li ntawd, thaum cov kwv tij thiab cov muam ntsib tej xwm txheej zoo li no dua, lawv tseem yuav tsis muaj tej kev xam pom thiab tus cwj pwm uas yog, thiab qhov teeb meem tseem tsis tau raug daws, ces txhais tau hais tias cov thawj coj thiab cov neeg ua hauj lwm tsis tau ua lawv tej luag hauj lwm kom tiav—lawv ua tsis tiav lawv tej luag hauj lwm. Qhov ua tsis tiav yus tej luag hauj lwm yog ib qho teeb meem ntawm kev txawj thiab lub peev xwm, tiam sis thaum tej teeb meem zoo li no tshwm tuaj lawm, koj yuav tsum ua li cas yog koj paub tias tej teeb meem ntawd tsis tau raug daws? Koj yuav tsum tsis txhob tsis quav ntsej tej teeb meem los sis tsuj qhov ntawd cia kom nws txias, cia txhua tus ua raws li lawv txoj kev ywj pheej thiab ua li lawv xav. Tiam sis, koj yuav tsum qhia tawm rau tus Nyob Saud, nrhiav tej kev ua thiab txoj hau kev xyaum ua raws uas tsim nyog nyob hauv tej xwm txheej zoo li no. Thaum kawg, yuav tsum ua kom txhua tus to taub tias Vajtswv tej kev npaj siab nyob hauv tej xwm txheej no yog dab tsi, tej hauv paus ntsiab lus twg uas tib neeg yuav tsum tuav, thiab tus cwj pwm thiab qhov chaw sawv twg uas lawv yuav tsum coj. Tom qab ntawd, thaum ntsib tej xwm txheej zoo li no dua nyob rau yav tom ntej, lawv yuav to taub qhov tseeb tej hauv paus ntsiab lus thiab muaj txoj hau kev xyaum ua raws lawm. Ua li no, ces cov thawj coj thiab cov neeg ua hauj lwm thiaj li ua lawv tej luag hauj lwm tiav lawm. Yog li ntawd vim li cas nej txhua tus thiaj li xub hais tias nej yuav teb tias “yog” thaum raug nug seb nej puas yog ntseeg Vajtswv Tus Uas Muaj Hwj Chim Loj Kawg Nkaus? Muaj ib qho laj thawj rau qhov no: Cov thawj coj thiab cov neeg ua hauj lwm yeej tsis tau sib qhia nrog nej txog kev daws tej teeb meem zoo li no li. Lawv suav tias tej no yog tej teeb meem me me uas txhua tus muaj lawv txoj kev to taub, uas txhua tus tuaj yeem to taub li lawv nyiam thiab xyaum ua raws li lawv pom tias tsim nyog. Vim li ntawd, thaum nej raug nug lo lus nug no, nej thiaj li muaj ntau yam lus teb. Yog li ntawd, tam sim no nej puas tau ib qho xaus lus txog qhov teeb meem no lawm? Yog muaj neeg nug koj tias koj puas yog ntseeg Vajtswv Tus Uas Muaj Hwj Chim Loj Kawg Nkaus no, koj yuav tsum ua li cas? Thawj yam, nug tias lawv yog leej twg. Yam ob, kom lawv qhia ntawv pov thawj. Yog lawv nug koj txog lwm yam ntaub ntawv ntawm koj ntiag tug, tsis txhob teb. Txawm hais tias lawv qhia ntawv pov thawj tawm los xij, koj tsis txhob qhia rau lawv, vim qhov no yog tej yam ntiag tug ntawm koj xwb. Koj ntseeg Vajtswv tau pes tsawg xyoo, leej twg tshaj tawm txoj moo zoo rau koj, koj tau ua koj tej dej num qhov twg, koj txoj kev ntseeg muaj zog npaum li cas, koj xaiv koj txoj kev yav tom ntej li cas, koj caum thiab tau txais qhov tseeb li cas—tej yam no muaj nuj nqis dhau rau peb lawm uas yuav tsis tuaj yeem lam tau lam qhia rau ib tug neeg txawv ntsej muag twg li. Lawv tsis muaj cai nug txog tej ntaub ntawv tseem ceeb zoo li no. Yog cov thawj coj thiab cov neeg ua hauj lwm daws tsis tau tej teeb meem zoo li no, lawv yuav tsum ceev nrooj qhia tawm rau tus Nyob Saud kom nrhiav tau txoj hau kev daws thiab nug txog txoj kev teb uas tsim nyog. Tus Nyob Saud yuav tsis luag koj; ntau tshaj plaws, yuav hais tias koj ruam dhau lawm xwb. Txawm li cas los xij, kev daws tau qhov teeb meem yog qhov txiaj ntsig uas zoo tshaj plaws.

Hnub no, hais txog cov thawj coj thiab cov neeg ua hauj lwm lub luag hauj lwm yim—qhia tawm thiab nrhiav kev los daws tej yam uas paub tsis meej thiab tej kev nyuaj uas ntsib nyob rau hauv tes hauj lwm ntawd kom ncav sij hawm—qhov tseem ceeb peb tau sib qhia txog tias kev paub tsis meej thiab kev nyuaj yog dab tsi, nrog rau cov thawj coj thiab cov neeg ua hauj lwm yuav tsum saib xyuas thiab daws tej teeb meem no li cas thaum lawv ntsib, thiab yuav tsum coj li cas rau tej yam no. Hais txog tej kev qhia tshwm uas pom tau meej ntawm cov thawj coj cuav zoo li cas thaum lawv ntsib tej teeb meem no, peb mam li hais txog cov ncauj lus ntawd hauv qhov kev sib qhia tom ntej.

Lub Peb Hlis Ntuj hnub tim 27, xyoo 2021